رواية حجرة التهميش الفصل السابع عشر بقلم اساور حسين
﷽
تذب نفطك عليـه واني بيه النار
وتتحمه ع ناري ومـا تطفيني
وصرت محبس بـديك وكمت بيه تسوم
ساعه تبيع بيه وساعه تشريني
⋆˚☆˖°⋆｡° ✮˖ ࣪ ⊹⋆.˚ ⋆˚☆˖°⋆｡° ✮˖ ࣪ ⊹⋆.˚
وصلت الغرفة استــاذ كافل وفتحت الباب اتصنمـت بمكاني واني اشوف الطـرف المُقابـل لاگانـي كابــوس مو أنقــاذ ، تشـرُد مو احتـواء مشيت تجاههُم خطوات عميـة گلب وعيـن ما عرفت ورا هالخطـوات راح تنگلب حياتي فوك تحت وكُـل المستــــور ينفضــح!!!!
شهگت شهگه طلعت من صدري المهدوم منهـم ودموعي وحدهن طاحن على خدي نزلت راسي من شفـت عمتي الوحيدة اللي امي وصتني ارتمي عدها
لو خسرتها الوحيدة الشاهده على عذاب امي وصديقتها وتسمعلها الوحيدة
اللي تعذبت من اهلهـا مثل ما ضيعوا امي وضيعوا حقها ودمها انهدر
اختهم من لحمهم ودمهم ما همتهم وهي بنص الخراب على ذمـة مجـرم
بجيها اضعافي اجت عليَّ فاتحه ايدهـا لمتني يحضنها ما مصدگه رجعت
شفتها وشميت بيها ريحة اهل دمـار البنية عيشتها بدون اهلهـا ذبيت ثگل
الجبال اللي انجبرت اتحملها بحضنها بجيت بعلو صوتيّ اشهگ ما اريد
اعوفها ، حضنت وجهي تباوع بوجهي وتنزل نظرتها لملابسي وتميل براسها تنوح من القهـر اخذت ايدي تريد تبوسهـا سحبتها منها صاحت
_ ولـچ ميثاء رجعي وشوفي حـال بنيتچ المدلله
مشت ايدها تلزم بوجهي وجتوفي وايدي هزها منظري رفعت راسي
اجر النفس اختنگت بذكر طاري امي لو اروحلها شلون
_ ويـن دُجى التلمع بملابسها الجديدة وتصفن الگرايب
ويـن ذهبچ التارس رگبتچ وايـدچ
ويـن ضحكتچ عمـه وين راح دلالچ
دُجى: راحت امي واخذت دلالي وياهـا عمـه
دفنـت نعمتي الما قدرتها غير بروحتها
بقت روحي تتعذب بلياهـا خلتني وحدي
اشوف حقيقة عاشت عمرها كله ويايَّ
تحذرني بيهـا واني اجذبهـا
تمسكت بيدي گعدتني على تخم وگعدت هي بالگاع تمسح بعيوني
مـيس : تجيـن تعيشين يمي نتگاسم الخبزة سوية
بقيت اباوع بعيونها اجر بالنفس واسألها
_ وزوجچ ، اخـاف يكتلني
_ انسجن بتهمة سرقة محكوم سنة
بهاللحظة لفت انتباهي حركة على المكتب درت عيوني عليه شفت عيونه مصبوغة دم وإيده قابضها چنه لازم گلبه بيها گاعد يراقبني يغلي والف
كلمة تنفهم من هالنظرة الما گدرت أظل أتحملها نزلت راسي وتلفتت على عمتي متهربة منه
دُجى : اخاف اصير ثگيله عليچ وانتِ صاحبة جهـال ...
ميس : اشتغلت اسوي كبة وبورك وابيع
بيهن تساعديني واني اساعدچ تكملين
دراستچ وتبلغين سن الرشد وتسافرين
دُجى: مـو ..
ميس : بنيتي انتِ ، وامانة صاحبتي واجيت اخذچ
هذا مو مكانچ يابنت اخوي هاي مو حياتچ يبنت راعد
تعالي وروّح امچ ليل ونهار اشتغل وما أقصّر ويـاچ
حضنتها حضن اگول الها بي وين جنتي عني تمسكت بعبايتها ومطرت عيوني بالبچي حسيت الفرحة رجعت دگت باب گلبي المهدوم طرت من الفرح وروحي رجعتلي بشوفتها وكلامها گمت ادعي وأشكر الله بگلبي الحمد لله ربي اجه اليوم يطلعني بيه اهلي وارجع اعيش جوة سگف يسترني من الدنيا والناس الغريبة واخلص من الغربة
ميس : فرحيني وگولي تجين تعيشين عندي ؟
دُجى : اخــذيني عنــدچ
سـارت نظرتي على طوله بـوگفته شـايل القلم وضب عليه خـازرني بعد جوابي وبيده ورقة خلاهـا على مكتـب يحجي وياها مـا طايق يباوعلها
كـافل : هلا بيچ اذا خلصتوا استلمي هالورقه
البنية بذمتي وحمايتي وبالقانون بالأوراق الرسمية في حال تريدچ وتريديها تروحين لـوزارة العمل والشؤون الاجتماعية تقدمين طلب كفالة وتسليم وعود الأسبوع الجاي تطلع لجنة على بيتكم تتأكد من وضعكم
وحالتج يلة تطلع عـود اذا اذا وافقوا والذاك الوكت هـل بنت تظل عنـدي
ميس : الله يسهل امـرك سهل امـري مابيَّ روحه ورجعه
صاحبة اطفال واريد ارجعلهم واخذ هل بنية عندي
عايفهـا مركـز بيَّ وصـرت حافظتـه لو راد يصعبها يصعبها ولو حب يسهّلها يسـويهـا اسهل من شربت المـاي، مشيت امسح بوجهي واروحله لگدام المكتب وگفت مقابيله ركز عيونه يسمع مني وجاوبني بنبرة مخنوگ بعبرته
_ استـاذ حبـاب اريد عمتي
كـافل : لا تعرفينا دُجى
جذبت عقلي وتفسيرة ، جذبت هل نظرة الضعيفة ، وجذبت نبرته المهزومة
دُجى : أتمنى ارجع اعيش وياها اريد بيت واهل تعبت
بهـدوء رضخ يفهمني كلمة والثانيـة ومتردد من رد فعلي
كـافل : مـو وفيت بوعـدي وياچ ، من رجعتي هنا صـار
شهـرين وايـام عشتيها عندي ماخليت احـد يتقرب منچ
ويتنفس بحـرف ، ووفرت الچ الأمان ومكمله دراستچ
وامانتچ بالحفظ والصون وصديقات عندچ
بعـد ليش تعوفينا ؟!
درت كل جسمي على باب من سمعت صـوت ست سامية صار بنص
المكتب اطگ بكعبها تفحص عمتي بعيونها من راسها الرجلها
سـامية : شنو ديصير هنا ؟
سلمت عمتي عليها وفهمتها بكل احترام مثل ما فهمت ابنها الواكف ورايَّ
راحت عليها اخذت الورقة تقراها وباوعت على ابنها ورجعتها بيد عمتي
سامية : سهلة هالإجراء بيومين تخلص
شفت ايده لزمت المكتب قريبة مني درت جسمي منه صارت بوجهي امـه
تشرح لعمتي وتعلمها شنو تسوي غمضت على صـوت همساته بأذني
كـافل : لو يموتون مـا اخليهـم يـاخذوچ
فزيت على صـوت ساميـة لگيتها گدامي لزمتني من معصم ايدي وجرتني
ودتني بعيد من المكتب وگفت گدام استاذ كافل من جـر كـرسي المكتب وگعد وراه المكتب ونزل راسه للأوراق يلتهي بيهن بين ماتروح عمتي
اجت ست كبرى اشرت الها طلعتنا من المكتب رحت امشي وياها ممنوع اعبر سياج الحديد والحرس بالباب لزمت ايدي وعيونها مغورگه بالدموع
ميس : لا تخافين عمه دُجى ارجع هل يوميـن اخذچ وعد
هاي المديرة گالت تساعدني وتروح ويايَّ للوزارة تجيب قبول
حضنتها فـرحانة بيها ما مصدگه اجت تاخذني بوستهـا سلمت وراحت
عيني على مكتبـه من صـعدت فـوك الغرفة فارغة اريد البنات حتى احجي
وأفرحهم ، ظليت افتر بالغرفة خايفة وبنفس الوكت فرحانة راح ترجع حريتي
بقيت انتظر بالساعة والساعتين وللظهـر رجعوا البنات بقيت احوس يبدلن ويغسلن واني احومي على راسهن نزلن ونزلت وياهن على غده اخذت ماعون خليت تمن وعلبة روبة من عرفت الغده اليوم دجاج لعبت روحي
رحت على ميز بمكاننا والبنات گاعدات اجت بنصهم متحمسه افرحهن ويايه
_ خلوني بالنص دللوني هاي اخر ايام أتغدى وياكم بالدار
خلت رونق لگمه هلكبرها بحلگها وگالت
رونق : ها ربحتي ورث الخلفـوچ راح تشتريلنا
جزيرة بعيدة نعيش بيها وحدنا وبعد ما ناكل بالدار
دُجى : اجت عمتي وتريد تاخذني
رونق : اكيد استاذ كافل طردها
_ لا ابد بس ..
استفقدت صوت سُكرة درت عليها گالت
_ صدك تعوفينا وتطلعين
دُجى : اشوفكم بالمدرسة
دنت رونق المواعين بعيد منها ماتريد تاكل بعد وگفت على حيلها ، ضحكت على زعلتها ولزمت ايدها قبل لا تروح بعيد وهاي جرتها مني قفلت دفعت ايدي وطلعت من الصالة جنها خبله راحت صعدت وسكرة باوعتلي صفح هزت ايدها وراحت وراها ، غصيت بالضحك على موقفهن ورحت اركض وراهن مـن ردت اطلع سـم فنـار ضخ عليَّ تعيل بيه
فنـار : روحي مثل الجرو رراهن اركضي امداچ
رفعت ايدي صفگتهن وحده بالثانية وغميتها وكملت مشي وجاوبتها
دُجى : شحارگ دمچ صديقات بيناتنا اصير الهن جرو
چلب براحتنا صداقتنا ونلعب بيها شلها غرض بينا الناس
اسمع بس دردمتها ورايَّ تفشـر الخايسة رحت صعدت لمحت استاذ خيبر بتراك البيت اجه فـات من برا مستعجل يلم بالمحفظة ومفاتيح السيارة يمشي المكتب استاذ كافل عبالك واحد يركض وراه ولونها مخطوف
كملت طريقي صعدت فـوك للمنام اول ما دخلت لگيت رونق بفراشها دايرة
جسمها على حايط ومغطيه حتى وجهه ، وسُكره شافتني وطبگت باب الكنتور وذبت جنطتها من ايدها بنتره وراحت على چرباية ضحكت
دُجى : ثول تتزعلون مثل الجهال شبيكم رايحة حرب
سُكرة : رجاءً دُجى لا تحاجيني ابد ابد
دُجى : هاي شبيها عود صدك زعلانات
واسمـع الشهگه المخنوگه وجرت الخشم من جوه البطانية رحت عليها سحبتها من راسها وهي تعت بيها من ايدي وفحطانه من البجي تصيح
رونـق : عوفيني روحي مني خليني نايمة
دُجى : ولچ كل عقلچ عليمن تبچين شنو راح اموت
سُكرة : امشي لملمي غراضچ من هسة
دُجى : سكيره القزمة مو راح تتزوجين هم هيچ نتلاطم ؟
سُكرة : انجبي لا تحاجيني ابد
فتحت حلگي وعيوني على هاي الثانية تون من البجي وتسد بحلگها
مشيت گعدت يمها حضنتها اضحك عليها تضرب بيه تگلي
رونق : عليمن تضحكين گدامچ مضحكه احنا ما تستحين
دُجى : هههههه لا ما استحي تعالي انطيني بوسة
من هل خدود بالله تعالي فدوة لهذا الخشم الحلوة
تدفع وتضرب على راسي وتصيح
رونق : ايع لا تبوسيني ولي اطلعي من غرفتنا
سُكرة : اي روحي بالطابق الفوك بمنام فنار
رونق : خلي مخده بصف فنار الجايفة ونامي
سكرة : بلكي للصبح تكسرج تكسر
رونق : تفوخ گلبنا بيچ
درنا وجوهنا على باب من دخلت بنية وجهه جديد علينا گالت
_ منو بيكم اسمها دُجى
رونق : يا الله كون يدز عليها ألبالي ويرزلها
دُجى : عليمن يرزلني بايگه كعب امـه ؟
دفعت السلايه ام عطوب وگفت ابتسمت بوجهه البنية
دُجى : اني دُجى گلبي گولي امر خدمة ؟
_ استـاذ خيبـر ينتظرچ بمكتبة يگول ضروري هسة تجين
من طلعت درت على بنات اتأفف وذبيت روحي على جرباية نمت بطني
دُجى : شگد احب استـاذ خيبـر وكلماته الحلوة
بس هسة بنفسي ما انزل لأن اعرف استاذ ابو الغنادب دزه
فضولها ما يخليها تلزم نفسها من السؤال حتى لو زعلانه
رونق : ليش يدزه
_ من صعدت شفته فات للمكتب مستعجل
رونق : يريده يقنعچ تبقين ؟
سكرة : مايگدر يصيحها للمكتب يخاف تكسره على راسه
رونق : ختولي هو يستخطيها بخزره وعيطه يصگرها صگر
طلعت الهن الساني وعدلت حجابي نزلت والبنات مكملات اكل نص يصعدون فوك ونص يطلعن للحديقة يتمشن ، دگيت مكتب استاذ خيبر شفت فنار گاعدة بالحديقة بصف منـارة وجهه وردي من الضحك
دخلت واستاذ خيبر سد البردة المفتوحة على حديقة تحمحم وابتسم
خيـبر : اتفضلي عيوني سـت البنات شنو الأخبار ؟
عدلت الكرسي گعدت وهو گعد على كرسي المكتب وقدم جسمه مبتسم نفس ابتسامته الحلوة تاخذ العقل والگلب يخليني مرتاحة بگعدتي
دُجى : ردت انفصل من الدوام واجيتك گالوا اجازة
خيـبر : والله امشي بقضية سرگال تعقدت ودخلت
سين وجيم وخطية مو حلوة بحقة يطول بالسجن
وكل غلط ماعنده كل همه يحافظ على بنية بداره
دُجى : الصراحة انصدمت من عرفت قانون المدير
ممنوع يتزوج بنت من الدار ، عرفت من اتهموا استاذ سركال
خيـبر : من زمان هذا القانون اي مدير تزوج
او يحب بنية من المستفيدات ينحكم وينسحب
منصبة ماتشوفين ست سامية حذره هههههههه
دُجى : حبيت هذا القرار ذكي اللي مسوي
حتى محد يساوم ويستخدم منصبه ويستغل
رفعلي حاجبه وابتسم يمكن افتهم بسماري
خيـبر: احنا ماعدنا استغلال
زلم ينخاف منه ونخاف الله وبالكلفه عد عيناچ
دُجى : والنعم منكم معدلين
سكنت الأصوات ثواني نزلت راسي وجر الكرسي قريب من المكتب
وحط ايده على خده يتأمل مدري يفكر من كال
خيـبر : عمتج اجت وصلني خبر وزعلت من سمعت
قابله تعوفينا وتروحين ، اكو تقصير هنا زعلانه من شي ؟
دُجى : لا بالعكس صح بالبداية مشاكل بس من رجعني
استـاذ كـافل للدار ودگ صدره لليوم الحمدلله الوضع تمام
خيبر : چا ليش تردين تروحين وتعوفينا ؟
دُجى : كم بنية تجي هنا وبعد فترة اهلها يجون
ياخذوها وترجع قابل اني اول لو اخر وحده
خيـبر : صحيح ، بس لو تظلين هنا بيناتنا
مو احسن من بيت عمتچ ؟
دُجى ؛ ماكو احسن من بيت الأهل استاذ وعمتي من اهلي
ظل يلوف ويدور ويحاول ويقنع ويضرب امثال ويگلي تطلعين وبعدين ترجعين بعد ما تتحملين وشنو عدنا قصور وياج واذا ضايجة نحل الموضوع واني كل تفكيري اطلع مـن سجن الدار ، فشل وما قنعني
ولا بكلمة خليت وسلمت عليه ضحكت بوجهه وبگلبي كتله بيباي گول الصاحبك اطلع منكم يعني اطلع هسة او تزنچلني
من الطابق الثاني ولمحت استاذ خيبر يروح المكتب استاذ غرابيل ويتمتم يرتب الجواب قبل الدخله خالسهم بسواده وعيونه الغضبانه ، فتت على منام وحجيت للبنات وبعدهن طافره روحهن مني كلمة والثانية اترزل بيها
عفتهن بعدين أقنعهم ورحت بفراشي نمت للمغرب گعدت صليت وفتحت كتبي اريد اقرأ سُكرة فاتت تخوز بيه گالت
_ استاذ كافل دز مرتين عليچ وبلغنا نايمة
هزيت راسي ورجعت اكتب بالدرس اكمله حتى احفظ احياء وست وسن الچلبة ماتحصل حجه عليَّ وتعاقبتي اعرفها واح تشد فرد شدّه ويـاي
الحد ما اطفش منها واحطها واكتلها واخليها تحمد الله على رد فعل
استاذ غندوب وتعرفه نعمة واني نقمة لأن سحلاتي ما بعدهن سحلات
رونق : المتواعده المصاحبه امشي انزلي مو دز عليچ صگارچ
ضحكت عليها وكملت كتابة
دُجى : ماروح اخـاف يكسر على راسي المكتب مثل ذاك اليوم
فـاتت من يمي ضربتني على راسي وراحت لفراشها
سُكرة : صدك انزلي لأن اخذ كلمة مني من تگعدين
تنزلين خطية الساعة صارت ب8 وبعده ما طالع للبيت
ومن الصبح مداوم إجه ويـاچ وكمل كل شغله
دُجى : امشوا ناكل عشانه واروحله جوعانة
رونق : اكل ويه فنار ولا أكّل ويـاچ
رحت على مرايا عدلت حجابي زين تعطرت بعطري ونزلت على صالة الأكل
اريد افوت وسمعت طگطگه بمكتبه وباجي كلثوم طلعت منه من شافتني گبالها فتحت عيونها واجت عليَّ تحجي بصوت عالي
_ هـاي دُجى صح النوم عيني منتظرتچ تگعدين
اخذتني من ايدي تمشيني بممر الورشات باوعت وراها وشهرته شهيره
_ استـاذ كـافـل صعدني مرتين عليج لگيتچ نايمة
_ شيريد ؟
_ اقنعچ ما تطلعين ويه عمتچ
دُجى : باجي والله العظيم راح اطلع لو مو يوگف بوجهي
_ ماراح يگدر يوگف بوجهچ مستحيل ينزل من نفسه
ويبين الچ مايريدچ تروحين بالعكس هسة هو دزني
حتى لا يحجي وياچ
بقت تقنعني نفس جواب استاذ خيبر جاوبتها وعفتها ورحت الصالة
الأكل صبيت وجبتي وگعدت اكل والأفكار تتراگع بعقل دايخة ومرتبكة
من افكاري وما اريد اسويهن صعبات على گلبي بس لازم اخطي هيچ
خطوة حتى اضمن المستقبل وما اخسر الأثنين
كملت اكلي ورحت على مغاسل غسلت وجريت نفس شطوله افرك بيدي وامشي بالممر مالتـه اعرفه اخر شي يريده هسـة شوفتي بس لازم
اجبر روحي واوگف گدامه هل وگفه حتى لا يشد ويايَّ ويكرهني اكثر
دگيت باب مكتبه وگلبي دگاته احس صرت اسمعهن ورجلي ترجف بين
ما سمعت كلمته صـاح " اتفضل " ردت اشرد من گدامه وفشلت
فتحت باب مكتبـة وتحمحمت اجذب انتبهه من شفته گاعد على مكتب لازم راسه وجهه نظراته للباب من شافني نزل راسه وجهه احتقن رجع ظهره
وشنچ اكتافه مبين من رفعتهن وكأنه جاهز للهجمات ومتأكد راح نتصارع
فد شوية بالكلمات متهيأ من خزراته ورفعت حاجبة
دُجى : شـلونك استـاذ ؟
كـافل : منتهـي
دُجى : اسم الله عليك استاذ تريد اصيح استاذ خيبر ؟
كـافل : اجيتي هنـا شتريدين دُجى ؟
_ بعـدك زعلان مني ؟
_ على شنو بالضبط ازعل ودگاتچ بيَّ هـواية ؟
_ مثلاً على تصرفي المندفع قبل شهرين وياك ؟
من ذكرته بالرفض والتكسير دنگ راسه ورد يباوع على اغراض اللي كسرتهن كلهن مصلحهن ومرجعهن مكانهن والمكسر كلش مغيرة
دُجى : ما جاوبتني يعني زعلان ؟
تقـربت من مكتبه حتى ما گال تفضلي اگعدي مثل كل مرة ادخل
اول كلمة يحجيها اگعدي على كرسي هل مرة قافل نظراته السيف ما يگصها خففت نبرتي وهنا قررت استخدم الصوت الشتوي الدافي
حتى اكسر خاطره عليَّ رمشت بعيوني وهمستله
دُجى : اسفـة زعلتك بعـد مـا اعيدهـا
ذب حسرة شكبرها ويباوعلي مصدوم باعتذاري اشري بيده شنو وبلع ريگه صـافن بيَّ ابتسمت من ما حجه شي وضغطت على روحي گتله
دُجى : استـاذ كـافل لو ماتهمني ما اجي واعتذر منك
بس يهمني اروح وگلبك من جهتي صافي
شبي مايجاوب شنو خايف ردت اگله الأسيود انطق لا تخاف والله هاديه ما اكسر المكتب عليك بس احجي شي ، وهو مبلوع صوته وگف افتر من
المكتب واجه يمشي وثبت وبيني وبينه تلاث خطوات بس ويوصلني
عيـونه تحجي وهو مانطق بكلمة سألته " شبيك استاذ "رفع ايده على گلبه خلاهـا وميل راسه مركز بعيوني حذر بكل حرف يحجي همسلي بتعب
كـافل : ولچ گلبي يـوجعني
انخبصت بي وجهه التعبان ولمعة عيونه المختلطه بلون الأحمر من القهـر
ويه رجفت ايده وخت اكتافه المشدوده وثگلت النفس وهو يجر النفس خفت
دُجى : اگعد استاذ اگعد اصيح استاذ خيبر ياخذك
ركضت على باب افتحه لزمني على سريع شدني من طرف فستاني
وظل متمسك بقماشه يسحبني عليه مايرضى أتحرك خطوة وحدة برا الغرفة يباوعلي بنظرة المستميت الي يريد يفهمني ويوصل أفكاره
كـافل : ابقي خلي اكمل كلامي
درت وجهي عليه خايفة منه وعليَّ شفته واگف وصدره يصعد وينزل سريع وأنفاسه ثگيله چنه واحد يركض من مسافة بعيدة وإيده الثانية بعدها ضاغط بيها على جهة گلبه بحرگه
كـافل : لا تروحين ، من الدار لا تطلعين ابقي يمنا
باوعت على ايده شلون ضاغط بيها على فستان من قوة الضغط
بارزات شرايينه وحجيت بنفس نبرته الخافته بنفس الخوفه گتله
_ هو اجيت أحاجيك على هل موضوع
_ ادري اجيتي تحاجيني بي وتقنعيني
_ واريد اطلع وانتَ ما زعلان مني
_ راح تسهـريني الليالي
جانت عيونه تحجي كلام جبير وهو يعرف لو نطق بيه تنگلب الدنيا فوگ راسنا ، بس محارب يسيطر ضاغط على اسنانه يحاول يفهمني
دُجى : يرضيك اعيش بدار مشردات طول عمري ؟
_ ما يرضيني
دُجى : يعني حقي اريد اطلع ؟
_ حقـچ
دُجى : اذا طلعت راح تزعل مني ؟
_ هــواية ازعــل
دُجى: زين اني اريد اطلـع وانتَ راضي عني ؟
_ ليـش ؟
_ لان ماتستاهل ازعلك
المستوى طولي خفظ طـوله مرجع ايده اثنينهم وره ظهره خلاني بينا
وبين الباب ورجع كم خطوة عني من شافني راح اوگع من قربه يگلي
كـافل : انـانيـة تدرين تعبـان وراح تكملين بعنادچ وتطلعين
دُجى : والله العظيم مو انانية بس ..
_ لا تگولين بس من رجعتچ احد تعرضلچ ؟
_ لا
_ من فلشتي الدنيا على راسي عاقبتچ؟
_ لا
_ لو غيرچ مسويها ادفنه
فرك وجهه بجف إيده حيل ويجر حسرة ذبها بقهر ومشى مبتعد حس
على نفسه وراح استند على حافة المكتب بكل ثگله گعد عليها يگلي
كـافل : موفر احتياجاتچ هنا عليمن طالعة
تشتغلين وتدرسين وتكسرين بظهرچ
دُجى : مقدرة خوفك عليَّ وهل شي يحلي صورتك
بعيوني بس اني امنيتي اطلع من هذا الدار وارجع
بنت بيوت مو بنت عايشة بدار مشردات
كـافل : مو قدمت الچ عرض يخلصچ من الدار
دُجى : استـاذ رجاءً لا تفتـ ...
_ راسچ اليابس ما يرضخ دُجى وين ماتردين
تروحين روحي عليمن حارگ روحـي عليچ
درت على باب اريد اطلع وهو راح على مكتبه گعد بقيت لازمه الباب واگفه
واحس نار واشتعلت بيه من القهر عفت الباب ورجعت عليَّ ما اگدر اطلع وحجيت وويه كلامي دمعتي طاحت ماعرفت الزمها غدرتني گدام هل انسان مكانته عندي چبيرة احترمه صح مرات ما اطيق تصرفاته بس احترمه صوتي يرجف والعبرة خانگه بلعومي
دُجى : بس اني ما اريد اروح وانتَ زعلان مني
عـدل گعدته ورجع على نفس البرود حركاته عكس نظراته اريد
يلين جمود ملامحه وصده اليه امسح بدموعي مقهوره اباوعله
وهو يباوعلي ذب نفس وگال
_ تتفننين بعذابي
ابتسمت بوجهه من ابتسم يحرك ايده سريع يگلي
كـافل : بوية امسحيهن ادموعچ دمسحيهن شعدنا
ما زعلان منـچ ولا ازعل شعندي ويـاچ،تقررين براحتچ
هاي حياتچ منو اني واتحكم بيها اللي تشوفـي صح
ويناسبچ سووي براحتچ
انفتح الباب ودخل استاذ خيبر مستعجل يحاجي يگله
_ كـافل كملت الأوراق وابو عصام باجر يداوم بمكان
اسلام وحجزت موعد المنارة عند الدكتور ووو ..
سكـت استاذ خيبر من الكلام صافن على استاذ كـافل ما كمل كلامه
درت عيوني من استاذ خيبر على مكان استاذ كافل حتى اشوف ليش
انصدم وسكت هل سكوت وهو مستعجل ويحجي حسيت الدم صعد الراسي وخدودي گبت نار حرت وين اضم روحي من شفته فاصل تماماً وعكس ايده سانده على كرسي وجف ايده على خده صـافن عليَّ غـايب عن الدنيا مسلهم عيونه الذبلانه فـاصل من الشغل ومن منصبه وكبريائه وغروره وثباته
خيـبر: احـممم استاذ كـافل الولد برا ينتظر
رمش ومارفع عيونه لحظه جر نفس وبنظرته جنه يريد يحفظ تفاصيل ملامحي بگلبه قبل عيونه جذبت عيوني واحساسي وكتمت مشاعري
ما اريد اصدگ هل موقف ولا اربطه بكلام رونق واحساسهـا ، خجلت
من استـاذ خيبـر وحرت وين اخلي عيوني منه نزلت راسي من استاذ
خيبر هز ايده فرها فر وطلع من المكتب كله يگله
_ مستوي زايد
على طبگت الباب واني خزرته ذيچ الخزره المحترمه عدل گعدته ودار على
جهه الثانية يجمع بالأوراق ولازم القلم بكل قوته من كثر الضغط اصابعه
صارت لون ابيض ، ردت اطلع رفع ايده بيها كـارت وبدون ما يوگف گال
_ دُجى هذا رقمي بقي عندچ اذا تحتاجين شي
خـابريني تلگيني عنـدچ بأي وقت ووين ما جنتي
اخذته من ايده وابتسمت گتله
_ تمـام شكراً ، راضي عليَّ ؟
_ ههههه راضي
_ يعني صافي يلبن
_ سكر يا شربات
قبل لا اطلع سألته
_ باجر تسلمني الجنطة ؟
_ الجنطة تظل عندي امانة من تدخلين عمر 18 استلميها
اكبر غلط تاخذيها وانتِ ماتعرفين شنو ينتظرچ برا
ما گدرت اعارضه لأن كلامه صحيح گتله
دُجى : شكراً على كلشي سويته علمودي
تصبح على خير استاذ كـافل مع السلامة
_ مـع السلامة دُجى ...
عفتـه وطلعت وخليت الكارت مالته على رفوف الممر مـالته رافضه التواصل
وياه بأي شكل من الأشكال وكملت طريقي لفوك ، ومشاعري متضاربه
خايفة حتى خايفة افكر بي وبمواقفه كلماته ونظراته كلشي يخوفني من ناحيته هـو رجـال من عـالم يختلف عن عالمي وواقعه يختلف عن واقعي
صعدت وجمعت اغراضي من صعدوا البنات ضميت جنطتي جوه الجرباية اخاف اقهرهن وكعدت على جرباية من راحوا كل وحده على فراشها حجيت وياهن افهمهن واتفقنا ما نفترگ ابد ونلتقي بالمدرسه
واذا وحده شافت حياتها بيوم وتزوجت او سافرت نظل على تواصل دوم
نمت بعد ما تأكدت رونق نامت وهي تضحك مو تبجي ما ينطيني گلبي أزعلها وسكره رحت نمت يمها من غفيت رجعت على فراشي الثاني يوم
دوامي صبحي لبسنا ونزلنا كملنا ريوك واجه ابو الخط طلعنا وياه
كل الدروس مرت سهلة ومدرساتها تخبل هي فاتت الچلبة وگلبت مزاجنا
والبنات ملها تكهربت من صاحت
_ هل دفعة كلها راسبة زمالات ما متربايات امشن طلعن
اوراق امتحان عدكم يلة هسة تمتحنون بالموضوع واي
درجة تاخذوها تتسجل بالشهادة عناد مثل ما تعاندوني
عاطت بيها الشاطرة مال صفنا
_ ست والله كلنا محضرين الدرس مال يوم الخميس
انتِ گلتي كتبوا وحضروا شلون بعد تمتحنين بهذا
الموضوع الجديد
وسن : بكيفي تعلمني شغلي خايسات اكول امتحان
معناتها امتحان ما تريدون تمتحنون اطلعن امشن
واحسب الكم صفاره قابل يضرني انتوا متضررات
سُكرة : يعني ميصير والله ست غير نمتحن بالتحضير
وسن : انتِ امشي اطلعي برا مو حذرتچ لا تتنفسين
دُجى : شحجت وتطرديها شبيج ست غير نتفاهم
وسن : انجبي لا اجي اگطعچ ولا عبالچ نخاف
من خطيبچ وما نحجي والله احجي وازمخ واضرب
اذا ما تحترمون نفسكم انتِ وصديقاتج واطلعون
اوراق الأمتحان بحلگ مخيط يلة
الشاطرة مال صفنا هزت ايدها وطلعت من الصف تبجي بعلو صوتها والباقي طلعوا يرجفون جمعت دفتري وكتابي خليتهن بجنطتي وردت اغمها لو اگطعها بس ما تسوى عفت الصف الها وطلعت بقوا بس
خمسة لوگيات مالتها خلي تشبع بيهن وتمتحن بيهن براحتها
اجتمعنا كلنا البنات ودخلنا على ادارة استقبلتنا المديرة مصدومة
من عددنا وزهراء طالبة صفنا الشاطرة واني تقدمنا نحجي الها
بالسان كل البنات وهي عافت الأدارة اخذتنا وصعدت فوك عليها
دفعت الباب عليها وعاطت بيها
_ وتالي وياج ست وسن يعني هم يروحون
يجيبون أولياء امورهم واتخارب وياهم اتخاجل
واظل اتوسل هي هاي هم حاله
وسن : ست ملتهيات بالمرايا والمرطبات بيدهن والأكل
وعايفات الدروس والتحضير وعندي مادة اريد اخلصها
اخذتها وراحت للأدارة واني والبنات رجعنا للصف لا من هي احتوتنا ودرستنا مثل باقي المدرسات ولا شرحت النا خسرتنا الدرس خالي بلاش
خلت ناس تبجي وناس تفشر وبنات يدعن عليها بالموت على قهر
وفاتت عليها مثل العاصفة صاحت
_ تشتكن عليَّ مووو سهلة اذا انجح وحده بيچن اطلع
***** والله العظيم اخبلكم لو اني لو انتوا
هي عايزة وتلتم ضميت وجهي احس بضغط من كل صوب بجيت منها ما عايشة ضيم اكثر اريد اكمل دراستي واخلص من هل مرحلة الصعبة
ما اگدر اخاف من الدراسة لو من المدرسة وتهديداتها ليش تزيد خوفنا
دگ الجرس وطلعت خليت راسي على رحلة واسمع البنات يحجن بينهن
_ باجر اجيب امي عليها اخليها تنعل والديها
_ والله ابوية متخبل منها بس ييمع بيها يجي يخزيها
_ اي باجر نجيب اهلنا عليها نشهرها
_ والله بابا گال بس تخبث يجي ينعل والديها وحتى نقل ينقلها
بقينا اني وسكرة وحده تباوع على ثانية ولا وحده بينا تگدر تشاركهن
خليت الغصه بگلبي وكملت الباقي من اليوم مكسورة خاطر ، طلعنا من المدرسة روحنا تلوب من القهر اول ما دخلت شفت ست سامية ضحكتها
هاي ضحكتها اول مرة اشوفها واطگ بالكعب وبالعلچ فرحانة طايرة من شافتني زادت ضحكتها وصاحتني من بعيد تگلي
_ تعالي دُجى جبت الموافقة مالتچ
راح تطلعين عمتچ بمكتبي تنتظرچ
زاد كرهي الهـا واعرف تصرفها حقير وكل همه اطلع ترجف على ابنها
رحت على مكتبها وعمتي صارت گدامي حضنتها وبوست خدودها فرحانة بيها مكملة الها كـل الأجراءات وشفت بيدها الأوراق وعليهن توقيع استاذ كافل غابت ضحكتي ودرت وجهي ادوره بكل زاوية ومكان بالدار ماكو مختفي
صعدت جبت جنطتي نزلتها والبنات يمشون ورايَّ وعلى شباك الدرج واگفه فنار ومنارة بيدها حجارات مخليه اني امشي تشمرهن ورايَّ من فتت من يمها ابتسمت وگلت الها
دُجى : راح اخلص منچ
فنـار : سبع حجارات أشمر وراچ
دُجى : مع السلامة
حجيتها وجنت اريد اخر لقاء بيناتنا مابي مشكلة ، تعديتها ونزلت وهي سكتت من وصلت النهاية الدرج قبل لا اعبر سمعت صوتها متردده گالت
فنـار : مـع السلامة
رفعت راسي شفتها انطتني ظهرهـا ماتحب تشوفني وصلت للباب لگيت استاذ خيبر موجود منتظرنا ابتسم وجهه مقهور ما يتفسر گال
_ ام رسول بنت اخوج جوهرة وردة هاي وردة ودخلت
دارنا الله يرحم امها امها على هيـچ تربية وشخصية القوية
ام رسول : تسلم استاذ واشكركم على تعبكم وياها
خيبر : والله ما اتعب بالعكس اثرها محفور بالذاكرة
ولا راح ننساها وشوكت ما تحتاجنا عدها اخوه بظهرها
اريد اخفي هل دموع اكرهه الفراگ حجيت ومبين على صوتي الخنگه
دُجى : كاعد بگلبي تشرب جاي وتغمس كعك ابو السمسم
خيـبر : هههههههه ديري بالچ على نفسچ ماشي ؟
_ ماشي استاذ
التفتت على اغلى اثنين واثمن بنات جابتهن الدنيا وجمعتني بيهن بصدفة
واحلى صدفة ماعندي خوات صاروا اغلى من الأخوات سند وروحي تعلگت بروحهـن دموعهن تقهرني وضحكتهن تفرحني ذبيت اغراضي بالكاع ورحت حضنتهن اثنينهن وبجيت بجي الفاگد عزيزة ويريده يرجعله
بجيت بحرگت گلب والنفس ضاگ بصدري بست سكرة ما ترضى تعوفني
وسامية تسحب بيها رحت على رونق حضنت وجهه وهي تناشغ تگلي
رونق : آنيّ احبچ لا تعوفيني ابقي يمي
شوفتها سواري ولزمت سوارها امسح بدموعها ودموعي تصب
دُجى: عساني اموت لو اعوفچ وعد وباقية على وعد
بس الموت يفرگني عنكم انتِ الچ معزه شكبرها بگلبي
رونق : وانتِ وسكرة صرتوا گلبي ماعندي غيركم
حضنتها قوي وعمتي اجت تگول الها
_ اجيبها الكم كل فترة تشوفوها يمه حرگتوا گلبي
رونق : عليچ الله عينچ عليها ديري بالچ على دُجى
بست خدها وعفتها وعمتي باستها من راسها
ام رسول : بعيوني هاي الحبيبة
شـال استاذ خيبر جنطة المدرسة وجنطة اغراضي وطلع صعدهن بالتكسي ، درت وجهي اخر مرة على دار جنت ادوره بيناتهم جنت
انتظر واتمنى اي والله تمنيت يجي بيناتهم ويودعني بس ما ظهر
ليش هيچ ما كلف روحه أجه وودعني وخلاهـا حسرة بگلبي تقهرني
طلعت من الدار مودعه احبابي وعفت ذكريات حلوة ومو حلوة هنا صعدت بالسيارة ورفعت ايدي سلمت على استاذ خيبر والبنات والسيارة تحركت صاروا ورانا ، غطيت وجهي بيدي منهارة من البجي اشتاقيت الهم وروحي ادورهم من اول ما ابتعدت عنهم شلون امسح ذكراهم بعقلي وگلبي شلون اكمل يومي بدونهم الدار ونظام الدار واهل الدار وحكامه كلهم تركوا اثر بروحي وكلبي
عبرت السيارة منطقة الدار وصار بعيد هو والمدرسة كلش ابعاد عن بيت عمتي مرينا بنفس الجامع اللي دفنت بي الجنطة ومنطقة المطاعم وشفت نفس عربانة الرجال اللي اتهمني شاردة گدام ابنه شفته واگف يبيع لبلبي ، دخلنا الفرع الفنادق وشفت كل فندق دخلتله حتى الولد اللي جاب جماعته وصعدوا شاربي على غرفتي لمحته واگف ويضحك هو وصاحبة
فتنا على منطقتها والفرع صار ضيق نزلت الجنط من السيارة سالت وحده واني الثانية وكملنا مشي المنطقة تعبانة كلها عماير وبيوت بدربونه شافت ابو الگهوه سلمت عمتي عليه وصعدت الدرج المتهالك نفسه على شقتها
دگت باب الشقة وصاحت
_ ماما رقية افتحي الباب رجعت
اكتشف المكان اتلفت من فوك وجوه الحد ما طلعت بتها دخلنا ردت ابوسها
دفعتني وراحت تركض تلعب ويه اخوانها بالغرفة والبيت صاير هوسة
التخم مكسور المقعد مالته واليده مالته واگعه مكسريها المخاديد والفراشات مطشريها والأكل بكل زواية البيت بحيث عمتي تمشي وتلملم
ام رسول : فوتي عمه دُجى عذريني على هوسة
هذولي بزوتي خيسه مثل ابوهم الچلب شفتي
الهوسة هاي عود نظفت وطلعت هاجمين البيت
خليت اغراضي بالگاع ورحت الملم وياها كسرة خاطري والزم الشغله
اظل واگفه احير وين اوديها عدلت اللي يتعدل والمواعين اخذتهن ذبتهن
على كاونتر وطلعت من صدرها خمس الاف جرت ابنها ضربتها على
ظهره من شافته يخنگ بأخو وانطته الخمسة شمرته برا
ام رسول : اركض ولك جيب كباب من ابو علاء متنا من الجوع
گعدت على التخم وجهالها يتبحرثون بالگاع يتضاربون والبنات منعزلات ليغاد يلعبن بالخواشيگ والجدوره بيت بيوت ومخليات دوشگ مثل الخيمة
حتى لا نباوع عليهن ، بقيت اراقبهن ورحت يمهن گعدت همست
_ عادي العب وياكم ؟
دفعتني رقية والثانية فاطمة بالثلاث سنوات عمرها تدفع بيه
رقية : امشي منا ما تلعبين الكو**** ولي
فكيت عيوني مصدومة من ألفاظها متعجبة والثانية تسب حتى كلامها ما ينفهم وعمتي تمشي عادي عدها بناتها يتغالطن بهذا الغلط جنت اذا اگول كلمت ولي گدام امي تخزيني وتزعل واذكر مرة گلت چلب على كارتون ضربتني راشدي صح خفيف بس اخذت موقف وخفت افشر بعد
رجعت على تخم وعمتي تجلف بالمواعين وتصيح على جوارينها يسدون الماي لأن ميهم متصل وياهم وهذيچ تگلها من اكمل تنظيف ، رجع ابنها بيده علاگة ماعون كباب وصمون حار وبطل ببسي خلت عمتي صينية
وجرتني تصيح على ابنها جاب گلاصات وبنتها جابت المواعين اول ما انفتح الماعون تسع ادينات انمدت اخذوا كل واحد شيش وعمتي لزمت شيش كباب بسرعة خلته بالصمونه وخلتها بيدي وصبت گلاص ببسي
ام رسول : اكلي حبيبه هذول مفجوعين مثل ابوهم
ضحكت بوجهه وبگلبي اگول الها صدك مفجوعين اكلت وهي تسألني
على عيشة الدار احجيلها وعلى دراسة وما احس غير عيوني طفت ببوكس
من ايد ابنها الصغير احس عيوني طفاها ردت الزمه والزگه بالگاع بس
استحيت من عمتي بقيت ارافس بيدي ورجلي حاصرتني الدمعة
وهي قهرتني تبوس براسي وتوخر بيدي تشوف عيوني ولزمت ابنها صفگته راشدي وهذا تخبل يبجي وراح بصف الغرفة عمره بالسنتين نزع الباسه
ويصيح امممم خايسين بول عليكم وامه تصيح عليه حتى يرفع البجامه
غطيت وجهي بحجابي خربت ضحك على حركته شلون يهز بروحه ونازع لباسه
ام رسول : خرب حظي الخلف ما مات يبو عليكم وعلى ابوكم
وتعض اصبعها تسوي روحها تريد تگوم تكتله
_ ولك البس البجامة عيب من البنية خرب ابوك
_ خـرب ابوچ وابوها ابول عليها
واجه هو والباسه المنزوع عليَّ وگفت اركض وهو يركض ورايه خفت صدك يسويها بقيت اگمز واطافر بالبيت وخربانة من الضحك عليه گوه اتحرك
فحطت وعمتي فحطت على ضحكتي اجت شالته من ملابسه وشمرته بالغرفة وهو كسر الباب الا تفتحي ويرجع عليَّ خرب حظي
ظل يدگ ويشيل روحه ويرگعها الحد ما تعب وانطمر مبين يحتاج ارجع اكوكهم عمتي ماعرفت تربي راح ابتلي ورانا مشوار طويل تربية
لملمت عمتي الباقي من الهوسة واخذتني للغرفة گالت
_ نامي انتِ والبنات بالغرفة واني والولد بالأستقبال
عدلت ملابسي بالخانه وشفت بناتها يباوعن ما اطمنت رجعتهن بالجنطة وخليتها فوك الكنتور وفتحت بس مال كتبي طلعت الكتب ادرس وفاتحة
الباب شفت عمتي من بعيد تلف كبة لابسه كفوف وتباوعلي من ادرس
لليل تعودت على ساعة 8 اتعشى عبرت العشرة وبعدهن والجهال يطلعون
ويطبون يعلسون خبز لو حلويات وعمتي نصيح عليهم لا يشترون هواي
هذا كله دين يسجله ابو المحل عليها الحد ما صارت ب12 طفيت من النعاس بس جوعانة والجهال بلشوا ينامون طلعوا ما يتعشون متعلمين
من عهد ابوهم ما يجيب الهم عشه ويفترون اي شي ياكلون
نمت صح جوعانة بس جنت فرحانة بعمتي ومن نومت اطفالها كلهم واجت
يمي نامت على مخده بصفي ومسحت على راسي طرت من الفرح غمضت
وهي غمضت تگلي
_ نامي يا مدللة ميثاء كون امچ اليوم ترضى عليه
كل يوم تجيني بالحلم زعلانة مني وتبجي عليچ
وسعت نظرتي مصكوعه صگع بكلامها
_ تحلمين بأمي ؟
_ كل يومية تجيني تبجي عليچ والله تسألني عليچ
_ چا ما تجيني امي اريد اشوفهـا ميته على شوفتها
مسحت دمعتي الطاحت على مخده وهمست
_ بيوم مـن الأيام تجي عليچ
_ ما تجيني امي زعلانة مني گلبها شايل قهر مني
باست راسي وهزت راسها لازمه ايدي واحنا نايمي تگلي
_ عاشت ويه ظلام وتنازلت على حالها ومآلها الخاطرچ
بحياتها وانتِ تزعليها ما زعلت منچ تريديها هسة بكسرتچ
تزعل ميثاء ام گلب الطيب تزعل من الدنيا كلها ما تزعل منچ
_ تعرفين شگد مشتاقتلها واتمنى انام بحضنها
_ وهي هم مشتاقتلچ چا هي ما تگدر بدونچ راحت مجبورة
غطيت وجهي ابجي واتذكر موتها گلت الها
_ بس اني ما نسيت دمها التارس الگاع عمـه
ولا راحت ريحته مني ولا من خليت راسها بحضني
_ ولا تنسين ابوچ وهوَ گاعد ملطخ ايده بدمها
_ اريـد انسى ابوية شلون اموت ابوي بگلبي ؟
طبطبت على ظهري تگلي
_ الأيام ومصايبه بيچ راح تخليچ تموتي بگلبچ
وهسـة نامي وارتاحي تعبانة يلة عمه نامي
غمضت عيوني وجروحي مفتوحه اخـاف اتذكر يوم موت امي وذكرياته
سجين ونابته بگلبي مواقف ابوية وركضت عمامي بيها وبدفنتها وتسجيل
موتها انتحـار ، ودفعاتهم في سبيل ما اودعها وحتى گبرها ما خلوني اندله
الثاني يوم دوامي مسائي گعدت بدلت وانتظرت عمتي لگيتها ماكو بالبيت
اريد اروح وماعندي فلوس الكروه ولا خط ياخذني ، بقيت بالشارع عيوني
على درب وجهالها نص يلعبون ونص فوك عبرت الـ12 الظهر وراح دوامي
وهي ماكو رجعت صعدت والدمعة بعيوني ذبيت ملابسي وخفت شلون
اخلص من السان ست وسن وهي گالت اليوم امتحان يومي وهم غبت
هسة عبالها متعمدة اغيب بالأمتحانات مالتها
ولا عندي تلفون اتصل على بنات ولا البنات عدهم تلفون بقيت افتر بالبيت
اكتر الهوسة وشفت ابنها صاعد بالبلكون يلعب ركضت شلته وعطر بي وهو اجه يدفر برجلي فريته من اذاناته الطول گتله
_ تحتاج تربية ابن ابو فانيله صفره منا لمن يطلع
ابوكم يلگاكم مبدلين ينصدم عباله بدلناكم
راح بعيد يتفل عليَّ من ركضت عليَّ ركض على اخته ختل
يعيط ختل وراها رحت رافعه نعالي عليَّ اهدده حتى يكعد
_ املخك اذا تضربني بعد لو تتفل
مشيت على بالكون اشوف عمتي ومتكو عدلت كم شغله بالبيت ودخلت
علينا بيدها علاليگ مسواك ذبتهن بالگاع كلهن بسطت بيهن وفتحت
العلاليك تشمر على كل واحد حاجه وتصيح
_ منو محتاج نعال ؟
اخذوا كم واحد عاطت
_ هاي بجايم منو يريد بجايم
زين هاي تيشيرت برشلونه منو يريد ؟
اجوها كم واحد والباقين يعيبون عليهم
_ هاي مال كرستيانوو منو يريد الريال ؟
اخذوا القسم الثاني وفتحت علاكة حلويات تقسمهن الهم گعدت يمها
شالت علاگه مال وحده لابسه حجابات خلتها بحضني وغمزتلي
ام رسول : هاي دشداشة حلوة تطلع مخصره عليچ
وفستان وحجاب جديد وجبت الچ كحله اعرفچ تحبين الكحل
_ ليش كلفتي نفسچ عمه عندي
_ لا منين عنـدچ اخذي ولچ تكشخي بيهن
وخلت علاگه مال حلويات ابطن العلاگه مال ملابس گالت
_ ضميهن من تجوعين بليل اكليهن لا تخلين الفروخ
تشوفهن ترا كلهن ياكلوهن وتبقين صافنه عليهم
تحمحمت خجلانه منها من شفتها شگد تعبانة
_ اليوم غبت من المدرسة لأن مـاعندي فـ...
گطع كلامي عياط ابنها ولدها يتمالخون گامت عليهم تفك بيهم
كسرتهم وتعيط تعبانة من السوگ ومنهم اني اهم استحيت احجي
بعد عدلت الغراض وياها وفتت على غرفة درست من كل مادة موضوع جديد حتى لا يتراكمون
صبت الغده ب4 العصر اجتمعنا كلنا اكلنا وهي تسولف على ابو المطعم
تسويله كبه وتنطي هل مرة مقلل الفلوس عليها لازم تزيد الكمية مال كبب
فتت وياها على مطبخ احاول اتعلم شلون تلف ماعرفت ابد علمتني مرة والثانية والتلاثة وما مني فايده بقيت بس اعدلهن الها بالصواني واشغلها
بالسوالف حتى لا تمل اشكيلها وتشكيلي وهيچ يخلص يومي
ثاني يوم هم ما لگيتها وعرفت اليوم هم ماكو دوام استسلمت وگعدت
انظف واعلم نفسي ضروري اليوم احجي ويه عمتي تخليلي مصروف
السيارات روحه ورجعه غبت هواي وراحت الدروس ، عصرت وصلة المسح
ودفعت عمتي الباب عدلت الشال ونزلت دشداشتي اللي جنت مشكلتها ملابسي من سمعتها ترحب
_ اتفضل استـاذ هلا بيك فوت البيت بيتك
بقيت جامدة بمكاني من دخل استاذ خيبر هو وبدلته الرسمية على بيت
يباوعلي ويرجع يشوف حال البيت وگف بمكانه مبين قلقان
خيـبر : شلونچ دُجى
_ الف الحمدلله زينة
_ عرفت من البنات اليوم الثاني ما داومتي
واجيت اشوف سبب الغياب خفنا عليچ
شمرت الوصله بالسطله ونزلت الحجاب اعدله اكثر گتله
_ باجر اداوم
ام رسول : والله بعدني ادور الها خط تعرف المسافة
بعيدة وهي ما ترضى تغير مدرستها علمود صديقاتها
والخطوط اسعارهم نار بس احصل واحد زين اداوم
هي تحجي واستاذ خيبر ما رفع عيونه مني گال
_ دُجى متأكدة انتِ زينة عيوني انتِ گولي
احجيلي اذا بيج شي حتى اخذچ يمنا
جاوبته وعمتي تباوعلي مقهورة تخاف اعوفها
دُجى : زينة والله مابيه شي هسة اتعود
قـدم ورقة اخذتها من ايده گال
_ هاي دزتها سكرة بيها الواجبات
وسلم علينا وطلع ما طول لأن يستحي من الجوارين ومايريد
احد ياخذ نظره مو حلوة علينا بقت عمتي تحمد بي وطلعت اني
للبالكون شفته يحجي بالتلفون واخذ شارعنا كله يمشي ويحجي
رجعت للبيت واخذت الغراض من عمتي اعدل بيهن ورقية صاحت
_ ماما عمو رجع تعالي ماما
راحت عمتي وگلبي من اسمع صوتهم يدگ بكل سرعته رحت طلعت
على حس استاذ خيبر باقي واگف بالباب يگول لعمتي
_ عذريني اخاف سببت الكم ازعاج بس رجعـت الدُجى
عيوني ابو خـالد راح يجي عليچ كل يومية قبل ساعتين
من الدوام حتى تلحگين ياخذچ بالخط يوصلچ للمدرسة
دُجى : ما اقبل استاذ اني طلعت من مسؤوليتكم
ليش تصرفون على خطوطي ما يحتاج والله عمتي گا...
خيـبر : هـاي اوامر استـاذ كـافل تريدين تكسريها ؟
_ لا بس ..
_ لا تبسبسين يعتبرها عناد منچ ، على اتفاقنا؟
_ تمام
سُكرة...
اول يوم داومنا بدونها رجعت بعز خوفي وتعبي دخلت المكتب استاذ
خيبر بلغته بغياب دُجى من طلعنا من عنده راح على مكتب استاذ كافل الثاني يوم من داومت لگيتها ماكو گبت نار بگلبي عليها رجعت ولگيت
استاذ كـافل منتظرنا بالحديقة اول ما دخلت صـاح علينا
_ هلو استاذ
_ صاحبتكم مداومة ؟
_ لا والله استاذ حتى اليوم غياب
عـافنا وفات على استاذ خيبر للمكتب وطبگ الباب صعدت بدلت من نزلت لگيته ينشي وياه يوصله للباب ويحاجي يفهمه عبالك طالب عنده وست سامية من باب مكتبها تراقبهم ، من راح استاذ خيبر من باب الصالة
صاحني وراح للمكتب مالته عفت اكلي ورحت وراه دگيت الباب ودخلت
لگيته لازم ملف وقلم احمر يمشي ويخطط بي ويحاجيني
كـافل : سُكرة باجر الصبح عدنا محاكمة سرگال
ومطلوب اسمچ تتواجدين حتى ياخذون اقوالچ
_ تمـام استاذ ويطلع ويانا ؟
_ الله اعلم يطلع او يتحاكم بقت على الله
_ ماشي استاذ بعد محتاج شي ؟
اخذ قصاصه صغيره وحط عليها قلم گال
_ اكتبيلي اسماء مدرساتكم اللي اخذوكم باليومين
الفاتت ومنو امتحنكم بيها اكتبي المعلومات كاملة
_ شتسوي بيهن استاذ ؟
_ احتاجهن
حتى اخاف ارفض لزمتها وگعدت كتبت اسماء المدرسات والدروس والامتحان وبلغته ست وسن امتحنتنا والغياب صفرتهم اخذها مني وگال
كـافل : اشكرچ سُكرة اخذي راحتچ
رجعت الصالة الأكل وشفت منارة نزلت من فوك مبدلة طلعت برا واستاذ كافل طلع وراها واجت وياهم وحده من المدربات طلعوا كلهن ، اخذت اكلي
ورحت بصف رونق تاكل بلا نفس وصافنه على حياطين شوية وراحت ذبت
الأكل الباقي من شبعت وراحت صعدت فوك صارت انعزاليه قليل تحجي ويانا واعرفها تخاف تتعلق بأحد اكثر وهم يروح ، من صعدت لگيتها نايمة
الثاني يوم من الصبح لبست فستاني وحجابي وغطيتها ونزلت الأساتذة لگيتهم ينتظروني صعدت وياهم بالسيارة استاذ خيبر يسوق واستاذ كافل گاعد بالصدر صافن بغير عالم رايح ولا عبالك ويانا حتى استاذ خيبر مرتين صاح بأسمه وهو ولا عبالك بالبداية عبالي متعاركين بعدين من دگ
هورن السيارة اللي ورانه طل يتلفت يريد يعرف احنه وين گال
كـافل : ليش ما طلعت على طريق العام احسن ؟
خيبر : مرتين صحت عليك وانتِ ما تجاوبني شسويلك
ذب نفس ورجع حط ايده جوه خده وصفن بالشارع
وصلنا للمحكمة بقيت احير اشوف سيارة ابو وامه گاعدين بيها بكامل
اناقتهم واخو منتظر بالسيارة يشرب جگارته ويخابر ، وعلى جهه استاذ
كميل واگف بصف ست سامية يسولفون ويضحكون بيناتهم ، وبالجهه
الثانية اخذت صفنه على متعب وهو واگف بنص المحكمة وياه لهـب عفت الأساتذة ورحت عليهم امشي من شافني متعب لزمني من ايدي باس راسي وعيونه على اساتذة ولعب يخوزر بيهم
سُكرة: نزلوا عيونكم منهم نزلوها تريدون تورطوني تخبلتوا
لهب : بشنو تتورطين منو همه وتتورطين وياهم
سُكرة: اصحاب فضل عليَّ حافظوا عليه بوكت
ما ابوك راد يكتلني اني واخوية ودافعوا علينا
درت على متعب ولزمت ايده وعطت بي
_ ليش اجيت مو خطره عليك ما تخاف يلزمك
ابو جسام ويكتلك ، عليمن جاي متعب
لهب : اني اجيبه هنا ومحد يتنفس وياه حرف
اجه حتى يشهد على بلاغي سرگال الكلب مانعنا ناخذچ
وبالحرف الواحد وگف گدامي گال رايدهـا حليلتي
عطت فاقدة بصوت عالي ما واعيه على روحي من كثر ما عصبني
_ وتـــروح تشتــكي عليَّ وتخلي يخـسر وظيفته !!!
لهب : واموته لو اضطريت
سُكرة : شوف وراس متعب وغلاته اذا ظل استاذ سرگال
بالمركز واذا فكرت تأذي حتى بكوابيسك بعد ما تشوفني
لهب : محسوبه عليچ واگفه گدامي وادافعين الواحد
همجي يمعن اخوچ ياخذچ ويتعدى علينا بالضرب
سُكرة : واجهه زلمة الزلمة لا تغدره وتگطع رزقة
قطع الأعناق ولا قطع الأرزاق وهذا شغلهم من
ينين ومحافظين على اطفال والصغار والكبار
هذولي ينحطون على راس عيب يتحاسبون
بثواني اندفع لهب من گدامي واستاذ كافل اخذه يحجي ويه يكله
_ امشي اريد اغنيلك
واستاذ خيبر اخذ متعب من ايده مشيت وياهم دخلنا للمحكمة جوا
واهله ورانا يمشون گعدنا على كرسي واجه المحامي بصوت ناصي حاجيت متعب وبعدني مصدومة شلون بمثل هيچ يوم يجي ويه لهب
سُكرة : بس لا صدك اجيت تشهد على استاذ سرگال ؟!
متعب : كل عقلچ ؟ اجيت لأن اعرف مطلوبه اوگف
ويه اختي شنو تريدين اعوفچ وحدچ بنص الزلم !!!
سُكرة : اذا تأذيهم لو بكلمة وحده ازعل منك والله ازعل
متعب : لا ادافعين على احد گدامي كلهم غلطانين
عـافني حتى لا ترتفع اصواتنا وراح على استاذ خيبر غاد يحاجي التفتت على محامي من اجه يحاجيني يفهمني شنو احجي وآم سـرگـال تهز بيدها تباوعلي بأستحقار واگفه بصف ست سامية عبالك يباوعون لشي مقزز منقرفات مني دنگت راسي خجلانه
وابو سرگال كل شوية يريد يتهجم علينا وامه ما تحملت اخر
شي اجت بصفي تگول للمحامي
صبا : بدينك ابن عائلة ال سـردال ينعجب او حتى يعبر
هـاي المشردة بنظرة او بكلمـة عابرة متخيل انت متخيل
حجم الأتهام الباطل بحق مدير بدور ايواء
دنگت راسي ورجلي ترجف اريدها تروح والمحامي ما يجاوبها فشلان
متت بدمي ردت اصيح متعب لو يسمعها شنو تحجي يدخل بيها اعدام
وهفهف گلبي مثل الماي البارد ونزل على گلبي من وصل استاذ كافل
وراه يمشي مكلبشه ايده استـاذ سرگال لازمي من ايده وامه ركضت
عليه حضنته وتبجي بحرگت گلب تسأل عليَّ دخل جوا
ومتعب راح يشوف لهب ، وهو يتقدم وگف والمحامي يحاجي بي ما منتبه
وابو يعلمه شلون ينفي الموضوع حتى لا كلهم يتضررون وامه تگله
_ همه من يشوفوها ويشوفون ابني يعرفون الأتهام جذب
المحامي : اني فهمت البنيّة وعلمتها شلون تجاوب
سـرگال : وانتَ وين شفتهـا البنية وگعدت تعلمها
ولك كـــافل خيبــرر نعلعه ابهاتكم وينكــم
اجـه خيبر على سريع يضرب على حلگه بمعنى اسكت والشرطة
صاحوا بي يقلل صوته وممنوع يتجاوز بنص المحكمة وابو ظل
يهدي بيهم وخيبر يگله
_ يمعود غير طلبها القاضي وجبناها فهمها
حتى تفوتون سوية سؤال وجواب وتفضها
فر راسه يدورني بيناتهم واني كاعدة دار على مكاني من انتبه عليَّ
ابتسمت ابتسامة بعده ما كملها وانگلبت ملامحـة گلب جر خيبر يگله
سـرگال : امشي اوگف يمها عايفها وحدها وين
كافل هي هاي الأمانة هيچ يعوفها وحدها واكو
چلب سلوگي بالمحكمة
الشرطي : ماكو چلاب بالمحكمة
ايده مكلبچه رفعهن اثنينهم واشر على لهب الواگف غاد
واستاذ كافل بصفه هو متعب
سـرگال : چا هذا شنو قطة مو گدامك چلب يلاهث
لهب تخبل هجم على استاذ سرگال والأساتذة والشرطة لزموهم
غطيت راسي من اجت امه كفختني وراحت تفاكك بيهم تصيح بأبنها
وهوَ استغل الهوسة والتفتت عليَّ يحاجيني
سـرگال : سـوكـا هنا
بقيت منزله راسي وايدي مغطيتها اجه متعب عليَّ من كلها هدأت واني
بعدني ما رفعت عيوني اخذني من بيناتهم ورحت امشي وياه بعيد منهم
استندت على حايط وصدت عيوني على استاذ سرگال غمزلي وذبلي بوسة
بالهوا خربطني تخربط مدري اخاف متعب يشوف لو رعبي من المحكمة واهله وهو گدامهم يشمر بوسات ويغمز لا بوسة ولا بوستين شمرها
صاحوا بأسم استاذ سـرگال تقدموا استاذ كافل وخيبر يمشون وياه
تلاثتهم سوية واستاذ كافل اخذني ورا ظهره امشي دخلونا على قاضي
گعدني واستاذ سرگال واگف مقابيلي گلبي من الخوف يريد يوگف خايفة
عليَّ وعلى ضياع منصبه وهوَ يبتسم بوجهي بقيت ما اباوعله حتى لا يشوفه القاضي ونوصل احنا الأثنين بالحضيض
عدل القاضي مناظره وفتح ملف الدعوى وهو يباوع لأستاذ سركال بنظرة يدرسه بيها بلش يسأله على التهمة الموجهة إله بخصوص استغلال النفوذ والتعامل ويه النزيلات وعلاقته بيه وشنو سبب منعه أليه اطلع ويه اخوية
واستاذ سرگال واگف مقابيله ولا كأنما هو متحاكم ومقابيل قاضي ثابت احسده على گلبه الميت اني وصلت المرحلة اعالج من الخوف ويجاوب برزانة وهدوء خلاني انصدم بي واشك مبدلين الشعشاع واعصابه
ظل ينفي كل التهم وبثقة وصار هوَ بنصهم صاحب الحق وشرحله على شغله بالدار وظل القاضي يتجاوب وياه حتى يعرف على شغله اكثر واكثر وقصص العالم واكتشفت استاذ سرگال من يبلش يحجي حلو يرتب قصص العالم بحيث القاضي يتشوق يسمع
كمل كلامه استاذ سرگال والقاضي سحب قلم سجل سطرين بالملف وهو يهز راسه مبين صدگ گلامه بعدين دار الكرسي والتفت عليَّ صارت عينه بعيني ونزل مناظره بطرف خشمه خلاهن وگال بنبرة رسمية تخوف
_ سمعتي كلامه ينفي الأتهامات كلها هسة أريد منچ
تعتبريني ابوچ وسألتچ شنو طبيعة علاقته بيچ؟
وهل فعلاً استغل منصبه حتى يمنعچ تطلعين ويه أخوچ ؟ احچي بابا حبيبتي وأنتِ بحماية القانون
حجيتله القصة من البداية وشلون استاذ سرگال ساعدنا وبعدين انشغل بأعمال دار المسنين واختفى ورجع قبل فترة من عرف اخوية يريد يزوجني الواحد اهلي بايگين فلوس ابو انفعل ومنعه من هذا الزواج وما رضى اطلع المصلحتي مو عناد بي ولا حتى يطلبني من اخوية عشت سنين
يمهم بعمري ما واجت موقف مضايقة او تحرش منهم بالعكس اخوه
واحسن من الأهل ولو احد تعرض النا وحوش نلگاهم يدافعون النا
كملنا من المحاكمة وما صدر قرار استاذ سرگال اخذوني الأساتذة على سريع رجعوني للدار راح يبلش دوامي واهلهم باقين ويه استاذ سركال
حتى ما لحگت اشوفه من طلع ودخل لهب على قاضي هو ومتعب بصفته
اخوية وشاهد على صار ، خفت متعب يضيع تعب الأساتذة ويانا وينطي بيهم وهمه اول واخر ناس ساعدونا بمصيبتنا
دُجى ...
جهزت نفسي قبل الدوام بساعتين بين ما اوصل صح راح اتعب بس ما اعوف صديقاتي هاي الفرصة الوحيدة اشوفهن بيها واوفي بوعدي دگ هورن السيارة من الركن ما دخل اخذت جنطتي وطلعت اركض عمتي هم ماكو بالبيت وصيت رقية گاعدة على درج ومشيت الشارع وحدي صعدت بسيارة النترا لونها رصاصي سلمت على ابو خالد ولو زعلانه منه وما احبه من اتهم سُكرة بس اعديها الخاطر اشوفهن استخطي فتحت كتابي أراجع بدروسي خلصت من هوسة الجهال
دخلت للمدرسة رحت للصف مغلسه على رزايل المديرة ومجهزه روحي الهجمات المدرسات وحقهن بكلشي يحجن حقهن علمود مصلحتي
انتظرت البنات ماكو من دخلت اول الرياضيات شرحت اجت سكرة
من شافتني ضحكت واجت بصفي ما اگدر احضنها بقت لازمه بيدي
من جوه الرحلة والمدرسة كملت الدرس ما رزلتني واجت عليَّ خلت اربع اوراق يمي گالت
_ هذا ملخص دروس اليومين الفاتت عليچ اقريهن زين
واش شي ما تفهمي تعالي عليَّ للأدارة اشرحهن الچ
من طلعت حضنتها وحسيت ضربات على ظهري قوية درت وجهي وشهگت اضحك من شفت رونق ورايَّ حضنتها وهي تعض بيدي لأن اغيب
دُجى : اشتاقيتلچ
رونق : الصراحة اني مخلصه منچ
سُكرة : الصراحة راح تخلص دموعها من البجي عليچ
اجت ام الفيزيا كمزتنا راحت رونق تركض واحنا گعدنا نتابع شرحها
من كملت اجت طلعت سكرة من مكانها وگعدت بصفي فتحت الدروس السابقة تشرحلي بيهن والبنات يباوعن عليها ليش تعيد من كملت واني غايبة واني بس اهز براسي واكتب ملاحظات بالورقة مثل ما فهمتني
من كملت سألتني
_ هـا فهمتي ؟
_ اي ست فهّمت شكرًا
بقيت اباوع على سكرة متعجبة شنو الوجبة شكو! وطلعنا اخذنا رونق ورحنا للساحة يسألني ليش غبت اشتروا حلويات وصاحوني اشتري
واني ماعندي مصرف وهمه مصرفهم على گدهم گلت الهن
_ ما اشتهي اكل شي امشن نگعد بمكانه هناك
مشيت وياهن گعدت بالحديقة على صفحه اضحكهن على جهال عمتي وشيطنتهم، وعرفت بسكرة جانت بالمحكمة وخربتني ضحك على استاذ سرگال هي تحجي واني ورونق نجذب بيها مستحيل واحد مثل سرگال
يغمز ويذب بوسات وهي تحلف الحد ما دگ الجرس مجذباتها
رجعنا للصف ولگيت ست وسن گدامي داخله خفت تطردنا من شافتني
ضحكت واني ما طايقتها گوه ضحكت بوجهه ورحت على رحلتي مجلبه
بيد سكرة من گعدت انتبهت عليها اكلتني اكل بعيونها ومن تشرح تباوعلي
بتركيز عبالك جايه تخطيني لبكتني تلبك وياها الحد ما كملت وعي ما رزلت ابد تعجبت من گالت
وسن : عيوني دُجى تعالي ورايَّ للأدارة وجيبي كتاب الأحياء
هنا البنات عيونهن نطت وحقهن يشكن بالموضوع اذا ست وسن اللي تحذر ببنا ما نوصل الها للأدارة اليوم صاحتني انزل وياها اني من يمي ما مستوعبة هذا التعامل ، نفذت كلامها واخذت الكتاب ونزلت فتحت ورقتين
من المواضيع السابقة اسرت على كم تعريف وگالت
_ اقري الموضوع راح اجهز الچ اسئلة تمتحنين
الأمتحان وتخلصين من عنده واني هم اخلص
والله وصارت صدك خليت كل تركيزي بالكتاب بس من ارفع عيوني اتشتت من همس المدرسات ونظراتهن عليَّ وشلون صافنات بيَّ وبتحركاتي من كملت المراجعه اخذت الورقة بكل هدوء بقيت احلها سؤال بعد سؤال الى ان كملت وسلمت الورقة وجمعت اقلامي والكتّاب همست
_ شكرًا ست
_ هاي گدام المدرسات قصرت وياج ؟ ضايقتچ ؟
_ لا والله ست ممنونه منكم
عفتهم وبطلعتي زادت همساتهم وكثر الدوي مال صوتهن رحت على مغاسل غسلت وجهي بماي بارد اجتني دوخه لأن من البارحة بلا اكل
عيوني بقت تزغلل گوه طلعت گعدت بالحديقة ومددت رجلي اشم بالهوا البارد من راحت الدوخة واستقر راسي رجعت للصف لگيت المدرسة
تشرح حتى خفت اتقدم بس هي صاحتني من لمحتني من الشباك
دخلت لازمه راسي گعدت برحلتي وسكره تسألني بهمس شبيه
دُجى : امتحنت ودخت هسة اصير زينة
ما صدگت كملنا دروس وراح نرجع ودعت البنات بوستهن وصعدت بالسيارة ويه ابو خالد وسكرة خازرته وهو صاح عليها يعتذر منها
لأن غلط بحقها وهي دومها جانت ادافعله من يتأخر علينا
صعدت مرجعه راسي على باب السيارة والبنات راحوا بخطهم جريت نفس طويل وغمضت عيوني ردت بس انام وخلص من تعب هاليوم عبرنا شارع مدرستي واخيرا والبنات بعدهن يصعدون بالخطوط مالتهم هوسة صايرة وبس صرنا على الشارع العام فزيت مرعوبة
ثواني وتفاجئت صوت زمجرة دگ الخوف بضلوعي دگ الرعد الصوت عالي ويخوف ورا سيارتنا بالضبط ، رفعت راسي على السريع وصارت عيني على المراية الخارجية، ووضحت صورة الدراجة ضخمة لونها أسود فحمي ومزينها بالفضي من كل جوانبها بحيث بيها لمعة ومسيطر عليها زلمة ضخم لابس قَمصلة جلد سودة وخوذة بنفس تطعيمات الدراجة مغطية راسه وخافية كل ملامح وجهه ومكملها بچفـوف سودة مغطية الظاهر من ايده
ضغط على البانزين وعلت صرخات المحرك مثل الوحش! يخوف يخووف وضج الصوت بالشارع كله وبلمحة بصر خلسني خلس ورجعت ليوره احمي روحي من داس بيها وصار بمستوى سيارتنا بالضبط
فر رگبته ودار وجهه الي ما اشوف ملامحة ابد والسايق يصيح عليَّ حتى يعرف السيارة من مد إيده ولزم حافة باب السيارة من جهتي ، وبحركة فاجأتني گام يحرك أصابعه على الجامة عبالك ناوي يشغلني ويخوفني احس نظراته مستقرة بوجهي من ورا الخوذه وفجأة داس إلها ورجع الصوت عالي يهز بالجامات وبسرعة عاف باب السيارة وحنى ظهره وضغط على البانزين بأسرع شي وبدون وعي رفعت إيديه ثنينهم على أذاني من قوة الصوت التراب عجعج بالشارع كله واختفى بين السيارات
ابو خالد : عمو ارفعي الجامات هاي الشباب
المستهتره من يشوفون بنات يحيرون شلون
يجذبون نظرهن ولد الگـ*****
هبطت هبطني خليت ايدي على صدري وجريت نفس وگعدت بالنص رجعت غفيت النص الطريق گعدت اباوع على شارع لمحت نفس الدراجة
بالمرايا وابو خالد خازره يدردم بصوت مسموع
ابو خالد : كون يفوت منا اذا ما اهبده بوكس وانعل والدي
دُجى : عمو خلي يولي عوفه هسة يولي لا انوب
ينزل علينا مببن شراني من حركاته وراعي مشاكل
وصلنا الشارعنا وعجت التراب والصوت العالي من الدراجة والجهال على صوتها يصفگون مشيت اركض للبيت وابو الدراجة حرك وطلع على شارع واختفى ، وابو خالد واگف انتظر افوت للبيت وراح هوَ هم
صعدت فوگ لگيت عمتي وجهه مخطوف وجهالها كلهم يبچون والبيت بكبره مگلوب گلاب عبالك مفجوره بي عبوه بعدني اريد اسأل شنو بيها ودرت
جسمي على باب من سمعت صوت نجيبة زوجة عمي وبنتها دخلن علينا
منتظراتني ارجع صاحت من برا دخل بحر وابن عمي ضرار تعجبت هذا مو جان يشتغل برا شوكت رجع وليش جايني وياهم والشر بعيونه
مـر على ذاكرتي شريط طفولتي اني وهل انسان المتغير تغير جذري بشكله وطلته وحتى شخصيته المتحوله من الطيب للقسوة رجعت كم خطوة وركضت على عمتي لزمت ايدها ورجلي صارت خيوط من عاطت بيهم
ام رسول : ولچ نجيبة خافي الله وعوفي البنية
نجيبة : شهرتنا بالمنطقة وضيعت عمها وابن عمها
بالسجون عليمن ولج شرايده طالبتنه طلابه
دُجى : لا تجون يمي ما اجي يمكم عوفوني
ابني حياتي بعد ما هدمتوني واخذتوا كلشي حلو مني
اباوع الضرار اجه خطف ايدي من ايد عمتي ولزگني
بالحايط يمرد بوجهي يريد يضربني يصيح
ضرار : صحيح الحجي اللي يمعته عنچ ؟
نجيبة : چا نجذب عليك
ضرار : اسكتي انتِ بنت الكلب خلي اسمع منهااا
بحر : لاااا تغلطططط
ضرار : راح اصب ضيم گلبي بيكم اسكتوااا
ورجع عصر وجهي حيل وروحي مسحونه نزلت روحي وگتله
دُجى : يا حجي هذا يا كلام سمعته؟!
ضرار : شارده ويه واحد ؟
ضربته على صدره ودفعته مني اضرب بيهم ياهو يجي يمي اضربه هجم بحر يلزم بيه كفخته وركضت الباب الشقة اريد اشرد لزمني ضرار ودفعني على تخم عوج ايدي بين ايده وعيونه فاتحهـا على وسعها دم ناطه
ضرار : اخر مرة اسأل بأسلوب ، صحيح شردتي ويه واحد ؟
طاحن دموعي على ايده وجسمي صار هلگده گدام قوته
وضخامته لزمت ايده مخنوگه اهز براسي واصيح
دُجى : جذابين والقران ما شردت همه شمروني بدار مشردات
نطقت كلماتي تخبل وانجـن جنونه لزم بحر وشمره على حايط ضربه راشدي بلا ما يتـردد من شفت انشغالـه ووحشيتـه لگيتها فرصة واستغليتها ببالي اركض واشرد بس اول ما نفذتهـا وخطيت خطوة لگفني جرني سحل من ملابسي ودفعني بالغرفة الجوه وسد البـاب تخبلت ادفع بي وعمتي تضرب بالباب حتى يفتحه وانقذ نفسي بس ماكو احساس امسح بعيوني حتى اشوف بيهن والف فكرة ومصيبة اجتي براسي گتله
_ ضرار والقران اذا تجي يمي اكتل روحي والله
بلعت ريگي والـدم وگفت بجسمي متجمد على موقفي وصدمـة عمري العشتها بخـوف ورهبـة ومصيـر مجهول ما اعرف شنو تاليتـه من وگعت كلماتة على راسي
_ تبقين هنـا بين ما يوصل الشيخ وابـوچ يعقد النــاا !!!...
─── ⋆⋅☆⋅⋆ ───
𐙚 الباقيات الصالحات 𐙚
❀˖° سُبحانَ اللَّه
❀˖° وَالحَمدُ للَّه
❀˖° ولا إلهَ إلا اللَّه
❀˖° وَاللَه أَكبَر
