رواية سواد الاثمد الفصل الخامس عشر بقلم نورس
نورجان :- كافي بسمة عليج النبي فهميني شصار بعدين
مسحت دموعها وتنهدت :- الصار همام وكف بوجهم كلهم اني اخذها
- وين ياخذج
باوعتلي :- يتزوجني
- عزة احلفي
- طبعًا محد جان راضي وخاصة عمتي ابنها الوحيد شنو تنطي وحدة مثلي بس هو جان عند كلمته وكلهم اذا انطيتوها اخذها واشرد بيها واخرب شغلكم وأبليكم
- وقبلت عمتي
- ليش بأيدها غير خيار مشفتي حالته بذاك اليوم شلونه جنت اني ابجي واملخ بروحي وماما تتوسل بأبوي وعمتي يلغون السالفة انهد عليهم
- مدا اصدك هو نفسه ابن سجودة
- الحاصل لغوا موضوعي بس ما انتهى لهنا خلوا هبة بمكاني
جنت توني مخلية اللكمة بحلكي غصيت :- صدك تحجي
بجت :- ابوي جبرها كال لعمتي انطيها الهم ما اريدها ورة سوايتها الأخيرة
- يا سواية هاي
حجتلي كُلشي يلا بديت أربط الأحداث :- عززاا لج هذا عبد مرگصهم
- متخبلين منه شكد ما سجودة گوية ومتخاف هو أضرب منها مخبل نورجان تفهمين شنو مخبل الله وحدة اليعلم بان شنو شايفة منه وطفرت هالطفرة شوفي الحيطان مزرفة صار اسبوع كل يوم جماعته هادين عالبيت
- واختج
ردت نزلت دموعها وتمسحهن :- والله ما ادري هبة صح لسان بس غبية وصغيرة وينها وين هيج شمرة تريد توديها للكويت
عفت اللفة من ايدي حتى مكملتها بعدنا نحجي اندفر الباب وفاتت عمتي وراها اثنين من زلمها جفلنا اثنينا مصكوكات بمكانّا وجوهنا اصفرّت
أشرت لنسمه براسها حتى تطلع كامت بسرعة راحت تركض باوعتلي من فوك ليجوة حصرت روحي بالزاوية
12 تعليق
صوت رنة تليفون واحد من ذول الوراها تقربلها ومدلها التليفون :- عمة هذا عبد يتصل
أشرتله يرد جابولها كرسي كعدت عليه وفاتح سبيكر
عبد الإله :- لگيتيها عندهم لو لا
سجودة :- جبتلك الأقوى منها
- فضيني عاد
- اختها بيدي مو جنت رايدها وضليت تهدد ضاحكين علي تعال استلمها وعوفلي بان اني الگاها
سمعت صوت تكسير قوي وصوته وهو يصيح :- بنت الگو** انعل شرفج كتلج اريد بان جايبتلي اختها شسوي بيها
- قبل كم اسبوع انتَ تنگ كل يوم والثاني تهديد لو تجيبيلي اختها لو أسوي ما اسوي
- اريد بان تطلعيها من جوة الكاع لا أحرگ مخازنكم والبيها وأخلي النار للضالين
- گد هالتهديد
بنبرة تحذير گلها :- الكم منا لـباجر بان اذا ما طلعت ابدي أصفي بيكم واحد واحد
انسد الخط باوعت لسالم الواكف بالباب
سالم :- متخبل على ميلگاها
- فرصة واجتي لرجلينا الگالياها قبل لتصير بيد عبد ويدري بالمضموم لأن بساعتها تنهد هالبيوت فوك روسنا
سالم :- يسويها
- يسويها هذا يهدد وينفذ مو جديدين عليه
- وهاي
حجاها وأشر عليَّ گامت اجتني صارت گبالي لزمتني من فكي رفعت وجهي لوجها
سجود :- نورجان اسألج سؤال وجاوبيني
هزيت راسي بخوف
مررت ايدها على شعري :- بان يم عيالج بالغربية
نورجان :- لا والله مشايفيـ..
بعدني احجي محسيت الا جابتني براشدي ردت لزمتني نزلت دموعي واني اباوعلها
- فدار وين ضامها
- والله ماكو هو دا يدور عليـ..
جابتني باللاخ شهگت لزمتني حيل :- آخر مرة اعيدها بان بالغربية يم امج
هزيت راسي لا بخوف واحس مالي بعد قابلية للكلام اجه عمو سالم بهمة منعته يتقربلي عافتني
گلتله :- عوفها مو يمهم
سالم :- لعد وين راح نلگاها
- تنلزم مرجوعها علينا
اجه واحد من زلمها شاور عمو وعمو غمز لعمتي وأشرلها باوعتلي وطلعوا قفلوا الباب وراهم رجعت لوحدي كاعدة بالظلمة بس صوت شهگاتي مسموع
ما ادري شكد مر من الوكت انفتح الباب أشرلي اكوم
ضليت صافنة عليه صاح
سالم :- فضيني گومي
كمت اسحل بروحي وراه دخلنا للصالة مدنكة راسي ما اشوف احد كدامي لحد مسمتعها كالت
سجود :- هاي چنتكم
رفعت راسي كبالي عمو تيم ويمه رجال مشورب اثنينهم نفس الهيئة مصدكت من شفته كام ركضت حضنته واشهگ بالبجي
مسح على شعري باسني براسي ورفع وجهي يباوع بيه
عاقد حاجبه
تيم :- انتِ زينة
نورجان :- اخذني وياك
ضل يباوع لوجهي ومبين متضايق :- منو سوة بيج هيج
سكتت وعيني صارت على عمو سالم وستار الي واكفين على صفحة باوعلهم بسرعة عض شفته وهو يهز راسه خلاني وراه وگفوا هو والرجال الوياه
- ما راح اسكت عليها خلها ابالك يالنشمي
سجود :- هنا الحجي وياي
حجتها باوعوا اثنينهم عليها كاعدة عالتخم متشخصة هي ام الكلمة سلاحها بخصرها ولا تخاف
42 تعليق
- عجل والزلام الواكفة
الوياه گله بصوت ناصي
صدر الدين :- تاء التخنيث الساكنة لا محل لها من الأعراب ابو علي
باوعلهم :- لا والنعم
سجود :- لتضيع السالفة سكتت على سالفة خطفكم لبنت أخوي ورحتوا زوجوتها بدون علمنا وعديتها لأن شفت بيك رجال ينوخذ منك حق وباطل
- وانا أعطيتج كلمة
- خليك عند حجايتك يابن الحمولة منتظرتها منك لأن بساعة الأدري بيها عندك وما منطيني خبر أحرگك انتَ وأهل بيتك وبعدك متعرف سجودة شتگدر تسوي
تيم الله :- وهاي كلمة مني بيوم التجيني بنت اخوج دخيلة عندي انا بيدي اردها الج لهين وعلى هالشارب
انتهى نقاشهم اندارلي :- نروح
هزيت راسي اي ومجلبه بأيده عبالك راح يطير اول مطلعنا من بيتهم سمعته يگول بنفور
تيم :- نسوان سايبة وعلي الفحل
باوعت جانت بعدها ظلمة طلعنا صعدنا سيارتهم هم كدام واني ليورة اريد اطير دموعي تنزل واتبسم مثل المخبلة مشت السيارة شال تليفونه خابر وفتح سبيكر
- حي الله الخال
فدار :- حي ابن اختو بشر
- افا عليك أبو علي يفوت بيها وما تعمر
38 تعليق
- ذيب بعد خالك منو حدرك
- الأمانة وابن السادة
- وسبعة أنعام منك ومنو
- خابرلي شبير تايتهدى گلو راجعين ليعملو فاينة من ورانا متصرگع من ساعة العرف
- حدري لا يضل بالك انا گاضبو رد بساع امها متخبلة وراها
- مسافة الطريق يمكم
تسالموا سد التليفون منه واندارلي :- عش البجي يولي
- تريد تسلمهم بان
- هي وينها اختج احنا مدحكيها وتانسلمها غير ركضتنا
خلصت الطريق اشهك خايفة عليها بالي كله يمها من سمعتهم شلون كلهم يتوعدولها اندارلي الرجال الوياه
صدر الدين :- شوفها ابو علي موتت نفسها
اندارلي خازرني حيل انخلست
صاح :- انكتمي يولي عش تعوين
سديت حلكي أشرتله سكتت رجع اندار يحجون بالشغل
لحد موكفت السيارة كبال بيت عمو فدار لكيت شبير بالباب يمه مآب يحجي وياه اول مشافنا اجاني
فتح الباب جرني لحضنه حيل ما اهتم للموجودين
فدار :- خنگتها يالأغبر
وخر مني اباوعله عيونه حمر وجهه مخطوف حالته حاله ببدلته العسكرية كاف ردانه انتبه لنفسه والداير مدايرنا يضحكون عليه
شبير :- عجل گلب والدة شعملو
گرصني بخدي وباس ايده يباوعلي مبتسم براحة
دخلنا للطرمة طلعت ماما تركض دموعها بعيونها حضنتني ولازمة وجهي تباوع بيه
شدن :- شمسوين بيج كسر بأيدهم
فدار :- هسع زين وهاي بنتج ردت لحضنج
رفعت راسها رادت تحجي سكتت فجأة وعينها على الرجال الاجه ويَّ عمو تيم وهو هم متفاجئ أشر
صدر الدين :- هاي بنتج
عضت شفتها وخلت شعرها ورة اذنها ردت :- شلونك استاذ
باوعلهم عمو فدار مستغرب كمل كلامه الرجال وهو يوضح الموقف للواگفين گلهم
- اخت شدن جانت تشتغل عندي بالشركة اجيتني انتَ گبل بمرة لهناك من جانت تشتغل عندي بس ما عبالي تطلعون گرايب
فدار :- كلنا أهل ماكو غريب ان شاء الله تفضلوا جوة عش واگفين بالباب
- غير مرة ابو مؤتمن عندنا شغلة انا وابو علي نگضيها والنا گعدة ان شاء الله سوة شتگول ابو علي
عمو تيم جان عينه بالموبايل مو يمنا لحد محجه هيج رفع راسه ضحكوا :- مو ويانا ابو علي
تيم :- وياك يابا وياك هم يلا تانتوكل عفنا الجماعة واگفين عالنص
فدار :- ما گصرتوا سباع
تسالموا وقبل ليطلعون تشكرتهم ماما هواي شالوا ايدهم سلموا وراحوا مستعجلين صفنت شنو من شغل هالوقت
فتنا للبيت اني بحضن ماما حجيتلها كل الصار وجان عمو والولد كاعدين يسمعون خلت ماما راسها بين اديها جسمها صار يهتز أثر بجيتها على بان
ضل عمو يحجي وياها هو ومآب متحملت خليت وكمت طلعت برة للحديقة دموعي تنزل اجاني فتحلي ايده شمرت روحي بحضنه واشهگ بجي
نورجان :- راحت اختي ماكو راحت بان
《 شهربان 》
لبنان _ بيروت
طلعت من الحمام المنشفة على راسي لابسة الروب اخذت الفستان اللي عالجرباية لبسته وردي وسخ بتعلاگات سود يجي للركبة اجه فيت على جسمي
نشفت وسشورت شعري سرحته بالكاوية خليت شوي ميكب وجريت عيوني بآيلاينر سحبت حمرة وردية خليت على شفايفي رشيت عطر وباوعت لروحي
اندك الباب كمت فتحته صارت بوجهي الخدامة بتنورتها السودة وقميصها الأبيض ابتسمت
- الفطور جاهز مدام بان
هزيتلها راسي باوعت لنفسي نظرة أخيرة جريت نفس ونزلت عالدرج بكعبي الأسود شفته عالطاولة منتظرني
جان واگف عالشباك ديباوع للحديقة وظهره علي
وصلت يمه رسمت على وجهي ابتسامة
شهربان :- بونوجغ مسيو مراد
اندار من سمع صوتي وابتسم وهو يباوع لشكلي
مراد :- أهلا مودموزيل بان لبنان بتحلى فيكي
انطاني نظرة من فوك ليجوة وخلى ايده بجيوبه وهو يهز راسه بأبتسامة رضى على شكلي
گال :- شو عجبك الفستان على فكرة طلبتو مخصوصي لألك
- ضيك حيل ممرتاحة بالحركة بيه
- ليه هاد أحلى من التياب المكركبة اللي كنتي لابستيون
كزيت على أسناني ورديت بحدة :- دا اگلك ضيك
ضحك :- تنفسي شوي وخديلك دئيئة ما بدها كل هالحدية
سكتت بضوجة ودرت وجهي
گال :- وبعدين روئي شوي خلص ولا يهمك هلئ لنخلص فطور بخليون يجيبولك تياب غيرون
أشرلي عالطاولة :- تفضلي خلينا ناكل ونحكي بهدوء
حجاها وهو يدفعلي الكرسي مشيت گعدت وهو گعد مترأس الطاولة الخدامة اجت تصبلنا الچاي
عيني جانت ليبرة وبالي بعالم ثاني لحد مجفلني صوته
مراد :- بشو عم تفكري كل شي تمام
باوعتله وهزيت راسي :- ماكو شي
عاف الچطل والسچين من ايده وشبك اصابع ايده وخلاهن جوة حنكه وهو يباوعلي بتركيز
- شايفك مش هون بدك تحكي
سكتت شوي وعيني بماعوني :- هاي صارلنا تلث أيام من اجينا لبيروت واكو اسئلة هواي براسي مدا تنطيني جواب الها
- فهمت عليكي وبعرف بشو عم تفكري متل ما بدك نكمل فطور ونطلع نحكي بالجنينة هيك تمام
رفعت عيني عليه منتظر مني جواب تنهدت
گتله :- ماشي
- هلئ كلي الفطور مطيب وهو بارد
التهى رجع ياكل واني مديت ايدي وبلشت اتريك بعد الريوك طلعنا للحديقة وصرنا نتمشى بمستوى واحد وهو يسولفلي عالمكان ويأشرلي عالڤيلا مالته
لحد موصلنا لگعدة خارجية أشرلي حتى اگعد وهو گابلني وطلب واحد من الخدم يجيب عصير
مراد :- اييه مودموزيل بان ولا احكي الآنسة شهربان
- برأيي نفوت بالموضوع بلا هالمقدمات
- هيني عم أسمعك تفضلي
- ليش دتساعدني
سكت شوي وطلع باكيت جگاير من جاكيت سترته وورث جگارة وسحب نفس منها أباوعله على أعصابي
وكأنه متعمد يسوي هالحركات حتى يستفزني
سحب نفس لاخ وگال :- ليه عم ساعدك هاد بعدين بتعرفيه هلئ بدك انتِ تئولي كيف رح تئدري تساعديني
عقدت حاجبي :- اني
- مبلى انتِ ليه استغربتي
صفنت شوي عليه گتله :- الأفتهمه من هذا كلامك تريد مقابل يعني وحدة بوحدة
- يعني هيك شي
- وشنو الرايده مني شلون وحدة مثلي حتگدر تساعدك معندي شي أقدملكياه فلوس ما عندي ترى
رد مستهزئ :- والله وبرأيك انا بحاجة لمصاريكي يعني
- لعد شنو مضل غير رايد تستغلني جسديًا ولو سويتها دتشوف هالسچينة اللي گدامك هسه أشيلها اخليها بگلبي وابليك بموتي ولا أخليك تلزمني
من حجيت هيج ضحك بصوت عالي لدرجة شحط وصار يگح واني صافنة على رد فعله وضايجة اجاله الخادم يركض انطاه مَي يشرب
أشرله يروح ارتاح وجر نفس وبعدها الضحكة بيه
- معليه صارلي زمان مضحكت هيك
ضجت أكثر نترت :- مگلت شي يضحك ترى
- هلئ انا بدي أستغلك شو مين مفكرة حالك الأميرة ديانا بعدين ليكك بعمر بنتي شو بدي فيكي
- لعد شنو المقابل التريده مني وليش جبتني لهنا أصلا
رجع ظهره عالكرسي بأريحية وهو مركز نظره وياي
- اتركي شو بدي منك هلئ بعدين منحكي بس ليش جبتك لهون أولا مشان ما يمسكك عبد بسرعة لأن لو ضليتي هنيك الموضوع ما راح ياخد معو وقت بظرف يوم وليلة كان راح يمسكك وبيخرب كلشي مخططلو
- والشغلة الثانية
- هلئ بتعرفيها
دار وجهه وصاح للخادم :- شو وصل ضيفنا
- مبلى يا بيك عم ينطرك بالصالون
- كتير منيح
حجاها وگام وگف يعدل بسترته وأشرلي اگوم وياه صار يمشي واني أمشي وراه ممفتهمة شي من الديصير
دخلنا لغرفة الضيوف جان گاعد شاب أشگراني بعيون ملونة لابس لبس عادي ملابسه كلها أسود بأسود
أول مشاف مراد گامله تصافحوا ومراد استقبله بحرارة
صارت عيونه علي جنت واگفة بظهره سوالي مجال وأشرلي عليه وهو يقدمني اله
مراد :- بعرفك على الآنسة بان متدربة عراقية الجنسية
عقد حاجبه :- متدربة
- اي ليه استغربت مو شي جديد عليك
- لا ما هيك ئصدت بس استغربت انها عراقية
باوعلي بأبتسامة :- تشرفنا مودموزيل بعرفك عن حالي انا ميشيل
حجاها وهو ماد ايده ترددت بالبداية وعيني صارت على مراد هزلي راسه يطمني مديت ايدي صافحته
شهربان :- الي الشرف مسيو ميشيل
گعدنا كلنا وصاروا يتبادلون الحديث ورجعوا للموضوع الأساسي الي صار يضرب أخماس بأسداس براسي
ميشيل :- قول شو بدك حاضر
أشرله بأيده علي :- هي
ميشيل باوعلي ورجع اندار لمراد :- بفهم من هالحكي طلبتني لهون كرمال الآنسة ولحتى أشرف على تدريبها
باوعلي وگله :- مبلى ما بئدر خليها بأيد واحد غيرك انتَ اكتر شخص بسق فيه بهالمجال ومتأكد راح تساعدني
- انتَ بتأمر وانا جاهز
هز راسه بأبتسامة :- متل متوقعت
شهربان :- أگدر أعرف تدريب شنو بدال ممخليني مثل الأطرش بالزفة بينكم
باوعولي اثنينهم بنفس اللحظة
ميشيل :- صبرك علينا ما تعجلي كلشي بيصير بوئتو
مراد :- بصراحة انا اللي بدي الموضوع يعجل وبأسرع وقت كمان ازا ممكن
- كيف يعني ماعم افهم
- بظرف اسبوعين او تلاتة بالكتير بدي الموضوع يكون خالص
- هيك عم تصعبها عليي المدة قصيرة
- بعرف لهيك اخترتك لألك الموضوع مستعجل كتير ومهم بالنسبة لألي ازا بدك تخدمني اخلصلي من تدريبها بهالمدة واطلب شو ما بدك
- لا ولو انتَ بتأمر ما بيناتنا هالحكي بس هيك بدي ضاعف وقت التدريب وبدي اجي كل يوم
- خود وئتك واعمل اللي بدكياه المهم الموضوع يكون خالص
- خلص متعتل هم الموضوع عندي شو رأيك نبدا من بكرا
- برأيي اسأل المعنية بالموضوع منرجعلا هي هي الأساس بهالئصة
- شو رأيك يا آنسة بكرا عالظهر بيناسبك
باوعتلهم اثنينهم وراسي مشوش يتفقون ويقررون عني واني مدا افهم شي من شافوني ضليت ساكتة
مراد گله :- خلص خليها بكرا الظهر تمام
- اتفئنا
گاموا اثنينهم اني ضليت گاعدة أضرب صفنات
تصافحوا وطلع الشاب وضل مراد واگف وگفته المعتادة ايده بجيوب البنطرون انتبهتله يباوعلي گمتله بأنفعال
شهربان :- شديصير فهمني لتخليني هيج مثل العمية
- روئي ما تعصبي خلينا نحكي بهدوء تفضلي لو سمحتي
حجاها وأشرلي اگعد مشيت گعدت واني على أعصابي أهز برجلي واباوعله گاعد گبالي رجل على رجل
حجيت بنفاذ صبر :- خلصني مراد شرايد مني
گال :- بدي عبد
صفنت بوجهه للحظات :- اي
- انتِ مرتو مافي حدا قريب منو يوصلني للي بدياه غيرك
- مراد خاف ناسي ترى اني شاردة منه وانتَ الگتلي اذا بقيت يوم واحد بعد بالعراق راح يلگاني وعلى هذا الأساس اني بححح طرت سافرت وضامة روحي بغير دولة حتى ليلگفني
- بدك ترجعيلو
ضليت أباوعله ممستوعبة الكالام الي ديحجيه عضيت شفتي وضحكت على روحي
- اقسم بالله شوفتي الك بذيج الليلة بالفندق والبطاقة اللي بيها رقمك العفتها على طاولتي انتَ مدبرها مو صدفة
ابتسم ورفع أكتافه :- يمكن
- يعني مراقبني من زمان وجنت تعرف كُلشي عني شگد غبية اني لعد
- لشو هالحكي
- لأنك حالك حالهم واحد خسيس رايد تستغلني علمود مصالحك
- مافي داعي لهالكلام خلينا رفئا ما بدي نخسر صداقتنا
- وتلومني من احجي هيج ليش شجابرني عفت أهلي وكلشي وراي وسمعتلك واجيت وراك مثل العمية حتى تخلصني منه وآخر جاي دتگولي ارجعيله هيج بكل بساطة
- اي هيك ليش مصعبتيا
- يكتلني والله ميخليني عايشة اذا رجعتله
سوة حركة بوجهه :- لأ ما راح يئتلك لو بدو هالشي كان عملا من زمان
- وليش هيج واثق بحجيك عبد متعرفه شلون يفكر مرة طلعت من الشقة بعد كم شارع گلب الدنيا عليَّ
- وهاد راح يكون شغلك بدك تئعدي براسو وبتعرفي شو بيفكر وشو راح يعمل وعلى شو ناوي
- استغفر الله اگوله يكتلني بس ارجع يريدني أصيرله جاسوسة بعدين تعال شمعنى اني ليش مرحت لمرته هذيج تعرفه أحسن مني وعايشة وياه أكثر مني
- يسر بتحبو ما راح تغدرو
- لعد اني الي أغدر
رفع حاجبه :- ليه طلعتك بنص الليل من الأوتيل وهروبك منو هيدا شو بتسميه
- وانتَ شنو جاي تحاسبني هسه
- لا ما بحاسبك عم احكيلك الي صار انتِ الي اتصلتي فيني وانتِ الي اجيتي برجليكي انا ما بعتت وراكي
- انتَ طابخها من الأول جنت تعرف راح أجيلك بأي طريقة او سبب
- اي بس الي ما كنت متوقعو انُ كلشي يصير بهيدي السرعة لهيك طولت كم يوم قبل ما سافر فيكي لهون
لزمت راسي وفركته حيل بدوخة ورجعت باوعتله
- من الأخير مراد شرايد
- ترجعيلو
- اي وبعدين
- في عندو أجهزة كل شغلو وبياناتو فيها
عقدت حاجبي :- أجهزتيش
- أي شي موبايلات كومبيوتر تاب بدك تخترقي كلشي من هالأجهزة وتبعتيلي البيانات والحسابات الي فيها
ضحكت ضحك هستيري ضل ساكت وهو يباوعلي محافظ على تعابير وجهه لحد مسكتت وجريت نفس
- شنو هالثقة الي تحجي بيها منين جبتها منو گلك حوافق أصلا
- بدك توافئي مافي عندك خيار تاني
- لا صدك صارت تهديد
- أبدا لهلئ عم احكي معك بصفتك رفيئتي
- وشنو الي يخليني أوافق أسوي كل الي گلته
- رح خلصك منو شو بدك اكتر من هيك
- انتَ راح ترجعني للموت بأديك شنو الفايدة من كل الي سويته وتعبت روحك وجبتني لهنا جان من البداية حجيتلي الموضوع واحنا بالعراق جان مفكرت أطاوعك واجي ونهيت هالمهزلة من بدايتها
- امك واختك شو وضعن
فز گلبي من جاب طاريهن
رديت بحدة :- شبيهن
- اختك هربانة من عما وامك هربانة من خالك وانتِ جوة ايد عبد شو بدك أكتر من هيك
- كلها فترة يمل ويطلگني وأرجع اخذ امي واختي ونعيش سوة
- لا ما حزرتي ما راح يتركك لحتى يلائيكي ولما تصيري عندو ما راح يطلئك راح يئتلك عالبطيء وحتنطري يوم يوم لحتى يخلص عليكي وترتاحي
- هذا كله وتريدني أرجعله
- الحل كلو بالبيانات الي عندو ازا قدرنا نمسك ضربة قوية عليه راح ينتهي هو وشغلو وبهيك حتخلصي منو
- وانتَ شنو مستفاد ليش رايد تأذيه
- هاد مو شغلك
- تريدني اسوي هذا كله ومتريد تگولي عالسبب
رد بنفس النبرة :- برجع وقلك مو شغلك انتِ بتعملي الي قلتلك عليه وازا جبتيها انا وانتِ بنكون ربحانين
- ربح شنو ترى أگدر هسه أخابر أهلي وأرجع منين ما أجيت ولا عبد ولا غيره وخليك عود انتَ بأوهامك
- ماشي خدي باسبورتك وروحي عمطرح ما بدك
حجاها بكل برود واني ساكتة أباوعله
- اي اخذه واسويها مخايفة ترى وممنتظرة من أحد مساعدة
- اوكي اعملي شو ما بدك انا عرضت عليكي عرض وانتِ حرة تئبلي فيه او ترفضي
صاح على واحد من الخدم وأشرله دنك يشاوره وراح ضلت عيني عليه گاعد بكل شموخ وكبرياء يحاول يبين انه ما مهتم الي سواء رحت او بقيت
رجع الخادم بيده الجواز انطاه اله :- تفضل يا بيك
اخذه منه خلاه عالطبلة البيناتنا ودفعه بأتجاهي صار جوازي گبال عيني اخذته بيدي ورفعت عيني عليه
- افتهمتك دتگولي اذا مقبلتي بعرضي مالج مكان هنا
گمت :- تمام رايحة وأشكرك على كلشي سويته الي الباقي بعد اني أدبره أعرف شلون أخلص روحي معايزة لأحد
دا أمشي وانلوت رجلي بالكعب وگفت متوجعة دنگت لزمت رجلي وانداريت عليه لگيته يباوعلي
عدلت وگفتي وحجيت بتهكم :- بس قبلها رايده ملابسي الأجيت بيهم
أشر للخادم أخذني للغرفة الجنت گاعدة بيها
بدلت ملابسي بسرعة بنطرون وتيشيرت وحذاء رياضي رفعت شعري ذيل حصان اخذت جنطة صغيرة خليت بيها الجواز وكم قطعة ذهب ناعمات جبتهم وياي
أخذتهم من جنطة يسر بنفس اليوم الأخذت بيه الجواز
نزلت جوة هو جان مموجود طلعت من الڤيلا محد من الحراس اعترضني وصلت للبوابة الخارجية جانت واگفة سيارة برة تقدمني واحد وفتحلي الباب الخلفي
گال :- البيك أمرني وصلك لمطرح ما بدك يا آنسة
صفنت على روحي ما أندل شي هنا أحسن شي أخذه واخليه هو يدليني بس لا لا منو گال مو مراد موصيه حتى ياخذني يكتلني لو يخطفني
واني أسولف بيني وبين روحي هو على وگفته يباوعلي ببدلته السودة الرسمية وشابك اصابعه ومنزلها منتظر مني رد باوعت للمكان بحيرة جريت نفس طويل صعدت
وين متريد توصل خلي توصل
سد الباب وراح لمقعد السايق وشغل السيارة قبل ليتحرك باوعلي بالمراية :- وين بتحبي وصلك يا آنسة
شهربان :- ماعرف ما أندل شي هنا
سكتت شوية وهو هم احتار بأمري
گتله :- اكو شارع عام او رئيسي بهالمنطقة تاخذني عليه
- اي مبلى بدك تروحي على شارع الشيخ عبدالعزيز
هزيتله راسي بالأيجاب مشت السيارة جنطتي بحضني هاي كل الأملكه ما عندي غيرهم عيني بالجامة مرة
وبالسايق جانت عندي شكوك منه محضرة سچينتي ومادة ايدي بالجنطة أقل حركة منه إتجاهي أطعنه
وصلني للشارع الرئيسي ووگفت السيارة
گال :- وصلنا يا آنسة
2 تعليق
جريت نفس من شفت الناس والمكان الي احنا بيه سديت الجنطة ونزلت شخط سيارته وراح بسرعة
باوعت داير مدايري الناس تروج كبار صغار طلاب
صرت أمشي وأباوع للمحلات الشارع متروس مقاهي ومطاعم سوبر ماركت ومحلات تليفونات ومكتبات
مدام ما عندي فلوس ايدي مربطة بس عندي ذهب اگدر ابيعه وأتصرف بالفلوس الي تجيني منه
صرت أمشي واسأل اي واحد يطلع گدامي عن محلات صياغة قريبة والناس تدليني وتوصفلي لحد مفتت فرع جان على طوله محلات صياغة منين متندار
بديت أروح عليهن واحد واحد واسألهم اذا يشترون الذهب العندي وكلهم جانت على لسانهم حجاية وحدة
" مافيي اشتريه منك لأن ما معك ورقة عربون "
" ما بئدر اخده بدون ما يكون في ورقة عربون "
دخلت أربع خمس محلات كلهم على نفس الحجاية
وگفت أخذت نفس لساني تعب من السؤال بس ما استسلمت رجعت أكمل البديته ودخلت على اثنين
الأول مقبل يشتري بس المحل البعده ردت أطلع ورجع صاحلي رحلته بسرعة
باوعلي گال :- بدي شوف الدهب الي عندك أول إزا كانت أوزان خفيفة وحلوي بشتري ما بيهم العربون
فتحت الجنطة وطلعتله منها إسوار أخذه شاله وزنه يباوع بيه فحصه منا منا واني واگفة على أعصابي
خلاه عالميز گال :- هاد وزنو 4 غرام فيني اشتريه
شهربان :- وشگد يجيبلي
- بعطيكي فيه 282 ألف ليرة
انطاني هالسعر بيه بس ما أعرف اذا زين لو لا مدري مضحوك علي والله حيرة يا إلهي
گال :- شو يا آنسة ناوية تبيعي ولا ما بقى بدك
هزيت راسي :- اي أبيعه
اخذه وطلع مبلغ وصار يحسب بيه بعد ما خلص مدلياه گدامي عالميز
گال :- هدول مصرياتك فيكي تعديون ازا بدك
- لا تمام هيج
أخذت المبلغ وخليته بالجنطة وطلعت رجعت منين ما وصلتني السيارة أول مرة ووگفت أباوع وتذكرت
محتاجة موبايل خما أضل هيج ايد ورى وايد گدام
دخلت لواحد من محل الموبايلات وگتله اريد أشتري موبايل وصار يعرضلي الأنواع والأسعار ويضرب بالعالي
گال :- ليكي شوفي عندي آيفون فايڤ هيدا جديد نازل عالسوق مواصفاتو كتير عالية وآخر إصدار من شركة آبل
- والسعر
- سعرو بمليون ومية ألف ليرة
بلعت ريگي گتله :- لا أريد أرخص
- ماشي في عندي أجهزة متوسطة من نوع سامسونغ ونوكيا أسعارن بتبدا من 400 لـ800 ألف ليرة
بللت شفتي وباوعتله :- أريد بعد أرخص
الولد صفن بوجهي مستغرب وضعي
گال :- انتِ هون سياحة
- اي سياحة
- قدي السعر يلي بدك ياه خليني شوف ازا بئدر فرجيكي شي مناسب لحضرتك
- يعني بحدود الـ100 ألف واذا أقل بعد أحسن
56 تعليق
هز راسه :- معليش بعتزر منك ما عندي بهالميزانية الأسعار الي عندي أعلى شوي بس ازا حابة بشوفلك شي قريب منها
اندار دور وطلعلي موبايل خلاه عالميز گال :- هيدا سعرو حوالي 147 ألف ليرة شوفي ازا ينفعك
فرحت بالسعر مقارنة بالبقية شكله زين وجان مستعمل بس نظيف أخذته واني الضحكة تارسة وجهي
گتله :- ينفع أهمشي يگول ألـو
خليته يفعلي خط وردت نت گال :- في مقاهي كتيرة بتوفر الواي فاي فيكي تشوفي واحد منن
عبيت رصيد دفعتله المبلغ الي صار علي وجان الولد متساهل وياي تشكرته وطلعت واني فرحانة بالموبايل
اتصفح بيه وامشي سجلت رقم ماما اتصلت عليها رن رن ومحصلت رد عفتها ونزلت فيسبوك سويت صفحة جديدة وبحثت على صفحة نورجان ودزيتلها طلب
جانت ممتصلة تنهدت بحسرة ضميت التليفون وكملت مشي أباوع للمطاعم وبطني گامت توصوص ريحة الأكل بكل مكان وگفت يم مطعم صغير يسوي شاورما
طلبت وحدة ووگفت أنتظر شافني الرجال
گال :- هول طاولات وكراسي فيكي تئعدي وتريحي شوي يا عمو وطلبك بيوصل لحدك
أشرلي على طاولات صغيرة عالرصيف مشيت گعدت على وحدة وباوعت داير مدايري مجان اكو هواي زباين
دقايق واجاني :- تفضلي صحة وهنا
حجاها وخلى اللفة گدامي ابتسمتله مجاملة وراح صرت آكل وجنت متلذذة بيها حيل يمكن لأن افتريت هواي وجنت تعبانة من المشي
أكلت وشبعت حاسبته وگمت أتمشى محسيت إلا رجلي ماخذتني للكورنيش جان يبعد مسافة دقايق عن الشارع
شفت هناك رجال يبيع بعربانة كعك اشتهيتلي وحدة رحت اشتريت منه ورجعت أباوع عالبحر والمَي
جان الجو حلو رغم طالعة شمس بس مو حارة بيها نسمة هوى باردة تجي من البحر ترد الروح
مخلين مقاعد خشبية گعدت على واحد منهم والكعكة بيدي فتحت الجنطة واخذت التليفون وفزيت
لگيت ماما راجعة متصلة شلون محسيت يربي
رجعت اتصلت عليها بسرعة ثواني واجاني صوتها
شدن :- ألـو
طلعت شهگة مني غصب عني ودموعي نزلت عفت الكعكة عالمقعد ايدي ترجف گوة مسيطرة لازمة الموبايل
وأسمع صوتها تگول ألو منو مگدرت أرد أحس لساني انربط ودموعي مبطلت تنزل ثواني وانگطع الاتصال
مسحت دموعي بسرعة ورجعت اتصلت ما ردت بالثانية عاد يلا جاوبتني بنبرة حادة وبنفاذ صبر
- ألـو منو وياي عليش كل شوي متصل ومحد يجاوب
رديت :- ماما
سكتت ما حجت وطال سكوتها متحملت صرت أبجي واحجي :- ماما ردي اني بان الله يخليج احجي سمعيني صوتج لتسكتين
ردت واسمع صوت بجيها :- لج انتِ شسويتي بحالي ليش هيج يماما تحرگين گلبي عليج هديتي حيلي بان وكلام الله مالي قابلية حتى اوگف على رجلي
- آسفة والله أعرف أذيتج هواي بس كُلشي صار غصبا عني وخارج إرادتي
- وين انتِ هسه بس گوليلي دا أجيج
- اني زينة لتخافين
- اي وين احجي ليش مأجيتيني شگد ضليت منتظرتج بالشقة متأملة تجيلي والله بيوم الي اجاني عبد يدورج عقل مضل براسي من گال انهزمت احتاريت شسوي
- ما أگدر أرجع ماما
- ليش انتِ وين
سكتت گالت :- بان احجي ولج امي لتشلعين گلبي والله العظيم نوم منايمة مثل العالم كل وبالي صايرلج شي تعالي شوفي اختج شحالها مدتاكل وكل يوم متخربطة علينا شوفي شحالنا وشصار بينا من وراج
تحجي وتبجي تحرك روحي بالزايد بصوتها
- والله زينة لتخافون مبية شي
- وين انتِ هسه بس گوليلي لتخافين والله ما أخليهم يوصلولج لا عبد ولا غير عبد دليني على مكانج هسه جايتج
جريت نفس ومسحت دموعي
- ماما سلميلي على نورجان ولتخافون عليَّ اني بخير
- شنوو لتخافون علي اگولها لا ليلي ليل ولا نهاري نهار ما ضل لا مركز مبلغت لا مستشفى لجج حتى بالطب العدلي رحت أدور بالجثث وأضحك على روحي
- ما اگدر افهتميني والله ما أگدر وداعة بابا
- ليش شصاير بس گوليلي ليش انهزمتي منه أذاج ضربج مو احجي لتسكتين بان طك گلبي ومحمد
حجتها وصارت تشهك متت قهر عليها بس ما بيدي شي اسويه بس أگولها على مكاني أجني على روحي
- ماما أخابرج غير وقت ونامي وانتِ مرتاحة ليضل بالج يمي والله اني زينة
صاحت :- لج تعاي بنت الصخلة شنو الزينة مهزومة بليلة ظلمة من ذاك ومخليتنا منعرف راسنا من رجلينا وتگوليلي زينة
گتلها :- بيباي
وسديت الخط بوجها الموبايل طول ما هو بيدي مسكت كل شوي ترجع تتصل وأرفضه لحد ما لزمته غلقته
ضليت گاعدة بوحدي طگيت بجي والناس تمشي وتباوع ونظرات الأستغراب مبينة على وجوهم
مرت ساعة واني على وضعي والسما بدت تغرب عيني عالبحر صافنة بولا شي حسيت اكو عيون دتراقبني
انداريت بسرعة وصرت أتلفت وأباوع للمكان ماكو أحد
معقولة يتهيألي
《 نورجان 《
سمعت صوت ماما من جوة نزلتلها أركض لگيتها بالصالة لازمة التليفون وتبجي رحتلها مفزوعة
نورجان :- شصاير ماما ليش تبجين
باوعتلي دموعها بعينها گالت :- اختج خابرتني ولج نورجان والله بان خابرتني سمعت صوتها
- صدك وين هي شلونها
- ماعرف مگالتلي المصيبة واتصل عليها ما تشيله لحد مسدت تليفونها
جانت منهارة عليها ولازمة التليفون على أمل تحصلها ضلت تروح وتجي بالصالة واني فرحانة بداخلي أقلها اجانا خبر منها مو ضالين معميين على عيوننا
ماما من شافتها گامت مترد خابرت على عمو فدار بسرعة حتى يجي خبصته خبص بالأتصالات
يمكن ساعة وسمعت صوت السيارة بالباب وفات هو والولد للبيت اجاها عاقد حاجبه
فدار :- شبلاج يولي شصاير وريتيني ور عفت الگدامي والوراي واجيتج
- بان خابرتني
وحجتله الصار والمحادثة البسيطة الصارت بينهن وهو گاعد عالتخم مقابيلها ويسمعلها بتركيز لحد مخلصت
گلها :- وتالي ما حجتلج وينها هساع
- لا مگالتلي وأرجع أخابرها مترد علي راح أتخبل والله وين راحت هالبنية
رجع ظهره عالتخم :- هاي سهلة بعد ان شاء الله دامها بخير الباقي ينحل
باوع لمآب گله :- گوم ابني اخذ رقمها وتوكل شوفلك واحد من رفجانك يطلعون موقعها وين مفينة
فتحتله ماما التليفون وشوفته الرقم عقد حاجبه
مآب :- يابا هذا الرقم دولي مو عراقي
شبير صاح :- اهبدة
كلنا باوعناله وهو كمل :- خرب عرضها دحك اللوتية دايحة مدري بيا دولة واحنا هين ما عنعرف گرعة راسنا
باوع لمآب :- يول مو گتلك هاي ينخاف منها مو عليها
مآب :- كافي وكتو هالحجي
- وانتَ ابقى لوب مثل الحريم عليها هم ياريت لو مگلبتك
- اكل تبن شبير راح اگوم أدوس راسك
- ميخالف ما راح أحجي وياك لأن عندي أخلاق
- انطم لا أگوم
صوتهم صار عالي صاح بيهم عمو اثنينهم
- والله خالي ساگت عليك وعلى شواربنا كلنا عجل اسبوع احنا ندور عليها زلام طول بعرض گالبة الدنيا عليها ما خلينا مكان يعتب علينا تالي تطلع طافرة هالطفرة والله سبعة عمي وينخاف منها
باوع عمو فدار لماما :- ما حجتلج كلش ولا جابتلج طاري هي وين تذكري خاف ناسية
هزت راسها :- لا ابد والله شگد حاولت وياها حتى تحجيلي وحتى گتلها دا أجيج ومقبلت تگولي
تنهد تنهيدة طويلة واندار على مآب اللي صار يضرب صفنات من وكت مشاف الرقم
گله :- مآب كمل الوصيتك عليه حتى لو دولي اعرفلي موقعها بسرعة تانشوف وين مفينة هالبلوة
- بس الشغلة تاخذ وكت
- شگد يعني
- يعني چم يوم
- ميخالف المهم تعرفلي مكانها حتى لو توصي أكثر من واحد تانخلص من هالسالفة بسرعة طلعت أرواحنا ما عنعرف راسنا من رجلينا شغل مثل العالم ما عنگدر نشتغل
شبير :- ركضتنا الكلفة
گام مآب أخذ الرقم وراح طلع من البيت وماما على بجية وحدة لحد محجة عمو فدار وهو متضايق
فادر :- يول مو كافي
شدن :- راح أطك فدار وكلام الله اني ام محد يحس بالي دا أحسه
- حگج والله الله يلومو الي يلومج أعرف صعبة بنيتج ومتعرفينها وين بس مو أحسن من حالنا البارحة واحنا ندور بالمستشفيات كل وبالنا صايرلها شي خطير
- خايفة عليها
- گضت وعيونج كلها چم يوم وانا بيدي أروح اجيبها الج واردها لحضنج بس بطلي بجي عاد شلون بله تموتين نفسج الحمدلله من طلعت عايشة
شبير :- ذيبة مسرحة مينخاف عليها وانا اگول اتركو السالفة من أساسها هي ترد لوحدها
- نعوفها شنو تايهة هي لو ما وراها أحد عجل بنت بعمرها شعتسوي بدولة ثانية ولوحدها والله لو وحدة من العندي مسويتها تاما أگص راسها على هالسواية
باوع لماما اللي تسمعله بهدوء :- لتزعلين مني بس هذا الصدك عايفتج هين محترك گلبج عليها وهي ولا على بالها ما حسبت وراها ام اخت طرگاعة توگف بعينها كلها ضربتها بعرض الحايط ودارت وجها وراحت
- والله العظيم بنتي متأذية أحس بيها أعرفها من نبرة صوتها لوما مغلوب على أمرها مجان انجبرت تسوي هيج وتنهزم منه لدولة ثانية
- وهذا هم بعدو عيدور گالب الدنيا عليها بس تايلزم خبر عنها
- فدار ديربالك زوجها يحس انها متصلة لو لاگينها والله بنتي تروح بيها
- يولي سهلة ما راح يعرف
طول ما هم يحجون اني صافنة بالي كله وياها شتسوي وين گاعدة شحالها حسيت على شبير يلزم ايدي
شبير :- شبلاج يولي مو گلنا راح نلگاها
- خايفة عليها شُبير
- خافي على روحج
- لتحجي هيج تضوجني
- والله عجل مجذب هي هسع متونسة عتفرفر واحنا هين مشتعلين مو گتلكم ضاربة الدنيا چلاق ولا على بالها أحد
فدار :- انتَ لو تحجيلك حجاية بيها حظ لو تگوم تنگلع تشوف شغلك
- شغلي هناك مو هين الليلة ان شاء الله ماخذ الصفرة وراد للغربية
نورجان :- وماما
حجيتها وباوعتلها
گال :- امج ترد ويانا عجل وين تروح لو شتگولين باجيتي
شدن :- ما أرجع إذا مسمعت خبر منها
فدار :- ردي وياهم شدن ضلتج ما منها فايدة أول تالي شما صار ويانا انا مخابرج
- أعرف اني مثگلة عليك بس قصدي جان أجرلي غرفة فندقية بـ بغداد واگعد بيها لبين ما ألگاها بس ما اگدر ارجع للأنبار على يا أساس اروح لهناك
- ام بنيتنا شنو على يا أساس تردين وياهم وتگعدين معززة مكرمة هناك الأهل ما يقصرون
- أعرف ما منكم قصور بس دا اشوف ضلتي هناك صعبة
- وضلتج هين لحالج بعد أصعب منو يگول ما مراقبينج ومنتظرين يحضون بيج تا يعرفون مكان بنتج وهيج تخربين على روحج وعليها ردي للغربية وخلي الشغل الي هين إلي وهاي چلمة مني اي شي يصير ويانا لو نسمعو عنها انتِ اول العارفين بعد
باوعتله بحيرة وباوعتلي ترجيتها بنظراتي حتى توافق على كلام عمو تنهدت تنهيدة طويلة وگالت
شدن :- تمام هذا هو الي تشوفه
صارلنا يومين بـ بيت عمو فدار نوم منايمين بس نبجي اليوم يلا گدرنا شوي نجر نفس رغم قلق وخوف ماما
طلبوا أكل من برة وگعدنا تغدينا براحة ورجعوا عمو والولد طلعوا من البيت للعصر رجعلي شبير
رحتله لگيته بالصالة گاعد مدنك عينه بموبايله من شافني غلقه وخلاه عالطبلة أشرلي أجيله
رحت يمه جرني من ايدي لحضنه حاوط خصري وراسه برگبتي يشتم بيها ايدي صارت على صدره أدفع بيه
همست :- كافي شبير عيب والنبي ماما هنا لتطلع وتشوفنا ولك وخر
خلى أصبعه على حلگي يسكتني :- اششش مشتاگلج ومحمد
وخر راسه وباوعتله ابتسمت :- اني هم اشتاقيتلك
عض شفته :- آخ يربك تسلگينا بوسة لو أشوف شغلي
باوعت وراي ماما فوك بالغرفة تقربت طبعت بوسة سريعة على شفته ووخرت بسرعة عاقجة وجهي
عقد حواجبه :- شبلاج ولج
لزمت خشمي :- ما أدري خشمي ديأذيني من يوم مرجعت من بيت عمو سالم
- شو أشوف
مد ايده بس طخه عطت وخر بسرعة :- لتلزمني شُبير والله حيل يوجعني
- سودة عليَّ ريتو بالكلفه ولا بيج
- لا عزة لتدعي عليها
- ختولي غير من وراها انكتلتي وتشعوط گلبي وراج
- حتى لو لتحجي عليها ترى ما أقبل
- لا صدك تهدد البوخة شعتسوين يعني
رجعت درت وجهي اشوف خاف ماما موجودة وبحركة سريعة تقربت عضيته من چتفة حيل وگمت حتى أطفر
ملحگت بسرعة لگفني جرني عليه گعدت بحضنه لازمني حيل ظهري صار على صدره وأنفض بجسمي
نورجان :- شُبير وخر وحق الله أصرخ وأفضحك
- دحك الصفرة دحك منيلج هالعرامة ولج منو العلمتج شو الكلفة وطافرة وامج فقيرة
توسلته بصوت ناصي :- عوفني حباب والله ما أعيدها بعد
ما اهتم وخر شعري گلبه على صفحة وحدة وتقرب صارت أنفاسه على رگبتي كش جلدي ميلت راسي
أحس بگزگزة شورابه وهي تلامس بشرتي سكنت بحضنه شو هذا خلي ايدك على حلگي وشد ايده قيد حركتي وتقرب عضني حيل خلاني أگمز
وخر مني دا أگوم مخلاني بقى لازمني وكاتم صوتي دموعي گامت تجري من وحدهم ويمهس بأذني
شبير :- شي مو گدو عش تتوازين على روحج
وخر ايده طلعت شهگة من صدري وصرت أحرك بجسمي واني أبجي :- وخر يلا ما اريدك حقير
- اخ عنيفة
عافني گمت منه وقبل لا أطلع انداريتله
- اني الك
- دمشي لج البوخة عود تهدد
أخذ تليفونه وگام طلع وهو يخابر صعدت لماما للغرفة لگيتها على وضعها العفتها بيه لازمة الموبايل وتحاول تريد تتصل على بان رفعت راسها شافتني
شدن :- هاي شبيها عيونج جنتي تبجين
نورجان :- اي دا ابجي على بان اشتاقيتلها
فتحتلي ايدها شمرت روحي بحضنها حضنتها حيل
- نلگاها والله فدار انطاني كلمة ومدام اتصلت وعرفنا رقمها يعني لزمنا راس الخيط كلها كم يوم وننجمع سوة
رفعت راسي :- ما ردت
تحسرت :- ماكو لهسه جهازها مغلق
- اذا لگيناها ترجع ويانا لو تروح لزوجها
- يا زوجها دخلي ألگاها وبنت امها وابوها التنطيها اله بعد شبية تخبلت وأرجعها بيدي لهالمجرم ابو العصابات هذا
سكتت شوي وحجيت :- ماما شلون صاير شكله
- وليش هالسؤال
- بس اريد أعرف دومكم تحجون عليه تگولون مو زين لعد بان شلون جانت عايشة وياه كل هاي الفترة
- ما أدري شمسويلها وشنو شافت عليه وهيج شاردة منه بليلة ظلمة بس الأعرفه المثل بيت شاكر مينعاش وياهم جبيرهم وصغيرهم
جان راسي بحضنها ومتمددة عالجرباية وهي مادة ايدها تمسد بشعري سمعنا صوت شبير من جوة
گمزت بسرعة وگفت
گالت :- اسم الله امي شبيج
- شُبير هنا عبالي طلع
- اي سمعته يصيحلج روحي شوفيه
ضليت واگفة مطنگرة شكت وضيگت عيونها
گالت :- شبيكم متعاركين
- خيولي الحقير
خزرتني :- عيب ماما شلون تحجين عليه هيج ميصير
- شوفي شسوة
حجيتها وشوفتها رگبتي مكان العضة ضحكت
- طاح حظج مفضوحة متنضم يمج سالفة
- ها والنوب انتِ هم علي
- ميصير بنتي كُلشي يصير بينج وبين زوجج تسولفينه مو كل حجاية لازم تنگال أعرف انتِ تحجيها على لاهيتج بس الغير راح يحسبلها غير حساب وانتِ التنذمين بعدين
- مو قصدي شي والله لأن انتِ سألتيني وحجيت
- أعرف حبيبتي بس بعد حاولي تتحذرين ولتحجين گدام اي واحد هالحجي خاصة علاقتج انتِ وشبير حتى لو جانت اني لو اختج هالأمور خاصة بينكم
- ماشي ماعيدها بعد
گامت گرصت خدي :- اوي تويتي الشطور امشي دننزل رجلج خبصنا
نزلنا اثنينا واني بعدني ضايجة منه لگيناه واگف بنص الصالة شافنا گال
شبير :- وينجن يول صار ساعة أنده
نورجان :- ماما جانت دتعلمني حتى ما أحـ..
دا أحجي وماما صاحت علي سكتتني
شدن :- الغبرة لعد صار ساعة شنحجي
خليت ايدي على حلگي :- نسيت والنبي
باوعلنا مستغرب :- شتحجون
- اني وبنتي شعليك انتَ
حك گصته :- ها هيج الحجي
نورجان :- ليش رجعت
- أخذتلج حجز عند دكتور تحضري بسرعة تانروح
ماما باوعتلنا بخوف :- ليش الدكتور
- خشمها مأذيها وأخاف ليطلع بيه كسر تانروح نفحصو قبل لا نرد للغربية
- اي هي من البارحة تشكي من التنفس مالها وحتى عيونها جانت مورمة اليوم يلا خف الورم
- خير ان شاء الله
- يحتاج أروح وياكم
- لا ارتاحي باجيتي ترى خالي موصي بيج عوفيني انا احير بالصفرة
ابتسمت :- ماشي بس شيصير وياكم خابرني ماريد أضل بقلق لحد مترجعون
- بعيني
- سالمة عيونك فدوة لگلبك
باوعلي :- يلا يول شو بعدج واگفة بسرعة خلصي هم يلا نوصل ونرد ورانا طريق
صعدت فوك ملابس ما عندي بس على بنطروني ولبست قميص من ماما اباوع لروحي بالمراية شكبره
مشطت شعري وشلته كعكة عالية رشيت عطر ونزلت شبير طلع قبلي يشغل السيارة وماما وگفت تعدلي بالقميص خلتلي عليه حزام وضيگته رتبته الي
طلعت صعدت يمه ورگعت الباب
صاح :- اشتعل أصلج عدا شدونة تاج وباج
باوعتله :- sorry
- احطو بــ..
سكت ودار وجهه ما كمل مشت السيارة والطريق خلصه مشغل أغاني سارية السواس ماعرف شنو السر الي مخليه يحبها هالگد بحيث ميسمع لغيرها بالسيارة
وصلنا گبال عمارة نزلنا قفل السيارة واخذني گايدني من ايدي صعدنا للطابق الثاني جانت بيها أكثر من عيادة
وگفنا گبال غرفة وعيني صارت عاللافتة أقرة اسم الدكتور الفلاني إختصاص أنف واذن وحنجرة
اجتنا السكرتيرة بنية شابة گلها :- السلام عليكم
ردت :- وعليكم السلام تفضل
- عندنا مراجعة عند الدكتور
- حاجز موعد
- اي
باوعتلي :- هاي زوجتك
گلها :- لا مرتي
ضلت البنية صافنة عليه
انطاها أسمي گلتله :- اي هذا نورجان حارث تگدرون تستريحون لبين ميخلص المراجع القبلكم واني أصيح بأسمكم
أشرلي حتى اگعد عالكرسي وهو ضل واگف ايده بجيب بنطرونه يهز برجله وعينه تتجول عالمكان
صارت گبالي شابة تطلع عشرينية انتبهت عينها على شبير وتتبسم رفعتله راسي والگفه هو هم يباوعلها
شافني بسرعة دار وجهه أحس دمي صار يغلي من جوة وتنفسي صار عالي الدمعة تشكلت بطرف عيني
انتبهلي دنك شوي يحجي بصوت ناصي :- شبلاج يولي
نترت بيه :- ليش تباوعلها
خزرني :- صوتج لج وين گاعدين
- عبالك مشفتك
جر نفس يتمالك أعصابه :- شنو هالأسلوب نورجان احجي عدل تاما أفين حظج گدام خلك الله
سكتت بعد محجيت بس الغصة صارت بگلبي وهو هم حسيته ضاج سحب باكيته راد يطلع جگارة وتذكر احنا وين
گال :- لتتحركين هسع اجيج ما اتأخر
حجاها وطلع وضلت هاي مگابلتني عيونها تلاحگه
صرت اهز برجلي حيل وصوت الحذاء وهو يطخ بالگاع واضح دقايق وطلعت السكرتيرة صاحتني باوعت للباب
شبير ما هو والبنية منتظرتني ما انتظرته گمت دخلت لعيادة الدكتور جان رجال كبير بالعمر شعره مشيب لابس نظارة وقميص كلاسك گاعد ورى مكتبه
ابتسملي وگال بهدوء :- مرحبا تفضلي
حجاها وأشرلي اگعد گعدت بتردد متوترة ممتعودة أتعامل ويَّ دكاترة لوحدي طول عمري ماما تحجي عني
الدكتور :- اسمج نورجان
هزيت راسي گال :- تفضلي باباتي سولفليلي من شنو تشكين
تشجعت وسولفتله عالألم اللي عندي گام فحصني ويلزم خشمي يضغط عليه وخرت راسي بسرعة متوجعة
گلي :- الألم قوي
- اي مدا اگدر أطخه حيل مأذيني
- عندج صعوبة بالتنفس
- اي
هز راسه :- وعندج تورم هم محاوط العين بس معندج تشوه ولا إنحراف وهذا جيد
من تقرب مني صار يركز بوجهي وطبك حواجبه
گال :- الألم هذا نتيجة ضرب متعمد
بلعت ريگي يمة شلون عرف
گتله :- اي
هز راسه بأسف :- لا حول ولا قوة الا بالله ورداية مثلج وبهالعمر تنضرب
دنك على أوراق ورجع سألني :- منو جاي وياج
- زوجي
رفع راسه بسرعة مثل الي انصدم
- انتِ متزوجة بابا
هزيت راسي مستغربة من رد فعله گام يستغفر
- طفلة بهالعمر أشمرها للزواج أهلج وين عنج وليش هيج حالج وعادي قابلين بهالوضع
گعد عالكرسي گدامي يستفسر مني أكثر
گال :- شلون هيج تنضربين وأهلج ساكتين الكدمات وآثار الضرب الي بوجهج واضحة جدا هذا مجرم السوة بيج هيج
سكتت ودنگت أحرك بأصابعي بتوتر گعد گبالي
گال :- احجي بابا ولتخافين المثل هذا ميصير ينسكت عليه ولازم يتحاسب على هالعنف هذا
رفعت راسي بسرعة گتله :- لا لا عمو عفية ما أگدر
- ليش خايفة باباتي اني اوگف وياج واشهد وأكتبلج بحالتج تقرير ونقدمه للمركز وتشتكين عليه لتسكتين عالظلم هذا واحد ظالم سيبندي ما لازم تسكتيله
- عمو هو ضابط بالداخلية حتى لو اشتكيت مراح يسووله شي
- وليش ميسووله شي شنو هو بلد تايه أمثاله صاروا يتقوون برتبهم على الناس المستضعفين اذا انتِ سكتي واني اسكت وغيرنا سكت على هالظلم شلون نبني هالبلد ونحس بالأمان إذا الظالم ماكل حق المظلوم
ضل يحجي ويحجي هذا مجرم هذا طاغي هذا كذا وغلطه كله مال مثقفين امتلى راسي بكلامه وشبه اقتنعت فاتت السكرتيرة
گالت :- دكتور هذا زوج المراجعة يريد يدخل
تقرب حجى بصوت ناصي :- مثل مگتلج بابا لتسكتين ولتخافين ابد خليج شجاعة واحنا كلنا بظهرج
أشرلها وقبل لتطلع انفتح الباب وفات شبير شافنا
گال :- السلام عليكم
محد رد والدكتور تجاهله ويباوعله بحدية وگعد على مكتبه وبده يكتب ويحاجيني
گال :- راح اكتب تقرير بحالتج وبوجهج تاخذينه للمركز وتشتكين عليه وهم يتصرفون وياه ويرجعولج حقج
شبير :- لحظة لك يا مركز يا تقرير شعتخرط انتَ
گال :- فوك ما انتَ انسان سيبندي ما عندك اسلوب بالحجي وشخص تافه وعديم إحترام
شبير عيونه صارت بگصته صاح :- يول لا تخليني ألعب اللابسو على راسك احجي عدل تاما ينگص لسانك أعرفك تعرفني عتگول عني هيج
گام وگف الدكتور بأنفعال :- اي نعم انتَ انسان مجرم بنية مثل الوردة تسوي بحالها هالشكل وين القانون عنك
صاح :- يول يا قانون لا تسودنوني لج نورجان شخارطة براسو شمفينة من وراي
الدكتور صار گدامي :- ما أسمحلك ولا من الممكن ان تمد ايدك عليها هي بحمايتي واني أترفع عن الكلام وياك لأن ما يشرفني
تخبل لزمه من ياخته وجره عليه ويصيح يرعد رعد المراجعين البرة والدكاترة كلها التمت بالعيادة يردونه يوخر وهو لازمه خانگه خنك اخذه سحله وطلع برة
يعت بيه ويتصايح وياه والدكتور يحجي مسكت بس ولا ينسمعله صوت من ورى صوت شبير العالي
رجلي گامت ترجف واني أباوعلهم متلازمين والناس تفاكك بيهم وشبير ميقبل يعوفه لزموا الدكتور وجروه وصاروا مجموعة بوجه شبير لازمينه ميخلوه يتقرب اله
عوف الدكتور واگلب عالعيادة شيل الكراسي كسرها اللافتة شيلها اعقجها واشمرها بالحايط المراجعين تطافروا وضلوا بس الدكاترة ومعاونيهم واگفين
واخذنه بصوته يصيح :- ولكم انا يگلي حرمتك بحمايتي اسگطو اليوم والله ما يفلت من ايدي
صرت ابجي وواگفة بالزاوية والدكاترة يحجون وياه حتى يهدئ بس وحش وثار وجيب اللي يسكته
- يهددني يشتكي بالمراكز ابن الـ..
گام يفشر ويسب ويجيب ويخلي وحجي مينلبس عليه ثوب گوة لزموه وواحد من الدكاترة الكبار وگف يحجي وياه بس يريد يفهم منه المشكلة حتى يوصلون لحل
شبير :- ما أعرفو بالقرآن الكريم استلمني من أول ما دخلت غرفتو أهدد واشعل وأنعل لا والله شو دنعل ابوك لابو منين ما طلعت لابو مرضعك
الدكتور سكته :- مو هالشكل الحجي ابني كُلشي ينحل بالتفاهم والهدوء
گوة سكتوه وخلوه يهدأ وضل يحجي وياهم الي تعارك وياه اختفى دقايق وشفته صار گبال شبير من بعيد
بيده تليفون رافعه يصور ويحجي :- السلام عليكم شوفوا هذا الأنسان الهمجي جايب زوجته متعرضه للعنف والاعتداء بالضرب من قبله ولما ردنا نشتكي عليه ونكتب تقرير بحالتها صار يصيح ويهدد وكسر العيادة علينا وخوف العالم
هو حجى هيج شبير غافلهم واگمز عليه شيل التليفون وارگعه بالحايط سويه طشار وصير فوگاه واوگعله ضرب وبوكسيات والدكاترة يجرجرون بيه
السكرتيرة وبنية ثانية صايرات على جهة يتعايطن واني حاشگة روحي بالزاوية ميتة خوف من منظر الدكتور جواه وجهه دماه تدمي صار مينشاف
انسحبت من الهوسة وطلعت اركض نزلت من العمارة وگفت عالرصيف آكل بأظافري أطگطك من الخوف
3 تعليق
مديت ايدي وطلعت تليفوني من جيبي وخابرت ماما
شدن :- ها نورجان بشري شگال الكم الدكتور
گمت ابجي واحجيلها :- ماما الحگي فدوة شُبير تعارك وياهم راح يموت الدكتور گولي لعمو فدار خلي يجي
انخبصت اكثر مني :- ولج فهميني شبيه ليش متعارك
- ما ادري فدوة بسرعة خلي عمو يجي يخلصه
هدتني وسألتني عالعنوان وصفتلها المكان واسم العيادة سدته بسرعة ضليت واگفة بمكاني دموعي تنزل
يمكن مرت نص ساعة بالهواي وطبگت سيارة مآب نزل منها عمو فدار ومآب شافوني اجوني بسرعة
صاح :- شصاير يولي شبير وينو
أشرتله فوك واني أرجف صعدوا اثنيهم ومآب قبل ليروح وصاني أصعد بالسيارة واسد الباب
سويت مثل مگال صعدت بسيارتهم وضليت گاعدة اباوع لأيدي جسمي لهسه يرجف وعيني عالعمارة
مرت ساعة الدنيا ظلمت واني گاعدة على أعصابي لحد ملمحتهم وهم ينزلون عمو فدار لازم شبير ويحجي وياه مبين عصبي وشبير يجاوبه
صاروا قريبين شبير شافني اجاني يمشي بهمة متحلفلي صار بوجهه مآب لازمه يمنعه يتقرب والخال صاح بيه
ما خلوه يوصلني خزرني وعض ايده وأشرلي بيده عود بسيطة عافهم ومشى لسيارته راح وراه مآب
اجاني عمو صعد السيارة واندارلي يباوعلي معاجبه
فدار :- هو هيج يالغبرة شابچتهم لحية بلحية ونازلة
دنگت دموعي بعيني گال :- دگومي حولي گومي هم عايز تبجين النوب يعينك الله يالبالي اهو المگرود ينبجي على حالو من ورى فواينج
گمت نزلت وصعدت يمه بالصدر وخلص الطريق اني احجيله الصار بالتفصيل وهو يرزل طول ما اني احجي
انداريتله :- عمو والله عبالي جان يقصد عمو سالم بكلامه معبالي على شبير
- وانتِ شكو حاجيتلو من الأصل شنو عرف ولف هو تاتزامطين بيه
درت وجهي بضوجة :- ما أدري هي صارت بعد
باوعلي :- ضلي هيج يول لا تدرين عن شي لحد متنداسين وتجيبين لروحج مصيبة محد عيگدر يخلصج منها من حدر هالثول البراسج
غصيت :- اني مو ثولة عمو
- حشى الثولات ظلمتهن بيج
من گال هيج متت بجي ودموعي مسكتت وهو احتار بيَّ لحد موصلنا للبيت نزلت بسرعة ركضت جوة
تلگتني ماما شمرت روحي بحضنها واشهك بجي
تخبلت من شافتني وتباوع بوجهي خاف صايرلي شي
14 تعليق
فدار :- لا تخافين ما بيها شي صحت بيها صيحتين لمصلحتها موتت روحها بالبجي
گعد يحجيلها عالصار وسبب المشكلة وكلها سوء فهم واني عفتهم يحجون وصعدت ليفوك بوجهي للجرباية
لشوي وصعدت ماما كملتها عليَّ حجت رزلت حسيتهم كلهم صاروا ضدي متت قهر أدري غلطت بس والله مجان قصدي ومعبالي توصل لهاي المواصيل
بالليل تحضرنا اني وماما حتى نرجع ويَّ شبير بس منزلت ابد ضليت حابسة روحي بالغرفة حتى الأكل صعدته ماما الي فوك
واگفة أفتر بالغرفة واسمع صوتهم يصيحولي من جوة
اخذت تليفوني ونزلت على كيف گوة أجر برجلي أخاف لا أوصل وأشوفه وصدك أول ما لمحني نازلة فز وگف
أشرلي :- ولج تعاي
ردت أرجع صاح بيه عمو فدار وخلاه يگعد وصاحلي حتى أنزل رحت صرت بظهر ماما لازمة بيها حيل
شدن :- شبيك شبير خلست البنية
- أگضبج لو ما أگضبج بعيني
ومآب يضحك عليه متشمت گام يطحن بروحه
گال :- ول نورجان انا تسويني مضحكه لمآب الحرمة ااخ والله وكت أجنزج والله
شدن :- ياا شو تهدد لتخليني هالمرة اني أسويها صدك واروح اشتكي عليك
- لا دخيلج الا انتِ ساعتها حتى خالي ميخلصني
عمو يسمعله ومدنك شفت أكتافه تهتز يضحك
گمنا حتى نطلع شبير وگف يسولف ويَّ مآب بالصالة
عمو وماما ماكو
استغربت گمت طلعت برة شفتهم واگفين يسولفون بالحديقة تقربت شوي صرت بزاوية وگفت واسمعلهم
اسمع ماما تگوله :- لا فدار الله يخليك لتحرجني تعرف اني بوضع ميسمح افكر بهيج موضوع هسه كُلش مو وكتها والنبي
- شنو المانع ضلي عندي هين وأرد أعقد عليج تاتصيرين على ذمتي وبحمايتي ساعتها ابن وامو وابوه اليگربلج
- الوقت مو مناسب بنتي ما أندلها وين وماعرف شنو مصيرها واني هم ماعرف شسوي أحس روحي مربطة ما اگدر اتحرك لأي مكان من ورى ذول
- عجل ليش انا جاي أگلج نعقد ساعتها تصيرين بأسمي اليفكر بس تفكير انه يتدنالج يعني يدوسلي على طرف ويا ويلو اليگرب على واحد من أهل بيتي
- ما أدري فدار ماريد نرجع لنقطة البداية هم بالسر ونتختل من أهلك حتى ليعرفون ماريد هيج
- يول شو انتِ متعرفين تحجين نتختل شنو بايك ناهب غير زواج بالحلال والعندو اعتراض يجي ويواجهني ويحجي بوجهي تاشوف منو اليفتح حلگو ويعترض
- مو وكتها والله خلي أشوف بان وين هسه واطمئن عليها ومناك رايدة أرجع للشمال عفت شغلي كله وراي مدري الگاهم فاصليني
فدار :- دگعدي يولي ترجع للشمال بكيفها هي
ضحكت :- حلوة هاي لعد بكيف منو
- اششش سدي هالسالفة لا رجعة ولا غيرو روحي هساع ردي للغربية اگعدي يم نسابتج ومن نلگى بنتج ذيج المفينة يصير الي حجي ثاني وياج
دخلت بسرعة للبيت صار بوجهي شبير انكتمت
لزمني من طرف ملابسي :- تعاي لج وين جنتي
نورجان :- بالحديقة شبيك
باوع شاف ماما وعمو فدار واگفين ورجع علي
- هم رجعتي تتسمعين طايحة الحظ متجوزين من هالطبع الجايف هذا
- ترى مسمعت شي شبيك
- گولي والله
- لا اني ما أحلف
5 تعليق
عض اصبعه بقهر وهو يتوعد :- نوصل لو منوصل
عمو فدار وگف وصى شبير علينا وگله يخلي عينه عالطريق وگال من توصلون خابروني ركبنا السيارة
سلمنا ومشينا راجعين للغربية
وصلنا لهناك بسرعة طريق سريع وفارغ جانت دنيا الليل والساعة عبرت 2 جنت نعسانة حيل منمت بالسيارة
وگف گبال البوابة ونزل فتحها ودخل السيارة أشرلنا ننزل وهو رجع راح للبوابة حتى يسدها
دخلنا اني وماما أضوية المطبخ مفتوحة طبينا جوة وغرفة عمة شيخة هم مشتغلة الأضوية حست علينا
انفتح باب الغرفة وتلگتنا الظاهر عندها علم بجيتنا
سلمت عليها جنت گوة اباوع گدامي من النعاس حتى ماما ولا النا قابلية للحجي وهي هم ما سألتنا تدري بينا تعبانين جانت محظرة الغرفة الي بصف غرفتها لماما
غرفة مخصصيها للخطار الي يجيهم لو اذا وحدة من خواتهم اجت ورادت تبات لو واحد من نسابتهم
دخلت اني بيها مصعدت لغرفتي وبوجهي عالجرباية تمددت وغمضت عيوني بتعب متكسرة من السيارة
أحس بحركة ماما فوك راسي وهي تحاجيني
شدن :- ماما گومي غيري ملابسج لتنامين بالبنطرون مترتاحين بالنومة
مرديت عليها وهي تروح منا وتجي منا تطلعلها ملابس
اندك باب الغرفة راحت فتحته وسمعت صوته يسألها عني :- نورجان هين
- اي هيانها نامت من التعب حبيبتي
- ها متصعد يعني
- لا خليها هنا نايمة متسوى بعد تگوم
- اخذي راحتج باجيتي تصبحين على خير
- تلاگي الخير
راح ورجعتلي ماما فتحت عيوني اباوعلها شايلة هدومها وواگفة صافنة بالغرفة
نورجان :- شبيج ماما
باوعتلي :- ها هاي انتِ گاعدة واني اگول لشبير نامت
- خليه أحسن يريد يكتلني
- هاي شلج بيها
- وحق الله
- دنامي نامي انتِ طفيتي بس اگولج اريد اسبح متت من التعب ماعرف انام اذا ملاح جسمي مَي
أشرتلها عالباب برة الحمام بعدها تحجي واندگت الباب راحت فتحته طلعت عمة شيخة تسأل اذا محتاجة شي
گلتلها علمود السبح أخذتها لحمام غرفتها وعافتني
توني غفيت وغمضت عيوني حسيت بصوت الباب وهو ينفتح ما اهتميت النعاس جان طاغي علي
فزيت واني أحس بيه يشيلني تعلگت بسرعة برگبته وقبل لا أفتح حلگي واحجي خزرني يسكتني
شبير :- اششش ولا نفس الناس نايمة بلا فضايح
- نزلني شُبير والنبي أصرخ مو أحجي وياك رجعني للغرفة يلا ماريد اروح وياك عوفني
ولا عبالك أحجي متجاهلني تمامًا صعد الدرج واني أحجي
گتله :- نزلني يلا راح اوگع
وگف بنص الدرج وسوة روحه ديوگعني چلبت بيه حيل متت خوف عبالي صدك راح ننگلب
91 تعليق
شبير :- ها أنزلج
- لا عليك النبي والله سكتت
- عفية حلگج صميه
صعد فوك ودخل للغرفة ودفع الباب برجله مشى شمرني عالجرباية ورجع للباب حتى يقفله
اجاني رفعت اصبعي بتهديد :- باوع شُبير وكلام الله اذا تقربت لو سويت شي أصرخ وألم البيت عليك
ما اهتم وتقدم وگف گبالي متخصر لطشت روحي ليورة
گال :- الفاهية انا معنفج ولج يمتى مديت ايدي عليج وطگيتج
- لا والله محجيت هيج
- عجل شحجيتي
حجاها وهو يتقربلي صار عالجرباية وجهه بوجهي
گال :- تهددين وتفزعين بالناس يشتكون علي بالمراكز ولج انا تالي وكت أصير مضحك لليسوى والميسوى
- لا مو قصدي والله
- عجل شنو فهميني
اختنگت مگدرت احجي دنگت ونزلت دموعي گام ينافخ يستغفر
گال :- هسه عش هالبجي شگتلج انا ونزلتيهن بسرعة
رديت من بين دموعي :- مو قصدي الصار والله هو ما افتهمني عدل وصار يحجي براسي عبالي على عمو
مد ايده يمسح دموعي :- دكافي عاد كافي وجرتي گلبي بدموعج الا دموع البنات يولي ما أستحملها
رفعت راسي باوعتله :- اني آسفة مراح أعيدها بعد
اخذني لحضنه شبكته حيل باسني بشعري وهو يگول
- يا يمة جعل محد غيرج تعتذر
ثاني يوم گعدت جانت دنيا الظهر ماخذتني النومة ومحاسة على نفسي حتى للمدرسة مرايحة
شبير ما هو مبدل وطالع لشغله گمت اخذت ملابسي واخذت شاور بدلت ومشطت ونزلت جوة اباوع بالبيت
51 تعليق
عمة شيخة بالمطبخ جانت دتحضر بالأكل وماما واگفة وياها تعاونها عالخفيف ويسولفن بموضوع بان
مشيت للأستقبال أسمع صوت عمو تيم وهو يضحك
دخلت شفتهم گاعدين در بملابسها المدرسية توها راجعة وعلي بالگاع يسوي شناو وعمو گاعد گباله يحاجيه ويضحك
سلمت عليهم ورحت حضنت در مشتاقتلها
تيم الله :- يابا عاش من شافج شنو وين غطيتي كل هذا نوم ولج
- تعبانة عمو محسيت على نفسي
هز راسه :- يابا حگج
گعدت وياهم وصار يسألني
گال :- اختج هاي وين صارت ما وصلكم شي عنها
نورجان :- اي خابرت ماما البارحة من جنا بـ بيت عمو فدار وطمنتنا عليها وبعدها اختفت ومردت على اتصالاتنا
- لا يابا وينها بالله وين ضامة روحها
- شُبير گال دايحة مدري بيا دولة وسايگة على شواربنا عايفتنا ندور وراها
فتح عيونه :- مسافرة
هزيت راسي :- اي بس منعرف وين ما ترد علينا
- انا اخو شيخة وهيج لحالها مسافرة بدون لتگول
- اي
هز ايده :- نسوان سايبة وعلي الفحل
- هي بان هيج من زمان متعرفها بشنو تفكر لو شنو براسها متحس الا جايبة مصيبة
- وشگد عمرها هاي
- بگدي
- يعني توم عجل شو متشبهيها على هالعرامة طينة
در الزهراء :- شفت صورها بابا هن بس بالشكل يتشابهن بالطبع كل وحدة صايرة بكتر
- وتالي شلون
نورجان :- ما ادري عمو فدار گال لمآب يشوف رقمها ويطلع الموقع ديشوفوها وين گاعدة
35 تعليق
صبوا الغدة وگعدنا كل احنا ناكل وعمو يسأل ماما على بان أكثر ويستفسر منها وهي ترده
شدن :- والله مدا أعرف راسي من رجلي من البارحة أخابر اريد أحصلها متجاوبني موبايلها مغلق بالي كله يمها اخاف لا صاير عليها شي
- وشلون دبرتها وسافرت لحالها
- ما أدري والله هي بيوم المهزومة من زوجها جانوا بأربيل تلگاها ماخذة الجواز وطالعة
- السالفة بيها انَّ
- شلون يعني
- وحدة بعمرها مهزومة بليلة ظلمة ومسافرة لدولة ثانية متدبرها هاي لوحدها الا اذا اكو واحد مساعدها تدفع وتحجز ومصعدها الطيارة ورايحة
صفنت ماما شوي بكلامه
- بس هي مگالتلي ولا جابتلي طاري أحد وياها
- الله يخليج ام بان مكالمة طولها كلو 5 دقايق شعتفهمين منها
سكتت بس جان كلام عمو صحيح گامت تضرب صفنات
حس عليها گلها :- تهدي الا ما ينعرف مكانها خالي والولد ورة الموضوع اعتبريه محلول ان شاء الله
- ان شاء الله يا رب كُلش دا أثگل عليكم اني ومشاكلي من جهة خالك فدار ومن جهة جاية گاعدة بـ بيتك
- عيب هالحجي انتِ من الأهل اذا ما شالتج الگاع تشيلج عيونا
- فدوة لگلبك متقصرون مشهودتلكم
كملنا أكل وصار يسألني على الدوام ودرجاتي اني من يجيبون طاري المدرسة بطني تگوم تمغصني
تيم :- غياباتج كثرن يولي
32 تعليق
- أدري عمو بس اليوم وباجر وبعد هاهية ارجع اداوم
- وباجر لازم هم ناوية تغيبين
- اي تعبانة گلت اطبگهم الأحد والثنين
علي خيبر :- الثلاثاء بدربج لا يزعل عليج
- انكتم وانتِ هذا الحجي نگعيه واشربي مايو الباجر تگعدين من الصبح تروحين حالج حال در
- والله تعبانة بس باجر
- ماكو ولا يوم بعد واليوم خليتج براحتج لأن جاية من طريق گلت خطية عترتاح منا وجاي انا أوصلجن واردجن بيدي تاشوف منو التغيب بعد
طنگرت وحواجبي تطابگت بسرعة بين علي
رفعلي حاجبه :- يول خاف ما عاجبج كلامي
باوعتله بسرعة وهزيت راسي
- لا والله أسوي التگوله لباجر اگعد أبدل واروح أداوم
- عفية لمصلحتج احجي بابا أحسن ما تنزل ورقة فصل بيج من كثر الغيابات ساعتها صدك يا ويلج مني
انخلست من يحجي يفتح عيونه حيل عبالك يخوزر مفتحت حلگي بعد رجع يسألني على درجاتي
وجانت كسيفة وهو يعددلي بالمواد واني اگله الدرجة
سألني عالرياضيات گتله :- ماخذه بيه 13 من 50
علي خيبر :- يول ضمي درجتج عيون الناس ما ترحم
باوعتله بضوجة ودرت وجهي منه
تيم :- لا حول الله انتِ حالتج فوق الحرجة عش هيج درجاتج بالنازل
شدن :- متقرة الا واحد يگعدلها گعدة ويگابلها
- عجل رجلها المصون شنو شغلو ميگعد يدرسج
- ميقبل عمو كلما أروحله يگولي ماعرف
ماما گالت :- الله يخلي بان قبل تگعد قبلها تدرس الموضوع وتفهمه حتى تجي تشرحلها
تيم :- تبين عرمة وذكية أكثر من الطينة العدنا
ضحكت :- طينة بس والله فطيرة وماكو بگلبها
باوعلي عمو مبتسم :- خوما زعلتي ولج
ابتسمت وهزيت راسي لا
گال :- منا وجاي شتحتاجين شكو شي ما فاهمتو تجيني انا أشرحو الج لتترددين بحجة المستحة
كملنا أكل وصرنا ننقل المواعين عالمطبخ ماما واگفة تسولف وياي وعينها بعمو تيم
شدن :- شگد مجنت لازمة گلبي من ناحيتج هسه أحس هم وانزاح من صدري من شفت تعاملهم وياج
33 تعليق
- هم حبابين خاصة عمو تيم تعامله هيج وي الكل
- جعتله مثل اخوي ينطي شبه لخاله فدار
- لا عمو تيم أحلى
- يشبهه والله بس الكاريزما طاغية
- أبو شركة لو تشوفيه كم تبديله باليوم يبدل
- اي يلمع محصن بالله
مر يومين رجعت للدوام وفايتتني هواي دروس ومناك اني هم جنت غايبة تكومن علي من كل جهة وصرت ما ألحك احك راسي امتحانات شهرية وتحاضير
شبير بشغله طول اليوم ودر ملتهية هم تدرس ماما حايرة بـسالفة بان مبطلت اتصالات بعمو فدار
محد جان متفرغلي منهم حتى يدرسني گابلت كتبي وگعدت ابجي بغرفتي فاتت ماما شافتني اجتني
شدن :- ها ولج شكو ليش تبجين
مسحت دموعي :- عندي امتحان ومدا أفتهم شي من المادة والباجر راح أرسب
- ليش يا امي يا حبيبتي أنعل ابو الدراسة التنزل دموعج تعالي شو انطيني اشوف اني اگعدلج
گعدت يمي بالگاع وصارت تگلب بالكتاب تريد تتذكر المواضيع حتى تشرحلي يا دوب قرتني كم موضوع والباقي عافته المنهج كله متغير وين تتذكر ..
