رواية سواد الاثمد الفصل الحادي عشر بقلم نورس
انفتح الباب وفات هو يخابر اجيت اطفر اصعد فوك بس استوقفني من جاب اسم ماما درتله بسرعة
شبير :- زين دزلي رقمها تاتحاجيها يصل سلام
سداه اجيت گدامه :- راح احاجيها
- رقمها طلبتو من مآب عياخذو من خالي ويدزو لتليفوني
گعدت عالتخم عيوني مغورگة واني اتذكرهن والابتسامة شاگة حلگي ممصدگة احاجيها
گعد هو گبالي واحد يباوع للثاني بالختلات ومن تلتقي عيوننا نرجع ندنك وصلته رسالة فتحها ابتسم طگطك بيه شوي خله التليفون عالطبلة ودفعه عليَّ
اخذته رقمها صار گبالي دست اتصال واني طايرة گلبي يدك يدك احسه يريد يطلع من صدري اجاني صوتها
جانت تعبانة :- ألو
- ماما
متحملت حجيتها وشهگت بسرعة ايدي ترجف گوة لازمة التليفون واسمعها هي هم تبجي وتصيح بأسمي
شدن :- نورجان ماما يروحها لأمج يا نظر عيني ردي جاوبيني لتسكتين دا اسمع صوتج
جريت نفس وحجيت :- اشتاقيتلج ماما
- سودة عليَّ يماما فرقونا الميخافون من الله اخذوجن مني اخ يحسرة گلبي شكبرها عليجن والله الليل منايمته وانتن مو يمي شلونج شلون عايشة
- زينة حبيبتي انتِ گوليلي شلونج بان وينها دا احجي وياها
سكتت شوي ما ردت :- شبيج ماما صاير شي لبان
- لا حبيبتي ماكو شي بان مو يمي هسه دتسبح من تخلص اصيحها الج تحاجيها
- محتاجتج يمي اريد انام بحضنج
شفته تنهد وگام صعد خلاني براحتي
حجيت هواي وياها من اول موصلت لهنا وشگد بيت عمو تيم طيبين وياي ويعاملوني زين
جنت أحجي بس بلا نفس مثل المخنوگة
وهي حبيبتي حست بسرعة من نبرتي وسألتني
شدن :- نورجان شبيج صوتج معاجبني
ضليت ساكتة گالت :- ماما احجي لتشلعيلي گلبي بيج شي سولفيلي لتضمين عني
من حجت هيج مسيطرت على روحي صارت دموعي تنزل وصوتي مسموع تخبلت عالتليفون وتصيح بأسمي
عاد متحملت حجيتلها كل اللي صار بيني وبين شبير
تهسترت تحجي وياي تصيح ما أفهم كلامها آخر شي گالت :- انطينياه
نزل هو عالصوت شافني دموعي ووجهي حالتي حالة
عقد حاجبه وتقربلي مديتله التليفون بدون لا اباوعله
اخذه مني گال :- شبيج نورجان
اجاه صوت ماما صوتها حان عالي خلى التليفون على أذنه وصار يسمعلها ما أدري شنو تحاجيه بس وجهه دخن
عفتهم وصعدت فوك دموعي تنزل واسمع صوته صار عالي مشيت للدرج واباوعله من فوك أعصابه صارت نار ويروح ويجي بالصالة ويتصايح وياها
يگلها :- وانا جاي اگول حگج وما ألومج بكلشي تحجيه بس تجاوزج هذا ما مقبول وانا عاذرج هساع
آخر شي شمر التليفون بالحايط سواه طشار وگعد عالتخم يهز برجله بعصبية وجهه انطعن صار أحمر
خفت من شكله عفته وخبست روحي بالغرفة
ثاني يوم الصبح گعدت غسلت وجهي رتبت شعري ونزلت للمطبخ مثل كل يوم عبالي طالع لشغله
تفاجأت من لكيته كبالي بالمطبخ واكف عالطباخ حس عليَّ اندار شافني ابتسم :- صباح الخير
سكتت مرديت ودا امشي اجه بسرعة صار بطريقي معترضني :- شبلاج يالفحلة
حجيت مترددة
نورجان :- وخر اريد افوت
- نورجان عينج بعيني
مرديت وضليت مدنگة لزم وجهي رفعه مقابل وجهه
صفن بعيوني شوي وراها تنهد بحسرة
گال :- نورجان لتجافيني هيج ومحمد گلبي ما عيحمل بعد
- اريد افوت
- نورجان
مرديت رد همس :- يولي
هم مرديت
رجع همس :- يالصفرة
نزلت دموعي درت وجهي عنه گعد للگاع لزم ايدي
شبير :- ومحمد جنت شارب مو بوعيي متندم بكد شعر راسي
وخرت ايده :- زين لتردين ميخالف ولتحجين وياي بس لتگلبين وجهج عني اسيب بلاية عيونج الشهل وروح ابوي
- شتريد شُبير
- هاا هي هاي الاريدها الراء متنكطع من لسانج
- ما اگدر اتعامل وياك طبيعي بعد الصار
- والله اعرف انا واحد ساقط فاين حظو من يومها ما خليتو بحلگي بعد والله رووحي مشتعلة يولي الليل ما انامو من اتذكر دموعج وشكلج من تبجين شهگاتج شگتو لصدري
- انطيني مجال ما أگدر هيج
- حگج يبا ما طلبتي غير حگج بس مو مال كلمن يعزل أكلو ونومتو بعد شوفي سويت ريوك وأظن البيض أحترك
حجاها اندارينا اثنينا الطاوة مدخنة ركض خلاها بالسنك وفتح المَي عليها زاد الدخان ترس المطبخ
اندارلي :- راح ريوگنا يولي
درت وجهي منه راح لعمو هاشم شوي ورجع جايب منه بيض اخذتهن منه وگفت اسوي وهو واگف يساعدني
عفت من ايدي وانداريتله :- شُبير دتضايقني وخر
رفع ايده صاح :- يابه آسف اخذي راحتج
جر كرسي وگعد عالميز مال طعام بيده تليفونه بس جذب كل شوي اباوعله الگه عينه عليَّ ويرجع يدنك
تريگنا وغسلت المواعين من يحجي وياي ما أرد مو ميانتنا القديمة هو يحاول وياي بس اني جامدة
باوعت لملابسي صارت كلها مي
صعدت اخذت ملابس وطبيت اسبح مشطت ورتبت نفسي ووگفت هواي اباوع بالمراية على نفسي
سمعت صوته من حوة يصيحلي نزلت جوة لگيته گاعد بالصالة مدنك على تليفونه اول مشافني طفاه وباوعلي
گال :- تعاي هين گابليني تاحاجيج
- ماريد احجي وياك
- نورجان صدك احجي
شفت ملامحه صارمة وجدية مشيت گعدت گباله
تنهد :- دحگي يولي احنا اليوم رادين لبيتنا
رديت بفرحة :- صدك
- الليلة حنتي
تلاشت ابتسامتي وهو سكت يشوف رد فعلي
گتله ة- شنو يعني مدا افتهم
- حنة يولي أهلي لكولي مرة وصار فترة نجهز للعرس
حجيت من بين رعشة شفايفي :- ليش اني وياك مو عاقدين
رفع حاجبه :- عجل مو عقدنا خاطر نسد حلوك گرابتنا
- بس شلون تتزوج مرة ثانية واني
عقد حاجبه :- انتِ شنو
- يعني ميصير تتزوج واني على ذمتك طلگني لعد
هز راسه :- ايه من نرد هناك اخلي السيد الراح يعقدلي على عروستي الجديدة يطلگنا انا وياج
عضيت شفتي خليت خصلة شعري ورة اذني
گال :- عش تبجين ترى انفرضتي عليَّ فرض انا ما اختاريتج
- لا صح اني شعليَّ مجرد دخيلة بحياتكم أهلك فرضوني عليك
گمت من مكاني گتله :- مبروك تتهنى ان شاء الله حروح اجهز الجنطة
درت وجهي نزلت دموعي غصب عني احس گلبي انسحب من صدري صعدت فوك اباوع لنفسي
شبيج نورجان ليش تبجين نسيتي شسوة بيج
ما ادري شصارلي احس گلبي كام ينغزني وجع فضيع يعصر صدري نزلت بالجنطة لگيته منتظرني قفلنا البيت وطلعنا سلم على عمو وسلمه المفتاح مال بيت
صعدنا السيارة اثنينا نصفن وشاردين بغير عالم هو حيل ضايج وعاقد حاجبه يسوق سريع شوي ونندعم
حتى الطريق ما اتذكر شلون صار عليَّ من الصفنة دموعي كل شوي تخوني تنزل بسكتة وارجع امسحهن
وصلنا هناك هوسة مال شباب برة البوابة مفتوحة رفع ايده من الجامة يسلم ودخل السيارة للگراج اباوع حديقتهم متروسة زلم والاغاني عالية وصايرة هوسة
اجاني فتح الباب باوع لملابسي أشرلي اوگفي
صاح على واحد من ولدهم جابلي شال خلاه على راسي اخذني بيده يضمني من عيونهم
دخلنا من باب المطبخ ايدي بأيده عيوني مغوركة والشهكة لازمة صدري صارت بوجهنا كومة مال نسوان تتقدمهن عمة شيخة اول مشافنا اشتغلت الهلاهل والچُكليت صار ينطش من كل صفحة
باوعتله فاتحة عيوني ممفتهمة شي وهو يضحكلهن اجت عمة شيخة باوستني وتتبارك واني عيني متشكلة على شبير اللي التهى بأخواته يتجنب يباوعلي
گامت تصلي علينا وبيدها المبخرة
واشوف بوجهه فرحة كبيره
حسيت بأيده صارت ورى ظهري وصاح :- عمة
أشر لعمة شيخة بعيونه عليَّ اجت اخذتني من بين الهوسة ضل واگف يم خواته يشاقيهن ويحجي وياهن
صعدتني لغرفة شبير واني براسي ألف علامة استفهام
وعمة تحجي وياي
شيخة :- عين الله ترعاكم يمة جان منى عيني يوم الاشوفو عريس جدامي اندار فدوة لطولو يا عيني وشلون جمارة أعطاه تسوالها ديرة عين الباردة
سكتت ودنگت راسي الغصة بعدها بصدري
شلون تحجي بيها گدامي أعرف زواجنا
جان شكلي بس مو يزوجونه واني على ذمته
عاد ينتظرون لبين متجي ماما تاخذني
نزلت دموعي مسحتها ودرت وجهي
اجت گعدت يمي وتباوع لوجهي متعجبة
- عمة شبلاج مادة البوز والدموع تهل عالخدين عجل هذا وجه عروس اليوم حنتها
رفعت راسي بسرعة ممستوعبة الي گالته
نورجان :- عروس منو
ضلت صافنة بوجهي :- وعلي تسودنت البت ولج شعاملج هالمصگوع ومخليج مثولة هيج
- عمة يا عروس والله دخت اليوم غير حنة شُبير
- اي حنتو قربان وجهو
- العروس منو
- يا دحك الحظ تكول منو العروس انا عمة انا العروس
- عليج الله
ضحكت شافتني صدك محتارة لزمت ايدي
- شبلاج يعمة عجل غير حنتكم انتِ وهالمصگوع
صفنت :- حنتي اني وشُبير
- اي عش مو تممتوا زواجكم خالو فدار كلو نشهر الخبر بين گرابتنا ونسوي حفلة نعزم بيها الوادم اثنينكم عمت عيني ضليتوا لا عرس ولا زفة
- بس لحظة لحظة عمة ترى شُبير مفهمني هيج ومگلي مسوين الحنة النا شلون هيج وشوكت عرفتوا بالصار
عقدت حاجبها :- عجل شگلج
- گلي اليوم حنتي بس مفهمني اني العروس عبالي وحدة لخ
ضربت فخذها :- صخم الله وجهك يشبير
باوعتلي :- مو انا اعرف فواينو ما ينلام بيه تيم من مسح بيه الگاع على سوايتو الغبرة مشى من هين وانا أوصي عمة البت أمانة عمة مثل أخيتك لا تدنالها عينك عليها وهو يجي يحلف ويتكفر ما عندو شي وياج
لحد گبل چم يون اجانا وجهو ما يتفسر ما ينفهملو لون عاد شبير بساع يبين عليه حسني گلبي عرفت بيه شي وضامو علينا حاولت وياه ما انطاني حجاية عتريح الگلب گمت حاجيت اخوه لزمو من خوانيگو گلو احجي
گام خرط علينا السالفة كلها والله لا يوريج المشكلة العجت بينهم هذا يصارخ واللاخ يبرر ما عوزو يبجي گمت ندهت لخالهم تايجي يحلها وعاد اجى فدار گلو تايتمم زواجو منج وتعقدون محكمة فد مرة ونخلص
هي تسولف واني ألعب بأظافري توترت حيل شنو يتمم زواجه شنو نعقد احس عقلي گام ميحمل كل هالكلام
باوعتلها :- بس مفهمني هيج والله ليش ضم عليَّ
مدت ايدها حاوطتني بأيدها تمسح على متوني
اشوف بعيونها نظرات الأستعطاف الي تنهدت
گالت :- حگج يعمة حگج كلشي صار خارج ارادتو هو حلف گال ما جان واعي وصار اللي صار ولوما رايدج ومتمسك بيج ما جان قبل يكمل بهالزواج وياخذج يحسبج حرمة الو
صرت اشاهك ودموعي جرت فد جرة اخذتني لحضنها تمسح على ظهري جنت محتاجة ماما حيل وشفت بعمة شيخة حضن ماما الدافي شبكتها حيل وانفجرت بجي
نورجان :- عمة ما اريد اتزوجه ماما كالت حتجي تاخذني
باوعتلي بوجهه الحيرة :- عش هيج يعمة صح الصار غلط بغلط بس الولد عاشگج ادحك عيونو تحوم عليج وتتحسر ومن گالو خالو فدار تعدها حرمتك وتعقد محمكة ما صدك الگاع ما سايعتو لا تكسرين بفرحتو
- واني شذنبي من كسرني
حجيتها ورجعت اختنگت وبجيت صارت تلوب يمي ووجها يذب ألوان وتهم بالناس المنتظرة والمعازيم
باوعتلها واني ابجي :- گوليلهم متريد تتزوج اريد ماما هي گالتلي حتجي تاخذني
صارت تردد :- لا حول ولا قوة الا بالله شگول عليك يعمة خليتنا عنفر بروسنا
ونزلت على شبير بالحجي والملامة والزمو لو ما الزمو
اندك الباب وصوت خشن اعرفه صاح :- ول يمة وينج
شيخة :- فوت يبعد امك هين
انفتح الباب وفات عمو تيم بدشداشته الكحلية بيده سبحة يفر بيها شافني ابجي عقد حاجبه ودار لشيخة
تيم الله :- شبلاها
- هذا اخوك الله هاطرو ما معطيها خبر وصارت بوجه هالمسكينة
فتح عيونه :- وشلون ما حاجيلها انا من يومين گتلو يگعدها ويحجي وياها بيناتهم ويفض الموضوع خاطر اذا قابلة البنية نبدي نجهز وهو خابرني گلي قابلة
تنهدت :- ما رايدتو يمة البت تريد امها
- دحگيلي بابا نورجان
باوعتله من بين دموعي صفن بوجهي عاقد حاجبه دار وجهه استغفر ورجع وجهلي الكلام
تيم :- انتِ ما رايدة هالزواج
هزيت راسي لا
گال لعمته :- عجل شلون يگلي حجيتلها وأخذت رأيها وقبلت نكمل بزواجنا انا يضحك عليَّ هالأخلاق سز هذا تالي وكت وتلوميني من أگاونو على فواينو يلا بله هسع جيبي الي يحلها
- گول يا الله الا ما يحلها الحلال
- يمة الله يخليج يا حلال هذا اسمعي البنية عتگلج ما اريدو الأخ طرحنا زواج انا وخالي وخلانا نعزم خلك الله كلها روحي شوفي البيت يغص شگلهم بله
- يمة شبلاك دومك ترعد ما شفنا مطرك عطينا مجال دحك هالبت ماعت روحها تناشغ
باوعلي سحب نفس طويل ودار وجهه يستغفر يحاول يتمالك اعصابه ويحجي هو وعمة لحد ما صار أعصاي وصار صوته عالي وبدا يصيح ويتحلف بشبير
خابر عليه يريده يجي غسله غسل بالرزايل والفشار
وسد التليفون وضل واگف ينتظره وهو صاير نار
باوعلي :- شگلج الشفيه بل لا تجون
مسحت دموعي كتله :- كال اليوم حنتي أهلي لكولي مرة وانتِ انفرضتي عليَّ وبعد ما اريدج
شبير :- زتيهن كلهن لتخلين شي
رفعت راسي شفته بالباب تيم مصدك شافه زمخ بيه زمخة من عندي انخلست وراحله لزمه من ياخته وجره يصيح عليه تخبل عليه اول مرة اشوفه بهالعصبية
وعمة لازمته تهدي بيه تگله :- يمة اندارلك فدوة لا هيج الناس ملتمة جوة والشمات هواي لا تعلي صوتك كلشي ينحل بالتفاهم لخاطري لا تشمت الناس الغرب بيكم
گوة جرته منه ووگفت تحجي وياه وهو ولا جنه عاقد الحاجب ضايج اجه گعد بصفي مدنك يهز رجله
صاح بيه :- ول شبير يالأمعة انا تضحك عليَّ أملص عيونك من مجانهن شلون ولك تگلي هي تدري وراضية بالزواج انا شوصيت
انتَ عش تفور أعصابي يمتى تعقل فهمني
رفع راسه گله :- هي قابلة من گلك ما قابلة
- لا والله
شبير :- هاي گدامك واسألها
باوعلي :- نورجان انتِ راضية
هزيت راسي بـ لا فتح عيونه على وسعهن خزرني خفت من رد فعله وكمت وكفت يم عمة شيخة عمو صاح بيه
تيم :- اي اخرزها يول بعد گوم جدامي انطيها طراگين لشوف يلا يالسبع
دنك راسه يهز رجله بأعصاب وعاقد حاجبه حاله انگلب
باوع لتيم گله :- بسيطة يخوي حلها عندي
- يلا لشوف حلها اذا انتَ زلمة بهاي الناس والهوسة المنتظرة جوة
- انعل ابو الناس واحدهم جاي يطربك ويحطلو سم بحلگو وينگلع
- لا عاشت ايدك والنعم منك والله
هز راسه وهو يتحلفله :- ثق بالله لوما هالعالم الواگفة جوة جان لزمتك من خوانيگك سحلت بيك الغربية كلها وخليتهم صغار كبار عتضحك عليك
- على راسي
صاح :- انكتم واكل تبن باثنين اديك
باوعلي أشرلي عمو تيم اجي يمه رحتله
گعدني على كرسي وجر كرسي لاخ گابلني
- دحگي نورجان والحط هالرگبة دام انا بهالبيت محد الو كلمة عليج ولا احد يجبرج دامج ما رايدة هالزواج والصار انا أتحمل مسؤوليتو حگج تاخذينو من هالشارب
أعرف الصار صعب عليج وبعدج صغيرة بس ياريت بالج وياي وتفهمين كلامي وهذا هو گاعد ويسمعني شبير نادم عالسواه ويدري بغلطو وما رايد يكسر بختج شاروا عليه ياخذج تايعترف بزواجو منج وما گال باطل
دموعي مسكتت طول ما هو يحجي
تنهد :- عش هالبجي يا عيوني والله العظيم هو رايدج
رديت :- بس اني مرايدته
گام وگف يصيح :- نعلعلة شرفك شبير لابو الساعة الدحگت وجهك بيها لابو مرضعك لابو منين ما طلعت
شيخة :- يا شبلاك اهو هيج الحجي عتسب بالموتة دستغفر ربك وگول يا الله
- هيج ونص تايعرف حك الله عجل كسر البنية بدون رضاتها وضحك علينا وهسع تايريد ياخذها گوة ويفرض رايو عش وين گاعدين هيته هي خوما هيته
- وشنو راح تلغي الحنة عجل هاي الناس العازميها شتگول علينا
- ما ادري يمة ما عتسمعين البت ما رايدتو نجبرها تاخذو بالگوة
- دستهدي بالرحمن وخابر خالك فدار واگعد شاورو الا ما تلگون حل بالعگل
- هو ابن اخوج خلى براسي عگل
شبير :- يابا أدري غلطت وحگك شما تحجي وهذا انا جدامك رايد أصلح غلطتي وطالبها للزواج
- انكتم ابن السايب عود حجه هي ما رايدتك
اندار لعمة شيخة :- يمة واليرحم أهلج أعطي خبر لخالي تانشوف صرفة لهاي المصيبة عينج عليها لتخلين وحدة تصعدلها من البنات ماريد قيل وقال
شبير من شافها قافلة عنده فد مرة وما منطيه وجه عافنا وطلع رگع الباب حيل ضايج وجهه محتقن
شيخة :- كسرت خاطرو ودست وياه بالحجي عش هيج
تيم :- انجعلو بالكسر عجل والجاهل هاي شذنبها
- گلبو هاويها ييمة
- طز بيه وبگلبو
- صاير فدنوب وياه
- والله لمصلحتو تايتوب من دربو الأعوج اگول بلكي يعدل وينهجب ولو ما ظنتي الناس كلها تنعدل الا شبير يزيد ما ينقص
اندارلي :- اسكتي ابوي وامسحي دموعج والله ما يصير الا التأمرين بيه
هزيت راسي ومسحت دموعي ولزم راسي باسه
اخذ شيخة حضنها من ورة يحجي وياها وطلعوا اثنينهم من الغرفة جريت نفس وحسيت براحة
الحمدلله عمو تيم وياي على اخوه ونا راضي باللي سواه من صدك احس اكو سند بظهري
يمكن ربع ساعة بالزايد وانفتح الباب شبير ماد راسه
شافني فات وسد الباب كمت بسرعة من مكاني مفزوعة
نورجان :- اطلع ترى والله اصرخ وألم الناس عليك
شبير :- دحكيني كمت أرجف دهجبي لج الصفرة لا أخربط معاني وجهج المفهية
گام يتقرب واني اتراجع بخوف
گتله بتهديد :- وحق الله اگول لعمو تيم بس تسوي شي
- وينو عمج ما عدحگو هين هسع انتِ بغرفتي
- وخر اريد اطلع
ما اهتم وتقدم اكثر بأتجاهي صار ظهري بالحايط وهو گدامي قريب محاوطني من الجهتين وجهه بوجهي وايدي على صدره امنعه يتقرب زايد
عقد حاجبه وگال بجدية :- عش رافضتني نورجان
- ما اريدك
- وگلبي
- عمو تيم يكول طز بيه وبگلبو
عض شفته :- ويلي ربي النوب تحجي أنباري
- والله هو گال اني مالي علاقة
- وانا شعلية بتيم انا احاجيج الج يولي عيوني صارت ما تدحك غيرج وروحو لأبوية
- شنو يعني
تقرب أكثر همس :- أريدج مرة الي
دفعته من صدره وخر راسه تنهد وهو على نفس قربه
- لا تشعلينو لگلبي يولي هسع ننزل انا وياج وآخذج جدامهم گليلهم موافقة لتكابرين أدري بيج تحبيني ورايدتني
- لا
صاح :- لتفهين نورجان وتحرگين أعصابي تدريني هاويج هسع تنزلين تگليلهم قابلة اكمل بالزواج
- ماريدك گوة هي
نصى صوته :- يولي أحبج والله ورايدج أدري عقدنا صار بظروف لا انا ولا انتِ جنا متوقعيها وأعترف انا غلطان والصار بذيج الليلة جان خارج إرادتي بس لا تظنين انا رايد أكمل وياج علمود الصار بيناتنا
انا صدك حبيتج يولي ورايدج كلج بكل تفاصيلج تصيريلي حرمة على سنة الله ورسولو جدام العالم
ضليت ساكتة واتظاهر القوة بس رجلي أحسهم مثل الريش شوي واوگع من طولي من كلامه
گتله :- بس اني ما أحبك ولا رايدة اتزوج
ضرب الحايط بعصبية
- عنج لا حبيتي عجل شحاسبة روحج واكف اتوسل بيج ومنزل روحي لخاطرج وانتِ رافعة خشمج شبالج الخلقج ما خلق غيرج روحي عنج ما حبيتيني ولا قبلتي
خله وطلع وسط صدمتي بيه وتقلبه المفاجئ
شوي واجتني عمة شيخة هم تقنع بيَّ تريدني اقبل عرفته هو الدازها وطلعت بعد ما يأست مني
اول مطلعت دقايق وانفتح الباب رجع فات گمتله
نورجان :- يعني وتالي شُبير
- خرب روحو نعال بس دحك الراء وتريدني اعوفها
- استغفر الله گتلك مراح اقبل
- حرام عليج ومحمد خلي بگلبج رحم صار ساعة اتوسل بيج
- ممجبور گتلك ماريد
- والله أحبچ
دنكت ألعب بأظافري :- همم
- اي هممم كلو من روى خالي هو الزتجن علينا
باوعتله رافعة حاجبي كال :- أحلى زتة وعيونج الشهل
صار گدامي
- لتتقرب أكثر والله هالمرة اسويها واصرخ
- ما عسوي شي والله بس احاجيج
هدأت بعد مشفت حاله صدك وضعه مختلف غير كل مرة عوزه بس يبجي وهو يباوعلي يريدني انقهر عليه
- لتحاول
- يا برود گلبج ما ظنتي هيج تصيرين قاسية ويَّ شبير
- انتَ جبرتني أتعامل وياك هيج
حجيتها واختنگت تذكرت الصار مثل الشريط مر گدامي
- يابا وروحو لأبوي وروح أمي الما حالف بيها چذب كلشي صار وانا مو بوعيي من يومها وانا مثل المخبل ادحگج گدامي بالمركز بالبيت بنومتي ساعة الاغمض
عيوني صارت متشوف غيرج نورجان حالي مو حالي حتى انا مستغرب من روحي من بين كل العرفتهن گلبي يهوى وحدة زعطوطة متدري الله وين زاتها من الثول
باوعتله گال :- اي لتدحگين هيج زعطوطة وفاهية وفوگها ثولة وساحلتو لشاربي وراها وانا المرجف زلم
- اني
- عجل ابوي مو اگلج ثولة تزعلين
ضليت ساكتة حجه يتوسلني :- يولي لا ترديني هذا ابن الخوش حرمة حط راسو وراسي تايريد يتوبني لتخليه يتشمت بيَّ عجل مو انا رجلج
- منو
- اكو غيرو تيم يابا اذا ما اتبريت منو ما اتسمى عالزلم
- بسيطة الا اگوله
ابستم :- ابوسهن هالعيون الحلوة والله ما عيصير الا التردينو بس لتكسرين بيَّ يول ما كسرت خاطرج وانا أتوسل بيج
بخنگة گتله :- اني هم توسلت بيك من جـ..
ما خلاني اكمل خلى اصبعه على شفايفي يسكتني
- اشش كافي انسي الصار ماريدج تفكرين بهالموضوع وادري هالشي صعب هاي انا جدامج رايد أفتح صفحة جديدة وياج ونبدي بداية حلوة وترجع علاقتنا مثل ما تعرفنا بأول ايام ساعة ما دحگتج بيها بـ بيت خالي
ما أگلج حبيتج من ساعتها وإذا گلتها يعني انا جذاب بس ما انكر جنتي لافتة نظري وخليتيني اركز وياج وبتفاصيلج من ورى تصرفاتج الجانت تصفني من الثول
تخيلي حبيت ثولج وفهاوتج قبل شكلج وراها صرت أدقق وأركز أكثر بيج عيونج الشهل الماخذة عقلي لو صوتج وهو يتنعوص من تحجين ما أدري والله بس كلج حبيتج ولگيت روحي غرگان بتفاصيلج
ضليت ساكتة واباوع لرجلي احرك بيها صاح :- حلو الصبغ بس عوفي طرگاعة الله وخلي عقلج وياي
زفرت نفس طويل وحجيت :- شتريد شُبير
فتح عيونه مصدوم
- عجل هذا الرطين كلو وشريد لا انتِ ثولج اليوم ناوي عليَّ
مسح وجهه بنفاذ صبر وگال :- ميخالف ارد أحجي وانا الممنون
لزم ايدي :- يولي انا شبير ابن عزام ابن صبحة طالبج انتِ الأنثى المثقفة نورجان بنت شدن على سنة الله ورسوله
- أخيرا اعترفت اني أنثى
عض ايده بقهر وهو يباوعلي ابتسمت غصب عني على ردة فلعه ضل صافن عليَّ وعلى ثغره ابتسامة خفيفة
توترت من نظراته خليت خصلة شعري ورى أذني واني مدنگة وارجع ارفع راسي اباوعله على نفس النظرة
- لتباوع هيج
- هايم انا يولي هايم
- لتحاول مراح اتأثر
- بداعة امج
- ما
- بداعة أختج
- ما تربيع
- بداعة أبيج
- ما تكعيب
صفك ايد بأيد صاح :- رحت بيها شبير فعلت عليك شخصية الكلفه بعد ما منها
تنهدت :- زين تريد جوابي
- يولي إذا بعد هالرطين كلو تگولين لا ترى هذا الشباك وأشمر روحي
- لا
عقد حاجبه :- شنو لا
- اني موافقة بس بشرط
گام وگف :- يــا محمد العربي وجرتي گلبي هيج ومن الاول سحلتي الخلفني لا ضلت كرامة لا هيبة كلهن انزعن وسگتي على شبير وشاربو لشبير
- مراح أقبل الا تقبل بشرطي اول
- أأمري يالصفرة شبير وعشيرتو طوع أمرج
- اريد أخابر ماما بالأول حتى يصير عندها علم بهالزواج
- هي تدري
- تدري البيناتنا بس عقد متعرف راح نكمل زواجنا
هز راسه :- حگج ما طلبتي شي انا هسع اخلي خالي يخابرها ياخذ منها الموافقة بعد تأمريني بشي
هزيت راسي جر نفس بأريحية ويباوعلي
شبير :- ركضتي المركضهن يالصفرة
باوعتله :- والله ممسوية شي
- اضحكي عليَّ اذا ما طلعتها من عيونج بسيطة انا الج
راح وهو يتوعدلي سبحان من غير حالي من خال لحال قبل ساعة جنت ابجي ومقهورة وهسه الغرفة مگاعد توسعني من فرحتي مدري من كلامه لو لمعة عيونه الشفتها وهو يحجي ويعترفلي
گمت افتر بالغرفة مثل الفراشة واتذكر كلماته وهو يهمس بأذني باوعت بالمراية لنفسي وجهي مورد والابتسامة مالية وجهي جانت مشاعر أول مرة أعيشها
دخلت عمة شيخة شافتني وهلهلت وراها بنية
اجت باوستني
شيخة :- فدوات طولج عجل هيج ومن الاول عش شلعتي گلوبنا شو انتوا واحد نفسو بالثاني
ابتسمت بخجل وضليت ساكتة
صاحت للبنية گلتلها تجهزني عالسريع باوعتلها صافنة
گالت :- عش تدحكين هيج عجل غير عروس اليوم أريد وجهج يضوي عيدحگون حرمتو لشبير شلونها
جنت فرحانة وگعدت گدام ميز تواليت أوصي بالبنية شنو تسويلي بدون هوسة هفت بضوجة اندارت لعمة
گالت :- عمة شيخة شو عروستكم هواي تتشرط
- جعلها تتشرط منا للصبح شرايدة منها سويلها الي بنفسها
نورجان :- ماريدها عمة تريد تخليلي ألوان مدري شلونها أطلع مثل السحارات اني ما أحب هيج
- عشتو وانا ماريد بعد أمكيجها
- عايز تتكافشن من الروس جدامي يلا عاد الناس مناطرة تاتحنيكم
- والله متلزمني
عندت ويبست راسي وهي هم مدري شلونها تباوعلي وتگلب بعيونها گلت لعمة :- اني احضر نفسي
باوعتلي بحيرة :- وتگدرين خليها تعاونج عاد
- انطيني بس نص ساعة وخليلي الجنطة البيدها
من شافتني معندة محجت بعد انطتني فستان قبل لتروح واكسسواراته وخلت جنطة المكياج ونزلن
فتحت شعري مسرح على طوله حاطه روحي بيه مهاملته ابد طلعت كاوية من الجنطة برمت اطرافه ورفعته من الجوانب ونزلت خصلتين من گدام والباقي مفتوح على طول ظهري
تذكرت ماما وهي تعلمني عالميكب :- الكُحلة من تخليها بس عالجفن العلوي بمنبت الرموش حتى تبين الرموش كثيفة
المسكارة تمسكرين رموشج كاملة وبالمرة الثانية تطمسيها وترجعين تمسكرين بس الأطراف
أحمر الخدود اذا دنيا الليل لازم اختار ألوان دافية وإذا نهار لازم ألوان باردة
الآيلاينر اذا لونه مو بني ميتسمى آيلاينر عندها تگول ينطي سحبه ومنظر طبيعي للعين اكثر من الأسود
والحمرة شي بسيط ينطي لون للشفايف
باوعت لروحي بالمراية :- والنبي حلوة
لبست الفستان جان طويل لونه اوف وايت ويجي مخصر عالجسم لبسته جسمي انصب صب بيه واني هم سمنانة بآخر فترة اجه فيت على جسمي
لبست تراجي واسوار ناعمات ولبست الكعب باوعت لنفسي بالمراية طالعة كُلش حلوة ميكب خفيف لبس بسيط وتسريحة بسيطة برزن جمالي
انغرمت بشكلي كل شوي اباوع بالمراية وافتر بالفستان
اندك الباب رحت فتحته صارت اخته گبالي وياها وحدة معرفتها فاتت تباوعلي وگامت تصلي عالنبي
صابرين :- روح شبير تتهنى عجل من حسبلها من غادة بنت عمي وطفر طفرة لهالگمرية
سعاد :- والله وگعتلو صغيرة ومنمنمة وشگرة اجتو عدلة لحضنو
جنت مستحية منهن حيل ضليت بس اوزع ابتسامات
باوعتلي وعقدت حاجبها :- عش ما لابسة ذهبج
نورجان :- ما أحبه
- عجل هيج يضلن رگبتج وايدينج فارغات ميصير
مشت للكنتور مالته فتحته طلعت علب ذهب ووگفن يباوعن ويستنگن :- دحگي شيخة كلو جديد مشتريتو
صابرين :- عجل كم شُبير عندنا يستاهل اهو وحرمتو خليها تدللها
- ما عتذكر جبتولي هالكد ذهب بمهري
- جبنالج الأكثر يعين گلبو خوية سلام لهساع ينگل ويرد ليورى بس بني آدم ما عيرضى بالعندو وعينو على حاجة غيرو
- عش هالحجي صابرين هسع انا صرت ادحك على هاي الزعطوطة
- الزعطوطة هاي تصير حرمتو لشبير والها اسم ومن اليوم حالها من حالج بالعائلة انتِ چنة وهي چنة
شفت هاي الوياها ضاجت وثگل وجها اباوع لأيدها مليانة بتوت ذهب المحابس كل اصبع بيه محبس من هذولي الضخمات والگلادة اللابستها ثگيلة
عمة شيخة وصت صابرين تعوف الذهب حتى هو يلبسنياه انطتني شال نفس لون الفستان گالت
- خليه على راسج الخال فدار جوة تايحاجيج
بس خليته على راسي بدون لا الفه ونزلت وياها جان بغرفة درة بعيد عن هوسة النسوان دخلنا
اول مشافني ابتسم سلم عليَّ وباس راسي وضل واگف ايده على متني حاضني يمه عمو تيم وشُبير الي عيونه ما انشالت عني من اول مشافني
لحد ما عاط بيه عمو تيم :- عينك لك
شبير :- يبا حلالي احد طالبني بطلابة ترى اكوم ابوسها والله
تيم :- انكتم شبير حدي واصلة لجاي من عندك
اندارلي :- وانتِ يالعثرة عش قبلتي بهذا الخبل مو هسع عفتج تصارخين ماريدو لو أكل بعقلج حلاوة
- والله صرت اشك انتَ اخوي
- انكتم
- بس لو تدحكها شلون اول ما طلعتوا اجتني تتوسل تاقبل بيها سحلت روحها سحلة حتى الكاع نظفت بس هي جانت خايفة منك
ضليت فاتحة عيوني كتله :- لا عمو والله جذاب هو سحل روحه حتى كلي سحلتي شواربي وراج
كام وكف صاح :- لا يا الله عتبدي تزتهن
تيم :- وبعد بله شگال
- گال اني وعشيرتي طوع أمرج
شبير :- دحت ومحمد
- والله انتَ هيج گلت
فدار :- عجل ما جذب بهاي انا وكل وهالأزلام الگاعدة بأمرج
شبير :- على راسي خالي
- چبح الك ولراسك
- يلا ميخالف خالي وتمون
- لا بلة شو احجي
- عندي أخلاق ما أگدر
- لاه أحرجتني بأخلاقك
باوعلي حجه بصوت ناصي :- شلون قابلة بيه يولي
ابتسمت :- حلو
ضحك بصوت عالي وهز راسه
- هذا هو يابه هسع انا مرتاح من ناحيتو لگيتلو المرة العتستحمل خبالو ونفس طينتو شبير گالي اخابر امج
- اي عمو ما اكمل بهذا الزواج اذا ما اسمع موافقتها هي بالاول
- لأنج بنت أصل
گعد :- خابرتني قبل چم يوم وفاتحتني بالسالفة وگعدت تعاركني وتعاتبني عالصار وحگها بس ورى ما حجيت وياها وفاتحتها بموضوع زواجكم گالت الشور يرجع الج انتِ إذا رايدة تكملين بالزواج لو لا
أشرلي حتى اگعد گعدت وهو گبالي فتح تليفونه گلب بيه شوي ومدلياه اخذته منه فاتح كام ويَّ ماما اول مشفتها نزلت دموعي لا إرادي
شدن :- تويتي الصغير كبر وتزوج واني مو يمه
- محتاجتج هواي
جانت مخنوگة عيونها حمر مبينة باجية
- والله لو بيدي اطيرلج طير ولا افوت هاليوم وياج
- لعد ليش ماجيتي
- ما اگدر يماما والله لهسه زلم سجودة وراية كل يوم والثاني واحد لاحگني ويگعد يسويلي استجواب بس اجي راح يندلون مكانج ويأذونج
تيم :- عجل هي تايهة احنا هين عزوة للمالو عزوة
وبنتج صارت بنيتنا لا تهمين بيها ونامي رغد ما عيوصلها بشر واخوة شيخة يشمون الهوى
- لأنكم زلم مو مثل عمها الباعهن بيع وحرمني من شوفتهن
فدار :- وحگ الحط النفس بيَّ چلمة منج تاروح اجيبها من عيونهم وادحك الزلمة بيهم يطلع ويفك حلگو
مفتهمت كلام عمو فدار وشنو جان يقصد بس انتبهت لماما شلون مسحت دموعها بسرعة وحجت
- نورجان أمانة الله ورسوله يمكم أي شي يصيرلي أمانتي يمكم بس هالوحدة
- نخشها بـ بطن العين شحدو اليوصلها تانگص رگبتو
وجهتلي كلامها :- ماماتي انتِ موافقة بكامل إرادتج محد ضغط عليج
هزيت راسي بـ لا واني مدنگة
گالت :- لتحتارين ماما الي يرضيج يرضيني فدار گلي انتِ قابلة
- ما ادري
شبير :- شنو ما ادري لا تسودنيني نورجان عجل وسحلة شواربي
ضحكت على كلامه وردت :- مو بس شواربك كلك على بعضك فدوة الها
دار عمو فدار التليفون على شبير گلها
- يبا انا والخلفني واخوتي وعشيرتي فدى لعيونها وخالي فدوة لعيون امها
فدار :- لا تهتر شبير
- عش خالي حلويات الخاصكي هاي دحگي شدن
سكت شوي وصفن
گال :- صدك انا صرت رجل بنتج يعني صرتي عمتي شندهلج بعد
- هههههه اليجي منك بس لتكبرني
- باجي هاي مالتكم انتوا تندهون لمرة الخال باجي
فدار :- شبير راح اگوم
- المهم سالفتنا عش متجين ازوجج خالي
گله :- شبير ايدي عتبدي تهف
- بس دحكي ومحمد بعدو بحيلو لو انا حرمة ما اخذ غيرو
- عش انتَ حاسب روحك زلمة
رفع حاجبه :- خالي تريدني انزعلك تتأكد
النظرات صارت تخازر من كل صفحة عمو تيم وعمو فدار وماما تبتسم على كلامه وصته وصية أخيرة
شدن :- شبير منطيتك لبة گلبي ونظر عيني الما اشوف بدونها منطيتك بزري المدلل الفاهي لتزعلها ولتبجيها عيونها ملت وهي تنزل دموعها صيرلها ابو شبير بنتي مشبعت من حضن ابوها كسروها وهي طفلة صير انتَ العوض لكسرتها
أشرلها على عيونه جانت تحجي ودموعها تنزل وجهتلي كلامها الأخير
- روحي ماما سبع سعادات ان شاء الله وزواجة الدهر ما انطيتج الا واني متأكدة انتِ بأيادي أمينة وبجال رجال راح يصونج ويحارب الدنيا علمودج
ضل أثر هالكلمات محفور براسي لفترة طويلة من حياتي جنت دائمًا اتسائل ويَّ نفسي
هو فعلًا صانّي
ضحكاتي وفرحتي مفارگوني بذاك اليوم سوولي حنة بناتهم داير مدايري هواي عيون حاسدة ونظرات غيرة بس جنت ناسية نفسي وياه
دخل لابس الزي العربي دشداشة شادة عضلاته وغترة اباوع لطوله يباوعلي مبتسم واردله الابتسامة عيوننا هي الجانت تسولف كمية المشاعر الي بداخلنا
بفترة قصيرة گدر يسيطر على كل حواسي وتفكيري ويخلي گلبي يتعلق بيه أكثر يوم ورى يوم
جنت معجبه بيه من اول يوم شفته ما انكر شكله يجذبني احب سوالفه شخصيته بس متوقعت نوصل للزواج ما اعرف اذا اسميه حب بس إعجابي بيه جان واضح بعيوني
رگصنا وضحكنا وهو يشاقيني گدامهن والعيون تريد تنط وعمة شيخة تفتر وتسمي علينا هي ومبخرتها
حناني لبسني الذهب ما احبه بس طلعتها من نفسهن اخذنا صور كومة وثقنا بيها ذكريات ذاك اليوم
بعد ما خلصت الحفلة وبدت الرجل تخف من البيت والخطار يرحون ضلن بس خواته ونسوان اخوته
نزعت الكعب وصعدت رجلي متكسرة منه گوة اصعد الدرج ما حسيت الا ايد حاوطت خصري من ورى اجيت اعيط ايد سدت حلگي وانرفعت صاعد بيه الدرج
هدأت من شميت عطره وصلنا للغرفة نزلني دار يقفل بالباب واندارلي يباوعلي من فوك ليجوة عض شفته
شبير :- عجل انا جذاب
نورجان :- هاي منو گال هيج
- انتِ عجل ابوي
- شوكت
- لتبيعين مالاتي عليَّ يالفحلة
- بالحرام اذا كلت
- هاا
اجه يتقدملي واني واگفة بمكاني صار مقابيلي عينه بعيني :- صايرة گوية الصفرة
جسمي كله يرجف واحاول اتصنع الثبات ايده حاوطت خصري والثانية تنزع الشال من راسي شمره عالجرباية
تقربلي اخذ نفس طويل من شعري وضل على وضعيته
همست :- شُبير
گوة جاوبني نبرة صوته خدرانة :- اممم
ايدي على صدره كل ماله يشد على خصري يقربني اله اكثر صارت بوساته تتوزع على رگبتي ايده تتحرك على ظهري فتح السحاب لزمت ايده
- شُبير
باوعلي خازرني :- لتتمضيگين لج وخري ايدج
حصرتني البجية وحجيت اتوسله
- ماريدك بطلت وخر
- هالحجي نگعي واشربي مايو عجل هي لعبة اريد وماريد
- ترى ابجي
ابتسم :- لاه لا صدك
- والله راح ابجي
بحركة سريعة حاوط خصري باثنين اديه ورفعني من الگاع ايدي تعلگت برگبته :- نزلني
- اسلگينا بوسة غميجة وانزلج
دزيتله بوسة بالهوى كال :- يولي غميجة
بست خده ووخرت وجهي مقابيل وجه رفعلي حاجبه
- شنو مو بستك
- من ذن يولي من ذن
حجاها وهو يأشر بعيونه على شفايفي
هزيت اكتافي :- ما
- هاا
ما انطاني مجال ارد لزم راسي من وره وقربني عليه
اخذ شفايفي جسمي كله نمّل واني بين اديه
ابتعد يباوعلي :- شبلاج يولي مايعة روحج
مگدرت احجي احس لساني مشلول گلبي ينبض بقوة
دگاته سريعة صدري يعلو ويهبط وهو على نفس نظراته
رجع تقرب اخذ شفايفي بهدوء ووخر بسرعة عينه عليَّ
عاد الحركة مرة ثالثة ومن اجه ديوخر ايدي لا إرادي حاوطت رگبته قربني اله اكثر
نزلني أنفاسه برگبتي وبحركة سريعة دفعني ليورة انشمرت عالجرباية حواسي كلها متخدرة احس روحي بغير عالم واني بين اديه
نزع الدشداشة وصار فوكاي يوزع بوساته على خدودي شفايفي لرگبتي نزل لصدري فزعت على ايده وهي تجردني من الفستان
مثل الحلم الوردي وصحيت منه على صرخة قوية تفزع
ايدي لازمة معصمه دموعي صارت تنزل من وحدها ايدي گد مضاغطه عليه حسيت أظافري نبتت بجلده
لحظات ذاك اليوم المشؤوم رجعت تراودني لزمتني الرجفة حس عليَّ وبخوفي گام اخذني لحضنه ايده يمررها على شعري ويهمس بأذني يحاول يهديني
مرت لحظات سكنت بحضنه وعلى صوت همساته رفع وجهي بيده يباوع لعيوني نظراته بيهن خوف وقلق
مرر ابهامة يمسح خدي من الدموع :- خايفة مني
هزيت راسي بـ لا
گال :- عجل عش ترجفين يولي بذاك اليوم ومحمد ما جنت بوعيي وقسيت عليج هسع الگدامج واحد ثاني ما اجبرج على شي انتِ ما راغبتو
خليت راسي على صدره مطمأنة لكلامه
كل وباله خايفة منه هو ميدري روحي شلون تتراوالها وجه الخلاس ولمساته بذاك اليوم كل ما حاول يتقربلي
گام لميز تواليت نزع ساعته اخذ ملابس من الكنتور وفات للحمام ضلت عيوني وراه ورى مطلع اخذت ملابس مريحة للنوم ودخلت اخذت شاور ذبيت تعبي
طلعت نشفت شعري وضفرته وبعده بيه رطوبة باوعتله بأنعكاس المراية ايده جوة راسه وصافن بالسگف يفكر
شافني فتح ايده وأشرلي اجيله رحلته سحب ايدي مددني عالحرباية واخذني لحضنه ايد محاوطة خصري وايد تمسد بشعري وايدي على صدره أفكر بالصار اليوم
گال :- نعسانة يولي
- مجايني نوم
- عجل استچني واهجبي مكانج عيب عليج تتحارشين بولد العالم
- واني شمسوية
- ايدج لا تحركيها
رفعت راسي فاتحة عيوني :- عش تدحكين هيج شنو ما عندج اخوان
- لا
- ويلي ربي صلفه النوب عجل وين اضم روحي تاتاكلني بعيونها يولي استحي
- والله ممسوية شي انتَ نيمتني على صدرك
- تتبلين عليَّ خافي ربج هم متحرشة وهم جذابة عجل ينرادلج فتوى تاتهديج للطريق
- شُبير اريد اسألك شي
- جواب
رجعت امرر ايدي على الوشم اتجنب نظراته ما اباوع لعيونه گتله :- جنت قاصدها من كل گلبك
عقد حاجبه :- شنو هي
- من گتلي أحبچ
- انا شوكت گلت هيج
- اهوو شُبير صدك دا احجي
- بالحرام اذا كلتها دحگتج كاسرة خاطري محد مگلبج ضالة سايبة كلت انا اتبرع واستر عليها اخذها شسوي بعد أمري لله
- شكد تچذب لعد منو الكال سحلتي شاربي والخلفني واجه يتوسل بس حتى اقبل بيه
عض شفته :- اشتعلت روحي شزتيت من حجاية بحلكج ما ضل واحد ما درى
- ترى والنبي بديت تضوجني راح اروح انام جوة يم در
- استري علينا يالفحلة خواتي كلهن هين بس وحدة عتدحگنا كل واحد نايم بغرفة تشهرنا بالعشيرة
- زين اگولك شي
- لتگولين هسع انا اسألج انتِ عش قبلتي تزوجيني بلة لأن حلو مو
باوعتله :- هاي شلون سمعت
ابتسم :- يولي شيخ ترديني ما أدري لا تضيعين السالفة هسع صدك هالحجي لو لا
- لا
- هاا
- والله شبيك كسرت خاطري كد مسحلت روحك عوزك بس تعوي على گولة عمو تيم
دارني وانگلب صار فوگاي رافع حاجبه
- دحك الصفرة دحك لحگت تحفظ سوالف تيم واجت تاطبقها براسي
- هاي شبيك اتمازح وياك
- اتمازح
- مال مثقفين هاي
- وانا همجي ماعرف بهالسوالف مو بلة
- لا حشاك
- انتِ مثقفة يولي
- اي شنو ممبين
- لا منيلج
- عيوني ملونة بس المثقفين عندهم عيون ملونة
- غمها لثقافتج اي والله
رجع مدد وجرني لحضنه كال :- كافي نامي تاما افعل شخصيتي السايبة عليج
مر وقت طويل واني احوص بمكاني لحد ما خله رجلي بين رجليه قيد حركتي وهمس بتحذير :- والقرآن حركة لخ تاطلع السايب البداخلي انطمري
كال كلمته الاخيرة بنترة خنست بحضنه وبعد متحركت لحد ما شوي شوي بديت انعس ومدريت شوكت نمت
《 شهربان 《
الأيام تمشي بصعوبة يمكن لأن فارغة وما عندي شي اسويه ضاله عيوني تراقب هبة وحركاتها شتسوي
من يوم ما انطيتها الموبايل وهي ملازمة غرفتها اشوفها تمشي وتراسل والابتسامة شاگة الحلك
كل الي بالبيت متجنبيني محد اتقربلي بعد
سجودة محذرتهم خاصة تمارا وكفاح وبنتها
ماما اخابرها بالختلات من همام اطمأن عليها لحد ما بمرة دزتلي على صفحة همام صور فتحتهن شفتهن دموعي كامت تنزل بلا وعي مني
واگفة نورجان وبصفها شبير لازم ايدها يحني بيها والابتسامة مرسومة على وجوهم ويضحكون
اخذت زاوية بالسطح وحشگت روحي بيها واگلب بالصور واشهك مشتاقة لشوفتها ممصدگة اشوفها تضحك الوجه مورد ومبينة فرحانة
ضل ببالي ليش ديحنيها ماما مكاتبتلي شي
جريت نفس بحسرة حسيت روحي مخنوگة محتاجة ابجي تذكرت كلام ماما طلعت اغنية لساجدة وقللت الصوت وبدت كلماتها تتردد لمسامعي
يا محمد بوية محمد
چتلي ليش تتعمد
يا محمد خاف من الله
يا محمد مو هذا الله
مسحت دموعي وهمست :- اشتعلت روحك محمد لابو اليوم العرفتك بيه
رجعت اباوع للصور مال نورجان وشبير طالعين حلوين يربي صفنت شوي معقولة حيكملون بزواجهم وهم واحد مرايد الثاني
حسيت بحركة قريبة وواحد فات للسطح باوعت ملكيت الا عمو سالم واكف كدامي مخنزر بوجهي
سالم :- شتسوين هنا
شهربان :- مدا اسوي شي
واني احجي وياه وايدي تمسح بالصور لا يشوفهن محسيت عليه الا لاگف الموبايل من ايدي واخذه يگلب بيه وهو عاقد حاجبه
كمت من مكاني نكثت ملابسي ومبتسمة بوجهه
مسحتهن بسرعة ملحك عليهن
باوعلي بخزرة لزمني من متني عتني عت
- شضامة بان ويامن جنتي تحجين
- ماكو شي مدا احجي
- ويَّ يا گواد لج منين جبتي هالتليفون
همام :- تليفوني اني انطيته الها
اندارينا اثنينا عليه جانن واگف بالباب اجه اخذ التليفون من ايد عمو وسحبني وخرني منه
- وليش تنطيها اني مو موصي ممنوع هالجيفة تتواصل بالساقطة امها موصي لو لا
- گالت ضايجة رادت تتصفح بالتليفون شوي
- لك جذابة هاك شوف لگيتها داخلة على صفحتها تريد تحاجيها
- بعد ما انطيه الها ختولي لتحرك أعصابك عليها خالي
حجاها وعينه عليَّ رفعتله حاجبي
رجع عمو يعت بيَّ من ملابسي ويهدد
- وانتِ لج مرة الخ اشوفج خانسة لوحدج اطيح حظج والقرآن ويا ويلج بعد احس بيج متواصلة ويَّ امج اشوفج وجهي الثاني
- اي عود خوش
اجه ديصفگني منعه همام ودفعني للباب وعمو يتهدد
- مستگوية بـ عبد لج بان والقرآن ألزمج أذبحج عالقبلة
صحت :- هو انتَ صلاة متصلي عالقبلة تريد تذبحني
حجيتها وطفرت للغرفة واسمع صوت صياحه وراي يريد يلگفني وهمام يهدأ بيه طبيت لغرفتي وقفلتها
لليل محد اجاني ولا احد ذكرني والبيت هدوء استغربت الوضع فتحت الباب ونزلت ادور اكل ميتة من الجوع
بوجهي عالمطبخ حتى شارمن ما هي لگيتها طابخة صبيت الي وگعدت آكل فزيت على صوتها
شارمن :- بان اكل ما مستوي
- اشتعلت روحج جفلتيني
- انتَ شلون ياكل اكل ما مستوي
- المعدة كُلشي تصفي مرمر
دگت على ظهري :- عافية اكل يسوي زين انتَ كولش ضعيف هواية
- رتب الجملة التالية
ابتسمتلي :- اكل أكل هواي تصير مثل مدام سجودة
- ايع خليني هيج احسن ولا اطلع مثل سجودة البربوقة
ضحكت افتهمت الكلمة گد ما احجيها گدامها
وگفت تحضرلهم بالعشا وتسولفلي على أهلها وخواتها شلون كلهن يشتغلن شغلتها مطشرات اثنين بالكويت وهي هنا من تسولف تذكرت نورجان تنهدت بحسرة
كامت تبجي وهي تحجي سجودة الچلبة مانعتها تروح تصلي بالكنيسة هالشهر وضالة مفرفحة خطية
وگفت أواسيها كتلها :- مرمر don't cry انتَ من يسوي دموع تصير مو حلو
ابتسمتلي ومسحت على راسي
- شكد گلب مالك طيب بس انتَ وكيح
- لا يا بنت الزفرة مو صوجج صوج الزوج الواكفة دتحجي وياج وگلت اسوي زين واخليج ترحين للكنيسة
باوعتلي بلهفة :- والله اروح تقبل مدام
- شعليج بسجودة بابا انتِ بظهر بان خليها عليَّ ومعليج حظري روحج على ساعة اجي اگلج طالعين
حضنتني حيل وتتشكرني طلعت من المطبخ جانوا گاعدين بالصالة شافتني سجودة صاحت وراي مرديت
دا اكمل طريقي محسيت الا انجر من ملابسي انداريت لگيتها عمتي أمجاد اخذتني جرتني الها وگفتني گدامها
دفعت ايدها ووگفت اعدل ملابسي كلهم گاعدين عمو سالم ومرته وزوج عمتي الوسطانية ستار وهمام مدنك على تليفونه
شهربان :- شتردين
سالم :- تعاي بعد اخذيلج راشدي لتنترين لا اگصلج هاللسان
أشرلته يسكت وعينها مرتكزة عليَّ
گالت :- الباجر تاخذج أمجاد وياها كفاح يجهزنج ما ضل بس كم يوم عالعرس
- ما اروح
- مو بكيفج تولين وياهن ورجلج فوك راسج تكملون الجهاز وتجون
أمجاد :- والذهب
- ختولي هي هاي الرخيصة مال جديد شوفيلها كم قطعة من ذهبج كفاح وانطيه الها
كفاح :- يا فدوة لله ماليش انطيها ذهبي حلال حرام
- لتصيرين ثولة انطيج الفلوس الدزهن عبد واشتريلج جديد بمكانه
رخت شوي
- اي اذا هيج ميخالف خلي تاخذه
اندارت لعمتي :- أمجاد باجر تاخذيها شوفيلج محل كملي جهازها اعتمد عليج
أمجاد :- عوفيها وراي
شهربان :- مو بكيفكم متجبروني گلت ما اروح يعني
ما اروح
- ليش تيبسين راسج بان
سجود :- عوفيها الظاهر مو مال عيني وأغاتي روحي بس انتِ وكفاح كملوها شلون ما جان وخلصوني من هالسالفة خلي ننطيها ونخلص
شهربان :- أنفطهن وأحرگهن والله بس تجيبوهن
- دنعل شرفج بنت الخرا انعل ابوج لابو اليجيبلج ضلي مگطنه بالعندج عنج ما اشتريتي كلت اسوي زين خلي عبد يحير بيج وعود خلي يجي ويكلي ليش ما مجهزتها الا اشمرج بخلقته حالج حال الزبالة
شعوطت من جابت طاري بابا قبل لا اغرد وألوصها لزمني همام صعدني فوك غصب عني نترت ايده
- وخر
همام :- وجع حتى وجع متشوفيها كلها كاعدة تذبيلج حجاية من حجاياتج يصير قتلج عمل شعبي وهم منا شلون يحبونج ويموتون عليج رايديها من الله على الله
- امك هاي اني الها اذا ما حرگتها بالنار الذبتني بيها وشعلت ابوها عالخلفها بسيطة
- لسانج بان لا ينبتر
- اوي شكد تخوف انتَ توكل ابني
- شحاسبه روحج انتِ
- انا الشديت حيل بحيل يا زلمة يمر بيَّ
ضل صافن :- لا ومحمد مو بعقلج انتِ
عفته وفتت للغرفة رگعت الباب بوجهه وگعدت عالجرباية اهز رجلي بأعصاب تالفة واتوعد لسجودة
لليل حيل الناس نايمة بس اني ضالة اتگلب بفراشي
انفتح الباب وفاتت هبة تتلفت وراها سدته واجتني
- خير شكو النوب
وگفت تفرك بايدها متوترة
هبة :- عبد خابرني كال باجر يجي ياخذج حتى ترحون تجهزون
طفرت من فراشي :- شنو شوكت هالحجي
- بابا خابره وگله متقبل تروح تجهز وعبد گال اني اجي اخذها
رديت واني اهز راسي :- همممم
- راح ترحين
- طبعًا وليش حتى ما اروح
اجت كعدت يمي وتتوسلني :- بان عليج الله خلي اروح وياكم
- وشعندج رايحة
- لا حبابة بس اخلي يشوفني
- ميخالف احاجيه عود واذا قبل اخذج تعاي سولفيلي بلة
- شنو
- شصار بعلاقتج ويَّ رجلي وين وصلتوا
- خرب بان لو تشوفينه عليه لسان يوكع راس اكبر بنية حتى هواي مرات ماعرف شنو ارده يخليني أفر بأذاني وهو يضوج يكلي لتسكتين سمعيني صوتج
طكيتها ضحكة طويلة طنكرت :- اهوو شبيج تضحكين والله ما اجذب هو هيج يكلي
- شعجب مطلب منج صورة يشوفج فتح كام وياج
- هو يفتح دوم بس اني اسدها ومرات اطلع بس جسمي ووجهي اضمه
فزيت نترت بيها :- وثول وشكو مصورلته جسمج
- شبيج هو يكلي
- وبملابس لو مخلعة
دنكت تفرك ايدها وبينت معالم التوتر بوجها :- هاا
- لج لتخبليني هبة شنو مصورتله جسمج هسه عباله هاي اني
- عفية بان صوتج لحد يسمع
- بنت الزفرة امشي ولي من خلقتي الله ياخذج انتِ وياه
- هسه شبيج انفعلتي هو اصلا بالداخليات ممبين شي
خلتني اگمز :- شوف حظي تگولي ممبين شي لج بعد شطالب منج غير التصوير احجي هبة
- هاا
ضلت ساكتة مثل المترددة تحجي :- احجي هبة لتنثولين هم طلب منج شغلات ثانية مو زينة
هزت راسها بسرعة وكامت :- لا وين بس مرات يكلي افتحي كام وكم مرة هم مو دائمًا اني راح اروح تصبحين على خير
حجتها وطفرت بسرعة وضعها مو طبيعي عرفتها ضامة شي ومتريد تگوله الله وحده يعلم شحاجي براسها
ثاني يوم انفتح الباب فاتت تمارا
الت :- رجلج جوة عمة سجودة تگول خلي تنزل
- انگلعي هسه اجي
- مو اجي اسحلج
- اوي خفت توكلي بنتي
غلطت وفشرت من شافتني ساكتة خلت وراحت
گمت بدلت تراك رياضي فوگاه سترة خفيفة لميت شعري شلون مجان بسرعة لبست حذائي ونزلت
طلعتله واگف بالباب منتجي على سيارته مكتف ايده ومدنك راسه للگاع صرت گدامه رفع راسه شافني
عبد الإله :- شلونج مرتي
باوعلي من فوك ليجوة وعقد حاجبه تقدم صار گبالي
لزمني جرني عليه جر الگتر من راسي فتح شعري ورفع السترة نازله من الكتف عدلها ودنك لحذائي يربط القيطان عدل ورجع وكف
- هيج أحلى يلا امشينا
اندار ديصعد استوقفته :- لحظة عبد
اندارلي :- شكو
- اريد شارمن تجي ويانا تساعدني بالغراض
عقد حاجبه :- منو هاي
- الخدامة مال بيت عمو
- صيحيلها
مصدگت وافق بسرعة ركضت جوة لگيتها تكنس بالصالة أشرتلها تطفي المكناسة الكهربائية طفتها
- يلا مرمر دنروح
شارمن :- وين يروح
- مو ردتي ترحين للكنيسة
ردت بفرحة :- مدام سجودة قبل
- شعليج بسجودة مو گتلج خليها وراي بسرعة يلا عبد منتظرنا محد راح يعترض اگلهم اريدها تشيل الغراض وياي
بلغت عمتي أمجاد محد اعترض على طلعتها بسرعة طلعنا هي گعدت ليورة واني يمه ليگدام اندار علينا
يباوعلها :- متأكدة ماخذتها تساعدج
- لا نوصلها للكنيسة
هز راسه :- مو عرفت التگمز مالج مو خالي
- وإذا بطريقنا مو بعيدة الكنيسة
- واني السايق مال خلفج وخلفها
- خطية والله عمتي سجودة مخلتها تروح تصلي هالشهر
- يا يابة النوب حنينة
- توصلها لو لا
باوعلي للحظات واندار :- نوصلها يابة ليش لا
لبس نظارته وشغل السيارة مشينا
الطريق كله عيني عالشارع أفكار هواي تراودني
على ساعة تطخ عندي افتح الباب واشمر روحي
وارجع اتعوذ من الشيطان واباوعله
ممستوعبة انُ اني صرت على ذمته او مجنت فاهمة هالكلمة بشكل صحيح جان هادئ كل شوي يدك تليفونه
ويشيله يحجي بردود مختصرة وكلام ما افهمه
وصلنا شارمن للكنيسة گتلها من نخلص نرجعلج نزلت واحنا كملنا طريقنا جان السكوت سيد الموقف طول الطريق محد حجه من عندنا كل بالي ماخذني للمول
وين يلا وگفت السيارة ركزت بالمكان انتبهت واگفين گبال بيت نزل بسرعة واجه من جهتي فتح الباب
شهربان :- وين جايبني
أشر على شفايفه :- اششش انزلي
- ما انزل الا تگول
جرني نزلنلي غصب عني ورگع الباب قفل السيارة ومشى ساحبني وراه واني اجر بأيدي اريد افلتها
شفته ما تحرك دنكت عضيته حيل وكف يباوعلي رفع حاجبه :- لا صدك هاي كل قوتج
- رجعني يلا
- صار من عيوني
عبالي صدك حنرجع انداريت دا اريد امشي للسيارة محسيت عليه الا رافعني من الكاع گلبني على ظهره ومشى فات بيَّ للبيت وسط صرخاتي المعترضه
طبينا للبيت جان فارغ دخلني بغرفة كبيرة بدون أثاث بس گلوبها مشتغل وعلى جهة كم كرسي وطبلة صغيرة
صحت :- نزلني چلب حقير
وكف بنص الغرفة وشمرني للكاع وكعت على ظهري تكسرت عضيت شفتي من الألم وسندت روحي كعدت وهو واكف يباوع
- شكو تباعين هيج غير انتِ گتيلي نزلني
- مخبل انتَ هو هيج كسرتني
- لا بعدج ما شفتي شي
جر الكرسي برجله خلاه بصفي گال :- اگعدي
- شتريد عبد
- شحجيت
- ما اگوم
جرني من سترتي كعدني وضل لازم يدات الكرسي ساند جسمه ومنزل جسمه وجهه عليَّ عينه بعيني احس بأنفاسه قريبة من بشرتي متحركت بعد
- بانووو
ايده يمررها على وجهي يوخر خصلات شعري
همس :- ليا گحبة من گحاب سالم منطيه التليفون
جمدت حتى النفس گطعته رعشت شفايفي
- مو لوحدة
- احلفي
- ممنطيته عندي
- صدك والله شوكت آخر مرة خابرتج
- البارحة
- شگتلج
- گتلي راح اجيج حتى نروح نجهز
- شايفتني زوج
ما رديت
گال :- أدري بيج منطيته لهبة من أول مرة دگيت عليها وردت
ضليت اباوعله :- متوهم ماكو هيج حجي
حك گصته مضيك عيونه گام عدل وگفته طلع تليفونه من جيبه ووكف يگلب بيه يطلع يمي صوت رنين لحد ماجاني صوتها
هبة :- هاا عبودي
وهو يباوعلي رد :- ها يعيون عبودي وينج
- خرب بيها هاي بان الچلبة كتلها خلي اجي وياكم خلتني اتأمل ما دريت بيك هنا الا ورى ما رحتوا
- ختولي تروحلج فدوة
- هي هسه وياك
- اي ذيج واگفة تختار بالملابس هواي تفتر اخذت زاوية حتى أرتاح وخابرتج
- يوو بعدك متعرفها هاي عنودية وراسها يابس راح تدوخك
- انتِ گلتيها چلبة
ضحكت بصوت منعوص ماصخ مثلها قبل لترد عليه سد التليفون بوجها وخلى الشاشة بوجهي
عبد :- هذا رقم منو
21 تعليق
- ما ادري
- الرقم الخليته بجهازج
- وشنو يعني
هز راسه :- تعجبيني استثولي بعد
گامت كل شوي تتصل غلق الموبايل خلاه عالطبلة رجعلي دنك عليَّ لزمني من فكي خله عيني بعينه
- بانو يا بانو وجهج حلو وعيونج حلوة ليش تخربيهن بهالتصرفات الرعنة
لزمت ايده :- وخر هيج دتأذيني
- بحتج تموت
عض شفته گال :- من اليحبها گلبي
تقرب باسني من شفتي بقوة ياكل بيهن بسنونه عبالك دياخذ حيفه مني ادفع اخرمش حايط وانصب بمكانه ولا تحرك ما وخر الا واني طالعة روحي
عيوني مدمعة بوجع تحرگني شفتي احس نار تسعر بيها من الألم لزمتها وباوعت لأيدي بيها دم خزرته وهو يباوعلي مبتسم بطرف شفته
وكف يعدل ملابسه كال :- راح اعديها بمزاجي هالمرة واكتفي بهاي لان وكعتي بيدي چنص يلزم سجودة وسالم من ايدهم التوجعهم بس والقرآن والسماج بان ألزمج اشگج شگ لو فكرتي بعد تعيديها واليوم من ترجعين للبيت تاخذين التليفون منها واريد من الله على الله اخابرج ومتردين صدك اشوفج الخبال على اصوله
جر سويچه وموبايله وأشرلي گدامه مشيت وهو يمشي وراي روحي طالعة كارهته وكارها حتى نفسي
رجعني للبيت نزلت صاح وراي شمر عليَّ علبة من الجامة لكفتها وباوعت نفس الحبوب الآخذها
عبد الإله :- خليهن عندج وخلي بـ بالج هاي آخر علبة تاخذيها وانتِ بهذا البيت
غمزلي وقبل ليحرك گال :- راقبي الجاي بانو
شخطت سيارته من گدامي واني ممستوعبة شي من الگاله رجعت اباوع للعلبة شمدريه هذا بعدين يلا طخت عندي عضيت شفتي واني متحلفتلها
طبيت بهمة للبيت متجاهلة شكو واحد يطلع گبالي بوجهي على غرفتها فتحت الباب وفتت جانت متمددة عالجرباية تگلب بتليفونها اول مشافتني جفلت
هبة :- هاي شبيج طابة هيج گمزتيني
- اني چلبة مو ولج
شفتها صفرت وگامت تمتمت :- شبيج بان متخبلة عليَّ شمسويتلج
- شگايله لعبد شمصخمة وياه
- شنو شگايله
- لتثوليها بنت الزفرة احجي شمصخمة شحاطة من لزمة بيده احجي
راحت قفلت الباب ما عوزها تبجي واجتني تتوسلني
- بان صوتج يمعودة لحد يسمع
- عنهم مسمعوا
مديت ايدي :- انطيني الموبايل
- ليش
- الموبايل هبة
- اي افتهمت والله هسه انطيجياه بس صوتج فدوة
ركضت للكنتور طلعته من الملابس واجت خلته بيدي
فتحته وكمت اگلب بيه دخلت عالفيس بس صفحته موجودة رحت لمحادثتهم
الصور والمقاطع الشفتهم وكفن شعر راسي كعدت عالجرباية رجلي احسهم رخوا واگلب بالمسجات
الثولة ممخلية شي محاجيته من ابوها لعمتي لشغلهم ساحب لسانها وهي خارطتهن اله وضاحك عليها عود بالعرس يخرب زواجنا وياخذها بدالي وهي مصدكة
باوعتلها :- انتِ شسويتي هبة شلاعبة بروحج
- هو كلي والله
- وانتِ مثل الثولة شيكلج تطاوعينه لج بابا لازم عليج مقاطع إباحية تنگص رگاب من وراها ليش هيج رخصتي نفسج
- يحبني وحيتزوجني معليج انتِ
- شيتزوجج بابا ديضحك عليج
- موتي ممگلبج وحياخذني الي
- لا يا رخيصة يا بنت الرخاص طبج مرض منج اله عود مقهورة عليج اشوف بيج ثول نورجان بس وين شجابج عليها بهاي عرامتج
- تغارين لأن اخذته منج
- مصدگة الثولة ياخذها
اخذت التليفون ومشيت صاحت وراي :- وين ماخذته
درتلها :- دكلي تبن صدگت روحها
خليت وطلعت من الغرفة رحت لغرفتي بعده بيدي واتصل جريت نفس و رديت :- ألو
عبد الإله :- آخ هاي البحة الجنت منتظر أسمعها
- شرايد
- دزيتلج جهازج ويَّ خدامتكم وصلج
صدك بعده يحجي وانفتح الباب فاتت شارمن محملة وراها اثنين من زلم سجودة حطوا كومة مال جنط وعلاليگ دنكت خلتهن ووكفت فحطانة
- هاي شنو
شارمن :- مرتك جابتهم
- خنثتني الفلبينية
عضيت شفتي سمعها اللوتي تشكرتها وطلعوا
كال :- شوفيهن زين أي حاجة متعجبج خابريني تتبدل وشوفي اذا بعد ناقصج شي الذهب ينضم بالكنتور وينقفل المفتاح تخلينه بصدرج اليمج واوية ما يتأمنون
- ولويش جبته هنا اذا هيج خايف لا ينباك
- الغبرة لعد يضل وجهج فارغ كدامهم شگلك راحت واجت بالجذب ما بيدها علاكة
- ترى هم معايزيلك خيرهم أكثر من العندك خاف متدري
- رب التبوگ البتوت من ايد امها وهي على فراش الموت ترديها متبوگج
- منو قصدك
- روحي بانو منا لباجر أدزلج واحد من جماعتنا ياخذ الغراض لشقتنا ولتنسين الوصيتج عليه المفتاح وين ينحط
سديت التليفون بوجهه اكل بروحي بقهر منه المنحط
ثواني ودزلي صورة عالفيس فتحتها طلعت حمالة صدر وكاتبلي جواها ( هنا )
ضليت فاتحة حلگي حتى ما اعرف شرد رأسًا سديت التليفون خليت الجنط على جهة مالي نفس بيهن وضميت الذهب بالكنتور وقفلت عليه صعدت عالطبلة خليت المفتاح فوك عالحافة مال كنتور
مر كم يوم وتحدد موعد العرس يوم الجمعة
بس اسم عرس ماكو معالم فرح بالبيت عمتي سجودة منتظرة بضاعتها منه وكفاح وبناتها يشوفن دم سنونهن وميشوفني والباقين كلمن ملتهي بروحه
صافنة بالسگف انفتح الباب وفاتت شارمن بيدها جنطة كبيرة خلتها گدامي وأشرتلي اگوم وگفت يمها فتحتها وطلعت فستان أبيض طويل وخلته گدامي وتبتسم
باوعتلها :- منين هذا
- مرتك جابتو
رجعت عدت عالجرباية ممهتمة اجتني
شارمن :- ليش انتَ زعلان شوف كولش حلو
- شفته
- ما تلبس
- لا ماريد اگدره اخذيه ضميه
هزت راسها مني بيأس رجعته للجنطة وعلگته بالكنتور
اندارتلي :- انتَ جوعان
باوعتلها عيوني غورگت نزلت دموعي اجت حضنتني وتحاجيني :- لا تبجي انتَ عروس ما يصير تنزل دموع
همست بشهگة :- ماريد اتزوج اريد ماما
ضلت يمي تواسيني كلمة افهمها وعشرة لا تخبط عربي انگليزي رغم هذا ارتاحيت شوي واني بحضنها
صاحولها من جوة كامت كالت :- don't cry حبيبي
هزيت راسي واني ابتسملها راحت كمت قفلت الباب ورحت للكنتور طلعت الفستان اخذته ووكفت كبال المراية اخلي على جسمي نزلت دموعي بقهر
محتاجة امي محتاجة وجود نورجان وياي محد الي هنا مو أهلي هذول طالعة من بيت غربة ورايحة لبيت غريب ثاني ما تغير عليَّ شي
شمرته عالجرباية وفتحت الجرارة طلعت العلبة اخذت آخر حبايتين بيها وذبيت روحي عالجرباية دافنة راسي بالفستان
شفايفي ترعش همست برجفه :- يلا اخذن مفعولجن بسرعة نامي بان انسي كُلشي ديصير وياج احسبي حلم وراح تكعدين منه يلا نامي
صرت اعصر بالفستان بيدي واشهك
وينج ماما تعاي اخذيني جذب مو گدها اني وروح بابا مو گدها اريدج يمي تعاليلي راح أموت
صوت همسة صارت صدى بالغرفة بأسمي :- بان
رفعت راسي ادور مصدر الصوت لحد مشفته واكف بالزاوية عينه عليَّ همست :- بابا اخذني وياك لتعوفني
يباوعلي مقهور ويهز راسه بـ لا
صحت :- ليش حرام عليكم مو كلكم تعوفوني اخذني يمك ماريد ابقى هنا محد الي
مستمر على نفس وضعه ويهز براسه
عقل مضل براسي :- والله اجي وياك متعوفني هسه تشوف شلون
رحت للفستان لزمته جفوني ثگلوا گوة فاتحة عيوني دخت واني واگفة افترت الغرفة بيَّ فركت راسي حيل اريد اصحى مقاومت نمت عالجرباية والفستان بيدي
غمضت عيوني واني بنفس وضعي والفستان معايفته
كمت اخذته خليت الطبلة وصعدت عالجرباية شگيته صار وصل علكته بالسگف ولفيته على رگبتي
بابا يباوعلي ويأشرلي لا
عبد واكف بقاطه ايده بجيوبه ويباوعلي مبتسم
صارت كبالي ماما مدنكة راسها متباوعلي
ونورجان يمها تبجي تهمس خلصيني بان
دفعت الطبلة برجلي وبدت روحي تصارع تريد النفس
رجلي تتحرك بفزع جسمي كله منتفض انفتح الباب دخل رجال غريب ملحكت اشوف وجهه وصار ظلام
فتحت عيوني فزيت على صوت عمتي
أمجاد :- بان مو احجي وياج
باوعتلها وانتبهت للمكان الـ اني بيه واگفة گبال المراية لابسة فستاني الأبيض الكوافيرة مستلمة شعري وعمتي أمجاد فوك راسها توجهها شتسوي
اليوم جمعة عرسنا اني وعبد
أمجاد :- شوفي بان تسويلج هالتسرحية حلوة مو
حجتها وخلت گبالي كتلوك صور عرايس وگامت تگلب تريدني اختار وخرت ايدها وانداريت للكوافيرة
شهربان :- لتسويلي شي ما أحب الأهرامات التسووها فوك الراس خلي على طوله وبس سرحي
- غير عروس شنو تعوفه مفتوح
الكوافيرة :- لازم تسوين فد تغيير بشكلج هذا يوم مميز راح يبقى ذكرى الج طول العمر
شهربان :- سوي الگتلج عليه
حاولن وياي واني معاندة سرحته اول مرة بالسشوار بعدها سوتلياه ويڤي وبقى مفتوح مثل مردت
الميكب مردت اخلي بارز كله عالخفيف كل شوي اگلها خففي بعد صار عبالك محاطه شي مجرد برز ملامحي
ثبتتلي البرگع بالماشات انطتني عمتي اكسسوارات ناعمة لبستهم ووگفت تباوعلي تنهدت
أمجاد :- خيرنا لغيرنا ياريت لو يسوى ننطيه هالجمال
لبست الكعب وصرت اباوع لروحي بالمراية الفستان جاي مخصر على جسمي ولأن ضعيفة كُلش جان لايگلي وجاي فيت عليَّ من جوة جان كلوش بسيط
ضليت گاعدة انتظره لا معازيم لا صفگة لا هوسة عرس
البيت سنطة كل شوي وحدة فايتة تباوعلي تگلب بعيونها وتطلع معاجبهم شي
اليوم التسليم مال عمتي سجودة صارلها أسابيع تدك على هذا اليوم ومنتظرته على أحر من الجمر اول مياخذني يسلمها التريده ويفض كُلشي بينهم
اتصالاتها موگفت بجماعتها كل شوي تسأل اجاكم عبد سلمكم البضاعة وضالة على نار تفتر بالبيت
زلمها واكفين استعداد عمو ورجل عمتي مخبوصين وياها البيت اجواءه متوترة ضليت كاعدة بغرفتي
انفتح الباب وفات محمد عيونه دم شعره مخربط يتنفس سريع خفت من وضعه كمت من مكاني مفزوعة
- شبيك محمد
محمد :- بأحلامج اخليه ياخذج مني انتِ الي مالتي وحدي انتِ مال محمد بان
انتبهت للمسدس الي بيده تراجعت مرعوبة وصحت
- لتتخبل محمد اهدأ دنسولف
- والقرآن اذا ما اخذتج هسه طلقة براسج اكتلج واكتل روحي وراج متجمعنا الدنيا ننجمع يم الله
- لتتهور عليك الله اذا متنا نروح للنار
- ان شاء الله للدرك الأسفل من جهنم اخذج يعني اخذج اذا مو الي متصيرين لغيري
كمت اتوسله احاول استعطفه :- يهون عليك تأذيني تأذي بان حبيبتك
كام يبجي :- انتِ أذيتيني بيوم القبلتي بعبد يعقد عليج
- هم جبروني والله ليش انتَ مو هم رحت تزوجت وعفتني كم مرة كتلي اخذج وانهزم ومشفت منك شي لحد ما كلمن راح لطريقه
- ما تغير شي هسه خلي ايدج بيدي ونروح منا
- محمد افهم الجان بيناتنا انتهى بيوم زواجك انتَ وتمارا
- مو بكيفج أكتلج والله أرميج
حجاها واجه عليَّ بهمة يريد يلزمني ويصيح اجوا يتراكضون على صوته لزموه بسرعة زلم سجودة جروا المسدس من ايده وطلعوه بره صوته عج البيت
اجتني مرة عمو تصرخ وتبجي صارت بوجها أمجاد
كفاح :- شسويتيله الله ياخذج يالساقطة مو راح الولد استقر شتردين منه
أمجاد :- ترى ابنج هو الجايها متخبل هي شعليها
- هي شعوطته الله يشعوطها ان شاء الله تدري بيه يحبها شوف شذبتله من حجاية وخلته يتخبل
سجود :- انگلعي برة كفاح والزمي مرة ابنج لا أدفنها بمكانها
حجتها وصارت عينها على تمارا الي واكفة بالباب دموعها تصب وتباوعلي بكره مصاير بودها
تك تلني ..
كلمات تسألون عن معناها
عديلة مريم : هي السيدة الزهراء (ع)
سرفايفل : شفرة خاصة يعني ال
