رواية فصلية بديلة ( شموخ ) الجزء الثاني الفصل السابع عشر 17 بقلم ام ملكوت

:-دزيت الرساله بايد وكلب يرجف خوف على قلق على توتر على قهر ماعرفت افسر شعوري بلحظتهه شنو وهوه بقه صافن مارد بس قراهه وطلع من

المزيد من الخيارات

:-دزيت الرساله بايد وكلب يرجف خوف على قلق على توتر على قهر ماعرفت افسر شعوري بلحظتهه شنو وهوه بقه صافن مارد بس قراهه وطلع من

المحادثه ماعرف شوضعه هسه وهوه طاير من فرحته وانه شوضعي مبتسمه بذبول على رسايله وفرحته وبكلبي نار تسعر على خطوتي هاي تمنيت

ربي يدليني عل طريق الصحيح وماظلم نفسي وهل شخص واكسر كلبه غمضت عيوني واحس ربي بعثلي اشاره عن طريق محمد وخلاه يراسلني

ويفتح هل موضوع وياي من العدم.. فكرت وحسبتلهه زين محمد شاب خلوق ومحترم ومثقف وحليوه و طول معرفتي اله ماشفت منه شي مو

زين واعرف ان هوه الوحيد لامه اما ابوه واخوه متوفين الله يرحمهم وعنده اخت وحده صغيره بعمر ال١٨ سنه تدرس واهله خوش ناس وكل

زميلاتي يمدحون باخلاق امه لان مرتين او اكثر مستقبلتهم ببيتهه وعازمتهم ببدايه شغل محمد بالشركه ..صرت احس بحيره لمن افكر و اجيب

واسفط فاحسن شي ابقى اعيش كل لحضه بلحضتهه من حزن وفرح بدون تفكير وخلي السفن تاخذني وين ماتريد وخلي شيصير تالي خل يصير

يكفيني السنين التعبت بيهه وتدمرت روحي وضحكتي خليني اضحك ويه محمد واعيش بسلام حتى ولو لفتره قصيره .. اي قصيره لان ماتوقعت

علاقتي بمحمد صحيحه او بالاحرى كلبي يلي مو راضي عليهه ومقتنع ان مشواري وياه قصير رغم

عقلي وتفكيري مصر على ان محمد هوه الخيار الصحيح والافضل الي بس شسوي بكلبي القافل على مرتضى..

فبعد رسالتي الاخيره لمحمد ماجاوبني ابد منا لثاني يوم كعدت الصبح بدلت وطلعت للمطبخ اكلي لكمه لان احس فتحت صفحه جديده ولازم ابدي اهتم

بنفسي وبصحتي واخلي كلشي مؤذي وراي وهيج صار فعلا سمعت صوت حمحمه وراي والتفتت للنص شفته مرتضى واكف ومخلي اديه بجيوب

السروال وصافن بملابسي يدور خاف بيهن شي ضيك مايدري رايه صار مثل كلام الصخر عندي ماينسمع ..درت وجهي عنه ورجعت الف بلفه الجبن

خليتهه بجيس واجه اخذهه من ايدي باوعتله باستغراب وهو يفتح بالجيس اكل لكمه من اللفه

وباوعلي باستفزاز تجاهلته و رجعت سويتلي وحده ثانيه ورجع مد ايده راد ياخذهه وسحبتهه منه خليتهه وراي وكتله ببرود..

_لا انت ولا انه بعدنه جهال حتى تتصرف بهل طريقه واذا عبالك تكدر تستفزني بهاي التصرفات والسوالف فتكون غلطان لانك طحت من عيني

وانتهى كلشي حلو بيناتنه واولهه طفولتنه سويه ويكون احسن لو ترجع تنجاهلني نفس عادتك وماتباوع بوجهي حتى 

_شهل حجي تدرين بيه مو قصدي وكلام امس حجيته بعصبيه لانج جبتي سيره سراج 

_اولا انته قللت من قيمتي لمن خليتني ويه بت عمك كاختيار احتياطي وهاي مانساهه الك ثانيا اذا

عندك مشكله ويه سراج روحله واحجي التريده وياه لا تجي تطلع عضلاتك علي وتجرحني بالحجي

_يعني نجرحتي من كلامي امس 

_ههه تريد الصدك 

_اكيد

_امس اي انجرحت وانهضمت من كلامك بس تطمن لان بعد ليله امس رجع عقلي لراسي ومنا

ورايح راح اخلي لكلشي حد بيناتنه وراح ابدي صفحه جديده بعيده كل البعد عن كلشي جان ياذيني ويدمر نفسيتي

_يعني شنو

_يعني بعدين تعرف وتشوف بعينك شنو المغزى من كلامي...

باوعلي بتوتر وعكد حواجبه مستغرب كلامي خليت اللفه الجانت بيدي عل ميز وطلعت من المطبخ للحديقه ركبت بالسياره واجه احسان وبابا

متفاجئين لان دخلت للسياره قبلهم وماخليتهم ينتظرون مثل كل مره اخذت نفس وابتسمت بنشاط متناسيه حزني وعصبيتي صعدوا بالسياره

وصبحت عليهم سالوني شلون صرت وطمنتهم على حالتي حرك السياره احسان وعمو شهم كالعاده سد الباب ورانه ..وطول طريقي للشركه وانه احس

كلبي يريد يطلع من التوتر ومادري شلون راح اكدر اشوف محمد واخلي عيني بعينه بعد كلامي وياه

امس اول مره اجرب هل شعور واحس بمغص كلما افكر اني راح اشوفه وانه حاجيه وياه هيج من المستحه الاكلتني حتى بابا انتبه علي وسالني...

_بابا شبيهه عيونج حمره بعدج مصخنه

_لا بابا بس السياره خنكه وعيوني كعدت الصبح هنه هيج

_هاا لحضه خلي افتحلج الشبابيك شلون عفتهن مقفلات انه

_لا عادي بس هاي اليمي شوي راح افتحهه لان الهوى بارد

_ماشي بويه..

دست الدكمه ونزلت الجامه شويه كفخ وجهي هوى بارد يشرح الصدر احس كلشي تجدد بيه بعد يوم امس وصارت الدنيا حلوه بعيوني وكأني تحررت

من سجن حبه وعذابه متناسيه كل كلامه الجارح ..غمضت عيوني وابتسمت براحه لان احس راح اكدر انتصر على مشاعري اتجاه مرتضى

واتخطاه .. وصلنه للشركه ودعت ابوي واحسان ونزلت كلت بسم الله اخذت نفس ردت ادخل واشوف محمد واكف كبالي تحمحمت ونزلت راسي

بخجل منه مادري منين هل مستحه طلعتلي حتى ماكدر اشيل عيني بعينه مثل قبل كلشي اختلف بكم رساله اجه باتجاهي بتردد وكال ..

_صباح الخير جنّتي

_هاا انه

_اي ليش منو غيرج كدر يحول حياتي بكم كلمه منه من صحره بارده لجنه دافيه 

_هاا صباح النور بس وين اختفيت امس

_لو تدرين شصار بيه من اختفيت

_ليش شصار سلامات 

_ههه ربي يسلم هل عيون 

_لا تتغزل 

_افاا ليش شفايده الحروف لو ماتتغزل بيج

_محمد بلا هل كلام لا تخليني ماجي للشركه بعد

_ليش تستحين

_لا بس ماحب 

_اشو رفعي عينج بعيني خل انعم بلونهن

_محمددد

_هههه يله ماشي راح اسكت بس رفعي راسج ركبتج انكسرت

_امشي خلي ندخل وارفعه

_تمام تفضلي النساء اولا

_لا انت روح بالاول 

_ههه تمام ميخالف ..

نزل راسه بطريقه مضحكه وباوع بوجهي وانه دافنته بملابسي من المستحه ابتسمت على سوايته ودرت وجهي اضحك هوه عدل وكفته وضحك

خفيف وراح يمشي كبالي رفعت راسي ومشيت وراه وهاي اول مره انتبه على ثكله ورزانته بالمشي وشخصيته الجديه يلي تبين على ملامحه وكل

تفاصيله تفاجات منه واحس اول مره تنفتح عيني وانتبه على شخصيته الحقيقيه جان حب مرتضى عامي عيني وماشوف اليجي كبالي غيره .. دخلنه

بالمصعد وداس الدكمه عل طابق الثاني وصعد بينه بسرعه انفتح الباب ورجعت سديته باوعلي باستغراب وكتله بتوتر..

_محمد لا تبين شي لاحد من زملائنه خلينه نتمم كلشي ياله نحجيلهم لان ماريد احد يفهم علاقتنه كل هل وكت بشكل خطأ 

_تمام بس خو ماترديني ماحجي وياج ابد

_يكون احسن لان راح يبين علينه من خلال سوالفنه 

_لا هاي واكفه اصلا لو شافونه مانحجي مثل العاده راح يستغربون ويشكون صاير شي بيناتنه 

_ماعرف بس حاول تشغل روحك وانه انشغل حتى اليسالنه ليش مانحجي نكله عدنه شغل 

_تمام امري لالله يمته يمر اليوم وباجر 

_ليش شيصير..

رفع حواجبه بتعجب وقلص عيونه وهوه يكول..

_لا تخليني اشمر روحي من المصعد جنه 

_ياا ليش 

_جا شنو قصدج شيصير مو وافقتي وكلتي اجيب اهلي بعد يومين نتقدملج 

_هاا اي 

_لا هاي هيه ربحنه هسه تطلعين تضحكين علي وتلعبين هاا

بهتت ملامحي واختفت ابتسامتي من حجه هيج حسيت فعلا كاعد استغل حبه ومشاعره الي حتى اتخطى مرتضى رفعت راسي باوعتله وهو عكد حواجبه بتساؤل وكال..

_شبيج جنان

_عندي شي اريد احجي الك قبلما نتقدم باي خطوه 

_اي عادي تردين نرجع نطلع وتحجيلي

_لا خلينه نحجي مثل كل مره بالحديقه

_تمام 

فتحنه باب المصعد وطلعنه خلينه جنطنه وشغلاتنه عل مكتب مالتنه ورحنه للمطبخ سوينالنه كوبين كهوه وطلعنه للحديقه هيه عباره عن بلكونه جبيره

وبيهه خضار فنسميهه حديقه احنه .. بقينه نتمشى ونشرب كهوه ابتعدنه عن مسامع الكل و التفتت عليه باوعلي بتساؤل وكتله..

_محمد مدام قررت اخطي وياك هيج خطوه فماريد اي شي بيناتنه ينبني عل جذب اريد كلشي يصير واضح بيناتنه حتى مايصير مجال لشخص ثالث يدخل بيناتنه ويخرب علاقتنه

_وهذا رايي همين بس اريد اسالج سؤال بالبدايه وجاوبي عليه بصراحه ومن كلبج

_تمام

_انتي متاكده من هاي الخطوه يعني قبولج لمشاعري وموافقتج ع الزواج مني متاكده منهه ونابعه من كلبج مو مجرد نزوه او خطوه تافهه بالنسبه الج

_لا والله مافكر بهيج شي لمن وافقت عليك بالعكس وافقت لان شفت الحنيه والدفو منك اتجاهي وظنيت اني ممكن اعيش بسلام لو وافقت عليك وانت اعز صديق على كلبي

_ريحتي كلبي وربي يقدرني واكون عند حسن ظنج بيه وهسه احجيلي شنو البكلبج بوحي بكلشي وانت مطمئنه سدج امان..

ابتسمت بتوتر ورجعنه نتمشى واسولفله عن حبي لمرتضى من وانه صغيره وشلون تغير هسه وشلون تعبت صح ممكن البعض يكون ضد خطوتي هاي

بس انه ردته يكون بالصوره لان ممكن يختلط ويه ولدنه وبالاخص مرتضى خاف يحاول يشتت انتباهه او يشككه بيه ويرسم صوره مو حلوه الي

بنضره او يحاول يفرقنه لهذا السبب اريده يكون واثق بيه ويكون داري بكلشي هوه لازم يدرى بي والخلاني اتطمن وارتاح بالحجي وياه مشاركته الي

للحديث وانه احجي عنه وتفهمه الي وحسن استماعه الي لحدما كملت باوعلي وعيونه تلمع تقرب شوي علي ونحنى يم اذني وهمس بصوت خشن وانفاس حاره خلت جسمي يتقشعر..

_المايتشرف بيج مايتشرف بي الوطن انتي غاليه وقدرج عالي وخسران اليتغرب منج وانه محظوظ واحمد الله عليج لان طلبت منه حضن دافي وانطاني جنه بحالهه..

رفعت راسي واجت عيني بعينه وهو وجهه قريب علي ومثل رزانته جانت عيونه حلوه وكأنها حديقه مليانه خضار رغم يحجون على يلي عيونهم خضر

ويكولون فاهين او شخصيتهم بارده بس محمد غير لان من حلاوه عيونه تنبع هيبه شخصيته ..

استوعبت اني صافنه عليه ونزلت عيني عنه بتوتر عدل وكفته تحمحم وكال وهوه يفرك بباطن ايده بتوتر..

_اكو شي ثاني حابه تحجيلياه

_لا بس هذا الصار وياي واريد اعرف رايك بعد كل السمعته

_ كتلج رايي قبل شوي واليعوف هيج حب وجمال واخلاق هو الخسران بس همزين ايقنتي هل شي

من وكت واتخذتيني سد امان تلوذين بي شارده من كلشي ياذيج والا جان ضعتي وانه ضعت وياج 

_يعني ماخفت يكون قبولي بيك مزيف او مؤقت او لاني اريد اغثه 

_وانه لهذا السبب سالتج عن هاي الخطوه وسمعت الجواب الصريح بعد مايحتاج اخاف دامج انطيتيني كلمه واما عن مشاعرج اتجاه ذاك

الشخص فراح ابذل كل جهدي حتى امحيهه من داخلج واخلي مشاعر الحب الي بمكانهه واذا ما الله

وفقني ونسيتج الحبيتي بعد يبقى القرار الج لو ترتاحين بوكفتج وياي وتبقين لو تشوفين طريق وسبيل غير سبيلي وترحين 

_يعني اذا غيرت رايي ماراح تنجرح

_لا شلون اكو شخص ماينجرح لمن يتركه الشخص اليحبه انتي وحده من المجروحين واكيد تعرفين هل جواب اكثر مني

_تمام بس اريد اطلب منك طلب

_غاليه والطلب رخيص

_ههه هاي حجايه ابوي 

_اصيرلج اهل مو بس ابو لو تردين 

_احمم المهم خلينه نسد صفحه هاي القصه ومانحجي بيهه وننساها ونبدي صفحه جديده نكتب بيهه قصتنه ممكن

_هوه هذا الاحسن لان لو استمرينه بذكرهه والنقاش بيهه ماراح نستفاد شي وراح نتراجع مانتقدم

_اي 

_اي يا جنتي ..

رفعت راسي لمن حجه ماعرف ليش بس حبيتهه هاي الكلمه منه حتى صرت ارددهه بلساني واستطعم حلاوتهه بس اشو مو حلوه بلساني

عابت .. اجت وحده من زميلاتنه وكالت المدير رايد الكل باجتماع باوعت لمحمد باستغراب وشفته هوه هم مستغرب مو من عوايده يجتمع بينه

مباشرتا رحنه رجعنه اكواب الكهوه بالمطبخ واخذنه لابتوب ودفتر الملاحظات ودخلنه لغرفه الاجتماعات اخذنه اماكنه وحجه المدير بحماس..

_ادري مستغربين اجتماعي بيكم فجاتا بس طبعا السبب وجيه وضروري فاريدكم تتجهزون وتسوون كروبات كل ثنين سويه لان جاينه مشروع مهم

ووقعنه عقد ويه شركه الاجهزه الالكترونيه فاريد تشدون حيلكم وتقرون الملف الكبالكم والمشرفه رحاب راح تنطيكم الخطه والمهمات الكم وتشرف على شغلكم تمام 

الكل : حاضر استاذ

_جنان انتي مبرمجه صحيح

_اي نعم استاذ

_اريدج تكونين بالوجه وتاخذين فقط الاشياء الحساسه التخص البيانات واعاده التشغيل التلقائي لان بس انتي تكدرين تدبريهه واذا تردين اخذيلج

شخص نفس اسلوبج بالشغل يساعدج لان ماريد اي اختلاف ماريد تاخذين شخص يختلف عنج وهو يكتب شكل وانت تكتبين شكل اعرف اسلوبج غير انتي فحاولي تضبطين وضعج ويه زملائج 

_حاضر استاذ 

_ هذا هوه الموضوع الردت اجتمع بي وياكم واعتقد فهمتوا ان هل مشروع مهم كلش لدرجه اجيبكم واقلقكم علمود ابلغكم عنه

الكل : نعم استاذ

_تمام يله شدوا حيلكم وبيضوا وجهي بهل مشروع اريد اسم الشركه يصعد للقمه والكل يعرفهه والينجز شغله باكمل وجه خلال ٣ أشهر اله جائزه تقدير من الشركه

الكل : حاضر استاذ

_يله تكدرون ترحون لشغلكم هسه..

كمنه كلمن اخذ الملف الكباله يلي كال عليه ورحنه لمكاتبنه كعدنه وبقينه نقره بتفاصيله شويه واجت المشرفه انطتنه كل واحد ملف خطه شغل وكالت..

_راح اوزعكم حسب مهاراتكم واجمع العنده خبره ويه الماعنده حتى تتعلمون سويه ..

عكدت حواجبي باستنكار وباوعتلهه ببرود وهيه تاشر على زملائي وتربط كل كروب سوه من وحدهه والمدير كال بشكل واضح ان النه حريه

الاختيار ومحد يجبرنه نشتغل ويه شخص مانريده باوعت لتوزيعهه بترقب وشفت البنات زميلاتي من جمعتهن سويه فرحن لانهن صديقات اصلا ومحمد

خلته ويه وحده ماعدهه خبره وهوه محمد يرادله واحد يعلمه بقيت ساكته بس لمن راحت جابت

الموظفه الجديده وطبكتهه بالكروب وياي عبالك صدك جابت شريجتي انتفضت وكمت حجيت ببرود..

_استاذه رحاب المدير كال بشكل واضح ان بكيفنه نضم الشخص النريده مايحتاج احد يوزعنه

وبعدين انه تدريني اسلوبي يختلف وعندي خبره شكو تخلين وياي موظفه ماتعرف تطفي الحاسوب حتى ولا تعرف بشغلنه بعدهه ولا شي

_ليش تردين واحد عنده خبره حتى يشتغل نيابه عنج وتنسبين الفضل الج بالاخر

_شهل كلام هذا تشهير واكدر ارفع عليج قضيه تشويه سمعه هيج انتي كاعد تكولين اني ماسوي شغلي زين وان اخذ الفضل عن غيري

_انه ماحجيت ولا شهرت بيج لا تتهميني باطل وكلهم وزعتهم وبقوا ساكتين وراضين بس انتي انتفضتي شايفه نفسج مبرمجه والكل اقل منج 

_اولا الكل يعرفني لا تكبرت بيوم ولا انغريت عليهم وكلت انتو مو من مستواي ثانيا البنات رضوا

بتوزيعج لانهم اصلا صديقات ويردن يشتغلن سويه اما محمد واميره فما راضين عن توزيعج

_وانتي شنو محاميتهم وتدافعين اذا ماعاجبهم عدهم لسان ويكدرون يحجون انتي شكو تحجين نيابه عنه...

قبلما تكمل كلامهه كام محمد اجه يمهه وحجه محاول يهدي الوضع..

_استاذه رحاب احنه بشركه لو ناسيه وصوتج عالي تكفي الشر وعوفينه احنه كلمن ياخذ شريك اله وهوه المدير كال هيج لان يعرف راح تصير مشاكل لو سلمج امر توزيعنه 

_قبل شوي جنت ساكت وتهز بذيلك وهسه من شفته انتفضت انتفضت وياهه

_احترمي نفسج ست رحاب لحد الان ساكت واكول مره جبيره بكد عمتي وماريد اتجاوز عليج

_عمه بعينك انه بكد عمتك..

شفت محمد عصب وشد قبضه ايده وصار ينفخ عفتهم ورحت دكيت الباب عل مدير كال تفضل ودخلت باوعلي باستغراب وكتله..

_العفو استاذ ماريد اعطلك بس انت مو كلت بالاجتماع وبوضوح كلمن يسويله كروب وياخذله شريك وياه بالشغل

_اي نعم

_حاليا صايره حرب بره الاستاذه رحاب جبرتنه نشتغل ويه اشخاص مانريدهم وبالاخص انه خلتني ويه موظفه صارلهه بس كم يوم هنا لا تعرف شغلنه ولا تعرف اسلوبنه بالشغل شلونك بيهه هاي

_تمام روحي صيحيلي المشرفه رحاب وانه اتناقش وياهه وانتو رتبو كروباتكم بنفسكم

_حاضر استاذ..

طلعت من المكتب ورحتلهه وانه امشي بثقه وكفت كبالهه وهي تباوع بعجرفه بادلتهه نفس النضرات وكتلهه..

_المدير يريد يحاسبج اقصد يريد يناقشج..

فتحت عيونهه بعصبيه وراحت تزاكط مثل الخروف رجعت عيني على محمد وشفته يباوعلي مبتسم

ومكتف ايده بادلته الابتسامه ونزلت عيني عنه شويه ورجعت المشرفه تمشي بتعجرف وكفت كبالنه وكالت..

_سمحلكم المدير كلمن يختار شريكه بس الي شرط الموظفه الجديده تضميهه بفريقج ست جنان 

_وانه ماريدهه افضل اشتغل وحدي ولا اخذ شخص يخرب علي شغلي

_راح تصير نفر ثالث بفريقج يعني تكدرين تختارين شخص بكيفج بس هيه راح تبقى كمساعده لان هذا المشروع هوه فرصه الهه حتى تتعلم منج

_هذا كلام المدير

_لا ويكون الاحسن لو تلتزمين لان هذا شرطي اذا ترديني امشي السويتي بسهوله

_العفو منج بس شسويت انه حتى ماتمشيني بسهوله

_شكوتج علي عند المدير اكبر غلط لا تستهينين بيه تره انه المشرفه هنا واقل كلمه مني عند المدير اخلي يفسخ عقدج ويطردج من الشركه

_تهددين 

_لا احذرج

_واذا كتلج اني ماخفت والف شركه تتمنه موظفه خبيره وصادقه مثلي وانتو رح تخسرون لو رحت منا 

_الف وحده احسن منج تجي بعدج خافي على روحج

_تمام لعد منا ورايح ماراح اعتبرج مشرفتي وماراح اسمع اي كلمه تامريني بيهه والتردينه سوي ها وخلي احطج بالصوره

هاي الموظفه يلي جبتيهه بالواسطات ويلي ماعدهه حتى شهاده جامعه خلليهه يمج لان تحلمين اخليهه تدوس عتبه شغلي 

_لا تخلينهه وشوفي حسابج شلون راح يصير 

_بله عليج لو سمع هسه المدير كلامج ماتخافين يطردج

_خليهه ببالج محد يكدر يطردني من هل شركه لا المدير ولا الاكبر منه ...

رادت تكمل وعاط بيهه المدير فزت من مكانهه والتفتت عليه اجه تقدم عليهه وكال بعصبيه ماشر علي..

_تعتذرين من الست جنان هسه وتحترمين نفسج وتبطلين عجرفتج هاي والا صدكيني ماخلي باعتباري انج موظفه قديمه هنا 

_بس استاذ ماشفت لسانهه

_رحاااب

_حاضر استاذ انه اسفه..

حجتهه وراحت لمكتبهه بعصبيه باوعت للمدير ابتسملي واشرلي ارجع لشغلي وراح رجعت اباوع للملف واجتلي رساله من محمد فتحتهه وشفته كاتب..

💬خطيبتي طلعت نجره ومادري

💬ليش خفت لو غيرت رايك

💬لا شلون بالعكس حبيت هذا الجانب منج يوم عن يوم تبهريني اكثر بابداعج وشخصيتج

💬شكرا عل اطراء

💬العفو عيوني

💬ههه صدك لابسه اخضر بلون عيونك اليوم

💬هههه اعتبر هذا غزل 

💬يااا وشكلت انه حتى تعتبره غزل مجرد اني منسقه ويه عيونك

💬هههه عادي كلشي يطلع من حلكج اعتبره غزل وشعر شعبي بي حنيه وطن

💬هههه انت وياي بالكروب غير

💬بكيفج ترديني اصير بكروبج ماعندي مشكله رغم عندي مشاغل بس عادي احاول اخلي لشغلج وقت

💬هاا انغرينه عدتك ست رحاب

💬ههههه لا الواحد يحجي الصدك

💬اذا ماتريد عادي اشتغل وحدي 

💬لا اشتغل اذا محتاجتني كلش بس كتلج بوقت الفراغ بس لان عندي اشغال لازم انهيهه

💬وشنو هل اشغال بله استاذ محمد

💬عندي مشيه و حلاقه وحجز قاط و تجهيز قاعه وفره سوك واووو ماتخلص اشغالي بعد 

💬مو كأنك استبقت الاحداث عبالك كلشي كلته هسه راح يتحقق

💬وليش مايتحقق 

💬لاني راح اخطفك واحبسك بالمكتب لا تروح تسوي مشيه ولا تحجز قاط وقاعه..

شافهه ومارد رفعت راسي اشوفه ولكيته يباوعلي وعاكد حواجبه بتساءل ودزالي رساله..

💬تعالي للحديقه بله شو طلع حجي جديد 

💬هههه مو جديد هوه ردت احجيلك من تجي تتقدملي كطلبات لا اكثر

💬تمام بله خلي نطلع بالحديقه وفهميني طلباتج

💬اوكي..

كام عدل ملابسه ومشه قبلي بجديه للحديقه اخذت ملف الخطه وطلعت وراه حتى نتناقش فرد مره بالشغل رحت كعدت مقابيله عل كرسي وكال وهو يضم بنقاله بجيب البنطرون..

_اي احجيلي بله شنو طلباتج خضار عيوني

_هههه ليش هيج صرت جدي 

_لا عادي بيبي انه مو جدي

_هههه 

_لا صدك جنة شنو قصدج ان ماراح اسوي شي من المخططله

_يعني ماريد حفله بقاعه وهوسه اريد حفله صغيره بين العائلتين تعرفني بسيطه واحب البساطه

_اي افهمج بس انتو حسب معرفتي بيكم بيت شيوخ وعائله جبيره عندج عمام وخوال وخالات وعمات من غير

بناتهم وجناينهم زحمه بنت الشيوخ مانجيبلهه مشيه وعل عزايم والحفل هذول كلهم لو رادوا يجون وين تخلينهم وبعدين انه هم معازيمي هواي يعني شفتيني وحيد امي عبالج ماعندي عمام وخوال 

_لا صدك

_والله عل اقل معازيمي يصيرون بال٨٠ نفر وين نخليهم هيج بيتكم يوسع الكل

_ماعرف لعد شو ماحسبتهه هيج

_جا شلون حسبتيهه تعزمين التحبينهم من عوائلكم وتعوفين الماتحبينه

_شكلي هيج فكرت والله

_ههه هذول كلهم بكفه وانتي بكفه ثانيه شلون اخلي هذا الجمال يسيح بين ازدحام النسوان والجهال وياساعه تطفى الكهرباء 

_اوك فهمت بس لا تحجي وتبدي تتغزل

_هههه تمام وبعد 

_راح اكول لاهلي ماياخذون مهر لان طالبه المهر قرآن 

_لااا حدج هنا مايصير تجاوزين الخط هذا المهر وسواليفه علي واذا طالبه قرآن مستعد اجيبلج مكتبه مال قرآين 

_بس انه ماريد اكلفكم وماحتاج المهر

_جنننه عوفج من هل موضوع فدوا

_هفف تمام

_وبعد شنو طلباتج

_بس هذن حاليا واذا فكرت بشي منا لوكتهه اكلك 

_تمام اتفقنا

_خلينه نتناقش بالمشروع هسه ونحاول نخليلنه صفحه نبدي شغل بيهه 

_تمامبس لحظه ..

راح دخل جوه شوي ورجع بيده دفتر ملاحظات كعد كبالي وبدينه نخطط جدول ونكتب تفاصيل المشروع واولوياته يلي لازم نبدي بيهه .. مر تقريب

الساعه وتعب ضهرنه من كعده الكراسي اليابسه عاد رحنه دخلنه جوه نكمل شتغل منا لخلص دوامنه كالمعتاد ورجعنه كلمن لبيته وكالعاده لا

حجيت ويه مرتضى بعد ولا الي خلك اباوع بوجهه اعتبرته ماموجود وعدمت شعوري بي وماسمحت للتفكير ياخذني يمه واحنه بنفس البيت.. دخلت

سلمت عل كل ورحت لغرفه شموخ لكيتهه توه راجعه من امتحان المديريه العامه سالتهه عن الامتحان وكالت ان مشه بسلاسه وانشاءلله تجيب نتيجه الامتياز .. عفتهه تلعب بريانه ودخلت سبحت وبدلت وطلعت اكلتلي لكمه ونمت بعدما لعبت ويه ريانه شوي .. لليل كعدنه صلينه والتمينه عل عشه رغم

ماردت اشوف مرتضى بس لازم احجي بوجود الكل وبالاخص هوه حتى يلزم حده منا ورايح ويعرف اني مو مجرد اختيار ومزهريه جانبيه

وعندي من يقدر قيمتي ويشتريني بكنوز الدنيا كلهه .. وبوقتهه ربي دب بكلبي الثقه و قواني

وخلاني احجي بالموضوع لاهلي وكدام الكل من بيت عمو شهم تحمحمت بعد تردد طويل وحجيت موجهه الكلام الهم..

_بابا ماما عندي موضوع وياكم واريد الكل يسمع وينطيني رايه 

_كولي بويه خير انشاءالله 

باوعت لمرتضى وشفته عاكد حواجبه يباوعلي بتساؤل درت عيني عنه اخذت نفس وكلت موجهه الكلام لبابا..

_خير انشاءالله بابا انت تعرف محمد زميلي بالشغل مو 

_اي اعرفه ليش

_مساع حاجاني وطلب عنوان بيت عمي

_ليش شصاير..

رفعت راسي واجت عيني على مرتضى واحس راح يغمى علي من التوتر والخوف لمن اشوفه خازرني

ولازم الكلاص وكأن منتظر احجيهه ويشمر الكلاص بوجهي هيج تخيلت شكله .. غمضت عيوني ونزلت راسي وحجيت بصوت شبه مسموع..

_يريد يجي يطلب ايدي منكم 

_شنو 

_كالي انعجبت بيج وباخلاقج واذا ماعندج مانع اريد اجيب اهلي واطلب ايدج 

_وانتي شكتيله

_كتله طالب الحلال نلبيله انطيته عنوان بيت عمو شهم لان يريد يجي هل يومين يحاجوكم وبعد بكيفك انت اذا تريد توافق عليهم او لا

_زين جان عل اقل انطيتي رقمي يحاجيني ياخذ موعد مني احجي وياه اعرف شبي مابي شكد عمره وين ساكن شنو مستقبله مو هيج الحجي يابويه

_ماعرف انه بابا بهاي الامور وهوه طلب عنوانكم يعني اكيد راح يجيب اهله وانت اكعد وياه ساله

التريد تعرفه يعني يصير بمثابه اللقاء بيناتكم وتعرف عليه احجي وياه اخذ رقمه وبعدها قرر اذا تقبل او لا

_شنو اقبل لو لا اول وتالي القرار النهائي عندج انتي شنو رايج موافقه عليه شتشوفينه الولد

_حسب معرفتي اله خلال هاي السنتين فاكدر اكلك خوش ولد ومؤدب ومايوم شفت طلع منه كلمه لو فعل مو حلو وماضم عليك الولد كعد حجالي كلشي عن اهله ووضعه حتى يخليني بالصوره زالولد طالب الحلال ماطالب لعب مثل باقي الولد الطايشين

_اي سولفي بله شحجه عن اهله

_سولفلي انه ابوه واخوه ماتوا قبل كم سنه وعنده امه جبيره بالعمر واخته بالسادس تدرس وحالتهم

زينه وهوه شغله مستقر بالشركه واذا بقه بعد سنتين يصير موظف مستقل بيهه وهاي الامور يعني

_وشنو جان جوابج بعد سماع كل هذا 

_كتله القرار النهائي عند ابوي واهلي لهذا السبب طلب يقابلكم ويسوي الشغله رسميه..

سكت بابا وحجه احسان بترقب..

_متاكده البيناتكم بس هل حجي جنان

_اي الله خويه ماحاجيه وياه كلام زايد فقط عن الشغل مالتنه نتساعد ونشتغل احنه والبقيه سويه واصلا تفاجات من كلي ان يريد يتقدملي لان ماجان مبينلي شي ابد

_زين تعرفين شكد عمره

_مادري يمكن لو اكبر مني ب٥ سنوات لو اقل لان من توظفت جان هوه موجود اصلا فما اعرف

_تمام عندج رقمه

_اي

_شنووو ومنين جبتي

_شبيك عصبت غير زميلي وعدنه كروب شركه 

_متاكده 

_اي والله شبيك

_تمام انطينياه خليني اشوف شوراه

_تمام راح ادزه الك..

راحت عيني على مرتضى يلي ساكت وعيونه تنبع شرار وخازرني هسه اليشوفه هيج شيكول شماله انرعص اكيد يريدهه مايدرون هوه اصلا ماشايلني

من كاعي ومعتبرني رخيصه فالضاهر فكره ان اكو شخص مقدرني وطالبني بالحلال زعجته عباله اني رخيصه وياهو الجان يلعب وياي ويشمرني ..

باوعتله بقوه واخذت نقالي من حضني دخلت عل كروب مال واتساب نسخت رقمه ودزيته لرقم احسان التفتت على شموخ وشفتهه تباوعلي

بصدمه وترجع تباوع لمرتضى بترقب ماتعرف شسالفه عبالهه لعبه جديده مني هاي ماتدري بيه نويت اخصمهه وادوس على مشاعر كلبي...

.

.

:- كل هل فتره وجنان هادئه ظنيت انهه كاعد تتجاهل مرتضى او تعلمه درس او تعبت منه او تفكر بحل يربطهم سويه بس ابد ماظنيت راح

تتخبل وتسويهه وتشوف غيره .. بقيت كاعده اسمعلهه وهي تحجي عن هذا الولد محمد والكل مصدوم ومفهين واحد بوجه الثاني اول ماباوعلي

احسان ومرتضى عبالهم ادري بشي اشرتلهم بمعنى ماعرف وبقيت منتظرتهه تكمل وانه ادور صدكهه من جذبهه بس شكلهه جدي ومدام حجت لاهلهه

وبوجود الكل معناهه طابخه الطبخه ومصره تقدمهه .. اخذ احسان الرقم وعمي كلهه تكول للولد خلي يجون ويصير خير انشاءالله ..هزت راسهه ب اي

وكمنه من العشه محد اكل بقينه نفكر بكلامهه ومتفاجئين من جراتهه لمينه الصحون واخذتهه

لغرفتي من بين الكل دخلت وسديت الباب باوعتلهه بتساؤل وهي بادلتني بنضره واثقه وبارده وكتلهه..

_الحجيتي مساع صدك لو جان درس لمرتضى هذا 

_لا صدك ليش حتى اتعب نفسي وانطي دروس لشخص مايفتهم وماعنده احساس بغيره 

_يعني شنو جنان خلاص تخليتي عن مرتضى عفتي 

_اي تخليت عنه من يومين ومات كلشي بكلبي اتجاهه

_ليش شصار قبل يومين واعتقد لمن تخربطتي مو

_اي اخوج كابلني ونبت خنجر بكلبي لمن باوع بعيني واعتبرني رخيصه واي واحد يكدر يلعب بيه لمن كال ماتشرفيني يعني شنو شموخ يعني انه

وحده بت شوارع يعني اعتبرني مثل الكحا* التلمهن البيوت ياهو الجان يشبع منهه ويشمرهه على غيره.. تصوري بعد كل هل حب والمعاناة

الشهدتي انتي وربي عليهه يجي ويكلي هل كلام ويباوعلي بدونيه ويخليني مجرد اختيار احتياطي بالنسبه اله.. ليش شنو سببهه هاي جزات كلبي

البقى متولع على طيفه كل هل سنين هاي جزات صحتي ونفسيتي وروحي الذبلت بفركاه انتي كليلي بعد هذا التعب كله وكلامه هذا شلون اكدر

اباوع بوجهه شلون ادوس على قيمتي وامشي باتجاهه شلون انسى كلمته ونضرته الدونيه الي بهذيج الليله والتجأ لحبه

_خلاص حبيبتي كافي لا تحركين بروحج واعصابج هل شكل صدكيني محد يستاهل تحركين كلبج لخاطره 

بس هاي الخطوه مو هيه الحل مايصير تورطين شخص ثالث وتلعبين بحياته وانتي بعدج مجروحه وبس تردين تنتقمين من مرتضى

_شنتقم منو هوه بالنسبه الي وانتقم منه خطوتي هاي مو علموده ولا علمود اي شي بالعكس هاي الخطوه اخذتهه لنفسي اخذتهه كفرصتي بالحياة ان

اعيش بسلام يكفيني اعيش وبالي مرتاح حتى لو جان كلبي يحترك لان تعبت شموخ ماتحمل بعد محد حاس بيه انه حبه مثل هاويه ضلمه وبارده

بالنسبه الي ومحمد هو الوحيد اليكدر حاليا يطلعني منهه وياخذني لمكان دافي انتي ماتعرفين البداخلي ولا شفتي شلون بالي ارتاح لمن كعدت

وياه وشفت لمعه الحب بعيونه النتظرتهه طول عمري من اخوج وهو بخل علي بيهه رغم كلبي

محترك جان بس كلماته وحبه الي خلتني اغفل عن وجع كلبي ونسيته ولو لساعات معدوده 

_تمام فاهمتج والله بس الاريده منج ماتستعجلين وتفكرين زين لا تغلطين غلطتي وتزوجين على عمى عيونج وتالي تتيتم جهالج لا سمح الله

_عندي هواي وقت قررت اطول الخطوبه وتالي اكله نتزوج اكدر اعرف وافكر زين منا لذاك الوقت بس حاليا ماكدر اطول واجل الموضوع هواي لان تدرين باخوج يخربهه علي...

قبلما تكمل انفتح الباب علينه بكل قوته ورجع انسد التفتنه وشفته مرتضى اجه يهف بعدني عنهه

ولزمهه من رقبتهه وهي باوعتله بعناد وبرود لزمت ايده محاوله ابعده عنهه وعاط بيه وهوه يكول...