رواية فصلية بديلة ( شموخ ) الجزء الثاني الفصل السادس 6 بقلم ام ملكوت

_امي تعبانه شوي يمته نرجع لبيتنه

_تردين اوديج للطبيب 

_لا مايحتاج هسه بس نرجع انام واصير زينه

_تمام يله عدلي حجابج راح نروح

_تمام 

عفتهم ورجعت دخلت عدلت حجابي وشفت عيوني مورمه وصاير سواد جواهن من التعب النفسي والبجي تنهدت بحيره وطلعت لبست

برجلي وودعنه خالتي وشموخ وعمو وطلعت بدون ماسلم على مرتضى ولا اباوع بوجهه اصلا ركبت بالسياره واسمعه يحجي ويه ابوي وبحه

صوته الخشن ترن بصدري احسهه لزمت كلبي متضايقه وصعد ابوي للسياره وحركهه مسافه الطريق وانه خاويه روحي وصافنه بالشوارع

واباوع للجهال التلعب بره تمنيت ارجع طفله ونضل نلعب انه ومرتضى بالمراجيح انه اصعد وهو يضل يدفع بالمرجوحه تمنيت لو ماحبيته بس

ارجع واكول احبه ماندمانه على حبه اصلا حبه احلى شي صار بحياتي وطفولتي هو يلي خله كلبي يحس ان عنده جناحات ويطير بكل مره يشوفه بيهه او يسمع صوته او حتى باسمه ...

وصلنه ودخلنه للبيت ردت اروح لغرفتي وصاحني بابا رحت يمه ولزم جبيني يتفحص حرارتي تالي لزم وجهي بثنين اديه بحنيه وكال..

_بيج شي بابا اكو احد مضوجج متضايقه من شي حرارتج زينه ومو مريضه ليش جا مالج خلك اليوم كله

_مابيه شي بابا بس احس متضايقه هسه انام وارتاح 

_تمام بابا روحي ارتاحي واذا تحتاجين شي او تحسين نفسج مو زينه صيحيلنه اوكي

_انشاءالله

باسني بجبيني وردت اروح واستوقفني حنيني وخنكتي واحتياجي للحضن نزلت دمعتي والتفتت عليه وكتله بصوت مبحوح خانكته العبره..

_بابا اكدر انام بحضنك 

_ليش لا تعاي يبعد ابوج تعاي لحضيني 

ماتحملت اكثر عبست وجهي ورحتله بسرعه ارتميت بحضنه ونزلت دموعي لا اراديا امي ادري بيهه حست على تصرفات مرتضى وياي بس

ماكدرت تسالني كدام احد اخذني بابا ورحنه لغرفتي تمدد وسوالي مكان يمه ورحت غصت باحضانه نفس قبل لمن جنت صغيره ومانام الا بحضنه

استوعبت وايقنت ان شموخ وياهه حق فعلا الحب بس للاب ولو ما حب الاب لبنته البنيه تضيع وماتعرف ناسهه .. استنشقت عطره ولزمت السلسال يلي بركبته مثل عادتي وانه صغيره واستسلمت للنوم ..

.

.

:-احيانا الشخص يحب ويقدم كل المشاعر يلي بكلبه لانسان معين ومن هل مشاعر تنسبي مشاعر القوه

هواي اشخاص اقوياء وهمه وحدهم بس مجرد مايحبون

شخص ينطونه كل المشاعر وهيج تضعف عزيمته وقوته لمن يتلاعب المقابيل بمشاعره ويصير ضعيف وخاضع لتصرفات كلبه يلي بالاخر تودي للتهلكه ..

ولهذا السبب انه اكره الحب جذب لو اكلكم اني من صغري اكره الحب لان كل انسان يولد وتولد وياه فطره الحب بكلبه يتمنى يحب وينحب شمهما كان

عمره ان جان سنه او خمسه سنوات او اكثر .. الانسان بطبيعته يحتاج الحب لو جان طفل بعمر السنه ومايلكه شخص يهتم بي يضل يتصنع المرض

والاذيه ويبجي بسبيل ان شخص ينتبهله ويهتم بي وهو طفل عمره سنه وحده بس ومايعرف شنو الاهتمام ..او اذا جان طفل عمره ٥ سنوات فراح

يضل يتعزز بنفسه ويسوي معزه اله عند اهله من خلال تصرفاته وحنيته ولمن يبتعد عن ابوه او امه يضل يبجي عليهم ويتعلق بيهم وهو مايعرف شنو

الحب والتعلق.. لهذا السبب اكول ان الحب فطره تنخلق ويه الانسان وحلاته الحب بالفطره لمن تحب شخص ويحبك بدون مقابل وبدون كلل او ملل او

يحبك ويضل طول العمر على نفس حبه الك وماينتظر منك تحبه او تنطي مقابل لحبه ولا يتغير عليك.. و هذا انقى حب بالنسبه الي وللاسف هل

حب ماموجود بهذا وقتنه ابد ومستحيل يجي شخص يقنعني ان اكو ناس تحب بالفطره بدون ماتطلب مقابل لحبهه او تتامل المقابل يحبه بنفس

الطريقه او اكثر .. وجنان ومرتضى رغم حسيت بحبهم حقيقي ونقي بس مدام صار بي تجاهل وتخيلات وطلب مقابل لهل حب اكدر اكول صار

حب مؤقت او حب مصلحه وماراح يدوم من طرف واحد ويا اما ينتهي بخيبه او ينتهي بتبادل الطرفين ..اما بالنسبه الي فكلشي ياخذني للحب ابتعد عنه وكل مره كلبي يحاول يسحبني ويعذبني ليالي 

بس ارجع استجمع قوتي وانفض الحب من داخلي واتناساه بالدراسه والشغل والحب بالنسبه الي هو مثل " انه حبيته تمام  راح اخلي حبه بكلبي بعد ماكو داعي اطلب الحب من هل شخص ولا هو مجبر ان يبادلني مشاعري ولمن اريد او احس اني بديت

احب شخص اخلي باحتمالاتي ان هل شخص ماراح يبادلني الحب ونسبه 30% ممكن يكون هو يحبني همين بالسر او ناوي يحبني بالمستقبل

ماخلي كلبي يتمرمر ويتعلق بشخص من نسج خيالي ماموجود بالواقع ولا حاجي التخيلت يحجي وياي بالواقع ..واتمنى هل شي يوصل لكل البنات

والشباب الحب من طرف واحد مؤذي ومحد يعرف اذيته الا المجربه وصدكوا شمهما مرت السنين وشمهما دخلت ناس كلبكم وحياتكم فالحب

الاول يلي عشتوا من طرف واحد راح يبقى حسره وغصه بكلبكم مستحيل ينمحي اثرهه حتى ولو اختفى من كلبكم .. وهذا راح يسبب ضعف

بالمشاعر وعدم ادراك لتصرفاتكم واسلوبكم راح تحسون بعد هل تجربه المؤلمه انكم شخص ثاني رغم كلبكم يتحول حجر الا ان نار الحب هاذي رح

تبقى مشتعله بي العمر كله .. وانا خلقت حتى اكون قويه ومحاربه ومن لما وعيت على حقيقه الحب هاذي وانه اكره كل شي اسمه حب وزواج

التقاليد واحاول ابتعد كل البعد عنهم لان ما من وراهم غير ضعف الكلب وتحجره وكسره الخاطر ...

بس للاسف ماكدرت اثبت على قراري هذا ولا كدرت امنع الظرف يلي جبرني اقبل بهذا الشي بحياتي فأول مشاويلي اتجاه حلمي دخلت عرقله ومنعتني لمن دخلت كليه قانون ومرت اول

مرحلتين تقدملي شخص غريب عني يكون حمى بنت عمو باقر شايفني مره واحنه عدهم وطالب ايدي من عمي وماعرف شنو صارلي بهذاك الوقت حسيت

بشعور غريب وكأني مالي راي ولا كلمه على نفسي وكان شخص كاعد يقودني مو انه وبسهوله وبكل بساطه كعدت العصر من حلم ماعرفت شنو افسره .. 

وكأني كاعده امشي بمزرعه كلهه خضار وفجاتا صارت عاصفه وطلعلي من بين التراب ارنب بري اسود وسنونه مثل سنون الاسد 

وشكله يخوف هجم علي وكأني دوامه العاصفه اخذتني قبلما ياكلني فقط شخط بطني باضافره الحاده بس ساعتهه انه بنفس الوقت لزمت ايده كسرتهه واجت وياي منفصله عن جسمه..

رغم هل كابوس مرعب وجان مجرد حلم بس جان كفيل يدمر مسيره من حياتي ..فزيت وكلبي يخفك وخايفه صرت اتلفت بالغرفه كثر ماحسيت هل حلم حقيقه صفنت اتذكر الحلم وصار مثل السكون بعقلي واذني صار الصوت بعيد عنهه جسمي يرجف ويعرك وكلبي معصور كمت اشوف كبالي بس دوامه ..

طلعت كوه من الغرفه ماشوف كبالي بوضوح وبلحضه طيش ماعرف غباء ماعرف سهو رحت للصاله لكيت

اهلي كاعد يشربون جاي وياكلون كعك العصريه وكفت كبالهم وهمه مصدومين من شكلي لان بعمري ماطالعه كبالهم وشكلي هوسه وانصدموا اكثر لمن

نطق الساني بالموافقه على هل شخص بدون مايستاذن من كلبي وعقلي حسيت شخص وافق بالنيابه عني حتى بابا انصدم لان ماجان مقتنع بهاي القسمه ومسلمهه بيدي .. باوع لامي ورجع باوعلي وكال...

_شنو بابا شموخ متحلمه شنو 

_لا بابا وانه قابله بهذا الشخص

_زين ليش شنو السبب وانتي ماتحبين الزواج شنو اكو شخص حاول يلعب بعقلج او يقنعج بي

_لا بابا جنت افكر بالموضوع وشفته عادي ومابيهه اشكال لو تزوجت هسه حتى لو بطلت جامعه 

_شموخ بابا شكاعد تخربطين انتي لا ممكن اسمح بهل شي ولو انطيتج الهم فاول شرط الي ان ماتتركين دراستج وجامعتج حتى لو انتي ردتي هل شي 

_تمام بكيفك كللهم واذا قبلوا انه هم قابله اكمل 

_لا حول ولا قوه الا بالله لج بابا شموخه اكو احد مضايقج بالبيت حتى اصريتي عل زواج وعلى حساب حلمج همين

_لا عادي كتلك ماعندي مانع بهل زواج و راح اكمل جامعه عدهم ماكو اشكال ..

كل هل كلام الحجيته ماجنت سامعه منه شي باذني ابد ولا اتذكره وكالولي بي بعد فوات الاوان طبعا .. اهلي ضلوا مصدومين ومامصدكيني بس

تالي بعد كم يوم اقتنعوا وخلوني على راحتي ردوا الموافقه وحددوا العرس بشكل مستعجل صارت الخطوبه والحنه وانه مثل الجماد امشي بلا

احساس وبلا وعي ماوعيت على السويته الا لمن صارت الشغله وانتهت ومرت ايامي وياه وانه جسد بلا روح الا لمن مر على زواجنه فتره ٩ اشهر او اقل بين البجي والخنكه المجهوله الجنت اصبح عليهه وامسي كارهه روحي والدنيا البيت صار كبر يعتصرني كلما مر يوم ثاني علي بي بده ياكل بيه الندم كلما مر موقف بيناتنه

وبعدها بسنه تقريبا عشتهه وياه كزوجين عاديين علاقتنه ميته وكل حب مابيهه فقط اقوم بواجباتي واروح لجامعتي وزين اذا حجاله كم كلمه وياي

بالليل لمن يتقربلي صار اليوم اليمر وياه يخنك من يدخل للبيت اتخبل اشرد للمطبخ مادخل للغرفه منا لاشوفه يطفي الضوه وينام وماعرف شنو الجبرني وتزوجت واجيت لهل بيت وعفت بيت ابوي يلي جنت مدللة بي وقللت بحقهم وحق دراستي من عرست لهسه .. 

المهم ماريد اتطرق لتفاصيل عيشتي الممله وياه بس اكدر اكول الا ان حسيت نفسي تعيسه بهل زواج والزاد تعاستي باخر فتره لمن صار يتاخر بالرجعه من

البيت وهواي مرات اشوفه يدخل للحمام اول مايجي يضل يتقيأ ومن اساله يكلي اكلت بره وتسممت رغم شكيت بي يشرب بس ماعرف ريحه

الشرب بالضبط حتى اكدر اشم ملابسه واقطع الشك باليقين ومرات المح عطور نسائيه مشكله بملابسه ومن اساله يكلي المساعده مالتي تكوي قميصي وتلكي ماخذ من عطرهه 

وانه شي ويسد حلكي بعد كلامه شي يمنعني من الحجي لساني يكصر وعقلي يفرغ من كلامه ..فبقيتهه للوكت وسكتت وصرت شوي شوي تحت رحمه ايده شنو يكلي اسوي مثل

الطرمه وعي للحياة وللدارسه ما بقالي فقط اروح وارجع للجامعه وحملت درس ومستواي تراجع وانه الجنت ناويه ادخل اوائل حتى اتحول للجنائيات صارت اقوى مستوى عندي هو جيد .. 

مرت الايام وياه واختناقي اتجاهه يزيد يوم بعد يوم صرت ماحس بوجوده بالبيت اصلا ولا يهمني فقط احس محبوسه بالبيت ولمن يجي اختنك اكثر

واندم لان تزوجته واكره نفسي لمن اسمع صوته يامرني او يطلب مني شغله.. نصحتني صديقتي بالجامعه بسوره البقره وللرقيه الشرعيه بعدما شكيتلهه همي وكالت اشك واحد مسويلكم سحر انتي ورجلج يريد يفرقكم

ساعتهه ماهمني اليتسمى رجلي ولا همني يبقى وياي بحد ما همتني روحي ودراستي التراجعت بسبب هل مشكله بيهه.. اخذت ايام وليالي اقره جزء من سوره البقره بكل فرض من الصلاة والرقيه الشرعيه ماتسكت بالبيت 

فقط لمن يجي يضل يصيح علي ويكلي طفي القران دوختينه ساعتهه رجلي تاخذني واطفي التلفزيون غصب عني ومو بوعيي رغم كارهه هل شي وكارهه تصرفاته وياي بس لمن كلت لصديقتي كالت مدام يكره صوت القران معناهه 

فعلا مسحورين وبقيت امشي بنصايحهه لان امهه شيخه وتعرف بهاي السوالف والله وبيوم  لا عل بال ولا عل خاطر ومن بعد ليله اتعس من باقي الليالي نمت بيهه عيوني متجرحه من البجي سبحت سبحه الطهاره وصليت صلاة الليل ونمت والصبح فتحت عيوني وكاني جنت بحلم وفزيت منه خايفه

وكلبي معصور ويخفك حيل لكيته نايم بصفي مثل كل مره بس حسيت بخرعه من شكله خليت ايدي على كلبي وتعوذت من الشيطان.. تنهدت و كمت لميز المرايه لميت شعري

ورجعت التفتت عليه وهو نايم عريان عل جربايه وشكله مقزز اول مره اشوفه هيج من بعد هل سنه وكسور العشتهه وياه.. تذكرته امس من تقربلي بعنف

وغصب وريحته زفره وشكله يقزز .. فتحت عيوني باوعتله ولعبت نفسي خليت ايدي على حلكي وبطني خبطت رحت بسرعه للحمام ذبيت

من راسي من هول التذكرته ماتحملت وروحي انمردت احسهه .. اتلفت ملابسي وذبيتهن اخذتلي صفنه عل مرايه بروحي وكاني وعيت تماما عل

غلط يلي سويته شنو صار وليش هيج انه جسمي وشلون قبلت اتزوج وليش اصلا وافقت وين جنت اخطط اوصل بدراستي وشنو يلي سويته ..كل هل

اسئله احسهه دمرت عقلي وحطمتني فوك ما اني متحطمه كمت غسلت وجهي واحس عيوني تنفض انتقام لمن اشوف الزراك يلي برقبتي وجسمي

ماعرف ليش جنت ساكته عنه كل هل وقت شديت قبضه ايدي وردت اكسر المرايه يلي مطلعتني مشوهه هل شكل بس سرعان ماهدات واحس غيمه سوده انشالت عن عيني وكلبي احس وكان دخلت لبيت شخص غريب وانتحلت شخصيه مو الي وتزوجت واحد ماطايقه شوفته واللعب نفسي اكثر لمن دك باب الحمام واجالي صوته نعسان..

_شمووخ وينج انتي بالحمام شمومه فتحي الباب خلي ادخل وياج ليش قافلته عن العاده فتحي شمو تردين نسوي بالحمام  تمام بس فتحي الباب لا تلعبين وياي من الصبح..

خليت ايدي على حلكي مصدومه من كلامه شكله مثل السكران يحجي كلام يقرف الواحد حتى لو مرته بس عيب يحجي هيج ويطوخهه.. اخذت

نفس وكوه بألف يا ويلاه صبرت نفسي ورحت فتحت الباب دخل بسرعه لزمني من خصري وصار يبوس برقبتي لعبت نفسي من الريحه البي ودفعته عني بسرعه بقه واكف مصدوم شديت قبضه ايدي

ردت اركعه ببوكس يطير ملامحه بس نفضت هل افكار من راسي وكلت اتكفى شره وخله كلمن يعيش وحده احسن ومايهمني شيسوي بروحه ..

_خليني اليوم تعبانه احس نفسي ولعبانه روحي حتى شوف جنت اتقيأ ماتلعب نفسك لمن تشوف هيج 

_جبحج هاي شمسويه بالحمام يعع هسه تغسلينه بسرعه وتطلعين وراي عندي حجي وياج عابت هل خلقه

_تمام

طلع وانه مصدومه من نفسي شلون جنت اسمع كلشي يكوله  الي بهل اسلوب وغلطه هذا شلون امشي واكول حاضر وتمام مثل الحيوان الاليف.. غسلت الحمام وانه متحلفه بي

بس كلام صديقتي يوكف كبالي لمن تكلي اذا حسيت بقرف او كره اتجاه رجلج اسكتي ولا تسوين شي لان كله الاحس بي من السحر ولازم ماخلي السوالنه السحر ينول اليريده.. بقيت لازمه اعصابي كوه وطلعت وراه لكيته كاعد عل جربايه يدخن كعدت كباله وكال..

_سمعي من اليوم ورايح ماكو كليه بعد كعدي بالبيت وشوفي شغلج

_شنوو شنوو ليش ماكو كليه بعدلي سنه مامخلصتهه وبعدلي سنتين ادرس جنائيات 

_وانه كلت ماكو دوام اكيد سمعتيني 

_ليشش ماكو على مزاجك الشغله غير هذا شرط بابا بالزواج

_لا تلاسنين بنت الكل* 

_انت الكلب مره ثانيه لا تغلط على ابوي لا اسوي شي مايعجب.....

قبل لا اكمل لطمني على حلكي بظهر ايده وصار يغلط علي خليت ايدي على وجهي مصدومه من سوايته هاي انه شموخ تالي عمري انضرب من هيج

شخص سزز وحقير ماتحملت وشنطته من رقبته وشخطتهه باضافري من الطول للطول طلعت دمه وهو يدفع بيه صرت مثل القط المفترس وكأن

اسلوبه كل هل وقت وياي ربه بداخلي حيوان مفترس وهسه طلع هاجمه .. ضل يدفع ويضرب بيه وانه مستمره منبته اضافري بجسمه وتوحشت

عليه بس شي بداخلي يصيحلي يكلي كافي شموخ انتي مو هيج انتي ماتنزلين لمستواهم لا تسويهه بس حركه كلبي طلعت بي واعصابي تلفت.. لزمني

من بطني وصار يدفعني حيل طحت من الجربايه على حوضي وطلع بره لزمت بطني موجوعه والم فضيع حاوط خصري وظهري بقيت متمدده

وعيوني غوشت من الالم شفته بصوره ضبابيه اجه علي وبيده الحزام وصار يضربني من كل مكان وانه روحي ممروده ماكدر اتحرك او امنعه كلهه لحضات واستسلمت للضلام فتره بين الحلم

واليقضه شفت بابا كبالي يصيحني بس ماكدر اروحله رجلي مربطه وابجي .. بس هو اجه علي يمشي وانطاني بيده شي مغلف بابيض وكال هاي

من بيبيتج ام باقر .. واختفى من كدامي صار ضوه ساطع بعيني لمن فتحت عيوني لكيت نفسي بالمستشفى والحقير ثائر كبالي بلعت ريجي بصعوبه ودرت وجهي عنه وهو حجه قريب وجهي وصدم عيشتي لمن حجه وكان واحد مخبل وكال..

_الف مبروك مرتي راح يصير عدنه نونو صغيرون يلعب ويانه بالبيت واطلعه وياي واوكله بره ها وبس يكبر ادخله مدرسه حكوميه ومن الصغر اعلمه عل سجين حتى لا واحد يتعرضله وكلهه تخاف منه اي ابن ثائر هذا مو حي الله 

التفتت عليه باستغراب وحجيت متناسيه سالفه حملي..

_انت مو صاحي سكران مخبل مجرم والف عله بعقلك مايوم حسستني انك شخص طبيعي ومايشرفني اولد طفل الك يشبهك بطبعك واسلوبك الزفر

_بختج بابني والا جان كسرتهن ضلوعج على هل جربايه وسويتهه كفن الج

_اذا انت رجال وطالع من ظهر رجال سويهه بلكي تخلصني من العاله البطني الشايله دمك 

_شموخ لا تخليني اكفر واجرم بيج هسه وادخل سجن تالي سكتي وتكفي شري

_شكلك انت مجرم فعلا لان احس سلوكك مثل سلوك المجرمين والمرضى النفسيين

_ههه اعلمج بالبيت منو المريض النفسي هين 

باوعلي بعصبيه وبادلته بنظره شجاعه وبارده راح كتبلي خروجيه وكمت انه وجسمي احسه كله خدران من الضرب بس هيهات مو انه اروح لاهلي ذليله بسبب ذكر حقير والا اخذ حقي بيدي منه ..

كمت عدلت حجابي وملابسي واجه لزم ايدي ونترتهه منه هز راسه بوعيد وطلع كبالي وانه امشي وراه كوه جسمي ورجلي مورمه علي..

صعدت بالسياره ودرت وجهي عل جامه ركب هو هم حرك السياره ورجعني للبيت مسافه الطريق كله وهو ساكت.. يباوعلي ويباوع للشارع ويهز راسه

متحلف بيه والله لو مو تتحلف لو تلزم سيخ من نار علي ماخاف وراح اطلع حق كل ضربه وكل كلمه وغلطه طلعت من السانك ياثائر السزز ..

وصلنه وفتحت الباب دخلت للبيت وبوجهي لغرفتي رحت اخذتلي ملابس جديده وردت ادخل للحمام لزم ايدي سحبني عليه وهمس يم اذني من بين سنونه..

_تلزمين حدج وتكعدين وتنجبين ببيتج واي كلمه او تصرف زايد منج ماريد والا والخلقج ماخلي بهاي الخلقه عظم صاحي 

_انت كفو وتسويهه 

_تردين تجربين 

_خليني اذكرك خاف نسيت انه شموخ بنت شهم ابن الشيخ محمود وعمي الشيخ باقر يعني بت شيوخ ومو زلمه اليحاول يذلني وخاف صيتنه ماواصلك وماتعررفه

جرب تمد ايدك علي مره ثانيه وانت تسمع بصيت بواردهم فوك راسك ولا عبالك راح افوتهه الك ضربتك الي مساع لا خليك حذر منا ورايح لان ماراح تشوف خير مني 

_خب طز انتي وعشيرتج وعمامج كلكم جوه نعا**  واريد الزلمه يطلع ويحاسبني شسوي بمرتي بكيفي مفهوم

_انت كد كلامك هذا 

_كده وشنو يعني مثلا ترديني اخاف من جم زلمه اغم من عشيرتكم

_لا زلم  حوك همه مايوصخون ايدهم بواحد جبان مثلك انت كافي عليك مره وحده تزوعك حليب امك وترجعك لاصلك يا بلا اصل..

نطت عيونه بعصبيه ورفع ايده راد يضربني وتقربت عليه خليت عيني بعينه تردد من شافني هيج ونزل ايده بنتر هز راسه بوعيد وطلع من الغرفه يزاكط مثل البهيمه ..

ذبيت حجابي وملابسي ودخلت للحمام سبحت ونشفت وطلعت لبست ملابسي وتمددت عل جربايه صارت حكه ببطني واستوعبت لمن خليت

ايدي على بطني مكان الرحم وتلمستهه باصابيعي.. وحسيتهه على شكل طوبه صغيره كلش ماعرف شنو شعوري وانه احس بطفل ببطني افرح لان راح  يصير عندي طفل لو اضوج لان هذا الحقير ابوه

صفنت بالسكف وانه افكر شراح اسوي بثائر وانه اعرف ان اول تالي مصيرنه الطلاك .. وهذا الطفل وين يروح مستحيل اخلي عند ثائر ويدمره ويسوي مجرم مثلما خطط بالمستشفى .. حتى لو جان ابوه

حقير فامه احسن من ابوه واتمنى يطلع شايل دمي وصفاتي مو صفات هل نذل.. غمضت عيوني وابتسمت بفرح من صغري احب الاطفال وجنت اتمنى امي تجيبلنه اخت صغيره بس ما الله قسم

الهه وهسه ربي هداني هاي الهديه وانطاني الطفل يلي جنت اتمناه واريده ورغم الصار بيني وبين ابوه بس راح استعز بابني وماخلي احد ياخذه مني او يضره وربي يقدرني واربي احسن تربيه ..

مر تقريب الشهر وانه علاقتي بثائر متكهربه مايدخل للمكان الموجوده بي حتى نومته بالصاله ينام مايدخل يمي وهذا الشي خفف علي هواي من

الهم الجنت شايلته لمن يتقربلي .. صرت اكدر اراقبه بدون مايشوفني طلعته ومشيته كلهن اعرف اوقاتهن وتقريبا عرفت عنه ان يشرب كلما طلع ويه

جماعته يعني كل يومين هيج تقززت اكثر وانه اتذكر لمن يجيلي سكران ولعبت نفسي صرت كلما اشم ريحته بالبيت اركض للحمام اتقيأ صار كابوس بالنسبه الي مرت كم يوم ودخلت لغرفه المكتب

وهو بالدوام اخذت كم ملف سري بغرفته وعرفت هواي شغلات مهبد بيهه بشغله وويه عمه وجماعته ومقاطع فيديو طلعت متزوجه مصيبه بكبرهه وماجنت اعرف  ..

قررت اشرده مني وانتقم قبل كلشي ارد عليه التعب النفسي يلي سوالياه كل هل فتره صرت ماسويله شي لا اغسل ملابسه ولا اسويله اكل ولا

انظف مكانه الينام بي فقط اراقبه لمن يشوف شي يخصه وصخ ويضل يصيح ويهدد بس زودهه لمن لكه قميص دوامه وصخ وجاب سيره امي وكال..

_امج ماعلمتج الاصول يابنت الاصول ماعلمتج تخدمين رجلج وتخلين قندرته فوك راسج امج الفصليه ماعلمتج لازم تاكلين نع* وتخدمين رجلج مثلما جانت تسوي هيه ..

استفزني حيل بكلامه رغم كل كلامه الباقي وتهديده ماهمني بس هل كلام هز بدني ركعت الملزمه بالكاع وطلعتله لكيته واكف ويباوعلي

باستهزاء منتظرني شحجي اخذت نفس وشديت قبضه ايدي وحجيت بنفس الابتسامه مالته..

_عذرا عزيزي لا تتوفر خدمه للكلاب هنا حاول العوده للذي خلفك كي يوفر لك هذه الخدمه رجاءا 

_ايا بنت الكل* يا ساقطه اليوم احركج واحرك الخلفج وياج صبريلي اذا انتي مره ابقي بمكانج ولا تشردين والقران الشريف الا اشيل جلدج عن عظمج اليوم ..

ابتسمت على شكله شلون فحم وصار يزاكط ويتلفت يدور على دبه البانزين بقيت واكفه مكاني ماتحركت خطوه وحده شيسوي خلي يسوي ماعندي شي اخسره وابني البطني يموت ويه امه

افضل اله من العيشه بهاي الدنيا .. راح جاب دبه البانزين فتحهه وصبه علي سبحني بي ذب الدبه على صفحه وكال وهو مبتسم بمكر ولازم الجداحه..

_جؤ جؤ واكفه بعين صلفه عبالج ماراح اسويهه لا حبيبتي بعدج ماتعرفيني مايهمني انه لا مره ولا اهل ولا عشيره وتهديدج خلي... تعرفين وين

_بس سؤال قبل لا تموتني

_مالج حق تسالين

_ليش تزوجتني 

_ ههه ليش عبالج جنت حابج من اول نضره وتقدمتلج لو جنتي متامله بيوم احبج لا يبعد عيون ابوج غلطانه و اريد اكلج شي قبلما تموتين وتختفين من هل دنيا 

تدرين جان الي غايه لمن تزوجتج جنت اريدج تصيرين محققه وتشتغلين لصالحنه 

_ليش شتشتغل انت حتى اشتغل لصالحك اشو كلك خلك محاسب بالكمارك 

_جؤ فد قديمه انتي المهم مالج شغل شنو اشتغل اساسا ردنه تعبريلنه جم قضيه بس لسوء حظج عمي لكه من يفوتله القضايا مالته وصرتي مو مهمه بالنسبه الي اكدر هسه بكل بساطه احركج وادفنج ومحد يسال عنج واليطلع وراج اكله بنتك شردت ويه عشيكهه 

_ومن كل عقلكم انت وعمك استلم قضايا حرام واعبرهه عل قانون هيج القانون بعيونكم ولا شي وهيج انه سهله بالنسبه الكم

_اكدر اروضج ساعتهه مثلما روضتج وخليتج تقبلين بيه وانت مغمض ياحلو

_شقصدك

_كلج انتي وهيبتج وقوتج وشخصيتج هاي تسوون بس ٥٠٠ الف وشربه ماي جانت كفيله ان تكلبج وتخليج تحبيني مو بس تقبلين تزوجيني

_ههه لا تكلي اشتغلت بالسحر حتى تجيبني

4 تعليق

_سحر ومن يلي يعجبج هم سواج مط* مجلب بذيالي وين ماروح 

_ههه ههههههه ضحكتني خرب شكلك اي والله هههه لا والله ماعاش اليجيبني بسحر تافه مثلك انه شموخ لو جبتني لدربك بسحر فتاكد راح اطلع من هل درب بحبل مشنقتك

_بعدج مغروره وشايفه نفسج وتحجين وكأنج راح تبقين عايشه لذاك الوكت 

_اعيش وانت تعيش ونتلاكه هناااك يم القاضي ساعتهه اذكرك منو شموخ 

_راح احسبهه اخر امنيه الج بس للاسف ماراح اكدر احققهه 

_عادي الادله اللازمتهه عليك هيه يلي راح تحقق امنيتي الاخيره 

_من كل عقلك راح اخليهن هنا وانت تحوم حوالي مو غبيه انه استاذ ثائر خليتهن عند شخص واي شي يصير عليه بهاي اللحضه راح تسمع الاسئله الكلاثه ..

تقدم علي بعصبيه وعصر فجي بايده والثانيه لزم بيهه شعري وانه عيني مخليتهه بعينه تقرب يم اذني وحجه من بين سنونه..

_تطلعين الملفات لا اروح احرك بيت اهلج بيلي بي 

_ماتكدر تسويهه

_تردين تشوفين بعينج

_اي لان هواي صبرت واريد اشوف نهايتك على ايدي بنفس الوقت 

_شمووخ لا تطلعيني عن ديني طلعي الملفات ما دامني احجي وياج بهدوء

3 تعليق

_ليش الياكل حق غيره ويظلم يعرف ربه لو دينه والك حق بعد تحجي بعالي صوت 

_وصدكني ساعتهه يختفي اثرك وياي 

_لا تعانديني تخسرين

_لا تتحداني تهلك 

_تمام خلينه نوصل لاتفاق

_وهو

رخت ملامحه وتركني وبقه يمشي مقابيلي بحيره ويفكر التفت علي باوعلي وكال..

_سلميني الملفات واسلمج ورقه طلاكج مو انتي ماترديني خلاص اطلكج وتنطيني الملفات وتعتبرين نفسج اصلا ماعرفتيني

_بس الطلاك 

_واي شي ثاني تردينه

_تكتبلي تعهد بوصايه الطفل وانك تتخلى عنه وتختفي من حياتنه

_حاضر 

_وتكتب الشقه والبستان مالتك باسمي 

_البيت اي بس البستان ماكدر لان مو حلالي 

_حلالمن 

_حلال عمي ومرته وانه حصتي بي فقط ١٠ بالميه

_تمام تسجلهه باسمي 

_تمام 

_تنطيني اسم المحقق يلي مستلم قضاياكم

_ماكدر 

_تمام براحتك لعد اول تالي راح تدخلون سجن ان جان بافادتي او اعتراف المحقق

_لا خلاص  خلينه نتفق ان مانشتغل عنده بعد

_جؤ تنطيني اسمه 

_تمام اسمه الملازم ^^^^ 

_اذا ماتريد تسلم نفسك تكتبلي تعهد وكمبياله بالمحكمه انك ماتتعرضلي او لاي شخص من اهلي او اعرف ويقربني طول حياتك واذا خالفت هل شي تنحكم مؤبد 

_خلاص وعد ماتعرضلكم بس انطيني الملفات لانهه تروح روس مو بس راسي هاي الادله 

_تمام انطيهه الك بس لمن تكتب تعهد بكل هل اشياء وتسويهن الي

_بس وعديني ماتطلعين من البيت وتنتظرين البي شروطج ياله 

_تمام وعد ..

هز راسه ب اي وابتسم بتمسكن وراح يمشي محودب طلع من البيت رخيت جسمي ولزمتني البارده ولعبت نفسي من ريحه البانزين رحت

للحمام ركض ذبيت كلشي من بطني وبعدهه الدوخه بيه نزعت ملابسي ودخلت جوه الدوش فركت جسمي بالليفه والصابون انتحرت بكل مسامه من جلدي اكره ماكره ريحه البانزين مو نوب

وانه حامل ولعبانه روحي من روحي .. اخيرا وبعدما صار جلدي كله زلوغ ودم راحت ريحه البانزين مني شطفت نفسي ونشفت وطلعت

لغرفتي لكيتهه منكوشه نكش ضحكت بكلبي على تصرفاته الغبيه من كل عقله اجه يدور بالغرفه والغبي دور بكل مكان وعاف الاماكن المفتوحه

كبال عينه .. اخذت ملابس من الطايحات بالكاع لبست ورحت لباب الغرفه لزمت لافته التهنئه يلي محطوطه من عرسنه لهسه وعدلتهه بابتسامه نصر

على وجهي رحت طلعت جنط المهر الاكشر وخليتهن عل جربايه وسفطت الملابس بيهن وشغلاتي ماخليت الي شي بالغرفه ولا بالحمام

صارن ٣ جنط مثلما اجن راح يرجعن .. خليتهن وره الباب واجيت تمددت عل جربايه لزمت نقالي ودزيت رساله لجنان وردت علي..

💬 ها حبي نقلتي كلشي يمج 

💬 اي عمري تم

💬عشتي

💬انتي العايشه شموخنه

💬خلال يوم تجيلج فد ملفات معينه اريد تسحبينهم وتدزينهم للمحامي يجيكهن

💬تم

💬شكرا قلبي تعبتج

💬ولا يهمج المهم سلامتج

💬 ربي يسلمج جنونه يله باي

💬باي حبي

مسحت المحادثه وطلعت منهه بقيت اكلب بالانستا وشغلات للبيبي اجيب واحفظ عندي بالبيجات حتى اجهز ابني منهم من كلشي يحتاجه.. اذن

الضهر وكمت توضيت وطلعت فرشت مصلايتي ووكفت اصلي .. اخيرا وبعدما رجعت من بيت خاله وفاء كدرت التزم بصلاتي والتذاكير تلهج بلساني

حمدا وشكرا لله على رحمته وقوته يلي انطانياهه ورجعني لاهلي سالمه وهمه سالمين.. فعلا الصلاة حلوه لو جانت بخشوع ومحبه مو بس واجب والتزام وشي يعتبره البعض غصب واجبار ..

" الصلاة محيط عميق ولا يعرف عمقه الا الذي غاص به خاشعا لله " 

_________

"وجوم في نفسي يائسة 

وجرح لا يقبل أن يلتئم

نزاع طويل مع روحِ وهاجس أمام قلبي ،

وها أنا من جديد..

أفترش قلبِ بصبابة لا تقبل أن تنسئ

بعذال مع نبضِ وروح وعتمة

لا تقبل أن تضيء سماء بحسرة داكنة

وفؤاد جرحِِ  هالك وأنفاس إنسان تائة

وها أنا من جديد..

الملم شعورََا مُر في نفسِ وروحِ ..

شعورََا لا يقبل أن يزهر ..

بل راضيََا بحقل الجوارحِ ..

وكان ولا يزال 

شعورََا لم يطاق..ولم ينسئ.."

ملفين صادره من شموخ فتحتهم وشهكت بصدمه لمن قريت المكتوب بيهن وجان عباره عن ملف يضم تسجيل بيت ثائر و10% من بستان ابو فلاح عمه باسم شموخ وملف ثاني مكتوب بي وصيه

طفل و تعهد بعدم الحاق الضرر باي وسيله كانت بشموخ بنت شهم وطفلها واي شخص من اهلها او اقاربها ومعارفها وعدم تهديدها باي وسيله كانت ...

كعدت عل كرسي مصدومه شنو تهديد شنو وصيه شنو طفلها شنو سجل البيت باسمها هاي شموخ شمهبده ومسويه .. مشيت الكرسي للجربايه واخذت نقالي اتصلت على شموخ ردت علي بسرعه وعطت بيهه..

_هاي شنو الملفات شنو هل اشياء يلي باسمج وشنو تهديد شنو طفل احجيلي ولج شسويتي 

_سويت اللازم اسوي من زمان حاليا عندي ظرف بليل تعالي لاهلي وتلكيني هناك واحجيلج كلشي ساعتهه

_بعدين اكلج جنان بعدين

_اي بس....

سدت الاتصال وراحت بقيت صافنه وارجع اقره بالملفات الدزتهن الي تنهدت بحيره ونسختهن عندي دزيتهن للمحامي مالتهه وطبعتهن على شكل اوراق

وخليتهن ويه بقيه الاوراق الناسختهم الهه.. اخذت اللفه مالتي وبقيت اكل واصفن وبالي يم شموخ شسوت وشصار وياهه وشنو القصد بان يهدد

طفلهه يعني شنو شموخ حامل بس لا جان كلتلي لو فعلا حامل كل يوم هيه تحاجيني ماجابت هل سيره .. زين هسه مو كالت اخذ فتره طويله ياله اكدر ارجع لاهلي ليش فجاتا كالت بليل اروح لاهلي

معقوله بس زياره لو جايه تشتكي من ثائر وتطلب الانفصال عنه والله ماعرف حيرتني هل بنيه .. خلي اكوم اراجع للامتحان احسلي وبعدين افهم سالفتهه شنو ..

فرشت مصلايتي ووكفت اصلي كملت قريت سورة البقره يلي صارت ماتفاركني ابد وهواي غيرت من حياتي وشخصيتي بالفتره الجنت بيهه تحت سيطره كلبي ومشاعري مانكر ان هل مشاعر

بعدها موجوده وشاعله بصدري كل هل سنين المرت بس على الاقل ماصرت انهار بالبجي وتتعب نفسيتي مثل قبل احس صرت اوعى واصحى عل

حياة وامورهه بس وين هيج انه اتهنى واكمل بناء شخصيتي بدون ماتعرقل الا بالحلم .. كملت صلاتي وكمت بدلت ملابسي وطلعت كلت لاحسان وهو كاعد يدرس..

_احسان فدوا وديني لبيت عمو شهم

_ياستار شصاير ببيت عمج حتى تردين ترحيلهم فجاتا

_مو شموخ راح تجي واريد اشوفهه خطيه

_ليش شبيهه شموخ

_مابيهه اجت تزور بيت عمو وانه اريد اشوفهه مشتاقتلهه

_تمام انتظريني اكوم ابدل

_تمام بس بسرعه فدوا

_اي ماطول صبري

_اوك

راح لغرفته يبدل واجت امي لزمتني من ايدي وكالت ..

_ماما جنان شصاير بييت عمج شهم ليش تردين ترحين فجاتا وانتي بالسنه حسنه تمرين عليهم

_يمه مو حجيت كبالج وكلت شموخ جايه تدريني ماروح بس لمن تزورهم شموخ

_اكيد يمه علمود شموخ

_اي امي قابل علمودمن علمود سلام ههه

_اي يمه ديروا بالكم بالطريق واذا صار مطر لو عاصفه ابقوا بيت عمج لا ترجعون والطريق طويل

_انشاءلله امي وانه ماتاخر ساعه واطلع منهم

_تمام بنيتي 

_يله امي مادام اجه الامير احسان خلي نروح من وكت ختى نرجع من وكت

_روحوا بنيتي مودعين بالله ..

بوست ماما وطلعت لاكاني بابا توه راجع من البستان وكال..

_ها وين بنيتي مبدله

_بابا رايحه لبيت عمو شهم ساعه وارجع شموخ هناك

_ليش شصاير بشموخ

_شسالفه شبيكم ويه البنيه مابيهه شي بس اشتاقيتلهه واريد اشوفهه

_جا صبري للصبح وروحي بنيتي الا هسه بالليل

_ميخالف بابا ماطول بس ساعه اروح ويه احسان وارجع وياه 

_تمام براحتج حبيبتي 

_احبك باباتي انت 

بسته براسه وطلع احسان سلم عليه وراح شغل السياره لوحت لبابا وصعدت بالسياره وطلعنه من البيت مسافه الطريق ساعه تقريبا وصلنه

لبيتهم ونزلنه دك احسان الباب وفتحه سلام وجهه مايكصه السيف سلمنه عليه ودخلنه للبيت واسمع صوت شموخ وصوت مره غريب علي طالع

لبره دخلت للصاله وشفتهه واكفه وتحجي بعصبيه والمره طلعت ام رجلهه كاعده وتحجي باستفزاز وتكلهه....

.

.