رواية حجرة التهميش الفصل العاشر بقلم اساور حسين
﷽
أَخَافُهُ بِالأَمْسِ خَوْفَ مُشَرَّدٍ وَاليَوْمَ أَلُوذُ بِظِلِّهِ إِنْ أَظْلَمَامَا
كُنْتُ أَحْسَبُ أَنَّ قَلْبِيَ مَرَّةً سَيَعُدُّ قُرْبَ جِوَارِهِ كَالمَحْرَمَا
⋆˚☆˖°⋆｡° ✮˖ ࣪ ⊹⋆.˚ ⋆˚☆˖°⋆｡° ✮˖ ࣪ ⊹⋆.˚
بلعت ريگي مرعوبة من الفكرة ومن حديـة عيونه والعرگ الطگ بگصته تجاهي ثگل نفسي وضاق صدري من نظراته اكثر راح يصدگني! يوگف وياي! ياخذ حقي! لو افكـار عقلي راح تترجم لحقيقة والگـاه طابگ ويا الأذوني ضـــدي واشطُــب على أسمة من هالمـوقف وهالـدقيقــة..!!!!!!
بهـوسة افكـاري بچيت ،لازگه جسمي بالمكتب أناظر عيـونه ضايعة ومتوجعة
دُجى: گتلي انتَ تكفلني ومـنهـم تحميني ولذت منهـم عندك أحميني
گعد على ركبـاتـه چن حيلـه طـاح ، مـد چفـوف ايده اثنينـهن ثابتـات
يـريد يسـاعدني اوگف واطلـع مـن جوه المكتب، رفعت چفـوف ايدي
تـرجـف من الوجـع عكـس ثبـات ايده وخليت ايد بچف وايدي الثانية
بچف أيده الثـانية ،خسـروني صحتـي وقـوتي صفيت بلا حيـل يحملني
يريد يلزمها سحبت ايدي اليسرى اصابعـي مكسـرات وعطت شايغه
روحي، بحـركـه سـريعة مدّ ايده وره ظهري بدون ما يطخني بس حتى
اذا اوگع يلزمني ، ومن دنيت روحي اريد اطـلع وصلت الحافـة المكتب
حط ايده على خشبـة حتـى لا ينضرب راسي ، وگفت وهو جر الكرسي
مالتـه گعـدت عليَّ ومـا اشوف وجهه من دمـوعي التنزل على خدي
ضـرب على مكتـب ضربتين وينبـرة أمـر يحاجيني
كـافل : منـو مسـوي بيـچ هيـچ ؟
دُجى : استـاذ لـو حجيتلك تصـدگني ؟
كـافل : وأشــد على ايــدچ جـربيني
واگف مقابيلي يطحل من القهـر يدي بس احجي واني گدام عصبيتـه ينشـل لساني واجبر بروحي احچي واخذ حقي منهـم وبس هو يگدر الهن
كـافل : هـــا ابـويـة يمتـى تحچـين
راح غـاد مني يفتـر متزوهـر ودمـه محـروگ گتله
دُجى: من يـوم اجه استـاذ خيبر للدار وبلغهم يستلمون
مسؤوليته حاربونـي أبشع محاربة شوفوني الموت لو
ما شردت چان هسـة ميتـة وصلوني للمـوت
امسح بعيوني بطرف فستاني واناشغ من اگول اله
_ حبسوني فوك بالغرفة وربطوا ايدي ورجلي ويضربني وحرموني الأكل والشرب وسكون تجيب عظام حتى اكلهن
وست ساميـة من رجعت انت وطلبتني خلت نسيبة تجذب
عليك وتكول ما اريد انزلك
خليت عيوني بعيـونـه اشكيله منهاره من البچي
_ جذابات استاذ جذابات والله اول مرة جنت اريد انزلك
واحجي الصـار بيه وتحميني منهم استاذ گالت ممر
مكتبك ما اباوعله واذا ادخله يدمرني اني وصديقاتي
وضربوهن ضربوا رونق وحبسوا سُكرة وهي تعبانة
اني ادمرت هنا دمروني ليش يسون هيچ بيه ليش
جـن جنـونـه فـاتح عيـونه واني رفعت جف ايدي اشوفه اثار تعذيبهم
كـافل : سطري كـارتاتهن منـو ومنـو ؟
دُجى : سـت ساميـة هي اسـاسها وحزام ظهـرهن
ودفعتهن ونسيبـة وسكــون وغـرام ومـريـم وعـلا ومهـا
أشـر على بـاب ونبـرتـه تغيـرت وعيـونه مصـدومة يگلي
كـافل : أمــي !!! امـي سـوت هيـچ بيـچ مستحـيل
بهــتت مهدومـه بكلمـته وكل حيـلي راح خـايفـة ما يصدگني ولزمت اصابعي ودموعي بدون صـوت ما اون يوگعن ،اريد اتوسله يصدگني ويحميني وياخذ حقي اريد اگله صفيت بلا كرامـة واليوم صـدگت اني هامش وصدك لو الدنيا
داست على راسي حقي يظل ضايع ، اريـد اصرخ واگـله لا تصير وياهم
وتضيع حقي ما اجذب اني والله مـا اجذب انصفني رجـع حقي وكرامتي گدامهم شلون اخليك تصدگني وظل هل كلام غصـه وحاشره بصدري
وارجـع اگول هـاي امـه ما يبيع امـه وينصف وحده هـامش ، انهزيت وتمنيت لو شردت ولا اجيتـه مـن راح بعيـد وگعد على قنفـه ملامحـه حـادهن حـد طـلع من البـاكيت جـكارة ورثهـا وورث النار بكلبي ويـه مـا جـر نفـس منهـا يباوع گدامـه ما يلتفت ويشـوفني هيئته هدأت مو مثل قبل لا يسمـع بأسم
امـه تغيـر بذكراهـا ، خليت ايدي على شفايفي اكتم صـوت شهگاتي منـه
لـزم تلفـونـه يكـتب ويجـر نفـس بعـد نفـس منهـا وسمعت شعـار رسالة
ورجـع كتب وسد التلفـون رجعـه بجيبه، وانتـظر بهدوء لا حجه لا عاتب
ولا ريح گلبي بكلمة اكثر من نص سـاعة ، وويـه وگفتي وگـف شغـل جگاره
ثـانيـة وتقدم گدامـي رفعـت راسي عليَّ وسـألتـه قبل لا احـرگ ورقتـه
دُجى: استـاذ صـدگتني ؟
كـافل : گلتها قبـل اليأذيچ يختارني خصمـه هذا قـانوني
طفـه الجگـاره بالطفايـه مـن سمـع شعار رسالة وصلت وراح للباب فتحـه
حسيـت گلبي يريد يـطلع من صدري ويطيـر مـن الفـرحـة صدگني ياربي
الحمدلله صـدگني استـاذ كـافل مـا جذبني ، ومـن طبـك البـاب قليل ،لزمت بالكـرسي الجلد مالتـه المتـوسط المكتـب ورجعت گعدت دايخة تنفسـت وهو صاح وصـوتـه بالممـرات انتـشر ينسمـع
كـافل : سـت سـاميـة ، سـت نسيـبة اتفضلوا يمي
ورجـع فـات نظـراتـه متـوجهه على ايدي الظاهر بيها اثار الضرب واجه
وگف گدام المكتـب ، دخلن ووجـوهن صفرت وتبهذلت احوالهن تبهذل
ومن وراهـن اجـه استـاذ سـرگال وياه سكـون وجماعتها كلهن الذكرت
أسمائهن مستغـرب والواضح استاذ كافل طلب منـه يجيبهن لهنـا ، وامـه
تـريد تجيني متخبله شلون لگتني بالمكتب مالتـه وگاعده على كرسي المدير
سـاميـة : هـاي هنـا واحنـه گلبنا الدار عـ ...
قبل لا تكمل كلامهـا گطع كـلامهـا بنبرة العـاليـة صـاح
كـافل : سـركال سويت الطلبتـه منك
سـرگال : اي جبت دوريـة النجـدة ينتـظرون بـرا
ودخل للغرفة يباوع بالوجـوه ويستفسر من الصدمة
سـرگال : شتسوي بالدوريـة ؟ وهذني شمسويات ؟
شصاير كافل! قلقتني احچي فهمني
اجت عليَّ اطگ بكعبها تريد تملخني وكفت على طولي واستاذ كافل
صـار سد بيني وبينها مانعها توصلني بأي شكل من الأشكال ما طختني
وبدم شايـط من الغل والحقد والرهبـة تعيط عياط هزت المكتب علينا
ساميـة : شحاجيـه ولچ بشنو جذبتي على مديرچ
يا ما متربايـة لك مـاما هـاي ممثلة وراح توگع بيناتنا
ليش تصدگهـا كـافل مـو احجيك ما تجاوبني ؟
رفـع صـوتـه بأعلى من حسها أضعاف يعاتبها
كـافل : بيـوم ما رجعتهـا للدار وكفت گدامكم حذرت
شگلت الكـم ست سـامية ؟ جاوبيني على سؤالي لو
نخلي المجرمة مساعدتچ تجاوبني ؟؟ نسيبة متذكره
من رجعت دُجى شنو گلت الكـم ؟
نزلت دموعها بضعف خايفة منه ومن صوته وتنجبر تجاوبه لان احلف عليه اذا ما ترد عليَّ هسـة يروح يكسر اعظامهـا وما يبرد ولا تنطفي ناره
نسيبة: گلت بحمايتك وانت كـافلها واليأذيها يختارك خصمه
بخـطوات سـريعـة راح الهـا عصرت ملابسي من يمي خفت
والرهبة ترست گلبي من ضرباته على باب وتهديداته الها
كـافل : معنـاتها منـو خصمـچ هسـة اني لـو دُجى ؟
_ انتَ استـاذ ، بس عليك الله لا تظلمني اني عبد مأمور
ما دار الها بال مغلس عليها وصـاح على سكون فاك عيونه
كـافل : لچ انتِ شنـو من بنيـة مجرمـة سفـاحة مخليج
عايشة بنص البنات تعذبين بيهن ولچ تايهات شفتيهن
لو ماعندچ رحمـة شلون تضـربيها هل ضرب شلــون !!!
تريد تلزم ايده تبوسها وهو يرجع ليوره لعبانه روحه منها
سكـون: ابوس إيدك استاذ والله ماعيدها بعد والله
ست نسيبة وسامية السبب حرضوني عليها
دار عليهن وحده وحده يباوع بوجههن ويصيح
كـافل : هذا دار ايواء مـو سجن وبي سفاحات
معذباتها تعذيب كافر ما يسويهاا
وشاف ابـو اجـه وما عبره ابد ظل مكمل كلامـه وامه صاحت
_ ماتوقعتها منك كـافل تخليني بمثل هيچ موقف
تهيني وتصغرمي بعيـونهـم واني المديرة هنـا مع الأسف
فقـد من كلامها طلعته من طوره بقت رجلي ما تشيلني وهو يشمر بيده
كـافل : وانـي مديـر هنا صغرتيني بعيونها وانا داگ صدري الها ، ودستي على كلمتي وهي بحمايتي هاي يا حماية
شوفي حالها فشلان منهاا بسببچ ست ، مديرة تحافظين
على سلامة البنات لو تحرضين يكتلوهن ؟!
نزلت عيونها بالگاع فشلانه من عنده صاح
_ إرفعي راسـچ وجاوبيني كم مرة نبهت اني المدير هنا
وكلمتي سيـف على كل الما يحترمني مـا يكمـل ويايَّ
كُميل: ابني نحلهـا بيناتنـا لا نكبر الموضوع
كـافل : فكـرت وقـررت ونفـذت والدورية بالباب تاخذهن
أشّر براسه الأستاذ سـرگال طلع برا وظل الباب مفتوح وانقبض كلبي من
شفت رجع وياه ضباط اثنين بس قبل يدخلون للدار ، رحت وگفت بظهر استاذ كـافل فشلانه من شكلي وحالتي تصعب على عدو وما صعبت
عليهم ، وباوعت على ست ساميـة بجت وتباوع الكافل مكسور خاطرها
مو معقوله يذكر اسم امـه وهو مبين يحبهـا ويحترمها ، لزمت گلبي وگوه وگفت قريب منه همست بصـوت ما يسمعـه غيـره گتله واني اتوجع
دُجى: لا تكسـر گلب امك وتنطي بيهـا لو خسرتها
تعيش ندمان الله يخليك استثنيها
رجعت اكثر من خطوة من اجـه بصفه ابو مستعجل قبل لا يوصلون الضباط
وسـت ساميـة وگعت على تخم گاعدة وايده على راسها ما توقعوا هل اجراء
كُميل : لو بمكانك وشفت هل تصرفات اقدم شكوى مثلك
وياك اني وسنـد بظهـرك وبعد افعالك هاي أمنت على دور
الأيواء ، خليني بيـن عيونـك واحترمني بـويـة اسـم امـك
لا تذكره بيـن الأسماء وهناك بوسط بيتنا الحسـاب ثگيل
رفع ابو على لحيتـه يتـوسله
_ الخـاطر شيباتي بـويـة كـافل امسحهـا بشيباتي
توجـه للضباط ومـد ايده يتسـالم وياهم وابو راح على سكـون وجماعتها وگف بحجـة يعاتبهن ويحاسبهن يتهامس وياهن ، استغربتـه ونسيـبة
تريد اطيح من طولها لازمـه بالحايط واگفه
كـافل : استـاذ سـرگال وخيبـر اتفق وياكـم اريد افتح تحقيق
بقضية تعنيـف صارت بوسط دارنا هنـا بتحريض البنـات
على وحده من النزيلات هنـا
الضابط : وين البنات ؟
اشـر عليهن وعدد اسمائهن استـاذ سـرگال وگال
سـرگال : مكانهن مدرسة الأحداث حتى يتعلمن
انضباط بيهـن عـرج اجـرامي نفذن جـريمـة
الضابط وكف مقابيل سكـون وجماعتهـا وسألهن سؤال واحد
_ منـو حرضكم على هاي التصرفات والتعنيف منين متعلمات
بكلمـة وحده ورأي ثابت جاوبوا والغدرة حسيت بيهـا
سكـون : سـت نسيبة دفعتنا عليها نكتلها
نسيبة: وست ساميـة هي اساس التحريض
اني ماعندي شي وياها هي تضوج منها
لان سببت مشاكل بالدار وماتسمع كلمتها
وتدخل مكتب الأساتذة وهي مانعه دخلتهن
سكـون : لا سيدي سـت سـاميـة ما عادها علم بالصار
وجانت مريضة وملتهية بمشكلة البنية المختفية
غـرام : ست نسيبة سلمتنا مفاتيح المخزن فوك واخذناها
بمساعدتها صعدناها وضربناها ومتندمه والله العظيم
ممثلات وكلامـهن خلاني اخلي ايدي على وجهي ابچي بشهگه طالعة
من صدري تذبح شنو من إمكانية وبيناتهن وحده تبيع الثـانيـة ومتعجبة
يعني ما فكرن بيهـا يجي يوم اشرد وافضحهن لو چان براسهن ارضخ
استسلم واصير بين ايدهن لعابـة ويتحكمن بيها على مرامهـن
الضابط : وصل البلاغ والبنات بعهدتنا يتحولن للأحداث
وست نسيبة تنرفع تحقيق وننتظر امـر القاضي بحقهـا
نسيبة: استـاذ كـافل استاذ كميل اني صاحبة بنات
عيبه عليهن امهن تفوت سجن استاذ سـرگال لا تخلوها
براسي وحدي فدوة اروحلكـم
كـافل : قبل لا تتصرفين برعونه ماخليتي بناتچ بين عيونچ
وگلتي هاي اليتيمة مكسوره على امها ما صار غير كم شهر
ميتـة ومسلبيها كل حقوقها احتـويهـا ليش تحرضين عليها
والله كفـر ولو احجي للعالم تذبحچ مـو يسجنوكم
الضابط : استعجلي استـاذ كـافل حتى نتوكل لملي حاجاتهن
كميل : خلوهن يصعدن يلمن اغراضهن مـن فوك
سكـون : استـاذ كـافل لا تخلينه نطلع منا راح نتعذب
والله نتبهذل الله يخليك الله يوفقك سامحونا ما تنعاد
سـرگـال : روحن منـا وبسكـم طغيان نصير زينيـن ونحصل
بس المـوزين منكـم ما بيكـم وحده قدرت مديرهـا وكلمتـه
روحـن على صعب جربـوهم حتى تقدرون
غرام راحت على رجل استاذ كـافل گعدت بالگاع اول ما طخت رجله
جرهـا منهـا مبتعد عنها وهي تصرخ وملخت شعرهـا
_ والله متندمة ماعرف شلون سوبت اعتذر منها
ابوس راسها بس لا تخليهم ياخذونه الله يستر
عليكم استروا علينا اني كبرت هنـا اخـاف
اطلع منكم الله يخليك استاذ لا ياخذوناااا
جنت اباوع عليها واتذكر شلون تلزمني من ايدي وتنام على بطني حتى سكـون تسيطر وتضربنـي ، مركزه بيهـا وفـرحانة واني اشوف دموعها وشفت حقّي يرجعلي والأساتذة اللي منعتني ادخل الهـم لذت بحمايتهـم واخـذوا بحيفي وردوا اعتبـاري ونرفـع راسي بأفعالهم
جبروهـن يطلعـن يصعدن فـوك وراحـن يلمن الأغراض سُكرة بصفي ما عافتني طلعوا ست نسيبة ، ذبيت حسرة وهمست وسكرة سمعتني
_ تمنيت عنـدي حيل واكتلهـن واخذ حقي بيدي
بقت مركزه بعيوني ومدت ايدها تعدل بشالي ادخل بشعـري طالع
واجـه استـاذ خيبـر اول ما اجت عيني بعيـنه ولزم راسه مصدوم
بشكلي بجيـت وهـوَ خزر سـت ساميـة خلاهـا تنزل راسـها واچه يمي
خيبـر : لا تبجيـن يروحولچ فدوة اللي يبچون عيـونچ
يباوع على اصابعي المنتفخات ويعصر بأصابعه
خيـبر: وعلي اعتـذر منـچ لو مداوم مـا اخليهن يسونهـا
شسـوي وشلون اعتـذر بيا وسيلة اطلع مقصـر ويــاچ
سُكرة ...
صدّت نظراتي على استـاذ كـافل وسـرگـال شلـون يلاخصون استاذ خيبـر مـن جوه رجله الراسـه متعجبين بكلمـاته واستاذ سـركال يهزّ بيده يتمتم
سـرگال : شلـون يرتب حجـاياته هسـة لو اشتري
قامـوس احفظ بي هذا الحچي ما تترتب بعقلي مثله
واستـاذ كـافل منـا مشتعل نار شايط ويسمع بي ضغط على اسنانه همس
كـافل : غـرگان متبربع باللواگه ابـن الكـلب
ودُجى چنها شافت اهلهـا بأستاذ خيبر تحجي وياه وغافله على الأساتذة الأثنين المتحولين كرة نار قابليـن للأشتعال بأي ثانية تحجي وياه تشكيله بصـوتهـا النـاعـم وهوَ يواسيهـا مقهور متگطع گلبه عليهـا
خليتهـم وقبـل لا يروحـن حلفـت أخذ حقّ دُجى منهـن ومـا اخليها بنفسها
طلعـت ولگيت برا تنتظـر رونق تلم الأخبار ورگعتني على ايدي عاطت
_چلب اني هنا ما تاخذيني وياچ جوا مو صاحبتكم
مخليتني اشمشم الأخبار تشمشم ابزبز ما افوت
كضيت ايدهـا وسحبتها فـوك واني على درج گلت الهـا
_ اريـدچ تعاونين نسوي شده يا ورد على سكـون الليل
وجماعتها الضاربات دُجى وناخذ حقها مربـع
رونـق : ولچ اني هم كتلني لو عادي عندچ اني
انضرب اهم شي تاخذي حق صديقتچ
سُكرة : الخايسة استعجلي وكت غيرة هسة لا ينزلن
رونق : الخـاطر دُجى اكتلهن لأن لو دُجى بمكانه واحنه
مضروبات تكتلهن الخاطرنا بس لو شفتهن سحلنچ ما افزع
وصلنا للطابق مالتنا قبل لا اصعد جرت ايدي وعضت اصبعها تگلي
رونق: ولچ اني رونق مو رامبـو وماخذتني وحدي تريدين
تكتلين ست بنـات يعوبه يحطنه ويمسحن الدار بينا
سُكرة: لعد شلون راح ينزلن حرامات تروح الفرصة من ايدنا
ضربتهـا حاسبه وشغلت شخصيتها الاستخباراتية وركضت على غرفة
من الغرف الموجودة بالقسم مالتنا فتحت الباب وگالت الهـا
رونق : ضحى مو گلتي متحلفه السكون تكتليها لأن
خربت شغلچ وما خلتچ تبيعينه ؟
ضحى : اي الجايفة الله لا يوفقها شعرها اهلسه لو اگدر
رونق : وانتِ مهـا مو خلتچ تغسلين ملابسهن اسبوع كامل
مهـا : حسبي الله عليها ومن اشتري ملابس جديدة تاخذهن
سُكرة: اجت فـرصة للحلگ تملخن شعرهن وتبردن گلبچن
تعالن ويانا قبل لا ينزلن خلي نكتلهن كتل الوداعية
ولا دقيقة مـرهن تردد بالعكس أيدونا وتجهزن يمشن ويانه سـد بسـد
صعدنـا الدرج وبنص الممـر الفـوك التابع للقسم مالتهن تلاگيت وجه بوجه
سُكرة: سكـون الليل ينطيچ گلبچ الجايف تعوفين
الدار والذكريات وتروحين شلون نهون عليچ
يا چلبه يا بنت الچلاب يا ما مترباية غير
تبقين هنـا نتونس ونطيح صبغچ المزنچره
الخايسة رايحة تركضين إدري شبيچ الطرده
اول طيحتها وتهرولين رايحة للأحداث
رونق : يگلچ الأحداث سجـن مطوق والبنات
هناك نصهن يتعاطن ونص جانن اجرام بلكي
تتراهمين وياهن ، انوب اگلچ اذا ما تگدريلهن شلون ؟
سُكرة: تنتظركم شلون ايام سوده مصخمه تلوگ
الهاي الشكول الزفره وقبل لا تروحن نصنع وداع
ماينسي سنيـن ليگدام
دنگت رونق على نعالها خلته بيدها وصاحت
_ سلاحي بيدي راح يلعب على وجوهكم الزفره
شلت النعال مالتي بيدي ورفعته بوجهه گلت الها
_ نعالك بيدك محد يفيدك
سكـون: تروحين من وجهي لا اختمها بيـچ؟
سُكرة: ليش مو نختمها احنه بيــچ ؟
حجيتها ولزمتها من شالها فريت بيدي حسيت بشعرها يتگطع والبنات يتمالخن ويـه غرام وباقي البنـات وعيـاط سكون هز القسـم كله جرجرتها اركع بوجهه راشديات ودفعتها على باب الجانت دُجى بي ، اشوف برونق
تشيل بالنعال وتضرب بيهن وين اليوجع على وجهه على ظهر على ايدهن
وسكون تجر بروحها مني
عطت برونق تجيني والبنات بظهرنا جريت عظم يابس مال دجاج نفسه اللي رادت تجبر دُجى تاكله مشمراته بالغرفة متروك گعدت رونق على بطنها وهي ترافس مثل الصخله ويريدون يذبحوها عوجت حلكها واضغط عليه قوي افتح بي وهي عاطت خليته بحلگها بقت تگح وترافس ولزمت رگبتها تتقئ الخايسة وتبجي بس من جبرت البنية المكسورة دُجى جانت قويـة ورادتها تاكلهن دفعتها وگفت عطت بيها وبعده گلبي يفور منها الچلبه تروح فدوه للچلب
سُكرة: حتى تعرفين الكثرة تغلب الشجاعة، وانتوا اثبتوا
خايفات من دُجى وهي بنية اصغر منكم رعبتكم ورعدت
على روسكم وصعبت تمشون كلمتكم عليها ربطتوا ايدها
لأن تعرفون نفسكـم مو كدها يا اخي والله مـو گدهااا
سكـون: اني اعلمچ يا سُكرة يابنت جسـاس سهلـة
سُكرة: وين بعد تشوفيني سكون الليل گتلچ هاي الوداعية
واجتها ضحى تضرب بيها واني بقيت اباوعلها تمنيت دُجى ويانا وبعيونهـا تشـوف شلون اخواتهـا اخذن حقها وكون يبرد گلبهـا ، فزيت من دفعتنا ونـزلت تركض وتصـرخ بكـل علـو حسهـا وتنزل ورافعـه ايدهـا تطلب حمايتهم
سكـون: لحگولي موتونـي استاذ كـافل خلصني
راح يموتني كتلوني يمــه استاذ خيبر على بختك
ضربني سكرة ورونق ملخني استاذ سـرگال
رونق: الخـايسـة سطرتهم تسطر عليّنا
سُكرة: امشن ننزل ونظل على كلمة وحده جذابة
لا شايفيها ولا شايفتنا وتريد تتبلى علينا
حتى تبقوهـا بالدار وتكسبكم بصالحها
وماجذبت خبـر اخذت رونق والبنات ونزلنا نمثل مثلهن على اساس مصدومات بصوتها وصراخها ونزلنا ، شفت الضابط واستاذ سرگال
قريب الدرج الجوه يسألون بيها ومن رجعت تعيد بأسمائنا عاط بيها
خلسها بمكانها خلاهـا حتى تنسى البچي مالتها
سـرگـال : صـوتچ ما اسمعـه ولا تعددين اسماء البنات
امشي اطلعي وياهم من حلگ ساكت وعوفي كـافل
بحـاله لا يفقد عليكـم ممنوع توصلون مكتبة لا يحترك
على روسنا
راحت هي وجماعتها يمشون ويـاهم والضباط وراهـن وبقيت ادور بعيوني
باب مكتب استاذ كافـل مسدود بس لا صار شي ويعاركها ، لـو يستجوبها
دخيلك ربي لا يزلگ السانها بكلمة وتخلي يتخبل ويفحم بروحه وهو مساعدها
انفتـح مكتب ست ساميـة وراهـا زوجـة استاذ كميل عصبي ومغندب نفس ابنـه واكثـر ، وهي مجمعة اغراضها المهمـة ولا تباع على احـد تعدتنا وراحت
وياه صعدوا سيارتهم ورجعوا البيتهم والظاهر ليلتها سوده مصخمـه جهنم
وبأس المصير يمكعب العـالي طيحتها هل دجى بعد ما جانت خشم عالي
اخذني التفكيـر بدجى ونـاسيه الگطعي النساي البيـاع مقابيلي مچتف
ايده ويخوزر بيَّ منتظرني اكمل استكشاف وتفكير ، هزيت راسـي بمعنى
شكـو وشنـو سبب هـل نظـرة الغضبانـه والزومها گـال
سـرگال : صايرة تتعاركين تالي وكت ؟
جتفت ايدي اني هم مقلدته ولا ارادياًرفعـت تك حاجبي معترضه
سُكرة: شنـو قصدك استـاذ احجي اعدل وسيده
سـرگال : ماحجيت بيوم اعوچ حتى اخذ بكلمتچ واحجي عـدل
سُكرة: مو هذا قصدي
_ امشٰي اصعدي فـوك هـوسة وحراس طالعين داخلين
اشوف وحده بيچن تنـزل اجر شـريان العناد مالتكم اذبحـه
رونـق : ودُجى شلون بالنا يمها الأستاذ
سـركال : صديقتكم اخذهـا استاذ خيبـر للمستشفى
تعجبت گتله
_ شعجب استاذ خيبر اخذها مو استاذ كافل ؟
_ صديقتچ اختارت خيبر يوديها
عافنا وحده تباوع على ثانيـة والفضول يذبح اختارت خيبر شلون يعني ؟
رحت على مطبخ دخلت بالممر وشفت الباب الخارجي والدرج منو وهمهم
دُجى شردت وشنـو غايتـه ؟ لازم انتظر دُجى تفهمني عقلي افتر
صعدت على شباك الجبير مالت الدرج وگعدت اني ورونق فحطانات بعدنا من كتل سكون الليل الخايسة احسن الها هسة طيروها هي وصاحبتها
مو جنتوا عايشات مرتاحات كلها تسمع بكلامكم وتحترمكم وقسمكم ضابطاته تخبثون خباثة اكبر من راسكم ليش هل خباثة ليش الغيرة
اربـع ساعـات بالتمام والكمـال مـرت خلصتهن بين اصعد وبين انزل وشفتهـا فاتت ايدها ملفلفه وجهه اصفـر لازمـه معدتها وياها استاذ خيبـر يمشي وفاتح ايده حتى اذا داخت تلگي ايد تسندهـا ، طلع الهم استاذ سـرگال
وركضنا على دُجى اخذناهـا منهـم ومشيناهـا بصعوبة تخطي من التعب
صعدتها تكه تكه ومن وصلنا للغرفة قبل لا تفـوت گالت
_ فدوة سُكرة اريد اسبـح قبل لا انام
_ اي يا گلبي ادللي هسة اخذچ للحمام اسبحچ بيدي
ابتسمت ولزمـت ايدي ودمعتها طاحت مسحتها واسمعها تگلي
_ طگ گلبي على شوفتچ وتعاملچ الحنين ويايه
گرصت خدهـا وجاوبتها خجلانه
_ اروح فدوة لعيـونچ الحلوات
رونق : اكلجن اني ولا اشتاقيت السكرة وحتى
دُجى من اخذوها فوك وظليت وحدي ارتاحيت
بقيت اتنقل من چرباية للثانية براحتي
سُكرة: ليش احسچ چذابـة ترا الچذاب تاليتـه بالنار
دُجى : من اخذوا سُكرة ما تأثرتي ! والگعده بالزاوية
واللطم والتملخ والصلاة نسيتيهن لو اذكرچ بعد
عضت شفتها تسكت بدجى وتردها سريع
رونق : جنت امثل گدامچ عود متأثره بس گلبي يرگص
من الفرح ،ومن رحتي انتِ هنا صارت الونسـه ونستين
رحت اجهز ملابس الدُجى واسمع بجذبها واني اعرفها واثقة جذابة، سندت دجى وشمرت على رونق الملابس اخذتها للحمامات گعدتها على طبلة صغرة مال حمام وذبيت ملابسها جسمها كـله كدمات وضعيفة صايرة من قلة الأكل والقهر ، رادت اطلع هي تسبح ما قبلت
_ ايدچ تخرب تضميدها عوفيني اني اسبحچ
ذبيت على جسمها ماي وبديت اغسل الها بدون ما اوصل المتي الأيدها
ورونق كل شوية مفلشه الباب على روسنا تعيط
_ طاحت رجلي من الوگفه برا حسيت روحي چلب
حراسـة ما تخلني افوت وياچن اتفرج والله ملل برا
عطت بيها واني كلي صابون واغسل بيدي
_ هسة اطلع واحطچ واكتلچ نفس ما كتلت سكون
تتفرجين عليمن عدنا فلم الخايسة البنية ترجف من البرد
رونق : افوت ادفيها ؟
سُكرة : انوب نگلبت صوبة
رونق : خلصيها حتى اجيب الها استاذ خيبر يدفيها
بحچاياته الحلـوات ويفرحها هي ما تفرح بس من استاذ
خيبر يلقي شعر بكلامه تنطرب البنية
وجنها ناسية وتذكرت فتحت الباب علينا وصاحت ودجى تستر بروحها
رونق : تذكــرت ليش استاذ سركال
يگول اختاريتي خيبر ياخذج مستشفى؟
ركضت عليها اگرص بيها وادفعها برا
سُكرة: ولج ولي هسة البنية تستحي امشي مناااا
رونق : العيارات الخايسات تستحي مني ما تستحي
منچ شنو شايفتني عندي شوارب لو غراض النسوان
ممسوحه شو انگط انوثه حتى صوتي انثوي
ضربتها على ضهرها وسديت الباب صاحت
رونق : حاسبتني چلب حراسة افتح الباب عليهن
هسة واروح اصيح البنات اگول الهن يوزعون شامبو
بالحمامات اركضن اخذن وكلهن يجني يشوفن دجاجة
دُجى: بعد لا تصيحني دجاجة تعقدت من الدجاج
من وره سكون الحقيرة خلتني اكرهه ريحته
رونق : وسكـرة دحست العظم بحلگها
دُجى: ايع اكلته سُكرة
سُكرة: اكل اعظام؟
دُجى: غير هي تگول سكرة دحست العظم بحلكها
سُكرة: امشن الخايسات دحسته بحلگ سكـون
ضحكت دُجى وحتى بضحكتها تتأذى
دُجى: اسفة والله فهمتني غلط رونق استخبارات
رونق : خلصن دا احوس اعرف سالفة الأختيار وليش
تروحين ويه استاذ خيبر مو كافل استعجلي قبل
لا انزل واتهور واستجوب استاذ كـافل
سُكرة : خلصت ولچ صبرر انوب هاي صدك تسويها
وتروح تسأله وهو قـابل للأشتعال والأحتراق اليوم
نزلت على رجلها اجلف بيها بالصابون وليفه واصب الماي على كيفي
وجريت ايدها اغسلها وهي ساكته وفزت على حس رونق
رونق : سبحة العروس ماخلصت ؟ امشن نزفها
ضحكت ورحت جريت منها المنشفه نشفتها وبدلت ملابسها وهي واكفه
يمنا تباوع وتتفحص بدجى صافنه بيها خلتها تخجل
رونق : والله عليچ جسـم دُجى يذبح احب الظهر
الممسوح والبطن الممسوحه والباقي مرسوم
رسم ليگول تلعبين رياضة
دُجى: جنها عيون زلمة ايع كتليها سُكرة
سُكرة: مخلين ويانا وحده مشبوهه
رونق : السؤال محيرني ليش اني جسمي مسح
مو حالي حال هل بنات ؟ خرب حظي حتى بهاي ما گعد
سُكرة: هي البنية حظها طايح ناقصه بس عيونچ
رونق : حتى بهاي ماعندي حظ بالحسد عيوني باردة
لفلفت دُجى ومشيت بيها للغرفة مستعجله لكيت رونق مشغله الهيتر
گعدتها وجابت رونق المشط گعدت وراها تنزل بشعرها وتسحب بلسانها
رونق : راح امشط شعرچ وانتِ احجيلي شنو صـار ؟
دُجى : من عفتوني ورحتوا استاذ غندوبه يخوزر بيَّ
گلت حقه الصار مو سهل ، والضابط طلب تقرير طبي
بحالتي حتى يتقدم للقاضي ويه البلاغ واستاذ خيبر
واگف بصفي يفتـح بالبطل مال ماي حتى اشرب خطية
وچان استاذ كـافل گال هسـة اخذها ، اني خفت منه هو
اعصاب ويخوزر واگف منطيني ظهره
سُكرة: عود حتى الضباط لا يشوفون همـه مايحبون
البنات ينكشفون على احد واليوم انجبروا
دُجى: واني والله العظيم بصفاء نية درت على استاذ خيبر
گتله استاذ عادي انتَ هم تجي ويانا للمستشفى، شو هذا
دار وجهه عليَّ اني گلت راح يلزم راسي يرگعه بالمكتب
بقيت ارجف منه وجه التاير ولچن چان عاط بيَّ يگلي
لو اني لـو استـاذچ خيبـر واحد من عدنـا يروح
سُكرة: يااا يااا عود صدك تحجين ؟
دُجى : لعد جذب اني خفت من صـوته جاوبته بلا وعي
عادي استاذ خيبر يجي عود اطلب منه هم يجي ويانا هو افتهمها اريد بس استاذ خيبر عينكم لا شافت ملامحة صارت
ما يكصها السيف وراح مني گلت راح يگول للضباط رجعوا البنات ونسيبه واخذوها بدالهن هي ام المشاكل
رونق: وشصار بعد ولج شو انكتلتي وصرتي فاهية
دُجى: تعبانـة وجه الطاوة ، وراها طردنا گال يلة استعجل
اخذهـا وروح اني عندي شغله اهم اكمله ، واستاذ خيبر
راد يحاول يفهمـه قفل عقله بقفل ومفتاح وشمره بالنهر
عفتهم وگمت دا اطلع من المكتب وهو يدردم يگول مستعجله
عاد استاذ سـرگال اشر الأستاذ خيبر وطلعنا منهـم ورحت
ورجعت شفته بعده بالمكتب ما رايح للشغل مالته المهم
وكفت رونق عدلت شالهـا وشدت محرك وراحت تلبس بالنعال مالتها
سُكرة: ولچ وين رايحـه
رونق : احب اسمع القصة من الطرفين
ضربت على صدّري ودُجى گوه تحجي تگول الها
_ ولچ رايحة الأستاذ كـافل عزا سُكرة لزميها
_ لا ختولي وين تروحله غير تخاف توصل مكتبة
رونق : ترا مو غبية واروحله وهو عصبي أني اكشف
المستور بطريقتي الاستخباراتية معليچن انتن بيه
راحت وطبگت البـاب وراها ، اخذت دُجى بفراشها نومتها وهي تون
لزمت بيدي وتسألني على صار ويايَّ سولفت الها الحد ما نامت
وعافتني ورونق ساعة ورجعت گعدت على جربايتها تهمسلي
_ الأساتذة طالعين باقي بس استاذ خيبـر حرامات
_ لعد شو تأخرتي ؟
_ بقيت اراقب بهاي الجديدة منارة گلبي ما مرتاح الها
واگفه بالشباك وتراقب النازل والصاعد الداخل والطالع
اخذت اليه ملابس حتى اسبح وسألتها
_ اي وتالي رجعتي ؟
_ مو انتبهت عليَّ وصعدت فوك بالقسم مال سكون وفنار
_ تلگين شوفي شعدهـا من ضيم بكلبها الله يبرد گلوبنا
عفتها فاتحة كتابها تريد تقرا وطفت وتعاجزت تگوم اطفئ الأضاءة تتوسل بيه اطفيها واني طالعة خبثت عليها ما طفيتها ، وهي تحلفني ومن وصلت
للباب اجت ضحى تريد تطمئن على دُجى مدت راسها شافتها نايمة
وضحكت وهي تأشر على رونق
ضحى : الحمدلله من رجعتوا لأن رونق رادت تموت
عليكم بجت بجي لو امها ميتة ما تبجي هيچ
لطمت لطم من يمي متوني وجعني ونلزم بيها
نريدها تسكت فقدت والله لو خوات من نفس
البطن مو هيچ يستقتلن ويوگفن سـوية
درت وجهي على رونق متمدده ومخليه الكتاب على وجهه
سُكرة: طلعتي تتمرغلين برا مو على چرابي
مالتنا يمكن لو اعصرچ مخلصه دموعچ
رونق : جذابه هاي ام حلگ الفكاكه دواكم سكون وفنار انتوا
عوفني بحالي يلـة خلني اقرا لا تظلن تشمرن قنابل
ابتسمت الضحى وخليت ورحت للحمام سبحت ودموعي ما نشفت بعيني
بعد هسة اني خليت اخوية يوگع بيها وعفته هناك واجيت ليش غير اظل
عنده واحمي بروحي مثل ما فداني بروحه من سوده عليَّ يا متعب يا خوية يا حبيبي كون انطيك من روحي وحيلي وعمري وترجعلي سالم افرح بيك يا نظر عيني اهلي كون بيه ضرباتهـم مو بيك عشت متغرب بالشوارع حسبي الله على الچان السبب بعيشة البهذلة هـاي الله لا يحفظهم
غسلت وجهي بالماي حيل لأزم اخذ خطوة ليگدام واساعد اخوية ميصير اسكت وهو بين ايد نـاس ما رحموا بنية شلون يرحمون اخـوية وهذا جسام
واحد حقير ما بگلبـه ذرة رحمة ، نشفت روحي وبدلت رجعت للغرفة عيوني ما اگدر افتحها تعبانة ، عفت شعري لا نشفته ولا مشطته ولفيت راسي على چربايتـي ونمت مـن بعد ايـام شفـت انـواع المصايب بيهـن
اهلنـا يغلطـون واحنه نتحمـل نتيجـة اخطائهم
جفلت على هزات رونق اليـه وصوت العصافيـر بـرا مسموع
وهي فوك راسي واگـفه لازمـه بطنهـا وتجر بيـدي بعدها
رونق : صباح الخيـر امشي تعبتيني گعدي دُجى
حتى ناكل البارحة صايميـن اليـوم هم نصوم
من طلايبچن الماتخلص شلون بالله نمـوت
دُجى: شبيچن چنچ بگابه تفتر علينا امداچ
_ والله كون امداچ انتِ گومي ناكل گومي
حتى ما تخسرين قوامچ الممشوق بالأنوثة
رفعت دُجى ايدها غمتها وهمست
_ المشبوهه
سُكرة: امشي صدك نلحگ على ريوك علمود تاكلين
وتسندين طـولچ خوما تظلين بالفراش
دُجى: سكون كرهتني بكل الأكل روحن عليجن الله
اكلن اني راجعـه انام تعبـانة
حاولت توسلت قفلت ويبست راسها رجعت نامت واني اخذت رونق ونزلنا لگيت الـدار هدوء وبس المدربات يمشن ينظمن المكـان ، اخذت ماعون اخذت بيضه سلگ وقطعتين جبن مثلثات ترست گلاص چاي ورحت على ميز اكل وجبتي الممنوع اخذ اكثر من هل كمية حتى نحافظ على جسمنا
وما ندخل مرحلـة السمنه ، ورونق يمي بيدهـا صمونه علست نصها
من كملت ذبيت ماعوني بالزبالة والگلاص هم ورحت للمدربة ترجيتها اخذ وجبة الدُجى وهي تعرف وضعها وبقت تعاند نظام الدار اي اكل مايطلع برا صالة الأكل ولو تريد هي تنزل تاكل ما نصعد الها وضلت تحجي عفتها وصعدت لگيت دُجى عيـونها مورمات والدموع مبلله وجهه تكتم بصـوت شهگتها حتى لا نعـرف بيها تبچي ، رحت على جربايتي اباوع الهـا
مغمضة وتنزل دموعهـا بلا صـوت انهضمت
سُكرة: اغنيلچ ؟
هزت راسهـا لا ، رحت يمهـا خليت راسها على رجلي العب بشعرهـا
ونزلت بستها بشعـرهـا لزمت ايدي تبجي ومـا تحچي الحد ما رجعت
نامت ما خليتهـا وغفيت على نفس چربايتهـا للعصر اندفع الباب
وفاتت رونق شايله بشالها كومه حاجات وتعيط
_ اگعدن صرت بواگه بگت اكل تحول اسمي رونق الحرامية
گعدنا نفرك بعيونـه وهي ذبت الأكل على چرباية جايبه تلاث نساتل
وتلاثه ببسي وتلاثه جبس واثنين برتقال وصفگت بيدهـا
رونق : اويلي على حلويات شايفات حلويات تبوگ حلويات ؟
ضحكنا ورجعنا ظهرنا على حايط اني ودجى وهي تفتح النا بالنساتل اخذناهن وطگت الببسي وتنطينا وفتحت الجبوسه كلهن تدفع بيدنا تصيح
_ اكلن لا تموتن بعد منو يسمع موجز الأخبـار
دُجى: لازم عندچ اخبار رونق استخبارات ؟
رونق : وعلي من الصبح الحد الأن افتر الأخبار حار بحار
سُكرة: احجي عايزين وجع راس لا تنفجر بطنچ
رونق : قاسيات امداچن
فتحت دُجى ايدهـا وراحت رونق حضنتها وباستها ودُجى تتخبل
اذا تنباس غفل دفعتها وابتعدت توكلها جبس يضحكن
رونق : هسـة رضيت راح احجي بسـم الله الرحمن الرحيـم
سـت ساميـة متعـاركـة بالبيت عركـة عميقة والمشاحنات
واصله الدرجـة استـاذ كافل ضارب الحايـط واصابعـة
فاصخهن ، المصدر وشوشت المدربات بيناتهن
سُكرة: فصخ اصابعه تضامن ويـه دُجى
رونق : انجبي واسمعي مو دا احچي مو بعينچ ؟
سُكرة: احجي وقز القط غير اعلق على اخبار
دُجى: امهات حلگ الفكاكه لا تتعاركن خليها تكمل
راح يخلـص الجبس والببسي احجي رنوشة
رونـق : حبيت دلعچ رنـوشة اول مرة احد يدلعني
دُجى: بعـد كل ما اصيحچ ادلعچ بس كملي
رونـق : اي وسمعت استـاذ كـافل سـافر
فتحت دُجى عيونها ولطمت بيدها المفصوخه على صدرها
_ يمــه عــزا صــدك لو تجذبين ؟
رونـق : اي والله سـافر وسلـم الشغـل كلـه الأستاذ خيبـر
والخبـر الصـادم اكثـر رجـع استـاذ سـرگال ياخذ مكان
استـاذ خيبـر وهسـة هـو گاعد بمكتبـة
سُكرة : معقـولة سافر يدور على خـوالچ؟
رونق : حسب سمعي الضعيف سفرتـه السوريا مو مصر
دُجى: ديلـة بالله جنطتي عنـده غير بنطينياها ويسافر
رونـق : نسيت اگول اسبـوع ويرجع
سُكرة: اي من البداية واحجي مو خوش إعلامية
رونق : بعدني ماعرف اصفط الأخبار عدل صبرلي اتعلم
دُجى: يعني هسة استاذ سـرگال يداوم بمكتب كـافل
رونق : كل كلامچ صحيح عجبتيني
تحمحمت وگفت اجمع بالجيس
_ منين اخذتي الحلويات ؟
رونق : استـاذ خيبـر استلم راتبة وراح اشترالنا كارتونات
اثنين جبس ونساتل وببسي وهاي المدربة الخايسة ماتقبل اصعد الچن اجت باجي كلثوم خلتني ابوگهن وشردت ركض گلبي حنين كلت شلون اكل وصاحباتي نايمات
مددت رجلي توجعني احسهن مكسرات وگلت الها
_ عليچ الله مسدي رجلي حيل يوجعني
_ ما اشتغل خدامة عند الخلفوچ افتهمتي
دفعتهن وشالت الجياسه خلتهن بعلاگه ونزلتهن بسكوت بدون محد ينتبه
بقينا بالغرفة الثاني يوم خليت دُجى تنزل ويانا بعدنا على
درج واستاذ خيبـر شافنا اجـه علينـا مبتسم
خيبـر : يابـه هلا شلونهن بنياتنا ؟
سُكرة: الحمدلله
_ وانتِ ست البنـات شلونها الصحـة ؟
_ احسن من قبل بهـواية
خيـبر: يلـة استعجلن اكلن ولا وحده بيجن وجهه
مورد الوجوه صفـر كركم ليگول طفل نفاس مو بنات
ضحكت رونق بصوت مسمـوع واني ودُجى ابتسمنا حتى نفس للضحكة ما بقت عدنا وصكيت بمكـاني من طـلع استـاذ سرگال صاح
_ اطلعـن بالحديقة بعد سمعوا العالم الضحكة
وخازرني ويرجع يخزر بدُجى گتله
_ استـاذ اني ما ضحكت والله هاي رونق
ودُجى مشت بيَّ تگرص بيدي عود با تبررين ودردم
_ وخفت الهاي الخزره وامداج وامده فرگچ ولچ
تبررين اله الضحكة شنو حاسدنا عليها هوَ شله غرض
رونق : تگله رونق تضحك كون حبايه بخشمچ ويكبر
فتت للصالة ويمشن گدامي اخذن مواعين وجبة الريوك وگعدنا ناكل والبنات كاعدات ييسولفن ويانا ويتذكرن الأيام الفاتت وكل شوية وحده تتذكر موقف وتعيط من يمها ، والمدربات صاحن بينا نسكت ونكمل ورحت غسلت وصعدت اني ورونق ودجى نظفت الغرفة صايرة خيسه وغسلت ملابسنا كلهن ورتبت خانتي مال ملابس ونزلت الظهر تغدينا وطلعنا للحديقة لازمات ايد بيد ونمشي وحجيت الهن على أبن التاجر اسمـاعيـل ورونق شهكت وعاطت بنص الحديقة
_ خطبچ طلب الزوآج منـچ ويراقبچ هذا يحبچ
نفس القصـة قريت مرة بطل حب بنية وراقبها
وخطفها وتزوجهـا عزززا الله كون اني بدالچ اگله موافقة
دُجى: هـاي شبيها ملگوفه يعني خاطفيهاا وتقبل بي
رونق : واذا قصة حب قوية تصير
سُكرة: انجبي ما اعترف بالحب وخرابيطه
وبعدين من جان يراقبني غير مجبور وعدهم
غاية يريدون اهلي مو على سواد عيوني
توجهت المكاني بزاوية الحديقة تربعت وگعدت نگطع بالعشب ورونق تاخذ الأكل من ظهر النمله تخلي بصف بيتهن وانوب طگتها صفنـه طويلة وبقت تضحك وحدها مدري شتفكر خطية مو بكامل قواها العقلية
_ شتفكرين ؟
رونق : تخيلت واحد يخطفني ويگلي احبچ تتزوجيني
_ اي
_ اجلب بي بيدي ورجلي حتى بالخطف حظي مو گاعد
وانتن مجنصات وعلي تنخطفن وتنخطبن شنو هل حظ
دُجى : ولچ مخطوووفـة يا حظ هذا يا حظ
رونق : انتِ اسكتي ندور عليها طلعت تحتمي بمكتبة
المديـر وقانعتـه ومصدگها وهو صار كم يوم يترسون
براسـة عليها وراح صدگها وجذبهن هذا حظ لو مو حظ ؟
ضربت المدربة على الحـايط وصاحت ندخل نجهز روحنا للورشات ، دخلنا صعدت جهزت روحي ونزلنا اول ورشة اعمـال يدويـة اخذت خـرز سوده سويت بيهـن سـوار وكتبت اسـم دُجى وهي تصنع گلادة لزمت ايدها
ولبستها السوار وسويت واحد ثاني لبسته بيد رونـق وبين ما كملت لكيتهن مسويات واحد يشبـه مالتهن عليه اسمي ولبستني رونق گلت الهن
سُكرة : لا تنزعنه خلوا السوار رمز خوتنا الحلوة
دُجى ورونق وسُكرة نگضي العمر سوا وما نفترگ
ضربنا ايد بأيد وكلنا همسنا بكلمة وحده
_ على العـهد مـا نفترگ
انتهى وكـت الورشة وبقيت انظف بالهوسـة والبنـات ويايَّ واجت ضحّى
_ سُكرة اركضـي استـاذ سـرگال
تـوترت وقلقت شنو يريد ذبيت الغراض من ايدي وانكت بملابسي مستعجله اريد اروح بسـرعة قبل لا يصيـر عصبي ويـاخذ موقف مايحب ينتظر بأول خطواتي انسحبت من ايدي قوي واندفعت للورشة من جديد
دُجى: ويـن رايحـة تركضين يالعـوبـه ؟
رونق : ولچ استاذ سـرگال يريدها ينتظرهـا روحي سُكرة
تمسكت بيدي بكل قوتها ضاغطـه
دُجى: اثگلي شـوية لا تبينين البنية الخايفة
والتركض بس منتظـره يصيحهــا
سُكرة: هـا
_ اسمـعي كـلامي
_ شگد انتظـر ؟
_ ربـع سـاعة
دفعتني رجعتني اشتغل وهي تلم بالخرز وترتب بيهن على رفوف
ضحى : سُكرة مو صحتچ استـاذ سـرگال يــريدچ
باوعت على دُجى خزرتني خلتني اگها هسة اجي وارجع اكمل
دُجى: يلـة روحي صارت ثلـث سـاعة
وصلت العتبة الباب ورجعـت الهـاي البنيـة ورطتني
سُكرة: هسـة اذا يگلي ليش ما اجيتي بسـاع شنو اجاوب ؟
دُجى : گوليله جـنت اصنع سوار وشوفي سوارچ
سُكرة: اني هم غمه سمعت كلامچ استاذ سركال وين يفتهم
بالسوارات بعد ما تريدين اگله اصنع الك سـوار ؟
دُجى: اي شكـو بيهـا اذا يحب صنعي الأستاذچ سوار
عفتهـا ورحـت على مكتب اطگطگ اجمع بالكلام بعقلي كون ما يطير
دگيت الباب مـرة والثانيـة والثالثـة مـاكو رد ، ردت اروح وسمعتـه گال
ســرگـال : تعـالي خـانـم
على اقـل من مهلي فتحتـه ودخلت لگيته گاعد على كرسي ومخلي
ايده على المكتـب وحاطها على خـده رجـع ظهره وسألني
سـرگال : مو صـار سـاعة من دزيت عليـچ ؟
سُكرة: ثلث سـاعة
سـرگال : اي ما تجين
رفعت ايدي افـرهـا منـا ومناك حتى ابـرز السوار ويشوفه بوضوح
سُكرة: جنت اصنع سوارات وشسمـه لميت الخرز واجيت
نشف الدم بجسمي وثگل حلگي من گال
سـرگـال : متأكده ملتهيـه بالسوارات لو صاحبتچ ما تخليچ ؟
هزيت راسي سريع ورديته
سُكرة: يا صاحبتي ؟
سـرگال : دُجى الثعلبــة
سُكرة: لا عيب استاذ شنو هل حچي
_ تعلمـچ تراوغيـن مثلهـا ؟
سُكرة: وشعندي اراوغ ؟
ررفـع اكتافـه وگف على طوله يفتـر من المكتب ويجي عليَّ
سـرگـال : الله يعلـم ، اصبحهـا نعرف ليش تعلمچ ؟
سُكرة: مـا يحتـاج
حجيتهـا وخزرتـه مقهورة من اسلوبـة البارد وكف گدام المكتب
گعد على طرفه ويهزلي براسـه وبصـوت خــافت يگلي
_ سهـلة سُكرة سهـلة
لا يـلف هل رجـال ولا يدور لبگلبـه على السـانـه سألني دفعه وحده
سـرگال : ابن الكلب صدك تحـارش بيـچ ؟ لو جنتي خايفة
نزلت راسي وادفع بالكلمـة حتى اطلعها گتله
سكـرة : والله تحـارش بيَّ مـا جذبت عليك
صـوتـه انكتم رفعـت طرف عيني من شفتـه شلون مفحم رجعت
دنگت راسي احير وين انطي وجهي وگبيت نار من گال
سـرگال : يعني شلـون تحـاررش ؟ وتعرفين شنو تحرش ؟
سُكرة: اعرف شنو تحرش
_ منين تعــرفين شنو التحرش منين انوووب متعلمـه !!
رجعت كـم خطـوة وجسمي يـرجف من صـوته گتله
_ علمونا بالمدرسـة
_ اه يعلموكم بالمدرسة التحـرش ؟!!
سُكرة:لا يعلمونا ندافع على نفسنا من المتحرشين
_ ودافعتي على نفسچ؟
_ لا مـو مربط ايدي
حجيتها وتمنيت الگاع تنفتح تاكلني وتنسد واخلص من الفشله
طگطگ رگبتـه وراح طلع من المكتب وسد الباب رحت فتحته شويـة لمحته دخل المكتب استاذ خيبر ظل بالخمس دقايق وطلع رجعت المكاني اركض وهوَ دفـع البـاب ضـابط اعصابه ورجع نفس مكـانـه واحس خدودي واذني صاروا نـار مـن گال
سـرگال : سُكرة حوصلتي صغيرة جاوبيني
عدل لا تفرفحيني يعني شلـون تحارش وهوَ
يحلف ما متحـارش بيـچ
سُكرة: استـاذ اسفـة مـا اگدر احجي
_ لااااااااا احچـي هسـة تحجين لا الدنيا اگلبهااا
رگع المكتب تلاث رگعات حسيتهن بگلبي
سـرگال : سُكرة فهميني هو باقي اخر خيط بعقلي احجي
سُكرة: استـاذ لزم
نزلت راسي ابچي واشهگ ما اگدر انطقها بس هو تخبل بالزايد
سـرگال: شلزم ابن الكلب شلزم احترگوا اهله شلـزم
شهكت بصـوت مسموع صراخه ضيع الكلامـات مني وقشعريرة سرت بكل جسمـي واني ارفـع اصبعي اشـرت على شفتـي وهو تهستر عباله باسها
وعيـونه تجدح من العصبيـة يگلي
_ بــاسهـن ؟
بلعت ريكي والرجفه بكل جسمي صارت گتله
_ لا والله لا طخهن اقصد لزمهن بس لزمهن
راد يطلع استوقفته صك بمكـانه من كملت كلامي وبلغته
_ استـاذ سـرگـال تـرا لهـب خطبني
سمعت صـوت بلعت ريگه واجـه اتجاهي يهزلي براسه وايده
_ مـا سمعت زيـن بالله عيدي
_ گال تتزوجيني وأمسح ثار ابوي واهلچ بحلقاتنا
_ ادير نفـط على اهلـچ واهلـه واحرگهم بليلة ظلمة
من الخوف بقيت مكتفيـه اهز براسـه وهو صـاح
_ شو ساكته چن موافقـة عليَّ ؟!
ضجت اسلوبـة يخليني افقد واحجي ضد تفكيره گتله
سُكرة: ماعرف استـاذ بعـدني افكـر واحتمال اوافق
بلكي صدگ ينتهي هل ثـار وتفض ونرجع لحياتنا
قلص عيونـه ورجع خزرني فتحهن يريدن ينطن قبض ايده
قوي واشر على بـاب وبصـوته الثكيل گـال
_ امشـي اطلـعي بــرا
شطت من كلامه شطت ودت اعيط لو اسوي شي يرد اعتباري ما گدرت مسحت عيـوني ودفعت الباب وطلعت من المكتب كله وتركت انسان يفتر بي بعقله الفوضوي وقراراتـه المتسرعه بحقي دائماً يطردني بدون ما يفهمني
شنو يدور بعقلـه ونوع الموقف اللي ياخذه ويصيـر هيج حجاره ويايَّ
عفت البنات يصيحون بأسمي وصعدت ما طايقة اتنفس ذبيت روحي على چربايتي وجسمي من البچي والعصبية يهتز اخ يا نار گلبي منك يا سركال وين جنت وشلـون صـرت شنو اللي غيرك وقلل احترامي عندك !
اتمنى اعرف شنو سمعت عني وصرت هيـچ مو طايق الكلمة مني جابر روحك واگف گدامي تستمع ما صدگت تطردني وتقلل مني
دخلن عليَّ البنات رفضت احجي وياهن حرف لفيت راسي وبقيت بمكاني خلص النهار ودخلنا المعرب وعده والليل اجه ودجى تحاول ورونق تتوسل
بقيت كاتمتها بگلبي ونمت ، الثـاني يـوم ماقبلت انزل وياهن وبقت دجى
يمي للعصـر صعدت رونق گـالت
_ استـاذ سـرگال يريدچ
سُكرة : ما اريد اروحله والله العظيم ما اتقبل اشـوفه
شلون يقلل مني ويجبرني اروحله بكل مرة التقي بي
يكسر گلبي بأسلوبه شسوي وما اروحله شسووي
دُجى: عاملي بالمثل
حجتها واجت يمي لازمه بيدي تمسح بدموعي
رونق : هل مرة استـاذ سـركال مو وحده شفت وياه
شاب حليوه ودخل البنات للورشات وفات وياه
على مكتب واستاذ خيبر دخل وراهم
لطمت على خدي وصرخت
_ عزا يمه عزا بس لا جايب لهب ويريد اتواجه وياه
دُجى: لهـب منو انوب
_ ولچ ابن التاجر
_ شعرفه بي ؟
_ حجيتله البارحة
_ ههههههههه تحول فحمه
قنعوني البنات انزل من دز عليَّ مرة ثانيـة بدلت ولبست شالي ونزلت خطوة اتقدمها وخطوتين ارجعهن الى ان دكيت الباب وسمعته يگلي
افوت ، دخلت وشهگت بعلو صوتي ضربت على گلبي وركضت بسرعة
من شفت اخـوي متعب گدامي بقيت اعيط واحضن بي بست راسه
وهو يلزم بيدي يبوسهـا ويحضن بيـه يگلي
_ عبون اخوچ واخر امل باقيله شلونچ اروحن فدوة لطولچ
حضنتـه ما اگدر احچي والأساتذة طلعوا گعدني على تخم رجلي بعد ما تحملني بقيت حاضنته خايفة اعوفه وبعـد ما اشوفـه رجعت شعره گتله
_ شلون خلصت روحك من ايدهـم
_ استـاذ كافل الله يوفقـه وسـرگال وخيبـر اجتمعوا
بيهـم ومسوين گعده باقين يتفاهمـون وياهم ومتكفلين
بينا وانطوهم كلمة بيوم ما نحصل اهلي نسلمهم
بيدهم بنفس الساعة
گرص خدي فرحان بشوفتي يگلي
_ وابنهـم لهب صـار صاحبي هذا دره مال الله ساعدني
وخلصني من ايدهم وگف وگفات زلمة ويانا يدافع وقنع
ابو يقبل يطلعني وابو اخذ كلمته الحمدلله
رحت جبت الچاي مالته مقدمين اله اخذه من ايدي يشرب
_ يعني بعد ماكو خطر على حياتنا ؟
_ احسن من قبل راح ادور شغل زين واجمع واأجر بيت
ونرجع نعيش اني وياچ خويـة بعد ما اريد نتفارگ
تعبت من الشارع والله اريد تالي التعب ارجع
البيت واحصل لگمه طيبة وانام مرتاح
سُكرة: حلم ويتحقق بيوم ما نرجع يجمعنا بيت
وتفوت عليَّ نهاية اليوم واخدمك بعيوني وايدي
اروحلك فدوة يا حبيبي شكد شكلك تعبان
_ اي والله خـوية سُكرة مهدود حيلي من التعب
_ تفرج حبيبي مايظل شي على حالة شد حيلك
_ من باجر اطلع ادور شغل حتى استعجل برجعتچ ويايَّ
هزيت راسي وحضنتـه بكل حيلي ما اريد يعوفني ورجعوا الأساتذة دخلوا وهوَ يستحي منهـم ودعني وطلع واسمع استاذ خيبر يكله عندك مكان تبات بي يجاوبه اي عندي ، واني متأكده راح يبات بالشارع ماعنده ولا ربع بجيبـه ، صحت وراه بصـوت
_ متعب انتظرني دقيقة
ركضت فوك بكل سرعتي فتحت كنتوري وطلعت وصله صغيرة لفيت بيها فلـوسي حسبتهن 50 بس شلتهن ونزلت اركض اخذتـه من ايده ورحت
بعيد منهم بصف الباب الحديد جوه وفتحت ايده وهمست
_ دبر حالك بيهن لا تسحب ايدك
ولا تدفعها ينتبهون علينا
_ مالها الزوم اني مدبر حالي
ومتعود ليش تشلعين گلبي
_ اذا ما تاخذهن والله يحترك كلبي
ترضاها اختم يحترك گلبها
_ اسم الله على گلبچ من عمري
على عمرچ سُكرة خوية
اشر على استـاذ خيبر وگال
_ استاذ خيبر عزمني انام بالبيت مالتـه اليوم
خيبر : لا تخـافين على اخوچ بعيوني اخلي
سكرة : الله استاذ روح كون الله يوفقك ويسعدك
ضحك استاذ خيبر وطلع ومتعب باس راسي وراح وراه ، ردت اصعد
صاحني استـاذ سـرگال وراح يمشي للمكتب اضطريت امشي وراه
من دخلت وراه راح بعيد مني يگلي
_ شلـونچ ؟
_ الحمدلله جنت اتمنى اشوف أخوية واحاجي
_ وحصل الحمدلله ، اسأليني شنو اتمنى ؟
_ شنو تتمنى ؟
_ عندي سلطة على دنيا
_ غريب ليش !
_ أوصيها مـا تــأذيــچ
رفعـت عيـوني حتى تقـابل عيـوني وجسمي ينمل من كلماته الغريب اللي دار السنـة عليهـن ومـا سامعتهن چان يعاملني معاملة طيبة وخسـرتهـا
وهـو مركـز بكل حـركـة أتحركها تراجعت كم خطوة وهمست
_ شكراً استـاذ ، اترخص منك صاعدة فوك مع السـلامة
وشـردت من گدام عيـونـه مثل شردت المجرم من سجانه رافضه اعيد
المـاضي اكـره اباعوع فـوك خليني بنفـس مكاني اني مـو گدهم واجازف
دُجى..
مـن بعـد ايـام الضغـط مـرني الروتيـن وصـرت اعيشـه ويا محله الروتين
بعد ايام الشدة، بيـن هدية ربي صديقاتي، وبين شغل الورشات والتنظيف وباجي كلثـوم تعدي السـاعات مستقرة ومـرتاحـة ، ومن بعد اكثر من
اسبوعين بمصباح الصبح گعدنا مريد ننزل واسمـع صوت مو غريب
بوسط الممـر يلقي بكلامـة وقوانينها تكول
سـاميـة : ايـام الخربطة تنتهي اليوم ونرجع للانضباط
ودروسنا مـا باقي غير شهـر ويبلش دوامكم لازم نستعد
ندرس من اليـوم ممنوع يتأجل درس واحد
نزلوا البنات قبلي وگفوا بمجاميع البنـات واني بقيت على درج اسمعها واكفه بصف الشبـاك مآل الدرج واشـوف استـاذ كـافل بطلـته ومشيتـه الواثقـة دخـل ورافع ايده يسلم على حارس ورفع نبرتـه اكثر
كـافل : السـلام عليـكم
والبنات يردن السلام بحرارة وحماس والأبتسامة على ملامحهن والمدربات
يرحبن برجعتـه واستـاذ خيبـر واگف تقرب تسالم وياه وگله
_ ألك وحشـه الحمدلله على سلامتـك
ناظر امـه لأن هي من دون الكل لا ردت السلام ولا تباوع عليه ومبين بعدها زعلانه والجو بيناتهم مشحـون عـاد اني ما احب اكسر كلمتهـا لأن احبهـا فـقررت انـزل الـدرج وهم ارد بحماس مثل باقي البنات
دُجى: الحمدلله على سـلامتك استـاذ كـافل
نورت الدار برجعتك والله
رفعـلي تك حاجب وابتسم ابتسامة طرفيـه احسه يكول علينه يملعبه وگفت اخر سره بين البنات منتظره جوابـه خلاني اطحل بمكاني وراهاا قرر يجاوب ليكول مغصوب على جواب مختنگ
كـافل : هلـو
عضيت شفتي على لا تطلع الفشار بصوت عالي صار ساعة ادوس على روحي وألقي شعر مو سلام وتجاوبني بتلاث حروف لا يا ابو غندوبه لا يا حقير ولك حتى الله مسود وجهك الأسيووود وجه الطــاوه المحروكه ولج
ليش تسلمين عليَّ امداني وامده فرگي اذا لعد اسلم عليك يا ما تستحي
يا كرة النار مو مال سلام والله هذا افتر وراه واحرگ بگلبه ويفوخ گلبي
دخل ايده بجيوب البنطلون واگف ثابت واستاذ سركال اجه وياه
كـافل : العطلـة عدنا خلصت اريدكم تشدون حيلكم
وراح يجون مدربات ومدرسات بنفس الوقت يدرسوكم
واي شي ينقصكم ينكتب بورقة كل يومين تطلع مجموعة
بنات للسوگ تشترون احتياجاتكم الكاملـة
وحده من المدربات كالت
_ واذا تنسون شي بعد ممنوع تطلعون
الأحسن تسجلون بالورق
سـاميـة : اهم شي نرجع على القوانين القديمة
نظام الدراسة والأكل بوقته وكلامكم ويايَّ شخصياً
بعيد عن مكانب الأساتذة مفهــوم ؟
همست بأذن سكرة وهمَّ مقابيلي
_ دگها ومدگوگها مكاتب الأساتذة تريد تموت عليهم
لو بس اعرف ايش هيج تخاف نفوت عدهم ارتاح
سُكرة: اش لا يسمعون
دُجى: نسيبة خلصت مني اخذت عقوبتها وهاي الحقيرة
الراس الچبير بقيتها حتى اشوفها نجوم الليل بعز الظهر
سُكرة: استـاذ كافل خزرنااا روحي مني روحي
دُجى: اشو اليوم افوت الغرفـة ابنها ادبر سالفة وافوت
سُكرة: ما ناوية على خير وياها
دُجى: ابد والله على عذاب والذل وحجيها ويايَّ
واني مكسوره وشلون تگلي اعرفي حجمچ راح اخليها
تعرف شنو حجمي عبالها اني تربية شوارع الحقيرة
ضبطت وگفتي من حصلت خصره منـه ومن امه وراحت هي للمكتب مالتها وهو سلـم على الكُل وراح وراهـا ، اقل العشر دقايق طلع
وكلنا نفتر بالممر ونص رايحات صالة الأكل راح يصير وكت الريوك
وهوَ وگف بـوسط الممر مالته وبصـوته العـالي كال
_ منـارة تعاليـلي للمكـتب
مناره بيدهـا كتاب شمرتـه بحضن البنية وياها وراحت تركض وتنزل بالفستان مالتها وترتب بشعـرهـا نازل النهاية ظهرهـا لـونـه احمـــر دم يطاير بالهـوا ، دخلت وسدت الباب وجرتني سُكرة للصالـة وعيـوني على بـاب اريد انزلها واشغل بالي ما گدرت تفكيري متخربط ، سكرة ترست ماعوني وهي فاتت وعلى ملامحهـا ابتسامة هـادئة بارزه قليل من اسنانهـا گعدت بكل هدوء بمكانها وخلت ايدها على خدهـا سعيــدة
سألتها صديقتها تتبسبس هي وياها ورونق تصب الچاي بظهرها
واجت علينا تفر بشفايفها ذبت الچاي على ميز وضربت رجلها
رونـق : ما توقعتها من استـاذ كـافل عزا معقولة !!
سُكرة: احجي بسـاعع لا تهبطيني من الصبح
رونـق : طـالب منهـا تصبغ شعـرهـا لـون اسـود متخيله ؟
يگول الهـا الشعر الأسود راح يطلـع احلى عليـچ
سُكرة: استـاذ كـافل ما يتدخل بهالموضوع، واكيد من طلب
منها لأن شافهـا من دون بنات الدار مالتـه شعرهـا ما يوالم
عمرهـا ورادهـا تصحح غلط لون شعرها حتى تتساوى
ويه باقي البنات لأن الصراحة شعرها اوڤر ويجذب الأنتباه
بطرف عيني باوعت عليها اريد اكفخها على راسهـا
دُجى:يعجبني دفاعچ عنـه عايشة
حتى تبررين الأستاذ غندوبه
كملت منارة واجت عليها عاملة من العاملات اخذتها وطلعت من الدار
رحت الورشـة الرسـم بقيـت أشخبط واجيب وارسم ولكيت روحي ارسم
عيـون ضايعـة تباوع للمجهول بدون هدف يرسيها على بـر تنفست
وكورتها بين ايدي وشمرتها ، ورحت شربت ماي رجعت لكيتها مختفيه
طلعت من الورشة دخلت الورشة الخياطة اجتي المدربة مبتسمة وكلماتهـا حلوة خلتني احب هل ورشة وتجرأت اخذ قماش وبيدها تعلمتي شلون افصل فستان على حجم لعابة بدايتها وخيطته وصار اعوج ورجعت خطوة بخطوة فتحته وخيطته وضبط فرحتني
ضحكت وهي توگف مقابيلي واني اخيط تگلي
_ يگولون عليچ صلفه وصاحبة مشاكل ما تنطاقين
ياربي الناس شكد بيت بلاء تخبلين والله حبيتچ
_ واني هواي حبيتچ ست شكرا تعبتچ
من طلعت صادفتني منارة راجه من برا وشعرها اسود فحم مسرحته
وشكلهـا صـار احلى بأضعاف تلفت العين جمالها يسلب العقل فكره
مرت مني وقبل لا تكمل الممر طلع استاذ كافل من مكتبه لزمت شعرها
وخجلت وهي تگله : سويته استاذ
لمحـهـا بطرف عينـه وصرف النظـر منـهـا على سريع ابتسم
وهو يكمل طـريقـة يمشي عنهـا وگـال الهـا
كـافل : عفـية هسـة تمـام
واضح رايد يطلـع وصّل الورشة الخياطة باوع بوجهي وگال
_ دُجى تعالي اريــدچ
التفتت اسد البـاب مقرره اروح بسـرعة شفت منارة بعدها بمكانها
عيونهـا متوجهه علينـا وراحت على حـديقـة ، عدلت حجابي ورحت
وراه مثل مـا طلب لگيتـه واگف بوسط الحديقة بعيد عن كل الأبواب
والشبابيك ، ذب جگارتـه ورفـع نـظراتـه لوجهي گال
_ شسمهـا مدرستچ القديمـة ؟
ضيقت عيني وجـاوبته وخليت ايدي على گصتي الشمس عليَّ
_ شتسوي بأسمهـا ؟
_ اتمنى من أسأل تجاوبيني بسـرعة
لو تنفذين كـلامي مـن دون البنـات كلها
ابتسمـت وگتله واني مركزه برد فعله
_ اسمهـا نازك ، اذا على مدرسـة سهلـة
استـاذ همزين ما طلبت اغير لـون شعري
باوعلي ورفع حاجبة يحاول يخفي نظرات الصدمة
كـافل : ما يخصني اي شي يخصچ
وقبل لا يروح گال
_ تجهزي انقل دوامچ ويـه سُكرة تداومين
وبطلي ضرب أبر ما يفيـد
طلع من الدار وخيبر يمشي وياه گال اله
_ وين رايـح
_ اشــوف الوحـش مالتي واشربـه بانزين
دخلت للدار حجيت السكرة وبقوا البنات هل فترة يجهزون قرطاسية
وملابس للدوام ، واكو بنات رفضوا رفض قطعي يكملون دراستهم
والأساتذة حاولوا بكل الطرق يقنعوهم ورافضات ، وكل اسبوع تطلع
مجموعـة بنـات وبعد اسبـوع صاحني استـاذ خيبـر بيده فايل
خيبـر : هذا ملف قبـولچ بنفس مدرسـة سُكرة ورونق
ضحكت ما گدرت اخفي فرحتي وردت اكمل الهدف واحقق حلم امي بتخرجي على اقل اريحها بگبرهـا لأن ما گدرت افرحها بحياتهـا
تشكرت منـه ولا عرفت اعبر وهوَ يضحك وبلغ المدربة تاخذنا ثاني يوم
ورحت بشرت باجي كلثوم وطلبت منها هي تجي ويانا بالتجهيز اخذتني ثاني يـوم طايـرة من الفـرح صعدنا بتكسي ونزلنا مقابيل سوگ معروف وچبير ولان موسم دراسة الشوارع والمحلات عبارة عن جنط وصداري مدرسـة لزمت بيد البنات صرت بنصهن ونمشي ونتلفت نختار صداري عجبتني وحده عدله على الجسـم ومربعة من الصدر وعلى خصرها حزام
رونق : تذبح عليچ تصير لچ تخصر جسمچ بنزاكـة
سكرة : اخذيها ابد لا تترددين راح اخذ هذيج
حلوة شكلها مرتب ومابيها شغل هواي
رونق : عليچن الله اختارن اليـه وحده حلوة ذوقي خايس
دورنا وحصلنا وحده تگعد عليها تطلع اميرة تخبل وهي ضعيفة كلشي يناسبهـا من تختار ، اخذت قميص وحذاء ورحنا على محل عبارة عن دفاتر واقـلام اشتريد لكل درس دفتر واخذت اثنين احتياط والبنات
يختارن بالمساحات وشكل المقطاطة والألوان دخت بيهن شنو اختار
طلعنا المحل راضيات والضحكة تارسه وجوهنا ونحجي بغراضنا وكل وحده لازمـه علاگتها طايرة بيها، وعبرنا من فرع ضيق حتى نطلع من هوسة السوك ونوصل للشارع العام ونأجر تكسي يرجعنـا ، وبثـواني چف ضخمه وقوية ضغطت على ايدي ضبتها ونسحبت من بين البنات وجسمي استدار كله حسيت بگلبي ارتعد بمكانه وعلى وشك يطلع من صدري حتى الدم بجسمي اختل بدون توازن واني اشوفه واگف گدامي مستفرد بيـه ! عيـونه تارسها الشر والغيـض واضح ناوي على مصيبـة شلـون راح
اوجهه هل طغاة وأخلّص مـــنـه؟ ...
𐙚 الباقيات الصالحات 𐙚
❀˖° سُبحانَ اللَّه
❀˖° وَالحَمدُ للَّه
❀˖° ولا إلهَ إلا اللَّه
❀˖° وَاللَه أكبر
