رواية فصلية بديلة ( شموخ ) الجزء الثاني الفصل الرابع عشر 14 بقلم ام ملكوت

:- مشيت السيخ على معصم ايده وصلت للكف وكال بجزع...

_راح احجي سيدي راح احجي بس عوف ايدي سالمه الله يخليك

_ها شنو شكلت شتريد تحجي

_راح احجيلك التريده 

_جؤ جؤ ماريد اسمع الاريده وانما اسمع الحقيقه المحد يعرفهه غيركم 

_حاضر سيدي احجي الحقيقه المحد يعرفهه بس عوف ايدي

_تمام اتفقنا..

رجعت السيخ لمكانه ووكفت كباله وبده يحجيلي عن شغله وشلون بده قصه حياته باختصار مللني وطفر عروكي سحبت السيخ وخليته بطن كف ايده وصرخ بخوف على ايده وخرت السيخ بسرعه وكتله..

_تحجيلي المختصر لو اشلع ايدك من العرج واخليك شلون تعرف تلعب اقمار بعد

_حاضر سيدي راح احجي والله راح احجي..

بقه يباوع لايده ويتوسل ويبجي مثل النسوان اشرت لسالم واجه فتح قيوده وكعده عل كرسي رحت كباله خليت اديه عل ميز ونزلت لمستواه وسالته بهمس..

_احجيلي شلون تعرفتوا عل ثعلب وشلون قتلتوه

_سيدي ماقتلناه احنه بس راح احجيلك الصار كله شلون ويمته تعرفنه عليه وليش صارت مشكله بيناتنه

_غرد

_سيدي هذا بيوم كاعدين كالعاده نلعب بوحده من الحانات واحنه فزنه على الخصم اكثر من مره اخر شي كاموا معصبين وكالوا راح نجيب الثعلب

ونشوف شلون تطلعون منا بفلوسي فراح جاب شخص اسمه الثعلب وكعده مقابيلنه احنه استهزأنه بي لانه شخص ضعيف وهزيل مو مثلما توقعناه

معضل وضخم وصرنه نصيحله الثعلب المهلس بس هوه بقه هادئ وانتقم من عدنه باللعب وصارت شغله تحدي بينه وبين رئيسي اليخسر يكطع ايد الثاني فصار هوه وفريقه واحنه ورئيسنه فريق نلعب سويه كم كيم وكالعاده هو الفاز بكلهن وكف وامر يكطع ايد رئيسنه فاحنه كمنه كلنه رفعنه اسلحتنه عليه.. قصص ماي هوبس 

وهددناه اذا يكدر يسويهه هوه استغل وجود القمارين وصار يحجي على رئيسنه بصوت عالي عاد رئيسنه اخذ ايد واحد من عدنه

وكطهه بدال ايده كدامه وطلعنه بس رئيسنه تحلف بي وصار يتدرب على لعب القمار ليل نهار وراح لاحسن القمارين يعلمونه بس حتى يفوز بس

لمن رجعنه للحانه مالكينه اله اثر ورحنه سالنه عليه وكالوا مريض فدخلنه لبيته غصب عنه والرئيس تحداه يلعب وياه وهو جان مريض فعلا

وكدر رئيسنه يفوز عليه وجان الرهان على الممتلكات لان رئيسنه جان متعلم زين وضمن فوزه اكثر من شافه مريض وحالته ماتسمحله يركز باللعبه 

_وبعدها اخذتوا املاكهه

_لا سيدي تصنع الاغماء وره اللعبه وامرنه الرئيس نودي للمستشفى خاف يصير بي شي وحده بالبيت وتضيع الاملاك من ايدنه فاخذناه وبقينه ننتظر

بالباب لحدما مر تقريب اليومين دخلنه عليه ولكينه الممرض نايم بمكانه وهو شارد من يومين ومن خبرنه الرئيس امرنه ندور عليه ليل نهار وبكل

مكان لحدما نطيح بي فتطشرنه بالشوارع اسبوع ندور عليه ياله حضينه بي وصرنه نلاحكه بالسياره وجان بوقتهه سياره ثانيه ورانه تتبعه ماهتمينه

جانت اولويتنا ان ناخذ حقنه منه فلما حاصرناه وكف السياره ونزلناه خلينه السلاح براسه سيدي وهددناه ان يفرغ حساباته النه وهو ماجذب حولهن

النه وضربناه بالاخمس على راسه وبقه دايخ بمكانه عفناه ورجعنه انطينه الاملاك للرئيس وبس هذا سيدي الصار وماجذبت عليك بحرف الله شاهد

_وتعرف الله انت ابو الوصخ 

_جا شلون سيدي 

_زين ماشفت شي غريب او هوه ماحسيت بي شي يعني مامعقوله اخذتوا كلشي منه وبقى بدون مايقاوم 

_سيدي بس كال رقم ^^^^ ماعرفت شنو هوه ردت اساله بس واحد من الوياي ضربه على راسه وخلاه يسكت دايخ

_تذكر رقم او نوع السياره يلي لحكته غيركم

_لا سيدي ماخليت بالي وياهه بس جانت سياره بيضه وعاليه ماعرفت شنو نوعهه بالضبط

_تمام 

_سيدي راح تخليني اطلع مو 

_اي ليش لا ساالم

_نعم سيدي

_طلعه للحجز وحول القضيه مالته هوه والوياه

_حاضر سيدي

_نسيت قضيه السرقه شنو

_بس سيدي هذا جان حقنه واخذناه 

_تمام عود يم القاضي كول حقنه وماوصيك ضم عليهم اسم رئيسك تمام حتى خوش يكسرون اصابيعك انت والوياك يم المحققين هناك 

_سيدي دخيلك احجي وياهم لا يحولوني للتحقيق راح احجيلك كلشي وانت حقق ويانه سيدي 

_يعني اذا حققت وياك تكلي اسم رئيسك..

صفن بوجهي بغباء وبلع ريجه بصعوبه ونزل راسه اشرت لسالم واجه هوه والشرطيين الوياه ربطوا اديهم واخذوهم للحجز ويسلمون قضيه السرقه

مالتهم للمحققين المدنيين ومحكمه الاحوال المدنيه يلي يختصون بالسرقه والسطو والتحرش

وغيرها هل اقسام لان احنه شغلنه جنائي كلشي يختص بالقتل والاغتصابات الله يكفيكم الشر...

_قضيه رقم 4_

:- مسحت ايدي ولميت معداتي ورجعت لمكتبي بعدني ماكاعد ورن التلفون الارضي رفعته واجالي صوت بنيه تلهث وتبجي وهي تكول بهمس وصوت متقطع..

_الو انت المحقق بدائره ^^^

_اي منو وياي

_سيدي دخيلك الحك علي راح يموتوني اهلي راح يذبحوني انه انطوني رقم مكتبكم وكالوا اتصلي عليهم من تصير وياج مشكله وهسه انه بحاجتكم سيدي

_اهدي واحجيلي بوضوح شصاير وياج ووين انتي هسه

_سيدي انه بمحطه بانزين يم سيطره ^^^ شارده من اهلي جابوني هنا خواني وابن عمي حتى يذ بحوني سيدي وشردت منهم وكاعد احاجيك من رقم شخص ابن حلال دخيلك سيدي لحكوا علي راح ياخذوني ببستان بمنطقه ^^^ 

_وشمدريج راح ياخذونج هناك

_لانهم قتلوا بنت عمي هناك وهسه يردون يقتلوني انه هم

_تمام ابقي بمكانج شكد ماتكدرين وابقي على تواصل وياي لبينما نوصلج

_تمام سيدي بس فدوا بسرعه لا يلكوني

سديت السماعه ورجعت اتصلت على سالم انطيتهم تبليغ وكمت حضرت نفسي اخذت رقم النقال سجلته بنقالي واتصلت عليه شويه ورد ولد وكتله..

_الو منو 

_انت منو

_وين البنيه التوه اتصلت علي 

_اجه اخوهه اخذهه

_شنوو بيا جهه راحوا

_ على طريق ابو الخصيب ليش

_شفت رقم السياره شكد

_اي بس منو انت

_انه المحقق راهب ردلي الرقم بسرعه البنيه بخطر

_مرحبا سيدي رقم السياره ^^^^^^...

سديت الاتصال وطلعت بسرعه لكيتهم مكملين صعدنه سياراتنه وشخطناهن وطلعنه على طريق ابو الخصيب طلعلي سالم موقع السياره باللابتوب

وشفت بيناتنه مسافه مو طويله زودت السرعه وصرنه قريب عليهم وبيناتنه بس سايد واحد معاكس همه راحوا بجهه واحنه بجهه لفيت السياره

عكس اتجاه السايد ولحكتهم بسرعه انتبهوا علينه وصاروا يدخلون بين الطرق والدرابين واحنه وراهم وراهم لحدما وكفت السياره لحضه من بعيد

وشمروا شخص من السياره تقربت يم المكان بالسياره واشوفهه بنيه مدمايه فتحت عيوني بصدمه ودست بريك فجاتا وشخطت السياره متربه الدنيا....

.

.

.

_في مكان اخر_

:- مر كم يوم على الصار بيني وبين مرتضى وانه ماخلي عيني بعينه ولا اجتمع وياه بنفس المكان صرت قصدا لمن اشوفه وحده او اكون وحدي

ويدخل للمكان اكوم اطلع من المكان كله واكثر من مره حاول يحجي وياي وتجاهلته وسويت نفسي اشتغل او احجي ويه خالتي الى ان بيوم كاعده

ضهريه كلهه نايمه الا انه النوم مجافى عيوني اخذت نقالي وطلعت بالحديقه خليت السماعات باذني وشغلت اغنيه [حرت /هيثم يوسف] وكاعده

افكر بي وصافنه بالزرع ومره اصفن بالفراغ واتذكر طفولتنه نزلت دمعه حاره على خدي جوت بيهه روحي ذبيت حسره وباوعت للسما بالجهه

الثانيه والمح شخص وراي التفتت وشفته مرتضى واكف باب المطبخ وساند نفسه ومتكتف عل حايط درت وجهي عنه مسحت دموعي وبعدت السماعه

كمت اريد ادخل جوه واجه علي لزم ايدي ولزكني بي ماكدرت احجي او اطلع صوتي لان خانكتني العبره وحيلي تعب احس بس احجي كلمه انهار

بالبجي كدامه ..بقيت ساكته ومنزله راسي وابعد بايده عني عصرهه حيل ورفعت راسي باوعتله متوجعه وعكد حواجبه مستغرب صفن بعيوني وكال ..

_شبيج جنان ليش عيونج حمر

_مابيه عوفني

_ماعوفج الا اعرف البيج والبكلبج شنو ليش متغيره ليش صايره هزيله ودمعتج بعينج عكس الشخصيه المرحه والخجوله يلي عفتج بيهه

_لكك مرتضى

_عيونه..

هزيت راسي بتنهيده وصدمني رده رفعت راسي بتفاجئ وطاحت دموعي غصب عني نزلت راسي حتى لا يشوفهه ورفعه باصابع ايده وبعد خصله شعري الطاحت على عيوني من الحجاب وكال..

_احجيلي شبيج ليش تبجين

_عوفني ابتعد عني لا تسوي هيج وياي وترجعني لنقطه الصفر عوفني فدوا لا توريني وجهك وتعطف علي وتعاملي على مزاجك يمته ماتريد تتجاهلني ويمته ماتريد تهتم بيه

_شسويت بس اهدي هسه خل نفتهم شمسويلج 

_ ماريد احجي واكول شي بس عوفني بحال سبيلي لان تعبت

_من شنو تعبتي

_منك ومني ومن اهلي ومن كل الناس تمنيت لو ميته ولا امي جايبتني لهاي الدنيا تمنيت لو ماخطت رجلي باب بيتكم بيوم ولا شفتك وعرفتك تمنيت لو مخلوق كلبي بمرض خبيث ولا ولد بحب....

بلعت كلمتي لمن حسيت راح افضح البكلبي اتجاهه ولو هيه عيوني ودموعهه حجن كلشي مايحتاجن لساني نزلت راسي خليت ايدي على وجهي وصرت

_شبيك احسان لا تفهم غلط وتتهور ماصار شي 

_شنو ماصار شي وهو حاضنج وين كاعدين احنه شكو حتى يحضنج جنان وشلون تخلينه

_ماحضني بس جان يواسيني لان جنت ابجي ماقصده شي والله واصلا هو حضني وانت اجيت وانه جنت ابجي مانتبهت والله صدكني ماصار شي وهو ك اخ وصديق بس حب يصبرني 

_جناننن

_اي والله تدرينه اصدقاء واخوه من الصغر ومابيناتنه شغلات مو زينه وانت تعرفني اذا ابجي بعد محد يسكتني وهوه احتار شيسوي بقه يطبطب على راسي حتى اهده بس هيج والله..

رفع راسه باوع لمرتضى وهو معصب ومرتضى صافن على كلامي ويباوعلي بحسره وانزعاج رفع عينه لاحسان وكله بجمود ..

_مثلما سمعت خويه الكالته صحيح ولا تفهمنه غلط مابيناتنه شي تره ولو اكو شي ماتردد واكللكم ان بيناتنه شي تدريني ماستحي منك ولا اضم عنك شي..

هز راسه احسان بايجابيه ورخت قبضه ايده لزمني من ايدي ودخلنه وهو يسحبني وراه وصلنه لغرفه شموخ وكف وكال..

_حدج لهاي الغرفه والصاله تطلعين ومرتضى ماتنجعمين وياه بمكان واحد بعد وهيج شغلات طايح حضهه ماريد مفهوم

_اي هوه اصلا ماجتمع بي تدريني كله وياكم اكعد واسولف ومامخالطته بمكان وحدنه

_اي هاذهو هيج احسن الج واله والا والخلقج لو احس بي تجاوز حدود الاخوه والصداقه بيناتكم يصير الي حساب عسير وياه 

_لا ماكو هيج شي اتطمن

_يله فوتي للغرفه اخذي علاجج ونامي

_انشاءلله ..

هزيت راسي ودخلت وهو يدور بعيوني الحقيقه من الجذب مايدري بروحي تمرمرت ياله كدرت اسيطر على عيوني وماضهر بيهن الحب البكلبي دخلت للغرفه وفزت شموخ من نومهه باوعتلي وكالت بنعاس..

_ ها خيه وين جنتي

_جنت بالحديقه اشم هوى مخنوكه

_هاا تمام اخذتي علاجج

_هسه راح اخذه وانام كملي نومتج انتي

_تمام ..

رجعت نامت ورحت انه اخذت علاجي وتمددت عل جربايه صفنت بكلام مرتضى مساع لمن كال لاحسان ان ماكو شي بيناتنه ولو اكو جان حجيت يعني فعلا هوه

مامعتبر اكو شي بينه حتى الصداقه يعني كلام شموخ كله مو صح لمن كلتلي هوه يحبج وطلعت غيرته واهتمامه هذا بس لاني بنت عمه وفرد من

العائله لا اكثر .. فركت وجهي بحيره ومسحت دموعي درت على الجهه الثانيه وغمضت عيوني ونمت للمغرب كعدتني شموخ اكوم اصلي عاد كمت

وبقيت ساجده لوقت طويل حيل ودموعي تصب حيره ووجع على المصلايه سمعت الباب انفتح مسحت دموعي باصابيعي وكمت لفيت المصلايه

ورجعتهه التفتت وشفت امي كاعده عل جربايه وملامحهه قلق وحيره عرفته احسان حاجيلهه الصار الضهر كمت يمهه كعدت وهي لزمت ايدي وكالت..

_يمه جنانه احجيلي يبعد امج شبيج مساع متضايقه وتبجين صاير شي وياج يوجعج شي احد

مضايقج او مزعلج بكلمه متضايقه من كعدتنه هنا تردين نروح نكعد بغير بيت لان احسان كلي شافج تبجين بالحديقه وماكدر يحجي وياج 

_وشنو كلج بعد

_ماكال شي بس كلي شفتهه تبجي وخلاص ليش صار شي بيناتكم

_لا 

_زين ليش تبجين احجيلي انه امج لا تضمين علي

_ماكو شي يمه لا يضل بالج بس جنت مخنوكه ومشتاقه لدوامي وبجيت من الاغنيه 

_تردين ترجعين تداومين اخلي ابوج لو احسان ياخذج وياه للدوام 

_اي والله ياريت تحجيلي وياه لان تدريني ماعرف ابقى كاعده جنت اكضي وقتي بالشغل حتى بايام العطل وصار اسبوع انه هنا وماخذه اجازه اكيد همه محتاجيني هناك هسه

_تمام اذا متضايقه علمود دوامج ميخالف راح احجي ويه ابوج واخوج واكلهم ياخذونج وياهم ويرجعونج من يرحون لدوامهم

_تمام امي 

_هسه شلون حاسه نفسج

_عادي لا يضل بالج متعوده لان دائما هيج تجيلي الخنكه فجاة وبس ابجي تروح 

_يبعد حيلي دموعج غاليه علي لا تسوين هيج بنفسج لمن تختنكين تعالي لحضني وفضفضيلي وابجي لا تبجين وحدج اخاف عليج بنيتي

_لا تخافين امي حبيبتي انشاءلله بس اضوج مره ثانيه اجي ابجي بحضنج بس مو تساليني وتخليني اشرد منج

_تمام اتفقنا 

_اي بعد امج..

ابتسمت وتمددت خليت راسي على رجلهه وهي بقت تفلي بشعري هاي عادتهه كلما انام بحضنهه تفتح شعري وتضل تدور بي لحدما يمر الوقت

شويه ودخلت شموخ صاحتنه عل عشه وراحت بقه الباب مفتوح كمت من حضن امي وهي طلعت وره شموخ تساعد خالتي اخذت قراصتي ولفيت

كوشتي الواصله جوه خصري رفعت راسي ردت البس حجابي واشوف مرتضى واكف من بعيد ويباوعلي بنضرات ماعرفت افسرهه رفعت الحجاب

بسرعه خليته على راسي باوعت للمكان ومالكيته وكأن اختفى للحضه حسيت نفسي جنت اتخيل لزمت كلبي يلي انخبص اهدي بي وكمت طلعت

للصاله اول مادخلت اجت عيني بعينه لمحت احسان يباوعلنه ثنينه ودرت عيني عنه سويت نفسي طبيعيه واجيت كعدت يم شموخ وحجيت وابتسامه مزيفه على وجهي..

_هاا شموخه الله يساعدج

_ويساعدج حبيبتي 

_ابتسمي سوي نفسج كاعد احجيلج شي حلو 

_ليش

_ابتسمي وهاي هيه

_ههه يله احجي

_هههه ولج ابتسمي عدل شهل ضحكه التخرع

_هههه جا شسوي ماعرف اتصنع دحجي ليش

_بعدين بعدين

_مدام صار بيهه بعدين معناهه مرتضى اله ايد بالسالفه

_واحسان هم

_لا تكوليهه 

_اي والله 

_شافكم بوضع مخل يعني

_يا فلشج شهل تفكير منين جبتي الوضع المخل هسه

_اندري سوالف اخوي ماتنحزر نفس حضج 

_اي والله لا عاب حلكج

_هههه والله

_يله خلي نتعشه حتى اسولفلج

_خوب انتي سوالفج تجي ويه الوجبات تخليني اكل لكمتين واسحلج للغرفه من الفضول راح اضعف من وراج

_احسن ضعفي يساعد بشغلج

_على كولتج يله سمي بالله

_بسم الله..

مدينه ايدنه ناكل ونسولف منا ومنا عن الشغل مالتي ويمته ارجعله شويه وحجت امي ويه ابوي على شغلي وكال..

_اي عادي خلي احسان ياخذني انه وياهه ويروح لشغله شكلت بويه احسان

_اي ماعندي مانع خليهه تلتهي بالشغل احسن ماتلتهي بغير اشياء..

رفعت راسي باوعتله بعبره وباوعت لاهلي وهمه مستغربين من كلامه رجع كمل كلامه مصحح سوء الفهم وكال..

_اي بدال ماتضل تكضيهه خده ونوم وتطب منا تطلع منا مثل الطرمه خلي ترجع لشغلهه احسن 

_لا تحجي هيج عليهه بويه اختك هاي وبيت عمك كاعدين عيب

_كاعد نتشاقه وياهه بويه شكلت هسه انه

_ميخالف لا تحرجهه بعدهه مريضه تره ومايجوزلهه ضيجه الخلك

_حاضر بويه اترخص انه دايمه انشاءلله 

حسيت عليه ضاج من كلام ابوي ومنا هوه بعده ضايج من مرتضى وسالفه الضهر كلش تضايقت واستحيت منه حتى نسدت نفسي ترخصت منهم

واهلي عبالهم متعاركين انه واحسان كتلهم ماصاير شي بيناتنه بس شبعنه ياله سكتوا عني ..كمت غسلت بالحديقه وشميت هوى شويه شفت مرتضى

طلع متوجه للمغسله تحمحمت ورحت دخلت للبيت بسرعه صرت اتخيل احسان واكف بره ويباوعلنه من السياج من كثر الخوف السيطر علي

الضهر ونضرات احسان يلي ظنيت شويه وياكل مرتضى حتى لو مامسوي شي.. رحت  للصاله شفتهم خلصوا ونكلنه انه وشموخ الماعين ووكفت اغسلهن اجت اخذت الماعون مني وكالت..

_شكاعد تسوين انطيني من ايدج روحي انتي للغرفه اخذي علاجج وارتاحي لا تعبين روحج وانتي بعدج ماصحيتي

_لا مابيه شي احس روحي احسن والوكفه ماراح تسويلي شي واساسا اضوج اذا ابقى وحدي وكاعده بلا شغله وعمله فخليني اغسلهن عنج هواي تعبتي اليوم

_لا والف لا ماتغسلينهن انتي واذا ضايجه اوكفي على صفحه تناوشي الماعين مني ورتبيهن 

_ماشي هاج..

انطيتهه الصحن ودرت على جهه الكاونتر صارت تغسل وتشطف وتنطيني اخليهن بمكانهن ونسولف بالصار الضهر بصوت ناصي وهي شكلهه ماتفاجات

لان فهمت سوالف مرتضى حسب قولهه.. اما انه فما يهمني سبب تصرفاته بعد احس تعبت واسلوبه المحير وياي من رجع لهسه كاعد يخليني اكره

روحي وانفر منه .. ثاني يوم راح احسان وامي لبيتنه جابت ملابس النه تكفيلنه طول كعدتنه عند بيت عمو شهم وجابتلي ملابسي مالت الدوام

وشغلاتي .. دخلت للحمام ذبيتهن كلهن بالغساله وخليتلهم تايت وعطر ملابس لان بيهن ريحه دخان بس وانه ساده خشمي بالحجاب خليت العطر..

شغلت الغساله وقتتهه وطلعت خليتهه تغسل وحدهه رحت لغرفه شموخ فرغتلي ميزهه وخليت حاسبتي شكلتهه بالكهرباء وخليت دفاتري

والفايلات مالت شغلي وهي اخذت شغلاتهه رتبتهن بخانه ثانيه واخذت ملابس البيت يلي مابيهم ريحه دخان رتبتهن بخانه فارغه من كنتورهه ..  قصص ماي هوبس على ما كملت ترتيب الغراض طفه مؤقت الغساله رحت فرغت ماي الغسل وخليت جديد وشطفتهن حاولت اشغل النشافه ماشتغلت بقت تطكطك شلعت كلبي

وماكدر اصيح لشموخ كاعده توكل بتهه عاد كلت يولن المن منشفتهن وشمس الله موجوده ..خليتهن بالسله وطلعت وانه اسحبهن بالكاع ماكدرت اشيلهه

ثكيله وصلت لباب المطبخ وانه منحنيه وانضربت بضهري بشخص التفتت وشفته مرتضى بيده كلاص وحلكه منفوخ بي ماي عكد حواجبه باستغراب وبلع الماي..

باوع للسله وراح خله الكلاص عل كاونتر نزلت جريت السله و ماحس الا انشالت بسرعه رفعت راسي وشفته شالهه بايد وحده وطلع بيهه بقيت مصدومه تالي كلت..

ماشاءالله راح احسده شمالني خليت عيني على قوته طلعت وراه وخله السله قريب الحبل وره

البيت وباوعلي تحمحمت وكتله شكرا وانه متوجهه للسله باوع حواليه ولزم ايدي وانه لازمه الستره..

وسحبني وراه عل حايط صار البيت ورانه ومحد يشوفنه باوع بعيوني لحضه واحنه عاكدين

حواجبنه ومقلصين عيونه من ضوه الشمس صفن بعيوني وكال بهيام وطريقه شاعريه..

_ " واذا طلعت شمس فوت انت للبيت ؛ لان شمسين معناهه احتركنه"..

كمل كلامه وبقيت مفهيه ماعرف شسوي وشحجي ماعرفت شدوس بس اباوع لحدما كسر الصفنه هوه لمن ضحك خفيف وبينت سنونه ضربني بكصتي باصابع ايده ولزمتهه متوجعه باوعتله بزعل وبهتت ملامحه وهوه عيونه على رقبتي انحرجت كلش من نضراته رفع ايده للحظه خلاهه

على رقبتي وانحنى راسه متجه الهه .. لا اراديا دفعته عني وانه مصدومه ومستغربه تصرفه هذا هوه استوعب الموقف فرك وجهه بتوتر..

تالي عافني وراح وانه بمكاني متصنمه ماعرف شسالفه وليش سوه وحجه هيج شلون يتجرأ ويتقرب مني معقوله راد صدك يبوسني بيهه لا لا اكيد

راد يهمس باذني اي لهذا السبب تقرب لان انه متوبته من هاي السالفه .. لزمت وجهي بتوتر وعدلت الحجاب تنهدت بحيره ورحت شريت الملابس عل حبل شفت باب الشارع انفتح ودخل احسان لزمت كلبي

وزفرت براحه همزين ماسواهه الحظ وجابه قبل ٥ دقايق جان صارت مشكله شكبرهه وين انطي وجهي منهم تالي وهذا مرتضى لعب بحالي مادري

شيريد وشنو الغايه من تصرفاته هاي وياي تافافت وكملت شر اخذت السله ودخلت خليتهه بالحمام وغسلت اديه ورجلي تبللت ملابسي شويه طلعت ردت اروح للغرفه

وشفتهم عمي وبابا واحسان ومرتضى واكفين بالممر ويسولفون مدري على ايش انتبه علي مرتضى وكال كدامهم..

_بدلي ملابسج مبلله لا تتمرضين وانتي رئتج متسممه..

يدور الزله والمشكله دواره وياه هزيت راسي ب اي ودخلت لغرفه شموخ اخذت دهداشه الي من الكنتور بدلت اللابستهه ورجعت للحمام وهمه

بعدهم بمكانهم دخلت غسلتهه ورحت للحديقه شريتهه عل حبل التفتت ردت ادخل واشوف احسان وراي متكتف وعاكد حواجبه باوعتله باستغراب وكتله وانه اتمشه باتجاهه..

_شنو شبيك هيج واكف جنك ملك الموت خرعتني

_ هذا يسويهه عل عناد لو شنو شمعناهه يحجي وياج ويامرج كدامنه انه وابوي 

_لا عادي هوه فعلا ملابسي مبلله وخاف علي اتمرض شكو بيهه هسه انت لو شايفني قبله ماراح

تكلي روحي غيري ملابسج وقابل هوه شسوه شاف ملابسي ضيكه وكلي غيريهه حتى تكول يغار ومدري ايش 

_اي والله لا تبالغ احسان ماكو شي مجرد قلقان علي لان مريضه وماعندي مناعه اقل شي تتخربط حالتي

_تمام يله روحي دخلي للغرفه

_اريد اروح اساعد خالتي بالمطبخ عندك مانع

_لا روحي بس باجر الصبح حضري روحج نازل للشغل حتى اخذج وياي

_تمام انشاءلله 

_يله روحي..

هزيت راسي بايجابيه ورحت دخلت للمطبخ لزمت كلبي وزفرت براحه مايفوتله سالفه لازم يحقق بكل كلمه يكولهه مرتضى وبكل نضره عبالك اعرف شنو

بداخله وشنو غايته من يسوي هيج ماعولت اخلص من حيره مرتضى هسه اجالي احسان بالوسط.. التفتت وشفته يحجي ويه شموخ

بالحديقه ردت اروح واستجوبه مثلما استجوبني بس تعوذت من الشيطان لا يروح يلطش بيه ويخبث وياي زايد.. بقيت اساعد خالتي وامي

بطبخ الغده لحدما صبينه وكملنه رحت صحتلهم من بره اجوا دخلوا للصاله وكعدنه نتغده سويه وحجت شموخ بهمس..

_اكلج هذا اخوج كاعد يحوم عليكم ديري بالج

_صرتي مثلي سوالفج تجي بالوجبات ومو اي سوالف كل مواضيعج تجيب المغص

_هههه كملي واحجيلج شكلي عليكم 

_شكلج

_ولج توه كتلج كملي وبعدين احجي 

_يله تمام 

كملنه غده والكل ساكت وشلنه الماعين للمطبخ وكفت تريد تغسل الماعين وسحبتهه من ايدهه للغرفه دخلنه سديت الباب وسالتهه واحنه نمشي للجربايه..

_احجيلي اروح اتانيج منا لتخلصين ماعين سالفه طارئه هاي ماتنتظر

_تمام كعدي خل احجيلج

_كعدت ..

كعدنه عل جربايه وحجتلي كلام احسان وشكه بالعلاقه بيناتنه لزمت كلبي بخوف وتوتر اشتاح

صدري وكلت لازم ابتعد عن مرتضى هل فتره وماخلي احسان يشك بينه زايد حتى لو حاجته شموخ ....

.

.

:- مر اسبوع وانه كل هل فتره عيني على مرتضى واراقب بتصرفاته اريد اكتشف البداخله شنو اتجاه جنان وشنو غايته بكل هل تصرفات وياهه لو يحبهه ويكول احبهه لو

مايحبهه ويعوفهه لحال سبيلهه شهل تدخلات والكلمات والمحاسبه البيناتهم ويوميه محير البنيه ومخليهه ماتشوف دربهه .. شفته لمن حجه وياهه

على ملابسهه وانتبهت على احسان يخزر بيهم وماعاجبه كلام مرتضى ويه جنان كلت هسه يشك بيهم ويضل يحوم عليهه ومرتضى مايكعد راحه يا

ساعه يسويله سالفه ويه جنان وتصير مشكله الهه اول مالهه تالي عاد كلت اجيب احسان بالكلام واشوف شنو يفكر اتجاهم قبلما تصير شغله عناد

وتالي حتى خيط الامل بيناتهم ينكطع من وره المشاكل .. شفته طلع وره جنان وطلعت وراهم وكفت وره باب الصاله وسمعت كلامه وياهه كله

خليتهه دخلت هيه للمطبخ وانه طلعت يمه شافني وتحمح فك عكده حواجبه ورخه قبضه ايده واجه تقدم علي وهو يكول..

_ها #شموخه 

_ها #حساني شلونك

_زين نحمد الله شوفه عينج

_مرتاح بكعدتك عدنه

_ماعمري ارتاحيت هيج تعرفيني بعد

_احم اي باجر تنزل لدوامك مو

_اي انشاءلله بعد خلصت اجازتي السنويه ولازم ارجع اداوم ومن يخلص الدوام اجيب جنان وارجع بعد هنا 

_بيا دائره هسه تشتغل

_بالشعيبه دائره ^^^^ 

_وشلونه الشغل هناك 

_زين يعني بس مو هذا جان هدفي من دخولي لهذا الاختصاص 

_جا شنو هدفك

_ردت اصير ضابط حتى انتقل للنيابه العامه اشتغل بيهه 

_بالنيابه بس ليش

_حتى ابقى قريب منج ومحد يستفرد بيج ويتجاوز حدوده وياج حتى يعرفون ان ابن عمج شيال همج وياج 

_هههه لا صدك

_اي والله بس لا تخافين حاجيت جم واحد من صحباني بالنيابه وكال راح يدبرلي موافقه حتى ادخل للاختبار 

_ومنو كلك راح تشتغل وياي بنفس الدائره يجوز يودونك للمحكمه المدنيه

_لا ضمنتهه هاي الشغله مالج شغل انتي يجيج الصافي

_يعني هاي هيه مصر على هدفك يعني بالبيت مكابلني وبالشغل مامفتكه منك

_اريد اصير مثل ظلج وين ماترحين تلكيني يمج ساندج وحاميج

_كابن عمي لووو

_ككلشي ابن عم وابن خاله وصديق واخ  وحتى كزوج وحبيب اذا تردين

_لا كفيتي شرك خليك هيج وبس احسن 

_كلنه نجرب حضنه بلكي ننقبل كحبيب كزوج ك شي منا منا

_اكعد راحه حساني وعوف عنك هل سوالف لا تخليني اكرهك

_لو تكدرين تكرهيني جان كرهتيني من ٩ سنين لمن اعترفتلج اول مره

_لا تنغر ولا تحاول تتجاوز الحدود بحجه الحب ترى باقل تصرف مو حلو منك ادفنك بارضك واحسب ماتقربلي ولا عرفتك بيوم مفهووم

_هههه لا والله ابد تدرين نيتي صافيه وياج وماعول تحبيني وتقبلين بيه مو نوب اروح اسوي شي يكرهج ويخليج تنفرين مني

_اي عبالي هسه المهم انت شبيك 

_شبيه

_احسك مو على بعضك انت وجنان صاير شي بيناتكم متعاركين

_لا بس الحجي بيناتنه شاك بينهه وبين اخوج شي

_منو محمد

_لا مرتضى شسالفه شجابهه على محمد

_شنو بيناتهم مثلا

_ماعرف احس تصرفاته مو حلوه وياهه قبل فتره لزمتهم هنا بالحديقه وحدهم وحاضنهه وهي تبجي ونضراته الهه مو حلوه ومساع شفتي شلون حجه

_بس احنه مو مجرد اصدقاء وماكو صداقه بين الولد والبنيه 

_اي يعني اذا انت تحبني معناهه مرتضى لو جنان هم يحب وين المنطق بهل كلام ولنفترض ان فعلا مرتضى حب جنان او جنان حبته وين المانع بهل شي

_شلون وين المانع لعب هوه كضو اغلب وقتهم سويه وكاعدين بنفس البيت وتالي يطلعون واحد يحب الثاني والله اعلم شصاير بيناتهم جوه سكف البيت بحجه الصداقه ماترهم

_عجيب كلامك هيج انت تشك باختك وماعندك ثقه بيهه

_مو اختي انه ماثق بمرتضى خاصه بعدما عاش بره وشاف حياة الغرب احس تغير وتعود على طبيعه الحياة هناك ونسى عاداتنه وحلالنه وحرامنه

_لا غلطان وبعدين انه اخوي واعرفه حتى لو سوه تصرفات مشبوهه وتشكك الناس بي بس نيته صافيه وماله قصد ونيه عاطله ويه احد وخاصه

اختك تعرفهم شلون جانوا اصدقاء ومتعلقين واحد بالثاني من الطفوله وشي غريب اذا يتصرفون هسه مثل الغرب وكأن ماجان بينهم

صداقه وبعدين مو هاي انه وياك يعني اذا ردت تجاوز حدودك وياي هسه باسم الحب شتتوقع مني راح اتقبلهه منك واخضعلك

_لا حشاج

_جا تتصور ان جنان ممكن تتقبل وتخضع لمرتضى لو راد يتجاوز حدوده وياهه 

_لا بس

_ماكو بس مدام احنه ربينه بنفس البيت ومن نفس العائله وامهاتنه خوات وتربيتهن وحده خلاص معناه ماكو داعي تقلق وتشكك باخلاق اختك

واخوي وعوفهم على طبيعتهم ولا تخلي سالفه الحب براسهم ويضلون يفكرون بيهه ولا تحاول تقيد جنان وتخليهه ماترتاح عدنه ولو اسمع بيك

حاجي وياهه ومقيدهه او مانعهه من التصرف براحتهه ويانه صدكني لا احجي وياك بعد ولا تحجي وياي 

_تمام خلاص ماراح احجي وياهه بعد بهذا الموضوع بس انتي هم ساعديني واحجي وياهه اخاف اختي ماواعيه على هيج تصرفات من

شخص ولا تعرف شلون تردع شخص يتجاوز حدوده وياهه فانتن بنات بيناتجن كعدي وياهه ونصحيهه وعلميهه تمام

_تمام بس لا تحجي على اخوي بعد وتكول يتجاوز تراه يخاف على عرضك اكثر منك خلي هل شي بالك

_العفو ماحجي بعد عليه وانه اسف 

_العفو العفو يله هسه سد الموضوع هذا بعد وانساه وانه احجي ويه جنان بعدين

_تمام استبينه ..

انسد الموضوع واخذنه كل واحد صفنه بالجو يفكر وانه بالي بكلامه خفت على جنان يسوي وياهه شي لو يضرهه بكلمه وهيه منا شلون طاكه روحهه

من روحهه كلت لازم احاجيهه وانبهه من تصرفات مرتضى مو وين ماسحبهه راحت وراه .. اجت جنان صاحتلنه عل غده وكمنه دخلنه جوه تغدينه

ولحت احجيلهه ومنا مرتضى يباوعلنه واذانه يمنه سكتتهه كوه لحدما خلصنه غده سحبتني للغرفه ماكدرت تصبر بعد فضولهه مايسمح .. دخلنه

للغرفه وحجيتلهه الحجاه احسان ونبهتهه ماتختلط ولا تنجر وره مرتضى وين ماياخذهه

تروح بقت تصفن طول كلامي وملامح الحزن بانت على وجهه نزلت راسهه شويه تنهدت ورفعته ونزلت دموعهه على خدهه تافافت بحيره وكتلهه..

_جنانه حبيبتي اذا الج نيه تتحملين الصعوبات والمشاكل بسبيل انتظار مرتضى حتى يحبج فلازم تديرين بالج من اخوج ومن كل شخص بهل بيت

عداي انه وامج لان كلهه تنكلب ضدكم لو انكشف المستور واذا تكولين تعبت وماتحمل بعد ومامستعده تصير مشاكل وعراقيل بيناتكم

فاختصري الطريق واطوي صفحتج ويه مرتضى وابدي صفحه جديده ويه نفسج وشغلج ووكلي

جرحج وكسره خاطرج لله هوه كفيل ان يشفيهه ويجبرهه وعوفي حبج للوكت هوه يبرده ويمحي من كلبج

_اووف ياشموخ ليش بس انه هيج ليش حظي عثر ويه الشخص الاحبه ليش ربي زرع حبه بكلبي معقوله هذا كله اختبار لصبري وقوه ايماني معقوله

هيج الحب صعب واصعب الاختبارات عند الانسان تدرين كلما مرت ايام حياتي اتمنى ارجع لطفولتنه لا هم لا غم لا حزن لا تفكير لا قلق جنه الشي

انكسر كلبي من كلامهه هذا وبجيهه سحبتهه لحضني وبقت تبجي وتحجي تعاتب الدنيا والايام وحضهه وانه اهدي بيهه لحدما شبعت بجي وصار

بيهه هدوء قاتل خفت كلش عليهه لمن شفتهه ابتعدت من حضني بوجه صارم وبارد ومسحت دموعهه بقوه هزت راسهه بايجابيه ماعرف بشنو

تفكر خفت الشيطان لعب براسهه وراح تسوي بنفسهه شي خفت تروح تسويلهه سالفه ويه مرتضى لو ويه احسان وتصير مشكله بس كل

الافكار المرت وخطرت على بالي جانت بسيطه وتافهه وماتصورت ابد بخطوتهه الجايه تكون بهل قساوه ....