رواية قاتلة ابي الفصل الحادي عشر بقلم بنت الشيخ ترابية
نتكلم عن الكثير
نتكلم عن احداث كثيرة
نتكلم عن هذا وهذهِ
اما اليوم...
أيهــــــــــم
يتيم الابوين .. انا وَرقة واقعة من شجرة العائلة ..
فقيد لمهنتي .. يتيم الاخوة .. منبوذ العائلة .. كريه الاصدقاء .. مجرم الارهاب .. عميل سري لاحد العُملاء .. حقاني لنفسي .. وحـب لنفسها...
السلام عليكم.. انا الدكتور ايهم ..
يتيم الابوين والاخوة.. امثل نفسي بورقه مگطوعة من شجرة العائلة لا عمام ولا خوال ولا اهل.. والسبب هو موت عائلتي...
بيوم من الايام صار حادث مع عائلتي وانا ماجنت وياهم.. جنت عند بيبيتي لانو مريض
الكل يكرهني على انو انا ولد فگر الهم من يوم الي ولدت بيه لحد ما توفو اهلي مشكلة وره الثانية ويصيحون ايهم..
اتهموني بقتل اهلي .. واخذو الورث كله الهم وطردوني بالشارع .. جان عمري 15 سنه جنت مراهق..
يتيم وحافي القدمين.. جنت اجدي بالتقاطع حتى اكدر اجمع فلوس واعيش نفسي
طردوني من بيتي وخلوني بالشوارع
انام جوه الجسر بنهاية اليوم من يفرغ الشارع وبفصل الشتاء جنت اجدي قماصل وملابس من الناس حتى ادفي نفسي بيهن ....
لحد ما بيوم صار الحق الي ورجع الورث الي والبيت
امتلكت كلشي بعمر الـ 18 سنه
وصارو هم الي يجدون ويجون يدكون بابي واسده بوجههم.. كملت دراستي وطلعت الطب وصرت دكتور معروف بـ تكريت وببغداد بعمر الـ 26..
اخوي جان عسكري وابوي مدير مدرسة وامي ربت بيت وجان عندي خوات صغار طالبات..
اروح وارجع بسيارتي واشوفهم يجدون بالتقاطع انطي فلوس للجهال كدام عينهم وادير وجهي عنهم
كارههم ولو بيدي جان قتلتهم من زمااان ..
سنة 2014 دخلو الارهاب للعراق
جان عاجبني اطلع معدل واصير عسكري بس صارت وصرت دكتور .. صارت مواقف وياي وتركت مهنتي واخذت مهنة اخوي الشهيد وصرت عميل سري بمكانه واقاتل مع الارهاب ... طردتي بالشارع والعيشة الي عشتها وحدي من عمر 15 لعمري هذا علمتني شلون اقاتل وعلمتني هواي امور
من اوگف بنص الدو١عش اباوعلهم وانا بودي اخذ الحق وبس .. اشوف البنات والزلم والجهال شلون ينقتلون كدامي وانا بس اريد اخذ الحق من عيونهم ..
تعرفت على اسراء عن طريق موقف صار..
جانو الارهاب يدخلون للبيوت حتى ياخذون الي يردو وانا ڪـ عميل سري لازم اكون وياهم .. دخلت على بيتها وهي خايفة جانت بس هي وامها كاعدات حاولو يتقربون وانا اقنعتهم انو اقتل الام واعتدي ع البنت واطلع.. طلعو هم وانا اخذتهم لبيتي وقفلت عليهم اشهر بقو تحت اماني تعودو على وجودي بحياتهم وعرفت شلون اهتم بيهم .. ماحسستهم هم كاعدين بوسط الارهاب ..
انا رجال تعبت هواي بحياتي تعبت على نفسي لحتى كونت نفسي وصرت بهذا المكان ... وبيوم تعرفت على بنت صديقة اسراء وعرفت اسمها وسكنها وعمرها وكلشي يخصها ماجان ببالي صديقة اسراء من الطفولة عبالي ارهابيه بس من كعدت اسراء وسولفتلي عرفتها منو وشنو ... وصارت مضاربات وقتل وعجاج اخذتها لبيتي كعدتها وجانت ويانا طفلة اسمها نور
نور احسها مثل اختي الي ماتت.. اختي الصغيرة لو عايشة هسه يكون عمرها 20 سنه..
اهتميت بهنادي ونور اهتمام مو طبيعي
انطيت كل الاهتمام الي جنت فاقده من جنت طفل
الهم.. بعد ماعرفت هذول الاثنين يتيمات
يوم عن يوم يتغير كل الي بداخلي تجاه هنادي
صرت احسها روتيني
انا رجال عميل سري فاقد الاهتمام من طفولتي ولليوم
انا رجال بلا روتين وروتيني كله قتل صارت هنادي روتيني... صارت اهتمامي صارت حياتي الفاقدها.. صارت راحتي وصارت اماني..
الفاقد شيء يعطيه... فقدت كلشي بحياتي الا اسمي ومكانتي واجت هنادي انطتني كل الي فاقده بشهر كامل ... طلبوني بموضوع يخص مهنتي بتركيا وضروري اروح واذا مارحت يروح المنصب مالتي ومايصير الي حق ارجع بيوم من الايام..
يعني حياتي كانت اسود وابيض وهنادي لونت الي حياتي ...
حبيتها حب لدرجه اذا ابتعدت عنها من الممكن يكون بيني وبين الموت شعراية وحده.. بس كنت مبتعد لان احسها ماتحبني ..
رغم اهتمامها وخوفها عليه يكول شي
وعقلي يكول شي ثاني
گلبي احيانًا يأكد الي هنادي تحبني
بين نارين.. نار عقلي وتفكيره ونار گلبي وڪلامه
هنادي وردة بيضة بين الورود الحمر
جنت اشوفها هيَ وبس
ماجان حب بحياتي وعيت على المشاكل والقهر
ومن شفتها شفت الحب بتفاصيله..
.......................................................................
نتكلم عن حياته بدون اختصارات
من لما كان عمر ايهم 15 سنة ...
توفو اهلي وانا عمري 14 سنة ... بقيت سنة كاملة ببيت اهل ابوي .. جانو يحتقروني بشكل مو طبيعي
عندي عمام 3 وعمه وحده
ابوي الوسطاني سلمان
عمي جواد
وعمي الثاني كاظم
عمتي ارمله رحاب ...
عمتي ماعندها جهال.. عمي جواي عنده بنيه وحده وعمي كاظم ولد وبنات ثنين..
جدي متوفي وبس بيبيتي
ماجانو يهتمون بيه ابد
ابقى شهر كامل بلبس واحد ومايشترون الي ملابس
رحاب : ابن الخايبه خلي يروح يجدي من الشوارع ويتشري ملابس لروحه شني جاهل
كاظم : لا تجيني الورث مال ابوك النا لانو اخونا
تريد فلوس سوي مثل ماكالت عمتك
ايهم: عمي بس كم فلس اريد اشتري ملابسي تشككت
عليَ شلون اطلع بيهن وانا شبيت
جواد: اكول شبيت ع نفسك مو علينا خوش اطلع جدي واشتري..
جانو يحتقروني بشكل مو طبيعي
كرهوني بالحياة الي عايشها انا
لحظات احس انا مو بشر احس نفسي حيوان بسبب تعاملهم .. مرات يخلوني بدون اكل .. مرات يقفلون علي باب الغرفة
دخلت 15 سنة طردوني من البيت
بقيت افتر بالشوارع
من تطلع الشمس اروح للتقاطع اجدي
هذا الي ينطيني وهذا الي يكول الله ينطيك
وهذا الي يعبرني وهذا الي مايهتملي
وخلصت سنة من عمري ونفس الروتين ينعاد
ودخلت 16 سنة
ونفس الشي اجمع فلوس واشتري شي ادفي نفسي بيه
مرات ماكدر احصل الفلوس الكامله ومن اروح للمحل يطردوني مايقبلون ينطوني
وبيوم واكف بالتقاطع وكفت سيارة سوده دكيت الجامه ونزلها
كاظم: الله ينطيك ههههههههه...
وراح صارت بيه غصه مو طبيعية بس احس الفرج يجيني
بالليل اخلي كارتونه جوه الجسر وانام عليها وتجي الچلاب فوك راسي تنبح لو الذبان على وجهي والبگ
وبالاخص الشتاء لا دفو ولا شي يگتلني البرد وبالگوه انام حتى حلم مثل الناس ما احلم ..
مرات يجوني شباب يتعاطون يدفروني وانا نايم وروحي تطلع ويرحون عني ويضحكون
ومرات اتمرض وماكدر اشيل روحي لحد ما اطيب ابقى بالشارع مشمور
دخلت 17 سنة وصرت اجدي بالسوك
اخذ عربانه من الي كاعدين واساعد النسوان الكبار
هاي الي تنطيني وهاي الي تكول يمه ماعندي
بالـ 5 اشهر وراها كمت ابيع علاليك
جان اكو گصاب من يشوفني يكول اشوف ابني بيك
وينطيني علاليك وفلوس
واروح اخذ العربانة والعلاليك وافتر بنص السوك
كدرت اجمع مبلغ اشتري بيه اكل واشتري بيه قمصله لان بارد الجو
وكل يوم نفس الروتين وهم نهاية اليوم ارجع جوه الجسر..
الجسر تعود عليه يا دنيا..
دخلت 18 سنة وبيوم من الايام اجاني عمي جواد للشارع
جواد: طالبينا بالمحكمة امشي وياي
اخذني للمحكمة ودخلنا لكيت عمتي رحاب وكاظم وبيبيتي..
كال القاضي: كلشي احجي ولا تكذب بكلمة وحده.. وصلت النا دعوة رفع قضية تجاه اهلك تفضل احجيلنا..
بقيت صافن بوجه القاضي انا مارافع قضيه ولا واصل محكمة وما كلت اله منو بس كال احجي خرطت الاول والتالي ماخليت حرف واحد
: يعني هسه انت تنام جوه الجسر ومشمور بالشوارع صارلك 3 سنوات مو
ايهم: نعم 3 سنوات بالكامل ولا يوم اجوني ومره عمي كاظم بالتقاطع يصيح الله ينطيك ويعبرني وماخذين كل الورث الهم ومامنطيني ربع واحد ملابس مايشترولي والشوارع اهون منهم جانو يحرموني من الاكل اسبوع كامل حسره عليه اللكمه وشربة الماي جانت ...
رحاب: والله جذاب جنت مدللته دلال وحتى جان يحاول يگتلني ويلزموه عمامه
ايهم: ياقاضي صدك كلامها جذب والله وروح اهلي
وانا اصلا مادري القضية هاي شنو قصتها ولا اندل محكمة ولا شي مخلص حياتي و وقتي بالشوارع وبالسوك وماعرف شي ثاني حتى اسمهم ناسي
القاضي: الي رفع الدعوة اسمه صاحب وليد ..
والي كاله هو گصاب يشتغل بمنطقة الـ **** بسوك الـ ***** ويعرفك صار سنتين وكال كل الكلام الي انت حجيته هسه ومانقص حرف واحد وطالب بالقضية كل الورث يرجع الك مع سجن العمام واخذ الحق ..
ايهم: كلشي ماريد منهم بس حقي يرجعلي
بعد ماصار حديث حاد وكلام قوي
عمي كاظم وعمي جواد انحكم عليهم سجن 5 سنين بتهمة سرقة اموال و ورث وتعنيف مراهق ذو 15 عام
ورجعلي فلوسي والورث كااامل ماناقص ربع واحد وشنو اتصرف بيه اتصرف
بيت اجدادي تسجل بأسمي وبيت اهلي تحول لأسمي
كل الي جنت محروم منه صار حلالي ...
اخذوهم للسجن و وصلوني للبيت انا وعمتي وبيبيتي
رحاب: يعني راح تطردنا لو نبقى هنا
باوعت الها صفح وابتسمت الها
: يا بيبي انا ماسويت شي الك انا معليه ومره جبيره وين اروح بتالي عمري
ايهم: انتي حتى ماحجيتي حرف من طردوني ومن جانو يعنفوني وهسه جايه تكولين ماسويت شي
چا ماكلتي هذا الطفل اليتيم وين يروح من طردناه
ومن جنت اجدي وافتر بالسوك كم مره ومره تعديتي عليَ بالسوگ وغلستي عني هاا؟ اطلعو من بيتي يلا
ماخليتهم يحجون وطردتهم بسرعه وسديت الباب
مرات اكول تصرفي غلط بس اكو شي يتحكم بتصرفاتي الماضي والايام الي مريت بيها بسببهم هم الي يتحكمون بتصرفاتي ماجنت بكامل عقلي
تفكير يكول غلط وتفكير يكول سوي الاكثر بيهم
رجعت ادرس من السادس بواسطة وفلوس خلوني ادرس من السادس
درست وطلعت المعدل انقبلت طب
وهم درست تعبت على نفسي حيل
كونت نفسي بالمرحلة الاخيرة اشتريت سيارة
بيت اهلي ساكن بيه رتبته وصبغته واثثته من جديد
بيت اجدادي اروحله بين فتره وفتره
عمامي ناسيهم بيبيتي وعمتي اخر الاخبار عنهم
براتب بيبيتي كاعدين ببيت ايجار
وانا عايش عيشة جنت اتمناها طول عمري
تخرجت وفتحت عيادة ببغداد وعيادة بتكريت
اهل امي ماعرف عنهم شي من توفو اهلي تبرو مني اهل امي
ماحبيت ولا شفت بنيه بعيني كل نيتي اكمل حياتي مثل ما اريد
صرت دكتور معروف وناجح حيل بعمر الـ 26 سنة
كل شهر اتواجد بعيادة
يعني شهر هنا وشهر هناك
الكل صار يعرفني
بعمر ال 23 سمعت عمامي طلعو من السجن وكعدو وي عمتي وبيبي
وبعمر 24 سمعت بيبي توفت راتبها قل
وبيوم جنت طالع من العيادة وصلت للتقاطع شفت مره
تفتر على السيارات جهزت 15 الف حتى انطيها من وصلت يمي صوتها سامعه انا
رفعت عيني عليها شفتها رحاب
: هااا رحاب شلونج اخبارج
: منو انت
ايهم: ابن الخايبة هي انصدمت وبقت صافنه... الله ينطيج هههههههههه.. وسديت الجامعه ومشيت
والله الدنيا دوارة يابخت..
وصلت للبيت.. ماعندي روتين معين مرات اكل ومرات لا من التعب
انظف وحدي وارتب ومعتني بالبيت وبشغلي
دخلت 28 سنة ودخلنا سنة 2014
وسمعنا بدخول الارهاب للعراق
رتبت اوضاعي وسديت عيادتي ورحت لتكريت لكيت عيادتي مفجريها ولاعبين لعب
ورحت وياهم ڪـ عميل سري وتركت مهنتي ...
تعبت حيل بس جان هدفي اخذ الحق وبس
اتشجع وتكبر الدنيا بعيني واحب ثقتي بنفسي اكثر من اوڪف بنصهم وارفع سلاحي عليهم...
وبسنة 2016 تعرفت على هنادي
وحياتي بوجودها صارت غير حياة
حياتي صارت مليااانه اللوان بوجودها بيها...
ونور اخ يانور.. وفاة نور سببت الي هوس وحالة نفسية قوية الليل ما انام اكل ما اكل ضعفت و ونزل وزني 7 كيلوات تعبت حيل بموتها تعلقت بيها وتعلقت بيه حبيتها حيل صرت الها جناح حمايه بس ما دمت الها...
وسنة 2016 شهر 4 خابروني لتركيا لازم اروح ...
اجوني الفجر ماهر واسراء و عزوتي
سلمو عليه كلهم وطول الوقت اشوف لمعة بعيون هنادي من سلمت عليه شهكت وطلعت تركض
راحت واخذت روحي وياها
شهكتها زرفت گلبي
حسيت نفسي انا الي شهكت مو هي
عتت روحي عت
جنت اوكف كدامها من تنام واصفن عليها لحد ما تكعد
تعبتني بحبها حيل تعبتني
هدت حيلي بعيونها...
