رواية دموع خرساء الفصل السادس 6 بقلم ورود الخالدي

ماجد:::

الاحد اجه ابوي طلعني بكفالة بس طلعت مصخن ومنشول يمكن انعديت فلاونزة ..من المساجين الوياي اهيس راسي مثل الجبل بس طلعت ..بعدني جاي اتغده ابوي كلي ؛

ناملك ساعتين..المشيه العصر يم بيت حجي نايف

شني المشية العصر تره توني طلعت شني هذا العار يمشينه على مرامة 

ولك شني على مرامه غير انه ماخذ عطوة ثلث تيام من الخميس واليوم احد..هو شله غرض ويمشيك على مرامه غير وادمنه ..حددو ساعة الكعدة وانت الطلبت نكعد عد طرف ثالث. 

بويه راح امشي وياك بس كبل ما امشي..تخابر حجي نايف وتكله يخلي علم يم هذا العار..ويكله اذا يجيب طاري ام غادة لو البنات بالمشيه جدام الزلم..وروح راشد اخلي..طلقة براسه جدام المضيف..كله..

على كيفك يبويه طلعت انت عمهن مو هو؟؟

اي احنا عمامهن هو. ذبهن واحنا تكفلناهن مو هيج يولا؟؟

بويه هذا حجينا احنا...انه وانته..بس بالعشاير ماكو كفيل عن النسوان غير اهلهن؟؟

وهو مو اهل للكفاله كتلك بويه تخلي علم يمه مايجيب طاري النسوان ..واذا جاب طاريهن مايهمني حتى لو رحت بيه اعدام..

صار..يبويه على هونك..شني بس انت براسك غيره انه هم ما ارضة ينجاب طاري المرة وذني اليتيمات بنص الديوان..ماعليك انت بس اسكت ومايصير خاطرك اله طيب..

صارت الخمسه العصر..ورحت ويه ابوي لكيت عمامي ابوي موديهم جدامنا..وهو هم جايبلة جم واحد مخربط عو يحجون بمجانه وحجي نايف حاضر هو واولادة واخوته..لان يعتبر طرف ثالث..وطرف صلح بنفس الوكت..وبدو يسولفون على السناين والفصول ومن حجيهم عرفته يطالب..بفصل اي افصله..واطي فصله ع القندرة بس بشروطي..وبنهايه سوالفهم..سمعت ابوي يكول:

هسه خصم الحجي ابو زهرة يريد فصل دم كامل؟؟

هو طفر مسوي روحة موات شاد ايده ومضمد خشمه كلهم:

اي هذا حقي..وفصل الدم معروف..؟؟

ابو نايف كال:

فصل الدم معروف ثلث ملايين..

لا ما اريد ثلاثه يطيني سته..انه خشمي مكسور واحتمال اسوي عمليه..ثلاثة مايفيدني

عمه كله اسكت حجي نايف يفصل واحنا نلبس..

انه ساكت..اريد اشوف تاليها..

ابوي كال:

يسوي عمليه مايسوي فصل الدم ٣ملايين بسنينتنا من كامت الساعة..

طفر..

لا مايكفني..اريد ٦ملايين وهمه الممنونين وبعد شي ثاني ما اريده يدوس كاعي ولا اله علاقة لا ابيت ابوي..ولا اب...

عرفته راح يجيب طاري النسوان كبل مايكمل خزرته ومديت ايدي على حزامي هو جبان بساع انكلب لونه وبدل الحجي ..وكال:

اي ..ما اله علاقة بالكاع ولا بحوش ابوي شني يريد يفشلني ويه الودام المشتريه عمي انه الكاع كلها بايعها وبضمنها الحوش ومستلم فلوسهن والفلوس جنت مطلوبهن وسددت ديني بيهن شني وجه ..الحك من يجي يحاسبني على حلالي ..

ابوي راد يحجي كتله..

من رخصتك بويه والتفتت علي حجي نايف ما اريد اوجه الحجي اله لان انه مستصغرة ..مااريد اكبر راسه..

اي حجي نايف..انه جاي وياكم بالحجي..اطي ٦ملايين..من عين باجر..بس هو يردلي..١٥مليون..مالاتي تعويض للبنيان ولو انه ذاب اكثر بس مايخالف؟؟

طفر واحد من كرايبه..

خمصطعش مليون مال شني..

مال بنيان حوش ابو..غير انه طيحته للكاع وبنيته من حله وجديد..

وليش تفلش بيت ابو وتبنيه..

شيخ نايف التفت عليهم لان يدري بيه ما اريد الحجاية تكبر ويصير بيها ليش وشني وبالاخير تصفه بسبب النسوان فكال:

اي انه عندي علم بالموضوع من زمان..

ابو زهره كال:

بويه انه لا كتله فلش ولا كتله ابني من حله وجديد؟؟

هاااا..هسه نكرت ماكلت ابني..

عندك شهود؟؟؟!!!

اي عندي..ربك الشاهد واذا نعيم..ما مقتنع بشهادة الله..نمشي انه ويا ونحلف وين ماجان..بس كلكم تعرفون..قانون العشاير وره الحلف ينوخذ الحك مربع معناتها ال١٥....يصيرن ٦٠..مو هذا حك الله يولا؟؟؟

هو سمعني كلت مربع..ندس نسيبه وتسيبه راح ..حجة ويه حجي نايف..حجي..نايف كال..

من..رخصتكم يوجوه الخير نعيم عنده حسبه يمي راس براس وان شالله خير؟؟

وطلع هو وابو نايف يحجون بره يمكن نص ساعة وردو علينه..ابوي..كال:

يريد٦...ملايين يعني يريد مضاعف..وكلام ماجد ما عليه زود...هو يحلف واحنا نحلف من عين باجر..احنا نفصله مضاعف وهو يعوض مربع؟؟

على هونك يبو راشد ..جايك الحجي..مادام القضيه بيها رد وعطاواكو تعويض..مايصير احنا نقدر من يمنا نجيب ناس .تعرف بالبنيان ويقدرون ..سعر البناء وذاك الوكت كلمن ياخذ حكه..كامل..مكمل..

اي..شكو بيها هذا خوش..حجي..جيبو الوادم التعجبكم واحنا حاضرين..!!!

وخلصت المشيه هالشكل ع اساس احد يقيم الحوش جم يوم ويردلنا خبر..الوادم كامت كلها كلمن راد يمشي الحوشه واحنه ماشين للباب ابو نايف جر ابوي على صفحة مدري شحجة باذنه..المهم طلعنا ..كلها الوادم مشت وعمامي هم راحو

صح محد كدر يغلبني وحكي ذاك هو مبين وراح اخذه بس..افكر بام غادة والبنات هذا يكول بايع الكاع والحوش واول وتالي راح يطلعن منه بس وين يرحن ما ارضاها يردن ويا لحوشه ويصيرن مدكة لمرته ولبناته ولا ارضة يردن لبغداد وما اعرف عنهن شي وهناك يدولبهن الوكت..من جديد كلها بجفه وغادة بجفه شلون ارضه تصير بعيدة عليه وانه مأمن هي يمي..حتى لو ما اشوفها هواي الف..حسبه ابالي كلت اخذ فلوسي واكمل عليهن وابنيلهن حوش بكاعي.. ع الاقل أأمن عليهن ولو الناس هم ماتسكت ويصير قال وقلت بس مايهمني شتحجي الوادم خل تحجي..افكر وصافن لفت اريد ارجع لحوشنا ابوي كالي:

بويه ردنا على بيت حجي نايف مادام الوادم كلها طلعت من مضيفه الزلمة شاورني يكلي عندي حجي وياك..اويه ابنك..

هااا..شعده بعد..

اكيد عنده شي ..لو ما عنده شي جا ماكالي خلي الوادم اطش ورد عليه انت وابنك..؟؟

اي نرد ليش مانرد؟؟

لفت ورديت على مضيف الحجي..بس انه مصخن ودايخ.. من وصلنا للمضيف ابوي خابره ..طلع النه وحده فتنا للمضيف كعد بس هو ويانه..اول مابده كال:

الله بالخير ابو راشد...

الله بالخير والعافيه..

ابو راشد هذا نعيم ..واحد دوني ..وكلها الوادم تعرفة..سفلي ودوني ومايطلع منه شي ومايند النديدة وابنك الله يسلمه كلنا نعرفة نشمي ومايسكت على حكه..وتاليها تصير وحده من اثنين ذاك مايرضة يدفع وابنك يخلي ويرميه ويصير بيها كاتل ومكتول؟؟

والحل شني نسكتله على ابو بخيل ودوني!!؟؟

انتو ليش بنيتو بيت ابو ..احجولي والسالفة بيناتنا..؟؟

ماجد بنه الحوش وانه ..الكتله..خطية بيه حرمة ارملة وهي وبنياتها اليتيمات واعتقد انت عندك علم 

اي عندي علم..واعرف الحرمة مرت اخو رحيم..المات ابغداد واعرف هم انتو ماهمكم لافلوس ولا بنيان ..واعرف..غيرتكم تدفعكم حتى تسترون هالنسوان جوه سكف..هذه شيمتكم يبو راشد ومو غريبة عليكم تره المنطقة كلها تدري انتم متكفليهن!!

الله يعزك..حجي نايف..

واعرف هم هذا الناقص الدثو ..ذبهن بالشارع وهسه لو اكلك شطلب مني يمكن تشك هدومك من القهر؟؟

انه من يمي..دمي فار كبل ما يحجي ابوي كتله:

شطلب منك..

يكلي اذا كاتلين رواحهم على بنات رحيم وامهن خلهم ياخذون وحدة من البنات لو امهن مره لابو راشد لو هو نفسه ماجد ياخذله وحده منهن..ويخلهن كلهن جوه جناحة شكلك ..صارن منه وبيه ..بعد..

شلون..يعني يريد ابوي لو انه ناخذ ام غادة مره النه؟؟

يكول بكيفهم ياخذون اي وحدة حتى لو وحده من البنات الزغار ماعندي مانع انه بايع الكاع ولا عندي تعويض ولاشي..واذا اخذ وحده منهن يدورهن كلهن يمه ويحسب مهرها الفلوس الصرفهن ع البنيان..

ابوي هز راسه ودنك..

لا حول ولا قوة الا بالله العلي العظيم..لهنا وصلت بيه المواصيل يبيع ويشتري بمرت اخو..وبهاليتيمات ..اللهي شمتناني ماتكلبها بينه..

انه..اهيس راسي..شاط مامصدك الحجي..ومن حركة كلبي بساع كتله:

اي..من رخصة ابوي..انه راضي انه مستعد اخذ وحدة منهن ابوي جرني..كلي

..ولك اكعد شني مستعد تاخذ مره شني هي لعبه خو مالعبه..وياهي المستعد تاخذها شني المره الجبيرة امهن لو ذني..الفريخات..الزغار البطول زرك؟؟؟؟

لا بويه اخذ البت الجبيره..

ابوي انكلب وجهه..بس ابو نايف كالي:

عفيه عفيه النشمي..

ابو نايف انت ماتعرف..شي..البت اليحجي عنها خرسه خطية..

خرسه شني..

اي وروح ابوك..خرسه..انت من عدنا وبينا ومو غريب البت خرسه وهذا بالعناد يريد ياخذها!!

لابويه مو عناد اخذها..ومايهمني خرسه لو عميه لو مكرمة اهم شي شىريفة..وهذا كافي عليه..وانه بعد ما اكدر اتيهن تعرف هنه بكفالتنا..على موتي اتيهين بيد عمهن النذل

حجي نايف كال:

نشمي بويه..نشمي يماجد بارك الله بيك..وجزاك خير الجزاء هاي هيه باجر اردلهم خبر..

بس ما امشي على نعيم واخطب منه؟؟

جامنين تخطب يعمي!!

تروح انت وابوي وتخطبلي من جبيرهم..وهاي هيه..

اي صار..شكو بيها..

طلعنا من بيت حجي نايف بس حركت ابوي كال:

شو انت وحدك تسولف وتتخطب نسوان خليتني هاكبرني جدام الزلمة..ولا جني ابوك حسبالك انت ابوي وتفصل بكيفك لروحك شني ولك طفرت من ماعوني بعد؟؟

بويه..جلمة وحده راح اكلك بيها تخصم كل الحجي البالك؟؟

اي تفضل كول حجي ماجد كول يالفريضه:

البت..احبها..ورايدها على سنة الله ورسوله..ومايهمني خرسه لو عميه..لو حتى مكرمة..لو مشلولة وبس نفس هم رايدها..

هاااااه...هنا الحجي كتلك من اول يوم انت موخالي. .كتلي لابويه ماعندي شي تكسر خاطري وبس..عرفتك من الاول؟؟

وانه صادك بويه ما عندي شي عشكته..بشرف ورايدها على سنة الله ورسوله تره العشك الشريف لا عيب ولاحرام..

بويه بس البت خرسه وفروخك يطلعون مثلها..وكلها بجفه وامك اذا درت..يمكن تتسودن علينا..

ماعليك من امي..انه اعرف شلون اقنعها..بس خلي ايدك بيدي..وخلنا نفض هالسالفة بويه تره الشغله مو شغله عرس وعشك...وبس بويه اخواتها..يتلطمن بالدنيا ع الاقل من اخذ غادة محد يكدر يفك حلكة انه نسيبهم واخليهم حدر جناحي وكلشي يكعد بمجانه..

بس امهن تضل غريبة مايصير..تكعد ويانه..

لا بويه ماتكعد ويانه ..بس اعقد على غادة فلوسي اطلعهن من عين نعيم...خاف حسبالك انه راح اسكتله لا وروح راشد ..اخذ البت منا..وارد اداعيه بحكي منا..

شلون يصير وهو يكول احسبهن مهر..

جا انه ليش كلت لابو نايف اخطب من جبيرهم مو منه..محسب لهاي حساب..انه ابنك ما انغلب..تربات ايدك..ومن اخذغاده ابنيلهن مشتمل زغير بكاعنا قريب على حوشنا..وتفض السالفه

والله ما ادري يبويه..من يمي اكيف تعرس بس..

لا تكول بس بويه..كتلك احبها وهاي هيه..

بكيفك بويه..

هسه شني باجر اودي امي ومرت حامد على ام غادة!!

ليش..توديهن..هسه غير ناخذ حجاية من جبيرهم بالاول!!

شلون...نروح نخطب يجوز البت ماترضه!!

ماترضه شني..ولك تحب ايدها وجه وكفه..شلون ماترضه بيك؟؟

ليش انه ياهو..قابل نبي لو واحد من اهل البيت ..حتى تحب ايدها وجه وكفه..وهيه هم بنيه حالها حال كل البنات هم لازم نعرف رايها راضيه ماراضيه بيه!!!!

لا ترضه..ترضه يبويه..اكيد انت مدستر وياها دبطل هالجذب تضم على ابوك؟؟

لا وروح راشد ماتدري خطية ولا عدها اي خبر انه احبها ورايدها

خوش قنع امك..ووديها هي ومرت حامد وخلنه نشوف رايها..

وردينه للحوش كعدنا وي امي بس شني شلعت كلبي وحطته بيدي كامت تلطم :

شني اخذلك خرسه..تريد الوادم تتشمت بيه..وانت مطلك ووراك شماته ...شني شعوزك وتاخذ خرسه..

يمه..مثل ماكلت لابوي راح اكلج عاشكها واحبها..واريدها..مرة الي...رضيتي لو مارضيتي..واذا صرتو ضدي ماعندي مانع انهبها..واخليكم جدام الامر الواقع...

تنهبها شني ولك..عود انت المعدل الشادة حزامي بيك؟؟

مثل ماسمعتي الصبح ترحين انتي ومرت حامد تحجن ويه امها ..ها وترحين ووجهج مبتشر مو كالبه وجهج ع المرة..

عفتها ورحت لغرفتي..

الصبح غصبا عليهن راحن لام..غادة بس من ردت..ملخن..روحي ملخ من سمعت امي كالت:

حك العلينه سويناه وحجينا جدام البت وامها واول ماحجينا البت بجت ..واخذتها امها للغرفة تحجي وياها وطلعت ..وتعذرت من عدنا وكالت البت ما راضية الف الحمد لله والشكر..همزين طلعت من عدهم مو من عدنا..

عفتهن ورحت كعدت بغرفتي ..اكل بروحي ليش مارضت بيه شبيه انه ورفضتني..لازم اكو سبب مامعقوله بس حجن وياها رفضت بساع..شلون اعرف شلون اريد اكعد وياها واريدها تكلي عين بعين انه ما اريدك....يومين انه الوج حتى الزاد مر بحلكي..مالي خلك..مدري مريض..بعدني مدري حجي امي على غادة خربط احوالي

ماعندي بعد صبر..ثالث يوم تنيت امها تروح تجيب البنيات من المدرسه ورحت دكيت الباب..ضليت ادك حد ما سمعتها هي هم دكت..كتلها:

انه ماجد يغادة اريد احجي وياج فكي الباب..

بس مافكته دكت ع الباب يعني ما افتحه..

ليش..ماتفتحينه بعدج خايفة مني..وما تأمنين بيه شتردين اسوي بعد حتى تأمنين..وتصدكين انه ماعندي دغش وغرضي شريف يمج..مو وديتلج امي ومرت اخوي ليس رفضتي ليش بجيتي شبيه انه ورفضتيني بساع!!

دكت ع الباب..ماتريد تفتحة..

براحتج يغادة انه ماشي..

بعدني توني درت وجهي سمعت الباب انفتح التفتت رديت عليها..

وكفنا بسد الباب حتى مايشوفنا الرايح والراد كتلها ردود

ليش..رفضتيني انه ماعاجبج؟؟

هزت راسها يعني ..لا..

خاف جا انه اكبر منج بعشر سنين وتشوفيني جبير عليج..؟؟

هم..هزت راسها..يعني لا..

جا ليش..غير افتهم..اهلي..ماتحبينهم ماترديهم وماتردين عيشتهم؟؟

هم هزت راسها يعني لا..

جاشني مالج نفس..يمي وكلبج ما هاويني؟؟

هزت راسها حيل هم يعني لا..

ولج راح اسودن جا ليش رفضتي..بساع؟؟

اشرت على حلكي..وهيج فرت ايدها كتلها....وردت اشرت على حلكها..وهم عادت نفس الشي..افتهمت شتكول..

تكلي انت تحجي..وانه مااحجي خرسه..شلون ترضة بيه

.كتلها..

على هاي..جا انتي خرسه وانه احجي مارضيتي..هسه انت شعليج عمي انه راضي..بيج خرسه عميه انه راضي..ورايدج..

اشرت بيدها يعني ليش..راضي بيه وانه خرسه..

كتلها بساع..

لان احبج..اي والله احبج..عاشكج..عشك..مامصدك حتى انه بيه..اريدج الي مرتي وحبيبتي وام بيتي..وضوه عيوني الاشوف بيهن دربي..

صفنت بوجهي ودمعت عيونها..

ليش بجيتي يبعد اهلي وطوايفي..

باوعت بعيوني جنها تكلي صدك انت تحبني كتلها:

اي والله..احبج واذا صرتي الي اخليج جوه كلبي واخلي امج واخواتج جوه جناحي طول العمر..

بقت صافنه بعيوني كتلها:

شفتهم هسه من صفنه عيونج الحلوات ..راضيه ما راضية اذا رضيتي..راح اروح والدنيا كلها الي..واذا مارضيتي ما اكدر اسوي شي..ولا..احجي بعد وياج..بهالسالفه

ابتسمت..ومسحت دمعتها..بيدها..هيست كلبي رفرف..من شفتها تبسمت كتلها :

ها..يغادة هاي هيه افرح واخلي كلبي يبرد..رضيتي..هسه..

هزت راسها..يعني اي..

بودي...احضنها..بس ما اكدر بعدها مو حلالي ومو شيمتي امد ايدي عليها..هيج كضيت روحي كوه وطلعت..من..يم الباب..

رايح انه يبعد روحي..وراح ادز اهلي ردود واتاني منهم جلمة حلوة.

الفصل السابع من هنا 

لجميع الفصول من هنا