رواية دموع خرساء الفصل التاسع 9 بقلم ورود الخالدي

ماجد:::

ضليت بره شويه بس اريد روحي تهود واشتم الهوه كلش انمردت من حجي امها..اوف غادة....اوف حكج تكطعين الحجي حكه حسج يروح منج السده عليج مو قليل هذا الابو التحسبه كل بت سند الها وحايط تنتجي علي وحامي لعرضها هذا الابو المفروض يمسح دمعة بنيته..والمفروض يصيرلها عزوة وجاه هيج تهون عليه هيج تدنه نفسه على فرخة جاهله..طالعة من ظهره..شلون ما ادري شلون كلما اصفن روحي اهيسها تريد تطلع من خشمي..ولج غادة كل هذا سده عليج يبعد جبدي هسه افتهمت ..شرادت تكلي بليلة العرس..وحته من كتبتلي نشدتها تكلي روح انشد امي اثاري امها ضامه الماينحجي وما ينكال..

اخذتلي نص ساعة كاعد بره هيج اتصفن ع الرايح وع الراد واهيس انه غلطت من..تدنيت عليها وخذتها جان لازم اتاني شويه حتى افتهم شني قضيتها واعرف شلون اتصرف وياها..بس بعد الصار صار وكعدتني هنا وانه الوم بروحي ما منها فايده فتت جوه كعدت بس ماحجيت بعد ويه امها..ما اريد اسمع بعد جلمة..وضليت ساكت اجت كعدت يمي..

خاله ماجد تره بنتي مالها ذنب بالسوا ابوها.

طفرت روحي كتلها..

سكتي..سكتي وسدي حلكج مني كالج انه محملها ذنب...هالمسكينه مني كالج انه راح الوم عليها..اللوم والذنب من بعد ابوها النذل عليج..انتي هم..ليش ما اخذتيها لطبيبة لطبيب يداويها ويرد حسها من جديد ليش ساكته عنها ابوها العار صارله سنتين من فطس..ليش ساكته عنها كل هالوكت وتشيعين عليها بتي خرسه حتى انه من..اجيت وخطبت ماسولفتيلي مافكرتي بيها..ماكلتي بتي بيا حال وازوجها..ليش ما حجيتلي الصدك..

خاله..اني وضعي ووضع بناتي صعب..من اجيتو خطبتو مني اني كيفت وكلت الحمد لله راح تصير البتي ولاخواتها سند وخفت اذا اسولفلك تبطل منها..

شكالولج عني ناقص لو ماعندي مروه

لا حشاك..بس كلت خاف من اسولفلك تلعب نفسك منها لو متصدك هي بعدها بنيه لو كلشي يجي ابالك وتبطل..

انه تلعب روحي من غادة وهيه مالها ذنب ..انه تلعب روحي منها وانه احبنها اكثر حتى من روحي..

شمدريني انت تحبها ومتمسك بيها خاله كلت هذا شاب ابن عرب ومراح يتقبل ياخذ بنيه متعرضة لتحرش..

ليش شبي ابن العرب شبي ابن الريف ..شني..محسوب من الهمج ؟؟صح انه صرت وتصورت بالعرب بس انه دارس وتعبان على روحي مو جايج من وره الهوش وما اعرف اوزن الامور...

خاله هسه اللوم شيفيد

صدك بعد مايفيد.

انه روحي شايغه من سدري وبراسي الف حسبه بس اريدها تفك عيونها بس اريدها تكعد شفت وحده فاتت يم الدكتورة والدكتوره طلعت تركض وياهن ..رحت وراها..بعدني ماحجيت ..كالت:

هسه تجي الطبيبه البديلة عندي حاله ولادة ابقو منتظرين بره الى ان ترجع المريضة لوعيها..

ضليت كاعد والنار بكلبي يمكن ساعة ونص بعدين.امها فاتت جوه وردت عليه..

ماجد..خاله..غادة كعدت ..

صدك..صدك كعدت..

اي والله..وحجت وياي..

صدك حجت صدك سمعتي حسها..

ركضت وامها وراي بس فتت وشافتني كامت تصرخ..

ماما..ماما تعالي ماما ..

امها اجت تركض حضنتها هي خلت راسها بحضن امها واسمعها تكلها..

ماما...احميني منه..ماما يريد يعتدي عليه..

صح فرحت جا سمعتها تحجي بس ..روحي طلعت من اسمعها تكل امها احميني منه خطية خايفه مني ..مدري شبيها حسبالك ماتعرفني..

امها كالت:

اسم الله ماما هذا ماجد رجلج..شنو يعتدي عليج هو يحبك ميأذيج لتخافين منه

لا..لا ماما..يريد يعتدي عليه..

امها عضتلي شفتها انه طلعت..استغفر الله ..استغفر مدري شبيها جنها مو بوعيها جنها ماتعرفني..شلون ترجف بحضن امها  ..كعدت بره كلت ما افوت خلها تهود وترتاح..

وتانيت الدكتوره منا لما اجت..حاجيتها:

دكتوره مرتي كعدت بس جنها ماتعرفني..تخاف مني مدري شبيها:

وليش دخلتو عليها اني كلت تنتظرون بره شي طبيعي تخاف منك كتلك عدها انهيار عصبي تحتاج ع الاقل ٨ ساعات حتى ترجع للواقع...حاليا هي مو بوعيها تمام ولازم تاخذ ابره ثانيه مهدئه ممنوع تدخل يمها منا لباجر الصبح..لمصلحتها..والافضل تروح حاليا للبيت وتبقه يمها بس امها..

دكتوره معناتها الصبح من اجي تعرفني؟؟

حسب درجة تحسنها حاليا وجودك ما اله داعي بالعكس يضرها مينفعها؟؟

اي..دكتوره اروح بس ديري بالج عليها..الف رحمه على والديج..

لتقلق روح وان شاء الله تتحسن للصبح..وباجر تجي ..حتى اوجهك على طبيعة علاجها والتعامل وياها لان حالتها مو اختصاصي..اني طبيبة نسائية احتمال احولك على طبيبة نفسيه؟؟

دكتوره ..هي عدها طبيبه ابغداد اسمها..دكتورة خولة سعيد الدكتور ابغداد حولني عليها..

زين لعد من تطلع منا لازم تراجع دكتورتها..

صار..اخذها من عين باجر..

رديت للحوش امي تلكتني 

ها يمه وين جنت شو مرتك ماهي بس امها اجت وجابت البنات ..وبساع طلعت تتراكض

بعدني ماحاجي ابوي فات..توه جاي من بره..

حرت شكللهم قابل اسولفلهم الصدك..ما اكدر اكول اي جلمة من الصدك..قابل اكلهم اليوم ياله اخذت مرتي وهاي وهاي سالفتها هسه هم يصير قال وقلت وره غادة وانه ما اتحمل جلمة..لا والله حرف واحد ما اتحمل على غادة ضليت صافن افكر بعدين كلت ماكو غيرها..اضرب عصفورين بحجر شافتني امي صافن كالت:

يمه شبيك صفنت مرتك وين شو امها جابت بناتها خلتهن يمنه فوك..واخذت الجناسي والعقد ومشت شنهي شصاير وياك انت ومرتك؟؟؟

شصاير يايمه شصاير مرتي تريد تموت ..طاحت بين اديه من القهر والدكتورة تكول بيها انهيار عصبي 

شني هيار..عصبي؟؟

يعني مثل ..الصدمة يمه؟؟

صدمه شني ياستار..خاف انداست جا بعدها عروس؟؟

يمه انداست شني كله من وره بت اخوج..

ياهي مرت حامد..!!

لا مو مرت حامد؟؟

جا ياهي..خالدة؟؟

اي خالدة.. خالدة يمه؟؟

ابوي مايريد  مرت حامد لو حامد يسمعون؟؟

كصر حسك بويه امشنه نكعد بالديوانية ونسولف هناك.

ومشينا ..فتنا للديوانية ابوي سد الباب وكعد..

تعال ولك سولفلي شنهي الصاير..

بويه ..غاده جانت تسبح..واجت الغرفه على غفله لكت..خالدة بغرفتي وشافتني كاض ايدها..!!

لا ياخسيس يانذل 

راد يطكني كتله 

بويه اصبر خلني اكمل..نزل ايده..

شتكمل ولك..بعد هذا الدهر الاسود شتكول؟؟

بويه هي هم هيج افتهمت حسبالها انه عندي شي ويه مرت اخوي وكاض ايدها!!

وانت ليش كاض ايدها شني ماتندل وتريد ادليها الدرب؟؟

لا بويه..خلني افهمك تتذكر من كتلي اخذ مرت اخوك وانه كتلك مالي نفس يمها وانه يبويه صدك مالي نفس يمها..

جا شنهي....شحده مابده..

بويه ..اكلك الصدك البت باليتني بلوه اخذني ما اخذني واصيرلك خدامه اخذني حتى لو فوك مرتك ..اخدمك واخدم بتك..وانه ما اريدها وروح راشد مالي نفس يمها مثل اختي امل بس هي ماتقنع....شافت مرتي خذت هدومها ومشت تسبح فاتت عليه للغرفة وتتوسل بيه احبنك واخذني..انه عود كضيت ايدها اريد اطردتها ..بساع فاتت غاده..ماافتهمت الصدك حسبالها عندي شي..ماعت روحها ردت اكعدها ماكو ماتكعد ذبيت عليها ماي ماكو لاحس ولا نفس..ركضت بيها للمستشفى ..الدكتوره..تكلي بيها انهيار عصبي يعني صدمة هسه هيه حتى ماتعرفني..

بويه لاتسودني..خالدة مرت راشد هيج تسوي..

اي بويه غير انه ما اريد اصيت عليها واكول خلي الحجي مساترة عيب مرت اخوي وبت خالي شلون افضحها. 

امي كامت تخرط بخدودها..

ياااااع..هيج خالدة ...كاتله روحها..على ريحة الزلم ونست راشد..يااااااااع..ولك صدك تحجي؟؟

اي والله يمه ماجنها..جانت ماخذه ذاك البطل تركض وراي صارلها ثلث سنين..

اليوم انعل والديها ماتضل عندي وماتفوت لبيتي من الصبح اوديلها غراضها..وراها..واشهرها شهيره وعلي..

يمه شني تشهرينها تره عيب جا انه ليش ساكت تره هي هم بت اخوج وتلحكج فضيحتها خصم الحجي نوديلها غراضها وتكعدين وياها تسولفين مره لمرة وتكليلها بعد لاتوصل ..وخلها تشوف نصيبها بغير مجان  

ابوي التفت علي امي..

هسه احنا بحال..زربه بت اخوج لو بحال بت العالم..البلمستشفي!!

بوويه باجر اخذها..لبغداد...اردها لدكتورتها هلبت تصير زينه..

اي بويه ناخذها انه وانته!!

لابويه شيوديك امها تمشي وياي..

خوش..

عفتهم بالديوانيه ومشيت الغرفتي..كاعد وافكر شني باجر تصير زينه وتعرفني وتذكرت ..حسها من تحجي ويه امها..اووف..حسها..هيج لزك باذني كل شويه اسمعه حسبالك..شي وينعاد براسي....لا تغديت ولا تعشيت..نص الليل فزيت معدتي تكطعت من الجوع رحت للثلاجة..اكلتلي  تفاحة ملخت روحي بالزايد مدري شلون غمضت عيني وصار الصبح كبل ما افوت خابرت امها

ام غاده انه بره شلونها غاده

زينه بعد خالتك بس الدكتورة كتبلها البارحة علاج وكالت..لازم تراجعون بيها..

هسه..اروح للدكتوره..الفحصتها امس!!

مموجودة اليوم يمكن مداوم بس الاثنين والثلاثاء اليوم مجازة..

جاشلون تضلن هنا!!

لا مو هيه كالت اخذي العلاج وطلعيها باجر...لان اجتها ٣,.مرات بالليل..حتى وجه الصبح هم شافتها كالت تحسنت تكدرين اطلعيها بس لازم تراجعون طبيبتها الاخصائية..

يعني اجي اخذجن وياي..مو خاف اجي وتشوفني وهم تضل تفرفح مثل امس؟؟

لا خاله تعال هيه هادئه البارحة جانت مو بوعيها..وترجف خطيه هسه الحمد لله..احسن..بس انت ها..يعني مو..تضغط عليها منا لما تاخذها تراجع بيها..

اي..صار انه جاي..

امشي بالممرات احس روحي ارتاحت من كالت صارت احسن فتت لكيتها كاعدة ساكته شافتني ادنت يم امها ..هم بعدها خايفة مني بس تعرفني..اهيس عيونها تعرفني انه هم كعدت كبالها..

ها..يبعد روحي شلونج اليوم..

هي باوعت على امها..اول مره تحاجيني..

اني..اني زينه..بس انت روح منا!!

هههه..فديت هالحس الحلو ..ليش اروح منا ..ماترديني يمج..هسه نمشي الغرفتنا وهناك اراضيج اذا زعلانه مني..

ادنت على امها اكثر..

هاااا..لا..لا..اني ما اروح وياك..اروح ويه..امي..

ضحكت بوجهها..متونس على حسها الحلو كتلها؛

اي ضلي يم امج يبعد روحي ..وين ماتردين تضلين ضلي..بس خلنا نطلع من المستشفى ما احبها المستشفى خنكة..مو بله؟؟

هااا..اي..اي..خنكة!!

وكامت امها.:

يله لعد كومي ماماتي خلي نروح هناك للبيت تمددي وارتاحي على جربايتي..

ادنيت مديت الها ايدي..جفلت ولزكت بامها ماتريدني اجيسها..واسمعها تكل لامها..

ماما كوليله خلي يوخر اني..امشي وياج؟؟

امه عضتلي شفتها عود هي تمشي ماتريدك تدنه يمها وتكضها.

وطلعنا من المستشفي هنه كعدن بالوره وانه طول الدرب عيني عليها حسبالك اول مره اشوفها...هاي الدنيا كلها مامكفيه فرحة كلبي ..حبيبة كلبي..تحجي مثلنا وحسها..يسلم ع الكلب..صح خاطري مكسور شويه لان خايفة مني وما اكدر اكضها بيدي بس..مايهم كله يهون من سمعت حسها..وهالمرة لازم اطول خلك واصبر..واخذتها للحوش الكاعدة بيه امها وخواتها..شفت امها كعدتها ع الجربايه انه واكف عيني عليها ما اكدر اطلع..من يمها امها كالت:

خاله روح جيب البنات من البارحة بايتات يمكم واكيد مانامن للصبح...

اي هسه اجيبهن..بس ديري بالج عليها..بروح الحسين..

روح خاله لتفكر..

..بس طلعت ابوي خابرني؛

الو..هابويه..

بويه صبيح اجه..جايبلك المواطير الجدد ومتانيك بالديوانيه..انت بالمستشفي مو؟؟..امك راح تجي للمستشفي هي ومرت حامد يشوفن مريتك

..وذني البنات خطيه هم راح يجن يردن امهن

بويه لاتخليهن يطلعن احنا طلعنا وهسه بحوش ام غاده وانه جاي لاتخلي امي والبنات يطلعن انه هسه جاي للحوش..

خوش..شلونها مريتك؟؟

احسن شويه بس باجر اغبش بيها لبغداد

خوش

ورحت جبت البنات ورديتهن لامهن امهن كالت:

خاله خلي..اسويلك لكمه حلكك يابس..مبين مماكل شي؟؟

لا انه رايح اجيب غده وياي ونتغده كل احنا..

لا خاله اني اكول لو انت شويه تبتعد منا لباجر حتى اكعد واسولف ويه بتي اريد شويه وقت حتى اكدر اخليها متخاف منك 

صار انه رايح الصبح اجي اخذجن وياي واخلي البنيات يم امي. 

الله وياك خاله..

ثاني يوم الصبح غبشت بيهن لبغداد ورحت على دكتورتها..فاتت هي وامها للدكتوره..تعطلن جوه يم الدكتورةوره ساعه يالله طلعن ام غادة كالت الدكتورة تريد تحجي وياك

فتت يم الدكتوره وحدي 

السلام عليكم دكتوره..

الدكتورة وجهها يضحك..

وعليكم السلام اخ ماجد والف مبروك صوت زوجتك رجع بوقت قياسي والحمد لله؟؟

دكتوره بس هي ..بعدها مو تمام حتى تخاف مني..

اخ ماجد اني طلبت اكعد وياك ونحجي على انفراد تام..واريدك تحجيلي كولشي صار بينك وبين زوجتك من طلعت مني يمي لحد هاللحظة وابدا ما اريدك لاتخجل ولاتتحفظ ولا تستحي اني طبيبتها النفسيه واريد اعرف كل التفاصيل الزغيرة قبل الجبيرة حتى اكدر اساعدك وارجع زوجتك انسانه طبيعيه وتعيشون حياة زوجية متكامله..

صار..دكتوره..

وبديت احجيلها كل الصار..وهي تسمع وتكتب..ومن خلصت حجي كتلها دكتورة..

انه ادري بروحي من اخذتها كوه غلطت وتسرعت بس ماجنت ادري شبيها مابيها...حسبالي تخاف من الزواج ومن اخذها ..تصير مرتي عادي وكلشي يكعد بمجانه ما ادري هيج يصير بيها؟؟

لا..لا..ابدا...لتلوم ...نفسك اخ ماجد بالعكس انت ابدا مغلطان..يمكن انت حاس اكو قسوة من جانبك بطبيعة العلاقة الزوجية  الاولى بس يمكن مراح تصدك اذا كتلك بالنسبة لحالة زوجتك..الي سويته هو المطلوب لان زوجتك ..متعرضة الى حالة تحرش..عنيفة ..ومقاومة منها..وحاله صدمة شديدة على اثرها ...فقدت النطق ومكان ممكن..نكدر نرجع النطق الا بصدمة مباغته مشابهة وعنيفة ايضا...فأنت بدون متقصد ساهمت ...بشكل كبير جدا..في..تحسنها ورجوع النطق الها بشكل سريع جدا..

دكتوره يعني انت تشوفين انه ماغلطان؟؟

ابدا...مغلطان...وملازم تلوم نفسك بالعكس لازم تكون متفائل جدا بالنتيجة الي وصلنالها..يعني رجوع النطق لزوجتك معناه..احنا قطعنا نسبه٧٥بالمية من العلاج بشكل سريع ..

دكتوره يعني اكو امل جبير مرتي تصير طبيعيه وبعد ماتخاف مني..

ههههه..مو بس امل..انطيك نتيجة مؤكدة...خلال ٥...او ٦جلسات من العلاج....يمي..

الله..يبشرج بالخير..دكتوره

طلعتلي كارت..بيه ارقام تليفونات وكالت 

هذه ارقامي..لازم نكون على تواصل بعد كل جلسه اليوم خلصت اول جلسه..طبعا كتبت بعض..المهدئات تصرفوهن من الصيدليه..وخلال الاربع ايام القادمة ما اريدك تحتك بيها او تتواجد هوايه يمها والافضل تبقى يم اهلها..وبعد الجلسه القادمة انطيك تعليمات جديدة..

مشكورة دكتورة