رواية خيط وابرة الفصل التاسع بقلم شمس العراقية
نور ...
ـ من يوم أجن أخواتي وأني بالي مشغول وسگوت لينا قالقني معقوله تكون سگتت هيج خوفاً مني لو نافع مخوفها وكلما اسأله عنها يأكدلي وما أعرف شنو المأكدله!
شيء يحير وكلشي افكر بي الا بشغله وحده تكون معجبه بي ما أريد أوصل لهل النقطه من مرض أفكاري
فجأه بدون تخطيطات طلعتي روحه البيت جدي وغافر يودينا الصراحه ما عارضت لان أريد اطلع ضوجه وملل ومشتاقه البيت جدي وبيبي عطايات وخالتي لميعه
دخلت حسابه ما موجود من البارحه وين رايح هذا أتصلت عليه مغلق ليش غالق تلفونه! قبل لا أنام دزيتله نافع راح اروح البيت جدي حبيب ويه خالتي .
دخلت عليه أمي بس لا تسويلي سالفه
سميعه ـ نور شفت كريمات وعلب وعطورات بجيس عندج المن هذن؟
نور ـ يا كريمات ماما وين
ـ بالجرار شوفيهن
ـ باوعت وتذكرت هذن أخذتهن لخالتي لميعه شگولها هسه ها هذن
ـ أي هذن المن مأخذتهن؟
ـ صفا وصتني عليهن ونافع جابهن ونساهن يمي
ـ نساهن يمج! وليش ماهو يجيب لأخته وليش هي متجيب بعيد عليها السوك أحجي المن ما تعبر عليه دروبج رحتي ويه خالتج جايبتلي كريمات بكومة فلوس مدري المن احجي صايره تضمين عليه نويره
ـ لخالتي لميعه عدها كلف بوجهه اخذتلها علاج
ـ وهي وصتج
ـ لا أني من ذاتي أريد أخذلها
ـ نور بطلي سوالفج
ـ داكولج من عندي شبيج ماما ما تصدكيني
ـ أبوج خوما يدري لان هذن غاليات والفلوس الانطيتهن الج يله جايبه شغلاتج بيهن منيلج احجي أذن هي موصيتج
ـ من نافع أنطاني وبعدين وأذا هي وصتني شگو بيها مو خالتي وأختج ليش معارضه
ـ ما معارضه بس لاتگولين لأبوج ويمكن مـا أخليج تروحين دزيهن ويه خالتج صبيحه هي تنطيهن الها
ـ ليش ما اروح بس لا ما تقبلين
ـ أي ما أقــبل تروحين وخلص شعندج كل عطله تكظينها يم خوالج ومنو يوديج لو عبالج نفسج بعدج صغيره تركضين على نافع يوديج على عطايات ترى كبرتي
ـ أدري كبرت وما اروح وياهم أساساً غافر هم گالي ما تروحين ويه خالي مشعان لان أبويه ما يقبل واروح وياه
ـ لا ويه غافر ولا ويه نافع كعدي وأنجبي هواي صايره مسربته خو أبوج مطلع عينج بهل الدلال، صايرين كواده علني مو أخواتج وياج شو ما طالعات كاظبات غرفتهن وساگتات
ـ ماما عليج الله لاهيج تسسوين وياي وين الكواده بالموضوع قابل رايحه بيت غرب غير خوالي لو بيت جدي وخالي مشعان ترة أهلي وأهلج ليش تمنعيني منهم
ـ أمنعج منهم لان أني اعرف بمصلحتج باجر عكبه يطبلن وراج حجي ما ينلبس عليه ثوب مسربته بنتها من بيت لبيت ما تردين أحد يدك بابج لو ضامنه نفسج لنافع حلم إبليس بالجنه تصيرين اله
ـ ماما
ـ وجعة أبو أمي تنام بگلب أمج على هالخلفه سيطره ما عندي عليها كلمه ما عندي وياج والله زمن طلعات وطبات وموبايلات وبكيفج الله يستر منج يا يمه
ـ ردت الباب وراها بقوه فدمره مسويتها أمي واذا على قصة أهلها وياها أشوف ما تستوجب هالحقد طول هالسنين! شغييرج ماما يوم عن يوم حقدج يزود ما ينقص وصايره قاسيه وادون سبب تعاركين الكل ..
راسلته وينك متگولي تالي نمت والصبح كعدت وهو ما شايف الرساله يربي هذا وين رايح ، خل أتصل على صفا شوي وجاوبت هلاو صفا شلونج
صفا ـ هلا بنور الحمدلله
ـ صفا اريد اسألج على نافع وينه
ـ رايح البغداد
ـ ها تمام شكراً
ـ عفواً حبيبه .
ـ قطعت الخط شيسوي بغداد! أكيد ملاهي ساقط حن لسوالفه والله رايح على نسوان أمي تحجيلي عنه ما اصدك بيها ثول اليثولني شگد غبيه شلون عبرت عليه
ومبينه ملاهي صارله يومين ما موجود وموبايله مغلق اني الك ينافع كمت بعصبيه تحضرت وكشخت وحضرت كل شغلاتي وطلعت وكبت العيطه بين ماما وبابا بالف ويلاه يله وافقت وطلعت لكيت غافر ينتظرني إخذ مني الجنط
غافر ـ شبيج ضايجه
نور ـ أمي ما تعرفها طلعت وهي زعلانه مني
ـ هي ترضى من ترجعين راضيها ميخالف أم حقها لما تخاف عليج ما تمانع
ـ ما ادري والله
ـ يله صعدي لما اشوف أمي وأجيج
ـ عبر من يمي وعثر وجتفه طخ بجتفي وكبل أبتعد اسفه أني ما مشيت من كدامك
ـ لا لا عادي أني دايخ من الصبح
ـ سلامتك ضليت أنتظره وأجتي خالتي أبتسمتلي وتقربت باستني هلا خاله وطلعنا للقريه وغافر شغل قرأن واحس جنت محتاجه اسمعه خليت راسي على الجامه وغمضت عيوني براحه لما وكفت السياره وطفاه ونزل
خاله وين نزل غافر
صبيحه ـ نزل يتسوك
نور ـ واكف يتسوك ويباوعلي وأجه أنطاني عصاير وجبس وكرزات
غافر ـ خلصي بيهن الطريق يمه هاي الج
صبيحه ـ شسوي بي يا ماما أنتوا شباب اشتروا اني ما احب هالسوالف
نور ـ فتحت الجام واخذتهن من أيديه والهوا يضرب بشعره وهو مبتسم بوجهي شكله يبث طمأنينه .
كمل مسواك واجه شغل وطلعنا ورن موبايلي نافع يتصل وغافر گبل باوعلي وخالتي كالت
صبيحه ـ موبايلج يدك هاي أكيد أمج طيبي خاطرها ماما.
نور ـ أي خاله ، جاوبته هلا ماما .
نافع ـ وليتي مو ما صبرتي لما يجي نافع وصاعده بسيارته .
ـ لاتزعلين مني ماما
ـ سدي سدي من نسد باب كبرج .
ـ قطع الخط بعصبيه عفت الموبايل مزعوجه منه
لو يمي اشرب من دمه فوكاها هو المعصب عوزه يطلعلي من الموبايل ويضربني فد خبل خبال كون
صبيحه ـ حجيتي وياها شكالتلج
نور ـ ما كالت شيء من ارجع أرضيها
ـ هي هم الله يهديها فد داس صايره شگد حاجيتها واقنع وأريد بس تمشي وياي على أمي ما الله يهداها وكلبها صاير قاسي ما جانت هيج .
غافر ـ عوفيها على راحتها يمه لاتلحين عليها سويتي العليج بعد .
صبيحه ـ أني علمودها جم دوب تضل لوحدها بهل البيت صارلها عمر لاحد يطبلها لاحد يجيبها لا ام لا داده والكطع موزين ماما والاهل زينين مو زينين ينحملون وينرادون ، بدون أهلنا احنه ما نسوى شيء .
نور ـ فعلاً كلام خالتي ما اكول غير الله يهديج يا ماما ورجع اتصل رفضته وسويته صامت ولاحظت كومه دزلي رسائل واني ما شايفته هسه يشيل ويركع بروحه يستاهل لعد يومين مختفي شعندك ، فتحت الرسائل
نافع ـ وليتي للقريه مو ويامن ويه غافر اكيد يركصلج بجفيه ما يصدك أحد يصعد بسيارته ، وأنتِ حلوة البنات كاشخه أكيد وعطوبج طالعه شالج هذا بس اجي الا اشنقج بي .
ـ أسم الله شرجعك مو جنت مفقود ومرتاحين منك
ـ بس اجي اشيلج وادكج بالكاع وحق الله أنتِ مو مال زينيه مال دك بالنعل واني انطيتج مجال هواي وتسربتي بس خل اجي ،اشوفج وجه نافع الثاني.
ـ أدري شبيك تسودنت وتخبلت عليه ويا جلب وصلك اخباري
ـ أنتِ ليش اكو جلبه غيرج ، مو دازتلي رساله
ـ شسويلك غير أنت مختفي اني شكو فواكاها راجع عليه تحاسبني ما الك حق نافع الزمك حدك ولاتتجاوز خوش .
ـ أنجبي نـــور وأتجاوز وأنعل والديج كسار رأسج أني .
ـ أستغفر الله وأتوب اليه
ـ أستغفري لأخرتج يفيدج الأستغفار بربوك .
ـ هم كام يغلط ويفشر بس أريد اعرف ليش تنعل وتسب بإهلي تايهيين الك لو أنت ما تعرف تكمل يومك بدون فشار
ـ بكيفي
ـ نافع كافي عاد
ـ صارلي يومين عايفج كلت خطيه خلصت الخامس خل ترتاح وأنتِ مثل النعال كلشي ما بيج عرج ما يطكج ضاربتني بعرض الحايط وكاظيتها دياحه ويه غافر الكواد
ـ يمه غافر صار كواد شبيك تخلبت من خبال اي والله
ـ كل واحد تصعدين وياه لو تحاجينه هذا كواد
ـ وأنت واحد منهم غير
ـ نور وحق العباس ابو فاضل بس الزمج حسابج عندي
اذا ما سويت البالي واخليج تدگين وتلطمين أني مو نافع وأريد أبن أمه وابوه اليطلع رأسه وراج أدوسه برجلي وعلي .
ـ مو تايهتلك اني ما وراي أهل خاب ما تطير
ـ أطير ليش لا وهاي سوالفج راح تعم عليج ولسانج المشكك والحسين نور كل كلمه راح تتحاسبين عليها بس أجي .
ـ نافع مو عبالك مسيطر عليه ترى ماكو هيج .
ـ أي أنه الربيتج وأنه المسؤول عنج .
ـ أي فهمنا .
ـ نــور هاي أخر مره اسمع طالعه ويه غافر وتحجين وياه وهذا اخر تحذير الج مره الثانيه اني كبل أتصرف وياج وأنعل والديج على هالأنفلات أدبسزز .
ـ ميخالف تدلل على حظر
ـ تحظرين منو ولج
ـ أحظرك لان هواي تجاوزت حدك وأني ساكته إلك .
ـ بس تحظريني اسوي ما اسوي نور والعباس أعدمج.
ـ تعدمني فوك سوالفك الساقطه ابو النسوان عبالك ما ادري بيك جنت بالملاهي وقافل موبايلك علمود لا نور تخرب عليك الاجواء والله ماكو ادبسزز غيرك .
كبل حظرته وهو يكتب وعفت الموبايل وغافر مدلي العصير شكراً اخذته وطلعت الحلويات فرغت قهر نافع بالحلويات الجابهن كلهن اكلتهن حتى غافر مصدوم باوعلي وضحك .
غافر ـ جوعانه شنو ما متعشيه!
نور ـ أكلت هواي مو
ـ ههه لا عادي بالعافيه المن جايبهن غير الج هسه أنزل على مطعم واخذلج لفه .
صبيحه ـ لاتخربون غداكم بإكل المطاعم هسه نوصل وخالتك طابخه واكل البيت شحلاته
غافر ـ بس تصبيره مو نور
نور ـ غمزلي وضحكنا اي ههه ورن وبايله رفعت رأسي ولمحت اسمه نافع أجذب اذا كلت ما خفت ، رجعت كعدت عاقله وهو فتح الخط وسماعه .
نافع ـ ها غافر شلونكم .
غافر ـ هلا بالحبيب الحمدلله زينين وأنت شلونك ما خلصت شغلك .
ـ لا والله بعد بلكي للعصر تكظي اي وين ما وين اشم ريحة خيانه .
ـ لا يا خيانه تحجي عنها كاعد بالبيت والنرگيله كدامي والكعده بس ناقصتك .
ـ جذاب غافر مو أعرفك ما تجذب .
ـ رايحين أني والحجيه للقريه
ـ ها بيها الخير ما ادري جنت غالق موبايلي كلت خل اسال أشوف إشسويت يله توصلون بالسلامه سلملي على عمتي .
ـ يوصل حبيبي تسمعك .
ـ ها تسمعني يله بيها الخير .
نور ـ اني حتى نفسي كطعته خرب بيومك شمسوي بيه قطع الخط وغافر باوعلي كأنما يريد يتأكد أنه شعجب ما حاجيه ويه نافع! هو اله الظاهر عباله علاقتي بي صداقه بس گلبي اليحبه شسويله
قبل لا نوصل أجييت أقفل الموبايل وخالو مشعان يتصل! أكيد هذا نافع بس ليش من رقم خالي يعني سوه ومع ذلك ما جاوبته ، بسرعة البرق رسل رساله
ـ جاوبي على ال** غالقه كل حساباتج وزيره أنتِ وزيره .
ـ قفلت الموبايل من عيوني نافع مو تدلل ..
وصلنا القصر جدي حبيب وغافر دك الهورن وطلع النا خالوا جاسم ويهلي ويرحب بينا شگد انقهر عليه وأحبه
جاسم ـ يا كُل الهلا ، هلا بنويره حلوة البنات!
نور ـ حلوة البنات هاي كلمته هلا بيك خالوا دخلنا وشفت جدو حبيب باسني وحضني مشتاقتلك جدو
حبيب ـ وأني يبعد جدج هلا بيكم .
نور ـ حاضني وغافر حسيته يصور بيه غمزلي وكفت يمه صورتنا مو
غافر ـ أي اشوفها لخالتي بعدينبلكي تحن .
نور ـ تمام ، ودخلنا اني وياه بيبي كاعده هي وخالتي لميعه كاموا ورحت حضنت بيبي وتبوس بيه وحاضنتني بكل قوتها وحنيتها شتاقتلج حبوبه حبيت أكول الها حبوبه نفس نافع .
الحجيه عطايات ـ تشتاقلج الجنه يعيون حبوبتج ، هلا بيج يمه فدوه لطولج طولتي علينا هالمره وأنه عيني عالدرب وأسال عليج نافع يكول تدرس
ـ اي والله جان عندي أمتحانات
ـ الله يوفقج يمه ومبارك عليج النجاح
ـ الله يبارك بعمرج وكعدنا واني كعدت بين حبوبه وبين خالتي لميعه صافنه عليه بكل حنيه يربي شگد احبها وتحبني ، شلونج خاله .
لميعه ـ زينه شتاكيتلج همزين اجيتي ويه خالتج واليوم نهاوند هم تجي زلمتها يجيبها اتفقن هي وصبيحه ونلتم باليل أنه وخالاتج وبنات خالتج نهاوند هم يجن
ـ ها زين هلا بيهن وتذكرت ماما شيصير لوهي هم تجي وتتجمع ويانا عاد باوعتلي حبوبه وكالت
الحجية عطايات ـ أمج شلونها
نور ـ زينه الحمدلله .
ـ سمعت أخواتج اجن سكنن يمكم
ـ أي حبوبه وخالتي كامت جابت كيك وعصير وكامت تحجي على خالتي صبيحه
لميعه ـ ليش تكلفون على نفسكم خنت حيلي غافر ما مخلي ما جايب شكثر حلويات اليوم جاسم يرتفع سكره
صبيحه ـ شجابين يا عيني خل يأكل واكو علب حلويات أنطي منهن لوهبيه والصالحه .
لميعه ـ اي انطيتهن مشكوره
نور ـ وضلينا كاعدين ونسولف وانطيت الكريمات لخالتي وشغلات نواعم على عطورات وحيل فرحت بيهن وحبوبه تباوعلنا ونزلت رأسها حسيها نقهرت .
لميعه ـ ياعيني يا نويره ليش كلفتي على نفسج يولي خاف ما يشتغل على وجهي صامطته الشمس .
نور ـ لا يشتغل وجهج يخبل شحلاته ومن يخلص اجيبلج نفسه ، كبل باستني تدللين والله مقصره وياج .
الحجية عطايات ـ لا يحبوبه ما منج قصور وأنتِ احسن من امج ذكرتي خالتج الا هي اخيتها التؤام جان ماتت ضربتها المكينه ونمت بيها بالمستشفى شهر وكل خلك الله أجتي علينا الا أمج بالجذب ما كالت خل اروح اشوفن خيتي دكول راضعه حليب دابه ما بيها عرج محنه .
صبيحه ـ والله يمه طلع على لساني شعر ما الله يهداها وأنتِ هم بسلامتج توصلين الها حجايات يغثتها ليش تكولين عليها أم حصن خطيه .
الحجية عطايات ـ چا أنه مجذبه صدك أم حصن وكل حيلها وكلما تشوفني تعفص وتكظ شيلتها وتغم وجهه والله لوما عيب احطها واكتلها بس كاظه أيديه العيب من خلفتها ولخاطر نويره تسوى رأسها .
لميعه ـ نور حبيبتي لاتزعلين .
نور ـ لا خاله ما ازعل واتمنى لو جايه ويانا .
الحجية عطايات ـ عوفيها حبوبه هي يجي يوم ويجيبنها رجليها وغصباً عليها ، دواها عندي بس صبرج عليه يحبوبه صارلي سنين صابره وساكته لاجل يجي الوكت المناسب .
صبيحه ـ شناويه يمه
الحجية عطايات ـ مالج غرض من يجي وگته تعرفين .
لميعه ـ نور اروحن لمطبخ أشوف الجدر تجين وياي
نور ـ اي خاله گمت وياها وطابخه كلشي وريحة الطبخ تفتح النفس ومحضره كلشي حتى المواعين والمطبخ يلمع لمع من نظافه والجدوره مجلوفات وهي لابسه ربطتها ودشداشتها نظيفه شكد حلوه ونظيفه بس حظ ما عدها .
لميعه ـ شمالج نوره شو صفنتي يبعد خالتج .
ـ صفنت عليج تدرين خاله دائماً أفكر بيج ليش كطعوا قسمتج لو متزوجه جان هسه حالج من حال خالاتي
ـ لا يخاله سالفة الزواج قدر ومقدر واني حظي من الدنيا أنكطع من سالفتي انه وأمج وباقي عندج علمه كلش ضلتلي نفس ، الحمدلله على وعدته والعمر والشباب كظه ، وشبقى من العمر اكثر من الراح .
ـ خاله بعدج تحبينه
ـ منهو
ـ أبويه
ـ تردين الصدك لـو اجاملج
ـ لا الصدك ولاتخافين مني ما اكول لأحد والله بس لان مقهوره عليج ودائماً افكر بيج أعتبري فضول مني
ـ لا يبعد خالتج أنه وياج مو خاله وبنت أختها أنتِ صديقتي وعزيزة گلبي وأذا على ابوج أي ينوره بعدها خالتج تحبه وتحن لايامه عشكي لابوج ما ينسي هو كاظ رويحتي
*وكبل كم يوم رحت زياره لبيت خالج مشعان ولمحته بالدربونه وريتني ما شفته شسولفج ينوره الكلب صار رماد واريدن اكظ رجليه ما بيه بالكوه لزمت رويحتي وشفت دربي
ـ تحجي وأني ابجي وهي تبجي وتمسح بربطتها
ـ أنه نظلمت حيل نظلمت وكلشي ما ردت بس هو وما حصلته ولا سلمت على رويحتي كطعو قسمتي بزيجه مالت مخابيل خلوني معلگة بذمة خضير علمودن لا العالم تجيب طاري ويكولون مطلكه.
ـ لحد الأن ما طلكوچ
ـ جدج حبيب ما يرضى وحربي خنت حيلي شكثر حاول يقنع جده ما اقتنع معاند بس نافع فدوه لطوله وعدني يطلگني منه وياخذني عنده من يتزوج
ـ هو هيج كالج
ـ اي فدوه لعمره كالي من اتزوج اخذج عندي وانه وافقت وأمي هم وافقت
ـ ليش هسه ما تروحين تعيشين عند خالي مشعان
ـ لا حربيه أخته ويضل الدرب درب سچه الباقي أنتِ أفهمي وأنه ما اريد تجيني حجايه وتمسني عكب هالعمر .
ـ هم صدك الله كريم خاله الله يعوضج ويجبر خاطرج
ـ لا تنقهرين عليه تراني مرتاحه الحمدلله أمي ما مقصره وياي حتى لشغل ما تخليني اطلع بس شغلات البيت والحلال انه وصالحه واذا عالباقي الحمدلله كلشي ما اريد بعد بس احصلي حجه وهم نافع وعدني بيها
ـ أن شاء الله تحصلين حجه تستاهلينها .
ـ فدوه لعيونج تعالي بوسه من هالوجه الحلو نياله التصيرين من نصيبه الله يجمعكم بجاه الحسين .
ـ أبتسمت خجلانه منها هي تدري بعلاقتنا أني ونافع وكعدنا نسولف وهي تضحك على سوالفه وأني محترك دمي
ـ ليش حظرتي هسه تلكينه فاحط من القهر اكوم اجيب موبايلي هسه حرك الدنيا.
ـ لا خاله لاتجاوبي أني اريده يحترك يستاهل
ـ لا يمه ، هسه اجيج
ـ راحت وأجتني تحجي عالموبايل هو مو هزتلي راسها وانطتني الموبايل ما ما احجي وياه والله واحد مخبل
نافع ـ عوفيها عمه أنه واحد مخبل بس خل أجي واشوفها المخبل صوره وصوت مجهزلها هواي مغامرات والباقي خل هي تفهمه
نور ـ سحبت الموبايل مغامرات شنو
ـ مو أني مخبل
ـ اي
ـ وجعي ، باجر أجيكم حضري روحج للبوسه أقصد للرجعه
ـ سخيف ومقزز قطع الخط وخالتي تضحك فهمتي عليه شيء قسم بالله راح يجلطني
ـ شحلاتها سوالفه نيال بختج ينوره ولج زلمه النسواين كلهن يتمنن يكابلنه ويكابلن خبالاته وأنتِ تتبطرين على نعمتج .
ـ نعمه نافع نعمه! خاله غير ما مسولفتج خبالاته من يكبن عليه بس گلبي متحمله والله .
ـ هما كلهم هيج دمهم حار طالعين على ابوهم .
ـ لا والله ما يشبه خالي مشعان اصلاً ما يشبه أحد واحد مخبل وذابينه عليكم وابتليتوا بي .
ـ فلك سكتي شبيج انفتكتي عليه ما ارضى تحجين عليه هذا عزيز گلب عمته ، يله كومي نروح نجيب خضره ونجي
ـ أي ليش لا وطلعنا أني وياها وتمشينا بالكاع وصلنا الخضره وبايدها سله خوص واني فتحت موبايلي اصور ونتصور اني وياها وتغطي بروحها واخذنا هواي صور وفتحت عليه الحظر اشتاقيتله خرب بيومه
وبسرعه وصلتني من عنده رساله
نافع ـ شگد حقيره أنتِ بالجذب ما سألتي عليه گلتي عايش ميت وينه شنو شغله ، تعبان جوعان مشتاك
نور ـ لا عايش عايش لو ميت جان وصلت أخبارك بسرعه
ـ ما أموت كبل لا أكسر رأسج.
ـ وأنت تعلم بنفسك يمتى تموت .
ـ شو صايره جلبه مستجلبه فردنوب
ـ لاتغلط نافع
ـ أذا ما أغلط عليج ما أرتـاح بالأخص أذا جنت ضايج منج ابو ابوج اشعله ياسين أحطه وادكه بالقندره
ـ خرب بيومك جدي شگو ما لكيت الا هو فقير نمله ما مأذي
ـ ليش حظرتيني هاي تسجلت عليج نقطه حمره
ـ سجل نقاط شگد ما تريد
ـ كل نقطه الها عقاب مختلف ترى خاف ما تدرين
ـ ما الك حق تحاسبني ما إلك سلطه عليه .
ـ ها تحاجيني بسلطات! بنت الوكحه
ـ الوكحه عمتك عيب عليك
ـ عمتي ما الج دخل.، حيري بروحج .
ـ شعندك مولي بغداد
ـ لو تموتين ما أكولج
ـ ولا تكول على أساس كاتله نفسي علما أعرف
ـ أي ادري بيج ولا مهتمه أصلاً
ـ كلش
ـ اي مـا مهتمه .
ـ يعني ما تكول شعندك بغداد
ـ أشتري قنادر العبهم على رأسج
ـ خوش تلوف لوفات خالد ابن الوليد مـا يلحك بيها كول جنت بالملاهي وفضها عادي اعترفلي مو اول واخر أثنين يفترقون بسبب الخيانه والنسوان .
ـ هو أنتِ مفرگسه گلبي نوب نسوان كطيعه التكطعجن بس مع ذلك احبجن مو بيدي تجرن بدمي نافع يتنفس نسوان
ـ تتنفس نسوان كلتي ماشي يا نافع
ـ شتسوين .
ـ ما جاوبته
ـ تعالي الزركه غرتي عليه منهن .
ـ غير يستقر المعضل بشرفك عليك الله اني زركه شگد ما عندك ذوق
ـ أي والله والدليل حبيتج .
لميعه ـ ولج الشمس صمطتنا امشي نرد كظيتها عليه لازمه موبايلج ضحكتي عليه بجم صوره وتحسبينها عليه طلعه
نور ـ لا والله اطلع وياج بس خل أفهم منه شعنده رايح بغداد ما فهمت منه ما يتحصل لا حق ولا باطل
ـ چا شمالج كلما دز رساله جاوبتي دعوفي ثكلي برأسه حمسي حمس خلي هو يركض وراج .
ـ مو جنت حاظرته بس ما كدرت
ـ گلبج رهيف مثل خالتج ، يله أمشينا صار وكت الغده هسه جدج حبيب يفتل بالقصر ويثولني علما اصبن الغده .
ـ رجعنا القصر وقبل لا نرجع وصلنا البير مشتغل والماي شحلاته وصوت الماطور والاجواء تجنن كعدنا نظفناها وغسلناها بالماي وخليت رجليه ماي بارد ثلج وشفت واحد اجه من بعيد شايل الكرك وخالتي نزلت ثوبي وصاحت بيه .
ـ نزلي ثوبي وغطي شعرج هذا حربي اجه ما يحب يشوف مره مفرعه .
ـ ليش هم مخبل مثل اخوه
ـ كلهم نفس الشيء ، سلمي عليه وخل نرد لايكبن خبالات جدج على رأسي شيفكني منه .
ـ عدلت شالي وگفت بصف خالتي وهو تقرب علينا ضرب الكرك بقوه ونبته بالكاع الا فزيت ودنك غسل وشرب ماي بجف ايده ركزت عليه ضخم حيل جف أيده جبير وخشن واسمر طوخ غسل وفك الشماغ ونكع راسه بالماي ووگف وباوع علينا وهو ينشف وجهه بطارف الشماغ وعيونه كبار وگال .
حربي ـ نوره شلونج .
نور ـ الحمدلله زينه .
ـ يا هلا بنوره ، عميمه الغده حاضر
لميعه ـ اي عيني يله نور تأخرنا خل نرد القصر
نور ـ مشينا وهو ضل واكف وصلنا القصر وعمتي صالحه ووهبيه محضرات الغده وجدي حبيب باوعلنا وخالتي لميعه نثولت كبل كامت تصب بالخضروات خطيه حسيتها حيل تخاف من عنده هو شكله يخوف لاف الشماغ والسبحه وملابسه ملابس شيوخ ويفتر
وصبوا الغده واجو الولد شالوا وشفت خالي منعم سلمت عليه حنين وگلبه طيب ، وكعدنا نتغده وحبوبه تخلي كدامي للحم وتحجي عليه لان أكل بطيء .
الحجيه عطايات ـ شمالج يجده تأكلين مثل الحمامه ربعج نفضن الصينيه نفض وأنتِ ماعونج مليان ، شيلكي بيج محظوظ البخت .
نور ـ لا والله حبوبه جاي أكل .
ـ خنت حيلي على نافع أكل سم يحبوبه يمه لميعه ما خابرتي على أبن أخوج وفهمتي منه يمت يرد من بغداد كله من مشعان ودروبه شالع گلبه
ـ ردت اسأل تالي سكتت بس مبين شغل يخص خالي وهو رايح وياه وكملنا الغده ورى الظهر خالتي نهاوند وبناتها اجن والكعده صارت تخبل وكلما يسولفن اتذكر أمي وأشبع قهر عليها وأتصلت عليها ما جاوبتني ادري بيها زعلانه مني .
والعصر طلعنا لزرع وأفترينا وتونسسنا ورحت على غافر جان واكف هو وباقر وحربي يسولفون سلمت عليهم وباقر ترخص ومشه وغافر اجه عليه
غافر ـ ها نور محتاجة شيء .
ـ اي بس أريد أطكلي صور مثل كل مره .
ـ نور بويه مو وگته هسه
ـ شوگت
ـ بعدين أني أكولج عود
ـ لا ليش مو هسه الجو يخبل والله
ـ واكفين وهسه روحي يم البنات من يفرغ المكان أدزلج رساله وأخذلج صور .
ـ تمام
ـ عدلي شالج رحمه لأهلج
ـ تمام تدلل حسيته أنزعج من تصرفي يمكن ما أنتبهت على روحي لو أمي جان كالت عادي بس نافع يبو ادكلي طبل ورجعت يمهن كعدنا وخالتي لميعه جايبه سله بيها فواكهه وحلويات وكرزات وفرشنا وكعدنه نسولف وبنات خالتي هم حبابات كلش ومبين عليهن متدينات حجابهن وكلامهن خالتي نهاوند صفنت عليه واشرتلي وأخذتني على صفحه ها خاله
نهاوند ـ نور حبيبتي لاتزعلين مني اذا أحجي وياج وأنصحج أني والله علمودج ما أريد تجيج حجايه وتغثج
ـ لا عادي گولي خاله
ـ ليش ما محجبه
ـ لا محجبه
ـ تضحكين على روحج بهذا الحجاب الستر حلو ماما ودامج لابسته لبسي زين ليش ظفيرتج يهفي بيها الهوا وركبتج بيضه تلج لج دگول ركبة زرافه ونوب زديتها من مشيتي على غافر وهو استحى واكف ويه ولد خالج
ما يصير أحد يشوفج هيج حرام ، شعجب سميعه ما علمتج ما نصحتج هي مو هيج دومها مستوره وتخاف من ضلها .
ـ بس خاله
ـ علمودج أني أحجي وخفة الرجل محد يحبها جذاب اليكولج أحب البنيه الخفيفه ، كلهن يردون الثكل والحشمه .
وأدري تتصرفيين بدون درايا وعلى نياتج ولان ربيتي وياهم حاسبتهم أخوانج بس ميجوز ماما وأنتِ كبرتي وحليويتي وملامح جسمج برزت ، أنتبهي على نفسج أنتِ حلوه والعين عليج ، ماشي ماما .
ـ أن شاء الله خاله
ـ يله نمشي يم خالاتج ولاتزعلين مني أني لما أحبج ما احاجيج عادتج وحده من بناتي
ـ لا خاله ما زعلانه تقربت باستني ورجعنا كعدت بصف خالتي صبيحه صارلي عمر وياها ابد ما يوم حجت عليه رغم هي هم ملتزمه .
صح كلام خالتي نهاوند حلو وما بي شيء بس داخلي نغثيت وضميتها بكلبي وخالتي لميعه لاحظت عليه وطبطت على اجتافي وكملنا الكعده وللمغرب يله رجعنا وغافر أخذلي كومة صور تخبل ...
لليل نعست أجييت أنام وصلتني رساله من غافر والصراحه أستغربت هو مو بالعاده يراسلني بهيج وقت
غافر ـ نور كاعده؟
نور ـ أي بعدني جايين يفرشون فراش كول
ـ خوما نغثيتي
ـ من منو
ـ من خالتي نهاوند سألت أمي وكالت حاجيه وياج
ـ نوعاً ما عادي لاتهتم بس ليش تسأل
ـ مو أجتي عليه وحاجتني لهذا باجر لبسي حجابج زين أتمنى تقبلين النصيحه مني مو بس منها اذا الي خاطر عندج حجابج وركبتج والحجايه التغثجح تسممني مو بس تغثني .
ـ تمام تدلل والله وأصلاً أني مزعوجه من هالسالفه وعد اتحجب واضبط حجابي .
ـ ماشي عيني .
ـ عفت الموبايل وصفنت على أخر كلمه من عنده وتذكرت نافع من گال ( حتى لو أنه متت حبي الج
غافر ما لازم يعرف عنه أي شيء حبي يموت وياي)!!
تجاهلت الأفكار ونمت حتى نافع ما راسلته بعد وخالتي لميعه اجتي شاورتني
لميعه ـ محصور حصرة الجلب مشعان كاعد ومكابله وهو يستحي يكظ الموبايل لان مشعان يتخبل من سالفة موبايلات وسألني عليج كتله راح تنام .
نور ـ يستاهل ، ضحكنا عليه ونمنا والصبح كعدت على هوستهن ولا يشبعن سوالف ومطلعات ملابس وحده تشوف الثانيه وحبوبه تلزم الثوب وتشوفه وتشمره عليهن .
الحجية عطايات ـ شنهي هاذ ولا تعرفن تلبسن زمن أول شحلاته لبسنا وهذيج الالوان تفوج الكلب فوج ولا حلو
نهاوند ـ لا والله يمه شحلاته هذا قماشه غالي قطعته بـ ٢٥
الحجية عطايات ـ وأذا غالي بس مو حلو ما عدجن أذواق تهرفلن بنفسجن تلبسن لبس مو لعمارجن صغيرتجن تلبس مال كبار وكبيرتجن تلبس مال صغار ، بس صبيحه تعجبني بمهدامها مرتب لبس شيخات .
نور ـ خالتي إبتسمت وفعلاً كلامها من وعيت عليها هي كشاخه ومرتبه حتى بيتها مرتب بگلشي وغافر طالع عليها .
للظهر كاعدين وأني نايمه على رجلين خالتي لميعه وفتحت ظفيرتي وتفلي بشعري وخالتي صبيحه گبالي وتسولف ويه حبوبه نايمه ومتغطيه بس رأسها طالع وتسمعلها وخالتي نهاوند بناتها يردن يسبحن وراحت وياهن ما تعوفهن ولا ثانيه .
وأتصل موبايلها وجاوبت وتحجي وشكيت بي هذا نافع
صبيحه ـ والله ما ادري شكولك يعمه ليش ما تعوفها هسه ، أي والله لان واصله حجي وكلام يغث من جدك ياسين بالفواتح يحجي عليه شمدريني ياعمه هو جدك ياسين مهرفل يشمر بسوالفه حجايه ما يعرف يحجي ينرادله واحد يدگه ويعلمه مالات الاوادم .
نور ـ ممده رجليها وتمسح على ثوبها ومندمجه بالاتصال وحبوبه ماده رأسها وتسأل بيها وخالتي تكول الها هسه أحجيلج ، باوعت على خالتي هذا نافع مو
لميعه ـ اي متشوفين خالتج تحاجي وهو يغني لطلايب ومن زمان يريد يدك عمي ياسين ومهديه بس حبوبتج كاظته تخاف عليه لايموتون جوه أيده ويبتلي بيهم
صبيجه ـ والله يعمه الله وأيدك تدكه أنت دگه زينه بس مو تموته لان ايدك ثكيله بسلامة عمرك براجدي تدخله انعاش ونبتلي لا دخيلك يممممه مهديه عوفها تعبانه ما بيها دفره ، أنت تموت عالدفرات ولك بطل سوالفك سرسري انه عمتك استحي شويه
تدلل يعين عمتك تدلل هسه اروحله اذا ما طردني
تعال حاحيني عمه أنت تسوي زين لعمتك سميعه لو لخاطر حبوبتك ها علمود حبوبتك والله حبوبتك ما ترضى هاا ترضى مدري عمه منك الها اني العليه اسوي وتجي أنت وتتفاهم وياهم ماشي وليدي أمان الله يوصل يمه الله وياك .
الحجيه عطايات ـ هذا نافع
صبيحه ـ اي منو غيره يريد يدك جده ياسين يكول غير أنه هسه يله دريت بحجايته على جدي حبيب من أبوي وانه بغداد والله احطه واكتله كدام ولده ومهديه ام السحوره .
ـ لا يمه دخيل العباس خل يفك إيده منهم شيخلصني منهم كاوليه لا مهديه تسويله شيء وتضره حبيب بشنو يفيدني حاجي لا عليه منهم واذا حجه أخوه خلهم بينهم يتصافون مالنا غرض بيهم اخوان وهو خل يكعد عاقل لا يعل گلبي واضل شايله همه .
ـ لا حاجيته بس يمه حاجاني علمود سميعه
ـ شبيها
ـ يكول روحي حاجي جدي علمودها جم دوب يضلون هيج والعمر اله حوبه
ـ شو بالعكس هي تجي لو احنه نروحلها لو نافع برأسه موال يريد يغني .
ـ يا موال يمه علمود عمته مقهور عليها
ـ انهجم بيته شگد مقهور ،دروحي على أبوج ونشوف تاليها وانه أحط رأسي أنامن هرجتني بسوالفجن رأسي صار منخل
ـ نامي أكوم اروج والله يكون وياي على هالسالفه شگول عليك ينافع بس لخاطر عمتك .
نور ـ راحت وحبوبه نامت وأني وخالتي ضلينا كاعدين وما نحس الا الباب نفتح ودخل علينا نافع وبإيده مسدد خالتي شهگت بخوف ولطمت واني صحت نافع خله أيده بتحذير على حلگه وكال بصوت ناصي
نافع ـ وجع ما أسمعلج صوت
نور ـ وجه المسدس علينا أني غمضت وخالتي خلت المخده على رأسها تحمي نفسها يذبحنا ما نسمع الها صوت وأني اريد اعيط وهو مطكك عيونه ويحذر بيه ويمشي على كيفه وصل لحبوبه وجه المسدس على رأسها يمه راح يگتلها المخبل .
الحجيه عطايات ـ شگو شبيجن ما تخلن واحد ينخمد
نور ـ طلعت رأسها وشافت نافع وشهكت
نافع ـ راح أرميج ، اليوم أحطج وأكتلج ووراها أكتل مهديه وأخلص منجن ومن شرجن .
الحجيه عطايات ـ بويه أمشي عليك الحسين تكعد وتسكت ، يمه ذبه من أيدك يمعود عوفه نعله على يومك مشعان خلفتلك واحد مسودن
ـ والحسين بي طلقات تارسه ترس لعينه .
ـ يا مصيبة الله ، تسودن الولد ولك حبوبه حاجيني شنهي طلابتك وانه براسي احلها الك والتريده يجرالك بس ذبه غاد يمه الشيطان ما مات أخاف يكبعك بالشر ويسويلك شيء غير أموتن وراك .
ـ هو شيطاني ركبني وجبته وأجيتج واليوم احطج واكتلج
أنتِ وبنتج المدعبله .
لميعه ـ لا نافع دخيلك انه شلي غرض ما لكيت الا انه يكبن سوادينك عليه .
نافع ـ لا بطلت ما أكتلج أنتِ رجال ما حصلتي عاد تحصلين طلقه من نافع لا أخليج اغسل ذنوبي بيج
بس الضيم هنا يم هاي المدعبله الا اكتلج راح أرميج
ـ تسودنت يحبوبه إذا ترتاح ارميني يحبوبه وريح نفسك يله صوبني بمسدسك وين ما تريد طخني
ـ زوجيناها لو أرميج وأكتلج
ـ منهي يبعد طوايفي وهلي گولي منهي ، ولك ازوجك عشر نسوان أنت بس أمر اجيبها من عطوبها غصباً على رأسها وراس الخلفوها أنت بس ارمش
ـ وراج هذيج حية التبن الساله گلبي سل بسوالفها هو المفروض الطلقه تستقر بصماخها بس گلبي ابن سطععش گلب ما يرضى عليها
ـ بس يرضى على حبوبتك ليا جلب ابن الجلب
ـ أي لان من وراج لما شرج أنتِ ومهديه السوده انه ما هيج متعلل ومتعذب من وراجن اليوم اكتلجن وأخلصن منجن زوجيناها
ـ أبشر يحبوبه تريد هسه ازوجها الك لو بعدين
ـ أكون ممنون أذا هسه وياريت تستعجلين لان مستعجل
ـ والله يحبوبه ما طلبت الا حقك أبشر بطلبك هسه اجيب شيخ يعقدلكم واخذها لغريفتك وطفي نار گلبك ولا زفه ولا دنبك
ـ تدور دنبك المدعبله أستقري حبوبه
ـ استقريت يمه بس ذبه من ايدك والله گلبي راح يوكف وأنت مخلي بوجهي اخافن الطلقه ترد عليك وتصوبك
ـ لا لا تخافين تصوبج الج
ـ ميخالف حبوبه تصوبني ولاتصوبك يمممه اسم الله على عمرك دخيلك ولك رويحتي أنت حبوبه ذبه
ـ أريد حجايه زلم منج حبوبه ما أتشاقه نور اريدها منج لا والله احط بنتج هذيج المدعبله الثالثه وأكتلها والحسن اكتلها بس كاظ روحي لان أمها وبعدين جهالي يبجون يكولون كاتل جديتنا شيفكني من هالطلابه
ـ هاي هي أبشر وانه حبوبتك ازوجك عشر نسوان مو بس نوره
ـ ما اريد عشره أريدها هي
ـ تدلل يحبوبه بس عوفه من صواب صابها شمسويه بيك بنت صبيح .
ـ خالي صباح ماله غرض بس بنتج المدعبله شالعه گلبي
نور ـ وجه المسدس عليه وعطتت وتقدم فركه برأسي
نافع لاتتهور نافع ما اريد اموت نافع
نافع ـ أحبج يل زارفه گلبي بحبج
نور ـ فتحت عيوني وشفته راح فتح الشباك وحبوبه صاحت بي
الحجيه عطايات ـ أضربها غاد دير بالك لاترد عليك
نافع ـ طلقه صوابج وطلقه صواب مهديه هاي كسران الحلفان .
نور ـ ضرب طلقتين ورجع لخصره وعالصوت كلها التمت وحربي كام يحجي
حربي ـ شهل الحركات مالت جهال صغير أنت ما تكول البيت مليان أوادم كبار بالعمر وكومة لحم لو متفكر بس بنفسك
نافع ـ وأنت منو يمك .
حربي ـ نافع أحترم نفسك وبطولاتك المتعلمها بالولايه روحك هناك سويهن مو هنا ترعب أهل بيتي فاهم
نافع ـ عالجاياات عود افكرلك بيها .
نور ـ طلع جگاره يدخن وتتدخل غافر وسحب نافع وطلعوا برة وحربي يشيل روحه ويركعها بالكاع نافع ما أحترمه وهما أهل القصر حيل يحترمونه .
حربي ـ حبوبه كله منج أنتِ أنطيتي حجم أكبر من حجمه وجلبتي علينا بله على شنو فاتح الشباك ويرمي ما يفكر ما يكول القصر مليان كومه لحم لو جايه طلقه بواحد من أهل البيت .
الحجيه عطايات ـ خوما جاهل رماها وخلصت السالفه يله هدي
حربي ـ هاي الله كدرج عليها هدي والأفندي مستفلت
نور ـ مشه عصبي ومزعوج ونافع من أخذه غافر بعد ما شفته وحبوبه باوعتلي نزلت رأسي منها خجلانه من سوالف نافع عزه العزاك على هالسالفه ولا يستقر المعضل
كعدن خالاتي يسألن وحبوبه ما تنطيهن السالفه ولا خالتي لميعه عفيه شكد يحفظن سر نافع شكد عزيز عليهن ووحسيت بحبوبه داخت بالسالفه حتى كامت ما تحجي ولا تشارك ويانا ودزت عليه خبر ما اجاها ونوب شاطت وراه شدت العزم وكامت تريد تروحله
نهاوند ـ يمه وين تكومين دكعدي هو يجي شكو مكبره رأسه وتروحيله
الحجيه عطايات ـ نهاوند سگتي ولا تتدخلين يمه صبيحه هو وينه
صبيحه ـ جان كاعد هو وغافر بالطرمه بس هسه شفته فاتح باب السياره وكاعد يمكن يريد يمشي للبيت .
نور ـ باوعتلي وهزت رأسها وطلعت وگمت لحكتها باوعتلها من شباك الصاله راحتله للسياره وكف يحجي وياها مدري شگالتله وضحك ضحكه قويه وحضنها من رأسها ويجعص بيها اخر شيء عضها من خدودها وهي حضنته وتبوس بي ، ضليت صافنه عليهم لما شافني وحبوبه أندارت عليه گبل رجعت رأسي ورجعت الغرفه .
ومن بعد موقف الخايس السواه مالي عين أخليها بوجه حبوبه ، حتى من يكعدون وهو موجود
أني اسحب نفسي والمكان اليكعده أطلع منه صرت أحس الكل يباوعلي على رغم بس خالتي تعرف وحبوبه جانت شاكه وهسه تيقنت يقين تام على سالفته الما تسولف وياها نوب عليه المسدسات شاروخان ما يسوي سوايتك ، خبل مو صاحي والله
طلعت ويه خالتي للخضره وهو وغافر واكفين ماكو احد وياهم يحجون عبرته ولبسته بس غافر حاجيته هلاو غافر شلونها الاجواء تخبل مو بله وهسه خالتي تخليني أحلب وياها .
غافر ـ اي والله حلوه مال واحد يخييم هنا .
نور ـ لان أني موجوده نور على المكان مو بله
غافر ـ هههه هم صدك .
نور ـ عفته ومشيت ويه خالتي وهو يا ريح أشتدي ما حدا أدي ، أبد ولا أهتم بس جكارته مهتملها أكثر مني حتى ولا باوع يباوع للكاع نظراته حفرت الكاع حفر ضليت أباوعله غافر يحجي وهو مندمج ويحرك بأيده عود متكلم عابتلك يالثور
لميعه ـ ياهو الثور ولج نوره
نور ـ أبن أختج اكو ثور بالكاع غيره عوزه وشاح أحمر
ـ دهر فرج ينوره كون يسمعج ، أمشي شبيج أحمريتي وراح أطگيين..
ـ من سوالفه فدمقهوره منه لعد سالفه سالفته أكره هالتصرفات أحسها مال جهال مو رجال شكبره طول بعرض وواعي ليش هيج سوه خاله والله حبوبه ما أكدر أباوعلها وهو الصلف كاظيها كعدات وسوالف ولا كأنما عادي عنده
ـ شيسوي يا خاله قابل بايك الرجال يحبج ويريدج وطلابة حبه الج ما تنحل وبس حبوبته تحل طلابته وتأخذج من حلك السبع لحضنه چا السالفه هينه وأبوج وأمج يوافقون بهل السهوله لا أذا ما عطايات تشد العزم عليهم وعلى حبيب وياسين وزين إذا كظت هيج زين يخاله .
ـ ليش شيصير مثلاً
ـ كلشي توقعي من هل المله! ياخوفي عشگگم يصير جسر الهم وواحد يشمر حجايه عالثاني ويكظونها عليكم أممالخ وطلايب بينهم ، گلوبهم سوده ما ينسون
ـ حطيت إيدي على گلبي وباوعتله أموت أذا أفترقت عنه رفع عيونه وباوعلي وهو رافع حاجبه وصافن عليه أني هم أباوعله ونظراتنا تحجي وتداركت نفسي من هو اشرلي ورجعت كعدت لان غافر اجه من بعيد يفتر بالكاع
لاحظت عليه عيونه بالموبايل حتى أني ما راسلني المن يراسل! فجأه عافنا وراح وغافر صاح وراه جاوبه مستعجل .
غافر ـ ها وين
نافع ـ شغل .
نور ـ سويت روحي ما مهتمه ما أريد غافر هم يلاحظ وما اكدر أباوعله عفيه حب فشله من الناس ما ينراد
تجاهلته ورجعت ويه خالتي وخالي جاسم جاب الغنم والهوايش واني افتر بنصهن
جاسم ـ ديري بالج لاتهفج بگرونها
نور ـ غافر سحبني ، يمه صدك يعني تضرب
غافر ـ لا تتشاقه وياج ، تعالي يمي .
ـ سحبني من أيدي وكفنا على صفحه ونباوع عليهم وخالي جاسم يلزم النعجه يوديها لخالتي واجتي حبوبه بيدها سطل فافون گبل أبتعدت من يم غافر انى اروح احلب ويه خالتي .
ـ روحي بس ديري بالج .
ـ كعدت يم خالتي واحلب وياها وهي تعلم بيه بالكوه ما اعرف مهم شاركت وغافر باوعتله ماكو ما اعرف وين راح وكملنا وحبوبه دخلت قبلنا سريعه بالحلب وبالي يم نافع ما شفته واجتي عمتي صالحه تخبز على التنور الطين وكفت يمها واباوع على الأجواء تخبل الديج والدجاجات والوز وكل ظني نافع يراقبني عيني عالشباك وين راح! .
كملت خبز وأخذت كرصه ودخلت وياها والقصر فارغ ماله صوت وباوعت سيارته ما موجوده بس سياره باقر
وسيارة غافر وين راح طلع الطلعه من عيوني شبي مشه بدون ما يحجي مو بعاده يعوفنا بهيج اجواء حلوه
شفت خالتي خاله نافع وينه
لميعه ـ هسه اسأل حبوبتج عليه
نور ـ وسألت عليه وحبوبه كالت .
الحجيه عطايات ـ راح البيت شيسوي ضال يشبع قهر
نور ـ يبوووي على هالسالفه طفرت لغرفة خالتي ما صبرت أتصلت عليه وتنهد وجاوبني
نافع ـ نعم
نور ـ وين رحت .
نافع ـ للبيت ليش شتردين مني مو توني جنت يمج
ـ ما أريد شيء بس شعجب رحت وعفتني
ـ ليش عفتج مو غافر موجود تعالي وياه مو هو جابج خل هو يرجعج!! أنه ما ارجع أحد طلع من بيته بدون علمي وما مهتم لحجايتي ولا مهمتلي أصلاً على شنو اصرف بانزين ما تستاهلين .
ـ ليش هيج تحجي وياي ، نافع شبيك
ـ أنتِ وحده خاينه ما تستاهلين واحد يحبج .
ـ أني خاينه!! ليش إشسويت .
ـ ضحكج وسوالفج وياه نسيتي روحج لو أذكرج ، لو صورج تارسه موبايله ، ما صبرتي لما أجي وأنه أخذلج صور ،گبل رحتي مطيوره على غافر بس يله .
ـ أنت سالفتك مو سالفة غيره من غافر ولا صوري تارسه موبايله لان أساساً صوري بموبايله من زمان شنو التغيير هسه وعلاقتي بي أنت مأمن أكثر مني السالفه مو يم غافر ، السالفه تخصك أنت وارجع البيت ونحجي بيها هسه الوقت مو مناسب..
ـ عندي شغل .
ـ كمل شغلك منو يمك باي ، قطع الخط بوجهي عفت الموبايل مزعوجه من تصرفاته صاير جاهل ما جان هيج معقوله شاف شيء على غافر بس الولد مأدب ابد ما يوم قلل من أحترامه .
" شبي يربي شنو قالقك أكيد لينا هي السبب أرجع البيت واحجي وياها على شنو اتهرب منها ما دام هي سگتت اذن سگوتها مو خالي وراها سالفه ...
وراسلت غافر وين أنت بالزرع بعدك لو رجعت الديوان
غافر ـ لا بعدني بالزرع كاعد
ـ ليش ما رجعت كلها هنا شنو كاعد لوحدك
ـ اي والله لوحدي كلها راحت والجو حلو حبيت اضل كاعد ما تجين يمي .
ـ ها لا توني جنت هناك
ـ براحتج
ـ دزلي الصور بموبايلك ما شفتهن حلوات لا
ـ من أرجع هسه الانترنت ضعيف ما يحمل وأكيد حلوات عندج شك بتصويري .
ـ لا أبد ودزلي صوره مقرب الكاميرا على وجهي ومبينه واضحه كلش كل ملامحي مبينه بوضوح ودقه هو يصور بكاميرا الايفون .
ـ شوفي هاي عبالك صوره لفيلم .
ـ اي كلش حلوه عاشت أيدك .
ـ التصوير سهل لان أنتِ حلوه صورج يطلعن حلوات .
ـ شكراً .
ـ العفو أبويه .
ـ ورن موبايلي أمي جاوبتها هلا ماما كبل عاطت بيه
سميعه ـ هسه تجين ما كافي دياحه خليتيني علج بحلك جديتج وعماتج
نور ـ ماما وين أجي ما ضل وگت وبكيفي أجي غير وياهم
ـ والله مشكلتج كلت تجين هسه يعني تجين لا أنه بنفسي ألبس عبايتي وأجي أشحطج من شعرج كدام خوالج وأخليج تكرهين اليوم الصرتي بي .
ـ ماما الله يخليج قطعت الخط بوجهي كبل راسلت غافر شوكت نرجع البيت
غافر ـ ليش ضجتي
ـ لا بس أمي كالت ارجعي البيت وحيل معصبه
ـ عادي تحبين هسه نرجع كيفج .
ـ بعد وگت مو أذا نرجع
ـ خل أشوف أمي واردلج خبر أذا ما ترجع أروح بس أني وياج أني هم باجر الصبح عندي دوام .
ـ تمام ، ضليت بغرفة خالتي وطلعت على صوت خالتي نهاوند تحجي ومزعوجه ضليت مصدومه بكلامها عني
نهاوند ـ أكولجن وين صايره دايره بنيه أمها تسربتها ويه ابن خالتها لو ابن خالها مو عدها أهل وين عايشين أحنه
صارلها يومين ما شفتها أتصلت وسألت على بنتها وأنه ثانيه ما أفارك بناتي سميعه شبيها تسودنت .
صبيحه ـ نهاوند شهل الحجي هذا وأبن خالتها رابين سوه ليكون ما عندج ثقه بأبني تحجين هالحجي عيب عليج .
ـ السالفه مو سالفه ثقه يا أم غافر بس بنية بيت واصلاً حرام تمشي وياه مو عاد تريد تمشي لبيت اهلها بهل المغربيه ولوحدهم هسه لو أنتِ وياهم بيها مجال واذا رابين سوه يضل محرم عليها مو أخوان صبيحه مو اخوان شبيجن ما تفهمن ما تحجين يمه ليش ساكته .
الحجيه عطايات ـ ما الج غرض حيري بروحج وبناتج وكظي لسانج والتحجين عنه هذا ابوه كاظم خاف نسيتي ، أنه أمن بي وأمها هي مخابره غافر وطالبه منه يرجع نوره أنتِ شلج دخل حاميه رويحتج .
نهاوند ـ بنات وخلفة أخر وگت .
نور ـ ما حجيت بس خالتي صبيحه هزتلي رأسها ورحت لكيت غافر دازلي رساله
غافر ـ تجهزي هسه اشغل السياره ونطلع
نور ـ تمام ، ولبست وتحضرت ودعتهم وطلعت وخالتي صبيحه ما رجعت ويانا وكعدت بالصدر يمه واجتي علينا خالتي
صبيحه ـ ما عليج من كلام خالتج روحي وسلمي على أمج وأني بقيت علمود سالفتها أريد أحلها ويه أهلي
واصالحهم
نور ـ أن شاء الله خاله ، ودعناهم وطلعنا للبيت وبالي مو صافي منا نافع زعل منا أمي منا كلام خالتي نهاوند منا حبوبه ونظراتها اليه بيهن كومه حجي ما ادري تاليتها شلون تصفى على رأسي
•┈┈┈••✿❂✿••┈┈•
ليــنا ...
ـ بحياتي ما خايفه هيج خوفه هاي أول مره تصير وياي وبهيج موقف صعب ، باوعلنا وشكله جان عصبي ومزعوج .
نافع ـ ها اليوم جايه يمنا خير .
لينا ـ ردت أحجي وصفا سبقتني وگفت يمه وخلت أيدها على كتفه طبيعي!
صفا ـ أنه عزمتهن خطيه كلت نتعرف عليهن وهنا ما طالعات ،
أي شوكت أجييت .
نافع ـ توني وصلت يله نزلن .
لينا ـ تقربت أخذت مني الموبايل ونافع عيونه بموبايله ما أنتبه الها ونزلنا سريع وأني أيدي على گلبي خرب بيومج هاج موبايلج عايزه خوف جان متت غير دمي نشف ، شنو ما تخافين أنتِ .
صفا ـ على شــنو أخاف ليش شمسويه وحتى لو ساحب الموبايل منج أكوله اشك حسابي مفتوح واريد اغير كلمة المرور وما عرفتله وطلبت من لينا تساعدني وخلصت السالفه وابوج الله يرحمه .
ـ داهيه أنتِ
ـ شگو شبيج يمعوده وبعدين هو دايخ أكو سالفه برأسه قالقته اني اعرفه والله لو ما بي شيء جان گبل هف الموبايل من أيدج وكلب الدنيا علينا بس فكره مشغول أخويه وأعرفه .
ـ ما ادري والله أخوج وأنتِ أعرف بي وهسه شتسوين
ـ شسوي أنتظره ينخمد وأبوك موبايله بس بالأول علميني شلون وشسوي علمود ما أطول گبل ارجعله موبايله ما اريده يحس وهو نومه خفيف من ذبة الابره يفز .
ـ ما عليه صفا أعفيني من هالسالفه لا يصير شيء ويرجع عليه يگول أنتِ علمتيها شخلصني من للسانه
ـ أهوو ليون لاتسوينها قصه شسالفه .
ـ وكفت علمتها عالسريع بعد ما عليه لاتجيني صار صار ما صار مشكلتج مالي شغل بيج ، اروح اكعد يمهن
كعدت بصف لبنى كعدتها كعدة شيوخ همستلها لبنى شهل الجمال .
لبنى ـ وين جنتي وشتسوين صعدتي مو اتفقنا رجلج على رجلي
لينا ـ ترى صديقتي لاتسوينها سالفه
لبنى ـ يله نكوم كافي تأخر الوقت ولدهم بالبيت زحمه أني أنتظرج ردت نمشي قبل لا احد منهم يجي ويشوفنا عيب
لينا ـ تمام تونا ردنا نگوم وصوت نافع واصل لعدنا زهور راحتله يا ساتر شگو .
لبنى ـ وأحنه شگو امشي نولي للبيت .
نافع ـ وأكو كواد يطلع بهل الوگت شگد صارلهم من طالعين .
لبنى ـ أمشي تضلين واكفه
لينا ـ خل نفهم شگو مستعجله عالبيت لاحكين .
نافع ـ وهي شگو قافله موبايلها هاي سالفه سالفتهم عساهم بحادث عظمه ما تطلع منهم زين لو لا اي ما جان تحجي تگول جان جبتها وياي وأمها هسه تندرت من تغرب الدنيا تذكر عدها بنيه ،
أم جيس حب من خرب بشغلكم
لينا ـ ضلينا واكفين وأجه وعاط بينا لبنى كبل صدت وجهه تخشبت من العيطه
نافع ـ وأنتن شگوووو دايحات مو غوربت الدنيا ما عدجن بيت ما تولن لبيتجن بس أريد اعرف خالي صباح وينه وين مگبور عايفجن على حل شعرجن ، أمششن أكبرجن بطريقي تحرررررركحن .
لينا ـ مشى كدامنا ولبنى ضربتني على ظهري وكفت كلياتي خرب بيومج كطعتي نفسي هو هيج الضرب
لبنى ـ كله منج أنتِ جبتيني هيج أحسن تسوى عمري هالرزاله ونستاهلها فلا ينلام بينا أمشي الله يأخذج مو جنت مكبوره بالبيت ومكابله مكينتي رايده الطلعه اني
لينا ـ صعدنا بالسياره وشغلها بسرعتها وتوه يريد يلوف الفرع اجاه أتصال .
نافع ـ الو نعم ها غافر متگولي وين أنت!
موبايلك وين عمي دتتصل من اي رقم مو حركت الدنيا على رأسي وعمتي ضغطها معلك عليك هاي سالفه سالفتك بشرفك حادث! وهسه خوما بيكم شيء ها زين وهسه وين أنت أي اندليت اندليت يله جايك
لينا ـ فر السياره وطلعنا والطريق خارجي لبنى سگتت حتى نفسها كطعته بس تخزر بيه لاتباوعيلي هيج علمي علمج
لبنى ـ سألي وين رايحين
ـ ما اسأل ما عليه
ـ سألي
ـ گتلج ما اسأل أوي ، كرصتني خرب لحمي يوجعني أبتعدت منها وهي صايره ورة نافع بس منزله رأسها خرب والله صارت بينا خوفه ونوب هو يسوق سريع ويتصل محد يرد .
نافع ـ ادري المن شايله هالمهجوم من شالج الله.
لينا ـ رجع أتصل ويحجي ويه
غافر لما وصلنا وشفناهم طابكين السياره ونافع وكف ونزل وسد الباب بقوه يمه صاير نار باوعت وشفت نور! لبنى هاي نور يمكن سيارتهم عاطله لو حادث .
لبنى ـ كملت جنا بإثنين صرنا بثلاثه اليوم خالتي ما تلفينا بالبيت أذا ما طلعتنا حفاي على هالسالفه هاي
لينا ـ أجتي أجتي ، تقدمت فتحت الباب صعدت ليكدام معصبه ورافعه خشمها وحاجبها ما يكصه سيف هاي شبيها ونافع يحجي ويه غافر واجه يهف بالسويج وشمر الموبايل ويريد يشغل السياره ونور صاحت بي
نور ـ لحظه لحظه وين عايف غافر وجاي ، أذا تعوفه اني ما أعوفه تريد تموت خالتي صبيحه على شنو دزينا عليك خو من الأول نركب سياره ونرجع .
لينا ـ رادت تنزل وهو جر الباب وسده قوي وشغلها بسرعتها رجعت عاطت بي
نور ـ أفتح الباب نافع ، غافر ما أعوفه مو احاجيك شگو عفته وأجييت ، سيارته عاطله أكعد صلحها وياه ترى منطقه مكطوعه بشر ما بيها شكو عفته ،
نافع ارجعله مو ويااااك نااااافع .
لينا ـ ولا جاوبها بحرف بس أتصل وحجه .
نافع ـ ناجح وين أنت وصلت لو بعدك ، أتصل على موبايلي الثاني اي رقم نهايته ..
اي بقيته يمه خاف ما تندل ومن توصله خابرني بس اوصلهن أرجعلكم .
لينا ـ قطع الخط وشمر موبايله ونور سگتت ما حجت بعد ووصلنا البيت وهي نزلت قبلنا وركعت الباب بكل قوتها أني ضليت مصدومه من تصرفها .
لبنى ـ أنزلي شعندج كاعده .
لينا ـ ها أي ونزلت وهو راح ، شفتيها إشسوت شون ركعت الباب .
لبنى ـ شعلينا بيهم يله أمشي وحجايه وحده ما تحجين ولا تنلكفين وتسألينها مالنا شغل هي وأهلها يله كدامي گبل للغرفه .
لينا ـ اي فهمت بس لاتكرصين شلعتي لحمي
ودخلنا البيت والعيطه كابه لستار صوتهن بالغرفه وسادات الباب حتى صوت نور عالي .
سميعه ـ كله من وراج فتلتي وعزمتي الا تمشين على خوالج كاتلتج المحنه عليهم
نور ـ هسه رحت شصار قابل
ـ ولج لو صاير شيء على غافر لو مگلوبه سيارته شسوي اني شصخم بيج ربج لطف وطگ التاير لما أنتِ هو شجابره يجي مناك بهيج وگت بس من وراج سودتي وجهي كلها تلومني وتحجي عليه وجديتج وعمامتج يعلجن بلحمي مسربته بنتها وصادكات بنتي دايحه ومسربته لا أب بي خير عايف البنيه وحايرلي بطمعه ولا أم الها كلمه على بنتها .
ـ يمه دكافي عاد هسه الله لطف والحمدلله شطالع بأيدي كاعده تلوميني
ـ الومج لان أنتِ السبب من رأسج الگوي
ـ ماما الله يخليج كافي والله تريدينه يصير بس أهدي وخل نحجي
ـ ولج شنحجي وأنه كلما احاجيج تروحين على ابوج تبجين وهو يرجع عليه وتاليتج تصخمين وجهي انه حاطه أيدي على گلبي منج .
ـ لا لا ماما والله أني مو هييج
ـ بس لااااا منا وهيج أنه الج ولج وحده وما كادرتلج لو مخلفه اربعه خمسه وشوفي وسمعي زين ينور خليها أبالج حدج بس تكملين السادس ازوجج وأخلص من همج اذبج بركبة رجال خل هو يتوالج أنه ما أكدرلج أنجلبتي وتخبلتي عليه هاي مو تربيتي أنه ما اربي هيج بنات فالتات حتى قلق أحسن مني مريضه وشوفيها شمربيه شوفي أخواتج محجبات صوتهن ما أسمعه أنه ما احبهن وما اطيق وجودهن بس الشهاده لله مربيات على أقل محترماتني أنتِ لا تسمعين كلمتي ولا تحترميني خشمج مادته متر وشايخه ششايفه نفسج ولج يمه الدنيا بس الج بس أنتِ صايره ما وراج أهل لو لان وحيده أمج لازم گلشي مباح لا يمه فتحي عينج انه تربيه عرب تربيه باب أول ادكج بالكاع ينويره اذا ما تثكلين روحج وترزينها
ـ ليش محسستني أني بنت شوارع مو بنتج شلون ينطيج گلبج هيج تحجين عليه بعدين اني ما مسويه شيء غلط وكلشي كدامج .
ـ لا يمه ما سويتي شيء وأني بعد مالي شغل ويجي أبوج أحاجي خل يعوف هالمحلات ويگابلج ليش بس راكضلي ورى طمعه وعايفج بس عليه لا يسأل وين رحتي وين أجيتي وكت الحجي أمه وأخواته لسانهن متر عليه مخليني بوجه المدفع ، وتكملين السادس ازوجج
ـ ماما
ـ وجعة أبو أمي زين لو لا .
لينا ـ سمعت الباب ينفتح ركضت على لبنى لكيتها تصلي وسلمت وصاحت بيه .
لبنى ـ أمشي توضي وتعالي صلي وهالعاده بطليها عيب أم وبنتها ما الج حق تسمعين حجيهن ، يله كدامي .
لينا ـ رحت توضيت وصليت وسميعه مرت من غرفتنا وباوعت علينا ولبنى گبل كامت وين شبيج تخافين منها بس باوعتلج كمزتي .
لبنى ـ لا بس جوعانه اكوم اسوي عشه
ـ ما يطبخن هنا ، أنتِ شگو
ـ گلت جوعانه يعني اليه والج واسوي الياكل يأكل عليه بالف عافيه تردين تجين تساعديني تعالي ما تردين ابقي .
ـ راحت لبنى وهي طبخت العشه وكملت ونور طلعت تعشت بس كم لكمه وأبويه يسألها وتجاوب وكامت
صباح ـ نور شبيها .
سميعه ـ اسألها
ـ لا اسألج الج
ـ غافر سوه حادث وهما راجعين طك التاير وفقد السيطره وزين ما نگلبت بس ربك لطف بيهم
ـ ما تحجين ما تگولين بعد وگت سميعه بعد وگت
ـ أنت هسه أجييت
ـ مو أكو موبايلات ما تخابرين وخوما صارلهم شيء غافر شلونه ، نور بابا تعالي احاجيج شلونج بابا نور
لينا ـ راحلها الغرفه شوي وطلع مزعوج وصاح عليها
صباح ـ سميعه تعالي احاجييج .
لينا ـ دخلوا غرفتهم ولبنى غسلت المواعين ودخلنا غرفتنا ما سمعنا شيء صار هدوء للصبح كعدت الوقت متأخر ولبنى تغسل وتنظف جالفه البيت جلف منو يستاهل تعبج المسعدات نايمات ومرتاحات وأنتِ تنظفين وسخهن .
گملت شغلها وسويت الريوك وكعدنا أني وياها نتريك وسمعنا باب الحوش انفتح منو أجانا
مهديه ـ سميعه ولج سميعه وينج
لينا ـ دخلت علينا هي وعمتي نوريه دگت عوجيتها بالكاع وطلعت سميعه من الحمام سلمت عليهن
مهديه ـ الله لا يسلمج ولا يبارك بيج على هالتربيه السكط ،
تاليتها وياج يبنت عطايات هم تردين تصخمين وتسودين وجهنا وتنزلين رأس صباح بالطين من ورى نويره نفس ما سويتي أنتِ ويه أهلج يمت تبطلن هالخفه لو توارثتنها من الام لبنتها
نوريه ـ أي يمه البنت تطلع على أمها
مهديه ـ شوفي يبنت عطايات سالفة البارحه ما تنضم عليه أنه مهديه ما تنخش عليه سالفه مثل هاي وبنتج راده من العرب لوحدها ويه غافر والدنيا أظلمت وهما ما رادين البيت!
شنهي ماكو زلمه بهل البيت يلمجن! لو سايگه عليه وعايفج أنتِ وبنتج بكيفجن وناسيات نفسجن والأم لازمه درب الدلالات والبنت لازمه درب خوالها ويه ابن الخال وابن الخاله لا عيب ولا مستحى وأنه هذا الشيء ما يخش عقلي ولا يرضي عمج وحموينج
نوريه ـ يمه نأخذها يمنا .
مهديه ـ لاتقاطعين حجايتي ينوريه خلني أكمل اي يبنت عطايات بنتج نويره بس تكمل السادس أزوجها لمصطافي ابن قادر وأخذها يمي لان أنتِ مو مال تربيه ينخاف منج والمعيوب يعيب يسميعه سمعتيني زين ، أي وحاجي بنتج وفهميها حجايتي يله يمه نوريه أمشينا نرد البيت .
لينا ـ مشت وباوعتلنا بس ما حجت وسميعه ونور ابد ما حجن وطلعن وسميعه دخلتها الغرفه وتحجي عليها.
سميعه ـ خو شفتي وسمعتي بأذنج الحجي سمعتي زين جديتج مهديه شناويه عليج نيه كشره وتزوجج لمصطافي السرسري !
شفتيها شون تحاجيني ضربتني بنعال على حلگي ما كدرت أتنفس وياها ليش لان حقها ولان بنتي نعال وتستاهلين اكليها من أيدج يمه من أيدج
لينا ـ رجعت يم لبنى أكولج ليش يكرهنها شمسويه
لبنى ـ وأنتِ ليش حشريه وتتدخلين بگلشي .
ـ يعني ما نسأل
ـ لا ما تسألين طرشة عميه خرسه ما علينا بأحد .
ـ أهووو لبنى
ـ هذا الموجود ما عجبج ضربي رأسج بالحايط
ـ سگتت وهاي لبنى ما ينحجي كدامها گلشي مسالمه بسلامتها ، وبعدها سگتن بس سميعه كابه نارها عصبيه وتدردم على نور ومر كم يوم هدوء واني ضايجه طاكني الملل كلش ولبنى تخيط ملتهيه أحسن مني .
عصريات كاعدين أني وياها ودخلت علينا .
سميعه ـ لبسي عبايتج وتعالي وياي للسوك ما بيه اشيل علاكيك وميثم نايم مو تردين مواد خياطه وگلتي محتاجه شغلات كومي . .
لبنى ـ اي خاله هسه .
لينا ـ تروحين
لبنى ـ اي شسوي وأني أريد اروح السوك ، محتاجه شيء أجيبلج وياي .
ـ لا سلامتج وراحت وياها وضلينا بس أني ونور وميثم نايم ودخلت عليه نور تفاجئت بيها نور .
نور ـ أريد احجي وياج بموضوع أنت أعرف بي
لينا ـ أي أحجي
ـ سكوتج شنو جان مقابله! .
ـ مقابله شقصدج
ـ جاوبي على كد السؤال
ـ شوفي نور سؤالج هذا روحي وجهي لبنت شارع مو اليه وأني اختج من جان أستحيتي على تفكيرج المنحط
ـ لحظه لحظه وين رحتي
ـ والله سألي نفسج قبل لاتسألين هالسؤال
ـ ليش سگتي ، لينا أحجيلي من الأخير شعندج ويه نافع
ـ ما عندي شيء وياه والله
ـ شوفي لينا أنتِ صار عندج علم بعلاقتنا عيونج اطلعهن اذا تباوعين عليه الزمي حدج ولا عبالج تعبر عليه حركاتج وتصرفاتج وكلامج عنه كدام لبنى ترى سمعتج تتغازلين بي وأني مو غشيمه لهذا ما يعبرن عليه هالسوالف وخليج بعيده وأحترمي نفسج .
ـ بعيده والله يبعدني عنه وعنج وعن قرفكم ومستحيل أفكر لو مجرد تفكير انعجب بي وأذا حجيت عنه كدام لبنى فهو ابن عمتي لاتنسين ، وأجييت أكولج
هو فعلا يحبج ومشتريج بدم گلبه بس ما تستاهلين الواحد يسوي زين وياج .
ـ لينا الله عليج أحجيلي حجه وياج هو
ـ اي حجينا
ـ بشنو حجيتوا أمانه أحجيلي
والله گلبي طگ ومية الف فكره أجتي أبالي ما لكيت نفسي الا أجي أحاجيج .
ـ أجاني للبيت وأعتذر مني عن التصرف السواه واعترف بغلطه وندمان واعترفلي بحبه الج وشكثر يحبج ونيته طاهره ويريدج زواج والموقف الشفته جان أول مره يصير وغلطة شيطان وبس هذا الحجاه .
ـ أني والله ما عندي شيء وياج بس نفسيتي تعبانه هالأيام تعرفين الصار وياي مو سهل أمي وجديتي لهذا أعذريني
ـ لا عادي عاذرتج
ـ شكراً لتفهمج وأمانه لاتحجين لاحد
ـ بعدج ما عندج ثقه بيه .
ـ لا عندي ، أخذي راحتج عيني .
ـ راحت مسكينه حسيتها فطيره وعلى نياتها تعصب وتنفعل وتحجي وبسرعه تلين ، والله موقف خايس أني احب نافع شبيه تخبلت قحط زلم .
ورجعت لبنى جايبتلي شغلات وتذكرت أمي عبالك أمي صفنت عليها يربي شكثر تشبهينها حتى تعرفين شنو احب وشنو أحتاج .
لبنى ـ شلون غير أختي .
لينا ـ الله يخليج اليه ،
كمت ساعدتها وبالليل نايمين وهي صافنه وحسيت بالها مشغول حتى ما تعشت لبنى شبيج شنو الشاغل تفكيرج .
ـ لا هيج ماكو شيء يله نامي
ـ لبنى ازعل منج وبعد ما أشاركج بداخلي واضم عليج مثل ما تضمين عني
ـ نجبي لينا غصباً عليج تحجيلي
ـ أحجيلي شبيج
ـ خالتي سميعه
ـ شبيها
ـ طلبت مني باجر أروح وياها أنظف بيت الحجيه أم غافر وقبل فترة سمعتهن يحجن بشغلي ما أعرف يردني خدامه انظفلهن وأعزل الهن وردت أكول لأبويه وتراجعت
ـ شُــــنو شُــــنو ، عيدي عيدي شگلتي تنظفين لا هاي العايزه شُــــنو يردجن خدامه أصلاً مسوياتج خدامه وعلى جثتي ما أخليج تنظفين وأني أعملها سميعه شُــــنو لگتنا على گد أيدها ما عدنا للسان أحنه بنات الست قلق نشتغل خدم لأختها لا والله اليوم أهجم البيت على رأسها ورأس الخلفوها بنت الگلب .
ـ لينا تعالي أستري علينا الله يستر عليج أني أحجي ويه أبويه لاتكبرين السالفه وتصيير مشكله لينا ارجعي .
ـ دگيت عليهم الباب بكل قوتي وطلع أبويه يفرك بعيونه وصااح بيه
صباح ـ شگو شعندج بهل اليل تدكين الباب مثل المصروعه
لينا ـ أسفه بابا كعدتك من النوم بس السالفه
تقهر وما ينسكت عنها وما تحملت أصبر لصبح وكلت تروح المحل وما الحك بيك بس شوف وأسمع بابا مرتك تريد تشغلنا خدم لأختها أم غافر وطالبه من لبنى باجر تمشي تنظفلها البيت أحنه مو خدم عند الخلفوج علمود أنظف لأختج .
سميعه ـ وشگوو بيها وهي تحبجن وتعزجن وزينه عليجن وما عدها بنيه وأني أروح وياها مو لوحدها وتساعدها مو تشيل كل شغل البيت سويتني مسويتجن خدم يمه منجن يمه .
لينا ـ لا والله جذابه لبنى سمعتج تحجين ويه أختج وتردين لبنى تخدمج وتخدمها وتنظفلجن وسخجن
وأنتِ وحده حقده تردين تتنقمين من عدنا وتشغلينا خدم بس لو تموتين أحنه بنات الست قلق خاف ما تدرين
ما حسيت غير أبويه ضربني راجدي ورجع ضرب لبنى لزمت خدي مصدومه بي
صباح ـ يله كدامي نكبرن بغرفجن كطعيه التكطعجن كل وحده بكد النعال لسانها شطوله تحجي وتشمر بإيدها ولا دكول أبويه واكف أدبسزز ، يله كدامي من أنعل أبوجن لابو الرباجن مكعداتني بنص الليل من نومي علمود هالسالفه من غضب الله عليجن .
لينا ـ ردت أحجي ولبنى سحبتني ودخلتني وقفلت الباب گبل حضنتها وبجيييت لو بس ضاربني ميخالف بس أنتِ ما حجيتي ليش ضربج وإشسوينا ويضربنا
فوك ما مرته تريد تشغلج خدامه .
لبنى ـ مو كتلج لاتروحين ، والوقت مو مناسب وهو نايم وتعبان للصبح ينسى شحجيتي يعني ضيعتي حقج بإيدج لو سامعه مني ومخليتني الصبح أني احجي وياه بهدوء جان ما صار اللي صار
ـ ما تحجين أدري بيج تخافين منه
ـ يله سگتي كافي تبجين كومي غسلي وتعالي أنومج بحضني
ـ گمت غسلت وباوعت غرفتهم ظلمه حسبي الله عليكم ورجعت نمت بحضنها نفس ريحة أمي وحنيتها وصفنت عليها شگد قويه أبد ما تبين حزنها تكتم بداخلها حضنتها مقهوره عليها وبداخلي حقد على سميعه ويصير خير يسميعه أني وياج والزمن طويل ...
