رواية قانون يونس الفصل السابع
لعبة الكبار والرقص على الشناكل
اللي معاه قرش يكسر عين القوي واللي معاه سلطة بياكل القوي حي..
بس اللي معاه يونس العامري بيخلي القوي يمضي على بياض
قعد يونس على الكرسي الجلد
مِمدّد رجله على الترابيزة وسجاره في بقه
بيبص لـ ورد اللي كانت واقفة قدامه وشها شاحب وعينيها فيها لمعة غضب وحزن غريب.
يونس نفخ دخان سجاره بهدوء وقال بصوته الرجولي
نفسك قصير قوي يا ورد.. اللي عملتيه مع الشاهد ده يدوب
فاتح شهية إحنا لسه مابدأناش التقيلة
ورد لفت وشها ليه ونطقت بحدة
انا بعت ضميري عشان أجيب حق أخوي يا يونس..
بس ما تفتكرش إني بقيت زيك. أنا لسه عارفة الفرق بين الغلط والصح
حتى لو كنت غرقانة في الغلط دلوقتي
يونس ضحك وقام وقف مشي ناحيتها لحد ما بقى وراها مباشرة
وهمس في ودنها لدرجة إنها حست بحرارة أنفاسه
الصح والغلط دول كلمات في الكتب يا قطة..
هنا في الواقع فيه قوي وضعيف طارق المهدي مش بس حرق مكتبي
ده بعت رسالة إنه عاوز يمحيني من على وش الدنيا
وعشان نضربه لازم نضربه في أكتر حاجة بيحبها.. فلوسه وعياله
ورد لفت له بسرعة
عياله؟ إنت عاوز تدخل العيال في اللعبة؟
يونس بصلها ببرود مرعب
طارق عنده ابن زين شاب ضايع مقضيها سهر ومخدرات وعامل نفسه ملك الدنيا بفلوس أبوه.
زين ده هو الثغرة
هو اللي هيخلي طارق يركع تحت رجلينا عشان يلم فضيحة ابنه
سكت يونس لحظة وطلع من جيبه فلاشة صغيرة وحطها في إيد ورد
دي عليها كل تحركات زين المهدي
النهاردة بالليل فيه حفلة في فيلا في الساحل.
إنتي هتكوني هناك.. مش كـ ورد الرشيدي لا..
هتكوني ليل البنت اللي هتخلي زين ينسى اسمه بمجرد ما يشوفها
ورد بصت للفلاشة بصدمة
إنت عاوزني أكون طعم؟
يونس قرب منها أكتر رفع إيده ولمس وشها بصباعه بهدوء
إنتي مش طعم.. إنتي الصياد. وزين هو السمكة اللي هتقطم الصنارة
أنا هبقى في ضهرك سماعة في ودنك وكاميرات مراقبة مغطية المكان.. بس الدور عليكي إنتي
ورد شالت إيده من على وشها بقوة وقالت بتحدي
ولو رفضت؟
يونس ملامحه اتغيرت وبقت قاسية زي الحجر
لو رفضتي يبقى ملف أخوكي هيفضل مجرد ورق مركون وطارق المهدي هيفضل يدوس على الناس بجزمته..
وإنتي هترجعي لبيتك تندبي حظك.
اختاري يا ورد.. تعيشي ضحية
ولا تموتي وانتي واخدة حقك؟
ورد بلعت ريقها.. الصراع جواها كان بيموتها.
بس فجأة افتكرت دموع أمها وحسرة أبوها اللي مات من القهر.
هعملها.. بس وحياة غلاوة دمي اللي اتحرق النهاردة
لو غدرت بيا يا يونس العامرى هكون أنا اللي بكتب نهايتك بإيدي
يونس ابتسم ابتسامة شيطانية بجد
تعجبيني.. اطلعي فوق
هتلاقي فستان في الجناح
وميكب أرتيست مستنياكي.
عاوزك النهاردة نجمة عشان النجوم هي اللي بتحرق الضلمة
خرجت ورد من الجناح ويونس فضل باصص لمكانها..
طلع موبايله واتصل برقم
الخطة ماشية بالمللي.. البنت دخلت العش
طارق المهدي هيعرف الليلة إن اللي يلعب مع يونس العامري لازم يجهز كفنه
لكن اللي يونس مايعرفوش
إن ورد وهي خارجة لمحت ورقة واقعة من ملفه
ورقة كان فيها صورة قديمة ليونس مع طارق المهدي وهما بيضحكو
ورد وقفت في الممر قلبها كان هيقف..
يعني يونس وطارق كانوا أصحاب؟
يبقى ليه بيحاربه دلوقتي؟
وهل يونس بيستخدمها فعلاً عشان حق أخوها ولا عشان يصفي حسابات قديمة مع شريكه؟
غمضت ورد عينيها بقوة وقالت لنفسها
ماشي يا يونس.. إنت بدأت اللعبة بس أنا اللي تمشي على القواعد
والبادى اظلم
