رواية ومضه امل الفصل الحادي عشر بقلم ام مصطفى
حسيت باوجاع تكطع بطني وكلها تصرخ وشايليني انتبهت عمتي كبالي تدعي دخيلك ياعلي دخيلك ربي كوم بت الناس بالسلامة اباوع رحمن يركض بية شايلني للشارع
جانت الضربه ع راسي ودماية من راسي تطلع
لان دفعة من ضهري من فوك راسا وكعت ع كصتي وع وجهي
فتح الباب وحطني بسيارة جيرانه وعمتي وناديه وسمية صعدن وياي ورحمن هم
كمت اصرخ اخخ راسي بطني
-يمة اسم الله عليج بنيتي شلون هيج وكعتي مانتبهتي يربي عين وصابتج منو يجي يشوفج يفك عينه عليج وع شطارتج
اريد احجي اكللها واحد دفعني اني موكعت بس مااكدر من الوجع
رحمن يصيح يوجعج شي انوسة
اويلي عليج الف مره كايلج لا تصعدين وتنزلين لا تشتغلين اكعدي واسكتي
-مو وكتها تلومها هي بيا حال مدكلي اسكت خل تكوم بالسلامه الطفل يجي
-يعني شنو وكع الطفل
-لا منعرف بس اكلك حتى لو وكع يجي الطفل
وصلنا للمستشفى بسرعة ركض رحمن جابلي عربانة للسيارة وشالني حطني بيها ويباوعلي انوسة لا تخافين حبيبتي ان شاء الله تصيرين زينه
دخلوني لردهة الحوامل عمتي وناديه فاتن وياي كوه ميقبلون وسميه ورحمن ضلوا برة
دخلت للدكتوره جان دكول شبيها هاي
-عثرت ووكعت من الدرج وهي حامل وهسه بطنها توجعها
-صار نزف عدها
-لا ماكو
سئلتني تنزفين
-لا
زين لعد ضمدوا راسها دخلوها للعمليات الضغرى يراد خياط لراسها وبعدين هاي ورقة للسونار نشوف وضع الطفل
دخلوني للصالة وخيطوا راسي بدون بنج لان حامل بس موضعي بنج قليل وبس اصرخ
من الصريخ حسيت شي وكع علي
تلمست شفت دم قليل
كمت ابجي من الوجع من القهر راح الطفل
رحت للسونار
سوتلي الدكتورة
كالت بس الجارة مضروبة وتنزف ارجعي للدكتورة تنطيج ابر وعلاج
رجعت لكتورة كتلها وكع علي دم قليل
-اي ماما مو الجارة مفطورة وان شاء الله تصيرين زينه اهم شي الطفل بي نبض راح انطبج علاج واهم. شي الراحة ونامي ع ضهرج ورجال ماكو هاي الفترة
-اي
طلعت شفت رحمن يروح ويرجع شافني اجة يركض
-ها بشروا
عمتي حجت لا سلامات الطفل مابي شي وانطتها علاج وخيطوا راسها
-باوعلي ياريته بية ولابيج
يدفعني واني بالعربانة واني افكر منو دفعني احد شفته صار وراية ودفعني
معقولة يتخايلي لا لا شنو يتخايلي احد دفعني دفعة قوية
وصلت للسيارة شالني رحمن وحطني بالسيارة
والسايق جيرانه يسئلة بشر
-لا الحمد لله الطفل مابي شي بس هي راسها وجسمها متاذي
-الحمد الله ع السلامة
يحجون واني بين وجعي وبين منو دفعني راح فكري الينا بس ليش والله اني ابد مماذيتها ومجنبتها ومالي علاقة بيها معقولة توصل بيها المواصيل لهيج شي
وصلنا
عمتي ركضت كدامي فتحت غرفتها وفرشتلي فراش
وعمي فوك راسي ها بوية شلونج
وجدهم وجدتهم يصيحون بت الناس شلون هيج لوينة تدفعها
تعجبت شلون عرفوا
خلوني بالغرفة وكلها واكفتلي وكفة صدك اليزرع خير يحصد اني كلش زينه وياهم واحبهم واعتبرتهم اهلي واجدادهم مداريتهم شيردن اجيب الهم الحجيه الجبيره اكوده للحمام وادخل اسبحها ووو لذالك همه حبوني
عمتي كالت لنادية لطلعي خلي تنام ترتاح اكيد دايخة
طلعوا وسدوا الباب صدك اني دايخة وتعبانه بس ماكدر انام من الوجع مال راسي وجسمي
سمعت صياح بالبيت ورحمن يتهدد
اخاف اكوم بس ردت افتهم شكو
دخل رحمن علي
-منو دفعج وكعتي لو صدك لينا دافعتج
-باوعتلة عيونه نار اخاف اكلة اي تصير مشكله
عاط بيه احجي
كتله اي احد دفعني بس ماشفت منوا
-ولج جدتي شايفة لينا دافعتج يعني انت صدك احد دفعج ليش مكلتيلي ليش سد الباب وراح
بقيت ابجي ليش والله مماذيتها حسيت روحي محتاجة امي يمي رغم واكفيلي واكفة بس مو مثل حضن امي احس بالامان يمها
لينا كامت تصيح وسلمان ورحمن يصايحون وعمي يصيح متبقى بالبيت بعد فوك ما حامليها وصار خمس سنوات متخلف وساكتين تالي هيج تسوي تبقى بالبيت
بعد شويه صار هدوء جنها راحت لهلها
اني هم ع الهدوء نمت يمكن مطيني مسكنات .......
اية
امي كاعده
جان تكول اختجن اليوم ماخابرت شعجب
-اكيد رحمن مو بالبيت لان هي ماعدها مبايل منين تخابر بس من رحمن
-والله كلبي طاك عليها
يصير نروح الها ماما
-لا بنتي شيودينه بلكت هي تجينه اخلي رحمن يجيبها كم يوم يمنا
اي ان شاء الله
اندك الباب حييلراحت امي تفتح الباب
ونسمع صوت صياح
طلعت امشي
جان اشوف شكرية مرت ابو علاء
-ارتاحيني من اخذتي بواكت الزلم ماتستحين الله لا يوفقج ولا يهنيج
وضلت تغلط وتسب
بس امي جانت ساكتة ومحجت ولا كلمه
وهي تغلط ع امي
شالتني الحركة
اجيت عليها شبيج تغلطين
امي اشرتلي اسسس
سكتت
وهي نزلت علي اسكتي العرجة انوب مابقن علي بس العرج يحجن.
وكامت تحجي اخر شي وصلت للفشار والعار
امي كالت الها لهنا وكافي اتفضلي اطلعي برة
-تطرديني تره هذا بيت زوجي الي انتي لفتي عليه واخذتي طالعة بس اني الج
طلعت.
-ماما ليش ساكتة انتي ليش محجيتي
-بنتي خليها تحجي حقها محروك كلبها اني مدام اجيت عليها اتحمل شتحجي وصدك اخذت زوجها قلبل مجذبه بس الله اليعلم بس ردت رجال فوكانا
لذالك محجيت اولا لان حقها وثانيا عيب من ابو علاء بنتي ميخالف كلشي نتحمل ونسكت انعم الله ع الرجال من متكفلنا همه اخوتج ما اسئلوا علينا والله اليعلم منو الي كتل ابوج اخاف يطلع منهم
-معقوله
اي معقولة الفلوس كلشي تسوي
ايناس
طبت نادية بيدها صينية العشة
كالت كاعده
-اي اي كاعده
يلة حبيبتي تعشي حتى تاخذين علاجج
-اكولج لينا راحت لهلها
- اي ابوي طردها بعد مترجع الله لايوفقها ليش هيج سوت شكد حقيرة
-والله اني ماعندي شي وياها ابد
-اي ماندري بيج قابل هي هذا طبعها نحسة وتسوي مشاكل مو تحس بنفسها بيهانقص لذالك هجي تسوي
-الله يهديها.
رحمن هنا
اي
اريداخابر امي
-خطية لا تقلقيها شيجيها احنه يمج اي تحتاجين منقصر وياج
-فدوه لعمرج حبيبتي
بعد اسبوع
سلمان راد يرجعها وعمي يحلف مطب للبيت سلمان جان يحبها رغم يعرف بتصرفاتها بس يكول مرتي اريدها
كام عمي طردة كله اخذها واطلع من البيت طبه ماالها
وصدك ثاني يوم اجر البيت الي جنة ماجريه احنه وشال من عدنه
وبدت صحتي تتحسن الحمد لله
واكيد رحمن يركض وراي من صفحة لصفحة اكعدي لا تشتغلين
واني اتقيد اني مااعرف اكعد متعوده ع الشغل مو اخواتي معوقات واني الوحيدة اساعد امي والبيت نصة علي
فمتعوده ع الشغل
رحمن توضف حارس يعني شرطي حار بدائرة حكومية
وراتب زين والحمد الله
مرة رايحة للعيادة وايلاكيني اخوي نعيم ومرته بالعيده جانت مرته هم حامل
فرت روحي عليه ورحت ارمض حضنته وبستة شلونك خوية شخبارك
-انت شلونج اخواتج
-الحمد الله زينات
-وين صرتن
-امي تزوجت بالحلة واخذت البنات وياها واني هنا مثل متدري
-ها الله يوفقجن محتاجة شي
-لا سلامتك
يله رايح
رغم سلامة بارد جام بس شكد ارتاحيت من شفته اذكرت ابوي جان حيل يشبهه الله يرحمك بويه
حماتي كالن هذا اخوج
-اي اخوي
-شعجب لعد ميسئل عليجن
-ماادري هو طبعه هيج شنريد منهم المهم سالمين
اية
امي مدري شبيها وضعها مو طبيعي
وتصفن هوايه
-كتلها ماما شبيج
-ها لا ماكو شي طب عمي ابو علاء شايل مسواك كال هاج عمو فوتيهن
اخذتهن منه وامي ع حطتهن
اجه يمها سلم
اسمعة يكلها شبيج لونج مخطوفاني حامل
-شنو
حااااامل
-صدك تحجين
اجيت اني تقربت اسمع اكثر امي حامل
-اي صدك احجي رحت حللت وطلعت حامل يعني معقولة بهيج عمر واحبل
-واي شكو بيها احلى خبر سمعته خلي يثير عدنا طفل يربطنا شبيج ضايجة
-صدك تحجي اني كلت هسه تضوج
-وليش اضوج رزق واجانه بالعكس احلى خبر وع هذا الخبر الحلو اخذج اجيبلج احلى محبس ذهب يعجبج
اجيت اني صدك ماما صدك حامل حيصير عندي اخ عنون الله
-والله سويتلوي واهس افرح وياكم
-الله ماما حجيبين طفل خل اروح اكولها لنهلة
نهلة كاعده تخيط
عمي ابو علاء دخلها دورة خياطة كلها صنعة تفيدج بس جانت تصعب خطيه عليها لان رجلها مشلولات متحركهن ابد العصب كله ميت بس اديها فجانت تدوس الماطور بيدها بتك وينشلع كلبها
اجيتها اركض
نهلة امي حامل امي حامل
-صدك عليج الله بهيج عمر حامل
-عادي اصلا امي شباب بعدها فديتها جنها تفاحة
- اي والله صدك
بعد اشهر جابت ايناس ولد
وامي سوة سونار طلع بيها ولد
طارت فرح امي ولد يعني اخ النه فدوه حبيبي حتى لو صغير بس يكبر نكعد عنده ع الاقل
ايناس جابوها عدنا ومداريها ابنها بجنن هم عيونه زرك فدوه جنه لعابه
ومن ايد لايد ميوكع من عدنا لحد مااجة رحمن اخذها
ايناس رجعت بعد ماولدت
والفرحة عد عيالي شكيرها عبالك الاميرة وجبت ولي العهد كلها تبوس بيه ومن حضن لحضن
اول اسبوع انخطبت ناديه لرجال مزوج جبير وزوجته ميته
عمتي كالت جيته خير اموري سموه امير
وازوجة نادية وبيوم عرسها شافوا سمية وحجوا عليها بس الفرحة ماتمت جد رحمن توفه واجلوا الخطبة
اية
امي حيل تعبت وجانت حيل خايفة تجيب الطفل هم معوق جانت تفكر هواية
الى ان امي جابت جابت الولد الحمد لله صاحي وكلشي مابيه الولد جان يشبه علاء كولش فدوه
طبعا علا ابتعد هاي الفترة بسبب امة مانعته يدخل علينا واني عاذرته بس حيل اشتاقين اله
واتمنى اشوفة
وبعد ولادت امي بيومين اندك الباب. فتحته جان اشوف شكرية وعلاء بالباب
وجان الشر بعيون شكرية
شكرا لزيارتكم عالم روايات سكيرهوم
