رواية نورة الفصل الخامس عشر بقلم ام مصطفى
دخلت اني وامي وسلمت ع خالتي
شنو منو هذول
حمويني وولد حماي جايين بفاتحه
واجوني
وعمي راد نور يكول مشايفها
ياا شرايد
اكيد ع السالفه ذيج
لعد ميت علي جاي هو عمره مااجايني
ولا طاب بيتي
انوب خاف امل هم يحجي عليها
والله خايفه
هسه دزيت ع ابوي يجي
كلشي يصير
-اي زين تسويين
-طبي نور سلمي ع جدج وعمامج
-مااريدهم
-بنتي بله مشاكل ولا تعاندين
تره ذول خباث متعرفينهم
اني اعرفهم
فوتي وسلمي عليهم
وكليله مااريد ازوج عود اريد ادرس
- اووف ماطيقهم
هسه اني شلون اعرفهم
حتى مشايفتهم
-دفوتي واني جايه وراج بنيتي
-لا انتي فوتي
فاتت خالتي
وكالت هاي نور عمي اجت تسلم عليك
باوعلي
-هله جدي هله بهالطول اللهم مصلي ع محمد
تعاي ابوسج
سلمت عليه وباوسته
كال ذول عمامج باوسيهم
رحت سلمت
اكعدي جدي عدي حجي وياج
باوعت ع خالتي
-اكعدي نور لا تستحين
علي اخوي كاعد
رحت كعدت بصفه
علي صف ثالث متوسط
هستوه كبران
كال جدي اني رايدج لولد عمج
اي واحد ترديه من ذول الكاعدين اشري
واختاري
انت مثقفه ومدرسجيه مثل امج مانريد نفوتج
وابو نائل يحلم يناسبني
عدج ولد عم ياخذوج..
مدري منين اجتني القوه وحجيت
كلتله
-بس اني مااريد اخذ من ولد عمي ولا اريد ابتعد عن اهلي
-اذا ع البعد اخذي، من ولد عادل ذول قريبين عليج
-لا مااريد ازوج منهم
-مو بكيفج جدي احنه ماننطي لغيرنه
ناس تاخذ، من ناس، وانتي واختج ناخذجن لولد عمجن
-مو بكيفك
-انه غلام ابوي شني، مو بكيفك
انه تكليلي، هيج
-انت هسه عرفتنا صارلك سنين ماشيفنا
وين جنت عنا من ابونا راح
وامي احتارت بعيشتنا
اشو محد سئل بينه محد كال شلون عاشوا
احنه ماعدنه عمام منعرفهم
نعرف بس خوالي
ضليت احجي طلعت حركت امي احلام بيهم
امي صاحت بيه عيب كافي
مدري شجاني فقدت
كال شوفي
بيت ابو نائل مالهم مره
وماتاخذين ابنهم مادامني عايش،
من اموت اخاذه
-ايا طايحت الحظ يا مامتربايه
لشوف منو يوصل الج
كوموا
احلام هاي بنتج منهي عليها وتضل هاي كعدتها
وذيج زوجيها لو رادت
بس هاي لا ماتاخذ تضل
كاموا
خالتي كامت تتعذر وجاهل وماتعرف تحجي
عمي فدوه لا تاخذ بحجيها
طلع زعلان
وخالتي احلام رجعت علي شبعتني رزايل
ولج شلون هيج تحجين بنص عمامج
ياما تستحين
-خاله والله قهروني يعني هسه عرفنه واجه ينهي عليه
ليش حارمنا منهم كل هاي السنين
وهو عنده خير من الله
ولا يوم ذكركم بفلس، بسؤال هسه جاي ينهي عليه
ماله كل حق علينا
-لج حتى لو عيب هيج تحجين
-بعد حجيت وريحت كلبي
وطبه مرض
-هاي انتي الفقيره هيج صايرلج لسان
والله مصدومه بيج
ضليت ابجي وطلعت
رجعنا للبيت كلش مقهوره منهم
يعني شنو كوه كوما كوه الزواج
مااريدهم
امي ضلت تحجي شجاج
نوره مااعرفج هيج عصبيه
طول عمرج هادئه ليش هيج
سويتي
-حرگ كلبي يمه
خرب خطبتي وفوكاها نهى علي
مو حرام النهوه
مو حجت المراجع العلماء ع النهوه كول حرام
لعد هو شلون سيد
مايعرف النهوه حرام
تره حتى زواج بالگوه باطل
احجي وابجي
وامي سكتت كافي يمه لا تحركين
كلبج
تره الي كاتبه الله يصير
بعد فتره داومت سادس
امي اشترتلي مبايل
اختي امل انخطبت لبيت خالة ابوي
الحمد لله ماعارضوا ع خطبتها
اني اخذت رقم اسلام وضليت اتواصل وياه
ونتخابر
يسلم علي ويسئلني كم سؤال ويسده
ماعنده غير سوالف
يكول تره اني مااعرف احجي مال حب وهاي السوالف
تعذريني
كل الي اكوله رايدج وماازوج غيرج
اضل منتظرج العمر كله
اني هم خجوله كلش،
ع كد السؤال اجاوب وبسرعه اسده
ومرت الايام زوجت اموله ورحت لعرسها
كلش فرحت الها طلعت تخبل حبيبتي تستاهل
جان اخر سنه الها بالكليه
امي شرطت عليهم تكمل وقبلوا
فديوم مرت عمي ام نائل مسيره يمنا
واجت مره
تخطبن
كالت اشوفها تروح للمدرسه وترجع
وانه هم ساده اعرف انتم ماتطون بس، للساده
عمتي من يمها حجت هاي جنتي
خاطبيها لابني تره
بس جدها ناهي عليها ومايطيها
المره سمعت بيها نهوه تعذرت وراحت
بس امي ماقبلت زعلت
كالت
مايصير نشيعين ع بتي منهي عليها
تردين تكطعين قسمتها
بلكت تجيها قسمه زينه
وجدها يرضى
تره هو معاند لان ابنكم الرايدها
تدرين هو ع خلاف وي ابو نائل
واذا هيج احنه بتنا مانوكف قسمتها
-ياا شني يعني تطوها لغير اسلام
شلون يصير غير احنه خاطبيها
-بس، مصارت وجدها مارضى
نكعدها شنو
سكتت وخلت وطلعت
وره شويه
خابرني اسلام يعيط ويصيح
شنو امج هيج دكول
شنو تريد تزوجج. واني مو بعينها موخاطبج
اني ضل يغلط ويصيح
هو عصبيي كلش
ومن يتعصب يفقد
كام يغلط ويصيح
وانتي اكلج بطلي من المدرسه
ضاله ترحين وترجعين
تعرضين نفسج
-شبيك اسلام اني شكوو
-اسسس ولا كلمه من احجي اني انتي لا تحجين
سكتت وهو يعد ويسفط وسده بوجهي
شبعت بجي وقهر
بالليل خابر يتعذر واسف
تره والله تخبلت وجدج خبلني شسوي هسه اني اضل اتفرج عليج
اعصابي ادمرت مو بيدي
-لا عادي حاسه بيك
بس شنو بيدي اسويه وماسويته
اعذريني نور والله من حبي الج تره فقدت
-كتلك عادي مصار شي....
خلصت السنه وبدت امتحانات اخير السنه الحمد الله دخلت بكلوريا
والله تعبت بالدراسه
واقره ليل نهار اريد اطلع معدل زين
تالي طلعلي معهد طبي معدل ٧٥
انقهرت
خابرت اسلام كتله طلعلي معهد طبي
جان يكلي لا طبي ولا اي شي
داوم ماكو
يا اني يا المعهد سمعتي لولا
وللحكاية بقيه ام مصطفى
