رواية قاتلة ابي الفصل العاشر بقلم بنت الشيخ ترابية
اغسل مواعين ويجي على بالي...
ارسم ويجي على بالي...
اطبخ ويجي على بالي...
اكعد وحدي ويجي على بالي...
دومه على بالي...
ماهر: يمعوده البصل احترك
: يبوووو على الثول الي عندي هستوني خليته شبسرعه
ماهر: عيني ياهستوج صارلج ربع ساعه من خليتي
..
شبيج هند؟
هنادي: مابيه حبيبي سلامتك بس صيح اسراء تجي يمي..
ليش دافكر بيه ؟!
مو لازززم مو لاززززم رجال حب يسااااعدنا وبس
نقذنا وبسس مالازم افكر بهيج طريقة
مستحيل مسسستحيل
رحت غسلت وجهي بماي بارد
: صحصحي هند صحصحي .. الوقت الي انتي بيه مو مال حب هند صحصحي...
امسح الكنتور ودخل عليه وسد الباب
ماهر: شدسوين؟
اسراء: امسح الاخشاب.. شنو شبيك تفضل احجي
اجه يمي وشابك اصابع ايده بين اصابع ايدي وسحبني اله ايد لازم ايدي وايد ع خصري
دنڪ على ركبتي وهمس بصوت هاااادئ
: هل الترافه شلعت روحي من روحي
اسراء: ههههههههههه وانت عليش هلكد ولهان
: لعبتي بحالي لعب
اسراء: هممممم هجي؟
: عتيتي روحي عت اسراري ...
زين خلي انزل والله هند تضوج وحدها...
ماهر: بس شويه ابقي يمي دقايق بس..
باسني بخفـه من ركبتي ومن خدي ومن باطن ايدي
عيونه بالڪوه يفتحهم بسرعه دفعته على ڪيف
كااافي ولك غسل وانزل نازله انا يلا...
نزلت ارڪض ... شافتني هنادي
: الله الله لا توكعين نوب بيمن احير
اسراء: اييييييه ايي هااا؟
: على كيفج شبيج شربي ماي .. اسم الله
نزل ماهر يفرك بعينه وبالكوه ينزل الدرج ويباوع لاسراء وهاي خاتله وراي
العقل من الله.. العقل منين
ماهر: من الله
الله يهديكم.. كاعدين بنص الموت محل عشك هسه ولك فويسد
ماهر:چا شسوي دشوفيها شلابسه
هنادي: شلابسه ولج
اسراء: دروح شلابسه يعني هل كدامج هند وشوفي
واحنا نبقى هيج؟ شوفي هند وجيبي هند وخلي هند تعاي كملي الاكل وياي وانت روح لخالتي ام اسراء جيبها وتعال يلا خلصني
ماهر: اعصابج.. ليش بس امها على ما اعتقد خالتها وياهم كاعده
اسراء: خالتي و ولدها طلعو مدري وين والله وامي بقت وحدها جيبها وتعال
راح ماهر يجيب خاله ام اسراء وانا واسراء نسوي الغدى
يمكن اربع مرات ثرمت بصل ورجعت حمسته بالي مو يمي .. ومرتين جرحت اصبعي بالسجين .. ابد بالي مو يمي
اسراء: شوكت نخلص من الارهاب ويرجع العراق
هنادي: نخلص بنسبة قليلة نكدر نتخلص من عددهم هذا بس يبقون قليلين وماعتقد العراق راح يرتاح
اسراء: وليش؟
هنادي: من قامت الساعة العراق بلش بالحروب مالته وغير عن الاستاذ صدام الله يرحمه جان لازم العراق وهم بوقته حرب وقتل واعدام وجرائم ونفس الشي
فـ العراق مايرتاح ولا راح يرتاح بس اذا راد الله يتغير بوقتها يتغير
اسراء: واحنا البنات ليش علينا السمعه اكثر من الولد
هنادي:ماخذين فكره عن البنيه هي عباره عن ورقه بيضه اذا تبللت او تلونت بلون ثاني تعتبر غير شريفه ويذبحوها.. كل الحريه للولد والتقيد للبنات عداله ماكو واذا صار العراق فوق القمة فـ نبقى احنا البنات مقيدين وبأذن الله اذا تزوجت وصار عندي بنات انطيهم الحريه الي احنا فاقديها بحياتنا
اسراء: يجي يوم ونتخلص من الارهاب هنادي؟
هنادي: ربج فوكانا.. ونخلص منهم وبوقت قريب جدا
كله هذا امتحان صبر من سبحانه .. لا الارهاب وجودهم عبث ولا انقاذنا عبث ولا حظنا عبث.. والدليل كلما يحاولون يتقربون من عندنا نخلص منهم بطريقة ميكدرون يلزمون جتفنا بعد.. الامتحان صعب بس جاي ننجح بيه... اخذت اللحم واريد اخلي بالطاوه كالت اسراء
اسراء: ايهم ماقصر ويانا بس راح نشتاقله صدكي لانو باجر يسافر وبأعتبار تهجير ومن الصعب نشوفه بعد
فلت اللحم كله بالطاوه وطفر الزيت على اصابعي وبسرعه خليتها جوه الماي.. كش الجلد مالتي وصارت تحركني واسراء تنفخ عليها وتحير شتسوي وماهر بعده ما اجه وانا صافنه بكلامها.. معقوله مانشوفه بعد؟
معقوله ميجي بعد؟ زين وين سافر هو؟
وليش هلكد مهتمه اله؟ وينه هو؟ اخباره احواله؟
لهل الدرجه غيابه صعب علينا
راح نفتقده.. راح يشتاق النا؟!
اسراء: يمعووووده ايدددج شبييييج... ياااربي وينك ممماهر عزززه بعينج اسراء صخام بوجهج باع ايدها ياربي لا دهن لا علاج ولا دكتور هسه والارهاب محوطين الشارع شلون هسه شسوي ياربي
انداريت عليها دمعتي جامده ماتنزل
: شبيج عيونج مغرغره دموع هند بالج يمي؟ جاي تحسين بوجع؟ سوده عليه ياروووحي
وينننك مااااهر تأخر تأخرررر
بقت تنفخ وتهفي عليها حتى تبرد بس ماخلت ماي بعد دخل ماهر هو وام اسراء
اسراء: مااااااهر تعااااال بسرعه
اجه يركض: هاااا شكو شبيهااا
شاف ايدي وبسرعه رفع عينه عليه ورگض للثلاجة طلع معجون الطعام وخله شويه عليها
راح تحركج بس لازم..
حركتني وانا مو يم الالم ولا بالي يم الالم... مادري شجان بيه وشجنت احس بوقتها لدرجه لا آبالي
ام اسراء: ياعمري سوده عليه يايمه شو تعالي يمي تعالي
رحت يمها وكعدت بصفها خلت راسي على حضنها وبقت تمسد على شعري وتقره ايات بحيث عيوني ثگلن وماحسيت على روحي ....
اسراء: نامت؟
: اي نامت اكيد توجعها سوده بوجهي
اسراء: مو طبيعية اليوم حتى البصل اكثر من مره احترك ورجعت سوت
: تعبت نفسيتها كاعده بنص الارهاب شترديها مثلا تركص لو تهلهل دشوف البنات يموتن كدامها وتشوفهم شلون يعتدون عليهن وتشوف الناس شلون تنقتل طبيعي كل هذا امي ليش نسيتي الي مريتي بيه انتي لو لا؟
اسراء: نفيت كلام امي.. لا مو من الارهاب محد يعلمني بتفكيرها وبيها انا اعرفها كلش زين
ماهر: شتعرفين؟
اسراء: هيج ولا شي.. بقى يباوع عليه بشك وامي تمسد على شعرها وتقره عليها... كملت الغدى انا وجهزت كلشي ورتبت الصينية وشالها ماهر وامي كعدت هنادي
تاكل لكمه وتصفن بالكاع تشرب شويه ماي وتصفن
نحجي احنا بالها مو يمنا نضحك نسولف
نحجي وياها وهي حتى ماتباوع علينا
بعالم ثاني
: يمه هنادي حـَبيَبه اكلي يبعد امج
صافنه بالكاع هنادي
ندست رجلها: هنادي امي
حست عليه شويه واندارت لامي
هنادي: هلا خاله
: اكلي يبعد اهلي اكلي ردي رويحتج
هزت راسها وتاكل شويه شويه.. ماهر يباوع الها ونظراته احسها تشكي الي بداخله وكأنو مامطمن وحاس بيها شي وانا من صفناتها شكيت بيها وتأكدت ولازم بعد منخلص احجي وياها...
خلصنا الاكل وغسلتهم وسويت جاي لماهر وامي هنادي صعدت فوك لغرفتها وصعدت وراها انا وسديت الباب
هنادي..
هنادي: اريد انام اسراء .. كولي
اسراء: ماكو نوم عندي موضوع مهم
هنادي: تعاي.. احجيلي
اسراء: صفناتج هاي على شنو؟
صفنت بعيني شويه ودنكت راسها وكالت: نفسيتي تعبت من الارهاب
اسراء: مو عليه هنادي كلنا نفسيتنا تعبانه بس انتي لا
هنادي: شقصدج؟
اسراء: تحبيه؟
هنادي: منو شبيج اسراء
اسراء: تحبييييه جاوبي؟
هنادي: ومنو عاد
اسراء: ايهم
رفعت عينها بسرعه عليه: شمعنى ايهم؟
اسراء: من رجعنا لهنا وانتي بالج مو يمج وحتى من چنا ببيته چنتي مهتمه بيه من بعيد وتراقبي وتنتظري
من يتمرض تكابليه وتكعدين وهذا كله ولا شي يمج الصبح
هنادي: وشسويت الصبح؟
اسراء: من جبت طاريه حركتي ايدج
هنادي: اسراء اريد انام فدوه
لزمت متنها: احجيلي هنادي تحبيه مو؟ ليش مغلسه على الوضع باجر يسافر هنادي
هنادي: وشسويله؟!!!! راح يبقالي!!! مراح يبقى ميحبني لا لا
اسراء: نظراته الج غير شنو جان يكلج
هنادي: بس چيفة ام لسانين غيرها ماكو
اسراء: يحبج صدكي هنادي وداعتج يحبج
هنادي: احلام العصر اسراء خليني انام
اسراء: هنادي باجر يسافر
هنادي: وشسوي؟
اسراء: باجر ساعه 4 الفجر يروح مطار هنادي..
باوعتلي وطلعت سدت الباب وبقيت وحدي بالغرفة
يعني شنو اسوي مثلا
هو حتى ممهتم الي ومعقوله احبه صدك؟ زين ليش ياربي ليش هو بالذات ليش حبيت شخص ممفكر بيه غير انو بنت عاديه وحب يساعدها ورجعها لاهلها وبس
اروح واسلم عليه؟ منو كال يرجع؟
.
اسراء: ناخذ هنادي ونروح نسلم على ايهم باجر الفجر يسافر ترى ومو اكيد يرجع للعراق
ماهر: إن شاء الله
: حسيت بيها تصرفاتها مو طبيعيه
عيونها تحجي كلشي ولازم اجمعهم مع بعض
بإي طريقة كانت .. بس المساعدة الفرصة بس باجر عندي ولازم استغلها..
كعدت ساعة 8 ليل عيوني مورمه وحمر
وجهي حار دخلت للحمام وفتحت الماي البارد حتى اغسل اثناء غسيل وجهي بالماي البارد ينزل حار على وجهي دموعي ماتوكف ليش!!!!!؟
انا بنت مو فارغة للحب ابدا
انا بنت عندي مسؤولية كبيرة عليه
انا بنت يتيمه الاب والام
انا بنت وام لأخي الاصغر ولبيت كامل
انا المسؤوله عن كل املاك ابوي واخوي
انا المسؤوله عن كلشي ممكن يصير ويانا
تعبانه ماكدر والله ماكدر
دموعي ماتوكف ماكدر انزل جوه شسوي..
بقيت انتظر لحد ساعة 12 ليل ودموعي ماكو صعدت يمي اسراء: ساعة 4 نروح لبيت ايهم نسلم عليه جهزي نفسج.. ونزلت
بجيت اكثر وبصوت هل المره .. يعني ماشوفه بعد
نمت....
ندك باب غرفتي وكعدت بسرعة مجنت غافية كلش نومتي خفيفة فتحتها اسراء واكفه: يلا بدلي حنروح
شفت الساعة 3
رحت بدلت ولبست عباية وبوشية ونزلت
ماهر: جاهزات؟
هزينا راسنا واخذنا وطلعنا
يمشي بينا وانا بكل خطوة نمشيها احس روحي تصعد
انا عيني بالكاع وين متروح رجل ماهر امشي وراه
وكف ماهر انا وكفت
دك الباب ثلاث مرات وانفتحت..
طلع هو شعره طولان واللحية حيل طولانه
عيونه بالكوه فاتحهم ومنتجي على الباب ويباوعلنا
ماهر: سلام عليكم اخووي
: وعليكم السلام هلا تفضلو
دخلنا للبيت شفت الجنط بالهول غصيت بشهكه
ماهر: شبيج؟
هزيت راسي بـ لا.. كعدنا وهو جاب ماي وكعد يمنا
ماهر: شلونك اخبارك
: والله على الله الحمدلله
ماهر: سمعنا بيك بعد ساعة تسافر
: بإذن الله
ماهر: والطفلة وين؟
نزل راسه ومسح كصته .. بيوم الي رحتو بيه نسيت اقفل الباب داخلين عليها وذابحيها
هنادي: شنووووو شنو ذابحيها؟؟؟؟ نووور ماتت؟؟؟؟
هز راسه بـ اي
وانا اريد حجه حتى ابجي نوب خرطتها بجيت بجي اضرب من البجي بوفاة ابوي واخوي
: من طيور الجنه الله يرحمها ولو ماصرت الها سند بس يومها هذا..
ماهر: قضاء وقدر مكتوبلها هذا اليوم ... يلا اخوي مانعطلك ردنا نجي نسلم عليك مانعرف اذا ترجع للعراق لو تبقى ومانريد نأخرك ساعة 3 ونص
: كل الهلا نورتو والله ماجان ببالي راح تجون بس صارت
كام ماهر حضنه وراحت اسراء تسلم عليه وباس راسها
ماهر: يلا هنادي سلمي حتى نروح أخرنا الرجال
هزيت راسي بـ اي ورحت يمه اللمعه الي اشوفه بعيني من اشوفه نفسها بعينه
يباوعلي بنظرة عجزت تفسيرها
: توصل بالسلامة إن شاء الله ويهدئ الوضع وترجع ونشوفك
باس راسي... : ان شاء الله انتبهي على نفسج..
هزيت راسي وعفتهم وطلعت بسرعه ماكدرت ابقى ورحت وحدي مشي احس عيوني طلعن من البجي
صعدت لغرفتي ذبيت العباية والبوشية وبقيت ابجي بفراشي للصبح
احلام غريبة
اسماء اغرب
احلامي بعد مادخلو الارهاب للعراق واحتلو تكريت
احلم احلام غريبة
وبالاحلام اسماء غريبة
اشوف اشياء مايستوعبها العقل
الي احلم بيهم مو بشر
عباره عن هياكل وعظام
اسماء غريبة واكثر اسمين يتكررن بالاحلام هي
هامود .. راڤير
سر هل الاسمين ماعرف
وهل الاسماء ماينذكرون بأحلامي الا اذا اكو دم
يعني بحلمي اذا كان في دم ينذكرون
اسماء مو طبيعية ..
كعدت الصبح ونزلت..
سمعت اسراء وماهر يسولفون
اسراء: اليوم نرجع لبيتنا لانو حرام ابقى هنا وانت محرم عليه
ماهر: ان شاء الله
اسراء: ايهم راح؟
ماهر: ساعة 9 الصبح خابرته بالكوه حصلته وكال وصلت
اسراء: امريكا؟
ماهر: تركيا ولج
هنادي: صباح الخير
: صباح النور
ماهر: شلون ترجعين بدون متحجين؟
اسراء: عادي مو طفلة ترى تعبانه سلمت وراحت
ماهر: بس مو تعوفنا وتروح اسراء
هنادي: هسه ليش معصب؟
ماهر: ولا حرررف لا تحجين وياي
وطلع للصالة كعد
اسراء: عوفي عوفي ضايج وخايف عليج
هنادي: ميهمني
اسراء: ميهمج؟ هذا ماهر هنادي
هنادي: تعبت ياناس افهمووو تعبت والله
اسراء: بس
قبل لتكمل: لا تكملين لا بس ولا شي عوفووووني
وصعدت لغرفتي اركض وقفلت الباب
اسراء: صعدت تركض وشفت ماهر عينه منها من سمعنا قفل الباب هو طفر وصعد وراها.. ادري بيه مايتحمل
ماهر: هند افتحي الباب.. هنادي افتحي حبيبتي
هنادي: روووح عوفوووني
ماهر: هنادي فدوه اروحلج افتحي الباب خليني يمج
مو من جنت اقفل الباب جنتي تجيني وتكولين اخذني بحضنك؟ هسه تعاي خلي اخذج بحضني حبابه افتحي
شوي وانفتح القفل ودخل ماهر وسد الباب
ماهر: ليش تحبين تعذبين گلبي بحبج هنادي
هنادي: ماهر انا تعبت حاول تفهم كلشي فوك راسي تعبت حيل
ماهر: انتي امي هند .. يعني تخيلي لو انا بدونج جان هسه وين ميت من الجوع لو ما انتي ماجان ماهر هذا كدامج لو ما انتي ماجان ماهر رجال بهذا الطول
حاولي تفهمين لو ما انتي بيناتنا كلنا هسه
جان هسه احنا جوه التراب او بالشوارع تحت ايد الارهاب افهمي هنادي انتي كلشي بيناتنا
حضنته وبجيت بحضنه
ماهر: عفيه عيون 24س يخرن تخرخر فاتحه تانكي جوه دسدي سدي
: هههههههههه... رحت غسلت وجهي وطلعت لكيته كاعد على الجرباية
ماهر: تعاي ام برموده خلي انيمج
هنادي:ام برموده شنو ولك
ماهر: من جنتي صغيره اذكر ابوي يكول هنادي تلبس برموده مو بجايم تعاي يلا
رحت تمددت وهو بقى يلعب بشعري لحد ما نمت..
وبالحلم نفس الشي
هم انذكرن الاسماء ... هامود .. راڤير
شسالفتهم ماعرف
اكو اشياء من احلم بيها تصير واقع
احلامي تتحقق شي ورى شي
مثل..
بيوم من الايام كعدت الصبح اسمع صوت بنت صغيرة تبجي كمت بسرعه وفتحت البرده وشفت زلم ثنين ملثمين ولازمين بنات ثنين ويضربون بيهن ويزينون شعرهن ويعتدون عليهن واخر شي قتلوهم ...
اول وحده ذبحوها والدم يطفر على كد الشارع
وبقى جسمها يرفس وحده
والثانية طلقة براسها و وكعت من طولها
ونفسه حلمت بيه قبل لا اكعد من النوم..
الفرق بين حلمي والواقع 4 ساعات بس بعد ما اكعد من النوم...
ليش مادري رغم قبل ماجان يصير وياي هجي
ماعرف حاله نفسيه بسبب الي جاي يصير وياي
بسبب الارهاب وبسبب فقدان الاهل وبسبب القتل وبسبب الدم الي اشوفه يوميه
صارت بيه حاله نفسيه لدرجه اذا اسمع صوت الماي تتخربط اوضاعي....
قاتلة ابي
