رواية نورة الفصل السادس بقلم ام مصطفى
نوره:- خطيه عمو رزاق اووف شايفه صوره يخبل
عليج الله ماما كملي
شصار ابيبي من سمعت عمو رزاق استشهد
اووف شحجيلج يوم الاسود صار علينا
جنة نايمين بوكتها بالليل
واندگ الباب
محد جان موجود من الولد كلهم بالجيش
طلعت عمتي صاحت منوووو
-اني ام رحمن اني المختار
-المختار يمةةه دخيلك ياربي ياهو من ولدي استشهد
تحاجيني
جان بذاك الوكت دكت المختار بالليل تخوف
يعني لو ع فراري يجون
لو الاكثر بالحرب يجيب خبر استهاد واحد
-احلام فكي الباب رجلي مايسعني امشي بعد
-اسم الله عمه
اني خفت اكثر منها
عمه انتي افتحي الباب اني استحي اطلعله
مشت تتوجه ع الحايط
وتكول يا الله يا الله
سلم عليها
وهو مدنك ومبين جايب خبر مو زين
كالتله
-كول ياهو استشهد من ولدي
-ام صلاح ياهو من الولد هنا
-محد كلهم بالجبهه
-والله مدري شكلج
بس البقيه بحياتج
رزاق استشهد
سمعنا رزاق
وصرخنا فد صرخة
عمتي وكعت بطولها
واحنه نصرخ
ومحد النه
طبت الجوارين والتمت
عمتي كومتها خطيه
احس انتهت وانهد حيلها بالخبر
-يمة رزاق يمة يالصغير گعدتي المدلل يمه الفقير ابو طول الحلو يمه
تحجي بس هاي الكلمات
عمه ع كيفج
مدري اسكتها مدري اسكت نفسي
الجيران كامن يواسنها
واني اصرخ من حركت كلبي
وصفاء ملخت روحها
خويه وخويه
رزوقي خويه صويحبي
صدك متت
المختار صاح نريد رجال يجي يستلم الجثة
كتله هسه لبست عباتي ورحت لبيت ام سليم جيرانه عدهم تليفون
خابرت ع اهلي
وكلت لابوي يخابر ع عمي ابو رحمن بالناصريه حتى يجون
رديت فحطانه بناتي لكيتهن ناطات بجي
انرعبن
خطيتهن بحضني واصرخ
يربي شلون بينه شيهخلص هالانتقام هاي الحرب
اووف داوود وينك تعال
جان موعد جيت داوود بعد يومين
كلت هسه يلحگ ع الفاتحه
ابوي واهلي كلهم اجو
وعمامي كلهم
لان اصلا همه هم اقاربنه من بعيد هم ساده موسويين
وهم ماخذين عمتي
فاجوا واحد وره الخ
ابوي اخذ اخوي حسن وراحوا يجيبونه
استلم ابوي الجثه وجابوه واجو
واحنه متنه عليه
لطم وصريخ
عمتي انتهت عليه
صريخها يطر الصخر
كوه شالوا التابوت منها
اخذوه وراحوا يدفنوه ومناك ابوه وعمامهم مشوا للنجف
بقينا بالبيت احنه
واجت الناس كلها كرايبنا من بان وبني
لثاني يوم اجه داوود
جنت كاعده اخبز للفاتحه فوك
واسمع صريخه
رزااق خويه
عوفوني رزااق استشهد ليش يربي جان خذتني بداله
ذبيت العجين من ايدي
وباوعت من فوك الستاره
وصدك اشوف داوود بملابسه العسكريه
ويصرخ والناس لازمته
طبعا صار شهور مشايفه وماملتقين سوه
جان ينزل داوود يلكاه صاعد
ويصعد داوود وينزل رزاق
جان كلش مشتاق اله...
ذبيت من ايدي صحت ع مرت صلاح تكمل بدالي كتلها نتزله اشوف داوود اجه
نزلت اركض كلت داوود اجه
عمتي كامت من النسوان
ضلت تصيح خايب داوود اخيك مات
ولك يمة داوود
طلعت عمتي بالشارع
وتصرخ وينه داوود
والناس كلها تتفرج
عليهم حضنته وتبجي
لحد مدخلوهم جوه
وهو يصرخ
كوه سكتوه
اني بساع حضرتله الحمام
كوه فوته من النسوان التارسه بيتنه
-الله يساعدك داوود والبقيه بحياتك
هو بس يهز براسه ميحجي
سبح ولبس دشداشه وشماغ تنگب بيه
وطلع...
اتلاث ايام وخلصت الفاتحه
بس هلكنا دك ولطم وتعب
ضلت المحافظات كرايبنه للسبعه
وداوود راح لوحدته اخذ شهادة الوفاة
وطلب اجازه شهر
فوك اجازته
غيم الحزن ع بيتنا
وعمتي ليل نهار تنعى
ع رزاق
عادل اجه هم
وانجمعوا هو و داوود
بقوا منا للاربعين
يله راحوا
سوه
وعمتي هم ضلت تحن وتون عليهم ابداية
سنة ١٩٨٥ حبلت بيج
كلت بلكت ولد
بس اجيتي انتي ابوج سماج نوره
هنا ابوج خمس سنين يداوم بالجيش
والحرب مافضت كل هاي السنين
واخذت ناس يابو ناس
ابوج ابد ابد ما ضاج من اجيتي
كلش فرح
يكول كلشي من الله نعم الله
ويحبجن كلش
خصوصا ورود يموت عليها
روحه من الدنيا هي
بس اني الصدك ضجت ردت ولد افرحه بيه
مرت عادل اثنين ولد عدها
ورحمن ٣ ولد
اكول خاف ينقهر من اجيب بس بنات
وتفكيره كله صار بالولد
شلون افرحه
بولد
كلت احبل واجيب
وما اابطل لحد مااجيب الولد
من نزل داوود كتله اريد احبل
كال بس نور بعدها صغيره
-ميخالف اخواتي مساعداتني بيهن
تره مامتعباتني ابد
-بكيفج بس تره اني مضايج لا خاف عبالج
مقهور لان تجيني بنات
لا والله ابد
اه باس ايده الف الحمد للة والشكر
خير من الله البنات
يدخلن ابوهن الجنه البنات
-ميخالف اني اريد ولد
-اذا انتي رايده ما امنعج
كمت نور دوم اوديها يم اختي خديجه
الي ماحبلت ابد
وتكيف من ادز بناتي يمها
بسنة ٨٦ هم حبلت
وليل نهار ادعي كون ولد
وافرح داوود بيه
فديوم اخذت بناتي ورحت لهلي
كتلهم ديروا بالكم عليهن
رايحه للسوگ شويه وارجع
محتاجه شغلات اجيبهن واجي بساع
صدگ رحت للسوگ
تسوكت شياش دبس وراشي
بناتي يجوعن بالليل ويحبن الدبس وراشي وحلويات الهن خطيه محد يجيب الهن ويجوعن بالليل
وجبت ملابس وشغلات
ورجعت شايله العلاليك
من بعيد واشوف هوسه اباب اهلي
ياربي دخيلك
شصاير
ذبيت العلاليك
واجيت اركض
شفت اخواني لازمين ولد ويدكون عليه
صحت ياا حسن حيدر ليش وي والولد
عوفوه مو خطيه موتوه ضرب
خطيه الولد مدمه تدمي
صاح حيدر
ولج احلام هذا دعم ورود
اباوع جوه السياره
واشوف كصايب ورود جوه التاير
واني صرخت يمه بنيتيييييي
وللحكاية بقية
ام مصطفى
