رواية خيط وابرة الفصل التاسع عشر بقلم شمس العراقية
السلام عليكم أحبتي 🌺❤✨
لبنى...
ـ ضليت مصدومه بكلام عمتي ليش يا نافع ماكو بس انت السويتها بيه بس ليش ياربي عقلي گام ما يربط
وگالوا نروح واني مختنگه وكلام باقر برأسي طلعت وما شفته ولا هو بين بعد.. حقه يجوز صدك كالوله ما موافقه وضاچ الله يدري هسه شيفكر.. وطلعنا للبيت وصلنا ركضت الغرفتي مخنوكه من يوم طلعت من بيتنا طاح حظي
لبنى ـ عندج رقم نافع
ـ لا والله بس حسابه أدبره الج عادي بس ما گلتي شتسوين برقمه
ـ محتاجته دبري ولا تسألين
ـ تمام هسه
ـ طلعت وعافتني أكل بروحي من القهر وأجتي ها دبرتي
ـ هاج .
ـ أخذته ودكيته بموبايلي وأتصلت عليه شوي ورد نافع
نافع ـ أي نافع
ـ ليش هيج سويت بيه مو أني وثقت وأمنت بيك ليش تغدرني مع الأسف والله
ـ عيني على كيفج يا غدر تحجين عنه غير أعرفج منو أنتِ وحددي نوع الغدر لان ما غادر احد اني
ـ وتسوي روحك ما تعرفني
ـ لا وأمي ما أعرفج بس الأعرفه صوتج حلو
ـ لبنى
ـ ها عيني أي گولي من الأول لبنى وفضيها على شنو تبجين وغدر وهالسوالف شگو شبيج منو وياج .
ـ ليش گلت الهم أني ما موافقه يمتى حجيت وگلتلك أصلاً ما نطيتك لا موافقه ولا رفض بقيت ساكته واني على أساس كلامك گلت بعد يم نافع وطلعت أنت كايل الهم اني ما موافقه... قاطعني
ـ اوگفي أوگفي على كيفج وأني الگايل!
ـ أي منو غيرك أني ما حجيت بس وياك وويه خالتي
ـ وتشگين بيه أنه أسويها مو
ـ ما أدري شمعرفني بيك
ـ أكو طبخه تنطبخ خل أشوف منو طابخها وأرجعلج
ـ ما يحتاج خلص هذا هو أني بعد ما أريد خليتني موقف نوبه تروح تصير مشاكل ويذبونها برأسي
.. قطع الخط بوجهي وعفت الموبايل ولينا كعدت تسألني وأني مالي خلك حجيتلها وسگتت
لينا ـ مستحيل نافع يسويها
لبنى ـ وليش مستحيل شنو اليخليج متأكده مو نافع
ـ لان ما عنده هالسوالف هاي مو سوالف زلم!
ـ شقصدج
ـ سوالف نسوان خبيثه وهسه نافع يثرد بيهن
ـ هذا الخايفه من عنده لايسويلي مشاكل وأسمي ينكز بينهم أني شجابني على هالسالفه
ـ وأنتِ شعليج.. أكولج هو طلب أيدج وأنتِ سگتي لان من حقج تفكرين والسبب جان أمه لهذا مالج دخل
ـ ضلينا كاعدين وعيني عالموبايل وأندك الباب خالتي طلعت.. ورجع موبايلي رن نافع جاوبته ها نافع
نافع ـ تحضري بسرعه تروحين وياي
لبنى ـ وين أروح وياك نافع من كل عقلك
ـ لا من المعده وفوك. لبسي وفضيني وصلتج .
ـ قطع الخط وسمعت صوته بالمطبخ يحجي ويه خالتي لينا طلعت قبلي.. لبست شالي وطلعت واكف يقنع بخالتي
سميعه ـ عمه والله ما أكدر عمك أذا أجه وما لگاها يگلب البيت على رأسي ورأسها وبعدين شتريد منها
نافع ـ نص ساعه وأرجعها أكو سالفه صايره بعدين من ترجع تحجيها الج بس هسه مستعجل.. يله لبنى
سميعه ـ ولك يمه وخالك شلون
نافع ـ خالي خلي عليه يله لبنى تحركي عاد
لبنى ـ ما أروح
نافع ـ شلون أحجي حجايه هسه دمشي أبويه جاهل أنتِ لو تخافين مني شسالفه لبنى
سميعه ـ بس لاتتأخرون
نافع ـ خل تتحرك هي ، يله أبويه
ـ خل لينا تجي وياي .
ـ مو رجلج هي.. أمشي لينا بس فضينا عاد شگد عناد وتشلعين الگلب .
ـ دخلت لبست عبايتي ولينا تضحك واني واصله لخشمي وطلعنا وياه وخالتي توصي بي بس هو مستعجل ومن عجالته أني نسيت نفسي گبل صعدت الصدر وشغل وطلعنا وبالطريق يخابر
ـ ها باقر وصلت لو بعدك.. تمام أي جبتها يصير خير
ـ قطع الخط باوعتله أنتِ أشسويت
ـ كل الخير ..
ـ سگتت ولينا كمزت من يمها وحچت
لينا ـ تعاي أنتِ منو گلج تصعدين بالصدر هذا مكاني
لبنى ـ خزرتها ونافع بعصبيته باوعلها وضحك تأففت بقلة صبر ووصلنا ما ردت أنزل أحس فشله والله دخلنا وياه وعمتي شافتنا وصفگت بأيدها ومعصبه
حربيه ـ شگو رحت جبتهن تريد تجيبلنا حجايه ناقصين أحنه.. شبيك أنت تركض ركض على الطلايب .
نافع ـ چا من تحجن بإسمي ما تگولن وأنه ما رديت خبر لباقر .. الحجي اليصير من ورا ظهرري هسه أريد أعرف منو طابخه وكدام الكل
الحجيه ـ ولك حبوبه شبيك محترك دمك شجاريلك وشبيهن البنات ليش رجعتهن
مشعان ـ نافع شصاير ليش جبت بنات خالك
نافع ـ هسه حجي أفهمك السالفه كلها وكدام عينك
لبنى ـ دخلنا والعيون علينا وعمي مشعان أيديه ورا ظهره وويسأل ونافع وگف بالطرمه معصب صاير بركان ثاير وعمتي تحجي والحجيه تسأله وأندك الباب ودخل باقر وأمه!شچاي يصير؟
لينا ـ هاي الزلم كله حار بحار.. فدوه لطولك جعلتك أخويه والله كفو .
ـ كفختها وسگتت ودخلوا الأستقبال وأني حشگت نفسي بصف لينا وأتهرب من نظراتهم وباقر معصب وجه مدخن باوعلي عيونه شرار وضاغط على أصابعه ودمارات أيديه مبينات مرعبات بلعت ريگ خلص بطلت ما موافقه .
باقر ـ أنت وامك وبنت خالك تلعبون علينا من أنتَ تريدها ليش ما تحجي وتگول. تضحكون عليه أنتوا
نافع ـ منو ضاحك عليك وگايلك أنه أريدها بابا أنت واصلك غير حجي أنه لا أريدها ولا جايب طاري البنيه بحجايه ولو أريدها لا خايف ولا مستحي بنت خالي وأني أولى بيها بس عادها وحده من أخواتي وهذا الحجي أنه كله ما عندي علم بي وأكو منو يطبخ طبخه وكربسها برأسي .
باقر ـ بس أنه الوصلني البنيه ما موافقه وأنت تريدها تگدر تفهمني شلون أنت ما الك علم وهاي أمي شاهده وجبتها على طلبك وخلص هاي هي ما موافقه ما صار شيء ولاتوافق .
نافع ـ بابا شبيك.. البنيه كدامك ماكو شيء بيني وبينها والشاهد الله هذن أخواتي بيا لغه أحجيها علمود تفهم وتعاي ماما أحجيلي شوصلج أنتِ أحجيلي .
الحجيه عطايات ـ ولچن شمسويات شمصخمات خليتن ولدجن ممالخ بينهم ما تحجن
نافع ـ حبوبه بس أصبري عليه.. أنتوا منو گال الكم لبنى ما موافقه .
وهبيه ـ والله يمه الحجايه وما بيها أنه حجيت وياها وهي تسمعني ولو أدري السالفه توصل لهل المواصيل لا أحجي ولا أفتح حلگي
مشعان ـ شحجيتي وياها لبنى بابا عمتج شحجت وياج
لبنى ـ سگتت فشلانه من عنده وباقر حجه
باقر ـ ما رايدتها لان وصلها حچي لبنى نافع يريدها! وأمي سحبت نفسها لان ما تريد تصير طلايب بين الأخوان علمود مره! وحاجت لبنى على هالاساس علمود لبنى ترفض بس الوصلني أنه اكو راده بين نافع ولبنى واذا أكو كولوا يابه ليش مستحين وأنه هسه أخذ أمي وأمشي وكلمن يكعد البيته.
نافع ـ باقــر أندار على عمرك أنت أطبگ عالصفحه وخليني أشوف شغلي وأذا ألك حگ عندي أشلع إلك عيوني بس السالفه التدخل بيها نسوان مو بس تنلاص! توكع بيها زلم ..
أي ماما راح أحاجيج بالطيب أحجيلي منو وصلج الحجي أحجيلي أحجيلي لان واكف على شعره.. والحسن أذا ما تحجن حگ الله أكلب البيت على رورسجن أنه هذا حجي النسوان والطبخ التطبخنه عقلي يطير منه أتخبل منجن من سوالفجن ما وراجن بس هجمان البيوت صركاعة الله مو نسوان .
الحجيه عطايات ـ ولك حبوبه على كيفك على رويحتك تحرك بدمك وأنت مريض.. هسه أنه أكعد وياهن وأفهم منهن السالفه كلها
نافع ـ لا حبوبه السالفه تنحجي كدامي وكلها.. أحجيلي ماما منو وصلج وگالج لبنى ما موافقه!
وگالج نافع يريد لبنى وبينهم راده! يا كواد گالج هالحجي علمود أزوعه حليب أمه اليحجي بأسمي ويلزك حجايه بظهري.. أحجي ماما أحجيلي بساع
لبنى ـ أم باقر تبلع بريگها وخالي مشعان خازرها وعمتي حربيه نزلت رأسها وتفرك بأيدها ضلت ساكته عاد عمتي حربيه جاوبت
حربيه ـ أنه گللتها نافع يريد لبنىً!
نافع ـ أنتِ يمه! وليش
حربيه ـ لان ردت لينا لناجح ونافع ما رضىٰ وما ردت لبنى جنه لمشعان كلت ليش باقر ياخذها وأخذ لبنى لنافع ولينا لناجح احسن .
نافع ـ يعني أنه رفضت لينا يأخذها ناجح ومنعتج كمتي تخططين من ورا ظهري وما كفاج هذا گله دخلتي لبنى عالخط ولزگتي بيها سمعه وسالفه عود أنه أريدها علمود لا باقر يأخذها عفيه عليج يمه والله خوش تفكرين وتخططين .
لبنى ـ يحجي بعصبيه ويصييح على أمه والحجيه تضرب على رجليها وعمي مشعان عاط بيها وحجه .
مشعان ـ ومتباهيه حضرتج شو بكيفج تخططين وتضربين من رأسج والبنات لعبه بأيدج تجبين وتلطشين عليهن ساعه باقر ساعه نافع ساعه ناجح ما تخافين ربج هذن بنات أخوج.. حربيه أمشي للبيت أهلج ما تصيرلي مره بعد وأنعل أبو اليلفيج أبيته بعد .
الحجيه عطايات ـ على كيفك يمه خل نفهم السالفه يجوز تريد بنات أخوها أثنيهن للولدك ما بيها شيء وليدي .
مشعان ـ ما سمعتيها شتحجي ما تريد باقر يأخذ منهن شبيج يمه .. يله لبيت أهلج يله
حربيه ـ لا دخيلك مشعان والله أنه علمود ولدك
مشعان ـ من أنعل أبوج لابو ولدي وياج
لبنى ـ تعارگوا وعمي مشعان تعصب ويصييح عليها والحجيه وگفت تحاميها خافت يضربها عاد باقر أخذه وطلعوا برا وأم باقر تباوع على حربيه ويتبادلن النظرات بينهن وباوعلي أثنيهن بلعت ريگ خايفه.. ونافع گام وباوع عليهن وأشر عليهن بأصابعه بتحذير!..
نافع ـ هالمره راح أعديها وأحاجي أبويه وأقنعه وتبقن على ذمته بس والحسين الشهيد والعباس أذا مره ثانية سمعت لو وصلني حجي وحده منجن متدخله بحجايه لو أكو طبخه تطبخنها من ورى ظهورنا أنه بيدي أطلكجن وأسربتجن على أهلجن وأنعل ابو اليلفي مره تمد لسانها بظهر الزلم وتسوي سوايات تصخم الوجه
وأنتِ يمه سمعيني زين وفتحي أذانج بنات خالي صباح طلعيهن من رأسج وتنسيهن أنه ششفت من الحنضل أكلب بهروشه.. خلص حجيت وگلت زواج ما أريد أتزوج لا لبنى ولا لينا وناحج هم تطلعينه من مخططاتج
لبنى ـ سگتت ما حچت عفيه حتى أمه تخاف منه مسح وجهه بقلة صبر وصاح بينا
نافع ـ يله گومن أوصلجن البيت.. مكبورات وما خلصانات من الحجي .
لبنى ـ گمنا وأم باقر تباوعلي بنظرات دافيه ولحگتني لطرمه گالت
وهبيه ـ أني والله ما عندي شيء وياج وان شلي دخل وحتى لو باقر تزوجج أنتِ تصيرين جنة حربيه مو جنتي وأذا تجيني أشوفچ زياره حالچ من حال الخطار ومن حاجيتج لمصلحتج لان أنتِ تصيرين زوجة أبني وتكعدين وياها وعمتج تشلع گلبج تشوفج نجوم الظهر وأنه گلبي مچوي وجاريات على گلبي يا يمه .
لبنى - ما حچيت، رفعت راسي لگيت باقر يباوعلنا.. الشمس ضاربة بوجهه وعيونه الحادة بيها نظرة عتب تذبح مليانة زعل.. دنّگت راسي ومشيت ورا لينا من عبرت من كدامه حسيت روحه طالعة من جرة نفسه جان مبين صدگ زعلان مني ونظراته أخذت روحي ..
رجعنا البيت ولينا تحجي هي ونافع وأني بالي يم عيونه ما باوعلي بنفس نظراته المتعوده عليها فززني نافع بصوته دگول مخلي سماعات مو صوت يصرع الواحد .
نافع ـ وين صافنين يابه
لبنى ـ ما جاوبته.. فتحت الباب أريد أنزل وگال
نافع ـ هسه موافقه مو علمود نجي نخطبج عيني لان أبننا محموس حمس من القهر ما يهون عليه أشوفه زعلان
ـ موافقه بالعشره أكولها موافقه وأمداني ساعة السگتت وما گلت موافقه وتاليها طلعلتي هالسالفه لا بيها لا عليها.. ضحك وگال
ـ هاي أنتِ لو مبدلينچ!.. بس والله حقج ما الومج هي هاي البشريه ناس تأكل ناس يله بيها الخير..
ـ دخلنا البيت وعفت لينا تحجي لخالتي دخلت الغرفه مخنوگه خنك ونظراته طبعت برأسي شبيه هلگد أخذت تفكيري وبالي .
" مر أسبوع على السالفه ماكو شيء هدوء وهذا الهدوء وراه زعل ثكيل وحتى لو السالفه نحلت وصارت كدامه بس حسيته ما أقتنع معقوله يكون يشك بأخوه لا مستحيل نافع خوش زلمه وأخو خيته مواقفه تبين شگد هو خوش زلمه وما راضي على هالتصرفات بس يجوز عنده شغل .. لو يجوز بعد ما يريدج يا لبنى وسحب نفسه..
كعدت وشفت نور مثل كل يوم ساكنه المطبخ تتعلم طبخات وخالتي تساعدها ومبين عليها شكثر فرحانه وتصور وأدز لغافر دعيت من كل گلبي الله يسعدها ويهنيها بحياته ويه التحبه .
منظفات البيت باقي بس الكراج شغلت الماطور وبلشت أغسل وصلت الباب وشفت سيارته!وياه نافع گبل رديت الباب وأندك ضبطت شالي وفتحته .
باقر ـ شعندج ورا الباب لو كاعده تتنظرينه.
لبنى ـ عفواً أنتظر منو
ـ تتنظريني
ـ نزلت رأسي خجلانه منه وطلعت خالتي وأني ختلت ورت الباب وگفت تحاجي
سميعه ـ يمه هلا بيك أتفضل ليش واكف نافع أنزل عمه
نافع ـ لا عمه مشكوره يله باقر فضني تعبان من الخفاره أريد أرجع أنام.
باقر ـ هلا بيج عميمه.. عود عميمه حضروا نفسكم العصر نجيكم أني والأهل وأني بلغت الزلم بس گلت بطريقي من الأصول أبلغ النسوان .
لبنى ـ يحجي ويباوعلي وأني غرگت بملابسي من الخجل وخالتي تبسمت وجاوبته
سميعه ـ يا هلا بيكم يمه وزين ما سويت والله يقدم البي خير وينطيك خيرك ويرضيك ويسعدك يعمه .
باقر ـ فدوه أروحلج عميمه يله فيمالا .
لبنى ـ وباوعلي معبس الوجه.. فتحتله الباب وأبتسم وطلع وخالتي أبتسمت ودخلت فرحانه وأني الله ذب عليه كل الطاقه والنشاط جلفت الكراج جلفه زينه خليته يلمع وأخواتي فرحانات اليه ونور گالت
نور ـ عندي فستان مال الخطوبه خالتي جابته اليه ما لابسته بالكنتور يجنن لبسي بالعقد لو نـروح السوك ها ماما خاف ما نلحك
لبنى ـ لا ما يحتاج نروح السوك البسه عادي..
راحت جابتلي الفستان كعدن يلبسني وهنَّ محتفلات ولينا صارتلي ميكب أرتست وگلبت وجهي خريطة! شخط ومسح فرفحت روحي. صحت بيهن يمعودات ولجن كافي ما أريد مكياج والله ما أخلي ولا قطرة شسالفة. وجهي صار حقل تجارب
ونور هجمت على شعري بالمكوايه وتكويه، وغافر كل شوية متصل عليها وكامزه ومخليتني عالنص ناشفه شعري چني سعلوه
أنتفضت بيهن يابة بطلت! ما أريد ألبس ولا أريد أتحضر بس فكن عني خنكتني بطلت ما أريد أتزوج!
لينا ـ أنتِ كل شوية والثانية تگولين بطلت ما أتزوج، مو بكيفج عيني نمشي وبعدين ضابطج مسموط جد جده وأنتِ وجهج وجه الصيني شايفه نفسج شوفه على ضابطنا الحلو كافي عاد لا ترفعين خشمج علينا تصير مرت الضابط شيحاجيها ينراد الها واسطه وحجز مسبق
لبنى ـ تحجي وتضحك وكفختها طفيت شمعة شبابها
نور هنا فطست من الضحك، طايحة الحظ أنا أعرف منو علمج على هالسوالف هذا نويفع
نور ـ نافع عزاااا العزاج ولج اسمه شكد شكبره.. نافع مو نويفع! هذن سوالف حبوبة
لينا ـ كون يسمعها تگوله نويفع يحير منين يطلع الها تعلوكة..
لبنى ـ طاح حظج.. عفتهن يضحگن گمت غسلت ورجعت وجهي ردتله الروح مخابيل مو صاحيات والله
للظهر أجه عمي محمود وكعدنا عالغده سوه وخالتي حجتله ضل ساكت ما حچه وباوع على لينا وخفت من نظراته دائماً يباوعلها بحقد حتى لينا ما تحملت نظراته گامت وعافت الأكل ولحگتها نور..
چاب الضيافه خلاها عالكاونتر وراح الغرفه وسمعت عيطة خالتي شيء تكسر وطلعت نور تدك عليهم الباب وخالتي تعيط وتبجي ونور تدك الباب وأحنه نباوع وفتح الباب وباوعلنا وعاط بينا وطلع ركضنا على خالتي كاعده وتبجي ومبين ضاربها شعرها مخربط وجهه نور تخبلت رادت تگوم جلبت بيها ومنعتها
سميعه ـ عوفيه لايرجع عليجن خبل الله يأخذه .
نور ـ ليش ضربج
لبنى ـ باوعتلنا وسگتت ونور فرگت وجهه بقلة صبر
نور ـ وأنت طاوعتي؟
سميعه ـ لو يموت لو يموت هذا الشيء ما يصير لو أعرف أموت من الضرب أحرك روحي والله وما أخلي يلمس شعره مني قابل ما تعرفين أمچ .
نور ـ خلص ماما خلص.. شگول على أهلج كله من وراهم ونحسبت عليج زواجه تحجين يكولج رجلج وحقه
.. ضلينا يمها وطلعنا وضلت يمها نور وعمي محمود ما بين بعد يمكن راح البيته وكملنا ترتيب وگلشي وتجهزت وأخواتي هم ونور طلعت تخبل رغم خلت مكياج خفيف بس وجهه يضوي وملامح الفرح واضحه بوجهه
وخالتي خطيه تفتر خوما أكو نقوصات وأجه عمي وجدي ياسين وغافر وياهم عبر وسلم بثكل وعيونه أكلت نور
حاجاها عالسريع
غافر ـ عمج منصب كاميرات بظهره مو عم طركاعة الله نزلت على رأسي .
نور ـ شتسوي تحمله .
ـ غصباً عليه أتحمله وأتحمل عشيرته هم.. خوما محتاجين شيء وصوني على شيء حسسوني أني نسيبكم الجبير
سمعيه ـ ما محتاجين غير سلامتك فدوه لطولك ما تقصر خاله
لبنى ـ راح كعد الأستقبال وشوي وسمعنا صوت الباب وطلع غافر يفتح وطلع جدي ياسين واكف بالطرمه وعمي محمود شاف نور باب المطبخ يعني داخل المطبخ وعاط بيها .
محمود ـ شعندج واكفه يله داخل والأشوفها الا أكسر رجليها يله مثل الصخول .
لبنى ـ نور ردت الباب خلته شايط وعافنا وراح..
.وباوعنا من الشباك ودخلوا الزلم گومه كلهم معگلين منو هذول!وغافر وعمي محمود وجدي مباوس وراهم الشيخ حبيب وأخوه رزاق وعمي مشعان وأخوه وولده كلهم .
لينا ـ طگينا عمي ضابطنا الهيبه جايبلج زلم الجنوب والغربيه شلون مكس رهيب ينگط فخامه شتردين بعد لبلب هم گولي ما موافقه علمود أنوم هالجدر رأسج
ـ لينا لسانج.. دخلوا وباقر لابس رسمي ويباوع للكل بنص عين وجه مدخن هذا شبي لحد الان زعلان! صوجي وافقت لو حامستك بعد
ودخلوا الزلم العرفته هذول خوال باقر من الغربيه جايين وياه.. وأنفتح الباب ودخل نافع سلم منزل رأسه ودخل الكراتين وعلب الحلويات خلاهن عالكاونتر .
نافع ـ وين لينا تعاي ولج أيديه تملخن أخذي هذا الكيك خلي بالثلاجه..
ـ راحتله لينا والنسوان بالطرمه يسلمن على خالتي ودخلن وتقدمت سلمت عليهن والحجيه حضتني وتبوس بيه وأم باقر شافتني وأبتسمت باستني بكل حيلها! وعمتي حربيه مجامله غلست ودخلت نورس وياهن وبنات عمي مشعان كلهن جايات ما عدا صفا
وكمزت لينا تسأل عليها
لينا ـ صفا ليش ما أجتي وياكم
زهور ـ سگتي وخليها أنگتلت لابست فستان دلع ونافع منعها وهي عاندت ومد لسانها عليه وصعدلها نافع صبغها صبغها لما أبويه وأمي جان ماتت.
لينا ـ عزااا
زهور ـ تستاهل ما تسمع كلمته أحنه مو وياها ما حجه على ملابسنا هو هذا طبعه ما يقبل تريد تمشي كلمتها عليه .
لبنى ـ لينا حسيتها ضاجت ولزمت موبايلها عوفيها ما الج شغل هي وأخوها لاتتدخلين وعوفي موبايلج ويله كدامي يله
ـ لا شعليه بيها أصلاً تستاهل الگتله عاشت أيده
ـ سگتتي ولج شعلينه أحنه.. مشت وأجتي نور وحضرنا الضيافة وأجه غافر هو اليضيفهم وراه نافع
غافر ـ أسكت وخليني نافع أثاري مسؤوليه صعبه والله
ـ چا شعبالك بالهين تريد نضل عفيطه ملاحگين عاصف
ـ طاح صبغك شو أخذ الصينيه وروح
لبنى ـ هما ضيفوا الزلم وواحد يصنف عالثاني وعمي محمود مترصد الهم واكفين بالطرمه مثل معاقبين وأني ولينا ضيفنا النسوان والحجيه تباوعلي وتصلي عالنبي وكعدت بصف خالتي ونورس مقابيلنا وتباوع على نور!
ويحجن النسوان بينهم وبالي مو يمهن أبداً ودمعتي بطارف عيني أفتقدت أمي وتمنيتها تكون وياي بهيج يوم مهم بحياتي لو أبويه الله يرحمهم مشوا من وگت .
ولينا أجتي كعدت بصفي ها شصار
لينا ـ ما أدري كلهم كاعدين جاي يحجون ما گدرت أطلع. أسمع نافع يعدمني قفل باب المطبخ من الخارج .
لبنى ـ تحجي بهمس سگتي..وأندك الباب گامت خالتي لميعه .
نافع ـ حضرنها يعقدون الهم هاج العبايه
لبنى ـ لحظات صعبه بطني مغصتني ونزلت دمعتي ولبسني العبايه مالت الشيخ گامن وياي خالتي تمشي وياي ووگفني من ورى الباب ونافع لازم الباب وصار الكلام
وصل الى موافقتي ونربط لساني بالگوه حجيتها ورجع عادها مره ثانية ورددت وتم العقد وصرت من نصيب باقر..وأبتسمت بيني وبين روحي رغم الخوف البيه
رجعت كعدت وعمتي وهبيه گامت طشت الجگليت وگالت للحجيه
وهبيه ـ عمه أهلهل هلوله لأبني .
الحجيه عطايات ـ هلهلي يمه أبنج من حقج تفرحين
لبنى ـ هلهلت وطشت الجگليت وتبوس بيه وكعدت بصفي كل شوي تبوسني حسيتها فرحانه من كل گلبها عكس كلامها قبل فتره!الا عمتي أخت أبويه عبالك ذابحه أهلها وعينها ورا نورس وگمت للمطبخ وأجتني لينا تدردم شبيج
لينا ـ شفتي عمتج شلون تباوعلنا بنظرات حقده ولا عبالك بنات أخوها وتخوزر بنور بس عجبتني هالنور طنشت الكل وأنطلقت ويه خالتها صبيحه تسولف وياها ما مهتمه الها
لبنى ـ أي شفت عود عمتنا گرت عيني حتى خالتي سميعه أحسن منها
ـ وأكص أيدي اذا ما مخليه نورس برأسها لنافع
ـ وشعلينا وتخليها.. حسيت بيها ضاجت لينا أكو شيء
ـ مثل شنو
ـ أنتِ معجبه بنافع سولفيلي
ـ لا والله أبداً وأذا معجبه بشخصيته كأخ هو خوش ولد تعجبني مواقفه ويانا لا أكثر بس غير شيء أبد لايروح بالج لبعيد نافع أخويه الجبير والله .
ـ سگتنا من دخلت نور تحجي عالموبايل وطلع غافر مبتسم ويباوعلها هذول ما يصدگون يحصلون فرصه يتشاوفون أمشي أمشي خطيه غافر يستحي من عدنا.
ـ حقههم عمج مسوي عليهم حصار قريش وهما مخطوبين خطيه شدعوه صاير حريص شو بناته ما يكول عليهن مسربتهن بيت عمتي حربيه وبيتهم مليان شباب.
ـ شعلينا.. دخلنا يمهم وعمتي وهبيه تباوعلي مبتسمه ومر الوگت وگالوا راح يگومون وكل ظني يجي يشوفني مثل ما غافر أجه شاف نور بس طلعوا كلهم والنسوان هم گامن وهو ما بين حزت بگلبي وسگتت وعمتي قبل لا تمشي همستلي .
وهبيه ـ لاتضوجين بعدين يجي يشوفج بس هسه خواله موجودين وتلكينه مخبوص وحاير بيهم وورانا عشه نسويلهم بعدين تفض ويمرلج .. وبالخير عليج يمه الله يسعدكم ويفرحني بيكم.. تعالي دحبج من هالخد دگول تفاح نيالك يا يمه يباقر .
وطلعن والبيت فرغ بس الحجيه أم غافر ضلت ونور تمشي كدامها وتلملم الهوسه وتحجي ويه روحها وحسيتها متوتره من خالتها وشوي وگاموا راحوا
ضل عمي محمود بالبيت ولليل تعشينا ولمينا الهوسه
ودخلت أصلي وموبايلي أتصل عالسريع كظيت صلاتي باوعت الشاشه رقم غريب ما أعرف ليش شگيت هو بس ما جاوبته ورجع دز رساله .
ـ جاوبي أني رجلج .
ـ أبتسمت وكتبت اله مو زعلان
ـ دفتحي خط .
ـ هذا شبي؟ أتصل وجاوبته وأجاني صوته بي نبرة عصبيه
ـ عمج بالبيت
ـ أي
ـ عبالي أجي عليكم بس تأخر الوقت وباجر عندي دوام
ـ كيفك
ـ ها
ـ أي
ـ أشوفج ويصير خير
ـ الخير بوجهك
ـ لبنى
ـ نعم
ـ لا هيج أخذي راحتج
ـ تمام قطع الخط وأني كاتمه ضحكتي عود زعلان شگو متصل وتحاجيني معلك وعفت الموبايل وسجلت رقمه حكومتي الموقره! وأني خربانه ضحك ونمت وأني مرتاحه والصبح كعدت من وگت وعمي محمود رايح بس فراشه بالاستقبال كعدت خالتي شالت فراشه وملابسه غسلتهن ونشرتهن وفتحت الباب على نور نايمه عالموبايل وگامت تحجي عليها
سميعه ـ وأني أكول ليش طول النهار مطفيه وبس نايمه أثاري تكظينها سهر لصباح.. الله يساعد هالموبايل شلون ما يعطل ما يصير يا أمي يمل من هسه
نور ـ وي ماما نسيت أكعده عالدوام خرب تأخر الوقت
سميعه ـ تلكين خالتج كعدته طبعاً الليل كله سهر وين يكعد عالدوام خفي عالولد ماما
ـ ما تجوزين مني ماما شمسويتله قابل .
لبنى ـ عفتهن وطلعت أغسل الحوش وصلت المغاسل وأندك الباب منو! توقعت غافر بس لبست شالي وصحت منو
باقر ـ رجلج
لبنى ـ أبتسمت باقر عدلت شالي خرب ما كاشخه
ـ يمتى تفتحيلي الباب يابه
ـ فتحته أتفضل رجلي
ـ تتقشمرين ولج
ـ مو زعلان
ـ خو جلبتي بيها.. شلونج مريتي تفاحتي
ـ دنگت خجلانه زينه وأنت شلونك.. أتفضل أتفضل
ـ زين بشوفة هالوجه.. منو موجود عمج الحقنه بالبيت
ـ لا بالدوام
ـ زين أمشي سويلي أستكان جاي وأريدج تكابليني أشوفج مو تنهزمين وتگرصين بالغرفه .
ـ مشيت كدامه أمشي مستحيه منه وهو وراي بملابس الدوام ويحجي ويه روحه بهمس
ـ لك صدقه لهل الطول..چا الله شگد يحبني وخلاج بدربي يروح عمري نذر لهذيج الساعه الشفتج بيها .
وصلنا وهو دخل الأستقبال كعد لوحده وركضت گلت لخالتي جانت بالحمام ونور رجعت نامت خرب خوما يضل كاعد لوحده..دخلت المطبخ وحضرت الجاي وصبيتله ومستحيه وعيوني تنتظر خالتي وهو كاعد لوحده تالي أخذت نفس وعدلت شالي وشلت الصينيه ودخلت وعيونه ملاحگتني بكل حركة ونظراته تحسسني إني لابسة أحلى ما عندي رغم إني بملابس البيت البسيطة.
وبگلبي حجيت ليش هيج يباوعلي عبالك أول مره يشوفني! سند وجهه على إيده وابتسامة هادية ارتسمت على شفايفه
باقر ـ كل مرة أشوفج بيها أحسها المرة الأولى سبحان اللي صورج وهالوجه الحلو من أشوفه يروح كل تعب الدوام ومشاكله .
ـ أرتبگت وقدمت الاستكان كدامه، وبسرعة ردت أبتعد وأروح بس هو بسرعة إيده امتدت ولزمت طرف شالي سحبني بحركة خفيفة خلتني أتعثر وأصير كباله مباشرة
بصوت ناصي، ومليان حنية كال:
ـ وين رايحة مو گلتلج اريدج تكابليني گعدي هنا يمي.
ـ كعدت مقابليه وأنفاسي صارت مسموعة من كثر الخجل هو قرب الاستكان وبدأ يشرب، بس نظراته بعدها ما شال عينه عني
ـ هاي يوميه هيج تكعدين من وگت وتكرفين شغل
ـ أي حسب
ـ حسب شُنو
ـ مرات أني مرات خالتي
ـ لا بس أنتِ.. أدري بيج وحافظج وكلما أجي عليكم الكاج تغسلين الحوش والبيت ريحته تهفهف لباب الشارع .
ـ سگتت ومنزله رأسي وخالتي تأخرت
ـ بس هم أريدج ديرين بالج على روحج، لا تتعبين نفسج زايد، أدري بيج تحبين البيت يلمع، بس صحتج عندي أهم من كلشي
ـ سكتت، وما عرفت شنو أرد.. هاي الحنية منه جانت تخلي الكلام يضيع بصدري باقر مو بس زوج جان الأمان اللي لگيته بعد تعب طويل هو كمل استكان الجاي، خلاه على الطبله رفعت رأسي وباوعتله لكيت صافن عليه
ـ بقى شي واحد يخليني أسعد إنسان بهالدنيا اليوم
سألته بفضول ـ شنو هو
ـ تضحكين.. لأن من تضحكين، الدنيا كلها تضحك بوجهي
ـ ودخلت خالتي گام سلم عليها وكعدت وشلت الصينيه
سميعه ـ متريك يمه لبنى جان سويتله ريوك
باقر ـ لا عميمه متريك والله سوا ريوك وتريگت .
لبنى ـ يحجي هو وخالتي وعلمود العقد والفهمته منه لما عمي يكمل شغله علمود يروح وياي هو وجدي ياسين لان قاصر ما يعقدون النا
سميعه ـ أي والله عمك هم گال يكمل شغله يله
باقر ـ الله كريم ترهم .. يله أترخص
لبنى ـ گام وعيونه ملاحگتني خالتي وصلته الباب ورجعت مبتسمه ورجعت لينا من مدرسه وتسألني واني خجلانه شسولف شعور يخبل.. وبهل الفتره عقدنا محكمه عمي محمود دبرها النا وجدي ياسين راح ويانا والحمدلله عدت عالخير وصرت مرته شرعاً وقانوناً
هما متفقين عالمقدم والمأخر والعرفته هما يجهزوني خالتي ما راضيه رادت هي تجهزلي بس عمي محمود ما وافق ما يقبل تطلع بس يحجي ويزرل بيها وما يخليها توصل عتبة الباب ..
سميعه ـ وين صايره هاي غير أهلها يجهزونها
محمود ـ وأنت بصفتج شُنو موليه وياها لو أنتن النسوان تموتن عالدياحه وركع البوب
ـ شنو أني شنو غير مرت أبوها وحسبة بنتي چا منو يجهزها ما يصير محمود شهل الحجي هذا
ـ عمتها تجهزها وخلص فضينا لايطگج عرج المحنه عليها هسه وهو جهاز قابل شنو وعمتها مو غريبه وأنت اكعدي بيتج والتطلع أكسر رجلها وعلي.. وبعدين تعاي شُـنو هالحجي السمعته بنتج ما تريد العرس هساع
ـ أي أجلته هساه
ـ وليش التأجيل مو عقدوا والولد مكمل شغله ليش تماطل
ـ لما تطلع سنوية أبوها
ـ أنهجم بيت حزنجن وفنودجن أنتِ وبنتج چا الحزن ما تعرس والعقد والهلاهل شيسمونها طربگه عالسكتاوي هاي دروبجن يمتى تبطلبها شو أنتِ عقدتجن أنتِ وبنت رجلج.. العرس شله لزومه تأجلنه والله حزنات على أبونه!
فهمي بنتج العرس هالشهر أنه أحاجي غافر يكمل شغله ويجي يأخذها ونفتك من هالسالفه وتأجيل ماكو لا حزن ولا فتوك تعبانه.. حزنات انهجم بيتجن .
وأنتِ عمي باجر الصبح عمتج حربيه تمرلج وتروحين وياها يكملن جهازج.. يأخذونج هالشهر وماكو طربكه هنا وعرسج گبل هناك بالقريه وعرس نور وراها بس كملن شغلجن وما اريد أماطل ويوميه طالعتلي بشغله
لبنى ـ سگتت وخالتي هم سگتت غصباً عليها وما راضيه ولا مقتنعه وثاني يوم الصبح تحضرت وباقر خابرني گالي هو يمرلي يودينا السوك..
طلعت وجان هو وعمتي حربيه وخالتي لميعه تمنيت خالتي ونور يجهزلي بس بعد صارت ورحت وياهن وصلنا السوك ونزل ويانا لمحلات الذهب واكف بصفي وعمتي تختار وتكولي شوفي لبسي ودخت من الموديلات وهو صافن حسيته ما راضي .
باقر ـ خاله خليها على راحتها
حربيه ـ ورانا شغل كومه وهي تكظيها بس تتصفن
باقر ـ ميخالف شگو ورانا قابل يوميه تتزوج
لبنى ـ سگتت وعافت الذهب وكعدت يم خالتي لميعه وگفت بصفه وهو يختارلي ويلبسني عجبني ذوقه حلو
باقر ـ شتردين بعد أشتريلج المحل كله والله بس أمريني
ـ هاي هي.. حضن أيدي وخلاني بصفه حضنة أيده كلها أمان تمنيت يضل حاضن أيدي وحاسب أبو المحل وأخذ محبس لأمه وخلاه بجيبه وغمزلي .
وطلعنا وهنا يمشن وأني وياه لازمني من أيدي متمسك بيها
باقر ـ راح أروح باقي الجهاز وسوالف النسوان عمتي وخالتي يحهزنجن .
لبنى ـ تمام .
باقر ـ من تخلصن خابروني
حربيه ـ ميخالف مرتك تخابرك يله أمشي .
لبنى ـ ودعني وراح ودخلت وياهن محلات الملابس وعمتي هي تجهزلي ولا تخليني أشوف بس تشوفه اليه
حربيه ـ أي هذا هو عجبج مو أي عجبج شحلاته ليكون ما عجبج
لبنى ـ لا عجبني بس أهز برأسي وگالن كمل جهازج وباجر يكملن باقي حتى ما خلني اخذه وياي للبيت
حربيه ـ شگو مأخذته وياج نصفطه الج بغرفتج
لبنى ـ كيفج عمه.. ونافع أجه أخذنا لان باقر عنده شغل وجان طول الطريق مزعوج حتى ما حجه وحسيته متعارك ووصلنا وخالتي تلگتني وحجيتلها كامت تحجي
سميعه ـ شلون يصير غير جهازج تجيبنه وياج وذهبج وين
لبنى ـ هي عمتي گالت جهازج نصفطه الج بغرفتج وذهبج نلبسه الج بحنتج أخذته يمها .
سميعه ـ أنه هذا الشغل كله ما يعجبني أول مره أشوف عروس جهازها وذهبها مو عدها وعمتج دخلت نفسها هاي هي أستلمي شلعان الگلب وطيحان الحظ من هسه .
لبنى ـ سگتت شحجي وفعلاً ما حسيت بفرحة جهازي وثاني يوم نفس الشيء ولا أختاريت على ذوقي وأذا أختار عمتي ترجعه وتأخذلي غيره وكظتها عليه ترزل بيه
حربيه ـ ولا تگولن أبونا مات شگد صلفات يعمه شويه عاد أخذيلج ألوان راگده عاد بيني كدام العالم مقهوره على أبوج مو العالم تحجي وتعيب.. شبلاجن كاتلات نفسجن علما تعرسن تلحكن على الرجال والواق والويق
لميعه ـ عوفي البنيه حربيه خطيه خوما يوميه معرسه
حربيه ـ لا خيه أذا أعوفها تكرف السوك زرق ورق هاي جاهل شمعرفها شتلبس وبسوالف المتزوجات .
لبنى ـ حيل أنقهرت وأنهضمت بحاجيتها ورجعت البيت حلفت بعد ما أروح وخابرت باقر وبجيت أنت المفروض تمشي وياي ونجهز أني وياك
باقر ـ ليش البچي يا عيني على كيفج شوي شوي فهميني من شنو مقهوره والله هسع أعوف دوامي وأجي أجهزلج من جديد شتردين بعد
ـ ما أريد بعد وين جنت هسه تذكرت
ـ والله الشغل فوك رأسي والغرفه اليوم نجيبها نشدها
ـ نفس الصورة الدزيتها اليه مو
ـ أي نفسها حبيبي على ذوقج أخذتها وأذا جهازج ما عجبج وزعلانه ميخالف عديها ورى العرس وعد مني أني أخذج السوك ونفتر كل المحلات والمولات أختاري وأخذ االيعجبج بس لاتزعلين
ـ تمام هذا هو
ـ يروحلج فدوه المزعلينج من صغيرهم لجبيرهم .
ـ ما زعلانه والله بس حزت بخاطري
ـ أبوس خاطرچ وأرضي يا بعد ناسي.. أويلي شمسوية بحالي شگد أحبچ والله أحبچ حيل يا المصگوعه .
ـ خجلني وأكتفيت الله يحفظك.. باقر خاف عندك شغل وعطلتك عن شغلك
ـ شلون أعوفج بالي يمچ وأركز بشغلي والله يا لبنى حتى الهوى اللي أتنفسه أحسه يمر من يم طاريچ عيونچ، ضحكتچ، حتى عتبچ وزعلچ صايرين أغلى شي عندي
ـ سگت وهمست باقر مو هيج خجلتني وضحك وگال
ـ تخجلين يا بعد حيل باقر لبنى أنتِ مو بس حبيبتي أنتِ العمر اللي جاي أتاني أعيشه. تصدگين وجهچ هذا اللي أحس الضو يطلع منه، هو اللي ينسيني تعب الدنية كلها والدوام ومشاكله أنتِ مهونه گلشي
.. ولو خيروني بين كنوز الدنيا وبين لحظة وحدة أگعد بيها مقابل عيونچ وأتأمل تفاصيلچ أختار عيونچ وأنا الممنون.
ـ أنا شلون بية وأنت هيج تعاملني أخاف أتعود على دلالك وأنسى الناس والدنيا كلها .
رد بسرعة، ونبرته جانت مليانة ثقة وحب
ـ لا حبيبي تعودي وانسى الدنيا وأنسي كلشي أنا كفيلچ من كل زعل ومن كل تعب وما دام إنتِ وياي أحس إني ماسك زمام القوة بإيدي.
لبنى أنتِ ضحكة عمري وكل يوم يمر أكتشف بيج شي جديد يخليني أتمسك بيچ أكثر، كأنچ بحر وكل ما أغوص بيه أگول يالله شگد حلو هذا الحب
ـ الله يخليك إلي يا بختي الحلو
ـ ويخليچ إلي يا عافيتي.. نامي وارتاحي ولاتشيلين هم يكفي أنتِ صرتي زوجة باقر اللي أول ما يكعد من النوم أنتِ أول شي يجي على بالي وأول شي يخليني أبتسم لدوامي ولتعب يومي .
ـ تمام حبيبي .. گلتها بصوت ناصي وهو ضحك من كل گلبه
ـ يروحلج فدوه حبيبج .
ـ أسم الله عليك..وضلينا نحجي ولينا مخليه كتاب برأسها وتدفر برجليها وجع راح شگو نكرصتي
لينا ـ سنگل حديقه يمعودين .
لبنى ـ عابتلج اي والله شحاجين قابل
ـ أي عقال خطيه عليكم ..لبلب سؤال تحبينه تحبينه لو بعدج بمرحله الأعجاب ما داخله مرحلة الحب
ـ تردين الصدك لينا أني من أحجي وياه أحس الدنيا كلها تتوقف مو بس وقتي حتى نبضي. مو قصة إعجاب أو كلمة عابرة لا باقر سكن روحي قبل لا يخطبني لان شعور الأمان حسيته بي من أول مره التقينا..
من أگول أحبه أحس الكلمة صغيرة وما توفي حق ذاك الأمان اللي أحسه بكلمه وحده من عنده
شلون أوصفلج..شوفي هو مو بس يسمعني هو يحس بيا قبل لا أنطق گلمه حنيته تغطي على كل قسوة شفتها بحياتي واهتمامه يخلي كل تفصيلة صغيرة بيا تحسسني إنها شگد مهمة عنده وأبد ما يقاطعني مستحيل بالعكس هو الوحيد اللي يخليني أريد أحچي وأحچي وكأنه يگولي أني مسمعچ وأني ملجأج
الحب مو بس كلمة وتنگال الحب أمان.. والحنية اللي شفتها منه خلتني أتيقن إني ما أحبه وبس أني مغرمة بوجوده مغرمة بكلشي بي ومستعدة أگول لكل الدنيا إن اللي گدر يوصل لگلبي بهاي الطريقة يستحق أكثر من كلمة حب ويستحق عمري گله .
ـ فدوه شگد حلو حبكم وطاهر ونظيف الله يحفظكم لبعض ويخليكم الف الحمدلله الله عوضج ورزقج أنسان تستاهلينه ويستاهلج وباقر خوش أنسان بمعنى الكلمه .
ـ الحمدلله ربي.. تسلمين أختي حبيبتي ويفرحني بيج أريد تشدين حيلج كدامج مستقبل حلو ينتظرج دراستج لينا أهم شيء دراستج حلم أمي وحلمي كله بيج
ـ أن شـاء الله ..
ـ عفتها تدرس وتمددت بفراشي مرتاحه.. كعدت الصبح وعلى أساس أروح أشوف غرفتي وأرتب أغراضي بس عمي ما قبل وهم گام يحجي حتى خالتي ما قبل عليها تروح وضجت حيل گلشي أريده ما يوافق عليه .
ومرت هالفتره ومر على وفاة أشهر وأجه الموعد والخوف سگن گلبي بالأخص الناس مـا تساعد منا عمتي حربيه بس تعيب وتتنقد أقل تصرف من عدنا منا عمي محمود ما يقبل على گلشي بس يرزل ويحجي حتى بروحة الصالون گلب الدنيا عاد خالتي عاطت بي
سميعه ـ ترى مـا صايره هاي لا خليتوها تجهز براحتها لا راحت شافت غرفتها لا رتبت غراضها نوب روحة الصالون ما تقبل شطلعت هاي شو بناتك ما تحجي عليهن من البارحه هنا وبنات مشعان نايمات بالصالونات بس عليه وعلى البنات تمانع والله أخذهن واروح طگت روحي منك.
لبنى ـ ضربها راشدي ونور گبت بي وضربها أني ولينا سحبناها من كدامه وهو يعيط ويحجي
نور ـ على شنو تضربها شو شايف نفسك شوفه وأيدك أخذت عالضرب شوف وأسمع زين أنت عمي وأحترمك بس من تضرب أمي أتصرف غير تصرف وياك .
محمود ـ بنات گلب أدبسززيات أني أعلمجن وأني كواد أذا خليت وحده منجن تعبت باب الحوش وبعدين مو حزنات على المرحوم أكعدن وأنجبن والحنه ما تصير اهنا بيت مشعان هي لأهل العريس انتن شگو موليات الصالونات بس لبنى هسه أوديها.. يله تحضري
لينا ـ الله يأخذك ان شاء الله تنكسر ايدك أني أعلمك شراب العرك أبو المتع أصبرلي أذا ما طيحت حظك وأروح الصالون غصبا على رأسك دكول صبلوغ حصو
لبنى ـ صميت حلگها ومشينا من كدامه شال البيت شيل بعياطه وخالتي كعدت بغرفة نور مقهوره وتحرك بروحها. لبست وطلعت أمشي وياه وأنفتح الباب ودخل نافع يمشي بثكل ما أعرف ليش حسيت لينا خابرته
محمود ـ نافع شجابك
نافع ـ لبنى روحي گولي الهن يحضرن نفسهن يله نص ساعه الكاجن يم السياره.. خال تعال نحجي .
لبنى ـ عمي محمود مشى وياه حيل ورجعت فرحانه وگلت الهن ولينا لكيتها متحضره أنتِ كلتي اله مو
لينا ـ أي منو يگدرله غير نافع والله لما هو أحنه ماكلين وحل ..
نور ـ روحن وأني أطلع وياجن وغافر يوصلني
سميعه ـ خابري لا عمج ينبص نفسه ويسويلج سالفه هذل ما عنده لحيه مسرحه
نور ـ خيولي بس نافخ نفسه عالنسوان بس شاف نافع فش عربانه والله كل خير ما بي..
لبنى ـ ضحكنا وتحضرنا ونور كشخت وخابرت غافر وطلعنا لكينا غافر ونافع واكفين واحنه طلعنا ويه نافع ونور ويه غافر وتوجهنا للصالون..
وصلنا الصالون وبلشنا شغل وخلصنا نافع أجه أخذنا ونور هم راحت ويه غافر وقبل لاتصعد سيارته أجتي على خالتي وگالت الها
نور ـ ماما أني ما أجي عالعشه أتعشى بالمطعم وأروح للمول غافر يريد يشتريلي ملابس
سميعه ـ بس لاتتأخرين فدوه لعينج عمج يفضحني
نور ـ نافع يسكته! نافع كظ خالك بس هاليومين
نافع ـ أن شـاء الله .
لبنى ـ رجعت على غافر ونافع شغل السياره بسرعه وطلعنا قبلهم وصلنا وطول الطريق ساكت ما حجه وهمزين ما لگينا عمي.. ونور تأخرت وخالتي تلوب من الخوف وعينها عالساعه وتتصل تگول هسه وصلنا وهي ماكو... وأجتي هي وغافر يضحكون وشايل الاكياس خلاهن بالطرمه .
غافر ـ أستلمي بنتج خبصتيني بالأتصالات عبالك خاطفها صدك جذب خاله والله ما يوم تهنيت بطلعه وياها .
سميعه ـ شسوي يا خاله قابل بيدها عمها مخبل
غافر ـ مخبل على نفسه أني مو كواد ترى رجلها شرعاً وقانوناً بس راح أسكلته وما اخلي عقلي ويه هيج نفسيات تعبانه .. يله خاله باجر الصبح أمرلكم أخذكم الصالون .
سميعه ـ أن شـاء الله وليدي .
لبنى ـ خالتي أخذت الأكياس ودخلتهن وتعض بشفايفها لنور تريد غافر يروح قبل لا يجي عمي بس ضلوا واكفين بالطرمه.. مشيت عفتهم ودخلت غيرت ملابسي ودخلت المطبخ عبالي راح وشفته حاضنها من خصرها ويبوس بيها من خشمها وهي خجلانه وشافتني وأبتعدت يبوو شموقف خايس .
غافر ـ أحمم يله حبيبي تصبحين على خير
نور ـ وأنتِ بخير حبيبي .
لبنى ـ أسفه والله مو قصدي أباوعلكم عبالي راح
نور ـ لا عادي لا هو عاقل..يله تعالي .
لبنى ـ دخلنا وكعدنا بغرفة خالتي ونور جابت كرزات وسوينا كعده حلوه وهي ولينا كعدن يسولفن وأني خالتي أخذتني عالصفحه وكعدت تحجي وياي وتعلمني وأني بس أهز برأسي ولينا تخلي أذانها ونور تنام عليها وتسد أذانها
نور ـ سوالف متزوجات ما يصير تسمعين عيب ماما
لينا ـ ها أي فهمت فهمت.. صدك خاله شكراً
سميعه ـ محد طالب منج تتشكرين
لينا ـ فواكاها يعني مو صوجج صوج اليتشكر منج
سميعه ـ أي ديري ظهرج وصمي أذانج والا أكولج كومن منا خلنا لوحدنا شعدجن كاعدات يمنا .
ـ طلعن من الغرفة وخالتي حجتلي وعلمتني گلشي ووصتني بهواي أمور تخص الحياة الزوجيه وتشكرت منها وگمت لغرفتي لكيت باقر متصل أتصلت عليه ما رد عليه يمكن نايم واني هم نمت وراي باجر .
الصبح أجه باقر أخذنا الصالون وخالتي كعدت ليورا واني كعدت بالصدر عنده ولينا تصور بينا ونور راحت ويانا
حاجزلي صالون لوحدي همزين مو وياهن ولا عمتي أجتي بس خالتي لميعه ويانا ما ردت مكياج طوخ وتغطي ملامحي والحمدلله عجبني ورضيت بي
خلصنا وناجح أجه أخذنا وصلنا بيت عمي مشعان مرتبات وجايبات كوشه وكلهن موجودات كعدني وخاالتي يمي ما عافتني ونور ما مخليه قطرة مكياج بس مرتبه شكلها وفستان مستور وحجاب وگفت بصفي هي ولينا وخالتي بس لابسه عبايتها لون اسود وشيله سوده هي من يوم يومها هذا لبسها مرتبه بس تلملم بشيلتها وتلتفت تحس الكل يباوعلها .
نور ـ يمه شبيج ضامه وجهج
سميعه ـ حاطة أيدي على گلبي والله يا يمه الله يعدي هاليوم عالخير وما نسمعلنا حجايه .
لبنى ـ سگتنل وبدأت الحنه ودخل باقر بطوله الحلو ووتقرب باسني من كصتي ولزمني من أيدي بحنيه دافيه .
باقر ـ تخبل مريتي طالعه تضوين .
لبنى ـ دنگت خجلانه منه والعرفته ماكو گلشي عمتي حربيه ما تقبل بس يصفگن ويباعن بالوجوه وعمتي وهبيه ضاجت وگامت تبجي وطلعت ولحگها باقر والحجيه هزت رأسها ما عاجبها الوضع شگو
نور ـ عمتي حربيه ما تريد حفله عالسكتاوي .
لينا ـ شيسمونها شهل الجذب والنفاق هذا أشو بناتها صارلهن يومين نايمات بالصالونات باوعي لبسهن ومكياجن وشعرهن.. اجيتهن هذاك اليوم بغرفة صفا مشغلات اغاني ويهزن ويركصن هنا وبنات عمي محمود من جانت عمتي حربيه يم بيت جدي فد منفقات شهل الفنود بس هاي شكليات كدام العالم والله عود حزينه ومقهوره على أخويه..
لبنى ـ سگتي يمعوده.. وسگتنا وضلينا كاعدين وباقر رجع كعد وعمتي كعدت بصف الحجيه وتصفك وتباوعلنا ودمعتها بطارف عينها وشويه وسمعنا صوت ديجي وأغاني عاليه وعمتي حربيه نترت وگامت تحجي
بصوت عالي .
حربيه ـ ياهو الشغل هالمهجوم منو شغل أغاني دافنين رأس بصل المات أخويه .
لبنى ـ ودخل نافع شايل الديچي وخلاها يم الباب وصاح
نافع ـ أني شغلت هالمهجوم والحزن بالگلب والمات خالي والله يرحمه والمعرس أخوي مو يوميه متزوج.. يله أريد تسونله حنه وفرحه ما صارت ويمه حقج على رأسي بس الفرح فرح .
حربيه ـ والله حرامات بيك التعب هذا خالك يكواد خالك
لبنى ـ كامت عمتي وهبيه باسته وتشگرت منه والحجيه باسته من خشمه وتقدم حضن باقر وباركله
نافع ـ مبارك يابه شايفين الف خير .
باقر ـ الله يبارك بعمرك أخوي حبيبي
لبنى ـ ترخص وطلع وصفا شغلت الديچي وبلشن يركصن عبالك جانن متحضرات لچية نافع وعمتي تعض بشفايفها وتحجي وترزل ما سمعن الها وذبن لحمن بركصهن ولينا ونور واكفات بصفي يباعن..
وعمتي وهبيه فرحانه وبلشت الناس تجي والصاله أنترست واجن بنات خواله وطلعت الحجيه تهلي وترحب بيهن ودخلن باركن اليه ولباقر وكعدن بصف خالتي وهبيه..
والحنه بس بنات وباقر ما طول شويه وطلع وبلشت فقرة صور ولينا تأخذ صور هي وصفا ما أرتاحيت لهل الصور!وردت منها بس تباوعلي ما تنطيني وجه ونور سحبتها وخلتها بصفها وضلت ترزل بيها عاد كرصت .
لما خلصت الحنه وعدت عالخير والناس طلعوا وضلينا بس احنه وبنات عمي ومحمود وعمتي طفت الديچي وجرت الواير وصاحت بصفا بعالي صوتها.
حربيه ـ أمشي تودينه على أخوج لا أخذه أكسره على رأسه ما يستحي ولا يكول لخاطر خوالي متغزر بسميعه وبناتها وهنا ولا مهتمات مات صباح وخلاهن على حل شعرهن بكيفهن يوميه معرسات .
سميعه ـ شنو هالحجي حربيه عيب عليج ششايفه عليه وعلى بناتي هيج تحجين كافي سگتلتج هواي
ـ وشعندج سگتيلي يمه شعندج أحجي
ـ خليني ساكته يحربيه وخلي حنة هالبنيه اليتيمه تعدي على خير والله أنه ما ردت أجي بس گلت خطيه يتيمه وتنهضم وخوما يوميه معرسه أجي وياها
ـ أنتِ أخر من يحقله يحجي ولج جان أستحيتي على روحج وخليتي قدر لنفسج ولميتي بنتج وكعدتي بالبيت شگو جايبتها وجايات وكاشخات ومعرسات يبعد عيني وما صدكتات يموت وتعرسين أنتِ وبنتج بنفس الشهر.. أثاري طلع أخوي خانگجن خنك واحنه ما ندري .
سميعه ـ عيب عليج يحربيه شلزومه هالحجي وين الكشخه يخيه شو متبكبعين بالاسود وانه هذا مهدامي من يوم يومي وبنتي مستوره والحمدلله دام حزنانه شو ما تحجين على بناتج مو صالونات ومكياج ودك ورگص شو تندرتي عليه وبنتي .
حربيه ـ والله بناتي لما شافنچ أنتِ وبنتج كاشخات وما مهتمات هنا هم يگولن مرت خالنه ما حزنانه عود يعني يقتدن بعمتهن وعمتهن معرسه وبس تتنفض
الحجيه عطايات ـ حربيه مسلتي هواي تحشمين نفسج لا أكظبح الباب وما أخليج تفوينه أنه كم مره حجيت وگلت سميعه وبناتها اليجيب طاريهن أتفل بوجهه .
لبنى ـ تعاركن بالكلام يبووو على حظي وعمتي سميعه گامت تبجي نهضمت حيل ونور هم مسناها بالكلام
حربيه ـ أي احجي من نار گلبي لان ما مهتمات ولبس وصالونات وطلعات بالمطاعم الخاتونه نور ما صدكت غافر يخطبها اليشوفها يگول جانت مخليته جوه أبطاها ومن خطبها الفستان والشعر ولا مهمته ولا گالت أبوي مات وهو بعده بحيله .
ولج هذا أبوج لو أنه مكانج أحفر گبر بصف گبره وأطم رويحتي وين حزنج ودگج ولطمج على أبوج من مات أم الفنود كله جذب كله جذب
لبنى ـ نور بس العيون تصب دموع صارت جمر وأخذت خالتي وگفن على صفحه ويبجن خالتي بعد ما حجت ابد بس بالبدايه بس الحجيه تلاغت هي وياها وعمتي حربيه صارت عصبيه وتصييح ما سگتت وجان يدخل نافع وعاط بأمه
نافع ـ ها يمه گملتي طلعتي البگلبج يله سگتي
حربيه ـ وأنت شعليك تسگتني شعليك لو محروك دمك وتدافع الهن مو هذن الكسرن گلبك ولك فشلنك كدام أهلك .
ـ وأنتِ تردين تأخذين ثارات وگته هالحجي هذا هالتمسلت هذا شيسمونه منو رايد منج ومن سمحلج تحجين وشعليج باليحزن والما يحزن ما كاعده بگلوب البشر أنتِ عوف الناس بحالها.
ـ ولك خالك المات خالك يكواد .
ـ مات الله يرحمه محد يموت ورا أحد يله گافي سگتي وحزينه على أخوج روحي الغرفتج ما داز عالحزنان يحضر لا أنتِ ولا غيرج يگول فلانه وفلان ما مهتم وما حزنان عليج بنفسج وبس وحجايه زايده ناقصه ما أسمع لا والله بالله بأيدي أوديج لأهلج وأكلب هالعرس على رأسج ورأس الخلفوني .
الحجيه عطايات ـ امشي لا بارك الله بيج .
لبنى ـ ما سگتت أبداً والحجيه أخذتها خافت من نافع ونافع تقدم سحب خالتي من حضن نور وحضنها ويسگت بيها وخطيه گامت تبجي عالصدره وتشهك..
نافع ـ دموعج حيل عزيزه على گلبي عميمه لاتوجعين گلبي فوك وجعه عميمه وحقج على رأسي وأمسحيها بوجهي ولو أدري بهل التمسلت بساعتها أخذها وأوديها على أهلها لما يفض العرس يله أجيبها بس فاتتني .
سميعه ـ فدوه لطولك يعمه ما تقصر بس الصوج من عمتك المفروض مل أجي لا أنه ولا بنيتي الظاهر صرنا ثگيلين يعمه
نافع ـ أروحلج فدوه عميمه لاهيج تحجين البيت بيتج .
لبنى ـ سگتتها وباوع على نور تبجي ومهضومه حيل عمتي حيل قست بالكلام وياها ونافع باوعلها هز رأسه بقهر وخالتها صبيحه أخذتها تسگت بيها وتحجي وياها وهي تباوع على خالتي وتبجي
صبيحه ـ ميخالف عمتج وحجت شجاج ملختي نفسج يا أمي
نور ـ خاله مو حجت عليه وعلى حزني على أبويه وأنه أبوي حيل عزيز عليه ليش هيج تحجي عليه وعلى أمي ترى الحجايه توجع.. والمات أبويه مو بس أخوها ولو أدري هيج والله فلا أوصل واني صوجي أجييت بس لخاطر لبنى ما ردت تحس روحها يتيمه وماكو أحد وياها وتنهضم واجيت وياها لخاطرها والله لخاطرها وتاليتها يحجون عليه بحزني على أبويه ليش خاله ليش
صبيحه ـ ميخالف عمتج ميخالف وهي من حركة گلبها على أبوج حجت ميخالف عمتج
نور ـ عمتي على عيني وعلى رأسي بس گلشي الا أحد يحاجيني على حزني أبويه..هذا أيويه خاله أبويه كسرلي ظهري .
لبنى ـ بجتنا وياها لان تحجي وعبرتها ترس صدرها ودموعها تصب ونافع ضل ساكت وورجع باوع علينا وگال
نافع ـ تحضرن أوصلجن البيت .
لبنى ـ وتحضرنا وباقر راد يوصلني بس نافع ما قبل وصعدنا بسيارة نافع ونور أجتي ويانا وطول الطريق هي تبجي ووصلنا نزلت أول وحده وخالتي تشكرت من نافع على موقفه ويانا ..
دخلنا البيت والجو كئيب وقررن وگالن باجر ما يروحن ولا يحضرن يضلن بالبيت وتعذرن مني بس لينا تروح وياي .
باوعت بالمرايا وعلى بدلتي وصفنت على روحي عود عروس الله يرحمك بابا لو عايش وفرحانين بوجودك ولا هالكسره خليتنا مكسورين من دونك يحبيبي .
ذبيت البدله ولينا ساعدتني بالتسريحه وغسلت وجهي من المكياج وأسمع صوت نور تبجي غصتها لحدهسه بصدرها الله يسامحج يعمه .
دخلت لميت الهوسه وموبايل يتصل باقر جاوبته هلا حبيبي .
باقر ـ ها عمري.. لبنى يابه عود العرس تأجل!
لبنى ـ تأجل شلون يعني .
باقر ـ الصار اليوم بالحنه مالتج مس كرامتي وكرامة أمي وكرامتج وكرامه عمتي وأخواتج والما يحترمج ومعناها ما يحترمني ويحترم فرحي
ـ باقر شصار
ـ كل الخير وراج أخذت أمي ورجعت العرب والعرس تأجل
وبعدين أخابرج ..
ـ قطع الخط وضليت مصدومه بهل الأتصال ليش هيج صار ولينا صافنه بوجهي ماكو عرس يگول تأجل.
ـ هذا شبي ومعازيم والذبايح المحضرينها! هاي أكيد عمتج الحيه سوتلها عركه وتعاركن الضراير الله يدري شخرطت علينا وباقر ضاج وأخذ أمه ومشى العرب ربي كون عمي مشعان مطلگها وشامرها على مهديه .
ـ تحجي وبالي مو يمها بالي يم باقر وصوته مبين عليه شگثر ضايج.. وأتصل موبايل لينا منو يتصل
ـ هذا نافع أجاوب
ـ جاوبي شوفي شيريد.
لينا ـ هلا نافع
نافع ـ باقر أتصل عليكم
ـ أي وگال العرس تأجل.. نافع صاير شيء
ـ لا ما صاير شيء والعرس ما تأجل.. وباجر تتحضرن ناجح وزهور يمرون عليجن تروحن الصالون تسون الأكوله الجن حجي زايد ناقص ما أريد .
ـ ماشي هذا هو
لبنى ـ قطع الخط وباقر شو هذول كل واحد يحجي شكل
لينا ـ يمعوده هذا ضال يسد فتوك ورا أهله ومشاكلهم
لبنى ـ هم صحيح ونمنا وبالي مشغول وخايفه من باجر خايفه لاتصير سالفه بوجهي للصبح أني ما نمت الافكار تربعت برأسي..
تحضرنا بس أني لينا ونور ما رادت تروح بس بعدين تحضرت ويانا ورحنا الصالون وجنت طالبه حجاب ما طولنا ورجعنا البيت ولا أحد وصلنا وعيني علباب نور شو ماكو أحد ولا باقر أتصل والله نشغل بالي
نور ـ لا لاتخافين ماكو شيء هسه غافر خابرني گال بالطريق
لبنى ـ تروحين ويانا .
ـ لا والله أعذريني خالتي صبيحه تروح وياج وأمي لوحدها ما أكدر أعوفها وهي منا نفسيتها تعبانه .
ـ تمام براحتج.. أختنگت تمنيها تروح وياي ودمعتي بطارف عيني وگالوا وصلوا ودخلوا بدون گلشي وهيج أحسن وتقدم باقر لزم أيدي وخالتي حاجته وتوصي بي واني أبجي وخيال أبويه صار كدامي .
سميعه ـ ما يحتاج أوصييك عليها بس أگولك طفله ويتيمه أم وأب ونهضمت دير بالك عليها .
باقر ـ بعيوني عمه ما يحتاج توصيني .
لبنى ـ تقدمت حضنتني وتبوس بيه حضنتها بكل قوتي خاله .
سميعه ـ سامحيني يمه وأعذريني خاف قصرت وياج روحي الله يسعدج ويوفقج يمه .
لبنى ـ ردت أودع نور بس خالتي گالت
سميعه ـ تروحين ويه أختج ما تعوفينها لوحدها
نور ـ ماشي ماما .
لبنى ـ وصار الوقت نطلع وأجاني ميثم يركض حضني وگام يبجي وأبوس بي دير بالك على خاله وعلى لينا ونور أنت زلمة البييت وأحنه نباوع عليك تمام هزلي رأسه ودموعه تصب وأخذته خالتي وباوعت لبيتنا ودعته ودعت ريحة أبويه ولينا ونور ساعدني بالبدله وصعدت السياره وأجه نافع صعد لان الزفه بسياره نافع هو اليسوق وباوعتلي نور كل ظني تصعد بالصدر بس گالت
نور ـ أني راح أروح ويه غافر وخالتي تمام
لبنى ـ تمام عيني راحت وأجتي زهور رادت تصعد بس نافع منعها اباوعلها أدور مكان ماكو وتلتفت وصاح عليها نافع .
نافع ـ لا لينا تصعد.. لينا تعالي ويانا .
لبنى ـ أجتي شگد فرحت لان حسيت روحي غريبه أختنگت وباقر أجه ما أعرف وين جان .
باقر ـ تأخرت عليج حبيبتي
لبنى ـ لا عادي.. حضن جف أيدي بحنيه والرجفه سرت بكل جسمي وشغل السياره نافع وشغل أغاني وباوع على لينا وگال .
نافع ـ لاتخلين شيء بخاطرج والأغنيه التعجبج شغليها
لينا ـ صدك نافع مشكور عيني أغرمتني بگرمك والله أنت معدل .
لبنى ـ وعلى الصوت ومشى بكل سرعته الف بالسيارة شويه ولينا تصفك وتضحك هي ونافع وتصور الاجواء
تلتفت علينا وتصورنا ردت أمنعها خاف تجينا حجايه بس هي جاهله ششافت من حياتها خليتها تتونس خطيه.
لينا ـ عيني سيادة الضابط باوعلنا يا أخي اليوم عرسك مو بالمركز ليش وجهك مرعب
باقر ـ هههههه ولج فگي عني الله بلاني بيج
نافع ـ هههههه مصيبه.. لينا صوريني وأني ما أدري أريد منج ستوري حلو.
لينا ـ وياك مصوره درجه أولى .
لبنى ـ تونسنا وياها سوتلنا أجواء وتصفك وتباوعلنا ونافع يضحك على حركاتها
نافع ـ كون أمي تشوفج
لبنى ـ ضغط على أيدي وتهربت منه وگلبي يدگ سريع
باقر ـ زعلانه مني
ـ لا بس خوفتني من گتلي العرس تأجل.. شاورني
ـ أذا أنت خفتي أني اليل ما نمته والله أعد ساعه ساعه أجييج يمي وأخليج بحضني .
ـ ردت أفقد الوعي الا شويه وضحك عليه ورفع أيدي وباسها وأستحيت نافع يباوعلنا بالمرايا رغم الخوف بس الأجواء جانت تجننن وعبرت من يمنا سياره ودگ هورن بعلو صوته باوعت هذا غافر يسابق ماكو وياه بس نور
نافع ـ ما تگدرلي هسه أعبرك أوگفلي .
غافر ـ سيارتك جديده عيني شحاجيك يابه
باقر ـ عوفوا سوالفكم يمعودين أستروا علينا .
لبنى ـ وتسابق وياه وعبرهم وصلنا الأستديو نور أجتني ساعدتني ودخلت وياي وأخذنا جلسه تصوير وجانت أصعب شيء حركات ونظرات ما عبالي هيج
باقر ـ يابه الوجه صار أصفر طركاعه على رأسك يباقر حبيبي أحد گايلج أني عتوي شبيج رب الحلو والله أخاف عليج توكعين لاتخافين والكعبه ما أخوفج أمني بيه حبيبي .
لبنى ـ بلعت ريگي وطلعنا ونافع وغافر واكفين يحجون ولينا بالسياره نزلت ساعدتنا وطلعنا للقريه ..
ووصلنا بعد تعب ووقت طويل ودخلنا القريه بوسط هورنات عاليه ونافع نام عالهورن ولينا ساده أذانها
ووصلنا القصر والحديقه مالتهم مليانه كراسي وكل عربهم موجودين الزلم بحديقه بصف الديوان والنسوان بالصفحه الثانيه ونزلني وكل النسوان والبنات والجهال يباعون عليه العرفته من عربهم شگد حبيت الأجواء.
كعدت وباقر بصفي وهلاهل وطشوا الجگليت وتقدمت عمتي تبوس بيه ومر الوگت بوسط الهوسات والهلاهل والأجواء تخبل وگالوا يردون يركصون اله وهو ما كعد شوي ودزوا عليه راح يم جده ناس تباركله ..
نور ولينا كعدن بصفي .. والزلم مجموعيين يخططون يمكن علمود الجوبيه وبيهم خوال باقر مبينين خمس زلم وتوسطوا الحديقه وخوال باقر بالبدايه بعدهم باقر ونافع وغافر وناجح ..
بس باقر عافهم وصار يجوب بالنص خبره بجوبي وگابله نافع ورجع ترأس الجوبيه هو وغافر وباقر عيوني تلاحگه الجوبي مالته يخبل .. وأستمرت الحفله للعشه وگالوا صار الوگت يدخلون العرسان يمه دخيلك ربي .
نور وياي مـا عافتني هي وخالتي لميعه ساعدني ودخلني القصر للغرفه والحجيه حاضنه باقر وتبوس بي
الحجيه عطايات ـ يمه فدوة لطولك والله أنطاني عمر وشفت عرسك يحيل حبوبتك مبارك يحبوبه مبارك .
لبنى ـ دخلنا الغرفه والأعرفه كالوا هناك تسكنين وغرفتي هناك ليش هنا هم محضريلي غرفه يجوز تغير الكلام وأسكن هنا.. كعدت على طرف الجرباية ومجلبة بطرف فستان نور فدوة لا تروحين ابقي يمي، لا تعوفيني.
نور ـ يا حبيبتي شلون أروح بس عيب ما يصير أبقى يمج عيب ولا تخافين، اذكري الله وأقري الأدعية الكالتلج عليهن ماما وباقر خوش ولد ويخاف الله بيج
لبنى ـ سگتت وهي تطمن بيه والحجية وعمتي وهبية وخالتي لميعة كعدن يمي يحاولن يطمنوني ومن بعيد شفت نافع وغافر واكفين بالباب دفعوا باقر ويضحكون عليّ ودخل باقر وهنا گامن
الحجية عطايات ـ لا تنسى الصلاة يا حبوبة، اذكر الله وسمي باسمه
باقر ـ إن شاء الله حبوبة
لبنى ـ طلعوا وسمعت صوت القفل وهو ينسد وراهم.. دگات گلبي صار صوتها يتردد بكل زاوية بالغرفة، جنهن طبل ويطبل گمت أرجف وحسيت بإيده ترفع حنچي بخفة، صفن بوجهي، وباسني من گصتي.. طالت البوسة وحسيت بلمسة إيديه الدافية وهي تحضن وجهي، وصوته نزل على گلبي مثل المي البارد حاجاني بحنيه
باقر ـ يا روح باقر يا عمره، وحياته، بدايته ونهايته
ألف هلا بيج بحياتي، يا سورها ونورها نورتي بيتي لبنى
ـ نزلت راسي بخجل وبصوت ناصي گلت من بعد نورك
سكتت، وسحبني من إيدي بهدوء.. صلينا ركعتين شكر لله، وأني بمكاني وبحالة من الخجل والتوتر وأصعب لحظات عمري، بس هو ما حسسني بخوف عاملني بحنية چني طير مكسور، ما استعجل ولا ضغط عليّ، جان يباوعلي بنظرات مليانة حنان وتقدير
سحبني وگعدني يمه على طرف الجرباية، وبدا يسولف وياي بهداوة، كأنما خايف لا يكسر شي بيا من كثر رقته
مسح على شعري بإيده، وگال
ـ جنت أراقبج من بعيد، وأگول يا ترى راح ترضين بيه يا ترى هالبنية الحلوة راح تتحمل طبعي! اليوم، ربي حقق أمنية جانت تطلع ويا كل نفس أتنفسه
ـ رفعت راسي وشفته يباوعلي بنظرات تخلي الواحد ينسى كل خوفه، وعيونه تحجي أكثر من لسانه. همستله مو بس انت جنت تراقب حتى أني جانت عيني عليك وأدعي ربي يجمعنا بالحلال
ضحك ضحكة خفيفة، وسحبني لحضنه بهدوء حسيت الدنيا كلها توقفت بهذيج اللحظة حضنه جان مثل الملاذ اللي جنت أدور عليه من زمان بهدوء مسح على كتفي وباس راسي، وهمس بأذني
ـ الحمد لله اللي جابج لبيتي والحمد لله اللي خلاج من نصيبي .
ـ نزل بـراسه تجاهي أنفاسه أختلطت بأنفاسي، وبحركات بطيئة تنم عن شوق واحترام، باسني من گصتي وبوسات خفيفة على خدي.. كل بوسة جانت مثل الوعد، وعد بالأمان.
يمسح على وجهي بحنية، ويخلي بوساته تذوب الخوف اللي جان مچلب بگلبي يهمس بين بوسة والثانية كلام يخلي روحي تأمن اله
ـ يا نبض باقر.. يا أغلى شي صار بحياتي، ما مصدگ أنتِ كدام عيني كدامي بهاللحظة
ـ بقيت ساكتة وأسمعه ويزيد يقيني إني بين إيدين إنسان عرف شلون يصون روحي قبل جسدي.. جانت ليلة عمر مو لأنها ليلة عرس بس لأنها الليلة اللي بديت بيها أحس إني صدك محمية بگلبه وبحضنه.. نمت وأني بين إيدين إنسان عرف شلون يملك قلبي من أول لحظة بحبه الطاهر والنظيف .
غافيه بتعب وبس أريد أنام والباب يدك وباسني من خدي
باقر ـ حبيبتي روحي.. يله الأهل ينتظرونا عالعشه وأمي بالها يمج خايفه عليج لان عمرج صغير بس الحمدلله عدت عالخير .
لبنى ـ لميت نفسي وهو گام قبلي وسبحت وجابلي الثوب المحضرته عمتي لبسته ورفعت شعري وگفت رتبت شگلي عالسريع وهو يباوعلي
باقر ـ على راحتج شورانا الليل كله عشه .
لبنى ـ گملت حبيبي تقرب حضني ولبسني گلأده بإسمي بالعربي وحرف من أسمه ومكتوب عليها تأريخ زواجنا تخبل كلش حلوه تسلم حبيبي
باقر ـ تستاهلينها حبيبتي .
لبنى ـ لبسها اليه وطبع بوسه على رگبتي وطلعنا وبلشت الهلاهل عمتي والحجيه وتقربت عليه تبوس وشفتهم كلهم كاعدين أستحيت وأريد أكعد يمه وهو حس بيه عافهم وأجه عليه كعد بصفي ..
وحضروا العشه وتعشينا وياهم كلهم عالسفره وحده مفرشه عالطول الصاله زلم ونسوان ماكو غرب ..
كملت قبله بس بقيت أنتظره وگمنا أني وياه للمغاسل وشفت نور وتذكرت لينا.. تقدمت عليها باستني
نور ـ الف مبروك
لبنى ـ الله يبارك بيج عمري. أكولج لينا ما شفتها
ـ سگتي وخليها غير من دخلتي الغرفه لحدهسه هي تبجي عليج أسكت أريد ما يفيد قفلت وتالي نامت عيونها ورمت من البجي
ـ سوده بوجهي.. رحتلها كالوا بغرفه خاله لميعه لكيتها نايمه رفعت الغطا وحضنتها وحضتني وتبجي يروحي أنتِ بنيتي أمي أهلي كلهم أنتِ ليش هيج تسوين بنفسج وبيه هاا ليش .
ـ ما عبالي هيج بس دخلتي الغرفه فرفحت كلت هاي هي راحت مني لبنى أخذها باقر ردت أموت وراج أني هواي أحبج وأنتِ أمي أني ما حسيت باليتم لأن أنتِ موجودة .
ـ أخذتها بحضني أهدي بيها وهي تبوس بيه لما أجاني باقر ضل صافن عليه ومبتسم
ـ خطيه شمسويه وراج هسع نافع يسولفلي حيل مقهور عليها يگول هنا فردتين ما يتفارگن هههه
ًـ خرب ولا يبطل سوالفه.. ضحك وطلع وضليت يمها واجتي نور أخذتها مني خلتها بحضنها وتمسح على شعرها تقربت بستها من جف أيدها بنيتي حبيبتي.
ـ روحي لايضل بالج.. أني يمها
ـ تباتين مو
ـ أي نبات ما ضل وگت الصبح نطلع من وگت لان غافر عنده دوام بالـ ٨ .
ـ أن شـاء الله.. نور أمانه ديري بالج عليها
ـ بعيوني والله لايضل بالج عليها .
ـ طلعت من يمها وشفت باقر واكف ينتظرني تقدم وأخذني لغرفتنا وأبتدت حياتنا الزوجيه بقصر الشيخ حبيب ..
_____________
لينا ـ بيوم الرحنه للقصر.. جنت بالصدفه أريد أروح المغاسل وسمعت صوت مره تبجي وتنعي بصوتها وصوتها يفطر الگلب.. أخذني الفضول وباوعت عليها كاعده ورا البيت بالساحه مكان معزول ركزت زين هاي أم باقر ومخليه صور بحضنها وتبجي وتردد أسم .
وهبيه ـ يمه حربي يمه يروح وحيل أمك طالت الغيبه يوليدي يسبعي طالت والله طالت وين جانتلك هاي شيصبر گلبي عالفراك عمت عيني عليك يمه حربي
يمه كون السجن لأمك مو الك يا يمه ..
لينا ـ ما كدرت أتجاهلها تالي مسحت وجهه وحضنت الصور وتبوس وتشتم بكل حيلها وضمت الصور لصدرها وگامت على حيلها وأجتي ناحيتي وركضت ختلت بالمغاسل مشت وراحت رجعت غسلت وأني راجعه شفت الصوره واگعه بالكاع! مگلوبه ورفعتها من الكاع وركزت على الصوره رجال معگل لابس زي عربي جنوبي ملامحه حاده منو هذا!
ما أعرف ليش ضميت الصورة بصدري ومن وصلت الغرفة خليتها بجنطتي وصار عندي فضول اسأل وأعرفه منو وليش تبجي عليه وبطاري سجن!
رحت المطبخ شفتها كاعده وتعاون خالتي لميعه بالطبخ وضليت كاعده أباوعلهن وهي مالها خلك وتشتغل سريع وگامت ضلت بس خالتي لميعه
كعدت يمها أكولج خاله
لميعه ـ گولي عيني مبين عندج سالفه أحجيها من أجيتي لمطبخ أنتِ تحوصين شنهي طلابتج .
لينا ـ لا ما عندي طلابه أسم الله بس سؤال شفت أم باقر كاعده لوحدها وتبجي قهرتني ليش ميت الها أحد
ـ لا أسم الله بس الله يساعد گلبها
ـ ليش شبيها
ـ أبنها الجبير گتل واحد من عربنا ودخل السجن وأنحكم
ـ ها يعني أخو باقر ونافع يعني أخوهم الجبير
ـ أي الشيخ حربي.. ليش تسألين خيرج
ـ لا بس گتلج شفتها تبجي ما عبالي عدها واحد مسجون تعرفين أني أول مره أجي لقصركم
ـ أي حالها يبجي الصخر ويوميه على عالرنه تبجي دم الله يساعدها ويفگ أسره ويفرحنه بي .
ـ أمين.. وعفتها وطفرت على لبنى أكولج عرفت سر بهل القصر
ـ سر شنو ولج
ـ باقر مو عنده أخو جبير يگولوله الشيخ حربي
ـ غضب على يومج شبسرعه لكفتي أسمه منين عرفتي أستخبارات أنتِ
ـ لا غير شفت أمه ورى البيت حاضنه صوره وتبجي وتعرفيني أني مو فضوليه والله
ـ أبداً خطيه عليج.. لينا لاتتدخلين بإشياء متخصج
ـ دصبري غير أسولفلج شبي يجوز أنطيج سبب يخليج ما توافقين على باقر لان أخو گاتل واحد من العرب وداخل السجن
ـ گاتل واحد دخيلك ربي وشنو السبب
ـ ما عرفت والله نسيت اسأل اروح هسه اسأل
ـ لا وين دكعدي لا أبتلي بيج والموضوع سدي يجوز خاص بيهم لان ما سامعه مسولفين بي حتى خالتي سميعه ما جايبه
ـ لا وين دكعدي لا أبتلي بيج والموضوع سدي يجوز خاص بيهم لان ما سامعه مسولفين بي حتى خالتي سميعه ما جايبه طاريه .
ـ أي يمكن شيء خاص بيهم بس هما دائماً يگولون الشيخ وشلون شيخ ويگتل ويدخل سجن مو غريبه
ـ لزگتي عاد فضولج شيسكته شينومه عوفي هالسوالف وما الج شغل لاتتدخلين ما علينا تفض هالسالفه ونولي لبيتنا .
ـ تمام سگتت والله .. وعفت الصوره بجنطتي وبعد ما تبعت وراها ..
ولليل هما كاعدين يسولفون بغرفة الحجيه وخالتي وياهم ولبلب منهزمه تستحي ونور هم ما شفتها وصار الكلام وگفت وسمعتهم يحجون ومن ضمن حجيهم الحجيه وجهت المدفع عليه! .
نافع ـ ضلت بس الزيبك الله عليكم لا تزوجونها تفسدونها خلوها هيج أحلى
الحجيه عطايات ـ ان جان الك راده بيها هذي شيخه توالمك ومن تحجي الحجايه تدك وزنها تكول مصفطه تصفط منهدمه تعجبني وأحسها من نسوانك! لو الله يهداك وتخليني أخطبها الك وأزوجك بهل الشهر.
نافع ـ لا حبوبه وهي لان شيخيه ولسان ماريد الوثها
وهيه حسبه اخيتي وأني ما الومها تستاهل الأحسن من عندي
الحجيه عطايات ـ چا أذا أنت ما تريدها أمك مخليه عينها عليها وتريدها لأخوك ناجح والبنيه خوش بنيه
نافع ـ لا منين طلعتوا بهل السالفه البنيه بعدها جاهل ولينا ما مجبوره تاخذ ناجح وتدرس تتخرج تلكه شخص اليناسبها خلوها تدرس حالها حال صفا.
بس عوفوها مو مال زواج وتشيلون خطيتها ما سوينا شي خلصن من ولد قادر طلعتولها ولد مشعان خلص لبنى لباقر ولينا تدرس ونور لغافر عبالكم ماأدري اني ميفوتني شيء
شايفين من أنت بعز غصتك واداوي خواطر اللي تحبهم
هيج اني اهم شي تنسعد اني ما اوالمها بعد..
لينا ـ ضليت مصدومه والله ما أتزوج لا نافع ولا ناجح هاي جديتهم مصيبه ومخليه عينها عليه ردت أرجع ونافع طلع وشافني وضحك
نافع ـ لگفتلج شتسوين ولج
لينا ـ نافع عليك الله أنت مو تحسبني أختك
ـ أي والشاهد الله گولي
ـ الكلام السمعته ما أريده يصير
ـ لاتخافين أني ما أريدج ما الومج بس أزوجج لناحح شتگولين
ـ لا عيني ناجح ما أريده
ـ ليش عيني ما تريدنه شبي.. شبيج تجرين الحجايه جر وخليتني أصير مثلج
ـ ضحكت لا عفيه ما أريد أتزوج
ـ شبي ناجح خوش ولد وطيار يوميه يطيرج بطياره ويطير بيج وتصيرين مرت الطيار
ـ يمه عزه ما أريده لا طيار ولا غيره ما تهمني هالأمور والله.. نافع عليك الله شيل هالسالفه من رأسك ورأس أهلك
ـ لاتخافين شايلها والله ومحد يغصبج ويجبرج على شيء أنتِ ما تردينه لا أني ولا ناجح ولا غيره وتبقين معززه مكرمه تكملين دراسه وأريد منج تطلعين معدل بالسادس
ـ يجرالج يابه يجرالج وأي شيء تحاجينه ما يردج الا لسانج شنو تعتازين تجين عليه گبل أخوج الجبير أنه
ـ أن شاء الله.. راح البره وصفنت على كلامه والله أخو كفو.. خرب الحجيه منين طلعتلي بناجح عزه نوب طيار ضحكت على سوالف نافع يطير بيج ..
ورجعنا البيت وبلش الموسم الدراسي الصف الخامس أعدادي ورحعنا ندوام ورجعت صفا الخايسه لسوالفها ورجعتلي الخوف والهبطه عاد أضل طول السنه عايشه بقلق ورعب نفسي وقررت ما عليه بيها وأبتعد عنها .
طول هالفتره الصعبه المرت علينا عشناها بقلق نفسي وأفكار ومغثة كلام وحيايا كومه شفت بس على شكل نسوان مو حيوان وأولهن عمتي حربيه حية كوبرا ..
طلعنا من المدرسه وعيني أدور وراها والله خايفه منها حاطة أيدي على گلبي.. أجتي وحسيت مخليه شيء بصدرها صفا جايبه موبايل وياج .
صفا ـ لا وين أكدر أجيب موبايل علمود بسرعه أنلگف وأوكع بلسان نافع يعدمني حتى ما يخليني أتلاحك أتشاهد .
ـ ها بس أحسج تجذبين! صفا سوالفج عندي الموبايل مال منو؟ الاعرفه أهلج ما يقبلون تشيلين موبايل وأذا تجيبه تبقينه يم مديره منيلج .
ـ أراس جابلي موبايل بس أرقى نوعيه حتى أحدث من موبايل نافع كون تشوفيه الا تضربين زريك عليه .
ـ صخام بوجهج نوب جابلج موبايل ولج أنتِ شنو ما تخافين يوم واحد من أخوانج يلكفج مو گبل يذبحونج
ـ لا مضبطه أموري لاتخافين بس أذا أنت فتنتني عليه
ـ يارب الصبر والستر مشينا للبيت وحاطه گلبي بشبيشه لاتنلزم والله گبل ذبح هي خل تنذبح ولله هيج بشريه ما تحسب حساب تستاهل بس السمعه وأهلها وأخوانها خوش ناس وأني ضليت بين أنه ومانه حايره بزماني بسببها كرهت الدراسه بسببها كلما تبدي المدارس تبدي مكسراتها التعبانه .
وصلتها وندهتني بكتفي الا فززتني والله صارت بيه خوفه ها شتردين
صفا ـ العصر تعالي علينا
لينا ـ شعندي أجي عوفيني وعمي محمود ما يقبل ما أكدر أطلع ونافع هم ما يقبل
ـ ونافع شگو ليكون هو ولي أمرج أشوفج هواي مهتمه لكلامه خير لينو سولفي
ـ أخويه غير وكلامه تاج على رأسي يله نزلي وبله تمسلت غمتني ونزلت وأني بالي يم موبايلها! مال هسه أدز رساله لنافع وأكوله فتش أختك..
وصلت البيت وخالتي جاي تصلي والبيت فرغ عليه من تزوجت لبنى مخنوگه خنك كل ليل يمر أكظي بس أبجي عليها.. ونور هالفتره جاي تجهز هي وغافر ومرات هي وخالتي.. خطيه أحسها لگت العوض وغافر حيل يحبها ويدور رضاها يارب تسعد أخواتي وأني ما أريد گلشي غير تستر عليه من مصايب صفا ..
تغديت أني وخالتي وميثم ونور رجعت من السوك گبل نامت گملنا وردت أغسل المواعين مكانها ما قبلت
سميعه ـ عوفيهن أني أغسلهن منين جتچ النداره
لينا ـ خاله أنتِ مو مال زينيه مو بالله
ـ لا ما أريد منج خفتج وخفه شغلتج روحي على دراستج شدي حيلج هناك
ـ يله مشكوره صدك رجلج وينه ماكو
ـ رجلج شنو مو أكوم أكسر هالجفجير على صمامخ لما عمج أخو أبوج وشمدريني بالدوام لو بيته
ـ ههههه صدك خاله أذا ما حاسبته رجلج ليش مبقيته على ذمتج طلگي وخلصينا منا ومن شره بس يعيط خير شر عنده حنجره مالت بغل والله
ـ لو عليه من الصبح اطلگه هو ما يريد يطلگ دمشي درسي شلج بهل السوالف شگد تلهين يا أمي .
ـ عفتها ودخلت الغرفه نمتلي ساعه وكعدت لكيت صفا خابصه عليه الدنيا بإتصالاتها خير ياربي هاي شبيها وكع گلبي بين رجليه من الخوف وأتصلت عليها
صفا ـ وينج مو گلتي العصر أجي
لينا ـ شگو شعندج
ـ تعلميني على هذا موبايل بي هواي شغلات ما أعرفله
ـ مشكلتج صفا شمدريني شمعرفني بي شايفتني يوميه مشتريه موبايل شو على موبايلي من أمي لحد الان أدفع بي أيام هو لدراسه
ـ بس لدراسه ماكو منا منا
ـ شگو يعني
ـ نافع! غير نافع مثلاً أبو مسار
ـ نجبي نافع أخوي وأبو مسار شذكرج بي بويا شكد قديمه .. ديله ولي مالي خلكج عندي دراسه ورانا أمتحان لو نسيتي كالعاده
ـ لا ما نسيت تعالي يمنا نقرأ سوا .
ـ عوفيني صفا ما أجي هي گوه شهل الملحه
ـ أذا ما تجيين أكول لنافع على أبو مسار!
