رواية فصلية ولكن الفصل الثامن بقلم سوزان ليث
حياة: حسيت ساعه ثمانيه كمدت من الفراش بس اني شابعه نوم مع العلم نمت الفجر شفت امل بعدها نايمه شلت فراشي وراها نزلت فتت للحمام غسلت وطلعت للمطبخ لكيت بس خاله
صباح الخير
خالة: اصباح نور جيتي بوكتج تعالي تريكي وياي
حياة: رحت جريت الكرسي وكعدت جانت مسويه بيض وجاي وخبز حار وخاله دبس وراشي واجبان
خالة: يمه شو نزلتي من فوك
حياة: اي البارحه جنت يم امل وغفيت يمها . . خالد بعده نايم
خالة: اظن بعده
حياة: كمت كتلها خل اروح اشوفه رحت فتحت الباب لكيته نايم بعده تقربت منه وصحتلها شيخ خالد مره وحده جان يفتح عيون
كتله صباح الخير
خالد : صباح النور شسوين هنا
حياة: اوو اليوم عصبي .. مو كلت اكعدك تجي تتريك ويانه
خالد: ماريد اسمم طلعي وسدي الباب وراج
حياة: ظليت اباع عليه ماعرف شكله حسيته كلش مقهور مني كتله اني اسفه علمود البارحه والله مجنت اقصد بس جنت كلش ضايجه
خالد : طلعي وسدي الباب
حياة: خرب شبي هذا صوجي اني الاعتذرت عفته وطلعت كلت بعد ولا حجي وياه منو هو حتى هيج يفشلني
طلعت رحت كلت اكمل ريوك
خالة: ها يمه ماكعد
حياة: ميريد ياكل ظليت اكل بعصبيه لحد مكملت وكمت شلت الاماعين الفارغه واللستكاين غسلتههن وراها رحت انظف الاستقبال والهول الجبير والهول الصغير انظف واني احس نار جوايه مشتعله وبس اريد التهي بشي كملت وطلعت للطرمه جريت صونده وكمت اغسلها اجه حسين عليه
حسين : يابه عليش انتي دتغسليها عوفيها اني اكملها
حياة: لا اني اريد اغسلها وظليت اغسل واخرط الماي بالماسحه هو لح عليه بعدين عافني ودخل كملت شغل دخلت لكيت ساره وعلي ديتريكون دخلت للغرفه لكيت امل دتنزل من درج بكوه جر نفسها
امل: انتي شوكت كعدتي
حياة : من ثمانيه خاتون وكملت شغل كله حتى الكراج غسلته
امل: عفيه بابنيتي يوميا اريج بهيج نشاط
حياة: هههههه حروح ابدل دشداشتي تبللت بالكراج
دخلت للغرفه لكيته بالحمام اني طلعت دشداشه ومنشفه وظليت واكفه انتظره يطلع افوت اسبح
خالد: جنت مشتعل نار من جتي تكعدني جنت حاس اصلا اجتي اعتذرت مني بس اني طردتها من الغرفه لان جنت كاره نفسي
طلعت من الحمام لكيتها واكفه وبيدها هدومها تنتظرني تريد تدخل للحمام
اني طلعت هي دخلت للحمام ظليت بالغرفه شويه وطلعت من غرفه
خالة: هلا يمه اصباح الخير
خالد : صباح نور
خالد : امل صبيلي جاي وجيبي للهول
امل: صبيت جاي ورحت لابويه نطيته كتله بابا متتريك
خالد. ماشتهي جيبيلي باكيت جكاير من جراره
امل : بابا اجيبلك جديد
خالد : اي بجراره مال ميز
امل : رحت جبتله باكيت ونطيته
رجعت للمطبخ تلكتني بيبي دكلي سوي ريوك لابوج
- بيبي ميريد مو سئلته
- ها شعجب
راحت ام خالد لخالد للهول
يمه من صبح جكاير عالاقل تريك
- ممشتهي وداعتج
حياة: كملت سبح وطلعت امشط بشعري شويه دخلت امل
امل: حياة: شبي ابويه
حياة: شبي
امل : شو من صبح كاعد يدخن حتى ريوك مقبل يتريك
حياة: وشسويله اني هم صبح كلتله هم مقبل
امل: شبيج انتي جنج ضايجه
حياة: تعبانه شويه
امل: ديله كملي وتعالي بره انتظرج
حياة: ماشي اكمل واجي
كملت تمشيط وجففت شعري وكملت شغلاتي ولابست حجابي وطلعت رحت للمطبخ
خالة: حياة يمه روحي لرجلج بالكي يقبل ياكل
حياة: خالة ميقبل هو من يجوع ياكل
خالة: دروحي يمه وراه دوه حتى ياخذا
حياة: شكد اضوج من تلح خالتي عليه كمت رحت للهول لكيته كاعد يباع اخبار ونفاضه بصفه مليانه جكاير
رحت كعدت يمه كتله ليش هيج دسوي
خالد : بعصبيه ليش شفتيني اسوي
حياة: يعني كومه شارب جكاير وممتريك وبارحه بالليل هم كومه جكاير وتاليتها
خالد: حياة كومي من كدامي مابيه حيلج
حياة: انت دتاذي نفسك تعرف لو لا
خالد : ساكت
حياة: يعني عالاقل روح تريك لخاطر امك رايح والجاي دكله روح عليه بالكي ياكل
خالد : مالج دخل انتي
حياة: ماشي مالي دخل بعد وياك عفته وكمت
حياة: ظلينا هيج اسبوعين لاني احجي وياه ولا هو يحجي وحتى كلشي ماسوي اله كله امل القايمه بي
بيوم جان العصر شفت عمتي دتخابر عليج
جاوبته
-الو هلو عمه شونج
-هلا بيج انه زينه انتي شونج
-الحمدلله
-حياة عمه تكدرين تجين اليوم
- ليش عمه صاير شي
- عمه لتفزين بس ابوج تخربط الظهر ودينا للمستشفى بس هو هسه الحمدلله طلعنا بس رايد يشوفج
- كمت ابجي شبي ابويه عمه احجي صدك الله يخليج
- ولج والله مابي تعب شويه والحمدلله هسه احسن بس كال اريد اشوف حياة
- عمه هسه اكللهم يجيبوني يله باي
رحت ركض ادور خالد اريد اكله شفته كاعد بالحديقه ركض رحتله هو شافني اركض
خالد: شبيج ليش دتركضين
حياة: خالد الله يخليج وديني لابويه متخربط وموديه للمستشفى ويريد يشوفني
خالد: شبي متخربط
حياة: مادري عمتي هسه خابرت وكلتلي مطلعي بالبيت هسه بس يريدني
خالد: دكافي بويه لتبجين مابي شي ان شاءالله دروحي بدلي خل اوديج
حياة: رحت ركض لابست عباتي ولفيت شالي دخل خالد
خالد: اخذيلج وياج ملابس حتى تبقين يمه
حياة: باوعت على خالد ردت اروح احضنه من كلي تبقين
كتله هناك عدي هدوم بس خل روح بسرعه ديله امشي حسين بره دينتظرنا
طلعت عمتي سلمت عليه وكلتي مابي شي ان شالله
طلعنا ركبنا بسياره وظليت بس اريد اوصل للبيتنا احس طريق شطوله صار وصلنا ركض نزلت دفعت الباب وفتت طلعت عمتي من باب المطبخ عليه حضنتها عمه شونه ابويه
عمتي : حبيبتي والله احسن صار دخليله بغرفته
حياة: ركضت لغرفه ابويه فتت لكيته نايم عالجربايه يمه من شفته جن روحي ردت ركض رحت كعدت بالكاع وراسي بحضنه وابجي واكله شبيك
ابو حياة: مابيه بابا شويه ضغط صاعد عدي لتخافين
حياة: ظليت حاضنه ابويه وابجي مثل الاطفال لحد مسمعت صوت خالد
خالد : دخلتني عمه حياه للبيت وفتت للغرفه لكيت حياه حاضنه ابوها وتبجي كسرت خاطري جان بودي ارح احضنه كل قوتي
كتله حمدلله عالسلامه عمي مشوف شر
ابو حياة: الله يسلمك . ام محمد جاي للشيخ
ام محمد : صار من عيوني
ابو حياة: اشكرك لان
جبت حياة
خالد : لا عمي هذا واجبي شون صرت
ابو حياة: والله الحمدلله ضغط جان صاعد وتخربطت الحمدلله ضربوني ابره بالمستشفى ونزل عاد كالو طلعو مابي شي بعد
حياة: اكيد متاخذ حبايه الضغط ماتك مو
ابو حياة: اي والله صار جم يوم خلصان الباكيت وانسى اجيب جنتي انتي ذكريني
حياة: بابا شون تنسى والله من سمعت عمتي ردت اموت بس اريد اوصلك
ابو حياة: يله كومي بابا مابيه شي كاعده هيج هسه شيكول رجلج مزوج طفله
خالد: باوعت على حياة وابوها وذكرت امل بنتي وكلش تندمت لان اخذتها من ابوها
حياة: ظل شويه خالد وراها كال
خالد : اترخص عمي بعدين اجي اشوفك
ابو حياة : وين شيخ ابقى عالعشه
خالد: مشكور والله اخوي بسياره بره
ابو حياة: جااا ليش مانزل
ام محمد : والله طلعت كلتله بس مقبل يفوت عاد طلعتله الجاي بره اله
خالد : يله عمي حمدلله عالسلامه مره ثانيه حبقي يمك حياة حتى دير بالها عليك
ابو حياة:والله شيخ خالد مشكورمقصرت
خالد : يله اترخص مع السلامه
ابو حياة : الله وياك شيخ .. حياة روحي طلعي وصلي لرجلج
حياة: كمت وره خالد وصلنا لباب البره اندار عليه كلي اني باجر يمكن اروح لبغداد احتمال اظل هناك فد اسبوع عود من ارجع اجي اخذج
حياة: ابتسمت كتله تروح وترجع بسلامه وراها مد ايده طلع محفظته وطلع فلوس كلي هاج خليها جوه ايدج خاف تحتاجين شي
كتله لا ماريد شكرا ابوب...... قاطعني كتلج اني مسؤول عليج
اخذت الفلوس كتله شكرا
وراها كلي محتاجه شي
كتله سلامتك
يله بويه فوتي جوه سلمت عليه وطبيت ورحت كعدت يم ابويه وعمتي جانت يمنا
ظلينا نحجي ونسولفت لابويه على اهل خالد وشون يعاملوني وحتى على خالد لكيت نفسي احمد بي وابد مشكيت منه
وراها كمنا اني عمتي سوينا عشه وتعشينا لليل اجوي عمامي ولد عمي يشوفون ابويه
وجنت بالمطبخ اجه عليه قصي وظل يسولف ويايه ويحجي وراها اجه حمزه الي دعم خالد كلي
حمزه : حياه شونج
- الحمدلله
- حياة انه بعد مشفتج وره مزوجتي ردت اعتذر منج الي بي انتي هسه بسببي
- اعتذرت وشصار هسه ارتاح ضميرك
- والله مداكدر اريحه دايما افكر اني سبب الي انتي بي كل ماشوف عمي احس اني الي خليتهم ياخذوج منه
- ماكو داعي بعد لهذا الحجي الحمدلله خالد واهله خوش ناس مشفت منهم شي يضوجني
وراها عفته ورحت كعدت وياهم وظلو يسولفون ويحجون
جتي رساله من خالد 💬 شون صار عمي
رديت 💬 الحمدلله احسن شكرا لان خليتني ابقى
رد 💬 هذا واجبي ديري بالج عليه وعليج ماشي تصبحين على خير
رديت 💬ماشي وانت من اهل الخير .
ثاني يوم فتحت عيون وظليت اباع بغرفتي واني ممصدكه نايمه بيها كعدت رحت لابويه لكيته نايمه دخلت سويت ريوك ورحت كعدته وكعدنا تريكنا شويه وجتي عمتي وراها كمت انظف البيت وعمتي كالت اني اجيب الغده لسوين
للظهر اجتي عمتي خطيه جايبه غده شاويه سمج ومسويه تمن احمر وزلاطه كعدنا تغدينا وراها ابويه كال حروح انام وعمتي راحت لبيتها
كعدت ظليت افكر بخالد هسه وصل لو لا كلت خل اخابره بس استحيت منه فدزيت رساله💬هلو شونك وصلت لبغداد
شويه ورد💬اي الحمدلله قبل ساعه دخلنا بغداد هسه يم بسمه
رديت💬 حمدلله عالسلامه شوكت تروح للدكتور
رد💬 باجر اذا الله راد شونه عمي
رديت 💬الحمدلله احسن
مر الاسبوع واني فرحانه يم ابويه وابويه تحسنت صحته وعدته كتله كل اسبوع اجي اشوفك وانت هم تعالي اهل خالد حبابين ودايما ام خالد تسئلني عليك
ابويه كال ان شاءالله
ظلينا هالاسبوع اني وخالد بس مسجات بس اطمئن عليه وهو يطمئن عليه
العصر عمتي اجتي كالت تعالي روح للصالون صاير بيج حواجبج عبالك مال بنيه بالمدرسه
ليش هيج ماما ممهتمه بنفسج
كتلها والله عمه جنت مهتمه بس ذيج الايام مجان الي واهس اسوي
اسوي شي رحنا للصالون حفيت وكصيت شعري مدرج لان اطرافه تعبانه وسويت تنظيف لبشرتي وجهي صار احمر احس هسه طلع وجهي
رجعنا للبيت فبطريقنا مرينا على ابو كوزمتك اخذت شغلات عطور ومكياج واخذت لامل هم لان خطيه متكدر تطلع اجيب هاي سوالف
ورجعنا للبيت لكيت خالد داكلي اني جنت عايفه تليفون بالبيت
رجعت دكيت عليه
-الو هلو
-هابويه وينج دكيت من شوكت ماكو
-اي جنت طالعه ويه عمتي وناسيه تليفوني
- غير دكليلي من طلعين
- مادري والله ..انت وين
- انه بيتنا
- شوكت رجعت
-الظهر وصلت
- موكلت باجر اجي
- كملت شغلي ورجعنا متريديني ارجع
- لا بس عبالي اكو شي
- بالليل اجي اخذج
-صدك
- متردين ترجعين لبيت رجلج
- لا ماشي شوكت تجي حتى احضر نفسي
- فد بثمانيه هيج
- ماشي يله باي
- باي
كمت كلت لابويه خطيه كلي روحي صالج جم يوم هنا ورحت فتت سبحت وطلعت سشورت شعري وخليت مكياج خفيف وتعطرت دخلت عمتي عليه كلتلي كله هذا للشيخ
حياه : ههههه لا والله بس وجهي يسوي واهس اخلي مكياج وسشورت داشوف الكصه شون صارت
كالت دكومي يله ابوج وصه قصي يشوي كباب ويجيب دجاج شوي هم حتى تتعشىون قبل لترحون
كتلها خل ابدل واحضر غراضي
رحت لكنتوري طلعت بنطرون قماش اسود ولابست فوكاه تون لونه جوزي وبي بيجي وشال جوزي مشجر بيجي
شويه وعمتي اجتي كالت تعالي عاد رجلج اجه اني نزلت بس ملبست الشال طبيت للاستقبال لكيته كاعد يمه كلبي صالي كومه مشايفته كلش مشتاقتله فديت الرجوله الي عدك
خالد: كملت شغلي بغداد ورجعت للبيت جنت ناوي ابقي حياة لباجر يله اجيبها بس ماكدرت اشتاقيتلها مكانها خالي بالبيت كلش كتلها حجي اخذج اليوم ورحت اجيبها ذبني حسين وكلي من دكلي اجيك
دخلت للبيت ابو حياة استقبلني وظلينا نسولف لحد مدخلت حياة بس شنو من جمال ظليت بس اباع عليها متغيره شعرها يموت لبسها كلشي بيها حلو جتي عليه وهي مبتسمه ردت اخذها بحضني واظل اشم بريحتها هلكد ممشتاقلها
حياة: هلو شونك
خالد: هلا بيج انه بخير انتي شونج
حياة: الحمدلله ورحت كعدت بصف الكرسي مالته ابويه كام يشوف العشه راح للمطبخ على عمتي
ظليت اباع عليه ومبتسمه لان كلش مشتاقتله وهو هم يباع عليه
خالد: ها شمسويه بنفسج
حياة: شبيه محلوه
خالد: لابويه منو الكال طالعه كمر
حياة: كتله شكرا جنت مستحيه منه كلش
خالد: لزمت شعرها بيدي هي ظلت مستغربه كتلها كاصته
حياة: يمه من مد ايده على شعري كلبي كام يدك سريع .. كتله اي اطرافه جانت تعبانه فكصيته
خالد: تنهد شون اطلعج اليوم هيج و.... بعد ممكمل وابوحياة دخل يله شيخ خالد العشه جاهز
كمنا اكلنا جانو خالين العشه عالميز علمودي وظلت حياة تفلسلي دجاج وتنطيني كملنا عشه وراها جابو جاي وفواكه صارت بالعشره خابرت حسين يجينا شويه واجه دكلي مسكول
كتله لحياة يله بويه خل روح تاخر وكت كامت راحت لبست الحجاب وطلعت ظليت اباع عليها بت الاوادم شون حتطلع هيج
كتلها محتلبسين عبايه.
حياة: لا ليش اللبس هذا طويل
خالد: باوعت عليها كلت يله هي بسياره سلمنا عليهم وطلعنا رجعنا للبيت
حياة: رجعنا للبيت جانت امل واكفه يم باب المطبخ جتي ركض عليه حضنتني
امل: اشتاقيتلج يولي بعد لتروحين هلكد
حياة: والله اني هم مشتاقتلج رحت للهول سلمت على خالتي وساره وعلي وكعدت يمهم وفات خالد هم كعد ظلت خالتي تسئل على ابويه وشون صار وراها باوعت على خالد يباع عليه صراحه حبيت نظراته الي عبالك اول مره ديشوفني
شويه ورحت لغرفتي فتت نزعت شالي وكفت اباع نفسي بالمرايه شويه فاتت امل ظلت فاتحه حلكها
امل: كاصه شعرج
حياة: اي
امل: لج يخبل
حياة: شكرا . اوكفي جايبتلج شي
امل: شنو شنو
حياة: اوكفي خليته بجنطه طلعت الجيس كتلها هاج هاي الج
امل: فتحت الجيس بي عطر ومكياج وكلش حلوات .. حياة يخبلن شكرا
حياة: عفوا
امل : يله حروح اجربهن
حياة : اوكي روحي راحت امل وراها طلعت تليفوني خليته عالشحن شويه ودخل خالد
خالد: ظليت بالهول امي تحجي ويايه بس اني بس اريد اروح للغرفه على حياة شويه ورحت للغرفه دخلت عليها
حياة: باوعت عليه ورحت للكنتور طلعت دشداشه البسها
خالد: حتبدلين
حياة: اي
خالد : بقيج لابستهن شويه
حياة : باوعت عليه كلش فرحانه كتله ماشي .. رحت كعدت على حافه الجربايه وهو كبالي كتله تعرف اشتاقيت للغرفه
خالد: حتى اني اشتاقيتلها
حياة: جبتلك فدشي ويايه
خالد: جبتيلي
حياة: دقيقه .. طلعت علاكه نطيتها لخالد
خالد: فتحتها لكيتها جيبتلي عطر الي اخلي منه .. يابويه ليش كلفتي نفسج
حياة: لا حبيت اجيبلك شي وبعدين لامل هم جبتلها
خالد:مشكوره
حياة: ظلينا كاعدين بعدين رحت بدلت وفرشت ونمت
مرت ايام وصار موعد عمليه خالد يقرب يوم بعد بوم مرت خمس اشهر واني يمه ولازم شهر جاي يحضر نفسه لان يسافرون للهند صح جنت اتمنى يسافر باقرب وقت بس ماكذب جنت خايفه عليه
كل ميقرب هذا اليوم خالد عصبيته زيد علينا مالومه عليها هذا العمليه لو تخيب لو صيب
يوم اجتي امل عليه واني بالغرفه راكضه وصيح حياة
حياة: شبيج وكعتي كلبي
امل: احمد احمد اليوم حيجي لهنا
حياة: اي وشيسوي
امل: ميسوي بس حتى يشوفني واشوفه
حياة: امداج اني على هالركضه وصيحين احمد كلت جاي يتقدملج
امل: صالي هواي ممشاوفين صح من يجي اسوي المستحيل حتى بس المحه بس على كلبي مثل العسل
حياة: اويلي عالحب ههههههه
امل: اي دمرنا هالحب
حياة: ياعيني بعد شويه حتطلع عدج جناح وطيرين
امل: مو انتي سوين اضرب مني من ابويه يرجع من بغداد
حياة: لا ماسوي عادي يعني غير استقبله رجال تعبان وجاي من طريق
امل: حياة انتي تحبينه لابويه
حياة: ماعرف ممتاكده مرات اكول احبه ومرات اكول لا مشاعري هاي من وره حالته مادري
امل: يعني اذا ابويه سوه العمليه ومشى شسوين
حياة : اكيد حطير من الفرحه. ولتنسين الي سوى بي هيج من اهلي . يعني اتمنى يمشي على رجله اليوم قبل باجر. بعدين امل هو اول مزوجنا وعدني يرجعني لابويه بس تهدا الاوضاع واني دانتظر يسوي العمليه ويصير زين واكله
امل: ليش عزه
حياة: امل حياتي ويه ابوج صعبه شوفينا بين يوم ويوم نتعارك وهو بس يصيح ويرزل اني مجنت راسمه هيج لحياتي ابوج مو هو الي احلم بي اني دتفهمين
امل: بس بابا احسه يحبج
حياة: بس اني ماحس بهذا الشي دايما احسه يريدني اغلط حتى يحجي عليه
امل: لاحياة بابا مبين يحبج والله من رجع ذاك اليوم من بغداد ظل يفتر بالبيت عبالك يدور عليج واصلا من رجع كال لبيبي باجر ارجع حياه بس اتفاجئنا بي العصر كال اروح اجيبها
حياة: ماعرف من اشوفه بالكرسي كلبي يمرد عليه احس ابن عمي سبب الي هو بي ماعرف هذا احساسي ليش
امل: عوفج من هالسوالف كومي نطلع مره
وره ايام جنا اني وامل بالمطبخ سمعنا اصوات خاله وعلي وخالد عاليه امل كالت خل اروح اسمع شبيهم
شويه ورحت وره امل شفتها واكفه ماده راسها عالباب مال الهول الجبير
حياة: ها شكو
امل: اوكفي
حياة: سمعت خالد يكللهم هذا الموضوع سدوا ماريد احد يفتحه
وراها ندارت عليه امل اشرتلي الحكها رجعنا للمطبخ كتلها شكو مفتهمت شي اني
امل: باعي هو الي افتهمته تقريبا ابويه ميقبل يسوي العمليه
حياة: ظليت صافنه بوجه امل .. ليش
امل :ماعرف مفتهمت ليش بس عمو علي يكله احنا دننتظر يوم يوم حتى نشوفك واكف على رجليك هسه دكول ماسويها
شنو الي ميسويها اكيد العمليه
حياة: يعني انتي سمعتيهم يحجون عالعمليه
امل: لا مسمعت بس حجيهم هذا يدل عالعمليه
حياة: ظليت ساكته ماعرف شحجي كعدت عالكرسي ظليت افكر ليش ميقبل يسويها معقوله خايف من النتيجه لا ممعقوله خالد ميخاف من شي
ظل هذا الوضع كل وقت خالد وخالتي اصواتهم عاليه ومانعرف السبب لان خالتي متقبل تحجي وحتى سئلت ساره كلت بالكي علي حاجيلها بس كالت محجالي شي
خالد مو هو تغير 180 درجه ويايه معاملته كلش صارت محلوه ومجنت اعرف سبب حتى بكل فرصه جان يشوفه يحجي ويرزل كدام اهله حاولت جم مره احجي وياه بس مينطيني مجال واكثر من مره يطردني من الغرفه
وره ايام شفت حسين بالمطبخ كاعد وحده دياكل كلت خل اسئله شكو
حياة : حسين اريد اسئلك بس لدكلي ماعرف الله يخليك
حسين: سئلي خيتي صاير
حياة: شبي خالد هاي الايام كلها اعصاب وميتحجي ومعاملته صارت كلش قاسيه ويايه
حسين : والله حياة هو معاملته هاي ويه الكل هيج مو بس وياج
حياة: شنو سبب
حسين: ميقبل يسوي العمليه
حياة: ليش شنو سبب
حسين : مادري ميقبل يكول سبب
حياة: زين يجوز خايف من العمليه
حسين : لا يابه هو خالد يخاف من شي .. انتي محاولتي تحجين وياه
حياة: حسين كل ماحجي وياه بالغرفه يكلي طلعي بره وماكدر احجي كدام خالتي ليرزلني وافشل كدامها
حسين: والله ماعرف شكلج هاي سالفه شاغله بال الكل بس ربج كريم يحلها
حياة: الله كريم .. عفت حسين وطلعت للحديقه كعدت بيها وظليت افكر ليش ميقبل يسويها ليش هيج تغير ويايه والله تعبت هاي الايام صارت كلش ثكيله
رحت لخالتي حجيت وياها وكتلها عرفت بسالفه خالد خطيه خالتي ظلت بس تبجي ودكلي ماصدك اشوف واكف على حيله يجي هسه يكلنا ماسويها
ظليت اواسي بيها وكتلها ربج كريم يحلها بدقيقه
خالد : الفتره الراحت جنت كاره حياتي كلش وقررت ماسوي العمليه بعد مسمعت حجي حياة ويه امل .. اي سمعتهم يحجون عليه وجانت الباب مفتوحه بوكتها حسيت بخنجر بصدري حياة متحبني شفقه باقيه ويايه تريد اسوي العمليه وترجع لابوها بوكتها كرهت حياة وصرت اعاملها معامله محد يتحملها بس هي جانت متفتح حلكها ويايه
مره فتت عليها لكيتها دصلي وكاعده تدعي ظليت واكف وراها هي تدعي وتبجي بنفس الوكت وماعرف جانت تدعي كملت وكامت شافتني وجانت عيونها دموع
متحملت اشوف دموعها كتلها ليش دتبجين
حياة: مابيه بس جنت مخنوكه كلت اصلي بالكي ارتاح
خالد: شنو الي خانكج
حياة: انت
خالد: انه
حياة : تقربت من يمه وكعدت بالكاع ويدي عالكرسي ماته .. كتله
ليش متقبل سوي العمليه
خالد: استغفر الله كتلج معليج بهالسالفه
حياة: شون معليه كلي شون تريدني اشوف اكو فرصه ترجع توكف على رجلك واسكت
خالد: هذا الشي خاص بيه محضر بي احد غيري
حياة: غلطان انت حضرنا كلنا وياك
خالد : عصبتني وصحت ماريد احد يشفق عليه ويحسسني انه عاجز
حياة: بس احنا مشفقانين عليك احنا من حبنا الك ريدك ترجع مثل قبل
معاجبك ترجع تمشي وترجع سوق وتطلع وطب ومحد وياك معاجبك تاخذني اني وامل طلعنا تفرنا مو دايما دكلها لامل من اصير زين نروح للشمال سفره
خالد: ظليت اسمع لكلامها تحجي ودموعها تنزل .. كافي تبجين مسحت دموعها كتلها دموعج سجاجين بكلبي كافي
حياة: ابجي لان احس نفسي اني العاجزه لان مداكدر اسويلك شي
خالد: ظليت ساكت
حياة: لزمت ايده وماعرف شون صارت عدي عالجراة احجي وياه هيج والزم ايده .. كتله.. انت جبير هذا البيت وشيخ عشيره مو بس احنا محتاجيك ناسك الي تحبك كلها محتاجيك
الله يخليك فكر بينا وبيهم
خالد: الله كريم .. عفتها وطلعت للحديقه ظليت افكر واجيبها منا واجيبها منا حجيها صحيح بس اكو شي بداخلي مديقبل اسويها يمكن لان سمعت حياة دكول من يصير زين اعوفه هواي افكار
حياة: حجيت وياه كلشي الي بكلبي وهو حسيته قتنع بس يكابر ظلينا ايام وهو بعده ميقبل بس عصبيته قلت بس بقى معاند ميسويها
