رواية سواد الاثمد الفصل التاسع عشر بقلم نورس
من شفته شغل المكينة وتقرب مني
گمت أصرخ :- لا عبد فدوة لا أبوس ايدك إلا شعري عليك النبي لتسوي شي لتحرك گلبي بشعري اضربني والله قابلة اضرب وما أبجي ولا أطلع صوت بس فدوة لتجيس شعري
أنتر بجسمي وأنفض بروحي فرفحت من صار يمشيها على راسي واني أحرك بيه وأصرخ بعلو صوتي
سد حلگي كتم صوتي وثبت راسي مخلاني أتحرك
صاح بأرقم :- كمل
دموعي تنزل بحرگة أشوف شعري وهو يوگع للگاع خصل كبيرة على طولها توگع وتصير بحضني
عاجزة بلا حركة بلا صوت بس دموعي جانت تسولف وشاهدة على قهري وعلى كسرتي بذيج الساعة
وحوش بشرية فوك راسي محاوطيني من كل الجهات بلا رحمة وبلا عطف يمارسون أفعالهم الشنيعة وبارزين عضلاتهم على إنسان ضعيف بلا حيلة ولا قوة
ما عافني إلا لمن خلص عالأخير طفى المكينة وابتعد يباوعلي دفعته عني حيل وگمت على حيلي أباوع للگاع
عيوني مغوشة من گد الدموع المتجمعة بيها أمسح بيهم وعيوني تدور على شعري تارس الگاع صاير كوم
أتلمس راسي مثل المخبلة وأرجع أباوعلهم وأباوع لشعري اللي صار جوة الرجلين نزلت على ركبي
أشيله بيدي أتلمسه ممستوعبة هذا شعري
والله هذا شعري
رفعت راسي صار گدامي أرقم على وجهه إبتسامة حقيرة مثل وجهه القذر يباوعلي بشماتة
شگد مرت علي لحظات بحياتي ضعفت وانهاريت بيها بس كلهن ميجن يم القهرة اللي حسيت بيها بهذا الموقف
صرت مثل الحمامة المفرفحة ما أعرف شسوي بجيت صرخت لامة قبضة ايدي وأضرب على أفخاذي بقوة
نار أحس نارر شاعلة بگلبي واني أشوف شعري بالگاع
باوعت وراي لگيته واگف ايده بجيوبه ويباوعلي بكل برود بملامح جامدة وكأنه متشفي ومتلذذ بأنهياري
گملته انهديت بيه أضرب بأيدي وأصرخ ببجي
بان :- ولك حلفتك بس گولي ليش شنو أذيتي عليك شسويتلك گتلك اضربني بس لتلزم شعري ولك موتتني إلا شعري
ما تحرك ولا شوية ولا اهتز من مكانه وعينه مشالها
وخرت منه مدنگة لازمة صدري أحس گلبي راح يوگف الشهگة تطلع مني غصب وأجر النفس مثل الفحطانة
أنحب بصوت :- ولج ماما وينج ولج ماما راح أموت والله آخ يمة گلبي
بين كل كلمة تطلع مني شهگة عالية تشك صدري شك
دنگت ألم بيه بيدي وأجمعه حسرة بگلبي بس الله يدري شكبرها وشگدها البنية تشوف نفسها بشعرها وتصير روحها بيه گد متعزه واني دا ألمه من الگاع بيدي
انشمرت يمي مكرافة ومكناسة صغيرة وچيس زبالة
باوعتله من بين دموعي أشرلي :- اكنسيه ولميه يلا
ضليت صافنة بوجهه من شافني متحركت خزرني
عبد :- ويامن أحجي
هم ما تحركت شافني تعاندت وياه دنك جرني من التشيريت وشال المكناسة اليدوية يريدني ألزمها
دموعي تصب وصوتي بالبجي يعلى أكثر ويزيد تخبل عليَّ إلا تلزمين المكناسة تكنسيه وتلمين الشعر
أبد ما تجاوبت وياه صار يضرب ويزيد أذية حتى أسوي اللي يريده مني واني مالي طاقة حتى أحرك روحي
جابني براشدي لطشني بالگاع خليت راسي صار شعري گدام عيني لزمته وعضيت شفتي مغمضة عيوني بقوة
صاح بأرقم :- انتَ ذب الخرا التليفون وتعال لملي هذا الشعر من الگاع وذبه بالزبل
حجاها ورجعلي شالني من متني وجرني سحل رجعني للغرفة شمرني بنصها وگعت چفي على وجهي
گوة حركت نفسي وگمت لحيلي الغرفة فارغة وهو ماكو
باوعت داير مدايري مصارت بوجهي غير المراية مشيت أحرك بيها حيل لحد مفلتت من الحايط واجت بيدي
ابتعدت وهي بيدي رفعتها حيل وشمرتها عالحايط بكل قوتي صارت طشار والگزاز ترس الگاع دنگت مثل المخبلة على گزازة شلتها وقربتها من معصمي أجرّح بيه
ما أدري شوكت لزمني شوكت جر الگزازة وشمرها مني
قيد حركتي بيده ويصيح عليَّ واني أصرخ وأنفض بروحي حتى يفلتني گعد للگاع وهو مقيدني بحضنه
صاح على أرقم من برة اجه بسرعة شافني وباوع للغرفة
گله :- لم الهوسة هاي بسرعة ولا گزازة أريد
حجاها ورفعني من بطني غصب عني وطلع يمشي من الغرفة أخذني للصالة گعد عالتخم وبعده مقيدني بيده
- ولك وخر يالحيوان يالقذر لتلزمني قذر توصخني وخر اني أريد اموت منو انتَ وتمنعني ولك عوفني
ما سكتت لساني صار يذب حجي وفشار وغلط واني حتى محاسة بألي أگوله خلى ايده سد حلگي
وعلى هالحال لحد ما طلع أرقم من الغرفة رجعني بيها
عافني وراح شوي ورجع بيده گلاص مَي وتقرب مني گعد لمستواي دفعت ايده واريد أگوم جرني وگعني
خلاني بحضنه غصب عني لزم فكي ومد ايده خلى بحلگي حباية ورجع أخذ الگلاص من الگاع شربني
ضل لازمني مخلاني أتحرك من مكاني واني متهسترة
عيوني گامت تفتح وتنسد أحس بثگل جفوني صوتي تراجع بشكل تدريجي وصار هدوء بالغرفة
سكتت أحس بخدي يحرگني آثار دموعي جانت بيه
حرك راسه من رگبتي معندي طاقة لا للكلام ولا أگدر أعترض ساكنة بأيده فجأة بطريقة غريبة
همس بأذني :- كل عقلج أخليج تموتين بكيفج
لزم فكي دارني عليه غصب خلى وجهي بوجهه
- لج والله حتى موتج ما راح يصير إلا بكيفي اني وعلى ايدي وبالطريقة الأختارها الج اني أقرر شوكت أگطع النفس عنج وشوكت تنهين حياتج متخلصين مني والله حتى المووت ميخلصج مني
ما أبديت أي رد فعل جسمي كله جان خدران وروحي رايحة مالي طاقة حتى للحجي عافني من ايده وگام
مددت جسمي وخليت راسي عالگاع طلع من الغرفة وسد الباب وقفله من برة أسمع صوت القفل وأسمع صوته وهو يحجي ويَّ أرقم برة بس ما أميز شيگول
شوشة كبيرة براسي دتقل تدريجيًا وكأنما مجموعة أشخاص ديسولفون وبدوا يسكتون واحد ورى الثاني
أنفاسي هدأت گلبي دگاته تباطئت شوي شوي النعاس سيطر على كل خلايا جسمي غمضت عيوني
غفيت بمكاني
مر يوم يومين تلاثة واني على نفس الوضع
لا أكل لا شرب يجيني يفتح الباب يگومني للحمام مرة وحدة باليوم ويرجعني لمكاني بلا صوت بلا كلام
مرة وحدة جابلي الأكل للغرفة ومن رجع وشافه على مكانه ضربني عباله دا أعانده من ما أحجي لو أرد عليه وجبرني آكل كم لگمة ومستحملت تقيأت
ينطيني حباية آخذها وأنام أنسى نفسي وأنسى الدنيا
جانت الحبوب هي الشي الوحيد اللي يخليني أهدئ وأنسى اللي صار جنت كارهة روحي ومطايقة أي شي
مر يومين ما انفتح الباب وحتى الحبوب گطعها عني
گمت ألوب بمكاني نوم ما أنام أرق صداع وغثيان
التوتر مسيطر عليَّ أفتر بالغرفة رجلي تدور تدور بدون تعب بس حتى أقلل من التوتر اللي دا أعيشه وتنسيني الوضع والحالة اللي اني بيها
انفتح الباب وفات شافني ضل واگف بيده صينية الأكل
مشى خلاها بالگاع واني على وگفتي بنص الغرفة عيونه تتفحصني من فوك ليجوة
گال :- تعاي اكلي
ما انطيته أي رد تقدم علي لزمني من ايدي وواخذني گعدني يم الصينية وهو گاعد ركبه ونص يباوعلي
طولت نظراته على ملامحي واني ساكتة كُلشي بداخلي أحسه ميت فقدت الرغبة بالشعور والحجي والحياة كلها
مد ايده يتلمس وجهي درته بسرعة مبتعدة عنه
جر نفس بتنهيدة :- يلا اكلي أحجي وياج
تقرب أخذ أكل وشال الخاشوگة قربها من حلگي
دفعت ايده وگعت الخاشوگة وتناثر الأكل عالگاع جابني براشدي بچفه بحرگة خلى شهگتي تطلع من كل گلبي
بقيت لازمة خدي وابتعدت انحشرت للحايط لزك شفايفي ترجف والدموع متجمعة بعيني بس مبجيت
گام وهو ينفض ايده وعاقد حاجبه متضايق
هز راسه :- اني أدري بيج رايدة الحبوب بس خلي ببالج ما أنطيج ولا حباية وحدة ما دامج ميبسة راسج بهذا العناد مالتج سهلة اني الج
أخذ الأكل طفى الأضوية ظلم الغرفة وطلع ضليت آكل بروحي طول اليوم جسمي نارر صاير أتعرق رغم برودة الجو لعبان نفس ودوخة مو طبيعية عندي
أريد أنسى بس شي يخلصني من الحالة الـ اني بيها
گمت أدك عالباب وأصرخ عليهم أريد واحد يفتحلي دقايق وسمعت صوت طگة المفتاح وانفتح الباب
شغل الأضوية وشافني شعره مخربط مبين جان نايم
صاح :- راح أنعل أمج على أبوج بهالليل شبيج تدگدگين
حكيت رگبتي وحجيت بتردد :- أريد حباية
- ماكو انطمري يلا خليني أنخمد وراي گعدة
اجه يسد الباب مشيتله بسرعة أتوسله
- لا عليك النبي والله مدا أگدر أنام بس وحدة أريد والله بس وحدة
ضل ساكت مركز بنظره على عيوني دفعني ليجوة وسد الباب انهاريت للگاع دموعي الحابستها صارت تنزل
دقايق واني على هالوضع رجع الباب انفتح وفات للغرفة
گمت بسرعة أمسح بدموعي وشفته بيده گلاص مَي والعلبة مال حبوب عاف الگلاص بالگاع وفتح العلبة
أخذ منها حبايتين تقربت منه مديت ايدي حتى آخذهن
رفع ايده بسرعة ليفوك باوعتله
گتله :- شنو
رفع حاجبه :- متأكدة ترديهن
- اي انطيني يلا
حجيتها ومديت ايدي اله تجاهلني وگام شمرهن للگاع
باوعت للحبوب ورجعت باوعتله
- ليش
گال :- ترديهن دنگي شيليهن من الگاع واشربيهن
ضليت أباوع للحبوب اندار يريد يمشي گلاص المَي صار جوة رجلي شلتها ودفرت الگلاص عليه وهو طالع
اجه برجله ووگع للگاع بس ما انكسر اندارلي بسرعة
خزرني ونتر :- يابة بالقرآن راح ألزمج اگطعج وصل على هالصلافة والعناد الشايلته تردين حبوب بعد تتزقنبين الأكل الأجيبه الج وانطيج حباية غيره ماكو
طلع حبايتين جدد مدلي ايده بنترة :- اخذي فضيني
اخذتهن من ايده بلعتهن بدون مَي
رجعت لمكاني وگعدت ظهري للحايط ما أباوعله ضل واگف شوي أحس بعيونه عليَّ بعدها أخذ الگلاص وطلع
مر كم يوم بعد مشفته لا بالغرفة ولا سمعت صوته بعد بكل الشقة جان أرقم يجيبلي الأكل والحبوب بداله
أول يومين تلاثة يجي كل يوم صينية الأكل وبعد ما أخلص ياخذني للحمام يخليني أغسل وينطيني الحبوب يلا يسد الباب ويدير وجهه ويروح
بس وراها صار يطول الأكل والحبوب عليَّ يطبگهن كل يومين وبالثالث يلا يفوت ينطيني لو يدخل صينية الأكل للغرفة وأقل الدقيقة ويشيلها ميخليني آكل
فوك التعب اللي بجسمي والأرق العندي وقلة النوم گمت أجووع وهالشي قلل من طاقتي وضعفني أكثر
بيوم انفتح الباب وجان عبالي مثل كل مرة يدخل أرقم يذب كم حجاية ويغلط ويفشر ويطلع بس دخلت هي
كاشخة كعبها يطگطك بكل خطوة تمشيها مكياج خفيف بارز جمالها أكثر وريحة عطر نسائي هادئ تهف منها
أول مشافتني شهگت بفزع وخلت ايدها على حلگها
يسر :- هاي شمسوين بيج
تحجي وتباوعلي مفهمت طبيعة نظراتها عطف لو شماتة درت وجهي عنها للجهة الثانية ماريد تشوفني بهالحالة
گتلها :- روحي امشي اطلعي برة ماريد أشوف أحد
- أبد متوقعت أشوفج بهالشكل شصاير بحالج هذا بكل عقله شمسوي بيج شلاعب
باوعتلها :- انتِ هم حالج حالهم جاية تتشمتين وترحين امشي اطلعي برة ماريد أشوفج روحي لرجلج يلا
نزعت جنطتها من كتفها شمرتها عالتخم وتنهدت
- لا انتِ وضعج صاير فد مرة شبيج متگوليلي شنو هاي العدائية اللي انتِ بيها فوك مجاية دا أساعدج
- ماريد منج شي روحي گتلج
- متأكدة ؟ ترى عبد دزني عليج گالي أنطيج أكل لأن مراقب الأفندي بالكاميرات وطلع مدا يجيبلج الأكل
وگفت گدامي متخصرة :- وجهج صاير يخوف شوكت آخر مرة جابلج أكل
- ما أدري
حجيتها وانتجيت خليت راسي عالحايط دايخة حيل
گالت :- بسيطة اني اله بس گوليلي شنو مشتهية دا أطلبلج
- ما أدري أي شي أسد بيه جوعتي راح أوگع من طولي
عافتني وطلعت باوعت وراها وصارت عيني عالجنطة
مالتها مشمورة عالقنفة گمت أخذتها بسرعة أفتش بيها قلم حمرة عطر فلوس بس مجان بيها تليفون شمرتها
رجعت لمكاني ضايگة الدنيا بعيني ومطايقة حتى نفسي مستثقلة حتى النفس اللي يفوت لصدري
أسمع صوتها تتجادل هي وأرقم بالشقة وصوتهم جان عالي واصلني للغرفة وهي تلوم بيه وهو يردها
أرقم :- معليج انتِ اطلعي منها اني المسؤول عنها هنا
- شنو أطلع منها أرقم ترى خابرني ديشكي منك لأن مدا تفوتلها للغرفة وگلي أجي اني أنطيها الأكل ويخابرك مترد عليه
- جهازي عطلان ما أدري بيه
- روح گول هالحجي لعبد وبطريقك گله ليش متنطي أكل لبان والله متحلفلك بس يرجع يستلمك
- اششش مالي خلك تردين صيري انتِ حنينة وروحي فوتيلها أكل فوك ما ماخذة مكانج وعايفها هنا بالشقة وانتِ بالأسبوع مرة يدز عليج للونسة
- انچب وسد حلگك لتتجاوز حدودك وياي مرته اني رضيتوا والما رضيتوا وبان كلها فترة ويطلگلها حالها حال القبلها
ضحك :- تحلمين والله طلاك ما راح يطلك وراح يبقيها عنده إلا لو رايد يخلص منها جان من أول ما لگاها حط طلقة براسها وكتلها خلاص بعد السوته بيه
- لو تنط عبد مراح يفضلها عليَّ ويخليها بمكاني كلها فترة وراح يعلن زواجنا وأجي اگعد ببيته گدام كل أهله
- لج تعلميني بيه لو رايد جان سواها من زمان وطلك بس اخذيها مني رجلج متونس عليها والصدك غير
سكت شوي وكمل كلامه :- حقه ما ينلام صغيرة وحلوة وعلى گد ايده وأهله كلهم يدرون بزواجه منها ليش يعوفها ويرجعها لملة سجودة وسالم حتى يرجعون يزوجوها وغيره يستفاد
- اني راح أصير أحسن منك ومراح أوصل هالحجي لعبد كافي عليك البهذلة الراح تاكلها منه من يجي
أسمعه يضحك عليها بعدها ثنينهم سكتوا واختفى صوتهم ورى نص ساعة أكثر أقل ما أدري بالوكت
فاتت بيدها علاليك الأكل وخلتهن يمي بالگاع جابت طبلة صغيرة حطتها گبال القنفة وفتحت الأكل وأشرتلي
يسر :- گومي يلا
متحركت اجتني گومتني وگعدتني عالقنفة وهي بصفي
مدت ايدها للأكل انطتني :- اكلي بان يلا لتشلعين گلبي والله أترزل إذا مأكلتي شوفي حالج شلون صايرة
أخذت منها وبلشت آكل على كيفي أكلي مجان مشتهاة بگد مجان جوع وحاجة حتى ما جنت أحس بطعمه
شبعت وباوعتلها هي لاهية بتليفونها
گتلها :- أريد حمام وملابس رايدة أغسل جسمي دياكلني صار فترة ملايحه مَي
گامت وأخذتني گايدتني وصلتني للحمام
- اسبحي انتِ واني هسه أشوفلج ملابس وأجيبهن الج
سديت الباب ونزعت ملابسي صرت گبال المراية باوعت لشكلي وصفنت على حالي مديت ايدي لراسي
تشكلت الدمعة بطرف عيني ونفس صار عالي جسمي هزيل حيل من قلة الأكل والتعب اللي مسيطر على جسمي صار كم يوم وجهي شاحب شفايفي جافة
درت وجهي عن المراية متجنبة أباوع لوجهي فتحت المَي سويته فاتر بيه شوي حرارة ودخلت جواه
عظامي كلها رخت واني جوة الدوش ضليت ساكنة على نفس الوضع لوكت طويل لحد مسمعت صوت دك الباب
فتحته ومدتلي الملابس بينهن داخليات أخذتهن منها وكملت حمامي نشفت ولبست ملابسي بقيت الخاولي على راسي وضليت صافنة بالمراية
رجع اندك الباب طلعت بسرعة لگيتها گدامي
گالت :- شفتج تأخرتي عبالي محتاجة شي
أخذتني للغرفة لگيتها لامة الأكل وجايبتلي غطة ومخدة
قبل لتطلع وگفت :- شتحتاجين اني موجودة الباجر يجوز هم أجيج اخذي راحتج
اندارت حتى تطلع وگفتها باوعتلي حجيت مترددة
- عادي أطلب منج طلب
- أكيد گولي إذا شغلة مگدور عليها ما أقصر
- أريد تجيبيلي وياج سكارف ألبسه
من حجيت هيج اجت عينها رأسًا على المنشفة بعدها على راسي هزت راسها وراحت قفلت الباب وراها
ثاني يوم اجتني جايبتلي بدال السكارف الواحد اثنين وشالت بيدها علبة صغيرة وانطتنياها
يسر :- هذا زيت خروع خاص للشعر جبته الج من العطار يومية دلكي فروة راسج بيه وراح يسرع نمو الشعر
صفنت عليها وهي تعلمني على طريقة الأستخدام
- ليش تسوين هيج
عقدت حاجبها :- مفتهمت
- ليش تساعديني واني بأعتباري ماخذة زوجج منج
- لا أبد أعرف انتِ مالج علاقة خطيتج برگبة عمتج اللي شمرتج هالشمرة وعبد أعرفه مستحيل يخليج براسه هو عايفج لأن كسرتي عينه من شردتي منه ورحتي لمراد وديعاقبج عالسويتيه كلها فترة وراها يعوفج
من حجت هيج صرت أقارن حجيها بكلامه هو من يتوعد ويهدد هي تحجي شكل وهو شكل وتاهت عليَّ
بعدها مشفتها رجع أرقم يدخلي الأكل بس مستعدل مو مثل قبل ميحجي ولا حرف ينطيني الأكل والحبوب وياخذني للحمام ويطلع وهو ساكت
بهالكم يوم هادئة أكثر من غيرهم طول وقتي نايمة أگعد على صوته حتى آكل آخذ الحبوب وأرجع أنام
يفوت يوم وندخل بيوم جديد واني ما أدري بالأيام ضاع الحساب وضعت اني وياه
《 نورجان《
اجه الخال فدار وعمو تيم للغربية وبوجهم اجوا لهنا
تيم وگف يحجي ويَّ عمة شيخة والخال سائل على ماما گايلتله بالغرفة عدل وگبل رايحلها وساد الباب
جنت اني وقتها توني نازلة من غرفتي واجاني صوتهم العالي من الغرفة أسمع صوت عمو فدار يصيح بس ما ميزت شنو يحجي
تقربت من باب الغرفة وصار كلامهم بأذني
صاح :- بس ما جان المفروض تخشين سالفة چبيرة مثل هاي علي شنو يول طارحتنا زواج ولبالج عتضل السالفة بينج وبين بنتج وما يوصلنا الحجي
شدن :- نورجان معليها اني وصيتها متحجي ومتجيب طاري لأحد
- لا عاشت ايدج زين سويتي والله
- مجنت أشوف اكو داعي اگولك بسالفة صارت من سنين لا تقدم ولا تأخر بعلاقة نورجان وشبير
- شلون ما تقدم وتأخرر يول انتِ استغفلتينا لو من ذيج الساع شبير يدري جان ما كمل بالزواج بكبرو تدرين انا وتيم بيومها الگضبناه تايعقد عليها واهو ما راضي
من صارت سالفتهم بالمزرعة اجانا حالو مگلوب گلاب لبالو كاسر البنت بنومتو وياها وحتى يصلح غلطتو والبنية ما ينظلم بختها خليناه يكمل بالزواج
- يعني الأفتهمه من كلامك لو جان يدري بنورجان مو بنية من ذيج الساعة جان مكمل بزواجه وياها ليش شنو الفرق بالحالتين هو جبرها عالعلاقة وهي مرايدة
- شنو لبالج ليمتى راح تضلين ساكتة إلا ما يجي يوم وبمثل ما انا عرفت راح الناس تدري تعرفييين چم حلك ولسان سادو بيدي تاما يجيبون طاري بياضها لبنتج
- لتحجي بهذا الأسلوب لأن كُلش تقرفني من اللي أسمعه منك إذا أهلك وعشيرتكم تفكيرهم همجي وعبالهم طهارة وشرف البنية بقطرة دم فالموضوع مختلف عندي اني متهمني هالسالفة
كل الأعرفه بنتي خابرتني بليلة ظلمة وهي دتبجي لأن ابن اختك جابرها عالنومة ولوما انتَ مخابرني بيومها ومفهمني رايدها زواج كامل جان اني بيدي اجيت أخذتها منكم وخزيتكم ولا أخليه يطول أظفرها
- اگفي لج حدج هين لتگلبين الحجي على مزاجج كلامي واضح انتِ ضحكتي عليَّ انا هم من غافلتيني وضميتي عني هيج موضوع ما لازم ينضم من الأساس
- اي شتريدني أگولك بنتي منتهكين عرضها وهي طفلة واني مجان بيدي شي أسويه الها غير بس أباوعلها لا طفولة لا مستقبل لا حياة عدموها فدار تعرف شنو يعني عدموها وهي كل عمرها تسع سنين
جانت تحجي وتبجي مختنگة گوة تطلع الكلمة منها ومبطلوا جدال هو يعاتب وهي تبرر وصوتهم يعلى
أباوع لأيدي صارت ترجف رجلي گوة شايلتني وواگفة على طولي واني أسمع حجيهم ونقاشهم
حسيت بخيال أسود خيم فوك راسي انداريت بسرعة
صار شبير بوجهي يباوع لوجهي مستغرب
شبير :- عش واگفة عالباب ولج شصاير هين شنو هذا الصوت
ضليت ساكتة وأأشرله عالغرفة أريد بس الكلمة تطلع مني عبالك حلگي انشل لزم وجهي يباوع بيه
گال :- شبلاج يولي وجهج أصفر
واحنا واگفين انفتح باب الغرفة وصار بوجهنا عمو فدار
من شافه تفاجئ :- ها خالي هين يمتى رديت للغربية
حان متضايق ومبين من تعابير وجهه اجت عينه عليَّ جر نفس طويل بتنهيدة ورد على شبير وخلى الوضع طبيعي بعدها عافنا ومشى طالع من البيت
صارت عيني على ماما اللي گاعدة عالجرباية وتباوعلي دموعها تنزل الوجه صاير أحمر ونظرات شبير بيناتنا
گال :- يابا شبلاكم غير نفتهم شو كلها أعصابها صايرة براسها گليلي يولي امج وخالي متعاركين
قبل لا أرد سامعته ماما واجتنا وگفت بالباب
شدن :- ماكو شي هيج بيناتنا ليضل بالكم
- ميسوى يولي تنزلين دموعج عليه بالقرآن أروح أصفگو أطر راسو حدر الگاع تاما يضوجج مرة اللخ
ابتسمت :- متقصر
- هسع أكيد ما بيج شي
- ماكو شي والله گتلك خلاف بسيط بيناتنا
- اي خير ان شاء الله اخذوا راحتكم صاعد أبدل
حجاها وگرصني من خدي وصعد يغير ملابس الدوام
ماما من شافت حالتي وشلون ساكتة عرفتني سمعت كلامهم جرتني من ايدي دخلتني للغرفة وسدت الباب
لزمتني من أكتافي :- نورجان شسمعتي
- كُلشي
ححيتها ونزلت دموعي جرتني لحضنها
- لا يماما لا ليش تبجين والله كله كلام عابر هو بس ضايج مني اني لأن مصارحته بشي من البداية صوجي اني انتِ معليج بالصار
- راح يـگول لشُبير وشُبير إذا عرف راح يعوفني
- شنو هالحجي هذا شبير يحبج مستحيل يعوفج
- ماما مسمعتيه من گال هو وعمو تيم جبروه حتى يتزوجني يعني مرايدني من الأساس هو بس ديحس روحه غلطان وياي ورايد يصلح غلطه ميحبني إذا عمو فدار جانت ردة فعله هيج لعد هو شراح يسوي إذا يعرف
شُبير أعرفه ماما أعصابه أضرب من خاله لتشوفينه يضحك ويشاقي بباله شي والله دوم أشوفه يصفن ويجر حسرات دوم جان يجيني إحساس هو مرايدني وأكذب روحي بس كلام خاله قبل شوي أكدلي هالشي
- كله يتهيألج انتِ بس خايفة ليعرف واخذيها مني فدار مراح يحجي لا لشبير ولا لغيره لتفكرين بكل الصار وانسي الموضوع هي سالفة انفتحت وانسدت بساعتها
هي توصيني وتگولي انسي بس اني أگدر ضل كلامهم كله براسي اليوم بطوله واني شاردة بالي بغير مكان
بنفس اليوم للعصر رجع الخال دز على ماما لبيته نزل عمو تيم أخذها وراحوا واني أحوص وراها لحد ما رجعت جانت ضايجة والعيون مورمة من البجي
بس ما حجيت وياها شي فاتت بوجها للغرفة شافني عمو تيم وأشرلي أروحله مد ايده كفش شعري وابتسم
تيم :- شلونج يول صايرة متنشافين
- دا أقرا عمو مضل شي إمتحاناتي الأسبوع الجاي
- عفية شدي حيلج والما تعرفينو تجيلي أشرحو الج
- لا عمو شُبير گاعد ديقريني ويراجعلي المادة
- ها شعجب الله هداه
- زاعلته وگمت ما أحجي وياه يلا قبل
- زين تسوين وإذا ضوجج بكلمة تجيلي أدوسلج راسو
انتبهت بيده جنطة سودة نسائية مدلياها
گال :- هاي جنطة امج عطيها الها من الظهر عندي ناسيها بالسيارة
ثاني يوم جان يوم العزيمة الراح تصير ببيت الخال بيومها انگلبت الدنيا يمهم ناس هواي تارسة بيتهم
عمة شيخة أخذت در وراحت تعاونهم والولد ويَّ خالهم من الصبح ماما ما تحركت من مكانها ولا وصلتلهم واني هم مخلوني أروح ورى آخر موقف صار ببيتهم
نزلت يم ماما بالغرفة گاعدة هي عالجرباية واني نايمة راسي بحضنها مادة ايدها تمسد بشعري ونسولف
نورجان :- شبير گال كملت البيت هاليومين ياخذنا نروح نرتبه ونستقر بيه
- خايفة من فدار بس لا يعرض على گعدتي وياكم وياخذني لبيته هو منا طالعة روحه ضالين كل واحد بصفحة
رفعت راسي الها :- وترحين تگعدين يم مرته
- ما أدري والله يماما خلي أحاجيه وأشوفه شيگول اني سالفة روحته لبغداد ويضل اسبوع هناك ويجيني يوم بالأسبوع هاي متصرفلي أگله يشوفلي حل
- وراح يقبل
- أحاول احجي وياه وأقنعه شنو الغاية من گعدته هناك وعايفني اني هنا لو ياخذني يمه لو هو يحول شغله لهنا مبايگتلي بوگة حتى يجيني يوم واحد ويرجع ركض
- لتعوفيني وترحين ماما
- هسه دا أحجي حجي اني شبيج تردين تبجين
- محد الي غيرج هنا
- ليش وشبير وين راح
- ميحبني بگدج
تحسرت ومدت ايدها بين خصلات شعري
- والله العظيم مجنت رايدة نوصل لهالمواصيل كُلشي صار خارج عن إرادتي ما انطوني مجال ألم روحي وأجيبجن يمي انتِ صارت سالفتج من جهة وبان راحوا زوجوها وخلوني أفرفح عليها بلحظة خسرتجن اثنينجن
- اشتاقيتلها حيل صار كُلش هواي مشايفتها
- هو انتِ لو اني من يوم مطردوني من ذاك البيت واني أدور أخبارها دوراة لو تخابرني بالختلات من وراهم لو أضل آكل بروحي عليها
باوعتلها :- إذا لگينا بان وتطلگت من زوجها أخلي شُبير يطلگني وانتِ عمو فدار هم يطلگج ونعوفهم كلهم نروح لمكان بعيد بس احنا التلاثة
من حجيت هيج ضحكت :- والنبي أحجي صدك
- خوش والله نصير شلة مطلگات وبوجهنا نفتح دار رعاية إجتماعية شرط بس مطلگات يگعدن بيه
- هسه تشوفين بس ترجع بان تطلگني وتطلگج وتاخذنا ونروح وياها
- دخلي تخلص روحها اول وبس تجي لو تگولي امشي نروح لجهنم آخذها وأروح ولا أنطيها لأحد
رجعوا كلهم بالليل من فضت عزيمتهم من بيت خالهم وياهم عمو فدار يدور ويباوع للوجوه عيونه تدورها
شبير :- خالي شعندك جاينا لهين
- تطردني ولك
- لا مو اگول تعبان وهسع يلا خلصت روحك من هوسة الخطار يعني لو ترد لبيتك ترتاح
- عودين من أفوت بيتك اطرد براحتك هسع تنچب وتصم حلگك
- على راسي والله
- وچبح
باوعلي :- امج وين يولي
نورجان :- جوة بالغرفة
- روحي اندهيها تاحجي وياها
طفرت بسرعة للغرفة گتلها مقبلت تطلعله رجعتلهم
- مقبلت عمو
عقد حاجبه :- وعش يابا
- تگول گليله نايمة
شبير غم گصته وعلي غص بالضحك وابوه يرزل بيه بس شفته يتبسم وياه من جوة لجوة ويخزره حتى يسكت الخال يهز بيده ويباوعلي ضجت
گتلهم :- والله هي هيج گلتلي اني شعلية
- دسكتي الغبرة اسكتي النوب تاتأكد الحجي
شبير :- لا خالي حدك هين جاينا بنص الليل بلعناها بس مال تغلط على حرمتي وانا گاعد ترى ما أرضاها
علي بعده على ضحكة وحدة صاح بيه شبير
- انتَ انچب راح أگوملك
شبير رزله وأبوه رزله عافهم وگام طلع برة
الخال وگف وراح للغرفة الگاعدة بيها ماما وعيوني وراه
والباقين كلهم طشوا لغرفهم تعبانين باوعلي
استغل الفرصة شاف محد موجود جرني من ايدي گعدني على رجله لزمته من ياخة الدشداشة
وعيني عالباب :- شبيك عزة ليشوفنا أحد
- راحوا لغرفهم
- علي بعده برة عيب ليشوفنا
- أموت عالعيب والله
حجاها وقرب راسه يشم برگبتي ويمرر أرنبة أنفه على بشرتي أتحسس گزگزة شواربه وهي تتحرك تچكچني
بالي مو وياه بگد مجنت مركزة عالباب مال غرفة ماما
انتبهلي :- وين تباعين
- ليش عمو اجه لهنا يريد ياخذ ماما وياه مو
- لا يولي شياخذها يحطها هي وفرحة ببيت واحد تاتقوم مجزرة بأهل بيتو شبلاه ما رايد روحو قابل
- شُبير
- آخ يابا الراء شعملت بحالو لشبير
- عليك النبي لتخليه ياخذها وگله تجي تگعد ويانا بالبيت
- يا بيت
- بيتنا غير
- حرام ولا عندي بيت ضال سايب بالشوارع
- لا حباب صدك دا أحجي
باسني بخدي :- معليج هي ويانا غرفتهم جاهزة خالي بيدو أثثها وجهزها الها
تقربت بسته بخده
صاح :- يا يمة يا يمة انزلي بوجهج عالغميج هاي متوكل خبز عندي
سمعت صوت خطوات من برة گمزت بسرعة من حضنه وگفت أعدل بشعري فات علي طب ليجوة وشبير التهى بموبايله عفت الصالة ومشيت الهم
جان الباب مفتوح شوي وگفت قريبة وصرت أسمعلهم
فدار :- يول مو تجاوزنا الموضوع هالزعل هذا بعد على شنو
وماما ترده :- عوفني فدار مزعلانة
- لا واضح من شيلة هالخشم
دارت وجهه منه بضوجة
گلها :- يولي ومحمد اليوم كلو فكري يمج بالي كلش مو يم خطاري أحسب الساعات بس تافض الهوسة وأجيلج
- والله مزعلانة شبيك بس شوي تعبانة من الصار وبالي يم ذيج البنية شاغلة تفكيري ليطلع مسويلها شي
- لا تهمين زايد وعطي نفسج مجال تاتجرين النفس
- شلون ما أهم واني ما أعرف عنها شي ليلي مدا أنامه حتى اللگمة صرت أستثقلها بحلگي وهي ما أدري بيها أكلت شربت نومتها شلون صايرة بنتي مريضة فدار
من وكت مجنا گاعدين ببيت خالها والبنية نفسيتها صفر أكل قليل نوم ماكو ولو نامت تجرها لثاني يوم الوجه يخوف دومه شاحب والكوابيس مجانت تفارقها بنومتها
جنت لامة مبلغ جمعته من راتبي حتى أعرضها على دكتور نفسي يبدي وياها جلسات متحطمة هالبنية من الشافته انتهت دمروهن اثنينهن نورجان أذوها جسديًا بس الأذية النفسية كلها صارت بأختها
جرها لصدره :- كلها چم يوم وأرد أروحلهم تاحجي ويَّ زوجها وأشوفو شيريد منها وشناوي بهالزواج الأگشر ما أخليها الو والله
عفتهم وابتعدت رجعت يم شبير گعدت يمه
باوعلي :- ها شمشمتي أخبار واجيتي
- شبيك وياي
- مو گتلج جوزي من التنصت هذا عيب بنتي مو أخلاقنا هاي
- مشفت شي والله
- ما دامج حلفتي يعني شايفة شوفة
باوع للباب ورجع باوعلي نصى صوته
گال :- بشرفج شنو شفتي
- جانت زعلانة منه وهو گعد يتوسل بيها حتى ترضى وآخر شي حضنها
- بس هيج
- اي والله
هز راسه :- هذا خالي أخلاقو فالتة واحنا بيتنا ما بيه هيج سوالف خادشة للحياء دخلي يطلع تاگضبو أملص رگبتو
- يا لعد لو تدري ذاك اليوم شلون باسها
فز :- عليج الله
- والنبي شفته وحتى رزلني لأن باوعتلهم
- النوب فوك ما جاي تمنعين الرذيلة
رجع راسه للتخم :- لا هذا خالي ينرادلو ضبط مصنع من جديد أگضبو لو ما أگضبو إلا ألعب حزام البنطرون على جلدو هين
- لا خطية
گال :- هسع أگوملو والله
لزمته باوع بأتجاه الغرفة وللساعة البيده جرني گومني
- گومي يولي ليطلع وأروح أرتكبلي بيه جريمة بهالليل خليني لازم روحي عنو
- والكتلة
حك گصته :- معليج ضامها الو على باجر بس گومي لا ترحين تكتيهن بحضنو تايلزمنا يكتلنا انا وياج
بالليل الكل نايم وفزينا على صوت صرخة من جوة شبير طفر قبلي واني وراه لاگانا عمو تيم نزل يركض
الصوت جاي من غرفة ماما الباب جان مفتوح دخلنا جانت عمة شيخة يمها لازمتها تحجي وياها تريد تفهم شبيها وهي تبجي متهسترة والتليفون بيدها
رحتلها لزمت ايدها خايفة وعيوني مغورگة
- ماما شبيج
ايدها دترجف الوجه انطعن أحمر وگع التليفون من ايدها دنك عمو تيم لگفه يباوع بيه عاقد حاجبه
تقرب منه شبير يباوع وياه والوجه انگلب ماما حضنت عمة شيخة وتشهك مفرفحة من البجي گوة تحجي
تگلها :- ولكم شعرها هذا شعر بنتي أعرفه
عمو ضاج حيل انطه التليفون لشبير وطلع من الغرفة تقربت منه أريد أشوف رفع ايده ليفوك مخلاني
نورجان :- عليك النبي بس أشوف
- اششش ارجعي مكانج عينج على امج اگعدي يمها
اخذه وطلع ورى عمو وأخذ الموبايل ماما انتهت بجي واني دموعي مسكتت من شفت حالتها هاي
تشكي لعمة شيخة :- ولج شلون گوليلي شسوي بروحي وين انطي وجهي والمن أفزع عليها ولج يگلي أحررك گلبج عليها گلي أخليج بحسرة شوفتها وسواها
وعمة شيخة مقهورة على قهرتها وتصبر عليها بس شيفيد گلب والدة محروك على ضناها ومجان بيدها تسوي شي تحس بروحها مربطة
مرت نص ساعة واندك الباب فات الخال وراه الولد انتبهت لعمو تيم مغير ملابسه وبيده جنطة
گعدت تشكي لعمو فدار بدموعها وهو يهدي بيها
اللي افتهمته زوج بان دازلها صور لشعرها مگصوص ومتناثر بالگاع وكم مسج حارك بيه دمها
طول ما هي تحجي تيم واگف يباوع ويدير وجهه يستغفر ويتمتم بكلمات مگدرت أفهمها بس أشوفه
شدن :- راح يموتها الچلب راح تروح من ايدي واني گاعدة أتفرج امداني اني صوجي عفتها واجيت وما جبتها
تحجي وتضرب على رجليها بقوة وتبجي صاح بيها عمو فدار ولزمها يسكتها وعمو تيم واگف بالباب يباوعلها
تيم الله :- يابا وعديلة مريم وهاي كلهم واگفين هين تايسمعوني مالي جية للغربية ولا الي فوتة على بيتي ولا الي شوفة لعيالي إلا بيوم ما أرد بنتج بيدي لحضنج
حجاها أخذ جنطته واندار طلع گامت وراه عمة شيخة
باوعت ماما لعمو فدار :- صدك حيروح لبغداد
- يروح ويلگاها ويردها الج سالمة لا تخافين گتلج موضوعها صار عندو ولوما انا جبرتو عالجية وياي لهين جان بقى غاد يدورها
- عبد مو هين فدار هذول أهله كل شغلهم إجرامي وهو ميقل عنهم ميتحرك خطوة بدون جماعته وسلاحه روحة تيم لوحده لهناك صعبة
- ومن گلج لوحدو جماعتنا ببغداد ما يگصرون ايدهم بيدو وانا وياه هناك لا تخافين عليه عين ذيب ما تنام
شبير :- يول أبو علي فات بيها لتشيلين هم بعد ما دامو عطاج كلمة يعني يردها
- گلبي مشتعل عليها وكلام الله
- هانت والله هانت كلها چم يوم وتنجمعين بيها لو أعرف أفزع الغربية كلها لبغداد
عفتهم وطلعت للحديقة دموعي تنزل واني أتخيل شعورها شلون جان وهو يگصلها شعرها شلون انطاه گلبه يأذيها هيج شجان صار لو اني جنت مكانها
حسيت بخطواته وراي انداريتله دموعي بعيني
شمرت روحي بحضنه وانفجرت بجي
بنفس اليوم گاعدين للصبح نوم منمنا مثل البشر ماما بس تبجي على ساعة أحس گلبها حيوگف من القهر
بدلت الصبح لبست ملابس المدرسة واني كل طاقة ما عندي لبست الحذاء أخذت الجنطة ونزلت أشوف ماما
فتحت الباب صبحت عليها ما ردت
جانت گاعدة عالجرباية ايدها على راسها حتى مشالته
تقربت منها :- ماما حبيبتي بيج شي
- دايخة ماما دايخة راسي حينفجر أحس الگاع دتفتر بيَّ
- تمددي ارتاحي شوي ونامي الليل كله گاعدة
رفعت راسها جفلت من شكلها وجها أصفر وشاحب حالها انگلب شفتها بيضة لزمت گلبي بخوف
ركضت برة صحت لعمة وشبير ورجعتلها فاتوا شافوها
شبير :- گومي يولي طلعي ملابس لأمج تا اخذها للمستشفى
حجاها وطلع زاد خوفي وعمة تحجي وياها وهي گوة ترد طلعتلها ملابس غيرتلها أخذت جنطتها والموبايل وطلعت لازمتها اني من جهة وعمة من جهة
صعدناها السيارة جانت خاملة گوة تجر بروحها من دا أصعد صاح عليَّ شبير مخلاني أصعد
گال :- وين رايحة عندج دوام يولي هسع واحد من الولد يجي ياخذج انتِ ودر
- لا شُبير والله يضل گلبي وياها ما أرتاح خلي أروح
- عمتي وياها ما عايفتها ضلي هين بلا عناد
صعدوا حرك السيارة وراحوا واني دموعي تصب وراهم
در ضلت الدوام كله وياي مفارقتني بس وكت الدرس واني بالي جان يم ماما وشصار وياهم هسه
من رجعنا للبيت جانت نايمة مخلوني أتقربلها حتى لتگعد وعمة تباوعلي مقهورة سألتها شگال الهم الدكتور مرضت تجاوبني وشبير مو هنا حتى اسأله بدوامه
للعصر اجه عمو فدار يشوفها أخذت صينية الغدة مالتها ورحتلهم للغرفة قبل لا أدخل اجاني صوته وهو يحاجيها
فدار :- سكري ولج شدن سكر
شهگت ورجفت ايدي اندارولي اثنينهم نفس اللحظة
《 شهربان 》
اليوم يجر اليوم ويصير أسبوع والأسبوع صار اسبوعين وتلاثة رجع عبد للشقة وما تغير شي بجيته مستمر حابسني إهاين وتجاوز لو رديت بوجهه أنضرب
ولو سكتت أموت بدمي وأحترك من جوة وضالة بنارين
حايط الغرفة صار عليَّ مثل حيطان السجن جسمي حركته ثگيلة من التعب والضرب أغمض عيوني أحاول أشرد من وجع اليوم وترجع بالليل تهيج عليَّ مواجعي
بيتنا بالأعظمية وجود بابا ويانا والدفو الجنت أحسه واني بينهم بذاك الوقت رغم ظروفنا الصعبة
لحادثة نورجان اللي طيرتلي نومة عيني من ذاك اليوم من گد الكوابيس اللي أشوف وجه الخلاس بيها
لضيقة بابا وديونه وحيرته بطفلته الصغيرة وهو يركض بيها بالمستشفيات وبالمحاكم يمشي بقضيتها
لحد ذاك اليوم الشفته بيها معلك بالسگف بغرفة نومهم هو وماما مصرخت مبجيت انعگد لساني بيها لأول مرة
بعدها مشى الحال ودخلنا متوسطة وعمو صار يتردد علينا بين فترة ولخ لحد ما بمرة جاب ابنه وياه وشافني
محمد هو البادر واني اللي صديته صار بكل مرة يجي عمو يجي وياه حتى يشوفني ثقيت بيه ما أگول حبيته بساعتها بس شفته الشخص الوحيد الجان يفهمني
سولفتله عن نومي المتقطع وكوابيسي وبيومها عرض عليَّ الحبوب لأول مرة وعلمني عليها بدون لحد يدري
فزيت من نومتي مگلوبة معدتي گلب گعدت عاقجة وجهي لعبانة نفسي حيل وأحس أريد أستفرغ
گمت شغلت الأضوية لازمة معدتي ورجعت گعدت مدنگة راسي ليجوة حسيت الگاع افترت بيَّ
مستحملت وگفت بزاوية الغرفة وتقيأت كل اللي بطني حسيت روحي دتطلع واني مدنگة راسي للگاع
هديت شوي وگفت جريت نفس صدري يصعد وينزل الغرفة هادئة بس صوت أنفاسي المتقطعة مسموعة
رجعت أجر بروحي گعدت عالقنفة مغمضة عيوني
من أيام واني أحس روحي ثگيلة ثگل ما اعرفله تفسير صدري يأذيني بطريقة محسيتها من قبل
الغثيان والدوخة مو شي جديد عليَّ دائمًا تصيرلي من تتأخر عني الحبوب بس الغريبة هسه گعدتي بنص الليل من نومتي بس حتى أستفرغ
حسيت گلبي يدك ودگاته بدت تتسارع صدري يضيق بديت أحسب الأيام وأشر بأصابعي عقلي يرفض الفكرة بس جسمي يصرخ بيها
جمد الدم بجسمي مو شك لا متأكدة هالشهر فايتتني
ضليت آكل بروحي وألوب دموعي نزلت وأدعي بداخلي يطلع إحساسي غلط مديت ايدي أخذت بطل المَي خليت بأيدي غسلت وجهي وشربت منه شوي
صارت مرارة بحلگي زاد اللعبان نفس رجعت تمددت ايدي على عيوني أريد أنسى وأكذب روحي
ثاني يوم فزيت على ايده مادها يتحسس جبهتي
فزيت بسرعة عدلت گعدتي جان واگف فوك راسي
عبد :- بيج شي مريضة
هزيت راسي بـ لا وخليت رجلي بالگاع لزم فكي رفع وجهي يباوع بيه وعاقد حاجبه ويدور بوجهي للجهتين
وخرت ايده على كيفي وگمت
- ماكو شي بس أحتاج أروح للحمام أغسل قبل لتطلع
- روحي الباب بعد راح يبقى مفتوح بدون قفل
باوعتله بسرعة متفاجئة لزمني جرني من متني
رفع اصبعه بتهديد :- بس لا عبالج انطيتج مجال حتى تصولين وتجولين بالشقة بكيفج مثل قبل تطلعين ترتبين المكان وتنظفينه وترجعين لغرفتج مثل الحبابة
اختنگت أمشي رجع جرني :- وشغلة بعد الشقة موگف حراس جوة وواحد لازم الباب وكل العمارة فارغة يعني سوالف صريخ ما صريخ متفيدج لأن محد راح يسمعج ودرب الشردة انسيه أحسن حتى كاميرات من جوة شديت بالشقة
- افتهمنا
نتر ايدي :- وبلا صلافة اللسان هاي حتى ما أگصه الج
دا أمشي رجع جرني من ملابسي ليورة وفات يمشي گدامي طلع من الغرفة واني وراه بوجهي للحمام
رجعت أستفرغ من شميت ريحة عطره القوية انگلبت معدتي غسلت وجهي وباوعت لشعري مادة ايدي عليه
صارله أسابيع من ذاك اليوم بده يطلع ويبين أكثر من قبل بس يحتاجله وقت طويل يلا يبين بيه طول
رجعت غسلت وجهي وباوعت بالمراية أسمع صوت عالي من برة طگطگة وصوت يضرب الشباك
جان صوت المطر
طلعت من الحمام راجعة للغرفة صاح وراي انداريتله
گاعد عالتخم حاط رجل على رجل ومرجع ظهره ليورة
أشرلي بأيده :- بوجهج عالمطبخ سويلي ريوك
- هسه دقيقة
دا امشي رجع صاح عليَّ جبرني أغير وجهتي للمطبخ مشيت لهناك مطايقة حتى أسمع صوته أكره حتى النفس اللي آخذه وهو موجود بنفس المكان
أتحرك وعيوني تدور وايدي تتحرك بس ما أعرف شريد بالضبط كُلشي جديد ودا أشوفه أول مرة ولا عبالك صارلي فوك الشهر بهاي الشقة
طلعت طاوة خليتها عالطباخ جايب ريوگات عالكاونتر وصمون جان حار سويت لفة عالسريع وسديت جوعتي
أول بيضة طگيتها صارت هي والگشور سوة ذبيتها رجعت سويت غيرها شو باوعت طاگة البيضة بالسنك والگشور بيدي عضيت شفتي ذبيتهن وغسلت
أخذت غيرها رجعت طگيتها بالطاوة سويتله بيض عيون گمت أدور عالملح وأقارن بينه وبين الشكر
واني واگفة بحيرتي النار جانت عالية والطاوة لگيتها مدخنة ركضت طفيتها حركت البيضة بالخاشوگة لاطشة لطشة بالطاوة من هاي الزينة حتى متتحرك
عبد :- وثول هاي ما دبرتيها بس لو سالفة بيها شردة وملاسن ويَّ عبد تصيرين استاذة بيها
باوعتله واگف بالباب ايده بجيوبه ضجت بس سكتت
دفعني وجر ردانه وصار يصب فوك راسي أوامر وهو يتحرك سوة الريوك وخلى قوري الچاي متانيه يفور
حطيت ريوگه عالطبلة بالمطبخ مثل ما گلي غسل وگعد يگلب بتليفونه مخليني واگفة منتظر الچاي عالنار
أول ما فار طفيته وأخذته اله أشرلي أصبله وسد تليفونه وبلش ياكل سويت مثل ما طلب مني بلا صوت
أعرف غايته رايد يذلني جنت مجبورة أسوي اللي يگوله بلا صوت لا تلوحني كفخة عالطاير جسمي مل الضرب
اندك الجرس باوعلي :- امشي افتحي الباب
رحت فتحته طلعت يسر بوجهي من شافتني تفاجأت
يسر :- ها طلعج من الغرفة
تحجي وهي تفوت ويم الباب ليبرة واگف واحد سديته ومشيت باوعت للشقة واندارت عليَّ
- اگولج عبد وين
أشرتلها عالمطبخ راحتله وأسمعها تسلم عليه ويسولفون
مشيت اخذت سطل ووصلة نظفت الغرفة والمكان اللي استفرغت بيه وفتحت الباب وشبابيك الشقة حتى تتهوى لأن الريحة صارت تخنك اسمها مقفلة
صاح عليَّ من المطبخ رحتله وگفت بالباب
عبد :- سوي ريوك ليسر
قبل لا أتحرك هي ردته :- لا حبيبي ما أحب البيض راح آكل أجبان بس أريد كوب چاي حبابة
- صبيلها چاي
جريت نفس ومشيت طلعتلها كوب وصبيتلها بيه
وأسمعه يگولها :- يسر بعد لتجين لهنا إلا اني أخابرج
- ليش
- بدون ليش سوي الگتلج عليه
سكتت بس ضاجت حيل وبين على وجهه رفعت شعرها وشالت راسها شافتني گبالها صارت عينها بعيني
گالت :- من جانت بان محبوسة جنت أجي شوكت ما أريد محجيت شي بس من طلعتها وصارت تفتر گدامك بالشقة مَليتني ولگيتلك وحدة تسد مكاني
شال راسه من التليفون :- شهالخرط هذا دماغج شلون يفسر الحجي
- اي لعد شنو جذب من يوم متزوجتها وانتَ متغير عليَّ لا أگعد وياك مثل قبل لا أگدر أحجي وياك لا طلعنا بالك بس يفكر شسوت بان وشلون راح ألگى بان وشوكت ألزم بان واني مخليني آخر إهتماماتك
شمر التليفون :- وبعدين وين تردين توصلين بهالكلام
- مقصدي واضح انتَ گمت تميل الها إلا وحدة ماخذها گوة وشردت منك شنو الجابرك تبقيها على ذمتك لحد هاللحظة
خلى ايده ورى راسه ورجع ظهره
گلها :- لا صدك
- عبد لتضحك دا أحجي صدك متريدها طلگها ورجعها لأهلها وخلينا نرجع لحياتنا مثل قبل غيرت الشقة وغيرت عيشتنا كلها من وراها كافي عووفها
باوعلي :- انتِ خوب كيفتي
درت وجهي منه سويت روحي أغسل بالمواعين بس حتى أبقى واگفة أسمعلهم
گلها :- معليج كلشي بوكته ومحسوبله حساب
- يعني لشوكت صارلك كم شهر بشهر تگولي هالحجي من أول متزوجتها ولهسه
- بلا ملحة ولغوة زايدة مو انتِ التقررين شوكت أطلك وشوكت أعوفها ولو رايدها صدك ما جان شفتيها على هالحالة شوفيها هي والميت سوة تبقى يوم زايد بعد بذيج الغرفة أصبح ألگاها ميتة وأبتلي بيها
شد وياها بالكلام وصوته صار عالي زعلت وگامت تبجي أخذت جنطتها وطلعت بسرعة گام يستغفر وراح وراها
سمعت صوت باب الشقة وهو ينسد حيل :- گلعة
رحت أخذت ملابس ودخلت أسبح طلعت لعبانة نفسي الدوخة مجاي تروح مني واليوم كله بس أستفرغ
ثاني يوم انتظرته بين مطلع ومشيت للباب دگيته هو من يطلع وأضل بس اني يقفل الشقة من برة
ثواني وانفتح صار بوجهي نفسه الشفته واگف البارحة
باوعلي :- گولي محتاجة شي
ترددت بالبداية حيل ليروح يگول لعبد
بان :- أريد اختبار حمل من الصيدلية
- هسه يجيج فوتي جوة
- رايدة اثنين
سد الباب وقفله صرت أمشي بالشقة بتوتر أعصر بأصابيعي والخوف متملكني بمجرد ما أفكر بالفكرة
رجع دك الجرس رحت للباب لگيته فاتحه مدلي العلاگة اخذتها ورجع سده طلعت الأختبار ومشيت للحمام
دموعي نزلت قبل حتى ما اتأكد وكأني أعرف النتيجة من أول شعور صورة وجهه وهو يسد عليَّ الباب صوته العالي وصياحه نظراته اللي تخوف والضرب اللي يخلي جسمي كله يصرخ من الوجع ماريد أصدك
دقايق واني واگفة على أعصابي عبالك ساعات مرت گلبي يدك يدك سريع وبطني مغصتني دموعي مسكتت
لحد مشفت ظهر خطين والنتيجة طلعت إيجابية
عضيت شفتي وهمست بصوت مبحوح :- لا مو هسه يا ربي مو منه
گعدت للگاع أبجي بحرگة صرخت من القهر وأضرب براسي عالحايط :- لا ما أريده
رجعت انتجيت عالحايط حاضنة رجلي لصدري وأنحب بصوت ناصي على المصيبة الوگعت على راسي
شنو ذنب هالروح الصغيرة إذا اجت من إنسان كل همه شلون يذلني ويحطمني شلون راح أگدر أحتضن طفل كل ما أشوفه يذكرني بوجه أبوه والسواه بيَّ
رفعت رداني باوعت لأيدي لهسه آثار الضرب واضحة على جلدي حزام واير شيجي بيده ميقصر ولا يرحم
شهگت من بين دموعي ولزمت بطني :- والله مراح أتحمل أشوفه بيك اخذه يا ربي ماريده
نزل هالحمل عليَّ مثل النقمة اللي تسود حياتي وتزيد معاناتي وقيودي بـعبد اللحظة اللي المفروض كل بنية تنتظرها بفرحة ولهفة اني جنت مرعوبة منها
《 نورجان 》
مر كم يوم انتقلنا لبيتنا اني وشبير وماما
جانت فترة إمتحانات التهيت بوقتها أدرس لاهية عن كُلشي ماما جانت شايلة عني البيت والطبخ وشبير گاعدلي گعدة بإمتحاناتي وجنت أجاوب زين
بس عيني جانت تراقب ماما أشوفها تذبل يوم بعد يوم على بان كلما أمر من غرفتها ألگاها تبجي ومن تشوفني تسكت عبالها مراح ألاحظها
عمو تيم من ذاك اليوم ما وصل للغربية دوم جان اتصالات بالخال فدار اللي مخلصها ببغداد ويجيله يوم لهنا يطمئن علينا وعلى أهله ويشوف ماما ويرجع
طلعت روحي على مخلصنا إمتحانات صادف بيومها عمو فدار يمنا وگال لشبير يعزم على بيته الجديد
شبير :- خالي شعزم المن أريدو للحلوك الجايفة تاتجي تملي بطونها وتروح
- يا هم الحلوك الجايفة ولك
- لا حشاك مو عليك والله على ذيج الصفحة لو يگطعوني وصل هسع ما أعزم واحد بيهم لبيتي ولا الهم فوتة لهين ما دامني أشتم الهوى
- انچب لك يبقون عمامك
- هم ونعالي
- انتَ صاير متحترم فد نوب ولا تحشم أحد
- والله هذا العندي الما يسأل عني ما اسأل عليه والميريدني ما أريدو ولا أريد گربو ولا حتى يوصلني انا اتفقت ويَّ عمتي أعزمك انتَ وأهلك وأخوتي وعوايلهم على غدة هين عندي بالبيت الباقي مالي شغل بيهم
- وبالله لو سألوا وعتبوا عش ما عزمتنا شتگلهم
- اليسألني أگلو بيتي بيه جنية مال خطار ميستقبل أحد
- والله گبحي
- والله أسويها ترى ألبس حرمتي عباية سودة وأفصل الكهرباء وأطلعها عليهم تاخلي طشارهم مالو والي
- وبس لا نورجان الجنية
- اي دحك بشرفك شعر أصفر عيون صفر بس تطلعلهم يصير عدهم عمى ألوان من گد الصفارات أخليهم يصفنون حتى جنيتنا شگرة
ضجت ودرت وجهي عنه جرني عمو فدار يضحك
- لا تضوجها ولك
- لا يابا شتضوج منا وجاي فوك راسها تاعلمها تصير بلا إحساس وبلا أخلاق لأن ما توكل خبز هاي عدنا
- لا ربحنا
اندار لماما اللي گاعدة تسمعلهم وتتبسم لكلامهم
فدار :- يول انتِ راضية بهالحجي وساكتة
- دخليها يمعود الفقير ميعيش بوكتنا
- لا الوضعية فلتت حيل حتى انتِ راح يگلبج علي
شبير :- انطيني اسبوعين بس وحك الرتبة العلى اچتافك إلا أسيبهن وياي وأطلع عينهن
- لا والنعم مشهودتلك
عفتهم يحجون ورحت للمطبخ طفيت الچاي وحضرت الإستكاين خليتهم بصينية ورجعت للغرفة خليتها عالطبلة گبال ماما وصارت تصبلهم عني واني أناوشهم
وجه كلامه لماما :- تيم وصدر الدين گايمين بالموضوع والحساب الراسلج ودزلج الصور مو عبد طلعت الصفحة لأبن عمو بس بعد هو الموصيه لا هاي بعد منعرفها
- ومعرفتوا مكانها
- من رحنا وسألنا عمو يگول عبد مسافر بس ما ظنتي السالفة هيج تيم گام طلع الحساب الراسلج وحدد موقعو ولازم ابن شاكر مهددو وضاربو ما حاجي شي
- وتالي
- مراقبينو بالفوتة والطلعة ولهسع ماكو شي
- خلي نبلغ بفقدانها
- شبيج يولي ترى زوجها هذا يرحون يلغون البلاغ ويگلهم مرتي عندي بالبيت وفنو اليفتح حلگو بكلمة وياه
- لعد شلون راح تلگوها هيج
- بطريقتنا بعيد عن القانون والعشاير لأن ذول ما يحسبون حساب لا لقانون ولا الهم عشيرة تكفلهم نجيلهم بالطريقة اللي يفتهموها هم
شبير :- حلو يعني راح نلعب عليهم الميدان
- ولا تدخل هم انتَ وهم ذاك تكك الثاني مآب تطلعون منها وتبقى هين عينك على بيتك وأهلك
- لا يابا عند عيناك
- شبير لا تراوغ بالحجي گتلك حجاية امشي بيها بلا رعونية اخوك الجبير هناك هو يفض السالفة
- تأمر يالچبير من يمتى انا كاسرلك حجاية
- والله هن هواي ما ينعدن
- على راسي الخال
رجعوا يحجون ببيت عمو وعمتي وشغلهم ويستفسر أكثر عنهم من ماما وهي تسولفله
- هذول ماخذينها فلاحة ملاچة شنو مالهم رداد
شدن :- من زمان هذا شغلهم حاسبين حساب لكُلشي
- الدولة وين عنهم
- يمعود غير ** الـ** واگف بظهرهم مدسرتلهم الشغل ومشيها الهم من جوة لجوة منو يگدر يلاويهم
فتح عيونه :- لاا
- والله العظيم حتى الرتب الواصليها كلها دمج واحدهم ما شام ريحة العسكرية ان جان سالم لو ستار
- لا الوضعية طلعت صدك فالتة
ضل عدنا لليل من گام يريد يروح
ماما گلتله :- الوكت تأخر ضل نام هنا شيرجعك لبيتك
- لا يولي رايح أغير ملابسي وأشوف الأهل هناك هم يالله أحط راسي جم ساعة أنام شو دايخ ولعبانة نفسي
شبير گله :- خاف حامل
باوعله صفح وسكت عنه ضحك وگام باس راسه
- لا تضوج يالخال ولا تنسى معزوم هين الخميس الجاي وإذا ما تجي بعد أحسن
- راح ألعب البرجلي على راسك
سلم وراح يوم الخميس سوينا العزيمة ومثل مگال شبير ما عزم بس اخوته وخاله حتى نسابته غلسهم
ماما مقصرت هي تكفلت بالطبخ وعمة شيخة من الصبح اجتنا تعاونها واني ايدي وياهم أتحرك منا ومنا
التموا عالغدة سوالف وضحك أخوهم وليد ببغداد گاعد هم جايب عائلته وجاي لهنا يشوفنا مرته علوية تصير بنت سيد ريحان
من كملوا الأكل التهن البنات بالمطبخ يغسلن بالمواعين واني أخذتلهم الچاي ورحت للصالة لگيتهم يسولفون
أشر شبير لـعلي گام تناوش الصينية مني وصار يقدملهم
من وصل لشبير گله :- هسع عمي ما ناوي تذبح ذبيحة
- عجل هذا الأكلتو شنو لا تخليني أقسّم
- ذبيحة عمي ذبيييحة جبيرة تعزم عليها العشيرة شنو ضاحك علينا بهاي دحك حتى بيتك شكبرو يسع كومة ناس
باوعلي :- يول امشي اندهي لعمتي تاتلحگنا بوحدة من مبخراتها للبيت
- يابا ما نحسد ما نحسد بس أگول شوكت لحگت تبنيه من ورانا منيلك هالگد فلوس منين جبتهن
- أشتغل غسيل أموال انتوا متدرون
صفك ايد بأيد :- والله جنت شاك بالموضوع
دفره وصاح :- ولكم انا حددت وعزمت بالأسم هذا منو العازمو
- لا ما مرجية منك عمي تطردني وانا أول فوتي لبيتك
- ديلا ماكو هيج عاد شلون انجرحت كرامتك وطلعت زعلان
- هسع أزعل بس تاكمل الچاي
فات يمان من برة گال :- السلام عليكم هاي شلون تسوي عزيمة وما تعزمني ما مرجية منك خالي
شبير :- أدري غير ما معزوم شجابك هين
علي خيبر :- انا عزمتو خطية أهلو ما عيعطونو أكل گتلو تعال لبيت عمي شبير ذابح خوش ذبيحة
- يابا إذا ما ملصت رگبتك بيدي ما أتسمى عالزلم
ضلوا عدنا للمغرب كلهم طشوا نمنا بيومها ميتين تعب من الفرة وودي وجيب بعد كم يوم جانوا مقررين ياخذونا للمزرعة بس انتظروا الخال فدار يجي
من گعدنا بالبيت الجديد صارت تجيلي كوابيس تخرب عليَّ نومتي أشوف بان بالحلم وهي تبجي دم واگعد مفزوعة أشبع بجي الليل كله لحد مينزلني شبير لماما
رغم تغير علينا الجو والبيت جديد بس ممرتاحين كُلش ماما من جهة وسالفة بان من جهة أحس حمل جبال صار على صدري واني أشوفهن شلون متأذيات
بيوم انتظرت شبير لليل تأخر حيل الساعة بالوحدة
مدنگة ألعب بتليفوني هذا اللي يركض بين القطارات
اندك باب الغرفة على كيف فزيت بسرعة حتى أفتحه صار شبير بوجهي ساند ايده عالباب ومدنك للگاع
رفع راسه شافني وابتسملي فات للغرفة يمشي بثگل سويچه بيده دگم قميصه الفوك مفتوحة الشعر مخربط
وضعه جان حيل غريب صحتله :- شُبير
اندارلي يباوعلي عيونه حمر وجهه ميتفسر مشيت يمه
لزمت ايده حاوط خصري وتقرب يريد يبوسني دفعته بسرعة بخوف وابتعدت عنه من شميت الريحة عرفتها
گال :- شبيج لج تعاي گربي
انترست عيوني دموع وشهگت :- شُبير انتَ شارب
《 شهربان 《
كُلشي صار گدامي أبيض وأسود انطفت الدنيا بعيني مالي نفس بأي شي بعد ولا عندي واهس لشي
صار كم يوم حابسة روحي بالغرفة ما أطلع بس من يصيحني على حاجة حتى ليشك بالموضوع
جان نهار ثگيل الجو أظلم ومغيم عبالك دنيا العصر الشقة أحسها حارة رغم برودة الجو والهوى صار مخنوك
جنت متكورة عالگاع ضامة بطني بأيدي دموعي تنزل بلا توقف سمعت صوت خطواته جاية من برة خلتني أكمش أنفاسي وأمسح دموعي بسرعة عدلت گعدتي قبل ليفتح الباب ويشوفني
وگف گدامي عقد حواجبه :- بيج شي
هزيت راسي لا
- لعد شبيج وجهج أصفر ما جاي تاكلين
- لا آكل بس شوي تعبانة
ضل ساكت ومركز بنظره حيل عليَّ عبالك شاك بشي گلبي يدك بقوة حسيته يسمع دگاته تقرب مني
دنك انحنى عليَّ صار گبالي مد ايده يمررها على تفاصيل وجهي انداريت للجهة الثانية مطايقة اشوفه
تنهد وگام :- انتظريني أكمل شغلي وأخذج العصر للطبيب گومي اطلعي من الغرفة لتضلين گاعدة هنا
هزيت راسي عافني وطلع جان مستعجل بيده تليفونه يخابرون عليه گمت وراه لگيته طالع من الشقة
المكان جان هدوء بس داخلي كله يصرخ گعدت أحسب خياراتي واني مربطة لا أگدر اطلع ولا أروح لمكان آمن
مشيت للباب ودنگت نمت للگاع أباوع من جوة اتأكد إذا أحد موجود محد جان برة ورحت للمطبخ خليت كرسي وصعدت عالكاونتر وگفت على طولي
عصرت ملابسي حيل واني أباوع للگاع ايدي رجفت مو من الخوف لو الوجع بس من الفعل نفسه
شديت نفسي رفعت جسمي وگمزت بقوة من فوك الكاونتر للگاع الوجع ضرب بطني مثل السچين دموعي جانت تنزل غصب بس عضيت شفايفي ومطلعت صوت
رجعت صعدت بسرعة مرة ثانية وگمزت
الوجع صار أقوى راسي صار يفتر ونفسي انگطع گوة أجره حسيت بشي دافي ينزل بين رجلي دنگت أباوع وشفت الدم بدة يلطخ ملابسي ويتلفهن
شهگت :- يا رب خلصني
عدت الحركة مرة ثالثة والگمزة جانت أقوى أحس روحي صارت تطلع وكأن جسمي صار مو ملكي الگاع صارت باردة جوة رجلي ايدي لازمة بطني والنزف يزيد
مشيت بصعوبة أسند جسمي بالحايط وصلت للصالة
محسيت إلا الباب يندفر بقوة وفات عبد وجهه متغير اجت عينه عليَّ عيونه توسعت من شاف الدم اندفع بأتجاهي لزمني من متني بقوة خضني خض
صاح :- حامل ومتگليلي
جنت أتنفس بصعوبة جسمي يرجف باوعتله بعيون مبللة
بان :- ما أريد طفل منك ماريد شي يربطني بيك
استلمني صياح صوته رج الشقة رج يركض منا ومنا يريد يوگف النزيف ولسانه ما بطل فشار وغلط وسب
حسيت بعد ما أگدر اوگف على طولي وگعت للگاع آخر شي شفته وجهه وهو مرتبك لأول مرة...
#سواد الاثمد
#البارت20
أغمض وأرجع أفتح الرؤية مغوشة عندي أحاول أركز بالگدامي السگف بوجهي جان عبارة عن بياض ببياض
اجت بخشمي ريحة ديتول ومعقمات قوية ثگل براسي مو طبيعي عبالك المكان يدور بيَّ أحس بوخزة بأيدي
رفعتها شوي متشكلة الكانيولا بيها معلگيلي مغذي
أسمع صوت مثل الوشوشة الخفيفة بس ما أميز لمنو وشنو مصدره ضليت مغمضة عيوني لثواني
وفتحتها فجأة من حسيت بوجع ببطني وكأن الألم جان ساكن وبس گعدت وبديت أصحصح هاجمني بسرعة
مديت ايدي لزمت بطني أحس بشعور غريب جوة بطني الألم جان يشبه المغص بس مو كامل أحس روحي تعبانة حيل حلگي ناشف والهوى يفوت ويطلع من صدري بصعوبة وبطء
من بديت أستوعب مكاني وحالتي وترجعلي ذاكرتي باللي صار حسيت گلبي انقبض واستثقلت روحي حيل
نزلت دموعي غصب عني مشاعري جانت متضاربة بين الإحساس بالذنب وبين أبرر لنفسي السويته
مجنت حاسة بوجوده ولا منتبهلته لحد ما اجاني صوته
عبد الإله :- شنو اليوجعج
انداريت بسرعة لمصدر الصوت وشفته واگف منتجي عالحايط ومچتف ايده عاقد حاجبه عيونه جانن حمر
بللت شفتي ودرت وجهي للجهة الثانية دموعي مستمرة بالنزول ومرديت بكلمة جان الموقف غريب ساعتها
من شافني ضليت ساكتة عافني وطلع من المكان شوي ورجع فات وياه دكتورة شافتني تحمدتلي على سلامتي
من شافتني أبجي عبالها لأن خسرت الطفل ومقهورة
باوعت لعبد :- صار عندها علم بفقدان الجنين
هز راسه وما گال شي والدكتورة تصبر عليَّ وگولي الحمدلله وانتِ مؤمنة على هالبجي وحالتي لو أگول اني كتلته بيدي منو راح يصدك كلامي
الدكتورة لازمة عبد على صفحة ومصارحته بالحبوب اللي آخذها وهذاك مسوي روحه مصدوم ومقهور
گلتله :- صح الموقف شوي صعب عليكم وعلى نفسية الأم بس صدگني موت هالجنين جان رحمة اله لأن إحتمال وارد تصير عنده تشوهات خلقية أثناء الحمل وزنه قليل وحجمه راح يكون أصغر من الطبيعي وفي حال تجاوز شهور الحمل بسلامة وصارت الولادة راح يكون النبض عنده ضعيف وصعوبة بالتنفس هاي إذا ما مات وهو ببطنها بسبب نقص الأوكسجين وعلى المدى البعيد تصير عنده مشاكل بالتركيز وتأخر بالنمو والتطور العقلي وحتى الحركي ومعاناته مراح تنتهي
من سامع هالكلام من الدكتورة ضال يصفّن سائلها عالخروج إذا يگدر يطلعني من المستشفى
ردت :- أكيد ويفضل إنها تطلع لنفسيتها حالتها مو خطرة متستوجب تضل يوم ثاني إحتمال يستمر النزف عندها لباجر وينگطع مو فد مشكلة وفي حال تطورت الحالة وطول عندها أكثر من يومين تراجع المستشفى
متشكرها واجت شافتني مرة أخيرة وابتسمتلي
گالتله :- الحلوة شبيه شعرها مريضة
باوعلي ايده بجيبه والثانية لازم التليفون
صارت عينه بعيني :- لا موديل جان عاجبها تسويه
ورى مطلعت هو جان يخابر واني تحركت عدلت گعدتي ونزلت رجلي للگاع بعدها الدوخة لازمتني ماگدر اوگف
سد تليفونه واجاني جر علاگة من عالميز انطاني بجامة جديدة اللي لابستها انتلفت دم راح لزم الباب وبدلت
رجعلي طلع السكارف مالتي وراد يلبسنياه دفعت ايده
نتر بوجهي :- شبيج لج
بان :- شنو مستعر من شكل شعري لو خايف لا واحد يرجع يسألك واني أجاوبه بالسويته
- اششش بابا الج عين تحجين بكل صلافة ورى السويتيه ولا حرف ترى محمل عليج قيامة الله بختج مريضة وبالمستشفى جان شفت شغلي وياج
- حقك متعود انتَ ايدك والحزام
- لأن المثلج ميمشي إلا بالمهانة والضرب ينراد هيج أدوس راسج برجلي يلا تتوبين وتصيرين تحسبين حساب
بصقت بوجهه تخبل
شال ايده راد يضربني وتراجع بسرعة من تذكر المكان اللي احنا بيه عض ايده بحرگة نظراته تتوعدلي
دمغ راسي بيده شمر السكارف بوجهي وطلع بسرعة
من طلع هو فات أرقم أشرلي بيده
أرقم :- فضيني يلا گومي للسيارة
- انتَ تنچب وتسد حلگك لا أطلع حرگة گلبي كلها بيك
اجاني مندفع فاتت الممرضة تراجع بس وجهه صار أحمر من الأعصاب ويتوعدلي بعيونه
عفية بان كلها تريد تحضى بيها بكتلة
اجت شلعتلي الكانيولا وتسألني عن حالتي واني أهزلها براسي شو هذا تعال والزمني جرني من ايدي حيل
عطت بوجع لازمة ايدي والممرضة تحجي وياه
گالت :- مو هالشكل أخي الله يخليك البنية مريضة وحالتها النفسية تعبانة محتاجة تدير بالك عليها
- ما بيها شي صل مثل الحصان أصحى مني ومنج
- هالأسلوب مرفوض ولا من الممكن نقبل بيه هنا
ضلت تحجي عليه تجاهلها واجاني واني لازمة ايدي
- خلصينا انتِ گومي ما صوبتج بطلقة
دموعي تنزل وصرت أون بصوت خافت ايدي على بطني الممرضة جانت متعاطفة حيل لزمتني
سألتني :- بيج شي حبيبتي شنو اللي يوجعج
- خلي يوخر مني ماريده گوليله خلي يطلع
- شيعودلج الأخ
- ميعودلي شي ما أعرفه خاطفيني من أهلي وحابسيني عندهم أريد أخابر أهلي ماما ساعديني فدوة
واني أحجي فتح عيونه على وسعها خزرني وتقدم عليَّ يريد يلزمني گمت أصرخ وأبجي خبصت المكان بالصريخ وهو انخبص وياي والممرضة تحاجيه تريده يبتعد صار يجر بيَّ من ايدي يريد يگومني غصب
ركضت الممرضة ليبرة وهو يجر بأيدي فات عبد شافنا
صاح :- شـكو
حجاله الصار والكلام الگلته للممرضة باوعلي وخزرني
- بسيطة دخلي نرجع للشقة وأستلمج
گومني غصب عني ودنمشي نريد نطلع اجت الممرضة جايبة وياها الإدارة مال مستشفى وگفوا يحجون ويَّ عبد وهو يهدي الوضع ويگلهم زوجتي ماكو شي
صحت :- كذاب لا أعرفه ولا يعرفني أخذني غصب عني وحبسني عنده شوفوا آثار الضرب على ايدي شوفوا حالتي الوصلتلها كله من وراه
أحجي وأرفع بردانات البلوز أشوفهم ايدي آثار التعنيف واضحة بيها وهو ينكر وينفي كلامي الهم وصوته صار يعلى شوي شوي وبده الجدال يحتد بينه وبين الدكاترة
گتلهم :- بس تليفون أريد أخابر أهلي يجون ياخذوني
انطتني الممرضة تليفون من شافها تخبل جره من ايدي وشاله رگعه بالحايط كسره سواه طشار بالگاع
رادوا منه دليل يثبت كلامه اني زوجته لو يكتبون بحالتي تقرير طبي ويشتكون عليه على انه فعلا خاطفني ومعنفني هو تجاهلهم ولا اهتم لكلامهم
من بينهم واجه يسحب بيدي وطلعني غصب عني ومحد گدر يفتح حلگه لو يحجي وياه حجاية
طلعني سحل للسيارة صعدني وسد الباب وراح صعد ليگدام شغل السيارة ومشى ولحگنا أرقم بسيارته
لازمة بطني وعاصرتها بيدي دموعي تنزل بوجع من جرني ومشيت تأذيت حيل خلص الطريق صياح وغلط ومسبة وبس يهدد أكتلج وأذبحج
خابر أرقم گله :- لتكمل ورانا دير وجهك وغير طريقك
سد الخط وباوعلي بأنعكاس المراية
- ولج بانو شلون بيج وبرعونيتج ترديني أكتلج صدك وأخلص منج ومن مصايبج
- أموت ولا أعيش عيشة الچلب
- لا صدك قوية يعني ومتخافين
سكتت عيني بالجامة عيوني صارت تحرگني
هز راسه :- سهلة گومي لحيلج ونتحاسب حساب قوي اني وياج
وصلنا للعمارة وگف طبك السيارة بمكانها نزل واجه نزلني قفلها ولازمني بأيده حيل عبالك راح أشرد منه
أمشي على كيف خطواتي بطيئة وصلنا للدرج وگفت
عبد :- تگدرين تصعدين لو أشيلج
تجاهلته وصعدت أول بايتين بصعوبة أحس روحي طلعت من الوجع والنزف رجعلي گعدت عالباية أبجي
دنك لمستواي حاوط خصري وشالني تعلگت برگبته
ويدردم :- العناد هذا منجوز منه
وصلنا لشقتنا فتحله الباب ودخلني خلاني عالتخم
حط تليفونه وسويچه عالطبلة ومشى للمطبخ باوعت وراه مديت جسمي جريت تليفونه شغلته عالبصمة
رجعته لمكانه بسرعة قبل ليجي طلع من المطبخ بيده بطل مَـي فتحه وانطانياه أخذته منه وأراقب حركاته
الحواجب متطابگة الوجه مكشر ساكت وسكوته هذا يخوفني يصيح ويصير عصبي عندي أحسن من ميضل ساكت وراسه شارد ما أعرفه بشنو يفكر ولشنو ناوي
گعد عالتخم وجر تليفونه فتحه يگلب بيه شوي وشاله على اذنه جملة وحدة گالها قبل ليسده ويرجعه مكانه
عبد :- الج منا لربع ساعة ألگاج يمي بالشقة
شمره ورجع راسه ليورة مغمض عيونه واني أباوعله عفته وگمت ماشية لغرفتي جريت اليدة مينفتح
انتبهلي :- مقفولة
- أريد أفوت للغرفة
- عوفيها هاي وحولي لغرفتي ملابسج هناك
