رواية فصلية بديلة ( شموخ ) الجزء الثاني الفصل التاسع عشر 19 بقلم ام ملكوت

:-رجعت لبيتنه دخلت وانه روحي مهدوده الحيل سلمت على امي واولما كعدت اجت عيني على بان كتلهم عن وفاة ام #اوس وامي صارت تبجي وتنوح

عليهه بعد رفيقتهه من اولما تزوجت وانتقلت لهل بيت تروح وترجع عليهه .. باوعت لبان وكتلهه ان بحاجتهه وهوه حالته مزريه بهل وقت وبحاجه من

يسنده ويشيل همه ويطبطب على ضهره وماكو شخص مناسب لهل شي غيرهه هيه هزت راسهه

موافقه واجالي اتصال من اوس كمت بسرعه بره ورديت عليه اجالي صوته مخنوك وهوه يكول...

_خويه #راهب البيت اظلم ووحشه بلا ريحه امي 

_وين انت هسه

_كاعد بالحوش مايهون علي ادخل ياخويه روحي شارده من البيت قبل رجليه

_جايلك انه..

سمعته جر حسره شكت صدره سديت الاتصال ودخلت باوعت لبان وكتلهه...

.

.

:- بعدما اتصل عليه ماعرف منو لراهب طلع وانه بقيت حاضنه امي اصبر بيهه وابجي شويه ودخل راهب باوعلي وكال بتعب..

_راح اجيب اوس يبات يمنه هل كم يوم حضروله فراشه وغطاه بالديوان وحضروله غده تره ماماكل شي من الصبح

_انشاءالله خويه..

باوعلي وهز راسه بحيره اخذ سويج السياره وطلع من البيت كمت انه بعدما هديت امي طلعت مندر وبطانيه ومخدتين لان اعرفه مايكدر ينام على

مخده وحده تضل رقبته تاذي رحت فرشتهن وعطرت الديوان ورجعت اسويله غده وانه دموعي مانشفت شلونه هسه شلون حاله شصاير بروحه

حتى مايكدر ينام بيتهم شلون ياربي صبره دخيلك وقوي كلبه هوه يموت على امه ومتعود على وجودهه وياه بكل تفاصيل يومه وحياته شلون

هسه راح يكدر يكمل وحده الله يصبره ويقدرني انسي وجعه واخفف عنه مصيبته .. كلهه دقايق قبلما اكمل الغده صاروا بالبيت طليت من الشباك

واشوفه شلون سانده #راهب ويمشي كوه وهوه حاني ظهره لزمت كلبي ممرود عليه وبجيت بحركه اجت عبير حضنتني وصارت تمسد على راسي وانه احجي بصوت مبحوح..

_لج شوفي حاله عبير شوفي شصاير بي مو ذاك اوس ابو طول الحلو شلون هسه حاني ظهره وكوه يمشي مهدود الحيل 

_الله يعينه يروحي مو هين فقد الام والله مو هين الله يشد على كلبه ويقوي ادعيلهه بالرحمه وادعيله ربي يقوي كلبه

_انشاءالله ياربي انشاءالله 

_يله حبيبتي هسه مسحي دموعج واهدي حتى توديله الغده خطيه هسه ميت من الجوع تلكي وماله روح ياكل عل اقل بلكي من يحس بيج انتي سويتي الغده بيدج ياكل 

_اي راح اكمل واصبله راح اخذله الاكل اكيد جوعان

_يله حبيبتي انتي..

مسحت دموعي واخذت نفس وزفرته بقهر رحت طفيت النار عن المركه وصبيت الاكل بالصحون خليتهن بصينيه واخذتهه للديوان طكيت الباب

برجلي محد طلع عاد صحت بصوت مخنوك لراهب اجه فتح الباب واخذ الصينيه عني ودخل ابتعد عن ناضري راهب وصارت عيني بعين اوس باوعلي

بعتب يشكيلي ونزلت دموعي ورحت من يم الديوان ماتحملت وصرت ابجي سكته حتى لحد يسمعني شويه واجتلي رساله منه كاتب بيهه ..

💬محتاجج 

💬روحي انطيهه الك ويه حيلي لو ردتهه

💬امي يا بان عافتني وراحت ماتحمل تعوفيني انتي هم

💬ماعوفك والله ماعوفك وانه وياك وقريبه منك وهسه بنفس البيت وانشاءلله عن قريب اصير يمك وامسد على ضهرك اصبرك

💬ااااه يا بان صدري كاعد يحترك وانطفت الدنيا بعيني

💬 ادفع عمري لجل هل عين انه لا تسوي هيج بنفسك اوس خلي ايمانك بالله قوي وشد حيلك امك راحت لدار ومكان احسن من دار الدنيا وهناك بالجنه انشاءالله الملتقى

💬انشاءالله 

💬روح تغده اكلك لكمه تره سويته بيدي بس لخاطر تاكل

💬تسلم ايدج بس والله مالي نفس ولا الي عين اكل وانام وامي طامهه التراب

💬لخاطري اكل حتى لو بس لكمتين 

💬انشاءالله 

💬يله روح تغده وراح احضرلك الحمام بره حتى تسبح تمام

💬الله لا يحرمني منج

💬ولا يحرمني منك يارب..

ختم الرساله بقلب مكسور وطلع رحت انه لغرفه راهب اخذت ملابس داخليه جديده منه وتراكسود وطلعت للحمام البره خليتهن كاسرت الماي

وشفطت الارضيه ردت اطلع وصار بوجهي اوس وثنينه تفاجانه بقينه دقايق واحد يباوع بعيون الثاني جر حسره وابتعد عن الطريق تحمحمت

وردت اطلع بس لزم ايدي وهو مدنك راسه بقيت اباوعله وكلبي يتطافر الدم بي ومبغوت عليه .. لزمت ايده طبطبت عليهه اطمنه ورفع عينه بعيني محد كدر يحجي جانت العيون كفيله تحجي البداخلنه .. 

عاف ايدي بتردد وبطئ ورجع نزل راسه ودخل للحمام جنت حاسه بي يريد حضن يلمه ويطبطب على كتفه جنت ادري بي يريد يشمر روحه بحضني ويبجي للصبح بس شبيدنه هذا يلي الله كتبه علينه والحرام وكف بعينه ..

تنهدت وطلعت بسرعه دخلت للمطبخ وانه كل اطرافي ترجف هاذ اول لقاء النه وجه بوجه بعد كل هل سنين الفاتت وجان تواصلنه بس عل صوت

والصوره .. لزمت كلبي الصار يدك دمامه براسي محاوله اهدي بس عبث كل شوي استرجع وكفته

كبالي وعيونه الذبلانه ولزمته لايدي صارخه مطالبه بالحضن ..فتحت الثلاجه طلعت بطل ماي شربته كله شوي واجتلي رساله منه استغربت جا مو بالحمام هوه .. فتحتهه وشفته كاتب..

💬شيصير لو انتي حلالي و ارتميت بحضنج شيصير لو ناسي همي و قهري على اكتافج جان مابتعدت وخليتج تطلعين من يمي نفس هسه

💬الله كريم #اوس لا تيأس وانشاءلله عن قريب يحين موعد فرحتنه

💬ماظن يا بان مات كلشي بعيني وبس حبج باقي عايش وماريد لا فرحه ولا شي من الدنيا بعد غير ان تكونين يمي ومافقدج لانج الشي الوحيد يلي باقيلي بعد امي واهلي

💬انشاءالله كلشي ينحل ومن دون ماتحس تلكاني يمك 

💬انشاءالله 

💬يله روح اسبح حتى تنام وترتاح ولا تكول لا فدوا لخاطري تحمل اذا ماتت الدنيا بعينك من بعد امك ارجع احييهه لخاطري تره انه بحاجتك بهاي الدنيا واذا رحت عني شسوي بحالي

💬يمج انه لا تظنين بيوم اوس يروح عنج لو يتخلى 

💬ربي يقوي كلبك ويخفف عنك همك وحزنك يارب

💬اقوى بيج انه بعد ربي 

💬وانه يمك انشاءالله وماتخلى عنك

💬انشاءالله 

💬يله روح اسبح حبيبي

💬اوك ..

طلعت من المحادثه وانه محتاره شلون اريح كلبه وشراح يسوي راهب بقضيتنه هسه تنهدت وطلعت للصاله كعدت يم امي فتره ودخل راهب لغرفته

سبح وبدل وطلع للديوان وامي راحت وياه تسلم على اوس ورجعت بعد دقايق وهيه تبجي بقيت اهديهه .. وهيج مرت يومين حزينه وكئيبه واوس

حابس روحه بالديوان لا يقبل يطلع ولا ياكل حده وجبه وحده بس لمن اخابره واتوسل بي ياله ياكل لخاطري بس حسيت على راهب شاك بيه اتواصل

وياه وخفت يعرف ويرجع يخبث ويانه ويفرقنه عاد كلت لاوس مايتصل بعد ومسحت رقمه لبينما

يرجع لبيتهم وارجع احاجي ادري هل شي اذاه اكثر وراد يروح ينام بالفندق بس بسبيل ان يتواصل وياي بس توسلت بي يبقى لان ادري لا انه راح ارتاح ولا هو اذا طلع منا ورغم ماراسله ولا اخابره

بس عل اقل احس بي يمي والمح طيفه كلما طلع للساحه وهيج مر اسبوع بطلاع الروح ياله اخيرا راهب نطق وكال موجه الكلام الي....

.

.

:- مر اسبوع واوس يمي حاول يروح للفندق مرتين وماخليته يروح لان بالي شغله واريد اتأكد منهه

عاد صدك باخر يوم بهل اسبوع سويت روحي نايم يمه للفجر سمعته يحجي بهمس وتاكدت شكوكي لمن سمعته يكول للمقابيل..

_ماجايني نوم محروم من حنيه امي وصوتج وهسه جافاني النوم يا بان وطالعه الدنيا من عيني بعد شيصير خلي يصير امي وخسرتهه وانتي وحاولتي تبتعدين عني شفايده الدنيا بعد..

مانكر اني ضجت وعصبت لمن عرفت بيهم يتواصلون كل هل سنين من وراي ولو انه جنت

حاس بيهم يتواصلون من جيات اوس المستمره حتى يخطب كل هل سنين بس جان سماعي الهم شعور مو حلو.. قررت بعد انهي كلشي لفيت راسي

ونمت والصباح رباح كعدت على ضوه الشمس داخله من الشباج شفته كاعد صافن بالسكف واديه جوه راسه كعدت على حيلي تحمحمت وانتبهلي كعد هوه همين وكال..

_صباح الخير خويه 

_صباح النور شنو ما نايم انت

_لا والله ياخوي مجافيني النوم انه مثل كل ليله واحس ثكلت عليكم وابوي وحده بالبيت اريد ارجع اعيش يمه البي احتياجاته من اكل وشرب لان محد بقاله والبنات هسه رايحات يمكن واخوي رجع بيته بعد

_تمام اذا هيج روح بس بالاول عندي كلمتين وياك

_ وانه كلني اذان صاغيه احجي

_اعرف انت هسه مو بوضع يسمحلك تفرح وتتونس بس اريد اكلك ان طلبك كل هل سنين اتلبى والتريدهه راح تصير الك

_شلون يعني خويه

_انت افهمهه بعد

_افهم من كلامك انك قابل اتقدم لبان واخطبهه منك..

هزيت راسي بايجابيه وانه عاكد حواجبي ضايج منهم من امس هوه فرك وجهه وبقه يمسح بدموعه بلع غصته واجه علي حضني وصرت اطبطب على ضهره ابتعد وهوه يحجي بغصه..

_مانسالك وكفتك وياي ولا انسى هاي اللحظه يلي رجعتلي الروح بعدما فقدتهه قبل اسبوع

_حلال عليك اختي وروحي ولا تظن جنت ارفضك لانك مو كفو بس جنت اختبر حبك الهه وصبرك وبان اختي الصغيره وعزيزه مثل باقي

خواتي واليصير عليهه يصير علي واحترامهه وتقديرهه من احترامي ماريد تجي بيوم تشكيلي منك لو احس بيهه ضر منك

_بعيوني وبوسط كلبي اخليهه بان هيه اخر عزيزه بقتلي من بعد امي هيه روحي ومحد يتخلى عن روحه

_وانه وثقت بيك وانطيتك اذا الله انطاك

_بعد روحي راهب اخوي الكفو..

ابتسم بحزن ورجع حضني ضحكت على شكله وبعدته عني مزعوج هوه ابتسم ومسح دموعه اول مره اشوفه مبتسم من بعد ايام ..ادركت ان فعلا

#بان عزيزه على كلبه ومثلما يكول هيه روحه زفرت براحه وكمت كتلهم عل ريوك صبولنه وجبته للديوان وكعدنه انه ويا ناكل حسيته صارله

واهس يهتم بروحه وبحياته .. كملنه ريوك واخذت الصينيه للمطبخ غسلنه ودخلت للصاله كعدت وباوعت لبان وكتلهه..

_خويه بان انه منعت عنكم النصيب كل هل سنين واكيد عرفتي السبب 

_اي خويه

_وهسه هوه بحاجتج اكثر من كلشي بالدنيا ولازم تكونين يمه وتعتنين بي وبابوه لان مابقالهم احد يمهم وانه حجيت ويه اوس وكتله طلبك مجاب

واختي نصيبك فاذا انتي موافقه حتى يجون هوه واهله بعد اربعين امه حتى تعقدون شرعي وطبعا تدرين بالوضع اذا حبيتوا تبقون مخطوبين منا

لتدور سنويه امه وتسوون عرس وزفه او تتزوجون هسه سكتاوي وبلا هلهوله بقت عليكم هاي وبكيفكم بس الاريده منج ماتضغطين عليه

وحاولي تسايرينه بسالفه العرس وتفهمي وضعه بينيله انج ماتردين العرس كله ومستعده بس تعقدون شرعي ومحكمه وتعيشون سويه والعرس يمته ماتردون يجي وقته

_انشاءالله خويه هوه انه هم فكرت هيج مو مهم العرس والهوسه المهم هوه ماينكسر كلبه 

_هاذهو وبالتوفيق انشاءالله 

_ويوفقك حبيبي ..

ابتسمت وكامت باست كتفي حضنتهه وبست راسهه وهيه دموعهه تنزل فرح خليتهم ورجعت للديوان لكيت اوس يبدل ملابسه استغربت وكتله وانه ادخل..

_شنو وين

_خليني اروح ياخويه احس توه ياله دبت القوه بكلبي واكدر اروح احجي ويه امي واكلهه ابنج راح يخطب وانتي مو يمه

_تمام روح بس تذكر كل كلمه قهر تطلع من لسانك راح تسمعهه وتنقهر عليك بكبرهه وماترتاح

_انشاءالله ياخويه انشاءالله..

طبطبت على كتفه كمل تبديل وطلعنه وصلته لبيتهم ورجعت للبيت انه همين سبحت وبدلت ملابس الدوام ووصيت امي لو اجه اوس تستقبله بالديوان .. 

طلعت ركبت سيارتي ورحت للدوام شغلت روحي بالقضايا وطلعنه مداهمه مرتين بهل يوم واخر الليل وكفت كبال باب البيت وانا كل تعب الدنيا بروحي نزلت فتحت باب الكراج دخلت السياره وبقيت كاعد بيهه مالي نفس ادخل للبيت

وهذا حالي من يوم مافاركته شموخ وافتقدت طيفهه بي صار يخنكني ويكبس على نفسي كلما نمت بي ..

 جريت حسره وشغلت اغنيه باسم العلي[ مشتاقلك موت ] ريحت راسي عل كشن وانه بالي مامرتاح صفنت بحديقه البيت وبذاك السياج السلبت بي روحي وهي تناظر بصفه ..

رجعت بيه الاغنيه لذيج الشهرين وانا اتذكر اول مره شفتهه وهي تبجي وتباوعلي بنظرات تتوسل واصابعهه يرجفن من الخوف ..

شلون ياربي خاف تاخذني المنيه وروحي تلوب عليها خايف يارب انحرم من شوفتهه طول العمر خايف اموت وتضل عيني مفتوحه تنطرهه ..

تخيلت الموقف كدامي وماتحملت لزمت صدري موجوع من فكره الموت وهي مو يمي وماتكون اخر شخص عزيز اشوفه من ناسي وهلي غمضت عيني دعيت ربي يطول بهل عمر لو يجيبها لدربي  اشوفنها وبعد ماريد من هل دنيا شي خلي يخلص العمر وتصعد الروح لون شفت عيونها وسمعت عذب صوتها غمضت وجرت دمعات عيني على خدي مجمره ..

بجيت وياكثر محاولاتي وقواي الاجمعها لفراكهه وتجي ذكرى منها تطشر الاول والتالي وتنزلي دمعه عيني المانزلت على غير ابوي غمضت واسرحت بظلمه احلامي بيها لحدما طر علي اذان الفجر....

.

.

:- بعد الفرحه يلي حسيت بيهه بكلام راهب ماشالتني الكاع رحت بسرعه على نقالي جان رقم اوس موجود من امس صفنت بقهر وتذكرت شكله امس امس الفجر من شفته يفتر بالساحه يدخن ودموعه تجري سكته على خده ساعتهه روحي فرفحت عليه وماكدرت ماحاجي واشيل الحضر عنه 

اجيت اتصلت عليه ماجاوبني منا لمرت دقايق ياله رجع اتصل عليه فتحت خط واجالي صوت حسرته غمضت عيوني وابتسامه ودمعه فرح على وجهي وحجيت..

_اوس 

_عيون اوس روحه انتي والباقيله بالدنيا

_احبك 

_وانه ماتصورين حبي الج شكد اليوم ورغم كسره ظهري وكلبي على امي بس احس رجعتلي الحياة

حسيت باقيلي امل بالدنيا بكلام راهب مثل الجان طايح بمستنقع اظلم وانفتحله باب ونمدتله ايد 

_الحمدلله ربي جبر خاطرنه وجمعنه بعد سنين تعب وضيم 

_الحمدلله يروحي

_انت هنا بالبيت

_لا رايح ابشر امي اكلهه انطوني الجنتي تتعنين حتى تخطبيهه الي 

_الله يرحمهه 

_يرحم اموات المسلمين اجمعين 

_والله مامصدكه اوس ماتصور شعوري بهاي اللحظه وكلهه بكفه واحتياجي لحضنك بهل لحضه بكفه ثانيه 

_والله حتى انه سنين وانه احلم بحضنج شلون راح تحملني رجلي واوكف كبالج لمن تصيرين حلالي مادري

_انطيك من حيلي لو احتاجيت

_يبعد كل الدنيا انتي

_احبك والله

_اموت بيج ورب الكعبه...

..فزيت من صفنتي بعد هذاك اليوم بشهر ونص لمن اجالي صوته وهو ينطي موافقته للشيخ بصوت مخنوك .. فاره ودخلنه النسوان للصاله رفعت راسي باوعتله واحس المسافه بيني وبينه تبتعد كلما تقرب باتجاهي وكفت وهوه عيونه تلمع

ومبتسم بقهر تقدمت بااتجاهه ياله تقلصت المسافه البيناتنه رفع ادي بثنين اديه باس باطنهن بعذوبيه وسحبني عليه حاضني لصدره دفن وجهه

برقبتي وصار يبجي بسكته مسدت على ظهره وشد على حضني اكثر ماتحملت ونزلت دموعي

وبجيت بحركه كل سنين الحرمان الفاتت ماراح يوفيهه هل حضن والدموع .. ابتعد وحضن وجهي وهوه جبينه على جبيني وهمس..

_اشتاقيتلج يا فرحه سنيني ودنيتي

_متت عليك يكل ناسي واهلي..

ابتسم ورجع حضني وكوه ياله بعدته امي واخته مسحنه دموعنه ولزم ايدي كعدنه عل كوشه وانطتنه اخته الحلقات لبسني واخذت الحلقه

لبستهه اله وباس راسي كصينه الكيك واحد وكل الثاني وبقه كاعد ومخلي ايد على كتفي وايد ثانيه

لازم بيهه اصابيع ايدي يلعب بيهن وضعنه بعالمنه واحنه واحد صافن بالثاني .. تحمحمن النسوان

وكلهه طلعت من يمنه وطبعا ماخليتهن لا يهلهلن ولا يصفكن حتى لا ينكسر خاطره.. التفتت عليه بعدما انسد الباب وفرغ المكان وكتله..

_اوس

_دنيتي

_ماشبعت من حضنك

_ولا انه عل اقل يرادلي عمر بحاله حتى اروي روحي بحضنج تعالي ..

ابتسمت وسحبني لحضنه بقينه هيج دقايق مامعدوده وهوه يجر حسره كل شوي ابتعد وحضن وجهي باديه باسني بجبيني وكال ..

_عذريني هذا الكدرت عليه والج وعد مني وره سنويه امي الله يرحمهه اسويلج احلى عرس وزفه

_مدامني وياك مايهمني شي بالدنيا بعد 

_الله لا يحرمني منج

_ولا يحرمني منك يسلوه ايامي ..

ابتسم وطبع بوسه خفيفه على شفتي حسيت برجفه سرت باطرافي وهوه كذلك ابتعد بسرعه 

وكام من يمي استغربت فعله هذا خجل لو تردد لو رفض ماعرفت شنو بس انه مو اقل منه احس مسويه غلط من كثرما جنت حذره بعلاقتي بي كل هل سنين بسبب اهلي.. تحمحم وعدل قميصه باوعلي وكال وهوه العرك يتصبب من جبينه ..

_محضره شغلاتج مو

_اي

_يله بعد خلي نتوكل ورانه روحه باجر للمحكمه نعقد

_اي بس خلي ابدل ملابسي

_تمام على كيفج انتظرج انه العمر كله..

ابتسم ووكأن ابتسامته وكلامه هذا طمن كلبي بادلته الابتسامه وطلعت من الصاله كلت لامي وخواتي راح نروح عاد هنه اخذنهه مناحه صارن يشبكن بيه ويبجن كوه خلني

ابدل ملابسي لفيت حجابي واخذت جنطتي بعدما طلع راهب كل جنط ملابسي للسياره ودعت امي والبنات وطلعت ويه خوات اوس بره سلمت على

راهب وهوه باس راسي ووصاني عليه وعلى نفسي تشكرت منه لان حقق حلمي وماحرمني من عزيز روحي اوس .. ابتسم وصعدت بالصدر حرك السياره اوس بعدما تحاضنوا هوه وراهب وتشكر منه ووعده الف وعد ماينزل دمعتي بيوم

لوحنه لراهب بالسلام وطلعنه كلهه دقيقتين ونزلنه ببيت اهله لان قريب وبعد كم فرع عن بيت اهلي..نزلنه وذبح نسيبهم دجاجه يم رجلي ودخلت

سلمت عليهم وسلمت على عمي بست ايده باركلنه واخذني البنات لغرفتنه والتوتر قره الف ذبيت الجبه والحجاب وبقيت بس بالفستان البسيط

الابيض عدلت شعري رشيت عطر شوي وكعدت عل جربايه جان جايب غرفه اخشاب جديده ومجهزه بالاثاث وكلشي بس جنطي مامسفطتهن بيهه ..

كلهه دقايق غير معدوده وانفتح الباب علي رفعت راسي وشفته دخل وقفل الباب طفه الاضويه وخله بس كلوب التيبلام الخافت وضوه نشره

الشلال يلي بالبرده .. لزمت كلبي وهوه ينبض بجنون ويه كل خطوه اله باتجاهي وكف كبالي نزع

الستره ولزم اديه سحبني عليه ..وكفت وانه كل زوايا جسمي ترجف باسني بجبيني ورفع راسي بايده جر حسره وكال بصوت شاعري..

_دعيني اتأمل رُموشكِ وخُطوط يدكِ، وكم عرقُ حفر مَعصمكِ، 

وكم شامةٍ زُينت كتفكِ،دعينا نقضي الليلة نتحدت عن الانحنائات في جَسدكِ،

ورائحة شعركِ ودفئ صوتكِ وطول اناملكِ،واحمرار خدكِ ولون عيناكِ، دعيني أقضي اليوم فيكِ يا شمعتي ..

_اوس يا سلوى ايامي ودعائي المستجاب ماتدري شكد احبك 

_اموتن برمش عينج انه يافرحه سنيني.. بنون

_هاا

_ماتصورين مدى خوفي من فقدانج بعد فقدان امي وبعدني احس كل هذا حلم وكسرتهه بعدهه

بخاطري وماظن تروح بيوم وجانت فكره اني ممكن اخسرج تسهرني الليالي وتجافى النوم من عيوني

_الام ماتنسي وفقدهه مو هين حقك لو مانسيت كسرتهه بس الاوله انك تهديلهه احسن الاعمال وتترحملهه حتى ربي يرحمهه وترتاح هناك اما فكره

خسارتي جانت بعيده كل البعد لانك تدري بيه احبك ولو ماصرت الك ماصير لغيرك 

_يبعد حيلي انتي تدرين رغم مر شهر ونص على وفاتهه بس احس مرت يومين تصدكين مستحي

منهه لان عقدنه انه وياج قبلما تدور سنويتهه وافكر شلون اتهنى وافرح بليلتنه وامي جانت متانيه عرسي ومتانيه فرحتهه بجنتهه بس شبيدي هيه جانت تدري بالحال وتعذرني لان تدري بيه خفت ارفض او

ااجل زواجنه وافقدج وانتي الوحيده يلي طلعت بيج من هاي الدنيا بعد اهلي خسرت امي يا بان ماردت اخسرج انتي هم

_وانت كذلك شخصي المفضل والعزيز على كلبي بهاي الحياة وامك اكيد سعيده لمن تشوف ابنهه نال

جزاء صبره كل هل سنين واخذ اليحبهه وتحبه ولا تظن ابد انهه ضايجه او مامرتاحه لانك تزوجت وره اربعينهه مباشرتا بالعكس 

_يلوموني من عشكتج واخذتج قبلما تدور سنويه امي مايدرون شلون روحي متعلقه بيج واموت لو خسرتج 

_اسم الله عليك لا تحجي هيج عمرك طويل انشاءلله 

_حلات العمر مو بطوله حلاته تعيش ويه التحبهم ويحبونك لاخر رمق

_اي والله 

_تدرين بشنو افكر هسه

_شنو

_كاعد احسب ساعات الليل تكفيني حتى اروي اشتياقي الج لو نزيدهه بعد كم ساعه 

_هههه

_اروح فدوا ونذر لهل ضحكه 

_اسم الله عليك

_بانه حبيبي

_هاا 

_مرتاحه 

_اي ليش

_حبيت اطمن عليج قبلما نبدي ليلتنه..

✋️🔥

رفعت راسي بتوتر وتقرب على وجهي باس خدودي وصفن بيه لحضات وهوه يمسد على خدي ويلعب بشعري ردت انزل راسي مستحيه من نظراته ورفعه

بيده متقرب منطي لروحي من روحه انقطعت انفاسنه بعد دقايق وابتعد ياخذ نفس وانه فتحت عيوني كوه وحجيت بصوت يرجف خوف..

_اوس 

_دنيته

_جوعانه خلينه ناكل بالاول

_جؤ ماكو اكل هسه كوه لزمت روحي مساع بيت اهلج ترديني اتحمل هسه وانه محترك عليج منا لتخلصين عشه خليهه بعدين

_بس..

_بان 

_هاا 

_احنه صبرنه سنين وانتظرنه هل ليله لا تخلين الخوف او شي يخرب حلاوتهه 

_تمام

_ ماتعبتي من هاذ الفستان احسه ثكيل على ترافه متونج اشو تعالي بله خلي اشيله عنج..

ابتسمت ودار وره ضهري فتح زنجيل الفستان وشمره عن جسمي سحبني للجربايه وهوه لازم

بخصري والغرفه اشتعلت نار حسيتهه نومني عل جربايه واخذنه الليل بطوله ندور على كل نقطه شوق اخذت عمر من عمرنه ونرويهه....

تعشينه ب٤ الفجر بعدما سبحنه ورجعنه للغرفه صلينه الفرض وصلاة شكر لله بعدهه طفينه الضوه  تمددنه عل جربايه نتسامر على كولته لحدما غفينه حضن بحضن وجانت احلى ليله عيني تنام بيهه مرتاحه حسيت نفسي نايمه بداخل صدره مو بدنيا هاي

ومن بعدهه توالت الليالي الحلوه ضمن حياتنه .. ورغم مرت فتره على زواجنه الا ان محد كدر يشبع من الثاني وشوك السنين مارتوه ولا راح يكدر يرتوي كلما استذكرنه الصار ويانه .. وكلهه اسبوعين تقريبا واضطرينه ننتقل لبغداد بسبب مهمه اوس بالمديريه العامه وصار يروح

للتدريب ويخليني وحدي بالبيت ابقى مستوحشه ومشتاقتله ومن يرجع نكون واحد متلهف عل ثاني وابد مافكرنه نمل او نتعب رغم تعب دوامه وتعب

شغل البيت الا ان لمن يجي يمي يصير يينه كل النشاط والواهس وكل هل مشاعر جانت دفينه وضحيه سنين انتظار والحمدلله ربي جمعنه بحلاله وريح كلبنه...

.

.

:- بعدما بان واوس كملوا امورهم وزواجهم اجه الوكت يلي لازم نروح بي انه واوس وفريقنه للمديريه العامه بمحافظتي البصره وبغداد خليت

اوس يروح لبغداد هو وبان لان مايكدر يعوف ابوه وحده لازم يرحوله كل اسبوع نزله يطمنون عليه عاد انه رحت لولايه عزيزه كلبي اخذت فريقي وامي وعبير ورحت للبصره ماكدرت اتركهم وحدهم بالبيت سنه كامله واحتمال اطول سنه ثانيه لهذا

السبب خليت عبير تاخذ اجازه مدفوعه الاجر من دوامهه واخذتهم وياي ورحنه للبصره وصلنه واخذنه تكسي توجهنه للبيت الاجرته النه لهل مده

انطيت المفتاح بيد امي وفتحته سمينه باسم الله ودخلنه للبيت شفت وضعه زين مثلما شفته بالصور فتشته زين خاف بي كاميرات خفيه او فد شي

وكلشي مابي طلع واساسا مابي اثاث هواي بس الغرف كامله بيهه ميز وجربايه وكومدي للملابس باوعت لامي وكتلهه..

1 تعليق

_عذريني امي هذا الكدرت احصله هنا لان البيوت كلهه مزدحمه والشقق خنكه وادري بيج ماتردين

مكان خنكه ومايدخله هوى وهذا البيت شفته شوي جبير وبي حديقه حلوه واذا عل اثاث خليني جم يوم استقر واشتريلكم الاثاث التردوه

_لا يمه وليدي نعمه المكان زين وحلو وكلشي ماناقصه بس الثلاجه وجم ماعون اذا احتاجينه

انزل انه وعبير للسوك نشتري النريده انتبه على شغلك انت وليدي ولا يضل بالك بالبيت

_تمام من تردون ترحون اخذكم انه لان ماتندلون بالبصره انتو

_هاذهو يمه يله فوت اسبح ورتاح وراك شغل باجر 

_اي بس خل اروح اجيبلنه لكمه نتغده وبعدها اسبح وانام 

_تمام يمه روح وديربالك بالطريق

ادور على مطاعم شفت ولد شاب بالطريق ووكفت اساله يا مطعم اكله طيب ومشهور ووصالي على مطعم اسمه ^^^^ .. تشكرت منه ولفيت السياره

وطلعت ادور عليه ولكيته اخيرا نزلت اخذت منه صينيه مندي دجاج ومرقه يابسه ومقبلات طرشي وغيرها وطلعت اخذت لبن وعصاير وشوي حاجيات للحمام صابون وغيرهه من المحل

وصعدت السياره رجعت للبيت وصلت دكيت الباب فتحته امي اخذت من ايدي علاكه العصاير ودخلت للمطبخ اخذت الاكل عبير وطلعته من

العلاليك كعدنه كلنه بالمطبخ سمينه باسم الله وبدينه ناكل لحدما شبعت كلت الحمدلله وكمت

غسلت ودخلت للحمام سبحت ونشفت وبدلت وطلعت كعدت شويه بالصاله يم امي وعبير وحجت عبير..

_احم راهب هسه احنه بالبصره غير

_لعد وين بالموصل

_ههه لا بس يعني اذكرك 

_شتذكريني

_بيت شموخنه هنا يعني لازم نزورهه عيب ..

رفعت راسي باوعتلهه بتفاجئ لمن جابت سيره شموخ وزيارتهه شفته حجيهه مبطن مافهمت شنو

قصدهه وليش تذكرت شموخ وشجابهه على بالهه واذا فعلا مشتاقتلهه وتريد تشوفهه لو لغير سبب تحمحمت وكتلهه..

_احم يمعوده هسه تلكينه متزوجه وشايله لغير مكان وين تطيحين بيهه 

_عادي نروح لبيت اهلهه نسال عليهه وين ساكنه 

_لا عبير عوفينه من هل سالفه شيكولون الناس علينه شذكرهم ببتنه بعد كل هل سنين وشكو جايين زايرينهه 

_عادي شكو بيهه هم صارت من اهل بيتنه بيوم من الايام 

_ميخالف خويه اعفينه من هل سالفه مالنه خلك ندخل سين وجيم ويه الناس 

_تمام بكيفك انه علمودك

_وانه شكو حتى علمودي

_لا هيج اكول خاف تريد تسال عنهه تشوفهه صارت مهندسه لا

_لا شلي علاقه بيهه واسال خل اروح انام انه تعبت كلش عن اذنكم

_اي روح نام خويه روح 

باوعتلي وابتسمت بخبث تنهدت بحيره وكمت من يمهن دخلت غرفتي تمددت عل جربايه وصفنت بكلامهه انه من غير شي جان بالي ادور على بيت

اهلهه واحاول اعرف اخبارهه نوب عبير كالت تريد تزورهه يعني اكدر اتحجج بيهن واروحلهه لبيتهه بس ياخوفي تطلع متزوجه وعايشه حياتهه

وناسيتنه ونتفشل ويه الناس اهلهه بس وين الكاهه بله بليل اخابر سالم يبحثلي عن اسم ابوهه بدوائر المنتسبين لان حسب العرفته وهي عدنه ان

ابوهه منتسب متقاعد فبلكي يطلعولي عنوانه من دائرته.. غمضت عيوني واخذتلي غفوه للمغرب فزيت على صوت الآذان كمت دخلت للحمام

توضيت وطلعت فرشت مصلايتي وكفت اصلي يم امي وعبير بالمطبخ تسوي عشه .. 

كملت صلاتي ورحت طلعت كتاب القرآن الصغير من جنطتي

واجيت كعدت اقره كملت جزء كلت صدق الله العظيم وسديته اجت عبير وبيدهه صينيه الاكل

كعدنه ناكل ونباوع للتلفزيون شويه واجالي اتصال من سالم اخذت نقالي وطلعت بالساحه رديت عليه..

_الو ها سالم 

_الو سيدي شلونك انشاءلله تكون استقريت قصص ماي هوبس 

_اي الحمدلله استقرينه وانتو عدكم غطه فراش اكل

_اي سيدي كلشي جبنه ويانه وهسه صلينه وراح نطلع للمطعم نتعشه ماتجي ويانه

_لا بالعافيه انه توه كملت عشا

_تمام بالعافيه 

_الله يعافيك اكول سالم

_نعم سيدي 

_راح ادزلك اسم شخص برساله اريد تدوره بدوائر المنتسبين وتطلعلي عنوان بيته

_منو هوه سيدي

_شخص محتاجه 

_تمام 

_هو متقاعد فيجوز تلكه عراقيل حاول تسال عنه بين المنتسبين اذا مانطوك معلوماته الاداره 

_تمام هاذهو سيدي اعتبره عندك 

_تمام مشكور سلوم

_العفو سيدي خادم انه

_خادم ربك يله روحوا تعشوا مع السلامه

_الله وياك سيدي..

سديت الاتصال ورجعت دخلت كملت اكلي وكمت غسلت ورجعت صبتلي عبير جاي وكعدت اشرب واكلب بنقالي وامي اخذتلهه صفحه تتصل على

خواتي المتزوجات صوره وصوت وكلمن تححي بصفحه والنت يكطع كلشي مافهمت منهن صدعت سلمت عليهن وكمت لغرفتي كعدت عل جربايه وكملت تكليب بالفيس ماعندي شي

مامتعود ابقى بلا شغل يوم كامل طفيت النقال ولفيت راسي نمت من الملل فتره وفزيت على صوت بالغرفه وخرت الغطه وشفتهه عبير شافتني وكالت..

_ها راهب كعدتك حبيبي اريد اخذ بدلتك مالت الدوام اغسلهه واكويهه الك مو عندك دوام باجر

_اي ماعندي شي هسه بسرعه اغسلهه الك واعلكهه حتى الصبح اكويهه 

_تمام خويه

_يله ارجع نام لا تطير نومتك

_تمام...

رجعت راسي عل مخده ورجعت غفيت للصبح فزيت على صوت المنبه شفتهه ب٥ الصبح كمت غسلت وجهي لبست فانيله وشورت طويل ورحت

للحديقه طلعت شغلات الحديد من السياره وكفت  العب رياضه تالي طلعت معدات الحديد والاثقال من جنطهن وصرت العب بيهم تالي صرت اسوي تمارين الضغط واعلك اديه بحديده الباب

وارفع روحي وانزلهه لحدما دك المنبه الثاني معناهه مرت ساعتين رجعت لغرفتي.. اخذت ملابس داخليه ودخلت للحمام سبحت وبدلت

وطلعت للغرفه على ما مشطت ورشيت عطر جابتلي عبير البدله كاويتهه صبحت عليهه واخذتهه منه لبستهه ورتبت الرتب بيهه لبست البيريه

واخذت معدات السلاح والصدريه بجنطه وياي اخذت نقالي ومفتاح السياره وطلعت بعدما صبحت على امي وبست راسهه وهي تصيح وراي عل ريوك

وانه اكلهه مالحك اتريك تاخرت .. طلعت من البيت وسدته وراي عبير ركبت سيارتي وطرت بيهه للمديريه دخلت انطيت فايل دوامي ورحت

عل قاضي ختملي عليه وطلعت بي للدائره الاستلمهه مسافه الطريق وصلت ولكيت فريقي جاي قبلي بشوي منتظريني نزلت من السياره واجه

سالم اخذ مني المعدات وطلع العميد والضباط المحققين استقبلونه سلمت عليهم ورحبوا بينه اخذني العميد لمكتبه كعدنه سولفنه على اوضاع

الدائره وشكم متدرب جاي جديد وشنو طبيعه الشغل يلي لازم انطي الهم بالتدريب وانه كل هل اساسيات اعرفهه لان مو اول تدريب الي هذا..

انطيته الفايل مالتي وقع عليه ورجعه الي كمت دكيتله تحيه وطلعت اخذني واحد من الضباط لمكتبي دخلت وشفته خوش مسوينه ومرتب سالت

اذا جان هل مكتب ملك شخص قبلي وكالوا لا انت اول شخص تدخله خله وطلع بعدما دك تحيه وضليت افتر بالمكتب ادور خاف بي كاميرا او جهاز

تنصت هيج امور وارده بشغلنه وماحب احد يسمعني او يشوفني لمن اشتغل وخاصه كلهه امور سريه.. شفتهه فارغه من هل سوالف اجيت كعدت عل كرسي وندك الباب دخل سالم دك تحيه وكتله..

_فوت سالم شسويت بالكتلك عليه 

_سيدي بعدنه نبحث عنه مثلما تعرف دوائر المنتسبين هواي وهو متقاعد من سنين طويله مو سهل نوصله سيدي

_تمام ودوكم لاماكنكم مو

_نعم سيدي كلمن مكانه

_مرتاحين بي لو اغيره الكم

_لا سيدي نعمه مرتاحين بي نفس مكانه القديم

_تمام تحملوا بس هل سنه تالي ترجعون لحياتكم السابقه 

_انشاءلله سيدي شنو جدول اعمالنه

_بعدهم مامسلمينه هسه ادز عل شرطي يجيبلي جدول اعمالي من العميد

_اوك سيدي محتاجني بشي 

_لا سلامتك روح ارتاح 

_حاضر سيدي..

دك تحيه وطلع رجعت راسي عل كرسي وبقيت صافن بالفراغ منتظر يجيبولي الجدول احس بحكه

بجلدي لمن اكعد بدون شغل كلهه فتره ساعه تقريبا ودخل الشرطي بعدما دك الباب دخل ودك تحيه انطاني فايل وكال..

_سيدي العميد دزلك هذا الجدول وكال هذا جدول اعمالك لهذا الاسبوع لبينما تستقر وبعدها تضل تستلم التدريب والمهمات بشكل مباشر

_تمام شكرا

_العفو سيدي محتاج شي

_لا تكدر تروح ..

دك تحيه وطلع فتحت الفايل وعباره عن ٤ صفحات كل صفحه بيهه الاعمال الامارسهه بكل اسبوع وجان التعرف على الدائره

وموظفينهه اول مهمه بالقائمه .. سديت الفايل وكمت عدلت ملابسي لبست البيريه وطلعت اجه سالم يمي وكال..

_نعم سيدي محتاج شي

_صيحلي واحد من الضباط كله المحقق راهب يريد اجتماع للموظفين حالا 

_حاضر سيدي..

راح هوه وانه رحت اجيك مكان شغل فريقي اذا زين ومريح او لا شويه واجه سالم كال انهم تحضروا ومنتظريني بغرفه الاجتماع هزيت راسي

ب اي ورحت لغرفه الاجتماعات دخلت وكلهم وكفو دكولي تحيه اشرتلهم يكعدون واجيت كعدت انه براس الطاوله وكتلهم..

_انه "المحقق ج راهب من جهاز العمليات الخاصه والجريمه المنظمه" اجيت هنا من كربلاء كمدرب للمبتدئين دفعه ١٦ لهل سنه وحاب اتعرف عليكم وعن طبيعه عملكم بالدائره كشرطه وضباط ومحققين..

الكل : نعم سيدي اهلا بيك 

بدوا واحد واحد يعرف عن نفسه تالي حجولي عن دوامهم وطبيعته وشنو يسمحون للمتدرب بعرف وشنو مايسمحوله صراحه استغربت لان تدريب

الدوائر الامنيه بكربلاء عكس تدريب باقي المحافظات يعني هوه متدرب جاي يشوف طبيعه الشغل وشنو اله وشنو عليه ليش تخلونه يعرفه

جزء صغير من عالم جبير مثل عالم الجنائيات طنشت تعليماتهم وكلت خليني براحتي اعلمهم

اللازم يتعلمونه راح اسلك طريق عميدي واستاذي يلي دربني وكسبني هل خبره بهذا المجال .. ختمت

الاجتماع بشكر منهم ورحنه كلمن لمكتبه وانه قبلما اوصل لمكتبي اجالي شخص عرض طريقي باوعتله باستغراب وكتله..

_منو حضرتك وتعرض طريقي هيج

_انه زميلك ومنافسك المحقق ج قيس ..

مد ايده يسلم ومديت ايدي صافحته وكتله..

_اهلا بيك استاذ قيس بس منين صرت منافسك

_ تعرف ثنين بنفس الرتبه ماينرادون بالمكان 

_وانت تعرف وجودي هنا مؤقت مالهه داعي المنافسه 

_لا شلون مو راح تستلم التدريب عني وباقي القضايا يعني هيج شغلي راح يقل واضطر اشاركه وياك 

_عندك اعتراض

_تكدر تكول هيج

_تعرف طريق مكتب العميد لو اخلي سالم يدليك عليه

_منو سالم 

_ضابط مساعد

_هاا وعندك مساعدين همين والله خوش عندك حظ اشو انه ماعندي مساعد

_ استغفرالله منين هل ورطه العرضت طريقي خويه تريد مساعد روح اخذلك مساعد وان عندك اعتراض روح اعترض يم العميد وفك ياخه عني عندي شغل عن اذنك..

تركته يريد يحجي ودخلت مكتبي وسديت الباب حيل مدري منين تطلع هل نماذج بطريقي كعدت

عل كرسي ودخل سالم انطاني ملف قضيه جديده اخذته وسالته على موعد بدء التدريب وكال..

_سالتهم سيدي كالوا باجر يجون للاختبار الامني ومحتاجينك تكون موجود بالاختبار وتشرف عليهم وبعدها يبدون المتدربين تدريبهم هنا الاسبوع الجاي

_تمام بيش ساعه الاختبار يبدي

_ب٨ ونص سيدي بالطابق الثاني بقاعه الاجتماعات....