رواية سواد الاثمد الفصل السابع عشر بقلم نورس
مراد :- عبددددد صار ببيروت اهربي من هون بسسسرعة
گلبي أحسه صار بين رجلي من گال هيج
توترت گتله :- شجابه شلون عرف اني هنا ؟
- ما بعررف ما بعررررف فلي من هون أحجزي أقرب طيارة وارجعي على بلدك ما تتركيه يمسكك عندي
43 تعليق
انخبصت وياه :- وييين اروح شلون ما أندل ولا أعرف شي
- انا رح اتصل فيكي ودلك لوين بدك تروحي بس يلا خلصييييني وفلي من الڤيلا بقاا ما عاد في عنا وقت
ريتا :- انا عن جد مش عم بفهم بدي حدا يشرحلي شو صاير هون ومين هاد عبد ؟ ليه كلكن موترين منو شو عامل لحتى هالقد عامليلو حساب
راح لبنته يحجي وياها بهدوء لازمها من أكتافها
مراد :- انا بشرحلك كلشي يا عمري بس مو هلئ بليز عطيني وقت لرتب وضعنا واحجز طيارة
- طيارة ؟ شو لوين رايحين ؟
عفته يحجي وي بنته وصعدت بسرعة للغرفة فتحت الكنتور اخذت جنطة صغيرة خليت بيها كم لبسة وغراضي مستمسكاتي التليفون الفلوس اللي عندي
لبستها على ظهري ومن طلعت اجت عيني على مكتب مراد صاير بنفس الطابق اللي اني بيه جان بابه مفتوح
باوعت للمكان محد موجود اتسحبت بسرعة واني اتلفت ودخلت لمكتبه أباوع بيه وعيوني تدور على شي
لحد ما اجت عيني عاللابتوب اللي عالمكتب مشيت بسرعة فتحته وشغلته عين بيه وعين عالباب ليجوون
صرت أفتش بيه عالسريع أريد أي شي يخدمني اگدر آخذه لزمة عليه لبعدين
لحد ما وگعت عيني على ملف معزول عن باقي ملفاته دخلت عليه انفتح كومة مال مقاطع فيديو وصور لناس مجهولة جثث ودم ووجوه مشوهة متنعرف لمنو
صابني غثيان مگدرت أفتح اي صورة او مقطع أگلب عالسريع نزعت الجنطة بسرعة وطلعت الـusb
شكلته باللابتوب وبديت أنقل الملف عليه ايدي ترجف واني أتحرك عيني عالباب على ساعة يدخل واحد
أهز برجلي منتظرته يكمل بسرعة لحد مخلص اني خلصانة روحي قبل لا أفصله سويت إخراج أمان واخذته
سويت خروج من كلشي سديته ورجعت اللابتوب على وضعه شلون مجان انداريت مدنگة بالجنطة
فزيت على صوتها جاي من وراي
ريتا :- شو عم تعملي هون ؟
انداريت بنص التفاته والفلاش بعده بيدي لگيتها واگفة بالباب تباوعلي خليت الفلاش بسرعة بالجنطة وسديته
گمت واني اگلها :- موبايلي ما هو دورته بكل مكان مدا ألگاه
- يمكن ناسيتي بغرفتي مبارح
- ما أدري
- يلا مشي بسرعة ما ضل في عنا وقت
رحنا لغرفتها وگفت تدور عليه وتسألني
گالت :- ما بتتزكري وين حطيتيه آخر مرة ؟
رديت واني أمشي للميز :- لا
باوعتلها ملتهية ودايرة وجهه مديت ايدي لجيب بنطروني طلعت التليفون خليته بيدي وانداريت عليها
گتلها :- هذا لگيته
اندارت بسرعة واجتني :- عن جد وين كان
- ناسيته جوة المخدة يمكن ما انتبهت
- اي منيح يلا لكان خلينا نمشي
دا أمشي لزمت ايدي رجعتني صارت گدامي
ريتا :- بيي خبرني انك هربانة من جوزك المجرم ومخباية هون يمكن لساتني ما فهمت كلشي بس عن جد حاسة فيكي وبعرف قديش موجوعة وخايفة
لزمت ايدي تطمني :- بس صدقيني انتِ قوية ما تفكري انك لحالك نحنا حدك
بللت شفتي :- أبوج باعني ريتا بس سمع بعبد هنا انگلبت أحواله ويريدني اني أصير بوجه المدفع حتى هو ليتأذى
- بيي موتر وخايف عليي انا متوقع انُ جوزك ممكن يجي لهون بأي لحظة ويعمل مشكل وإزا شافك عنا ما رح تمرق القصة هيّن عن جد الوضع كتير حساس ياريت تتفهميه
سكتت واندارت تباوع للباب ونصت صوتها
گالت :- خبرت ميشيل يرجع فورًا عالڤيلا ليجي ياخدك ناطر برا ما شرحتلو شي انتِ احكيه عمهلك الأهم هلئ انك تطلعي من هون وتكوني بأمان وأهم شي بيي ما يحس بالموضوع لأني ما خبرتو
سكتت ضليت أباوعلها وهي تطمني تقربت حضنتها
وخرت وباوعتلها :- شكرًا على كُلشي سويتيه الي
ابتسمت :- ولو نحنا رفقا هون وامتى ما احتجتي شي بتخبريني فورًا وبليز ما تنسي تعملي تلفن تطمنيني عنك
هزيت راسي وابتسمتلها مرة أخيرة لوحتلها بيدي ونزلت قبلها بسرعة مراد واگفلي بنص الصالة
أول مشافني اجاني انطاني جنطة صغيرة
مراد :- هي المصاري خديهن ودبري حالك فيهن أجري غرفة بأوتيل يكون بعيد من هون ونامي فيه الليلة وبكرا أول شي بتعمليه بتحجزي طيارة وبتفلي والباقي منرتبوا عالتلفن بس توصلي لهنيك اوكي ؟
أخذتهن منه گتله :- وانتَ شراح تسوي ؟
- انا رح آخد ريتا ونفل من البلد لفترة منيحة مشان عبد ما يخطر براسو انك عندي واني عم ساعدك هالشي مش بصالحنا لا انا ولا انتِ
- ومنو گال هو معرف بالموضوع وجاي لهنا على هالأساس
سكت شوي بعدها گال :- بدنا ننطر ونشوف شو بيصير وشو بدو يعمل بعدها بنقرر إزا عرف أو لا
مد ايده لجيبه وطلعلي علبة صغيرة
گال :- هيدا آيربود سري بتستعمليه لنتواصل فيه وقت اللزوم إزا انقطع الاتصال او صار شي طارئ
ضليت لازمته أباوع بيه ضرب على كتفي بهدوء
- انتبهي عحالك وما تخافي كلشي رح يمرق على خير بس توصلي لهنيك اتصلي فيي وخبريني
هزيت راسي أخذت جنطتي وعفت الڤيلا بكبرها وطلعت أول معبرت البوابة لزمت الآيربود شمرته بعلبته
بان :- ابن البربوقة عباله راح أمشي بمزاجه وأسوي اللي يريده علي وعلى أعدائي ان شاء الله
ابتعدت عن الڤيلا ومشيت لنهاية الشارع مثل مگالتلي ريتا وصدك لگيت ميشيل واگف بسيارته منتظرني
رحت يمه فتحت الباب وصعدت
حجيت أستعجله :- بسسسسرعة حرك
ميشيل :- ما بدي افهم شو صاير بالأول ؟
انداريت اباوع وراي گتله :- أحجيلك عالطريق بس امشي
باوعلي ما مقتنع باللي ديصير بس استسلم وشغل السيارة وداسلها بسرعة ابتعدنا عن الڤيلا
مشينا مسافة واندارلي :- شو بدك تفتحي تمك تحكي ولا بضلني متل الأطرش بلا ما أفهم شي ؟
ضليت ساكتة عيني عالطريق وأهز برجلي سريع
انتبهلي گال :- على مهلك شوي شوي شو بك موترة ؟ فهميني شو صاير ما تخليني هيك حايص ومش فاهم شي
جريت نفس طويل وتنهدت باوعتله مترددة
گتله :- زوجي اجه لبيروت ودا يدور عليَّ
من حجيت هيج ضرب بريك بسرعة انخضت السيارة خض بينا
باوعتله فاتحة عيوني :- شبييييييك تخبلت
ميشيل :- لحظة لحظة شوي انتِ اللي رح تجننيني جوزك شو ؟ لييييييه انتِ متجوزة ؟
سكتت ودرت وجهي عنه گال :- بليز احكي وقولي انك عم تمزحي
باوعتله عيوني متجمعة بيها الدموع من شاف حالتي وصله الجواب فورًا وفتح عيونه مصدوم من حالي
رجع حرك السيارة وصار يمشي وجان الصمت سيد الموقف معرفت شلون أشرحله وهو جان مخربط ميعرف شنو يگول عينه مركزها بالطريق يمشي سريع
حتى مجنت أعرف وين رايحة ولوين أگله ياخذني جان كل فكري بعبد وشلون گدر يعرف مكاني ويندلني
متأكدة أول شخص راح يفكر بيه هو مراد ما ألومه من أخذ بنته وراح يسافر بيها بس واني منو الي
أحس أفكاري متخربطة مية فكرة وفكرة اجت براسي
ها هسة يطلع بوجهي ويلگاني .. راح يشوفني واني عالطريق .. راح يندلني قبل لا أوصل باب المطار
عقلي گام يرسم سيناريوهات لحاله وواحد أتعس من الثاني وكلهن مجانن بصالحي مدام اني وعبد بمكان واحد
خايفة وخايفة حيل هم متوقعت حيجي بهالسرعة كلها يومين وجنت راح أفض الموضوع وأرجع لماما
هسه كلشي تخربط ورجعت لنقطة البداية وإذا لزمني أروح بيها وأطلع اني الخسرانة الوحيدة بهذا كله
واني غايصة بأفكاري منتبهت عالطريق والسيارة شوكت وگفت باوعت بالمكان خضار بخضار
الأشجار بكل مكان عبالك دخلنا بغابة باوعتله
- وين جايبني
- عالبيت لوين يعني ؟
حجاها ونزل من السيارة وأشرلي أنزل وياه نزلت وأباوع للمكان الدنيا ليل ظلمة ما أشوف شي
هوى عالي يلفح وجهي طيرلي شعري وأصوات أغصان الشجر وهي تتحرك والريحة وأصوات حشرات عالية
صف سيارته على جهة من الطريق ونزل بيده الفلاش يضوي بيه وأشرلي بيده حتى أمشي وياه
صار يمشي واني وراه فتنا بين الأشجار واني مستغربة
بان :- بيتك هنا ؟
39 تعليق
اندارلي وهو مكمل مشي :- انتِ شو رأيك
مشينا مسافة شوي لحد موصلنا بنص المكان وصار بوجهنا بيت متوسط على منحدر شوي عالي
طفى الفلاش أضوية البيت مشتغلة مضوية المكان
أشرلي أمشي وراه صعد الدرج طلع مفتاحه فتح الباب وسوالي مجال حتى أدخل باوعتله مترددة
ميشيل :- شو مودموزيل بدك تفوتي ولا ناطرة شي دعوة ؟
حجاها متنرفز والوجه متهكم أعرفه ضايج لأن محجيت
فتت جوة نزعت حذائي وهو هم خلاهم بالكيشوانية وفات گدامي واني وراه دخل لغرفة متوسطة جانت بيها گعدة بسيطة مرتبة تخم وطاولة متوسطة المكان
گعدت سادة رجلي وايدي شابكتهن واباوع للمكان
شال الگلاصات من الطاولة
گال :- خدي راحتك ما في حدا هون
حجاها وطلع عافني لوحدي عيني تدور بالمكان الغرفة هادية ودافية حيل باوعت من الشباك جان كله گزاز ماخذ صفحة كبيرة على طول الحايط
أشوف الأشجار وهي تتحرك الهوى جان حيل عالي انگلب فجأة عبالك عاصفة ضربت المكان
نزيت على صوته وهو يدخل مغير ملابسه گعد گبالي
ميشيل :- هلئ خلص ما عاد في مجال للحجج بدك تفتحي تمك وتحكي كلشي من الأول للآخر لأني نطرتك كتير
تنهدت ونزعت الجنطة من چتفي خليتها بصفي دنگت خليت راسي بين ايدي بتعب ورجعت رفعته باوعتله
حجيتله كُلشي من البداية شردتي من عبد واتفاقي ويَّ مراد اللي ما راح يصير بس مجبتله طاري عن الموضوع
جان گاعد يستمعلي بهدوء ما حاول يقاطعني طول ما اني احجي رغم أحس بيه عنده هواي اسأله براسه
تنهدت :- وهذا كل اللي صار
خلى ايده جوة حنكه حك لحيته بحيرة وعلى وجهه ابتسامة ساخرة
گال :- انتِ عن جد مانك معئولة ..
گام يفتر گدامي يروح يمنى يسرى بأنفعال
- عن جد ما تواخزيني بس انتِ أغببببببببببى مخلوقة شفتا بحياتي ما بتفهمي ولا بتستوعبي اشي
تنرفزت :- وشنو اله داعي هالحجي ؟ معجبك أعوف المكان وأروح اني أصلًا مطلبت منك تجيبني لهنا
صاح :- لك انتِ بتعرفي مييييين بيكون مراد ؟ بتعرفي حالك مع مين وبأييييد مين وقعتي حالك ؟؟
- مراح يگدر يسوي شي بس أوصل لأهلي أحجيلهم كُلشي وإذا حاول يأذيني أهلي يتصدوله
- انتِ مفكرة حالك عم تلعببببببي ؟ مراد ما حدا بيقرب صوبوووو وانتِ وقعتي بأيد ما بتررررررحم حدا
- ليش مكبر الموضوع ؟ إذا خايف هالگد گولي حتى أروح منا وأشوفلي فندق أدبر روحي بيه الليلة لبين ميصبح الصبح وأرجع منين ما أجيت
- انا خايف عليكي انتِ بشو كنتي عم تفكري وقت اللي خطرلك تعملي هيك ؟
- مفكرت بشي بس جنت رايدة أشرد بروحي وأخلص من اللي يتسمى زوجي
- وتركتي الكل واجيتي لعند مراد اليوسف ؟ عن جد عم تحكي ؟
- ملگيت غيره أحتمي بيه لو راجعة من الأول لماما جان لگاني عبد بنفس اليوم ورجعني اله گلت مراد مراح ينشك بيه بس ما أدري شلون عرف مكاني
جريت نفس وكملت :- على كل حال كُلشي انتهى مراد راح واني راجعة وخلي عبد يحير بروحه هنا اني الأثنين ميهموني يتكاتلون يتذابحون المهم اخذ ماما واختي واروح لمكان بعيد عن الكل
- لك افهممممممي يا بنت هدول مافيات ناس ما بتعرف شو الرحمة ولا بيتركو حدا بحالو بيمشوا عـالدم ووقت يحطوا حدا براسن ما بيرجعوا لورا لو كنتي بآخر الدني بدن يوصلولك ويطلعوكي من تحت الأرض ما بيفرق معن شي
ما أنكر كلامه دب الرعب بداخلي مسحت وجهي بسرعة
گتله :- ما أدري ما أدررري وين متريد توصل خلي توصل عسى ما يكتلوني ميهمني بعد أي شي مليت أريد أخلص من هالخوف العايشة بيه أمشي واني أتلفت أريد أغمض عيني وأنام مرتاحة بدون ما أحسب لباجر شراح يصير وياي كافي صدك مليييييت
گلت حجايتي الأخيرة بجزع وصرت أبجي مسحت دموعي بقوة بعكسي ورجعت تنزل أكثر انهاريت
- وأمك ما فكرتي شو بدو يصير فيها ؟
رفعت راسي باوعتله كمل :- ما تكوني أنانية وتفكري بس بحالك بعرف انتِ مو هاممتك نفسك بس في ناس بحبوكي بيهتموا لأمرك
أحس كلامه سچين وينغرز بصدري من جاب طاري ماما زدت بجي أكثر واني أتخيلها شلون خايفة ومحتارة
صار گدامي بسرعة مدلي كلينكس ويحاجيني
- خلص بيكفي بكي ما رح يتغير شي إزا بكيتي اهدي وخلينا نفكر سوا منشوف شو فينا نعمل لنرجعك لعند أهلك
مسحت دموعي وضليت أباوع من الشباك عالبرة
راح شوي ورجع جايب كوبين گهوة حط الصينية گبالي قدملي كوب وأخذ الثاني وگعد مقابيلي
گال :- اشربي وروقي شوي كل شي وفي الو حل وانا رح ضل حدك ما تخافي
سحب اللابتوب مالته من الطاولة وخلاه گباله وصار يشرب ويشتغل عليه مركز بيه حيل بدون ليباوعلي
بعد دقايق رفع راسه باوعلي ورجع ظهره ليورة
ميشيل :- ليكي شو لقيتلك حجز وموعد قريب كتير يعني ما عاد في داعي للتوتر
رديت بسرعة :- شوكت ؟
- بكرا المسا عالساعة تسعة منيح هيك ؟
هزيت راسي :- اي كُلش زين كل ما استعجلت يكون أحسن
طلب مني جوازي والجنسية انطيتهم اله ورجع دنك عاللابتوب يملي المعلومات اشتغل بيه شوي لحد مگال
- وهي خلصنا ..
مد ايده ليگدام بتعب وكسل :- officially انتِ أكتر وحدة مجنونة عرفتا بحياتي بس بضلني بحبك شو بعمل يعني
ابتسمت :- جد تعبتك وياي هواي ودا أسببلك مشاكل انتَ بغنى عنها لو عرف مراد اني يمك مراح يعديها الك على خير
- يا عمي هو والبيبيات اللي معو بكمشة ايدي ما بسيترجي يقرب صوبي
- ربع ثقتك وأحتل العالم
- ليكو مين عم يحكي يا بنت والله بلشت خاف منك ما عندي الشجاعة لأعمل ربع اللي انتِ عملتيه
- لو ممضطرة مجان سويت هيج هم الوصلوني لهالحالة وخلوني ما أفكر باللي أسويه صح لو غلط
- بس أحيانًا لازم الواحد يوقف شوي يحكم عقله ويفكر شو عم يعمل قبل ما يغلط ويحسب حساب العواقب خصوصًا لما تكون العواقب كبيرة
- ماريد أفكر بأي شي كل اللي اريده أرجع لماما وينتهي كل هالكابوس
- طيب قومي ارتاحي هلئ بنكفي حكي بكرا جهزتلك الأوضة فيكي تنامي هنيك
شلت جنطتي وأشرلي على مكان الغرفة رحت دخلتلها صغيرة مرتبة الجرباية نظيفة وعليها شرشف مسفط بعناية الديكور جان بسيط منظره يجيب الراحة
قبل لا اگعد صفنت شوي شلت جنطتي ورجعتله
جان مندمج بموبايله حس علي رفع راسه بسرعة
گال :- شو ليه رجعتي ما عجبتك ؟
بان :- لا مو هيج بس اذا اني نمت بغرفتك انتَ وين راح تنام
45 تعليق
- شو هالسؤال أكيد بدي أطلع عالشارع او أطلب من الجيران ينيموني عندن الليلة
رفعت عيوني بملل :- دا أحجي صدك لتگولي تريد تنام هنا عالتخم وهالسوالف مراح أقبل ترى
- شو هاد يعني بدك تطرديني من بيتي ؟
- استغفر الله ميشيل صدك دا أحجي بلا دمك الخفيف مو وكته أبد
- يا عمي خدي راحتك فضيت الأوضة كرمالك ما تعتلي هم أنا بنام هون عالكنباية معود هيك
- لا أبد والله اني أنام هنا وانتَ روح لغرفتك ما أگدر أنام هناك
- يا بنت ما تكوني هيك عنيدة حكيت اللي عندي وخلصنا
حجاية مني وحجاية منه شمرت جنطتي عالتخم وگعدت بعناد وهو يباوعلي مصدوم
گال :- أعند من هيك ما شفت بحياتي
- گلت اللي عندي بعدك متعرفني ترى
- يا ويلي أنا لو محل جوزك كنت انا اللي فليت منك بلا رجعة
- حرامات مالك شارب جان طيرته الك
- بالله شو ؟
ضلينا گاعدين شوي نسولف غيرلي جو بسوالفه لحد ما تأخر الوقت استأذن وگام على غرفته حتى ينام
من شفته بدة يطفي أضوية البيت جريت الجنطة طلعت العلبة مالتي وأخذت حبايتين بلعتهم
ميشيل :- شو هاد اللي أخدتيه ؟
رفعت راسي بسرعة لگيته واگف بالباب بيده شرشف ويباوعلي مستغرب عاقد حواجبه اجاني خليتها وراي
گال :- هاتي بدي شوف
- دوا يخصني شعليك انتَ
- دوا شو ليه شبكي ؟
- عندي صرع
فتح عيونه :- بحياة الله عم تمزحي ؟
سكتت مرديت انفعل وحسيته بدا يصير عصبي
گال :- هاتي فرجيني الدوا اللي بأيدك
- مو من حقك تحقق وياي بشي خاص
ما اهتم تقرب مد ايده ليورة يريد يلگف العلبة من ايدي واني لازمتها وأحاول أبعده عني مگدرتله ملصها مني
طفرت بسرعة أريد اخذها رفع ايده ليفوك صعدت عالتخم ابتعد عني مسافة وگف يباوع بيها ويقرا
رحتله بسرعة لگفتها من ايده واني متضايقة
بان :- ترى أبد محلو هالأسلوب
تجاهلني وگال :- من أمتين وانتِ بتخادي هالحبوب ؟
- من زمان
حجيتها ورجعت ضميتهم بالجنطة
صاح :- انتِ بتعرفي حالك شو عم تاخدي ؟ بتعرفييييي انُ فين نسبة كبيرة من المخدرررررات ؟ ولك انتِ عم تأدمنننننني يا مجنوووووونة
خليت گذلتي ورى اذني :- مهدئات لا أكثر دتساعدني حتى أنام
- من وييين جبتيون ؟ كيف وصلوا هول لأيدك ؟؟
- مراد جابلي
- ولك انتِ بدددددك تجننيني ؟ كل شوي عم بتفاجئيني بشي أبشع من القبلو قديش كنت معجب بشخصيتك من أول ما شفتك وهلئ عم تنزلي من عيني كتير بطريقة ما كنت متخيلها
هز راسه بأسف :- ما بقى شايفك متل قبل أبدًا
عافني ودار وجهه وراح زعلان مني گعدت عالتخم مسحت دموعي اللي ما أدري شوكت لحگت تنزل
دا أخسر كل الناس اللي داير مدايري بسبب أفعالي وين ما أروح بس المشاكل تجي من وراي
مددت عالتخم ايدي بين رجلي
مو كافي بان ؟ ليمتى تضلين هيج بلا نفع بس مشاكل وأذية الج ولغيرج .. موتي شعندج عايشة !
حسيت اكو حركة وراي فزيت بسرعة گمت أشوف
لگيته واگف منتجي عالباب ايده بجيوبه ويباوعلي مفهمت نظرته مقهور على ندمان اجه گعد گبالي
ميشيل :- أنا آسف ما كان قصدي أقسى عليكي هيك بالحكي بس طلعت غصب عني
- مزعلانة وعاذرتك أدري ثگلت عليك بمشاكلي وگعدتي عندك زادت الموضوع
- بليز ما تفهميني غلط بس كنت عم حاول ساعدك وصرختي ما كانت إلا لأني بهمني أمرك عن جد بلشت خاف عليكي أكتر
- شسوي ؟ من تضيك بيَّ الدنيا ما أحس روحي إلا واني ماخذتهن بلا وعي مني هي بس اللي تريحني وتخليني أشرد من كُلشي ديصير
- أنا بفهمك بس غلط أنك تضلي بهالحالة ما بصير تكملي هيك وانتِ بتعرفي منيح انُ اللي عم تعمليه مش صح
- انتَ عبالك محاولت ؟ تدري كم مرة ومرة جربت أگطعهم وأرجع والگى روحي ماخذتهم غصب عني حاجتي الهم أكبر من انها تهديني وتخليني أنام وبس تجيني أوقات صرت ما اگدر أسيطر بيها على نفسي إلا إذا آخذهن
- أخدتي شي تاني ولا بس هول ؟ لأن اللي بعرفو الجسم لما بيوصل مرحلة بيتشبع منن بيصير بدو اشي أقوى كرمال يهدى ويحس بنفس الراحة
سكتت دنگت شلت شعري رجعته ليورى
گال :- بليز ما تقولي انك أخدتي شي تاني
باوعتله :- مجربت آخذ غير شي بس هم انطوني بأوقات جنت اني مواعية بيها على نفسي
- شو عطوكي ؟
- ابر
سكت لحظات يحاول يستوعب اللي گلته دنك راسه يهز رجله بأعصاب ورجع يباوعلي شال ايده رجع شعره
گتله :- هسه عرفت اني ليش شاردة منه ؟
سكت وگام طلع من المكان سمعت صوت الباب الخارجي
عيني اجت عليه من الشباك مشى مسافة مبتعد من البيت بين الأشجار لحد ما اختفى عن أنظاري
رجعت مددت بمكاني نسيت أو حاولت أتناسى اللي صار
ونمت ..
ثاني يوم گعدت بصعوبة ضوة النهار ضارب على عيوني الشباك مفتوح على حيله يدخل منه نسمة هوى باردة
گعدت على حيلي واني حاضنة نفسي حتى أتدفى باوعت للمكان فارغ بس اني موجودة گمت من مكاني
صرت أتمشى بالبيت لگيت الحمام بوجهي دخلت غسلت
وطلعت واني ألم بشعري بيدي گتر رفعته ذيل حصان باوعت للغرفة الباب جان مفتوح والغرفة جانت فارغة
استغليت الفرصة وفترة غيابه عن البيت ورجعت لجنطتي شلتها على كتفي مشيت للميز فصلت تليفوني عن الشاحن وطلعت وصلت للباب دنگت ألبس بحذائي
واني ملتهية أشد بالقيطان صار خيال فوك راسي
رفعت راسي اجت عيني عليه لابس صدرية طبخ وبيده ملعقة خشبية كبيرة ويباوعلي بعدم فهم
ميشيل :- لوين رايحة ؟
وگفت متفاجئة :- انتَ هنا ؟ واني عبالي طالع من البيت
- من شي ساعة وانا واقف عم بطبخ إزا ما سمعتي صوت تكسير الصحون عالقليل لازم توصلك ريحة الأكل شو ما شميتي الريحة ؟
ضحكت وهزيت راسي لا :- لعمى شو هالأنف المسكر
خربت ضحك وطلع صوتي وهو ضحك لضحكتي
گال :- يلا بقى يلا أشلحي من رجلك وتعي ساعديني شو بدي أتعب لحالي وانتِ تجي تاكلي عالجاهز ؟
نزعت الحذاء رجعت الجنطة لمكانها ومشيت وياه عالمطبخ وگفت يمه أباوع أشوفه شديسوي
عقدت حاجبي :- أشو مسوي معكرونة ؟ ليش مو وكت الفطور ؟
رد مستهزئ :- أي فطور يا بنت الساعة صارت وحدة الظهر
لزمت راسي :- اوووه منتبهت للساعة هاي هالگد نايمة ؟
- متل الميتة مو حاسة بشي
- لتضحك ترى گاعدة من وكت بكل مرة أضل للمغرب ومرات أجرها لليل يلا أگعد بس لأن ماخذة بس حبايتين
اندار :- ليه كم وحدة بتاخدي بالعادة ؟
- أطبك أربعة أربعة
فتح عيونه :- بحياة الله ؟
هزيت راسي سكت وحاول يغير الموضوع والتهينا بالغدة هو يطبخ واني أساعده عالخفيف حضرت المواعين والگلاصات عالطاولة ورتبت الشوكات
سوى معكرونة بيضة وياها ستيك لحم شرائح صغيرة
ريحة الأكل ترست البيت أحس مصارين بطني دتصارع على مكمل كلشي وگعدنا ناكل جنت ميتة جوع والأكل طعمه جان عالم ثاني نفسيته تخبل بالأكل
لمن كملنا أصريت أغسل اني المواعين حاول يرفض منطيته مجال گمت أغسل وهو ينشف ويرجعهم مكانهم
گعدنا بالصالة الشباك مفتوح مهوي البيت والهوى جان حلو مو عالي وبرودته ويَّ دفو المكان عالم ثاني
سوالنا كوبين گهوة واجاني طلبت منه يعلمني عالباقي وأهم الشغلات اللي ملحگنا نكملها عالوقت ما تردد
ساعتين وتعبنا سد اللابتوب باوع للساعة بيده وباوعلي
گال :- ما ضل في وقت كتير كلها كم ساعة وبتطيري من هون
- ما أعرف شلون أتشكرك على كل اللي سويته وگفتك مراح أنساها كل عمري
- اي يلا بلا هالشاعرية والدراما شو لوين رايحة يعني ؟
رجع نفسه عالتخم وايده ورى راسه
گال :- حطي ببالك لما بدك ترجعي لهنيك وتستقري بتحضري حالك جاي لعندك زيارة وبدك تعمليلي سياحة
ابتسمت :- ولو تدلل أفررك عالبتاوين وشوراعها والمطاعم الراقية اللي بيها ناسها كلهم كلاس
ومناك نطلع لشارع أبو نؤاس وشرط نروحله بالليل لأن الشارع ينترس بطالة مال عصير على طوله
مناك بطريقنا نطلع على مدينة الصدر هذول حالتهم خاصة عندهم فعاليات متشوفها بأي مكان بالعالم
رد بأهتمام :- فعاليات متل شو ؟
- مثل الدگة العشائرية هاي تصير عندهم كل يوم مجموعة كبيرة من الشباب يلمون مسدسات أبو المَي ويرحون لمنطقة ثانية يغرگوها ويرجعون
- عن جد حمستيني
- يووه بعدك مشايف شي خوب عدنا الفصل العشائري هذا يگعدون بيه عشيرتين واحد يشمر فلوس عالثاني
- بحياة الله ؟
- لا تحلفني اني ما أحلف
- والله طلعت أجوائكن غير عن اللي عم نسمعو بالأعلام
ضلينا بالساعة اسولفله عن العراق سويته عليه المادليف من گد ما تحمس عالروحة لهناك اجه يحجز وياي
صارت دنيا العصر والجو جان حلو طلعنا برة نتمشى أباوع للمكان رغم جماله بس يخوف وهو لوحده هنا
باوعتله :- ليش مكانك معزول بهالمنطقة ؟ بيروت حلوة وبيها مناطق سكنية كُلش راقية ومناسبة أكثر
- شغلي بيتطلب هيك وبيني وبينك تعودت عالمكان وما فيي غيرو بعجقة الناس والبيوت الكتيرة بحس هيك أريحلي
- متخاف لوحدك ؟
باوعلي وابتسم :- من شو بدي خاف يا بنت أنا مرتاح لحالي بلا دراما زايدة بلا نكد أقل وجع راس وبزيد الأكل لألي شو بدي أكتر من هيك
- انتَ يمكن شطح بالك عالزواج بس اني قصدي عالمكان وانتَ لوحدك ما يمك ناس ممكن يكون خطر إذا أحد تعرضلك لو صارلك شي طارئ
وگف واندارلي :- تعي معي
عقدت حاجبي :- وين ؟
مدلي ايده :- تعي ورح تشوفي بعينك
مشيت وياه مشينا بين الأشجار مسافة بسيطة من البيت صار گبالنا مكان صغير خشبي مثل المخزن
باوعتله مستغربة تقدمني طلع مفتاح من جيبه وگف يفتح بالباب فتحه سوالي مجال وأشرلي أفوت
دخلت وعيني صارت تدور بكل مكان المكان رغم صغره بس على گد مجان لام غراض وحاجات وصناديك خشب
صار گبال مجموعة من الصناديك وخر الغطة اللي عليهن ورجع طلع مفتاح ثاني أصغر فتح القفل اللي عالصندوك ورفعه واندارلي تقدمت بتردد أباوع
فتحت عيوني عضيت شفتي وباوعتله
ضحك :- شو شو صرلك بس ما تكوني خفتي ؟
- واني اللي عبالي فقير والقط ياكل عشاك طلعت اني الفقيرة
- لا بليز كل الناس معترة ومسكينة إلا انتِ
28 تعليق
سد الصندوك ونكت ايده من التراب
تخصر :- شو رأيك ؟
- منيلك هذول الأسلحة شلون جمعتهم هيج ؟
- لسى فيه كمان على فكرة تحت بالباقي
- مرخصات ؟
- فيه اي وفيه لا جماعة كانوا يدبروهن لألي
- وليش دتجمعهم ؟
- من شي خمس سنين دخلت نادي رماية تعلمت القواص وصار عندي شغف بهالموضوع وتعلقت بالسلاح ومن وقتها وانا عم جمع متل المجانين بس ولا مرة جربتن عحدا هيك بس للصيد والتسلاية مش أكتر
- لعد خابصني شغلي قانوني وما أشتغل بشي مو معروف
گال :- وانا عن جد ما عم بشتغل إلا بشي قانوني ومرخص وحتى النادي اللي عندي فيه موافقات رسمية من الدولة
- تشتغل ويَّ الدولة من جهة وويَّ مراد والمافيات من جهة ثانية
حك گصته :- يعني أحيانًا الشغل بيتطلب منك شوي مخاطرة بس أغلب الشغل كنت أرفضو على فكرة لأنُ ما بيناسبني
- واو تصفيق حار على هالأمانة العالية اللي شايلها
ضحك :- اسكتي ولي عطيتك خبرة ١٣ سنة بمجال الحواسيب والإختراق بظرف كم يوم شو بدك أحسن من هيك
باوعت للصناديك ورجعت باوعتله
گتله :- علمني
عقد حاجبه :- شو بدي علمك ؟
- عالسلاح
- بتمزحي ؟
- لا والله جد أريد أتعلم شلون أرمي تفيدني للضرورة
- لا مستحيل ولا حتى تفكري فيها ولا بالأحلام ..
بعد ربع ساعة وگفنا قريب من بيته واني أباوعله مبتسمة بأنتصار وهو يرتب بالأسلحة عالميز
اندارلي :- تعي لهون
رحتله وگفت يمه وأباوع عليهن بده يرفعلي واحد واحد ويعلمني على أسمائهن وإمكانيتهن
أشرلي على واحد :- مسدس گولت إم M1911 بيسع من ٧ - ٨ رصاصات بالمخزن دقتو عالية بالتصويب
أشرلي عالثاني :- مسدس مكروف الروسي قديم ومو كتير متوفر مهندسيين لألو
وكمان فيه بيريتا الإيطالي هلئ هيدا حبيب قلبي
رفعلي واحد منهم گال :- مسدس الغلوك هيدا أخف واحد وأسهل عليكي من كل هدول فرح نبلش فيه
علمني على قطعه وحدة وحدة وصار يعلمني على طريقة الأستخدام وگف على جهة واني وراه بكم خطوة جان نيشانه على بطل گزاز ضرب طلقة
نزيت وسديت أذني من الصوت
اندارلي :- شفتي كيف
- أريد اجرب
وگفت نفس وگفته وحاولت أقلده ضبطلي اللزمة مال مسدس ورجع ليورة انطاني الأشارة ورميت طلقة
غمضت عيوني حيل واني على لزمتي اله فتحت أباوع
انداريت عليه :- يا شو هذا البطل بعده بمكانه
هز راسه :- خلص مافي أمل لسى الطريق طويل قدامك
- لا يمعود شيرادلها الزم المسدس هيج واضرب ..
حجيتها واني أوجه المسدس عليه
فز وصاح :- لا لااااا على مهلك
نزلته واني حاصرتني الضحكة على شكله هذا غير طلع داخل نادي فنون الدفاع عالنفس ووگف يعلمني
ضربة : ايدك على صدرو
بترجعي خطوة صغير بأجرك اليمين
راسك للخلف وبحركة سريع بوووووم بتعطيه ضربة براسك بنص أنفو
بان :- تعال أجرب بيك
رفع ايده :- لا واليرحم بيّك اعفيني
كمل :- شد الشعر غلط انك ترجعي بعكس اتجاه شد شعرك هيك انتِ رح تتوجعي اكتر بدك تمسكي ايدك وتثبتيها فوق ايدو بعدها بتروحي مع اتجاه المقاومة تثني رجلك على أجرو وبحركة سريعة توقعيه عالأرض
گتله :- ماكو غير طريقة احسها صعبة
- مبلى في
- شنو هي
- دغدغيه
باوعتله صفح ضحك گال :- بمزح معك ولو في طريقة تانية ازا بدك تتخلصي من شد الشعر
- شنو هي
- تحلئي شعرو بالمكينة
- لا اعذرني اني اختصاص شوارب بس
باوعت للسما وباوعتله :- اني عندي طريقة الزمه هم من شعره واگله هدني واهدك
ضحك :- حلو وازا كان اللي شادلك شعرك اصلع
- بتفي عليه
سوالي اوكي بيده :- براڤو بلشتي تفهمي
علمني على حركة جودو اسمها أوجوشي وشلون اگدر أوگع اي شخص بيها وعلى كم حركة ثانيات بعد ما خلص وگفنا نشرب مي
بان :- عاشت ايدك ومقصرت بس بعد هذا كله علمني طريقة اتذكر بيها الحركة بوكت الموقف
- ما عليكي هي بتجي لحالها
- أكيد ؟
- بضمانتي
- دتعال لعد خلي أجرب بيك اللي تعلمته
- عفوًا مين انتِ ؟ شو عم تعملي هون ؟ يلا يابنت على بيت أهلك
مر الوكت بسرعة ومحسينا بيه حضرت نفسي سبحت وغيرت ملابسي وهو سبقني وتحظر أخذت جنطتي وموبايلي وطلعنا بسيارته عالمطار
رغم خوفي من فكرة انُ عبد موجود هنا بس شي بداخلي جان غريب مثل الغصة اللي بگلبي
كلها كم أسبوع واني هنا بس أحس تعودت عالمكان والناس والعيشة وسوالف ميشيل اللي متخلص
وصلنا لهناك نزلنا يفتر وياي بأغلب الإجراءات اول شي مرينا من جهاز التفتيش وفتشوا الجنطة بعدها رحنا لنقطة الجوازات فحصوا جوازي لحد موصلنا للبوابة
رقم الحجز وبطاقة الصعود جانن بتليفوني جان حاجزلي عالأنترنيت وهو دافع من حسابه أونلاين
عالبوابة وگف حتى أودعه
گتله :- شگد مراح أحجي مراح أوفيك حقك أشكرك على كُلشي سويته علمودي أدري خاطرت بنفسك شغلك ما أتمنى علاقتنا تنتهي ان شاء الله بيوم من الأيام أرجع وأشوفك بوضع أحسن من الـلي اني بيه ووصل سلامي لريتا
ابتسم ايده بجيوب البنطرون
گال :- وريتا بتسلم عليكي
- وهمات قبل لا أنسى عفت فلوس بصالة بيتك وياهن أمانة ورسالة أتمنى تقراها
فتح عيونه :- عم تمزحي ؟
- هذول انتَ أحق بيهم مني ولتگول ما أحتاج ومن هالسوالف أدري بس أعتبرهن رد جميل للي سويته وياي
- عن جد وحدة غبية وعنيدة
ابتسمت ومديت ايدي :- تشرفت فيك مسيو ميشيل
ضحك وصافحني :- وأنا أكتر مودموزيل بان
مشيت عنه وقبل لا أبتعد انداريت مرة أخيرة ولوحتله بأيدي ومشيت گعدت أنتظر نداء الصعود عالطيارة
... 《 نورجان 》 ...
فتحت عيوني بتعب لگيت روحي بالمستشفى
باوعت ماما يم راسي مدنگة أول محست عليَّ فزت
دنگت باست راسي
شدن :- الحمد لله عالسلامة يأمي
انتبهت عيونها حمر ومورمة گالت :- شلونج خما دتحسين بوجع ؟
هزيت راسي لا شفايفي ما اگدر أحركها گد ما جافة انتبهت للكانيولا اللي بيدي معلگيلي مغذي
بللت شفايفي بصعوبة وأأشر لماما افتهمتني جابتلي بطل مَي وساعدتني اگوم حتى أشرب ورجعت راسي
صارت تمرر ايدها على شعري على كيفها جسمي كُلش جان خامل ومبيه أي طاقة وأحس بدوخة ولعبان نفس
گوة أفتح عيوني وأرجع أسدها حسيت عليه يفوت
وأسمعه يگلها :- ها شلون صارت ما گعدت ؟
وماما ترده :- گعدت فتحت عيونها بس كُلش مالها خلك تحجي ذبلانة البنية
حسيت عليه صار يم راسي لزم ايدي
شبير :- يولي يالصفرة
فتحت عيني باوعتله جان بملابس الدوام ابتسملي
گال :- الحمد الله على سلامتج يول هو هيج تفجعيني من الصبح منين أجيبلي صفرة لخ عيونها مطقمة ويَّ لون شعرها
ابتسمت بتعب ودرت وجهي سادة عيوني شال ايدي باسها
شدن :- شگالك الدكتور قبل نطلعها ؟
- اي بس گال على مسؤوليتكم وانا ما أحب جو المستشفى يمرضها وهي عاوية ما عندها مناعة
- لا هذا هو اكتبلها خروج خلي تطلع اختنگت هنا ندير بالنا عليها بالبيت أحسن
راح كتبلي خروج طلعوني راجعين للبيت خلص الطريق راسي على كتف ماما ومغمضة عيوني لحد موصلنا
شبير خابروه گال راح أروح عندي شغل وگف السيارة گدام البوابة ساعدتني ماما ونزلت ساندتني رايحة روحي گوة واگفة على رجلي وشبير راح
فتنا نمشي للبيت تلگتنا عمة شيخة تسأل بماما عني
شدن :- طلع عندها تسمم غذائي
شيخة :- يا يمة ومنين اجاها التسمم شو حتى ما ماكلة شي البنية من وكت العزيمة لحد ما ردينا ما رضت تتعشا
- هو هنا مربط الفرس البارحة بالعزيمة ماكلتلها شي گالب معدتها گلب ومخربط وضعها
- لا يمعودة شلج بيها اهو نفسو الأكل اللي أكلنا منو احنا هي أكلتو
- لا عيني لا متوهمة مأكلت من هالأكل أكلت من الماعون اللي صبولي بيه التمن
صفنت عمة شيخة مثل التتذكر
- اي ولج تذكرت مو حرمة مآب جابتلج ماعون لحالج وما گربتي صوبو وأكلتو عنج نورجان
- عفية بالضبط
- عجل شنو گصدج هالبت حاطتلج شي بالأكل ؟
- لا دادة فدوة لعينج جاهلة هاي شمفهمها بهاي السوالف بس گولي الأكبر منها مسويها أگلج اي
- منو گصدج ؟
وصارت تحجيلها على المشاحنات الصارت بينها وبين مرة عمو فدار وإبتهال البارحة بالمطبخ
- رادن يسمني لأن راددتهن بكم كلمة ماتن مني ووگعت براس بنتي حتى اني من البارحة معدتي مگلوبة بس مهتميت ولا شكيت بالموضوع لحد منزل شبير شايل نورجان وهاي عود اني مأكلت عالخفيف
- يا يمة صخام الصخمهن وصخم طراگيعهن عجل لو صاير شي لهالبنية والله ولدنا ما يسكتون خاصة شبير يتخبل بس يعرف بيهن هن السامات حرمتو
- وخليه يعرف ديأدبهن هالمسمومات
- لا خية دخيلج كلشي ولا شبير هذا فيوزاتو طگة ونص إذا درى يروح يهد لبيت خالو ويسويها سالفة شكبرها ويتخاربون خلي يرد تيم اليوم وانا أحاجيه بالصار واهو يتصرف
- لا ليش أنتظر تيم خوب أگول لچبيرهن وأخليه هو يشوف شغله وياهن دا أشوف منو اليقبل هالسواية تصير بخطار بيته
گامت ماما خابرت عمو فدار وگلتله بكل اللي صار هو من سامعها متخبل ساد التليفون ورايح لمرته محاجيها
67 تعليق
گايمة تحلف وتتكفر مو انا ومو انا وشلي عندها ومن هالكلام عاد راجع عمو مخابر ماما گلها متأكدة هي
شدن :- اني ماريد أظلم بختها يمكن صدك تطلع مو هي بس اني متأكدة وحدة من الجانن موجودات بالمطبخ واذا تريد تتأكد اسأل چنتك مرة مآب هي جابت الأكل
راجع عمو فدار على مرة مآب لازمها البنية گايمة تبجي
گايلتله :- عمتي البارحة شافتني واني أصب بالماعون وسألتني المن ومن گتلها لعمة شدن أخذت مني الماعون وصبتو عني وانطتو الي تاوديه
متخبل گايم على مرته صياح وغلط وإهاين گدام چناينها وهي مراددته وفاقدة شلون يدافع لماما ويفازع
ولده گوة لازمينه لا يمد ايده گام وطردها من البيت
العصر گاعدة بغرفة در متمددة على جربايتها ومرة سلام گاعدة تسولفلنا الصار وتمثل العركة صورة وصوت
سعاد :- وگام الخال رفع ايدو عيطگها ووگف بوجهو مؤتمن
دگت صدرها :- گلو يابا لخاطري إذا الي معزة عندك لا تمد ايدك على امي
أباوع لماما حاصرتها الضحكة على سعاد واني ودر غصينا بالضحك ملزمنا روحنا عمة انطتها غمة
شيخة :- فلشج كون ما تفوتج سالفة تموتين عالخوارة
34 تعليق
گعدت للگاع :- عجل شلون نخلص يومنا يا عمة هي سالفة من هين طلابة من هين متهجسين إلا خلص النهار
- وهسع شحال فرحة ؟
- زعلانة عند أهلها ومتانيتو يروح يردها
- والله الخال فلا يسويها عتغني بكيفها هاي فدار ونعرفو ونعرف طبعو
- والله هم گتلهم هسع چم يوم واخوتها يردوها لحالهم
للمغرب كلها طشت ضلت بس در گاعدة دتقرة قرآن
انفتح الباب وفات شبير ماد راسه
گال :- ول در انتِ هين ؟
قطعت قرائتها واندارت عليه
در الزهراء :- تفضل عمو موجودة
فات وعينه مشكلها عليَّ
شبير :- يولي شمشتاگلج انتِ وغرفتج صار شگد ما طابلها
ضحكت سدت القرآن وتحركت من مكانها
گلتله :- اخذوا راحتكم انا طالعة أي شي تحتاجونه اندهولي تلگوني قريبة
- أموت باليفهمها وهي طايرة
ضحكت وحركت كرسيها طلعت من الغرفة اجاني
گعد للگاع بصفي لزم ايدي
گال :- سودة عليَّ بالكلفه ولا بيج
تضايقت :- لتگول هيج خطية
رفع ايدي باسها
- ريتو بشبير ولا بيج يبعد هلي
- لا اسم الله
- ريتو بفرحة الچلحة ولا بيج
26 تعليق
ابتسمت وضليت ساكتة
گال :- دحك الصفرة دحك كيفتي شو ولج
- اي هاي ختولي ما أحبها
- هاه عش متحبيها
- ليش انتَ متدري ؟
عقد حاجبه :- شأدري
حجيتله كُلشي من طقطق للسلام عليكم وانطيته اله بالباكيت لحد طردة الخال لمرته من البيت وزعلتها
ضل ساكت عاقد حاجبه متضايق ويضرب صفنات
لزمت وجهه :- شبيك
لزم ايدي اللازمة بيها وجهه وباسها
- حگج تاخذينو ويوصلج مربع وعلى هالشارب
- وإذا ما أخذته ؟
- يول مو عطيتج كلمة
- دا أگول إذا
صفن بوجهي گال :- ميخالف انتِ تحددين العقوبة
- أزين شواربك وانتَ نايم
فتح عيونه وباوعلي مصدوم :- دحك الصفرة وصلت يم شبير أستفحلت عليه عجل ما ناسية السالفة لا والنوب مصممة إلا وانا نايم
- اي بان گالتلي
عض أصبعه :- النوب تلومني من أحجي عليها
بالليل راجع عمو تيم وعرف بالصار اجه شافني وتحمدلي بالسلامة وثاني يوم من وصل در لمدرستها
ماخذ أوراقي الطبية ونازل عالمديرة ماخذلي إجازة مرضية يومين ومناك يصادف جمعة وسبت انطبگن صارن أربع أيام عطلة بدون لا دراسة ولا دوام
عمة شيخة وگعتلي بالسوائل شوربة عصاير مَي كلما تشوفني تگلي اشربي وأربعة وعشرين ساعة متمددة
دللوني دلال مصاير بحيث تمنيت أضل مريضة بالفراش
جنت گاعدة بالمطبخ وفات علي شافني
گال :- ها المسمومة الحمدلله على سلامتج
تضايقت حسيته متعمد يگولها هيج حتى يضوجني
فتح الفريز أخذ بطل مَي ووگف يشرب ويباوعلي
فاتت عمة شيخة عالمطبخ
گلها :- صدك عمة متذبحون ذبيحة ؟
اندارتله :- ذبيحتيش ولك
- لخاطر حرمة عمي وگومتها بالسلامة
- اي والله ينراد نذبح فدى بس يجي أبوك أگلو
- وعش تگولين لأبوي هذا عمي شبير راتبو شگدو خليه هو يجيب
اجانا صوته واگف الباب
شبير :- دكل تبن عينو عالراتب الفگر روح لأبوك فلوسو متلتلة بالشهر مدري چم مليون يطلعلو
- عجل هي غير حرمتك
- أنا ؟ بالحرام إذا متزوج لا أعرفها ولا حرمتي
- همزين عقد الشيخ بعدو موجود عند أبوي
- هسع أطلگها
باوعتله فاتحة عيني :- شُبيرررررر
غمزلي ويعضلي بشفته
شيخة :- عش مفاول بالطلاك ولك هي هاي هم حجاية
- يابا عنضحك
- عجل وانتَ ما سامع گول أبو الحسنين أقداركم تؤخذ من أفواهكم لا تفاول بالمو زين عمة
علي خيبر :- ديحي يولي عتصيرين مطلگة
نورجان :- عززة صدك عمة ؟
- انتِ هم لا تصيرين فطيرة كلش عيضحك عليج معليج بيه
رجع گال :- الحگي يولي حظري للعدة تاتستلمين منو نفقة ولو انتوا ما عندكم جهال بس يلا انتِ موجودة
شبير :- يولي طلاگيش عش انا وين ألگي صفرة ثانية مثلها
حجاها وهو يحاوطني ويخليني جوة ايده
علي خيبر :- وبدربج لتنسين الغايب تاما ياكلو عليج
- عزززززة صدك عود ؟
- راح يسودنها علي ابن المومن
56 تعليق
- الذهب يولي الذذذذهب
حجاها وطفر برة المطبخ وشبير گام وراه لحگه
مر كم يوم تحسنت ورجعت لنشاطي القديم ورجعت أداوم طبيعي وبدينا نتحظر إمتحانات نص السنة قربت مضل الها شي والبيت كله مخبوص اني ودُر وعلي
جنا گاعدين بالليل بالصالة اني وعلي يم عمو تيم يدرسنا يشرحلي موضوع وينطيني امتحان ويرجع على علي يشرحله ويسويله امتحان وهيج مخلصيها
شوفته دفتري وگعد يصححلي الأخطاء ويفهمني
نورجان :- هذاك اليوم من انتَ مموجود جان عندي امتحان ومحد قراني ورحت امتحنت وممجاوبة زين
تيم :- عجل رجلج الشفيه وينو ميگعد يدرسج
- مقبل رحتله وطردني يگول ما أعرف
- ابن السايب عجل شهادة هندسة طول بعرض المن رايدها يدحك عليها
صفنت :- منو ؟
- الشفيه رجلج غير
فتحت عيوني :- مهندس ؟ منيله الهندسة هو غير ضابط ؟
علي خيبر :- استلم الأخت سويچ
صاح بيه :- انكتم
42 تعليق
- بس هو مگلي ولا مرة مكمل هندسة
- خاطر لا ترحيلو كل ساع تعال قريني أعرف تفكيرو
- دخلي يطير اني اله
علي خيبر :- راح تكتله
شفته ابتسم وضل ساكت يباوعلنا ويهز بيده فات شبير
گال :- ها السلام عليكم عش ملمومين
گملته بسرعة صرت گباله تخصرت
- عود ليش مگتلي انتَ مهندس ؟
فتح عيونه :- أنا ؟
- اي انتَ
- بالحرام ولا شام ريحة الهندسة ولا واصلها بطرك هذن النجمات
تيم الله :- دنكتم لك ابن السايب عش متگعد تدرسها شتخسر لو گعدتلك ساعة ساعتين وياها باليوم بدال ما ضالة تفرفر هين وهين
- مو اگلها هي متقبل هاك شوف بعينك تعاي يولي
گعد وأشرلي أجي أگعد يمه انطيته الكتاب والدفتر وگام يگلب بالمواضيع وبده رأسًا يشرح لا لزم قلم لا يكتب
نورجان :- شُبيرررر
- اشتعلت روحو ها يولي
- اشرحلي بالدفتر ما أعرف هيج
شو هذا أخذ الدفتر وصار يكتب رأسًا
صحت :- شُبيرررررر
شمر الدفتر :- نعلعلاه هو والراء البأسمو گولي يولي
- أول شي لازم تبري القلم
لزم القلم خلاه بوجهه
گله :- مبري الذمة خوية دنيا وآخرة
عمو تيم عض ايده حيل وهو يباوعلنا
گال :- يابا وعديلة مريم راح اگوم أرگع راسج براسو
ضجت وباوعت لشبير ونصيت صوتي
- كله من وراك
- انا شعليه گتلو انا وياها ما نتراهم بالدراسة ما سمع مني بعدين انتِ دحگي للجانب الإيجابي
- شنو ؟
- رجلج طلع مهندس وين لاگيتها ضابط ومهندس وشيخ وشيف
علي خيبر :- وتغسل مواعين
- انتَ انچب
تقربت لزمت جتفه مبتسمة :- عود صدك عندك شهادة هندسة ؟
- وعيونج الصفر هسع نصعد أطلعلجياها
هزيت جتف :- هلا هلا
علي خيبر :- لا الوضعية خربانة فد مرة
- انچب دع العلم يردح
صار عمو يسأل شبير عالبيت مالتنا وشوكت يكمله
بعدنا دنحجي وفاتت ماما للصالة متوترة حيل ومبين عليها تفرك بأيدها وتباوع لعمو تيم سألها شصاير
شدن :- بان خابرتني من المطار راح ترجع لهنا
73 تعليق
تيم :- يمتى هالحجي ؟
- هسه توني سديته منها عفية شوفلي خالك فدار هو گال إذا رجعت تنطيني خبر واني آخذج للمطار
- يولي خالي مو هين ببغداد شيجيبو هساع ما گلتلج وين راح تنزل ؟
- على مطار أربيل
- والساعة بيش طيارتها
- بالتسعة
باوع لساعته ورفع راسه گام من مكانه
گلها :- تحظري انا آخذج لهناك
حجاها وطلع من الصالة صعد فوك لزمت ايدها بسرعة
نورجان :- صدك حتجي ؟
ابتسمتلي :- راح ترجع والله مضل شي وتشوفيها
عافتني وراحت للغرفة تبدل گعدت عالتخم أرجف مشاعر مخربطة فرح على توتر ممصدگة حشوفها
حسيت عليه وهو يلزم ايدي
شبير :- افرحي يولي المعلم مالج جاي حدر رجليج
ضحكت وحضنته حيل فزينا اثنينا على صوت الباب وهو يندفر باوعت علي ماكو بالصالة
- عزة هذا شبيه ؟
- خيولي حبيبتي يغار من عدنا
راحوا بليلتها ماما وعمو تيم بسيارته وطلعوا للشمال حتى يجيبون بان وياهم بيومها حتى نوم مأجاني
... 《 شهربان 》 ...
الرحلة أقل الساعتين وصلت عالمطار ولحد ما خلصت وأخذت جنطتي اني طالعة روحي وميتة تعب
من طلعت مناك محد استقبلني عرفت ماما بعدها مجاية طلعت موبايلي وفتحته لازم أجيبلي شريحة جديدة وفلس أحمر ما بجيبي
باوعت للشارع مليان ناس جان الوقت متأخر بالليل
شفت رجال كبير بالعمر فات مني تعداني صحت وراه ولحگته بسرعة وگفته اندارلي مستغرب
53 تعليق
گال :- صحتيلي ؟
بان :- اي عمو بلا زحمة ممكن أستعمل موبايلك محتاجته أتصل بأهلي هسه ضروري
مگال شي الرجال طلع تليفونه وانطانياه سجلت بيه رقم ماما ودست اتصال ورفعته منتظرتها تجاوب
اجاني صوتها :- ألو
- هلو ماما اني بان
فزت :- بان ؟ منيلج هذا الرقم رجعتي ؟
- اي قبل نص ساعة تقريبًا وصلت ولوحدي هسه بالشارع مدا أعرف شسوي وينج انتِ
- بالطريق والله طريقنا بعيد ويريدله وقت
- لعد شلون أضل هيج
- عندج فلوس ؟
- لا
سكتت شوي أسمعها تحجي ويَّ واحد ورجعتلي
گالت :- زين اسمعيني ماما حتجيج سيارة قريبة من المطار اخذيها وروحي لبيت خالج
- للسليمانية ؟ ماما شيوديني لبيت خالو صدك تحجين
- لعد تضلين بالشارع ؟ فلوس معندج جان گتلج تاخذين غرفة بفندق تگعدين بيها لبين ما أجي
- ماروح لبيت خالو
- روحي بان لتشلعين گلبي حخابره لخالج فؤاد واخليه ينتظرج واني أجيلج لهناك وأخذج من بيتهم
باوعت للرجال طولت عالتليفون
جريت نفس گتلها :- ماشي يا تكسي هذا اللي راح اخذه مو گتلج معندي فلوس
- الرجال عرف هو راح يجيلج بس وصفيلي مكانج وين واگفة بالضبط حتى ننطيه خبر
دليتها وگتلها شلابسة حتى الرجال يعرفني
گالت :- ماشي هسه دقايق ويوصلج لتتحركين ديربالج على نفسج
سلمت وسدته انطيته للرجال وتشكرته هواي
والظاهر سامعني من أحجي قبل ليروح
گال :- بابا محتاجة شي گولي لتترددين
- لا عمو أشكرك خابرت أهلي هسه يجون ياخذوني
- فلوس ممحتاجة ؟
- لا أبد والله تعبتك وياي
95 تعليق
- لا بخدمتج في أمان الله
سلم وراح شگد دعيتله بساعتها ضليت منتظرة بالعشر دقايق وطبگت گدامي سيارة وانفتحت الجامة
رجال مد راسه
گال :- انتِ بان ؟
هزيت راسي أشرلي :- اصعدي أبو علي دزني عليج
صعدت وياه گعدت ليورى رجلي أحسهم مگرمين من الوگفة والفرة أريد بس أمددهم الرجال اللي أخذني ما حجى شي ولا سألني عالمكان مبين جان موصينه بيَّ
كل شوي يندار يسألني إذا محتاجة شي أكل شرب
الطريق جان مبيه إزدحام وهو دايسلها سرعة ما مصدگة شوكت أوصل وأمدد جسمي حيل تعبانة
بالطيارة منمت وبالسيارة عيني هم ما أخذت نوم رغم طول الطريق والتعب اللي جنت بيه بس مگدرت أنام
جنت مماخذة من الحبوب والعلبة عفتها ببيت ميشيل خفت لا أخذها للمطار وأتفتش وتسويلي مشكلة
عاد وصلنا لهناك الدنيا بعدها مظلمة الرجال طبك گبال بيت خالو بالضبط نزلت جنطتي بچتفي متكسرة
طفى سيارته ونزل وراي أشرلي عالبيت
گال :- هذا البيت مو ؟
هزيتله راسي مشى وأشرلي أتقدمه صار گبال الباب دك الجرس مرتين محد طلع رجع رفع ايده ودگه بأيده حيل
دقايق وانفتح وطلع خالو بسرعة شافني وخزرني
گله :- السلام عليكم
رد عليه وعينه مشالها مني الرجال اندارلي
- يابة وهاي الأمانة مالتكم وصلت بالحفظ والصون واعذرونا عالتقصير
ضل خالو يتشكر منه وأشرلي براسه حتى أفوت للبيت عفته يحجي ويَّ الرجال يستفسر منه واني دخلت جوة
بيتهم أظلم گعدت بالصالة نزعت الجنطة ورجعت راسي بتعب عالتخم أحس حيلي مهدود متكسرة تكسير
نسرين :- وين جنتي تخورين بالدول ام الخوارة
فتحت عيوني ورفعت راسي باوعتلها بسرعة جانت واگفة گبالي لابسة ملابس للنوم فوگهن الروب
سكتت عنها ماريد أتجادل وياها أتحمل هالساعتين لبين متجي ماما وأولي من شافتني ساكتة زادت بالحجي
غلطت فشرت واني متجاهلتها جابت بابا بالطاري گمزت عليها بسرعة لزمتها من شعرها وهي تعيط مدت ايدها تريد تلزمني من شعري دنگت راسي عضيتها حيل
بان :- ولججج تغلطين على بابا ؟ مداس رجله براسج يالبربوقة
غير تخبلت شيلتنا من البيت بالصياح فات خالو يركض من برة شافنا متكافشات اجاني لزمني ودفعني عنها
گامت تصيح :- والله متگعد بالبيييييييييت والله دقيقة وحدة بعد ما أتحملها ببيتي هسسسسسه تطرها
فؤاد :- هسه أطيحلج حظها بس اهدي ليصيرلج شي
- اگوووووووله متبقى هنا على جثتتتتتتتي
- دصبري جايين بالطريق ياخذونها متضل هنا
- طلعها متگعد هنا بالبيت ما أستقبببببببلها لا هي ولا امها ولا أي واحد من طرررررفها هسسسسه تطلع منا لو تاخذها وتطلع انتَ وييييييياها
خالو من سمع هيج اجاني متخبل أخذني كفخ من الصالة ليبرة فتح باب الشارع وشمرني حيل
انداريتله أباوعله بحرگة أنفاسي سريعة صدري يصعد وينزل ميتة بدمي گمت وگفت عدلت شعري ليورى
گال بدون ليعلي صوته :- انگبري هنا ولتتحركين من مكانج هسه أهلج جايين ياخذونج لتسويلنا هوسة بالليل الناس نايمة
گتله :- أريد جنطتي
فات شوية ورجع شمرها عليَّ أخذتها لبستها على چتفي
فؤاد :- مثل مگتلج بلا صوت أهلج جايين بالطريق
حجاها وسد الباب بوجهي ضليت أباوع على مكانه
وگفت الغصة ببلعومي وعيوني انترست دموع بس مبجيت خليت جنطتي بالگاع وگعدت عليها عالرصيف
وبقيت منتظرة ايدي على خدي ..
الشارع فارغ بس اني بيه والدنيا جانت ليل لوما أعمدة الإنارة مضوية الشارع جان تخبلت من صوت الچلاب
ضليت على حالي فوك الساعة گاعدة وايدي على خدي عيوني أفتحها وأسدها من التعب روحي رايحة
فزيت على صوت الباب وهو ينفتح وطلع خالو شافني
گال :- ها زين ما تحركتي گلت هسه ألگاها طافرة
ضليت ساكتة واني أباوعله صار گبالي بيده التليفون
فؤاد :- امج خابرتني هسه وصلت واگفتلج بنهاية الشارع
گمت بسرعة من مكاني لبست جنطتي
- لعد ليش مأجت لهنا ؟
- ماريدها لا تجي ولا توصل وبعد لتوصلين لهنا لا أعرفجن ولا تعرفني متبري من اختي ومن بناتها
أشرلي عالشارع
گال :- هناك تلگين سيارة منتظرتج
عفته ومشيت وين ما أشرلي وأتلفت عليه يباوع وراي
ما همني أي شي بساعتها بس أريد رجلي توصلني الها وأشمر روحي بحضنها وأذب كل تعبي يمها
وصلت لنهاية الشارع وانداريت مثل موصفلي وصدك لگيت السيارة واگفة منتظرتني مشيت بسرعة الضحكة تارسة وجهي وصلت لهناك ممبين شي جانت مظللة
وگفت يم الباب ودگيت عالجامة انفتح الباب الورى
تلاشت ضحكتي من شفت وجهه أشرلي براسه
عبد الإله :- اصعدي
انداريت أريد أشرد صار أرقم بوجهي دفعني عالسيارة صعدت وسد الباب وراح صعد بكرسي السايق وحرك
رجلي صرت ما أحس بيهم لاطشة روحي بالباب وجسمي كله صار يرجف لزمتني الرعشة
رفعت عيني عليه ساكت عينه ليگدام حتى ميباوعلي
نزلت دموعي بسرعة ومسحتها واني أتذكر لهفتي وفرحتي من جان عبالي ماما اجت ودتنتظرني
... 《 نورجان 》 ...
عمو تيم وماما واصلين للسليمانية بالأربعة الفجر
نازلين گبال بيت خالو داگين الجرس محد فاتحلهم عمو تيم كسره تكسر بالدك يلا فاتحلهم وطالع خالو
شاف ماما گلها :- ها شكو جاية شعندج هنا
شدن :- شنو شعندي فؤاد اجيت دا اخذ بنتي صيحها
- ماكو بنتج لا اجتني ولا شفتها
- شنو الماكو لتخبلني فدوة لگلبك صيحلي بان دا اخذها ونروح ورانا طريق
- يابة شلحيتي گتلج ما اجت ولا شايفها
ماما متخبلة
گلتله :- شلون ما أجت الرجال خابرنا گال وصلتها للبيت وطلعلي خالها
- جذاب لا شايف رجال ولا احد اجاني ولا وصلني وانتِ ديري وجهج وروحي منا وتنسين بعد عندج اخو اسمه فؤاد لا أعرفج ولا تعرفيني ولا الي شغل ببناتج روحي خلي الأنباري وولد اخته البعتي أخوج علموده يفيدونج هم يلگولج بنتج عود
عمو تيم من سامع هالحجي لازمة خالو من خوانيگه ومخابر على صاحبه اللي موصل بان يتأكد من الصار
والرجال يحلف گله :- أبو علي بيدي وصلتها للباب وما تحركت إلا ورى ما سلمتها بيد خالها شلون يگول ما شايفني جاي يلعب عليكم هذا
تيم رده :- هذا هو يالأخو كفيت ووفيت
سد التليفون وجار خالو للشارع لازمة من ياخته صايح بيه صيحتين مخلي خالو يطگطك وبعده ينكر
صاح :- أسمع لك تحجي ويييييين ضام البنية لو هسع أنزعلك أخلاقي وأشوفك النبي العربي احجي البنييييية وين راحت
- ما أدرري والله رجال لا حول ولا قوة عوفني بحالي
من گال هيج انطاه ضربة بنص وجهه مخليه يتطوطح بمكانه وراجع عليه لازمة ويريد يكمل عليه
فؤاد :- راح أحجي والله راح احجججججي بس عوفننننني
صاح :- فضني عاد لكككككك گاعدلك انا
- زوجها اجه اخذها منا قبل لتجون بساعة
ماما من سامعة هيج وبان صارت يم عبد متهسترة بجي وصياح على خالو وتضرب بيه گوة لازمها عمو تيم
وهي منهارة واگعة للگاع
شدن :- راحت بنتي يمووووتها هذا ميرحمها والله
- اهدي يولي مو هيج الحجي گومي وياي تانرد
راد يرجعها للغربية مقابلة تريد تروح ورى بان ماخذها وطالع بيها لبغداد على بيت خاله فدار
اني اليوم كله عيني ملاحها النوم تليفوني بيدي منتظرتها تخابرني تطمني عليها لوجه الصبح وهي ماكو
43 تعليق
گمت وخابرتها ردت عليَّ تبجي حجتلي كل الصار وهي منهارة وأسمع صوت عمو تيم يمها يهدي بيها
من سمعت بزوجها ماخذها متت بجي شبير جان توة غافي سهران وياي من سامع صوتي فز مفزوع
حجيتله الصار واني أشهك بحضنه لمني بين اديه ويحجي وياي يريدني أهدئ
نورجان :- شلون فهمني شُبيررر شحالها هسه أخاف ليسويلها شي
گال :- ما راح يصير شي وعيونج خالي مناك وتيم يم امج تايفضون الموضوع ويردوها وياهم
صار وكت دوامي گمت بدلت وشبير هم مبدل يريد يروح لدوامه وصلنا اني ودر بطريقه للمدرسة
الدوام ما أدري شلون خلص أحس روحي طافية ومالي خلك لأي شي وبالي كُلش مو يم الدرس كل شوي مدرسة تزمخ بوجهي بدرسها وترزلني واني بعالم ثاني
رجعنا للبيت گوة أجر بروحي تلگتني عمة شيخة مخابرة ماما وعارفة بالصار ذبيت روحي بحضنها
أبجي وهي تسكت بيَّ وتهون عليَّ
علي خيبر :- يابا هو هيج گالوها موتي روحج بالبجي من البارحة ولليوم ميصير هيج
باوعتله دموعي بعيني :- راح أموت والله خايفة عليهن ليأذوهن
گال :- لا تخافين امج بحماية الخال فدار فنو اليگربها واختج تردلج ما تضل على حالها بس انتِ عطي نفسج مجال مو كلشي بجي وخبصة
هديت شوي بكلامه مسحت دموعي وگمت غسلت وجهي أباوع لوجهي بالمراية صاير قطعة حمرة
ضليت اليوم كله ألوب عليهن إتصالات مبطلت ويَّ ماما كل شوي أخابرها حتى أعرف شصار وياهم
گالت :- خابرت عمتج أمجاد وعرفت عنوان شقته بس فدار مخلاني أروح عندهم إنذار بالمركز ولازميهم ميگدر يعوف شغله گال من أرجع آخذج ونروح
- وراح يخليكم تاخذوها ؟
- ما أدري يأمي والله ما أدري گلبي صاير نار كبره عليها
عمو فدار متأخر للمغرب وهو مجاي لا هو ولا ابنه وعمو تيم طالع لشركة صدر الدين مستغلة فترة غيابهم گايمة ماخذة جنطتها ورايحة لشقة عبد لوحدها
... 《 شهربان 》 ...
وصلنا لهناك وگفت السيارة گدام العمارة
الطريق بالأربع ساعات ما أدري شلون خلص من الخوف والتفكير اللي جنت عايشة بيه عيني بالجامة ولا باوعتله
دك تليفونه باوع لأرقم
عبد :- انزل حول من هاي الجهة اخذها صعدها للشقة هسه أجي وراكم
نزل أرقم فتح الباب من جهتي جرني من شعري نزلني
صرت أصرخ :- عوفننننننني وخرررررر حييييوان وخررر مارييييييد أروح ماريييييد عووووفني ولك هي أغببببببببر شيل ايييييييدك
ما رد ولا عبالك يسمعني سحلني من شعري وصعدنا الدرج أستلمني تكفخ لحد موصلنا للشقة فتحها وشمرني
وخرت منه لطشت روحي للحايط أوخر بشعري المكفش عن وجهي وجهي أحسه يطلع نار وصوت أنفاسي عالي
أرقم :- لبييييييروت ولج لبيروت مولية
حجاها ودفرني برجله على بطني أحس روحي طلعت تكورت على روحي لازمة بطني حيل ميتة من الوجع
فات عبد شافني أتلوى بالگاع ما حجى مشى وگعد عالتخم ذب روحه بتعب مرجع راسه ليورى ومغمض
مرت دقايق واني على مكاني متحركت أبجي ودموعي تنزل بصوت مكتوم وأباوعله متأذية فتح عينه شافني
اندار لأرقم :- الغرفة فرغوها ؟
- اي فارغة من البارحة طلعنا الغراض
گام عليَّ دنك شالني من شعري عطت ولزمت راسي متأذية كفخني على حلگي بچف ايده وخزرني
عبد :- ما أسمعلج ولا نفس
انكتمت ولزمت حلگي ميتة من الوجع صارت مرورة بحلگي وخرت ايدي باوعتها انترست دم انخلست
صاح لأرقم ومد ايده گله :- المفتاح
طلعه من جيبه وشمره عليه لگفه واخذني يجر بيَّ وسط صوت البجي مالتي فتح الغرفة مالتي القديمة
شمرني للگاع وقبل ليطلع رفع اصبعه بتحذير
گال :- وحق لا إله إلا الله النفس إذا سمعته جاي منج ما أتردد لحظة وحدة أفرغ المسدس براسج
حجاها وطلع طبك الباب حيل وسمعت صوت القفل
رجعت للحايط حضنت رجلي لصدري وأشهك بجي خفت ليسمع صوت البجي ويجيني خليت ايدي على حلگي بسرعة أكتم صوت شهگاتي العالية
حلگي موتني صرت ما أحس بيه گد ما أحسه صار ثگيل
سكتت شوي وباوعت للغرفة جان فارغة ولا غرض مبقي بيها وحتى الشقة جان وضعها مخربط أول مدخلنا هوسة وگزاز جان تارس الگاع
ضليت على هذا حالي بالساعات أسمع صوتهم جاي من برة الغرفة زلم هواي يحجون صوت عبد ميزته بينهم
جان كل شوي يصيح وصاير عصبي حيل ..
واني على نفس وضعيتي بين الغافية والگاعدة
سمعت صوت مرة من برة تبجي وتحجي عقدت حاجبي ركزت بالصوت زين وفزيت للباب بسرعة خليت اذني
نزلت دموعي عرفتها هاي ماما هذا صوتها جاي تتوسل بعبد وهو يردها بكل برود
لزگت روحي كُلش للباب هدأت أنفاسي حتى أسمع زين غرفتي صايرة قريبة من الصالة كُلشي ينسمع
شدن :- الله يخليك بس خليني أشوفها ماريد شي والله بس اطمأن عليها لتحرك گلبي
گلها :- خليه اني رايد أحرك گلبج عليها
- ليش شسوتلك شنو أذيتها عليك طفلة هاي شذنبها دتعاقبها على ذنب مسوته ولا الها ايد بيه
- وشردتها مني بليلة ظلمة هاي شتسميها ؟ وحدة زعطوطة مثل هاي تغافلني وتضحك عليَّ اني ؟
- غلطت يا بشررررر خافت منك وغلطت متريدها طلگها دا أخذها وأروح واخلص منها ليش حابسها عندك
- أطلك ؟ كل عقلج تحجين ورى السوته ترديني أعوفها هيج بكل بساطة ورى ما فريت الدنيا كلها عليها
- لعد شتريد منها ماكو شي يجمعكم وانتَ تعرف كُلش زين سجودة لعبت عليك وبدلتها بأختها شتريد بيها بعد
- سجودة جايها الدور لتخافين جايكم واحد واحد والحصة الجبيرة راح تصير لبنتج حتى انتِ متخلصين من ايدي ..
جفلت من سمعت صوت صرخة ماما گامت تعيط تخبلت گمت أرگع عالباب وأصرخ حتى يفتحه
انهاريت بجي واني أسمعها تصرخ شكو شي سوداوي اجه براسي بذيج اللحظة احتقرت روحي من سمعتها واني هنا محبوسة عاجزة ما أگدر اسويلها شي
اختفى صوتها وصار هدوء بالشقة گعدت ورى الباب مدنگة راسي وأنحب بصوت ناصي
نزيت من سمعته يگول :- تعال اخذ مرة اخوك عندي حابسها بالشقة
احتاريت شسوي دگيت عالباب صرخت بجيت توسلته حتى بس يفتحلي حتى اطلع أشوفها ولا عبرني
بالساعة واني على وضعي راسي عالباب عيوني منفوخة من گد البجي صوتي مبحوح گوة يطلع
سمعت صوت عمو سالم بالشقة يحجي ويَّ عبد
گله :- وينها ؟
عبد :- وشنو المقابل
- شتريد
- المخزن اللي بميسان
سكت شوي بعدها گال :- اعتبره صار الك
ضحك بصوت عالي وبنبرة بيها استهزاء
- ماريده أريدك تحرگه هو والبضاعة البيه وتصورلي وتدزلي التصوير
- بكل عقلك تحجي ؟ وليش أحرگه شراح أستفاد بس نطلع خسارة بلا فايدة
- وهو اني هيج أريد
- مستحيل ولا تفكر بيها
- حلو لعد دير وجهك وتوكل والحلوة اللي بالغرفة أنطيها لواحد من العائلة يشبع بيها ليش ضالة لوحدها
عمو حاول يعترض ويريد ياخذ ماما وعبد متصديله ممخلي گام خابر عمتي سجود گايلتله سوي اللي يريده منك وجيبلي شدن وتعال
قبل لا يطلع گله :- راح أسلمكياها وانتظر منك التصوير ويا ويييييلكم لو فكرتوا تضحكون عليَّ وتلعبون بذيلكم ما يحتاج أگول شراح أسوي أخلي سلاحي يسولف
طلعها أسمع صوت صريخها حتى يعوفها وعمو يصيح ويغلط عليها اختفى صوتهم وطلعوا من الشقة
... 《 نورجان 》 ...
عمو فدار راجع للبيت وملاگي ماما هناك أول شي خطر على باله شقة عبد جانت اليوم كله تلح عليه
متذكر العنوان ورايح لشقته طالعله واحد من جماعته
گله :- اي اجت لهنا تشوف بنتها ودارت وجها وراحت
فدار :- وييييييين راحت ؟
- ما أدري روح شوفها وين
مفتر راسه عليها صاعد سيارته ويدور بالشوارع يدورها جانت الدنيا ليل رجع لبيته خاف رجعت متلگيه ابنه
مآب :- ها يابا شصار وياك لگيتها
- ما اجت هين ؟
- ماكو رديت للبيت لگيتو فارغ
صفك ايد بأيد :- ماكو مختفيييييية مصيبة الله اكبر
وهم يحجون جايله اتصال من رقم غريب رد طلعت ماما تبجي تستنجده
شدن :- فدار فدوة الحگني جايبين مومن ويردون يعقدولي على سالم
من سامع هالحجي متخبل
صاح :- ويييييين انتِ هسع ؟
- ببيتهم ببيت سالم حابسيني بغرفة گوة حصلت تليفون وحدة من البنات وخابرتك فددددوة الحگني أموت روحي والله بس يعقد علي لو فكر يطخني
گوم اخذ سلاحك وابنك ماخذ سيارته وطالع لبيت عمو سالم مآب مخابر مفزع أخوه واصل الحجي للغربية
الولد كلهم دخلوا انذار تحظروا ركبوا سياراتهم وطلعوا
مناك عمو فدار مخابر على عمو تيم وگايله بالصار
عمو تيم لازم واحد من اللي يشتغلون عنده
گله :- خط أجدامك ولبيت السادة گلهم أبو علي يگول فزعة يالنشامى..
