رواية قانون يونس الفصل التاسع
وسط صريخ الناس والضلمة زين شد ورد من إيدها بقوة
اقلعي الكعب ده وامشي حافية مفيش وقت صرخ فيها وهو بيكسر إزاز باب جانبي بيطل على ممر الخدم
ورد مكدبتش خبر رمت الجزمتين ومسكت في إيده زي الغريق
جريوا في الممر الضيق لحد ما وصلوا لجراج خلفي زين فتح عربية ورمى ورد جواها وركب
العربية طلعت زي الصاروخ من الباب الخلفي للفيلا
ورد كانت بتنهج بتبص وراها برعب وفجأة عينيها نزلت على دراع زين.. كان بينزف جامد
زين! إنت اتصابت
زين بص لدراعه بلامبالاة وهو دايس بنزين على الآخر
خدش سطحي من إزاز الباب يونس كان باعت رجالة تخوفنا مش تقتلنا
هو بيحب يشوف الفريسة بتجري قبل ما يصطادها
بعد ساعتين من السواقة على طريق فرعي ضلمة وصلوا لإسكندرية
زين وقف قدام عمارة قديمة في منطقة شعبية متطرفة
انزلي.. دي شقة الدادة بتاعتي الله يرحمها محدش يعرف عنها حاجة ولا أبويا ولا يونس يقدروا يوصلولنا هنا
دخلوا الشقة كانت بسيطة
ورد جابت علبة إسعافات من الحمام وقعدت قدام زين عشان تطهرله الجرح
إيديها كانت بتترعش وهي بتمسح الدم
زين رفع إيده السليمة ومسك إيدها اللي بتترعش وبصلها في عينيها مباشرة
اهدي يا ورد.. إحنا لسه عايشين
ورد دموعها نزلت غصب عنها
عايشين إزاي؟ أنا كنت فاكرة إني بحارب شيطان واحد طلعوا اتنين
أبوك ويونس قتلوا أخويا ودلوقتي بيلعبوا بيا وببيك
إنت بتعمل ده كله ليه يا زين؟ ليه تضحي بحياتك وعزك عشان واحدة متعرفهاش؟
زين اتنهد وقرب منها لحد ما جبهته لمست جبهتها وقال بصوت مليان وجع
عشان إنتي أول حاجة حقيقية ونظيفة أشوفها في المستنقع اللي أنا عايش فيه
عشان أنا قرفان من الفلوس اللي بتيجي من دم الناس
أنا مراقبك من يوم ما وقفتي قدام المحكمة تعيطي على أخوكي وحلفت يومها إني هكون درعك حتى لو الدرع ده هيتكسر تحت رجلين أبويا
كلامه نزل على قلب ورد زي الماية الباردة على حريقة لأول مرة تحس إنها مش لوحدها إن فيه حد مستعد يضحي عشانها بجد مش بيستغلها زي يونس.
وفي نفس اللحظة دي.. في القاهرة
كان يونس العامري قاعد في مكتبه الاحتياطي هادي جداً قدامه كوباية قهوة وبيتفرج على شاشة التليفزيون الكبيرة.
باب المكتب خبط ودخل طارق المهدى العضو البرلماني ووالد زين العدو اللدود ليونس
طارق قعد قدام يونس وقال بعصبية
ابني فين يا يونس؟ وإيه المسرحية اللي اتعملت في الساحل دي؟
يونس أخد رشفة من قهوته وابتسم ببرود قاتل
ابنك قرر يلعب دور البطل وهرب مع البنت اللي كانت جاية تجيب رقبتك ورقبتي في قضية أحمد الرشيدي
#قانون_يونس
#الفصل_التاسع
الظاهر إن رومانسية الشباب خلتهم ينسوا هما بيلعبوا مع مين
طارق خبط على الترابيزة
أنا مش هسمح للبنت دي تدمر مستقبلي ولا تاخد ابني في سكتها
يونس طلع تابلت وشغّل فيديو
لـ ورد وهي بتجري من الفيلا وفي إيدها حاجة بتلمع وورى الفيديو لطارق
دي كاميرات المراقبة يا طارق بيه البنت دي دخلت حفلة ابنك بهوية مزورة
وسرقت ملفات تخص أمن شركاتك ولما الأمن كشفها ضربت نار وهربت
وابنك الضحية كان بيحاول يوقفها بس هي خطفته
طارق بصلة بذهول من ذكاء يونس
إنت قصدك.......
يونس قاطعه بصوت حاد
قصدي إن القضية اتقفلت قبل ما تتفتح
البنت دي مش باحثة عن العدالة دي إرهابية
مسلحة خطفت ابن رجل أعمال مهم
البلاغ هيتقدم للنيابة دلوقتي والصحافة هتنشر صورتها في كل مكان على إنها مجرمة هاربة
يونس قام وقف وبص لطارق المهدي من فوق لتحت
خلافنا يتأجل يا طارق بيه دلوقتي إحنا إيد واحدة لحد ما نرجع ابنك ونعلق البنت دي على حبل المشنقة.. بالقانون
نرجع لإسكندرية
زين كان نايم على الكنبة من التعب وورد قاعدة جنبه فجأة مسكت موبايلها اللي كانت سايباه في الشنطة وفتحته عشان تشوف الأخبار
الصدمة شلتها
صورتها مالية الشاشات ومواقع التواصل تحت عنوان
عاجل
أمر ضبط وإحضار للمدعوة
ورد الرشيدي بتهمة الشروع في قتل ومحاولة اغتيال وخطف نجل النائب طارق المهدي
ورد وقعت الموبايل من إيدها يونس مبعتش بلطجية عشان يقتلوها
يونس استخدم أقوى سلاح في إيده القانون اللي بيفصله على مزاجه
دلوقتي هي مش بس بتدور على حقها.. هي بقت مطاردة من الدولة كلها
