رواية فصلية بديلة ( شموخ ) الجزء الثاني الفصل الخامس 5 بقلم ام ملكوت

:- مر الاسبوع وجبت شيوخنه وعمامنه يلي بعمري ماشفتهم بس بوقت المصايب والطلايب هم نعمه .. اجو عمامه لهل عار وشيوخهم وكعدنه وحجيتلهم الصار وكتلهم بختاميه كلامي..

شيخهم: صلي على محمد يابويه هو صح غلط وتعاقب على غلطه بس مايعني ان تعاقبون اهله كلهم وتشيلونهم من بيتهم العاشوا عمرهم كله بي

_يا شيخ كلامك على عيني وراسي بس اكو هواي بيوت بهاي المنطقه غير هل بيت يكدرون يسكنون بي وهذا العار حشاكم اريده بعد المشرق عن المغرب من بيتي ماريد المحه بفرعنه حتى

_هذا اخر كلام عندك يابني

_اي شيخ هذا العندي انه واذا عدكم حل ثاني غير هل حلين كولوا

_اكو هواي حلول بس ماكدر اضمنلك ابنه مايعيدهه بعد ويطل على حرمتكم ولا اكدر اكفله لان الانسان ماتنحزر افكاره وتصرفاته لهذا السبب بويه طلبك وشرطك مجاب ومن هاي عيني من باجر الصبح ماتلكاهم بهل منطقه

سلمنه عليهم وطلعوا من البيت طبعا صار حجي هواي بين شيخنه وشيخهم بس هذا الحجيته انه وهذا جوابهم النه وهسه احس راح ارتاح من بعد اسبوع تفكير ومعانات راح اندمه لهل كلب واطلعه من بيته بليله ضلمه .. 

رجعت دخلت للبيت لكيتهن كلهن كاعدات بالصاله امي والبنات دخلت اخذت كلينكس مسحت وجهي من العرك من كثر ماحترك دمي عركت والدنيا شتا سالتني امي شصار هزيت راسي ب اي وكتله..

_كلشي تمام منا باجر يشيلون منا مايبقون بعد وخليهم يصيرون عبره لمن اعتبر وخل يعرفون ان احنه ما ينداسلنه على طرف

_بلاوي يا يمه هاي الناس مدري شجاهه جنه جيره وصحبه شحلاتنه وهسه كلشي خرب بيوم وليله 

_يمه ماكو واحد زين صار شين هيه وحده من الثنين لو هو منافق وطلعت حقيقته لو منافق بالحالتين هذول ناس زبال** حشا السامع

_اي والله يا يمه على كولتك الله كريم ربي موجود ويشوف ويسمع الله يبعدهم عنه انشاءلله بعد السما عن الارض 

_الله كريم المهم خلصنه منهم وهسه شنو ترى جعنه شنو ماكو غده

_لا يوم شلون ماكو غير كعدنه من الصبح سوينه عبالنه الشيوخ تتغده يمنه

_بعد ماقبلوا يبقون هم وياهم حق الناس شيوخ وشكبر الواحد وجايين يحلون مشكله هل زعطوط انه ابني لو شفته باوع على بنات الناس الزمه واذبحه ولا اخلي يجرجرنه احنه والشيوخ كلمن عمامته براسه للبيوت

_الله يهدي يمه طايش مراهق هذا دوم امه تشكي منه وماله حجايه ثابته اكثر من خطبته لشموخ

_شنو شنو يا خطبه منو خطب شموخ

_لا يمه هيج سالفه ولت وراحت لا تخلي بالك وياهه

_احجي يوم شصاير خطبه شنو ومنو الخطب البنيه

_ولك يمه بس حجي كايل لامه يريد يخطبهه وامه ضلت تلح علي قبل فتره وكتلهه خيه البنيه واهلهه مايقبلون وسكتتهه

_وانه شنو هنا ومادري بهاي السالفه غير تكليلي حتى اروح اشلع عيونه وين شافهه شموخ وطلب ايدهه

_شسالفه يوم غير اخذتهه مره لبيتهم هيه وبانه

_طبعا هاي السوالف والطلايب كلهه من طلعاتج للبنات ادري المن تاخذينهم وياج ماشايفات ناس 

_جا اكول خطيه خلي اطلعهن وياي اونسهن

_عايزات ونسه اشو وين مايردن يرحن يرحن محد يكلهن على عينج حاجب عايزات لصاحباتج يا امي

_هاذهو يمه لا اروح ولا اخذ وحده وياي بعد حتى ام اوس ماروحلهه بعد

_لا بله هاي خوش مره انه اكلج روحيلهه بس اكيد ماقبل تاخذين البنات وياج لان عدهم شباب وزحمه يرحن الهم

_لا ماطلعهن وياي بعد على كولتك هنه يطلعن ويمشن المن ماخذتهن وياي بعد 

_اي هاذهو بس لا كونج زعلتي ملكتنه

_لا يمه عليمن ازعل بس ضجت من روحي وتندمت لان اخذتهن وياي ورحت 

_اي امي ماتدرين الناس شنو هسه تغيرت النفوس مو مثل قبل احسن شي الواحد يحافظ على بيته واولاده ويكعد ويسكت ومن تضوجين احنه نلتم ونطلع لمكان سويه ونترفه تمام 

_تمام يمه انشاءلله يله يمه اسراء صبيلنه الغدا خلي اخوج ياكل

_انشاءلله امي كايمه

:- ابتسمت واجت عيني بعين شموخ وبقت مركزه بعيوني وكانها تدور على شي ماتدري هيه الضايعه بيهن تنهدت ورحت لغرفتي طلعتلي ملابس ودخلت للحمام فتحت الدوش وصب ماي دافي

مايل للحروره على راسي حسيت جسمي خدر وسرحت بافكاري .. بعمري ماتخيلت اني اتورط بالحب وهيج حب صعب وبهل عمر رغم بنات الجامعه القله ويانه كل وحده تكول للثانيه انه

احلى منج الا انهه هي الوحيده يلي جذبتني وسحلتني سحله اوس المسحول بيهه ولا اكدر اعترفلهه وتبادلني ونكبر سوه ولا احنه كبار بالعمر واطلب ايدهه واتزوجهه ..ضليت اصفن واحسبهه

بالف طريقه ماترهم لا هيج ولا هيج نفخت بحيره وطفيت الدوش نشفت نفسي وبدلت وطلعت لكيتهم صابين غدا وكاعدين اجيت كعدت يمهم

وشموخ صارت مقابيلي صفنت بيهه لحضه وكلت بكلبي حتى بالاكل مكابلتني وكاعده وين اشرد منج بعد شموخي وين .. بعدما كملنه غده تذكرت اوراق

القضايا القديمه يلي عندي مانطيتهم الهه كمت لكيتهه بالمطبخ يم عبير وصحتلهه باوعتلنه عبير باستغراب واجت شموخ يمي ..

_احم تعالي وياي انطيج اوراق القضايا من رديتهم قبل اسبوع ونسيت انطيهم الج

_اي تمام يله

اخذتهه ورحت للمخزن الفوك السطح فتحته ونفخ التراب بوجهنه صرنه نكحكح ونهفي من كدامنه دخلت اخذت الجنطه الزركه مالت السفر وطلعتهه

فتحتهه وطلعت منهه الاوراق التخص القضايا الاخذناهه بهاذي السنتين ودفتر الملاحضاات شلته وانطيته الهه صارن ثكال اجيت اخذت نصفهم منهه على ايدي الثانيه وكالت..

_عاا هاي كلهه حليتوهه 

_اي لعد شعبالج 

_حلو والله راح اكعد بعد سنه ليكدام ياله اكملهن

_لا بالعكس تشوفينهن اوراق هواي بس سهلات وعلى ذكاءج هذا بسرعه تطيحين باللغز 

_تمام اذا انت تكول هيج راح ابدي احلهن على وقت فراغي حتى يكون عقلي مصحصح بيهم 

_براحتج بعد انتي المحققه 

_خوش اسم المحققه شموخ

_لا مو هيج ينكال الهه 

_جا شنو 

_جا الملازم مو من الضباط

_لا مو بس للضباط هاي التسميه وانما يصير لقب للمحقق المبتدأ لانهم نفس المستوى باعتبار

_هايي شنو

_اي والله 

_جا لقب المحققه احلى من ملازم

_هوه بالعاميه نسميج محققه بس بالورق ينكتب ملازم تحقيق جنائي مو محققه 

_تمام اذا هيج 

_شنو نويتي تصيرين محققه

_لا ويني وين المحقق قررت اصير مهندسه بعد بس هيج احب الالغاز والاكشن 

_براحتج انتي بشخصيتج هاي يلوكلج اي وظيفه ترديهه وانشاءلله تنولين التتمنينه

_العفو تدللي..

ابتسمت الي لاول مره حسيت مدري شصار بيه تخربطت علومي وفهيت على ابتسامتهه تحمحمت واشرتلهه تنزل كبالي نزلت ونزلت وراهه بعدما

سديت باب البيتونه دخلنه لغرفه البنات خليت الاوراق عل ميز وبقت تسالهه عبير شنو هذن ومال ايش عفتهن يحجن وطلعت للصاله يم امي كعدت وبقيت اكلب بنقالي بس بالي مشغول بيهه وكل

شوي اتذكر ابتسامتهه وابتسم لا اراديا بدت اثار الحب تبين علي الله اليستر من القادم بس صرت اخاف اكثر كلما تقرب وقت روحتهه من عدنه..

ومرت ٣ اسابيع على حالتي هاي وكلما يمر جم يوم وينفتح قسم من حضر التجوال ينجوي كلبي من فكره رحيلهه لحدما انفك الحضر تماما وصار

الوضع تحت السيطره وبيوم وانه راكب دراجتي الناريه واجوب الشوارع بوقت الغروب شارد من غرك كلبي وحبه الهه اجالي اتصال ورساله على

نقالي لفيت وصفيت الدراجه على جهه نزعت الخوذه وطلعت نقالي من جيب الستره وشفته رقم متكون من ٣ ارقام متصل ودزالي رساله محتواها..

💬 لقد تم العثور على والد المفقوده شموخ شهم محمود في مستشفى ال^^^^^ قرب شارع محمد الامين يرجى الذهاب الى هناك للتاكد من العائله..

:- صفنت بالرساله ونفسي يتصاعد اكثر صار تخربطت احوالي وسيطرت الخنكه على حنجرتي كعدت عل رصيف وفركت وجهي بحيره .. خلاص

هاي هيه يعني راح تروح شموخ راجعه لاهلهه ولمحافضتهه بعد ماشوف طلتهه علي ولا احس بوجودهه حواليه .. شلون ياربي انت دليني عل حل

كمت ماعرف اتصرف احس كلبي وعقلي مو الي هي كاعد تتحكم بيهن كلبي الجان ابرد من الثلج غرق وذاب بحبهه وفقد قوته .. كمت لبست الخوذه

جدحت الدراجه وطرت بيهه للبيت وانه مره افكر احجيلهه ومره افكر اضم عليهه ومادري شسوي

هسه .. مسافه الطريق وصلت للبيت دخلت صفيت الدراجه وجان تطلع امي والبنات مبدلات وكاشخات رحت عليهن وحجت امي..

_ها يوم رجعت احنه راح نطلع نفتر شويه بالمتنزه القريب علينه ونرجع 

_تمام لعد اروح وياكم انه شسوي بالبيت وحدي

_مو ما تكفي السياره وليدي احسن شي تعال بدراجتك ورانه تمام

_خلاص تمام 

:- كمل كلامه وراح ركب دراجته حسيته مو على بعضه يحجي وصوته مخنوك ويبلع ريجه بصعوبه ماعرف شبلاه المهم خليني اروح اطلع اختنكت من

كعده البيت بلكي اشغل بالي عن التفكير والقلق حتى عافيتي انسلت مادري شوكت الوضع يهدا وينفك الحضر وارجع لعمامي وهمه يودوني لاهلي ..

ركبنه بالسياره وطلعنه من البيت وراهب ورانه بدراجته يمشي دقايق ووصلنه صفت السياره عبير بالكراج ودخلنه للمتنزه جان عباره عن خضار واشجار وورد ومراجيح وزحليكات للاطفال وناس

هواي بيهه لمن شفتهم هيج ازدحام اختنكت ردت بس اروح لمكان فارغ .. تلفتت وشفت راهب وراي اشر بمعنى شكو واجه يمي تقربت وهمست ..

_راهب ماكو مكان فارغ من الناس اختنكت من الزحمه 

_اي لحضه هسه اشوفلكم مكان ترتاحون بي 

_تمام 

راح يدور ويتلفت بالمكان ورجع كال لخالتي والبنات نروح بصفحه الورد ماكو بيهه ناس هواي بس عائله وحده عاد ارتاحيت شوي رحنه وياه

وكعدنه عل كراسي باوعت وفعلا ماكو احد لان قسم العوائل وياهم جهال ومايجيبوهم يم الورد حتى لا يخربوا .. اخذتني اسراء نتمشه حوالين

المكان ووكفنه وسندنه ادينه على القاطع .. ضليت اباوع للجهال شلون يلعبون بالمراجيح ومتونسين تذكرت بصغري لمن بابا ياخذني انه وجنان

ومرتضى واحسان للمتنزه القريب علينه ونضل نلعب بالمراجيح وانه احسان يدفع المرجوحه وجنان مرتضى يدفعهه الهه اثارينه جنه مسوين

ثنائيات بالصغر ومانعرف .. للحضه صفنت وبلعت غصتي لمن شفت بنيه بعمر ال٦ سنوات اجت لابوهه تركض وشالهه بحضنه ويبوس بيهه نزلت دمعه مشتاكه من عيني وتوالت علي الدموع وحده

وحده بهدوء .. درت وجهي عل صفحه الثانيه حتى لا تشوفني اسراء بس ماتفوتهه فايته دارت علي ورفعت راسي بيدهه فتحت عيونهه بتفاجئ وكالت...

_يااا شبيج عمري ليش البجي 

_مابيه شي هيج متضايقه

_مشتاقه لاهلج مو

_اي شويه

_شويه وهاي الخنكه كلهه بصوتج 

_مو بيدي اهلي هذول

_ليش هو ينلام اليحن على اهله ويشتاقلهم بس شنسوي ياعمري مالنه غير الصبر بلكي ربي يفرجهه عن قريب وترحين لاهلج ولو راح اشتاقلج بس ميخالف انطيج رقمي ونضل نتواصل تمام

_تمام حبيبتي انشاءلله 

_يله هسه مسحي دموعج الحلوه واخذي نفس وتونسي شمدريج يجوز بعد ماتطلعين هيج طلعه ويانه من ترجعين لاهلج 

_ههه ماعرف والله يجوز

_ههه والله

ضلينه نباوع فتره على الاجواء وشفنه ولد بعمر سلام اخوي لازم جرو جنه دبدوب صغيرون شحلاته شافته اسراء وكزكزت عليه ضربتني بيدي خفيف وكالت وهي مركزه بالنظر اله..

_شموخ بسرعه روحي جيبي نقالي خلي اصوره ولج شوفي شحلاته

_هههه اي حلو كلش يله رايحه اجيب النقال 

_بسرعه ولج

_اي اي

عفتهه ورحت اركض لمكانه الكاعدين بي جنه وصلت وسمعت راهب وخالتي يحجون وبهتت ملامحي واختفت الابتسامه من وجهي لمن سمعته كاللهه..

_ماعرف يوم اذا المفروض احجيلهه لو لا احس تعودت عليهه ماريدهه ترجع

_لا يمه مايصير شمهما تكون متعود عليهه وماودك ترجع لا تسوي هيج خلي نفسك مكانهه وشوف اذا جنت متاني اهلك على نار وشخص يضم عنك وجودهم شيصير بيك 

_اعرف يا امي بس متردد احس راح افقدها للابد لو رجعت لاهلهه

_هسه همه بكربلاء بعدهم غير

_اي لان ابوهه جان داخل غيبوبه وهسه ....

حجه هيج لو فرفحت روحي فكيت عيوني بصدمه ورجف جسمي وصرخت بي..

_بابا شبي وينه بابا ليش داخل غيبوبه وينهم راهب ليش ضميت علي مكانهم اذا تعرفه خالتي ليش ضميتوا عني وانتي تدرين شكد مشتاقتلهم ليش ضميت علي شنو غايتك من سويت هيج شنو تريد مني 

_اهدي شموخ مابي شي ابوج والله وقبل يومين كعد منهه وصحته زينه

_ليش ماكتلي لييييش شسويتلكم انه ليش حرمتوني من اهلي وانه عايشه على امل اسمع لو خبر واحد عنهم شنو غايتك راهب شجم دوب جنت ناوي تضم عني هل سالفه 

_اهدي شموخ احنه بمكان عام وبعدين انه نفسي اليوم ياله بلغوني الشرطه ومن رجعت للبيت ردت اكلج بس طلعنه وهسه جنت كاعد افضفض لامي وكلامي كله الحجيته مايعني ان راح اضم عنج مكان اهلج 

_هسه تاخذني الهم مايهمني الفكرت بي انت جنت ناوي تضم عني مكانهم وهذا المهم يعني لو ما سمعتكم جان مادريت العمر كله عبالك مو

_لا والله مو هيج ردت احجيلج باجر او اليوم من نرجع للبيت بس ابد ماردت اضم عنج لان ادري بهذا الشي ماراح يدوم واول تالي ترجعين لعمامج حتى لو ضميت عنج مكان اهلج

_استغفرالله ربي ليش كاعد يصير وياي هيج ليش لك انه وثقت بيك وسلمتك امر اهلي وكتلك وانه حتى مو بعقلي ان توديني لاهلي وكتلي حاضر

واوديج ليش جذبت ليش خلفت بحجايتك يعني بدال ماتجيلي ملهوف وتكلي لكيت اهلج كاعد هنا وتخطط تضم عني خبرهم

_ماكاعد تسمعيني ولا تفهمين كلامي ونيتي شنو لانج معصبه اهدي وبعدين نحجي بالبيت ماشي

_يا بيت تحجي عنه مالي فوته بعد لغير بيت اهلي هسه تاخذني لاهلي ولا تجذب وتكول مو هنا لان سمعتك وعرفت ان بابا هنا لان داخل غيبوبه 

_وين اخذج بنص الليل وطريق بعيد اهدي وباجر الصباح رباح اخذج الهم من عيني

_لا ماريد مستحيل اضل يوم واحد بعد بعيده عنهم ماريد هل ليله انام دمعتي بعيني مثل كل ليله مرت بدونهم هسه تاخذني راهب هسه

_تمام اخذج امري لله بس نصي صوتج تمام

_تمام يله اخذني الهم

_تمام يله امشي 

سكتت لمن صارت صدك وراح اروح لاهلي وافاركهم ماجنت مستعده افارك خالتي والبنات رغم هل شي بس فرحتي باهلي مامطيتهه لاحد

باوعت لخالتي بحزن وبلعت غصتي احس بلعوني تجرح من القهر والصياح رحت عليهه شبكتهه وبقت تمسد على ضهري وتكول..

_ماجنت ادري بمكان اهلج الا قبل دقايق وراهب هم يمه ماجان يدري الا اليوم دازيله المركز رساله بمكان اهلج وهو جان متردد لان حسبج مثل اخته

وتعود عليج وماجان يدري شلون يحجيلج بس صدكيني وليدي واعرفه مستحيل يصير اناني ويضم عنج مكان اهلج..

:- ابتعدت عن حضنهه مسحت دموعي وبست راسهه وابتسمت برضى وكتلهه عاذرتكم رحت سلمت على البنات واسراء ضلت غصتهه ببلعومهه

لان حيل تعودت علي وانه كذلك وصني على نفسي وباوعت لراهب ودرت عيني عنه ماودي اشوفه ولا احجي وياه كلمه لان حسيت بشي

غريب صار بكلبي اتجاهه وهذا اكثر شي اكره يصير بيه ومستحيل اخلي يصير اتجاه اي شخص غير اهلي .. دخلنه للسياره وبقن هنه بالمتنزه تالي يرجع عليهن حرك

السياره والطريق كله اباوع للشارع وافكر شلون راح يصير لقائي باهلي بابا ليش دخل غيبوبه وشكد صارله وشلون صحته ماما شحوالهه هسه بوضع

بابا وبفراكي ..كل هل افكار حاوطتني وبالاخير فزيت من صفنتي على كلام راهب يلي طبع بفكري سنين طويله..

_شموخ صدكيني والله يابنت الناس ماجنت ناوي اضم عنج بس جنت متردد وماعرفت اتصرف ماردتج ترحين بهاي السرعه بعدما تعودت على

وجودج شموخ يجوز هل شي مايبين علي بس من اليوم النخطفتي بي وانه افكر بيج وصرتي جزء مايتجزء من عقلي و اعرف انج بعدج مراهقه

وصغيره مالج بسوالف الحب وغيرها وهذا الشي يلي خلاني اتردد اكثر لان لو جبيره جان كدرت اعترفلج واتقدملج على امل تقبلين بيه بس انتي

بعدج صغيره وبالج مشغول بالدراسه وبطموحاتج فماكدر اشغل بالج بهاي السالفه واكلج بيهه ويتشوش عقلج بس بعد ماعدي وسيله غير ان احجيلج .. ولو تدرين شصاير بحالي هسه وانه

كاعد اوديج لطريق راح ارجع منه بحدي بدون وجودج ..يعني اذا دخلتي للمستشفى بعد ماشوفج وماعرف اذا الدنيا ضامتلي لقاء وياج

بيوم من الايام بس كل الاريد اكوله الج اني حبيتج وردتج حلالي لوما صغر سنج وراح ابقى انتظر عسى ولعل يجمعني بيج النصيب  

_تدري شنو اكثر شي اكرهه بالدنيا

_شنو

_الشخص اليحبني غير اهلي ان جان غريب او قريب بمجرد مايحبني ويعترفلي او يبينلي هل شي اصير اكرهه وانفر منه

_و هسه

_هسه كذلك رغم ماكرهتك بس نفرت منك واحس بضيقه وانه كاعده وياك بنفس المكان 

_شموخ

_اسفه راهب بس انه الحب والزواج شايلته من قاموسي

_وانه خليتج الوحيده بقاموسي وبعد لو قاموسي لو قاموسج اليمشي 

_راح ابتعد اصلا مستحيل نلتقي مره ثانيه

_شمدريج ماراح نلتقي

_ماراح اسمح انه بهل شي واذا صار اريد اطلب منك طلب اذا صدك وساعتهه التقيت بيه وشفتني لا تخسر علي رصاصه وحده

_ليش

_لان افضل الموت على ان احب او انحب 

_لهل درجه كارهه الحب لو كارهتني

_لا اكره الحب وتلعب نفسي منه والافضل ان تنسه كلامك هذا اليوم وتنسه هل مشاعر لانهه اساسا مؤقته وتنسي ويه الايام ونصيحه اهتم بمستقبلك لان الحب مايوكل خبز 

_هيج رايج

_اي هيج واتمنى تتوفق بحياتك بدون حب وزواج

_بدون حب ماعتقد اتوفق وانه بدون زواج اساسا راح ابقى منتظرج 

_ماراح تاخذ مني مقابل لحبك راح تتعذب وتندم على حبي 

_تمام اذا هيج خلينه نشوف وحده منا منا اكضي وياهه وقتي لحدما تجين

_استغفرالله 

_ههه شبييج

_ليش تعاند

_اريد اشوف وين راح يوصل كرهج للحب بله..

بقيت اباوعله وهو عيونه مثل الناعسه ومدمعه وشفايفه  نشفت وكل شوي يبلع غصته جنت مخليه بالي ان الشخص مستحيل يحب صدك وان الإعجاب الاول يبقى مجرد وماله اساس ولا راح يستمر ومع الوقت راح

يختفي وحاولت اقنعه بهل شي واقنع نفسي بس البداخلي جان عكس كلامي لانه اول شخص يحبني واول شخص يعترفلي تمنيت ابقى بداخله تمنيته يتذكرني كل يوم وكل لحظه وماينسى بيوم سوالفنه القليله وكعداتنه العصريه 

تمنيت ابقى اشوف لمعه الحب يلي بعيونه اتجاهي ولو بعد مانصير شياب والله كتبلنه لقاء وكل هذا بقى رغبه بداخلي ماعترفت بيهه لنفسي ولا للكلبه عاشكني وعيونه تترقبني بصمت.. تنهدت ودرت وجهي عل جامه وحجيت مغيره الموضوع..

_يمته نوصل للمستشفى 

_هاي وصلنه

_يله اودعناكم

_الى اللقاء واشوفج بخير

_ماراح تشوفني مره ثانيه 

_متاكده

_اي 

_واذا شفتج

_اخلي ابوي يصوبك بالبندقيه 

_هههه

_يضحك بعد

_احبج

_اكرهك

_اااخ كلبي

_يله مودع بالله واخذ بنصيحتي لا تنساهه

_انشاءلله ماراح انساج

صفنت بوجهه وماعرفت على ايش انتبه وازعل على تضاهره ان ماضايج لو على صوته المخنوك لو ريجه اليبلعه بصعوبه لو نفسه اليصعد وينزل بسرعه لو

عيونه اللمعت الدمعه بيهه ماعرفت احتاريت ونزلت عيني .. صح اكره الحب واليحبني بس هو جان اول حبيب رغم توترت

وتضايقت ومسلتت بالحجي بس تمنيتله يتوفق بحياته ويلتهي بمستقبله .. نزلت من السياره تمشيت لداخل المستشفى والتفتت لكيته

ساند نفسه عليهه وبيده جكاره وعيونه تلمع ويه لمعه النار وهاي جانت اول مره يدخن بيهه تفاجات للحضه وحسيت بغصه درت عيني عنه بتردد ومشيت ببطئ وانه احاول انفضه من افكاري نهائيا ومن راسي

دخلت للاستقباال سالت عن اسم بابا بالاستعلامات وكالتلي رقم غرفته نسيت كلشي والتهيت بلهفني على اهلي رحت امشي بسرعه وادور بين الغرف ودموعي تهل مثل المطر

بدون ماحس جسمي وكلبي يرجف مثل السعف واطرافي بردت واخيرا وصلت لغرفته دخلت امشي ببطئ وتردد باوعت وشفت الغرفه فارغه بهتت

ملامحي وصفنت بحيره ردت اطلع وانفتح الباب ودخلت امي وهي سانده بابا شافوني وصفنوا لحضه صحتلهم بصوت مخنوك وركضت عليهم

حضنوني ثنينهم وماشالتنه الدنيا طحنه عل كاع مهدود حيلنه وهمه يشدوني لحضنهم اكثر وصوت البجي يتعالى اكثر...

شهم : كسرتي ضهري ولج بويه وين رحتي وعفتي ابوج ولج عزيزتي وينج عن حضن ابيج وينج يبعد بيتي 

سماء : هاي انتي بنيتي شموخ هاي انتي ينظر عيني الحمدلله ياربي رجعتلي بنيتي دخيلك رحمتك وسعت كل شيء دخيل اسمك يارب دخيل

اسمك جنت واثقه راح ترجعلي بنيتي الي ولج يمه شموخه حبيبتي عليتي كلب امج وابوج عليج يمه

_بابا ماما اشتاقيتلكم روحي تمرمرت على شوفتكم بس خلاص رجعت انه الحمدلله ربي حفضني ورداني الكم سالمه والحمدلله كحلت عيني بشوفتكم 

شهم : ااخ يابويه الحمدالله دخلت غيبوبه ولا باقي مفاركج كل هل وقت جان زرتيني بكبري هسه

_اسم الله عليك يروحي بيه الموت ولا بيك لا تحجي هيج اروح فدوا لتراب رجليك

سماء : اسم الله عليكم ماتشوفون شر يارب يله كوموا من الكاع بارده عليكم كوم شهم مو زينه على الرطوبه اروحلك فدوا

:- كمت وكومت ابوي ساندته انه من جهه وامي من جهه كعدناه عل جربايه وكعدنه بصفه اخذنه ثنينه لحضنه وبقه يبوس براسنه وجسمه يهتز دليل على بجيه بصمت..

رفعت راسي باوعتله ومسحت دموعه بيدي وبست راسه وايقنت ان 

"ابوي الوحيد الراح يحبني طول العمر بدون مقابل وهو الوحيد يلي يستاهل الحب بهاي الدنيا" 

ضلينه هيج لحدما شبعنه شوكنه طلع الفحص مالته والحمدلله مابي غير الصحه والعافيه سوينه اجراءات المستشفى واجه عمو ساجد شافني من بعيد وصفن ورحتله بسرعه سلمت عليه وهو حضني حيل وكال بفرحه..

_شموخه بعد عمج هاي وينج كطعتي كلوبنه عليج ماضل مكان مادورتج بي وين جنتي ماتدرين شصار بينه على فراكج بنيتي

_والله حتى انه انكطع كلبي عليكم عمو بس شسوي ضعت ورحت لبيت مره حبابه هيه وبناتهه وضليت عدهه لحدما لكيتكم 

_اي وتالي شصار شلون دريتي بمكانه 

_خلينه بالاول ناخذ اهلي للفندق واسولفلكم لان سالفه طويله

_شفتيهم اهلج 

_اي شفتهم بعد عيني عينهم شصاير بحالهم 

_اي كله هذا عليج مو زين ماصار بيهم شي يمعوده وكفتي كلوبنه

_اسم الله عليكم من كل شر 

_بعد عمري الغاليه بت الغالي يله يا بعد عمج خلي نطلع ابوج يرتاح بالفندق حتى تشبعين منهم ونشبع منج

_حاضر يله نروح

خله ايده على كتفي ومشاني للغرفه اخذنه ابوي وامي وطلعنه من المستشفى وكفلنه تكسي كم دقيقه وصلنه وصعدنه للغرفه دخلت و شفتهه فارغه فهمت تالي من عمو ان مودي مرته وجهاله

وخواني للبصره وباقي بس هو يم امي وابوي .. شربت ماي وكعدت اسولفلهم كلشي صار وياي بالملم بس طبعا بعض المواقف الصعبه ماحجيتهه الهم حتى لا يقلقون علي وادخل تحقيق وياهم..

[وهيج رح تكون اول فتره من حياتي خلصت وراح يبدي الجد بعدما اسلم القلم للبطله جنان تسردلنه الصار وياهه هل فتره]

__________

:- اتساءل الآن!! 

هل يمكن للمرء نسيان شخص يحبه؟ 

وان كان.. فأنا لااستطيع!! 

فإني غارقة في عيناه وتفاصيل وجهه

وإني لمشتاقة لسماع كلمة موجهة لي 

تخرج من بين شفتيه

....

سمعت مرة انه لم يتذكر إسمي 

أيعلم كم آلمني ذلك 

أيدري كيف جرحت تلك الكلمات قلبي وجعلته يسيل دما .. 

لا أظن!! 

لكن مع ذلك.. لاتزال هناك شمعة متلألئة كالقمر تضيء قلبي وتقول لي انه كان يتظاهر بذلك فحسب!! 

وانه يتذكرني مثلما افعل كل ثانية 

.. اريد الاستماع لها 

حقا.. انني اريد الانصات لها 

لكني خائفة من ان اصبح عبرة وليس قدوة لمن بعدي.!! 

خائفة من المجهول والمخفي!! 

وخائفة من ان تكون تلك الشمعة مجرد وهم لاأكثر!! 

.... 

صار هو مطلبي الوحيد 

صرت ادعو ربي اَن يكون من نصيبي 

واِن لم يكن فدعوته ان ينسيني اياه،

ولكن في هذه النقطة اتوقف واتحسر لأنني لا اريد نساينه!! 

وانما اريده لي.. 

.... 

اصبحت اتذكر طفولتي معه وابتسم.. 

صرت احاول تذكر ابسط المواقف واقل الكلمات التي دارت بيننا حتى ابتسم ويصبح يومي اجمل به

٠٠٠٠٠

مع كل هذا اخشى ان يكون تفكيري به 

حبًا لانني ابغض الحب من طرف واحد!! 

ولكن مع ذلك فإن تذكري اياه وحبي له يجعلانني اطير سعادة.. 

فبفضله عرفت معنى ان يعيش الانسان وهو متمني ان يلتقي بشخص يبعد عليه بعشرات الكيلومترات

وحتى وان لم يكن لهما نصيبا في الالتقاء فيكفي للمحب ان يتذكر محبوبه فقط ""

:- جو حلو وصافي بين نهايه الشتا وبدايه الصيف شمس دافيه يبث الدفو بروحي البارده ايدي على خدي وصافنه بذكرياتي ويه السلب كلبي وراح بعيد عني قبل سنه رجعت لطفولتنه وشلون جانت حياتي ويا وبدايه حبي اله ....

___قبل ٥ سنوات___

:-يوم خميس مميز مثل كل خميس مر بحياتي وهو اليوم يلي راح نزور بي بيت عمو شهم وخاله سماء ومثل كل مره طلعت باحلى طله الي دخلت امي للغرفه شافتني وصلت على محمد وكالت..

_شطالعه بنيتي جنان اسم على مسمى صلاوات على محمد هاي انتي بس من ترحين لبيت خالتج تكشخين هيج راح تجيبيلج العين

_امي هو انه بس لبيت عمو اروح وين طالعه يعني الملابس والاكسسوارات الاشتريهم البسهن بس من اروح الهم 

_اي يايمه وياج حق شنسوي لدوام ابوج متعلعلين وياه من سنين بلكي ربي يفرجهه عنه ماضل شي ويتقاعد ويصير يطلعنه ويونسنه 

_انشاءلله امي 

_يله بنيتي اذا كملتي روحي جيبيلي عبايتي من المشره 

_حاضر 

رشيت عطر وعدلت حجابي وطلعت للساحه اخذت عبايه امي ورجعت انطيتهه الهه كملنه وقفلنه البيت ورحنه لبيت عمو شهم مسافه الطريق ووصلنه فتحلنه الباب كالعاده ابنه مرتضى اجت

عيني بعينه واحس عيوني نعست من الخجل ودي اشرد وبنفس الوقت رجلي تجمدت بمكانهه دخلوا اهلي وانه باقيه امشي على كيف لحدما فززني وكال بضحكه..

_ديربالج كدامج بيض مكسر لا تنجرحين

_هاا وينه وين البيض

_ههههههاي شبيج هيج تمشين اهلج دخلو وراح يتغدون وانتي بعدج تمشين 

_لا لااا عيب شهل حجي انه ادخل 

_ههههه وصدكتي شنو

_لا ادري بيك تشاقه

_اي مبيض

_شنو مبيض

_يعني مبين بس بتحشيش

_هاا 

_شلونج 

_زينه وانت

_نحمد الله شلونهه دراستج كاعد تدرسين زين لو ملتهيه بالمسلسلات

_لا والله ادرس اصلا ماتابع مسلسلات انه بس افلام كارتون 

_شنو طفله 

_لا بس احبهم 

_وانه

_شنو انت

_هيج ماكو شي يله ندخل لا تعيط بينه امج 

_تمام ..

ماعرف شلون تحملني رجلي وابقى مسيطره على نفسي لمن يحجي وياي مرات ورغم احساسي الغريب اتجاهه بس ماعرف اذا هو يبادلني نفس

الشعور بس مامبين لان يحجي وياي عادي مايتوتر لو يستحي مني مثلما هسه انه متوتره ومستحيه منه ودائما يجيبلي شغلات جان ويكلي هاي

اشتريتهم لشموخ ومايعجبنهه او ماتريدهن وجبتهن الج حتى صرت اخلي كل شغلات اليجيبهن الي بصندوق وحد وكل وحده كاتبه عليهه رساله بشعوري لحضتهه واذا انلكف بيد امي تسويني تمر

مفصم .. المهم دخلنه للبيت وسلمت عليهم وكعدنه شويه تالي اخذتني شموخ لغرفتهه ورتني ملابسهه الجديده للعيد تالي كعدت كبالي وكالت..

_بعدج تحبينه

_هاا منو

_مرتضى منو بعد 

_شموخ حبابه كليلي هو يحبني لو لا تدرين بالي مشغول كله بي وماكاعد انتبه حتى لدراستي واسال نفسي دائما هو يحبني لو لا واذا مايحبني شسوي

_ تفكرين وتالي من ترسبين تضلين تبجين 

_مو بيدي خيه عقلي مقفل عل دراسه ومشغول بس بي انطيني حل نصحيني شسوي انتي كلتي لا تعترفين بحبج اله وبقيت ساكته بس هل شي كاعد ياكل بكلبي ماكاعد يخليني ارتاح

_ماعرف هل شي صح او خطا بس راح احجيلج شغله عنه ومنهه وقيسي اذا يحبج او لا وبعدها توعديني ان تنتبهين لدراستج وتعوفين هاي الشغله كلهه تمام

_اوك تمام

_انتي بعد تدرين بي من يجيبلج مرات شغلات وحلويات مو

_اي ويكلي جبتهن الشموخ ومارادتهن وجبتهم الج

_جذاب اصلا هاي الشغلات اليجيبهن الج كلهم مالاتي وجنه دائما نتعارك لان يبوكهن مني 

_لا تجذبين

_وداعتج لان مصرفه مايكفي الكم ثنينكم مرات يبوك من ملابسي الاشتريهن او حلوياتي ويجيبهن الج خاصه الاكسسوارات بس انه اكول خطيه ماكشف حقيقته كدام جنان ويتفشل وياهه 

_ لا صدك شموخ الله عليج هو هيج يسوي يعني ياخذهن منج مو هوه يجيبهن الج مثلما يكول

_اي والله شبيج اسالي امي اذا ماتصدكيني

_ههههه لا مصدكتج مصدكتج بس ليش 

_يحظي الولد ليش يجيب هدايه بالبوكات لبنيه..

تركت ايدهه واخذتلي صفحه اصفن بيهه والابتسامه شاكه حلكي وكلبي احسه يرفرف جان هل شي كافي بالنسبه الي ان اعرفه يحبني او

معجب بيه او حتى لو جان بس اهتمام جنت مكتفيه بهذا الاهتمام مجهول النيه وصار حبي يتضاعف اله جنت لازمه السيطره على كلبي ان

مايغرق اكثر بحبه بس بعد علمي باهتمامه هذا اطلقت العنان عن مشاعري صار الحب يبين من لمعه عيوني ..

"اااخ يا عشك الكرايب ينفضح باول غده " 

طلعنه نتغده وانه الابتسامه كوه لازمتهه وجهي مبتسم وكل شوي عيني تروح لمرتضى واتذكره من يجيبلي شغله ويحجي باحراج وخجل وابتسم اكثر وشموخ كل شوي كرصتني

لان امي وخالتي انتبهوا علي وصار الخفت منه لمن رجعنه للبيت وامي دخلت وراي للغرفه لزمتني من ايدي وكعدتني عل جربايه وصارت مقابيلي وكالت بقلق...

_يمه جنان صاير وياج شي اليوم

_لا امي شنو مثلا الصاير

_يعني شي مفرحج او كلمه وصلتلج

_لا ليش تسالين

_يمه انه امج واعرف بنيتي من يصير وياهه شي ولمعه عيونج مساع عل غده اعرفهه كل زين وعايشتهه اذا اكو شي بكلبج يمه لا تضمينه كوليلي بي لا تغشميني عنج

_لا ماكو شي امي بس جنت فرحانه لان شفت شموخ

_شموخ لو مرتضى

_هاا لا امي لا مو هيج والله انه...

_اعرف يمه لا تكملين ماريدج تجذبيني شفت كلشي ولا تجذبين عيني شفتج شلون عيونج تلمع لمن تباوعين لمرتضى واكثر شي لمن طلعتي من غرفه شموخ كليلي صار شي او سمعتي شي بخصوصه

_هاا اي لان شموخ حجت عليه وهي معصبه منه وكالت ياخذ حلوياتي واكسسواراتي وينطيهن الج لان ماعنده مصروف يجيبلج 

_وبعد

_بس هاي وضليت اضحك من اباوعله لان من يجيبهن الي يكلي جبتهه لشموخ ومارادتهن كلت انطيهن الج

_وانتي شنو فهمتي من كلامهه هذا

_مافهمت شي امي سدي الموضوع

_احجيلي بنيتي حتى اعرف اساعدج البنيه بعمرج تكون صغيره وتجهل هواي شغلات لازم واحد جبير ويعرف مصلحتج ينصحج لان بهيج امور وعمر

سهل البنيه تطيح بالغلط وانه يا يمه ماريد انلام لان ماربيتج وعلمتج ونصحتج زين بيوم من الايام

_انشاءلله امي

_يله احجيلي كلشي بكلبج وانشاءلله انه تلكيني ناصح الج وتدريني اريد مصلحتج يبنيتي وابد مامعارضه البكلبج لان اعرف هل شي هبه من الله وفطره الانسان ان يحب وينحب بس بعقلانيه

_شكرا امي خفت ماراح تفهميني وراح تمنعيني من الروحه لبيت عمو شهم مره ثانيه

_لا ليش تدرين بينه انه واختي سماء من الصغر تمنينه تصيرون نصيب لبعضكم وتنجمعون واذا ربي كاتب الكم نصيب احنه اسعد الناس تلكونه بيكم

_احبج امييي

_هههه بعد روحي بنيتي انه هم احبنج..

اخذتني لحضنهه وبقت تمسد على ضهري وانه نزلت دمعتي على خدي جنت خايفه ان تمنعني منهم او تشد وياي او ترزلني بس الشفته منهه

عكس تفكيري تمام وطمن كلبي حيل من ناحيتهم ابتعدت وصرت احجيلهه من لما جان يجيبلي الحلويات وشنو يكلي ولحد هسه لمن يوكفني

ويسولف وياي عن اخباري وهي تستمع الي بكل انتباه كملت ونصحتني نفس نصيحه شموخ ان انتبه لدراستي واعتبر هل حب مضموم بزاويه من

زوايا كلبي واذا النه نصيب سوه يصير ولو بعد الف سنه واذا ماكو رب العالمين بعدي اسمه راح يشيل هل حب ويه الوقت من كلبنه ويجبر خاطرنه

بالاحسن .. ارتاحيت كلش وسمعت نصيحتهه واتبعتهه حتى صرت ماروح وياهم لبيت عمو شهم لفتره حتى تهده مشاعري ومابينهه للعلن لمن

اشوفه بس عبث هو اليحب دائما يبين حبه بعينه الناس تدري بي وهو مايدري بنفسه حتى عينه تروح دوم لمكان حبيبه..

بس كدرت بعد فتره قصيره اسيطر على كلبي والتزمت بدراستي ونفذت نصيحه امي وعرفت ان الحب شي والدراسه ومستقبلي شي ثاني حسيت

اني كبرت وصرت واعيه بهاي الامور ومو اي شخص يعرف البكلبي بعد مرور تقريب السنتين

صار يلي جنت ماحاسبتله حساب لمن بيوم جنه كاعدين بين عمو شهم و مرتضى حجه ويه عمو  وكال بدون سابق انذار..

_احم بابا بعد انه السنه الجايه انشاءلله اعيد سادس واريد اطلع بره ادرس يم اخوي محمد

_شنو كلت شني دراسه وبالخارج هم منيلك هل حجي بويه

_اي جا بويه شنو مو ابنك انه مو من حقي اشوف مستقبلي تريدني ابقى هنا ادرس واتعب تاليتي اكعد واسكت بالبيت لو اشتغل عماله

_بس انه مايوم كتلك او وعدتك تكمل بالخارج وعلى سالفه محمد وفراكه النه كل هل سنين قررت ماخلي احد بيكم يدرس بالخارج بعد ادرس هنا

بكليه ضباط وتوظف وهاي هيه مثلا اذا طلعت بالخارج ودرست شراح تصير دكتور لو مهندس

_اريد اصير قاضي

_قاضيي؟؟

_اي بويه ليش مو بعينك لو مالي حق بهذا الشي

_الك حق بس يهون عليك تعوف امك وخوانك وتروح للخارج ٧ سنين او اكثر يابويه

_مايهون علي بس بويه هذا مستقبل ولازم واحد يحرص على مستقبله حتى ماخلي اهلي بعازه لازم يكون عندي سلطه وقوه تحكم شمهما كانت الظروف

_واذا اجيتلي بيوم وكتلي حجايه محمد بان تريد تستقر بالخارج وانك تعودت وضمنت شغلك ومن هل تمسلت

_لا بويه اوعدك وعد زلم بمجرد ماكمل دراسه هناك واضمن مستقبلي ووظيفتي بالعراق ارجع وابقى يمكم بعد العمر كله لان اعرف انه السند الوحيد الكم لو مارجعلنه محمد

_هاذهو يابويه بس ماوافق الا توافق عزيزه كلبي الكاعده تسمع ودمعتهه بعينهه وطبعا عندي شروط توافق عليهه ياله اسمحلك تروح واساعدك

_امي علي خليهه انه وليدهه اكيد ماراح توكف بوجه نجاحي ومستقبلي وتدريني شكد احبهه ومافاركهه وتاليتي راجع لحضنهه..

:- بلعت غصتي لمن حجه هيج ويه ابوه فعلا هو ابني ومايهون علي اوكف بطريق مستقبله وادمر حلمه بس شسوي انه ام ومو بيدي وليدي عزيز

على كلبي مرتضى اعز جهالي من صغره احس الاشهر الفاركته بيهه وهو صغير خلت فراغ بداخلي

ماكاعد يملي حنيتي وقربي اله كل هل سنين مو نوب يبتعد عني وماشوفه بعد .. ابتسمت ابتسامه مزيفه وحجيت وياه..

_يمه وليدي انه ماكدر على فراكك ولا اكدر امنعك من شي بس بكيفك حبيبي هذا مستقبلك وانه ماكدر امنعك واخليك تكعد يمي العمر كله فلا تكطع بيه وانت تدريني ماعيش بدون طلتك علي 

_وعد يمه ماكطع بيكم واحاول انزل بكل فرصه تصحلي واضل يمكم واكوو نقالات واكدر اخابرج فيديو كلما تشتاقيلي وحتى لو جنت نايم تعبان طالع مافوت الوقت وماتصل عليج راح تعتبريني يمج موجود وكبال عينج

_انشاءلله يمه هاذهو التشوفونه انت وابوك بعد روح والله يرضى عليك ويوفقك بدراستك وينولك التتمناه امين رب العالمين

_يبعد حيلي امي الغاليه الله يحفظج ويخليج النه يارب..ها بويه شكلت هسه عزيزه كلبك ووافقت بعد شنو شروطك 

_ ادريهه توافق بس غصب عنهه لا تظن اكو ام حنينه على جهالهه وتحبهم تقبل تفاركهم حتى لو لحضه وعندي الك جم شرط قبلت بيهن قبلت وان كلت لا تكعد وتسكت

_حاضر لكل شروطك انه بويه اهم شي اروح ادرس واحقق الاريده

_اولا كل عطله نهايه ونص السنه تنزل نشوفك طبعت بالسادس معذور ماريدك تنزل بالعطل ابقى راجع بيهن فقط من تدخل جامعه تبدي تنزل ايام العطله كلهه عدنه 

_وانه موافق

_ثانيا ماتروح لقاره ^^^^^ لان هناك الوضع مو زين وعنصريه ويكرهون العرب فاريدك تروح للقاره العايش بيهه اخوك محمد تدرس وتداوم جامعه وتعيش وياه مو بالسكن الجامعي

_وانه موافق اذا اخوي قبل اعيش وياه ماعندي اشكال انه

_يقبل مالك شغل بي انت بس امشي وراه وطيعه ولا تضل تسخت وهو يقبل 

_حاضر بويه

_اي شكوى تجيلي من اخوك محمد بخصوصك تحسب حسابك راجع للعراق انت ماريده بيوم يجي يكلي يمشي ويه عفطيه وشرابين عرك ولا بيوم

يكلي متعارك ومسويلك هوسه ويه شخص تره هناك مو نفس هنا كلب على كلب لا هناك اذا تعاركت وياه يضل شايلهه الك لمدى العمر وعلى غفله يغدر بيك 

_انشاءلله 

_ثالثا اخبارك اخذهه من محمد بالتفصيل ماريد تتحاجه وياه وتتعارك اذا سويت شي غلط واجه حجالي انت ابني وهو ابني 

ومثلما هسه اراقبك محمد هم بوقتهه راقبته ولمصلحتكم هذا وبمجرد ماتكمل تعليمك وتخلص نهائي ترجع للعراق تشوفلك تعيين هنا وتستقر 

_هوه هيج ناوي اسوي بويه

_سوالف الحب والزواج شيلهه ابد من راسك لا تجيلي باجر وتكلي حبيت اجنبيه واريد اتزوجهه رغم هذا الشي خاص بيك بس اعرف اليحب يمشي

ورا حبيبه وماعندي مشكله لو جبتهه وياك وتزوجتهه طبعا اذا جانت مسلمه او تسلم بس مال تكلي حبيتهه وتزوجتهه 

واريد ابقى هناك يمهه كطنه واشلعهه من اذانك هاي تمام ساعتهه اخيرك بينه وبين العيشه بره وانت بكيفك بعد

_لا بويه ابد ماوصل لهاي السالفه مالت الزواج اصلا كلهه شايلهه من راسي وتدري انت ماترهملنه غير بنت ولايتنه يا اجنبيه يا خبر 

_هاذهو بويه اذا موافق على كل هاي الشروط وبوجود كل هل شهود توكل على ربك وابدي ادرس وجهز نفسك للسفر اول ماتعطلون

وصوغه عرسك راح اسويهه على شكل راتب واحولهه كل شهر مصرف الك وادزهه بالبنك وتصرف بيهه بحكمه بعد 

_انشاءلله بويه الله يخليك النه ومايحرمنه منك يارب 

_تعيش يابني

:- كام باس راس عمو ورجع كعد بمكانه وانه كل هل نقاش الدار وعيني عليه احس ماراح اشوفه بعد اذا سافر ٨ سنوات هواي مو شويه انه ٦ ايام

اموت على شوفته واتاني يمته اكحل عيني بطلته شراح يصبرني كل ٦ اشهر ياله اشوفه لا واول سنه تنكطع اخباره عني فرد مره .. اختنكت وصرت اجر

النفس كوه احس عيوني صارت تصرخ بحبه والكل سمع صريخهه نزلت عيوني بسبيل ان ماتفضحني وهمزين سحبتني شموخ واخذتني لغرفتهه اول

وقتهه ماتحملت ردتلي بس حجه او فرصه حتى انزل دموعي الغصيت بيهن .. اول مادخلت حضنتهه وصرت ابجي بصوت عالي وهيه تسكت

بيه حتى لحد يسمعنه بالكوه والف يا ويلاه كدرت اسيطر على شهكاتي وابجي بهدوء .. صعبه حيل صعبه اليحب من طرف واحد احس متقيده حتى

مالي حق اعاتبه او امنعه او اتواصل وياه ابتعدت عن حضن شموخ وباوعتلي بحيره هزت راسهه باسف وراحت طلعت بره ماعرف ليش طلعت

وماهمني التهيت بفكري وبحيرتي شي بداخلي يكلي روحي كليله انه احبك وماتحمل فراكك وشي ثاني يمنعني من هل شي كلهه لحضات ودخلت

شموخ للغرفه والصدمه وياهه مرتضى درت وجهي عنهم ومسحت دموعي وهو كال بقلق موجه الكلام لشموخ ..

_شنو شصاير شموخ ليش جبتيني هنا وليش جنان كاعد تبجي صاير شي 

_ماعرف انت اسالهه راح اكعد ادرس انه 

_جنانه شصاير ليش تبجين اكو احد كاعد يضايقج او حاجي وياج بالمدرسه او بالشارع 

_ها لا مابيه شي مرتضى مالك شغل بحجي شموخ مابيه شي بس زعلت على خالتي سماء لان راح تفاركك 

_هههه متاكده 

_اي متاكده

_جنانه 

_هاا

_ديري بالج على دراستج كون لمن اجي بعد سنوات الكاج باعلى المراتب وانه راح اضل اسال عنج امي اذا كلتلي جنان رسبت بدرس اعلكج بالبنكه خوش

_ههه انشاءلله ماراح اخيب ظنك واصير مجتهده بدراستي

_اعتبره وعد هذا 

_اي 

_زين ماعرف انه شنو تردين تصيرين

_مبرمجه 

_حلوو جا شوفي اذا اجتهدتي وصرتي مبرمجه اشغلج عندي لمن ارجع تمام وتدريني انه شكد سخي يعني راتبج معدل يجيلج

_هههه اي ادري بيك ادري 

_هسه متاكده هاي الدموع على امي مو صاير شي

_لا والله ماصاير شي اسال شموخ حتى 

_ماريد اسال احد اريدج انتي تحجيلي اذا بيوم صار وياج شي صح راح ابتعد انه بس بالي راح يبقى يمكم واذا صار وياج شي بس وديلي خبر ويه شموخ او امي وانه اتصرف 

_شلون مثلا تجي للعراق

_لا هاي للطوارئ الجيات بس عندي معارف هنا واصدقاء يفزعولي لمن احتاجهم بشغله

_هاا تمام

_ايييه ايييه بعد محد يجيبلج شغلات ماتريدهن اخته ..

حجه هيج لو طاحت بلوه على راسي جيب اليسكت دموعي بهاي اللحضه مادري شصار بيه لمن نزلت دمعتي كباله مشاعري تخربطت احراج

على خجل على فشله على حب على حنان اشتياق مسبق ماكدرت اجزم هاي المشاعر بصيغه وحده فقط اكدر اكول ان كلبي التحكم بيه بهاي اللحضه وحجيت بدون وعي لمن سالني..

_ليش تبجين هسه 

_لا تروح مرتضى اذا رحت بعد محد يجيبلي حلويات محد يسال عن دراستي مرتضى عفيه لا تروح

_هههه خلاص اهدي جا شكد مصلحجيه علمود الحلويات ماتردين اروح

_لااا والله موو هيج بس

_هههه خلاص اشاقه وياج شبيج كافي بجي اول مره اشوفج هيج تبجين جا شكد عزيز انه طلعت على اهلي واحبابي

_لا تروح ماشي

_ماكدر وداعت امي لازم اروح جنانه اذا ابقى هنا كلشي ماحصل وحلمي يبقى غصه ببلعومي وانتي اذا تتمنيلي الخير وتردين ارجع بسرعه ادعيلي ربي ييسرلي اموري هناك واكدر ادرس واكمل بدون مشاكل 

_تمام راح ادعيلك هواي وبكل صلاة ربي يسر امورك ويرجعك النه بسرعه

_هههه تمام جا معناهه راح اروح وانه مطمن ربي استجاب لدعاءج 

_هههه انشاءلله 

_هسه نهده ونكفي من البجي ونكوم نغسل وجهنه تمام 

ابتسم بوجهي وكمت للحمام باوعت لروحي بالمرايه وجهي صاير احمر من البجي والخجل حتى صخن صفنت بكلامه وكلبي صار يرفرف مثل

الحمامه الحزينه ياربي والله احسه يحبني ويهتم لامري بس ليش ماكاعد يكلي ويعترفلي بيلي بكلبه معقوله انه يتهيالي وهذا حبي كاعد يعكس على

عيوني واتخيل بحدي يعني لو هو مايحبني شكو مهتم ان بجيت او لا ليش يتعامل وياي بلطف شنو انه بالنسبه اله .. ياترى راح يفتقدني ويشتاقلي راح

يسال عني لمن يتصل على اهله .. غسلت وجهي وجريت نفس وطلعت مالكيته موجود باوعت لشموخ بحزن وكالت..

_بابا صاحله وراح وكال انطيج هاي الورقه 

_شنو بيهه

_ماعرف شوفي 

اخذت الورقه منهه بتردد وفتحتهه لكيته راسم ايموجي مبتسم وكاتب فوكاه ..

" ابتسمي دائما وليضحك قلبك فرحا جنان انتظريني عل موعد" 

ابتسمت وماطخت بالي شنو يعني انتظري على الموعد باوعت لشموخ ووريتهه الرساله وسالتهه عن القصد باخر كلمتين تحمحمت وجاوبتني ..

_يعني يكلج لا تزعلين وخليج فرحانه وعايشه حياتج بسلام وانتظري رجعتي هيج القصد من الرساله كلب كلبي

_ والله هيج يقصد

_لا العفو منج يقصد ان ضلي ابجي ولطمي وفكريني حتى مارجع بسرعه 

_لا اسم الله عليه لا تحجين هيج

_جا افتهمي القصد لا تطعيني عن طوري بسوالف الحب مالتكم

_عفيه شطوره هسه اخذي رسالتج وغسليهه وشربي مايهه وعوفوني ادرس رحمه لجدكم باجر عندي امتحان وشيبي مشعول

_وهسه انتي عندج شيب يبعد اختج

_اي والله طلعلي شيب من كثر قصص الحب الاسمعهه نوب تكثر ماتنقص يووع

_اشوفج بله باجر ماتحبين

_الا اذا تخبلت الله عليج اذا كتلج بيوم احب شخص وديني للفحص العقلي تمام

_الا اسويهه وشوفي

_الله يبعدنه 

_هههه يله درسي اليكول داخله علمي ما جنه ادبي وبس درخياات

_تدريني اكره ماكره الدرخيات انه انطيني كيمياء احياء فيزياء شجابني للاجتماعيات والادب خرب شكلي هم

_اوك حبيبتي 

عفتهه مخبوصه بالتاريخ وطلعت يمهم بالصاله اجت عيني بعين مرتضى ابتسم بوديه ورديتله الابتسامه باهته مايهون علي افاركه صعبه حيل

صعبه .. اجيت كعدت يم امي شويه تالي كالت امي راح تروح للسوك هيه وخالتي وبابا ياخذهم وعمو شهم يطلع وياهم يذبونه بالمزرعه بدربهم

كلهه طشت وبقيت بس انه واخوي احسان ومرتضى وشموخ ضليت كاعده اكلب بنقالي وكال احسان..

_اكلكم شموخ وين مختفيه

_طلعت للحديقه كاعد تدرس مساع جنت يمهه خطيه باجر عدهه امتحان اجتماعيات 

_هاي شنو بله خل اروح اشوفهه ..

_هاا ايي 

_جيد 

_ليش 

_مو ابوي صاحلي واجنه بنص الكلام كلت مايصير اروح فجاتا لازم اكلهه كلمه اخيره

_هاا 

_بعدج ضايجه

_اي شوي 

_لا تضوجين بالعكس اريد تستغلين روحتي دافع الج حتى تتقوين بدراستج وتجيبين معدل عالي حتى تحققين حلمج بس مو تتوظفين بمكان انتظريني حتى نشتغل سويه تمام

_ههه تمام انتظرك 

_هو اول مره تشوفني ابجي شبسرعه اني مو حلوه

_لان ابتسامتج احلى ولان الدموع ماترهم لعيونج

_هاا

_وجعا وجعت عدوينج كولي امين

_ههه امين

_جنانه 

_هاا

_ماعندج غير كلمه ها بالقاموس تردين انطيج كلمات اضافيه

_انطيني بله

_لمن اصيحلج جنانه كولي هاا مرتضى لا تكولين بس ها وتسكتين ولمن تساليني واجاوبج لا تكولين بس هاا لا كولي هاا فهمت لان اذا بقيتي تكولين ها وها تصير فهاوه

_هاا 

_يله بله

_هههه اي فهمت 

_ههه اشوه

_اي

_جنانه

_ها مرتضى

_عفيه هسه انتي عيني

_احم زين سؤال

_جواب

_انت شراح تدرس بالخارج 

_بالاول راح ارجع ادرس سادس لان دوامهم بعده مابادي نفسنه تالي ادخل كليه قانون فد ٣ سنوات وبعدها اقدر على دراسات عليا فد ٥ سنوات وتخلص باذن الله

_هاا هيج احسهه صعبه شو 

_هيه فعلا صعبه بس اذا تحب مهنه او دراسه معينه تبدع بيهه وتصير حلوه رغم صعوبتهه

_هاا تمام 

_ههه شوف الفرق بين مبرمجه وقاضي 

_اوو شجاب لجاب انت وين انه وين 

_بس بالنهايه انشاءلله نشتغل بمكتب واحد

_انشاءلله بس ليش تريد تشتغل وياي انه بالذات

_ماعرف يجوز اشتغل بغير مكان قبلك خو ماضل كاعده ٤ سنوات بدون شغل 

_اي حقج عادي تكدرين تشتغلين باي دائره او مكتب للبرمجه بس حدج لحدما ارجع ماكو عذر بعد

_ههه انشاءلله حاضر

_ايي

انقطع حديثنه لمن رجع احسان مخنوك وضايج فكرت ان سمعنه نحجي وضاج بس شكله مو مال سمعنه لان احنه دائما نحجي كدامه وكلامه كلش

عادي ومابي شي ضل بالي يمه بقه يحوس ومايعرف وين يروح لزم نقاله يكلب بي ويهز برجله اعرفه لمن يحتار ويتوتر يضل يهز برجله ساله

مرتضى شبي وتصنع الابتسامه ورد ماكو شي بس عيونه سولفت كلشي حالته مثل حاله المتفشل من شغله بله بعدين الزم شموخ واسالهه شحاجي

اخوي وشمهبد وياهه وهيه روحهه بخشمهه من وره الامتحانات .. مرت العصريه ورجعت امي وخالتي من السوك وكمنه نسوي عشه انه وياهن

واجت شموخ هم ويانه لان خلصت دراسه او بالاحرى اخذت استراحه اجت كعدت يمي وانه اكصكص بالطرشي وكالت بهمس ..

_اكول جنانه وين احسان

_بره يم مرتضى ليش

_لا هيج بس اسال

_صدك شصاير بيناتكم مساع

_ليش حجه شي

_لا بس جان مبين عليه مسويله سالفه وياج

_شحجه بله سولفيلي بالتفصيل حتى افهم

_عوفي الطرشي وتعاي احجيلج هسه امي تسوي 

_تمام 

عفت الطرشي وطلعنه بالحديقه سويه كعدنه عل مرجوحه والتفتت عليهه وسالتهه شصار بالضبط وفتحت عيوني بصدمه لمن حجتلي الصار وكالت..

_شوفي كاعده ادرس بامان الله هنا واجالي سالني شكاعد ادرس وشنو عندي امتحان باجر ومن هل حجي عاد كتله شنو عندي امتحان نوب كلي عفيه

شاطره انشاءلله اشوفج احسن مهندسه كتله انه اريد اصير محققه وهوه اول شخص اكله بهذا حلمي ابوي شكد قريبه عليه بعدني ماحاجيتله

بهدفي وردت فعله جنت ابد ما متوقعتهه منه جان يوكف على حيله ويكلي شنو محققه مال شنو عاد شرحتله شنو طبيعه الشغل والجامعه وهاي الامور وفاجاني لمن كال....

_وين عدنه بنيه تدخل بين الضباط والشرطه تشتغل 

_شنو هل حجي وبعدين ماشي اذا ماعدكم عادي انه اسويلكم الشرف بان تكون عدكم هيج بنيه 

_شموخ انتي تحجين صدك الاعرفه حلمج تكونين مهندسه بعد منو خله براسج فكره المحققه 

_عادي الانسان ماينحزر وكل يوم اله هدف وحلم جديد وانه الهندسه شفتهه ممله وماتلوكلي غير الشغله يلي بيهه اكشن ومغامرات وقررت ان اخلي هل وضيفه هدف جديد كدامي ولابد احققه

_وابوج وامج ومرتضى اذا سمعوا بهذا الحجي راح يقبلون راح يرضون بتهم تشتغل بين الزلم وبعدين انتي من عندج رهاب منهم شلون راح ترهمينهه

_ارهمهه مالك شغل واهلي انه اعرف شلون اقنعهم ومرتضى ماله علي كلمه من بعد بابا ومثلما هو طلب يروح للخارج يحقق حلمه انه كذلك عندي حلم واريد احققه عل اقل ماطلبت اطلع ادرس بالخارج هنا يم اهلي وناسي دارسه 

_لان اخاف عليج الزلم ثعالب يا شموخ مايرحمون المره التدخل بيناتهم 

_وانه مو مجرد مره عاديه انه لبوه والثعلب صدك خلي يتجرا ويتقربلي ساعتهه افترسه وافترس الخلفه وياه 

_لا شموخ فدوا كولي غيرهه عوفي هاي السالفه ولو اطيح بالخلاهه براسج الا العن ابوه 

_احسان لا تدخل ماكتلك انه بهذا الشي حتى تعرض بطريقي وتمنعني مالك حق تبدي رايك اصلا تمام

_لا الي حق مادام احبج واخاف عليج الي حق امنعج اوو انصحج وماخليج تمشين بدرب الخطا

_شنوو 

_شنو

_اي احب....

_اششش اسكت لا تحجي شي 

_ليش

_لان بساعه الاسمع منك الكلام الماريد اسمعه كلشي حلو بيناتنه يخرب ومارجع شموخ الحاليه بعد

_بس هذا الشي مو بيدي وماطالب منج مقابل بس اريدج تعرفين موقفي

_خلاص احسان كوم من يمي ماريد اسمع منك اي كلمه بهذا الخصوص واذا تريد تستمر صداقتنه وماكرهك شيل كل هل افكار من راسك وانساهه

نهائيا واذا تكرر هل شي بالمستقبل لا اشوفك ولا تشوفني ولا احجي وياك كلمه وحده تخسرني كصديقه وكبنت خاله وعم همين 

_احسن شي اكوم انه .....

شموخ : بعدها عفته ورحت لغرفتي وهذا الصار ياجنانه انه احسان اعزه واحترمه واعتبره اعز صديق بالنسبه الي واخ ماريد اخسره بسبب مشاعر

مؤقته وغبيه اتجاهي يدريني اكره الحب ليش فتح هل موضوع وياي وحاول يبينلي البكلبه تدرين وقتهه لو مكمل كلامه وسامعته باذني جان

نهيت كلشي وياه وصار غريب بالنسبه الي لان كلامه راح يضل يرن باذني وياكل بروحي لحدما يجبرني على كرهه 

_وهسه انتي شراح تسوين راح تستمر صداقتكم لوولا

_ماعرف انه كتله ينسى هاذ الشي ويطلعه من راسه واذا شفته بقه مستمر ومصر على كلامه ورايه راح اضطر ماحجي وياه بعد ولا التقي بي

_تدرين ولا جان مبين عليه اكو شي بكلبه اتجاهج وهسه صدمتي عيشتي لمن حجيتيلي اخوي المعاشرته عمري كله ماحسيت عليه ابد ان هو هيج 

_خيه الولد يعرفون شلون يسيطرون على مشاعرهم ويضمونهه وكان ماصاير شي اما البنيه فبسرعه تفضحهه عيونهه وبدون ماتحس حتى 

_اي والله ياخيه المهم انه احسان هم احجي وياه وافهمه ان كلامج الكلتي مو مجرد كلام نابع من توتر وانما فعلا تكرهينه اذا اعترف واصر على حبج 

_تمام خيه احجيله لان والله مايهون علي اخسره وانه العشت طفولتي كلهه وياكم يعني صداقتنه احنه ال٤ راح تخرب حرفيا لو صار كره وحزازيه بيناتنه 

_اي خيه احاجي ولا يهمج الا اكول شنو سالفه الهدف هذا صدك تردين تصيرين محققه جنائيه

_اي حبي هذا الاختصاص الوحيد الاحسه يناسبني لان بي كلشي احبه من مغامرات والغاز وشغلات حماسيه وحركيه واهم شي ان غالبا مايدخلن البنات بهل قسم يعني وحده من بين ١٠ زلم

_وشلون وانتي عندج رهاب

_اووف كلما احجي تكلولي رهاب انه لو تخلي هدف براسي اسحك فوك الرهاب والفوبيا وانول هدفي وحلمي 

_هاذهو جا انه وياج ومساندتج وربي يوفقج وينولج هدفج واشوفج باعلى المراتب يااارب

_يروحي انتييي ويوفقج همين 

_هسه كلمن حدد هدفه باقي بس احسانو خل نشوفه بله شراح يكون هدفه للسنه الجايه ..

جبت سيرته وشفتهه بهتت ملامحهه ضايجه من الصار بيناتهم اعرفه تعزه ومايهون عليهه تفاركه وتخرب صداقتهه وياه بسبب مشاعر تعتبرهه هيه

مؤقته وجذبيه .. تنهدت وصاحتلنه خالتي نتعشه كمنه دخلنه جوه ساعدناهن بنكل الصحون وكعدنه نتعشه بس شموخ ماقبلت تكعد سوتلهه لفه وراحت

لغرفتهه متحججه بدراستهه اعرفهه متضايقه من احسان وماتريد تكعد وياه بنفس المكان وهو كذلك حسيته ضاج وغص بلكمته بقه ينكش بالاكل لحدما

خلصنه اخذنه الماعين غسلتهن انه وخالتي ورجعنه كعدنه بالصاله يسلسون حب ويسولفون عن الشغل وغيرها .. عفتهم ورحت لغرفه شموخ

دكيت الباب وماكو صوت دخلت لكيتهه نايمه اليوم ابد ماشفناهه عدل من وره دراستهه واحسان رجعت سديت الباب ورحت للمطبخ كعدت عل ميز

وبقيت اكلب بنقالي وحسيت بشخص وراي .. التفتت بسرعه وشفته مرتضى واكف ومرتجي عل باب ويباوع باستغراب تقدم ناحيتي وانحنه سند

اديه على الميز وصار وجهه قريب وجهي حسيت اطرافي جمدت وكلبي ينبض بجنون نزلت عيوني وحجه بصوت هادئ وبي بحه..

_شتسوين هنا وحدج حزينه 

_ماسوي بس مليت وكعدت اكلب بنقالي هنا

_شبيهن

_ليش يلمعن واديج ترجف

_موو لان خوفتني من اجيت عبالي ماعرف ايش 

_رفعي راسج باوعي بعيوني

_ماريد

_جنااان باوعي بعيوني

رفعت راسه باوعت بعيونه وبدون سابق انذار تقرب علي راد يبوسني وفزيت من حلم اليقضه هذا على اثر كرصه بزندي رفعت راسي وانه افرك بزندي وشفتهه شموخ فوك راسي صافنه بيه وكتلهه..

_ااخ شبيج 

_دخل براسج جني شنو شمالج تحجين وتتمضحكين بحدج بعدج مو عل مخده تره

_يمته حجيت وضحكت ليش تجذبين 

_صارلي ساعه هنا احجي وياج وانتي كاضيتهه باحلام اليقضه مالتج الا اخرب عليج و افززج ياله تنتبهين علي

_اوو يمعوده مدري شمالني اول مره هيج اتخيل اشياء بس لا تخبلت 

_بعد وبعد هاي تصير لكل واحد بي جفاف عاطفي 

_انتي هم تصير بيج

_اي 

_والله

_والله شبيج مرات اسرح ويتخيلي واحد اكرهه كبالي ونتصارع انه وياه وبالاخر افوز عليه لو واحد كبالي نتعارك وواحد يسب الثاني واغلب الاتخيلهم مدرساتي 

_تردين الاقوه منهه

_اي بله

_انه صاعده عليه هذا الفرس يعني اذا حبيت بيوم انه اروح اخذه على فرس مو هو هاهاها

_هههههه شنو اختلفت الادوار بعد اختج

_جا شعبالج انه شموخ انه

_اعوذ بالله من كلمه انا 

_اي استغفرالله ..

اجت امي للمطبخ واحنه كاعدين وكالت يله نروح كمت عدلت حجابي سلمنه عليهم وطلعنه وعيني وبالي يم مرتضى تذكرت حلمي بي مساع واحس

وجهي صخن منين اجتلي الجراة وتخيلت هيج شغله وياه هاي وانه استحي احجي وياه حتى اووف منك يا عقلي بيمن راح تورطني بعد ...