رواية نورة الفصل التاسع بقلم ام مصطفى
اني نوره مواليد ١٩٨٥
فتحت عيوني ع الدنيا لكيت عندي اثنين امهات
كل وحده دگول اني امج
خالتي احلام تاخذني يوم يومين يمها
وتگلي اني امج
بس اني اكولها لا انتي خالتي
وامي خديجه
دكلي لا اني امج وخديجه خالتج
ابقى ابجي واكلها مااريدج رجعيني
لامي خديجه
واكطع الاكل
لحد مااروح لامي خديجه يله اسكت
جنت هواي متعلقه بامي خديجه وابوي ضياء،
يحبوني ويدللوني
بالاخص ابوي اموت علي
وين مايروح ياخذني وياه
وكلشي يشتريلي
جنت اروح العب يم بيت عمتي
بيت ابو فاظل عدهم ولد وبنات
بس الولد شباب كبار
عمتي هي اخت ابوي ضياء
جانو قريبين علينا بنفس الدربونه
احنه جنه كولنه گرايب بنفس الدربونه
بحيث جانو يسموها
دربونة الساده
بيت جدي اهل ابوي بيها
وخالتي احلام بيها
وبيت خوالي بيها
وبيت عمتي هم بيها
كولنه كرايب
من جنت اروح العب وياهم
جان فاضل يجمعنا بغرفة
ويبقى يحجينه قصص الانبياء
وقصص الائمه
وعن الجنه والنار والحلال والحرام
كلش حبيت فاظل
وكمت يوميه اروح يمهم
واكله احجيلي قصه عفيه
جان كلش متديين
صلاة وصوم هو واخوه كاظم
جانو شباب بذاك الوكت
والبقيه صغار اكبر مني وبكدي واصغر
مني
فديوم جان عمري ست سنوات
كعدت ع بجي امي خديجه
وهي تلطم وتصرخ
راح ضياء
-ماما شكو
-راح ابوج اخذوه الامن
بيش طالبيه
رجال شعرفه بحزب الدعوه
شو عماله وينه وين الحزب
يربي الطف بحاله
شلون بيه وين اروح ووين اولي
-يعني شنو اخذوه الامن شيسوله
-يسجنوه ماما
اندكت الباب
كامت امي تفتحه بخوف ياهو الي اجانه
يربي دخيلك
صاحت من وره الباب منووو
-اني امج افتحي الباب
فتحت الباب
ودخلت بيبي وسدته ع السريع
ويحجن ع كيف
لحد مادخلت للغرفه وقفلتها
وكعدت امي تبجي
-يمة اخذوا ضياء البارحه الامن شلون بيه
وسمعتهم دخلوا ع بيت حماتي ام فاظل
يمكن اخذوا الولد
واخاف اطلع اروح اشوف شصار
الامن تارس الدربونه
-خيبه خديجه حتى ابوج واخوانج خذوهم
-شنوو اخذووا ابوي
-اي والله
كامن يبجن واني ابجي وياهن
اكثر شي ع ابوي ضياء
وفاضل
احبه هواي فاضل جان يسولفلي قصص
ويحبني
اسمع امي دكل لابيي
-ليش عود اخذهم لازم اكو شي
-غير فاضل وكاظم
منتمين لحزب الدعوة جانوا
ويرحون ويرجعون للنجف
يدرسون يم السيد الصدر
والصدر عدموه هو واخته
ومن صارت الانتفاظه الشعبانيه
كامو شكو واحد جان بحزب الدعوه
ياخذوه هو وكريبه كلهم
انوب احنه ساده
بلياها العين علينا
مو عاد عدنه اثنين منتمين لهالحزب
-اووف ولا مبين عليهم
ضلن يسولفن
اكو حجي ماافتهمله بس
هواي مقهوره اريد ابوي
للعصر اجت خالتي احلام
-تدگ وتلطم ع جدي وخوالي
-شلون هسه وين نروح ووين نسئل
-خيه لا حول لا قوه ننتظر رحمة الله
ونشوف شراح يصير
-لج هسه واني جايه
يسئلني الجوارين صدك لكو صواريخ ابيت ابو فاضل
وصدك اخذوا ولدكم كلهم
طلعتوا تبعيه لايران
كتلها
من ساعة السوده ع ايران وع الجابها
واحنه شجابنه ع ايران هالجلبه بت الجلب وين نعرفها ونتبعها
حتى بالحلم مشايفيها
وصواريخ منيلنه
كافي خافن الله
كافي اطلعن دعايات
جان اكو حزبي، واكف
كلي روحي لبيتج وبله لغوه
-ولج خفت منه خزرني،
واجيت اركض،
-يااا شجاج وهيج كلتي،
-خايبه حركن كلبي، عرف ولف وي ايران احنه شو هجمت ابيوتنه احنا
وانوب يكولن ايرانين انتم
-فدوه احلام اسكتي لا ياخذونه
مو تعرفين هذول مايعرفون مره وجهال
مو خذوا بيت... كلهم همه ونسوانهم
استري علينا خيه
خلي الناس شتحجي ماتحجي مالنه علاقه بيهم
الله يدري لو مايدري
-هسه شلون شنسوي
-خيه نكعد ونسكت وونتظر رحمة الله
جاشنسوي
حكم القوي ع الضعيف
وانتي ارجعي لبيتج
-اكلج خلي نوره تجي يمي اخاف عليها
خاف انوب صدك يجون ياخذونجن
-يااا شجاج خيه بيش مفاولتنه
-اعذربني بس والله خايفه كلش،
خلي اروح واي شي تردين
دزي نوره علي
-الله وياج
راحت خالتي احلام
وامي خديجه سوت غده الي
-نوره يمه كومي اكلي،
-مااريد اريد ابوي
-هسه يجي ابوج بس انتي اكلي
تره يزعل منج اذا مااكلتي
-شلون اكل وهو مسجون يجوز هو هسه جوعان
حضنتني امي وضلت تبجي يمه فدوه للحنينه ع ابوها ام عقل الجبير
-اكلي لا تشلعين كلبي،
ابوج وخوالج الهم الله ماينساهم
اسبوع كامل امي تون وتبجي
ولا خبر ولا احد يعرف وين ودوهم
حتى عمامي اثنين اخوان ابوي ضياء هم ردوا اهذوهم
وره عشرة ايام
جنا نايمين بالليل
واندگ الباب
طفرت قبل امي
-ماما منو هذا
-لا تخافين يمه هسه اشوف
-ماما اخاف
-ابقي، بمكانج هسه اجي
فتحت باب الغرفه وهي ترجف خوف
وتصلي ع محمد وال محمد
صاحت
-منووووو
-افتحي الباب خديجه اني ضياء
سمعت صوت ابوي طفرت
امي ركضت فتحت الباب
وحضنت ابوي تبوس بيه
-ضياء طلعت مااصدك
حمد الله على السلامه
شصارلك شيوولك
وين ودوك
سد حلگها ابوي بايده
واشرلها
-اشششششش
قفل باب الشارع وفات
لباب الغرفة
هم قفله
شافني وشالني وحضني يبوس بيه
ولج بنيتي نوره فدوه رحتلج بويه اشتاقيتلج
كعد ع حيله جان شكله تعبان كلش
كال
-خديجه حضريلي الحمام خلي اسبح
-بس كلي شصار ابوي اخواني طلعوا
ايي كلهم طلعوا
بس فاضل وكاظم ماطلعوا
ضربت ع وجها امي صخام ليش،
-اعترفوا همه منضمين لحزب الدعوه
وبقوهم
واحنه شبعوانه كتل وصوندات وكهربونه
جان يحجي ع كيف ومنصي صوته كلش
رغم احنه بالغرفه
كالها موتونه
انواع التعذيب شفنه
رفع قميصة
طلع جسمه مشوه
صرخت امي
هو طفر سد حلگها
ولج اسكتي واستري علينا
موزين طلعنا احمدي الله واشكريه
اصلا احنه محظوظين
والله رحم بحالنه
تعذيب ولا اعدام
اسكتي مااريد تفتحين حلگج ابد
حتى وي نفسج لا تسولفين هاي السالفه
استري علينا
واني من باجر ماابقى هنا اشيل
اشوفلي غير بيت
اروح لبغداد احسلي
-يا وين نروح
لا عيني مااطلع من الحله اهنا اهلنا واعمامنه عرفه ولفه وي بغداد...
امي مقبلت نشيل
ابد
وبقينا ابيتنا
بيت عمي اخوان ضياء بصفنا
لان هو جان بيت جبير وابوب قسمه واخذ حصته
بقوا ذولاك عمامي بيه
وبصفنا من الجهة الثانيه بيت ابو فاضل
بيت عمتي اخت ابوي ضياء
خطيه عمتي تنوح وتبجي ليل نهار ع ولدها
همه الاكبار جانوا
وحيل تحبهم
جنت اروح العب وي بناتها مروه ومريم
اشوفها تطلع صورهم وتبجي...
جنت بوكتها صف اول ابتدائي
بيوم راجعت من المدرسه
لكيت امي تبجي
كتلها شبيج محجت
-ماكو شي يمه
التهي بدروسج
طب ابوي هم مقهور كلش،
سوت غده
وموه تاكل وتبجي
وابوي اكلها كافي الله يرحمهم
اسكتي لا تفضحينه
خلصنا كالت فوتي اقري
دخلت بس حسيت اكو شي
بقيت اتسنط عليهم
دكله
-يعني شباب بعمر الورد ينعدمون هيج
الله يساعد امهم
شلون تحملت خبر موتهم
فاضل وكاظم زينة شباب العشيره
يمه يا ضليمتهم وسفه ع شابهبهم
-اسكتي كافي انتي اله تجيبيلي سالفه يله ترتاحين
كافي لخاطر الحسين
الف مره كتلج لا تحجين بهيج مواضيع
لاتسمع الطفله وتحجي يم احد وتروح ركبنا...
افتهمت بوكتها انو فاضل وكاظم انعدموا
وانقهرت على فاضل اذكرت
شلون يحجيلنه القصص
ومره حجالي قصة الامام الحسين
يعني هسه هو هم انقتل مثل الامام الحسين
طلعت ابجي وكلت لامي وابوي
يعني فاضل انقتل
مثل الامام الحسين قتلوه الكفار
ابوي انصدم وفتح عيونه علي
وامي ركضت سدت حلگي
