رواية فصلية بديلة ( شموخ ) الجزء الثاني الفصل الثالث عشر 13 بقلم ام ملكوت

:- طلعت من البيت على خبصه السايق بعدما سلمت على امي وابوي ركبت بالسياره سلمت على زميلاتي الوياي بالدوره وحرك السياره مسافه

الطريق وصلنه واول مانزلت شفت استاذ حسن كبالي من بعد فتره اسبوعين من اختفاءه تحمحمت وصبحت عليه ورحت بدون مانتظره يرد دخلت

الطريق وصلنه واول مانزلت شفت استاذ حسن كبالي من بعد فتره اسبوعين من اختفاءه تحمحمت وصبحت عليه ورحت بدون مانتظره يرد دخلت

للقاعه كعدت عل كرسي طلعت اقلامي ودفتر ملاحضاتي راجعته لان اليوم اخر يوم الي بالدوره وراح نمتحن بالمواد النضريه الاخذناهه

بالمحاضرات.. صفنت وسرحت بذاكرتي قبل كم اسبوع لمن حجه استاذ حسن ويه بابا وطلب يحاجيني بخصوص الخطبه ..

بعد مافكرت زين بردي اله ثاني يوم جيت للدوره وخلص يومي بين النضري والعملي وهو ماجاب سيره ولا بين ان يريد يفاتحني بموضوع ظنيت ان غلس او بطل او

مايريد يحجي فغلست عنه همين وماخليت بالي وياه بس اشو وانه كاعد اركب بالسلاح هذا اجه واخذ السلاح من ايدي وركبه وهو يكول..

_شموخ اريد احجي وياج بموضوع تكدرين تنتظريني وره الدوام بالكافتريا اليمنه

_العفو منك استاذ ماكدر اروح لمكان ونحجي على انفراد اذا عندك شي مهم كوله هنا على شنو بعد نروح للكافتريا

_ماكدر احجي هنا لازم نكعد احجيلج شغله

_ استاذ انه تقريبا عندي معرفه بيلي راح تحجي لان بابا خلاني بالصوره وكال انك تريد تحاجيني حتى تطلب ايدي 

_اي صحيح بس الي اسبابي الي خلتني اختارج انتي غير عن الكل

_ماتهمني الاسباب لاني اساسا رافضه فكره الزواج ومستحيل افكر بي علمود اسباب اعجابك بيه

_ ليش

_كتلك ماريد افكر بالزواج وشلته من راسي بعد تجربتي التعيسه الكرهتني بالارتباطات

_يعني مو لاني جبير واكبر منج بشكم سنه

_شكم سنه عفوا استاذ انه مايهمني العمر كلش بس انت فعلا جبير وعندك ولد بعمري يعني تصور اقبل بشخص اكبر مني لهل درجه مستحيل وثانيا انه عندي بنيه شلون اتركهه واتزوج لو اخذهه تعيش ويه شخص غريب عليهه

_ماتردين يصير عدهه ابو وتحمل اسمه

_عندهه ام وجد وبيبيه وخوال مكفين وموفين واساسا مسجلتهه باسم بابا ماحتاج احد يسجلهه باسمه من بعده ولو اريد جان تزوجت من زمان

بس كتلك فكره الزواج شلتهه من راسي ومو اول شخص انت تنرفض اعتقد بابا كلك ان رفضي يعمم عل كل مو متحيز ضدك

_وراح تبقين هيج لحدما يفوتج العمر باجر بنتج تكبر وتزوج وانتي تضلين وحدج حالج من حالي هسه وحيد ومحد بحالي

_العفو منك استاذ بس انت مو مخول تسال هيج اساله خصوصيه واعتقد مالك حق تقلق على

مستقبلي ورفضي القاطع سمعته وفهمته فرجاءا لا تفتح هذا الموضوع وياي لان كلش انفر من سالفه الزواج واكره اليفاتحني بي

_اسف بس حبيت اكعد واقنعج براحتي مانحجي هيج وكفه وانه متاكد لو كعدنه وحجينه براحتنه راح تفهمين شكد انه معجب بيج ورايدج 

_اعرف بيك بس صدكني انه ماريد ولا اكدر اتزوج خلاص تزوجت مره بدون وعي وتندمت والحمدلله خلعته ماريد تنعاد هل تجربه التعيسه مره ثانيه بحياتي

_بس صدكيني راح اسعدج واسوي كل التردينه وحتى اذا تكولين ماعرفك عادي نعقد ونضل سنه نتعرف على بعضنا ماعندي اشكال

_استاذ افهمني اعرف انك معجب بيه ورايدني وانت ونعم منك خوش رجال وبابا دوم يمدح باخلاقك ووكفاتك ويانه بس انه ماريد ولا

تظن رفضتك لانك جبير انه مايهمني العمر لهل درجه لان لو حبيت شخص شمهما كان عمره مستعده اقبل بي وانه الزواج والحب شايلته من راسي صدكني لو يجيلي ملك جمال الكون ماقبل بي ولا راح افكر بيوم بزواج

_هذا اخر كلام عندج

_اي استاذ وفدوا اعتقني من هل موضوع بعد ولا تفتحه وياي خليني اكمل هل شهر بسلام واروح اشوف شغلي وحياتي وانه لو جان شخص

غيرك صدكني جان تواقحت وياه حتى يعوفني بحال سبيلي بس لانك صديق بابا وشخص عزيز عليه واستاذي بنفس الوقت هل كاعد احجي وياك

بهدوء وبابا كلي انك شخص واعي وعاقل وماكو منازع بهل شي وماراح تلح علي وتكرر نفس

الموضوع لهذا السبب اتمنى تكون فعلا شخص عاقل وماتفتح سالفه الزواج والحب وياي بعد

_تمام هاذهو وانه اسف لو ضوجتج وضايقتج 

_لا عادي انه هم اسفه لو حجيت كلمه جرحتك بدون قصدي

_لا كل كلامج حقيقي وصريح ماكلتي شي غلط تفضلي سلاحج

_شكرا استاذ

_العفو كملي تدريب يله وصفي بالج

_انشاءلله..

ابتسم بحزن وراح مانكر اني كرهته بس بنفس الوقت ضجت لان رفضته صعبه علي شخص يحبني ويتقدملي 

واروح اجرح مشاعره وارفضه هسه ما لكه غيري مو وياي جم وحده احسن واحلى مني ومامتزوجات شوازاه علي لو شافني مطلقه والزلم عبالهم المطلقات يذبن روحهن على ياهو الجان بس حتى لا تحجي الوادم عليهه ..

تنهدت بحيره ورجعت فلتت السلاح وركبته من جديد صوبت عل هدف واطلقت وخابت شنو الجديد مثلا صرت اكره حتى السلاح من وره ايدي

بس يله وراي سنتين تدريب سمعت انهم يعلمونه عل سلاح والفنون القتاليه هناك بلكي اشوفلي استاذ زين يلكالي حل لايدي .. كملنه تدريب

السلاح ورن الجرس صار وقت محاضره الشريعه دخلنه ودخل الاستاذ اخذ يشرح ويجيب تفسيرات عن الدين والحلال والحرام بشغلنه هذا وغيرهه هل

امور لحدما مرت ساعه ونص خلص الدوام ورجعنه لبيوتنه ومن بعدهه ماشفت استاذ حسن

بس سمعت ان سافر برحله عمل اسبوعين بحكم ان تدريب السلاح توقف بعدما سمعوا ان بالتدريب مالت الدوائر يعلمونه عليه وهذا كل يلي صار بيومهه وياي بموضوع الاستاذ حسن ....

فزيت من صفنتي على دخله الاساتذه وزعولنه الاسئله والدفاتر وكعدنه نحل مرت ساعه وكملت حل الاسئله كمت سلمت الورقه بعدما تاكدت من

اجاباتي وطلعت بقينه ننتظر بالساحه فتره تقريب ال٣ ساعات ودزوا علينه دخلنه كلنه للقاعه وبقوا يصيحون باسمائنه وينطونه شهاده تقدير خاصه بالدوره للناجحين ..

صاحوا باسمي ورحت استلمت الشهاده وطكولنه صوره تشكرت منهم ومن الاستاذ حسن وطلعت اتصلت عل سايق وبقيت انتظر جم دقيقه طلعن

باقي زميلاتي واجه الاستاذ شفته من بعيد وماردت احجي وياه احس بفشله لمن اشوفه بعد رفضي اله .. عفت البنات وتمشيت لبره الجامعه

وصلت للبوابه ووكفت سياره السايق كبالي اشرت لزميلاتي الجانن يحجن ويه الاستاذ ترخصن منه واجن ركبنه بالسياره واخذنه كلمن لبيتهه وصلت

وانطيته كروه اخر الشهر ونزلت دكيت الباب وفتحه سلام الي وبيده ريان تبجي تفاجات وهي ذبت روحهه علي اخذتهه لحضني وبقيت اهدي بيهه سالت سلام شبيهه وكال..

_جانت تلعب بالنقال وطاح على رجلهه وهي انطلقت بالبجي وجيب اليسكتهه بعد 

_ياا جا غير تسكتوهه حتى لا تختنك 

_حاولنه وياهه خويه صار ساعه احجي وياهه اريد اعرف شبيهه ماكو حتى طلعتهه بره اشتريتلهه وماسكتت كل شوي ترجع تبجي

_خاف بيهه شي يوجعهه بله اشوف ..

رفعت رجلهه واشوف اضفرهه ازرك ومورم سوده علي طايح على رجلهه انتبهت عليهه انكتم صوتهه باوعتلهه واشوف بتي فاكه عيونهه وحلكهه وكوه

تجر النفس صرخت وكعدت خليتهه على رجلي وصرت امسح على صدرهه واكلبهه واصيح على سلام يجيب البخاخ حسيت حيلي انهد من شفتهه

صارت زركه كلهه التمت علي واخذهه بابا مني بقه يمسد على ضهرهه ويكلب بيهه جاب البخاخ سلام ورشيت بحلكهه واستمر بابا ينفخ بحلكهه لحدما

شهكت جاره النفس حضنتهه لصدري وضليت ابجي بخوف رغم هل نوبات تجي مره او مرتين بالسنه بس ينهد حيلي بكل مره تجيلهه بقه يهدي

بيه بابا ويطمني لحدما هدات رفعت راسهه وشفتهه ذبلانه خطيه وسانده راسهه على كتفي اخذتهه وكومتني امي ودتني للغرفه خليت ريانه

عل جربايه وتمددت يمهه عبالك جنت اركض هيج مهدود حيلي وفحطانه بقيت امسد على شعرهه وهي تباوعلي بهدوء وذبول اجت جنان يمي مسدت على كتفي وكالت...

_مابيهه شي الحمدلله عدت على خير وهاي هيه بنيتج يمج مابيهه الا العافيه.

_انهد حيلي جنان بكل مره يصير وياهه هيج اموت الف موته يحاوطني الموت من كل جهه مرات تموت كل اطرافي وماكدر اشيلهه او اساعدهه لو ما اهلي يمي 

_حقج مو هينه الوحده تشوف بتهه ضناهه مختنك كبالهه وهيج حالته بس بعد ربج كتب عليهه تكون هاي العله بيهه اصبري وبلكي تروح منهه من تكبر

_انشاءلله جنان بلا امره عليج جيبيلي بخاخ المخدر الموضعي من الثلاجه اذا تكدرين والله حيلي ماكاعد يعيني اكوم

_لا شسالفه تدللين انتي رايحه اجيبه الج

_مشكوره حبيبتي

_عيوني الكم تدللي..

راحت جنان تجيبلي البخاخ ودخل علي بابا كعد عل جربايه يمسد على راس ريان ويكول..

_شلونهه بعد جدهه ريانه حبيبتي تردين نروح بالسياره اخذج اشتريلج عم اشتريلج نمنمات ونروح للمرجوحه بره..

سمعت النمنمات والمرجوحه وابتسمت بتعب هزت راسهه واخذهه بابا بين اديه خلاهه على كتفه وطلع بيهه للحديقه كمت كوه سحلت روحي بدلت

ملابسي وجابتلي جنان البخاخ اخذته ورحت للحديقه شفت خواني كلهم يمهه يحجون وياهه وهي بحضن سلام يكركر بيهه وتضحك بتعب بعد

حيلي حيلهه حتى ضحكتهه تصير باهته من يصير بيهه هيج .. رحت رشيت مخدر على رجلهه مكان الطكه وكمزت من برودته بستهه بخدهه وتقدم محمد اخذهه من سلام وكال..

_راح اخذهه اشتريلهه واجي لا يضل بالج يمهه

_تمام بس اذا بجت جيبهه بسرعه اخاف تختنك مره ثانيه 

_انشاءلله ..

بوسهه وضل يحجي وياهه يسالهه شتريد حلويات وهي تهز براسهه كلما كال شغله ابتسمت واخذهه وطلع من البيت هوه ومرتضى اشرلي بابا اجي

اكعد يمه عل مرجوحه كام سلام دخل جوه ورحت انه كعدت يم بابا اخذ راسي خلاه على كتفه وبقى يمسد على خدي غمضت عيوني بتعب وكال..

_لا تخافين بويه شموخه ربج هو الحافظ ومادامه موجود راح يحفظهه الج ومايكسر كلبج بيهه

انشاءلله بس انتي صبري وتحملي وكولي الحمدلله دائما لان كله هذا اختبار الج وراح تتجازين عليه انتي وبنتج احسن الجزاء باذن الله تعالى

_انشاءلله بابا صابره ومتحمله والحمدلله على كل حال 

_يله بويه خلينه ندخل شمس قويه خلصتي انتي من دوام الدوره مو

_اي بابا اليوم سوولنه امتحان وانطونه شهاده تقدير 

_تمام مبروك ماضل شي انشاءلله الاسبوع الاجاي اختبار النيابه شدي حيلج بعد هاي فرصتج

_اي بابا انشاءالله الله يسهلهه واجتازه بامتياز 

_كدهه انتي بويه اعرفج ماتخطين

_بس بنيتك خطت يا بابا ماكدرت تدبر لزمه السلاح صار اقوى من ارادتهه

_ميخالف ويه التدريب المستمر راح تتعلمين محد تعلم بكم شهر احنه اخذنه سنين ياله دبرناهه 

_هيج رايك

_اي يابويه كلهه سهله مو انتي جنتي تكولين سهلهه تسهل صعبهه تصعب

_اي 

_هاذهو جا شني بعد انتي كدهه وكدود لا تخافين ولا تستسلمين خليج قويه ومايصعب عليج شي توكلي على الله وهو يمديج القوه بكل يلي تردين تسوينه

_انشاءلله بابا شكرا لانك موجود وياي دائما تسندني وتشجعني لو ما فضل ربي ورحمته وتشجيعك ومساندتك الي جان ماوصلت لهنا اليوم ولا كدرت اكمل 

_الفضل لله بنيتي يله خلي ندخل يم امج كاعدات وحدهن هيه وخالتج

_اي يله..

كمنه انه وياه وهو مخلي ايده على كتفي دخلنه للصاله واجيت تمددت وخليت راسي بحضن امي بقت تلعب بشعري شويه ودخل احسان شافني

متمدده دار وجهه وتحمحم كمت عدلت كعدتي وحجابي وهو دخل كعد يم ابوي وسلام ضلوا

يسولفون واحنه نباوع للتلفزيون لحدما اجو محمد ومرتضى انطاني ريان وجايب علاليك حلويات باوعتلهه وكتله..

_ليش كلفت نفسك وجبت هل كد ماتاكل هيه هواي حلويات 

_ميخالف خليهه خاف تشتهيلهه شي تاكل 

_هاك هاي العلاكه الكم قرمشوا بيهه بليل وهاي خليهه لخالتي وامي والبنات وهاي العلاكه خليهه لريانه كافي عليهه

_هاذهو بكيفج ..

وزعت عليهم الحلويات وكعدنه نكرز ونباوع للتلفزيون تالي كمنه انه وجنان للغرفه لان حسيتهه تضايقت من نضرات مرتضى وامي وخالتي راحن

يسون غده بالمطبخ للضهر اذن وكمنه توضينه وصلينه خليت ريان عند جنانه ورحت اصب ويه امي واجيب للصاله كملت نكل واخر شي بقه الماي

راح مرتضى يجيبه صفنت مستغربه تصرفه بس تالي انتبهت ان جنان مو هنا رفعت حاجبي فاهمه حركته هاي تحجج بالماي حتى يصيحلهه اللوتي

ههه.. كعدنه ناكل فتره واجه هوه معصب وعيونه حمر وجنان وراه دخلت وعلى ملامحهه مرسومه

اللامبالاة كلت اكيد حاجي وياهه وناعله شيبه بعد ايدي شكد احبهه من تخبث وياه ماجنت ادري بالسالفه المسويهه بيهه...

.

.

:- كملت صلاتي واخذت ريان ورحت للغرفه مالت شموخ اخذت علاجي وبقيت كاعده اكلب بنقالي واطلع لريانه اغاني اطفال لحدما مر الوقت واندك

الباب كلت تفضل عبالي شموخ رفعت راسي بعدما صار هدوء وشفته مرتضى واكف ساند نفسه عل باب وصافن علي يدور بعيوني عكدت حواجبي باستغراب وكتله..

_محتاج شي 

_ اريد احجي وياج

_ليش اكو شي بيناتنه ينحجي

_اي وهواي اشياء مو شي واحد 

_ومنهن

_ليش متغيره هل شكل وضعفانه وشكلج هزيل

_عادي الوضع هيج تطلب ومثل ماتعرف شغلي يتطلب تركيز وسهر فاكيد اضعف

_زين ليش مانتظرتيني لمن ارجع ونشتغل سويه

_ليش حتى اضيع ٣ سنوات من مستقبلي وانه انتظر بمجرد ماحصلتلي فرصه ووظيفه زينه قدمت عليهه واشتغلت احسلي من كعده البيت 

_ تمام وهسه انه رجعت بعد عن قريب راح اقدم عل محكمه الجنائيه واريدج وياي

_ماكدر اعذرني

_ليش

_شغلي بعقد مايصير انهي العقد منا لبعد سنتين

_هاي شنو وين اكو هيج عقد يضل سنتين بالشركات العراقيه

_اي اكو بشركتي هيج عقد وتريد الصراحه عاجبني شغلي هناك وماناويه ابطل منه واشتغل وياك 

_جنانه

_اسمي جنان

_افاا

_اي 

_ليش احسج زعلانه مني 

_لا عادي بشنو ازعل منك مثلا شمسويلي

_لان ماسالت عنج هواي وتواصلنه بهاي السنين

_ههه قابل منو انه وتتواصل وياي كلامك مو معقول تره 

_ليش منو انتي غير صديقه الطفوله وبنت خالتي وعمي

_وهذا الشي ماينطينه حق ان نتواصل عادي مجرد ابن عم وخاله حالك حال باقي ولد عمامي شكو متواصله وياك وين عايشين باوربا

_لا تنسبيني حالي من حال بقيه اولاد العمام انه مو مثلهم وانتي تعرفين هل شي

_لا ماعرف وماحجيت شي جذب عن اذنك هسه خل اخذ ريانه لامهه..

شلت ريان ومشيت متوجهه للباب لزمت يده الباب ولزم ايدي عصرهه بعصبيه لزكني عل حايط وتقرب علي صار مايفصلنه غير ريان باوعتله بعصبيه وحجيت بصوت مخنوك..

_شكو تسوي هيج مرتضى ماناوي تجوز من سالفتك هاي

_احجيلي الصدك وروحي 

_شكو شحجي

_عدلي اسلوبج جنانه

_استغفرالله ياربي ترى مختنكه ماكدر احجي هواي شنو تريد ليش كاعد تسوي هيج بيه هاي ثاني مره تتجرا وتلزم ايدي وتحصرني هل حصره 

_وياريتهه تفيد وياج ماكاعد تحجيلي الحقيقه وتريحين كلبي 

_يا حقيقه قابل مجذبه عليك انه

_ليش مانتظرتيني نشتغل سويه

_ماريد انتظر احد ماريد اكضي عمري واضيع سنين من حياتي انتظر شخص مو باله انه ولا يفكر بيه اصلا مامستعده اضيع مستقبلي علمود شخص نسه بيوم من الايام جان صديقي ونسه كلشي جان يسوي الي

_مانسيت شي بالعكس مالحضه رحتي عن بالي كل هل سنين ولمن سافرت افتقدتج اكثر وحده واشتاقيتلج وهل شي خلق تردد وتعب وخوف بداخلي 

_ما يهمني شي بعد ابتعد عني خلي اطلع لا يفتقدون وجودي وتصير مشكله تره تعبانه وروحي طالعه مالي خلك احد يفهمنه غلط

_وليش ماكاعد تباوعين بعيوني ..

تافافت ورفعت راسي باوعت ببرود بعيونه الذبلانه والتصعد تباوع لعيوني مره ولشفايفي مره ثانيه بلعت ريجي بصعوبه وبقيت اباوعله ببرود عكس

نضراته الكلهه دفو ومحنه وكأني غبت عن الوعي لحضه وتقرب علي يريد يبوسني شهكت وضربته

راجدي لااراديا فتح عيونه مصدوم وعكد حواجبه بعصبيه لزم ايدي وتقرب اكثر وحجه من بين سنونه..

_تمدرين ايدج علي جنان

_واسوي اكثر بعد لو حاولت تلعب وياي وتجاوز حدودك ظنيت اني اعرفك وبعدك مرتضى العرفته والعشت وياه ايام طفولتي ظنيت انك ماراح تتغير

بس غلطانه الضاهر عيشه الغرب وبنات الحرام هناك خربنك وخلنك تتوهم انك تكدر تسوي بيه التسوي بيهن بدون ماتخاف ربك ..

دفعته عني وطلعت وهو طلع وراي وركع الباب فزيت ووكفت بمكاني اباوعله وهو خزرني ومشه قبلي للصاله غمضت عيوني ولزمت كلبي احس راح

يطلع من مكانه من ورا السواه مرتضى فعلا تغير وكل البراءة يلي بكلبه راحت مرتضى الحبيته ومتت عليه كل هل سنين مو هيج مو شخص

طايش وعنيد ومتسلط نفس الشفته بالغرفه بعمري ماتصورت ان ممكن يحاول يتقرب علي او يبوسني وانه لا حلاله ولا على ذمته .. مسحت

وجهي بحيره وخليت ملامح البرود بوجهي حتى لا يكول لانت وخافت مني ويرجع يكرر نفس

موقفه هذا .. دخلت للصاله انطيت ريان لشموخ وهي شكلهه انتبهت علينه متضايقين كعدت يمهه وكالت..

_شمسويتله وهيج اجه فاير دمه

_كولي هوه شسوه من سالفه بعدين اسولفلج تضلين تلطمين

_ياستار قلقتيني

_بعدين 

_تمام اكلي يله وراج ابره 

_اوك حبي..

مديت ايدي اكلت شويه وانسدت نفسي من خزراته شبعنه وكمنه ماخليت عيني بعينه ولا رفعتهه عليه يستاهل التجاهل وكلشي حقير اسوي وياه على

سوايته هاي بيه عباله سهله ويكدر يوصلي بالساهل ويلعب بيه بالحرام لا والله لو مو احبه لو ابوس تراب رجله ماخلي الباله يصير وخل يعيد هل

موقف مساع ويشوف الا اخلي مايخلف بعد ولا يشوف الخلفه ويندم عل ساعه الرجع بيهه للعراق وشافني .. ااخ ياخاله سماء راحت تربيتج اخذوهه

الغرب وبنات الحرام صار لا يستحي ولا يكول حرام صار ياهي اليشوفهه يريد ياخذ نصيبه منهه .. كملنه اكلنه وكمنه نكلنه الماعين وشموخ

انطت ريانه لمحمد واجت للمطبخ وكفت تغسل بالماعين وانه انوش منهه وارتبهن بمكانهن ماكدرت

احجيلهه خاف شخص يسمعنه كملنه الماعين ورحنه لغرفتهه بعدما اخذت ريان تنومهه كعدت كبالهه وكالت..

_سولفيلي بله شسوه من سالفه مرتضى وياج

_خيه كاعده بامان الله مطلعه اغاني لريان وماحس الا دك الباب ودخل عبالي انتي ارفع راسي واشوفه هوه وو....

كعدت احجيلهه كلشي صار وحجاه وهي نطت عيونهه بصدمه من كتلهه على سوايته وياي وشلون عصب من حجيت وياه ورزلته ..

_تحجين صدك مرتضى سوه هيج ماصدك

_اي والله انه من الصدمه ماعرفت شسوي مالكيت نفسي الا ضاربته راجدي 

_شجاه هذا تخبل نسه الحلال والحرام من عاشر الكفار شنو

_والله مادري ياخيه مدري شنو سالفته اخوج هذا

_معقوله تقرب منج لان يحبج وجان مشتاقلج يعني لو تحسبيهه من هل جهه تكون حرام بس سببهه مو نزوه وانما حب ولهفه 

_يمعوده يا حب هذا هوه شفت الحب بعيونه حتى اكول يحبني وحتى لو جان يحبني خل نفترض بس مايصير ينسه نفسه وياي ويحاول يتقرب علي حرام

_لا من عرف ابن الجيران شايلج بين اديه وشايف شعرج شفت الحب من عافج بالمستشفى وراح يجيبلج حجاب وعبايه ولبسج بيده شفت الحب من اجه ايده مطكوكه بالحايط من حركه كلبه عليج وخوفه 

_شموخ كافي لا تحجين 

_ليش

_اتاذه خيه والله لا تهدمين كل قوتي البنيتهه حتى اتجاهله واتركه لا تهدمين فكره ان مستحيل يحبني القنعت بيهه روحي كوه كل هل سنين 

_جنان تدريني ماحب الحب وهل سوالف بس احب احجي الحق وكاعد اكلج الشفته والحسيت بي لا أكثر..تذكرين من شجعتج وكتلج تجاهلي وعوفي

صدكيني جان السبب حتى يعرف بنفسه حتى يتدارك مشاعره لان جنت اعرف وحاسه بي يحبج من جان بعمر ال ١٥ سنه بس مايدري بكلبه ولا

يعرف ان هو طايح وغرقان بحبج ضل يكابر على نفسه ويتجاهلج قصدا حتى يكون غلطان ومايحبج بس تجاهلج اله خلاه يفقد قوته وارادته ويسحل

تكبره خلاه يعرف شكد هو يحبج ومتعلق بوجودج بحياته بس الفاجاني ان تاخر هواي ياله تدارك هل مشاعر وماعرف ليش هسه بالذات ياله تحرك وحاول يحجي ويتقرب منج

_ماريده شموخ ماريده بعد خلاص التعب الشفته من حبه كل هل سنين هدم كل شغف بالحب اتجاهه صرت لمن يحجيلي كلمه طيبه وعاديه

اخاف ماضليت افرح او استبشر صرت من اباوع بعيونه اتصنع القوه والبرود و مو نفس قبل على

طبيعتي وياه صرت اخاف يلين كلبي اتجاهه ويكسره صرت ماثق بنفسي ولا بحبي ولا بكل كلمه يحجيهه الي او تصرف يطلع منه

_وياج حق وانه كتلج الشفته حتى لا تظلمينه وتظلمين نفسج انطي مجال لروحكم حاولي تفهمين البداخله من خلال تصرفاته وياج وكلامه او سالي

مباشرتا وفهمي البكلبه شنو بالضبط اتجاهج ساعتهه بس تكدرين تقررين تحبينه وتكملين وياه لو تتركينه وتشوفين طريقج بعيد عنه 

_مادري شموخ مادري خايفه كلبي احسه مخنوك ومعصور من الخوف يلي بي والقلق خليني هسه

مامستعده لاي حركه او تفكير اتجاهه رح اخلي الامور على مجاريهه ووين ماتجري السفن تجري لان تعبت ومالي حيل بعد حتى انهار

_تمام ارتاحي ولا يضل بالج يمه عوفي وتجاهلي انتي مو ضايجه من تصرفه خلاص بينيله انج ضايجه وطالعه روحج منه من ورا السواه بيج ولا

تنطينه مجال يحجي وياج ولو كلمه وحده رديله العيشجياه كل هل سنين طول فتره وجودج هنا هاي فرصتج بلكي يرتاح كلبج ويصفى البالج

_اي هوه هيج راح اتصرف عادي وياه حاله حال بقيه الاعرفهم وماحجي وياه حتى كلمه وحده عن المعتاد وخلي شيسوي خل يسوي الا يتجاوز الحدود مره ثانيه ساعتهه الي حجي ثاني وياه

_كفوو منج

_ههه يله دوختج انه نومي بنتج ونامي ارتاحي

_ماعندي شي وماجايني نوم انتي نامي

_والله من وره اخوج كل نوم ماضل بعيني 

_هههه جا خلينه نتابعلنه فيلم شرايج

_صدك نازل فيلم لشاروخان وكاجول جديد تعرفين شسمه

_هم هذولي الثنائي

_احبهم احس نضراتهم وتصرفاتهم بيهه هواي حب وهذا زوج كاجول الغثه صاير مثل الشوكه ببلعومي

_شلج غرض ويوكف بلعومج

_احسه مفرقني عن حبيبي ههه

_هههه يله بله خب خبال ديله خلي نبحث عليه ونشوف فلميش بله شسمه هوه كلتي دوالي مدري شنو

_يا ولج فضحتينه شنو دوالي امده حضي اسمه ديلوالي 

_هههه جا شمدريني حجيتهه على لاهيتي لحظه خلي احط ريانه بجربايتهه وانتي بحثي عليه لا اروح اكتب دوالي ونشتهر

الابتسامه والقهر خلص الفيلم وجان كلش حلو طفينه الشاشه بعدما نعسنه و لفينه راسنه نمنه انه وياهه للمغرب...

.

.

.

__في مكان اخر__

:- رن صوت المنبه وكمت كوه فاك غيوني طفيته وسحبت روحي للحمام سبحت بماي بارد حتى اصحصح نشفت طلعت من الحمام وانه انشف بشعري اخذت ملابس الدوام لبست البنطرون والتشيرت الاسود وضميت الستره من اوصل للمكتب البسهه اخذت

عطري المعتاد رشيت بعدما كملت تبديل مشطت شعري وطلعت صبحت على امي والبنات ركبت سيارتي بسرعه وطلعت بدون ماتريك رحت للدوام

وبالطريق وكفت اشتريت كرزات واخذت وياي كارتون كهوه لان مخلصه بمكتبي خليتهن بالسياره وصعدت مسافه الطريق وصلت للدائره ..نزلت

واجه بوجهي اكثر شخص طالعه روحي منه تجاهلته وعبرت من يمه وهو اجه وراي دخلت

لمكتبي ودخل وياي سد الباب وبقه واكف بمكانه وانه ارتب بجياس الكهوه عل ميز هناك وحجه بحيره..

_راهب خويه شلونك يارفيق الدرب 

_ههه 

_ خويه شجم دوب تضل هيج متجاهلني نسيت الخوه والرفقه البيناتنه ليش كاعد تسوي هيج بيه وباختك انت كلي الحب حرام لو عيب وين المشكله

لو حبيتهه واجيت اتزوجهه على سنه الله ورسوله ليش كاعد ترفض بكل مره زعلك طول ياخويه وانه نفذ صبري..

رفعت حاجبي بتفاجئ والتفتت عليه اشرت عل باب وكتله..

_اذا مليت ونفذ صبرك تفضل بره استاذ اوس لا ترجع بعد وتعب نفسك اختي مستحيل تصير الك لو بقيت اخر واحد بالدنيا 

_ليش

_لانك مو كفو وانطيك اختي 

_افاا ليش يايوم انه غدرت بيك لو طلعت مني العاطله ويا يوم شفت مني شي مو زين حتى تشوفني مو كفو 

_لا تسال تعرف نفسك شسويت

_صدكني ياخويه طول كعدتي وكلامي ويه البنيه ماجان بالي غير انهه بنيه حبهه كلبي ورايدهه تصير حلالي و نصيبي وابد مافكرت بيهه بطريقه سيئه لو نويت وياهه العاطله

_تمام تفضل هسه من غير مطرود عندي شغل 

_هذا اخر كلام عندك 

_اي ويكون احسن لو ماتجي بعد وتحفظ الباقي من احترامك عندي

_هاذهو خويه نعم الله عليك وجزاك الله الف خير على كل هل سنين العذبتنه بيهه 

_لا شكر على واجب الله وياك

حجيت كلامي وانه اكلب بالملفات حسيت عليه بقه يباوعلي بحيره تالي تنهد وكام طلع بره وسد الباب عفت الملف وطبكت اصابيعي وصفنت افكر بيهم

معقوله يأس ومل وبعد مايجي يتقدملهه او مايريدهه بس لا اعرفه زين انه اوس كلبه نفس كلبي لو حب ماينسه ويبدل اليحبه بكنوز الدنيا

خليني انفذ اختباري بي هل فتره طالما بدى ييأس.. تنهدت بحيره ورجعت اكلب بملفات القضايا

شويه وندك الباب ودخلت المحققه رسل دكت تحيه واشرتلهه تتفضل كعدت عل كرسي وانطتني ملف قضيه وكالت..

_بلا زحمه عليك سيدي شوفلي الصفحه ٤ من ملف القضيه هاذي 

_شنو بيهه

_كاتبين اسامي كل المشتبه بيهم اللزمناهم بالتحقيق الا جم شخص

_شلون يعني

_امس رحت دورت وسالت الجيران عن افراد العائله وكلهم تقريبا كالو نفس الكلام المكتوب عن حياته العاديه بس كم شخص من جيرانه المقربين

كالو ان عنده ديانه جان يجيله كل فتره ياخذ منه فلوس وماجان يكلهم بشكد مديون او وين وده فلوس الدين وهو بيته خرابه فعرفت ان بالقمار مو لمكان ثاني

_وشنو يثبت ان صرفهن عل قمار

_لانه لاعب قمار وكل شخص مثله يكون مديون

_بس هنا مكتوب ان يلقبونه بالثعلب لان بعمره ماخسر يعني تصوري عنده كنوز هوه مايحتاج يتداين من شخص هو اليداين الناس 

_هوه هنا الحبكه ورايده مساعدتك

_تمام خليني ادرس الملف زين واذا لكيت شي مهم اخطلج عليه

_اكدر ابقى يمك ادرسه وياك

_لا مايحتاج اصلا ماعرف اشتغل وشخص يمي انتي روحي شوفي شغلج

_هاا تمام سيدي شكرا الك

_عفوا 

كامت دكت تحيه وطلعت من المكتب وهي تتلفت علي تجاهلت نضراتهه و هزيت راسي بحيره رجعت اباوع للملف وجان عباره عن قضيه قتل لاعب قمار يلقبونه بالثعلب ....

_قضيه رقم 3_

مناف لاعب قمار ماهر اطلقوا الحانات عليه لقب الثعلب من شده دهاءه وخفه يده وفوزه المستمر في الرهانات قبل اسبوع تورط مع عصابه بلعب

القمار وشن شجار بينهم باحدى الحانات الصغيره وبعدها ب٤ ايام لقي مذبوح مقطوع اليدين ومرمى في احدى نفايات منطقه ^^^ ليس له عائله فهو

نشأ وتربى في احدى دور الايتام وله اعداء كثر ومنهم المشتبه بهم ال٤ الذين قد خاض معهم شجارات منفصله مميته خلال مسيره عمله ولم

يثبت اي منهم هو القاتل فلم يوجد اثر دليل على جثه المغدور ولا بصمات اصابيع او اقدام ولكن هذه القضيه يشتبه بها انها جريمه قتل وسرقه لانه

جميع الاسهم والمال الذي كان يخصه في البنوك قد تم سحبه قبل وفاته ب نصف ساعه ورقم السحب مجهول...

:- بقيت صافن بيهه وشفتهه سهله بشكل صعب رفعت سماعه التلفون واتصلت على سالم اجالي دك تحيه وكتله..

_المشتبه بيهم بقضيه قتل وسرقه لاعب القمار مناف موجودين بالحجز مو

_نعم سيدي

_سحلوهم لاسفل السافلين

_حاضر سيدي..

دك تحيه وطلع اخذت الملف استنسخته ودزيت الاصلي للمحققه رجعته الهه ودزيت خبر اني راح احقق بالموضوع وياهه .. كمت اخذت معداتي

واستنساخ الملف ونزلت فتحت الباب ودخلت السرداب هذا عباره عن غرفه مربعه ٤×٤ متر ضلمه وبس كلوب اصفر معلك فوك وبيهه اعمده نربط

عليهه المجرمين ومكتب على جهه وكرسيين للتحقيق .. توجهت اله خليت المعدات عل ميز وطكطكت اصابيعي وكعدت اشرت لسالم على

واحد منهم بشكل عشوائي وراح فك قيده وجابه كعده كبالي وهو يباوعلي بشكله القبيح ممسوخه منه الرحمه اكيد يشتبه بي قاتل على هل خرايط

المسويهه بوجهه وراسه الاكرع .. تافافت وفتحت الملف مالت اساميهم سالته عن اسمه ورد خليت علامه عليه بالملف وبديت احقق وياهم واسالهم

عن المغدور اذا يعرفونه وطلعوا كلهم يعرفونه توقعت ينكرون معرفته بس طلعوا اذكياء مانكروا معرفه شخص ساحل كرامتهم بالحانات .. المهم

كملت تحقيق وماخذت منهم شي مفيد اشرت لسالم وخله السيخ عل نار ورجع اخر واحد عل عمود كمت اكلب بالسيخ واحجي..

_ليش تحبون تجبرونه نعذبكم وتالي تكولون المحققين مجرمين وماعدهم رحمه يعني بهايم انتو ماتمشون الا اذا اخذت اعز شي عدكم بس لا تخافون ماخذ مصدر جهالكم وانما راح اخذ مصدر رزقكم ..

اخذت السيخ بعدما صار احمر وقربته على ايد الاول وضل يتوسل اعتقه ورجع حجه كلشي حجاه مساع رحت عل ثاني نفس الحاله والثالث وكلهم

حسيت نفسي مليت وراح يتعبوني رجعت عل الاول اخذت ايده ومشيت السيخ على معصم ايده ردت اوصل للكف وكال بجزع...