رواية ارهنت عمري الفصل الرابع عشر 14 بقلم نورا ناصر

- احسبيني طفل مــآ يعرُف الصَح ،

- انـهَ الخسران عُمره و بيچ يربح ♥️،

تمارا

لزمني من شعري بقبضة من حديد ، نزلت للكاع اجر روحي منه واحس شعري راح يتكطع بيده ، الم وجع وخوف ، جسمي كله يرجف ..

وانه بيد رجال غريب مامعروف شراح يسويلي 

يغتصبني ؟ وافقد شرفي !! لو يكتلني واخسر حياتي 

تمنيت اكون ميتة او اموت واخلص من العار الي راح يلتصق بيه ..

نزلت على ركبي للكاع وصرت اصرخ 

رفعني من شعري وكتم حلكي بيده وصلت ايده لخشمي وكتم انفاسي 

استمر يسحل بيه خذاني من المطبخ لحد الهول 

كلساع انصي روحي واتمسك بالكاع واثبت جسمي بركبي ع الارض واحس راح تتكسر رجليه 

وهو يرفعني بجهد من شعري ويسحل بيه ..

همس بأذني بفحيح شيطاني وخبيث ويشدد ع الاحرف كلماته تخترق مسامعي وتدب بجسمي قشعريرة...

امشيييي ولللج امششي وبلا صوت لا والله اذبحج .. 

تألمت وبين على ملامحي .. 

سمعت صوت امير ابني يبجي 

باوعت شفته واكف يم باب الغرفة ويباوع علينا بخوف 

....

تمنيته ينقذني تمنيته رجال وجبير ويكدر يدافع عندي 

بس بالاخير هو طفل حتى نفسه مايكدر يحميها... 

هو بس شاف امير وكف لحظات يتأمله ويباوع عليه

دفعني بكل قوة ع الكاع لنص الهول ظليت ازحف ابجي واناشغ واشهك اريد اوصل لابني اتمسك بي بلكي يعوفني هذا ويرحمني لخاطر هالطفل هذا 

بس هو راح سبقني اخذه بكل قسوة من ايده 

ودخله بالغرفة وسد الباب بقوة .. 

بهاي الاثناء انه وكفت على حيل واحس راسي راح ينفجر من الالم اجاني بسرعة ودفعني بالهول ع الارض 

طحت على ظهري هو اجه وصار فوكي ...

ظليت احوس جواته واضرب بي بيديه على صدره 

كلما يريد يقرب وجهه مني ادير راسي بعيد عنه بعناد اتجنبه... 

ماعرف اذا جان من سوء حظي او حسن حظي 

تنفتح الباب مالة الصالة ويدخل نبيل وانه بهذا المنظر 

بس شفته صرخت نبييييل 

وهذا كام من فوكي يريد يشرد 

باوعت لنبيل ملامحه كلها صدمه 

شمر العلاليك بالكاع واجه صوبه 

تعال ولك انت منو وشسوي ابيتي ؟ 

هو دخل يركض وطب بالمطبخ وتبعه نبيل

كمت من مكاني تبعتهم وكفت اباب المطبخ منهارة واشهك ..

شفت نبيل ينقض عليه مثل النسر الي ينقض على فريسته 

لزمه وطيحه بالكاع وانهال عليه بالضرب والبوكسيات على وجهه 

جانت اكو يم الباب طابوكه جنت مخليتها عن الباب لاينسد من افتحه ، كام الولد مد ايده وخذاها 

وضرب نبيل على راسه صار الدم ينزل على وجه الولد 

شهكت وصرت اصرخ نبييل نبيييل 

ورجليه احس انشلت 

نزلت للكاع بدون ارادة مني .. 

حسيت بنبيل داخ والدنيا ظلت تدور بي مايعرف شيسوي ، ظليت ازحف اريد اوصله

شفته رفع الطابوكة مرة ثانية .. 

مادري شنو من قوة اجتني ووكفت امنعه 

دفعني بكل قوته ولزكني بالكاع 

وضرب نبيل على راسه 

صار يضربه مرة واثنين وثلاثة لحد ما طاح نبيل 

وصارت تحت راسه بقعة دم !! 

حسيت اختنكت والهوا ينسحب من رياتي 

وماكدر حتى اتنفس ، اريد اطلع صوت اصرخ ماكو وانا اباوع لنبيل زوجي ابو ابني يموت كدامي تمنيت الموت الي مو اله 

صرت اشيل بايديه واضرب على افخاذي ووجهي اتوسل بحنجرتي تطلع صوتي 

اجاني الولد كرفص يمي و صم حلكي حيل 

وظل يهمس بانفاس متسارعة 

اششش سكتي سكتي مات مات مات لا تفضحين روحج سكتي اهدي ..

ظليت احوس وهو لازمني اضرب بي ويلزم ايديه يكبلهن ، ويثبتني عدل ...

كال بنبرة متوترة باعي باعي خل احجي وياج راح احفر حفرة بالحديقة وادفنه بيها حفرة عميقة وجبيرة وانت ياهو الي يسألج علي كليلهم مااجي ومادري بي وسوي روحج كلشي ماتدرين اتفقنه ؟؟ 

يباوع بعيوني نظرات خرعتني ظليت اهز راسي علامة على الرفض تركني بقوة ..

ظليت اتمتم الله ياخذك الله لايخليك 

راح لنبيل سحبه من رجلينه 

بكوة لان نبيل ثكيل كلش وظل يحاول يطلعه من باب المطبخ .... 

صيحت اتوسل عوفه ياكلب ياحقير عوووفه 

كمت على حيلي اجر بي وعين على نبيل اصيحله 

نبيل اكعد دخيلك لاتموت فكر بيه نبيل عفييية

ماكو نبيل بغير عالم سابح بدمه .. 

رجع دفعني مرة ثانية انضربت بالكاونتر حسيت جسمي كله يوجعني وانجرحت بظهري .. 

واباوعله يسح بنبيل والدم وراه يخط طريق على الكاشي ...

كلما اقترب منه يدفرني ويرجع يسحل بي 

ضليت ازحف وراه بقوة منهكة وارجف كلي ارجف وصوت امير بأذني جاي يبجي بالغرفة ونبيل كبال عين مدمم وبلا حركة ومنظره يكطع الكلب ...

وهذا الكلب الحقير لازمه من رجليه وطلعه من المطبخ 

ظليت اجر بنبيل من هدومه وذاك يجره من رجليه 

ويرجع يدفرني بكل قوته اطيح متوجعة الم شتات قوتي الضئيلة وارجع الحك بي واحس صوتي انبح 

لحد ماوصله لنص الحديقة اجه يمي سد حلكي

حيييل وظل يخض براسي يخليني اتألم ..

 ويباوعلي بنظرات مابيها كل رحمة 

كال تسكتين لو اروح اجيب ابنج وادفنه ويا ؟ 

هزيت راسي برفض وخر ايده ودفعني 

ظليت اناشغ واريد بس اتنفس ماكو

 احس الاوكسجين ينسحب مني مو يدخل لرياتي 

واباوعله شلون اخذ الكرك و ظل يحفر بالحديقة واباوع على نبيل شلون ممدد كبال عيني بلا حركة....

... 

ميسم ؛- ولج وردة نصي صوتج امشي اخذج منا 

جريتها ورحنه ورا البيت وكفت ؛- ولج منو كالج ع الخطوبة ؟؟ امي اكيد ؟؟ 

_ لا مو امج ليش انت يالفاهية ماتدرين الي خطبوها تصير بنت عمة مرة اخوي محمد ؟ 

_ لا شمدريني ؟ 

_ ظلي ظلي جنج صخلة وطابكة على صفحه ، ماتدري الدنيا رشت لو طشت ، دليني وينه حازم ؟ 

فريت ايدي واخذتها لحد شباك غرفة حازم 

دكيت علي الشباك وصحت حازم حازم 

فتحه وطل شاف وردة انصدم وفتح عيونه 

كال بذهول وردة شجابج هنا ؟ 

جاوبته وردة يالعريس وردة دور احجي وياك كم كلمة واولي .. 

سد الشباك بقوة وبقينه ننتظره ثواني واجه يمنه ... 

يمشي ويتعثر بس يريد يوصل الها .؟

وهيه ترمقه بنظرات كلها عتب وغضب.....

وصل يمها اهتزت شفايفه من الجانبين وتكلم بنبرة مرتجفة ها وردة ؟ مشتاقلج 

جاي يلزم ايديها نترت بي ودفعت ايده 

لا تلزمني ماجايه اترومنس وياك عندي حجاية اريد اكولها وامشي...

هيه رجعت للخلف عدة خطوات منهزمة منه 

وهو تقرب منها والحزن والحيرة تشع من عيونه وتنهش بملامحه

كالتله وخر لا تتقرب مني حازم اذا انت مالك واهس بالعشك ليش ورطتني وياك ؟ خليتني احبك وتعلقت بيك ومن اول هويه تعبت و استسلمت وراح تتزوج ؟ 

اذا انت الرجال وهيج جبروك وخلوك تخطب انه شكول الي وكفت بوجههم كلهم وانت تعرف اهلي كلش زين 

انه تخليت عن حلمي وتمسكت بيك 

اسألها لميسم شكد احب الدراسة واحلم ادخل كليه ورغم كل ضروفي والاذية طلعت معدل ٩٤ 

بس لمن ساوموني عليك وخيروني بين اتزوج غيرك وادخل كليه اختاريتك انته بكلبي وتخليت عن حلمي تاليها هيج تجازيني ؟ 

دنك راسه للكاع وهو مغمض عيوونه حيل 

اجاهه تقرب عليها خطوات وهي واكفة بمكانها 

مد ايده يريد يلزم ايدها ابتعدت عنه 

باوع عليها بعيون كلها حزن كاللها خيعوني على حبج وردة وانه محظوظ بيج والله وماابدلج بكنوز الدنيا 

لا لا ما اتزوج ولا راح اخطب اليوم... والله طالع من البيت ورايح والي يصير خلي يصير .. 

ظلت تشهك بالبجي لزم وجهه باثنين ايدي وباسها على راسها يحجي وياهه وشفافه ترجف يله رجعي للبيت لايحسون عليج انت ماكو لا يأذونج 

وانه طالع من البيت وبعد مارجع ، هاي كدامج شوفيني رايح .....

وراح يركض بالبستان باوعناله لحد مااختفى بين الزرع .. 

لطمت خدي ولج وردة هسه شراح يصير وشنو موقف ابوي راح يتفشل ويا العالم 

دفعتني ولج ميسم وانه ؟ مافكرتي بيه شلون ؟ ابوج مافكر بينه احنه اثنينه شون يزوجه لوحدة وهو باله وفكره وكلبه يم الثانية يرضاهه لنفسه هو خلوا نفسكم بمكانه ..

ولج ميسم البنية الي المفروض ياخذهه حازم راح تنظلم اكثر مني شنو ذنبهه هيه همين ؟

حركتني لاتصفنين وجاوبيني ..

_ يله روحي روحي لا اهلج يسوونج تشريبه ع الغدا والله يعين ويعاون شون راح يخلص هذا اليوم والله مادري .. 

افترينا من ورا البيت لحد الباب طلعت وانه كلبي عليها ولو هيه هسه تعودت ع الكتل وبعد ماتخاف ...بس هم انقهر يكتلونها خطية 

طبيت للبيت هوسه ومخبوص خبص 

صارت بوجهي الحجية 

ميسم وينه حازم مامبين وماهوه لغرفته ماشفتي؟ 

احتاريت شنو اجاوبها بعدين كلت خلي اكلها من هسه لابعدين اهل البنية ينتظرون ، نلغيها من هسه احسن 

_ يمه حازم راح كال بعد مارجع وماريد اخطب وانت تصرفي بعد 

لطمت وجهه يا صخام وين راح ماكالج 

_ لا والله ماكال وين رايح بس ..

ماكملت كلامي وانخبصت الحجية ووصل الحجي لابوي وظل يتحلطم كعدوا كلهم اجتمعوا 

عياش كال عمي خاف رايح بيت امه اكيد هيه الملفيته كوم حاتم وانت سعيد روحوا دوروا عليه هناك ....

باوعت اله بنظرة رفض واحرك وجهي لليمين واليسار بحركة بطيئة ، هو ظل مركز بيه بنظرات ما افهمهه 

كاموا حاتم وسعيد وراحوا لبيت امي مثل ماكال عياش يدورون على حازم ..

انه جنت واكفة بباب الديوانية الي يطلع ع الصالة الجوا وعياش واكف كبال باب الديوانية الي يطلع ع الطارمة 

اشرلي بيده عود تعاي ...

فتحت عيوني على وسعها سويت نفسي عود متفاجأة المن يريد لان استحي اروح احجي ويا والكل كاعدين

باعتبار هو خطيبي فأستحي كلش

اشرلي مرة ثانية باطراف اصابعه تعاي تعاي 

خليت ايدي على صدري عود اسأله واتأكد اذا قصده عليه او لا ودرت وجهي اتفحص خاف احد وراي 

اكدلي بحركة راسه ومقلص عيونه ....

وانه جاي امشي ببطئ باتجاهه 

من مكانه سأل ابوي الكاعد ع القنفة وملتهي يسولف وي عمامي ع الدكة الناقصة الي سواها حازم 

_ عمي هسه انت اليوم بدل ما تعقد الحازم لو عاقد النه انه وميسم والله احسلك من هالمعمعة هاي ...

جاوبه ابوي ؛- هيه الك ميسم ماراح تطير ولا راح تصير لاحد غيرك ولاتستعجل على رزقك 

جاوب ابوي وعينه عليه ؛- خير البر عاجله يا عمي الشيخ ..

حجيت انه من يمي بدون ماحرك شفافي وطابكه على اسناني ؛- ومنو كالك زواجي منك بر ..

بعده مركز عليه وجاوب ؛- بر وعلي بر واحلى بر ... 

ورفع بحواجبه وينزلهن .... 

لملمت شفايفي وحواجبي عكدتهن ابتسم كال تعاي اكلج شغلة 

طلع بالطارمة وانه بس خطوتين طلعت ووكفت ع الفجة المسدودة مالة باب الديوانية ..

كال انت تعرفين وينه حازم ؟؟ 

ارتبكت لا لا مادري لو ادري جا كلت لابوي ماضم عنه شي انه ..

كال جيد حتى من نتزوج هم ماريدج تضمين عني شي خوش ؟؟ 

رفعت تك حاجب ودرت وجهي 

لزم حنجي وداره عليه 

وخرت ايده مني 

كال انت تدرين وين حازم وجاي تجذبين اشوفج مرتبكة احجي وينه بلا مانتفاشل ويا الوادم واحنه شيوخ والنه سمعتنه عيب نشتلهم شيكولون علينه وانت تهمج سمعتنه

ركزت نظري عليه كتلك مادري لو ادري اكول 

جا شبيج مرتبكة وماتحجين من جاي اسألج 

انه شعندي غير ارتبك من اشوفك 

اي حقج كال هيج بغرور وظل يعدل بياخة دشداشته 

بلع ريك وتكلم بفخر بعدين من تزوج شويه شويه ماترتبكين بعد .. 

غرس اصبعه بالشعر الي يم كصتي ، وجر خصله قصيرة من كذلتي لزمها بيين اصابعه 

سبابته والابهام وظل يتحسسها ويمرر اصابعه عليه ومركز بعيوني 

بسرعه سحبت روحي منه وطبيت جوة .. 

يمكن مابقيت واكفه يمه بالخمس دقايق او اقل بس عبالك يوم كامل مااتحمل اوكف يمه ولا اتحمل اسمع منه ولا نظراته الي عبالك تلتهم وجهي بشراهة .. 

مرت الساعات وما اجه حازم رجعوا سعيد وحاتم بدون فايدة ، بدون مايلكون لحازم اي اثر .. 

ابوي خابر على اهل البنية واعتذر منهم كاللهم ابنه طالع ولهسه مارجع ومانعرف عنه اي شي .. 

مرت كم يوم يله اجه ابن عم ابوي وتوسط لحازم يم ابوي حتى يجي يعتذر منه ويطلب السماح على التصرف الي سواه 

قبل ابوي ورجع حازم مدنك راسه اعتذر من ابوي 

بس ابوي ما قبل اعتذاره ظل يصيح عليه 

فشلتني كدام الناس انه شيخ والناس تخليلي مية اعتبار هيج تسوي بيه ولك 

يريد يحجي ابوي سكته كاله ماريد اشوفك كبالي ولي من يمي يله ، انه غضبان عليك ليوم الدين ولا راح اسامحك واذا بعد اندكيت ببيت خالك لو سمعت عندك علاقة ابتهم لو شايفها لو داز عليها ابيت امك 

بيدي هاي ارميك واخلص منك ويلله ولي لغرفتك ....

◇◇◇◇

سيف 

وصلت شهد لأهلها ورجعت للبيت المغرب

بس خطيت اول خطوة داخل البيت صار كبالي اخويه رأفت وجهه وملامحه ماتتفسر 

كال تعال عدنا حجي وياك 

خير ان شاءالله ؟ 

مجاوبني والتفتت صوب الصالة وصاح على طيف 

تعال طيف اجه سيف خلينه نحجي ويا ..

اجه طيف باتجاهنا ورحنه كعدنه احنا ال ٣ بالاستقبال والباب مسدود .. 

رأفت ؛- سيف هالايام صاير هواي تهتم بشهد وهالشي مسبب مصدر قلق لامي وابويه كولي شنو سر اهتمامك بيها ؟ 

ظليت اباوع عليهم واحتاريت شنو اجاوب ومن شنو خايف اني بس خاف ياخذون عليه غير نظرة وهاي سنوية اخويه المرحوم خلي لا اعترف كدامهم هسه خلي يمر الوقت احسن ومبين همه مدري شونهم اليوم مبين مشحونين من امي .. 

بعد لحظة صمت جريت نفس وجاوبت ليروح بالكم لبعيد ترة هيه مالها ذنب وامي دتقسى عليها هواي ومحملتها ذنب لذلك اني دا اوكف بجانبها ..

طيف بصياح ؛- توكف وياهه وناسي امك شون حجي هذا كول احجي شعندك وياهه ؟ 

كمت على حيلي حاجيته بنبرة عصبية لاتصيح مو زعطوط كدامك ولا جاهل واعرف شسوي بس امي 

زيدتها والبنية تريد تتزوج ولتنسى ابن اخوك حسين وياهه اذا تزوجت انسوا عدكم ابن اخ 

سحبني طيف وكعدني كعدت وجريت نفس بعدم ارتياح .. 

رأفت ؛- اكعد خلي نحجي بهدوء ، وانت شعليك تتزوج ماتتزوج معليك بيها ابتعد عنها ولا تجيب الاذية لامك وابوك وتزعلهم منك ترة اثنينهم ماراضين على قربك منها وممرتاحين لهالموضوع .. 

_ شنو تحجي صدك انت خو اتزوجها اني واخلي ابن المرحوم يعيش ابيناتنا

_ اي من البداية وكول هيجي انت عينك عليها ليش تظل تلف وتدور ؟؟ 

رأفت ؛- لك انت شنو من بشر شون يهون عليك تزوج وحدة جانت متزوجة اخوك .. 

جيت اعترف واكول اني جنت احبها قبل اخويه وجانت اول حب واخر حب اليه بس مردت تطور الامور اكثر وتصير موزينة او ياخذون علينا نظرة محلوة سواء عليه اني او هيه .. 

كتلهم مثل متردون هذا هو خلص اني اسحب كلامي ومو بالي اتزوجها بس علمود حسين وعلمود امي خطية متعلقة بالطفل .... 

شكلهم قنعوا بكلامي عفتهم وطلعت .. 

مرت الايام والمشاكل بين امي وشهد بازدياد 

كلما تجي ويا حسين لبيتنا تطلع زعلانة 

وتخابرني تبجي ممرتاحة ابيت اهلها 

واظل محتار اني ماعرف شسوي وشلون اهدئها .. 

اشتريلها هداية اخذها مطعم نطلع نسولف بالتليفون 

بالساعات بدون ملل حسيت نفسي كلما الي واتعلق بيها ...

تجي ايام وهيه تلمحلي على ابن خالتها وتحجيلي عنه

طكت روحي وتعاركت وياهه عركة قوية 

ظليت اغلط عليها واسبها زعلت وتركتني ..

اسبوع اخابر متجاوبني زعلانة 

خططت اعقد عليها بدون ميعرفون اهلي واخوتي 

لان ماكدر اتحرر من قيودهم واتحداهم 

من جهة حسيتها تريد تطلع من اهلها وترتاح منهم 

لا مفر احتاجيت شهد ولازالت الحاجة تلح عليه 

كلت اعقد عليها واخلي الكل امام الامر الواقع 

رحت عليها لبيتهم واخذتها مناك هي وحسين

دخلنا بالسيارة باوعتلي معصبة مو كتلك ماروح لاهلك اني يردون يجون لبيتنا يشوفون ابن اخوهم لان اهلك مصخوها ويايه سيف

مجاوبتها شغلت السيارة وطلعنا 

كالت وين موديني هو انت تصيرلك جارة دومك تتهمني بأخلاقي ماانسى لسويته بيه قبل بس الغركان يتعلك بكشايه 

التفتت عليها ها يعني متحبيني انت مجرد تردين اطلعج من الواقع الي انت بي ؟؟ 

هزت راسها لا مو هيج اني ولا مرة توقفت عن حبك بس انت تأذيني سيف 

اغار عليج شنو اسوي لتجيبين سيرة لهذا ابن خالتج واني ما اتهور 

هسه وين ماخذني ؟ 

اصبري الصبر حلوو هسه تعرفين ...

رحنا لبيت سيد 

دخلنه وكعدنه وهيه متفاجأة ومستغربة 

تقربت مني همست باذني شكوو سيف؟؟ 

ميلت نفسي عليها وشاورتها راح نعقد عقد سيد !!

ورفعت حاجبي وهي فتحت عيونها على اوسعها !!

◇◇◇◇

..... 

ميسم .....

من اخر مرة ماشفت امي بعد بس ظليت اخابرها بالتليفون واطمئن عليها وحازم ظل حابس روحه بالغرفة حتى للشغل مايروح ...

....

الساعة ٤ ونص العصر جنت كاعدة بالهول اباوع ع التلفزيون ، طلع حاتم ووراه طلعت زينة من غرفتهم 

تتوسل بي عفية حاتم خليني اروح لبيت اهلي شبيك شجاك ماتكلي ..

اندار عليها وشسوين اموليه اهلج كلهم مسافرين ماباقي بس بيبيتج واخوج الصغير خلي يرجعون ووروحي الهم ..

اي هم يرجعون بعد يومين خليني اروح حتى من يرجعون اتلكاهم وهم اداري بيبيتي واخوي ...

بيبيتج بعدهه بحيلها ماتحتاج مداراة كعدي وسكتي هنانه وانه اوديج من يجون لاتلحين ولا تنكين اريد اطلع عندي شغل ابوي وصاني على فد شغلة 

خلاهه وطلع وهيه ظلت تاكل بروحها 

مغندبة وشحالها اجت كعدت بصفي 

مبينه تريد تتعارك دفعتني من زندي 

سكتت الها مانطيتها مجال تفرغ عصبيتها بيه 

خذت الريمونت كونترول من ايدي 

وظلت تدور بالقنوات 

باوعتلي خو ماعندج مانع 

تكلمت بنبرة احتجاج 

هزيت راسي وتمتمت لا براحتج .. 

كمت وكفت اريد اروح لغرفتي 

جرتني وكعدتني كعدي وين رايحة اذا حضرت الشياطين غابت الملائكة لووو شنووو ؟؟ 

لايمعودة اريد اروح اشوف حازم 

جلبت بهدومي كوة فلتت روحي منها 

ورحت لحازم دخلت عليه للغرفة 

جان واكف يم الشباج يدخن 

وكفت يمه 

ها حازم 

باوعلي ها ؟ 

وديتي لامي اشوفها 

ماكو ابوي خذه السويج والسيارة مدري وين وداهه باعها يمكن ...

ها زين مايصير نروح الها تكسي لو اخذ سيارة حاتم

روحي شوفي اذا سيارة حاتم بالكراج تعاي كليلي حتى اروح بيها 

مشيت وصلت لنص الغرفة كتله يا تذكرت طلع حاتم كبل شويه 

فر ايده شبيج انت متيهة الاول والتالي بلله انه احب انت شبيج 

ضحكت بوجهه انه اكره اكره عياش 

طفى الجكارة بالمنفضة وراح كعد ع السرير 

كال قابل مجبورة عليه ؟؟؟ مو كتلج خليها عليه

لا مو ابوي يزعل مني وانه ماريده يزعل بس اليوم كلش مشتاقة لامي واريدن اروح اشوفنهه 

اذا اجه حاتم كليلي اخذ سيارته ونروح نشوفه 

انت هم لا ظل حابس روحك هنا 

وين اولي ابوي كلما يشوفني يرزلني 

ميخالف فترة وينسى 

اي ينسى 

يله انه طالعة تريد شي مني ؟ 

لا سلامتج ميوسه اخذي راحتج ..

طلعت من يمه ... 

للمغرب زينه بس تحوم تريد تسويلهه مشكلة ... 

ورى العشة جانت تفتر بالهول شافتها ام فخري 

كالتلها شبيج يالمصخمة تتعاركين ويا ذبان وجهج ؟؟ 

زينة ولكت احد يتعارك وياها انفجعت بام فخري 

ضربت اثنين ايديهه ع القنفة 

اننننه مصخمة جا شمالج وياي شمسويتلج ذبان وجهي واعاركه انتي شعليج شحارك حمامج 

الحجية ؛- عيب زينة شهالحجي مرة بكد امج احترمي شويه 

_ تروح فدوة لامي ماتشوفينها هيه اول بدت بيه انه لا يمها ولا كرباها

فخرية ؛- ولج عليمن هلحجي ؟؟ طيح الله حظج بيج خير سويلج خلفه ام بطن العاكر انه لو متزوجة جان ترست بيتي جهال 

زينة ؛- هو انت صاحلج رجل حتى تعرسين وتسوين جهال وتالي تعيبين عليه ؟ شو كل الي جاي يخطبونج زايعتهم الكاع وهم مايقبلون بيج 

فخرية بصياح ؛- يالحية الصفرة المسمومة ولج شمسجلينج بالجنسية حية مو ؟؟ شجابج علينه يالحية مكانج بالزبالة والنهران .. 

تقربت ام فخري تهد على زينة وهاي على صوتها والحجية تفاكك بينهم وهم مايفيد وبدخلة حاتم شافهه عالكة راحتله زينة تتبجبج هو انجبر خذاهه ووداهه لبيت اهلها ..

جان المفروض ناخذ سيارته نروح نشوف امي بس مامقسوم بعد وانه من شفت الامور داجة حتى ماكلت لحاتم اخذني وياك اشمرني على امي ورحت لغرفتي كلبي معصور من القهر احس بمرارة جوا لساني وخنكة حيل قويه مدري شبيه 

يوم ثاني من الصبح كعدت ادك على امي ماتجاوبني مدري ليش خفت لاصاير عليها شي 

رحت لحازم كعدته من النوم 

حازم اكعد شو امي ماترد ع التليفون 

كعد منعس يفرك بعيونه شجاج ميسم يمكن نايمة 

امي ماتنام لهيج ساعة تكعد هرفي الوكت 

تعلمني بامي انه اعرفها كلش زين 

روحي جيبيلي تليفوني خل اخابرها بلله 

ناوشته تليفونه ودك على رقمها وخابرها 

وهم ماتجاوب ...

بدا الفار يلعب بعبي والله مدري شبيه على امي 

هيه ابحدها بخطر جانت بيبيتي تبات يمها وخذاهه خالي ابو راضي وظل فيض يبات يمها وهم عمامه سووله سالفة وخذوه ومن رجع هو زعل وطعله شغلة صفح شكلك يريد يسافر ويريد فلوس والله حيرة ياربي وانه هم بسبب ضغوطات عياش وابوي ظليت ماهلكد اروح يمها ولاانسى بالدوام كله يمها انه وبالعطلة مواعدة ابوي ابقى هنانه وهسه شلون 

حازم كوم روح لامي لبيتها شوفها شبيها وليش ماترد ؟ 

حازم بعده منعس كال خوش بس صبيلي جاي بينما اغسل وابدل ....

صبيتله جاي كعد يشربه اجت مرة ابوي كالتله ماتريد ريوك هز راسه برفض وباوع عليها يمه ابوي ماناوي يرجعلي السيارة ؟ 

هزت راسها بعدم درايه وطلعت من الهول 

وانه عبالك كاعدة على نار وكلبي يدك ونبضاته احسه باذني شبيها امي ماترد وليش ؟ خاف طايحة خاف متخربطة مو عوايدها ماترد التليفون كله يمها حتى لو نايمة تكعد بسرعة على صوته لان تخلي يم راسها هسه شجاهه والله ما ادري .. 

طلع حازم ومر الوقت .......... 

اطب لغرفتي واطلع وارجع اطب اخابر امي ماترد وحازم همينه مايرد ....

صار الظهر وهو مامبين اطلع واشوفهم مخبوصين 

وعمتي ام عياش يمنه ووجوهم ماتتفسر وعيونهم مدمعة وصفرا!!!!

رحت عليهم وكلبي حاس وكفت كبالهم وحدة تباوع للثانية شبيكم ليش هيج تباوعولي صاير شي ؟ 

فخرية ؛- كلولها ليش تضمون عليها مايصير هيج امها ولازم تعرف 

الحجية ؛- سكتي غير نفتهم السالفة شنو ؟؟ يله نحجي 

طحت من طولي للكاع جلبت بذيال الحجية 

ورفعت راسي ليفوك اباوعلها ودموعي اخذت طريق بالنزول وبللت وجهي وكلبي يعتصره الالم وكوة اتنفس 

يمه شبيها امي والله كلبي حاس بشي جبير عفية لاتكليلي ماتت عفية ؟؟ 

نزلت لمستواي وكعدت وتربعت خلتني بحضنها وشبكتني حيييل وظلت تبجي وياي وانه الطم واصرخ 

بس احجي يمه شبيها امي ريحي كلبي ..

باوعت بوجهي وتبجي حازم من راح شايفها بالمطبخ مددة نازفة من خاصرتها ووجهه ازرك واثار على ركبتها ووجهه 

لطمت حيييل على رجليه انهاريت وانه واصيح 

ودوني الها 

هسه اريد اشوفها يييمه لا تعوفيني والله بعدني زغيرة والله يمه ماشبعت وانه اكلج يمه 

ظلوا يبجون وياي 

اريد اكوم اروح للباب جرتني الحجية وام عياش 

كالت يمه وين ترحين تحقيق وشرطة لان بيها كتل 

منو كتلها وليش حراااام عليكم تكتلونها مامسويه شي هيه ولا مأذية احد هم الناس يعيلون بيها كوووة

للعصر وانه على هالحالة الووب وكلبي ينزف على امي ومامستوعبة الموضوع ابد اكول لا جذب عايشة وهسه واروح اشوفها كبال عيني بضحكتها وحضنتها وريحتها اشبكها وتشبكني حيل واسمع چلمة ميسم من حلكها وصوتها واطيح ومادري بروحي افقد وعيي واتمنى انام واكعد والكاه حلم بس هيهات 

المغرب اجه حاتم وانه حالتي حالة صوتي مبحوح من البجي حاتم لاف الغترة على وجهه 

اجه يمي كال امشي وياي 

كتله ها كعدت امي جذب ماميتة هاا ؟؟؟ 

جر حسرة وباسني على راسي واخذني لحضنه 

كال كومي خيتي وياي كومي يردون ياخذون اقوالج ؟ 

بالمركز 

باوعتله يعني ماتت أئيس ماعندي ام بعد ؟ الله يخليك حاتم كلي جذب 

عفت حضنه وظليت الطم وانهاريت 

لفوني بالعباية وخذوني بسيارة حاتم 

لمركز الشرطة يسألني الضابط وانه مادري شجاوبه ولا اركز بكلامه اريد امي اريد اشوفها 

طلعنا من المركز وطحت وماحسيت غير وانه بالمستشفى اكعد واتذكر تهديدات عياش لامي ترن باذني واتندم ليش ماحجيتها للشرطة وارجع افقد الوعي واروح بغير عالم تمنيت اتبع امي بعالمها الي هيه بي وانجمع وياها 

كعدت والكاهم ملتمين عليه شفت ابوي وحازم وحاتم والحجية كلهم يمي 

ظليت ابجي وحازم يبجي يمي ويناشغ وحتى ابوي الحيد دموعه طاحت 

ظلوا يهدون بيه وانه اوون وانوح 

كضيت حازم من هدومه هاا حازم وين امي ؟ دفنتها لو بعدها 

دنك راسه وظل ينحب

منو هيج سوا بيها ؟ 

محد يجاوب

تدنى يمي ابوي وخر حازم من يمي راح حازم ليغاد وبعدني اسمعه ينحب 

كال بنيتي اكو ايه بالقرأن بسورة البقرة تكول ((واذا قتلتم نفسا فادارءتم فيها فالله مخرج ما كنتم تكتمون ))

وين يروح الله يكشفه لو بعد مادري شكد 

حاتم كال هو علمود فلوس وذهب لان مبيوكات فلوس امج وذهبها من البيت حسب تحقيق الشرطة 

انه ماريد الكاتل اريد امي ، خليت ايديه على راسي

بعد لحظة رفعت راسي حاجيت ابوي ودموع تصب 

خشمي مسدود ويعيق مخارج الفاضي 

بويه ترا عياش لا مرة ولا مرتين يهدد بامي خاف هو كتلها ؟؟ 

حاتم شنو هالحجي هذا ميسم جاي تعرفين شجاي تحجين انت ؟؟ 

ابوي لا يبنيتي عياش مايسويها مايكتل مرة حتى لو يكرهها وعنده وياها مشاكل 

حازم بويه والله اذا عياش اله ايد بهاي السوايه بالقران محد يشفعله والله اذبحه بيدي والله 

حاتم حازم اسكت هذا ابن عمك شهلحجي شنو هالظن هذا بي ؟؟ 

ابوي حازم لاتحجي بدون دليل الزلمة ماعليه دليل لا تحجيها اسكت .... 

◇◇●◇◇

جان ثالث يوم الفاتحة من طلعت من المستشفى 

امي مغسلينها ودافنينها سودة عليه 

ودوني لبيت خالي فائق مكان الفاتحة 

ورا ما خلصت الملاية كعدت بالهول وحيلي كله بايد 

اباوع للناس تباوعلي بشفقة وحزن 

والفقد الوجع ع فراك امي ينهش بروحي 

واحس روحها تحوم حواليه

واكول لا ماميتة يمكن كاعدة برا يم النسوان 

ولهناك واستوعب واطك من البجي وافقد ويلتمون عليه الي يبجي وياي والي يواسيني 

لحد ما اهدأ وترجع تجيني نوبة بكاء وصريخ عارمة 

ماعرف شسوي بروحي الطم اصرخ اخرمش روحي

واعرف هذا كله مايفيد ولا يرجعها بس بلا وعي اسوي هيج 

وانه كاعدة وكبالي مرة خالي ابو راضي تحجي للناس عن حالة خالي 

تكللهم تعبان وايده تعوره ويرادله عمليه ومن سمع بالخبر فقد كلش ..

كاعدة وتسولف ...

افتقدت وردة ماكو !!! وينها ماشفتها رغم طلعت من الصبح انه وجيت هنا

شفت سجى اختها يم امها اشرتلها تجي 

كتلها وين وردة ماجاي اشوفها ؟ 

كالت ها والله وردة مريضة 

شبيها مريضة ؟؟ 

يا بس سمعت بعمتي والصارلهه تخربطت علينه وابوي جابلهه مضمد للبيت شكللهه مغذي لا اكل ولا شرب فد نوب بس تبجي وتخرب ماتدري بروحها ؟ 

بعد عمري عمرها خليت ايدي على حلكي وشهكت اي هيه جانت تحب امي وامي هم تحبها وكله يمها جانت سودة عليه شهالمصيبة ياربي الله ينتقم من الي كان السبب .. 

كاعدة بالصالة قبل المغرب اجت الحجية وعمتي ام عياش وخواتي وعماتي وبنات عمي سلمن عليه

كتلت للحجية يمه انه باقية هنا للخميس 

كالت براحتج وديري بالج على نفسج واي شي تردينه خابريني .. 

وراحن .. 

اجت بت خالي صاحتلي كالت تعاي هذا فيض اخوج يريدج 

كمت على حيلي اجر بروحي جر واسحل بعباتي 

رحت للديوانية جان بس فيض بيها 

تلكاني ظل يبجي حضني ظلينه نبجي اثنينه 

باوعتله انته وين جنت كل هاي الفترة مختفي امي طك كلبها عليك وهيه تخابر عليك وماتحصلك وعمامك كل يومية جايين هدادة 

ميسم انه جنت بالكوت يم ولد صديقي 

وهسه شرجعك وشون عرفت امي ماتت منو كلك ؟ 

محد كلي جيت ولكيت الخبر كدامي 

ليش جيت وشعجب ؟ 

انباكت فلوسي ورجعت 

فلوسك ؟؟ وعليت نبرة صوتي ، انت منيلك فلوس مو كبل لاتروح سويت عركة ويه امي علمود فلوس ؟ 

كام على حيله انت لشنو تلمحين ميسم احجي احجي 

مادري كول هذا الحجي لحازم من تشوووفه !!!! 

◇◇●●◇◇

عياش ... 

كاعد بالهول المغرب جان ثالث يوم فاتحة صباح 

ويمي بنات اخوي يلعبن 

اجت امي من الفاتحة 

كعدت ع القنفة بصفي 

كتلها شلونها ميسم 

جاوبتني حالتها حالة مسكينة بجاهه يفتت الصخر وحالتها تصعب ع الكافر سودة عليه 

جريت حسرة ، اجت عفاف تريد تاخذ عباية امي وجواريبها 

امي ماخلتها وكضت ايدها بتوسل حجت وياهه

لا يمه عيفيهن انه هسه اغسلهن 

جاوبتها عفاف لا عمة انه هسه اغسلهن واشرهن ع الحبل شنهنه مابيها شي 

_ مالج غرض انت شوفي بنياتج خاف يردن شي شياتين وانه خما مكرمة هسه اموصهن واذبهن ع الحبل 

ماقبلت عفاف خذتهن وراحت صوب الحمام 

التفتت الي امي كالت يمه جا ليش طارد سعيد من البيت وماتخلي يجي جا شمسوي هو ؟ 

حجيت بنبرة حدية خلي يولي والله اذا لفى للبيت اكص رجله وعلي 

اجت عفاف خير خويه ابو مهند جا ليش طارد سعيد شمسوي واحنه وين نروح صح انت بنيت البيت والك حك بي بس والله وانت تدري بالحال سعيد راتبه مو هلكد ومايكدر يفتح بيت ثاني لخاطر هالبنيات 

تحسرت انت الج الصافي ومكانج هنا ع العين وع الراس لاتشيلين هم خويه وبنات اخوي بعيوني ماعاش الي يطلعهن منا بس انه اريده يتأدب وبعدين اشوف شغلي ويا شلوون 

امي كالت خير شمسوي اخوك احجي علمني شمسوي ؟؟؟ 

سكتت وهزيت راسي وانه اسمع صوت الباب تندك بقوووة وصوت صياح ازلمة 

طلعت بسرعة وكدرت اميز الصوت 

هذا صوت عمي 

ركضت فتحت الباب وطب عمي الشيخ عزام وطبك الباب حييل كلش حيل وعيونه حمرة و كلها غضب 

خيرك عمي شصاير 

صاح بيه ولك عياش كلي شسوي يم بيت صباح بالليلة الي انكتلت بيها احجي وكول ولك ؟؟؟ 

دنكت ماعندي جواب ؟ 

ولك انه مو كتلك لا تعبر ذيج المنطقة شعندك هناك احجي وكول وشمعنى بذيج الليلة بالتحديد ؟؟؟ 

بعده جاي يحجي ويهد طب وراه حازم بيده بندقية 

وصاح بعلو الصوووت ولك عياش الك ايد بكتل امي احجي اذا زلمة احجي وكول ؟؟