رواية فصلية ولكن الفصل التاسع بقلم سوزان ليث
ظلينا ايام وهو بعده ميقبل بس عصبيته قلت بس بقى معاند ميسويها
وره ايام من كيفه كله لعلي ياخذ جوازات حتى يطلع الفيز حتى يسافرون احنا جنا مصدومين منه يعني من صدك مجنا متوقعين يسويها ابد
وره ايام حجزو للهند وجان نهايه الاسبوع سفرتهم
فقبل يومين من السفره جنت داحضر غراضه وهو يمي يكلي شخليله بجنطه
اني جنت فرحانه بس بنفس الوكت خايفه كملنا غراضه وكلي
خالد: شتردين اجيبلج ويايه
حياة: باوعت عليه كتله اريدك ترجعلي بسلامه وكلشي ماريد
خالد : اعرف حياة خايفه عليه وخاصه الايام الي قربت بيها سفرتي بس هي جانت متبين هالشي بالعكس ظلت تنطيني تفائل وطاقه ايجابيه .. من سئلتها شتردين اجيبلج حسيتها جاوبتني من كل كلبها من كل كلبها تريدني ارجع .. محسيت نفسي الا اني اجرها من ايدها
واحضنها كل قوتي وهي هم حظنتني وحسيتها كامت تبجي
حياة: جرني وحضني حسيته حس بيه جنت محتاجه احضنه محتاجه اشبع من ريحته بادلته الحضن وكمت ابجي ماعرف احس جنت مختنكه كلش
خالد : ظليت حاضنها بس من شفتها كامت تبجي وخرتها .. ليش هالدموع
حياة : كعدت كباله بالكاع ولازمه ايده . خايفه
خالد: على شنو تخافين لان حسافر لو لان حسوي العمليه
حياة: اثنينهم
خالد: لتخافين هاي العمليه اسهل من ذيج وبعدين مو انت ثبرتيني الا اسويها
حياة: اي صح بس مو بيدي اخاف
خالد: جريتها بحضني وخليت راسها على صدري ظليت امسح شعرها .. وهي مجلبه بيه عبالك طفله .. لتخافين بويه كل واحد يموت بيومه
حياة: الله يخليك ديربالك على نفسك وكمل علاجك هناك كله هناك يفتهمون احسن من هنا
خالد : الله كريم كافي يله مو حتى تشيرتي تبلل من دموعج
حياة: ههه كمت مسحت دموعي . كتله بعد شتريد احضرلك
خالد: ماريد شي بعد بقن بس دوايات نخليهن قبل السفره
قبل بيوم السفره بيوم لازم يرحون لبغداد لان ميكدرون يطلعون بنفس اليوم للمطار خاف ميلحكون
طلعوا الجنط بره وجانو خواته كلهن يمنا وعماته هم ديودعوا امه سلمت عليه وتبجي وامل حاضنته وتبجي
واني واكفه على صفحه دموعي مسكتن سلم عليهم كلهم ندار عليه
خالد : محتجين سلمين عليه
حياة : رحت يمه بوسته كتله ترجع بسلامه ظل لازم ايدي كلي ماريدج تخافين ديري بالج على نفسج وعلى امي وامل ماشي
وراها طلعو لبغداد وثاني يوم طيارتهم جانت سافروا وره يومين بعد مسوله تحليلات وشغلات قررو عمليته سبوع الجاي
صح هالفتره صعبه كلش علينا بس قبل العمليه جان خالد يحجي ويانه يخابرنا نخابره وعلي يطمنا عليه ويكول زين لتخافون دكتور طمنا علي كلنا حتى المترجم لعبت نفسه هلكد مخلينا يسئل الدكتور
اني هاي الفتره ظليت بيت خالد واجه يوم الي يسوي العمليه جانت عمليته ساعه ب 11 صبح اني بذاك اليوم منمت ظليت اصلي وادعيله الله يكومه بسلامه
ساعه بتسعه دك عليه خالد
خالد: بيوم العمليه مجنت خايف على نفسي كد ما جنت افكر باامي وامل وحياة بيومها خابرت حياة وجنت اريد اسمع صوتها محتاج تنطيني جرعه تفائل
دكيت عليها من اول دك جاوبت
خالد : شونج
حياة : الحمدلله انت شونك
خالد : انه بخير
حياة: عمليه ب 11 مو
خالد : اي بس يجوز من 10 ياخذوني يحضروني بعد ماعرف اذا اطلع منها
حياة: لا اسم الله لدكول هيج تطلع منها ودكوم تمشي لتحجي هيج
خالد: حياة ديري بالج على امل ماعدها احد بعدي وهي تحبج لو صار بيه شي ومرجعت منا ورجعتي لابوج خليج متواصله وياها
حياة: من كلي هيج اني كمت ابجي .. لدكول هيج الله يخليك انت كلتلي ترجعلي لازم توفي بوعدك
خالد: ان شاءالله ديري بالج على نفسج ودعيلي
حياة: والله داعيلك ليل نهار وخالتي وامل كلنا ندعيلك
خالد: حياة انت اول مره بعد مرتي تدخل كلبي وتخليني ماشوف دربي وارجف من صيرين يمي انتي ملكتي كلشي بيه اتمنى انتي يمي هسه محتاجج حيا محتاج اباع بعيونج
حياة : ظليت خايفه من حجيه حسيته ديكلي الي بكلبه لان بعد محيشوفني ظليت ساكته بس دموعي تنزل
ماعرف افرح لان اسمع هالكلام لو اخاف لان ديكلي هذا الكلام هسه
خالد: لتبجين كافي ماكدر على هالدموع .. اول مره احس نفسي غالي عليج لو ادري من قبل سويتها
حياة:الله يخليك ارجعلي
خالد: ان شاءالله ارجعلج كافي دموع لخاطري
حياة : من تبدي العمليه خل علي يكلنا ماشي واول متخلص هم يدكنا وصي انت لان احنا مرات ندك عليه ميجاوب
خالد: ماشي يله روحي
حياة: لا اله الا الله
خالد: محمد رسول الله
ظلينا طول وقت العمليه احنا لوب وعينا عالتليفون وعالساعه واحس الوكت صار كلش ثكيل وميمشي
خالد: لما اخذوني يجهزون بيه للعمليه وراها ضربوني بنج ظليت اتخيل حياة وامل شون يسولفن ويضحكن لحد بعد محسيت بشي
حياة: بهذا اليوم بيتنا جان عمات خالد وخواته هم وحتى بسمه جتي كلنا جنا عايشين اصعب يوم كلنا جنا ندعي الله يكومه بسلامه
اني ظليت بالغرفه اقرة قران وامل كاعده يمي جانت صافنه وبيدها تليفون
جان الوقت ميمشي ابد وجنت خايفه عليه كلش
فاتت علينا خالتي كالت البشاره بنات علي خابرني والعمليه ناجحه وخالد زين
اني كمت على حيلي كمت ابجي اني وامل وحده حضنت اللخ وراها سجدت لله شكر
ظليت احمد الله واشكره لان نجاه من العمليه ودموعي بس ينزلن من الفرحه البيت نكلب عبالك عرس بس يهلهلون وكلسع خطار جاينا المنطقه كلها تحبه لخالد حتى علي يكول تليفوني ميسكت كلسع واحد مخابرني يسئل وماعده نصهم يردون يلحكوا للهند الله وكفله لان خالد انسان ماكو مثل طيبته وحبه للغير والكل يشهدله وكفاته وياهم
ثاني يوم دك علي علينا كال خالد يريد يحاجيكم طبعا خالتي اخذت تليفون وظلت خطيه تبجي وتحجي وياة وتبوس بتليفون
وراها امل حجت وياه
واني ظليت اللوب بس اريد احجي وياه واسمع صوته
حجت امل وسدت التليفون اني كلش نقهرت حتى مكلف نفسه يكللهم نطوني حياة احاجيها
شويه ودك تليفوني اشوفه خالد ركض جاوبته اول مفتحت الخط كلي
- كتلج لتخافين
- حمدلله عالسلامه شونك
- الله يسلمج بويه بخير مابيه شي
- صوتك تعبان
- اي غير بالختله داحجي وياج بالكوه دخلو علي عليه
- خوما اكو شي يوجعك
- لا ماكو كتلج لتخافين
- ارتاحيت من سمعت صوتك والله متعرف شون جنت خايفه عليك
- ادري بيج مشوفيني خابرتج مخصوص لان عرفت محتكدرين تحجين يمهم
- اي ضجت لان مكتلهم نطوني حياة احاجيها
- عرفتج مخبله حتفكرين هيج .. يله بويه روحي ماكدر بعد احجي لتفوت عليه هاي سوده وظل تحجي مدري شتلغي
- منيه هاي
- سستر ظل تحجي واني بس اهز راسي هسه تطلع تفشر عليه
- هههه يله ماشي دير بالك على نفسك ماشي وباجر اخابرك
- زين بويه يله مع السلامه
- مع السلامه
خالد ظل بالهند شهرين وشويه بس بالشهرين احسهن سنتين صح جان يخابرني ويحاجيني ومرات يدزلي صوره هناك بس جنت اتمنى اني يمه واداريه
وراه كلي روحي لابوج شوفي فخابرت ابويه اجه اخذني بقيت جم يوم يمه وراها رجعت
خالد: بعد العمليه مباشره بدو ويايه علاج طبيعي صح جنت اتعب منه بس جنت اريد اكمله واكدر اوكف على رجلي جتي ايام عليه ماكدر انام من تعب وراها كدرت اوكف على رجلي بس الا عكازه يله اكدر اوكف بس الحمدلله كدرت اوكف حتى لو على عكازه ودكتور كلي اذا استمر عالعلاج طبيعي بعد ماحتاج العكازه
طولت بالهند شهرين ونص تقريبا بس جنت مشتاق لاهلي اشتياق مو طبيعي صح جنت احجي وياهم بس جنت اريدهم يمي
دكتور سمحلي اكمل علاجي بغداد فحجزنا طياره هم جان نهايه الاسبوع فقررنا نطلع لسوك ناخذ هدايه للبيت صح اني مكدرت امشي هواي بس فتنا محل جبير اخذنا ساري هندي لحياة وامل وعلي اخذ لساره مرته وجبنا لامي شال مطرز تطريز يدوي لان ممعقوله نجيبله ساري وجم شغله للجهال وخواتي
حياة: من كلنا خالد حجزنا على نهايه الاسبوع نجي واني كنت طايره من الفرحه ظلينا هذا الاسبوع نعزل البيت ونظفه لان نعرف من حيجي خالد حينكلب البيت بالخطار
اجه اليوم المنتظر وخابرو كالو وصلنا لبغداد العصر ان شاءالله يمكم
للعصر بيتنا مليان ناس وبره اصلا الكراج كلها زلم وشارع مليان ناس كلها تنتظرهم يجون جنت بالمطبخ داشتغل جتي امل كالت اجوي اجوي ركض طلعنا وكفنا يم باب المطبخ وكامت دك المزيقه جايبيها ولد عمه جنت اباع عالباب بس اريد خالد يفوت نوب كومه عالم اكيد هسه كلهم لازم يسلم عليهم شويه وطلعو طليان ذبحوها كبال البيت شويه ودخل خالد جان واكف على رجله ولازم عكازه اني شفته كلبي ماعرف شصار بي حسيته راد يطلع من مكانه ظلو يسلمون عليه
لحد مخالتي طلعت عليه كامت طش جكليت وخواته هم راحو يسلمون عليه ويحضنون بي وامل طلعت هم سلمت اني بقيت واكفه اباع عليه طلعت شويه من باب المطبخ هو شافني خزرني واشر براسه دخلي جوه
دخلت جوه واني ماعرف شسوي فرحانه فرحه بحياتي مفرحانه هيج
وراها دخل للاستقبال وكومه ناس جانو جايين يشوفو بحيت همه العصر وصلو صار المغرب واني مشايفته وممسلمه عليه دخلت للغرفه داصلي المغرب طلعت من الحمام شفته واكف دينزع قميصه اني شفته ظليت اباع عليه هو ممنتبه عليه جان
كتله حمدلله عالسلامه .. ندار عليه ابتسم وكلي الله يسلمج
رحت يمه ظليت اباع عليه هو جرني بحضنه
خالد: لما وصلنا العماره جنت بس اريد اوصل البيت وصلنا للبيت كومه عالم بالباب ومزيقه وهوسه ظليت بس اسلم عليهم جنت اريد بس ادخل جوه اشوف اهلي واشوف حياة لان جنت ميت عليها اريد اخذها بحضني لمادخلت تلكتني امي والبنات سلمو عليه شفتها من بعيد واكفه تريد تجي بس خزرتها طب جوه الكراج كلها زلم وهي تريد تطلع بت الاوادم
ظليت يم عمامي وربعي وناس داخله ناس طالعه واني بعدني ممسلم على حياة جنت اريد اكوم بس كلسع واحد داخل علينا بالاخير كتلهم من رخصتكم اروح ابدل كمت للمطبخ كلت اشوف حياة لازموني عماتي وبناتهن سلام وبالكوه عفتهم رحت للغرفه هم ملكيت حياه
هاي وين راحت شويه وسمعت صوتها ورايه نداريت شفتها
اول متقربت مني جريتها بحضني ظليت حاظنها ودافن وجهي بركبتها وهي حاضنتني كل قوتها لاول مره احس نفسي مشتاق لشخص هيج
حسيت روحي ردت من شفتها ومن شميت ريحتها ظليت حاظنها فتره
حياة: ماعرف شكول يمكن هاي دقايق الي جنت بحضنه جنت احس نفسي طايره ممصدكه هو كبالي ولازمته بعدها بتعدت عنا اصلا جنت حاضنته وقميصه مفتوح واني ممنتبه
ظل لازمني من خصري
خالد: اخيرا شفتج
حياة: اي من العصر هنا انت هسه يله كمت منهم
خالد: غير كاعد على اعصابي بس اريد اكوم واجيج
حياة: ممصدكه انت واكف على رجلك والله عبالك حلم
خالد: بستها من كصتها .. اشتاقيتلج
حياة: ظليت مبتسمه وكتله مو بكدي
خالد: متحملت منظرها قريبه عليه اخذت شفايفها ورحنا غير عالم ظليت ابوسها بعمق واني احسها مستسلمه الي وحتى متلحك تبادلني لان انه جنت متلهف لشفتها
بتعدت عن شفتها وخليت كصتي على كصتها .. شسويتي بيه انتي
حياة: جان ماخذني وياه بغير عالم مجنت خجلانه منه بالعكس جنت مشوقه ومتلهفه اله. ظليت ساكته ديحجي جان الباب تندك
صاح منو
حسين: خوي ابو جاسم بره اجه يشوفك
خالد: هسه ابدل واجي
حياة: باوع عليه كلي
خالد:شتعلو اهل ابو جاسم وكته يجي
حياة: هههههه حطلعلك دشداشه
طلعتله ملابسه بدل وكعد عالتخم دينزع حذائه تقربت يمه كتله تعبان
خالد: اي والله كلش تعبان من البارحه منايم وكومه مشيت وظليت واكف هم هواي فتعبت
حياة: زين خل يكللهم تعبان
خالد: مايصير بويه ناس جايه سوي واجب
راح غسل وتعطر
حياة: اني عطره سطرني مشتاقه اشمه واحس هوبالغرفه كام وباع عليه كلي لابسي غير هذا ثوب وباسني من خدي وطلع
ظليت مبتسمه يمه كلبي لاول مره ماضوج لان كلي نزعي هاي هدومج رحت لابست غير كلابيه وراها رجعت توضيت وطلعت صليت وطلعت للمطبخ وهو كلسع جاي للمطبخ بحجه يحاجي عماته وهو بس يباع عليه ويغمزلي واني اظل بس اباوع عليه من جوه ليجوه عيوني ممصدكه هو كبالي و واكف على حيله
جان المطبخ مليان نسوان وطبعا خوات خالد بس يذبون حجي عليه ويصخرون بيه وهنا كاعدات وكلسع وحده منهن صيحلي هالفصليه شكد فاهيه وتخلي الكل يضحك عليه اني ماحجيت مردت صير مشكله وناس ملتمه يمنا بس بسمه اخت خالد الي عايشه بغداد ماقبلت وظلت تحجي عليهن ودكلهم اذا مسكتن اكول لخالد ويعرف شغله هو
صراحه اني كلش ضجت لان خلن حتى بنات عمه يصيحولي فصليه امل كامت ترزل بيهن وتندار عليه دكلي شبيج مجاوبيهن
كتلها ماريد اوصخ لساني وياهن وعفتهن ورحت للغرفه طبيت
رحت غسلت وجهي وراها خابرت ابويه لان خطيه ظل باله ونسيت اكله خالد وصل
شويه ودخلت امل عليه
امل: حياة ليش عفتيلهم المطبخ وطلعتي
حياة: امل مابيه حيلهم وعماتج هنا نطوهن هاي جرأة يحجون عليه
امل: خل يوكفلي والله اذا ماكول لابويه
حياة: لدكولين ولاتحجين هو اليوم اجه وتعبان وعادي اصلا هنا صارلهن سبوع هنا وكمت اصلا مجاوبهن وهنا يضوجن بزايد
امل عافتني وطلعت
امل: اني كلش ضجت من تصرفات عماتي وحتى ذني الميستحن ايات وعبير لان يضحكن على حياة متحملت من حياة دكلي لدكولين لابوج عفتها ورحت للاستقبال ظليت واكفه يم الباب شفت ابن عمو علي كتله صيح ابوي شويه طلع ابويه
خالد: ها امول شبيج
امل: بابا تعال ويايه
اخذت ابويه ورحت للهول صغير كتله بابا احجي ويه عماتي بس يحجن على حياة وكلسع يضحكن الواكفات بالمطبخ عليها وحتى ايات وعبير كامن يصيحولها فصليه
خالد: اني كلش عصبت من دتحجي امل وردت اروح الزكهن بالكاع لك هاي مرت شيخ خالد محد يكللها فصليه كتلها وين حياة هسه بعده بالمطبخ
امل : لا بالغرفه راحت بابا خطيه والله هي نقهرت بس مقبلت دكلك دكول جاي تعبان اكعد احجيله مشاكلي
خالد : دصيحيها كليلها تعالي للمطبخ ابويه يريدج خل اشوف ذني الله بلاني بيهن
حياة: جنت كاعده جتي امل عليه
امل : تعالي بابا يريدج بالمطبخ
حياة : امل لدكليلي كتيله
امل: اي كلتله حتى يوكفهن عند حدهم
حياة: ولج ليش والله ماريد مشاكل
امل: دتعالي بس خايفه امشي ابويه يريدج
حياة: رحت للمطبخ شفت خالد واكف يمهم وديسولف عادي اول مفتت التاف عليه وخله ايدة على جتفي وكلي كدامهم وبصوت يسمعوا كلهن
خالد: ها بويه وينج جاا ادور على ام البيت وماكو وين جنتي
حياة: ظليت اباع عليه وجنت فرحانه من كال ام البيت كدامهم ..
جنت بالغرفه داحجي ويه ابويه ديسئل عليك
خالد: ها شونه عمي
حياة: الحمدلله يسلم عليك باجر يجي يشوفك
خالد: هلا بي ينور البيت . تعشيتي
حياة: لابعدني
خالد: يله فدشويه نتعشى اني وياج
امل : جنت فرحانه لان ابويه هيج سوه كدامهم حسيت ايات عيونها رادت تطلع ورستا كبت من يمها .
ايات : تعال ابن عمي خل اصبلك جاي
خالد: مايحتاج هسه مريتي صبلي
حياة: ضحكت ورحت صبيتله ونطيته كتله مخليتلك بي شكر اعرف متحبه
خالد: اي ماحب الحلا الاصطناعي احب الحلا الطبيعي وكرصتها من خدها
بسمه: ها خويه جنك مشتاق لمرتك دخذها للغرفه لتتغازل هنا لنحسدكم
خالد: والله ياريت بس غير حياة متقبل وغمزتلها
حياة: عزه اباع على خالد يعني من صدك عرف شون يحرك كلبهن وخلاهن كلهن يلصمون
زينه : لعد وامل لازم نسيتها اليوم الاشتياق بس لحياة
حياة: زينه تريد توكع دايما بيني وبين امل لان امل دايما وكفه ويايه بس امل جاوبتها
امل: والله عمه مادام هذا لحجي لحياة اني مازعل بالعكس افرح
طبعا كلهن يباعن علينا بس عجبني بخالد عرفهم اني شنو اني ام البيت يعني همه خطار عدي عجبني تصرفه بدون مصيح ويرزل فهمهم بطريقته وخلاهن بعد ميفتحن حلكهن ويايه
ولد عمه كلسع فايتين طالعين ففات ولد سلم عالكل اجتي امل اشوفها تغيرت ملامحها وعيونها صارت كلوب ههههه
عرفت هذا احمد ظل يحجي ويه عمات خالد وخوات خالد وطبعا هو وامل نظرات حب من اول مطب للمطبخ لحد مطلع
لليل العالم فضت شويه بس عمات خالد وخواته بقو يمنا يباتون لان عدنا عزيمه ثاني المنطقه كلها يمكن حتجي بيها
بالليل صراحه اني كلش جعت لان ريوكي موكلش جان وغده اصلا متغديت وعشه ممتعشايه وبس شغل اليوم كله فنتهيت
فالكل جان كاعد بالاستقبال حتى عمات خالد وخواته ولد عمه ونص من عمام خالد هم يعني الاهل
اني جنت دانظف المطبخ اني وامل وساره بعدين ساره كالت حروح انوم جهال
وراها امل كالت
امل: والله هسه بس اخلي راسي عالمخده انام قتيله
حياة: والله اني هم ميته تعب وجوعانه
امل: وج صدك متعشيتي انتي
حياة: اي مالحكت اكل كلسع جايين سوي جاي اليوم سويت جاي اكثر من ابو الكهوه
امل: ههههه والله اني هم لعبت نفسي باعي ايدي جولحت من غسل الماعين
حياة: رحت فتحت ثلاجه طلعت خياره وكعدت اكل بيها
امل: بربج هاي الخياره حشبعج
حياة: والله مابيه اكوم اسوي شي
امل: مو بقى تمن وحشوه دحميهن
حياة: مابيه حيل
امل: لعبالج حنقهر عليج واكوم احمي شايفه ذاك البطل صار ساعه اريد اكوم اجيبه ومابيه حيل
حياة: ولي ماريد دومج متعاجزه امشي روح نكعد يمهم شبينا بس بالمطبخ فلبينيات
امل: اوكفي خل اغسل وجهي
حياة: ههههه اي عيني غسلي وغمزتلها لان احمد كاعد جوه
رحنا وكفنا يم باب الاستقبال جان مليان وهوسه الكل يحجي بوكت واحد
باوعت على خالد جان يحجي ويه عمه ومندمج بالحجي شويه امل راحت كعدت يم بيبيتها وندارت عليه كالت تعالي كعدي بصفي
داطب فجان اكو ولد اثنين ولد عم خالد بس يطلعون بعمري هيج شي وره الباب واكفين واني لازم اعبرهم يله اوصل لامل
فداعبر جان واحد يلتاف عليه جان يريد يطلع فصرنا واحد بوجه الثاني لا اني عابره ولا هو طالع نوب هوصوته عالي جان يكول يابه حيصير تصادم ديربالكم
عماته كامن يضحكن وصراحه اني هم ضحكت عبرت منه وكعدت بصف امل
باوعت على خالد يباع عليه وخازرني ظليت مدنجه وبكلبي اكول خرب لو مفايته هنا
نوب ظلو يحجون حجي يمكن صاله 20 سنه واني منا جوعانه وتعبانه شاورت لامل كلتلها بعد ماتحمل حكوم احمي الاكل جعت
امل: دروحي لو ماكله من ذيج الساعه
كمت طلعت ورحت للمطبخ جان مابي احد فتحت ثلاجه طلعت جدر الحشوه احمي بيه جنت واكفه يم الطباخ ماحس الا انفاس ورايه ظليت متخشبه بمكاني لتافيت بسرعه لكيته خالد
حياة: عزه جفلتني
خالد: شعدج طبيتي جوه
حياة: لعد وين اروح الكل جوه ابقى وحدي بالمطبخ
خالد: وليش جنتي واكفه كبال محمد من دتفوتين وضحكين
حياة: مو هو ضحكني وهو ديطلع واني دافوت وظلينا واكفين لاني داخله ولا هو طالع
خالد: وانتي ياهو اليضحكج تضحكين بعد متفوتين جوه كلها زلم كاعده شعدج انتي
حياة: باوعت عليه رجعت ريمه لعادتها القديمه .. عماتك وخواتك وحتى خاله وامل كاعدين جوه
خالد: اي مدخلين روحي للغرفتج ارتاحي مو تعبانه
حياة: باوعت عليه ولتافيت اشوف الاكل
اتقرب مني وخله راسه على جتفي
خالد: شدسوين
حياة: جوعانه اريد اتعشه
خالد: اي والله حمي حتى اكل وياج
حياة: جوعان
خالد: اي والله متعشيت زين
صبيت الاكل بالماعون وكعدنا ناكل اني وياه وهو طبعا صافن عليه
ونظراته تموت تخلي الواحد ينثول
حياة: باجر غده حنسوي الكل حيجي
خالد: اي عرفت والله مابيه حيل جان اجلوها جم يوم
حياة : مو ناس كلها جايه فرحانه بيك
خالد: وانتي فرحانه بيه
حياة: باوعت عليه بتسمت كتلته اني طايره من الفرح
خالد: عسى دايما طايره من الفرح
كملت اكل وكمت رجعت الاكل بثلاجه وغسلت الماعون وهو طبعا وين ماامشي يباع عليه
نداريت عليه كتله شحسوي انت
خالد: حروح يمهم وانتي
حياة: اني هم حروح يمهم
باوع عليه ورفع حاجبه
حياة: هههه دشاقه حروح اسبح وامدد كلش تعبانه اليوم وباجر عدنا كعده من صبح
خالد: ماشي بويه روحي ارتاحي بس لاتنامين انتظريني كرصتها من خده وطلعت
