رواية فصلية بديلة ( شموخ ) الجزء الثاني الفصل الثامن عشر 18 بقلم ام ملكوت

_عوفينه شموخ وطلعي بره 

_ماعوفك شنو لعب هوه تريد اهلهه يشوفوكم وحدكم وتسويلهه سالفه

_لا تخافين عود انهي عليهه اذا شافونه مو هيه ميته عل زواج ماعندي اشكال مستعد هسه اخذهه وبغرفتج ..

خليت ايدي على حلكي بصدمه من كلامه وبكف جنان يلي صفكته على وجهه و فرت راسه فر لزم وجهه بصدمه وباوعلهه راد يحجي ووجهتله اصبعهه

وكالت وهي ناطه عيونهه بعصبيه اول مره اشوفهه هيج جا شكد حارك روحهه ومولع كلبهه سكتته وحجت من بين سنونهه..

_((تحترم نفسك وتضب اخلاقك 

لا اسوي بيك سالفه ماتسولف لبشر وتكفى شري تره بكلمه وحده مني اخلي الدنيا تكوم ماتكعد واخليهم يرجعونك رفس))😡

_الضاهر لسانج يرادله كص وعمي ماعرف يربيج زي...

قبلما يكمل صارت عيونهه حمر وعصبت زايد ماحس الا تعاي وضربي جوه الحزام صاح بوجع ونزل بالكاع لازم بين رجليه وطلعت تهف بعصبيه بره واسمعهه

تحجي ويه ابوهه مدري شخبصت 

عفت مرتضى ملتهي بوجعه وركضت وراهه واشوفهه حاضنه ابوهه وتكوله..

_بابا اذا تكدر باجر العصر خلي نروح لان مختنكه كلش

_انشاءالله بويه اهدي هسه انتي وروحي نامي ارتاحي وباجر العصر اذا الله راد اخذكم من عيوني 

_تسلم عيونك حبيبي  ..

باسهه براسهه وراحت عل مغسله غسلت وجهه ورحت يمهه سالتهه بقلق..

_لا شسالفه بس طلبت ياخذنه باجر العصر للكورنيش لان مخنوكه كلش واحس راح اتخبل اذا ابقى بنفس المكان ويه اخوج بعد 

_اهدي عمري ووكلي امرج بيد الله هو كفيل بحالج 

_مسلمته امري وانه متاكده ربي هوه يلي اختارلي هل طريق حتى امشي بي وانه امشي وين مايوديني قدري الكتبه هوه 

_ونعم بالله يله غسلي وتعالي خلي نتمشه بالحديقه تاخذين نفس

_شموخ

_عيوني

_فدوا لا تخليني وحدي محتاجتج يمي لا تخلين مرتضى يتقرب مني منا لبعد يومين يجون الناس ويخلص بيتنه ونروح منا

_انشاءالله يروحي وياج انه ويمج ماخلي بعد يمس طرفج ولا يحجي كلمه زايده وياج بس انه اكول لو

تكعدون تحجون بهداوه وتحلون كلشي قبلما يصير شي وتدخل اطراف مالهه شغل بيناتكم وهم حتى محد يندم وتضل كلماته حسره بكلبه

_ليش هوه اخوج خله بيهه تفاهم جان كلامه كله واضح ومابي مجال لسوء الفهم 

_ميخالف جنان حاولي تسمعين البكلبه شنو يجوز جان متقصد يستفزج حتى يوصل لشي معين ولا تخافين انه راح اكون موجوده يمكم ماسمحله

يسوي لو يحجي كلمه غلط وياج بس وافقي لان هذا الشي مهم بالنسبه الكم وصدكيني لا العناد ولا زواجج راح يخلصج من هل قصه

_تمام بس مو هسه خليهه باجر من نرجع لان كلش روحي طالعه واريد بس اطلع اشم هوى وارفه عن ضيكه كلبي تالي عود اكعد ونحجي

_تمام عمري براحتج 

_ترحين ويانه غير انتي هم صارلج فتره ماطالعه وحابسه روحج بالغرفه تدرسين تعاي ويانه تونسي وهم ريانه تتونس وخاله سماء همين

_ماعرف والله اشوف بله بابا وامي اذا يردون يرحون او لا واذا مالهم حيل اخذ محمد لو سلام واروح وياكم 

_تمام حبي روحي حاجيهم ورديلي خبر انه راح ادخل انام بغرفتج لان صدع راسي

_اخذي راحتج حبيبتي..

راحت لغرفتي وهي تمشي بذبول تنهدت وهزيت راسي بحيره رحت للصاله شفت الكل كاعدين عدا مرتضى جان طالع من البيت يمكن راح للدكتور لان

ضربتهه جانت قويه حيل .. كعدت واخذت ريانه من حضن امي بوستهه وحضنتني بقيت اهز بيهه ببطئ على كتفي وهي تدردم باوعت لامي وكتلهه..

_امي خلينه نروح ويه بيت عمو ساجد للكورنيش تتونسين شويه انتي وابوي

_توه عمج حجه بنفس السالفه وكناله مابينه حيل روحي انتي وبنيتج واخوانج يمه تونسوا انه وابوج راح نبقى هنا وخلي واحد من الولد يبقى يمنه

_تمام براحتكم بس اخواني منو يريد يتبرع ويروح وياي ..

باوعت لسلام ومحمد واحد باوع بوجه الثاني مايعرفون شسالفه رجعو باوعولي وكالوا سويه..

_وين ترحين

_ههه للكورنيش منو فارغ يروح ويانه باجر

محمد : انه اروح وياج اريد اطلع اشوف شوارع البصره صار فتره ماطالع وسلام خلي يكعد يدرس كاضيهه تسخت هليام 

_ انه كاضيهه تسخت ليش تجذب 

_خليني ساكت لا افضحك كدام الحجي هسه واخلي يلعب الحزام عليك

_حافظ مافاهم هههه..

لزمه محمد من ياخته وضربه خفيف على علباته وهذاك يضحك ومستمر يهوسله بقينه نضحك على مناكرهم من اجه محمد لهسه وهوه ناشب ويه

سلام وراه وراه بس يشوفه يسخت بدراسته يشتكي لابوي ويخلي يضربه بالحزام وحتى من يطلع يروح وياه خاف يمشي ويه شخص مو زين

بس سلام بعد حيل اخته ماله شغل وماخذ تصرفاته برحابه صدر ويحترمه كلش لمحمد باعتباره اخوه الجبير وعنده خبره اكثر منه بالدنيا

والناس .. بقينه كاعدين لل١١ بليل كلهه طفت كمنه كلمن لغرفته وانه رحت نومت ريانه بالغرفه بجربايتهه وشفت جنان نايمه خطيه سديت الباب

وطلعت للمطبخ اكلي لكمه لان ماكلت زين بالعشه وميته جوع بس نعسانه و مالي خلك اوكف هواي واسويلي اكل شلون.. عاد فتحت الثلاجه لكيت

بيهه قطع صدر دجاج مقلي من الغده طلعتهن فلستهن صغار بصحن ورشيت عليهه دبس الرمان وشطه وسماگ وشويه ملح خبطتهن وكعدت اكل

بالشوكه واكلب بالانستا لحدما خلصته غسلت الماعون وسمعت طكطكه بره استغربت وطليت من الشباج اشوف منو والكاه مرتضى عبالي رجع من

مساع اثاري توه دخل بس اشو هذا مو صاحي فتحت باب المطبخ وطلعت صحتله التفت علي

بعيون حمر وجنه نايم ذكرتني حالته بثائر من جان يجي بالليل مرات هم هيج باوعلي وضيك عيونه وكال..

_هاي انتي جنانه 

_مرتضى سكران شنو 

_شهل حجي منو السكران هذا جناان

_انت السكران 

_لا مو سكران جنانتي

_انه شموخ مو جنان وبعدين شنو هاي طريقه كلامك وتكلي ما سكران 

_ماسكرااان كتلجججج روحيي منااا مووو ترديين تزوجييين وتعوفينييي روحيييي يلااا..

شفته كام يحجي بصوت عالي ولسانه ثكيل ويروح منا ويجي منا عرفته مطفي عل اخر ركضت عليه وسديت حلكه كومته وياي سحل وديته لغرفته

نوب انجلب وعض ايدي دفعته عني وطاح عل جربايه وبقه يسولف كعدت عل جربايه يمه استمعله وهو يكول...

_جنانه ليش سويتي هيج ليش تردين تعوفيني .. انه اريدج انتي حب الطفوله لا تعوفيني انه تحملت بعدج هاي السنين كلهه ماكدر اتحمل فراكج جنااان

_اششش مرتضى اصحه شبيك لا تفضحنه من يمته انت تشرب بس لا جنت بالخارج هم تشرب

_انتي خليتيني اشرب كله منج خبلتيني ماعرف شنو التردينه ماعرف ترديني تردين سراج النذل

تردين واحد غريب كليلي شنو انتيييي شنووو ترديننن منييي ليشش ماترحيين من بالييي اذا ماتحبينيي ليش ماتكوليين ليييش

_استغفرالله ربي لك مرتضى انه شموخ كافي لا تصيح فضحتنه راح يجيلك بابا يكسرك بالعوجيه ويطردك اسكت ونام وباجر تحجي وياك جنان واسالهه التريده

_مااا ماررريد احجي ويااهه هيه ماتحبني ماريدهه

_وانت تحبهه 

_اريدهه اريد تضل الي ماتروح لغيري جناانه مالتيي بس انننه الي حق المسهه 

_شهل حجي هذا اصحى على روحك مرتضى لو تكول احبهه لو تكول ماريدهه

_جنناان تعااي اريدججج مشتهي....

فتحت عيوني بصدمه وسديت حلكه قبلما يكمل الكلمه وخرت ايدي ورجع كال..

_روحي زاعلتج ماريد احجي وياج بعد

_تمام هسه نام ارتاح وباجر كلهه ماريد احجي وياج بس اسكت بعد لا تفضحنه

_ماريدج روحي منا روحي للغريب الفضلتي علي

_هففف راح اروح بس اسكت

_لا لا ترحين خليج يمي 

_ولك انه شموخ اختك مرتضى اشو ارفع راسك باوع انه شموخ اختك مو جنان

_شموخ

_اي شموخ

_شموخ احجي وياهه خليهه تطلع منا ماريد اشوفهه كسرت كلبي تريد تعوفني وانه عبالي تحبني

_تحبك بس انت زودتهه بالكلام وياهه

_لو تدري شكد احبهه ومشتعل ابوي عليهه من اشوف شفايفهه تلمع من اشوف خصرهه يتمايل كبالي اريدهه شمووخ هيه مو تحبني خلي تجي يمي نلعب عل جربايه شويه مثل العشاك ماتدري شلون جنت احلم بيهه وانه بالغربه ماحلت بعيني غيرهه كل الجربتهن طعمهن مر وهيه بس نضرتهه ترفع سكري

_ استغفرالله يالله لكك عيببب مرتضى عيبب شهل حجي ياالله شهل ليله النحسه هاي لك اصحى على زمانك شهل حب الاعوج هذا من خرب حضك هم

_ماا اريد امي وينهه 

_امي نايمه شتريد منهه

_اريد انام يمهه مشتاقلهه وديني الهه

_شلون بله ولك تريدهه تشوف حالتك هاي وتقهرهه والله تنجلط من القهر اذا شافتك سكران وتبجي هيج 

_ماا اريد امي جيبولي اميي اريدهه..

بقه ينده لامي بصوت ناصي لحدما غمض عيونه ونام مسحت دموعه من على خده غطيته زين وطلعت من الغرفه وانه شايله هم جبال بكلبي

عليهم ويامن اوكف ويه جنان يلي تعذبت سنين بفركاه ونفذ صبرهه بسبب كلامه الجارح لو ويه مرتضى يلي لعب لعب ومن رجع لهسه وهو ساكت لا كلهه

بمشاعره ولا حاول يبينلهه اذا جانت مشاعره حب لو مجرد نزوه وشهوه .. والاثنين غلطانين وعم عليهم سكوتهم ومطمطتهم هاي .. هزيت راسي

بحيره ورحت لغرفتي تمددت يم جنان وبقيت صافنه افكر بكلام مرتضى عنهه يعني شنو مشاعره مو صادقه يعني مايحبهه لو همه الزلم هيج

طبيعتهم لمن يحبون بنيه يفكرون بسوالف طايح حظهه اتجاه اليحبونهه.. تنهدت وهزيت راسي بحيره درت عل جهه الثانيه وغمضت عيوني

متناسيه كلشي صار اليوم ومحاوله انام وغفيت وره دقايق ..ثاني يوم الصبح كاعده اسوي ريوك ودخل مرتضى متردد باوعتله وكال باحراج..

_شموخ امس شصار وياي

_اجيت سكران وصرت تصيح شصار يعني

_اي اعرف بس شنو حجيت وياج

_عن البكلبك كله ويكون احسن لو تكعدون وتحجون انت وجنان وتوضحون كلشي بداخلكم قبلما تصير مشكله وساعتهه ماينفع الندم

_ماعندي شي احجي وياهه خلاص هيه اختارت طريقهه ومقتنعه بي على شنو الح عليهه واحجي وياهه

_اكو سبب وجيه بس ماراح اكوله انه لاني مالي حق وبالنهاية الشغله تخصكم بس اريد اكلك شغله

وهي ان جنان تعبت وتدمرت نفسيتهه بهاي السنين ولو تعرف السبب يلي خلاهه تخطي هل خطوه صدكني راح تفهمهه وراح تحاول تغير كلشي 

_ماكو سبب وجيه يخليهه تروح تقبل بشخص غريب الا اذا جانت عدهه علاقه وياه وتحبه

_غلطان 

_شلون غلطان جا ليش حجت بي كدامنه كلنه واصرت ابوهه يكعد وياه ويتفاهمون 

_كتلك لو تعرف السبب راح تفهمهه وبيدك رح تغير كلشي

_شغير وشلون اعرف السبب لو ماتحجي هيه 

_امس نصحتهه تكعدون تحجون سويه وتتفاهمون وهيه قبلت واذا تريد بعدين بليل نكعد كلاثتنه بالحديقه وتحجون على راحتكم او تروح ويانه للكورنيش وهناك تسولفون

_هيه قبلت نحجي

_اي هيه قبلت حتى لمن شخص منكم يحاول يبدي صفحه جديده فلازم يكون متاكد منهه ومصفي باله وضميره حتى بالمستقبل محد يندم بينكم 

_تمام راح اجي واسمع سببهه بله 

_بس بالمقابل لازم تحجيلهه البكلبك

_الله كريم 

_الله ارحم الراحمين ويكون احسن لو ماتعيد السويته امس وتجي سكران لان لو بابا شايفك يتبره منك 

_لا انشاءلله ماتنعاد هل غلطه 

_تمام تريد تتريك وياي لو ترجع تنام

_لا راح ارجع انام بالعافيه

_الله يعافيك ..

صفن بالفراغ وجر حسره خله وراح لغرفته وانه كملت الريوك ووديته للصاله كعدنه انه واهلي وبيت عمو ساجد نتريك كملنه وكلمن طش لشغله وجنان

بدلت ملابسهه وراحت ويه ابوهه واخوهه للشغل.. رحت انه غسلت ماعين ورجعت اخذت ريانه

سبحتهه ومشطتهه خليتهه تمشي بالصاله تلعب بلعاباتهه وانه كعدت يم خالتي وامي شويه وحجت خاله حلى وكالت موجهه الكلام الي..

_شموخ خاله ماكعدتي ويه جنان ماعرفتي منهه هذا الولد منو وشعدهه وياه حتى يجي يطلب ايدهه فجاتا

_خاله مجرد زميلهه بالشغل تشتغل وياه اغلب الوقت فاكيد صاير بيناتهم تواصل وحجي عن

الشغل وغيرهه وعاجبته يعني مابيهه شي اذا زميلهه بالدوام تقدملهه مو كل الزملاء يسوون علاقات مو زينه ويجون يخطبون من تالي

_زين ماكلتلج عنه شي عل اقل صوره اله ما ورتج

_لا خاله منين تجيب الصوره

_زين خاله بيني وبينج هيه ماجانت تريد تاخذ غريب ليش غيرت رايهه هسه اكيد فهمتيني مو

_اي خاله بس مو شرط يمكن غيرت رايهه لان الولد شافته زين ومؤدب واحسن الهه من غيره بعد ماعرف انه حاجيتهه وكتلهه تكعد ويه نفسهه وتفكر زين وبعد القرار النهائي الهه

_والله مادري ياخاله خايفه بنتي تكون ماخذه هل خطوه غصب عنهه لو مجرد عناد وتخرب حياتهه بيدهه

_بعد بيد الله خاله ادعي ربي يدليهه عل طريق الصحيح ويعوضهه

_انشاءالله يارب الله يكون وياهه ويهدي بالهه 

_آميين....

.

.

:- رحت لدوامي وانه متضاهره السعاده لان يكلك اليتضاهر بشي مده طويله يصير من اطباعه ويبقى شعوره بي نزلت واستقبلني محمد بالطابق الاول

صبح علي بابتسامته الدافيه وصعدنه سويه للمكتب اخذنه ملفات وبيانات المشروع وطلعنه بالحديقه فرشنه شرشف سحبنه نقطه محوله من

المكتب للحديقه خلينه حواسيبنه واوراقنه خلينه ماعون فواكه وكهوه اهم شي وكعدنه نشتغل عل مشروع اجت الموظفه الجديده رادت تلزم الحاسوب وكتلهه..

_العفو منج بس انتي ماراح تشتغلين وياي

_حبابه خليني بس اتعلم واشوفكم شلون تشتغلون واساعدكم ولو بشي بسيط

_احح تمام ماراح انطيج شي مهم لان بعدج ماتعرفين شغلنه راح انطيج الملفات الاكملهن وانتي تطبعينهن وترتبيهن حسب التسلسل تمام

_تمام التشوفينه..

والاكواب ودخلت للمطبخ غسلتهم ورجعتهم لمكانهم دخل محمد وكال وهو يسد الباب وراه..

_هاا جنه شتسوين 

_جنت اغسل ماعون الفوكه والاكواب وهسه راح اسويلي كهوه تريد اسويلك وياي 

_اي ماكو مانع اذا من ايدج ولو راح اتعبج

_لا ماكو تعب ..

توجهت للكاونتر اخذت كوابتنه وشغلت جهاز الكهوه بقيت انتظر شويه وحجه محمد..

_احم جنه اريد عنوان بيت عمج الكاعدين بي حاليا

_شلون يعني

_شنو شلون جا شلون نجي نتقدملج نعزمكم بمطعم

_هاا العفو مو راح من بالي عبالي انطيته الك

_ليش احسج مامستوعبه انج راح تنخطبين 

_تريد الصدك ماجنت افكر بالزواج ولا فكرت انخطب من شخص غريب واحس هل شغله جديده علي وغريبه شوي يرادلي وقت حتى اتعود عليهه

_تمام الج كل الوقت التردي 

_شكرا محمد

_على شنو

_على تفهمك الي ولوضعي ووكفتك وياي

_لا تشكريني على احب الاشياء على كلبي 

_همم تمام ماشكرك لعد

_هههه اي هيج احسن الا صدك اذا اجينه بشنو نتفق يعني اهلج شنو طلباتهم وشروطهم تره رايح على عمى عيوني لا انه ولا اهلي نعرف بسالفه الاتفاق والشروط بين الاهالي

_شوف خلينه نخطط كلشي انه وياك حتى من نرجع نخلي اهلنه بالصوره ونكلهم شنو نكدر عليه وشنو المانكدر وهمه يتناقشون بيهه تمام

_اي تمام بعد احسن 

_شوف اولا انه الحفله كلهه ماردتهه بس لان معازيمنه هواي ولان الاهل يردون يسوون حفله جبيره النه فراح نتفق عل قاعه وطبعا بس الخطوبه وبقيه المناسبتين لا بالبيت

_تمام 

_ثانيا احتمال يتغير موعد المشيه

_ليش

_لان لازم اشوف مواعيد اهلي واحضرهم يجوز عدهم مناسبه او فد شي ويعطلهم فمن ارجع

احاجيهم اذا وافقوا على موعد بعد يومين اكلك تمام على موعدنه واذا كالوا عدهم شغل لو عزيمه اشوف يا يوم فارغين واكلك تشوف اهلك 

_يله ميخالف وبعد 

_ثالثا المهر راح اكول لاهلي مايقبلون اكثر من ٥ ملايين

_هاا رجعنه مو كتلج لا تحجين بي

_مو انه الراح اخذه فحقي اطالب واشرط عل مهر اريد اقلله اريد اكثره انت عليك بس تدفع 

_نووو 

_محمددد

_اششش عوفج منه وبعد 

_هفف ماريد احجي بعد بطلت

_يله ميخالف نخصم من المهر الضامه الج 50% هيج تمام

_تمام هسه انت شنو تريد

_انه ماريد غير موافقتج بكلب صافي 

_ يعني اكيد ماتريد شي منا منا اكو بالك شغله تريد تسويهه قبل المهر

_شقصدج ولج

_لااا محمدد مو وكت استهتارك 

_هههه يله تمام راح اكلج شنو اريد 

_اي كول

_لمن تشترين البدله تصوريهه الي

_تروح كشختهه اذا شوفتهه الك 

_غير تاخذين ذوقي ورايي بيهه يجوز تجيبيهه مشلتحه

_لا شسالفه مالبس مشلتح انه

_متاكده

_اي شبيك قابل اجذب عليك

_تمام جا بعدين نتاكد

_وبعد شنو اطلب طلبات بيهه حظ شنو طلباتك هاي

_ماريد شي بس اكو شغله ببالي واريد اخذ رايج بيهه

_اي شنو هيه

_انشاءالله اذا الله وفقني اريد افسخ العقد ويه الشركه وره المشروع هذا

_ليش

_عندي موال براسي قبل الزواج اريد استقل بشغلي و ادرس برمجه ونفتحلنه شركه خاصه بينه انه وياج ونصير رؤساء مو مرؤسين ونكون نفسنه ونضمن المستقبل لعائلتنه شكلتي

_بس يرادلك سنتين تدرس وسنه خبره يعني تطول شغلتك

_وانه بهذا اريد اخذ رايج اذا درست دبلوم سنتين لازم نطول فتره الخطوبه لحدما اتخرج ونتزوج وبعد تبقالي بس سنه خبره وراح احتاجج بهاي السنه تكونين يمي مو بعيده عني

_همم ماعرف والله بله افكر واتباحث بالموضوع ويه اهلي واشوف رايهم لان تعرف احتمال مايقبلون خطوبتنه تطول 

_اي اكيد لازم تاخذين رايهم وهم كليلهم السبب  ان مانكدر نتزوج ونعيش على راتب واحد واحنه يا

دوب راح نعيش على تقاعد امي فراح تكون العيشه صعبه هل سنتين وماريد اضلمج واخذج تعيشين وياي بهذا وضعنه

_بس انه ماعندي مانع وعادي عندي اعيش بنفس وضعكم واساندكم ولو بشي قليل

_بت اصول وخيرج واصل بس الاريده منج تصبرين علي لبينما انجح بمشروعي 

_تمام بس انه وياك راح افسخ العقد واساعدك

_لا انتي خليج هنا حاليا لان اكو احتمال يخرب المشروع مالتي عل اقل ماطيح واطيحج وياي

وبعدها اذا الله وفقني بهاي السنتين اكدر اطلب منج ان تشتغلين وياي وتصيرين شريكتي ونكدر نخطط لحفله زواجنه واحنه بالنه صافي

_تمام اذا انت مخطط هيج فما عندي مانع خلينه نطول فتره الخطوبه انت تكون نفسك وانه استمد خبره اكثر حتى اساعدك بالمستقبل 

_شكرا جنة لان تفهمتيني وماعارضتي نطول عرسنه

_لا عادي الارتباط يتطلب التفاهم والمسانده لو انه غلطانه 

_كل الحق وياج بعد عيوني الخضر

_هههه انغريت بعيونك هواي هل ايام

_لا والله اريد اضحكج

_ليش

_شنو ليش

_ليش تريد تضحكني دائما وتخفف عني ولو بكلمه بسيطه

_لاني احبج و ماحب اشوف الدمعه تلمع بعيونج اريدهن دوم يلمعن سعاده وياي

_زين ليش تحبني او ليش حبيتني

_الحب فطره وبس الله الكادر ان يزرع الفطره بكلب عبده وانه عبد مأمور و كلبي مخضر بحبج..

ابتسمت على كلامه ونزلت راسي  تمنيت لو من بدايه ومرتضى واكف كبالي وحجه هيج جان ماتعذبت كل هل سنين ولا ذبلت روحي وصارت

موجره لا فرحتهه فرحه ولا حزنهه حزن.. كل عمري انتظرت اسمع هيج كلام منه بس تالي سمعته من غيره رغم كعدتنه وسوالفنه عن

الخطوبه الا ان كلبي مجمر احسه ويعتصر وخوف بداخلي مجهول.. ماعرف سبب هل خوف ارتباكي من هل خطوه ماعرف خوف من ان أتراجع وانهزم

واكسر كلب محمد ماعرف شنو الكاعد يصير داخل كلبي لان سديت بابه وماصرت اسمع الضجه الصايره داخله فقط احس باشتعال ناره تحرقني...

.

.

_في مكان اخر_

الى ذلك القريب البعيد ها قد حان اللقاء ، ها قد حان تشابك ايدينا ،

من حزن الحياة وسنين الظلمات قد خرجنا وانتصر حبنا قد نلنا ما صبرنا ، 

وها انا اليوم في فستاني الابيض ولو كان بسيطا ، فانا لم 

ارتدي فستانا فقط وانما ارتدي سعادتي وجزاء صبري وتحملي ، 

ها انا امشي في طريقي لاصبح حلالك لتصبح قوسي واصبح سهمك ونكتمل معا في الاحتفالات والحروب ،...

اخذت نفس وزفرته براحه اخذت مسكه الورد وطلعت امشي للصاله يلي مليانه نسوان دخلت سلمت عليهن من بعيد واخذت مكاني عل كرسي

يلي بجانب الباب كلهه لحظات وصار صوت الشيخ قريب مني وهوه يطلب موافقتي ويكول بالختام..

_بنتي بان هل تقبلين الزواج من اوس عبد الرضى بمقدم معجله ٢٥ مليون دينار عراقي ومؤخره ٥٠ مليون دينار عراقي..

خليت ايدي على كلبي وانه اسمع نغم هل كلمات يتخلخل لروحي ويتحولن فراشات زاهيه نطقت بعدما عادهه ٣ مرات وكتله بصوت وكلب يرجف..

_نعم قبلت.....

_قبل شهر_

كاعده مثل اي يوم عادي مر باخر ٩ سنين وانه استذكر وعد راهب الي بان يجمعنه واصير نصيبه لاوس مر تقريب الشهر على هل وعد ومابين

شي منه رغم اوس هليام ملتهي بمرض امه ويادوب يحجي وياي كلمتين بس مافكرت ابد اني اساله عن راهب واذا سوه شي وياه او صادف

موقف مو حلو بطريقه لان راح ادخل سين وجيم وياه فبقيت كل هل شهر ساكته بس هل مره قررت ان اتشجع و اسال راهب بنفسي لمن يرجع

ماجنت متخيله راح يرجع وبهل طريقه هاي .. ثاني يوم نزل من دوامه كعدت بالصاله ويه امي وعبير ننتظره فتره مو طويله ودخل علينه ..سلم

على امي وكعد بتثاقل ومبين عليه التعب هاد حيله باوعلي وصفن بيه لحضات وصدم الكل لمن كال..

_ام اوس انطتكم عمرهه

1 تعليق

الكل : شنوو وشلون 

_صارلهه فتره تشكي من شرايين كلبهه واليوم الصبح صارت بيهه سكته قلبيه فجاتا وماتت وهيه بالبيت ..

لزمت كلبي معصور ونزلت دمعتي لا اراديه وانه اكول ليش اوس اليوم ماموجود ومارد على

اتصالاتي جني ادري بي حسيت صاير وياه شي وكلبي كارصني منه .. رجع باوعلي وكمل كلامه بوسط نوح امي وصدمتنه..

_بان 

_هاا راهب

_هوه بحاجتج هسه اكثر من غيرج

_شسوي

_قبل شوي اجالي للدوام وحجه وياي

_شكال..

.

.

:- كاعد بالدوام مثل اي يوم عادي ملتهي ومندمج بالقضايا ودخان الجكاير معبيه المكتب دقايق واندك الباب صحت تفضل ودخل اوس وهوه هزيل

وحالته حاله بملابس الدوام متربه استغربت وضعه لدرجه اني عفت كلشي بيدي وكمت توجهت اله وكفت خطواتي لمن كال بصوت مخنوك..

_راحت امي راهب ماتت امي ياخوييه ام...

غص بالكلمه ونزل راسه يبجي كطع كلبي على شوفته هيج وحسيت روحي بمكانه اجيت حضنته وصرت ادك على صدره خفيف واحجي وياه اهدي..

_ شكاعد تحجي انته اوس شلون ماتت وليش هيج فجاتا شصار 

_صارلهه فتره تشكي من كلبهه لكو عدهه انسداد بالشريان الابهر وسوولهه عمليه ونجحت بس ياخويه ماضلت امي مابقت وياي عافتني وراحت بسكته قلبيه ياخويييه

_لا حول ولا قوة الا بالله خلاص ياخويه اهده راحت لباريهه ترتاح احسلهه من ضيم المرض هذا الله يرحمهه ياخويه والبقيه بحياتك هدي وامك انشاءالله بيد ربهه هوه الرحمن الرحيم وراحت لدار حقهه احسن الهه من الدنيا وضيمهه

_ماكدر ياخويه انهد حيلي ونكسر ظهري هيه كل ناسي واهلي ودنيتي ولك امي راحت من ايدي شلوون ادخل البيت وحسهه ماسمعه بي شلون

يهون علي اكعد باركان البيت وهيه مو بي منو يكعدني الصبح بعد منو يسويلي ريوك ويكلي يمه تعال تريك وياي ولك ااااخ 

_صلي على محمد ياخويه لا تسوي هيج وتشعل روحهه تره الميت يحس وينقهر من يشوف اهله واولاده هيج يسوون مايجوز ياخويه للميت غير

الرحمه ترحملهه وادعي تكون بمكان احسن من الدنيا وربك يرزقهه الجنه بدون حساب وعقاب

_الله يرحمهه الله يكون وياهه وياخذني الهه ماتحمل العيشه ياخوي بدونهه امي كلشي هيه بالنسبه الي راهب ام هاي تعرف شنو يعني انت عندك ام الله يحفضهه الك وفقدان الام مو سهل 

_فاهمك وروح ابوي فاهمك بس لا تسوي هيج اشو باوعلي ارفع راسك اوس لا تسوي هيج تره امك تضوج ومايهون عليهه تسوي هيج بروحك قوي

كلبك ياخوي وشد عزمك وكلما تحن لامك زورهه وادعيلهه واهديلهه قرآن وهيه فوك تشوفك

وتسمعك بكل مره تذكرهه لا تظن انهه عافتك وراحت لا بالعكس هيه تشوفك وتباوعلك كلما دعيتلهه وثوبتلهه 

_انكسر ظهري ياخويه وكسره الام ثكيله

_كول يا الله وانشاءلله هوه يربط على كلبك بالقوه ويصبرك على فراكهه..

بقه يهز راسه ب اي وحاط اصابعه على عيونه ويبجي حضنته ومشيته كعدته عل قنفه وهوه محني ظهره رحت جبتله ماي وكعدت يمه انطيته اله باوعله بقهر وشهك لمن كال..

_اوس باوعلي اوس خلاص انت زلمه وعيب عل زلمه يبجي هل شكل اذا احنه ضعفت كلوبنه شخلينه لارق مخلوق بالدنيا شد عزمك ياخوي

وصير كدهه لا تستسلم والبجي والنوح وهل حجي ماراح يرجع امك بالعكس راح تحرك روحهه بهل طريقه فكول يالله وكوي حيلك كلنه على هل

طريق وكول انا لله وانا اليه راجعون الله خلقنه والله ياخذنه يمه وكلنه بهل دنيا خطار وهناك دار حقهه وراحتهه يم باريهه واذا عل صلاحيه يجوز جانت موجودعه وتريد تنبه البره عليهه فكسرتهه لا تفكر وتحرم روحك الماي ياخوي اذكر ربك واستقوى بي

_اااخ يايمه سوده علي عسى الوجع بكلبي ولا بيج يممه 

_استغفرالله ياربي صبره يارب صبره ولك خويه اوس باوعلي اغديلك فدوا باوعلي امك ربك اخذهه ومنو ارحم على العبد غير ربه انت شكد تحبهه ومتاذي على وجعهه جنت بس ربك يحبهه اكثر

وماهان عليه وجعهه امك عل فطره وكلبهه صافي ومتقيه ربهه وربك يحب عباده المتقين واخذهه لعنده من حبه الهه لا تبجي ولك اوس لا تبجي وتكسر ضهري عليك صويحبي انته

_مو هينه علي خويه صدري نار موجره بي ماكاعد تهده ناري ياخوي لو بيدي ادفن روحي وياهه بس لا تكلي ادخل البيت وماسمع صوتهه واشوف طلتهه وهيه تفتر علينه بليل تغطينه

_كول يالله هوه اليشرحلك صدرك وييسر امرك وكل كلبك بيده وهوه الكفيل بان يشد عزمه ويقوي

_ونعم بالله ياخوي ونعم بالله

_يله هسه امسح دموعك ماعرفتك انه هيج عبالي كلبك قوي وتتحمل مصايب الدنيا ولو هوه فقد الام مو هين بس خلي ايمانك بالله قوي هذا يومهه وهذا حد عمرهه وربك اخذهه حتى ترتاح يمه وماتضل متعلعله بهل دنیا 

_وياك حق ياخويه

_الله يرحمهه ويجعل مثواهه الجنه 

_امين ويرحم موتاك  ..

بقه مخلي ايده على راسه وساند نفسه على ركباته وانه اباوعله بترقب وكلبي معصور عليه لان ادري كل كلامي وياه ماراح يطفي نار كلبه ويجبر كسره

ظهره على امه بس نكول الله يرحمهه ويصبره على فقدانهه.. كام بتعب وتثاقل وطلع من الغرفه بدون مايكول كلمه وروحه ضايعه منه .. تنهدت

بحيره وكمت رجعت اشتغل بس ماكدرت اركز سديت الملفات وبقيت ساند راسي عل كرسي وصافن بالسكف رغم جان بالي اختبره باقرب

فرصه وتاخرت بسبب بعده وعدم محاولته لاقناعي بس هسه لازم كلشي يستقر اوس مكسور وبحاجه ماسه لشخص يحبه ويسند ظهره بي وانه

ادري اختبرت صبرهم هواي من سنين وعذبتهم بس هسه اجه الوقت يلي لازم انهي بي هل عذاب والانتظار واخلي ايدهه بايده.. كملت شغلي شلون

ماجان وبطلعتي اتصلت عليه انطاني-رقم المستشفى يلي بيهه جثه امه ورحتله كبل وصلت صفيت السياره وشفته واكف بالباب ويدخن اجيت عليه تحاضنه وكتله..

_يمته يطلعونهه

_على مايخلصون الاجراءات

_شلون صرت انشاءالله هديت

_هديت بس نار صدري زادت

_اصبر واجرك وجبر خاطرك على الله ياخويه 

_ونعم بالله 

_خويه اوس بيتي مفتوح الك باي وقت لو ماكدرت تبيت ببيتكم انه داري وديرتي ترحب بيك

_تسلم ياخوي وخيرك واصل بس ماريد اثقل عليكم وازعجكم خليني اتحده روحي واكعد بالبيت لحدما الله يفرجهه علي

_ميخالف انه كتلك واذا غيرت رايك ادفر الباب وادخل محد يكلك لا 

_انشاءالله ياخويه..

طبطبت على ضهره ودخلنه جوه كملنه اجراءات الوفاة واخذنه الجثه للمغيسل دخل وياهم هوه غسللهه وانه روحي تنمرد لمن يوصلني صوته وهوه

يبجي ويحجي وياهه مهضوم بلعت غصتي وطلعت مسافه عن الغرفه حتى لا اسمعه كلهه دقايق وطلعوه مسحونه روحه اجيت اخذته من

العاملين وكعدته عل كرسي جبت ماي رشيت على وجهه وصرت اطبطب عليه لحدما فتح عيونه بذبول وبقه صافن لا يحجي ولا يرد علي .. عاد

سندته وطلعته خليته بالحديقه يشم هوى لان خنكه جوه وكلهه ريحه موت .. بقيت كاعد يمه وامسد باديه اجو جماعتنه القدامه وجماعته

ترحمولهه وسلموا عليه وهوه كاعد وهم حجوا وياه وصبروه وواسوه بس هوه ابد وكأن ترك روحه يمهه وماتت وبقه بس جسد .. كملوا تغسيلهه

وتكفينهه واجه ابوه ونسابته وعمامه وخواله كلهه التمت طلعوا التابوت وصاروا يشيعونهه وهوه بس يباوع وعيونه تجري بسكته رفعته من

اكتافه ومشيته ناحيه التابوت حتى يشيعهه بعده مالازم تابوتهه وطاح مغمى عليه شلناه انه وجماعتي وديناه للطوارئ علكوله مغذي ياله كعد وره ساعه وهوه يدور على امه ويكول..

_وين امي راهب امي خو محد اخذهه 

_اهده اوس اهده شحجينه احنه وشتفقنا 

_راهب امي لا تخليهم يدفنونهه وانه مو يمهه اخذني الهه ياخويه اخذني يمهه

_ اخذك بس اهده لا تتخربط علينه ونضطر ندفنهه وانت ماموجود 

_لا هادئ انه مابيه شي بس اخذني الهه تره رجلي ماتعيني بعد ياخوي

_يله كوم خلي اخذك الهه..

هز راسه ب اي وفلت الكانوله من ايده وراح يمشي سريع بلهفه وجزع اجيت وراه لفيت ايده النزفت دم بجفيه واخذته وراهم بسيارتي للنجف اتصلت

على جماعتي وكتلهم ينطي خبر لخوال اوس لا يدفنون المره منا لنوصل عاد صدك بقوا منتظرينه فد ساعه وصلنه ونزل هوه يمشي كوه ورجليه

ترجف رحت سندته واخذته يم تابوت امه كعد يمهه وصار يحجي وينعي وابوه يحاول يشيله عنهه مابي حيل .. اجيت رفعته وبعدته عن التابوت

وهوه روحه رايحه طلعوا المره منه ودخلوهه بالكبر وصاروا يقرون عليهه قرآن كرفصت وسندت ضهر اوس الكاعد بالتراب وعينه على امه وهمه

يطمون وجهه بالتراب خليت ايدي على عيوني وحضنته وصرت ابجي ويه بجيه وشهكاته لحدما كملوا دفن وطشت الناس ابتعد عني وراح يمشي

كوه نام على كبر امه وبقه يبجي بسكته وابوه كاعد يمه هوه وخواته يبجن .. سلمت على ابوه ورحت لسيارتي بقيت منتظره يطلع هنااك ياله طلع

وهوه سانده ابوه كمت بسرعه فتحت باب السياره دخلته بالكرسي الوره وابوه بالصدر وخواته ثنين راحن ويه رجولتهن .. صعدت وحركت السياره

راجع بيهه لكربلا مسافه صارت شطولهه علينه ساعتين ياله وصلنه عكس جيتنه نزلتهم كبال بيتهم ونزلت سلمت عليه وصبرته ورجعت لبيتنه

دخلت وانه روحي مهدوده الحيل سلمت على امي واولما كعدت اجت عيني على بان كتلهم عن وفاة ام اوس وامي صارت تبجي وتنوح عليهه بعد

رفيقتهه من اولما تزوجت وانتقلت لهل بيت تروح وترجع عليهه .. باوعت لبان وكتلهه ان بحاجتهه وهوه حالته مزريه بهل وقت وبحاجه من يسنده

ويشيل همه ويطبطب على ضهره وماكو شخص مناسب لهل شي غيرهه هيه هزت راسهه موافقه  واجالي اتصال من اوس كمت بسرعه بره ورديت عليه اجالي صوته مخنوك وهوه يكول...

لجميع الفصول من هنا