رواية فصلية ولكن الفصل الخامس بقلم سوزان ليث
حياه : دامشي للباب اريد اطلع صاح حيااة
خالد : حياة
حياة: نعم
خالد : اليوم خواتي يجون لهنا
حياة: اي هلا بيهم
خالد: هنا بس اثنين يجن اليوم والثالثه بغداد مزوجه
حياة: اي حياهم الله
خالد : بويه خاف يسمعنج حجي ماريدج تردين عليهم هنا لسانهن
طويل من حبهم بيه اعرف حيسمعنج كلام يغث بس اتحمليهم وشماحجن لاتردين مفهوم .
حياة: هزيت راسي اي . وطلعت من الغرفه واني افكر هنا ليش
يسمعوني حجي واني شعليه واني اصلا لابيها ولا عليها جيت هنا .
امل: شبيج حياة متخشبه واكفه هنا.
حياة: لا مابيه
امل : يله تعالي خل نتريك بيبي كالت ممتريكه بعدج
حياة : اي مو جنت ماشتهي
امل : متشتهين لو تستحين من الشيخ هههههه
حياة: دمشي نتريك اليوم عماتج يجن
امل: صدك منو كلج
حياة: مادري هسه ابوج كلي
امل : تعالي خل نتريك قبل ليجون عماتي وجهالهم ويخبصونه
رحنا تريكنا وشويه اجه خالد للمطبخ سئل على حسين بس شون جمال طالع و العطر يسطر ظليت بس اباع عليه امل كلتله بره عمو حسين دينتظروك
كمت ساعدت امل وساره بالتنظيف وخاله سوي الغده
وراهارحت للغرفه اعزلها شويه اجتي امل كلتلي
امل: تعالي عماتي جني ديريدن يشوفوج
حياة: اي هسه اجي
طلعنا من الغرفه رحنا للهول الصغير فتنا لكيت بي بنات اثنين يعني عمرهن تقريبا بكدي او اكبر
سلمت عليهن وكعدت يم خاله وامل
خالة: يمه حياه ذني خوات خالد هاي سميه وهاي زينه
حياة: هلا بيهن خاله
سميه : يمه طلعت صغيره هاي جاا عبالي جبيره
زينه : يا صغيره دشوفيها بعيره هههه
خاله: استحي زينه
سميه : شبيج يمه شو جنج حابتها لهاي الفصليه
خالة: وعليش ماحبها جاا هي شمسويتلي حتى اكرها
زينه : يمه جاا غير ابن عمها الي دعم اخوي لو نسيتي
خالة: يمه انتي كلتيها ابن عمها هي شدخلها بنص
سميه : زينه اسكتي عيني جتي يومين للبيت خلت امي بصفها لو ظل اسبوع شسوي
زينه : والله عمي حظها كاعد
حياة: اني ظليت اباع عليهن واريد بس اطلع واعوفهن واحس نفسي اختنكت منهن لان مشايفه هيج شي بحياتي واحد يكره واحد وهو كلشي ممسويله بس محجيت شي ظليت ساكته وهنا حارن شحجن بالاخير امل كلتلي تعالي نروح نكمل شغل
زينه : ها امل انتي هم بصفها يولي
امل : اي عمه شكو بيها
زينه : ولج بسرعه قشمرتج والله طلعتي فطيره بساع يقشمروج
خالة: بسج يمه شنو هالحجي جاي تغثينا لو شوفينا انتي .
امل : امشي حياة روح
حياة: طلعت من الهول واني عيوني مغوركه دموع وعفت امل ورحت للغرفه بس دخلت دموعي نزلن وكمت اشهك وابجي دخلت عليه امل
امل : شبيج حياة ليش دتبجين ولج والله هنا دايما هيج يجن بس يغثن ويرحن لديريلهن بال
حياة: اني ممسويتلهن شي شبيهن ويايه متحملات عليه والله مالي ذنب بالي صار والله العظيم معليه
امل : ولج شبيج انتي كافي حبابه ترى هسه ابجي وياج لتنقهرين منهن لان بعدج متعرفيهن لج هنا بس يذبن سم
لج والله من وعيت للدنيا هنا كل ميجن هنا يسمعني حجي على ابوج حيزوج وتجي مرت اب وتاخذه منج وحجي اشكال واللوان والله هنا صح عماتي بس اني اموت منهن عكس عمتي بسمه الي بغداد ذيج ورده مال الله حبابه وكلبها علينا حتى من صار الحادث وجتي شوف بابا وسمعت بفصليه. كعدت ويايه وكلتلي ماضوجج وانتي مالج ذنب وحتى كلتلي صيري صديقتها واختها ان شاءالله تجي وشوفيها شون حبابه مو مثل ذني الحيات يجن يعلفن هنا وجهالهم ويرحن
حياة: ظليت ابجي وامسح بدموعي واحس نفسي مكسوره محد الي ابويه بعيد عليه اريد اخابره اكله تعال اخذني وخلصني
هديت شويه وكمت غسلت وجهي وطلعنا اني وامل وطبعا زينه وسميه وظلن بس يحجن عليه وحتى يتعمدن يهينون بيه
صبينا الغده وكعدنا تغدينا
العصر اجوي الولد وخالد هم دخل بس جان شكله تعبان كلش راح للغرفه حسين اجه عليه
حسين : خيتي حياة روحي يم الشيخ خاف يحتاج شي اليوم كلش
تعب وتاذى بالتمرين لان اول يوم
حياة : اي صار هسه اروح . رحت للغرفه دكيت الباب ودخلت
لكيت خالد مدد عالجربايه وخال ايده على عيونه رحت يمه كتله محتاج شي وخر ايده من عيونه
خالد : لا سلامتج بويه اني حنام بس تعالي غطيني مابيه حيل انه
حياة: فتحت الغطه وغطيته وسديت ضوه وطلعت رحت للمطبخ
امل : شونه بابا داروح اشوفه هسه عمو حسين كال تعب اليوم
حياة: اي مبين عليه تعبان كلي حنام
امل: ياسوده عليه حتى ممتغدي
حياة: يله خل يرتاح ومن يكعد ياكل
امل : اي ان شاءالله اني حروح على بيبي اصيحها ذوله جهال ذني الحيات خربو الحديقه وعجزت واني اعيط عليهم
حياة: ظليت واكفه بالمطبخ دخلت عليه سميه جان دكلي
سميه : اكلج بله اخذج اخويه لو بعده
حياة: ظليت صافنه بوجهه كتلها اعتقد هذا شي خاص بينا محد اله دخل اخذني او لا
سميه : ولج انتي هم فصليه وهم تراددين
حياة: استغفر الله ياربي وعفتها وطلعت من المطبخ
رحت للهول صغير شفت زينه كاعد ركض لفت وطلعت لان كلت اكيد حسمعني حجي يقهرني
رحت لامل كتلها امل حصعد لغرفتج عفيه تعبانه واريد امدد شويه وراسي كام يوجعني من صياح الجهال وابوج تعبان ماريد ازعجه
امل : اي روحي شعلي سبلت ونامي عود اذا كعد بابا اني اصبله الاكل
حياة: صعدت لغرفه امل مددت عالجربايه وشويه وغفيت من تعب وكاعده من صبح
*******
خالد : طلعنا رحنا للمستشفى لان عندي علاج طبيعي طبعا لان اول يوم كلش تعبت وتاذيت واحس نهد. حيلي
كملنا العلاج ورجعنا للبيت لكيت خواتي جايات وجهالهم اني سلمت ورحت للغرفه انام من تعب يادوب غسلت وبدلت ومددت دخلت حياة سئلتني اريد شي كتلها غطيني غطتني وراحت نمت نومه مال ميتين من تعب
كعدت الغرفه ظلمه ظليت امد ايدي دريد تليفون لكيته شعلت ضوه مالته ظليت شويه بالفراش وكمت كعدت عالكرسي رحت شععلت ضوه ورحت للحمام غسلت وطلعت بره لكيتهم كاعدين بالهول الكل فتت سلمت وكعدنا نسولف
خاله: يمه جوعان هسه حيحضرون العشه واكل
خالد : اي يمه . باوعت ماكو حياة كلت يجوز بالمطبخ اجتي امل يمي
امل : ها بابا شونك صالك كومه نايم
خالد : اي والله جنت منتهي من تعب ..لعد وين حياة قتربت يمي امل
امل : بابا حياة بغرفتي صعدت نامت ومكعدتها من وره عماتي اليوم كله بس يغثون بيها ويقهرون بيها
خالد : دروحي كعديها كليلها ابويه يريدج
امل : اي بابا
حياة: حسيت امل دتكعدني ودكلي كومي يله بابا كعد ويريدج
كعدت نزلت جوه رحت للحمام غسلت وجهي وعدلت نفسي ورحت للهول شفتهم كاعدين كلهم اول مفتت زينه لتافت عليه
زينه : هلا والله همزين شفناج عيني جان استحيتي مدكولين خطار عدنا اشوفهم محتاجين شي
حياة: زينه تحجي وذب سمها سوي نفسها دتشاقه تخاف من خالد
طبعا اني مرديت عليها كلت سلام عليكم وكعدت عالتخم بصف كرسي مال خالد
خالد : ها بويه سئلت عليج كالو نايمه
حياة : اي والله راسي جان يوجعني وصعدت بغرفه امل نمت
خالد: اي زين سوين وشونه راسج هسه
حياة : الحمدلله
طبعا هو يحجي وسميه وزينه صافنات علينا خالد كلي
خالد : بويه ترى واكع من الجوع لحكيلي بتصبيره
حياة: استغربت من خالد من طلب مني هالشي بس حسيته سوه هيج كدام سميه وزينه حتى يبين علاقتنا عاديه مابيها شي
كمت للمطبخ لكيتهم اصلا الاكل جاهز واخذت صينيه مال خالد ورحت خاليتها عالطبله وعفته داطلع اجيب السفره افرشها للباقين حتى نجيب الاكل صاح خالد
خالد : حياة تعالي بويه تعشي
حياة: ظليت مستغربه من تصرفاته كتله خل افرش سفره
امل : جيبيها اني افرش ورحي اكلي
حياة: رحت كعدت بصفه وظليت مستحيه منه اكل واني جنت
جوعانه جان يمدلي خبزه كلي لظلين صافنه اكلي يله
تعشينا وكملنا شغل بالمطبخ امل كالت حصعد انام
وذني الحيات راحن بعد ما خبصو البيت هنا وجهالهم
اني فتت للغرفه مديت فراشي بالكاع ونمت
ظلينا شهر هيج ماكو شي تغير خالد يروح ويجي للعلاج والحمدلله اكو تحسن برجل وحده وكلوله بعد جم جلسه ويكدر يوكف عليها بس يحتاج عكازه لان رجله الثانيه اصلا ميحس بيها لازم عمليه
ظلينا هيج هو اصلا قليل الكلام ويايه بس اني بديت اتعلم عليه بديت اعرف الي يحبه الي يكرهه تقريبا صرت اني مسؤوله عليه على ملابسه على اكله حتى اني الي اذكره بدوه
خالد : مره شهر كامل على وجود حياة بالبيت كمت اتعلم عليها
يمكن لان تعلمت اشوفها دايما يمي صح اني قليل الكلام وياها بس صرت احب مداراتها الي
حياة: اليوم جان لازم خالد يروح لبغداد لان عده مراجعه ويه
الدكتور فاخذوا علي وحسين وراحوا لبغداد يظلون يم اختهم بسمه لان هي مزوجه وهناك كاعده وظلو هنا ك4 ايام صراحه حسيت بغيابه يمكن لان تعلمت دايما موجود
خالتي كالت باجر حيرجعون مكملين شغلهم اني بيومها كمت من صبح واحس نفسي نشيطه نظفت الغرفه وعطرتها وحضرتله ملابسه كلت خاف يجي تعبان من طريق
طلعت للمطبخ ساعدت خالتي بالغده وكملنا تقريبا كلشي
طبيت للغرفه كلت خل اسبح قبل ليجون
فتت سبحت وكملت وطلعت مشطت شعري وعجبني اخلي كحله كملت وطلعت للهول يم خالتي وامل وره شويه اجوي
دخل بالبدايه علي سلم وخله غراض وطلع ودخل وراه الشيخ خالد
اني بس شفته ابتسمت يمكن لان اشتاقيتله
هو هم ابتسم سلم علينا وكعدو يسولفون وخالتي تسئله عالدكتور
اني وامل رحنا للمطبخ نصب الغده ساره جانت بيت اهلها رايحه امها مريضه
شويه جتي امل كالت
امل : بيبي دكول خل ناكل كلنا عالميز ماكو بس احنا
صبينا الغده وكملنا وحضرنا عالميز واجوي كعدنا كلنا ناكل
خالد كاعد بصفي ظلو يسولفون همه ياكلون خالد ابد محجه ويايه حتى مسئلني شونج مع العلم هو سئل عالكل بس اني محجه حتى ويايه
كملنا اكل وكمنا نشيل بالماعين امل كالت اني اغسل اماعين انتي صبي الجاي
صبيت الجاي ورحت عليهم كلهم بالهول قدمتلهم بس خالد خالتي كالت راح للغرفه ديرتاح اخذيله جاي لهناك
رحت للغرفه دكيت الباب وطبيت لكيته نازع بدي مالته وديلبس بدي التراك اني ظليت ابلع ريكي ومدنجه بالكاع كتله
هذا جاي خالتي كالت اجيبه هنا
خالد : اي والله اجه بوكته
حياة: اخذه مني وكام يشرب اني ظليت خاله ظهري عالميز واكفه كباله اتفرج عليه
بكلبي اكول شنو هذا الجسم شنو ذني الرموش الي تموت لحيته الي مشفت احد لايكتله بكده
هو ابد محجه ويايه واحسه يجاهلني
كمل جان اخذت الاستكان منه وطلعت وهو محجه شي
رحت للمطبخ اجتي عليه خالتي كلتلي تعالي يمه اريدج بشغله رحت وياها للهول الصغير واول مره نفوت وسد الباب علينا اني استغربت منها
كعدنا كلتلي
خالة: يمه حياة خالد تعرفين بده علاجه صارله فتره
حياة: اي خاله وسمعت من حسين جم جلسه وان شاءالله بعد ميحتاج
خالة: اي يمه ان شاءالله .. والله ردت اكلج سالفه بيني وبينج
حياة: اي خاله كولي
خالة: هسه علي اخذني على صفحه وكلي دكتور سائله انت مزوج شونها علاقتك ويه مرتك
حياة: ودكتور شعليه بعلاقته بيه
خالة: يمه شون افهمج .. يعني دكتور يقصد وره العمليه كدر يسوي ذيج شغله
حياة: اني ظليت اباع على خالتي بصدمه
خالة: يمه دكتور طلب منه يجرب خاف العمليه ماثره شي على ذيج شغله
حياة: اني شعليه بهذا الشي
خالة: يمه جااا بيمن يجرب غير بيج انتي حلاله
حياة: ظليت بصدمه وماعرف شحجي كتلها خاله ماكدر زوجيه انتي وخل يجرب بيها
خالة: صخمتي ولج شون ازوجه جا قبل مازوج هسه من عده مره يزوج
حياة: بس اني وقاطعتني خاله
خالة: يمه اني ماريدج تروحين ذبين نفسج عليه اعرف صعبه عليج
وهو اصلا من طالع من دكتور كايله العلي لتحجي الاحد
بس علي كلي حتى اصرف يمه لا وليدي صار بي شي وره الحادث والله اكتل نفسي اذا بي شي
حياة: لا خاله ماشاءالله مابي صحته زينه وتحسن هواي عن قبل بس كليلي شسوي بس ماريد اني افرض نفسي عليه
خاله: لا يمه لتفرضين نفسج شوفي باجر اخذج ويايه لسوك نشتري جم هدمه الج
حياة: لا خاله عندي اصلا بابا قبل ماجي هنا جهزني كلشي خلاني اشتري
خالة: يمه شعليج ذني مني .. بس يمه اريدج شويه تغيرين من نفسج
حياة: شون اغير
خالة: يمه بالغرفه تكحلي تحمري فكي هالشعرات لابسي ثوب يجيب العين
حياة: لا خاله استحي شيكول عليه من يشوفني هيج اني لحد هسه
البس حجابي كدامه
خاله: عزه بعينج غير هو زلمتج شكو تلبسين حجابج
حياة: خاله والله استحي
خالة: حياة ادري بيج بعدج ممتعلمه عليه وادري يجوز مو هاي الحياه جنتي رايدتها بس يمه اني ام ومن سمعت بحجي دكتور نص حيلي راح يمه ماكدر اسوي شي انه اله يمه هذا الشي مهم للرجال هاي بيها رجولته ولج والله خالد ماكو منه بس تقربي منه رشوفين طيبته وحنينه معليج بي من يصير عصبي صح يظل يرزل ويصيح بس انطي ساعه ويرجع جنا مصاير شي
حياة: ادري خاله والله اعرف بس اني وياه مو مثل اي اثنين مزوجين حتى اتقرب منه
خالة: يمه دسوي الي اكلج عليه ومعليج انتي
حياة: ظليت حايره وماعرف شحجي شكول ظليت ساكته كتلها الله كريم
خالة: دروحي هسه يمه بالغرفه
حياة: خالة هسه كتيلي وحده وحده تقربي منه
خالة: ولج قابل كتلج روحي نامي بحظنه روحي بالغرفه كعدي يمه سولفي وياه
حياة: خالة هو ميسولف ويايه قابل شسولف وياه
خالة: ولج سئلي شكال دكتور خوما تعبان شونها بغداد فتحي وياه مواضيع
حياة: خالة والله استحي
خالة : هم ردت على هالحجايه ولج صالي ساعه احجي وياج شيبتي كلبي يله روحي يمه وسولفي وياه
حياة: كمت من خاله ورحت للغرفه دكيت الباب ودخلت لكيته مدد
عالجربايه يلعب بالموبايل .. ظليت ماعرف شسوي اروح لو ارجع احجي لو اسكت
تقربت عالجربايه هو صعد راسه عليه وظل يباوع عباله اريد شي منه
كتله . شكلك دكتور ان شاءالله اكو تحسن عالعلاج
خالد : اي الحمدلله
حياة: اي خوما تعبت من طريق
خالد : لا مو كلش عادي
حياة: اجوبته جانت مختصره حتى مينطي مجال احد يسئله نداريت منه ودارجع والتافيت عليه كتله
تريد اجيبلك فواكه
خالد : لا مشكوره بس سديلي ضوه اريد انام .. استغربت من حياة اول مره تجي تسئلني وحسيتها تريد سولف ويايه بس اني مدري شبيه جنت اجنبها حتى اسئلتي وياها مختصره
حياة: ظليت افتر بالبيت تالي طلعت بالحديقه كعدت شافني حسين جان يجي يكعد يمي وظل يسولف ويشاقه وجتي امل يمنا هم ظلو بس يناكرون بشقه
وراها حسين كال حروح للمحل اجيب حبشكلات تردن شي
امل : اي جيبلي جبس ليز ابو 500 واذا اكو العائلي بعد احسن واريد موطه ام 1000 ونستله الي جبتها ذاك اليوم
حسين : شبيج مفجوعه مصدكتي واحد يكلج شتردين
امل: مو انت عمي شيال همي من منو اطلب
حسين : يابه دللي وانتي حياة شتردين
حياة : لاشكرا ماريد شي
امل : باع جيبلها مثلي هاي تستحي تطلب
حسين : خيتي عليش تستحين دصيري مثل هاي شوفي لسانها شطوله
امل: الله يسامحك
حياة : راح حسين وراها غربت دنيا كتلها لامل امشي نطب جوه
طبينا رحنا للهول كعدنا يم خاله جانت دتحجي بتليفون ويه ساره مرت علي دتسئلها على امها
سدت تليفون ولتافت عليه
خالة: وين رجلج
حياة: نايم خاله تعبان
خالة : وشعندج كاعده هنا متروحين يمه
حياة: خاله هو كلي سدي ضوه اريد انام وطلعت عفته ينام
خالة: روحي كعدي كوليله اريدك
حياة: اشرت لامل تروح بس خاله شافتني
خالة: وج كومي كعدي رايدته بشغله مهمه
حياة: كمت واني شايله هم شون اكعده فتت للغرفه ظلمه فتحت ضوه لكيته بعده نايم تقربت منه ظليت اباع على رموشه فدوه جنن مكناسات عبالك هههههه
كتله شيخ خالد مكعد ولا تحرك ورديت حجيت شيخ هم متحرك لزمت ايده ولاول مره وحركتها وصحت شيخ خالد ........
