رواية سواد الاثمد الفصل الثالث عشر بقلم نورس
كعدت بالگاع منهارة ابجي بقوة مدري من الوجع لو وضعي الـ اني بيه هم يحجون وهو على وگفته ايده بجيب البنطرون لحد مسمعته يگلهم
عبد :- لموا چوالاتكم ومنا يلا
أرقم :- عبد صدك تحجي شوف شسوت
حجاها ويأشرله على جتفه بعدهم يبررون صاح بيهم ومشى للصالة بسرعة
أرقم فز بسرعة گام وگف
گلهم :- اطلعوا بسرعة راح يجيب السلاح
تطافروا كلهم وسمعت صوت باب الشقة وهو ينسد
اجاني لزمني من اكتافي رفعني جرني لحضنه ايده يمررها على ظهري وسط شهگاتي وحالتي المتهسترة
همس :- كافي اني اطلعلج حقج من عيونه والله
وخرت ردت امشي منعني اخذني من ايدي للصالة كعد وكعدني على رجله شال الگلاص من عالطبلة قربه من حلكي
- اشربي
دفعت ايده :- ماريد
- راح يسكن الألم
- اريد حبوب من الآخذهم راسي حينفجر
ضل ساكت يباوعلي للحظات بعدها كام راح للغرفة شوي ورجع بيده العلبة طلع منها حبايتين دا آخذهم
رفع ايده مانعني :- ليش انطيني
شال الگلاص خلاهن بيه وصار يفر بيه حتى يذوبهن
خلاه عالطبلة وأشرلي :- تردين حبوبج اشربيه
حاجتي الهن بذيج الساعة خلتني ما افكر شنو اسوي لو اللي دا اسوي صح او غلط اخذت الگلاص شربته سفته وحدة بدون تفكير
وكع من ايدي الگلاص مر يلعب النفس مشيت للغرفة مددت بفراشي غمضت عيوني بتعب محسيت على نفسي شوكت نمت
فتحت عيوني اني بالغرفة متمددة بلاية ملابسي بس شرشف يغطيني جسمي احسه متكسر عظامي تون
كمت من مكاني عاقجة وجهي بوجع شفته كاعد على كرسي گبالي بيده جكارته وعينه علي شعره مخربط صدره عاري ما عليه ملابس باقي بالبنطرون
جريت الشرشف بسرعة لصدري لميت روحي وهو يباوع
بلعت ريگي بازدراء حجيت مترددة :- شكو
شكله بهاي اللحظة خلاني انسى حتى نفسي والوضع الجنت بيه سحب نفس من الجگارة ونفخه گلي
عبد :- انتِ بنية بانو
ضليت ساكتة ممفتهمة كلامه
- شنو يعني
سحب النفس الأخير من الجكارة وكاملي اجه باتجاهي دنك لمستواي همس بأذني :- يعني وحدة من الاثنين
لو أهلج جذبوا علينا اخوي ما معتدي لو ضاحكين عليَّ ومبدلينج بأختج
جمدت عن الحركة احس دم ما بقى بجسمي واني اباوعله عيونه حمر گد مخازرني حتى ميرمش
ضليت ساكتة أطرافي كلها ترجف انتبهلي
گال :- ليش ترجفين بانو
نبرته الهادئة وهو يلفظ بيها اسمي ترعبني أكثر
مرر ايده يباعد خصلات شعري عن وجهي رغم برودة الغرفة حسيت روحي مبوخة وجهي باهت ويتعرق
- احجي بانو
رديت من بين رعشة شفايفي :- شأحجي
- عندج اخت
هزيت راسي اي وغورگت عيوني
رجع سألني :- جانت هي المقصودة مو
سكتت دموعي جرت وحدهم عقد حاجبه
صاح :- احجي يغضب
وي صيحته شهگت لميت نفسي حاضنه جسمي حيل جفلت عليه وهو يضرب التيبلام بقوة كسره بالكاع
شكو غرض عالميز شاله وگام يشمر بالغراض بنص الغرفة النفاضة گلاص مَي كسره ترس الگاع گزاز
ما وگف الا على صوت رنة تليفونه تناوشه من الكرسي
رد وعينه عليَّ :- ها عمي اي وشعرفت
سكت شوي يسمع الطرف الثاني دفر الكرسي برجله حيل وصاح :- مو اني اعرف طارحتنا زواج بنت القندرة زين اني المن دزيتك بيوم العقد غير حتى تتأكد وين جان بالك هسه جاي تكلي
اي برر من دنعل چلاب أهاليتكم ما يعتمد على واحد بيكم قندرة على راسك واذا عمي
حجه جملته الاخيرة وسد الخط بوجهه رفع راسه باوعلي شايط :- التوم مالتج ولج عندج توم ومبدلينج بيها وضاحكين على عبدد
بصعوبة رديت :- معلي اني والله هم گلولي لتحجين
اجاني دنك بمستواي عينه بعيني لزم فكي رفع وجهي لوجهه وضاغط ايده حيل نزلت دموعي
گتله :- والله هم خوفوني
- منو هم
- سجودة وسالم
- وليش صرتي مكانها
- عمتي جبرتني والله معلي اني عوفني عليك الله دتأذيني وخر
- واختج هسه وينها
- خافت وماما هزمتها قبل العقد ومحد لكاها بعد
- لا والله وليش خلتج سجودة بدالها
- حتى لتضيع عليها الوجبة مالتك
ضحك وهز راسه :- لبالها تلوي ذراعي وبعدين بانو
- شنو بعدين
- انتِ ليش ما انهزمتي وياها
- مكدرت جانوا حابسيني
ضغط علي وگعدلي گعدة وجبرني احجيله الصار بذاك اليوم بالتفصيل واذا سكتت شوي أنضرب حجيتله عن علاقتي بـمحمد والحبوب وكم مرة حاولت أنتحر
چان مگابلني گاعد عالكرسي ويباوعلي واني احجي طابك حواجبه ملامحه جامدة مثل الي ممقتنع بكلامي
رفعتله معصمي آثار الخياط جان واضح بيهن
گتله :- هاك شوف اذا ممصدك
جر ايدي مركز بيها حيل ورفع عينه :- حلو وتنتحرين علموده فوگاها لا انتِ واصلة مرحلة
سكتت عاف ايدي وسألني
- امج وياها
- لا ماما بالشمال
فز لزمني من شعري رفع راسي خازرني :- شمدريج
- من انطيتني الموبايل جنت اتواصل وياها كالت هزمت نورجان ورجعت يم خالو بعدها تعاركوا وخالي طاردها من بيته ومكالت وين رايحة بعد
- وين راحت
- ما ادري
- بان امج وين راحت
انهاريت گمت أصرخ :- والله ما ادري ليش مدا تصدگني شعري عوفني دتأذيني كافي
شد أكثر وقرب وجهه :- ما جاي تجذبين بانو
هزيت راسي بـ لا سكت شوي مركز بعيوني من الرعبة الجنت بيها الشهگة لازمتني شعري موتني من گد مشاده
عافني وگف جر قميصه يلبس بيه ويحجي وياي
- يصير خير راح آخذ بكلامج هالمرة وراح اتأكد من الموضوع بطريقتي بس والله والسماج بان كلمة وحدة جذب اخليج تتمنين الموت وما تلگيه
اخذ سويچه وموبايله وطلع مسمعت بس صوت باب الشقة وهو ينرگع سحبت نفس شوي تحركت من مكاني
وجع بجسمي فضيع عظامي احسها متكسرة جسمي احسه مثل المأكول يحرگني موتني رفعت الشرشف ضليت مصكوكة
اكو آثار دم عالفراش نزلت دموعي
گعدت عالجرباية لطمت بچيت نصبتلي مناحة
عاونت نفسي وگمت من الجرباية گوة اجر بروحي دخلت بوجهي للحمام فتحت الدوش وصرت جوة المي اريد الوجع الي بجسمي يسكّن شوي
ما ادري شكد مر من الوكت واني بالحمام جنت مثل الفاقدة كملت وطلعت لافة نفسي بالمنشفة
طلعت ملابس بدلت وشلت الفراش من عالجرباية خليته بالزبل غيرته بواحد جديد من الكنتور
جان منظر الغرفة يخنك بشكل الدخان وريحة الجگاير وكل شوي اباوع للفراش لعبت نفسي من المكان
طلعت من الغرفة ركضت للباب افتح بيه قافلها الچلب
رجعت للتخم مددت ولميت نفسي ايدي بين رجلي جسمي كله يرجف الشقة باردة التكييف اسمه مشتغل بيها واني شعري جان مبلل فقدت من البرد محسيت شوكت نمت
فتحت عيوني حسيت على ملمس ايده وهو يمررها على جبهتي فزيت دا اگوم رجعني لمكاني
- لتتحركين متكسرة من السخونة
رجعت خليت راسي عالمخدة مخلي فوگاي غطه لفيت روحي ارجف بردانة
جو الشقة هادئ اضاءة خفيفة مشتغلة المكان نظيف بشكل وهو هادئ حتى من يتحرك ميسوي صوت
حسيت بشي بارد على جبهتي فتحت عيوني لكيته كاعد يمي بالكاع يسويلي كمادات ردت اكوم اعترضني لزمني غصب عني واني رايحة روحي مالي خلك اجادل
ضليت ساكنة بمكاني وهو كل شوي يبللها ويعصرها ويرجع يخليها الي گام شوي ورجع مبدل لبس بيت
رجع كعد يمي يمرر ايده بشعري
عبد :- طلع كلامج صح بانو
درت وجهي نفسي عالي بلاعيمي مقفلة فد مرة مالي قابلية احجي حسيت بانفاسه صارت برگبتي تحركت متضايقة ما وخر ضل بمكانه
نمت ما ادري بروحي بعد كعدت على شي شاد على جسمي ركزت شوي اني بحضن عبد
نايم عالقنفة واني على صدره ايده محاوطة خصري مقيد حركتي انتبهتله صدره عاري واني بدون ملابس باقية بالداخليات تخبلت كمت احرك بجسمي اريده بس يوخر حتى اكوم
يأست منه وهو رايح بالنوم خليت راسي على صدره نفسه قوي احس بنبضات گلبه شلون هادئه غمضت عيوني
عبد الإله :- شبيج تحوسين چنج دودة استقري بمكانج لج خلي اعرف انام لتتحركين
رفعت راسي متضايقة :- انتَ كاعد لعد لويش متوخر اريد اكوم
- اششش نامي بلا صوت
- شبعت نوم ما اريد
- اني ما نايم خلصت اليوم فرة
- واني شعليَّ بلة
- مو ستوج جنتي مواتة شصحاج متكليلي كافي انطمري خلي انخمدلي ساعة
- اريد اكوم
- نامي بان
- جعت اريد اروح آكل
رفع راسه باوعلي رديت :- لتباوع هيج والله جعت مماكلة شي من الصبح
تنهد وگام يفرك بوجهه لزم ايدي جرني وراه صحت
- خاب هاا
باوعلي عاقد حاجبه لافة روحي بالغطة ومطنگرة بوجهه تقرب دنك لوجهي
- وجعا بان حتى وجعا ترى شفت كلشي لا عبالج خليت بنفسي شي
همست :- چلب
لزمني من فكي عض شفته :- ليش تجبريني أذيج الزمي لسانج بانو
- وخر
- واذا ما وخرت بلة شراح تسوين
حجاها وهو يحرك ايده على طول ايدي ويصعد لكتفي
سكتت عيني بعينه اريد اكله بسنوني واشرب من دمه هو ونظراته القذرة مركزها على شفايفي محسيت عليه الا ماخذهن بين سنونه رفعت ايدي بسرعة معترضة لزمني دفعني عالتخم
صار فوكاي ايده تتحرك على جسمي تجردني من باقي ملابسي والثانية لازمني ميخليني اتحرك اختنگت ردت نفس ولا عبالك نزلت دموعي حس عليَّ يلا ابتعد
كمت اشهگ النفس نزل يطبع بوساته على رگبتي حجيت توسلت بجيت ما اهتز مجان عندي قابلية للتحمل وهو يلح يريدني اتجاوب وياه
تعبت من المقاومة صار بس صوت شهگتي احسه يطلع من گلبي وهو من يشوفني هيج يزيد يتعمد أذيتي على ما سلمته نفسي وأخذ اليريده مني اني طالعة روحي
كام مني لفيت نفسي بالشرشف ودموعي تنزل عيوني تدور ملابسي الرؤية انعدمت عندي من الدموع المتجمعة بعيوني
كمت من مكاني لافه جسمي امشي واعثر الغطه يسحول وراي وصلت للغرفة اخذت اي شي طلع كدامي بالكنتور ودخلت للحمام اسبح
طلعت من الحمام الشهگة بعدها بصدري تطلع غصب عني دموعي كل شوي تنزل وامسحهن وكفت كبال المراية جريت المشط امشط بشعري وكع من ايدي مسيطرت أثر الرجفة البجسمي
دنكت دا اخذه انرفعت من كتفي شفته دنك هو جابه وصار وراي كعدني عالطبلة وصار يمشطلي شعري
عيوني بالگاع ما اباوعله يمرر المشط على كيف حسيت بأنفاسه قريبة من بشرتي ايده حاوطت خصري من وره
همس بأذني :- أذيتج
ضليت ساكتة باس خدي وكال :- لتتعاندين وياي بانو اني من اتعاند ما اسيطر على روحي اكوم أأذي ما حاس على نفسي
نزلت دموعي غصب عني هواي كابرت وعاندت عيوني حتى لينزلن همست :- چلب
رفع حاجبه :- ها هاي اني
- وحيوان هم
- راح امشيها الج هالمرة بمزاجي النفسية يمي مرتاحة
- الله ياخذك
هز راسه :- ياخذني وياخذج وياخذنا كلنا لتخافين كلمن اله يوم
دفعت ايده رجع لزمني جرني لحضنه واني نافرة منه اريده يعوفني شبكني حيل ضاغط على جسمي عبالك يريد يدخلني بجسمه
نترت :- وخر
- بطلي بجي عاد
- مدا أبجي وخر يلا
- تسكتين يلا
- كسرتني ترى مو هيج المواساة فاهم الموضوع غلط
وخر وهو يضحك باوع بعيوني رفع ايدي باسها ومركز بنظره عليَّ سحبت ايدي ودا امشي رجع لزمني اخذني وياه طالعين من الغرفة ما انطاني مجال اعترض
كعد بالصالة خلاني بحضنه جر الطبلة برجله خلاها كبالنا جايب أكل واني انفض بجسمي اريده يعوفني
عبد :- استقري بان راح انعل والديج
- وخر ماريد
- مو بالمزاج
- لعد بكيفك شنو
- اي انتِ يمي تمشين بمزاجي وبمثل ما يعجبني اني خليها براسج هاي وهاي مال تاخذيلج ساعة بجي ورى ما اتقربلج تنسيها بعد الي حق يمج اخذه وانتِ الممنونة كافي انطيتج مجال هواي من تطك عندي اشوفج عبد منو ساعتها
اختنگت اكثر وزاد نفسي حجيت :- وخر
- اكلي وكومي ماريد منج شي مو كل يوم والثاني متخربطة عليَّ
- ماريد
ايد لازمني حيل من بطني والثانية يفتح بالأكل كام هو يوكلني بيده جبرني واني صدك جنت جوعانة بس من الصار جانت نفسي مسدودة كوة اكلت كم لگمة ودرتله
شهربان :- طلگني عبد
هز راسه گال :- اطلگج بس مو هسه
- ولويش مو هسه
- لأن بكيفي
جريت نفس أحاول ألزم روحي :- شوكت يعني
- من أرد اعتباري من عمتج
- بينك وبين عمتي سجودة اني شلي دخل مدخليني بنصكم انتَ من الاول مرايدني أصلا وانجبرت عالزواج حالك حالي من ورى اخوك
- والله منو كال
حجاها وسحب باكيته طلع جگارة يدخن
- سمعتك من حجيت ويَّ عمك بيوم العقد جنت ماخذ الموضوع باستهزاء وممعترف بزواجنا اصلًا لأن مبني على اتفاق بينك وبين سجودة لا همكم نورجان ولا قضيتها البقت معلگة
ضل ساكت انداريت بكل جسمي عليه وحجيت اتوسله
شهربان :- عبد طلگني خليني ارجع لماما انتَ مرايدني خلص شوف حياتك معليك بعمتي وتهديداتها مدام نورجان شاردة مراح تگدر تسوي شي ضد اخوك لأن هي كل همها جان البضاعة وانتَ سديتها بوجها وخربت عليها الشغل مراح تگدر تسوي شي
- وانتِ برأيج اللازمني على طلاگج خوفي من عمتج
باوعت بعينه ؛- لعد شنو الجابرك تبقيني على ذمتك
- لأن كلشي يمشي بكيفي اني مو بكيفكم انتوا اخذج شوكت ميعجبني واطلگج شوكت ما اني اريد وما دامج على ذمتي حتى النفس التتنفسينه ما يفوت صدرج الا بأمري خلي هالحجي براسج
گالها وهو يطبطب على راسي بأصبعه
- واني شنو ذنبي اصير بينك وبينها
- ذنبج شلتي ذنب غيرج
الدموع تجمعت بعيوني صدري صار يوجعني خليت ايدي لازمة صدري وگمت منه بوجهي للحمام
وكفت عالمغسلة اباوع لأنعكاسي عيوني دم وتحرگني من الدموع المتجمعة بيها بس مراضية تنزل وتريحني
ذبيت على وجهي مي بارد اريد النار البصدري تطفى
رجعت للغرفة شمرت نفسي عالجرباية دافنة راسي بالمخدة صرخت بعلو صوتي بصوت مكتوم
ما كدرت اكتم اكثر انفجرت بجي وايدي تضرب بالفراش روحي تريد تطلع الدنيا طالعة من عيني
صرت اصرخ :- والله اندمك على كل دمعة نزلت من عيني
- تندمين منو
رفعت راسي لكيته واكف بالباب ايده بجيوبه صحت
شهربان :- انتَ وسجودة وسالم واخوك كل واحد جان اله ايد بأذيتي وأذية عائلتي اندمكم وارجعلكم أضعاف أذيتكم النا أطشركم مثل ما طشرتونا بليلة ظلمة وأحرگ بيوتكم وشغلكم التتحاربون علموده
فقدت كمت اصرخ مواعية على نفسي اجه يحاول يلزمني يريدني اهدئ :- والله عبد اموتك وما يرفلي جفن وروح بابا اندمكم والسماني بان
راح للمجر طلع حبوب واجاني لزمني كوة واني انفض بجسمي شربني الحبوب وضل مقيدني بحضنه دنكت عضيت ايده اللازمني بيها كمز متوجع
دارني عليه جابني براشدي نومني بالفراش لزمت الغطه بيدي عضيت شفتي حيل من القهر روحي مفرفحة
أحرك برجلي وايدي ضاغطة عالشرشف بقوة الشهگة اللي بصدري تعبتني مثل الفحطانة گوة أجر النفس
بدت الحبوب تاخذ مفعولها وجسمي بدة يخدر طلع من الغرفة شوي ورجع لازم ايده يباوعلي
عبد :- بنت الچلب والله ينطلع بيج شوهتي ايدي خوش أنياب عندج
حسيت عليه وهو يرفع رجلي عالجرباية نومني وغطاني واني اردد :- إلا اموتكم وأندمكم كلكم
كام يمسد على شعري گال :- شو تهددين ولج لوما وضعج حرج جان شفت شغلي وياج بس مسايرج
باوعتله :- اني الك
- اني هم
- أولهم انتَ راح اندمك يجي يوم وتصير بمكاني تطلب رحمتي ومتشوفها
عض شفته :- آخ الله گوية
- اذكرك
ابتسم وهو على وضعه محسيت على نفسي نمت
ثاني يوم فزينا اثنينا على صوت الباب وهو يندفع
باوعت احاول اركز بنية واگفة بالباب عينها علينا
صاح بيها :- بنت القنادر شعندج هنا
ضلت واگفة تباوعلنا وجهه مخطوف لونه توترت
يسر :- اعتذر مو قصدي ادخل عليكم وانتوا بهالوضع
حجتها بسرعة وطلعت مخنوگة انتبهت اني بحضنه واثنينا بلا ملابس ميغطينا غير الشرشف باوعتله اخزر بيه
عبد :- عيونج لا افگسهن بنت المچلق
دفعته وجريت الغطه على جسمي وكمت وهو عينه وراي ايده وره راسه منتجي يباوعلي مبتسم
دخلت للحمام سبحت واباوع لجسمي بالمراية مشوهه
لغبت نفسي من روحي لزمت الليفة أفرك بآثاره القذرة
كملت وتذكرت اني مجايبة ملابس لفيت المنشفة على جسمي وطلعت مادة راسي اباوع بالغرفة ماكو احد
اطمأنيت طلعت
طلعتلي ملابس و وكفت البس دا البس بالتيشيرت وسمعت صوت طگة الجداحة انداريت بسرعة
لكيته وراي كاعد عالكرسي بالبنطرون بدون شي يغطي صدره العاري بحلكه جكارة يدخن ويباوعلي
بلعتها صارت حرگتي بگلبي اريد اكله بسنوني وما يبرد دمي كملت لبس و وكفت امشط بشعري كل شوي تخطف عيني عليه الكاه على نفس وضعه
ضفرت شعري لنهايته وخليت گتر حسيته وراي حضني من وره راسه برگبتي غمضت عيوني احاول اسيطر على أعصابي قبل لا انفجر
- وخر عبد
- اششش حلكج اشگه بس تحجين
دنكت اريد اعضه جرني بسرعة من گصيبتي رجع راسي ليورة عض شفته :- ليش هيج بانو
- وخر
- اخ مفترسة وينج لعد بالفراش مواتة تكول نايم ويَّ جثة
دا احجي اندك الباب عافني وراح فتحه مدري شنو حجت وياه اجه اخذ موبايله والجكاير وطلع وراها
عدلت ملابسي باوعت بالمراية وجهي صاير أحمر طلعت للصالة شفته عالتخم مدنك على تليفونه وهي لاطشة روحها بيه من شافتني زادت بحيث شوي وتكعد بحضنه
عقدت حاجبي من وضعهم تحجي وياه وهي بحضنه وهو ممهتم عينه بتليفونه ويرد عليها بأختصار
هزيت ايدي ومشيت للمطبخ ما اهتميت هو المثل عبد أستغرب منه يجيب نسوان للشقة
وكفت ادور على شي سريع آكله اجت وراي للمطبخ
اتچتفت وسندت روحها عالحايط تباوعلي لحد محجت
يسر :- شوكت تقربلج عبد
انتجيت عالكاونتر بيدي گلاص مي اشرب بيه وعيني عليها من فوك ليجوة لابسة بنطرون وبدي حصر مفاتن جسمها بارزة شعرها متدرج على شقارات شوي جوة من أكتافها حنطية بوجه دائري ما أنكر حلوة جانت
- دا احجي وياج
شهربان :- شتردين بنتي
- شوكت تقربلج
- مو شغلج
تنرفزت صارت بوجهي منفعلة تحاول متعلي صوتها
- لا عبالج أخذج ونام وياج يعني هذا هو صرتي مرته ترى عبد اصلًا ممعترف بيج وكلها كم يوم يطلگج ويرجعج لعمتج
رفعت ايدي :- الله يسمع منج
ضلت صافنة رجعت گالت وهي تفتح الثلاجة
- نصيحة مني الج لتحاولين تتذاكين لأن مرجعه الي لحضني اني
- مگشرة بيه بس محصلي الشرف حتى أعرف منو
تخبلت بالزايد شلون احجي وياها هيج صارت گدامي
- والقرآن اموتج لو فكرتي تجرجرينه عبد طلعيه من راسج هواي حاولن غيرج ومكدرن لأن رجع للأصل
ولا عبالج تغرينه عود بالنومة راد يجربج لا أكثر حتى لتضلين بنفسه كلها كم يوم ويرجع يطلبني للشقة راحته بحضني اني ميرتاح يم غيري
- اشوفه ممنطيج وجه
- حبيبتي بعدج عروس وشافج صغيرة مراد يكسر بيج الا هو تلعب نفسه منج وحدة اخوه لاعب بيها قبله شلون اله نفس بيج بعد
أشرتلها بيدي واني اضحك :- هاي صار ثالث مرة يتقربلي
سمعت صوت گحته اندارينا اثنينا جان بالباب جكارته بيده باوعلي :- اشتعل أصلج مو هيج
يسر :- تضحك عليَّ عبد لعد انتِ وانتِ وماكو غيرج التملي عيني واني مرايدها وين كلامك هذا وانتَ ماخذها زوجة الك بالفراش
- وشنو جاية تحاسبيني بعدين اني شعليَّ هي تحطلي منوم بالأكل اكعد الصبح الكه روحي مچلق بحضنها مغتصبتني شبيدي يعني
رفعتله حاجبي غمزلي هاي كامت تشيل روحها وتركعها
- لك عبد زوج كدامك لو شنو
نتر بيها :- صوتج لج لا اگص لسانج لتنسين روحج زايد
طلع للصالة وهي وراه مديت راسي من المطبخ واباوعلهم لازمة ايده تبجي تكله
- يهون عليك اسبوعين وانتَ ممعبرني علمود هاي الزعطوطة أثاري مشبعتك واني اندفرت صرت بخبر كان
شهربان :- الي يجرب الغالي تكش روحه من الرخيص
يصير ما يرغبه
اندارتلي تخزر بيَّ وترجع تباوعله مدنك راسه يحك بگصته انتبهتله مبتسم عاد هي تخبلت
- تضحك عليها تسمعها تهيني وتضحك لا انتَ صدك فارة عقلك عليَّ هالجاهل لك الأحلى منها وبنت الحسب والنسب ما هزنك تجي هاي الزعطوطة بنت الرخاص تگلبك على يسر
عبد :- هاي الزعطوطة جمعتهن اثنينهن هم حلوة وهم بنت حسب ونسب
- يا نسب هذا سجودة الي تبيع بـ بناتهم لخاطر الفلوس لو سالم المجرم
- لا نسب حارث المغدور
فزيت وأحس جسمي كله انتفض من جاب اسم بابا تقربت عليه صرت گدامه همست من بين رعشة شفايفي
شهربان :- تعرف بابا
باوعلي شوي بعدها اندار گعد عالتخم عينه بتليفونه
گتله :- دا أحجي وياك عبدد منين تعرف بابا
باوعلي :- لتدوخين راسج بهالسوالف
رجع لتليفونه :- كافي يلا دوختني امشي سويلنا الريوك
- عبد لتهسترني احجي منين تعرف بابا
رفع راسه گال بنبرة حادة :- ويامن احجي گدامي للمطبخ حضري الريوك خلي نتزقنب عندي شغل
صحت :- اسويلكم سم
حجيتها وانداريت دا امشي محسيت الا انجر من كصيبتي وارجع ليورة همس بتحذير
- جلدج يحكج اليوم بانو تردين ارجع للحزام ما عندي مانع صيري حبابة ولتعاندين حتى لا اطلع خبالاتي عليج
دفعني كوة سيطرت حتى لا اوكع وكفت واباوعله بحقد أشرلي بيده عالمطبخ :- يلا بسرعة ربع ساعة الريوك كدامي
- ماعرف
رفعلي حاجبه كتله :- والله ما اعرف كُلشي بالمطبخ احرگكم ترى
- روحي يسر يمج تساعدج
اندارلها :- ايدج وياها يسر هاي خبلة مو بعقلها تروح صدك تسويها
- اذا هيج خليها هي تسوي الريوك
- وتالي بانو
جرتني من متني من شافته صار أعصاب ومشينا للمطبخ نترت ايدها :- وخري
يسر :- ومرض فوكاها النوب هذا لتتقربيله من يصير أعصاب يكتل الكدامه ومحاس على نفسه ديري بالج هاي اني حذرتج
- اوي منين نزلت عليج هالحنية فجأة شو انتِ متمنيتها من الله على الله
- لا شكالولج عليَّ اني بس ما اريدج تتقربيله زايد وتعوديه على وجودج لأن اول تالي مرجوعه الي
وانتِ راجعة لأهلج وهم بعدج صغيرة مو مال يندفن
شبابج يم عبد
- شقصدج
- وين الجداحة
سكتت وسوت روحها تدور بالكاونتر اني هم ملحيت وياها بالحجي سكتت عنها وصرت أراقب حركاتها
باوعتلها عجيبة تركيبتها هالبنية متريدني اتقربله وكفت تعلمني شلون احضرله الريوك كل يوم وبيا ساعة
شهربان :- تحبينه
- عبد النفس اللي أتنفسه
- بس هو ممبين عليه يحبج
- مو من نوع الي يعبر خاصة اذا كدام احد بس بالغرفة يفتحلي گلبه ميفضفض يم غيري لو ينام ويَّ مية وحدة راحته يمي اني
- شنو علاقتج بيه بالضبط ترى دوختوني
- عاقدين شيخ
- يعني زوجته
ضحكت :- بالضبط ولتسوين روحج عود تغارين وانتِ المضحوك عليج كلنا نعرف زواجكم اتفاق لا اكثر
- منج اله علاقتكم ممبين انكم متزوجين اشو لا يروح لغير مكان نومته بس بالشقة هنا زواجيش هذا
- دتشوفين الغرفة المقفولة هاي غرفتي اني مفتاحها وياي متنفتح بس من اني اجيله هنا
- وليش متجين يمه بالشقة
- أهله ميدرون بس ابن عمه
-قصدج ميدرون بزواجكم
هزت راسها :- أهله ميردوني حاول وياهم كم مرة حتى يجون يطلبوني من أهلي مقبلوا ولزموه بشغله وأخذني من وراهم وبس ابن عمه جان شاهد على زواجنا من طرف أهله
- منو هذا
- أرقم منو يعني
- ابن عمه
ضحكت واخذت المواعين وراحت قبلي للصالة
ضليت صافنة معقول البشر يوصل لهالدنائة بحيث يخلي عينه على عرض ابن عمه لا والمخبلني عبد ليش ساكت هيج مگرن وعديم غيرة لو مثل مكالت يسر مجرد هامش بحياته مراد يخليني بنفسه
صاحوا عليَّ اخذت الچاي ولحكتهم كعدنا ناكل هو ولا يمنا ملتهي بتليفونه وهي لاطشة روحها بيه كل شوي ترفعله ايدها توكله لعبت نفسي
سويت لفة اخذت كوبي وكمت كعدت على صفحة عيني بالتلفزيون اندك الباب صاح :- الباب بان
- مو دا اتسمم
- افتحي وارجعي تسممي
همست :- بگلبك
باوعلي :- ها اگوم
كمت للباب فتحته صار بوجهي أرقم ضليت صافنة على حاله ايده مچبسه وجهه مورم عليه كدمات باوعلي ونزل عينه بسرعة
أرقم :- شلونج اختي بان
صاح عبد :- منو عالباب
گتله :- هذا أرقم
حجيتها وعيني مشلتها عنه مصدومة بشكله ولا عبالك هو أشرلي اسويله مجال كال
- ممكن شوي افوت
وخرت من كدامه دخل سديت الباب وراه سلم عليهم وكعد اللابتوب بيده فتحه وكعد يطگطگ بيه كام عبد غسل واجه يمه يسولفون بيناتهم
شفت يسر تشيل بالمواعين صرت يمها وعيني عليهم
شهربان :- شبيه هذا
باوعت عليه وضحكت بصوت ناصي :- مو تحرش بيج عبد رجعها اله وتوبه گله تصير عينك عليها مرة الثانية اطفيها الك نهائي والأيد التنمد على عرضي تنخلع
- شو انتِ تضحكين مو زوجج وخابصتني الي والي
- لتخافين مو غيرة هاي بس هو ميحب احد تصير عينه على حاجة تخصه وخاصة أرقم مو اول مرة يسويها
أشرتلي عالمطبخ مشينا وكامت تسولفلي :- مرة اخذ سيارة عبد بدون علمه ورجعها اله مدعومة لزمه ربط ايده بحبل وربط الحبل بالجنطة وشغل السيارة يمشي وأرقم يركض وراه الله ليشوفج حاله يكسر الخاطر
- وشعجب هيج متمسك بيه عنده هواي زلم غيره
- ميثق بأي واحد أرقم رغم سوالفه ومكسراته وياه بس واثق بيه متجي الغدرة منه الغدرة من الغريب
- عجيب شنو طينتكم انتوا
- وشبينا عيني عايشين ويا محلانا
غسلت المواعين وطلعت قبلي وگفت اني ارتبهم رحت للصالة ماكو لا هي ولا عبد بس أرقم مدنك يشتغل
جريت الريموت وكعدت اگلب بالقنوات يمكن نص ساعة
جفلت على صوته وهو يصيح :- عينك بالكاع ابن القندرة
رفعت راسي لكيته كبالي طالع من غرفته توه سابح وراه يسر المنشفة على راسها عضيت شفتي وانداريت عالتلفزيون وادردم بيني وبين نفسي
اجوا كعدوا ويحجي ويَّ أرقم ركزت بكلامهم شوي سمعته يكله
عبد :- حجزت
- اي اليوم بالليل موعدها
- بيا ساعة تطلع الطيارة
- عالعشرة
- جواز بان عندك
- كلهن يمي عفتهن بجنطة صغيرة بالسيارة
يسر :- هاي شنو عبد وين رايحين
- لأربيل
انداريتله شفتها كامت يمه لزمت ايده مبوزة بوجهه
- وتعوفني
حاوط متنها جرها لحضنه :- حاجزلج وياي والله
ضحكت خلت راسها على صدره اجت عينه عليَّ
- متردين ترحين مو
شهربان :- لا
- مو بكيفج حجزت بعد وخسرت فلوس المن
- ماريد اروح عوفني هنا
- حتى ارجع الكه االحايط مزروف مو الباب ودرب الشردة وارد ما الكالج ذكر حالج حال اختج
سكتت بالليل حضرنا الجنط وطلعنا للمطار بسيارة وحدة ورانا سيارة بيها اثنين من جماعة عبد حتى يرجعون السيارة مالته
وصلنا هناك كعدنا بصالة الأنتظار وراح أرقم يكمل الاجراءات ورجع وكف يمنا ما طولنا بالكعدة شوي ووكف عبد أشرلنا :- يلا
صعدنا الطيارة هو بصفي وأرقم يم يسر صاروا ورانا
طول الرحلة اني محاسة على نفسي نايمة على كتفه مكعدت الا على ايده كمت متكسرة من وضعيتي
اباوع ليسر تخزر بيَّ وأرقم يضحك عليها لزمني عبد من ايدي من شافني مثل السكرانة ما اندل دربي وصار يمشي واني وياه وهذول يمشون ورانا واسمع صوتهم
استلمنا الجنط جانت واكفتلنا سيارة كدام المطار صعدنا وبوجهنا عالفندق حجز سويت كبير بيه غرفتين يسر ويانا بالسويت وأرقم صار بغير غرفة لوحده
شفتهم ذبوا الجنط وراحوا لوحدة من الغرف وانسد الباب رحت للغرفة الثانية فتحتها ودخلت نزعت السترة فتحت شعري اخذت ملابس ودخلت للحمام
طلعت متنشطة شبعانة نوم المكان هدوء هذول مالهم صوت گلت ناموا جعت الغرفة فارغة ما بيها شي
صرت أباوع للأثاث وأفتر بالمكان لگيت حلويات عالميز أخذت قطعة أكلتها وعيوني تتجول الحلاة عطشتني جانت اكو ثلاجة صغيرة بين الغرفتين فتحتها وكشيت
بيها بطالة شرب سديتها بسرعة :- شنو هالعبان نفس
لبست حذائي وطلعت برة صار بوجهي أرقم وهو طالع من الغرفة المقابيلنا عقد حاجبه
أرقم :- وين رايحة
- جوعانة اريد اكل
- عبد يدري
- لا نايم
- وشلون تطلعين بدون متگليله لو حطيتيها براسج بعد
حجاها ولزمني من متني صحت :- شبيك ابني تخبلت
- تردين تغافلينا حتى تنهزمين بان والقرآن يموتج وميرفله جفن
- اني بـ بغداد مسويتها مو عاد هنا ما اندل شي شبيكم متحسسين من سالفة الشردة لهالدرجة
- الج سوابق
- ولا مرة حاولت انهزم واني يمه بطلوا تفكيركم المريض هذا وفضني يلا اريد اكل تجيبلي لو انزل اني اشوف
- تشوفين وانتِ مهتلفة حتى فلوس ما عندج
طلعتله جيبي ضامتلي ضبة فتح عينه :- هاي منيلج
- اخذتهن من عبد
- هو انطاج
- لأ بگتهن بدون علمه
صفت بوجهي :- صلفة والله وتحجيها عادي
- جعت أرقم تاخذني آكل لو اروح اگعده
ضل ساكت يباوعلي متردد وباوع لغرفتنا أشرلي بيده
- امشي گدامي
نزلنا اني وياه طلعنا من الفندق نتمشى انداريتله
- اكو مطاعم مفتحة هيج وكت
- اكو
صدك تمشينا شوي ووكفنا كبال مطعم دخلنا مليان ناس واغلبها شباب كعدنا على طاولة نزلنا اكل وكعدت اكل جنت حيل جوعانة والأكل جان طيب نفسيتي انفتحت
اتصل تليفونه رد بسرعة اسمع صوت صياح من الطرف الثاني عرفته عبد
باوعلي وكله :- هاي كدامي ومحمد جبتها تاكل كالت جوعانة زين هسه نرجع
سد الخط وباوعلي
- فضينا خاتون رجلج خبصني عباله مهزومة
- استغفر الله مو بعقلكم والحُر
- ليش هو ينلام بيج
- انطم ابني
- اكوم
- اكول لعبد اخليه يجنزك والنبي بس تتقربلي واكوله هو جبرني حتى نطلع اني مكايلتله
- ما استبعدها منج وحدة بربوك
- مثل امك
كمز عليَّ طفرت بسرعة طلعت اركض برة وهو وراي الناس تباوع علينا رجعت من الطريق الاجينا منه لكيت عبد واكف كبال الفندق متخصر ويباوع يمنى يسرى
ركضت عليه شافني صرت وراه لازمة بملابسه من ورة باوعلي عاقد حاجبه نتر :- شبيج
أشرتله على أرقم الصار وراي من شافنا كام يتمشى باتجاهنا يريد يطلع بروحي اول موصل يمنا لزمة من ياخته جره عليه وصاح
عبد :- وين وليت بيها
- للمطعم ومحمد وانهزمت مني
صحت :- كذاب هو شافني طالعة من الغرفة وكلي تعاي اخذج رحنا هناك خلصها تكفخ وفشار لأن منطيته مجال يتقربلي خليت ورجعت
فتح عيونه :- بنت الكلب شوكت متقربلج عاد لو حلوة بيها باب وجواب لوما الملاهي تارسه أربيل اجي اباوعلج انتِ
- اكل تبن چلاب انتَ وأهلك تاج راسك لتجيب طاريه على لسانك القذر
- وحق محمد إذا لزمتج إلا أگصلج لسانج هذا الي يشمر
هو حجه هيج اجاه بوكس من عبد بنص وجهه وكعه للكاع رفع راسه يباوعله وهو لازم حلكة عاقج وجهه متأذي
اندارلي خازرني :- اصعدي كدامي حسابج بعدين
مشيت منهم انداريت لكيته لازمه من ملابسه يحجي وياه أعصابه گابة وأرقم واكف يبرر كملت طريقي صعدت للسويت طبيت لغرفتي وسديت الباب
كعدت عالجرباية اهز برجلي منتظرة سراي ابتليت على عمري معبالك رحت اتسمملي لگمة اسد بيها جوعة بطني
لحظات وانفتح الباب فات للغرفة كمت بسرعة حجيت
- عبد ترى والله جعت وطلعت آكل وهو من شافني مقبل أنزل الا يجي وياي ما جرمت ترى ليش مكبر الموضوع
ما اهتملي قفل الباب شفته نزع قميصه واجاني صرت بينه وبين ميز تواليت مركز بعيوني
همست :- والله مشردت
- والفلوس
- ردت أكل
- وهلگد تاخذين
- سحبت كُلشي بالمحفظة محسبت شكد
- لا صدك
- والحُر
مد ايده يوخر شعري عن وجهي
- تعبتيني بانو وتالي وياج
شفته صار قريب مني حيل رفعت ايدي على صدره اريد ادفعه بحركة سريعة سحبني عليه اكثر باسني من شفتي
رفعني من الكاع مشى بيَّ للجرباية يوزع بوساته على وجهي عض حنجي وهمس بأذني :- وكحة بانو صيري عاقلة خاطر لا تتأذين
الصبح فتحت عيوني بعده نايم وخرت ايده المحاوطة خصري وكمت منه جريت ملابسي من الكاع لبست بسرعة اخذت ملابس من الجنطة ورحت سبحت
طلعت شعري يذب مي عفته على طوله وطلعت من الغرفة صارت يسر بوجهي وجها ميتفسر شافتني صعد الدم لراسها راحت للغرفة عليه
عفتهم وگعدت عالتخم النوب عليَّ هاي عايزة اني
شوي وطلعت لغرفتهم الضحكة شاگة حلكها شگد خفيفة يربي شوي وتوگع لرجله تبوسها حتى يباوعلها
طلع وراها شعره مبلل يدگم بالقميص شافني غمزلي
عبد :- ليش تباوعين ما عاجبج بانو
- ماكو شي بس شوي متفاجأة من ذوقك توقعتك أرقى من هيج
- قصدج على يسر
اجاني دنك عليَّ وجهه بوجهي متحركت ضليت نفس وضعي :- شبيها تخبل شفتي جسمها يكتل قابل مثل جسمج هزيلة متشبعين
- الحيوان الشهواني المثلك ميشبع بوحدة
لزمني من فكي عاض شفته :- وتالي وي الملاسن هذا
- فكي عبد وخر
عافني گال :- شبرين ونص وبيها كل البلة
نزلت عينه انتبهت وين يباوع صدري مبين من مقدمة التراك خليت ايدي خازرته تقرب اكثر يحرك شفايفه على وجهي
همس بأذني :- بس الصدك ترفات يسون واهس
دفعته حيل كام يضحك طلعت يسر مبدلة بيدها الجنطة
يسر :- يلا حبيبي
راح للغرفة شوي ورجع نظارته بيده امّشط شعره العطر يهف ترس المكان مدلها ايده حاوطت عكسه واندارلي
عبد :- شجيبلج ويانا
- وين رايحين
- نتريك
- وليش ما اروح وياكم
- عقوبة البارحة من طلعتي بدون علمي مالج طلعة منا لحد ما ارضى عليج
- ديلا عيني سلطان سليمان يرضى عليَّ هو
حجيتها وهزيت ايدي مستهزئة أشرلي بيده عود بسيطة
طلعوا كمت وراهم فتحت اليدة مال باب قفلها 3 أيام على هالحال حابسني مخلاني اطلع برة الفندق ينزلون هم يتونسون ياكلون يطلعون واني محبوسة لوحدي
لحد ما بليلة احتاجيت الحبوب جان گاطعها مني هي والمنوم گمت من فراشي روحي تلوب تمشيت لغرفتهم دگيت الباب عالخفيف واحجي بصوت واهن
- عبد افتح
كعدت انتجيت ظهري عالباب لازمة راسي حيل يريد ينفجر جسمي نار تسعر بيه كمت افرك بصدري واشهگ
انداريت دفرت الباب بقوة برجلي ثواني وانفتح صار كبالي بس بالشورت ويسر وراه تلبس بالروب
عقد حاجبه :- شبيج
- اريد حبوب
دنك ركبه ونص يمرر ايده على وجهي ويباوعلي بقلق
- بيج شي بان
- حبوب عبد انطيني دا انخمد
- ما عندي
تخبلت بالزايد كمت اشمر بيدي وهو لازمني
- شنو ما عندك انطيني حبوب روحي دتطلع
- ما جوة ايدي والله الصبح اوصي أرقم يجيبلج
حجاها وسحبني لحضنه يهدأني واني ألوب مفرفحة جوة ايده جسمي ياكلني اكل كمت اصرخ وابجي بلا وعي مني كام اخذني للغرفة ويسر ورانا
وكفت بالباب متخصرة :- يعني هي هالكم ليلة وسوتها علينا سم
- انگبري لغرفتج يسر وسدي الباب
- وحتبقى يمها
- احاجيج بنت الخرا
زفرت نفس بضوجة وطلعت
ايده يمررها على ظهري محاوطني وايد لازم ايدي يبوس بيها ويحجي بأذني :- كافي والله هسه اخابره اخليه يجيبلج بس اهدأي
شهگت :- روحي تلوب والله
كام مني طلع من الغرفة شوي ورجع بيده تليفونه يخابر
صاير أعصاب سده واجاني ملامحه معتليها القلق
عبد :- يتأخرن بان
- لا عليك الله والله محتاجتهن هسه دبرني راح اموت
- بس الليلة تحملي
- لا ما اكدر اريدهن انطيني بس وحدة والله وحدة كافية حرام عليك لتصير حيوان
كمت اجيب واخربط غالطة ومفشرة ساعة ابجي بحضنه اضرب بيدي بالكاع مفرفحة وهو يمي ساد حلكي صوتي عالي احتاريت شسوي
شوي واندك باب الغرفة وصوت أرقم من وراه كام فتحله فاتوا اثنينهم وراهم يسر
- جبتهن
أرقم :- لا بس دبرتلك جرعة
ضرب الميز برجله صاح :- متاخذ ابر ابن النعال مو كتلك حبوب
- ما لكيت هي هاي وبالشافعات جماعتنا دبروها الي انطيها الها خلي تهود ترى صوتها عالي على ساعة يندك الباب تلگه الإدارة گبالك وتعال اگعد استجواب منا لباجر ميعوفونك الا يعرفون شبيها
باوعلي بحيرة :- قوية عليها أرقم متتحملها
- بس وحدة بين ما اجيبلها الحبوب باجر
طلعله الأبرة من جيبه انطاها اله واجاني كعد كدامي
عبد :- انطيني ايدج
مديتله ايدي بدون تفكير ضربني الابرة عالنص ولزم ايدي يفرك بيها ومد الابرة لأرقم
- شو نص
- ماريد تتعود عليها نص كافي وهاي اول وآخر مرة تاخذها الباجر تدبرلي علبة لو جانت بسابع كاع
- وهاي
- انطيها ليسر
انطاها الأبرة وطلعوا كلهم اني فقدت متمددة بالكاع وعيني عالغرفة الغراض داير مدايري بدت تتحرك بأتجاهي والغرفة بدت تضيق علي تريد تخنگني
لميت نفسي حشگت روحي بالزاوية خايفة
فات للغرفة وسد الباب عطت وضامة وجهي اجاني بسرعة گعد بمستواي يحجي بخوف :- شبيج يعيوني
- الغرفة دتخنگني راح أموت
كعد انتجه للحايط خلاني بحضنه ضم راسي بصدره ميخليني اشوف
- الجاي تشوفيه كله أوهام
- يخوف عبد لازملي البنطرون يريد يهد عليَّ
عقد حاجبه :- منو ولج
- الكنتور
- بالبنطرون
- اي
- شوف الساقط شوف
ضم راسي حيل عصرني بحضنه همس بأذني :- كافي غمضي وارتاحي شوي تعبتي روحج اليوم
ما اعرف شكد مر من الوقت واني بحضنه حسيته نام
رفعت راسي اباوعله فتح يباوعلي :- هاا
- اريد اگوم اختنگت
- لا يا الله صحت
- وخر
عافني كمت منه رحت للحمام غسلت وجهي جسمي صار بيه طاقة عجيبة رحتله وكفت كباله :- طلعني مخنوگة
باوع للساعة :- الوكت تأخر
باوعلي واگفة بمكاني جر نفس بقوة وگام من شافني مصرّة لبس وجابلي سترة لبسنياها فوك ملابسي ضاله بكيومنة تعلاگه لبسني حذائي ونزلنا
طلعنا نتمشى ابتعدنا عن الفندق خلصنا الطريق ساكتين جنت محتاجة هالهدوء الهوى ينعش الروح عبالك جنت بسجن وتحررت وگفت بنص الطريق وهو تقدمني
وگف اندارلي عاقد حاجبه :- شو وگفتي
- تعبت
- تعبتي شنو دمشي لج لعد المن نزلتي
تربعت بالگاع عناد بيه عض اصبعه متحلفلي
اجاني اخذني من ايدي كعدني عالرصيف يباوعلي متردد وعين عالسوبر ماركت الكدامنا جرني وكفني واخذني وياه دخلنا جاب مَي
عبد :- تردين شي
هزيت راسي لا
خليت ايدي بجيوب السترة السوبر ماركت بارد ثلج عبالك شتا جاب عصير وكيك حاسب واخذني طلعنا
رجعنا كعدنا عالرصيف خله العلاكة بحضني :- اكلي
- ماريد
- ها ابدي
فتحت العلاكة جايبلي الكيكة المحروگة choco lips اتخبل منها مُرة طعمها يسحل الروح نورجان تحبها
عفتها وفتحت العصير شربت منه شوي وعفته ضليت اباوع للطريق وهو كاعد يمي يدخن انداريتله
شهربان :- انطيني جگارة
باوعلي :- ما تبتي من هالعادة الزفرة
هزيت راسي مدلياها اخذت منها نفس ونفخته ورجع خلاها بين شفايفه :- من شوكت تدخنين ولج
- من زمان
- ديلا يالخمسينية النوب تجرها بحسرة البربوك
سكتت مرديت كمت انعس خليت راسي على متنه عيوني تغفي لزم ايدي شالها باسها انداريتله مستغربة
ما باوعلي عينه بالطريق رجعت خليت راسي على كتفه
ضلينا كاعدين بالربع ساعة وكام وگف انطاني ايده
- يلا امشينا
- مبيه حيل
حجيتها ونمت عالرصيف تخبل دنك رفعني من ملابسي وكفني غصب عني يعدل بملابسي وينتر بيَّ
- بنت المچلق فضحتينا تطوطحين حالج حال السكارى اللي يشوفج شيكول
- تعبانة ماريد امشي
باوع للشارع شبه فارغ دنك شالني على ظهره جلبت برگبته من ورة حيل صاح :- بنت المچلق خنگتيني
- اششش امشي يلا
گال :- طاح حظك عبد
خففت شوي لزمتي ومشى راجعين للفندق صعدنا بالمصعد راد ينزلني جلبت برگبته حيل
- وتالي
- كمل معروفك وصلني للغرفة
- انداس عبد بالنعال ومحمد
وصلنا وكف كبال الغرفة كلي أطلع المفتاح من جيبه اخذته فتح الباب ودخلنا وهو بعده شايلني شمرني عالتخم وكعد مهدود حيله مرجع راسه ليورة ويسب بيَّ
سحبت مخدة خليتها جوة راسي مالي خلك حتى ارد جان النعاس طاغي على كُلشي محسيت عليه الا دفعني برجله ومدد يمي خلاني على صدره رفعت راسي
- ها شكو جاي يمي روح لمرتك
- نايمة
- واني شكو منك الها
- عجبني انام يمج
- ولي ماريدك
لزم فكي :- راح نبدي
- اريد اروح للغرفة
- انخمدي بانو لا اطيح حظج
- البجامة ضايقتني اريد ابدلها
بحركة سريعة مد ايده جرها نزعني عطت سد حلكي خازرني :- صوتج لج لا ألزمج افصخج هسه واعلمج شلون تعيطين بعد
ثبتني عاصر جسمي حيل مخلاني اتحرك حاولت اوخر مكدرت غلبني النعاس ونمت واني بحضنه ثاني يوم صبحنا على صوت ترگيع بالبيبان اسمع صوته يهمس
عبد :- بدت رحمة الله
رفعت راسي باوعتله همس :- ارجعي نامي بسرعة
حجاها ودفن راسي بصدره وهو سوة نفسه موات ويسر تروح وتجي فوك روسنا عاد اني مصدكت رحت غفيت
كعدت بس اني موجودة كمت امد بجسمي وهم ملابسي ماكو همست :- اشتعل الخلفك عبد
جريت ملابسي من الكاع لبستهن وبوجهي للغرفة سبحت وبدلت ووكفت امشط انتبهت بس اني هنا مالهم صوت رحت للباب جريت اليده هم قافلها عليَّ
استغليت الوضع رحت لغرفتهم اباوع بيها نفس الدزاين مال غرفة الگاعدة بيها بس هاي لنفرين ذيج نفر واحد جنطهم بالگاع ملابس الخاتون مطشرة بهوسة
نفاضته وگطوف الجكاير عالميز مشيت فتحته عايف بيه فلوس باوعت شوي و رجعت سديته ، كمت ادور بالجنط صار بيدي الجواز مالتي شلته واباوعله
للعصر رجعوا جنت كاعدة عالتخم اصبغ بأظافري شافني يباوعلي مستغرب
عبد :- اول مرة احسج أنثى من صدك
- منو الجان نايم يمي البارحة
حجيتها وباوعت ليسر گلبت شعرها معاجبها ودنكت على تليفونها
- مصدكة روحج بابا غير عبالك نايم يم اخوي لا بيج شوفة لا لزمة حتى متسوين واهس
- مو اني ما اسوي واهس انتَ كبرت مو حيلك الأولي
حجيتها گمز لزمني من شعري عيونه نار
- كدها هالحجاية بانو
ضحكت :- اني اكول تلاحك لروحك ووصي أرقم يجيبلك حباية زرگة
محسيت الا راشدي جابني صفح أذني كام تطلع نار خليت شعري ورة أذني وابتسمت بوجهه
شالني من ملابسي دفعني للغرفة :- وجهج ما اشوفه ما دامني موجود هنا بس ألمحج ادفنج بمكانج والقرآن
رحت للغرفة باوعت لوجهي بالمراية واغلط عليه طبع ايده لاطش بخدي تكول ثور الهمجي
صارت دنيا الليل مطلعت من الغرفة فاتت يسر شمرتلي علاگة
يسر :- عبد يگول خلي تلبسه اكو امسية غنائية مسويها الفندق ودازيلنا دعوة ومراد يعوفج لوحدج كسرتي خاطره ورى الراشدي الاكلتي منه ولوما اني لحيت عليه مجان اخذج بس تعرفينه ميردلي كلمة
- كثر الله خيرج وخيره گوليله دعوتك واصلة تريد تنام
- مراح يقبل گال كلمة لتعانديه احسن ما يتخبل وتخربين الليلة علينا گومي بسرعة البسي دنروح كلنا معزومين حتى أرقم
جنت ضايجة من صدك گلت انزل اغير جو واشوف ناس لبست الفستان جان اسود مخصر على جسمي طويل يسحل وراي ما ادري احد كله اني طولي مترتين
فتحت شعري سرحته بالسشوار خليت شوي ميكب عالخفيف واني ملامحي بارزة اي شي اخليه بسرعة يبين ويصير شكلي نشاز محلو مكثرت رفعت شعري كعكة عالي ونزلت كم خصلة من الجوانب
طلعت رافعة الفستان صار بوجهي كاعد عالتخم ما انتبهلي رحت لغرفتهم دكيت الباب طلعتلي يسر بعدها بيدها الباودر باوعتلي من فوك ليجوة ضحكت
يسر :- لا والله حلوة لايگلج كلت حيطلع جبير عليها
- اريد كعب عندج
- تعاي فوتي وتخيري
مشيت وراها فتحتلي وحدة من الجنط وخلتها گبالي كشوانية كاملة جايبة عبالك جايين مقيمين اخذت واحد فضي واسود لبسته شوي بيه كبر عليَّ خليت بنهايته كلينكس يلا رهملي
طلعت قبلها گعدت گباله حجة بسرعة
عبد :- يلا يسر وين صـ..
رفع راسه سكت من شافني اني سد التليفون رجع راسه انتجى عالتخم وعينه مركزها وياي دنگت اباوع أظافري ميتة باللون الأحمر شگد حلوات طلعت
تنهد بصوت عالي باوعتله فاتح اول دگمتين من قميصه يهز رجله بأعصاب وعاقد الحاجب يباوعلي معاجبه ما اهتميت ولا عبالك موجود لحد ما هو حجه
عبد :- مو جن دلعة الفستان جبيرة شوي
- جسمي هزيل منو بحالي اني ويباوعلي
- ها ترجعيها يعني
- بشهادتك انتَ اني مگلت شي
هز راسه :- اضحكي بعدين أطلعها من عيونج
طلعت يسر تطگطگ بكعبها وبيدها جوزدان صغير والموبايل لابسه فستان قصير ضاب جسمها ضب
انداريتله رافعة حاجبي منتظرته يعلق ما حجى شي
كمت گدامهم للباب سحب باكيته وموبايله ويمشي گدامي خازرني وهاي لازمة بيه تگول راح يطير
نزلنا تلگانا أرقم من جوة طلعنا كلنا لمكان الأمسية جان عالمسبح برة محضرين كراسي وطاولات الأجواء تخبل
كعدنا على طاولة أربعتنا طلبوا هم مشروب واني طلبلي عصير بدت الأمسية جايبين مطربين شعلوها للحلفلة والكل هو وحبيبته يرگصون
أرقم ثگل بالشرب كل شوي اشوفه ويَّ وحدة شكل وكل ساعة جاييني يريدني اكوم وياه وعبد يطرده اباوع للمكان وخطرت على بالي نورجان روح گلبها هالسوالف
وأتذكر أيام من جنا نگعد نخطط حتى نطلع لأربيل
اجه واحد لابس بدلة رسمية شعره مشيب بلحية خفيفة تصافح هو وعبد اندار ليسر :- كيفك مدام يسر
يسر :- أهلا استاذ مراد شنو هالمفاجأة الحلوة متوقعنا شوفتك هنا
مراد :- ولا انا للصراحة
انتبهلي عقد حاجبه :- مين المدام
عبد :- أقدملك زوجتي بان
فتح عيونه متفاجئ :- اسم الله حولك ما تركتكن انتَ ومدام يسر عم تحضروا لزواجكن شو صار حتى غيرت
وكف يم يسر رفع ايدها باسها كله :- تبقى الأصل بس تعرف الشغل اله الأولوية عندنا
ضحك كله :- معك حق خدوا راحتكن انتوا بستأزن
باوعلي مدلي ايده بأبتسامة :- تشرفت بمعرفتك مدام بان
صافحته ورديتله الأبتسامة :- الي الشرف مسيو مراد
عبد يباوعلي رافع حاجبه ويسر تباوع صفح معاجبها
مشى من عندنا وهذا بس يخوزر عشتو بس لا يغار
ما اهتميت اندمجت ويَّ صوت الأغاني وادندن بكلمات الأغنية كاموا كل ثنائي يرگص سلو ويسر لحت على عبد الا يرگصون اخذها وكاموا قريب مني يتمايلون عالأغنية
عبد عينه عليَّ يخاف لا تغفل عينه وانهزم وهي محاوطة رگبته كل شوي وتدور وجهه عليها وتحجي وياه قريبين لبعض حيل شوي وتبوسه كدام خلك الله
محسيت الا واحد جر الكرسي وكعد بصفي باوعتله وخليت ايدي على گلبي :- يي نأزتني مسيو مراد
ضحك عاقد حاجبه :- انتِ لبنانية
- بيي لبناني بس الماما تبعي عرائية
- والله ما انا حكيت هالجمال منو غريب عليه ولو
- ميغسي من زوئك
طلع باكيت الجگاير من جيبه وطلع وحدة :- امتين تزوجتوا انتِ ومسيو عبد
- من شي فترة منيحة
- وليه ما خبرني كنت رح انبسط
- جوازنا صار عالسكيت
- اف ليش
- لأنو جواز مصلحة مشان الشغل عم يعمر شركتو وكان بدو شريك فيها هلئ وئت اللي شافني مسيو عبد انغرم فيني
- ما بلومو اسم الله حولك بتعئدي
- حاصلو شرط انو يتزوجني مشان يكفي الشراكة مع بيي وانا لأني بعزو للبابا مئدرت ارفض
- يعني بفهم انتِ ما بدكياه
- هيك شي يعني هو لاحئني بضل صرخ حل عني حل عني ما تركني صار يضهرلي وين ما رحت بئشعو بكل مكان بروحلو شو بدي اعمل كنت مجبورة مشان البابا
- اه معك حق ما حلو الجواز بالزور بس اللي بدو يلائي وحدة غنوجة وحلوي متلك لأ اسمحيلي راح اعمل اكتر من اللي عملو مسيو عبد لحتى اخدك وما اخسرك
- مسيو مراد عم تخجلني بحكياتك
- ههههه دخيلو ما أحلاكي
أشر للويتر بأيده اجانا
اندارلي :- شو بتريدي
- كباية عصير ازا بتريد
- ولو
طلبله مشروب والي عصير ورجع اندارلي يسولف وياي على عبد وشلون تعرفوا علاقتهم جانت قديمة وقوية
انتبهت لعبد عينه علينا خازرني عيونه تريد تنط
ما كدر يصبر عاف يسر واجانا كعد يمنا
مراد :- شو هاد مسيو عبد بتتجوز من عنا وما تعطيني خبر
اندارلي عاقد حاجبه ما فهم قصده ضليت آكل بشفايفي ومدنكة ماريد اشوف نظراته گلبوا على غير موضوع واني رجعت اندمجت ويَّ الأغاني وادندن وياها
- يا محلا صوتك بيعئد
ابتسمت مجاملة كام وكف ومدلي ايده :- بتسمحيلي بهل رئصة
نظراتي بينه وبين عبد مترددة أشرلي براسه عود لا
خليت ايدي بيده :- مبلى
كمت وياه شايلة فستاني الا شوي اعثر ايده حاوطت خصري ونتمايل عالأغنية يحجي وياي بس اتبسم واهز براسي بس جذب بالي ولا يمه يم هذاك الي شوي وحيكوم يطلع بروحي وروحه
انتبهلي اباوعله كال :- شبو مسيو عبد حايص ليكون لأني سرئتك منو
طلعت روحي حجيت متضايقة :- فينا نرجع مطرحنا
- هيك دغري ما هلئ بلشت الرئصة
- معليش فستاني عم يدايئني حاسه رح أشط عوجهي
- متعتلي هم انا حدك
حجاها وايده ضغطت على خصري اكثر محسيت الا ايد تجرني بقوة انلطشت بصدر عبد باوعتله وهو عينه بمراد يريد يطلع بروحه وهذاك يضحك
- شو يا خيي رئصنا معا خربت الدني يعني
ضحكله مجاملة :- تعذرني المدام تخصني
خزرني كز على أسنانه :- نوصل لو منوصل
سكتت بعد محجيت اباوع لشكله كثر بالشرب بس بعده واعي عيونه حمر نازع السترة فاتح اول دگمتين من قميصه وكاف ردانه
عيني بعينه قريب مني حيل ايدي على صدره وهو محاوط خصري باثنين اديه همس :- عيونج حلوة
حط راسه على كتفي يشم بيه :- صايرة جزء من يومه لعبد بانو ميكمل يومي بلاية شوفتج
- وميكمل بلاية طراگين تخربط بيهن معاني وجهي
- مينطيني گلبي أذيج والله انتِ تجبريني
- ممسوية شي حتى تضربني
- ملسونة وصلفة واني أحب الصلفات بس ما أحب الي تعاند وانتِ استاذة بالعناد
- وشجابرك طلگني واخلص وخليني أروح بطريقي وعيش حياتك انتَ وزوجتك
سوة حركة بوجهه :- لا
- ليش لا
- ما ادري
جان يحجي بطيء حسيته بدة بفقد وهو هم حس على نفسه وخر مني بسرعة فرك وجهه باوع للمكان رجعنا للطاولة يسر نايمة وبيدها گلاص الشرب وتهذي
تخبل من شافها هيج نتر بيَّ حتى ابقى يمها وراح يشوف أرقم وين شوي ورجعوا اثنينهم يتمشون بأتجاهنا
شالها ورجعنا لغرفنا دخلنا السويت خلاها بغرفتهم وأرقم راح لغرفته واني هم طبيت شمرت روحي عالجرباية بتعب
لحظات وحسيت عالباب ينسد وصوت طگة المفتاح
كمزت بسرعة من مكاني من شفته جاي عليَّ ملحكت اشرد بسرعة دفعني وصار فوكاي راسه برگبتي يوزع بوساته بهدوء
شهربان :- عبد تعبانة مو دا احجي وياك وخر
ما رد جان فاقد مد ايده فتح سحاب الفستان وشمره ايده تتجول على أنحاء جسمي يبوس بشفتي ويرجع يرفع راسه يباوع لعيوني حاوطته من وره قربته الي اكثر
《 نورجان 》
نزلت جوة سمعت صوت نسوان بالصالة رحت للمطبخ شفت عمة شيخة تحضر چاي وتخلي بالصينية
نورجان :- منو يمنا عمة
كمزت واندارت شافتني ايدها على صدرها :- وگعتي گلبي بمجانو اهو هيج ولج
ضحكت :- sorry والله مو قصدي بس دا اسألج منو هنا
- هاي ام مآب وحماتج سهاد
لويت شفتي معاجبني :- اهوو ما أحبهم
- يا ولج شلج بهالحجي عجل اهو بيتنا هذا بيت ابو علي بابو ما ينسد بوجه خطار مو عاد اختو ومرة خالو
- ما أحبهن ولا هن يحبني وخاصة مرة عمو فدار ما أرتاح من أشوفها
- متنلامين والله بس شنعمل أمر الگوي عالضعيف
اخذت الصينية وراحتلهن كعدت يمهن مشيت على كيفي صرت ورة الحايط واتسمعلهن شنو يحجن
فرحة :- يا عش متعبة روحج انا ما باقية چثير ابو مؤتمن الو ردة لبغداد باجر وجايتج بسالفة گبل لا يروح
- خير ان شاء الله گولي تاسمعج
باوعن هي وسهاد وحدة بوجه الثانية وبدت فرحة
- شوفي يخية احنا شبير تركناه براحتو وكام يلعب بكيفو اخذلو وحدة ما نعرف أصلها من فصلها وسكتنا سويتوها عالسكيت وسكتنا ما قبلتو تحجون من يا عمام وسكتنا خلو زواجتو الأولانية منكم الو باليعجبكم
بس زواجتو الثانية عتصير بكيف أهلو واختو الجبيرة
- بسم الله يا رحمن يا زواج يمعودة گولي يا الله الولد بعدو عريس
- هاي صارت قديمة بعد انتوا معطين جلمة لعمو ابو مظفر تاخذون منو غادة لشبير وساعة الأخذتولو الغريبة البغدادية رديتوا بجلمتكم وكسرتوا بالبنت لا الله ولا رسولو يقبلها
سهاد :- والله عمة لو تدحكين شلون عمي مغتاظ بيوم حنتو لشبير لونها صارت على وحدة غريبة مو بنتو
شيخة :- لا مغتاظ ولا غيرو انا دحكتو بالتصوير بعيني عيرگص ويَّ خالج لازمين راس الچوبي والضحكة شاگة حلكو
- يا عجل انا جذابة يعمة
فرحة :- لا جذابة ولا غيرو وما حجيتي غير الحگ انا شفت حرمتو وكلتلي بحالتو من درة بشبير عاقد عالبغدادية بس اهو ما بين جدامكم لانو يعز ابو علي واخوتو ما عيكسر بواحد بيهم
سهاد :- الحاصل عمة انا حجيت لحرمة خالي واتفقت وياها واجينا نعطيج خبر بحيل الله بس يرد ابو علي من خدمتو نفتح وياه الموضوع ونروح نخطب غادة رسمي من عمي لأخوي شبير
شيخة :- خافن ربجن البنت بعدها عروس وتحجن بزواج رجلها
- وعش يمة اول وحدة لو اخر وحدة زوجها ياخذ عليها ذول زلمنا كلها مثنية على نسوانها وبيناتنا يعمة هالبنت مشكوك بسالفتها لا دحكنا بياضها ولا غيرو گلبي لاعب منها واخوي مسيچين بساع ينضحك على عگلو بسوالف النسوان
شيخة :- هاه ومن يمتى هيج تهمين بأمرو لشبير مو عوايدج
- ياا عش هيج اشنو انا اكرهو يعني المن اباوع انا من بعدهم هم وابو علي اندار فدوة لطولهم ما مرجية منج هالحجاية عمة
فرحة :- خافي ربج يشيخة جبتي عمرج كلو تفرگين بين الاخوة حاسبة تيم واختو بكتر والباجين بكتر عش اهم مو من ظهر ازلمة وابو واحد ليمتى تضلين شايلة هالحقد بگلبج طول عمرج هيج الله اخذ منج ابنج ورملج وبعدج على سوالفج شعيسوي الله بيج بعد
شيخة :- تا تعيريني بمصابي وفگد ولدي انعم الله عليج
- الحگ ما يزعل شيخة انتِ حجواتج مدري شلون صايرات فارة عگولكم هالبغدادية مو بس انتِ حتى الزلمة العندي بالبيت يتراجف عليها شبلاكم ما ادري
- البنت صغيرة ويتيمة شافها بعمر بنواتو حسبها وحدة منهن عش انتن متخافن الله بيها
سهاد :- اهوو عمة ترحين وتردين لنفس السالفة انا بس يجي اخوي ابو علي بعد عيني احجي وياه تانروح نخطب غادة لشبير
فرحة :- وبوجهنا عنحاجي على بنت اختي إبتهال تايعقد عليها عش باقي بلاية حرمة تلمو وتلم بزرتو
- ومن گلج تيم رايد يتزوج
- عجل يضل بلاية حرمة ميصير هالحجي وبنواتنا موجودات
- وما لگيتوا غير إبتهال لو ناسيات السواية القديمة
- لا محد ناسي والبنية ماتت الله يرحمها إبتهال خالة بزرتو ما عنلگى وحدة تداريهم وتحن عليهم بگدها
هن كاعدات يتفقن وشيسون للعقد طلعت عمة شيخة ضايجة شافتني بالباب ابجي بس الدموع تنزل تحسرت وهي تباوعلي
خليت وركضت صعدت لغرفتي اشهگ بجي ودافنة راسي بالجرباية اجت وراي سدت الباب وكعدت يمي
شيخة :- ميخالف يعمة ابجي ابجي بعد عيني عينج ريحي گلبج لا تكتمين
خليت راسي بحضنها صارت تلعب بشعري شهگت
- يردون يزوجوه عمة
- عجل شبيدي اذا هن خاصماتها بينهن
- اموت والله بيوم اليعقد عليها اشرد وما ابقاله لحظة وحدة
- استهدي بالرحمن ييمة بعدهن هذن يهذرن لوحدهن
شنو لبالج الخال وتيم عيطاوعوهن
- وشُبير
سكتت شوي گالت :- والله يعمة الحجي بينا ابن اخوي واعرفو لو لحوا عليه شواي يعقد عليها واهو الممنون
رفعت راسي
- عززاا يعني يسويها ويتزوج
- عجل انتِ ما معطيتو حگو ومشبعتو بفرشتو
سكتت دنكت راسي افرك بايدي :- هو كلج
- مرة وحدة حاجاني بعد ما بزعتي منج وانا ادحگو عينو وراج وانتِ ما معطيتو مجال عش هيج يعمة مو الو ساعة ويمل وعينو عتبدي تدور الراحة بحضن غيرج
نزلت دموعي :- اخاف عمة
- يا يمة عش خايفة راح ياكلج شنو اهو مو متگربلج قبل بمرة
- اي بس جان مواعي
- وهسع بكامل وعيو وإرادتو شُبير رايدج هايم بيج يرجف عليج لا تكسرين بيه وتكسرين فرحتكم استهدي بالرحمن واكعدي راجعي نفسج واعطي فرصة لزواجكم خافن يهدمنو الما يخافن من الله گبل لا يبدي تايحومن عليه يردن يزوجنو ويجيبلج ضرة
- عززاا اجرم بيه والله
- واهو شذنبو عمت عيني الماي تجري من جواه صيري شاطرة وعلگي بيج واعرفي شلون تكسبينو بصالحج وتفرين راسو عليهن اهو اصلا ما يطيقهن بس أعمالهن تگلب راس أكبر زلمة وما ضنتي رايدتلج ضرة فوگاج
- لا عزة اسم الله
ضحكت :- مو انا كلت الضرة مرة لو جانت درة
ضل كلامها يدك براسي اليوم كله حتى هو من اجه بالليل وشافني حس علي وكل شوي يسألني بيج شي
شبير أحبه وروحي تعلقت بيه ما اگدر أتخيله يصير وي وحدة ثانية غيري خاصة واني أتخيل غادة واگفة وياه لو لازمة ايده وتنام يمه غير أنجلط
عمتي تروح وتجي عينها وياي تراقبني بس مفتحت وياي الموضوع بعد تريد تشوفني شنو أسوي
مر كم يوم واني راسي مشوش ومترددة من هالخطوة
خايفة بس ليمتى أخلي خوفي مسيطر عليَّ شبير يحبني وهو انطاني كلمة مراح يجبرني لو يأذيني
ليش أخسره وأضيعه من ايدي
صارت دنيا الليل اروح وارجع بالغرفة انفتح الباب وفات شبير يفر بسويچه ويدندن شافني وگف مكانه صافن
وگفت أفرك بيدي خجل على خوف
رفعت راسي باوعتله ونزلته بسرعة وجهي يطلع نار حسيت عليه صار كبالي رفع ايده يمررها على كذلتي
شبير :- ول ول شنو هاي يولي
حجاها وعيونه تتجول على سيت النوم الوردي اللابسته لابسة فوگاه روب بس قصير رجلي وافخاذي كلها مبينه والدلعة مالته فضيحة صدري نصه طالع
مشى لميز تواليت وعينه مشالها عني نزع ساعته عاف تليفوناته وعراضه واندارلي متخصر طابك حواجبه
- ول منو معلمج على سوالف البرابيك
- عمة شيخة
عض اصبعه بحرگة واجاني لزم شفتي
گال :- عيب يولي
- والله هي گالتلي مو اني
فتح عينه :- ولج عمتي بربوك
هزيت راسي بسرعة :- لا والله مو هيج قصدي
دنگت راسي ضايجة لزم فكي رفعه بيد والثانية حاوط بيها خصري قربني اله مد راسه صار يشتم بشعري
وخر راسه صارت نظراته تتوزع على طولي عض شفته
- خربانة أخلاقج الصفرة شنو هاللبس
- هاي عمـ..
لزم شفتي بسرعة عصرها ما خلاني أكمل
- ول لسانج هذا اگضبي تاما يذبلو حجاية ويطشرنا
هزيت راسي واني عاقجة وجهي متوجعة حس عاف شفتي وصار يمرر إبهامه عليها على كيفه بلعت ريگي
واني أباوعله عيونه ذبلانة عبالك واحد نعسان
همست :- شُبير تريد تنام
باوع لعيوني تغيرت نظرته وخر خصلة شعري ورة اذني
- نورجان ول انتِ راضية
- شنو
- بس ردي اي لو لا
مفهمت ضليت صافنة بوجهه هزيتله راسي اي باوعت الروب صار بالگاع ما انطاني مجال استوعب تقرب أخذ شفايفي وايده شادتني تقربني اله أكثر
شالني من الگاع ومشى للجرباية
ابتعد مني جر الغطه على جسمي باسني براسي همس بأذني :- يولي يالصفرة ردي ول ابوي
فتحت عيوني باوعتله ابتسم وتقرب طبع بوسة طرف شفتي تمدد وجرني لمني بحضنه وراسي على صدره
مرت فترة اقترب العام الدراسي عمو تيم كلي ترجعين تدرسين خلوني بمدرسة درة متوسطة واعدادية هي صارت تداوم ثالث واني عدت سنة بالرابع
جنت حيل فرحانة واني اجهز بالملابس والأغراض رغم كرهي الكبير للدراسة بس على كلام درة وتحفيز عمو تيم وشُبير الي صارلي واهس وكمت اقره
علاقتنا اني وشُبير تخبل عمة شيخة طايرة بينا وعمو تيم ممقصر ويانا يعاملنا مثل ولده شتردون وشتأمرون
محد جاب طاري زواج شبير من غادة بعد لأن دوم يصدف لو عمو تيم بالخدمة لو الخال بـ بغداد وهن يردنهم اثنينهم حتى يفتحن الموضوع
بيتنا هادئ بس اني وشبير نتمشكل مسوين البيت هوسة عمو تيم وخلفته هادئين مالهم صوت وعمة شيخة اسمها هي ومبخرتها تفتر بالبيت وتسمي
بيوم صدف عندي امتحان وكعد شبير يقريني بالصالة يمنا عمو فدار گاعدين ديسولفون هو وياه عندهم شغل ودر يمنا على جهة بيدها كتاب تقرة بيه
احنا بالگاع گدامنا طبلة صغيرة والكتب مطشرة
شبير :- سالب واحد بسالب اثنين الناتج واحد
درة :- لا عمو اشارات متشابهة يعني تجمع الناتج يطلع سالب تلاثة
صاح :- عفية بدرة جنت اختبركم
باوعلي وكفخني على راسي كلي :- الصفرة غير تنتبهين وين بالج
- اوي لتضربني
- شلون تريد تورني ور بالـ اوي مالتها
ضلينا بالنص ساعة نتمالخ خلصناها عرك وصياح وكل شوي يگول شي غلط ودر تصححله ويرجع يكفخني
شمر القلم من ايده
صاح :- يابا من الأخير انتوا مطاية متفتهمون بالرياضيات
نورجان :- انتَ كل شوي تغلط ونصححلك وتكول متفتهمون
- مو اغلط تاخترع الكم طرق علمية جديدة بالحل مال مثقفين بس انتوا متعودين عالقديم همج شعملكم
- اي مبين البسط من المقام متندله وين صاير
- كل العشاير على راسي بس ما عرفنا ذولة من يا عمام
فدار :- ديلا استلم
- خالي عجل انا مولي لدرب العسكرية المن غير تاخلص من هالسوالف التعبانة
تيم الله :- على حجايتك كل ضباط الداخلية دچة دبل
- هو وين ماكو واحد شاد النجمات على اجتافو هذا واحد زايعتو الكاع وما دبرها بالمدرسة عجل متشوف نص عشيرتنا ضباط
راد يكوم الخال صاح :- الا خالي فدار فطحل بالرياضيات وداعة الكسور العشرية اينشتاين ميلحكو شو بلة خالي كول 2 × 2 شكد ؟
- يصيرن زوجين قنادر تاكطعهن على راسك
- ميخالف خالي وعلى راسي
- لا بلة احجي
- تمون والله
- لاه أحرجتني بأخلاقك
- مو بس أخلاق حتى شرف عندي
- دنعل شرفك لابو منين ما طلعت دكوم ابن السايب شوفلي جماعة ريحان وين صاروا مكابلي المزعطة يفتي براسهم
- عجل شيخ ومدرس وضابط واغسل مواعين شتردون بعد
حجاها وكام طلع برة باوعلي الخال
فدار :- بس گليلي شنو شفتي بيه وقبلتي
- عمو عنده عضلات
غمني ودار وجهه مني بيأس
سمعنا صوت رمي قريب جاي من برة انخلست الصوت عالي حيل عبالك ديرمون بنص البيت متت خوف
لهناك وفات شبير التليفون مخليه على اذنه يضحك
شبير :- ول خالي الولايات المتحدة العمارچية نورت ببيوت آل عزام
فزوا كلهم يتلگوهم واني اباوع للوجوه مستغربة گمت ونباوع اني ودر من الشباك انفتحت البوابة الكبيرة فاتت سيارات سودة ملت الگراج على طوله
《 شهربان 》
كعد الصبح نايم على بطنه حرك ايده عالجرباية يتلمس مكانها ما هي فتح عيونه بسرعة وفز يباوع بالغرفة
كام يفرك براسة بوجع وكام للحمام صاح :- باان
طلع من الغرفة ماكو احد ومستمر على صياحه طلعت يسر على صوته تفرك بعيونها بنعاس
يسر :- شكو عبد
- بان وين
- ما ادري توني كعدت
ضرب الطبلة برجله وتلاكف تليفونه يحجي ويَّ أرقم
طلع من غرفتهم يدكم بقميصه يهرول عالدرج تليفونه منزل من اذنه تلكاه أرقم جوة ملامحه يعتليها القلق
أرقم :- هاا
صاح :- شردت الغضب لا هي ولا جوازها ...
