رواية حجرة التهميش الفصل السادس عشر بقلم اساور حسين
﷽
معقوله تنسَانِي بكَّلبي حطَ خنجرك اذيّني
وانه احتمَل بسَ لا تحب ثانِي
⋆˚☆˖°⋆｡° ✮˖ ࣪ ⊹⋆.˚ ⋆˚☆˖°⋆｡° ✮˖ ࣪ ⊹⋆.˚
مسح گصته اللي بلشت تتعرگ ونضراته مركزه بيه يدرس رد فعلي ويحزر افكار عقلي جـر نفس وزفره بحيـرة وهو بيـن متردد واثق مقرر ونافر كلها ثواني وانصدمـت ، بلعـت ريگي ورعشت ايدي متوتـرة مذهـولة من وگـع كلامـة على مسمعي وصعقني بـ عــرض قائـم على لا شيء أصلـة غاية وهـدف واحد نطقـه بجفـاء بكُـل ثكل ومن دون رضـى تـام ولا مُسمى مُجــــرد تمهيـد يتــم بين طرفيــــن!!!
كـافل : ترضين نتـزوج ؟
شهگت وجسمي كله وگف وعقلي تشنج اباوعله اريد افترسه ، ومن نظراتي
بلع ريگه عـدل گعدته اكثر وسبقني بالكلام حتى يفهمني وجهة نظره
كـافل : بموجب القانون العراقي يحـاسب مدير دار الأناث
اذا تزوج او ينكشف عنده علاقة بنزيله مستفيدة بالدار
يحاكم ويتجرد من حقه كمدير ، بس بحالتچ صعب أأمن
عليچ عند احد غيري وضروري تسلمين الأمانة بيـد خوالچ
واعرف مقتل امچ شگد حرج وميصير نمشي بأي دعوة اذا
خوالچ ماكو اقترحت عليچ هل اقتراح
يحچي ويفهم وكل شوية يتقدم حتى تتوضح عندي الصورة وعيونه تنتقل بين وجهي وعصرت ايدي اللي مردت اصابعي حتى اقاوم واستمـع لتبريره
كـافل : واقترحت على سـرگال يحولچ الدار المسنين متطوعه
ويصير هوَ المدير المسؤول عنچ حتى تسقط مسؤوليتچ مني
واگدر اقدم طلب زواج للقاضي ويوافق بعدها اگدر اطلع
الچ جواز ونسافر نبلغهم بالجنطة ومحتواها
اشرت على روحي بيدي گتله بكل هدوء
دُجى : تسـاومني !!!
قبض ايده وهو يقلص عينه يخزرني رافض كلمتي واستعجل بكلامة وبعده على نفس هدوئه رفعلي اصبعه يحذرني وفتح تلفونه يشوفني گال
كـافل : تواصلت ويه خالچ وهاي محادثة تثبت كلامي
مقتنعين انتِ شردتي ويه واحد وعمامچ مقدمين الهم
نفس البلاغ اللي قدمتي على غيث ومرصد بيوم ما خلصتي
منهم قبل لا تجين للدار من لزموكم بالدورية ومستسلمين
الفكرة انتِ ميتة عمامچ موصلين الهم انتِ انتهيتي ميتة
ما ألچ وجود
والصدمة كفختني وصارت صدمتين عرض الزواج وأتبعه خبر موتي
من اعز ناسي موتوني واني بعز حاجتي الهم ما رحموني
كـافل : مضطر اسفرچ حتى يصدگوني ، وماعندي كل غاية
وياچ غير اساعدچ وافيدچ يا بنت الناس والشاهد عليه ربي
نيتي وياچ بيضه ما اساومچ ولا استغلّ وضعچ وشوكت
ماتحبين تنفصلين ما ادور وياچ منفعه ويجرالچ شگلتي
فـاض صبـري وخلـص بأخر كلمة نطق بيهـا بيناتنا طبلة عليها فازة ورد
جريتهـا ورگعتها بالحـايط ورا وشلت الثاني رگعتها بجام الطبلة تناثرر
گزازهـا جوه حذائه ، رجع ظهره ساند عكوس ايده على رجله وحاني ظهره
ما يباوعلي وجهه من العصبية صار دم قابض ايده بكل قوته
جريت الملفات شمرتهن والأقلام رگعت سلتهن بالحايط وعلى طرف المكتب تبلام صغير مشتغل جريته ورگعته بجام اللوكر الكزاز وعج الكزاز وصوتـه بالمكـان بكبره ما تحرك وسكن بمكانه ماخفت منه رحت مقابيله وبوضوح
اشـرت على مكتبـه وحالته المأساويه وسألته
دُجى : وصلك جـوابي استـاذ كـافل ؟
هنـا گدر يرفع راسـه وركز نظراته بركوز نظراتي ضاغط على اعصابه
محتقن على اخيـر مشنج كل جسمـه وعيونه تنط شرار غضب ورد ببرود
كـافل : وصـل
هزيت راسي زين وصلك الجـواب ، بدون حرف زيادة عفتـه بنص الخراب
يتفـرج عليه زيـن حـتى يعـرف الله حـق ودجُى راعـد مـو مـن البنـات اللي تتفـاوض ويستغلهـا بحـجة يـريـد يساعدهـا ، ومرة ثانية يحط حد ويخاف يفكر يتجرأ ونفسه تدفعه يفتح لو يفكر لو يخليني على بـاله وتوصله صورة مـو مـن البنـات تفـرح وتصفگ لـو مـديـر رادهــا
طلعـت وطبگت البـاب ورايَّ واشـوف اكـو بنات بالممـر اختنگت واكثرهم بالحديقة بـرا ومكتبـه بعيد مايوصل الهم الصـوت ، اول ما صعدت وجثتي
كلها ترجف طلعت بوجهي فنـار وياها منـارة گاعدات على شباك الفوك
متأكدة سمعوا وبقوا يخططون اشكال الوان افكار سوده براسهن
فنـار : وين موليه بنت المصرية ؟
كملت دربي اصعد على درج سريع وعطت بيها
دُجى: الجهنم ، تجين ويايَّ؟
فنـار : لا ولّي وحدچ
دخلت للمنام شمرت حجابي وحتى شعري گطعته وسكـرة وياها رونق
فاتوا يركضون گوه يجرون النفس وطبگوا الباب وراهن يسألني
سُكرة : شصاير دُجى البنات جوا كلها تحجي
يگولون استاذ كافل طردچ من المكتب
رونق : يگولون كسر المكتب عليچ شنو صار
شسويتي ليش يكسر وعصبي عزا العزاني
اخذت بطل الماي اغسل بوجهي وگعدت على جرباية ارگع برجلي
زورگتها ورفعت اصبعي اعض بي دمي يفور عليه اتذكر شكله
وحال المكتب واحس روحي مقصره بحقه المفروض اكمل
دُجى: يريد يتزوجني ابو نفس الدنيه
سُكرة: تشاقين !!!
_ هذا وجهه وحده تشاقه ويــاچ
رونق : يا بنت المحظوظة
دُجى: كسرت المكتب على راسـه
رونق : هسة صدك تشاقة ؟!
دُجى : شلون يخليني براسه ؟ ليش فكر اقبل بي ليش اقبل اتزوجـه ؟ ولـچ گلبي محروگ امي صار أشهر ميته وحقها
ضايع بالرجلين واحير شلون ارجع حقها يا زواج هذا سُكرة
والقران كل ساعة تمر اموت الف موته تحسين بيه انتِ ؟
والله اضحك جذب وامشي وياكم جذب مضروبه على راسي خسرت حياتي واحلامي كلها خلي نفسكم بمكاني
كلامة يتعدد براسي موضوع موضوع يتفصل شهگت شهگه
لزمت گلبي احس بي يريد يوگف مهضومه على روحي
_ لچ سُكرة اعز ناسي موتوني ومحتاجتهم والقران
تبهذلت اريد اهلي حتى لو غلط اريدهم رجعوني الحياتي
بيا عين ارجع وهمه يگولون دُجى ماتت بنفسي اشوف ابوية
واگله من شوكت متت بگلبك وهنت عليك تموتني من جنت
طفلة لو ورا ما باگ امي وموتوهـا
حضنتني تصبّر بيَّ خليت راسي على صدرها ابجي على حضي
اجر النفس گوه مجبوره عفتها وگفت امشي محروگ دمي
دُجى : اريد اطلع اهج من الدار وين اولي
سُكرة : احجيلي الصار حتى افتهم فدوة اروحلچ
دُجى گلبي نار عليچ فهميني شصار جوه بالمكتب
اخذت نفس اختنگت احجي الهن گاعدات صافنات گالت
رونق : من كسرتي المكتب ضربچ ؟
دُجى : ما حجه حرف ابد
رونق : كلمن وحظها وقسّمتها بالدنيا
دُجى : كون انزل هسة لأستاذ خيبر اشكيله على مدير
سُكرة : ليش مـا وافقتي حتى يساعدچ ؟
دُجى: اعرف نيته يساعدني واللي براسه مو طمع
ولا استغلال وادري بي يعرف خطورة الجنطه ويمكن
امانتها صعبة عليهويكفي هوَ يساعد ويحمي بس
ما يناسبني ولا مثل مواصفات الرجل لبراسي
راسمتها ، واهله لا ارهم وياهم ولا يرهمولي
وعيب يفكر اتزوجه عيب
رونق : يعني يعلن الزواج ؟
_ لا ، لأن گال شوكت ماتريدين ننفصل
سُكرة : لا تزعلين مني والله العظيم احجي لمصلحتچ
بس اتمنى لو مفكرة قبل الخراب الصار ياريت لو
موافقة حتى تنحل هواي مشاكل بحياتج اولهم سفرة
خوالچ والجنطة وهم تخلصين من الدار وشرهم
دُجى: شوفي اني عندي الزواج فد شي مقدس
وبي احدد الباقي من حياتي لو اختار صح
واتعوض بعد العذاب لو ادمر روحي مثل امي
لازم افكر واختار وما استعجل ومن اتأكد وگلبي
يدگ واحب صدگ والرجال اللي يدخل حياتي
اختبره واقتنع بي واعرفه كفو ويستاهل اقبل
بذاك الوكت اتزوج واني مرتاحة اخذت زلمة
سُكرة: شنـو راح تسووين ؟
دُجى: گولي هوَ شنو راح يتصرف بعد تصرفي
وبيا عقـاب يعاقبني واحتمال يرفع ايده من حمايتي
ويخليني مكفخه بيدهم ، خايفة وضايعة واريد اشرد
هـل يـوم ساعاته مـر ويمشن على گلبي ، بقيت محبوسة مانزلت اسبوع كامل غير بس الوجبات الأكل واصعد حتى الورشات والدروس تركتهن متجنبة
الكل ومحتارة بروحي وبسكرة وخوفها على اخوها ، وعلى طول السبع ايام الفاتت ماشفته بعـد ولا لمحته حتى أخباره نگطعت ما اسمعهن ارتاحيت منه
وبلشت دوام اجاني انقاذ حتى اطلع من الدار وأخلص منهم ومن شرهم
جهزتنا باجي كلثوم قبل بيوم بملابس وقرطاسية وجنط عوضتنا على قديمات
ومن الصبح اجت باصات نقلت كل بنية المدرستها وعددنا قليل مو الكل مسموح الهن يطلعون برا الدار
دخلت المدرسة ويايَّ سُكرة بنفس الصف بس رونق خـامس داومت اشوفها بالفرصة نلتم ، من اول يوم الدروس والواجبات بدت ولو مو عيب المدرسات
ينطونا امتحان نريد نسيطر مايخلون مجال كل مدرسة مادة تدخل تشرح درس وتريد تحضير وكتابة وحفظ ، رجعنا للدار راسنا طبل اكلت بملابسي
وصعدت اخذت حمام ونمت گعدت قبل الدوام بتلاث ساعات كملت الدروس
وسكرة بصفي ورونق ساحلتها كدامي ختمناها وطلعنا للمدرسة
وخلص اول اسبوع ضغطت على نفسي اسيطر على مادة وسكرة جانت
بين تدرس وبين تنتظر خبر على اخوها اللي اختفى هو ولهب وضاعت اخباره ، وبعد هل اسبوع منتظرين الخط بالحديقة ودخل استاذ خيبر
من شافنا ابتسم واجه علينا مخلي ايده على عيونه الشمس عالية
خيـبر: ماشاءالله لعابات بنياتي شلونكم يالمختفيات
صايرات ثگيلات ما تعبرونا شنو هاي يابه على كيفكم
ويانا ترا احنا عم خوش ناس هاي لو دخلتوا جامعة
شتسووين بينا اطردونا من الدار
سُكرة : هههههههه شايف شصاير بينا استاذ
ما مخلينا نتنفس راح يبلشن امتحانات شلون ماتعرف
خيـبر : حقكم والله الله يساعدكم ، بس اي صعوبة تواجهكم
موجود بمكتبي تجون واني اساعدكم امتحان موضوع
اشرحه الهاي الوجوه الحلوة الترد الروح
منزله راسي ملتهيه بالكتاب لا باوعت عليه ولا حاجيته گال
خيبر : چا حتى اني زعلانه مني ما تسلمين عليَّ ؟
دُجى : لا استاذ شعندي وياك بس أراجع المادة ودوخه
زعل من تصرفي هز راسه سلم على بنات وراح للمكتب وسكرة رادت
تحجي سكتتها وطلعت للخط وبقيت ادرس طول اليوم اضيع الوكت
وعلى هل حال بين دراستي والدار خلصت اول شهرين بالمدرسه وعلى
طول هل فترة ما لمحت استاذ كـافل ولا يوم ولا نسمع اخبار الدار بكبره
ملتهي ناس بالدراسة وبنات بالورشات وبنات هواي طلعوا متطوعات على
باقي الدور
سُكرة ...
بـاص يمشي وايام تعدي وعقلي وگلبي عند اخويـة ومن بعد شهرين جرعت بيهن انواع الخوف والقهر وصلت للمدرسة وقبل لا ادخلهـا سمعت صوت مو غريب عليه صـاح من بعيد
لهـب : سُكرة
التفتت بكل جسمي من شفتـه عفت البنات ورحت عليَّ اركض وهوَ وگف
منتظرني اوصله وعيونه تلمع فصلتني تفصيل الحـد ما وگفت مقابيله
سُكرة : وين رحتوا اخوية وينه لهب شسويتوا بي
لهـب : مشتاقلچ روحي متعذبه عليچ
رجعت خطوة ورفعت راسي اباوعله واحس الدم تجمع بخدودي
بعدت نظرتي عنه شفت بسيارته واحد يسوق وعيونه علينه گتله
سُكرة : ظل بالي على متعب وينه فدوة ؟
لهب : واني ما ظل بالچ عليَّ ؟
دنگت راسي ما جاوبت ودرت ورايَّ من سمعت
دُجى: السلام عليكم
لهب : هلا خوية
دُجى : وين اختفيت بأخوها غير تجي اطمنها ؟
نـزل زلمـة من السيارة وگف مستند عليهـا وعيونه علينا
لهـب : متعب رجعته البارحة بليل يريد يشوفچ
المفروض مانرجع ابوي يدوره حتى انتِ دوامچ
غلط شلون يقبلون تداومين ويعرفون خطورتها
سُكرة : ليش ما اجه وياك ؟
لهب : ميصير يا كلبي والله اخاف يوگع بيدهم
وينقهر كلبچ عليَّ مخلي بعيوني الخـاطر عيونچ
سُكرة : اريد اشوفه الله يخليك
لهـب : اجيت اخذچ حتى تشوفي
دُجى : لا والف لا سُكرة ماتروح لمكان وياكم
ودُجى عيونها بهامتها صارت من ادخل الزلمة وياه
_ اعصابچ يابه اعصابچ خففي مستوى اعصابچ
دُجى : وانتَ ياهو مالتك ؟
لهـب : جهيـد اصعد بالسيارة مو وكتك
جهيد : ماتسمعها نفخت بوجهي جنها بزون
دُجى : يمتى نفخت بوجهك ؟
_ مو تگولين ياهو مالتك ؟
_ اي صدك ياهو مالتك
_ ولچ انتِ ياهو مالتچ ؟
_ انتَ ياهو مالتك
راح لهب يدفع بي للسيارة وهوَ هلكبره ولا يندفع يترادد
جريتها من ايدها وهي دفعت ايدي وجرتني ماترضى اروح
جهيد : ما اصعد وعلي واگف هنا خليها هي تروح
دُجى : خلي متعب يجي سُكرة ماتروح وياك
طلع لهب تلفونه اتصل شوية ورد عليَّ وقدم ايده اخذت التلفون وحجيت
سُكرة : الو
متعب : بعد اخوچ اروحن فدوة لصوتچ شلونچ
_ گلبي يمك
_ وگلبي يمـچ خويـة
مسحت دموعي ومشيت ألوب من أحاجي واسمعه تعبان
سُكرة: اريد اشوفك
_ دزيت لهــب ياخذج تعاليلي لأن
صعبة طلعتي من البيت يكتلوني
من سمعت متعب بنفسه گال اجي وياه قبلت وسديت الخط گتله
سُكرة : اجي وياك
دُجى : مايصير على اقل بلغي استاذ خيبر
لهب : مايحتاج قبل لا يكمل دوامكم ارجعها هنا
راح صاحبة يركب بالسيارة ويحاجي بلهب يگله
جهيد : هاي مو صاحبتها تخاف عليها
ماتخاف عليَّ مخليني بحلگ الموت
شلت جنطتي خليتها بيد دُجى ، ولهب صعد صاحبة بالسيارة ورجع بصفي فتحلي الباب منتظرني اصعـد لزمت دُجى ايدي وهمست
_ خليهم يجون للدار ليش تروحين وياهم
_ لا تخافين هو متعب لو ما مأمن منه مايقبل اجي وياه
خلي جنطتي يمچ قبل لا يخلص الدوام ارجع
بقيت واگفه صعدت ولهب طبگ الباب بقيت اباوع عليها ورونق من بعيد واگفه واتابع وتخاف احد يشوفنا ونترزل ، حرك السيارة وشوية شوية تبتعد دُجى على نظراتي فر السيارة بالفرع وصاح بي
لهب : مو عيب عليك تعارك البنية بنص الشارع
جهيد : ولك تنفخ بوجهي ، ماتستحي هي تعاركني بالشارع
لو نگلبت الدنيا لازم الزلم تستحي والنسوان تتصالف
لهب : دسكت يمعود وصلنا لا تسويلنا مصيبة
جهيد : اني غلطان اجيت وياك مو جنت منطمر
بس امـانة الله البنية خـوش بنية
خزره لهب وطگ رگبته وهذا شغل جكاره وينافخ بيها حسبه براسه صارت
عبرنا المدرسة والمنطقة ساعة وصلنا البيت صغير نزل جهيد قبلنـا فتح الباب قبل لا ننزل لهب گال
_ هذا بيته باقين عنده هل يومين ونرجع
نسافر اخاف على متعب هنا مو أمان
قبل لا انزل هو نزل فتح الباب وظل واگف حتى يمنعني انزل گال
_ وانتِ سكر خايف عليچ تبقين هنا خليني اعقد عليچ
واخذچ يمي تعبت من التفكير والخوف عليچ
سُكرة : بالبداية اشوف اخوية بعدين احاجيك
عيوني راحت على ايده من تقربت من شفتي قبل لا يطخها فزيت ورجعت
ذبلت عيـونه مركز بيَّ بلع ريگه ونزل جسمه يحاجيني بصوت خـافت
لهـب : محترگ عليهن
بعدت ايده بيدي دفعتها ودنيت روحي على باب الثاني صاح
_ انتظري
راح على باب الثاني فتحه نزلت وخايفة رجع صاحبة صعد بالسيارة
ودخلنا لگيت متعب بالگراج يريد يطلع من سمع السيارة جرني بحضنه
يغطّيني حاضني بكل قوته ويمسح على ظهري ما يعوفني حتى ما يحجي
حضن وجهي بيده بـاس راسي ورجع حضني
متعب : خفت عليچ خوف الله وحده يعلم بحالي
هل مرة اخذچ ويايَّ تسافرين ما تبقين هنا ابد والله
خليت راسي على جتفه وغمضت ودگات گلبي هدأت من بعد ايام كملتها بالموت ماجنت اگدر احجي بس بجيت وهوَ لزمني فوتني على استقبال
گعدت وهو بصفي لازم بيدي مايعوفها
متعب : اهلـچ غدارين وغدرهم وصل حتى بيناتهم
عرفت امچ غادره ابوچ وماخذه الفلوس ومسافرة
وهو يدور عليها وراجع للمنطقة سأل علينا
سُكرة: منين عرفت هل حجي ؟
_ من جوارينا ، شنو ابن الكلب هسة تذكرنا
ضرب صدره لزمت ايده وصحت بي
سُكرة : لا تضرب روحك ولك توجع كلبي
_ راح أدوره واستدرجه اول ما اشوفه اكتله
راح اموته واخذ ثارنا منه وادور امچ واشرب من دمها
لطمني على وجهي بكلامـه استغربت مصدومة بأسلوبه
سُكرة : من شوكت تحجي بالدوم والكتل ولك متعب !!
متعب : من كبروني ، من باگوا طفولتي وشبابي
من خلوني مكسور ظهري اجمع فلس على فلس حتى
اعيش وياچ ، من عيشوني بخوف وحياتي بخطر خلصتها
خايف بأي ساعة اسمع اخذوا اختي وضربوها
نفخ حاقد عليهم وجهه اسمر صاير وهالات بعيونه يحجي ومركزه بي
متعب : وين ما اشوفهم وشوكت احصلهم اعتبريهم
ميتين وعود سجنوني بتهمة كتل كتلهم حلال
سُكرة: انتَ مريض ليش هيچ وجهك شاحب وهالات بعيونك
نزل راسـه خجلان مني وهو يگلي
متعب : اشتغل شفتات اثنين
_ ليش تضغط على روحك ؟
_ زلمتيش انت ولچ مخلي اختي بدار مشردات
عليمن انحسب على زلم واختي مضيعها مو عندي
سُكرة : متعب لا تحجّي هيچ انتَ تعرف اني بمكان
امان وناسه تخاف الله حبيبي لا تحجي هيچ على روحك
مايقتنع منين ما اجي واقنع بي قافل يعيشني عنده ويكتل اهلي والشر اول مرة اشوف الشر بعيون اخوي واعرفه كبر وصار واعي ما يتحمل مصيبة اهلنا ولا يتقبل اني عايشة بدار مشردات وهوَ برا
دخل لهب بيـده علاگة حلويات خلاها على تخم وظل بالباب لابس حذاء گال
_ اني رايح اشوف اهلي اخذوا راحتكم البيت اعتبروا
بيتكم جهيد ماخذه ويايه وهاي مفاتيح البيت خلوها
عدكم واي شي تحتاجون خابرني متعب اجيكم ارتاح
ساعتين واجي اخذ سكرة ارجعها للمدرسة
متعب : رحمة الله والديك يا طيب تعبتك
لهب : خــادم
ابتسم وعافنا وطلع ومتعب راح وراه مشيت على شباك شفتـه واگف
طلـع محفظته وطلع فلوس خلاها بيد متعب ، ومايقبل متعب بيهن جبره
طبطب على ظهره ويحذر بي يقفل الباب وراهم ويگله
لهب : طلع اختك خطية مبيـن مخنوگه خليها تغير جو وياك
سلم وراح ومتعب فات گرص خدي ويلبس بنطرونه يگلي
متعب : اخذچ برا ناكل اروح فدوة لهاي الضحكه الترد الروح
وگفت لزمت ايده وشال علاگة الحلويات قفل البوب وطلعنا نمشى الجو بارد يخبل والشمس طالعة الهوا طيب ايدي بيده ونمشي بالشوارع وصلنا للشارع العام اجر سيارة وصعد بالصدر واني وراه كل شوية يلتفت عليَّ يبتسم ويشمرلي بوسة
نزلنا مقابيل مطعم عيونه عليَّ محاوطني بيده الحنينه دخلنا جر الكرسي خلاني اگعد وگعد بصفي كلش يضحك عليه كل شوية اختار واتراجع يگلي
_ هاي بعدچ نفس قبل ماتعرفين تختارين هههههههه
_ مو اتردد يمكن اكو شي اطيب
_ هم صدك يلة آختاري بـراحتچ اي شي تريدين اختاري
طلبت مشاوي وهو نفر قوزي لحم وخلاهن اثنينهم گدامي ياكل شوية
ويوكل بيه يلف لفه بعدني ما مكمله ينطيني الثانية ضليت اضحك على
روحي من انتبهت شايله لفات صغار اثنين بيدي وهو يگلي
متعب : اكلي خلصيهن كلهن
_ انت هم اكل
_ وعلي شبعت من شفتچ تاكلين
شربت ببسي والتفتت عليَّ من لاحظت ايده خشنه صايرة
سُكرة : شنو شغلك ؟
جر الخاشوگة اكل من ماعونه شرب ببسي وبدون مايباوع گال
متعب : بالحديد هو متعب ابو مخلي على حديد
دنگت راسي مكسور خاطري من سؤالي بس كل ما اشوفه اريد اسأله
واستحي اسكت واخاف اقهره بس هل مرة گلبي نار گتله
_ لا تصير عصبي بس ماعندي غيرك اسأله
عليك الله اختنا لتين تعرف اخبارها ؟
دفع الماعون غاد من عنده صحت
_ لا تزعل بعد ما اذكرها ارجع اكل عليك الله اسفة
متعب : ختولي هل سگط مثل امها وابوها عار
بقيت ماعرف شجاوب كلبي ما ينطيني يسبها مشتاقتلها اتمنى اسمع اخبارها اكلت ومسحت دمعتي طفرت من عيوني وبقيت منزله راسي
متعب : من اجيت للدار قبل لا أسافر طلعت منچ ورحت
سألت عليها وعرفت جابت بنية ، ردت أشوفها
بس لا هي قبلت ولا رجلها رِضى
نشغت من كل گلبي عليها وبجيت طاگ گلبي عليها
سُكرة : سودة عليه تزوجت وولدت
وحدها محد من اهلها وياها
متعب : عليمن تبجين غير هي ماتريد تشوفنا
رحت الها وتوسلت بزوجها مايرضى
سُكرة : يمكن هو مايقبل
متعب : غير حافظة رقمي ما تگدر تخابر وتگول
خوية متعب أريد أشوفك وهذا الدثو ما يرضى
وعلي أروح أحرك أهله ، بس أختچ دومها گلبها
مو علينا نسخة من أمچ تستنكف من عدنا
طلب الحساب دفع فلوسه وطلعنا نتمشى شاف ابو عصير اشترالي
وحضن ايدي بيده ودفعني بجتافه يگلي
_ لا تزعلين جايين نغير جو
_ ميخالف ، بس الخاطري روح هم اسأل عليها
قبل لا تسافر حتى لو هي خايسة خلّي رجلها يعرف
أخوها ما يمل ولا يعوف أخته گِله شتحتاج أختي أنا
يمها خلّي يخاف ويحس بيك بظهرها
ضربني على خشمي بطرف اصبعه وضحك
متعب : اروح الخاطرچ ما إكسر بكلمتچ
رجعت للبيت شفت جنطة مال ملابسه فتحتهن كلهن غسلتهن نظفتها
وهوَ نام تعبان مبين گعدت گدامه ابجي عليَّ واكتم بصوتي شصاير
بيك ولك متعب شنو هذا السواد بوجهك ليش هيـچ متغير !!
دورت بالبيت لگيت الغرفة الأخيرة مقفولة رحت للمطبخ اريد اطبخ اكتشفت روحي ماعرف اطبخ وبعمري مادخلت مطبخ وطبخت شكد عيب من زوجي المستقبلي يلگاني لا طبخ ولا نفخ
ساعة واندك الباب ومتعب رايح بسابع نومه رحت فتحته الباب
الخشب ومن ورا الباب صحت
_ منوو ؟
_ اني لهـب
فتحت الباب على النص وعدلت حجابي لگيته مبدل وشكله جان نايم
رفع عيونه يباوعلي وقدم ايده بيها علاگه اخذتها وگتله
_ متعب نايم
لهـب : شوكت اصبح وأمسي بهالوجه ؟
_ لهب !!
_ يروح فدوة لعيــونچ هوَ وعشيرتـه
ردت اطبگ الباب مد رجله وفتحـه يتوسلني ما اطبگه
سُكرة : روح لهب متعب لا يگعد ويسمعك تصير مشكلة
لهب : حجيتله رايدچ على سنة الله ورسوله
_ شگال ؟
_ ليش ماحجه ويـاچ ؟
متعب: لا ماحجيت، امشي سُكرة فوتي جوه
نزيت من مكاني وطبيت اركض خايفة من شفته خزرني خفت يظن بيَّ
سوء ، واسمعه وگف ويه لهب برا يحاجي وصوتهم يعلى
لهب : مو گلت تحاجيها وتردلي خبر برجعتنا نسفرها ويانا ؟
متعب : واجيت وشفتها صغيرة ما ازوجها اذا
ما تكبر خليها تدخل عشرينات وافتح وياها الموضوع
تنرفز لهب وگب بوجهه يصيح
_ گتلك صار سنين منتظرها يا عشرين تحجي بيهاا
متعب : هذا شرطي تريدها تنتظرها للعشرين
ماتگدر شوف حياتك لا تضيع وكت وتنتظرها
نگلب وحش وگف وياه جتف بجتف ولهب رفع ايده
يضرب متعب برهاوة ايدي على راسه ويصيح منفعل
لهب : شبيك ولك تخبلت ليش غيرت كلامك
متعب : سُكرة بالدنيا كلها عندي لا يوگف بوجهي ثار
ولا شغل وحتى حمايتكم ما أريدها لو تضغط عليَّ بيها
أهم شي عندي أزوجها زواج من العمر وتستقر
لهب : واني ما تستقر ويايَّ ؟
_ تستقر وياك واهلك يريدون يكتلوها ويكتلون اخوها ؟
لهب : ولك ابـوي معاديني ومحاربني عايف أهلي
والمال والجاه كله ما اريده لأن رايدها واجيتك
طلبتها منك وفهمتك البيت القديم يرجع باسمكم
وثاركم ينمحي ، تاليها هسة ترفضني ليش ؟!
متعب : ما رفضت گلت تنتظر واذا انتَ صدك
رايدها تنتظرهـا العمر 20 سنة عقلها ناضج
وبالغه تعرف تاخذ قرارهـا
ضبيت حجابي وطلعت عليهم لزمت متعب من ايده
لا يروح ينگلب هذا علينا بعدني ما ضامنته وگتله
سُكرة : لا ترفع ايدك على متعب
لهب : خـادم ، بـس راضية على كلامـه ؟
سُكرة: ليگوله متعب يمشي عليك وعليَّ
ماعندي كلام من بعـد كلام اخـوية
لهب : إذا هذا كلامچ هاي هيَّ لو هسة يگول
انتظر عشر سنوات، عشرين سنة، أنتظر
وما أمل ، بس انطيني كلمة وحدة گولي اريـدك
حتى لا تخليني هيچ معلّگ لا بالسما ، ولا اني
بگاع دليني على دربي وياچ لا تعذبيني مـا استاهل
متعب : كـافي
راد يطبگ الباب دفعه يتوسل بي وعيونه دمعت يحجي محروگ گلبي
لهـب : عليك بغلاتها عندك لا تعذبني بيـهـا
بعت الدنيا لأجل عيونهـا انا والله مشتري اختك بروحي
واحبها ما اغشك ولا غدرتك گدامك احجيها روحي لو ردتها
اخذ روحي وخليني اخذهـا
متعب : واهلك ؟
لهب : احمي ظهركم لو احد تگرب منكم اجرم بيهم
والله اجرم بيهم اهلي وانا گدهــم ما تلوحكم العيله
منهم وايدي بيدك
متعب : القرار عدهـا تريدك لو ما تريدك
ردت افـوت واشرد من گدامهم من التفتوا عليَّ اثنينهم منتظرين جوابي
سُكرة : تتذكر گتلك اقبل بيك بس اني ما أعرفك
لهـب : دامها موافقة نعقد هسة ونظل فترة خطوبة
علمود تعرفني وتتعود عليّ أخذكم اثنينكم نسافر
لنفس المحافظة أخذ لك بيت ايجار سنة وتعيش
ويا أختك بيه معززين مكرمين بعيد على دار واهلي
ونتفاهم أنا وياها سنة كاملة نتعرف ووراها نتزوج
على سنة الله ورسوله هـا شنو رأيكم ؟
دُجى ...
انتهى وكـت المدرسـة واجـه ابو الخـط وگفنا اني ورونـق بصف باب الطلعة
نتراجف شايله جنطة سكرة بيدي ومتردده نروح وسكـرة ماكو شحجي
شگول الهم ، رونق تاكل بأظافرها ضربتها عليهن وعطت بيها
_ لا تگروطين بأظافرچ راح اكسرج تكسر وترتيني
رونق : ام دودة شعدها راحت ويه ابن التاجر
شافت شواربة ونست روحهـا سلهمت عليَّ
دُجى : مثلچ شلون بقيتي صافنه عليهم
رونق : عندي جفاف قابل اني مثلچن حظي گاعد
واسحل شوارب الزلم الزينة تلگطن لگط انتِ وذيچ الخوينسه
دُجى : عزا العزاچ اني اسحل شوارب
رونق : چاااا مدير ولچ مديـرر بعد شتسحلين
رئيس الوزراء لو ابـوووي وتقتنعين
دُجى : سدي حلگچ لا احط قهريّ بيـچ
رونق : امشي نتبارز بنصّ الشارع
دُجى : عفية حتى يخابرون غنادب ويعرف منا
ذيچ راحت ويه لهوبه واني وياچ متبارزات بالشارع
رونق : يعفطلنه
دُجى: يدگلنا كلمات خشنه بالهاون وينثرهن علينا
رونق : هـاي ما شبعت من لهوبها الملهلب راح
توگعنا بالسـان كفاكف وسرگالو يارب تجي يارب تخزينا والله
لزمت راسي صدعت من شفت ابو الخط اجـه على مدرسة شحجي وياه
ردت افوت والمديرة والمدرسات بالأدارة گدامي صرت اني ورونق بنصهم
والمدرسة فرغت من البنـات ، قبل لا يدخل عليهن طلعنا صرنا وجهه بوجهه
_ وينكم شني البنات كلهن طلعن
دُجى : عمـو اريد انخاك ألك لو للذيب
شك وعيونه ادور على سُكرة بوسطنا ويحاجيني بس انشده فكره
_ گولي عمي شعندچ ؟
_ عمـو سُكرة راحت تشوف اخوها وتأخرت شوية
عفية الله يخليك عادي ننتظرهـا هي على وصول
دخلني تحقيق شوكت راحت ويامن طلعت ومنو اخذها وليش اخوها ما اجه للدار واكو أنه واحجي الصدك ويهدد خبلني احلف اريد ولا يقتنع عقله قفل هي شارده ، اخذنا للسيارة صعدنا وخلاني بنص النار من گال
_ عذروني ما اتحمل مسؤولية بنات لأزم ابلغ الأساتذة
رونق : الله بخليك انتظر الله يوفقك
_ عمو شعرفني وين راحت ويامن طلعت لا ترد حبله
هم يشمرون بلوتها براسي لأن مخليها عندي امانة
رونق : عمو هسة تـ ..
دُجى : بالله رونق اسكتي هذا شيگول حبله شنو حبله ؟
باوعلي بالمرايا ويخابر عليهم منتظرهم يجاوبون ويگلي
_ بنية من الصبح الحد هل ساعة مـاكـو يعني وين
راحت يا اخو هذا لو عدها اخ چان ما عافها بدار مشردات
دُجى : شكد سهلة عدهم ترمون المحصنات
الله لا يوفقكم شگد سهلة عدكم تطعنون بنية بشرفها
_ الو اهلا استـاذ كـافل مبين نايم اعذرني گطعت نومتك
بس اتصلت على استاذ سرگال ما يجاوب ، عندي مشكلة
اكو بنية من بنات الخط جاي عليها واحد ماخذها من بداية
الدوام والحد هسة البنية مختفية گلت ابلغكم
استمع لكلامه وافتر علينا مخبوص يسأل بينا
_ شسمها صاحبتكم ؟
رونق : دُجى
درت عليها عيوني تريد تطلع من مكانها ما مستوعبة الجواب
_ استـاذ نزلتهن للمدرسة والله العظيم گدام الباب
وحركت شعرفني ، استاذ بس اسمعني لا بس اگلك
انگطع الخط والسايق شغل السيارة وحركها يصيح
_ بطلني ارتاحيتوا گطعتوا رزقي
داس الها بانزين واني اعاتب برونق صارت صفره وخافت متندمه والدمعه
بعيونها تريد تبجي ذبيت نفس ولزمت ايدها خفت عليها گلت الها
_ لا تخافين ميخالف ، اهم شي سُكرة ترجع
طبگ السيارة مقابيل الدار شلت جنطة مالتي على جنفي ومال سكرة بيدي وونزلت امشي لگيت استاذ خيبر بالشارع منتظرنا من شافني بهت
_ ابو خالد مو هاي دُجى
_ عمي هاي الضعيفة گالت دُجى انا ذاكرتي
على گدي ماحفظ اسمائهن يادوب اتذكر اهلي
تلفون استاذ خيبر احترك جاوب يصيح
_ سُكرة مختفية مو دُجى طلع ناسي اسمها ووو
الو كافل الو تسمعني يمعود كـافل الووو ؟
حگ گصته واشر النا نفوت للدار دخلت وباجي كلثوم منتظرتنا بالباب
اخذتنا المكتب استاذ خيبر انطتني ماي شربت شوية وحجيت الها
اندفر الباب مـا انفتح دخل استاذ خيبر يلزم بأستاذ سرگال يدفع بي
وهو يفوت روحه اكثر وجهه دم احمر محتقن وصوته دوه بالدار كله يصدح
سـرگال : وين صاحبتكــم ؟
وگفت على ذولي وجلي صارت خيوط من الخوف اريد اجاوب عصبيته شلتني شل ورونق ختلت بظهري ارجع وهو يتقدم علينا واستاذ خيبر يمنعه
سـرگــال : تحجون لو اسويها سوده عليكممممم وينهــاا
رونق : بالعباس ما نعرف والحسين معلينا
سـرگال : احچي انتِ لچ انتِ الثانية احجي
دُجى : لا تصيح لا تعلي صوتك عليَّ واحجي
جر غراض من المكتب شمرهن على حايط بصفنا غطيت راسي ورونق صرخت تجر بيه رجعتني على حايط وهي ترجف بالزاوية ورايَّ
خيـبر : ولك تسودنت تضرب بيهـن اطلع برا امشي اطلع
الله لا يوفقك خلستهن ولك خوفتهن اطلـع من مكتبي
يدفع بي وهذا متخبل مايشوف گدامه لزم راسه حيل وصاح
سـرگال : ولك خليهـن يحجن وينهااا خليني اروح اجيبهـا
هدوا الدنيا على راسي ولك من كون تنهد الدنيا على راسكم
وگفه بالباب واجه استاذ خيبر علينا مقهور من شافنا خايفات
خيـبر : احجوا عليكم الأمان يمكم اني محد يوصلكم
مسحت دموعي وجاوبتها واني منهارة من ورا صياح ونظرات ذاك
دُجى : استـاذ شفتها من اجه ابن التاجر لهب وگال
الها اخوها يريدهـا وراحت وياه گال....
گطع كلامي من شال غراض المكتب يرگع بيهن كلثوم وگفت تحظن
بينا واستاذ خيبر يلزم بيَّ ، خليت ايدي على راسي من رگع شي
ماشفته بس تكسر وصوت التكسير عـالي وبدون ما اشوف سمعت
صـوته اجـه من بـرا يضرب على باب ونسحب استاذ سركال برا المكتب
كـافل : صـوتك لا اسمعـه خـرب اهلك
مـالمحت حتى خيـاله وهل كلمات سمعتهن بصوتـه وبعد ما وصلني
حسـه اختفى واصواتهم اختفت ويـاه بـرا ، گعدت على تخـم ودموعي
ما وگفت لحظة خايفة على سُكرة وهذا زاد خوفي بصياحه درت وجهي على طبه قوية صارت بالگاع وباجي كلثوم ركضت على رونق تلزم بيدها
ورونق تضغط على اذنها تبجي بصوت تگول الهـا
_ كون عيني لا تبجي حتى لا يضربوني
اريد اسكت أغسلي وجهي حتى تنغسل دموعي
حضنتها باجي كلثوم وفات استاذ خيبر على صوتها انطاها ماي تغسل بوجهه وگعد مثني رجله خايف عليهـا
خيـبر : رونق روشه لا تخافين عيوني هـاي إنّي يمـچ
محـد يوصلچ غيرنا إحباب گلبچ داير ما دايرچ
يحلوة باوعيلي لا تخافين وتخوفيني عليچ
رونق جانت منهارة جسمها يمنا وعقلها فصل بذكرياته ورجع بالزمن
خيـبر : اغسلي وجهه تعالي دُجى حاجيها واحضنيها
بـاجي كلثـوم: سوده بوجههم تذكرت شلون چانوا يعذبونها
خيبر : اسكتي باجي لا تحجين وتزيديها عليها
فـاتت علينا سُكرة من شافتها تبجي اجت يمها حضنتها وتهمس بأذنها ودارت علينا تگول عوفوني وحدي وياها ، بقت تحجي وياها واستاذ خيبر جبرني حتى اني اطلع بقت بس هي وياها بالمكتب ثلچ جسمي منها ليش صديقتي هيچ متخبله ؟ ليش تخاف تبجي ؟ منو يضربها وعذبها حتى صارت تخاف تلجي وتسمع صوت عالي وتنضرب ؟ شنو شافت رونق بحياتها وماضيها حتى هيچ متعقده وتنهار من صياح مر بيها ، لو دمع
نزل من عينها شصار وياچ رونق شصـار يا حبيبة گلبي
خيـبر : ست البنـات اصعدي فوك بدلي
وارتاحي وانا اعتذر على صار مسحيها بوجهي
دُجى : اهم شي رجعت سُكرة
خيـبر : اصعدي
_ عادي اظل هنا ؟
بنظرة وحده ردلي الجواب بدون كلام باوع على مكتب استاذ كـافل
عرفت مايريد يشوفني هزيت راسي وصعدت فـوك ودمعتي وگعت مخنوگه
صعدت ماگدرت ابدل صعدت باجي كلثوم رونق غيرت ملابسها وديتها للحمام غسلت الهـا وسمعت صـوت رج الدار علينـا رجعتها للغرفة گعدتها
على جربايتها وگعدت بالگاع البسها جواريبها ضحكت وگلت الها
دُجى : نقانق امشي شوفي شنو هذا الصـوت
ابتسمت بوجهي وفتحت ايدها حضنتني قوي لميتها بحضني خايفة عليها
ابتعدت منها لزمت وجهه احاجيها وگلبي مشتعل بنار عليها
دُجى : احجيلي شنو بيـچ رونق
رونق : الصـار بيـه صعب خليهن بگلبي
مو كل قصة تنحجي اني قصتي اذا تنحچي
تبچي حتى الما يگدر يبچي
رجعت جسمها على جربايتها تمددت ودفعت ايدي تگلي
رونق : روحي شوفي شنو هذا الحجي وتعالي احجيلي
اخذي مكاني اليوم إني رجلي توجعني بعد ما اگدر اوگف عليها
دُجى : انزلي ويايَّ حتى تكسرين الخوف ميصير من تهديد
لو عركة تنتكس حالتچ ميصير تخافين تتعذبين بعدين والله
دارت وجهه مني وگالت
رونق : عليچ الله روحي وعوفيني وحدي بروّح امچ
_ رايحه بس بسرعة اجي حتى ننزل ناكل مو گلتي جوعانة
_ اذا انام لا تگعدوني خلوني انام
گعدت يم راسهـا گلبي ماينطيني اعوفهـا بستها اريد أضحكها گلت الها
دُجى: شعرچ ريحته طيبة
رونق : بگت الشامبو مالتچ سبحت بي ورجعته
ضحكت وضمت راسها مني من صحت بيها
دُجى : يا خايسة
رونق : ماعندي مخلصه
_ هسة اجيبلچ واحد
_ تجيبيلي واحد كون اريده حلو لو مدير لو تاجر
_ ههههههه ولچ شامبوو شامبوو
دفعتني من جربايتها من صدح صوت الصياح جوا عاطت بيه
رونق : ولچ اركضي شصار لا اموت اركضي
دُجى : صرتي زينة ؟
_ اي والله اي
_ راح اروح ركض واجي
خليتهـا بالفراش وركضت على درج شفت فنـار واگفه على درج هي ومنارة
فنـار : اجت القندره
دُجى : قندره بحلگچ
بقت تسبني واسب بيها وگفت على طرف الدرج وعطت بيها
دُجى: سدي حلگچ خلي اسمع حجيهم
فنـار: وين مشردات سُكرة
دُجى : ليش منو گال شردناها
فنـار : غير هذا استاذ سمره خبصنا خبص
دُجى : شگال احنا شردناها ؟
فنـار : شمدريني بيچن الخايسة روحي تسمعي عليهم
نزلت البايات بعدني بملابسي اتسمع وهي نزلت گعدت على بايات الدرج بصف رجلي تتسنط دودتها ما تخليها ومنارة ورانا واگفه اذنها على حايط
لهـب : استـاذ كـافل هذا ابن عمك تجاوز هواي
والخاطرك ساكت هو سله دعوة بيها خلي يطلع
سـرگال : مديرها اني غصباً عليك وعلى ابوك
ادخل وانعل والديكم ولك شلون تاخذهاا من مدرستها
لهب : لا تدخل اخذتها برضاتها خطيبتي واني حر بيها
فنـار : ياا يااا خطيبته !
دُجى : جذاب بعدهم ما مخطوبين
منارة : مو يگول خطيبتي
دُجى : مالچ شغل شعليكم
سـرگال : ادفنك بالحديقة اذا بعـد تگول خطيبتي
كـافل : تگعد انتِ وياه لو الزمكم اثنينكم ادفنكم ؟
فنـار : كلهـا صارت دفانـه
لزگت روحي اكثر على حايط وحذره ما اريد احد يشوفني اتسمع
متجهزه قبل لا يجي احد اركض بكل سرعتي اصعد
متعـب : اكلك صدك اني دزيت عليها اشوفها
وبقت يمي واخذتنا السوالف وطلعنا تأخرت
سـرگـال : مو گتلك هذا مو راحـه ابن التـاجر مو راحه
لهب : لك شكو محروگ دمك ابن عم ابن خال عرف ولف
سـرگال : اكتم صوتك لا اجي اكتمك واسمع مالك
شغل بيهم بعد لا من قريب ولا من بعيد يظلون
هناا وحتى متعب يشتغل عدنا هنا انتِ تولي
متعب : مو هيچ الحجي لا تخربط استاذ سرگال
سرگال : بالله علمني شلون الحجي
لهب : اني اعلمك
سرگال : بس تتنفس ادفنك بالحديقة
سُكرة : كافي استاذ سرگال ، فدوة استاذ كـافل احجي شي
استاذ خيبر ما تشوفون شلون خانگ الرجـال شبي وياهم
سـرگال : اسكتي لا ادفنچ بالحديقة حسابچ بعدين
متعب : حدك لهناااا تجاوزت حدك اضربك وعلي اضربك
كـافل : ســرگـال اكتــم لا انعل الخلفوكم خلونا نتفاهم
خيبر : وين تعرفون التفاهم هاي مهزله
سـرگال : شني مهزله ولك ماكو مهزله غير دگتهاااا
سُكرة : يا دگه رحت شفت اخوية
سرگال : ويه هذا ابن الچلب اسكتي ما اسمعلچ صوت
مـا اسمع غير ردم وضرب وصياح وناس تفاكك بنـاس وباجي كلثوم والحرس فوك رايهم يسحبون بيهم مـديت راسي شفت لهب وسرگال واحد لازم برگبت
الثاني ومتعب يفك بيهم وخيبر يجر بسرگال واجه استـاذ كافل من شافهم
قافلين قبض اديناتـه اثنيناتهن يضرب بيهم بوكسات من صاروا زرگ من الخنگ مالتهم من تأذوا من البوكسات واحد فك الثاني گوه يتنفسون
درت وجهي على صوت ضحك واشوف فنـار الخايسة گاعدة على درج
وخربانـة ضحك عليهم رفعت ايدي غميتها وگفت دفعتني وضربتني على ايدي رحت اريد اضربها ومنارة وگفت بيناتنا عاطت بصوت ناصي تخوفنا
منارة : وكتها هسة يطلعون على صوتچ انتِ وياها
تتعاركن غير رأسن طرد صايرين مذابح همه مذابح ولچن
دُجى : أخذي صاحبتچ واصعدي خلصني
فنـار : انجبي وانتِ اصعدي
_ انتِ تصعدين
_ بسابع احلامچ
متعب : يا اخي مالك حق اني اخوها هنا وقابل
كـافل : الزبدة شنو اريد الزبدة
متعب : الزبدة الزلمة طلب اختي مني على سنة الله ورسولة
والبنية راضية وانا راضي واجيت اريد استلم اوراقها
وغراضها ان شاء الله باجر يعقدون وراح اسافر واسفرهـا
ويـايَّ واتشكر منكم
طـفرت اريد اوگف رجلي جمدت من دفع استاذ سرگال لهب برا المكتب
رگعه بالحايط والصياح هج يطرد بي والبنات كلهن طلعن بقيت ابطنش بمكاني ما اگدر اركض مــن الهبطة وهاي الخايسة كل الحيل بيها جرتني من قميصي سحلتني صعدتني ضربت ايدها واركض واغلط عليها
دُجى : المخبله لا تلزميني
فنـار : اروح اغسل بديتول لزمت الجايفة
صرت بالطابق الثاني ويه حشوك الهوسة اخـاف حتى افكر انزل
بس سكرة بنصهم طلع سـرگال لهب ومتعب دفـع وصلهم برا مايرضى وقبل لا تطلع سكرة طبگ الباب الحديد يقفل بي ولهب ضربه على رگبته لزمه استاذ خيبر يدفع بي ومتعب يعاتب استاذ كافل بس اسمع صوته ماكو لا شكله ولا خياله
عطت على سكرة من فوگ حتى لا تنضرب باوعتلي عضيت الها اصبعي متحلفه بيها واشرت الها تصعد قافله خايفة على اخوها صاروا امالخ
ماينعرف منو ويانا منو علينا ناس تتعارك ناس ترزل ناس تفاكك
هجموا علينا العاملات والمدربات دخلونا كلنا على غرف يكشن بينا مثل ما يكشون ويهشون بالذبـان ، بقيت اكل بروحي خايفة عليها رحت الرونق عيونها مورمات وسمعت طردونا بدون مـا احجي وگفت لبست نعالها
وطلعت بدون صوت امشي وراها اباوع عليهم من الشباك ماكو اشكالهم
بس اصواتهم لأن كلها واگفه بصف الباب الحديد
سكرة : متعب لا تضربون متعب ولكم عوفوا اخووية
هدأت اصواتهم خنست ملت راسي على شباك وگلبي دگ سريع من
سمعت صوت غضبان يهدي بالوضع يگول الهم بنفس طريقته
كـافل : الملخص هذا خطب اختك واختك رضت وهسة
رايد تسافر وهي وياكم واليوم تريد تاخذها ؟
متعب : اي صعبة ليش هل ضرب والعرك ما تستوجب
كـافل : النزيله عدنا اذا دخلت ما تطلع بمزاجك ومزاجي
لهب : شنو اجيب بيها كتاب من الدولة حتى تنطوها ؟
كــافل : حضرتك فكاهي ؟ اضحكهم عليك ؟
لهب : البنية رايدهـا واليوم اخذهـا
كـافل : يتـم
عـافهم ودخل ، بحركة سريعة لزگت روحي بالحايط كاتمة النفس اسمع بس دگات گلبي القوية حتى لا يشوفني أشوف بس ظهره لابس قميص اسود مفصل على چتافه العريضة، مشمر رداناته لحد عگس إيده وساعته تلمع بيده بارزه دخل مكتبه واستـاذ سرگال يمشي ورا
استـاذ خيبر يتفاهم هوَ واخوها ولهب برا وعلى اساس سُكرة اخذتها
باجي كلثوم حتى تجيب ملابسهـا قبل لا تصعد الدرج سديت حلگي
من صـاح بأسمها واشر الهـا على مكتب استاذ كـافل تروح
سُكرة ...
سـايرتـه ومشيت مجبورة المكتب استـاذ كـافل وكاتلني الرعب منه
كل خزره يخزرني بيها اقوى من الثاني امشي گدامه وهو يگلي
سـرگال : ذنبي برگبتچ لـو متت هل ليلـة
التفتت عليَّ اريد احچي رفع أيده گبال وجهي مايرضى حتى احجي
فتـح باب المكتب دخلت شفت استـاذ كـافل مطلع ملفي ومستمسكاتي
مجهزها راح عليَّ سرگال يلزم بيده يگله
سرگال : شتسوي ولك كافل شبيك تتعاون وياهم على موتي
كـافل : خليها تروح هي راضيه بالزلمة وتخوها راضي
توگف بـوجهه بيا عين لك فضحتنا گدامهم
سـرگال : هدهن جيب المستمسكات مالتها لا تنطيهن هدها
كـافل : ما اهدهن وراح اسلمهن واسلمها
سند بأيد روحه على مكتب وبأيده الثانية
لازم المستمسكات يعاتبه وعيونه تلمع
سـرگال : چا ليش حتى انتَ عليَّ
كـافل : ولك البنية راضيه
سرگال : حاجيها انتِ حاجيها لا تخليها تروح
جـر استاذ كـافل المستمسكات من ايد استـاذ سرگـال يگله
كـافل : منتظرك برا
طلع وعاف الباب مفتوح على النص وگفت اباوعله وهوَ رفع راسه
يشوفني اجه يجر بخطواتـه وگف گدامي يحاجيني وصـوته مهزوز
سـركال : ليش سـوكـا ؟
سُكرة : اووو شهـور طويلة مـا سمعت سوكـا منك
سـرگال : كـل ما اشوفچ مـا اصيحچ بكلبي غير بهذا الأسم
درت عيوني منـه ماحب يشوف دموعي وانهزمت سُكرة من سمعته گال
سـرگال : لا تروحيـن الخـاطر كل الأيام الحلوة اللي عشتي هنا
سكرة : خـاطر الأيام وبس ؟
سـرگال : ما اگلچ الخـاطري ماعندي خـاطر يمـچ
_ شلون عرفت ؟
_ راضيـة تصيرين حليلة غيـري
صفنت بي نظرات عيونه الذبلانة بعيوني المتعوبة وشايلة حمل وتفكير الدنيا وگف الوكت وفصلت عن العالم كله صار حچي بين عيونه وعيوني محد فهمـة بس احنـه تمنيت اخالف فكرتي تمنيت اخلق عالم هادئ وحلو ونسكـن بي وحدنا بعيد عن بشاعة هالوكت وأذيتـة
الأصوات غابـت وانمحت بأذني ما ميزت شي كلشي غـاب عني وصرت اشوفه بس هوَ ركـزت على كل تفاصيلة على كلشي يخصة منهـد گدامي مو نفسـه القوي الجان يهد ويصد ويضرب برا لا گدامي مكسـور كسرة مُحب بينـه وبين خسـارة حبيبة رمشة عين!
اخذت نفس وطلع صوتي بتعب
سُكرة : انـي ضعت
سـرگال : ما تضيعيـن بوجودي ويـاچ
لا تعلّمين گلبچ يقسى عليَّ
باوعتله بزعل عاتبته
_ انتَ بديت
_ انـه انتهيت بيـچ وبديت بهيامـچ
الزلمـة الما يهاب المـوت وگعتـي وخليتي يهابـچ
بأنفاس سريعة رفعت إيدَية سديت اذني بـكل حيلي أضغط على اذني بـأصابعي اريد بس أمنع تأثير كلامه لا تدخل بعقلي ويدمر الباقي من ثباتي گدامـه ليش هسة؟
ليش بنص بداية حياتي والخوف هد حيلي من يجي يفتح بوب قافلتها بـمية قفل ، الدنيا تفتّر بيا والمكتب صار هلگده وأصواتهم برا تبجيني ، لزمت الباب اريد اطلع لزمني بطرف القميص وسحبني دفعني على حايط وصوت كلامه وعتبه كفيل يفتر بعقلي واذني
سـرگال : لا يغرچ احد وتروحين صدگي سـوكـا
لو طلعتي وياهم راح تواجهين الأسوأ من التاجر وولده
سُكرة : لا تهدد عوف التهديد لا تهدد
سـرگال : حلفي ماتروحين حلفي تبقين هنا
احلفي حتى لا أغلط غلطة ماكو وراها رجعه
خزرته اريد اطلع دفعني على حايط اكثر عطت بي
_ استاذ سرگال شنـو تقصد شنو براسك ؟
_العاشگـچ كابوسة خسـارتچ
صفنت وهدأت كل هوسة عقلي يهزلي راسه وعيونه تعبانه يحاجيني بيها
ويشكيلي وخـوفه ما يخفي زلمة كلف ينخاف منه واگف هسة يمي خـايف
سُكرة : بس اني أريد اروح
سـرگال : انطيني فـرصة اخيرة
_ وبعدين ؟
_ أرضيچ
فتحت البـاب شفت استاذ كـافل واگف بعده بالممر قبل لا اروح گال
سـركال : تكفيني منـچ فعل واحد يثبت حاولتي الخاطري
عبـرني قبل لا اروح لزمـه استـاذ كـافل من ايده يگله
كـافل : شمالك جنك عربيد يحومي خلينا نفتهم
سـرگال : اذا ماتوگف ويايَّ باليوجع گلبي اليوم
اعتبر الخوه بينـي وبينـك ماتت
وقبل لا يسمع رد استاذ كافل عافنا وطلع الهم يريد يشوف افعالنا
مايريد يسمع رد احد اشر اليه استاذ كافل امشي رحت امشي
وهوَ بصفي يمشي وصلنا البرا متحزم حزام
لهـب : وين الجنطة ؟
بـاوعت لمتعب واگف على صفحة نزلت راسي گتله
_ متعب اريد احاجيك جوا
لهب : سكررررر خلينا نروح نكمل حجي بالبيت
سُكرة : بس انتظر احـ...
سـرگال : لا تحجيـــن ويــاه اگلهـا لااا تحجين ويـاه
متعب : هذا اخر تحذير محترمك وساكت گلبي
ما ينطيني اتجاسر وامد ايدي على ناس
مدت ايدها وساعدونا بعد حاجتي
قنعته يفوت جوا المكتب استاذ خيبر هو فات واني وراه ولمحت استاذ كـافل لزم لهب من ايده وطلع بي برا يحجي ومندمچ ولهب فاتح عيونه مركز بوجهه ، دخلنا ماقبل يگعد وگف بنص المكتب واني مقابيله واستاذ سـرگال دخل وطبگ الباب ورا
متعب : اطلع استاذ خليني وياها وحدنـا
سـرگال : بالبداية اسمعني وراها اذا تريد اطلع زواجها
بهالفترة غلط تزوجها خليها تكمل السادس تبلغ سن الرشد
وزوجهـا اني مو ضد زواجها بس ماريد سكرة تتعذب
ولا اريد احد يستغلكم وانتِ وياها أمانة برگبتي اليوم الدين
متعب : وانت ياهو مالتك بيها زودتها
سرگال : نزيلة عندي صار سنين بأمانتي
متعب : رحم الله على اهلكم تعبتكم بس رايد اخذ اختي
سُكرة : تمام اروح وياك بس عادي اجمع اغراضي وأودع
صديقاتي وباجر تمرون تاخذوني ؟
دخـل استاذ كـافـل علينا اشر المتعب بيده تعـال ومتعب نفذ كلامـه راح عليَّ من وصل متعب بصفه شفت استاذ كافل لف متعب لف بيده من اچتوفه يمشي لبرا يگله
كـافل : بات برا بمبيت الحراس صاحبك
ابـو لهب توكل ينام نعسان بس غنيتله غفه
متعب : غير جايين سوية شلون راح شسويتله
استاذ الزلمة معدل عيب ومساعدني صاحب نخوه
طلع برا بالشارع يدوره ماكو ولا رضى يظل اجه يمي گال
_ ما افرض كلامي رأيچ وحياتچ بيدچ
_ وين رايح
_ اشوف صاحبي ما اگدر اصير بذات
واعرف الزلمة طالع زعلان وهو صاحب فضل
معيشني صار فترة وعامي عيون اهله من عدنا
شـرگال : احرگه هوَ واهلـه ادفنه بالحديقة وحگ العبـاس
ترخص متعب سلم عليَّ وراح وراه واستاذ سرگال طابگ الحاجب يگله
_ شلون قنعته يروح ؟
كـافل : مابيه حيل احجي
_ بمزاجك تقنع وبمزاجك تشعللها بالزايد
كـافل : انجب والله من انعل الحب لابو الحب لابو كلمن يحب
عـافنا وراح على مكتبه باوعت لأستاذ خيبر دخل يشوف سرگـال
خيـبر : والعباس الصار برا مهزلـ...
سـرگال : والعباس اللي تحلف بي اذا
تگول كلمة مهزله بعد ادفنك وياهم
خيـبر: ليش سويت مشكلة ولك ليش ؟
سـرگال : الله يضوگك نـار گلبي على هذا البرود وتعرف ليش
شمـر جسمـه على تخـم لازم راسـه يضغط عليَّ يدردم
سـرگال : خطيتي برگبتهـا هـاي القزمـة
دخل علينا استـاذ كافل بيده اوراق شمرهن بصف استاذ سركال
كـافل : اصعدي سُكرة ارتاحي وبعدين عندي حجي وياچ
سـرگال : لا تصعد هسـة خليهـا هنا
كـافل : بابا انفجرت الحوصله سد حلگك
امشي اصعدي يلة اصعدي دوختونا
عفتـهم وصعدت شفت بس رونق بالممر ودجى فوك تشرب ماي من البراد
من شافتني هي ورونق لزموني من ايدي يصعدون بيَّ كفخات على راسي
دُجى : شگول عليچ خليتي هذا الأسود استاذ سركال يخلسنا
سُكرة : لو تشوفن شلون صاروا متعب ولهب مرادد ومدافع
واحد يعاند الثاني واني كلبي يمكم بس اريد ارجع واصيح
اريد ولا يهتمون گوه رجعوني يريدون اظل للصبح يمهم
عود ثاني بوم الصبح يرجعوني هنا اخذ غراضي واسافر
رونق : انجبي ما تسافرين عوزهـا تسافرين
دخلت الغرفة تعبانة تعب ماينوصف بكلمة انطتني دُجى ملابسي واخذت ملابس الروحها واجت يمي تسأل واجاوبها حجيت الهن كلشي الصار من لحظة روحتي الحد ما رجعت صعدت وياهن واخذت ملابسي سبحت ورجعت للغرفة لگيت رونق نايمة ودُجى ملابسها بحضنها ومايله جسمها
تعبانـة رايحة بسـابع نومه رحت رفعت رجلها بعدها بالصدرية عدلت
نومتها وغطيتها وجهه تعبان ورحت على رونق شفت عيونها مورمات
نمت على فراشي وگلبي حاسني هل يوم ما يعدي على خير
هل يوم وراه انقلاب يگلب گل حياتي مايمر وكلهـا ادوس عليَّ
مقبوض گلبي احوس بالفراش وكلام استاذ سرگال ينعاد بعقلي
ويسرع دگات گلبي ابتسمت ودرت وجهي من تذكرت كلمته وشكله
" انتِ وگعتي زلمـة حتى المـوت مايخافه "
غفيت مخنوگه وگعدت على مصيبة ما تنطم گعدت على كـارثة ونزلت
على راسي فـاتت علينا رونق تلطم على وجهه افرك بعيوني واسمعها تگول
رونق : اگعدوا ولكم لجنة مفتشين من الوزارة دخلوا مثل
النمل على دار مالتنا قبل دقايق يفتشون واصواتهم عاليـة
دُجى : اجراء قانوني عادي شنو المشكلة واذا
اخذت دُجى ملابسها راحت سبحت واني جريت الحجاب وطلعت اشوف سبب التفتيش نزلت على درج شفت الأساتذة تلاثتهم واستاذ كميل
وست سامية فاتحين ملفات واجراءات وكلهم يتحقق ويـاهم
اقل النص ساعة وصعدت مفتشة من المفتشات وياهم على منام فوك
كلنا نتراكض دخلنا على غرفنا فتحت باب المنام مالتنا لگت دُجى
تعدل بشعرها واني ورونق واگفات ابتسمنا بوجهه اشرت عليَّ وگالت
_ انتِ سُكرة ؟
_ اي ا... اني
_ تعالي نريدچ تحقيق جوا
بقيت اباوع بالوجوه والدمعة طفرت من عيوني مو بس خايفة لا اريد اخطي واروح وياها ما اگدر بقيت على جربايتي اگول الها ما اجي وياچ لزمتني من ايدي اول ما نزلتني اجه من المكتب على سريع استاذ كـافل اخذني من ايدها وخلاني امشي وياه گتله
سُكرة : شصـاير استاذ خفت والله ليش لازمين استاذ سرگال
ماعنده مجال يجـاوب دخلنا عليهم واستاذ خيبر ما ينطي مجال لأحد يوگف يمي جر كرسي گعدني وظل واگف يمي وسرگال غـاد منهم يوقع على اوراق من دار وجهه وشـافني مبيـن عيونه مورمات ما مرها النوم ، عمـه عيونه عنهم
وركز بيَّ شلون مگعديني تمتم بشفايفه يتأسف أليه بنصهم مايهتم الهم
گعدوا اربعة مفتشين وباحثة اجتماعية دازيها وياهم يحقّقون ويايّ
التفتت على اول واحد بدون مقـدمـات گال
_ اگدر اعرف صحة البلاغ وهل فعلاً استاذ سرگال
يمنعچ تطلعين ويه اهلچ وطلب من اخـوچ يتزوجج ؟
بقيت سـاكته الباحثة اجت گعدت بصفي وسامية على مكتب گاعدة ايدها على راسها بصفها استاذ كميل ايده على اكتافها وجوههم مصفره
الباحثة : وجهينا ماما لا تخافين كلنا موجودين وبكلمة
من عدنا ينسجون الأدارة كلها ، هل فعلاً استاذ سرگال
خالف القوانين واعترف الچ او ضغط عليچ او استخدم
نفوذه وبرز نفسه مقابيلچ حتى يتزوجج ؟
المفتش : ساعدينا ولا تخافين من أي تهديد
لأن بكل الأحوال استاذ سرگال خسر صلاحياته
كمدير واستاذ بدار التأهيل وتجرد من منصبة
ضربت سامية على رجلها وگفت على حيلها محروگ گلبها كلشي ولا
أستاذ كافل وخيبر وسرگال يخسرون منصبهم عدها احترگت حرگ
صـار اللي جانت تخاف منه وتحذرهم يصير صارلها سنيـن تحاول
وهوَ دمرها بالبرود واگف بـنصهم يا جبل ما هزك ريح لا على باله
منصب ولا همته خسارة ، لابس الهم ومتجهز قاطه الرسمي لمحت
اصبعه مبصمي على الأوراق وموقع الهم بـدم بارد لا تماطل
ولا عارضهم على الخسارة والكسرة اللي رايديهـا اله
نـزلت راسي وگعت دموعي مقهورة عليَّ ابتعدت وابتعد حاربنا حتى ما نعيش هل يوم لأن هوَ يعرف واني اعرف من هل ساعة الكل يعلن حربه علينا وراح يرجعون اهله لنفس الساحة ويدمروني مثل قبل وهل مرة بيها
دولة ومنصب مسحوب واحلام مهدومة
بلعت الغصه وحجيت بدم محروگ
سُكرة : من اني صغيرة عشت هنا ومن خوفه رفضه
اطلع لمصلحتي نصح اخوية ما يزوجني بعمر صغير
مو طلبني منه ولا يريدني بالعكس هو رافض فكرة الزواج
_ يعني ما تربطچ وياه شي منا منا ؟
سكرة : قليل اشوف استاذ سرگال لأن دوامه دار مسنين
وحتى ظل سنة كاملة يمكن اكثر ما يوصل باب الدار هنا
ظلوا واحد يباوع بوجهه الثاني وحسيتهم ما مصدگيني وحقهم مبين من رجفتي عبالك مخلين سجين على رگبتي فكروا اني مهدده باوع المفتش على باحثة هز راسه بمعنى اكو شي وگفوا اثنينهم صاح على حـرس برا يتأكد سحبوا كاميرات عركة البارحة بالحديقة لأن داخل الدار حفاظا على خصوصية البنات ما يهلون الكاميرات مشتغله
اشـر للحـرس على السـريع تقدموا وراح المفتش على استاذ سرگال يگله
المفتش : استـاذ سرگال انتِ تتفضل ويانا عدنا امر
بالحجز عليك على ذمة التحقيق بين ما تكتمل
الإجراءات القانونية ونتأكد من صحة البلاغ
وگفوا بوجههم استاذ كافل واستاذ خيبر وكميل معترضين وتعالت اصواتهن طبگوا باب المكتب حتى لا ينسمع صوتهم واستاذ كميل يحاول
يقنعهم لا يكبروها وهو سرگال يجي وراهم وحده قافلين ومبين مدفوعين
واضح راح يروح بيها استـاذ سرگال واللي مقدم البلاغ ايده طايله
وممشاه الدولة يعرف دروبها ويا قانون يطيحهم
طلعوا برا المكتب المفتشين واستاذ كميل يحجي وياهم وتحرك وياهم استـاذ سرگال قبل لا يطلع لـزم استـاذ كـافل من إيده يگلي
سـرگال : بعـد مـا أوصيـك امـانة برگبتك
سـامية : لا تقلق وتحلف بي اخوه انتَ وراح نظل وراك
وترجع منصبك وشغلك وتطلع من هل مصيبة
رفـع ايده واشـر بأصبـعة عليَّ تحت انظارها وست كبرى بصفهـا
وضغط على ايد استـاذ كـافل اكثـر وعيـونه عليَّ يگله
سـرگال : امـانة وبقيتها عندك بالدار ما تطلع لبين
مـا ارجع ذمة برگبتك تحـافظ عليهـا لا يوصلها احد
ضربتها على ظهره بكل حيلها گبت عليهم تحجي بهمس حتى لا يسمعوها
سامية : عبالي خايف ومقهورة ضيعت روحك يا غبي
الله منطيكم بس طول اخ بس اخ جنت حاسه كل
تعبنا يروح من عدنا بسبب ولدنـاااا
كـافل : مو وكتهاا
سامية : يمتى وكتها تجرد من منصبة ويوصيك عليها
صارت علني بعد ماكو من جوة لجوه بلشها سـرگـال
سـركـال : وابنچ مجهّز الجبيرة
سامية : ياربي مخلفين دواهــي داهيـة هل خلفه داهيـة
عـافتهم وركضت الرجلهـا وسرگال ظل يباوع الكـافل وكافل يريد يكفخ سـرگـال دفعـه طلعه بـرا وخيبر وگف بنصهم حتى لا ينتبهون عليهم
قبل لا يسدون الباب التفتت سـرگال عليَّ وذب نفس گال
سـرگـال : تنتظـريني ؟
گعدت بمكاني غطيت وجهي ابجي وهوَ طلع مقهور لأن ما سمع جوابي
اباوعله وجهه برا ما يتفسر ودفع استاذ خيبر يفوت يحاجيني ، اخذوا وراحوا يمشي وياهـم واستـاذ كافل يمشي بظهره ما يرضى يعوفـه دقيقة
مخلي ايده على ظهر سـرگال يحاجي بي يطمنه وراح وياه للمركز
وكميل اتصل على اهل سـرگال وصل الهم الخبر وكلها طلعت للمركز وراه
راح يرجعون اساس الدمـار النفسي ،راجعين الأسوأ من ساميـة وجماعتها
خلصني ياربي دخيلك مـا اريد ارجـع اعيـش المـاضي يارب
خيـبر : لا تصفنين يا حلوة الحلـوات سكـاكـر خـوف
لا تخافين بالله هنـا باوعيلي امسحي دمـوعچ عيوني
يوجعني من اشوف هل عيون الحلوة تبجي
سُكرة : اسفة دخلوا المفتشين عليكم من ورايه
خيبر : قابل اول مرة همَّ كل فترة المفتشين يفوتون
غفل علينا واحنا متجهزين الهم قابل شعدنا يا كلبي
سُكرة: منو مشتكي لهب ؟
خيبر : ويمكن متعب وبمكن احد من الدار
لا نظن بأحد قبل لا نتأكد لأن ما ذكروا اسماء
بجيت بجي الحد ما مسفت دموعي صعدت فوك لگيتها كلها مخبوصه لزمتني دُجى من ايدي وفنار ومنارة يباوعون علينا من فوك الدرج
سُكرة : راسي راح يطگ راسي ولچ دُجى انسجن من ورايَّ
دخلتني للمنام تسكت بيَّ ورونق تهديني تغسل بوجهي راحـت دجى للطوارئ جوه غرفة ورجعت جايبه عصير وشربتني حبايه وجع راس
وبقيت متزوهره افتر محروگ گلبي حرگ
للعصر رجعوا ما ترددت ولا خفت من احد نزلت على مكتب استاذ كـافل لگيت استاذ خيبر هم موجود وفاتت ويايَّ رونق بيده اوراق واگف بصف المكتب من شافني ذبهن وباوع بوجوهنا گال
كـافل : هـا سُكرة صاير شي ؟
_ ليش مارجع استاذ سرگال ؟
خيبر : سالفة مطوله شوية يحققون وياه ويريدون
يجون هنا تفتيش وتحقيق ويه بنات الدار يسألون
على معاملة الأساتذة وياهم
سلايـه اذا تسكت تختنگ وتموت همست عود يم اذني تگلي
رونق : تخيلي يصيحـون دُجى ويسألونها على استاذ كـافل
گرصتها من زرورها بقت تمسح بمكان الگرصه وابتسمت بوجهه استاذ
كافـل نطت عيونه صارت بهامتـه من سمع همس اسـم دُجى حـاقد على
الاسم صاحبتـه وجهه بعد مايگصه سيفين يگلي
كـافل : ليش تگرصيها عوفيها الظاهر گوه مسكتات الرعيده
سُكرة : لا والله استاذ قابل شعدها
كـافل : خيبر ضيف صاحبتهم وحتى لو ما يريدوها
تفوتهـا بالله اريد اسمـع رأيهـا بالمجرم السفـاح
رونق : لا استـاذ حشـاك وين اكو منك بالعكس
هي بس تسمع بأسمك تشبعك حمدان وبكل صلاة تدعيلك
كافل : صلاتها تصليها حتى تدعي على عالم مو تدعيلهم
سُكرة : والله استاذ ظالمهـا دُجى كلبها ابيض ماتحقد
كـافل : ام گلب الأسـود ام راس الجبير اليابس گلبها ابيض ؟
خيبر : هاي ست البنـات عمي ما نرضى عليها
كـافل : على العمـوم مو مهـم الأهم هسة لا يظل بالچ
خيبر : تبقين هنا دراسة تكملين من باجر ترجعين
للدوام من المدرسة للدار منا ومناك ممنوع
سُكرة : واستاذ سرگال ؟
خيبر : مطول بالحجز الموضوع مو سهل
شرحلي الوضع وطلعت مكسور خاطري صعدت والبنات وحده تصبر
والثانية تگلي تجهزي من باجر اهله يستلمونچ ودُجى تگلي شحدهم
بقيت انتظر اشوف متعب واحجيلي على قراري اللي ينهي المهزلة.
دُجى ...
للفجر جبرت روحي اكمل واجباتي تراكمت بالغياب وراح عليَّ الأمتحان
جهزت روحي الصبح والبنات ويانا واجه خط جديد رجال جبير بس حريص بحيث صعدنا وحده وحده للسيارة ومن نزلنا دخلنا للممر الأدارة
وراح ، توجهت على مدرسة بوجهي الغرفة المدرسات لگيتها تتريك سلمت
عليها وبكل احترام وگفت گدامها گلت الها
_ ست صار عندي ظرف ومادامت امتحنت
باجر عادي نمتحن اني وصديقتي سُكرة
فتحـت دفتر الدرجات خطت بالقلم تقر الأسماء وصلت الإسمي ودارته
بوجهي اقتربت منها مبتسمة قريت الأسم وبصفه الدرجة صفر غابت
ابتسامتي وجنها صفگتني على وجهي باوعت عليها والدمعة بعيني
دُجى : هـاي ليش والله العظيم حرام ست الدرجة
هاي تفيدني ليش صفر والقران عندي ظروف
سدت الدفتر وتحاجيني بنتره بلا نفس
_ شنو ظروفكم مو هاي البنات وياكم داوموا وامتحنوا
بعد انتِ وياها شنو هل طروف اللي تحكم ما تجون تمتحنون
شلون اگول احنا مو مثل باقي البنات واقل مشكلة بحياتنا تسوي
صد بدراستنا ومعرضه الألف خطر نخسر حلمنا ، شلون اشرح
مستقتله اخذ هل شهادة على اقل اكمل حلم امي ، بيا كلمة اوصف
الها وضعي حتى ينكسر گلبها علينا وتخلينا نمتحن هل امتحان
دُجى : هاي اول مرة اغيب ست الله يوفقچ لا تحسبين
الدرجة صفر والله العظيم اعتذر منچ بعد ما اعيدهـا
_ تسجلت بعد ماما وخلصنا يلة روحي للصف
دُجى : لا عليج الله ست لا تكسرين بدرجاتي
والقران ظلم اني سادس ست احتاجهن فدوة اروحلچ
ساعديني لا تغبنين دخولي للبكالوريا الله يوفقچ ست
ملت مني تطرد وارجع اتوسلها والمدرسات كاعدات يراقبون ما يدخلون
وحده منهن رادت تدخل الثانية سكتتها بقيت اتوسلها وابجي واشهگ
اختنگت وهي ولا مهتمه تشرب بالجاي وتاكل جبن عاطت واجت ادفع
بيَّ كل دفعه اقوى من الثانية وشمرتني برا الغرفة بحرثتني بالگاع
واجت سكرة تركض وبنية ويانا بالصف يوگفن بيَّ ينكتن التراب مني
_ ولي غبية بعد تسجلت الدرجة لو ابوية
يجي من الگبور ما اغيرها وحتى اليوم هذا الشهر صفرر
وعافتني اشهگ لازمه كلبي وراحت ولا على بالهـا
دُجى : ولج مسجله درجة الأمتحان صفر تعرفين شنو
صفرر واليومي صار صفر شظل بالدرجة راحت بعد
اخذتني للمغاسل اغسل وادعي عليها دبة الطرشي الله لا يوفقچ
حرگتي كلبي الله بحرگ گلبچ لج ما تنقهر تگول ميخالف مثل بنتي
ليش هيج حقاره عدهاا انوب السومي صفررته راح حتى اليومي
سُكرة : ختولي طبها مرض هل جلبة اروح
اشتكي عليها عند المديرة تروحلج فدوة
سمعت الجرس رحت للدرس بلا نفس مقهورة گوه خلصت تلاث دروس والرابع درسها ودامها خلت اليومي صفر حتى درسها ما احضره لعد
هل حيوانه بقيت گاعدة بالساحة اراجع بالدرس الخامس بين ما يكمل
درسها الجايف هي محمضه والأحياء محمض مثلهـا
اندمجت ارسم على كتاب واحس بحجابي ينجر من شعري وگفت
بلا إرادة مني على طولي واندفعت على حايط شفتها ست وسن
فكيت عيوني من تريد تضربني لزمت ايدها ودفعتها وصحت
دُجى : ليش تضربين لا تمدين ايدچ ما اسمحلچ
غمزتلي بعيونها وتأشر على عماير داير ما داير المدرسة والسياچ تگلي
_ شعندچ گاعدة هنا مواعده يا جلب وباقية تنتظري
شنو بنات هل وكت لو تغيبن وتطلعن وياهم لو تشردن
من الدروس انوب انظل نفتر وراچن.
ضربت على وجهي وحلفت الها واني امشي بكل سرعتي واركض صرت للأدارة والله العظيم ما اسكت الها شلون تتهمني على يا اساس هل حيوانه تشكك بشرفي هي هاي اطلع جيل المستقبل المريضة الكلبه
دخلت على ادارة مختنگه من البجي والركض والمديرة گامت من مكتبها
تحضن بيه وتعدل بحجابي تسألني واني اأشر على ست وسن واشكي
منها ومن كلامها وطعنها بقت ترزل بيها وهي اخذتها وراحت برا الأدارة
والمدرسات گاعدات اثنين يشكن من ست وسن اسمعهن يحجن بيناتهن
_ هاي مخبلة مو ذاك اليوم والد طالبة اشتكى
عليها بالتربية هم ضاربة بنته
_ اي وحده بطلت من وراها ضاغطه عليها مخليتها تكره المدرسة وشلون بنية ذيچ فد دره مال الله ادب واخلاق
بس وسن مخبلة
دخلت المديرة وجهه مـا يتفسر محتقن متغيرة 180 درجة واللي
جانت حاضنتني بقت ادفع بيَّ وتهدد تگلي
المديرة : باجر ولي امرچ يجي اذا ولي امرچ ما يجي
بعد لا تفكرين تداومين ما استقبلچ بمدرستي
دُجى : شنو سويت والله العظيم ما سويت شي
_ گلت ولي امرچ باجر يجي معناتها يجي
دُجى : ماعندي احد يجي ست والله ماعندي احد
_ واهلچ ؟
_ امي ميته
غصيت وبقيت اشهگ اكثر اختنگت وگلبي بوجعني گالت
_ وابـوچ ؟
_ مسـافر
سكتت ورجعت ست وسن توسوس بأذنها عاطت
المديرة : اذا ما بحي ولي امرچ لا اداومين بعد
وامتحان باجر واليوم ما تمتحنين اذا ما يجي وليّ امـرچ
انجبرت اطلع منهم بس ما اگدر حتى النفس اجره الدنيا بكبرها تفتر
بيَّ مستقبلي واحلامي وحلم امي كله راح يضيع من وراهـا وسكرة
لگيتها بالحمام تبجي هم طاردتها ومرسبتها بشهرين ويانا بنية هم
غايبة مخليتهن روحهن ترفرف من القهر مكتولات كتل
رجعت للدار شمرت الجنطة والكتب وكرهت كل الدروس ، نمت بملابس
راسي راح يطگ وينفجـر من البجي ، ما گعدت الثاني يوم غسلت
ورجعت لفراشي والبنات گاعدات يحلفون بيَّ اداوم ما رضيت تعبت
اركض وين ما اركض واريد احقق حام يطلعولي ناس وحوش ينهشون
بيَّ اتعجب على عالم ليش يحبون يكسروني ليش يقهروني ويتسابقون
على ياخو يهدمني وينزل دموعي ويذلني اكثــر من الثـاني
سُكرة جبرت رونق اداومي وهي ضلت يمي نبجي على درجاتنا اني وياها
وعفتها تصلي ونمت مـا عندي نفس بعد احارب اكثر خليها هي تمشي
للظهر رجعت رونق تعبانة من الدوام اكلت واجت يمي تقنع بيَّ وعيونها
تغفي نعسانة خلتني اضحك عليها جنها عجوز تحجي وتغفي
راحت لفراشها وسكرة تغطي بيها گاعدة يمها تسولف الها شسوت
بالمدرسة وشلونها بالأمتحان وحلفتها تلون الها دفاترها تعدلهن
اخذت نص من دفاترها ونص الثاني اخذتها سكرة نعدل بالدفاتر
مالتها وهي نايمة للعصر خلصنا قبل المغرب گعدتها نسمع الها
وسكرة تساعدها بالكتابة الحد ما كملت وتمددت تمطط بجسمها
رحنا نزلنا نتعشى حسيت روحي راح اتخربط من الجوع وقلت الأكل اكلت
ومن شفت منارة وفنار نزلوا صعدت فوك ركض الثاني يوم هم غبت وسكرة
راحت حتى تشوف الوضع وتحجي وياه المديرة من رجعت گالت معاندات
لليل دز عليها استاذ خيبر خافت تسمع خبر على استاذ سرگال بي نزلت
صعدت بعد خمس دقايق گالت
_ سألني گال دُجى ليش ما اداوم وانتِ محذرتني
ما احجي سمعت كلمتچ وسكتت بس المفروض ابلغهم
دُجى : واوگع بالسانهم ما اريد تعبانة والعباس تعبانة
خلص الأسبوع غياب ونفسيتي ادمرت وخالتي رجعت تنتكس اتراكم
كلشي على راسي لا من دارستي ولا من سفرتي ولا اخذت حق امي
انتهيت بس من البجي واذا غبت يوم تنگلب الدنيا ليش
نزلت وكت ظهر الباجي كلثوم حجيتلها الصار ويايَّ گالت اجي وياچ
بس دوامي ويه دوامها وممنوع تغيب على شغلها مسؤولية اكل البنات
عليها وصعب تعتمد على عاملة ، رحت على استاذ خيبر ست كبرى صاحت : بأجازه ما يداوم عدهم مشاكل
افتريت على مدربات وحده وحده وكلهن استحي اضغط عليهن صعدت بفراشي ما خليت دموع بعيوني هلكت ونمت گعدت المغرب عيوني منفوخه
والف فكرة براسي اذا هذا الأسبوع ما اداوم معناتها الشهرين تروّح هيچ
بلا فايدة بس تعب روحه ورجعه وسهر ضاع وبدون سبب
رونق وسكـرة بقوا يحجون براسي قبل لا يضيع اخر اسبوع ابلغه
انزل على اخر حل واصعب اختيار ارجع اوگف گدامه واشكيله
خليت سكرة تروح تحجيله من صعدت گالت
_ مايقبل قافل احجي عنچ قبل بس احجي بموضوعي
والمشكلة الصارت گتله خلت النا صفر لان غياب
دُجى : گولي الا طردوني ولچ ما يقبلون اداوم
رونق : بالعباس قافل يگول اللي عنده شي هو يجي يحجي
رفضت ومنين ما اجيب الفكرة براسي ارفضها اكثر وانهار اكثر بس تالي هل عناد انتهى ثاني يوم من سمعت دز مدربة وحل مشكلة سُكرة وما قابل المدرسة تعرف المدربة تعرفني حتى لا ينحل الموضوع كله ويضغط عليَّ
كل غايته انزل راسي وأرضخ واروحله ادوس على الكرامة والكبرياء بكعب امه اذا رحتله ما اروح ياربي شلون اروح واشوفه بعد كل هاي الفترة
بقيت احرگ بروحي من التفكير واروح وارجع عيوني زورگت من البجي والقهر وانتفخت گوه اشوف بيهن ومصيـري الأستسلام نـزلت بعد ما شفت البوب كلهـا انسدت بـوجهي ، رجعت مشيت بهذا الممـر المكروه وقريت نفـس اللافتة " حُجرة التهميش " وگفت مقابيل بابها دگيت بـابه وگلبي يريد يطلع من صدري متخربطه دگاته وعقلي رافض خطواتي
كـافل : اتفضل
فتحت البـاب ودخلت من بعد الشهور الفـاتت لا شايفتـه ولا مريت بمكتبه
منـزل راسـه بالأوراق وگفت بالنص قريب من مكتبه تحمحمت وهمست
_ مـرحبا استـاذ
بطرف عيونه رفعها شافني ونزل نظراته وحنه ظهره اكثر على اوراق گال
_ اتفضلي
شهگت اول ما اتذكرت الموقف لا ارادياً ودموعي تتسابق بنزلتها على خدي
وره كل كلمة احجيها اشهك واسكت اخذ نفس وارجع اكمل منتهيه
دُجى : عنـ.. عندي مشكـل... مشكلـة مايقبلون اداوم
يريدون ولي امـ... امري اسـ.. أستاذ تسمعني يريدون
ولي امري گلت الهم ماعندي مايقبلوني راح ارسب
دخل ايده بشعره يلزم براسه قوي ويريد يوكف يرجع ويرد يگعد
ما يباوعلي بس يسمعني واني بعد ما اشوف من دموعي
دُجى : ماغلطت وروح امي ماغلطت وياها غبت بيوم
المشكلة وداومت توسلت بيها وطردتني دفعتني گدام
المدرسات وترستني تراب وگلت بعد ما احضر درسها
لان خلت صفر
خليت ايدي على گلبي والعبرة خنكتني جنها سيام تخنگ بيه
دُجى : استاذ صفرت اليومي مالتي والله عيني انعمت من
الدراسة اجت جرتني من شالي اخذتني على ادارة المديرة
شاهده شسوت بيه وهي اتهمتني باطل وروح امي باطل
اقتربت من المكتب حتى بس يرفع عيونه يشوفني معاند ما يشوفني
كـافل : شسمهـا الچلبه بنت الچلب
دُجى : الچلبه اسمها وسن وابوها الچلب اسمه عـادل
سجل اسمهـا بقصاصه ملونه ورفع ايده يأشرلي بيها اروح گال
كـافل : بسـرعة اطلعي
_ ليـش ؟
_ اطلعي لا تعاندين
امسح بعيوني وصوت البجي شعلوه اجر بالنفس واسأل بي
_ ودوامي
_ باجر اداومين أدز وراچ مدربة تحل المشكلة
الموقف اجتمع بموقفه احسها كلها تلتم عليَّ اسلوبه وبروده ويايَّ
زادت حرگت گلبي صعدت فوك للحمامات اذب من راسي لازمه معدتي
على صوتي درت شفت فنـار واگفه من لزمت معدتي وگعدت راحت على
منام مالتنا دفرت الباب وعاطت
_ الخايسات تعالن اخذن هاي الخايسة متخربطة بالحمامات
لزمت بطني وطلعت خزرتها وكوه اجاوب بيها
دُجى : انتِ خايسة
_ ماكو غيرچ خايس
_ امداچ
_ تفو عليك
_ انتِ تفو عليچ
سكرة : ثول شبيكم جهال امشي دُجى امشي
فنـار : مو اجيچ اسحلچ القزمة
طبيت للغرفة وسكرة رگعت الباب بوجهه دفرت الباب وراحت تفشر علينا
حجيت السكرة وغفيت من شفتها انقهرت من موقفه مثلي ورونق ذبت
الدفتر تمددت تعضعض بالقلم وترفرف الدفتر بالهوا
رونق : مشاعر الجفاف العاطفي عندي فسرت تصرفه
وگالت طردچ وگال " بسرعة اطلعي " لأن لو باقية بعد
راح يجي عليچ يكمكش ويلزم ويحضن واحتمال يبووس
ضعف گدام الشهگات ضعف گدام دمـوعچ اسألي وحده
عدها جفاف ولا تسألين حكيم
سُكرة : انجبي كلش بلا تربية صايرة
دُجى : ذكريني باجر اكتلها الصبح
سكرة : تگلها ما يباوع عليه والبطرانه تگول يبوس
دُجى : شيبوس غير ازورگه والعباس اطلعه للمستشفى
الثاني بوم گعدت عيوني گوه افتحها لكيت سكرة مجهزه ملابسنا كلنا وماسحه حذائي وكاويه الملابس رحت سبحت ركض والدنيا جماد بدلت ونزلت تريگوا واني شربت كوب حليب ورحت للخط حتى الخط اشتاقيت اشوفه ، دخلنا على اصطفاف وگفنا والمديرة شافتني من بعيد هي وست وسن وگدام البنات طلعوني
وسن : داومتي وعليچ غياب اسبوع جبتي ولي امرچ ؟
اريد اجاوبها وحايرة شلزگ الها وما اتفشل وسبقتني ام الرياضيات
ست امل : اي ولي امرهـا بالأدارة
لزمهن ميوت فجأة رجعت المكاني وسكرة تهمس
_ شفت مدربة الخياطة اجت ورانا بتكسي
_ يارب تنحل خلص صبري
وبمجرد ما خلصت الأصطفاف صاحتني رحت امشي وراهن وست وسن مستمره بالرزايل دخلن قبلي واني وراهن دخلت وصـارت عيوني تتحرك
وياه صـاحب البدلة البيج الفاتح وكف سد الدگمه مالتها وسلم عليهن
بكل احترام والمديرة سألته على صلت قرابتنا طلع محفظته انطاني
فلوس وبدون ما يرفع عيونه عليَّ كال
_ روحي اشتري بطل ماي من الحانوت وتعالي
مثل الجهـال هم الجهال ما يصرفوهم هيچ خلاني اضطر اطلع حتى
لا المدرسات بگولون عنودية وتثبت عليَّ تهمتهن رحت للحانوت اشتريت
بطل ماي وتذكرت هو مقابيله براد ماي وعلى طبله بصفه مقدمين ماي
وكوب چاي اخ بس اخ اذا افشر هسة انفصل من الدنيا مو من المدرسة
لحگت وخفت افوت من سمعته يرعد عليهن وست وسن طلعت تصيح
_ ولا يمكن اسمح بهذا الأسلوب
كـافل : وهي يا مالتها تصاحب تتواعد تطلع وياهم
ياهو مالتها اللي عليها تشرح درسها تمتحنها وبس
غيرها لا تدخل بي تخابر وتبلغ ولي امرها هو يحاسبها
ذبيت بطل الماي ودخلت هي دموعي عيب تخلص عطت محروگه
اناشغ وگفت وراه دار وجهه عليَّ رفعت ايدي احلف
دُجى : استـاذ والقران ما اصاحب ولا اواعد
تتبلى عليَّ وروح امي تتبلى عليه
ظل يهش بيَّ بيده ويجي يصيح بوجهي گدامهن
كـافل : عالمـاليششش تبچين تحترك المدرسة لابو الدراسة
دُجى : تجذب والله العظـ...
كـافل : لا تحلفين ابـوية مصدگچ اعرفچ ما تجي
منچ الزلة بس ست وسن عبالها كلها مثلها
المديرة : مو جنت تحجي عدل لا تغلط استاذ كافل
_ اغلط بالمقابل دام ساكت على باطل خليها تجي
تحجي عدل وتتفاهم لو خليني اتصرف بطريقتي
جرت ورقة وحاوبته بعصبية
المديرة : انقلها وفضت المشكلة
راح عليهـا خفت يتصرف غلط وهو فصل من العصبية بعد ما يشوف گدامه ، لزمته من ايده اسحب بي وهو جر الورقة من المكتب صاح
كـافل : مسويلي عصابه ؟ انتِ اختاريتي
اني اجيت اتفاهم بالحسنى وطلبت تعتذر
على الضرب مالتها وهي عاندت وزادت
تتهم بالبنية حذرتكم لا تخلوني اتصرف
المديرة : لا بالله اتصرف ما دامك مجذب المدرسات
والمديرة ادارة كامله مجذبها ومصدگها روح اتصرف
كـافل : هي ما تخاف من حتى تجذب لو غلطانة
توگف بوجهچ وتگلچ اي سويت فلان شي وفلان شي
اعرفها كلش زين ، واعرف الباقيات هنا چذابات
هي الوحيدة الي تحجي الحقيقة
اريد اجر النفس ما اگدر وهوَ طلع تلفونه وطلع برا يخابر والمدرسات
نزلوا من الصفوف على اصواتنا العالية يتسائلون
_ شصاير يا ستار ست امل شنو هل عركة
_ طلبنا ولي أمرها وغابت اسبوع واليوم إجت جايبة خطيبها
وياها نريد نتفاهم وياهم ما يقبل يهدد ويتوعد شسويله عيني خلي شيسوي خلي يسوي سوء فهم بين طالبة ومدرسة ويصير بكل مكان
مو من حقه يجي يفرض قوانينه علينا ويزمخ وين گاعدين غابة
ست امل : والله ست اخلاص ست وسن راح تودي سمعة
المدرسة بالطين هاي كل اسبوع والثاني مشكلة شكل
ردت اطلع وتصادمت وياه لزمني من طرف قميصي وجراني
غاد من عنده مايتفاهم ولا ينحجي وياه راح للمديرة وقدم التلفون
اخذته منه نافخه روحها وتخوزر اول ما حجت وعرفت اسم المتصل
ومن التربية گعدت على كرسي تسمع وتجاوب بـ اي والطرف ثاني
ما وگف ثانية عن الكلام حاولت هي تقاطعة ما ينطيها مجال مستمر
ما سمع الحجي بس اللي عرفته المتصل من نص التربية
وبعد ما كمل اخذت نفس وگالت
_ سوء فهم وانتظر مكالمة دقايق وينحل وامانة الله
اي تقرير لا تسوي اني احلها وبعد ان شاءالله ما تتكرر
اعرف ست وسن تكرر اسمها بس طول بالك استاذ
اني احلها بمعرفتي
رجعت التلفون واشرت الأستاذ كافل يگعد وهو جر الكرسي گعد واشر اليه
من طلعت هي والمدرسات عرفتها راحت الست وسن ، رحت گعدت جر كلينكس ومد ايده اخذته امسح بوجهي وبعدني ابجي من الموقف
بدون ما يمهد للسؤال ولا حتى مقدمات بصوت خـافت گال
كـافل : منو هذا حاجيه وياه برا المدرسة بيوم العركة
باوعت بعيونه وبلعت ريگي گتله
_ لهب ابن التاجر
_ والثاني ؟
_ صـ.. صـا... صاحبة
رفعلي حـاجبه وملامحه هـادئه وصوته على نفس المستوى
كـافل : شعندچ وياه ؟
_ ماعندي شي
_ احجي حتى لا اعرف وحدي
_ رحت اشوف سُكرة وهوَ عاركني
اشر بيده اكمل بلعني ريگي وگتله
_ عاركني واني حتى ما حاجيته يگول چنها بزون
غمضت عيوني ورفعت ايدي على راسي من ضرب المكتب
بچف ايده وكف على طـوله يجـر بيَّ من قميصي يگلي
_ امشي جيبي الجنطة بعد ماكو دوام
شـردت من گدامـه عصبيته خلت اعظامي اطگطگ اريد اوصل للباب صار شطوله شردت والمدرسات نزلوا من ست وسن ، بقيت واگفه ما طبيت للصف ابجي وحدي وعيوني على اداره طلع منها يباوع على ساعته
اضطريت ادگ الباب بالدرس واشرت على جنطتي وسكرة تباوعلي
خايفة اخذتها وگلت للمدرسة المديرة تريدني ونزلت خطواتي ثگيله
دخلت على غرفة الأداره راجع گاعد ما يباوعلي وست وسن گاعدة على تخم منتظريني اجي لبست الجنطة عدل واسمعها تحاجيني
وسن : الأحد الجاي تمتحنين واليومي رجعته
هاي الخاطر ست اخلاص واستـاذ كافل عديت
رفعت ايدچ عليه
بقيت اباوعله من وگف وجهه ثگيل سلم على مديرة وضرب ست وسن
بعرض الحايط ولا عبالك گالت الخاطرة واشرلي امشي گدامه لابسه
الجنطة رحت امشي وهوَ ورايَّ ينافخ ويتأفف ويستغفر الحد ما وصلنا
للسيارة الطريق كله يستغفر ويدير بوجهه ويسب بالسيارات
وصلنا للدار ذب السيارة ونزلت صعدت ركض فوك اقل النص ساعة
واجت باجي كلثوم وجهه مخطوف وملامحها ماعرفت افسرها بس مبينة وراها شي يخوف گالت البس حجابي اجي وياها
نزلت بخطوات ثگيلة وايدي على گلبي المنقمت ويحس اكو شي منتظرني تاليتـه أذية! ما مرتاحة ابد، امشي والهدوء بالدار يزيد ولا بشـر ولا حسيس صوت بشـر وأنفاس ينسمـع على هالخـوف تراجفت اعصابي وتلفت من وصلت الغرفة استــاذ كافل وفتحت الباب اتصنمـت بمكاني واني اشوف الطـرف المُقابـل لاگانـي كابــوس مو أنقــاذ ، تشـرُد مو احتـواء مشيت تجاههُم خطوات عميـة گلب وعيـن ما عرفت ورا هالخطـوات راح تنگلب حياتي فوك تحت وكُـل المستــــور ينفضــح!!!! ....
𐙚 الباقيات الصالحات 𐙚
❀˖° سُبحانَ اللَّه
❀˖° وَالحَمدُ للَّه
❀˖° ولا إلهَ إلا اللَّه
❀˖° وَاللَه أَكبَر
