رواية سواد الاثمد الفصل الثامن عشر بقلم نورس
واصل الخال فدار وابنه لبيت عمو سالم والدنيا جانت نص الليل طابگين السيارة ونازلين عالبيت
صايرين الحراس اللي عالباب بوجهم موگفيهم
الحارس گله :- منو رايد ؟
فدار :- اندهلي على سالم
- روح منا چبيرنا ميستقبل خطار بهالوكت
- يول عش تخليني أدوسو لراسك
57 تعليق
- ليش منو انتَ ؟
مآب :- تاج راسك وراسو لچبيرك
الحارس ما عجبه الرد واجه يتقدم عليه ومآب هم مشحون عليهم على وگفتهم وشتلتهم وتحقيقهم وياهم
عمو فدار لازم مآب مانعه يتقرب وموجه كلامه للحارس
- يلا توكل اندهلي عليه لتخليني أبدي أهينك
فايت جوة وهم واگفين على أعصابهم لحظات وطلعت الهم عمتي سجودة شالها مشمور على راسها شمر
مقدمة شعرها مبينة من گدام واگفة ولازمتلهم الباب
سجود :- شرايد ؟
مباوعلها من فوك ليجوة ما عاجبه
گلها :- مالي حجي وي حريم اندهيلي زلمة البيت
- وأبو البيت مو هنا فضني شرايد من اخوي شعندك هنا
126 تعليق
تحجي بعلو واسلوب جاف تنتر نتر بالحجي
جر نفس وگال وهو يتمالك أعصابه
- اسمعيني يولي هاي السوالف مو على فدار اخوج الخيخة تطلعينو هسع يجي يوگف گبالي يواجهني تا أتفاهم وياه مو مطلعلي عرضو وخاتل جوة
- وانتَ هم الك عين وجاي تحجي ورى سوايتكم ويَّ بنت اخوي وعقدها على ابن اختك بدون علم أهلها
- امها موجودة وجانت شاهدة وراضية
- وهي هاي الأصول يابن العشاير ؟ لا گعدة عمام لا زلم جاي وماخذ شورها وطالب ايدها على حسب الأصول
- هم وينهم الزززززلم صار ساع واگف ناطر اخوج تايطلعلي ضام روحو حالو حال الحريم إلا حشى تاشوف الحريم ماخذة مكانو
- لا تتجاوز والزم حدودك لحد الآن محترمتك وجاي أحجي وياك بكل هدوء گتلك سالم مو بالبيت
- اهووووو اسمعي اسمعي يول ان ما طلع وشوفني وجهو الي سواية ثانية وياكم ترى لهسع گاضب روحي عنكم وما مسوي شي
- ميخالف راح أتجاوز كلامك هذا وأرد عليك بأصلي وأرجع وأگلك سالم مو بالبيت ماخذ مرة أخوه ورايح للشيخ حتى يعقد قرآنه عليها
عمو من سامع هالحجي گابة أعصابه وصاير نار كبره اندار على سيارته ساحب سلاحه وواگف گبال البيت
رمى فوك البيت وصايح :- والله والعالي سسسسسماه الكم مهلة منا لـعشر دقايق شششششدن ان ما طلعتوها براضتكم أدفررررر الباب وافوت جوة ولا أخلي حرمة للبيت ولا لأهلو وانزع العيب والمستحى وأدوس عليهن
الحراس من شايفينه مطلع سلاحه مدخلين عمتي للبيت ومتصدين لعمو فدار ورافعين سلاحهم بوجهه
مآب متلازم ويَّ واحد وياهم يتصايحون والخال من جهة يصيح ويتهدد عالبيت وعلى هالحال طالع عمو
سالم :- شعندك جاي لهنا لك خابرتلك دورية وهسه جاية تشيلك انتَ وسلاحك هذا المتسبع بيه وجاي تهوبز وتهدد
- أدوس على راسسسسك انتَ والزلم التطلع وراك شو تعال لهين ..
لازمة جارة من الباب لنص الشارع متلازمين ومآب صاير بين الحراس حتى لا يتقربون لأبوه وصايرة هوسة
واصلين عمو تيم وياه ولد السادة صدر الدين وعمه الجبير وابن عمه اللي وياه بالشركة وجماعتهم نازلين مفاككيهم والخال يتهدد من جهة وعمو سالم يهدد من جهة ثانية
فدار :- والله والأسسسسسسمو الله ما أتحرك من مچاني إن ما أخذت ام البنات من هين لو أعرف أسويها كاتل ومكتول
سالم :- وانتَ شنووووو وجاي تطالب بيييييييها وتهدد بصفتك منووو
- الحرمة دخييييييلة عندي وانا معطيها كلمة للزواج وطالب ايدها على سنة الله ورسولو وهي تعررررررف هالحجي كلش زين
- ماكو هيج حجي عقدت قرآني عليها وصارت على ذمتي وبأسمي لا انتَ ولا عشرة من أمثالك يجووني يحجون بيها ولا تفكررر تجيب أسسسمها على لسانك
صاح :- يابا يا شششششششدن يا بنت ساهرة ما أتحرك من هالشارع لو أخطي خطوة من هيييييييين وهي مو وياي وآخذها يعني آخذذذذذها رضيت والما رضيييييت وهذا حجيك نگعووووو واشرب مايو ما تعبر هالسوالف علي الگدامك فدار مثل الطود الراسي ما يلين لأمثالك
ضالين يتناطحون كلمة منا وكلمة منا ساحب الخال أقسام صاير بوجهه تيم مانعه وواگف يحجي وياه
تيم الله :- مو هيج الحجي خالي البيت بيه عوائل والوكت متأخر لا نكبرها فد مرة كلشي بالتفاهم
- ولك يگلي عاقد عليييييييها وبراضتها وهي من چم ساعة مخابرتني تبجي وعتفزع بيَّ چيف حابسينها تايغصبوها عالعقد هالقليلين الغيييرة والششششرف
لازم وجهه گله :- لخاطري انطينا مجال تانحلها بلا خبصة وهوسة لأن مو بصالحنا
ساكت بالگوة وصاير عمو تيم بوجه عمو سالم
گله :- إذا ام البنات هين سويلنا مجال تانفوت جوة ونسولف مثل الأوادم ونسمع من ام الآنة بلا هالمصايح المالو فايدة
- وانتَ منو ؟ اخذ جماعتك وروحوا منا يلا لتخلوني أتصرف غير تصرف وياكم
عمو من حاجي وياه هيج صايرة عيونه براسه لزمه من ياخته وجره قربه عليه
صاح :- اتخسسسى لك لا تخليني أهييييينك بالحجي تاحجي وياك بكل إحترام مثل الأوادم فضني المرة هييييين صيحها
لازمه السيد مرجعه ليورة وحاجي وياه
ريحان :- لا هيج أبو علي چا انتَ تنصح بخالك وانتَ أعصابك أضرب منه
- ما عيعطي مجال واحدددددد يتفاهم وياه عمي كل أسلوب ما عندو
- معليك يمي گتلك
اندارله :- يابة يابن الناس مالنا شي وياك ولا معادينك كل الطالبينه نگعد گعدة زلم ونسولف بلا هالدوخة هاي
عمو سالم شايفهم أعصاب كلهم صايرين عليه والدورية الدز عليها بيد رجل عمتي ستار بعدها ما واصلة
گله :- وشرايدين هسه ؟
- نفوت جوة ويصير الحجي ما ترهم عالواگف وانتَ ابن أجاويد تعرف بالأصول
مسويلهم مجال وفايتين للأستقبال الخال وعمو تيم والسيد وصدر الدين وابن عمه والأعصاب جانت فايرة واحد ما طايق يباوع بوجه الثاني ومتمني يطلع بروحه
سيد ريحان :- الله بالخير يابة
65 تعليق
ردوا عليه ومندار للخال
گله :- الحجي الك أبو مؤتمن احجي شنهو طلابتك
فدار :- يابا الله بالخير عليك أبديلك السالفة من أولها تا تصير بالصورة وهذا هو گاعد ويشهد عالكلام الراح أگولو
- سولف انا والگاعدين جاي نسمعك
- الله يسلمك الحرمة ام البنات گبل شهور اجتني بليلة ظلمة شاردة من عيالها بيدها بنتها داخلة عندي يابا شكو يا بنت الناس ؟ گالت عمام البنية يردون ينطوها وتايعقدولها على واحد بالگوة لا انا ولا بنتي راضين بيه
وانتَ تعرفني ما بطبعي ولا تربيت أرد دخيل داخل لعندي وطالب الأمان مني خص لو جانت حرمة لا حول ولا قوة وبيد ناس جايرة ما تخاف الله بيها ولا ببناتها
- لا محشوم أخو شيخة مشهودتلك گول وفعل
- رحم الله والديك المهم سالفتنا أمنت بنيتها يمي وخلتها أمانة عندي ومشت والأمانة ليومك بالحفظ والصون وصارت بنيتنا ومعقود قرآنها على ابن اختي
ساعتها عمها من عارف بالصار دازلي نسيبو ودورية لباب بيتي وعيتهدد تاياخذ البنت من عندي وبيومها أبو علي واگف وصادو من الباب وما مخلي يدخل البيت
گول مشت السالفة ومر عليها چم يوم گايمين معطين بنتها الثانية ومخليها بمكان اختها ومزوجيها وطاردين امهن من البيت رايحة المرة شاردة للشمال تاتلم روحها
وهنا الحجي السالفة مر عليها بالشهرين إلا ما يجي خبر البنية التزوجت شاردة من يم زوجها وعمامها عيدورون عليها وأول واحد متسبعين وهادين عليه هي الأماية
رايحيلها للشقة وهادين عليها طاگينها ومهددينها تاطلع البنت لبالهم مهزومة عندها وضالين مراقبيها بالفوتة والطلعة شايلة روحها وجايتني للبيت لبغداد سولفتلي
گمت أخذتها ومشيت للغربية تاتضل يم نسابتها خاطر لا تطلع حجاية تمسني وتمسها تبقى حرمة غريبة عني وضلتها عندي بالبيت ما جانت راهمة جدام أهلي وناسي
گوم يالعم واخطف البنية حرمة ابن اختي من مدرستها وأخذها احبسها وعيهددني بيها وبيومها أبو علي وصدر الدين هم جان شاهد اجوا لبيت عمها وردوا البت منهم
ساعتها عطيتها چلمة ألگالها بنيتها الضايعة وأردها الها وعرضت عليها الزواج وجانت المرة قابلة بس العائق والواگف بوجهنا جانت سالفة بنتها الضايعة جنا مقررين بس نلگاها أعقد عليها تاتصير على ذمتي وبحمايتي
لحد ما انلگت البنية الضايعة وصارت هالسالفة كلها أتفاجئ بيها مخابرتني تبجي وعتگلي حابسيني عندهم وتايجبروها تتزوج حماها واهي ما راضية وهاي كل ما بالموضوع الله وكيلك وهذا هو گاعد ويسمعني
باوعله السيد طول ميحجي الخال عمو سالم ساكت
گله :- سكوتك هذا ان دل على شيء فهو صحة كلام أبو مؤتمن
بنص كلامهم فايت زوج عمتي عليهم وگاعد بگعدتهم
سالم :- هذا الحجاه كله مالي غرض بيه ولا يهمني اني انطيته مجال يحجي براحته وما قاطعته رايد أشوفه وين يريد يوصل وحط ببالك كل هالحجي ما يشفعله هدته بسلاحه على بيتي بنص الليل
فدار :- ما جنت رايد السالفة توصل لهالمواصيل ساعة انا واگف عترادد ويَّ اختو بالباب ما عيرضى يطلع ويحاجيني مثل الأوادم انتَ الجبرتني أجر سلاحي
- هالحجي ميوكل خبز عندي والصار ما راح نسكت عليه والجاي عليه ما راح يصير المرة تبقى ام بناتنا سمعتها من سمعتنا واللي يمسها يمسنا ما نرضالها الغلط وفوتتها وگعدتها عندك بالغربية كلها غلط بغلط
ريحان :- شني بوية انتَ ما مربوط بديوان لو ما تعرف بالأصول جاي يگلك المرة اجت دخيلة عنده شاردة من جوركم عليها وعلى بنياتها
- لا خليت الأصول الكم هادين عالبيت تطالبون بأرملة أخوي وانتم لا تعودولها ولا تحلون عليها
-عجيب
گايم السيد گايله :- خوية هيج السالفة ما راح تخلص ولا راح نوصل لحل گوم بلا أمر عليك صيحلنا المرة حتى نسمع منها وناخذ رايها
14 تعليق
- مالكم حجي وياها الحجي هنا وياي اني المسؤول عنها
- عجييييب يابة غير هي المعنية بالسالفة ما يصير نخليها هامش ونقرر عنها صيحها رحمة لأبيك خلي توگف من ورى الباب حتى احجي وياها هالكلمتين
عمي متردد :- وشتريد تحاجيها ؟
- أشورها بالموضوع وأسمع منها إن جانت راضية على ضلتها عندك وزواجك منها هسه آخذ ربعي منا ونطلع من بيتك وحگك تاخذه مني مربع بعددد ؟
عمو سالم ضال محتار بس السيد ضاغط عليه بالحجي وجايله بأسلوب لين مخليه ما يگدر يعترض على كلامه
گام جوة للبيت وصاح على ماما واگفة من ورى الباب والسيد عايد عليها نفس الحجي الگاله لعمو
ماما جانت مخنوگة وصوت بجيها وجر النفس جان واضح حيل بصوتها وسائلها اذا راضية بزواجها من عمو
شدن :- لا راضية ولا رايدته جابني لهنا غصب عني وحابسني بوحدة من الغرف ميخليني أطلع واخته كل شوي تفوتلي تهددني إذا ما ترضين نذبحج ونموتج من شافوني قافلة تعرضلي للغرفة وتهجم عليَّ ضربني وساومني على شرفي بالحرام إذا ما قبلت بيه
وهي تحجي مختنگة وغاصة بالبجي
السيد ضال يردد :- لا حول ولا قوة الا بالله
گايم الخال :- لا يا غيرة سز
وقبل لا يتحرك من مكانه صاير بوجهه السيد وابنه ومانعينه يتقرب لعمو جارينه ومطلعيه ليبرة والوجوه تتفاور على عمو سالم
باقي السيد يحجي وياه
گله :- هاي احنا سمعنا المرة وبعد مالك كل حق تحجي وتسولف بيها لأنك جاي على باطل والسويته بهاي المسكينة وبناتها لا يرضي الله ولا رسوله ولا أهل بيته
خاف لبالك ما وراها أحد مو بس فدار من هاي الساعة أنا وعشيرتي المشاهدة كلنا بظهرها واللي يفكر يمسها بحجاية وحدة يجي ويگابل السادة حتى نشوفه ايدهم بالطك شلون ثگيلة ونرجعه لحجمه وأصله الحقيقي
- بطلعتها من هالبيت وياكم تكتب شهادة موتها بيدها
تيم الله :- أعلى ما بخيلك أركبو المرة مرتنا وتعود النا وبناتها بناتنا اليفكر يگرب صوبهن يگف ويواجهنا مو مرجلتو بس عيهدد بالحجي ويتسبع عالحريم
- نتبرى منها ومن بناتها إذا طلعت
- ديلا عاد انتوا شلون عزوة وسند ينشد بيكم الظهر ويخافن لا يخسرنكم رووح سبع حجارات گفاكم
ستار :- خالهن إذا عرف بالصار ما راح يعدي الموضوع على خير
- وينو هذا خالهن نفسو أبو سليمانية الطاردلو بنية بعز الليل بدال ما يعززها ويكرمها ببيتو بين ما تجي امها وتاخذ الأمانة منو
صدر الدين :- اوگف بلة اوگف أبو علي يابة الله بالخير عليك طلع تليفونك وخابرلنا خال البنات ونسمع رايه
- كفيلك علي واحد بلا غيرة مسيب عرضو بالشارع تريدو يحجيلك بالحك والباطل واهو الباطل بكبرو
- ميخالف حتى بعد لا تصير الهم حجة عالمرة وبناتها شگلك طالعة عن شور أخوها ومخليته أطرش بزفة
گايم عمو ومخابر على خالو فؤاد ومبلغه بالصار
خالو گلهم :- اختي بساعة التطلع من بيت عيالها وياكم تحسب حسابها بعد لا الها اخو اسمه فؤاد ولا هي اختي ولا معترف بيها لا هي ولا بناتها
ساد التليفون گايليله :- بعد مالكم عذر المرة شورها بيدها مو بيدك ولا بيد أخوها وهي المسؤولة من نفسها تتزوج اللي تريده وبرضاتها محد اله سلطة عليها
عمو متخبل شلون كلهم گايمين عليه وما منطينه مجال يحجي ضال بس يصيح :- اطلعوا من بيييييييتي
السيد ريحان :- لا گبلها توگف وتشهد عالعقد حالك من حال الواگفين حتى لا باجر عگبة يجي واحد منكم وينكر زواجهم
وما طالعين من البيت ومخلين المومن نفسه اللي جايبينه حتى يعقد عود لماما وعمو سالم
مگعدينه ومخليه يعقد لماما والخال فدار بحظور السادة وعمو تيم وعمو سالم وزوج عمتي ستار واگفين
من گايمين حتى يطلعون صايحين على ماما من ورى الباب حتى تطلع وراهم وعمو واگف بنص الأستقبال
صاح :- يا شدن ويا بناتها دمهن انهدر ويييييين ما أشوفهن أذبحهن وأشمرهن بخرابة تنهش بيهن الچلاب
تيم الله :- شاربي مو علي ومالي گعدة بنص زلم إذا خليتك تجيس شعرة من راسهن وأعلمك شلون يصير الحجي
حاجين هالحجي ودايرين وجوهم وطالعين ليبرة الشارع جان متروس يغص ويبلع زلم الغربية واصلين وسادين الشارع بسياراتهم على طوله
واگف الخال فدار بالباب منتظرها تطلع جايتله الوجه أحمر والخراميش تارسة وجها الشعر مكفش ملابسها مشگگة حالتها حالة والعيون مورمة من البجي
أول ما شايفها متضايق وضال يستغفر تقرب عليها
فدار :- يول انتِ عيونج أبچيها ؟
نازلة دموعها :- هدروا دمي ودم بناتي فدار
- نعلعلة شرفو لابو الخلفو البوخة عيهدد أحط رجلي بيه ادوسو دوس ببسطالي وأنعل ابوه لابو منين ما طلع
أشرلها :- كافي اسكتي بطلي بجي عاد تانطلع
ماسحة دموعها وجاي تمشي تريد تطلع لازمها ومرجعها لمكانها وهو يباوعلها من فوك ليجوة
گلها :- هين هيين حدج وين رايحة
شدن :- نروح غير ؟
- وتردين تطلعين بحالج هذا ؟ يول شايفة روحج بالمراية الشارع متروس زلام أطلعج هيج جدامهم كل عگلج انتِ
انتبهت لروحها ملابسها مشگگة من الجر والسحل جزء من مقدمة صدرها ورگبتها طالع ومكشوف
صايح على ابنه مؤتمن يجيبله غترة من الولد وگله يطبك سيارتهم گبال الباب راح جابله واجه
ووگف خلاها على راسها ويلفها على جسمها يستر الطالع منه ويتأفأف ما عاجبه حالها
گلها :- اگضبيها من هين لا تفلتيها تطلع مصيبة الله اكبر
جابوله السيارة گايدها وطالعين گبل من الباب مال بيت لباب السيارة والدنيا جانت ظلمة ما مبين شي
وگفوا السيد وجماعته يتباركوله وهو ضل واگف يحجي وياهم وهم واگفين گايم جم واحد من الولد من ضمنهم شبير ومآب جارين السلاح ورامين ليفوك
مصيحين الكبار عليهم وعمو تيم استلمهم رزايل شلون يرمون بنص الليل والناس نايمة والمنطقة سكنية
سلموا السادة وطلعوا بسياراتهم ضل بس صدر الدين
اندار على عمو تيم ضحكله تحاضنوا وباركله عالعقد
وضال موصيه :- أبو علي بوجهك لشقة هذا نسيبها شوفلي شنو فلمو
تيم :- هسه ؟
- اي هسه شوفلي بلة شيريد وشعندو بالبنية اذا زواجهم باطل بباطل واذا تگدر جيبها وتعال
هز راسه :- هذا هو يالچبير تأمر اعتبرو صار
- لا تروح وحدك ..
حجاها وباوع لصدر الدين اللي واگف يسمعلهم
صدر الدين :- رايح وياه أبو مؤتمن لا يضل بالك
- ما تگصرون
تسالموا وطلع عمو تيم وصدر الدين بسيارة وحدة والخال اخذ ماما وصعد سيارته وتحرك وأشر للولد يطلعون وياه بسياراتهم عايفين وراهم نفوس حاقدة
نفوس غدارة ما تنسى ولا يهمها حجي الكبار ..
من طالعين بالطريق مندار لماما الشهگة بصدرها
گلها :- ولج وتالي كافي ارحمي حالج ذبي حملج علي ولا تشيلين هم لأحد
- مو علي وكلام الله خليني طبني ألف مرض بس هذني شذنبهن ينهدر دمهن لسالم وأمثاله أخوي أعرفه ما بيه خير بس هن ليش يحضن بهيج أهل يتسابقون على كتلتهن هاليتامى خطيتهن برگبة منو
- انتِ وبناتج صرتن جوة جناحي اللي يفكر يوصلجن أردو لحضن أمو وأحسب الله ما خلقو كافي امسحي دموعج والله ما يهلي أشوفج بهالحال
- وبنتي فدار بنتي العفتها لا حول ولا قوة هناك مدري كتلها مدري موتها توسلت بيه بس حتى أشوفها مخلاني المجرم متحلفلها موت ضربني فدار وايده جانت ثگيلة بالضرب لعد هي جلدها الترف شلون راح يتحمل ضربته
- بنتج وكلت موضوعها عند تيم هو تكفل بأمرها ولا راح اگعد ولا يهدالي بال إلا بيوم ما أدحگها بحضنج
لزم الغترة اللي فلتت من جهة الصدر وسدها
5 تعليق
صاح :- كافي سگطتي عيونج وسگطيتني انا هم غطي مصيبة الله أكبر
ماشين لهناك وبنص الطريق مخابر عمو تيم عالخال
گله :- خالي وصلنا للعمارة ووگفنا الحارس يستفسر ومن گتلو بأسمو گال عافوا شقتهم ومسافرين منا
- شفت شقتهم ؟
- اي صعدنا ليفوك دگينا لحد ما ملينا محد طلع الظاهر صدك فارغة
ماما من سامعة هالكلام متهسترة
گالت لعمو فدار :- كذاب شوكت لحك يسافر بيها المغرب اني يمهم وگاعدة احجي وياه هذا الحارس واحد من جماعته ديكذب عليهم
رجع عمو فدار مسولف لتيم
گله :- أبو علي اگضبلي الحارس وخليه يذب الحجي اللي ببطنو
- ولو ما حجى شي ؟
- تصعدون للشقة تكسرون الباب وتفوتون ولو حظيت بالبنية تجيبها وتلحگني انا طالع بالمرة للغربية
- صدر الدين يگول أدبر دورية ؟ تاتصير فوتتنا بسبب
- أبد لا دورية ولا غيرو لتكبرون راسو تطبون للشقة واليفك حلگو خشوا بعينو وشوفوا شغلكم وياه
- هذا هو يجرالك
- أنتظر منك تليفون
سد الخط ومكملين طريقهم لشوي ورجع عمو خابره
تيم :- خالي الشقة طلعت صدك فارغة وحتى أثاثها ملموم كم غرض باقي هين
21 تعليق
- هاي شلون تاليها عجل وين رايحين ذول
- تريدني أراقبلك العمارة خاطر لو رد اگدر احظى بيه واحجي وياه
- لا ابوي ما تستاهل انتم هم تعبتوا اليوم على هالفرة رد لبيتي تلگى مآب هناك منتظرك والباجر من الصبح ارجع بالله للعمارة شوفلي الوضع شلونو
قبل ليسده گله :- شوفلي جنطة ام بان وياك ضالة هناك
- السودة ؟
اندار لماما :- جنطتج سودة ؟
هزت راسها گله :- اي هي
- غيرو محتاج شي
- سلامتك كفيت ووفيت انتَ والوياك
- لا تأمر ول يابا چم خال عدنا احنا
تسالموا ونهوا المكالمة ومسولف لماما الصار خلصت الطريق صافنة بالجامة وتتصفن والدمعة تلالي بعينها
موگف السيارة على جهة من الطريق ونازل عليها فاتح الباب من جهتها يشوفها وهي على حالها
دنك عليها :- ها ؟
هي مصدگت منتظرة بس واحد يحاجيها حتى تنفجر جارها لصدره حاضنها يحجي وياها وهي تبجي
شدن :- فدار گلبي ديوجعني عليها وكلام الله أحس نغزات بصدري تذبحني
- اسم الله على گلبج أمي وأبوي انتِ
32 تعليق
- خايفة فدار
- منين تخافين يمهرة وانا خيالچ ؟
- من كُلشي كُلشي صار يخوفني
- يولي مو عطيتج كلمة مو گتلج بعد انسي ذيج الصفحة واطويها ولت وانتهت انتِ باللة جاوبيني فد يوم انطيتج حجاية ونهرت بيها ؟ مو گتلج بنتج أمانة عندي وذيج هي گاعدة معززة مكرمة مو گتلج آخذج وأكسر خشمو اللي يفك حلگو ويحجي وأخذتج
- انتَ تعرف شنو بگلبي وناري عليمن شاعلة
- أدري والله أدري وحگج بنيتج وتهمين بيها وبأمرها حطي ببالج إن ما أخذتها منو بالحسنى آخذها بالقوة وأردها الج
لزمم وجهه مسح دموعها
گلها :- بسج عاد لهين گربنا نصل ماريد أحد يدحگج بهذا حالج ردي شدن الأعرفها وگومي لحيلج البجي ما يسوي شي يلا أبوي يلا اشوف شو
ساكتة وماسحة دموعها انطاها مَي شربت وغسل وجها
من وصلوا للغربية جانت دنيا الفجر موگف السيارة گدام بيته ماما معترضة
شدن :- شو لبيتك فدار
- عجل وين تردين ؟
- لا لا فدوة لگلبك رجعني يم بنتي هناك أريحلي
- يول انتِ حرمتي هساع يعني مكانج يمي بالبيت ترحين لغاد شتسوين
- الله يخليك لتجبرني بعدني ممتعودة عالوضع وبيتك ما أگعد بيه وصاحبته مموجودة الباجر يطلع حجي شگولك أول ما اجت فارة راسه وگالبته على مرته وماخذه منها الرجال والبيت
- شو انتِ متعرفين تحجين فارة راسو شنو عش انا أمشي بشور أحد بيتي هذا أگعد اللي يعجبني بيه محد الو كلمة علي
- لا مو هذا قصدي بس دا أگلك عالحجي اللي راح يطلع واني كُلش مو حمل لهاي اللغوة والقال والقلت خليني بس أرتاح هالكم يوم وأجر نفس وبعدين عود نسولف بگعدتي وين راح تصير
هاز راسه ومحاجي شي بس واضح جان متضايق
وصلوا لبيت عمو تيم على مسافة منهم واگف بالبوابة
نزل قبلها وراح لجهتها جانت بعدها گاعدة بالسيارة فاتحة الباب ورجليها للگاع ومدنگة
باوعلها :- ها شبلاها رجلج
رفعت راسها اله :- مو رجلي هذا حذائي أنشلع
42 تعليق
- يلا وصلنا هذا البيت
- لا عزة وأمشي حافية الگراج شيخلصه غير تنعدم رجلي
- شو خلي أشوفو
نزعته وانطته اله فالت مينمشي بيه شمره
شهگت :- عزة هاي ليش
- ميسوى خيولي
حجاها واندار عالسيارة فتح الجنطة الورى دور بيها شوي ورجعلها بيده شحاطه رجالية خلاها يم رجلها
باوعتله :- هاي منيلك
- مالتي يولي من أرد بالطريق بين بغداد والغربية أتضايك من الحذاء وألبس الشحاطة مخليها احتياط
لبستها :- حيل هاي شكبرها
- ميخالف كلها خطوتين
- عزة خاف واحد يشوفني لابستها شيگول
- يولي لا تسودنيني هذا هو البيت عتفيكين براسي
رفعت حاجبها :- النوب اني طلعت أفيك
ضحك ودار وجهه ردت :- اي اضحك اضحك
- ومحمد حتى نغوصتج وتعليقاتج على كل حاجة مشتاگلها
ابتسمت سكتت شوي وسألته
- فدار راح تشهر زواجنا مو ؟
- هو انشهر من حالو زلامنا كلها درت منا لباجر ما تهجسين الا البيت مگلوب گلاب ومليان ناس
مد ايده يمررها على خدها :- ولو جان المفروض هالمرة أمشيلج مشية من الغربية وأجيبج هين لابسة الأبيض
ضحكت :- عزة لا يا فدوة لگلبك يا أبيض بحال أبيض اني هسه
فتح عيونه :- والله أحجي صدك عش هواي عليج قابل لو متستاهلين ؟
سكتت وهي تباوعله مدنك عليها كمل على كلامه
- بالقرآن عمري كلو ما طرت علي بمثل سحبة هالعيون
باوعت داير مدايرهم
- يا فدار وكت هالحجي هسه اليشوفنا شيگول
- هم صدك هذا الحجي وكتو ورى ١٢ من ينسد الباب
- والنبي حجيك صاير مدري شلونه
- شعمل يولي رديت أراهق من وراج وانا ولدي بطولي
- حلوة هاي كله من وراي
ضحك ومادلها ايده :- دگومي گومي
ساد السيارة وفايتين جوة يمشون ايدها بأيده صاير بوجهم شبير واگفلهم بالباب
شبير :- يابا شنو أخذتولكم غفوة بنص الطريق صار ساعة متاني وييين جنتوا
34 تعليق
- يول تعال عش متاخذلك راشدي
- بنفسي والله بس عندي أخلاق ما راح أسويها
- لا والله
- وداعتك
- أحرجتني بأخلاقك
- أخجلك بأخلاقي صدك جذب
باوع لماما :- عالخير شدونة هسع باجيتي فعل ولسان
- شدونة شنو احجي عدل
- اهووو گام يبيعهن علينا گدام مرتو وشوفوني عود انا أخوف وعندي كلمة
مباوع لماما :- شو ناوشيني الشحاطة تالعبها على جلدو
شدن :- يشاقة وياك شبيك متتحمل شقة
- مو بلة ؟
31 تعليق
- هسع هو شعندو واگف هالوگفة متفوت جوة
- عمتي سادة علي الباب ما عتخليني أفوت
- يا ليش ؟
- هي يحتاجلها ليش إذا ما طلع ذابلو وحدة من مالاتو عليها ومضوجها انا ما أفتهم
- ظلمتني خالي لأن فقير هيج تحجي
- وينها هسه هي گاعدة ؟
- گاعدة عتفتر مثل بزون المطابخ لهساع شعندها ما أدري
- ولك غير وكت صلاة الناس عتصلي
- لا خالي هي حتى من أفز بالليل بالوحدة بالثنتين تلگاها عتفرفر بالبيت متدري شتسوي تذبلنا سحورة مدري عتحظر جنية هي ومبخرتها
النوب كلما أدحگها ألگاها گاعدة أدري شوكت تنام والله خبلتني وتگعد الصبح بيها طاقة ونشاط البيت كلو مو مرة دهيرة عود مثل العندي الصبح انا وياها بالدفرات تاشلعها لدوامها
- نورجان لو تگعدها على غير شي تفز گبلك بس مدام السالفة بيها مدرسة ودوام أيس
- هو انا غاسل ايدي منها
فدار :- دخابرلنا على شيخة گلها خالي وحرمتو بالباب
مخابر شبير على عمة شيخة جاية بسرعة فاتحتلهم الباب مسلمة عالخال وماما ما طب للبيت باوعلها
- انا رايح للبيت بعد اخذي راحتج انتِ
- ضل هين نام خالي
- لا يابا أروح اسبح أبدل ملابسي من الصبح على هالوگفة هاي رجلي خيوط صارن
- سودة عليَّ بذيج المرة ولا بيك
24 تعليق
- دنچب
مسلم عليهم وطالع لسيارته ورايح لبيته فاتوا ليجوة سمعت صوتهم واني فوك نزلت أركض عالدرج
شفتها گبالي شمرت روحي بحضنها باوعتلها وضعها غريب هادئة وتبتسم وتسولف ويَّ عمة بس حالها يگول غير شي الوجه والملابس والغترة العلى اكتافها
شيخة :- اخذي امج عمة تعبانة رادة من طريق طويل
رحنا اني وياها للغرفة وهي تسألني عن أحوالي واني أجاوبها عبالك دتتهرب مني متنطي مجال اني أحجي
وگفت دتاخذ ملابس صرت وراها
نورجان :- ماما ..
اندارتلي :- گولي أمي
وقبل لا أحجي رجعت اندارت :- أگولج صدك تراكي السمائي العريض وينه شگد دورته مدا ألگاه
مشيت يمها وطلعته من الجنطة جان گدام عينها
- أريد أحجي وياج ماما
- مو وكتها نورجان ميتة تعب مييييتة بعدين عود
أخذت ملابسها وطلعت من الغرفة وعافتني طلعت وراها اجاني صوت شبير وعمة شيخة من غرفتها
211 تعليق
شيخة :- ورد عقد عليها نوبة اللخ ؟
وهو يگلها :- عقد ودحگيه الگاع ما سايعتو
- خالك ظنتي عاشك
- عاشك وواگع چفي على وجهو من يوم ما طلگها وهو يباوع لكل شبر بالبيت ضايج ومقهور حتى چز گلبو من الزواج وبطل عادتو القديمة يگوم ويگعد شگالت شدن وشعملت شدن مكالمة وحدة يروحلها يركض
- يا يمة الله يهديه ويسعدو عجل احنا شنريد منو غير تايستقر ويجوز من العادة الغبرة ذيج
- لا تخافين اجت الراح تخليه يجوز من كل أطباعو القديمة واستلمي المصايب والمشاكل الراح تصير من تعرف فرحة بالصار عتگوم الدنيا وما تگعدها
- هي الخسرت زلمتها بيدها من سوالفها وخلتو يشيل ويگعد لغاد منها ومو جديدة عليها الشغلة تعرف بيه وبزواجاتو عليمن مگومة الدنيا
- تدري بزواجاتو مؤقتة وسالفة وكت ويطلك ويرد بس هسع اجت الراح تگاسمها العيشة بالبيت والرجال والمال والحال وعاد هي منا شلون تحب شدن وبنتها
عفتهم يحجون ورجعت للغرفة أهز برجلي ممفتهمة شي من اللي ديصير واسئلة هواي جانت براسي
بان ليش مجابوها وياهم ؟
وعمو فدار ليش رجع تزوج ماما ؟
وشبير وعمة ليش هيج متحذرين من ردة فعل فرحة ؟
فزيت من صفنتي على صوت الباب وهي تفوت المنشفة على راسها شافتني تفاجأت
گالت :- بعدج هنا عبالي رحتي
وگفت عالمراية تنشف بشعرها
نورجان :- ماما ليش رجعتوا عقدتوا انتِ وعمو فدار ؟
اندارتلي بنص التفاته :- شبير گلج
- لأ بس سمعتهم ديحجون هو وعمة شيخة
عافت من ايدها واجتني گعدت يمي باوعتلي وجرت حسرة طويلة وبدت تسولفلي الصار وياهم هناك
طول ما هي تحجي دموعي مسكتت لزمت ايدي
- ما فد يوم أخذت قرار إذا ما جان بيه مصلحتجن فوك مصلحتي اني أدري سويت هواي أغلاط ودا أتعاقب عليهن وحدة وحدة وأولهن من أخذتج بس انتِ من بيت عمج ودرت وجهي عن اختج وهاي شوفة عينج
دا أعض أصابيع الندم وراها وأركضلها بأدي ورجلي رايدة بس شوفتها مو غير شي وحرموني منها خويت اني نورجان بعد مالي أحد ماما غيرجن انتن وفدار
من بعد الله أباوع ألكم محد الي أخوي ابن امي وابوي اتبرى مني بساعة مجانوا الغربة يفازعولي ومحترگين علي هو ما هزته غيرته ولا حركته ولو شعره
لتلوميني على زواجي من فدار هو الوحيد الجان واگف وياي بكل ساعة احتاجيته وطلبته بيها لا قصر بفلوس ولا بفعل ولا حتى بالكلام بس صوته صار ينطيني الأمان
مسحت دموعي :- وبان ماما ؟
- بان الها يوم وترجعلنا وننجمع مثل قبل وهاليوم مراح يطول ان شاء الله كلها حسبة كم يوم وأجيبها يمج
حضنتها :- حتضلين يمي ومتعوفيني بعد
- أبد والله بعد وين متندارين تلگيني گبالج
عفتها ترتاح جانت تعبانة مردت أزيد عليها صعدت بوجهي لغرفتي مديت راسي فارغة محد بيها طبيت
وانداريت دا أسد الباب نكزني من ورى ظهري بايده
جفلت وسديت عيوني ايدي على صدري انداريتله
- صدك تحجي شُبيررررر گلبي اجه يوگف من الخوف
شبير :- يا يابا يا بوية
- لتحجي وياي زعلانة
حجيتها ومشيت عنه دايرة وجهي گعدت عالجرباية
اجاني :- وعش يابا زعلان علينا الأصفر
- شلون تخليهم يتزوجون واني مموجودة النوب كلها تدري الا اني عيب عليكم ترى اني گرايب العروسة
عقد حاجبه :- ياهم ولج ؟
- خالك وماما غير
غم گصته :- يولي حتى انا ما لحگت عالعقد وصلت بفقرة الكيك مال هي توكلو ويوكلها وايدهم ترجف
- عزة والنوب جايبين كيك شو ماما مگالتلي
- هذا خالي گلها لتحجين شي لنورجان
- ليش عود
- ما أدري هو هيج خبيث
ضليت ساكتة أحس اكو شي ضامينه عليَّ هو وماما مدا يحجونه تضايقت حيل وبين على وجهي
گعد گبالي :- شبلاج يولي صدك زعلانة عالكيك ؟ باجر أجيبلج معمل الكيك بكبرو لهين
- أحسكم ضامين شي عني ومدا ترضون تگولون
ضل ساكت ويباوعلي گام صفك ايد بأيد
- والله عرفتج راح تحسين بالموضوع وما تفوتج
گمتله بسرعة :- عليك النبي گولي شصاير
گال :- امج وخالي مو بس كيك حتى عصاير شربناهم هناك واجينا وشگد رگصنا يـــا علي خوب مآب ومؤتمن واگعين بالنص تايهزون فرحانين لأبوهم خطية
بوزت بوجهه وزادت الطنگورة عندي
- والنبي دتضحك عليَّ
ضحك بصوت عالي درت وجهي منه مچتفة ايدي لصدري جرني من ايدي حاوطني وهو يضحك
باوع لعيوني :- يول أموت على البوز هذا من تمدينو
- لتضحك كافي اسكت
- هاه أسكت ؟
- اي
- عبالي أسولفلج شلون هدينا على عمج ورجل عمتج بالهمر
باوعتله فاتحة عيوني :- گول والنبي ؟
- وحك .. وحك ..
يحجي ويباوع بالغرفة يدور شي يحلف بيه
گال :- وحك ذيج الشاحنة دحگيها
- بس ماما گالت بس عمو فدار رمى
- جذب متريد تخوفج ضامة عليج بلاوي تعاي أسولفلج
طفى الأضوية جرني من ايدي للجرباية مدد وجرني لحضنه خلى راسي على صدره وصار يسولفلي
ساعة يضحكني ساعة أضوج منه لأن أدري بيه ديكذب بس غير اندمجت وياه بالساعتين وهو يسولفلي
شبير :- بالعقد كلها ضايجة ومكدرة شغلتلهم سارية حتى خالي والسيد خليتهم يهزون طشيتلهم چكليت وعلگتها بالهلاهل وأباوعلج لمكان خالي فارغ بس امج گاعدة
- يا وين راح
- لگيتو بالگاع تايلم چكليت
- لتكذب ماما مگلتلي طاشين چُكليت
- متفقين هي وخالي تاما تگليلها عطيني منو بس انا ضلت ببالي شغلة وحدة مخوفتني
باوعتله :- شنو
- هذا الشيخ العقدلهم مبين عفطي من جماعة عمج گتلهم تعالوا انا أعقدلكم مكانو ما ردو وخايف لا يطلع العقد باطل
- ليش انتَ تعرف تعقد ؟
- باع هاي أبوي وأمي منو العقدلهم غير انا
ضحكت حطيت ايدي على حلگي بسرعة باوعلي
گال :- يول شو تضحكين شنو ما مصدگة ؟
- هسه اني شگلت بس انتَ اسلوبك يضحكني من تحجي
- يعني اني مضحك ؟
- عزة والنبي لا مگلت هيج
هز راسه ومد جسمه للميز :- هينة هينة هسع أخابرلج مآب وهو يگلج
- عزة شُبير شوف الساعة خاف نايم
- گاعد معليج
حجاها وهو يگلب بتليفونه طلع رقم مآب داس اتصال صار يرن وفتح السبيكر لحظات واجانا صوته نايم
گال :- ألـو
- مآب سولف للحرمة بشرفك شلون طبينالهم انا وياك بالهمر وخالي وتيم گضبونا ما خلونا نضرب
تيم الله :- دنكتم ابن السايب الساعة بالـخمسـ......
بعده ممكمل سد الخط بوجهه خليت ايدي سادة حلگي وأباوعله ساكت رجع التليفون وخلى راسي على صدره
گال :- كافي نامي يولي دحگي الساعة شكثر تسولفين
باوعت للساعة وألگاها ستة إلا ربع گمزت گمزة فز وياي
- شوف الساعة ولك شُبيررر شلون راح أداوم واني منايمة شلحك أنام بهالساعة مراح أشبع نوم
- خرب عمج على هاي خوفتيني لبالي شي
حصرتني البجية وأحس ضيقة صارت بصدري انتبهلي
گال :- شبلاج يولي انگلب حالج
- شلون راح أداوم
- طز بالدوام صدك جذب ضلي اليوم لتداومين واشبعي نوم حبيبتي
فزيت بسرعة :- عليك النبي ؟
- والله شنو فد شي يعني كلشي ولا نومتج تخرب
رجعت راسي مبتسمة :- همزين لعد عمو تيم ببغداد لو هنا جان مخلاني وضل يصيح لأن راح أغيب
- تاتعرفين انا زوج مثالي لو تسجدين صبح ومسا ما تلگين رجل مثلي
رفعت نفسي بسته بخده :- أحبك
- يا يابا يا بوية عناد بتيم حتى باجر غيبي
فتحت عيوني :- گول والله ؟
- وداعة هالعيون الصفر
طرت من الفرح وغلبنا النعاس اثنينا ونمنا بيومها وضوة الصبح جان طالع گعدنا بنفس اليوم قريب لصلاة الظهر
گمت گوة أمط بجسمي وأجر بروحي جر للحمام حتى أسبح جنت بعدني مشبعانة نوم سبحت وترتبت ونزلت
واني نازلة الدرج صارت بوجهي در صبحت عليها واستغربت هذا مو وكت حلتها شوكت رجعت
سألتها :- هاي شوكت رجعتي من الدوام لو اليوم ممداومة ؟
بعدها محاجية وفات علي هم بملابس البيت
گتله :- يا هذا انتَ هم ممداوم شنو كلكم غايبين اليوم
علي خيبر :- دواميش يولي اليوم غير جمعة
صفنت بوجهه :- گول والله ؟
هز ايده ومشى تعداني ودر تضحك
گالت :- شبلاج متيهة شو اليوم
- استغفر الله هذا شبيـ.......
شفت ماما تطلع من الغرفة سكتت مكملت وركضت الها
ابتسمت :- صباح الخير
شدن :- صباح النور ماماتي شنو سر هالأبتسامة شكو
- شبير گلي عمو فدار راح يسوي عزيمة وحفلة ببيته ويعزم گرايبهم حتى الكل يصير عنده علم بزواجكم
صفنت بوجهي :- بس شو مگلي
در الزهراء :- عمة بعدهم يحجون بالسالفة ما مجهزين شي المباركين عيجونو للبيت صبحو عندو يريد يسوي هوسة وحدة تايفض الموضوع لا كل يوم واحد جاي
- شنو شو بسرعة شوكت عرفوا شوكت لحگوا يجوون
- هاي ناسنا ما تضل سالفة مضمومة عندهم وخاصة لو جانت تخص واحد مثل الخال فدار وبمكانتو
- وينه هو هسه ألگاه ببيته ؟
- لا ذاك هو واگف بالحديقة تايحجي ويَّ عمو سلام وعمو شبير
ابتسمت لـدر گرصتها من خدها ومشت انتبهت لـدر صفنت على حركتها أحسها تفاجأت وضلت عيونها وراها
نورجان :- شبيج
انتبهتلي بسرعة :- شنو شبيـة
- أشوفج صفنتي
هزت راسها :- لا هيج ماكو شي
صدك جان كلام در عمو فدار كل شوي مخابره واحد يبارك لو الخطار اللي لزمت بيته وجايين يفتهمون السالفة وشلون هيج بسرعة ياخذ الثانية وما گايل لأحد
واصل الخبر لمرته الأولى وبساعة اللي عرفت جايبينها اخوتها وجايين للخال يطلبون منه يسامحها ويرجعها للبيت بعد مجانوا ميبسين راسهم إلا هو يجي ياخذها
اخوة فرحة وولدها كلهم يلوموها من ايدج وانتِ صوجج ضيعتيه وراح دور غيرج وگايليها حقه لو تزوج شرع الله هذا ومحد واگف وياها
بس هي ما ساكتة وحرگتها صايرة بگلبها وخاصة من عرفت الماخذها شدن البغدادية مو غير وحدة
راجعة على مرة مآب مصيحة عليها ولازمتها كاتلتها مگطعتها وتگلها كله من وراج انتِ الفتنتي عليَّ يمه وخليتيه يطردني من البيت
مرة مؤتمن گوة جارتها من ايدها ولابسة وجايبة البنية لشيخة لبيت عمو تيم وحجتلنا السالفة وعيني جانت على مرة مآب شلون تبجي وتشهك مطلعلها صوت
ماما حيل انقهرت عليها عمو فدار مجان بالبيت مسكتت گامت أخذت تليفوني وخابرته حجتله الصار وهو گلها أرد للبيت وانا أتصرف خلي البنية عندكم هسع وبالليل أجي آخذها
صار الليل واجانا عمو گعد بالصالة يمه شيخة وماما يسولفون بالعزيمة اللي راح يسووها بالأحد بس منتظرينه يرجع باجر وعگبة ياخذ إجازة ويرجع لهنا
طول ما هو گاعد ويحجي جان مبين عليه ضايج الوجه محتقن طلع قبلها رايح للبيت ومتعارك هو ومرته الأولى
گامت عمة شيخة وأشرتلي بيدها حتى أگوم وياها طلعنا اثنينا وضلوا لوحدهم يحجون
رحت يم البنات لشوي وصاحوا على هاجر مرة مآب
راحت للصالة واني وراها وگفت بالباب صاحلها عمو فدار وأشرلها تروحله وهي مستحية باس راسها وتعذر منها عالسوته مرته
گلها :- حگج يردلج وعلى هالشارب
هاجر :- لا عمو عادي ما مغتاضة منكم انتوا حسبة أهلي
لزمتها ماما من ورى خلت ايدها على أكتافها
شدن :- ترى لا عبالك بهالحجي وبوسة الراس تقشمرها بيها نريد شي أقوى
أبتسم :- تأمرني أمر بس تگول وتأشر ويجرالها التريدو
- لا عمو ماريد شي
ردتها ماما :- دسكتي انتِ أستغل الموقف يحظي مثل العندي شبيجن فاهيات بسرعة ينضحك عليجن
باوعت لعمو :- شوف عيني أبو مؤتمن نريد فد سفرة لو طلعة مرتبة لعيون هالحلوة مراضاة الها وكون طلعة قوية تسوى
فدار :- هذا هو عجل بس يكملن نورجان ودر إمتحانات آخذكم ونطلع كل احنا للمزرعة يومين تلاثة هناك
باوعتلها ماما :- ها راضية ؟
ابتسمت وهزت راسها أشرلها تروح تلبس حتى ياخذها
راحت تركض وأباوع لعمو فدار حاله انگلب عن قبل شوي الوجه صار يضحك وعينه ميشيلها من ماما
قبل لا يطلع گلها :- وام البنات ما عتطلبنا شي ؟
- سلامتك عيوني
دنك باس خدها
نورجان :- عزززززة
باوعولي اثنينهم بسرعة واني واگفة بالباب
صاح :- الغبرة اهو هيج هبطتينا لبالي شكو
- عمو عيب والله ميصير تبوسها واني واگفة
- وشعندج هين عتراقبين ولج ؟
- أغار عليها
- بعد عايز أترخص منج گبل لا ألزمها دمشي لج مزعط جاية شادة روحها علي تالي وكت
ضجت :- عمو لتحجي هيج والنبي ترى أبجي
مشيت يمهم وخرت ايده من ايدها ولزمتها حيل
كملت :- ورجاءً بعد لتلزمها گدامي وتبوسها هيج شوي إحترام لمشاعري
- شلون راح أطر راسها حدر الگاع
حضنتني ماما :- لا فدار فدوة لعينك لتحجي وياها هيج ترى ممتعودة هي على هالنبرة صدك تنقهر وتتمرض
- راح تسودنني انتن بالقرآن
صاح لهاجر سلم وأخذ چنته وراحوا لبيتهم
باوعتلها :- أحسه باگج مني
- شبايگني ولج بعده مشايف شي مني الرجال شو اني بصفحة وهو بصفحة مگابلتج وگاعدة
- ماريد تعوفيني ماما ماريد أخسرج مرة ثانية وتبتعدين عني حتى لو لبيت عمو فدار مترحين لهناك تجين وياي لبيتنا اني وشبير
- على طاري بيتكم وين وصل كمله لا
خليت گذلتي ورى اذني :- اي مضل بس الأثاث ومدا يقبل أروح اختاره وياه
- ليش
- يگول إلا تلبسين حجاب واني مقبلت وأريد أروح
- هي كم ساعة تحمليها البسي وروحي اختاري اللي يعجبج
- ميقبل ماما يگول بعد ماكو طلعة بدون حجاب ديخنگني ماريده يجبرني على شي اني مرايدته ومقانعة بيه
تنهدت :- أضرب من العندي البارحة خلصها غطي الشسمو ضمي المصيبة
- خلي نشرد منهم ونروح لبان ناخذها من زوجها وننهزم
- يحسرتي وينها هي بان لاگيتها اني ومرايحتلها
رجعت باوعتلي :- وبشرفج نورجان بعد أفكارج العظيمة هاي ضميها لوكت الشدة لأن كُلش مو وكتها هسه
بالليل راجع عمو فدار لبغداد والسبت الصبح ماخذ عمو تيم ومندلين عنوان بيت شاكر عم عبد الإله الجبير
مستقبلهم وگاعدين يحجون وياه بموضوع بان وليش عبد حابسها وخلي يطلك إذا ميرديها ونرجعها لأمها
شاكر :- الموضوع يرجع لعبد الإله هو يقرر يطلك لو لا وما أعتقد ناوي يسويها لأن البنية رايدها ومكمل وياها وهذا الحجي حاجيه احنا من زمان ومتفقين ويَّ أهلها
فدار :- امها مفرفحة عليها بس طالبة شوفتها متريد شي
- مسافرين خلي يرجعون بالسلامة وانطيه خبر
عمو تيم ما مقتنع بالكلام گله
تيم :- واتفاقيش هذا البينكم وبين أهلها
- سالفة قديمة من زمان وما دامك زوج امها يجوز عندك علم بيها المهم جانت اختها المقصودة بهالزواج ورايديها لأبنا بس عمتها مبدلة بينهن لأنهن توم وصارت قسمتها بعد
فدار :- أعرف هالحجي وعندي علم بيه بس الإتفاق ماليش غير أفتهم هيج مهم حتى ما عتگدرون تنهوه وتسدون السالفة إلا بالزواج ؟
گايم شاكر حاجيلهم الحادثة الصارتلي واني صغيرة ومسميني الهم بالأسم وگايللهم جنا منتظرين البنية بس تكبر ياخذها عبد الكريم بس هذا بالسجن وعمو وعمتي ضاغطين عليهم على موضوعي
گايمين مخلين عبد الإله بدال أخوه وگايليله يعقد عليَّ وينهي الموضوع وبوكتها صارت شردتنا اني وماما وضلت بان وصارت هي بمكاني
شاكر من حاجيلهم ضالين واحد يباوع بوجه الثاني وطالعين منهم يضربون أخماس بأسداس
عمو فدار مخابر ماما گلها :- جايج بطريقي للغربية عندي حجي طويل وياج يـأم النثاية
... 《 شهربان 》 ...
گاعدة بالغرفة لوحدي أصفن بحيطانها عيوني مقفلة صاير بيهم غواش والرؤية مواضحة عندي
منايمة صار كم يوم والحبوب مگطوعة مني ومنا بجي وقهر وأطحن بروحي على ماما والصار وياها
لم غراض الشقة وأخذني بنفس اليوم وگعدنا بعمارة ثانية جانت بغير منطقة وغير مكان سكننا
الشقة الگعدنا بيها جانت أكبر من القديمة بس ما تغير عليَّ شي شالني وشمرني بغرفة وقفل الباب من برة
الغرفة فارغة مبيها أثاث بس قنفة ومراية معلگة
كلما ينفتح باب الشقة أفز وأضل أحسب الدقايق هسه يفوت ويكتلني هسه يجيني ويخلي طلقة براسي
وألف فكرة وفكرة اجت براسي طول هاليومين
بس جان ساكت وسكوته مخوفني أكثر أدري بيه ضاملي ضمة وصلت مرحلة تمنيت يجي ويكتلني
بس حتى أخلص من هالتفكير والخوف اللي عيشني بيه أحسن عندي من ما أضل أفكر شنو راح يسويلي
الدنيا جانت نص الليل الغرفة هادئة بشكل مخيف بس صوت أنفاسي مسموع سمعت صوت باب الشقة ينفتح
وأصواتهم وهم يفوتون ويحجون هو وأرقم ما أميز شنو الكلام بس أسمعهم وهو جان صوته عالي بصياح
سمعت صوت طگة المفتاح جفلت وعيني صارت عالباب
انفتح وشفتهم اثنينهم واگفين گدامي صار يتقدملي
رجعت ليورى لطشت روحي بالحايط اجاني لگفني بسرعة لزم شعري بأيد والأيد الثاني لازمه بيده
عبد الإله :- جوازج الأصلي وين هذا منيلج ؟
- ما أدري
صفگني راشدي صرخت وگعت للگاع رجع رفعني من شعري دموعي گامت تصب وأباوع لعيونه وهو خازرني
- بانو هذا الجواز منيلج لتخليني أعيد الحجي مرتين
- هو انطانياه
شد على شعري أكثر :- منو هو ؟
- مراد
من گلت اسمه رجع جابني براشدي اختل توازني لزمني بسرعة قبل لا أوگع خلى وجهي لوجهه ضاغط فكي
- شلون دبرهن وجوازج ذاك وينه
- ما أدري والله ما أدررررري هو من رحتله أخذ الجواز مني وبعد يومين انطاني هذا هو والجنسية
- جنسيتج الأصلية عندي هاي شلون طلعها ؟
- ما أعرف والله هو جان مجهز كُلشي بس رحتله گال راح نطلع لبيروت وانطاني هذولي
عافني وگعت للگاع رجعت ليورة لميت رجلي لصدري وهو واگف فوك راسي لازمهن يباوع بيهن
انطاهن لأرقم :- ها شگتلك
أرقم :- المواليد لاعب بيها
- اي لعد شلون يطلعها ابن القندرة مدبرها وراسملها من زمان هاي متطلع بيوم ويومين
باوعلي :- گومي لج
گمت وگفت شهگتي بصدري وأمسح بدموعي رجع جرني من شعري لزمت ايده بسرعة شعري تهلس
- مراد شراد منج
ضليت ساكتة لازمة بأيده ميتة وجع
صاح :- احججججججي ولج
انخلست من صوته وحجيت أتوسله
- راح أحجي والله بس عوف شعري گاعد تأذيني
انطاني راشدي أقوى من القبلهن خلى أذني تصفر شمرني للگاع وگعد عالقنفة مدنك وايده على ركبه
- احجي يلا جاي أسمع
حجيتله على روحتي لمراد وشلون وصلتله عن طريق رقمه اللي عافلياه عالكارت بليلة الأمسية على الطاولة وعلى سفرتي لبيروت وشلون راد يستغلني حتى أراقبله عبد وأوصله معلومات عنه
شغلة وحدة مجبتله طاريها ميشيل والتدريب ..
من خلصت كلامي رفعت راسي باوعتله عينه متشكلة عليَّ نظراته جان بيها شك لكلامي أعرفه من تعابيره
ممقتنع ولا مصدگني نزع سترته وأشر لأرقم يطلع برة
طلع وسد الباب گام وراه قفله واندارلي
- مراد اليوسف بانو مو بلة ؟
صار يتقرب عليَّ نزلت دموعي
گتله :- والله هذا كل الصار
- شمدريني ما مستغلج مغتصبج لاعب بيج وجايتني بكل صلافة ترديني أصدگج ؟ على شردتج وطلعتج من الفندق لو سفرتج لغير دولة لو گعدتج يم مراد على يا وحدة منهن ترديني أبدي أحاسبج
- وروح بابا محد جايسني ولا أحد تقربلي بنـ......
بعدني أحجي ضربني على حلگي سكتني لزمت شفتي سادة عيوني تأذيت من الضربة ورجعت باوعتله
دنك خنگني :- مراد اليوسسسسسف ولج .. شاردة مني ومولية لمراد تحتمين بيه مننننننني .. اني تالي عمري وحدددددة زعطوطة مثلج تلعب عليَّ وتضحك اليسوى والميسوى على عببببببد .. ولججج شسسويلج گوليلي هم أكتلج مو ايدي تعبت من الضرب .. أكتتتتلج خلاص الموت أشوفه قليييييل بحقج .. ولجججج شسسسوي
يحجي وبين كل كلمة يضربني شبعني تكفخ وراشديات گد ما دخت حسيت راح يغمى عليَّ واوگع من طولي لوما هو لازمني مثبتني
نترني حيل من ايده وباوع لأيده بيها دم نزع قميصه مسحها واجاني ابتعدت بسرعة لزمني من ورى شعري ثبتني وصار يمسح الدم اللي ينزل من شفتي وخشمي
طلعت شهگة مني خزرني وأشرلي
عبد :- اششششش ولا نفس
دموعي صارت تنزل بسكتة وهو مكمل يمسح بالدم
باوع بعيني شمر القميص وجرني باسني من شفتي اني منا شفتي متجرحة وهو يعض بيها مثل الچلب أحس روحي طلعت من الوجع
مديت ايدي لوجهه خرمشته بأظافري دفعني وجابني براشدي لطشني بالگاع شالني من متني دفعني عالقنفة
تخبلت جاي أگوم رجع دفعني نومني وصار فوگاي دنك على رگبتي صريخ وعياط وبجي وتوسلاتي كلها ما هزن شعره منه ولا عطف لصوتي وهو يتوسله
مجانت علاقة حميمية بين زوجين بگد مجان إغتصاب إغتصاب للجسد وللمشاعر موتني وطفى روحي ..
گام مني يلبس بقميصه واني مشمورة عالقنفة ايدي بين رجلي جسمي كله يرجف ساكنة وممستوعبة اللي صار
أحس روحي بكابوس وأريد بس أگعد منه ..
دموعي متنزل سمعت صوت الباب وهو ينرگع متحركت من مكاني باقية على نفس وضعي جسمي مبية أحركه
ما أعرف شگد مر من الوكت ورجع الباب انفتح وفات عليَّ بسرعة جرني ورفع راسي خازرني حيل
شال أشرطة الحبوب بأيده
گال :- هاي من شوكت تاخذين مانع حمل واني مالي علم ؟
ضليت ساكتة أباوعله ملامحي باهتة ما بيهن روح من شاف حالي ووضعي ضربني وعافني طلع انزويت على روحي حاضنة نفسي رجفتي مگاعد تهدئ
دقايق ورجع فات وسد الباب بيده ملابس شمرهن بوجهي
صاح :- البسسسسي لج
مالي قابلية أحرك نفسي بس تعب جسمي من الضرب
لبستهن گوة عليَّ توني دخلت التيشيرت براسي شالني وجرني أخذني سحل من الغرفة للصالة شمرني بنصها
باوع لأرقم وصاحله :- جييييييب المكينة
صارت بس دموعي تصب وعيوني تتنقل بينهم بخوف وفزع اجه أرقم من الغرفة الثانية بيده المكينة
لزمني عبد قيد حركتي وأشرله يتقرب بأتجاهنا
تهسترت من شفته شغلها وقربها من راسي صار يحركها گمت أصرخ :- لا عببببببد فدددددددوة لا أبووووووس ايدك إلا شعري...
