رواية تلميذ الجن الفصل الخمسون 50 بقلم جمال الحفني

 لجن العجوز قال بصوت واضح حازم, معاكم دقيقة لكل واحد فيكم يختار فيها التابع اللي هيحمل اسمه, الهمهمة زادت في القاعة وكل واحد بدأ يقارن الجن اللي معاه ببعض ويكلمهم وياخد رأيهم, وأنا كمان كنت براجع كل حاجه جوه عقلي, كنت محتار بين مرهوب وجرموق, الاتنين اتقدموا خطوة ناحيتي يعبروا بيها عن جاهزيتهم, كنت بفكر وشايف الجن اللي بيختاره كل منفذ وهو بيتقدم وينزل القاعة ويقف جمب العلم الخاص بيه, لحد ما جي الدور عليا والعجوز سألني هتختار مين..؟

في اللحظة دي طلعت الخاتم من جيبي واللي أخدته من الساحر اللي اتدفن حي, مكنتش ناوي استخدم الخاتم لنفسي, عشان كدا خليته معايا الفترة دي كلها, مديته ناحية شدام وعنيا في عين العجوز وقولتله اخترت شدام اللي أخد مني الخاتم ونزل السلالم ناحية الساحة ووقف تحت العلم المكتوب عليه اسمي..

فجأة المنفذ الأصغر مني واللي عرفت إنه منفذ اليونان, وقف وهو بيحتج على اللي حصل وشاور ناحيتي وقال دا غش وقبل ما يكمل كلامه راح العجوز رفع إيده وقاطعه وقال "منفذ مصر لم يخالف القانون, تقدروا تسلّحوا تابعينكم زي مانتوا عاوزين" لكن للأسف الجملة كانت متأخرة قوي لأن اّخر جن تابع كان خلاص تم اختياره ونازل على السلالم عشان يقف تحت راية المنفذ بتاعه..

لحظتها بصيت عليه وعينه لسه في عيني, مستغرب من اللي عملته, وعشان استفزه أكتر رحت حييته بنفس التحية بتاعته, رفعت حواجبي وراسي مع بعض وابتسمت..

الغضب زاد على وشه, وعشان يحاول يرجع للثبات بتاعه راح باصص قدامه وتابع اللي بيحصل في الساحة..

التوابع السبعة واقفين جوه الساحة, كل واحد تحت راية المنفذ اللي بيمثله, الرايات كانت عالية جدا, بصيت للراية بتاعتي, مكتوب عليها اسمي وجمبه علم مصر, بصيت على الراية اللي بعدها لقيت عليها علم اليمن وبدون اسم, بصيت على اللي بعدها كانت راية اليونان وعليها العلم وبدون اسم, كل الرايات كانت بدون اسم ما عدا الراية بتاعتي كان عليها اسمي, ودا تقريبا كان سر من أسرار المجلس, مفيش منفذ هيعرف أسماء باقي المنفذين, خمّنت الاستنتاج دا لأني شوفت أكتر من واحد وهما بيبصوا على الرايات زيي وكان واضح عليهم الحيرة, كل منفذ هيشوف اسمه هو وبس..

العجوز حافظ العهد اتحرك بخطوات بطيئة لحد ما وصل لمنصة حجرية في منتصف الساحة, فوق المنصة كان فيه وعاء صغير, وفي اللحظة اللي إيده دخلت فيها للوعاء فجأة الرايات بدأت تنور واحدة ورا التانية, النور بيزيد ويقل كإن الرايات مستنية تعرف مصيرها, العجوز دخل إيده أكتر جوه الوعاء وحركها حركات دائرية تمثيلية, وبعدها سحب أول حجر ورفعه قدامنا كلنا, وقال "تابع العراق" صوته دوى في القاعة كلها, وفي اللحظة دي راية العراق لمعت باللون الأخضر, العجوز مد إيده مرة تانية والكل كان مترقب الطرف اللي هيواجه العراق حتى الجن كانوا واقفين متابعين إيد العجوز اللي خرجت بعد لحظات بحجر جديد رفعه للكل وقال "تابع الصين" 

 

العجوز كمّل القرعة بنفس الشكل..

 تابع اليونان ضد تابع مصر..

 تابع اليمن ضد تابع روسيا..

وبعدين قال "كدا تابع المغرب هيصعد مباشرة للمرحلة التانية" 

وبدأ النزال الأول...

تابع الصين كان بيعتمد على السرعة بشكل مخيف, جسمه رشيق وبيختفي من مكان ويظهر في مكان تاني خلال لحظات، لدرجة إن صورته كانت بتسيب وراها آثار ضبابية في الهوا!

 أكتر من مرة ظن الموجودين إنه وصل لخصمه وأنهى النزال، لكن تابع العراق كان بيخرج من نطاق الهجوم في آخر لحظة..

ومع مرور الوقت بدأت قوة تابع العراق الحقيقية تظهر, قوته كانت في ثباته وهدوءه..

 لفيت راسي ناحية مرهوب وبصيتله بصه فهم معناها ورجعت كملت المشاهدة..

كان بيصد ضربات, وبيتفادى ضربات, ومع كل دقيقة كانت الأفضلية بتميل ناحيته, بعض الجن في المدرجات بدؤوا يلاحظوا إن تابع العراق متعمد يسيب خصمه يتحرك بحرية كإنه مستني حاجه معينة, ولما حصلت اتغير كل شي!

وفي لحظة واحدة اندفع تابع الصين بتهور بأقصى سرعته وهو بيحاول حسم النزال لكن تابع العراق كان منتظره, في الثانية اللي دخل فيها نطاقه, فجأة ظهرت تحت أقدامه عشرات الرموز المضيئة واللي بمجرد ما وقف فيها تابع الصين اتكتف تماما, تابع العراق كانت عنده الخطة وطول فترة النزال بيحيك خيوطه زي العنكبوت اللي منتظر فريسته تقع في شباكه, وقد كان..

منفذ العراق مال بجسمه للأمام وهو مبتسم ومستمتع بخطة التابع بتاعه..

وفي اللحظة اللي تابع الصين اتثبت مكانه, تابع العراق اختفى ومظهرش غير وهو موجه لكمة قوية أسفل فك تابع الصين, وبعد ثواني كان جسم تابع الصين بيتلوى يمين ويسار ومن الأعلى والأسفل واحنا مش شايفين غير ظل تابع العراق وهو بيختفي ويظهر في الهوا بعد كل لكمة..

منفذ الصين ارتبك, وبدأ يتحرك في الكرسي بتاعه كذا حركة بين الواحدة والتانية ثانية ودا دليل على الارتباك اللي هو فيه..

واّخر ضربة وجهها تابع العراق لتابع الصين كانت الرموز اللي مكتفاه اختفت, والضربه أطاحت بيه خارج حدود الساحة الحجرية, وبكدا معناها هزيمته..

العجوز رفع إيده "الفائز بالنزال الأول, منفذ العراق"

   

تابع الصين وقف بصعوبة ورجع مكانه, وتابع العراق اتجه ناحية الراية بخطوات ثابته بعد ما ضمن أول مقعد في المرحلة التانية من بطولة سيد التابعين.. 

 

الفصل الواحد والخمسون من هنا