رواية خيط وابرة الفصل الثامن عشر بقلم شمس العراقية
نور ـ مخليه أذني زين وجدي سگت وتنهد وحجه
الشيخ حبيب ـ رايد بنيتكم لبنى لأبني باقر ولو الوگت مو مناسب ودياري مو مال فرح وأنه عندي زلمه بالسجن وكاسرلي ظهري وسالفته مطوله بس باقر عزيز وأريد أفرح بي وأنسابكم والم الشمل
محمود ـ والله عمي والنعم مـا قدمتلنا وبعيداً عن اللي صار بينا ودگات نافع الناقصه وياناأني عن نفسي منطيها وموافق وباقر خوش باقر ويستاهلها خل يكبعها ويأخذها ها يابه شتگول
ياسين ـ أنه حبيب عزيز عليه وهو أحسن من عدنا كُلنا رغم كل الخلافات الصارت ويانا گلبه ما شال وحقد علينا ودومه سباق بحل الطلايب ويريد الگرب ولم الشمل وأذا هذا الزواج بي خير ألنا أكيد نوافق وباقر ما عليه عيب
أخلاقه تشهدله بس الأصول أصول لازم نسمع شور ورأي البنيه
الشيخ حبيب ـ ما طلبتوا الا حقكم ومن حق البنيه أبني نافع روح على حبوبتك خل يشوفن البنيه ويحاجنها ويأخذن رأيها وردلنا الجواب
نافع ـ تأمر جدي
نور ـ فجأه سگتوا لبنى وباقر! ونافع طلع وصفن بوجهي ومشىٰ سريع نافع أريد أحجي وياك بخصوص أمي والسمعته ما سمعني يمشي سريع ومتجاهلني ونسيت نفسي وجريته من أيده
نافع أوكف أحجي وياك.. أندار وگلب عيونه ونظرته جانت بارده حيل وخاليه من كل المشاعر ونفض أيده مني بقوه ما راضي على تصرفي وتدارگت نفسي والموقف الخليت بي روحي
نافع ـ وخري أيدج وأخر مره تتصرفين هالتصرف
نور ـ تمام مثل ما تريد ترى بدون قصد ونسيت نفسي وقبل لا أكمل كلامي مشى وحجيت وراه شُـــنو هذا السمعته وشنو أمي تتزوج عمي محمود
نافع ـ نور أمشي منا لِـيْـــــش لحد هسه وأكفه
ـ جاوبني
ـ على شنو أجاوبج
ـ سألتك على أمي ليش ما تجاوب
ـ والله السمعتي ليش حضرتج ما موافقه
ـ أي طبعاً ما أوافق هيج بابا رخيص حتى أوافق
ـ ليش شگو بي خالي محمود ما توافقين! وأحسن ما تضلن بدون والي وقادر وولده وجديتي يستجلبون عليجن چا شتردين وأنتِ ما دايمه لأمچ علمود تمانعين زواجها من عمي وهاي سنة الحياة لاكيفي ولا كيفج كلمن يأخذ نصيبه
ـ عافني ودخل ولحگته راح على جديتي وأمي يحجي وياهن بخصوص لبنى وباقر وطلع من يمهن
نافع ـ وينها هي أنه أحاجيها
سميعه ـ لا يمه أني أحجي وياها
نافع ـ ماشي عمه أنه واكف بالطرمه رديلي خبر
نور ـ عبرني متجاهلني وگف بالطرمه وأني دايخه بسالفة أمي وتوصلت لقرار نهائي ورحت لعندها لكيتها تريد تروح تحجي ويه لبنى ماما صدك السمعته
سميعه ـ شُـــنو السمعتي
نور ـ زواجج من عمي محمود
ـ أي أمي صُدك
ـ يعني تدرين وعندج علم وما گلتيلي
ـ أي
ـ وشلون أي ماما شلون بهالسهوله أي وبابا نسيتي
ـ نور كَــــافِي والله البيه مكفيني
ـ أني المفروض مـا أطاوعج وأجي وياج لبيت جدي وهما محضريلنا هالمصيبه وبابا كله يله صارله6 أشهر من مات ترابه بعده أخضر يردون يزوجون لعمي لا مستحيل
ماما خليها أبالج هالزواج ما يصير وأني ما موافقه ولبنى هم ما مجبوره تتزوج باقر غصب علمود سالفة الستر أحنه صح يتيمات بس مالهم حق يتصرفون بكيفهم بينا وفزي على صوت حبوبه
الحجيه عطايات ـ نـــور صوتچ على وأنتِ هم تردين واحد يسترج
نور ـ حبوبه أني مستوره ما أحتاج أنستر بزواج هو صح الزواج نص الدين بس مو بالأجبار وأحس هالقرارت كلها علمود يخلصون من الحجي وكلام الناس
ـ منهو الگلج زواج بالأجبار ما جابرين أحد وسألي أمج
ـ أنداريت عليها مصدومه ماما لاتصدميني ولا تگولليلي موافقه على الزواج من عمي محمود دخيلح ماما لا لاتخربين مكانة بابا وتهدمين صورته وذكرياته
نزلت رأسها ونزلت دموعها وهزتلي رأسها
سمعيه ـ أي مثل ما گالت حبوبتج محد جبرني أنه وافقت من شوري ورأيي وبإرادتي وهالزواج علمودجن وعلمود أخوج ميثم وأني تعبت وياه ما أكدرله وكل الي صار والمشاكل هو ما لافي عالبيت مقيم يم جديتج ما يجي ومعاند وأني ما أريده يضيع وأذا يضل عدها يصير حاله من حال ولد عمج وأنتِ أعرف بولد عمج شلونهم
ـ يعني تقنعيني موافقتج على الزواج مم عمي علمود ميثم! ترى يوم يومين وغصبن عليه أنتِ ما أنطيتي العين الحمره وتشبع دلال ونجلب عليج وهسه مقيم يم جديتي نروحلهم وتأخذينه غصب وتكسرين رأسه
وأذا علينا على گولتهم أحنه ما دايمين الج أني ما أتزوج غافر ولبنى لباقر محد اله حق يجبرها
الحجيه عطايات ـ وأنتِ گلتيها ما دايمات الها وأمج بعدها وأحسن ما تجي تكعد خدامه لنسواوين وينشلع گلبها وشوفتجن تصير حسره عليها تكعد بيت أبوجن وتتجمعن عدها وگلشي يضل نفس مكانه
ـ لا حبوبه مو نفس أول بابا مات ليش تسبدل مكانه بعمي يعني عرف والعادات يمتى تبطولها اليموت رجلها تتزوج حماها وأمي ما مجبوره تتزوج عمي ماما رفضي وحتى أني زواج ما أتزوج خلص بطلت بس رفضي الله عليج ماما رفضي
ـ كَــــافِي نــور وافقت وخلص وأني ما گاتله نفسي عالزواج من عمج بس علمودكم تعبت من الحمل والمسؤوليه والمشاكل الصارت أني ما أكدر لوحدي أفهمي أمي
ـ ما راح أفهم گلشي وأنتِ هدمتي ذكريات بابا بهذا الزواج وهدمتي گلبي بموافقتج بدون حتى ما تگولليلي ووافقن شتسون سون مالي شغل بأحد
عفتهن وطلعت أبجي ومخنوگه والدنيا طالعه من عيني كعدت بالساحه مالت المطبخ وحضنت نفسي وبجيت وينك بابا وينك حبيبي تعال شوف شصار من بعدك تعبت من دونك والله تعبت ما صارلك يله أشهر من توفيت وركض ركض يزوجون أمي
بجيت هواي وأنقهرت هواي تالي گمت ومقرره ما أبقى بعد شافتني أمي تريد تحاجيني تجاهلتها ودخلت طلعت ملابسي
سميعه ـ نور مو أحاجيج كعدي خل نحجي
نور ـ وبشنو نحجي ماكو شي نحجي بي بعد مو تردين تزوجيني لغافر هاي هي أنا موافقة وهم علمود أخلصج من همي ولبنى هماتين تزوّجيها باقر وتضل بس لينا هم انطيها لواحد من ولد خالي مشعان نافع لـو ناجح وأبويه تنسيه وأنتِ اصلاً نسيتيه وروحي تزوجي وعيشي حياتج ويه عمي محمود عليش ضالة شايلة همنا وحارگة دمچ بمشاكلنا
جنت أحجي بعصبيه والدموع تجري وحبوبة واكفة يم الباب تباوعلي وما حسيت غير أمي تقدمت وضربتني راشدي طيّر الدنيـا من عيني ولزمتني من شعري بقوة
سميعه ـ ولچ نور صوتج ما يعلى على أمج فاهمة
أكسر رأسج والله لا عبالج كبرتي ترى بعيني بعدج جاهل ومعزة وغلات أبوج لا أنتِ ولا غيرج يحاجيني بيها ولا تتدخلين بقراراتي أنتِ جاهل ما تعرفين مصلحة هالزواج وين وسدي حلگج لا أكسره إلج وأطيح حظج
الحجية عطايات ـ من زمان محتاجلج هالراشدي علمود تعرفين شلون تحترمين أمج وين محضرة ملابسج وين تكبعين منو يوديج لــو عبالج مثل أول كلها تتراكض گدامج والشي الي تردينه يصيرلج زمان أول تحوّل يا بنتي والكسرتي گلبه ترى ما مفكر بيج هسه بطلي هالصلافة وأحترمي نفسج وأمج والوگت مو وگت لسان طويل وحركات جهال
وأخواتج مو وياج شو ما سمعتلهن حس بس أنتِ الي تفرعنتي وتدللتي زايد وتالي حتى الغريب ما يگدرلج
سميعة ـ رجعي ملابسج بمكانها وگعدي وأنجبي وأذا سمعت صوتج طالع أو دخلتي بشيء ما يخصج ما تلومين إلا نفسج أروح لأختج وأفض سالفتها ورجلج ما تعتب باب الغرفه فاهمة
نور ـ عافتني وطلعت وقفلوا الباب وگعت بالكاع لميت نفسي وصرت أشهگ بقهر قهره تشبه وجع فقدان بابا حسيت بهاللحظة إن الدنيا ضاگت عليه وإيديه فرغت من كلشي وصفيت وحيدة بوسط عاصفة من الخذلان من بابا وماما ونافع أخ يوجع گلبي يا نافع
تغطيت بفراشي وحاولت أهرب من واقعي بالنوم بس فجأة انفتح الباب بهدوء وضل مفتوح بس ماكو صوت
گلبي نغزني ويگولي هذا هو الواكف وأنسد الباب
وشويه ورجع أنفتح كل ظني هو بس من رفعت الغطا طلعت خالتي لميعة
لميعه ـ نور حبيبتي نايمة گعدي يا بعد خالتج خل أحاجيج بكلمتين
نور ـ ما جاوبتها بس من رفعت الغطا وشافت عيوني مورمة من البجي گبل رفعتني وضمتني لصدرها گعدنا نبجي سويه خاله اليوم أبويه مات اليوم والله لحد هسه ما مقتنعه والله وهي تريد تتزوج عمي شلون وبابا خاله وبابا شلون هيج ينسونه مو كل يوم أحضن مخدتي أبجي وأعاتبه شلون عمي يأخذ مكانه
لميعة ـ الكسرة اللي البگلبج والدموع اللي تبچيها على أبوج ترى أنه أعيشها ألف مرة باليوم وأبوج عزيز حيل عزيز والله ما چنت أظن بيوم يموت ويسد عينه عن هالدنيا بهالسهولة بس هذه أقدار رب العالمين ونرضى بيها مثل ما رضيت بقسمتي وبعدي عنه
كلشي بالدنيا سهل ويتعوض يا نورة الأ الموت أنه انكسر ظهري بموته وهو مات وأني بعد ما انتظر عوض من أحد
بس يا ماما أنتِ بعدج بريعان شبابج أيامچ الحلوة بعدها گاعدة تنتظرج لا تعذبين روحج وأبوچ ما يرضى بوضعج لأن كلنا نعرف شكثر چان يعزج ويريد خاطرج
أذكر كلمة سمعتها من حربيه من أنتِ صايرة للدنيا
گايل ألها هاي ثمرة حبي للميعة هي نور
الله يرحمه ويصبر گلبج على فراكه
ـ أخ يا خالة والله ظلم يمكن أبويه من قهره مات وأني السبب أي أنا السبب
ـ ما حجيتلج علمود تبجين حجيتلج علمود تعرفين قيمتج عند أبوچ لا تظلين تلومين بنفسج وتزعلينه بگبره منج الموت حق علينا كلنا أما أمج هي نظلمت بحياتها وهذا الزواج مو بكيفها الظروف جبرتها صح أهلي ما جبروها گلولها تبقين معززة مكرمة بيت أبوچ بس هي أخذت وگت وفكرت ووافقت على عمج
تفكر بيجن ما تريد بيت أبوچن يفرغ حتى لو تزوجتن
الوگت مو وگت بجي نور ماما التفتي لأمج هي محتاجتج هي صديقتج مو بس أمچ لا تجرحينها بالكلام وتحاجينها بمعزة أبوچ وغلاته حتى لو تزوجت المحب ما ينسي چا أنتِ نسيتي نافع لو نسيتي
ـ لا والله أبد خاله والله نار بگلبي مشتاقتله محتاجته بكل ظروفي شلون أنساه وأمي تگولي أنسي بس شلون فهّميني علّميني مو بأيدي خالة مو بأيدي أتمنى أنساه وأطلعه من گلبي لان هو طلعني قبل لا أني اطلعه شالني من قاموسه
ـ مع الوگت كلشي ينسي والله يعوضج ويترس مكانه الله يتلطف بجرح المكسورين هو هم مكسور خاطره منج إذا شفتي نفسج ما تكدرين تعيشين بدونه روحيله حاجي تحدي الظروف والأهل أنقذي الي بقى من حبكم إذا كبريائج يسمحلج روحيله
ـ صدگ خالة أروحله هيج تگولين
ـ تلگينه بالساحة گاعد يدخن بس گوي گلبج يا نور مو كل شي تشوفينه يسر خاطرچ جهزي نفسج للصدمة علمود لا تضلين تلومين نفسج العمر كله والملامه تأكل گلبج
نور ـ تمام مسحت دموعي بسرعة ولفيت شالي على راسي وطلعت بخطوات حذه لحد ما وصلت للساحة وشفت خياله من بعيد جان گاعد لوحده والجگارة بين أصابعه يجر منها نفس وينفث وياها الدخان
تقربت منه بخطوات مترددة گلبي جان يدگ دگات ثگيله وگفت وراه مسافة وهو جان منطيني ظهره بدون ما يلتفت حچة بصوت مبحوح ومكسور وكأنه جان ينتظرني أو حاس بوجودي
نافع ـ ليش أجيتي
نور ـ رجفت روحي من نبرته ونزلت دمعتي جاوبته بصوت يرجف
أجيت عليك أجيت على حب طفولتي الي كبر وياي أجيت على نبض گلبي الي ماعرف غير أسمك أجيت لأن الفراك ثگيل على صدري وما أگدر من دونك شتفكر شتحسبها أحسبها رخيصة ما عندي كرامة عادي كل هذا ما يهمني المهم عندي إنه أجيت لعندك
سكتت وأنتظر منه التفاتة أنتظر أشوف بعيونه الحنين اليطفي نار گلبي بس هو بقى ثابت بمكانه كأنه صنم
رجعت حجيت نافع
ـ نعم
ـ مو أحجي وياك گام وگف بطوله الي چان يمثلي الأمان التفت وباوعلي نظراته جانت تحمل عتب السنين
ـ بشنو نحجي
ـ نحجي بموضوعنا
ـ يا موضوع
ـ نافع تعرف يا موضوع الي صار ويانا وأني...
قبل لا أكمل قاطعني
ـ لا تكملين ما يحتاج
ـ ليش نافع أحس صرت ما أهمك
ـ صحيح وأحساسج بمكانه نور أختصري على نفسج الدرب وروحي ولاتجين بعد وأخر مره توصيلن باب گلبي
نور ـ مشى وخلاني واكفه بمكاني وقبل لايبتعد گال
نافع ـ مع الوگت تنسيني
نور ـ ضليت واكفه حتى رجليه ما تعيني الملم روحي وأمشي ضليت أني وكطوف الجكاير حالي من حالهن هيج نافع ونزلت أخر دمعه مني اله ومشيت راجعه الغرفه وشفت أمي كأنما فهمتني شصاير وياي تجاهلت الكل ونمت أتقبل صدمتي بيهم
رفعت الغطا عني وگومتني وحضنتني وبجيت على صدرها وأشهك طلعت كل عبرتي
سميعه ـ أنتِ مو ضيمج زواجي من عمج محمود ضيمج أنه أعرف وين وخلص غافر مو لزوم تزوجينه ماكو شي بالغصب وقرار أبوج بي أذيه الج شتسوين لگلبج الما يكدر ينسى أنه رايحه وأبرد نار گلبج وأحجي وياه
ـ گامت وجلبت بيها لا ماما لاتروحـــين عوفيه تأخرتي ماما نافع ما يريدني بعد خلص ماما أنتهينا
ـ لا ما تأخرت وأروحله ما جايزه منج كطعتي گلبي ما مخليه بال عندي من ذاك اليوم لامشيتج مشيه وروحج بغير عالم ويوم عن يوم أشوفج تذبلين كدامي مثل الورده وأخاف يوم تموتين من قهر نافع شتسوالي بشنو يفيدني قرار أبوج أذا خسرتج وأنه طلعت من الدنيا بس بيج حتى ميثم ما منه خير عوفيني أروح أصلح غلطة أبوج
ـ گامت وگمت وراها وشفته واكف يحجي هو ولينا عادي وطبيعي الأمر عنده ووياي شحت حتى أبتسامته لحكت أمي ماما رجعي وصلته وباوعلنا كأنما عرف أمي بشنو جايه
نافع ـ هاا عمه خير صاير شي
سميعه ـ نافع يمه أريد أحجي وياك
نافع ـ أي عمه گولي
نور ـ لينا راحت للغرفه ضليت بس أني بعد مسافه عن أمي وهو واكف منتظر أمي تحجي وعيونه عليه بس نظره عاديه ضليت أفرك بأيدي لا رجليه ما تعيني أرجع الغرفه ولا أكدر أمنع أمي
سميعه ـ نافع يمه أنه جايتك بخصوصك أنت ونور وأدري يمه الوگت مو مناسب وگلبي ملجوم وشابع هضم نور
بعدك تريدها
نور ـ رفعت راسي باوعتله وصفن بوجهي صفنه طويله ورافع حواجبه ويه رفعه عينه ورجعت أمي گملت كلامها
سميعه ـ نور الك عمه ما تصير لغيرك ما عليك بالحچي أنه ما يهون عليه لا بنتي ولا أنتَ وكسرة گلوبگم ثگيله عليه خل أفض سالفتكم ونفرح بيكم شتگول يمه
نافع ـ شُـــنو التغير هسه مو على أساس ما أناسبكم ومو من مستواكم
ـ لاتضل تدقق وادري بگلبك شبي
ـ لا عمه ما تدرين گلبي شبي وأنه بعد ما أريد ولا أني ما اناسبها وخل تشوف حياتها خالي مو جان يريد غافر هو يفيدها
ـ نافع عمه الحجي صار والحجته كله هي جانت مغصوبه عليه من خالك الله يرحمه
ـ مغصوبه وليش مـا حجت قابل أسحلها بحبل گوه المغصوب يحجي يطلع أعذار مقنعه عمه لو بنتج جايتني بذاك الوگت وگايلتي كلمه وحده ما أريدك ولا هالتمسلت الماله داعي فشلتني كدام أهلي وأنه الجنت أزامط بيها بس طلعت ما تستاهل والحجي بعد ما يفيد عمه
ـ نافع يمه
ـ عمه لاتكملين ما يحتاج والله وبنتج مقري فاتحتها على غافر ليش الحجي بعد
ـ أبوك گالك
ـ لا مو أبويه غافر بساعتها أجه گال تعرفينه صاحبي وأخوي هذا ما يضم عليه شي وخلص نور صارت نصيبه
ـ أنه ما أريد اكسر لا گلبك ولا گلب بنتي ولا غافر ماريد اخسر اي واحد بيكم وأنت مو بس ابن اخوي انت سندي وحزام ضهري يبعد روح عمتك لاتردني خايبه وتكسرلي ظهري وگلب بنتي لخاطري رد نور لگلبك
نور ـ أمي گامت تبجي وأني أبجي وياها وأفرك بأيديه وعيوني گمت ما أشوف بيهن من الدموع تقرب باسها من رأسها وحضنها ومسح دموعها وباوعلي وگال أخر كلامه وجه سهم بنص گلبي
نافع ـ عميمه أشلعي عيوني خادم أنه الج وكلشي يروحلج فدوه بس بهاي تعذريني خويي وصاحبي حط عينه عليها واكسر كلبه لا هاي هي وامي جزت نفسي منها بعد طلعت من نفسي من بنتج ماأكدر أرجع وأحسب گلشي ما صاير والينكسر صعب يتصلح عميمه
احسبها أختي بنيتي الربيتها على ايدي هذا هو غيرها ما عندي
نور ـ مشى وعبرني بدون ما يباوعلي حتى وأندارت أمي عليه ومسحت دموعها أنهضمت حيـل وتقربت سندتني وأخذتني لغرفة خالتي حتى دموعي جمدت بوسط عيني ضليت فاتحه عيوني وأمي تحجي وياي بالي مو عدها بالي مدري وين
للعصر تحضرنا نمشي ما ودعت أحد بس خالتي حضنتها وأحاجيها بعيوني
لميعه ـ لاتزعلين لخاطري
نور ـ أن شـاء الله حضنتها ودعتها وطلعنا حتى ما سألت عن باقي التفاصيل شصار ما صار وهو ما شفته بعد وباقر وصلنا والعرفته نروح يمهم وعمي محمود هناك يعقد على أمي من بيت خالي مشعان
حبوبه أجتي ويانا يحجن بينهن الا أني فاصله عن العالم وأمي تباوعلي بقيت ساكته لحدما وصلنا
نزلت وعمتي سلمت علينا بس وجهه ثكيل ردت بس سالفة أمي تكظي علمود نمشي لبيتنا كعدنا بالأستقبال وخالي مشعان يحجي هو وأمي وحبوبه
أني ما شاركت وگمت ما حبيت أضل كاعده لان عرفت عمي راح يجيب السيد وطلعت بالمطبخ يم البنات وسمعت صوت نورس تحجي بعصبيه بغرفة عمتي نورس أهنا
زهور ـ أي
نور ـ كلهن وجهن ثكيل مني وصفا تباوعلي بنظرات ما كدرت أفسرها وتبستم وترفع حاجبها مشيت لان أختنكت وسمعت كلام نورس لان صوتها عالي
نورس ـ عمه أنتوا بكيفكم تخططون أنتوا وأبويه وخوالي
حربيه ـ سگتي غضب على يومج جديتج كاعده سدي حلگج وشعليج أنتِ بأبوج وصغير هو خلي يتزوج
ـ يتزوج على عيني وعلى رأسي بس مو زواج شلون ما جان ومنو عمتي سميعه بس أعرف هاي كلها تخطيطات من خوالي هو أصلاً ما أباله الزواج وشايله من رأسه لو يريد يتزوج جان تزوج من ماتت أمي وأخوج مو مال زواج هو البيت باعه من الديون العليه شتحجين عمه يا زواج هذا
ـ نورس أذا ما تسكتين أخلي خالج يكسر حلگج خلي هالساعه تعدي على خير ولا عمتج گاتله نفسها على الزواج من أبوج لاتكومين تمسلتين شو طلعي سلمي ويجي أبوج حلگج ما تفتحينه فاهمه
ـ لخاطر والله لخاطرج بس أخوج بعدين حسابي وياه
ـ منج لأبوج بس أمشي وفضيني يا عمه مو أنتِ خوش بنيه ليش تصيرين عناد وتشلعين گلبي يله أمي
نور ـ طلعت وشافتني صفنت بوجهي وعبرتني سريع الا جتفها طخ بيه وبدون ما تسلم وعمتي لحگتها ضليت بالصاله كاعده لوحدي وحسيت روحي غريبه بنص أهلي بعد ما جنت الكل بالكل وبقيت أباوع للفراغ وأحس بروحي تذبل مثل الورده
ماعرف شكثر مر وگت بس العرفته أمي صارت على ذمة عمي محمود عقدولهم وجدي ياسين وخوالي منعم ومشعان جانوا موجودين
فزيت من صفنتي على صوت أمي
سميعه ـ يله نور ماما گومي نروح لبيتنا
نور ـ ما حجيت ما ردت أزود عليها قهرها هزيت رأسي ومشيت وراها وخالي محمود واكف هو وخالي مشعان عبرتهم وأمي گالت
سميعه ـ صعدي بسيارة عمج هو گال يوصلنا
نور ـ مشيت أني وخواتي فتحت الباب ونورس واكفه بشموخ بصف عمتي وتباوعلنا بنظرات كلها حقد من أولها ليكون عبالها مأخذين أبوها شسالفه شبيها هاي
صعدنا ليورا وأمي خطيه ضلت واكفه دمعتها بطارف عينها وتلم بنفسها مستحيه من عمي ومن أخوانها نزلت دمعتي عليها وعلى موقفها يابه موت الأبو شكثر يذل يابه
خالي منعم تقرب باسها من رأسها ماعرف شحچى وياها وفتحلها باب الصدر وصعدت مدنگه رأسها وأجه عمي صار زوج أمي شگد صعبه على گلبي هالكلمه
وصلنا البيت ورجع ودخلت ببتنا شكثر أنذليت بهالطلعه بيت أبوي يا بعد كل البيوت دخلت غرفتي مخنوكه ونمت گبل ما حسيت غير على صوت
عمي بالبيت ردت أطلع بس بقيت واكفه ورا الباب
محمود ـ طلعه من البيت بعد ماكو بس للضروره وتسمع كلام أمك وأذا سمعت معاند لو شايل رأسك ورايح على ولد عمامك ما تلوم الا نفسك شايف هذا الحزام البعه على جلدك بعدك بكد الفرخ وما ينكدرلك يله روح على أمك
سميعه ـ ميثم ماما حبيبي وليدي هلا بيك يمه
نور ـ أسمع صوت بچيها ورجعت سمعتها تتشكر منه
سميعه ـ مشكور أبو نورس ما قصرت
محمود ـ لا واجبي هذا لك أسمع مو تسمع منا وتطلع منا فهمت عليه
ميثم ـ أي عمي
محمود ـ أم نور اليوم أبات يم بناتي بعد الأمور صعبه ونورس وتعرفين گلشي صار عالسريع
سميعه ـ لا عادي أبو نورس براحتك
نور ـ وأختفى صوته يمكن راح طلعت وشفت ميثم بحضن أمي تبوس بي وتشكيله وتبچي باوعتله وصفنت عليه شلونك سگتت ما جاوبني بس حضن أمي وگام يبجي
ميثم ـ يمه مشتاك لأبويه حيل مشتاگله
نور ـ ما تحملت رجعت لغرفتي وبعد ما طلعت لليل صبن العشه دزن عليه ما گمت جنت حابه أبقى لوحدي
ثاني يوم من الصبح خالي مشعان ونافع أجو علينا كعدوا بالأستقبال يحجون رحت المطبخ أكلج لبنى ما عرفتي ليش أجوو
لبنى ـ لا والله هسه تطلع خالتي ونعرف
نور ـ شفت لينا واكفه تسمع يم الباب وگفت بصفها
مشعان ـ خيتي أم نور اليوم حضري نفسج وحضري نور غافر خابرني وبلغ عمامها اليوم يجيب أهله يجي يخطبها على أساس الصبح بس محمود بالدوام أجلها عالعصر وأجيت أبلغج
سميعه ـ هذا هو خويه بيها الخير
مشعان ـ الله يقدم البي خير نافع أبني قبل لانمشي گوم جيب الضيافه وحضر گلشي لاتخلي قصور
نافع ـ أن شـــاء الله يابه
نور ـ لينا باوعتلي تريد تشوفني شراح يصير بيه بس أني چنت ميتة من الداخل كلشي جمد بعيني رجعت للمطبخ ونافع طلع شوية وأجه ولينا تلگته أخذت منه الضيافة وخلتها عالكاونتر سمعت صوتهم طلعوا وأمي دخلت للمطبخ وباوعتلي
سميعه ـ تعاي يمة أريد أحچي وياچ
نور ـ ما يحتاج ماما سمعت كلشي
ـ إذا ما تردين گوليلي هسه أخابر غافر وأگله لأيچون
ـ لا ماما ما يحتاج تخابرينه ما يحتاج وحيل تأخرتي
ـ نور ماما لاتحيريني وياج شطالع بأيدي وما سويته الج يا ماما أذا ما تردين أني أفهم غافر
ـ لا ماما عيب من أهله وخلص أنا موافقة عفتها وگمت وقبل لا أوصل لغرفتي سمعت صوت خالتي صبيحة عالي وأمي طلعت عليها
صبيحة ـ وينچ سميعة
سميعه ـ خير خيتي شصاير يا ساتر
ـ وتسوين روحچ ما تدرين شصاير تردين تاخذين أبني من حضني أنتي وبنتچ لعبتن برأسه وسحبتن عقله هذا وحيدي أريد أفرح بي بوحدة أنا أختارها مو أنتي تختاريله بنتچ وتزوجينه على كيفچ ترى أبني مو أبنج
ـ شتحچين يا أم غافر وأنا شعليه بأبنج هو الي يريدها مو أنا غاصبته على بنتـي ولا بنتي بايرة حتى أزگيها لأبنج عيب هالحچي يا خيتي أحنا ربيناهم سوة وبيت واحد
ـ هو هذا الضيم لأن ربيناهم سوة صرتي تعرفين نقطة ضعفه وگمتي تردينه لبنتچ حتى تسترين الحچي الي طلع عليها وما لگيتي غير غافر وشفتي نفسج تملصتي من كلهم وگلتي ضل بس غافر وأجيبه للدرب حتى أزوجه لبنتـي
ـ لا يا أم غافر لا يا خيتي ما مرجية منچ هالكلمة بنتي ألف من يتمناها وما محتاجة تستر نفسها بأبنج وخلص لا تعيدين هالحچي وتوجعين گلبي وتقهريني وأقهرج بالحچي وأبنج عندچ وبنتي عندي كثر الله خيرچ
ـ أنه حجيت من نار گلبـي وگلتلچ بنتچ ما توالمني ما أريدها وأنا أريدله نورس وأبني يمشي ورا شور أمه ليش عفتي كلامي ورحتي على أهلي وتخططون وتزوجونها لغافر وگمتي تجدين غافر جداوه شنهي قحط زلم خلصوا بس أبني وحيدي تريد تبوكينه من حضني
ـ أبوگه أستغفر الله ربي صبيحه شبيج تسودنتي وخوالها شعليهم ترى هو الي مخابرهم ومبلغهم وهو الطالب أيدها من أبوها قبل لا يموت وقاري فاتحتها وأذا ما تصدكين بيه روحي اسألي أبنج لا تذبين بلاچ علينا بنتي مو نايمة على گلبي وأجدي أبنج عيب عليج
نور ـ خالتي نفضت نفسها وطلعت وهي عصبيه أنا بقيت مصدومة وأمي لزمت رأسها وگعدت حسيت بقهر ما ينوصف
ماما فدوة خل أحچي وية غافر وأبلغه إني ما أريد كلامها محسسني إني معيوبه سمعتيها شتگول تسترينها من الحجي الطلع عليها هي خالتي وهيج تحجي شخلت للغريب
سميعه ـ لا ديري بالج ما عليچ منها عوفيها ولا تخابرينه إذا يريد هو يخابر هسه هي تروحله وتحاجي إحنا ما سوينه شي ما كافي صرنا حايط نصيص ياهو اليجي يمد لسانه علينا ما طلعت هاي وعوفيها وعاذرتها لأن وحيدها
نور ـ سگتنا وكلامها يدك برأسي وأندك الباب لينا طلعت تفتحه أجتي خالتي لميعه تفأجئت بيها دخلت شايله أكياس بيدها وباوست لينا خالتي
طلعنا عليها وكفت تباوسني گوه تأخذ النفس خاله شجابج
سميعه ـ يا هـلا بيج خيتي جيتي والله جابج
لميعه ـ چا شلون أعوفجن بهيج يوم حلو تنخطبين يعين خالتج وأنه ما أحضر على بختج نوره أزعل منج ها كلاص ماي متت عطش جنت بالسوك أنه وزهور هاج شوفي هاي الفساتين ياهو اليوالمج وقياسج مدري يعجبج لا ما أعرف ذوقج كلت خاف ما يعجبج ذوقي
نور ـ من فرحتي بيها دمعت عيوني وحضنتها شكراً خاله والله بس جيتج گافي ليش متعبه نفسج وبعدين ما يحتاج خاله
سميعه ـ مشكوره خيتي ما أجازيج والله لا ليش حلوات يخبلن گومي لبسيهن وشوفي ياهو اليعجبج
نور ـ ما البس ماما هذن الوان
لميعه ـ چا تردين تنخطبين بالأسود تسودنتي ولج وتردين تسودين صبيحه فوك سوادينها لبسي يبعد خالتج وكشخي وهذا يوم الفرح ويوم مهم وفال الاسود مو حلو عليج وأذ عالحزن الحزن بالگلب وسميعه أمي وصتني وگالت تجي وتلكي البنات كلهن ذابات الاسود ولابسات الوان
سميعه ـ أن شـاء الله لبنى لينا ماما گومن ذبن الاسود لبسنن ألوان أمي وأنتِ كومي لاتضلين تتصفنين
ـ كعدت وأباوع الفستان بس خاله
ـ هسه شوفي وبعدين تبسبسي هسه تجي حبوبتج تشوفه عليج علمود اذا ما يعجبج أخذج وأجيبلج واحد
ـ ليش حبوبه تحضر المشيه
ـ چا شلون ما تحضر لازم تحضر وكُلنا نحضر وغصبن علينا وعيب من أهل غافر ونسوان عمامه وعماته وأنتِ بنيتنا ننطيج لغافر برفعة الرأس بإهلج ويخوالج وكلنا نحضر أمي وعمتج حربيه وزهور وزينب هم يجن وخوالج وأبوي الشيخ وعمي ياسين وعمي رزاق هم يحضر وحتى خالتج نهاوند هسه ناجح راح يجيبها ويجي
ـ يله گومي شوفي الفستان مو وگت سوالف علمود أسوي شعرج يله نلحك
ـ خاله يمتى لحگتي تروحين السوك ومنو أحذج
ـ بعدين هسه گومي
ـ جاوبيني خاله
ـ نافع ودانا وهو أختارلج الفستان لان ما نعرف ذوقج شتحبين هو گال أخذلها هذن الاثنين ودفع حسابهن
ـ لا ما البس
ـ ليش ما تلبسين شغلة عناد والولد فوك كسرته وضيمه فرحان الج ولصاحبه شتردين بعد
ـ سگتت وضميتها بگلبي وگومتني للغرفه وطلعتهن وأثنينهن حلوات رغن واهسي طافي مو بالألوان كلش بس جبرني كالز فال مو حلو ولبسته لونه ذهبي وتفصيلته حلوه ومرتبه وخالتي صافنه عليه ها حلو
لميعه ـ اللهم صل على محمد عين النبي تحرسج يمه بنيتي اليوم راح تصير عروس شحلاتج يا نويرة شحلاتج تعاي انطيني بوسة ومسحي هالدموع ما أريدچ تبجين أريد وجهچ يشعشع اليوم يوم مهم بحياتچ وغافر يستاهلچ وأمه الوجه يبجي وأنتِ إذا بجيتي شصير بحال غافر خطية لا تزيدينها عليه
ـ يعني دريتي بخالتي صبيحة شسوت
ـ أي درينا چا مو هدت علينا للبيت والله بالگوة سگتناها أمي ونافع رجعوها للبيت ونافع هسة راحلها يحاجيها ويقنعها هو وأمي لأن غافر راح على عمامه وما يدري بسوالفها خبله والله تسودنت
هسة ما علينا منها عوفيها لربچ گومي خلي أحفلچ وجهچ
ـ لا خالة شتحفين فدوة عوفي وجهي
ـ چا بكيفچ وجهچ صاير مثل وجه خالج جاسم گومي لا تعاندين وجهچ ينردله تنظيف
ـ بس وجهي عوفي حواجبي خالة ما أريد أغير شكلهن
ـ ماشي تدللين أي حواجبچ عوفيهن من تقدمين على الكلية ذيچ الساعة حفيهن وغيري شكلچ بكيفچ
حفّتلي وجهي وأني گاعدة على نار روحي ما تقبل بس شسوي كملت وهي تباوعلي برضا وإجتي أمي عيونها مدمعة حضنتني وتبوس بيه
وگامن نظفت ويرتبن البيت هي وخالتي وحدة تساعد الثانية وسوالفهن ما تخلص تحسهم جاي يرممون الأيام اللي ضاعت بالزعل والبعد وگلبو البيت فرح
وأندك الباب طلعت لينا تركض صار أختصاصها الباب دخلت حبوبة وحضنتها وتبوس بيها
الحجيه عطايات ـ يا يمة شكد أحبها هالبنيه
نور ـ دخلت وشفت نافع داخل وياها ويحجي ويه لينا صفنت عليه گلت بگلبي هيج بهالسهوله نافع
دخلت حبوبه باوستني ولمتني بحضنها
الحجيه عطايات ـ ما ريد أوجع گلبج يا بنيتي بس چنت أتمناج لوليدي وغافر هم وليدي والله يسعدج وياه
نور ـ سگتت وخلتها البيت وكعدن يسولفن ودخلنا الغرفة لبست الفستان الذهبي رتبن شكلي وطلعت وحبوبة تصلي على النبي وأمي وراي تبجي بالگوة سگتنها كعدت بصف حبوبة إيدها بيدي تحسسني بالأمان شوي وإجتي خالتي نهاوند وعمتي حربية وبناتها زينب وزهور ونافع رايح جاي يوصل بيهن ويرجع لحد ما وصلوا خوالي كلهن وأجدادي حبيب وياسين ورزاق وعمي محمود وخوالي مشعان ومنعم وباقر وناجح البيت أنترس وگلبي دگاته وصلت لراسي من التوتر
لينا ـ وصلوا بس شو نافع جاي وياهم
نور ـ فز گلبي غصب من ذكرت أسمه مديت راسي شفته يمشي وية غافر ويضحك وياه ذيچ الضحكة الي أعرفها شفتها باهتة ومجروحة ومبينة مال واحد جاي يمثل الفرح على روحه حتى لا يگولون انكسر بس عيونه تحچي كلشي
دخلوا وصفنت بالفراغ صرت أحس كلشي جمد بگلبي وبعيني وكلشي صار بارد تصرفاته نظراته بروده وحتى كلامه الأخير الحجاه وياي تنهدت وگلت بگلبي عادي نور عادي هاي هي بعد كل واحد بينا أخذ نصيبه ويدير ظهره ويعيش حياته رغم كل الحب الي عشناه من هاللحظة شلته من عيني ومن گلبي والدنيا نصيب وأنا مو نصيبه صرت نصيب صاحبه والكسرة الي بگلبي وبگلبه الله هو الي يتولاها ويبرد نارها
روح نافع ربي يعوضك على حسن نيتك وأني مالي ذنب والله مالي ذنب وما ردت أوصلك لهالمرحله من الأذيه أبد والله ما ردتلك الأذيه أني هم نظلمت والله
وضليت أحجي بگلبي لحد ما فززني صوت خالتي لميعه
ـ يله ماما النسوان وصلن سلمي عليهن
نور ـ تمام
أستقبلوهم غافر جايب وياه عمامه وعماته وجديته وخالتي صبيحة وكلهن سلمن عليّ وباوسني بس خالتي صبيحة دخلت كأنما ما شايفة أحد جديتها تكرص بيها وتدفعها وهي لا أبالي دارت وجهها وسكتت كعدت بصف حبوبه
دخلت نورس كاشخه عالأخير سلمت سلام حار وحبوبة تهلي وترحب وخالتي صبيحة باوستها بكل حيلها ونورس منزلت راسها والوجه مطعون
الحجية عطايات ـ تعالي يمة اگعدي يمي هلا بيج هلا بنويرس
نور ـ عبرتني بدون سلام ولا كأنما شايفه كدامها وكعدت بصف خالتي صبيحه ولبنى جابت الماي وگمت وياها للمطبخ ولحگتني أمي
سميعه ـ شفتيها شلون ما سلمت عليچ وخاف تسمعين حچاية من خالتچ سگتي ماما خلي هالساعة تعدي على خير عبالك ذابه روحي عليها وعلى أبنها هيج تاليها أنه تلبسني كدام النسوان ولا چن أختها
نور ـ ماما أي شفت وترى حتى نورس ما سلمت عليّ
سميهة ـ ما عليچ منهن الظاهر صدگ اكو رادة بينهن هي تريد الولد وخالتچ تريدها شعلينا أمي يله شوية نوب جيبي الضيافة وية أختچ ولا تهتمين طنشي
نور ـ راحت ولبنى ولينا جهزن الضيافه وسمعت صوت نافع
نافع ـ يله گملتن ناجح تعال أخذ هاي الصينية
نور ـ ما دخل بس من الباب أخذ الصياني وأني هم
أخذتها من إيد لينا ولبنى شالت الثانية دخلنا نضيف وعيوني صارت بوجوه النسوان نظرات خالتي صبيحة تجرح ونورس مطنگرة وعمتي حربية عيونها أكلتني أكل صفنتها تحيّر نزلت راسي وكل همي تعدي على خير ليش شمسويه وكلهن يباعن عليه عبالك بايگه
گملت ورجعت كعدت بصف أمي ومر الوگت بين النظرات والسوالف والعيون تحجي وزهور تباوعلي وعمتي حربيه تباوع وترجع تندار على نورس وخالتي صبيحه ما سمعتلها صوت وعمات غافر يحجن وفرحانات الا هي
وشفت خالتي لميعه گامت من مكانها وبلمحة عين شفت نافع شايل عباية وانطاها الها وجابتها خلتها على راسي
لميعه ـ گومي وياي يعقدون الكم
نور ـ مشيت وراها وخالي مشعان لزمني من إيدي بهاللحظة حسيت بقهره تأكل بيه والله تمنيت أبوية موجود بهاللحظه تمنيت يحضني خالي مشعان حضنني من أجتافي حضن أب لبنته ودمعت عيوني دخلت ما أشوف شي بس گعدوني بصف جدي حبيب
ما أشوف شي بس من الهيئة الجسم عرفته هو الواكف بصف خالي مشعان شاهد على لحظه عقدي على صاحبه غمضت عيوني وجريت حسره وسلمت أمري وگلبي لله سبحانه وتعالى يفتحها بوجهي ويسهل أمري ويتولى گلبي
وصار الكلام وأردد وتمت العقد وصرت من نصيب غافر
طلعت بوسط مباركات الزلم الهلاهل وعماته طشن الجگليت عليه وفرحانات وبهذيج اللحظه گلبي انعصر عصر وحسيت بغصة ردت أبويه حيل أحتاجيته حيل عيوني تدور عليه بين الزلم وتخيلته مبتسم ومرتضي وهمست بيني وبين نفسي هذا هو بابا صار التريده والتتمناه نام وأرتاح بگبرك
وفجأه صوت حربية عالي
حربية ـ لا تهلهلن أبوها يله صارله 6 أشهر من مات شدافنين رأس بصل
الحجية عطايات ـ حربيه مالچ حگ من حقهم يفرحون بأبنهم عيب عليچ سگتي الي أسمع صوتها ما تلوم إلا نفسها هلهلن يمه الولد أبنكم من حقكم تفرحون مالجن دخل بحچيها
سميحه عمة غافر ـ لا حجيه حقكم علينا والله غافر نبه علينا بس أني أحبه وأعزه حيل وما كدرت ما أهلهل وأفرحله هذا أبن كاظم غالي علينا ومن ريحته وأعذرونا والله يرحم أبوها
نور ـ كعدنا وفرحانات وحسيت بلحظات فرح سبحان من سكني هالشعور رغم نظرات خالتي اليه بس حبوبه وخالاتي فرحانات وياي من كل كلبهن وأبد ما قصرن
وگالوا راح يچي هنا گلبي يدگ بكل سرعته توترت حيل ماما لزمت إيدها وتقربت همستلي
سميعه ـ شبيج حبيبتي شجاج گمتي تموتين قابل غريب لما كظيتي طفولتج وياه ومبارك يمه مبارك
نور ـ الله يبارك بيج وخالتي لميعه سحبت الشال من رأسي ونزل شعري ودخل هو وگامن عماته يباركن اله ويبوسن بي وحبوبه هم وبعد عني بمسافه وأندار وصفن عليه نظرته كل حب وفرح تقدم باسني من رأسي وطول بوسته وصفن بعيوني
غافر ـ مبارك علينا
نور ـ الله يبارك بعمرك
كعد بصفي وعماته يسولفن وياه ويحجي ويتنهد ويباوعلي نظرته عميقه أني بس مبتسمه بوجهه عكس النار البصدري
وگام ما طول وخالتي گامت وراه وگف مسافه وعيونه عليه وأشرلي وگمت وراه وهو أبتسملي وشافتني خالتي خزرتني وأنطتني ظهرها
صبيحه ـ يله خل نمشي گملتوا العقد وأريد أرجع أطبخ عشه لعماتك وعمامك شوگت الحك
غافر ـ يمه فدوة أروحلچ أصبري شعندج مستعجله وبعدهم كاعدين بعدنا بسم الله والعشه شايلته هم من هسه شگو ياعيني روحي كعدي وأرتاحي أني أجيب من المطعم
ـ أي يمه من هسه حضر نفسك وشد حزامك للأكل المطاعم يله روح يم خوالك من تگومون گولي
نور ـ رجعت وهو باوع عليها وجر حسره وسگت تقدمت غافر صحتلي رايد شي صفن وهو مبتسم
غافر ـ شريد بعد دام حصلتج وصرتي اليه خلص ما أريد گلشي أكتفيت بس شوفتج كافي عندي
ـ نزلت رأسي مستحيه منه وهو صافن وأني أتهرب من نظراته وسمعت صاحوا عليه
ناجح ـ غافر وينك
غافر ـ يله عيني أروح يم الزلم
نور ـ تمام أخذ راحتك راح ورجعت كعدت بصف أمي وشويه وگامن النسوان وحبوبه جلبت بخالتي وگامت تحجي عليها
الحجيه عطايات ـ شبيج وجهج مگلوب وماده بوزج لما وليدج هذا وحيدج كظيتي الكعده الوجه ينفث دخان
صبيحه ـ شبيه يمه ما بيه الا الخير شريد بعد أبني وخطبتله بس مو الأريدها هو اليريد
ـ وأنتِ التتزوجينها لو هو خلص دام هو اليريد صمي حلگج وصيري أدمي صبيحه لاتسويله مشاكل هو هالواحد من كثر خلفتج لما حاجيتج بس عبس
ـ أن شـاء الله يمه
نور ـ طلعن وخوالي هم گاموا وطلعتني أمي على خوالي سلمت عليهم وخالي مشعان شبگني وباسني شگد أحب حنيته عليه
مشعان ـ الله يسعدج خالي أنتِ عزيزه خوالچ
نور ـ تسلم خالو
كعدوا شوي وترخصو وبالطلعه أجه نافع من برا يمشي على كيف وصاح على لينا
نافع ـ لينا كلاص ماي
نور ـ طلعت نورس وخالي يحجي وياها ومبين عصبي
نافع ـ يله نمشي
الحجيه عطايات ـ أي يمه يله حربيه صيحي البنات يله يمه مبارك عليج والله يسعدكم
نور ـ الله يبارك بعمرج حبوبه باوستني وصار كدامي جگارته بأيده وحجه وهو منزل رأسه للكاع
نافع ـ حبوبه راح أشغل السياره كدامكم كملن وتعالن
الحجيه عطايات ـ أي يمه هسع ولج حربيه لميعه وين صرتن
نور ـ دخلت عليهن وشفت عمتي واكفه تحجي ويه عمي محمود وهو منزل رأسه ويسمعلها
حربيه ـ چا شگو عقدت عليها أذا ما تبات هنا وبناتك حاجيهن وهي بس نورس ما راضيه أنه أحاجيها وافهمها
لما يتعودن
محمود ـ هو محد شالع گلبي غير نورس
نور ـ عبرتهم وباوست خالاتي وطلعن ونورس راحت وياهم وخالي محمود ضل يمنا ما راح بس كاعد يچر جگاير وأمي تكبكب وتستحي من عنده
لمينا الهوسه ولليل أجييت أنام لگيت من عنده رساله
غافر ـ نورتي حياتي حبيبتي وكل خطوة الف هلا بيج بحياة غافر وأهله
ـ من بعد نورك تسلم
ـ الله يسلمج اليوم من فرحتي حتى الكلام ضاع حاير ومحتار شگتبلج وبشنو أحاچيج دايخ والله بس أحلى دوخه
ـ ضليت صافنه على رسالته ما كتبت شي رجع دزلي
ـ الحمدلله والشكر عدت على خير
ـ هم ما جاوبت
ـ لا تخلين الخجل يمنعچ تحچين وياي أنا أريدچ تكونين وياي على طبيعتچ مثل قبل
ـ تمام
ـ راح وبقيت صافنه على كلامه وتالي نمت كعدت مخنوگه فتحت موبايلي باوعت على حسابه نايم من زمان وصار نافع گبالي نشط الأن وگمت طلعت برا
شفت عمي محمود بايت يمنا بس بالأستقبال دگيت الباب على أمي گبل فتحته ماما كاعده
سميعه ـ ليش يجيني النوم عمج اليوم هنا بايت
ـ ها وهم حجيتو
ـ لا بس هو ضايج من ورا بناته ما راضيات ونورس تريد منه يطلگني اليسمعها گاتله نفسي علما أتزوجه أني شلي بهالطلابه روحي نامي لايكعد عمج يگول تشكي لبنتها عيب من عنده
ـ رجعت لغرفتي ضليت كاعده أفكر بأمي وافكر بحياتي الجايه يارب سهل كل أمور حياتي
ومر كم يوم على يوم عقد السيد واليوم نثبت زواجنا بالمحكمه طلعت أحلى لبسه عندي لبستها وگفت أرتب نفسي وهو يتصل ورن الجرس وصل جاوبته ها غافر
غافر ـ ها حبيبي گملتي أجي لو بعدج
ـ لا گملت ما عندي شي
ـ لاتنخبصين أخذي راحتج
ـ لا والله ما عندي شي
ـ تمام حبيبي شويه وأجي
ـ هلا بيك وأجتي ماما
سميعه ـ ها ماما گملتي
نور ـ أي ماما باوعتلها شو ما لابسه شنو ما تروحين
وياي
ـ وين أعوف أخواتج وعمج عنده دوام خابرني ما يگدر يجي بس خالج مشعان گال يروح وياج
ـ لا فدوه ماما شلون بهيج يوم تعوفيني
ـ ما أعوفج أمي خل يجيني خالج وأفهم منه بلكي يجيبلي لميعه ما أكدر أعوفهن لوحدهن
ـ تمام
طلعت ولينا وگفت تخلي لمساتها خرب كافي تخلين حمره ما أحب ولج ما اريد أخلي مكياج
لينا ـ أدري المسكين متزوج جديتي شوي خلي من للمع ولو أنت حلوه ما تحتاج
ـ فدوه مو بحلاتج
سمعنا صوت الجرس ميثم طلع ودخلت خالتي لميعه هلا باوستها ودخلت تحجي ويه أمي ولبست عالسريع ها تروحين مو
ـ أي ماما أروح لميعه مشعان جابج مو يروح ويانا
لميعه ـ لا مشعان عنده شغل نافع يروح وياجن
نور ـ سگتت وغافر أتصل ها عيني
غافر ـ گملتي أجي
نور ـ تعال ننتظرك
طلعنا أني وأمي ونافع واكف يم الباب أمي سلمت عليه وگفت تحجي وياه وأني واكفه عالصفحه وأجه غافر دگ هورن وصعدنا أني وأمي ليورا ونافع ليكدام
طول الطريق يحجون بينهم طبيعي مثل قبل يارب أهم شي علاقتهم ما تخرب بسببي صافنه عالشارع وكل شويه الكاه يباوعلي ومبتسم علما وصلنا المحكمه
نزل وأشرلي أصير ورا ومشيت بصفه ونافع وأمي كدامنا نافع يمشي أسرع من عدنا وجگارته قبل لا ندخل طفاها وباوعلنا نظرته گبل صارت على غافر
نافع ـ شُنو الأجراءات مضبط وضعك لان أني گلشي ماعرف أعذرني ما متزوج قبل جان خدمتك بعيوني
غافر ـ لا حبيبي ما تقصر أي مضبط أموري وسهله أن شـاءالله حالنا حال العالم
نور ـ دخلنا وغافر دخل قبلنا علمود الإجراءات وأحنه كعدنا ونافع واكف يمنا بس حيل محترم نفسه وأني هم محترمه نفسي وكلمن يلتفت على حياته بعد خلص
بقينا ننتظر وأجه عمي محمود مستعجل وگف ويانا
لما دزوا علينا ودخلنا وصار كلام القاضي لما كملنا الإجراءات وثبتنا العقد بالمحكمه بس تأخرنا لان أزدحامات وهوسه كلش
وعمي محمود بس كمل العقد ما شفناه وأمي سگتت
واحنه طالعين يحجي هو وياه
نافع ـ على هالهوسه بطلت ما أتزوج لو أتزوج ورة الزواج أثبت بالمحكمه مو أحسن شتگول
غافر ـ وبنت الناس شيقنعها وين لاگي هالكلاوات نافع
ـ ولا تقنع على أساس كاتل نفسي عالزواج
نور ـ وطلعنا للبيت وغافر عزمنا عالغده بس أمي ما قبلت
سميعه ـ أني وصلني البيت وأنتوا شباب روحوا تغدوا ما احب هوسة المطاعم
غافر ـ ليش خاله البركه بيج وهم غيري جو
سميعه ـ لا يمه دخيلك وخالتك لوحدها خطيه روحوا يمه
نافع ـ أني هم وياج خاله
غافر ـ لا أنت وين والله ما تروح عزمتك ترد عزيمتي
نافع ـ أني شگو ياعيني روحوا سوه وبعدين مو تعرفني أني واكل المطاعم مو صحبه من أخر مره وصينا وكشت نفسي
ـ صخم الله جذبك تضرب زريك من واحد يعزمك تعلمني بيك أوصل عمتي وتمشي ويانا وحجايه زايده ما أسمع منك
نور ـ وصل أمي وطلعنا للمطعم وطول الطريق حسيت غافر يراقب نافع عيونه كل شوي تباوعله ما أدري ليش أجاني أحساس غافر عنده علم أو حاس لدرجه نافع ما ميل رأسه أبد وحسيته متوتر وما راد يروح ويانا بس لخاطر غافر ما كسر خاطره
وصلنا المطعم ونافع مشىٰ قبلنا يارب ليش هيج يصير والله ما أريدله هالعذاب مشيت بصف غافر وكعدنا ونافع مقابلنا بس منزل رأسه يگلب بموبايله وبدأ يحجون على شنو يطلبون أكل باوعت على غافر ونباوع عالمينو ونختار
نافع ـ ها شقررتوا لان جوعان وأنتوا سالفتكم مطوله ونور هسه تطلبلي بيتزا واكل مال جهال واني وياك ما يوالمنا غير الهبيط
غافر ـ هم صدك هي طلبت بيتزا يله نوصيلج على بيتزا وأني ونافع على تشريب شتگول نافع اليوم نطلع قهر عاصف مو يگول علينا فكريات
ـ ماكو فكري غيره أبو الاندومي ما تخليني ساكت لحد الان ضامها بگلبي وحالف بس أشوفه الا أنوم صينية الثريد برأسه والا اعزمه بعرسك واخلي يم الطباخ وأذا حجه حجايه وحده انومه بالجدر
ـ أي بالله وماكو فرق محد يعرف لحم ***لان هو عباره عن حميس الكواد مربي ***على الاندومي وخبز اليابس
نور ـ خرب سينما ويضحكون وضحگوني وياهم وباوعلي
غافر لازم عاصف سمين
غافر ـ الله لايشوفه لمتنسيه يا سمين هههههه
نور ـ من كثر ما ضحك كام ما يكدر يحجي ونافع غص
يحجي بالأشاره
نافع ـ دگول سمين
غافر ـ نافع تخيل نور بس تشوفه گبل تطلگني
نافع ـ والعباس تتبرى من عدنا أثنينا لا انوب أسمه عاصف معصف ومعطب من كاعه بربك غافر أعزمه بعرسك بشرفك نتونس عليه حتى مطرب ما أجيبلك اخلي هو يردحلك ب***
ـ هو هم هيج خرب بيومه شمضحكه لا مو وگتها دخيل الحمزه نافع كظ شواربك أنزلمنا لا يالكعبه أكيد أمي دعت عليه والعباس أمي دعت عليه والله أستجاب بساعتها ودزلي عاصف
نور ـ يضحكون ومتونسه على سوالفهم وغافر تغيرت ملامح وجه ولزم شواربه وصد وجهه عليه ويلم بشفايفه ونافع هم حصروا نفسهم شگو شبيكم انحصرتو أثنينكم
كتموا الضحكه بالگوه
غافر ـ سگتي المدير مالتنا ورانا خرب بيومك
نافع ـ هذا قاسم شور بينا ودزلنا المدير فدمره ماكو هيج والله غافر گوم روحله وسلم عليه واطلب اله الغده واني أدفع الحساب والله ما طلع غده هذا خساره شورطني واجييت وياكم
ولك صار مقابلنا ما بيها مجال نفلت والله اذا غلسنا گبل فصل عام واحنه تعيين بالجداوه يديحنا بالشوارع وعلي
نور ـ هو هذا عاصف هذا هم سمين ونفس ما وصفتو اني حجيت هيج لو هذول انبعجب بطونهم نافع كام يطفر بوجهي تفال وغافر جعصني كوه ساد حلكه
هو مو...
غافر ـ نوب علينا هاي دليل صوتي شيگتها يالحمزه راح اروحله واذا سالني عليك شگوله يله انت انفصل عادي بعدك عزابي تدبر نفسك بس اني راح اتزوج وراي مسؤوليات گومه
ـ أي حليب وحفاظات الطم بعد دمشي دعبله وخل نمشي سد نفسي عن الأكل
نور ـ گام ويعدل بملابسه وگوه لازم روحه ونافع يعدل بقميصه وكعدته وأختفت ضحكته من باوعلي وصفن بوجهي لحظات وتدارك نفسه گبل نزلت عينه وبـلع ريگه بـصعوبة ودار وجهه عني وهو يباوع للعيون الي چانت بـيوم من الأيام كل دنيته بس هالمرة چانت نظرته خالية ما بيها غير الخيبة وعتب ثگيل يهد الحيل حچى بـصوت ناصي حاد وبيه رجفة عصبية ووجع مكتوم
نافع ـ نور لا تـتأملين مني بـيوم أحط عيني بـعينچ وأخون صاحبي وماضيچ العشتيه وياي روحي أحفريله حفرة بـإيدچ وطمّيه لأن أصلاً ما يستاهل ينذكر ولو بعدچ تظمينه بگلبچ أحب أگولچ هالشي مات وأنتهى وأحترگت ورقتنا ولا تلفتين وراچ بعد
نور ـ ما جاوبته ولا گدرت أحط عيني بعينه بس أنتقلت نظرتي لأصابعه يضرب الميز بحركه مليانه عتب ونبرة صوته صارت أثگل ومكسور بس كبريائه بـالسما وگمل كلامه وهو يگول
ـ وأمانة يانور راح أخليها بـرگبتچ وأوصيچ بيها للموت غافر خلّيه بـمكان نظيف بـحياتچ ومكان يستاهله ويستاهل منچ صدگ تحبينه وتدارينه بـرموش عيونچ هذا الزلمة روحي ونفسي اليصعد وينزل بـصدري وأعزه أكثر من أخوي الصدگ الجابته أمي ديري بالچ عليه وعلاقتي بيه ما أريدها تخرب ولا تنهز بـسببچ
لـهذا السبب بـعدي عيونچ عني شگد ما تكدرين يا بنت خالي وأستري على نفسچ وأستري عليه هو الباقي الچ وسندچ وأنه الرايح من چفوفچ ومن دربچ والدنيا نصيب مثل ما تفضلتي حضرتچ وبـصمتي عليها ترى ما ناسي كلامج بذاك اليوم
نور ـ سكت لثواني يحاول يبلع الغصة الي وگفت بـبلعومه ومنعته يتنفس بـراحتة والمطعم ضاگ بـعينه رجع تقرب شوية ليگدام وهز رأسه وهو يباوع للأرض بـضحكة هزلية مكسورة
نافع ـ وإذا الدنيا ضاگت بـيچ بيوم وأحتاجيتي أحد خليها بـبالچ أنه موجود أسندچ بـروحي وسند أخو لأخيته الصدگ أحسبيني أخوچ الچبير صديق طفولتچ وصباج وسند چتفچ أذا مال بس غير هالشي لا تجيني ولا توصلين باب گلبي بعد
ولو أنه متأكد ما راح تحتاجيني ولا راح تجين لأن غافر كفو وزلمة معدل وما راح يقصر وياچ والحمدلله صرتي من نصيبه مو من نصيب غيره ع الأقل أكون ضامن اليأخذچ يتنفس حروف أسمچ ويقدرچ بـروحه ويصونچ بـعيونه
لمعت عيونه بـدموع حبسها بـكل كبرياء وبتر كلامه بـلوم لـروحه وحسرة واضحه من صوته
ـ يجوز أنه ما أستاهلچ وما داريت نعمتي وشوفت عيونچ الله طيّرها من إيدي وأنطاها لـشخص نظيف صبر ونال على صبره نور تنوّر ظلمته العاشها وحيد من بعد وفاة أبوه
سكت شوية وتقرب لـلطاولة أكثر وصار صوته أضعف بـس بـيه قساوة إنسان يريد يجبر روحه ويجبربني ع النسيان كمل بـهمس محروگ
ـ أنسيني نور أنسي حبيب طفولتچ وأيام أصباچ كلها وأنتِ تستاهلين تعيشين حياة حلوة ومستقرة مثل عيونچ بـالضبط ولايگين لبعض ورب الـكون لايگين وشــريد من الدنيا بعد أخوي وصاحبي وصديق عمري راح ياخذ صديقة طفولتي والي چانت بـيوم كل ناسي
يحجي وأني ما نطقت حرف بس عْـيُــــونِي لمحت خيال غافر صار على بعد خطوات وهو راجع تسارعت دگات گلبي ونافع بسرعه عدل گعدته وأخذ نفس طويل وعميق چن عمره كله يمر بـهالنفس ومسح طرف عينه بـسرعة بـطرف أصبعه قبل لا يلمح غافر وختم كلامه بـهمس سريع وابتسامة وجع تلوگ لـخسارته الچبيره
ـ مـبارك عليچ غافر وگلبه الطيب وأنه مبارك عليه خسارتچ بـالخير عليكم وعساها عشرة عمر دايمة يا بنت خالي
نور ـ سگتنا وغافر وصلنا وتركيزه جان عليّ كعد بصفي وأيدي على رجليه تقرب حضنها بجفه بحنيه
غافر ـ ها تأخرت عليكم بس الأفندي ما قبل ماعرف شعجب يمكن شبعان لو داهن زردومه بأكله دسمه
نافع ـ يا دسم يمعود تلكي عالعشه مال البارحه شعجب ما ضل هذا فكري ابن فكري يموت عالبلاش
ـ والله عزمته ما قبل گال عزيمتك واصله وباركلي ويسلم عليك يگول باجر خل يجيني من الـ6
ـ لا بربك شعندي بـ6 أصلي بي صلاة الجماعه أدري من كفار قريش شدعوه هلكد قاسي عليه جان گلتله مريض بلكي ينقهر عليه ويعفي عني
ـ عبالك ما گتله گال هذا ابو صفار يجي من السم الزايد وهو سماني ويوصيك يگول لايأكل لحم موزين على ابو صفار خوش عنده معلومات دكتور درجه أولى
ـ بيطري غير موخوش سالفه هذا الله مخلي بالدنيا يسجل مواقف على البشريه بله ما تسد سالفته وفضنا بالعزيمه مالتك وين صارت غافر هبيط هبيط اريد اطلع قهر عاصف من عصفو بي ان شاء الله بجاه الحسين
ـ خرب بيومك لا يرجعلك وگبل فصل عام
نور ـ يحجون ويضحكون على مديرهم وطلبوا الأكل وأكلنا وشربنا الچاي
نافع ـ يابه مشكورين عالعزيمه ونردها الكم وهسه نرفع الزحمه ونخليكم
غافر ـ حبيبي تدلل بالعافيه
نافع ـ الله يعافيك وأروح گبل أنام لان وراي كعده من الـ6 تخيل أذا ما اروحله عالموعد شيسوي بيه يحير شلون يتفنن بعذابي أخ بويه مشعان والله كاظ روحي واخلاقي ما نازعها وياه لخاطر التعيين وعلي مذله
ـ تستاهل هذا اليتعين بالواسطه
ـ أسكت لا اطلع قهر عاصف بيك وأطلع الهبيط من خشمك ديله فيمالا
ـ الله وياك حبيبي
نور ـ راح وغافر باوعلي وتنهد ورتچى ع الكرسي وصفن بوجهي نزلت راسي خجلانة منه وأريد أتهرب من نظراته گلتله أروح للمغاسل
غافر ـ ماشي عيني اخذي راحتج
نور ـ شلت جنطتي وگمت وأني أمشي لمحت خيال نافع بعده واكف يم باب المطعم ردت أركز زين وأختفى رجعت باوعت على غافر لكيته يباوع بموبايله رحت للمغاسل ورجعت لكيته منتظرني گام وگال
غافر ـ ها عيني نروح لو بعدج تريدين تضلين
نور ـ لا عادي
تقرب مني ولزمني من أيدي ومشينا للبيت والطريق كله هدوء بس غافر كسر الصمت وفتح موضوع التقديم عالكلية
غافر ـ أقدملج هسه قبل لا نتزوج منا لما تطلع سنوية عمي شتگولين عيني
ـ لا ما أريد هالسنة أقدم خليها عالسنة التجي أحسن
ـ التشوفينه عيني يله من تجين يمي أقدملج وتدللين
ـ غافر
ـ ها يابه گولي
ـ يعني ما عندك مانع على دراستي
ـ مانع على دراستج ليش حبيبي أصلاً هذا حقج
ـ يعني
ـ لا ما عندي أي مانع كملي هذا تعبج ومن حقج تدرسين لا تشيلين هم لهالسالفة 4 سنوات غمض فتح وتخلص وأكدر أقدملج معهد بس بصراحة ما أحب قسم الصحة
ـ قصدك معهد طبي
ـ أي بس خلينا عالتربية أحسن تفيدج وتفيدني
ـ الله كريم وصلني للبيت باي
ـ باي ولو ما شبعت شوف بس يله
ـ سديت الباب ودخلت وهو راح ولكيت عمي محمود بالبيت جاي يتغدى وجهه مگلوب
سلمت وما رد السلام وأمي واگفة وعاضة شفايفها عفتها ولحگتني شكو شبي رجلج وجهه ما يگصه سيف
سميعه ـ رجاجه غير گلب الدنيا على روسنا لأن عفتج وياهم وأجيت يبوو شخرط خرط فضحنا مو زين هسه سكت
نور ـ شكو قابل ترى خطيبي ما بايكة لا يعيش الدور زايد أني ما طالعة وية غريب نافع ابن خالي وغافر خطيبي
ـ سكتي لا يسمعج
محمود ـ سميعه وينچ
سميعه ـ أي أبو نورس أجيت
نور ـ راحتله ركض خرب أمي شكد تخاف هذا مبين عليه ما يتعاشر وسمعت صوته يصيح
محمود ـ فهمي بنتج لا تضل طلعات وطبات هي وغافر وعلى حل شعرها كطعت مهر تگعد وتنجب لما يكمل شغله ويجي ياخذها ونفتك
سميعه ـ أي إن شاء الله أبو نورس
نور ـ سمعت طبة الباب وطلعت ركض كبيت بيها شبيج خايفة ما تحچين صدك ماما شدعواج
سميعه ـ شسويله ماما غير لو سامعته قبل لا تجين شال البيت بصوته والله وأخواتج كرصن بالغرفة من الخوف ليش أكدر أحچي بلعت لساني وسكتت ونخيت الف إمام لما وصلتي نوب خابر عليج نافع وگاله رجعت البيت وتخبل خبال
نور ـ خبال يخبله هذا مسودن ناقصه مخابيل بحياتي هو مو مولي بيته شكو يجي لهنا وأصلاً هالعقد ماله لازم هيج طربگة من خوالي هو ما لافي بس يجي يترس كرشه وتغسلين ملابسه وتكوين يلبس ويكشخ ويطلع على ك*اب مالته لا عبالج ماعرف سوالفه ومع ذلك وافقتي على شنو وافقتي ما أدري على جعجعته وصوته العالي
ـ لاتضلين تلومين بيه وتأكلين گلبي شمدريني
ـ لا والله زين تدرين بس أنتِ خفتي على ميثم ضحيتي بنفسج علموده وهو باجر يكبر ويضل هذا نافش ريشه ويشلع گلبج سگتت وكعدت تبجي أخذتها بحضني والله مو قصدي أسفه حقج عليه
ـ لا أنتِ شعليج بس
ـ بس شُــنو ليش سگتي ماما أحجي
ـ أحس بعمج يريد مني حقوق ما أدري بس حسيت بي
ـ يعني يريد يتمم زواجه
ـ هو ما گال بس نظراته ويصفن من يشوفني وأني ما أريده خيال أبوج وروحه بعدها وياي بالغرفه
ـ تحجي وتبجي والله ما ردت هالزواج شگول عليك جدي وتالي
ـ ما أدري خالتج تگولي ميخالف سنة الحياة وتقربي منه وكسبي هو بس هوسه من داخل گلبه طيب وحنين مدري تريد تلعب بعقلي واني متخبله منه من يجي لما يروح اختم القران
ـ ما أدري شگولج ماعرف
ـ نامي وأرتاحي هي تصفى أكوم أغسل مواعين تغديتي زين أصبلج
ـ لاتغديت راحت وكعدت صافنه عليها وعلى حالها وين جانتلج هاي ماما الله يكون بعونج
لبنى ـ دخلنا البيت ونصدمت بالترتيب صدك بيت شيوخ جنت أسمع عنها بس ما شايفتها للامانه أول مره دخلت والطرمه تلمع هسه مغسوله تلگنا نسوان يهلن بينا ودخلت غرفة خالتي لميعه غيرت ملابسي وبقيت كاعده مستحيه أطلع وشفت أم باقر تبين حبابه
لميعه ـ تعاي لبنى طلعي شوفي گبل كرصتي بالغرفه
لبنى ـ طلعت وياها وگفت يمهن بالمطبخ يشتغلن وأني راجعه صار بوجهي بلعت ريگ أريد أنهزم منه بس وين أولي
باقر ـ وين جنتي أدور عليج
ـ أستغربت وقبل لا احجي گال
ـ أريد أحجي وياج
ـ بشنو وأفرك بإيديه وأباوع لا أحد يجينا لان مطبخهم معزول عن البيت اكو ساحه فارغه اني بنصها وهو متوتر أكثر مني غير يحجي ويفضني
ـ أدري بيج تخافين من نافع ومن غير نافع بس بعد ما يحتاج تخافين أي باوعيلي خل أشوف عيونج الأحبهن
ـ بلعت ريگ ردت أمشي صار بطريقي باقر لا أحد يشوفنا ويفكر غير تفكير
ـ شيفكر مثلاً أكو شي بينا خل يفكرون دام راح تصيرين حلالي
ـ صفنت بوجهه وهو مبتسم
ـ يا بنت الناس أنه هاويج ورايدج تصيرين حرمتي ومن زمان ردت أتقدملج بس صارت ظروف ووفاة والدچ الله يرحمه أخرني والا جان من زمان أنت حرمتي بس كل تأخيره بيها خيره وهسه طالب أيدج على سنة الله ورسوله لبنى موافقه علمود من تصير الكعده أطلبج من عمامج
گبل نزلت رأسي وهو يحجي وأني العرك يصب من وجهي وريگي يبس گمل ومسحت وجهي ومشيت سريع وصاح وراي
ـ لبنى أحلى أسم أسمج
ـ عفته أريد مكان أنهزم بي وحياطيين القصر كلها ما تلمني هيج گلبي يريد يشگ صدري ويطلع شگول باقر غير لساني بلعته أخرسيت كدامك
دخلت الغرفه وضليت صافنه وأتخيله شلون يحجي وحيلي يرجف مستحيه حتى من نفسي وضليت كاعده ومن الهبطه نزلت عليه الشهريه والوجع يأكل بيه شكد يوقت نحس وضليت نايمه ولينا ضلت يمي تروح وتجي
وگمت قبل لايصبون العشه عيب يضلون يسألون شبيها وشبيها وهو يضل باله ما أريد أشغله باله
طلعت للمغاسل أغسل وأجتني أمه
وهبيه ـ لبنى أريد أحجي وياج
لبنى ـ گلبي نغزني أي گولي خاله
وهبيه ـ عندي وياج حجايتين أكولهن الج وأمشي شوفي يا بنت الناس أنتِ كل قصور ما بيج لان توصلني أخبارج وأبني باقر رايدج وهاويج وساكنه گلبه بس خليها أبالج أنه ما أريدج مره لأبني أنتِ وراج طلايب جثيره وعمامج وولد عمامج يأكلون الوجه وراعين مشاكل وموخوش أوادم وأنه گلبي مجوي على أبني الجبير حاطه عيني بعين الله يحرسه ويحفظه اليه
يا بنتي فكري زين الزواج مو من أول هده وأنتِ الف من يتمناج وأبني الله يعوضه وباجر عگبه أزوجه وينساج
لبنى ـ گالت العدها مثل الضربتني على رأسي خلتني مسطوره سطر حتى ما حجيت حرف ودخت دوخة زماني بهالسالفه يعني أمه ما تريدني
گبل رجعت الغرفة أنهزمت بس تجي خالتي أكوللها خل نرجع لبيتنا غير لو تفض هالطلابه وأرجع لغرفتي شجابني على هالقهر هذا نوب أمه يعني گايللها
ضليت كاعده بغرفة خالتي لميعه وأسمع صوتهم برى يصيحون عليه لميت نفسي ودخلت عليه لينا گوه تجر النفس
لينا ـ ولج أنخطبتي خطبج الثكيل الخوش زلمه أنخوك طكيتي لبلب طگيتي ما تأخذين الا من العسكريين ولو أنتي من شكلج ذوق العسكري ما تشوفين باقر وكع على وجهه جفي ومحد سمى عليه
شمرت عليها المخده وهي فرحانه وتهزلي بحواجبها
ـ يحبيب قلبي لبلبي خطبها الثكيل خطبها من دواوين الشيوخ سواها شيخ الشباب وطبق مقوله الدخيل ما يطلع اذا ما يتكبع برأس الشيخ وأنتِ راح تكبعين برأس اخو الشيخ
ـ أذا ما تسگتين أطيح حظج وتردي أنتِ أخذي وخلصيني
ـ شُنو ماما أخذه هو واكع بيدي وكايله لا بس هو يريدج الج لا باقر مو قياساتي ولا ذوقي اني طربي على ناس مو بهذا الكوكب هيج اريد شي مو تقليدي ما أدري ذوقي صعب
ـ طاح حظج أنتِ وذوقج يا أدبسزز شو ما تستحين
ـ شگو بيها ترى هاي سنة الحياة حبيبتي وتزوجي شكو كلبتي خلقتج ومعصبه عشتوا فوك ما حصلتي رجال وهم حلو وهم ابن شيوخ وهم عسكري وهم ما عاجب الخاتون صدك ينطي جوز للماعنده سنون وانتِ عقل ما عندح مو بس سنون
ـ گمت أبجي عوفيني بحالي لينا ما ناقصتج
ـ لبلب تبجين أحجيلي شبيج شگو عيني أنتِ
ـ منو گلج خطبني
ـ نافع دزلي رساله وگال الصيني خطبها باقر
ـ منو الصيني أني
ـ هههههه أي أنتِ ناصب عليج لان بهالفتره سمنتي يكول عيونها مدحوسه من السمن
ـ خرب بيومج وبيومه وأنتِ حضرتج متونسه على سوالفه يصنف عليه مو من طاح حظج من بين الأخوات
ـ لا كبر ترى والله يشاقي قابل صدك وأنتِ شحلاتج أصلاً الصين يستوردن من جمالج جمال
ـ كفختها على رأسها أذا ما تكومين أفرغ قهري كله بيج
ـ لا مبين السالفه ثخينه تعالي أحجيلي شبيج
ـ أمه.. أم باقر
ـ شبيها الثانيه ما ناقصه حيايا أضيفهن لقاموسي لان قبطت والله ماكو ما استقبل ولا نفر
ـ مو وگت تفاهتج بس حجت وياي وطلعت ما تريدني
ـ هسه ما علينا بعدين نفكرلها علينا بيج أنتِ تردينه يعني موافقه
ـ سگتت وصفنت ما أدري
ـ لبلب عليج الله گولي لا تستحين أنتِ تحبينه يعني گلبج ما بي مشاعر منا منا
ـ وأنتِ شمعرفج بالحب والمشاعر ليكون تحبين
ـ لا شحب ويني وين الحب
ـ أكيد لينا
ـ أي شبيج قابل أكذب عليج
ـ ونافع
ـ شبي نافع
ـ ترى عيوني عليج وشايفتج شلون مهتمه بي ديري بالج لينا درب الحب وسوالفه خليج بعيده عنه وأذا عليه أني لا حبيته ولا حجيت وياه مجرد شفته كم مره وبس
ـ أي وأني شحاجيه والله ماكو شيء بگلبي من يصير أول وحده أكلج وأجيب نعال وياي
ـ شتسوين بالنعال
ـ علمود تضربيني بي غير
ـ ضربتها على رأسها من طاح حظح وحظ سوالفج
ـ هسه شگلتي موافقه
ـ ما أدري سگتت وأندك الباب ودخلت خالتي سميعه عرفت دزوها خرب گملت عليج لبنى .
سميعه ـ لينا ماما طلعي أريد أحجي ويه أختج
لينا ـ خاله شهل الأحترامات والله ما متعلمه عليچ تحترميني
سميعه ـ مو رعنه متعلمه على التكفخ وأنتِ هذا دواج
لبنى ـ طلعت وأجتي خالتي حجت وياي وبقيت ساكته
سميعه ـ أبن أخوي وأعرفه وأنه ربيته على أيدي باقر خوش باقر وأخلاقه تشهدله شگولج هو أحسن أخوته
لبنى ـ خاله هو مو بالولد
ـ چا عليمن تبجين شبيج ماما أنتِ هم حسبة نور صح بالبدايه ما ردتجن أسباب تخصني بس هسه لا والله بالي وتفكيري كله بيجن وقسمتج خوش قسمه والعرفته من أمي ما تسكنين هنا لان هو دوامه بالولايه
ضليت ساكته ما ردت أجيب طاري أمه وتصير مشاكل من أولها سگتت
ـ أخذي وگتج وفگري على راحتج أنه أكوللهم وأفهمهم ما مستعجلين اليريدج يصبر عليج ها شگلتي
ـ أي خاله
گامت وضليت مستحيه ومتهربه منهم وأبد ما طلعت وأذا أطلع بالبوگه وصدفه طلعت وصار بوجهي نافع ضحك وگال
ـ ها ولچ دگين ثگل برأس أخويه المسگين طلعتي مو هينه هم تعرفين تچوين گلوب
ـ أني
ـ لا أني عليمن ولج هاي الدروب حافظها رسم
ـ نزلت رأسي خجلانه من عنده ومن نفسي أريد أحجي ومتوتره وهو يضحك
ـ هو أنتِ نفسج لو بدلوچ قبل ساعه جان عدج عيون تخزر تكول عيون بزونه بليل يلمعن لا تخجلين هذا حقج وأحسبيني اخوج الجبير وان راحت امج لدار حقها وان راح ابوج وماعندج احد فأني سندج ومسندج ولاتتوقعين هالعصبيه والحرص عليجن أجتي من فراغ لا انتن صرتن من دمي ولحمي وحكج بهالركبه اذا بيوم باقر زل وياج
صفنت على كمية الحنيه بكلامه ما أدري شگولك ما تقصر الصراحه أني ما عرفت عليمن أروح واسأل وأنت أحسك واعي وتختلف عنهم صح عصبي بس عندك نظرة بعد
ـ جيد كلامج هم حلو يابه شكراً ع المدح خجلتيني ينعل بليسج وأول مره أخجل من كلام بنيه
أي أسألي شنو أبالج وأجاوبج
ـ ما أدري
ـ چا شتدرين رب الحلو هو أنتِ موافقه لو لا أنطينيها من الأخير لان أخوي يعارك ذبان وجهه هذا من يعصب ويضوج لا حبيب ولا خبره صركاعه
الله وكيلج
ـ أي ولا بس قبلها أريد أحجي وياك بموضوع أمانه ما تگول لاحد أخاف تصير مشكله بسببي
ـ سوالف نسوان مو قصدج ماما وهبيه حاجيه وياجً
ـ شمدريك
ـ واضح عليها ما موافقه بس ما عليج طنشي يوم يومين وتوافق ماكو أم ما تريد سعادة أبنها وكل الأمهات هيج لو بأيدهن هن يزوجن على كيفهن ومزاجهن لهذا طنشي وخطيتج بهالرگبه باقر يستاهلج مو أخوي وأمدحه بس خوش زلمه معدل يعجبج ويحبج
ـ دنگت خجلانه منه وضحك
ـ لاتخجلين أبويه المهم أذا موافقه بدون محد يجبرج گولي لاتستحين مني وگتلج أحسبيني أخوج الجبير وأذا تمت عالخير ما تسكنين هنا تجين يمنا لان أساساً هو دوامه هناك بعد بكيفج أنه موجود يمتى ما صفى بالج رديلي خبر علمود أبشر المسكين يلطم لوحده
مشى وصحت وراه نافع
ـ ترى أدري بيج موافقه بس راح أكوللهم انطوها وگت هم أدگين ثگل برأسهم وهم أحمسه حمسه زينه خليها عليه
راح يضحك شگد خبيث ورجعت متطمنه من كلام نافع وقررنا نرجع البيت وباقر هو يوصلنا صعدت ليورا بس شگله جان مزعوج ومعصب حتى أتصالاته يجاوب بعصبيه ونتر ولينا كل شوي تكرصني ولما وصلنا نزل ويانا دخل على عمي مشعان علمود العقد عمي محمود وخالتي عقدلهم
بالمطبخ أباوعله بالحوش يجر دخان صفنت عليه وأندار شافني وتقرب گلبي يريد يطلع من صدري من التوتر ألتفت وگال
ـ عاجبج ومتونسة على أذيتي مو أذا ما موافقه ليش جنتي تأمليني بعيونج
ـ منو گالك ما موافقه
ـ تلعبين على گلبي لبنى
ـ لا والله ششفت مني
ـ ليش ما رديتي خبر ليش ساكته
ـ قبل لا أكمل كلامي أجتي عمتي حربيه وخزرتني وهو أبتعد بس عيونه تتبعني وجرتني عمتي كامت تحجي عليه
حربيه ـ تردين تجبين الحجايه لنفسج شعندج واكفه وياه
مو ما موافقه ورفضتي وشلتي خشمج عليه بعد شگو لو بيجن طبع رفعة الخشم هاي ما تبطلنها تمشي بدمچن شايفات نفسجن شوفه على ولد الناس قبل أختج وهسه أنتِ هسه ولد مشعان صاروا مو من أعجابجن من فلك أي والله بنات أخر وگت فوك سوالفجن وصلافتجن نوب خشوم عاليه
مشت وعافتني وضليت مصدومه يمتى رفضت أني ما أنطيت لا موافقه ولا رفض وخالتي گالت أني أفهمهم والج الوقت وفكري معقوله نافع سواها لا مستحيل معقوله نافع بس ليش..
