رواية فصلية بديلة ( شموخ ) الجزء الثاني الفصل الخامس عشر 15 بقلم ام ملكوت

_في مكان اخر_

:-مرت الايام وصافيلي بس اسبوعين وانزل للبصره انه واهلي وكالعاده كملت تحقيق وصعدت المكتبي اخذت صور المجرم والحراس وبيته

وكبستهم على اللوحه الخشبيه المليانه صور وتخطيطات ابتعدت عنهه وبقيت اوصل بين الصور

والمواقع والجرائم لحدما فهمت وين مفتاح قضيه الاغتصاب هاي رفعت السماعه اتصلت على سالم واجه دخل دك تحيه وكال...

_نعم سيدي

_اكو فايل اجوبه وافاده لابن المتهم ^^^^ تخص قضيه الاغتصاب الجماعي والقتل وينهه مفقوده من الملف

_سيدي ماعرف المحققه سرى قدمتلنه كلشي يخص القضيه هاي فيجوز ناسيه او مامنتبهه عل ورقه او منبوذه اذا جان الطفل تحت السن القانوني

_اعرفهه منبوذه لان الطفل عمره بس ١٠ سنوات بس مايصير تطلعهه من الملف بدون علمي وانه الاقرر اذا جنت احتاجهه او لا وهسه اريدهه ضروري حتى افهم القضيه واربط خصائصهه فروح جيبهه منهه بسرعه

_حاضر سيدي..

دك تحيه وسديت المكالمه ورجعت عيني عل لوحه اخذت قلم ماجك وخطيت دائره على صوره ابن المتهم هذا ولو وصلت كل القضيه بي راح يصير

المفتاح عنده لان هوه الوحيد الجان شاهد بهذاك الوقت واراهن لو ابوه داري بي شاف كلشي سواه جان قتله بدون مايرفله جفن بس الله حماه واله

حكمه من بقاء الطفل ساكت لحدما انمسك ابوه .. دك الباب سالم ودخل بيده فايل صغير انطانياه ودخلت المحققه وراه باوعتلهه باستغراب وكالت بعدما دكت تحيه..

_سيدي كال الضابط سالم انك محتاج افاده الطفل

_اي اريد اشتغل عليهه 

_بس ماتفيدك سيدي لان ماياخذون بيهه بالمحكمه 

_وانه ماكلت راح اقدمهه بالمحكمه

_لعد شنو تسوي بيهه سيدي

_عندي شغله بيهه ليش عندج مانع 

_لا ابد بس ردت اتعلم منك شلون تستفاد من الاشياء البلا فايده

_اسويلهه اعاده تدوير ..

حجيت الكلمه عادي ودرت ضهري هي فتحت عيونهه مفهيه وسالم حبس ضحكته توجهت للوحه علكت الورقه عليهه وحجيت بدون ماباوعلهه..

_شي ثاني ست سرى

_بس سيدي شمدريك اذا عدهه علاقه بي او لا

_ليش بالنسبه الك طبيعي تصرفهه قبل شوي واصرارهه هل شكل 

_لا سيدي

_لعد هاي هيه احتمال اكو سببين وره تصرفهه هيج يا اما تشتغل عند المتهم هذا يا اما عدهه علاقه بي وبابنه يعني بالحالتين اشك بيهه تعرفهم

_وشنسوي اذا طلع واحد من هل اسباب صحيح

_اسحب ايدي اخلي العميد هو يحقق وياهه لان اذا عدهه علاقه بيهم من اي ناحيه احتمال تاخذ اوراق القضيه وتخفي الادله مثلما خفت افاده الطفل هسه

_وياك حق سيدي ويكون افضل لو سلمت كلشي للعميد من بدايه حتى لا تصير مشاكل وعداوه بينكم هل شي يولد عداوه بجهاز الامن الوطني

_هوه هيج انه افكر اسحب ايدي منهه اذا طلعت شكوكي بمحلهه المهم هسه عوفني خلي اشتغل وامخمخهه براحتي وبعد ساعه هيج اتصلي عل مطعم خلي يجيبولنه الغده المعتاد

_حاضر سيدي..

رجعت باوعت للوحه وبديت اربط كلشي بكلام الطفل وايقنت ان كلامه صحيح ومابي جذب او توهم مثلما يزعمون المحاميين ان اغلب افادات

الاطفال تجي من وحي خيالهم او جذبهم بس شبيدي راح احاول احجي ويه العميد واقنعه ياخذ بافاده الطفل لان هي المفتاح الراح يوصلنه

للحقيقه واذا ماقبل اعرف شلون اطلع الحقيقه من هل مجرم واخلي يسطر الحقيقه بترتيب بالملف وعلي ماخلي عظم صاحي بي منا ليعترف ويا انه

يا هوه صار شهرين محد طايح بعلته وكادر عليه وهسه حضه النحس خله قضيته تطيح بيدي خل يقره على روحه السلام بعد عباله رجيج

انه مثل البقيه واستحرم اكسره واطلع اعترافه من لسانه الا العب بيهم طنب .. اخذت اماكن اختباءه هوه وجلابه وانطيت تبليغ للفريق لبسنه الزي

العسكري للمهمات الخاصه خفينه اسلحتنه وطلعنه بسياراتنه ندور عليهم بالاماكن اليتواجدون بيهن دائما ما لكيناهم ولا بمكان لفينه سياراتنه

ورحنه لبيته اليشوف البيت يكول قصر وعايش بي ملك ماجن جمال البيت كله يطلع صاحبه جلب

_دادو ابنهم

_ذياب قصدج

_اي 

_سويلي مجال اريد ادخل احجي وياه

_بس مينو انتاا

_انه مينو انه محقق وهاي شارتي..

خليت الشاره كبال وجهه شافتهه وهزت راسهه ب اي ابتعدت عن الباب ودخلت لداخل البيت اخذتنه للصاله كعدت واشرت لسالم يلف بالبيت ويشوف

خاف اكو شي يلفت الانتباه مثل كاميرا تسجيل صوت سرداب مخفي منا منا المهم بقه يدور واجت العامله وهي لازمه بالولد لان خايف ومجلب بذيالهه

كمت على حيلي رحت يمه وهو يضم روحه بملابسهه كرفصت وكعدت كباله وسحبته من ايده رفعت ايدي امسح دموعه وفز خله ايده على وجهه

مثل الخايف من الضربه باوعت للعامله وهي تباوعله بتوتر وتبلع ريجهه بصعوبه هزيت راسي بايجابيه وتقربت للولد همست بصوت ناصي ولطيف..

_تحب الطوبه

_اي 

_يافريق تحب وتشجع 

_برشلونه

_لاا لعد انه احب ريال عندك بليستيشن

_جان عندي واحد وبابا كسره

_تريد اشتريلك واحد 

_هاا

_راح اجيبلك واحد الحلالك بس كون نلعب انه وياك وحدنه انت برشلونه وانه ريال شتكول

_اي 

_تمام ساالم 

_نعم سيدي

_تلكه فلوس جوه كشن السياره اخذ منهم وروح لاقرب محل اجهزه الكترونيه جيبلي احدث بلي وتعال الك ساعه وحده

_تريد اطردهه منا

_لا بابا يكتلني

_لا اخليهه تروح لغير غرفه حتى نكعد براحتنه

_اي 

_تمام..

بدأ يستجوب وياي شويه وخاصه لمن اجت العامله وكتلهه تروح منا لان اسالتنه سريه ادريهه ضلت تتصنت علينه من وره الباب بس اهم شي

مامكابلتنه وتحاول تمنع ذياب من ان يحجي.. كلت اسمه المألوف ورحت بذاكرتي لقبل اسبوع لمن رديت على اتصال من رقم خاص وطلعت بنيه تستنجد بينه ...

بعدما طلعنه من الدائره بسياراتنه طلعلي موقعهم من خلال رقم السياره باللابتوب وكدرنه نلحكهم ونطاردهم وين مايرحون ولما صرنه قريبين منهم

لفوا السياره عل سايد الثاني وعبر بغير شارع ضربت السكان بغضب ولفيت سيارتي عكس اتجاه السايد وشخطهه ورحت ملاحكهم من شارع لشارع

مناا لدخلنه ثنينه بنفس السايد صارت السياره كبالي وماشوف الا انشمر شخص منهه عل رصيف.. قربت واشوفهه بنيه شابه انصدمت ولزمت بريك

كبالهه واشوفهه مدمايه لفيت راسي شفت سياره سالم اجت وراي ورفعت اللاسلكي امرتهم ينقذون البنيه ويودوهه للمستشفى ودست بانزين لحكت

السياره الشمرتهه وكذلك مطارده استمرت ساعتين واحنه من شارع لشارع منا لطلعنه على محافظه ميسان رن منبه البانزين بسيارتي وبقيت اسوق

بجنون حتى الزمهم قبلما يخلص بانزيني وصلت قريب منهم ووكفت سيارتهم ببطئ مبنجر التاير

مالتهه ابتسمت باستهزاء وكلت ربي جابكم يمي عكست كبالهم سحبت اقسام الرشاشه ونزلت وجهتهه عليهم وكتلهم..

_اديكم وره راسهم وتنزلون اي حركه زايده اشخلكم فاهمين ادبسززيه..

رفعوا اديهم وره روسهم ونزلوا بتردد سحب واحد منهم بندقيه من الكشن ورفعهه بوجهي نزلت الرشاشه بسرعه على رجله وصوبته بيهه عاط

وطاح السلاح من ايده مديت رجلي سحبتهه وانه موجه عليهم السلاح شفت سياره من سيارات الفريق جايه باتجاهي واشرتلهم يمشون كدامي بقوا

رافعين ايدهم ويمشون كبالي حسيت بحركه من وراي التفتت بسرعه وشفت وواحد طلع راسه من جامه السياره وبيده خشبه مال كرك ..ضربني

براسي ولو ماشافني رفعت سلاحي وتخربط جان ضربني بكل قوته وفلش راسي لزمت راسي النبع دم ورفعت الرشاشه ضربته طلقتين باديه من

وراهن راح ينكصن حتى تضل ذكرى مني .. نزلوا عناصر الفريق سحلوا ذوليج وانه صعدت لزمت الكل* هذا من ياخه قميصه وسحيته بالكاع وهو

يبجي مثل النسوان على ايده .. وصلته للسياره مالتنه واجوا اخذوه مني رفعت ايدي لازم راسي دايخ والدنيا افترت بيه غمضت عيوني ورجعت

فتحتهن وهنه مغوشات اجه واحد من الضباط سندني و دخلني للسياره وصعدوا كلهم البقيه امرتهم يرحون للدائره كبل ماريد اروح للمستشفى

ويشردون من ايدي عاد لفيت وجهي باللثام مالتي و مسافه الطريق وصلنه للدائره ذبيناهم بالحجز

وودوني للمستشفى اتصلت بسالم وكلي على اسم المستشفى البيهه البنيه ورحتلهه اول مادخلت شفته من بعيد اجالي يركض لزم راسي وكال..

_ انشاءلله وانه لزمتهم هذول الانجاس اذا ماطلعت حقهه مربع منهم مايطلع اسمي الراهب

_كفوو منك سيدي بس اصابتك مبينه خطيره تعال وياي

_وين 

_للطوارئ يشوفون جرحك مايصير تضل هيج نازف هواي انت وخاف ماثره على الجمجمه

_هسه اروح بس خلي ارتاح 

_هناك ترتاح سيدي دخيلك امشي..

تافافت ورحت وياه للطوارئ خيطوا جرحي ٦ خياطات اكول نبعت دم ومن كثرما الضربه قويه وراسي خدر منهه ظنيتهه اصابه طفيفه لو بس

زلغ.. ضمدوهه الي و اخذولي اشعه فتره وطلعت النتيجه مالتهه والحمدلله ماكو اصابات بالدماغ فقط فطر صغير بالجمجمه نازل عل جبين وكال

عادي مابيهه شي بس راح يلازمني صداع لحدما يلتم الفطر وحذرني من تكرار الاصابه بنفس المكان او قريب منه لان احتمال يصير الفطر كسر واصير

مكسر الراس اويلي وشلون ينجى مني الا اخلي لا ادين ولا رجلين.. اخذت ورقه العلاج انطيتهه لسالم يجيبهن من الصيدليه ورحت انه يم غرفه العنايه

المركزه كعدت على كراسي الانتظار ورجعت راسي عل حايط غمضت عيوني بالم ونطقت اسمهه جريت حسره وهمست..

"كثيرا ما يلهج لساني هامسا باسم من تشتاق اليه الروح وتسهر ، باسم من ترفرف على طاري اسمه اجنحه قلبي ،باسم من تمنيت لو انها الان بجانبي وتنظر لحالي ، من تمنيتها لو تمسد على جرحي 

وتمحي الامي ، بقبله حنونه وكلمه عطوفه ، تحضني وتمسد على ضهري ، اوووف اووف اتمنى اضيع والتقي باحضانهه ، سنين مو لحضات انه أتمناها ،

عشكج مرمر كلبي يا زهره افادي خليتيني اخبط الفصحى ويه العاميه وسويت العرب عربين شراح يسوي بيه هل حب بعد وشضاملي من تعب مادري شجم دوب اكضي العمر بعيد لا انه لايذ بيج ولا ناسي طيفج ..

تنهدت بحيره وكمت لغرفه الطوارئ وبقبت بالمستشفى منا لثاني يوم نايم بغرفه الطوارئ لان ماكدرت اتحمل الكعده وراسي ماخذله صفحه علي

عاد خليت على بابهه حمايه ويسالون كل شخص يدخل عليهه ان جان الدكتور او الممرض ويشوفون شينطونهه وشنو ماينطونهه هم لحدما مر ثالث يوم

وكعدت البنيه بس داخله بحاله صدمه بس تباوع لا تحجي ولا ترمش هواي ..كال الدكتور طبيعي هل شي لان الشافته هوه الموت بحاله لعد ابصر شنو

الشافته صدك منهم من خوف ورعب حتى بقت مصدومه هيج .. بقت لليل وكتبتلهه خروجيه بس احتاريت وين اوديهه ماجان بيدي غير ان اخذهه

لبيت اهلي يم امي وعبير وهناك استلمني التحقيق على اصوله امي وخواتي لحدما خصمتهه وكتلهن حبيبتي وخطفتهه من اهلهه ادري بيهن ماصدكني يدرن ماعدي هيج سوالف واكثر وحده هي امي لو حاسه الحجيته صدك جان ضلت تلطم وثاني يوم رجعت البنيه لاهلهه لان ماتحب المشاكل ولا سوالف العشاير ..

المهم سكتن ماسالني بس اسراء عرفتهه وعرفن السالفه سريه وتخص شغلي.. وصيتهن يديرن بالهن عليهه لان كلش حالتهه مزريه وجسد بلا روح ضاله فقط

صافنه وحتى اكل ماتاكل الا شخص يخلي بحلكهه وصرت بهل فتره امشي بقضيتهه وماعرفت عنهه شي بس الحجوه اهلهه واعرفه اغلب كلامهم جذب

لان محد يتهم بنته بشرفهه وعرضه بس اذا جان يريد يطلع وينعم بالحريه براسي ولحد ما مر شهر و انه احقق وياهم اعرف طولت هل قضيه وهذا الشي

احسن الي شما رفضوا يعترفون اخليهم براحتهم فقط يوميه لازملي ايد واحد وكاسرهه لان تحلفت بيهم مادخلهم السجن الا وهمه مكسرين وكلمن

ماخذله ذكرى مني على السواه بعرضه وبعدها بكم يوم اعترفوا بكلشي سووه وجان السبب بس لانهه ماقبلت تزوج ابن عمهه خوش سالفه جديده نوب

موديل جديد الترفض ابن عمهه تنذبح اويلي يالله.. عاد لزمتهم وحولتهم للمحكمه وحتى خليتهم يعترفون ويكولون انهم ماندمانين ولو تكررت هل

سالفه هم نذبح بناتنه الماتاخذ شورنه سويت العرب عربين يعني وراح ينوخذون كلهم مؤبد لو اعدام ...

فزيت من صفنتي من القضيه لمن دخل سالم وجايب بيده البلي اخذته وكلت للولد يوديني لغرفته هو ماتردد بس شاف البلي عرفني ماجذب

عليه ولا الي نيه عاطله وياه بسرعه لزم ايدي ورحت وراه لغرفته دخلت واشرت لسالم هوه والضابط الثاني يلزمون الباب مراقبه ماريد احد

يسمع الكلام الراح يدور بيناتنه.. كعدت وياه وهوه شكل البلي بالشاشه وخله القرص واجه كعد يمي وهو متحمس بدت اللعبه وبين فوزه وخسارتي

كباله كدرت اسحب كم كلمه منه عن وضعه بالبيت وتعامل اهله وياه والعرفته ان امه ميته يعني المغدوره النقتلت هيه موو امه والفتهمته ان ابوه

جان يعذبه ويجي بليل شارب ويضرب مرته الجديده ويحبسهه بالغرفه وعلى اقل شي يضربهه وهي تبقى عنده لان ماعدهه احد او بالاحرى محد

يريدهه لان مامكتوب او مذكور بملف القضيه انهه مرته او خطيبته وخاصه انهه جابوهه مغتصبه ومقتوله وحسب كلام الولد انها صار كم سنه تعيش

وياهم فشلون مرته وشلون لحد الان مالامسهه واخر شي اغتصبهه وقتلهه .. عرفت السالفه بالتفصيل يم المجرم وابنه هواي ساعدني وعرفت

ملف القضيه ملعوب بي ومو صافي جابولياه ..فخطر ببالي المحققه سرى وكلت لازم اخذ افادتهه واشوف النقص الخافيته شنو بمساعده

العميد والجهات الخاصه طبعا .. كمت افتريت بالغرفه وشفت كاميرا خفيه بالساعه المحطوطه بالحايط عكدت حواجبي باستغراب واجيت اخذتهه

وسحبت الكارت منهه بسرعه حتى اذا اكو شخص وراهه يراقب مايلحك يمسح بياناتهه .. خليته بكفر النقال وطلعت كلت لسالم يبلغ الفريق يفتش البيت

شبر شبر ويطلعولي شكو كاميرا بالبيت وفعلا توزعوا والولد باقي يلعب بلي يباوع علينه واحنه

نفتش ببرود ويدير وجهه عل شاشه تفاجات واستغربت من رده فعله اجيت كعدت بصفه وسالته..

_ تعرف هذولي الشباب شكاعد يسوون بالبيت

_يفتشونه

_وما تخاف او تمانع

_شلي غرض همه دائما يجون يسوون هيج

_منو همه

_ناس لابسين اسود مثلكم بس اشرار جانوا يضربوني كدام بابا ومايحجي وياهم حتى مره جا....

كطع الكلمه وخله ايده على حلكه بصدمه ورجع باوع للتلفزيون عكدت حواجبي باستغراب وسالته ..

_كمل شنو ردت تكول بخصوص المره 

_وحده هم شريره جانت وياهم تحضني من تجي بس انه اكرهه لان تضرب خاله

_خاله الماتت

_اي 

_انت تحبهه هاي الخاله

_اي جانت تنومني بحضنهه بليل من اخاف وماتخلي بابا يضربني

_زين تعرف ان واحد قتلهه 

صفن بوجهي ونزل راسه ماجاوبني رجعت كملت وكتله..

_تدري هيه هسه كاعد تبجي لان قتلوهه

_وينهه هيه 

_تجي بس باحلامي وتكلي خلي القتلني بالسجن

_صدك هيه هيج تكول

_اي وكالت هم ان ذياب حبيبي يعرف كلشي هوه يحجيلكم ماتشوف اجينالك حتى تحجيلي الصار وياهه وادخل القتلهه للسجن حتى تبطل خاله بجي

_هاا

_انت بكيفك اذا تريد خاله تضل تبجي فلا تحجي شي واذا تريدهه ماتبجي وتضل تضحك وتصير تجيك باحلامك لازم تحجيلي كلشي صار وياهه وتذكرته..

بقه صافن بالفراغ يفكر بكلامي وانه منتظر منه جواب نزل راسه برفض وكتله وانه اكوم الف بالبلي..

_يله ميخالف مدامك ماراح تحجي خلي اخذ البلي وياي واروح اكول لخاله ان ذياب مايحبج مايريدج تضحكين 

_بس البلي

_خاف اخلي هنا ويجي القتل خاله يبوكك انت وياه

_يبوكني 

_اي ليش ماكلولك ان هوه كاعد يدور عليك لان شفته

_بس انه كتلهم ماحجي شي وبس لواحد حباب حجيت كلشي صار وهاي الخدامه اي هيه كالتلهم هيه الشريره دلتهم على مكاني وهيه تضل تكتل

بيه كلساع وتكلي لا تحجي وانه اسكت واضل ابجي عمو اخذني منا عمو اخذني وياك لا تخليهم

يقتلوني مثل خاله لا تخليهم ينزعوني ويضربون راسي بالجاكوج لا تخليهم يسحبوني من رجلي وينامون علي مثلهه..

شفته تهستر وبقه فاتح عيونه ويباوعلي بخوف ويحجي الصار بهذيج الليله ويبجي وجسمه مثل السعفه يرجف دنكت عليه حضنتهه وبقيت امسد

على ضهره واهدي بي واطمنه منا لمرت فتره ياله سكت اجو سالم والوياه واشرتهم يرحون طلعوا

وسدوا الباب بعدته عن حضني ومسحت دموعه وهو يباوعلي بذبول رفع ايده مسح دمعته الطاحت وكال..

_عمو احجيلك بس اخذني منا اخاف اضل هنا ويه الشريره وتنطيني للقتل خاله عفيه عمو 

_اخذك والله بس اهده وهسه قبلما تحجيلي راح اكوم اجهزلك ملابسك ونروح منا اتفقنا

_اي عمو بس بسرعه قبل لا تجي المره

_يا مره 

_الشريره التحبني كليوم تجي العصر هيه

_ومتاكد هسه راح تجي

_اي

_زين انه اريد اشوفهه بدون ماتدري شلون

_ليش عمو

_بس مو تكلهه احنه هنا 

_اي ماكلهه..

فركت شعره وابتسمتله طلعت حجيت ويه الفريق وامرتهم ينسحبون ويحاوطون البيت طلعت وياهم بعدما فتحت شباج غرفه ذياب وشمرت حبل منهه

للحديقه الورانيه .. ركبنه سياراتنه مزيفين رحيلنه وصلت لراس الفرع ولفينه السياره راجعين وكفنه وره البيت وطفرنه من سياج الحديقه باوعت ليفوك

وشفت ذياب يباوعلي منتظرني لزمت الحبل وصعدت بعدما انطيت خطه للعناصر دخلت من الشباج وسديته شفت الباب يندك حيل رحت

دخلت بالكنتور جان شوي جبير يمشي حالي كرفصت مثل وضعيه الجنين وبقيت اتسمع وفاتح شوي من الباب حتى اشوف شيسوون بي .. راح

فتح الباب ودخلت العامله انطته صحن اكل وعاطت بي لان قفل الباب ضربته على راسه وطلعت ..بقه هوه كاعد عل ميز وياكل بكسره

خاطر شديت قبضه ايدي وتحلفت بيهه هل عامله الا اسحلهه للسجن كم يوم اخليهه تتربه بيهن زين .. مرت تقريب ربع ساعه وهي ماكو وانه احس

اطرافي تشنجت فتحت الباب شويه واشرت لذياب يقفل الباب راح قفله وطلعت مديت جسمي بالم وباوعت جوه الجربايه شفت اكو مجال بيهه

لان عاليه تمددت جواهه ولميت رجلي لصدري رجع فتح قفل الباب وبقيت انتظر لحدما مر الوقت ياله شرفت سمعتهه دخلت وبقت كاعده تستجوبه

خو ماحجه شي النه من اجينه عرفتهه هيه يلي وره الكاميرا الجانت المخفيه طلعت عيوني من الجربايه لان صوتهه مالوف واشوفهه فعلا المحققه

سرى سجلت كلامهه وياه كله وتقريبا حجت نص الصاير بهذيج الليله وشلون تخوف بي حتى لا يحجي ضميت التسجيل بجيبي بعدما طلعت

وقفلت الباب.. وطلعت انه من جوه الجربايه والولد شفته وجهه اصفر من الخوف من كلامهه وتهديدهه

اله باوعلي بتوسل وهوه شاد قبضه اديه بخوف تنهدت بحيره وغمضتله عيوني اطمنه ماجان عندي طريقه غير ان .....

.

.

:- بعد ايام قليله على اختبار النيابه وانه هاي حالتي صار شهر مكابله الكتب واليوتيوب وكاعده ابحث وادرس مابقيت شي يخص هل امتحان مادرسته

واهلي حيل ساعدوني من ناحيه ريان والتعليم.. مرتضى بقه مكابلني نهاركله ويدرسني المواد يلي امتحن بيهن هوه بالخارج لان نفس الاختبار تقريبا

فصار بالنهار هوه يدرسني وبليل انه اسهر ادرس الواجبات النطاهن الي وجنان ماعرفت شصار وشسوت ويه مرتضى لان التهيت عنهم وحبست

روحي بالغرفه زين اذا شفت ريانه بالليل من انومهه .. واخيرا كملت دراسه واخذني بابا بسيارته هوه ومرتضى سجلت للامتحان ودخلت للقاعه

جنت فايته بطريق مجهول او خلينه نكول اختبار ماعرف شنو مواده بس الحمدلله رغم صعوبته الا اني بفضل رب العالمين ودعوات اهلي وتشجيعهم

كدرت اتجاوز كل هل الاختبارات بكل مابيه من معرفه وجاوبت الكدرت عليه واخيرا مر الاسبوع الثاني واجه اليوم المنتظر لمن دزولنه بريد من

النيابه تنص على نجاحي وقبولي بالمديريه العامه جانت فرحتي ماتوسع الدنيا مثل فرحه المشه بصحراء سنين عطشان وجوعان ويلكه بنهايه

الطريق جنه وكلشي تشتهي روحه بيهه هيج اكدر اوصف فرحتي بيومهه على ثمار تعبي كل هل سنين.. وعدني محمد هوه وبابا ان ياخذني للسوك

ويشتريلي ملابس جديده تليق بشغلي على حسابهم كهديه الي عاد ماكلت لا خليني اتدلل عليهم شوي .. فبعدهه بكم يوم اخذت جنان ورحنه

انه ومحمد ومرتضى للسوك لان بابا مابي حيل يفتر ويانه بس انطاني فلوس اذا احتاجيت بعد اخذ منهن .. 

علاقتي بالسوك مو قويه وحتى لمن تزوجت جهاز عرسي طلبته من البيجات بالانستا والفيس فاول مارحنه لسوك البنات بالعشار لان سمعت بي ملابس

حلوه وفعلا بي ملابس وشغلات حلوه بس مو نفس ذوقي واليلوك علي ..فاخذتلي شكم شغله عجبتني انه وجنان تالي طلعنه لمولات الجنينه

والجبيله صح غالين شوي بس ملابسهم كلهه رسميه وتجنن وكلش عجبني نفس ذوقي تماما فشتريت الي كم طقم رسمي وكعوبه وبناطير

وسترات وجاكيتات شتويه صاعد من الركبه شوي وشالات وجنط وجنان وياي طبعا كلشي اشتري هيه كذلك اشتريلهه الاحسه يعجبهه رغم رفضت

لان عبالهه مرتضى اليدفع بس من كتلهه محمد تطمنت وكالت ميخالف خلي يصرف علينه شوي مو اخته وبنت عمه احنه .. المهم قطيناه خوش قطه

بيومهه وهوه مكيف يكت فلوس وماله شغل سبورتي وكريم طلع بعد اخته حتى كاميرا صغيره اشترالي كهديه معزوله لان احتاجهه بشغلي وهم

بالتواسيل ياله قبلتهه صح ضجت لان خليته يصرف هواي بس ابتسامته وفرحته لمن يشتريلي شي جانت تطمني واكول هوه يحب يشتريلي ليش

اكسر فرحته .. كملنه كلشي تقريبا ورجعنه للبيت محملين علاليك وطبعا مانسيت امي وابوي وسلومي وريانتي الصغيره جبتلهم كم شغله وياي

بس مو على حساب محمد وانما بالفلوس يلي انطاهن الي بابا اشتريتهن لان كافي اخذ من محمد اذا صاحبك حلو لا تاكله كله خلي شوي منه للعازه ..

دخلنه للبيت وكعدنه فحطانين وتعبانين ماحسينه عل تعب من كثر ماجنه مندمجين بالتسوك.. جابتنله امي صلاحيه ماي وكعدنه كلمن كلاصه

ويشرب وذكر الحسين عليه السلام ماراح من بالنه واحنه تعبانين وشربنه الماي .. ارتاحينه شويه وبدينه نطلع بالملابس واعرضلهم ازياء كلساع ابدل

لبسه واجي اوريهه الهم وينطوني رايهم عدا احسان اله راي ثاني هذا ضيك هذا قصير هذا لونه فائق واووو ماسكت الا لمن خزرته بس بالنسبه

للبقيه كلهن حلوات وعجبتهم ومستورات مايبرزن شي من الجسم بقت بس ملابس جنان لحيت عليهه تكوم تقيسهن عل عناد حتى اشوف مرتضى

شيسوي عاد كومتهه سحل للغرفه خليتهه تلبس اول لبسه وصارت تجنن عليهه انه بنيه كرشت عليهه و تناسق الملابس عليهه كلش ضابط لفت

حجابهه وطلعت شوفت الملابس لاهلي واهلهه واشوف مرتضى يباوعلهه من فوك ليجوه ويتحسر ويباوع لاخواني خاف واحد ينعجب بيهه ماتحملت

ورحت لغرفتي طكيتهه ضحكه شكبرهه عليه حتى ريانه ضلت تباوعلي باستغراب عبالهه امهه تخبلت اجيت اخذتهه لحضني وعدلت ملامحي جديه

وطلعت ودخلت وياي جنان للغرفه بدلت باقي اللبسات ونفس شي مرتضى ماشال عينه عنهه

اعرفه انه اخوي عاشرته سنين ولو يروح لاخر الدنيا محد يكدر يغير البكلبه ويلي سكن بي من حب وكره وغيره بس طلعت غلطانه من تالي...

.

.

:- مرت فتره واحسان بعد كلام شموخ وياه ما خله باله وياي ولا علق على تصرفات مرتضى يلي

الوضع بيني وبين متكهرب حاليا وخاصه بعد النقاش الحاد يلي صار بيناتنه قبل اسبوعين لمن رجعت اداوم وانه عدهم ....

اول يوم رجعت بي اداوم جان نايم الصبح من طلعت ولمن رجعت من الشغل جان طالع بس ثاني يوم كعدت الصبح سبحت وبدلت ملابس الشغل

فستان طلعه وحجاب هذا ستايلي المعتاد ومتعوده عليه انه واهلي لان مستور ومايبين لا زند ولا فخذ منه .. كملت تبديل وطلعت للمطبخ على

صوت هورن سياره بابا حسيت بعطش واجيت للثلاجه طلعتلي بطل ماي و شربت ..بس فزيت من

سمعت صوته وراي وطاح شوي من الماي على ملابسي ضجت وتنرفزت كلش التفتت عليه وكتله..

_ادري اكو واحد يجي هيج وكبل يحجي كول احم سوي صوت هسه وين الحك ابدل وانه متاخره استغفرلله ربي

_هوش هوش على كيفج شهل لسان هذا وبعدين اول تالي راح تبدلين ملابسج مو عاجباتني

_عفوا 

_اي شنو هاي فستانج ضيك ولازك على ضهرج حتى الشسمه مبين 

_شكاعد تحجي انت شنو ضيك شنو مبين الشسمه 

_يعني الا احجيهه بالقلم العريض واكلج حماله صدرج مبينه من البدله من وره

_يااا سد حلكك شهل حجي ما عيب عليك

_جا شلون تفتهمين علي من اكلج الشسمه وبعدين شنو هاي الكماشه الاكبر من راسج مخليتهه جوه الشال حرام 

_تريد تضبط مو 

_اضبط واكسر راسج عندج مانع 

_اولا احترم نفسك وعدل اسلوبك ثانيا انت ساعه تصير امريكي وساعه تصير من اهل الحوزه عوفني بحالي الله يرضه على اهلك 

_ايبااخ صايره كويه عين ست جنانه ام دميعه

_من يوم يومي كويه عين وماستحي من الحق 

_يله هسه عوفينه من الحق وروحي لبسي شي مستور وعريض وشيلي الحجاره هاي المخليتهه بشعرج

_حاضر بس باوع هناك بالاول ..

اشرت بصبعي للكراج والتفت يباوع شنو اكو وكتله..

_شايف هذوليج الزلم يلي بالسياره 

_اي

_هذول ابوي واخوي تدري

_اي وشنو يعني

_يعني عندي اهل وعندي اب واخ همه يحاسبوني وانت اخر شخص اله حق يعلق على ملابسي مو نوب تامرني وتكلي شلبس وشنزع تمام خويه ..

1 

انه كلت خويه لو انتقم كز على سنونه واجه عصر زندي بغضب وكال بصوت شبه مسموع....