رواية قانون يونس الفصل الثامن
محامي الشيطان الذي روضته ملاك العدالة
أصعب حرب هي اللي بتبدأ بابتسامة.. وأخطر عدو هو اللي بيحبك بصدق في وقت إنت فيه بتمثل عليه الحب
الفيلا في الساحل كانت عبارة عن أنوار الديسكو ريحة البحر المخلوطة بريحة الممنوعات
والناس اللي لابسة ماسكات مخبية وراها وشوش مليانة غل وفساد.
ورد كانت واقفة لابسة فستان أسود سواريه طويل وماسك دهبي مغطي نص وشها
كانت طالعة زي الحلم بس قلبها كان بيترعش وهي سامعة صوت يونس في السماعة الصغيرة اللي في ودنها
اثبتي يا ورد.. زين المهدي لسه واصل
لابس قميص أبيض وماسك أسود. هو ده هدفك
عاوزك تسحبيه لمنطقة الهدوء اللي عند حمام السباحة
ابدأي
ورد خدت نفس عميق ومشيت بخطوات ثابتة
لمحت زين مكنش زي ما تخيلته شاب ضايع وبس كان فيه في عينيه نظرة حزن وكسرة مش ماشية مع الهيصة اللي حواليه
قربت منه وهي بتمثل إن كعب جزمتها اتلوى
زين لحقها بسرعة ومسك إيدها قبل ما تقع
خلي بالك.. الأرض هنا ناعمة زيادة عن اللزوم زي الناس اللي في الحفلة بالظبط
صوته كان هادي ومحترم وده اللي لفت نظر ورد
بصت في عينيه وقالت بصوت ناعم
شكراً
أنا ليل وإنت باين عليك مش طايق المكان هنا زيي
زين ابتسم
أنا زين
وفعلاً أنا بطلت أطيق أي حاجة فيها تمثيل يا ليل
تعالي نقعد بعيد عن الدوشة دي
يونس في السماعة كان بيضحك
برافو يا ورد.. السمكة بلعت الطُعم بسرعة
اسحبيه أكتر
قعدوا على طرف حمام السباحة
زين بدأ يتكلم بس كلامه مكنش كلام شاب عاوز يتسلى كان بيحكي عن قرفه من شغل أبوه
وعن إنه عارف إن كل الناس اللي حواليه عشان فلوسه مش عشانه
تعرفي يا ليل إنتي فيكي حاجة غريبة
عينيكي فيها وجع أنا عارفه كويس وجع حد ضاع منه حد غالي
ورد اتجمدت زين لمس جرحها من غير ما يقصد
يونس صرخ في ودنها
ما تسرحيش اطلبي منه يوريكي المكتب الخاص بتاع أبوه في الفيلا
هو ده اللي فيه المستندات
ورد تجاهلت يونس تماماً
وبصت لزين وقالت بصدق فجأة
ولو طلعت مش ليل ؟
ولو طلعت واحدة جاية عشان تأذي أبوك وتنتقم منه؟
زين سكت خالص
وبصلها نظرة طويلة وفجأة قلع الماسك بتاعه
وسامته كانت هادية بس ملامحه كانت جد جداً
أنا عارف إنك مش ليل وعارف إن يونس العامري هو اللي باعتك ليا
ورد قامت وقفت بصدمة ويونس في السماعة صوته انقطع فجأة وبقى وشّ
زين مسك إيد ورد وقال بلهفة
اسمعيني يا ورد.. أيوه أنا عارف اسمك الحقيقي
أنا مراقب يونس بقالي فترة وعارف إنه بيستخدمك عشان يضرب أبويا
ويصفي حسابات قديمة بينهم على قفا حق أخوكي أحمد
يونس مش ملاك يا ورد.. يونس هو اللي خطط لسرقة المناقصة اللي أخوكي كشفها
ولما الموضوع كبر لبسها لأبويا وللشاب اللي مات
ورد حست إن الدنيا بتلف بيها
إنت بتقول إيه؟ يونس هو اللي قتل أخويا؟
زين قرب منها وحط إيده على كتافها عشان يطمنها
يونس وأبويا كانوا شركاء
ودلوقتي بيخلصوا على بعض
يونس عاوزك تكوني الضحية الجديدة اللي يرميها في وش المدفع
بس أنا مش هسمحله
أنا حبيت شجاعتك من بعيد وأنا براقبك
ومستعد أساعدك تاخدى حق أخوكي من الإثنين
من أبويا ومن يونس العامري
في اللحظة دي النور اتقطع عن الفيلا كلها
وصوت رصاصة اخترق الهدوء
زين رمى ورد على الأرض وجسمه فوقيها عشان يحميها
ما تخافيش.. أنا معاكي
اللعبة قلبت جد ويونس باعت رجالة يخلصوا المهمة بطريقته
ورد كانت بتترعش بس لأول مرة تحس إن فيه إنسان بجد خايف عليها
مش وحش بيحركها زي العروسة
بصت لزين وقالت
هنتقم منهم يا زين؟
زين قال بقوة
هنحرق إمبراطوريتهم سوا يا ورد بس نطلع من هنا الأول
فجأة موبايل ورد نور
كانت رسالة من يونس
(الخيانة تمنها غالي يا ورد.. وزين المهدي هو أول فاتورة هتدفعيها )
ورد بصت للموبايل وبعدين بصت لزين اللي كان بيحاول يأمن طريق خروجهم
وفهمت إنها دلوقتي بقت بين نارين.. نار الشيطان اللي صنعها ونار الحب اللي ممكن يحرقها أو ينقذها
