رواية ارهنت عمري الفصل الثاني عشر 12 بقلم نورا ناصر

كعدت الساعة ب ٩ وكالعادة نبيل رايح للشغل 

يروح من الساعة ٦ مايتريك هنا يتريك ويا جماعته بالكراج وهاي فقرة مرتاحة منها لان الليل كل اسهر ويا امير مخبلني ماعبالك عمره ٣ سنوات يريد بالليل يلعب وبالنهار يكعد وانه تعودت على هذا النمط .... 

كمت غسلت وسويت ريوك وتريكت بوحدي 

وامير نايم ، عندي حنة سودة ومن الليل مخططة انقش بيها اليوم كلش عاجبني ....

بلشت بيها بسرعة ونقشت ايديه كبل لايكعد امير ويخرب كل شي ..

نقشت على اصابعي وعلى ظاهر جف ايدي 

زاد شويه باوعت لرجلي ...

باوعتلها وركزت بيها ايبااه انه دائما اهتم بيها بحيث صايرة تلمع بالعادة اهتم بنفسي هواي احب هالشي لنفسي رغم نبيل ما اشوفه غير كم ساعة باليوم ماعنده شي هو بس ملتهي بشغله وينام على وكت كلش ومن يرجع هم ينام الظهر ويكعد المغرب ويادوب نكعد شويه سوا يكضيها يباوع افلام بالتلفزيون او يلعب بالموبايل لعبة ... 

نقشت على رجلي ورد ناعم كلش وعلى اصابع رجلي 

انتظرت وبعدين غسلتها انبهرت بجمالها شكد حلوة صارت رحت صبغت اضافر رجليه احمر وضليت اباوع عليهن صارت رجلي عبالك مثل رجلين الممثلات بالتلفزيون ... 

اي اليوم نبيل راح يتعجب عليهن .. 

دزيتله رسالة اريد تجيب النه مخضر وكلوب للحمام وكرزات ضوجه بالليل اسهر ويا ابنك شسوي عاد اكرز كرزات ..وحفاضات وحليب ماكدر انومه او بالليل

بدون حفاضه

وصلله المسج وانكتب تم التسليم 

هو ورا ساعة رد عليه 

.. شكد تكركين صار ام امير .. 

ضحكت صدك لغيت هواي بالرسالة لو بس كاتبتله الطلبات هسه خسرت رسالتين بدل الرسالة الوحدة..

رحت على شغلي كملته كله وكعد امير وضل يلعب 

للعصر الساعة ب ٣ اجه نبيل تلكيتهه بوسته بخدوده

وصبيت اله الغده 

كعدت كباله اسولف ويا واسوي حركات اريد الفت انتباهه ع الحنة الي مخليتها ولا انتبه ابد 

كمت كعدت وراه ع القنفة وخليت رجليه على افخاذه وهو كدامي متربع جاي ياكل وضليت العب بشعره من وره ...

كال ايييه تمارا وخري رجليج جاي اتسمم تضلين جاهلة وزعطوطة انت شون وياج ؟ 

وخرت رجليه وضليت افتر يمه لابسة كلبيه للركبة

ورجليه طالعات ، هسه غير ينتبه ما اريد انه اكله 

اففف طكت مرارتي وكفت مقابيله متخصرة

كتله بدلع نبيييل حبيبي شنو متغير بيه ؟ 

باوعلي وهو ياكل كلشي مامتغير بيج يعني من الليل للصبح شنو الي يريد يتغير ...

عوجت حلكي وضليت افر بشفايفي ماعاجبني 

رحت حضرت اله الحمام خليتله ملابس وخاولي وطلعت امير كاعد يمه ياكل ويا 

خلص اكل شلت الصينية ورحت غسلتها وهو طب يريد يسبح ، صاح عليه تمارا تعاي اخذي امير يريد يطب وياي للحمام لا يتمرض الجو بارد 

غسلت ايديه رحت اخذته كوة يبجي يريد يسبح ويا ابو 

كعدت اسكته واقنعه حبيبي بس يطلع بابا اني ادخلك للحمام اسبحك 

ضل يدفر بيه جبابه جبابه(جذابة) 

اخذت ايده وبسته عيب يكولون لماما جذابة يله اعتذر 

كال افه (اسفة)

ضحكت حبيبي انت ولد كول اسف 

مبرطم شفايفه ويحجي افف افف (اسف) 

وضليت ابوس بي وهزه واضحكه واقنعه حتى يسكت...

طلع ابوه من الحمام وهو راح يركض اله يلعب ويا ونسى موضوع السبح وانه رحت كملت غسل مواعين ورجعت يمهم بالهول كعدت وتذكرت الحنة اله اريده يباوعلها هسه ، هو متمدد وبصفه امير وجاي يباوعون للتلفزيون ، مديت رجليه خليتهن على كرشه 

انه ناعمة كلش وهو عملاق ضخم وكرشه واصل لحنجه اصلا انه بالنسبة اله بنته .. معبالك مرته 

لزم رجليه ونزلهن كال شنو هالسوالف هاي مال مزعطة يمته تكبرين تمارا عيب عليج ترا كبرتي صار عمرج 

٢٥ ٠سنة طلابة..

برطمت كتله والله ضلمتني بعدني عمري ٢١ سنة والنبي ..

اووو هيه فرق كم سنة غلسي 

غلسنه بس باوع رجليه نقشتهن حنه

باوع عليهن لزمهن بيده وطكاهه ضحكة كال والله هسه يله عرفت لشنو تردين توصلين صارلج ساعة تلمحين يابه درينه والله درينه .. 

يخبلن حبيبتي يخبلن اصلا انت كلج على بعضج حلووة...

كمت بوسته من خدوده وطبعت على شفته بوسه سريعة .. اريد اوخر همسلي هسه لو ينام امير 

باوعتله وضحكت كتله اندري شينومه كاعد ب ١٢...... 

صوجج ماتعدلين نومته عدليها ولج ترة ياخذهه عادة للكبر وشون اذا دخل مدرسة ..

كتله بعد ٣ سنوات الله كريم .. 

ورحت للمطبخ اعدل بالمسواك ... 

شفت ماجايب لا بيتنجان ولا كلوب للحمام ولا كرزات 

ولا حفاظات ولا حليب وامير ميكدر بدون ميشرب حليب ومخلص العدنه .. 

رجعت للهول كتله حبيبي ليش ماجايب هاي الشغلات؟

كال اووو شون وياج تمارا بهالازعاج هذا ولج اريد اشوف الفلم ثاني شي ترة والله تعبت افتر بالمحلات بهالظهر انت عبالج اروح لمحل واحد الكه البيتنجان والكلوب والكرزات كدامي اشتريهن واجي ها؟ 

اي ياحبيبي الحمام ضلمه وانه اخاف من الضلمة 

وامير ماعنده لا حليب ولا حفاظات ..

كال روحي لمحفظتي طلعي فلوس وروحي ذاك الدرب والسوك قريب اشتري وتعالي شلي بهالدوخة ...

انه كيفت كتله لعد بقي امير يمك اروح بسرعة واجي 

لبست شال وعباية راس وشحاطة جانت يم الباب تصير كلها شفافة طلعت بسرعة وبنيتي ارجع بسرعة لان خاف نبيل ينام وينسى امير ومايتأمن .... 

رحت للسوك الجو جان بارد شويه ، تمشيت منطلقة فرحانة احس بالحرية تداعب روحي ، اول مرة نبيل يخليني اطلع للسوك وانه اموت ع التسوق هيج احس راحة نفسية حتى لو طالعة اشتري شغلات بسيطة .. 

لان انه من عمري ١٨ سنة تزوجت وزوجي نهار كله يركض. ع العيشة وما اطلع من البيت ابد بس لاهلي لو لاهله وهم يمنه بالمنطقة ... 

وحتى للسوك هو يشتريلي لو اروح للدلالات الي يمنه يبيعن بالبيوت اروح اشتري منهن ... 

وقبل لا اتزوج هم جنت محبوسة اهلي متشددين مو من النوع الي يطلعون ومايحبون يطلعون نسوانهم 

وحتى دراسة ماكملت لحد الثاني متوسط وبطلت ماحب الدراسة وكسلانة ... 

وانه جاي امشي شفت فيض ابن عمي بوجهي صار 

لابس قمصلة جلد وجواهه بدي رصاصي بلون عيونه الرماديه الي تناقض لون بشرته السمرة وشعره البني...

بس شافني دار وجهه عني ادري بي يضوج مني كله يسميني الوكحة .. ويكرهني لان جنت اكتله اشبعه كتل من جنه صغار وهو رابي عدنه من جان صغير انه اكبر منه بالاشهر تقريبا ٩ شهور اكبر منه وتسجلت قبله بالمدرسة .. 

جنت مو بس اكتله لا وانما دائما اضوجه هيج اخبث ويا مدري ليش هو عاقل وهادئ بس انه سولتي اضوجه ، حتى مرة جان كاعد ع الشط يغسل وداير ظهره جبته بحجارة على راسه وشردت لبدت ورا الشجرة ....وضليت اباوعله من بعيد واضحك عليه شون يحك براسه متألم ....

بس اخوي الجلب لا يروح فدوة للجلب فتن عليه لان شافني اضربه وراح كال لفيض 

بس هو ماسوا شي ظل بس يباوعلي بحقد 

ووصلت السالفة لابوي والي وصلها اخوي وحصلتلي كتله بوكتها جان عمري ١٤ سنة ....

سرعت بمشيتي ولحكت بي كبل لايعبر الشارع 

وكفت يمه وهو منطيني ظهره 

كتله ها فيض شلونك

دار باوعلي نظرة جانبية ودار وجهه يله رد 

هله بيج خوية شلونج محتاجة شي ليش بوحدج ؟ 

لا سلامتك بس طالعة اجيب حفاظات وحليب لابني 

_ ها لعد ابوه وين ؟ 

_ نايم تعبان .. من رخصتك اروح

_ روحي للبيت انه اشتري واجيبه الج لبيتكم ..

_ لالا هاي الاسواق هنانه هسه دقايق اشتري وارجع ...

باوع على رجليه طالعات من العباية خزر عيونه بدون مايباوعلي كال ها اي اي كملي مسواكج وروحي للبيت الدنيا ما تتأمن ..

كتله خوش يله الله وياك سلمني على اهلي الجمعة اجيكم كول لامي ومن اخلي رصيد اخابرها هسه ماعندي بس رسائل ..

_ اي ان شاءالله يوصل ... 

هو راح بدربه وانه كملت دربي جاي امشي باوعت لرجليه ياصخام مالابسة جواريب شلون عيب اشوف فيض ضل يباوعلي هسه ياخذ عليه نظره ابد مو حلوة خل اجيب الحفاظات والحليب وبسرعة اشطح للبيت ... 

رحت اشتريت من اقرب اسواق يمنه ..... 

اثناء ما جاي اشتري حسيت بواحد يباوع عليه

تجاهلته وكملت مشترياتي 

وجاي ارجع للبيت واحس بخطوات وراي 

اتذكر ابوي دائما جان يكلي من تمشين بالشارع 

لا تتلفتين عيب تجيبلج سمعة موزينة ..

بس انه خفت ولازم اشوف منو جاي يمشي وراي 

درت وجهي واشوفه هذا نفسه الجان يباوعلي بالمحل

سرعت مشيتي وخفت وكلبي صار يدك سريع 

خاف يسويلي مصيبة هذا 

انوب اقترب مني اكثر واكثر 

وصار يهمس ياحلوة يم رجلين تلمع اوكفي خل نحجي 

زين اوكفي جنج بيب بيب محد يلحكج هاج الرقم نتواصل وبعدين روحي .. 

حسيت الدم تجمد بعروكي وتفاقم شعوري بالخوف التوبة اذا اطلع بعد بوحدي ، علما وصلت للبيت 

وكفت يم الباب افتحه التفتت اله شفته واكف ويضحك بخباثة وتحدي ، غميته وانه مخنزرة ..

هو فتح عيونه على اوسعها بغضب 

وانه دخلت للبيت بسرعة وطبكت الباب حيل وقفلتها..

طبيت للهول شفت نبيل نايم جفي من التعب وامير ماكو يمه 

شمرت العلاليك ع الكاع وركضت ادور على امير 

سمعت صوت ماي ركضت ع الحمام طبيت شفته يلعب بالماي خليت ايدي على قلبي همزين مافاتح الماي الحار جان احترك ..لفيته بالخاولي وطلعته بدلتله كبال الصوبة .. 

خليته بحضني وانسابت خصلات شعره بين اصابعي العابثة بيها وافكر بهذا الي لحكني اليوم ياربي شكد جريء و مكروه كلش خفت منه

انوب انه مرات اطلع للجيران احف او اروح للدلالة خاف هم يشوفني!!

وماعندي احد اطلع وياه بيت عيالي مو كلش قريبين علينه ...

مرت ايام صارت عندي خوفة ما اطلع من البيت وحتى للضرورة ما اطلع وهم خفت اجيب سيرة لنبيل خاف تكبر المشكلة وتمس سمعتي خاصة انه بذاك اليوم طالعة ومنقشة روحي حسيت بالذنب وانه ماتربيت هيج ومنطقتنا ملتزمين بس صدك انه نسيت روحي بذاك اليوم وطلعت بسرعة .... 

واكيد ماراح يلومون الرجال ولا يمسون سمعته بشي سيء الاساءة راح تكون الي انه لذلك التزمت الصمت ..

مرت وراها ايام نسيت السالفة وصرت اطلع مرات الح على نبيل يوصلني ومرات مايقبل يتحجج تعبان واريد انام وانه دائما اسميه بزر نستلة اكله انت كل شي

ما تتحمل .. 

ضليت مرات من اطلع اشوفه هذا الكريه واضوج منه كلش تلعب روحي منه هواي مرات ارجع للبيت اسح باموري بسببه وما اكمل شغلتي ... 

صارت شوفته تتعبني وتأرقني وساكتة مااكدر اكول لنبيل ولا لاحد حتى لامي خفت حيل خاف يكولون مصاحبة ومحد يصدكني ... 

وجان كلما يتبعني ويوكف يم الباب مال البيت اغمه وادخل جوه .. 

الى ان بيوم اسوء ايام حياتي يوم مشؤؤم واسود 

وانه بالمطبخ الساعة ب ١١ الظهر امير نايم ونبيل بالشغل ... 

وما اشوف اله الباب 

مال المطبخ انفتح .... 

باوعت عبالي نبيل مو من عوايده يجي هيج وكت الا نادرا ....

وجان اشوف صاحب الوجه الكريه والابتسامة الصفراء الخبيثة والشيطانية ...

لطمت على وجهي وصرخت اطلع برا شجابك انت هناا اطلع 

اريد ادور شي استر روحي شفت وصلة يمي وخليتها على راسي واريد اشرد من المطبخ وجسمي كله يرجف شويه واخرب واطيح من الخوف 

سحبني وانه ادفع بي شمرني ع الكاع 

وقفل باب المطبخ .... 

وكعد ع الكرسي وبيده المفتاح 

كتله وانه ارجف وقلبي احسه ببلعومي لازكة بالكاونتر اريد اطب بي واحمي روحي منه .. 

_ ككككوم اطلع بره 

ضل يضحك واذا ما طلعت شسوين ... 

اصرخ والم الدنيا عليك 

كال عادي اكللهم صاحبتي وجاي اشوفها انه ما اخسر شي بس انتي 

تقربت منه مادري منين اجتني القوة وصفكته راشدي ..يمكن كان كف ايدي سلاحي الوحيد حتى نسيت انه بالمطبخ ونسيت مكان السجاجين .. 

كام سحبني من شعري حييل وضل يجر بيه 

ويحجي بنبرة شيطانية خبيثة تعاي وياي رجلج مو هسه يجي تعاي اعلمج شون تغميني ...... 

الفصل الثالث عشر من هنا