رواية خيط وابرة الفصل الثامن بقلم شمس العراقية
نور ...
ـ رغم كلام أمي عنه وتحجي وتكول مراهق بس هو والله مو هيج ومو صغير علمود يراهق اني مو وعيت لدنيا عليه هو جان واعي وفاهم .
" دائماً يكولي أني ما حبيت قبلج أنتِ أول حب تجذر بقلبي وتفرع بخلايا روحي ، أني أول وحده حبني يا مراهقه تحجين عنها ماما وهو أكبر مني بهواي قرابة ١٢ سنه عمر بنت كامله لو متزوج جان بنته بطوله .
جنت متوقعه منه ما ينساها لأمي وفعلاً أني بغرفتي وأسمع اصواتهم وصياحهم بين ماما وبابا تعاركوا وهو السبب أكيد راح گال لبابا ودزه عليها ، هسه تزود عليه وتعاقبني أكثر هي كلشي ولا نافع يمشي كلمته وحكمه عليها ...
صباح ـ كم مره منبه عليج وگايلج نور خط أحمر أيدج اكسرها اذا تمدينها عليها وعلى شنو معاقبتها وحابستها بغرفتها بس لان راحت بيت جدها .
سميعه ـ بنتي من حقي احاسبها وأمنعها من اشوفها رجلها خفيفه والبنت اذا ما تتحاسب تنفلت وتطلع من الطريق وهاي بنتي مو بس بنتك تدلل بيها وتخربها عليه وعلى نفسها .
ـ ألج الحق تحاسبينها أذا غلطت بس ما الج حق تمنعيها من بيت جدها واعرف أنتِ كلشي ولا نور تختلط بهذاك الصوب لا أهلي ولا بيت خالها مشعان ، شوفي الج الحق تمنعيها من أهلج بس أهلي ما الج حق تكطعين رجلها منهم فاهمه وأمي تحب نور وتريدها وعينها على جيتها ونور يمت ما يعجبها تروح بيت جدها وبيت عمتها تروح وحجايه زايده ناقصه منج بيت أهلج ينتظرج .
ـ بيت أهلي ينتظرني ليش أني عندي أهل يصباح ما توقعت يجي يوم وتعيرني بهل الكلمه
ـ بسبب تصرفاتج وحقدج ، بابا بنتج هاي بنتج وأني كايلج أحرك البيت عليج اذا نور تنضرب ومانعج ومحذرج ما تمدين أيدج عليها ، تضربينها بغيابي ليش والسبب تافهه والراحتلهم أهلي يا مره أهلي .
نور ـ خف الصوت وأنفتح الباب ودخل بابا تقرب باسني وحضني وأمي تباوعلنا ومشت وهي ساكته أنقهرت عليها حسيت الحجايه جرحتها ما تمنيت توصل الامور لهل النقطه وأمي تنغث بسببي
صباح ـ لاتزعلين من أمج ميخالف بابا هي من حرصها وخوفها عليج سوت هيج وأني اعرفها گلبها طيب روحي عليها طيبي خاطرها .
نور ـ أن شاء الله بابا ، وطلع برى شفته واكف ويه نافع عفتهم ورجعت على أمي لكييتها تبجي شافتني مسحت دموعها رادت تمشي ، ماما أني أسفه والله مو قصدي ازعلج ، گامت فتحت الكنتور وطلعت موبايلي وخلته بإيدي .
سميعه ـ هذا الموبايل أخذي وطمني وگوليله التريده صار ، وأدري بي يحبج وما يكدر على فراكج وأجذب عليج أذا گتلج نافع يضحك عليج ، واليحب مبين من تصرفاته أقل شيء راح حمه أبوج ودزه عليه وأنتقلمج
ـ ماما
ـ خليني أكمل كلامي ، وخليها أبالج كلشي اسوي وسويته علمودج ولمصلحتج ماكو أم تريد الخراب لبنتها ولما أعرف أبوج وعقليته ما أمنعج من نافع ولا أمنعج من أهل أبوج لان أدري شكو بقلوبهن وأدري بخبثهن عاجنتهن وخابزتهن محد مر عليه خبث وضيم بگدي .
"أدري واعرف شگو بگلبج ماكو ام ما تعرف شكو أبال بنتها والبالج ما يصير لو تلوحيين السما وأذا أني نسيت وجع وظلم أهلي إليه ، أبوج ما ينسى حتى لو نافع يكون أبن أخته وقريب منه وحسبة أبنه الجبير لو يصلي على ذيال دشداشته اللي البال نافع ما يصير لان العداوه البين أهلي وابوج ما تنسي صارلهم عمر
ما نسوا تردين نافع ينسيهم .
ـ لا هيج تگولين ماما عليج الله
ـ هاي الحقيقه ماما ومن زمان گلتها ألج بس أنتِ عاندتي ورفضتي ومشيتي ورى گلبج وعسى وعلى ما ينكسر كلبج ، بس أرجع وأكولج حتى لو البالج صار ما راح ترتاحين لان عقلية نافع نفس عقليه أهله نفس أبوه تزوج نسوان أثنين .
وطبعه صعب طبع أجداده رغم تربى بالولايه بس تربيته تربيه حبوبته ويجوز يأخذج القريه وتربيه عطايات ما منها خير يا بنتي!
" عطايات ما تربي بس الشر وتفرعنه على خلك الله والج عين التنظر! نافع أذا ما حصلج شراح يسوي ، تكب الطلايب وتثكب النار بين الصوبين والله يستر من شر عطايات ، نافع عباره عن تربيه شر وحقد متغلل من سنين من أيد عطايات قنبله موقوته تفجرها علينا .
بعد ضلت يمج لو تمشين ورى گلبج لو تمشين ورى عقلج ، أنتِ أختاري لان أني طلعت مالي كلمه عليج لان نافع المتحكم برتبيتج حتى وأنتِ بيت أبوج هو فارض حكمه وتخيلي بساعه وحده راح ودز أبوج عليه چا أذا صرتي يمه شيسوي بيج .
نور ـ عافتني وخلتني بمتاهه داخل أفكاري ورغم كل كلامها عنه ما تغيير شيء بگلبي اله ، وشيصير خل يصير وراضيه وين يوديني اروح وياه حتى لو للقريه
وخل يتحكم بيه ميخالف مهم أكون وياه .
طلعت شفت أمي دخلت الحمام وباوعت من الباب ماكو رايحين ضجت عبالي اشوفه وفتحت موبايلي وصلتني منه رساله .
نافع ـ عصفورتي طلعت من القفص
نور ـ اي ، حبيبي بس ليش دزيت بابا معصب عليها خطيه ماما
ـ بيني وبين خالي وما يهون عليه أعوفج مقهوره وكم يوم وهي تبرد أعصابها واجي أعتذر منها وأبوس رأسها
ـ اي مقهوره منك
ـ هي مو بس مقهوره مني لو يوكع بإيدها تذبحني بسلامتها ما تحبني بس شسوي بحبها يكفيني حب بنتها اليه ، اويلاه على حبج المتفرعن بروحي
ـ مو بگدي والله
ـ شتاقيتلج يبنيه .
ـ وأني هم ، أتصل أسمع صوتك
ـ لا اشوفج ، أصعدي السطح باوعيلي وأني بالفرع مقابل بابكم
ـ أطلع من الباب
ـ لا ممنوع ، والا اكولج عوفيها حتى السطح ما تصعدين
ـ ليش حبيبي
ـ ممنوع .
ـ ماشي ، صدك تعال معقوله لينا تكون كالت لأمي عن الشافته وخلت أمي تسحب الموبايل مني
ـ لا لا مو هي ، لينا ما دخلها ، عمتي هي طباكات وطبكن عليها ونكز شرها على نافع .
ـ ها شمدريك مو لينا شنو المأكدلك؟
ـ مو هي متسويها فقره ما عدهن هالسوالف فتنه ومشاكل ، وأساساً اللي صار غلط بغلط
ً ـ تقصد عن اللي صار بينا
ـ اي حبيبي ، وما تنعاد الا أنت على ذمتي وحلالي صارت غلطة شيطان .
ـ أي حبيبي أذا أني وياك ما أنجمعنا شيصير بيك .
ـ شجابه هالسؤال على بالج عمتي حاجتج بشيء .
ـ هي دائماً تحجي مو جديده عليه بس هالفتره من كشفتني على مراسله أني وياك وعلاقتنا حب قوي زايده .
ـ الله كريم أنتِ الي ما تصيرين لغيري
ـ شنو المأكدلك تحجي بثقه
ـ نور مستحيل أتخلى عنج ، أنتِ گلشي بالنسبه الي الحاضر والمستقبل لأن بگلشي أنتِ موجوده وياي
ـ ضحكت وكتبت اله أيباه شگد تجذب .
ـ والعباس ما مجذب بحرف ، شبيج عندج شك حبي الج لو عمتي لعبت بإعدادت عقلج وشخطتي عليه .
ـ لا شبيك بس ما متعوده على أعترافاتك وكلامك عن الحب ما معودني أنت جاف قليل تحجي بسوالف الحب وأمي تكول عنك طبعك صعب ما تكدرين تعيشين وياه لهذا عندي مخاوف منك .
ـ لا اطمئني بس تجين يمي الوضع يختلف لا مخاوف ولا بطيخ مبسمر بس أيدي ثكيله من أعصب اشردي من يمي لان بكف واحد الزكج صوره بالحايط هاي
خافي منها .
ـ ما تعصب عليه من تعصب أغمض عيوني
ـ فركسي كلبي بدلعج هو من أعصب مشعان ما أشوفه ما ادري أذا سويتلي أغراءت يجوز أتغيير
ـ سخيف
ـ لا والله عاقل ما ادري ليش مطلعين عليه سمعة الكواويد خو أمج ما تسميني غير الساقط والمسربت
ـ نافع
ـ مصارينه شگو من تكولين نافع كلبي يوكع
ـ هم عندك مخاوف بعلاقتنا من ناحية كلام أمي والمشاكل البينا وبينكم .
ـ ماكو مخاوف بويه بس خايف أنو أنتِ ما تتعودين على حياتنا وطبع بيتنا وأهلي أكو أختلافات هواي
وراح تواجهين صعوبه ، أما على المخاوف ناحيتج ما خايف .
ـ خجلني جاوبته وأمي
ـ شبيها ترى شگيتيني شك بالعباس ، قلقتيني نور متكوليلي شحاجيه وياج أمج .
ـ خايفه نافع وخايفه من لينا
ـ عوفي لينا حاجيني على الصركاعه أمج شبيها
ـ هيج كلامها وتحذريها قابل ما تعرفها
ـ أنه الاعرفها تحمليها ولاتراددين ويله عوفي موبايلج روحي أكلي ونامي أني أروح أنام ساعة زمان عندي خفاره
ـ ليش أستقر دوامك
ـ اي صار ب من ٨ باليل لـ ٨ الصبح وغافر العكس .
ـ ليش ما تصيرون سوه
ـ على الارهام حبيبي خلف الله على معارف الوالد المهندس مشعان موزين تعيينا احسن ما شايل شهادتي وأهفي بيها لحبوبه .
ـ هم صحيح
ـ يله روحي .
ـ شو تطرد بيه أخاف عندك غيري
ـ هو أنتِ گوه مدبرج أنوب غيرج شيصير أشك نفسي نصين وأحاجيجن .
ـ لا والله أشك بيك تلعب بذيلك
ـ نور اليلعب بذيله منو
ـ شمدريني
ـ ترة حيوان خاف ما تدرين
ـ ذيب مو
ـ لا جلب يا بنت الجلب تحجي حجايات أكبر منها هاي سوالف عمتي علمتج عليهن ، وأني اكول شبيج مجلوبه عليه هالوكت كلش .
ـ لا والله مو قصدي بس أنت تطرد بيه وشگيت
ـ غير علمودج مو أمج ما تقبل امشي لا أهفج بدفره
ـ باي
ـ باي گليبي أنتِ .
ـ رحت تعشيت وطلعت كتبي وتذكرت عندي أمتحان وفتحت موبايلي لكيت غافر كومه دازلي المهمات ملخصلي كلشي وكاتبلي .
غافر ـ من تكعدين أقري بس هذن المهمات والصبح من أوصلج اراجعهن الج بس ضبطيهن تجبيين درجه كامله .
نور ـ باوعت حسابه نايم ، كتبت اله شكراً تعبتك وياي نلتقي الصبح .
رجعت اقراهن وكملت ونمت والصبح كعدت نشطه وراسلته صباح الخير حبيبي ما رد عليه ، لكيت بابا وماما كاعدين بالطرمه وفارشين سفرة الريوك والحمدلله حسيتهم متراضين لان يسولفون وجوهم تضحك صبحت عليهم وكعدت وياهم وميثم كام قبلي
صباح ـ أستعجلي بابا غافر هسه يجي يوصلج قبل لايروح الدوامه روحي وياه اني اليوم ما عندي دوام
نور ـ أمي سوتلي لفه اخذتها منها وبستها وأبتسمت اليه بس نظراتها جانت تعاتبني ، طلعت واعدل بشالي ولكيته ينتظرني جان يدخن من شافني طفاها وفتح جامات السياره صباح الخير .
غافر ـ صباح العافيه ها شلون الأمتحان قريتي الگتلج عليهن .
ـ اي والله كلش ضبطتهن
ـ عفيه عليج
ـ صعدت وكعدت أقرا وهو لازم الكتاب ويسوق ويهزلي براسه ويصححلي الخطأ ومرات الكاه صافن ومبتسم بتك خد ، مرات تثولني نظراته ، كملت وطبكت الكتاب .
ـ لاتخافين ضابطه گلشي سباعيه ما ينخاف عليج .
ـ أنت ما قصرت شكراً
ـ تدللين لا شكر على واجب .
ـ نزلت وباوع على موبايلي بس ما حجه ونزلت ولاحظت شالي نسيته بسيارته خرب الظهر من احل نافع يجي يأخذني شيخلصني من لسانه .
يله أكوله نسيته بالبيت ما اكوله بالسيارة لان يضل يحجي عليه ويكولي فاهيه ، دزيتله رساله حبيبي الظهر من تجي جيبلي وياك شال نسيت .
نافع ـ چا شكو موليه والمن مطلعه عطوبج حظ المعطب .
نور ـ ضحكت حلوه هاي مال حظ المعطب يعني شنو
ـ يعني مشتعل مثلي مشعول أهل أهلي عليج ديله ولي لصفج وعوفي موبايلج يم المديره
ـ احبك جنتل مان
ـ لاتلهيين عوفي الموبايل حبيبتي .
ـ قفلت الموبايل وأنطيته للمديره ودخلت الصف وبالي يم الامتحان وراجعت شوي وجان الامتحان أول درس والحمدلله جاوبت جاوب كلش زين والفضل يرجع لغافر عبالك بايك الاسئله ههه لا هو ذكي وشاطر من يومه بس من وفاة خالي كاظم ما ضل عنده واهس بالدارسه وترك ونافع لحك بي ودرسوا وتخرجوا سوه وتعينوا هم سوه بنفس المكان يداومون بالدفاع المدني .
خلص الدوام اخذت موبايلي وطلعت وصديقاتي ناصبات عليه خرب كلها تدري بيه عاشگه
مريم ـ البطل مالتج ينتظرج ترس الشارع كطوف جكاير راح يحركنا هههه
نور ـ شعندج سوالف وصلته وفتحلي الباب وحضني بعيونه وشمر عليه شالي يا نسيته بسيارة غافر .
نافع ـ وجعا بكلب نافع مره ثانيه مـا تنسينه
ـ ضحكت ولبسته عالسريع وهو شغل أغنيه
حبيبي اطلب منك طلب
ـ اطلبي
ـ أفتحلي الجام وخليني اطلع راسي وافتح شعري بنفسي أجرب هالحركه الله عليك .
ـ نور لاتنجلبين عليه
ـ لخاطري الله عليك
ـ والستر والشال شــنو قضيته
ـ أمانه لاتردني
ـ هاي الأمانه شأگه گلبي بيها بس لاتطولين وأوكفي خل ادخل بشارع فارغ علمود لايكولن عليه شاد كرون
ـ أحبك
ـ بعلي راح تسوديني بسوالفج
ـ عبرنا المنطقه ودخلنا بشارع فارغ وأشرلي بأيده
ـ يله ام خبالات سوي الحركه التحبينها بس ديري بالج لا يطير راسج يضل بس جسمج شسوي بي أريدج كامله
ـ نافع لاتصير سخيف .
ـ منو جايب طاري السخافه وين راح بالج لو أنتِ مثلي گبل تربطيين فيشه
ـ نافع
ـ ممنوع سخافه نتأدب لما نتزوج
ـ گول لنفسك هالحجي
ـ هو كاظ روحي وكاعد شمسويلج يانظر عيني
ـ فتحلي الجامه وذبيت عليه قراصتي واخذها خلاها بقميصه وشكله يضحك .
ـ ربي تشوف طركاعتك شمسويه بحالي .
ـ فتحت شعري وأحس روحي طايره ويه الهوا ، وهو يسوق سرعه علمود الهوا يصير عالي واتونس ومشغل أغاني ولازمني من حزام صدريتي يخاف عليه اطير
نافع الجو يخبل يخبل .
ـ خبال حبيبي خبال ،حتى خبالج أحبه ،تونسي شعندي غير أشوفج متونسه وأفرح وأرتاح من اشوفج فرحانه .
ـ صحت بعلوا صوتي نـــافع
ـ مصارينه شگووو تسودنتي عليه .
ـ أحبك
ـ طركاعة على راس نافع مو وكتج بنت الوكحه مو وكتج
ـ أني أحب نافع أحبه يا ناس أحبه
ـ تسودنت البنت ، صوتج ولج صوتج .
ـ وضل يفرفر بيه بالشوراع بالظهريه والهوا يضرب بوجهي ويه صوت الاغنيه طايره ورايحه بعالم ثاني
ـ أمج طركاعه أمج تتصل
ـ شسويلها جاوبها .
ـ ها عميمه أي عندي ، جاي اونسها
سميعه ـ شتونس منها ولك نافع .
نافع ـ شعندي غير أونسها ما تردين أونسها كيفج
ـ نافع احاجيك نصي هالمهجوم وين أنت بنتي وين نافع أموت أذا تكرب صوبها اشرب من دمك تربيه عطايات الساقط .
ـ مشكوره عميمه مع الاسف عليج وأنه أبن أخوج تظنين بيه السؤء .
ـ عمه اليعميك انطيني بنتي أسمع صوتها وين مأخذها ملاهي صخام بوجهك علمتها على دروبك أبو درابين .
ـ وين أكو ملاهي تفتح الظهريه رب الحلو ، شوية نوب اجيبها ولاتخافين عليها بالحفظ والصون بنت روحي هاي ما أذيها .
نور ـ قطع الخط وعلى صوت الأغنيه وصاح عليه
نافع ـ تونسي حبيبي ما الج شغل ومن تملين كوليلي
نور ـ فدوه لوجهك وضلينا الا مليت وكف السياره ونزلت ، يخبل كلش حلو ، والله لو أمي تدري
نافع ـ مهم تونستي عوفيلي أمج هسه .
ـ كلش والله ، شكراً حبيبي
ـ يله لبسي شالج وابقي بالسياره أنزل اجيبلج بارد
ـ نزل وأني صافنه عليه وعلى وعلى شخصيته ومشيته كلها هيبه يهز الكاع وكل الأمهات يتمنن هيج نسيب لبناتهن چا شبيها أمي تكرهه تموت منه هذا هم حظي .
جابلي عصير وفتحه اليه ما جبت الك
نافع ـ ما أريد شربي أنتِ .
نور ـ وطلعنا للبيت والعصير أني وياه خلصناه...
أبد ما اتخيل حياتي من دونه أبد ، كل يوم مر من حياتي هو معيشني أميرته من بعدني صغيره لما كبرت هو هذا اهتمامه وحبه اليه ما تغير يزود ما ينقص بس موقف البارحه الصار جان مفاجئ ولأول
مره يتجرأ بالعاده هو محترم وياي وجانت نهايته
نكشفنا على أيد لينا .
وصلنا البيت وأمي جانت تتنظرنا يم الباب شافتني وخزرتني
سميعه ـ فوتي البيت أني أعلمج بعدين خوش سربته من المدرسه لشوارع ، بكيفج على حل شعرج لا صداد لا رداد ويه نافع زينه الشباب شون نافع نهجم بيت أهله
نافع ـ عميمه خفي عليها تررى جانت بإمانتي .
نور ـ سدت الباب بوجهه وأني طفرت لغرفتي ولحكتني عصبيه وكفت يم راسي ماما من كل عقلج نافع يأذيني مو تعرفينه وربينا سوه أني وياه والله أنتِ تأذيني ونافع ما يأذيني .
سميعه ـ شمسويلج هالمصكوع وهيج غاسل ولاحس مخ ومخبلج عليه خو هالوكت مستجلين هم أنتِ هم هو ، وضحك وأغاني ضاربه الدنيا جلاق أفنديه .
ـ سولفت الها ولطمت على خدها أهووو يمه ترى علمودي والله يريدني أتونس
ـ لو طاير رأسج لو طافره لو واحد من عمامج شايفج مو ذبحج يصير حلال ، شو نازعه المستحى فردنوب .
ـ يمه الشوارع فارغه دنيا ظهري شكو بيها تونست
ـ أهم شيء تونستي بس هاي تفكرين بيها وهو سليمه شلون يوافق على هالتصرفات الرعونيه جاهل أنتِ جاهل من كبر يا يمه كبر كلها تعقل الا أنتِ تبقين زعطوطه وأني اكول غافر ليش ما ينطي من نفسه لان عاقل وكاعد على وزنه مو مثل هذاك الخفيف ولكه الخفيفه مثله جدر وتتدهرب على القبغ مالته .
ـ ما جاوبتها حجت حجت ومشت نفس كل مره تطلع الطلعه والونسه من عيني بس ميخالف أتحملها أمي
وصلتني منه رساله
نافع ـ تغدي ونامي والعصر ادرسي أني هم راح أنام ميت تعب ونعس وراسي فرغ من دك الاغاني الشغلتها الج بس تستاهلين
نور ـ تمام حبيبي ، باوعتلي أمي گبل عفت الموبايل
سميعه ـ بالجذب سألي على خالتج گولي أشوفها شلونها لو بس هي من تتمرض تركض بيج گبلي وغافر خنت حيلي يضل سهران النوم مجافي عيونه والله نور مريضه ، بس هذا هم حظي لو حربيه تتمرض تروحين ركض حتى ما تگوليلي .
ـ ليش شبيها خالتي صبيحه
ـ اسم الله عليها شبيها بس سألي عليها ، صبح وعصر تخابر وتسألني عليج ، نامي والعصر نروحلها .
ـ ترى دائماً اروحلها أصلا بيتي الثاني بس بارحه تعرفين شصار وهسه توني رجعت من المدرسه وأستلمتيني
ـ ما منج فايده .
ـ عافتني وصبت الغده وعاطت على ميثم أجه وكعدنا تغدينا ودخل علينا بابا وكعد ويانا
سميعه ـ مو على أساس تروح هناك .
صباح ـ لا اجيت هنا ، يله بابا سمو بسم الله .
نور ـ بابا خالتي قلق شلونها شلون صارت ، سألته وأمي خزرتني بنظراتها .
صباح ـ زينه بابا حالتها أستقرت الحمدلله .
نور ـ الحمدلله ، الله يشفيها ، كملت الغده وغسلت المواعين وأمي صبتله الجاي واجتي عليه تحجي .
سميعه ـ نهجم بيت المحبه تسألين عليها والله اضمن عليج تحبينها أكثر مني
ـ ماما يعني ما اسأل والمره ما شفنا منها الا كل خير كظت عمرها مريضه وما نشوفها ولا أشوف اخواتي الا بالمناسبات يجن مثل الخطار ويرجعن.
ـ شتردين لعد يسكنن وياج لا هاي العايزه
ـ اي شگو بيها مو أخواتي
ـ من لا الج لأخوات ، نور أموتج أذا تحجين بهل الموضوع كدام أبوج ، ما ضل عليه بس أخواتج تردين اخوات گولي لابوج روحليهن بس هنا ما يجن لبيتي ما يدخلن لا هنا ولا امهن كطعيه التكطعهن .
ـ هزيت رأسي بقهر هاي أمي عشت عمري من الصغر لما كبرت بدون أخوات بس بالاسم وششوف منهن بالمناسبات يجن وأمي تذبلها حجايه وخاله تأخذهن وترجع لبيتها وحتى بيت جدي وعمامي ما يختلطن يمكن لينا بيها هون مرات تجي ويه بابا بس لبنــى
قليل تجي .
لليل باوعت الساعه صارت بـ ٨ نافع راح الدوام وغافر نزل
طلعت شالي أريد ألبسه بس حسيته جديد وما بي ريحة عطر يربي هذا شالي لومو شالي ، ركزت عليه لا شالي شبيه أني ، لبسته وأمي خبصتني .
سميعه ـ يله يا بنتي نمتي خوما نمتي .
نور ـ أجييت رشيت عطر وطلعنا وأمي شمت عطري شبي ريحته موحلوه .
سميعه ـ لا حلوه بس حرام عليج ابن خالتج أعزب
ـ ماما غافر مثل أخويه
ـ شجابه أخوج سويتي أخوج ما عندج بس ميثم أخ دمشي ساعه بس تتلمعين .
ـ طلعنا البيت ونسيت أكوله يله عادي هو ميكول على بيت خالتي صبيحه أصلا بيتنا هذا كل طفولتنا ولعبنا كظيناها بي ، وصلنا وخالتي تهلي وترحب بينا وتبوس وتشتم وتمسج على شعري .
صبيحه ـ يمه فدوه لهل الوجه شلون ريحة عطر طيبه
نور ـ دخلنا البيت بعدنا بالحوش ودخل غافر بملابس الدوام لابس زي كحلي ، سلم على أمي وباوعلي
غافر ـ شلونج .
نور ـ زينه الحمدلله وأنت .
ـ بعز الخير .
ـ گالها وأبتسم وأمي توزع إبتسامات لخالتي وهو يباوعلي ويرجع يغير نظراته ..
ودخلنا الاستقبال وهو راح الغرفته يغير ملابسه
صبيحه ـ اروح احضرله ملابسه يسبح هسه اجيجن
سميعه ـ أخذي راحتج خيتي ، كومي حضريله العشه بينما يسبح .
نور ـ إي يتدلل ، دخلت المطبخ لكيت العشه جاهز بس صبيته ورتبته بالصينيه وفتحت الثلاجه طلعت اله عصير بارد واجه ينشف بشعره وضحك
غافر ـ خوش أم بيت لايكتلج وكفة المطبخ .
نور ـ لا يمعود يا أم بيت غير العشه جاهز بس صبيته
ـ حتى لو مهم دخلتي المطبخ ، عوفي الصينيه اني اشيلها .
ـ اخذها من ايدي ومشه الاستقبال واني وراه وباوعت على خبز العروك حيل احبه من ايد خالتي وهو يدري لكيته مسويلي لفه واشرلي ، كعدت وياه عادي اتعشى مره ثانيه .
ـ عادي اصلاً أكلتج المفضله
ـ اي أموت عليه
ـ وخيار وخبز ، وزبد وشكر بالخبزه حاره
ـ الله جعت غافر شنو هاي شهيتني بيهن تذكر من يمت ما مأكله زبد وشكر .
ـ يمه أكو زبد لو اروح اجيب
ـ ليش الثلاجه تفرغ من الزبد ، اكعد هسه اني اكوم اسويلها
ـ لا إبقي أني أكوم .
ـ كام راح المطبخ وأني طفرت وراه غافر أكو خيار
ـ أذا ما ماكو اجيبلج
ـ مو معدة خلاط ذكرتني بيهن .
ـ لا حشاج ، أكعدي ليش واكفه
ـ جريت الكرسي وهو سوالي لفة الزبد واخذتها منا الله شگد طيبه ذكرتني بذكريات تخبل تذكر من نتعارك عليها اني وياك ونافع يخلي بدال الشكر ملح يبوي موقف خايس وكتها أنت ضليت تكح .
ـ اذ اذكر ليش هيج ذكريات تنسي.
ـ احلى ذكريات ، اكل وأسولف وهو يستمع اليه ، عزه العشه مالتك برد أمشي اتعشى .
ـ لا اصلاً مو جوعان ، نافع جابلي وياه لفة كباب
ـ هنا الحجي الدسم عمي أنتوا تأكلون كباب وتضحكون عليه بلفة الزبد والشكر
ـ شنسويلج أنتِ تحبينها .
ـ ورن موبايلي ، هاي صديقتي تهربت من نظراته لان ما يعرف بعلاقتنا ونافع ما يقبل مانعني ابين أو احجيله ولا امي تقبل
طلعت بالطرمه جاوبته هلاو مريم
نافع ـ شو هلاو مريم! وين أنتِ
نور ـ بيت خالتي صبيحه .
ـ وليش جاوبتي عوفي الموبايل ورجعي كعدي وغافر بالبيت مو
ـ اي جاي يتعشى
ـ عوفي الموبايل نور ، مو نبهت عليج أنه
ـ ليش ما تريده يعرف
ـ صوتج نور ، يله من ترجعين نحجي .
ـ تمام ، رجعت كعدت يمهم وكظيناها سوالف عن ذكرياتنا وشلون العمر يركض بينا ورجعنا البيت وغافر وصلنا ورجع ولكينا بابا موجود ودخلوا ناموا واني دخلت غرفتي كملت واجباتي ونافع عنده شغل ما حجينا انتظرته وتالي نمت ...
مرت الايام طبيعيه ومن اطلع من البيت أرتاح ومن ارجع أختنك مو لان بالبيت لا والله بس أمي ومعاملتها وكلامها وموتتني عالموبايل حتى نافع قليل يحجي بسبب الامتحانات وهي تبسمر وتذب بكلامها تخلي الكل يشك بيه صرت ما اكعد من بابا موجود اخاف منها
وبيوم نصدمنا بخبر حزين خالتي قلق توفت والصدمني أكثر أمي بس أول يوم الفاتحه راحت وبعد ما وصلت حتى اني ما خلتني وأجه بابا مزعوج منها ومن تصرفها
صباح ـ صغيره أنتِ ليش اليوم ما رحتي والبارحه هم بس أول يوم حالج حال الغريب لا من عايشه ولا من ماتت متكوليلي شنو من بشريه أنتِ ،گلبج ما يوجعج على البنات .
سميعه ـ وشعندي يوميه مسربه وأهلك كلهن هناك وأهلها هم ما شاء الله أخواتها بكد الدود شسوي ضاله
مسربه واسحل بنتي وراي بالفواتح .
ـ يا فواتح غير فاتحه مرت ابوها قابل غريبه وأخواتها محتاجتها ليش كطعتي رجلها ، شصايرلج يمره ما جنتي حقد ليش گلبج صاير اسود وما تردين أحد .
ـ من حقدكم وسمكم صرت حقده من ظلمكم ليش عبالك انسى سوالف أمك وأخواتك وسحورتهن مو هنا كطعن خلفتي وخلني مسربه للاطباء تالي بطرك نور وبالشافعات يله حصلت ميثم ، أذا أنت تنسى اني ما أنسى .
ـ هم رجعنا هم رجعنا
ـ اي رجعنا وما انسى بعدني عروس ركضت أمك زوجتك قلق جبتها واجيتني كاشخ وعطركم فايخ ، يابه وجع گلبي بهذاك اليوم وهسه تريدني احضر فاتحتها خليني مطموره بيتي ومالي شغل بإحد رحت أول يوم لخاطرك هاي هي الباقيين ما مقصرات كلهن هناك .
ـ هاي هي عمي لاتجيين بس سگتيي
ـ أي أسكت ومن هسه أكولها الك دير بالك تفكر تجيب بناتك يمي دير بالك ، ما الهن كعده عندي
ـ وين يولن غير بيت أبوهن سميعه تخبلتي
ـ تخبلت ما تخبلت هذا العندي وديهن على أمك على أخوانك وخوالهن موجودين بعد شگو حايبهن على سميعه
ـ منو جايبهن عليج غير بيتي بيت أبوهن اذا بيت ابوهن مالهن كعده وشلون اوديهن على أخواني وبيتي يطارد بي الخيال قسم بالله مصيفه البنات يجن يسكنن وغصباً عليج ترضين ما ترضين طبج هرش وضلي ضلي احجي كدام بنتج وأبنج ضلي ازرعي حقد واعزليهم عن الكل ضلي بهاي سوالفج أهلي وأهلك
ـ اوكف وين رايح والله بس تجيبهن اكب بانزين بالبيت واشلعها واحرك روحي وياهن البنات ما يوصلن عتبة بابي ، صباح ما يجن والله .
نور ـ رجعت عليه وصاحت بيه الا فززتني .
سميعه ـ أنتِ كلتيله يجيبهن مو أي أنتِ وبعدين ما يولن بيت حربيه مو عمتهن وطول الفاتحه مكابلتهن صارتلهن أم خل تأخذهن يمها خل تأخذهن لولدها مو عدها ثلاث ولد نافع وناجح وحليم كل واحد ازوجه وحده واسترهن وافض السالفه .
ـ يمه شبيج يا زواج! أمهن ميته وكته هالحجي هسه
ـ وكته مو وكته مهم ما يجن بيتي ولا أشوفهن وهاي لبنى قلق الثانيه نسخه من أمها .
ـ إستغفرالله ، عفتها وهي تدردم قسم بالله مو صاحيه أمي ماكو هيج قابليه نوب زواج بيا حال هنا صدك مصيفه
•┈┈┈••✿❂✿••┈┈•
لبنى ـ وصلنا ونزلت عمتي وسمعت صوت خالتي سميعه عالي وعمتي ضربت على رجلها بقهر ونزلت
سميعه ـ والله أحرك البيت بس يدخلن ، رجعهن صباح وين ما توديهن وديهن بس بيتي ما يفلن ما الفي بنات قلق خل أمك تحير بيهن مو نكزت عليك وزوجتك أنه شگو بيهن .
حربيه ـ لا حول ولاقوة الابالله يا سالفه الما تفض فضحتنا بلسانها ، أبقن بالسياره لما اشوفها .
لينا ـ خوش أستقبال هاي بدال ما تطيب خاطرنا المكسور على أمي ، ما ترضى تستقبلنا بيت أبويه وينج يمه تجين تشوفين بناتج محد يريدهن .
لبنى ـ ما حجيت بس غصه بروحي لو أمي عايشه هذا حالنا وأجتي عمتي وطلعت موبايلها تخابر .
حربيه ـ نافع يمه تعال أخذنا ، ما تقبل بعدها فايره خل تهدأ وأرجعهن مو بكيفك يمه عمتك خبل الجلاب لاتسويلها سالفه ، لا تعال بالسياره ما بيه أمشي .
لبنى ـ وضلينا بالسياره وأجه نافع حجه ويه عمتي ولينا نزلت تحجي وياهم أني بقيت بالسياره وطلع أبويه واشروا اليه ونزلت واجتي لينا ها بشري .
لينا ـ بيت أبويه غصباً عليها يله أمشي .
لبنى ـ دخلنا البيت ونور أجتي سلمت علينا وعيونها على لينا ووحده تباوع الثانيه! .
حربيه ـ هاي الغرفه منا وهيج غرفتجن وباجر أروح السوك اجيبلجن نواقصجن كلهن واي حجايه تسمعنها سكتن لاتردن لينا عمه ما أوصيج الزمي رويحتج وكظيها عن الطلايب .
لينا ـ أن شاء الله عميمه!
لبنى ـ عمتي طلعت وباوعتلها صايره تحجين مثلهم!
ـ لا أخذتها من نافع شفتها حلوه بلحگه وحجيتها
ـ لينا لاتستخفين على نافع أثكلي ماما
ـ بيا حال يمعوده ترى حجايه حبيتها لا اكثر .
ـ خير أن شاء الله ، كومي جيبلي ماي متت عطش
ـ ما تكومين أنتِ شگو خايفه منها عشتوا بيت أبونا وحاربونا ليكون بيت الخلفوها ما ندري .
ـ لسانج لاتسويلنا مشاكل وبعدها المره ما متقبله وجودنا بيتها مالنا گوه عليها بيوم ليله ندخل حياتها وكلمن ونفسيته .
ـ كلهم نفسياتهم خايسه ما عدا بيت عمتي حربيه!
ـ شو بيت عمتج حربيه هواي تحجون بيهم خير شعندج
ـ أهوو لبنى شعندي قابل أكوم اجيبلج مي مو عطشانه .
ـ طلعت وبقيت بالغرفه گلشي غريب عليه أستوحشت المكان والناس ما متعوده علبهم عكس لينا طلعت وتحجي ويه نور ونافع أني نور أختي مـا عندي علاقه بيها .
گلشي يخنك وصوره أمي مـا فاركتني حضنت مخدتي ونمت ودمعتي على خدي أشتاقيتلج يمه والله بعد وگت ليش مستعجله عالروحه وعفتينا على أيد النسواين وناس تذبنا على ناس هاي تاليتها بنات قلق مدللات بيت أمهن محد يلفيهن بيته ..
الصبح كعدت على دفرات برجلي كمت مفزوعه .
سميعه ـ گومن شنو جايات بس للنوم وتردن أكل وخدامه وبلاش ، گومي حدري جنط ملابسجن شكو عايفتهن بالصاله صوره أباوعلها ما عندي هوسه بيتي كلشي عالنظام ومرتب خاف ما معلمات .
لينا ـ لا خاله معلمين وبنات بيوت منو گلج جايين من الشارع وبعدين شهل الطبع تكعدينا بالدفرات ترى بنات رجلج مو يهوديات .
ـ أي دكعدي أكعدي بس شاطره بهل للسان يله كومن .
ـ أستغفر الله شلون صباح هذا ما أكوم اجرها من شعرها ولج شفتيها شلون تباوعلنا عبالك ناهبات تباوعلنا بقرف وكاشه نفسها اني هيج ما اتحملها الا أحطها وأكتلها ، شبيج صافنه ترة قلقتيني بسكوتج
ـ لينا ما تسكتين ترى بالكوه حاملتني الكاع ما كافي علينا أمي ماتت ، ليش گلبها أسود وششافت من عدنا گبل حكمت علينا وداخله من الصبح دكول ضابط .
ـ هاي تريد واحد يمشيها على صراط المستقيم وما لاكيه بس أبويه طرطور على گد أيديها حطنا بالغرفه ولحگها يراضيها .
ـ أبويه گدرته بس على أمي الله يرحمها .
ـ اي ولج شفتهم الصبح مثل البلابل ويضحك وياها فد كرهته وأمي يالناكر العشره ما كلت صارلها أيام من توفت شلون الك نفس تضحك طبيعي هيج الزلم حقراء ما يغزر بعينهم گلشي .
عوذه وهاي عبالك همجيه لا خصوصيه لا صخام گبل فتحت الباب ودخلت أدفر برجلينا ، أني أذا تضل هيج يوم أكتلها والله وأعلمها مالات الأوادم .
ـ دخيلج لينا عوفيها ما ناقصه ترة گلبي يريد يطك من القهر بجي ما شعبت على أمي ، تمنيت مخلينا كم شهر نشبع من ريحة أمي وذكرياتنا بالبيت وياها وبعدين يجيبنا عنده بس هو عايفنا وخلف على عمتي حربيه عافت بيتها وكابلتنا بس هالعمه الها موقف زين ما ادري شعجب .
ـ أكوم أشوف أوضاع البيت لازم نتأقلم
ـ طلعت وگمت وراها جبت الجنط وخليتهن أباوع الغرفه فارغه بطرك الفراش الجابته النا عمتي ، صفطته ونظفتها وصاحت عليه
ـ بطريقج نظفي الصاله وغرفة نور واطلعي عالحوش غسلي حتى كدام الباب هم .
ـ نظفت ولينا تحجي ما تقبل
ـ شكو تنظفين شبيج مثل الرجل الالي
ـ شسوي لعد مو تشوفينها شلون تحجي وتتأمر اشتغل واشتري راحة بالي مالي خلك مشاكل عوفيني بحالي الله يخليج .
ـ خل يجي النقل مالتنا نطك الجنطه ونولي المدرسه نشوف منو يخدمها وينظفلها خوش لكت خدامه وبلاش ، أحنه بنات قلق خل تفتح عيونها أم عيون الناطه .
ـ ما حجيت نظفت الصاله وطلعت نور كاشخه بملابس المدرسه صبحت علينا وكعدت تتريك هي وأمها واحنه وحده تباوع الثانيه .
لينا كوه لازمه أعصابها وأني دخلت نظفت غرفتها وصلت الحوش طلعت مستعجله والهورن بالباب ، فتحت الباب واحد واگفلها ما شايفته قبل طويل وجسمه مرتب وحلو أخذها ومشوا ، أشرتلها منو
لينا ـ أبن خالتها الصاك شفتيها كاعده بين الصاكين واحنه من الصباحيات نكعد بالدفرات نغسل وأنظف
لبنى ـ روحي المطبخ هسه اجيج أسويلج ريوك
لينا ـ گملي متت جوع وما أكدر اكابلها وأتسمم تحسبلي اللكم وأختنك وأموت .
ـ لا أسم الله ، كملت غسل وصلت باب الحوش كذلك ورجعت سويت الريوك وطلعت اللحم خلته عالسنك
سميعه ـ هذا اللحم خل يموع وطبخي على فاصوليا وسوي تمن بزل ، أني اروح على بيت أختي ومناك اتسوك واجي ، وباب الحوش ما توصلنا حتى لو يدك
ما الجن شغل .
لبنى ـ لبست عبايتها وشالت جنطتها ومشت ولينا دفرت الميز بعصبيه خبال جان كلبتي الجاي وحركتيني
لينا ـ شو الخاتون بنت الخواتين لزمتنا دك شغل ونوب الطبخ هم ذبته عليج أحد گايلها أحنه خدم ترى ما صايره ما تحترم دكول أمهن ماتت ترحم بحالنا ترى احاجيج بس نار بگلبي على أمي .
ـ شنسوي حظنا بعد زين أذا تضل هيج بس الشغل يكظي مـا يموت بشر والحمدلله أمي علمتنا گلشي عالطبخ والتنظيف والخبز وكل الامور التخص البيت ما متعاجزه من شيء ، گومي رجعي نامي أني أغسل مواعين واطبخ الغده
ـ لاتضلين راضخه الها ترة تستغلج وترى أدك عليج شغل الجايفات لكنج على گد أيدهن .
ـ شتسوي خل تسوي مالي خلك أحجي حجايه زايده بس أريد هدوء أني جوي مو جو مشاكل لاتنسين الربتنا ماكو احن واهدء منها .
رجعت كملت شغلي وأجتي عافات الأكياس
سميعه ـ طبختي الغده
لبنى ـ أي طبخته .
ـ اي زين كون طبخج طيب لان أبوج ونور وميثم على جيه ، يله لعد رتبي المسواك وهذن أغراض الجن من أختي صبيحه الج ولاختج الملسونه واخذتلجن كنتور وسراير هديه منها العصر غافر أبنها يجيبهن .
ـ اي مشكوره كثر الله خيرها
ـ هاي أم غافر خيرها وخيراتها مغطيه الكل .
ـ مشت واجتي لينا فتحت الاكياس شافتهن ها
ـ خوش أغراض گله من الزين منو هاي اختها تبين خوش مره شعجب المسمومه مرت أبونا ما طالعه مثلها بس تعرف تنكط سم
ـ شمدريج يجوز خوش مره بس بعدها ما متعلمه علينا
ـ لا وين الخوش جان يوم من الايام استقبلت أمي المريضه دومها تطرد بيها وتسوي مشاكل والموخوش مبين من لسانه وهي لسانها أعوذ بالله منه سليط
ـ لينا عوفيها شمعرفنها بيها ما معاشرينها كظينها عمرنا بس بالمناسبات نلتقي هو هذا البشر ما ينعرف الا تعاشره .
سكتت بس أخاف منها لينا ما تسكت عن حقها بس شنسوي نتجفى شر المشاكل وخاف أبويه يرجع علينا
واحنه لا حول ولا قوة الا بالله .
رحت صليت ودعيت لأمي وصاحت عليه وصوتها حيل عالي بسلامتها ادري هو بيت بحزيره خوما بجزيره .
سميعه ـ وينجن لبنى لينا طلعن من الكن مالتجن أمشي صبي الغده أبوجن أجه
لينا ـ ما تصب هي، شبيها إديها مكسره مو طبختي ونظفتي الغده شكو صابته وعالحاضر يتزقنبن والله اذا صبتي ماعون واحد ما تغسلين خل نور تغسل شهل العيشه من أول يوم استلمتنا دك شغل والله ما اشتغل ولا عليه وخلها تعيط منا لبعد سنه اني هم مدلله شنو بس نور بنت العز والدلال .
لبنى ـ صفطت سجادتي وكمت المطبخ وشفتها واكفه بالطرمه تحجي ويه نافع .
سميعه ـ تعال اخذ غداك
نافع ـ غداي! منين نازله عليج المحنه عمه صدك جذب شهل الكرم الحاتمي .
ـ مو صوجك صوجي أني عزمتك عالغده
ـ اي هو الصوج منج منو رايد منج عزيمه يا عميمه وما معودتني على كرمج .
ـ ديله أنفتكت عليه درجة متست حلگك ، لبنى صبيله وخلي بحافظات بهذيج الخانه وكثري حصته من اللحم هذا ابن اخوي يستاهل .
لبنى ـ صبيتله وهو مستغرب تصرفات عمته ويكح حاصر ضحكته ووكف بالطرمه أنطانا ظهره ووطلعت لينا شافته واستغربت شو هاي عافتني وكفت تحجي وياه طبيعي؟
"وطلعت نور ولينا سحبت نفسها وهو أحترم نفسه ومشة ونور ضلت تباوع على لينا وتخزر بيها وأجتي يمي شعندج واكفه وياه .
لينا ـ شگو شبيج غير أبن عمتي قابل غريب! وهو صح غثه وما ينبلع بس الشهاده لله حيل أدمي وحلو وصاك زلمه زلمه متشوفين عمته نكرصت وتتتعزم بي وتتلوكله .
ـ شو ما تستحين واكفه تتغزلين بي من يمتى صرتي هيج ملكوفه عالزلم شو أمشي كدامي للغرفه وطولج ما أريده أشوفه .
ـ بس خل أفهمج
ـ كدامي لينا ومن يجي أحد تلزمين الغرفه وما تحجين لا وياه ولا ويه غيره عيب ماما حتى لـو ابن عمتج وهنا عدهن عادي احنه مو عادي يضل رجال غريب حتى لو كان أبن عمتنا ، العيب عيب لا ابن عمتي ولا أبن خالتي يله
ـ والاكل منو يودي
ـ ما الج شغل أني صبيته هنا يجن يأخذنه اله أمشي كدامي .
ـ شگد تعجبيني .
ـ عفت الاكل ودخلت الغرفه وشالج ما تنسينا هالمره سماح مره ثانيه اهلس شعرج
ـ ليش نور مفرعه وظفيرتها على ظهرها عادي
ـ وأني شعليه بنور كمتي تقارنين نفسج بيها عليج بنفسج وبس وهذيج عدها أم تحاسبها أنتِ اني المسؤوله عنج فاهمة .
ـ إوك .
ـ صفنت عليها شگلها أتعبني بس هي من النوع تسمع الكلام ما تعاند ومع الوكت تتعود عالعيشه بهل البيت بس شكلي راح أصير فلبينيه .
سميعه إستلمتني من أول يوم شغل بس ميخالف مهم ما توجع رأسي بالمشاكل ويضل أسمي ينكز بكل مشكله مالي بيها .
والعصر جابوا الكنتور والسراير وعلى عين أبويه وتشكر من الحجيه ما ادري ليش استحقرت روحي وما تقبلت الموقف حتى لو زين واجه من نفوسهم الطيبه .
"صح يتامى بس نفسنا عزيزه وأبوي عايش شلون قبلها على نفسه ، بس هو أحنه يمتى صرنا مهميين عنده .
وماكو نقل لان خلص وقته ووقت أمتحانات وگامت تكعدني من الصبح أكمل شغلي ونروح اني ولينا للمدرسه الخط يجي يأخذنا ونور ابن خالتها يوصلها لما نطلع نلكاها رايحه لانشوفها ولاتشوفنا .
لحد الان ما مختلطه بيها عالكد السلام والسؤال هي ما تختلط بينا وطول وقتها بغرفتها لو تروح بيت خالتها لو بيت عمتي حربيه مرات بيت جدي ياسين عكسنا أحنه لانطب لا نطلع ، لينا كوه كاعده وهم أمتحانات مانعتها من الطلعه .
وأجه وقت الأمتحانات وبالي مو صافي أربعين أمي قرب ومحد ذكرها وذكرت ابويه صاح بيه وخليت وسگتت ، كلت بس اخلص أمتحانات أشتري واوزع الها خيرات حتى بدون ما اكوله ويضل يحجي ويعصب عليه
أمتحنا أني ولينا بس حسيت روحي ما مجاوبه الذكريات العشتها ويه أمي داهتمني ومرافقتني طول الوقت
أرجع أقرا بتركيز بس من أدخل الامتحان گلشي أنسى
خلصنا الامتحانات ومرت فتره وأستلمنا النتائج وطلعت راسبه ، ضلوا صافنين بوجهي ، عفتهم ودخلت غرفتي حيل انقهرت ولينا اجتني تبجي ، والله قريتي أحسن من عندي ليش طلعتي راسبه ، وفاة أمي حيل أثر عليج أنتِ جنتي متعلقه بيها
لبنى ـ شكالوا
لينا ـ ما گالوا شيء نور كالت تعيد السنه بس سليمه ما قبلت كالت على شنو تعيد تبطل وأبويه صاح بيها وسگتت .
ـ الحمدلله على كل حال
ـ لا تزعلين تعيدين السنه شنو قابل محد يرسب .
ـ الله كريم ، ما جنت متوقعه رسوبي نقطة سوده بحياتي حزني على أمي وأهمالي لدراستي خلاني أرسب محد أنطاني مساحتي للحزن على فراق أمي حتى مكان ابجي بي ماكو بس مخدتي ...
بالعطله نور تحضرت وحضرت جنطتها والقبعه وترتيبات كاشخه عالاخير باوعت جنطتها جبيره شكلها تطول يم خوالها والعرفته تروح ويه خالتها صبيحه غافر يوصلهم وأمها جانت مـا راضيه بس أبويه موافق .
صباح ـ وين رايحه لما ويه خالتها شبيج ثكبتي عليها .
سميعه ـ كل صيفيه هيج تسوي بيها وتخليها تكبع وتمشي ، وبنت تهرفلت ماكو هيج دلال صباح .
ـ أهووو دفضينا عاد ، أمشي بابا خالتج تتنظرج .
لبنى ـ عفتهم ودخلت الغرفه وأجتي لينا أدك برجلها شگو شبيج
لينا ـ شفتيها شفتي شلون كاشخه والموبايل ابويه جابه الها جديد بس نجحت والهدايا تركع عليها .
ـ شعلينا منها .
ـ ليش شعلينا مو بناتنه مو عايشين بهذا البيت ليش ما نطلع نشوف بشريه لو بس الست نور متونسه من بيت لبيت ولا احد يگول ألها أو يمنعها يوديها واحد يجيبها واحد عبالك بس هي حلوه ، نوب حظها كاعد
كلهم حلوين غافر نافع لو ناجح نهجم بيته كلهم زلم خشنه .
ـ جديده هاي مال حلوين أول مره إسمعها ينراد إلچ كرصة أذن علمود تعرفين معنى الكلام .
ـ شبيج هو حجي وبلاش قابل حاجيه كدامهم بس كدامج وأنتِ أختي حبيبتي .
ـ هزيت رأسي ما جاوبتها رجعت تربعت وگابلتني شعندج وناجح نوب وين شفتي سمعت طاري أسمه هسه طبكتي ويه غافر ونافع .
ـ أخو نافع اصغر منه بس شنو يجلط هو صح نافع احلاهم بس ناجح عيونه مكحلات وكلهم ضخميين وصفا اختهم كالت چا لو شايفه أخواني من ابوي حربي وباقر كلهم ضخمين لان حبوبتي من صغار ترضعهم حليب جاموس علمود يطلعون ضخمين وزلم خشنه .
ـ وأنتِ تموتين عالسوالف ، هاي أول وأخر مره توصلين بيت عمتي حربيه ، نوب عليه صفا كلمه والثانيه تحجين بيهم .
ثكلي ماما زينه البنيه ثگلها ورزانتها لو شفتي ربعج وكلتي اصير مثلهن واستخفيتي ترى اليريد يعيش ويونس روحه مو بهاي السوالف التعبانه وفلان حلو وفلان ضخم، شيلي عينج وباعي على طريقج اللي
هو دراستج لاتشلعين كلبي وياج لينا .
ـ أوك .
ـ ما لحيت عليها بعد بس عيني عليها بالأخص أحنه ورانا شامت ، شيخلصني من خالتي سميعه ولسانها تشرنا على الحبل ، الحمدلله هالفتره فگت مني بنتها مو يمها وكاعده ملتهيه تخيط جراجف ووجوه مخاد وتذكرت أمي جانت تخيط وعلمتني عالخياطه جنت بس اخيط الها ولينا واليه ومرات خالاتي بس من تمرضت هجرت المكينه ما ضلي واهس بيها .
من نظفت شفتها وصفنت ليش ما أكعد أخيط بيها وأونس نفسي أحسن ما كاعده وأيدي على خدي والروتين قاتل اذا لينا تطلع تشوف صفا مرات بيت جدي اني بس كاعده ، شفتها كاعده خاله عادي أطلب منج
سميعه ـ خير شعندج شنهو طلبج
لبنى ـ استخدم مكينتج أخيط بيها
ـ ليش تعرفين تخييطين بيها
ـ اي أعرف أمي جانت تخيط الها وللمعلمات وعلمتني
ـ لا عيني مكينتي جديده ومالي خلك لسوالف الخياطات وتفتحين عليه باب ويضل بابي مفتوح باب دلاله .
ـ شگو بيها خاله احسن ما كاعده
ـ گلت لا يعني لأ وبعدين محتاجه فلوس أنتِ تردين تخيطين شو أبوجن ما مقصر وياجن وراتب أمجن طلابه تعالن أكلن رأسي .
ـ ما ناقشتها لان رفضت ولينا سمعت وعندت الا دكول لابويه وكالتله وخالتي تخزر بيه ، كرصتني وكالت
ـ ما صبرتي يالخانسه مسويه روحج فقيره وأنتِ مثل حيه جوه التبن ، مثل أمج هجامة البيوت ، خوش ترستي اختج الملسونه ودزيتها على أبوج علمود تحصلين طلبج شكد شفت حيايا بحياتي مثلج حيه ما شفت .
لينا ـ خاله أبويه وافق لبنى تخيط بالمكينه
سميعه ـ خلاله تخل عينج ليش أني اكدرلجن علمود أبوجن نوب عليه طلبات الست لبنى ومن هسه اكولج فصال ما تطلع عتبة الباب لا صديقاتجن ولا صديقات أمجن بس الجن وأني عندي خياطه اليه ولبنتي لا خلف الله عليج وعلى خياطج .
لينا ـ هاي شبيها نكرصت منو يمها
لبنى ـ سگتي يمعوده موزين قبلت ، ليش كلتي اله جان اشتريت مكينه وفضيتها ما أريد منيتها عليه
ـ لا مو كلت لابويه مـا قبل كال هاي مكينه وخلها تخيط بيها ممنوع تشترن جديده ومهجوره قليل تخيط بيها ، يمكن يعرف بسوالف مرته المدعبله على كولة نافع ما يسميها غير المدعبله .
ـ شجابه على بالج! خير لينا
ـ شبيج هواي مركزه وياي ترة حاسبته أخويه الله شاهد
ـ مو جان سرسري وساقط وابو نسوان شتغيير هسه
ـ يضل أبن عمتنا شنو نسيتي
ـ لا ما نسيت بس أنتِ لاتنسين نفسج زايد
ـ تمام .
ـ ذابحتني بهل السالفه معقوله تكون معجبه بنافع بس هو ما مبين عليه هي من أعجابه هو جبير وأكبر منا كلنا ما معقوله شاب بهل العمر ما مخلي بوحده اباله والله لينا شكلج تشيبيين گلبي .
وتمشي بينا الايام نفس الروتين وأني التهيت بالخياطه اخيط اليه ولأختي شوي شوي نور هم كمت اخيط الها الا أمها تستنكف ومره اجتي الحجيه ام غافر
وكعدن ومدحت من خياطي شافت ثوبي وعجبها وطلعت جايبه قماش الها اخيطه ، تدللين باجر ادزه الج
سميعه ـ خاف تسكطه الج ، ديري بالج هذا القماش من الزين ، أنتبهي عليه .
لبنى ـ أن شاء الله
سميعه ـ گومي جيبي الضيافه .
لبنى ـ گمت حضرت العصير والكيك وقبل لو اوصلهن نصدمت بكلامها عني!
سميعه ـ شلون تشتغل شغل مال للطم أيدها خفيفه عالشغل حتى طبخها طيب واني خلصانه من شغل البيت هي لازمته كله .
صبيحه ـ ما شاء الله اي تبين خوش بنيه أم بيت الله يستر عليها .
ـ شتگولين اجيبها الج يوم وأخليها تجلف الج البيت ورى البيت صاير هوسه خل تعزله هي كاعده طول النهار لاشغل لا عمل بس اطكك بهل المكينه .
ـ لا شعندي خطيه
ـ لا ليش خطيه بنيه شابه شنو شغلها ما عليج أنه يوم اجيبها وأخليها تعزلج ورة البيت
ـ والله كيفج أني ما بيه حيل أعزله كلت اجيب وحده تنظفه وانطيها فلوس ، وخاف صباح ما يقبل
ـ لا عليج ما يكول وهي احسن من الغريبه شتعرفين منهن وهاي شغلها نظيف .
لبنى ـ رجعت الصينيه ودخلت غرفتي عبرتي بصدري منو كال الها اني خدامه! وإذا اشتغلت ونظفت جفيان شر للمشاكل وصوتها وبيت أبويه وانظفه بس مو معناها تشغلني بيت أختها لا هاي العايزه ...
انفتح الباب ودخلت عليه عصبيه .
سميعه ـ شگو عايفه الصينيه ومكبوره بغرفتج شعندج
لو ما تصدكين تكملين شغلج تكابلين هالمكينه ترى والله أكول لابوج خل يسحبها منج فوك ما قبلت تخيطين بمكينيتي گومي غسلي الكلاصات .
لبنى ـ طلعت وراها لكيتها رايحه أتفقن عليه يشغلني بس مستحيل يجي ابويه وأكوله وخل هو يتصرف وياها احنه مو خدم لأهلها ...
•┈┈┈••✿❂✿••┈┈•
لينا ـ كاعده بالمرجوحه وداقه فد ناس ميته مني وغرض بيتها عزيز عليها مثل المكينه لبنى تخيط بيها وهي كل شوي تجي تفحصها وسبحان الله المكينه من لزمتها لبنى تمشي سيده ولا تعطل ومتونسه بهل الخياط بدال الروتين الممل .
" صافنه وأباوع على لبنى تغسل الحوش وتجلف الارضيه أنقهر عليها ما تحجي عكسي اني ما اسكتلها وحتى ما تگدر تحاجيني كدرتها بس عالفقيره لبنى لا تطلع لا تطب وأني ماكو فرق عنها بس عندي صفا بنت عمتي اخت نافع الصغيره علاقتي بيها زينه أني اروحلها بس هي ما تجي نافع ما يقبل عليهن ولا وحده منهن تطلع متشددين عليهن .
وصلتني رساله من صفا
صفا ـ هلاو ليون شلونج ما بينتي علينا بعد
لينا ـ زينه الحمدلله وقبل أسبوع جنت يمكم شبسرعه شتاقيتلي .
ـ أني بخير لج تعالي علينا عليج الله
ـ خاف أخوج ما يقبل ويضل بس يخزر بينا
ـ مو هنا مولي للقريه بايت هناك بلكي اليوم هم يبات
ـ خرب بيومج مسوي عليج حصار
ـ كلش خانكني خنك ، تعالي وجيبي لبنى وياج هم تتعرف على أخواتي خطيه ما شايفات بشر بس بنات خالي محمود وهذنيج ملتهيات بالدراسه وخشمهم عالي .
ـ ها والله ما ادري خل أشوف لبنى من يكول توافق تجي وياي
ـ عليج الله قنعيها وجيبيها وياج نتونس هنا وهم تشوفيلي حسابي سويته ومدري طلب معلومات ما عرفتله .
ـ شبي حسابج هذاك اليوم سويتي خوما سويتي جديد
ـ لا نفسه بس غير كلمة المرور أخاف من نافع هذا داهيه حتى بعقلي تلكينه كاعد
ـ هيج متشدد وياجن
ـ مو كلنا زهور قريبه منه وزينب يعني ونص ونص وضمياء متدينه ما عدها شيء عوزه يشك بيها بس اني حظي مصخم مخليني برأسه .
ـ هسه اشوف لبنى بس منو يجيبنا أبويه اجه من الدوام نام كم ساعه وراح المحل .
ـ ميثم خل يجيبجن، ترى بيتنا قريب بكم فرع شمرة عصا وين ساكنين بالجزيره ، داطلعن شوفن هالبشريه شكو محبوسات بهل البيت هو شبي شو بس عمتي سميعه من شفتها وشافتني وجهه يبجي ونور متونسه وضاربه الدنيا جلاق .
ـ هم صدك تدرين راحت القريه ويه خالتها تغير جو
ـ اي أدري ونافع ثاني يوم لحگها قابل مثلي ومثلج واحد يوديها واحد يجيبها وكله تركب سيارات العاليه وأني اروح القريه بسياره عمي جاسم ونافع سيارته دكول سيارة الوزير بس حلالات على نور مأخذه حيفها منه .
ـ نصدمت بكلامها حسيتها تدري بعلاقتهم معقوله گايل لاهله عن حبه لنور! ، أكول صفا شنو مأخذها حيفها منه ما فهمت .
ـ يعني سايگه عليه بعدين تجين يمي وأفهمج هسه دتعالي وفضينا كظيتيها عليه تعززين عابت جهزتج وبلت .
ـ شگد احب سوالفج هسه نجي
ـ انتظرجن راح أنزل احضرلجن سوالف مال كعدة كون حليم ما رايح الطوبه واضل افر بأذاني .
ـ ليش روحي أنتِ
ـ وين أروح للأسواق قصدج! بابا شتحجيين غير نافع يعلك مشنقتي ، يله روحي أنت ملهيه الرعيان .
ـ ضحكت على سوالفها ورحت حاجيت لبنى احجي وهي صافنه لبنى مو وياج شبيج صافنه
ـ ها لا وياج هيج مابيه شيء ، شكلتي
ـ لا واضح وياي ، گلت ما تمشين نروح بيت عمتي حربيه وميثم يوصلنا صفا عزمتنا على كعدة بنات وكالت تتعرفن على أخواتي شتكولين خل نطلع نغير جو ضالين بس خدامه الها وبنتها متونسه يوميه بيت
ـ اي نمشي ليش لا يله نتحضر
ـ اي فديتج وتحضرنا وطلعنا وشافتنا
سميعه ـ خير وين لوين شادات العزم وكاشخات
لينا ـ صفا عزمتنا وكلنا نروح وهم نتعرف على بنات عمتي حربيه .
سميعه ـ أي شگو بيها روحن ، ميثم گوم وصل أخواتك
ميثم ـ أمشن يله .
لينا ـ طلعنا وميثم يمشي كدامنا ولبنى حجابها مستور بس اني بس ذبيت الشال ولبنى كظت الطريق بس تحجي لاتصيرين معقده ترى الفرع فارغ واني لابسه بس ما لبست دنابيس .
لبنى ـ ما اوصيج من نوصل تذبينه مثل أختج الجبيره
ـ لا ما اذبه لاتخافين تربيتج اعجبج أبتسمت رحتلج فدوه حضنتها من ايدها ومشينا وهمستلها أكولج شو مرت ابونا ما مانعت شعجب
ـ الله هاديها علينا
ـ لا بس اشك بيها تريد تلزكنا بثوب عمتي حربيه من أول يوم اجيينا بي وهي تتعزم بنافع حتى هو مصدوم بكرمها هم لاحظتي بس لو اني الاحظ..
ـ لا شتلزك يمعوده منين تجيبين هالسوالف ، سكتي لا ميثم يسمعنا
لينا ـ اوك وصلنا بيتهم ولبنى صفنت
ـ هذا بيتهم
ـ اي اكبر من بيتنا هما ما يكولون بيت
ـ شيكولون منزل!
ـ ههه لا خرب يكولون قصر ما يحجون بس بالقصور
ـ اها الطبقه المخمليه يابه ، يله ميثم حبيبي دك الباب
ميثم ـ أنتظرجن لو أروح
لينا ـ أني أتصل عليك .
ميثم ـ ما عندي رقمج
لينا ـ ها نسيت أحنه صرنا أخوان بالجديد ضحك
وسجلت اله رقمي ورقم لبنى نفسه رقم أمي
ميثم ـ ماشي عيني موجود عندي رقمها .
لينا ـ دك الجرس وطلع النا ناجح خرب لبنى كبل ختلت
ناجح ـ هلا لينا هلا بيج اتفضلن يابه .
لينا ـ تسلم ، لبنى امشي دخلت كوه واجتي صفا وحضنتني وسلمت علينا وكلهن كاعدات سلمنا عليهن
صفا ـ زهور أختي الجبيره ضمياء وزينب واني .
لينا ـ كعدنا بالحديقه ومرتبات الكعده واشكال والوان جايبات الاسواق كلها كلشي من احسنه والحديقه مالتهم حيل حلوه حيل ومرتبه والورد كله منسق ومرتب مو هوسه لا كله ديكور وهالامور وصفا تبجي بوجه الله شتردين بعد تطلبين اهلج طلابه .
كعدنا نسولف ولبنى بس تهز براسها وصفا طگ بحجاياتها طگ گالتلها
صفا ـ شبيج لبنى شاركي سولفي بس تهزين برأسج مثل الخبل دگول عمي جاسم كاعد ويانا .
لبنى ـ عفواً منو هذا جاسم
زهور ـ صفا شهل الحجي ما عليج منها هذا عمي الصغير شوي عقله ضارب وشبهتج بي لاتزعلين منها هي صفا هيج تحجي دچ .
زينب ـ خلف الله عليج صفا شبهتي لبنى تكول گيمر بعمي جاسم صامطته الشمس .
صفا ـ لا ولجن شبيجن اتشاقه ردتها تحجي مدري هي هيج سكوتيه وما تختلط بس حقج أنتِ ما طالعه حتى مرات عمتي قلق من جانت تجيينا أنتِ ما تجيين .
لبنى ـ اي صح مو هلكد احب الطلعات بيبوتيه .
لينا ـ وجبناها عالخياطه وكعدن يطلعن الها فصالات وقماش ما شاء الله اختي خياطه وهي أندمجت وياهن وصفا تغمزلي خرب شكو جنج واحد متحارش شكلج ابد مو راحه ولاتشبهين أخواتج حقه نافع يشك بيج تجبين الشك لنفسج كوه ، كرصتني وكالت .
صفا ـ أمشي نصعد الغرفه مالتي عليج الله محتاجتج بسالفه قبل لا يجي نافع
لينا ـ يله امشي لبنى اني صاعده يم صفا بالغرفه صفنت بوجهي نظراتها حجتلي ما اتأخر ، وصعدت وياها الغرفه ، وصفنت على غرفتها صفا ما تبدلين
ـ بشنو أبدل
ـ غرفتج والله اهلج مدللينج شبيج يحظي تتبطرين على نعمتج والله أشوفج أنتِ عايله عليهم وتزهكين من العيشه على شنو شو غرفه غرفة ملوك وتبريد فول
ـ خفت هيج دلال وبلت هسه عوفيلي غرفتي من حورها عاد تعالي هاج شوفيلي الحساب ليش ما أكدر اغير كلمة المرور
ـ وليش تغيرينها شبيها عوفيها مو سويتي جديد!
ـ مو نافع سوالي الحساب ما أريده ابقي نفس كلمه مو كتلج عقله مصيبه وداهيه اخاف منه هالصراكعه
ـ خرب بيومج ماكو صركاعه غيرج ، علواه عندي أخ مثل اخوج وهيج حريص عليه
ـ يا حرص هذا غير سجن ، هسه شوفيلياه فدوه لطولج
ـ هو برقم منو سواه
ـ ما ادري ما اعرف بهل السوالف دخلت بحوشت بالأعدادات وكلشي ما فهمت بلكي أنتِ تعرفين وأحنه هجم منين نعرف ليش يخلونه نلزم الموبايلات التلزم موبايل مشبوه فلك اي والله .
ـ دسكتي أنفتكتي على أهلج بس تردين واحد تحجيله
ـ اي والله مشيبين گلبي ، يله شوفيلي الحساب حبابه
ـ اذا الحساب برقم نافع مربوط صعبه توصله رساله
ـ أني كتله برقم أمي بس شيطان سواه برقمه
بس عادي ابوكلج موبايله!
ـ شلون تبوگينه صخام الصخمج صفا على العقل والتفكير العندج
ـ ابوكه شعليج أنتِ مهم تغيرين الحساب من رقمه لرقم أمي
ـ جاي نحجي وعيوننه بالموبايل وأنفتح الباب بقوه ودخل علينا نافع مثل الأعصار والدم نشف بكل جسمي بس نظراته كفيله توكف گلبي .
