رواية نورة الفصل الثامن بقلم ام مصطفى
الخبر مثل الصاعقة نزل علي
-يربي مابيه بعد اتحمل ماعندي طاقة صبر
دگيت ولطمت اشفت من دنياي ازوجت بعمر ١٤سنه وكلشي ما شفت من رجلي
سنه وحده واخذته الحرب مني ٨ سنوات
حرب كلشي مشفت من داوود
بس عوز وقهر ومتحمله مسؤولية البيت
والبنات
وبنتي فقدتها
وكل هذا واگول اهم شي داوود سالم
وعندي امل تخلص الحرب
ويرجع النه
بس راح الامل واتبخر وصار سراب
نصبوا جادر
والتمت الناس عدنا
وعمتي تخبلت رزاق وداوود
يعني راحوا ع كولتها عمدان البيت
واني الطم وشاگة ثوبي
منتهيه
طب حسن علي صاح احلام كافي لطم
بيش مفاولات داوود
تره هاي مو جثت داوود
اني اعرفه
طفرت
-خويه صدك تحجي لو تصبرني
صار هدوء كلها تسمع لحسن
-اي مو هو صح وجهه مشوه بس مو جسمه
صار جدال
وطبوا الزلم شلون
تره الجنسيه وكلادته لكوها بجيوبه
كتلهم
-اخذوني اني اعرفه
وعمتي هم صاحت اخذوني اشوفه
كال هو جابوه
راح يجوون بيه
بقينا كاعدين لا احنه نبجي ولا احنه نكدر نسكت
بقيت بس ادعي ربي كون مو هو
ويصير عندي امل داوود عايش
اجه التابوت وعليه العلم 🇮🇶 العراقي
والحزب وياه
نزلوا التابوت لا اله إلا الله
صار صريخ
بزايد
دخلوه للاستقبال
طلعوا كل النسوان
وبقه اخوي حسن وابوي
وصاحولي
موقف كلش صعب الله لايراويه البشر
تقربت من التابوت
اخوي راد يفتحه
كتله اوكف
-شنو شبيج فضينه يمعوده
-الناس متانيه
فتح التابوت ووخر من وجهه الوصله
وجهه محتر طاگة قاذفة عليه جانت
فالوجه محترك
كتله
بس افتح حلكه
كال شنو شيوين
كتله داوود سنة مكسور الكدام
-كال صدگ عفيه عليج
رفع شفته
اسنانه كامله
اني مرعوبه من الجثة
بس متحمله ماباليد حيله
كتله بعد اكلبه
بضهره شامه جبيره منفوخه
فتحوا ضهره ماكو شامه
من رجعوا لبسوه
وكعت جنسيه منه
مو جنسية داوود غير اسم
عرفنا اهنا مو هو
الف الحمد لله
بس بجيت ع الشهيد اووف
رجل يامگروده انت
شالوا التابوت
وطيحوا الفاتحه
بس داوود ضل مفقود ومحد يعرف وينه
احس رجع الامل عندي
المهم مفقود ولا ميت
اهلي كالوا بعد متبقين
ناخذج يمنا
لان المفقود لو ميت لو متأسر
فابوي مقبل ابقى بعد
انطاني غرفه
وشلت غراضي واجيت يم اهلي
الدوله حسبت داوود شهيد
لان لكت جنسيته
واهواي جثث بنفس المكان محروكة من قصف المدافع
ابني علي شلع كلبي مريض بالربوا
وهاي كل يوم والثاني اني بالمستشفى نايمه بيه
وبناتي ذابتهن ع خواتي
اهنا انتي بعد ضليتي يم خالتج خديجه
وبعد ماردتيني
وضياء زوج خديجه توسل بيه
تبقين عدنا
يكول تعودنه عليها
والله اداريها بعيوني
كتله خليها عدكم
اني محتاره بعلي
انام بيه اسبوع بالمستشفى
مرات عشر ايام
تعبني كلش
واخوي حسن خطيه يفتر وياي
جان يشتغل بسفوان
ينگل ملابس وحلويات لجهالي
مخلاني محتاجه الله شاهد
مصاريف الادويه والدكاتره كله منه
الدوله كامت تنطي حقوق الشهداء
وداوود انحسب شهيد عدهم
فاخوي حسن كام ياخذني
ويمشي بالمعاملات
لحد ماطلع حقوق داوود
انطوني بيت كامل 300 متر
عمي بس سمع اجه من الناصريه
يريد حصته من ورث داوود
يعني سنه كامله ع فقدان داوود
محد سئل بيه ولا كال شمحتاجه شرايده
ابنها مريض وتفتر بيه
بس سمعوا طلع حسن البيت اجه
يطالب بحقه
ابوي كله
ليش ما تتنازل لجهاله
موعنده جهال داوود
والبيت الهم مستقبل
-واني شخصل تره هذا حقي بالشرع
وبالدوله
ماماخذ منكم شي
-اي اعرف يابو رحمن
-بس انت مامحتاج وعدك بيت وخير من الله
-اكلك شنو عاصي بورث ابني انت
-لا يابه ننطيك حصتك
باع الببت ابوي
واطاه حصته
انوب عمتي
اجت تطالب بحصتها
كالت الي حق واريده
عاد انطيناها حصتها
واخذتهن وراحت
اني جنت ضامه فلوسي يم ابوي
عاد كلت لابوي يابه شوفلي بيت
مااريد اصرف الفلوس
اريد بيت لجهالي
خوما يضلون بالبيوت يفترون
الفلوس اجمعهن واشتريلي بيت
گام ابوي ودورلي بيت
قريب عليهم وع بيت عمي الي ماخذين خديجه اختي
واشتريته وسجلته باسمي
بقيت يم اهلي كاعده بس ماقبلت اعيش عاله ع غيري
جبت مكينة وتعلمت الخياطه
وتعلمت احف
وكمت احف واخيط
لحد ماكلت لابوي
بويه اني اريد اكعد ابيتي
مادام قريب علي
-ليش بويه احد ضوجج ضجتي من عدنا
-لا والله بس تعرف جهال وي جهال مترهم
واني اريد اخذ راحتي واجيب بتي نورا
واكعد ابيتي واخيط واحف النسوان
بيتي فارغ
والنسوان هنا ماتاخذ راحتهن
-بويه براحتج ما امانعج اني
اشتريت طباخ وغراض مطبخ
وثلاجه
والباقي عندي كنتور وافراش وكلشي
واخذتهن ورحت كعدت ابيتي
استقريت
ورحت جبتج بس خديجه ضلت تبجي عليج
و انتي هم تبجين عليها
رغم خديجه بنفس الدربونه كاعده
بس اني ردت اعودج علي
بس انتي تمرضتي
من كد مانقهرتي ع خالتج
كمت اوديج بالليل يمها وبالنهار اجيبج
تلعبين يم اخوانج
بس هم ماترديني
عاد امي كالت خبلتن البنيه
لو تاخذيها
لو تبقيها عد خديجه
وخديجه تبجي وتتوسل بيه
وضياء يتوسل
وانتي تردبهم
كتلهم اخذوها
وبقيتي عدهم
بيوم اجت عمتي علينا
وجانت فرحانه
سلمت عليها وفوتتها جوه
خير عمه اشوفج فرحانه
كالت عادل شايف واحد من جماعة داوود
وكايله داوود تاسر واني شفته
اخذوه الايرانين
اني ماصدكت الي كالته
صدك عمه تحجين
ايي والله يحلف الولد
كيفت وفرحت وكمت اهلهل
.ضليت انتظر وعايشه ع امل
صارت الحرب من جديد
حرب الخليج
وهم خوف ورعب
ابوي كام يجي يبات يمي بالليل
والقصف كايم علينا
بالف ياعلي خلصت الحرب
بس بوكتها كتلنه الجوع والضيم
انوب حصار
والناس حصره عليها الفلس
حتى خياط ماعاد احد يخيط
قليل قليل كلش
وعلي مريض يرادله علاج
اخوي حسن ماعافني
كال اني موجود لاشيلين هم
عمت عيني عليه
يشيل فلوس ويطيني
وعيشتكم
هيج وهيج وانتي بقيتي يم خالتج
تعرفيني اني امج وتصيحيلي ماما
بس نحبين خديجه اكثر
جنت انقهر وتندمت لان خليتج تتعلقين بيها
بس اكول مراحت بعيد اختي وابن عمي
وبصفي ومدلليها
خليها عدهم احسن
ع الاقل شايلين مصروفج
بسنة ٩٢
جنه نايمين
وكعدت الصبح اجتني امي تلطم وتبجي
هاي يمه خيير
كالت الحزب اخذ ابوج واخوانج
وولد عمج وحتى ضياء رجل
اختج
كتلها يمةةةو
ليش
كالت يكولون منتمين لحزب الدعوه
راحوا الولد يمةةة
والناس التمت الصبح علينه
شعدكم وشيويتوا
وماانعرف شنكل الهم
وللحكاية بقيه ام مصطفى
