رواية سواد الاثمد الفصل العشرون بقلم نورس
عبد :- الج منا لربع ساعة ألگاج يمي بالشقة
شمره ورجع راسه ليورة مغمض عيونه واني أباوعله عفته وگمت ماشية لغرفتي جريت اليدة مينفتح
انتبهلي :- مقفولة
- أريد أفوت للغرفة
- عوفيها هاي وحولي لغرفتي ملابسج هناك
- وليش عود ؟
- لأن بكيفي عجبني أخليج گدام عيني بالغرفة عندج إعتراض ؟
- ماريد افتحلي هاي الغرفة
- مو بالمزاج گتلج حجاية امشي بيها لتخليني أتخبل عليج وانتِ بهالحالة ترى لهسه ساكت عنج وما ماد ايدي
دا أحجي صاح بوجهي بصوت عالي جفلني سكتت بعد
عفته ومشيت للغرفة الثانية فتحت الكناتير جنطتي موجودة بوحدة من الخانات جريتها طلعتلي ملابس
رحت للحمام ما سبحت بس غسلت جسمي بمَـي دافي وخليت سانتي شفت بجامتي اندمرت مرة الثانية
لبست ملابسي وطلعت أرجف حاضنة روحي من البرد
سمعت صوت بجي من الصالة مشيت وگفت بالباب شفت يسر موجودة وعبد واگف لازمها من شعرها
حجت وياه كلمة جابها براشدي فر راسها فر
اخترعت ورجعت ليورة انتبهلي واگفة أباوعلهم
خزرني وصاح :- انگبررررري انتِ للغرفة
مشيت بسرعة بلا صوت سديت الباب وراي وأسمع صوته صار يعلى وهي تزيد بالبجي وأسمعها تتوسله
گاعدة عالجرباية وأعصر بملابسي كل صرخة منها أحس الضربة تجي بيَّ اني وأتذكر لزمته للحزام وضربه الي
تشكلت الدمعة بطرف عيني مسحتها بسرعة وگمت
لطشت روحي عالباب خليت اذني أريد أسمع شديگولون
ما أفتهم شي من كلامه بس صياح اجت بأذني حجايته
يصيح :- ولج تگليلي الصوووووج منك اني تلعبين عليَّ ولج يسسسسسر
وهي تبجي وترده :- بس خلي أفهمك اوگف عليك الله بس خليني أحجي وياك
- أمووووتج اليوم والله أنهيييييييج ..
ابتعدت بسرعة رجعت لمكاني وصوت صياحه وصريخها بالبجي مستمر سديت اذني بأيدي
خليت راسي عالفراش مغمضة عيوني لا أريد أسمع شي ولا أفكر على شنو ديتصايحون معليّة اني معليّة
ما أعرف شگد مر من الوقت هدئ صوتهم واني على نفس وضعيتي ولا تحركت الباب مسدود محد اجاني
گمت من مكاني فتحت الباب مترددة أطلع مديت راسي أباوع منا ومنا ماكو أحد الشقة سنطة وفارغة
طلعت أمشي أخذتني رجلي للصالة لگيتها گاعدة بين التخم لامة رجليها لصدرها ومدنگة تنحب بصوت ناصي
بان :- انتِ زينة ؟
رفعت راسها بسرعة من سمعت صوتي
جفلت من شكلها شلاعب بيها هذا الشعر مكفش من كل صفحة والوجه صاير أحمر وعلامات ضرب واضحة بيه حتى القميص اللابسته دگمه مشلعة من فوك صايرة فلم
تجاهلتني ورجعت دنگت تبجي ما أدري شصارلي بساعتها انقهرت عليها وشفت روحي بيها من أنضرب وما ألگى أحد يمي أشكيله لو أسولفله
دنگت عليها مديت ايدي لزمتها :- محتاجة شي أسـ....
دفعت ايدي عنها حيل وصاحت بوجهي
يسر :- انتِ معليج وخري يلا لتلزميني
گمت بسرعة متفاجئة من رد فعلها عفتها ما لحيت
گامت عيونها تدور لحد مصارت على جنطتها سحبتها طلعت تليفونها تگلب بيه ودموعها مبطلت تنزل
شالته تخابر يرن يرن ويفصل لوحده مرتين تلاثة ما حصلت رد من الطرف الثاني گامت تجر بروحها للحمام
شوي وطلعت معدلة شعرها وملابسها وسادة القميص من فوك وجها مبلل عيونها دم صايرات من البجي
رجعت تتصل بتليفونها محد يرد شافتني أباوعلها
شمرت التليفون والجنطة من ايدها واجتني جرتني من ملابسي تعت بيَّ عت
گامت تصيح بوجهي :- كله من ورررررراج انتِ گلبتيه عليَّ انتِ خليتيه يمد ايددددده ويكتلني المسسسمومة روحي ولي اطلعي من حياتنا امشششي بررررة
دفعت ايدها :- هي هييي ووجع فوگه وجع واني الثولة جاية مقهورة عليج دا أشوف شبيج لا والله أشو طبج مرض وحيل شما يسوي بيج ام كرامة سز
- امششششي ماريدج بحياتنا روحي لتضلين هنا
تصيح وتدفع بيَّ للباب تريد تطلعني أخذتني دفع
حرگت دمي جريت ايدها عضيتها حيل گامت تصرخ
انفتح الباب وفات عبد شافنا متلازمات ووحدة تصرخ بوجه الثانية اجه لزمنا يريد يرگع راس براس
اني دمغني على راسي ودفعني عالغرفة رحت أهرول وهي استلمها فشار غلط ويصيح وهي تحجي وياه گايم وطاردها من الشقة گلها :- رجلج إذا عتبت باب العمارة متلومين إلا نفسسسسج
وراگع الباب حيل وراها اني ضليت خاتلة بالغرفة هسه يجي وهسه يجي ويكمل عليَّ ما انفتح الباب ضل برة
ورى ساعة فزيت من شفته طب للغرفة عيونه تدورني
اجاني :- يعني شلون وياج وتالي ولج بانو شسويلج وتجرين عدل
- شنو تذكرت ؟
- مو هن هواي أحتار بيمن أبدي وياج
- هي البدت واجت تهجمت عليَّ وگامت تدفع تريد تطلعني من الشقة وتريد الصدك ؟ لو صحتلي جان سويتها وطلعت ولا أدير وجهي لهنا
- حتى أكسسسر رجلج
- اوي خفت
گمز بوجهي صار گدامي قريب لازم فكي
- بالقرآن هالصلافة واللسان هذا إذا ما بترته الج بيدي ما أتسمى عبد جوزي مني لج جووزي ستوج طالعة من المستشفى لتخليني أفقد عليج وأرجعج أبيتج الليلة هناك
- متخوف چلبي
- شنو انتِ مستغلة الوضع شفتيني ما سويتلج شي أگول مريضة خطية اتسبعتي وطلع لسانج ترى أطيح حظج والله وما أخلي بعيني لا مريضة ولا غيره ألزمج أفصخ رجليج واديج عن جسمج
- هي هاي كل قوتك بس بهاي گادر تطلع عضلاتك وتبرز روحك على ناس أضعف منك عبالك الرجولة بالضرب
باوعلي من فوك ليجوة وعض شفته بتهديد
- لو حالتج تسمح جان شوفتج الرجولة شلون تصير بس سهلة بعيني ضاملجياها بس تگومين
عصر فكي بيده حيل أنيت بوجع وعيوني انترست دموع يلا عافني لزمت فكي مغمضة عيوني متوجعة
عاف الغرفة وطلع رگع الباب وراه
إنسان مقرف كل تفكيره وباله يم ذيج السالفة يشوف الأنثى أداة للضرب يفرغ بيها عصبيته وعقده المريضة
لو جانت السالفة بس عالضرب هينة عندي مجنت أدري بيه ضاملي ضمة ثانية غيرت كل حساباتي
المغرب اندك الجرس أسمع صوته من برة شوي واجاني
شافني متمددة عالجرباية دايخة ايدي على عيوني
عبد الإله :- گومي اكلي جابوا الأكل
رديت بدون لا أباوعله :- ماريد
بحركة سريعة وبدون لا أحس عليه اجاني جرني من ايدي گومني غصب عني وطلعني من الغرفة للمطبخ
أصرخ بيه معترضة ولا اهتم ولا عبالك أحجي وياه
گعدني عالكرسي جان صاب الأكل بمواعين ومخليه على طاولة الطعام جر كرسي وگعد گابلني
نتر بأمر :- اكلي
ما رديت ولا تحركت صاح :- ويامن أحجي ؟
جريت نفس بنفاذ صبر وأخذت الخاشوگة وبديت آكل جان هالمرة أكل بيت مو مطعم اخذني الواهس وگمت آكل واني متلذذة بكل لگمة ما اهتميت لوجوده
هو خلص قبلي وگام غسل راح للصالة واني ضليت آكل على كيفي كملت وغسلت المواعين ورجعت كُلشي مكانه
باوعت من الشباك ظلمت الدنيا وصار الليل الجو بارد حيل رغم مشغل تدفئة بالمكان بس الشقة جانت باردة ممفروشة وأرضيتها كلها مرمر صايرة ثلج ..
مشيتله صرت گباله رفع راسه من التليفون
أشرلي براسه :- ها
- انطيني مفاتيح الغرفة أريد أنام
- ماكو نامي بذيج
- بس انتَ دتنام بيها ؟
- وشنو يعني نامي وياي بنفس الغرفة
- لا بالله ؟
- رجلج ترى مو صاحبج سرسحي گدامي للغرفة يلا
- ما أنام هناك لو تنطيني مفتاح الغرفة ذيج لو أنام هنا
تنهد ومسح على وجهه :- لتعبيني بان انگلعي من وجهي گبل للغرفة مالي خلك حييييل دوختيني اليوم واني من أتعب تضرب فيوزاتي وايدي تبدي تشتغل
عفته ضايجة ومشيت للغرفة طفيت الضوة وتمددت عالطرف تغطيت وانطيت ظهري للباب حاولت أغمض
لا ساعة ولا ساعتين أتگلب منا ومنا ردت بس يلوحني النوم مگدرت گمت على حيلي أفرك براسي
انفتح الباب وفات شافني رفعت راسي أباوعله وكأن فهمني شنو يدور براسي مشى للكنتور طلع العلبةأخذ حبايتين وخلاهن عالميز يمي ورجع العلبة لمكانها
غير ملابسه واجه تمدد بصفي بلا صوت واني أراقبه خلى راسه عالمخدة ساد عيونه ايده جوة راسه
ضليت على گعدتي صافنة عليه فتح عيونه
گال :- وتالي ؟ طفي الضوة عاد أريد انام
حجاها وانطاني ظهره التيبلام بصفي مشتغل مديت طفيته وراحت ايدي عالحبوب اخذتهن عاصرتهن بيدي
ضليت مترددة بين الآخذهن وأنام وبين اعوفهن وأضل گاعدة شمدريني إذا أخذتهن ونمت ما أدري بروحي يگوم يتقربلي واني نايمة أعرفه حيوان ميلزمه نزف
عفتهن من ايدي وتمددت دايرة وجهي منه لافة روحي بالغطة متدفية وايدي جوة خدي صافنة بالظلمة
ضليت الليل كله گاعدة عيني مشافت النوم ولا شوية عبالك النوم هجرني والحبوب جانت الوسيلة الوحيدة حتى ترجعه وتخليني أغمض وأرتاح ..
گمت من مكاني أول مطلع الصبح رحت للحمام غسلت وحضرت الريوك قبل ليجي ويگوم يتأمر سوي وحطي
جهزت كُلشي من گعد اجه مبدل يباوعلي مستغرب
عبد الإله :- هاي انتِ بس من تتمرضين تنعدلين ؟
باوعتله صفح مرديت جر الكرسي وگعد ياكل سويت لفة وأخذت كوب چاي واجيت دا أمشي صاح وراي
گال :- اگعدي هنا اكلي
- ماريد هنا أريد أتفرج عالبلازمة
خزرني :- شحجيت ؟
جريت نفس وگعدت مغصوبة أكلت لگمتين وگمت ما أتحمل مو بيدي ما أتحمله أگعد وياه وأباوع بوجهه وأخلي كُلشي طبيعي بيناتنا وأنسى الصار والسواه صح مرات أجي وياه وأسايره بالكلام وأسوي اللي يطلبه مني بس والله مجبورة ما بيدي شي أعرف إذا اعترضت راح اتأذى وإذا لاسنت تلوحني دمغة لو راشدي عالطاير ومن أعانده يتخبل وينگلب وحش
مشى على هالحال اسبوعين محد اجانا للشقة لا شفت أرقم ولا يسر من يوم العركة أشوفها دائمًا تخابره ويصدها وحتى أرقم تدخل وحجى وياه قافل عليها
يگله :- عوفها ختولي خليها تجر عدل وتجوز من الجذب وگلها ديربالج توصلين للشقة أكسر رجليها والله
تعودت على هذا الروتين الممل بس اني جان بالنسبة الي راحة أسويله الريوك أغسل ملابسه انظف أسوي اللي يطلبه مني بلا صوت
بس ما تجادلنا بعد حتى من يحجي لو يذبلي حجاية تسم منه أسكت وأبلعها بس أريد الساعة هاي تخلص ويطلع وتبقى الشقة فارغة طول اليوم بس الي
ميجي إلا تالي الليل يرجع ينام رأسًا مصار بيناتنا شي ولا حاول يتقربلي وهالشي ريحني آخذ الحبوب وأنام صرت أعرف مكانهن جان ضام علبتين بكنتوره ..
لحد ما بيوم مديت ايدي وألگى العلبتين فارغات گمت ألوب بمكاني انتظرته رجع بالليل وحاجيته عليهن
باوعلي :- اي والمطلوب ؟
- أريد حبوب العندي خلصوا شلون انام
هز راسه :- تنامين تنامين ما عليج شي
- شنو يعني شفهم من هالحجي
باوعلي مركز عينه عليَّ رجع ظهره منتچي عالتخم وماد ايده مرخي جسمه گال :- بعد ماكو لا حبوب ولا غيره
ضليت صافنة بوجهه ممستوعبة اللي گاله
كمل على كلامه :- آخر علبتين هذن عندي وخلصتيهن بهذن الأسبوعين
- اشتري غيرهن
- لو تنطين بعد متدخل هالحبوب للشقة
- عبد ما أگدر شبيك انتَ تعرف بحالتي ما أگدر أنام بلياهن أتخبل إذا گطعتهن عني
- لو تصيرين مواتة هسه گبالي انسي بعد ماكو أيام الدلال راحت
سد اللابتوب شاله وراح للغرفة وعيني وراه عافني ساكنة بمكاني فراغ بداخلي وشعور بالفزع ما جاي أعرف شلون أعبر عنه توترت حيل ايدي رجفت
گعدت عالتخم وأباوع لأيدي وأردد :- لا مو بكيفه ميگطعهن غصبًا ما عليه يجيبلي والله ألح عليه لحد ما أزرف راسه وهو من وحدة يمل ويجيبهن
مر اليوم والثاني جنت شوي مسيطرة على روحي بالليلة الثالثة ما تحملت وضعي بديت أستفرغ وأحس بالدوخة راسي أحسه شايل ثگل الدنيا كلها گد ممتأذية
رجعت حاجيته مرة ثانية وردني بنفس الرد وجان حاسم الموضوع ماكو حبوب يعني ماكو وانتهى
فقدت مخليت صياح غلط فشار گمت أشيل غراض من ميز تواليت وأشمر بالگاع وهو يباوعلي بدم بارد وعلى هالحالة للصبح اني بالصالة نايمة بالگاع منطوية على نفسي وأرجف ايدي بين رجلي نفسي سريع وعالي
طلع من الغرفة اجى يدورني لحد ما استقرت أنظاره عليَّ بالگاع عبالي انقهر على حالتي فزيت بسرعة
مد ايده :- گومي يلا
گمت وياه وگفت أباوعله :- راح تنطيني ؟
- اي بس قبلها عدنا طلعة
- وين ماخذني ؟
- معليج وين وبلا اسأله يلا گدامي للغرفة غسلي وبدلي حتى نطلع
سويت مثل مگال لبست بنطرون وبدي سادة ردان وفوگاه قمصلة ايدي بجيوبي ميتة برد طلعتله
لگيته محضر الريوك گعدت وياه أكلت لگمتين گدامه ليصيح وانتظرته بين ما خلص وگام للغرفة حتى يبدل
طلع وأشرلي :- يلا
أخذني وسد الشقة نزلنا من العمارة صعدنا السيارة ومشى بدون ميگول وين رايحين ولا جان هامني أعرف
بالي جان كله باللي گاله بس نرجع ينطيني
ما أعرف الطريق شلون صار مخلية راسي عالجامة وسادة عيوني بدوخة لحد موگفت السيارة ونزلنا
يمشي وهو گايدني دخلنا لمركز طبي كبير منين متندار عيادة ودكتور إختصاص شكل المكان متروس ناس
وگفنا گبال وحدة من العيادات وباوعت للافتة أقره المكتوب : الدكتور عمر الـ*** إستشاري الحالات النفسية والعصبية وعلاج حالات الإدمان
انداريتله بسرعة فاتحة عيوني خزرني وأشرلي على حلگه بأصبعه حتى لا أحجي وراح للسكرتيرة يحاجيها
شوي ورجع :- لو تموت ما أفوت وياك وخرر لا أفضحك وأخزيك گدام العالم
حجيتها وانداريت أريد أرجع لزمني من متني دارني
عبد الإله :- بالله الكريم يا بان لو ما جريتي عدل هنا ألزمج ألعب الحزام على جسمج وميهمني لا الناس ولا غيره وتدريني أسويها
- اي سويها خلي يشوفون خيستك
عض شفته باوع يمنى يسرى :- راح أطيح حظج كافي لتستفزيني بالحجي ويلا امشي گدامي بلا صوت
- انتَ گتلي انطيج الحبوب بس نرجع شكو جايبني لهنا؟
- واني عند كلمتي والله بس نرجع أنطيج حباية بس هسه خلصيني امشي
سكتت ومشيت وياه فايرة أعصابي دخلنا للدكتور سلم وگعدنا وبده يشرحله حالتي ويتناقش وياه مجنت مركزة وياهم كُلش ولا يهمني بشنو يحجون
أباوع لوجهه وأهز برجلي بسرعة بودي آكله بسنوني
لحد ما گام گمت وياه أباوعله ممفتهمة شي
لحگت على جملة وحدة من الدكتور وهو يگله
- لا ان شاء الله تتجاوزها ايدنا بأيدها وهي مبينة سباعية
باوعلي :- لا تعجبك سباعيتها فعل ولسان
طلعنا منه واني واگعة عليه بالأسئلة بس فنه لو فتح حلگه ورد عليَّ أخذني للمختبر سوالي تحاليل سحبوا دمي وتحاليل إدرار وضلينا گاعدين منتظرين يطلعن
لحد ما طلعن وصاحوا بأسمي أخذهن ورجعنا لنفس الدكتور شافهن وگعد يقيم النسبة نوع وكمية المادة
من خلصوا اتفقوا على خطة العلاج گام صافحه وطلعنا
بالسيارة مناك وطلع بوجهه أخذني لدكتور باطني سوالي فحوصات للكبد والكلى وهم طلب تحاليل ثانية فوك السويناهن أول مرة وضلينا اليوم كله على هالفرة
أحس راسي صار شكبره جاب أكل ورجعنا للعمارة الدنيا مغرب وتوها بادية تظلم الجو مغيم كل شوي تمطر عالخفيف وتسكت ..
دخلنا للشقة گعدت بالگاع وخليت راسي عالتخم مغمضة
راح للغرفة شوي ورجع مغير ملابسه اجاني دنك نزع حذائي فايتة بيها وتالفة الشقة بالطين وخر السكارف من راسي ذب بوجهي شوي مَي ويضرب بخدي
عبد الإله :- هنا وياي صحصحي
فزيت :- انطيني يلا انتَ وعدتني
- اكلي أول
- ماريد
- لعد ماكو حباية
- دا تكذب عليَّ مراح تنطيني
- والله أنطيج بس غير تاكلين أول من الصبح على هالفرة معقولة ما جعتي ؟
حجاها وراح للمطبخ فتح الأكل وخلاه بمواعين وصاحلي گمت وراه گوة أجر بروحي أكلت شلون مجان ووگفتله وگفة فوك راسه
گلي :- روحي للغرفة خلي أغسل وأجيج
گام يغسل واني سبقته لهناك دا أفوت للغرفة صاح وراي
انداريتله :- شنو
أشرلي عالغرفة الأولى :- هنا ترجعين للگن مالتج
حجاها وفتحها بالمفتاح وأشرلي أفوت من مشيت من يمه دفرت الباب برجلي حيل وطبيت للغرفة
انتظرته يجي ينطيني كفخة انداريت عليه لگيته يضحك
مديت ايدي :- يلا انطيني
راح لشوي ورجع بيده گلاص مَـي وحباية أخذتها منه
عقدت حاجبي :- بس هاي مو نفسها
- نفسها
- لا مو نفسها
- نفسها
- والله مو نفسها شكلها غير
- نفس مفعول ذيج اخذيها
بلعتها واني ممقتنعة وشربت مَي وراها مشيت للقنفة تمددت اجى غطاني طفى الأضوية وطلع سد الباب غير لو تاخذ مفعولها وتفضني يمكن بس بالبداية هودت وجع راسي وراها رجع الألم والدوخة نفسها گمت للباب
أفتح أجر باليدة قافله من برة گمت أرگع بيه وأصيح عليه أريده يجي ولا قلدلي ولا اجاني صوته
شگد بجيت شگد توسلته بليلتها زاد كرهي اله أضعاف مضاعفة أفتر بالغرفة مثل المخبلة بالظلمة رجلي تعبوا
وگعت من طولي دايخة راسي عالگاع أحس ببرودتها
وعلى هالحال الليل كله لثاني يوم گاعدة بالزاوية ولامة روحي الرعشة لازمتني أغمض وأفتح جفوني بثگل
انفتح الباب وفات عبد وراه الدكتور نفسه الرحناله البارحة وياه بنية شابة واگفة وراه
أشرلهم عليَّ وما أعرف شيحجي وياهم جنت خايفة منهم كلهم أشوفهم خطر لامة نفسي أريد أضم روحي بالحايط ولا أخلي أحد منهم يباوعلي ويتقربلي
... 《 نورجان 》 ...
لزمته من ملابسه :- انتَ شارب ؟
وگفته ممتوازنة يروح هيج ويجي هيج تقرب أكثر
رجعت ليورة وايدي ترجف دموعي تارسة عيني
لزم ايدي جرني :- تعاي ولج
نترت ايده وصرت من الجهة الثانية من الجرباية
گمت أبجي واحجي :- مو گتلي گطعته ؟ .. مو گتلي بعد ما أوصله ولا أخليه بحلگي ؟ .. ليش ولك لييش
ما رد يفرك بعيونه ويرجع يباوعلي شفت حالته ميأوس منها ماكو فايدة من الكلام وياه عفته ومشيت للباب
لزمني :- بس اوگفي أحاجيج
- وخر عوفني
دفعت ايده وهو يحجي وطلعت نزلت جوة لغرفة ماما
فتحت الباب ومديت راسي فزت بسرعة من نومتها
شدن :- نورجان شبيج ماما ؟
جانت تسمع صوت بجيتي گامت شغلت الضوة واجتني بخوف لازمتني تباوع بوجهي :- شبيج حبيبتي
مسحت دموعي بطرف رداني :- ماما عادي أنام يمج ؟
- غير تفهميني شصاير
- بس خايفة أريد أنام بحضنج
- هم دتكوبسين ؟
هزيت راسي ورجعت دموعي تنزل أخذتني للجرباية گعدت ومددت خليت راسي على رجلها جرت الغطة غطتني بيه وايدها توخر بخصلات شعري عن وجهي
رجعت سألتني :- نورجان أكيد ماكو شي ؟ خاف متلاغية انتِ وشبير احجيلي دا أفهم
- لا
جرت نفس :- لعد شبيج يا ماما والله وگعتيلي گلبي بدخلتج للغرفة هالشكل
ضليت هادية بحضنها لأول مرة ما أحجي لأول مرة أكبت بداخلي وأضم عليها ما أشكيلها شصار وياي
نمت بليلتها دموعي بعيني
ثاني يوم من گعدت لگيته رايح للدوام ماما گالت سأل عليج وطلع من البيت وهو ضايج ومطنگر من الصبح
جنت زعلانة مبوزة النهار كله أحس الوقت صار طويل الساعات گوة تمشي لحد مرجع من دوامه مردت أشوفه
بس لگفني جرني بعيد عن غرفة ماما واني أوخر بيده
شبير :- اگفي يول شبيج بس أحجي وياج
- وخر شُبير لا أحاجيك ولا تحاجيني لا رجلي ولا أعرفك
رفع حاجبه :- هاه ؟
- والله
- هيج صارت ولج
دا أمشي مد ايده سندها على الحايط حاوطني من الجهتين ميخليني أتحرك انحنى راسه دنك عليَّ
- زعلانة يالفحلة مو ؟
- وخر شُبير
حجيتها ونزلت دموعي احتار وهو يسكتني
- حگج والله حگج تزعلين وتديرين وجهج بس لا تبجين من ورى واحد مثلي والله ما أستاهل دموعج
طلعت مني شهگة غصب عني :- ليش تكذب عليَّ شلون تگولي گطعته وانتَ جايني سكران البارحة
- لأن انا ساقط
باوعتله :- والله العظيم لتدحگين هيج أدري انا واحد طايح حظو وأخلاقو فاينة بس ومحمد ما چذبت عليج ساعتها بس البارحة صارت بعد مدري شلون وسولتلي نفسي وشربت شوي ما كثرت
- بس انتَ انطيتني كلمة وگلت بعد ما أسويها
- مو بيدي والله أگلها ما أدري بروحي ما هجست إلا شاربلي كاس ونص بعدين عاد حسيت على نفسي ورجعت للبيت ربج ما فاقد وكملت الطريق لهين بسلامة
- خوفتني منك البارحة والله خفت لتنعاد ذيج الليـ...
رفع ايده خلى اصبعه على شفايفي يسكتني
- اشش يولي لا تكملين وربج ما تنعاد بعد ميهون عليَّ زعلج والله
- يعني بعد متشرب ؟
- أبد التوبة بعد
- احلف
- وحك ..
گام يدور بعيونه يريد شي يحلف بيه
گتله :- شُبير احلف بداعتي وگول بعد ما أعيدها
- وداعة خالي ما أسويها ولا راح تصير نوبة اللخ
ضليت ساكتة ضرب گصته بگصتي عالخفيف
گال :- يلا عاد يالصفرة لمي البوز تاشوف الضحكة
- ما
- يربك بعدها زعلانة أأمريني يابة شتگولين انا حاضر
- ماريد شي منك بس بطل
- هذا هو أمرج غيرو ؟
حضنت بطنه راسي على صدره لمني لحضنه محاوط خصري دنك باس راسي ولزم وجهي نزل لخدودي يبوسهن
باوعت لعيونه :- شُبير اني أحبك لتخليني أزعل منك
- طاح حظو لشبير إذا زعلج منو بعد
- لا لتحجي هيج خطية
- أطيحلج حظو والله وأنعل أصلو بس يحاجيج
ابتسمت وباوعتله ضحك لضحكتي ورجع باسني
گال :- امشي يولي تاناكل خويت من الجوع لهساع حتى ريوك ما جان الي نفس آكل وانتِ مو وياي
- اني هم جوعانة
- يا يمة يا يمة يخسى الجوع
گاودني ومشينا طالعين :- امشي تانشوف شدونة شطابخة اليوم
رحنا للمطبخ بديت أحضر وأصب بالمواعين وهو صعد يغير ملابسه رحت صحت لماما والتمينا على الطاولة
حياتنا هادئة بس احنا التلاثة بالبيت شبير ماخذ على ماما ما متقيد بوجودها أبد يتصرف براحته وهي كذلك
شگد أتوسل بيه يطلعني ميقبل ويگوم يتحجج بالشغل وأروح أشكيه لماما گامت خابرت عمو فدار عليه
والخال راجع مخابره گله :- اخذ حرمتك وعيال أخوك وامشي لبيت المزرعة خلي يتونسون عطلتهم راح تگضي وهم ما طالعين
- خالي الجو بارد والمزرعة مفتوحة ناخذهم غير كلها ترجع مسگطة فلاونزة بالفراش وهن منا عاد شلونهن اخبط خاشوگتين فهاوة على گلاصين مياعة تطلعلك نورجان ودر
- عود إذا تمرضن يا مكثر الأطباء بعدين نحير بيهن
- الدور أروح أفتر بالدكاترة والله زين
- اسمع لك لتخليني أعيد الحجي مرتين تكك مآب جاي الليلة للغربية من باجر الصبح تلمون حاجاتكم وتاخذون حريمكم لهناك وكون يخابروني ويگلولي ما رايحين تاجي أرگع راس براس وأطركم حدر الگاع
- هاااااا يخابروك گتلي طلعت هيج السالفة
- دكل تبن ويلا توكل
- هم بيها بلة حلويات الخاصكي
- انچب
- ميخالف أتجاوزك بأخلاقي
ثاني يوم تحضرنا علي جاب در لبيتنا ورجع يم عمة شيخة ضالة لوحدها بالبيت شگد حاولت ويَّ ماما حتى تجي ويانا تغير جو مقبلت أبد تگول مالي خلك
عاد جرني شبير على صفحة يحاجيني
گال :- عوفيها يولي شتردين منها
- شلون تبقى لوحدها بالبيت ؟
- لا وين خالي جاي ورى ابنو لهين تايضل يمها عوفيهم عيفرغ الهم البيت ياخذون راحتهم
- عزة لعد شو مگلتلي
- انتِ دهيرة ترحين تزتيها عدل وگبل بحلك فرحة
- ليش متدري بعمو حيجي ؟
- لا وين لو تدري تصبح عندهم هين تلزملهم الباب
- يا يخاف منها
- يطگطك من الخوف يرجف هيج دحگي
حجاها ويهز بيده عود دترجف
صعدنا غراضنا وحاجاتنا أخذنا ملابس وأكل لأن نضل كم يوم صعدنا السيارة سلمنا وعفنا ماما لوحدها هناك
الطريق كله ما سكتنا شبير عالك الجو أغاني سارية ومنطلقين وياه سوالف وضحك حيل خفيف بالطلعة والطلعة وياه تونس ما يسكت أبد يكسر ملل الطريق
وصلنا لهناك قبل سيارة مآب سلمنا على عمو هاشم وفوت السيارة ليجوة وبدينا ننزل بالغراض
اجت ورانا سيارة مآب وعمو فتحله الباب دخلها جوة جايب وياه مرته واخته من نزل صاح عليه شبير
- ول عش تحط راسك ويَّ الأكبر منك روح ألعب يم ناس على گدك
مآب :- بيتكم أقرب للمزرعة من بيتنا من هيج وصلت گبلي
- انتَ لوتي لو تستلوت ؟
- اشششش كافي اسكت
- باوع لك خاف عبالك عود مثل تيم وأنزعلك أخلاقي لا انا أنزع البرجلي تالعبو على راسك
أول يوم وصلنا جان الجو يموت صح باردة بس متونسين نفتر بالمكان وبالحديقة نتمشى عالمسبح
انطلقت ويَّ البنات مآب وشبير من يشوفونا ندخل جوة يطلعون برة ومن نطلع يفوتون لو يرحون يم الحارس حتى إذا وحدة من البنات تريد تنزع شالها تاخذ راحتها
بالغدة قرروا يشوون مشاوي برة عالمنقلة واتكفلوا الولد بالموضوع التهوا يشغلون بالفحم ويحظرون النار
عفت البنات ملتهيات بالمطبخ يحظرن المواعين واللحم طلعت برة يمهم وگفت يم شبير گاعد بالگعدة الخارجية
شبير :- ول يالصفرة دحگي ذاك الفرخ
باوعت بالمكان ماكو شي :- وينه ؟
- ولج ذاك يحظي گدامج
باوعت طلع ديأشر على مآب اللي واگف ملتهي بالنار
باوعتله :- شبيه
- أبوه مو متزوج امج ؟
- اي
- يعني هسع انتِ وياه اخوان
صفنت بكلامه :- اي صحيح
- من يموت خالي الله ياخذو ويطول بعمرو تصيرلج حصة من الورث حالج من حالو
- صدك عود ؟
- اي شبيج اخذيها مني هو ترى بحسبة أبوج يعني تورثينو مثل باقي ولدو وبناتو
اندار راسي بكلامه جر حسرة :- بس غير لو يموت ويخلصنا دهيرة مو زلمة لا ينجلط لا يصير بيه شي
شهگت :- عزة خطية شُبير لتحجي هيج
- شبيج لا تصيرين ثولة تاناخذ بيتو اللي بغداد منو من زمان عيني عليه وعاجبني
- الله ونرجع لأيام قبل من التقينا اول مرة
- مو بلة ؟
- زين شوكت
- بس عيموت ويسلمها
دنحجي واجانا مآب يمشي بأتجاهنا
بسرعة گال :- وينج يول هالحجي بيناتنا مو تگولين لأحد
سديت حلگي وهزيت راسي بـ لا وصل يمنا يباوع بشك
مآب :- بشرفك شزتيت من هبدة بحلگها
- أسرار حكومة معليك
- دگوم گوم وياي عايفني لوحدي مدخن وانتَ گاعد هين عالحاضر
راحوا اثنينهم واني فتت للبنات تغدينا كل احنا سوة وانطينا حصة عمو برة بالليل الجو كُلش برد
ضلينا بالبيت ولا طلعنا بعد والولد عمروا نراگيل وطلعوا
گعدنا بالصالة نسولف جامها كبير مسوين ضلع منها بس جام البرة كله جان مبين سدينا البردات ناخذ راحتنا
اخت مآب ما مقصرة بالألعاب دومنة وألعاب ورقية صرنا نلعب لعبة الحروف جماد حيوان نبات دولة
العياط صار بفلس حتى در الهادئة طلع صوتها وتزعل إذا نگلها خسرتي گامت هاجر طلعت للمطبخ مسوية گهوة حلوة وبهالبرد هذا جانت تموت دفت بلاعيمنا
التهينا بالسوالف لوكت متأخر وبدن يغفن من النعاس گامن للغرفة يعدلن الأسرة والفراشات ويقسمن اتفقنا البنات ينامن بالغرفة الكبيرة والولد كلمن بغرفة
من نزلت شفت هاجر فاتت من برة تبجي وطبت جوة ما انتبهتلي مشيت للشباك وخرت البردة وباوعت لگيت مآب واگف يشغل بجگارته وعافس خلقته ..
رحت وراها جانت گاعدة لوحدها وعلى نفس البجية
- ليش تبجين ؟
باوعتلي بسرعة ومسحت دموعها
هاجر :- لا ما بية شي هيج
گامت تمتمت عيونها حمر مبينة مقهورة
- تمام براحتج بس إذا ردتي تسولفين اني موجودة
من حجيت هيج انفجرت بجي گعدت يمها حضنتها وعفتها براحتها تكمل ماما جانت من تشوف وحدة بينا تبجي تلمنا بحضنها وتخلينا نسكت يلا تسألنا شصاير
عفتها تبجي لحد مهدأت وگامت تسولف من وحدها
- بيوم اللي گالولي راح تتزوجين شبعت بجي ما رايدة الزواج أبوي جان ميتفاهم بهالسالفة ومنطي كلمة للناس رضيت والما رضيت هو عطاني بعد ميفيد البجي
جنت خايفة حيل من فكرة الزواج بس امي وخواتي ملن راسي بالحجي ولج ابن العقيد وتبجين ؟ منو المحصلتها وما قابلة ؟ هذا نسب فدار مو أي نسب
دارن راسي وصرت أنام واگعد بالي وياه شكله طوله عيشتي شلون عتصير وياه من ياخذني حبيتو وانا ما شايفتو ولا أعرفو بس أسمع الحجي وحافظة اسمو
واجه وشفتو بالعقد ثواني قليلة بالبوگات جنت مستحية وهو ما رفع راسو ولا دحگني بس نورجان شگلج عيني صارت ما تغمض إذا مو صورتو گبالي طول وجمال وابن خير بنات گرابتنا كلها حاسداتني عليه
بيوم الدخلة مثل أي بنية بهيج يوم خايفة ومتوترة ومستحية أول مرة رجال غريب يصير وياي بنفس المكان وينسد علينا باب واجاني صعد للغرفة
جنت ناطرة منو كلمة يطمني بيها ويوخر الخوف البگلبي يحاجيني بس! ينطق اسمي لو الحايط رد مآب رد ولا فتح حلگو بحجاية فات دقيقة ورد طلع بسرعة وسط صدمتي عافني بحيرتي وخوفي ما أعرف شسوي
لوما أبوه صايح بيه جوة فلا يصعدلي ولا يدحگني اجه جرني وتقربلي مثل واحد گوة عليه وكاره الدنيا ما ردت منو شي والله بس يحس بخوفي يحاجيني كلمة
من ساعتها بدت سالفتي وياه انا أدور رضاه وأركضلو وهو ما شايفني جدامو يروح اسبوع ويجيني يوم واحد وجنت قابلة ما دام أكحل عيوني بشوفتو
بس ميشوفني نورجان ما جني حرمتو يضحك يسولف طبيعي ويَّ الكل ويشاقي اختو وحرمة أخوه ومن يوصل يمي ينگلب حالو چن شاف إبليس جدامو
رحت أشكي لأمي وخواتي لعبن بحالي فلك وين لاگيتها هيج بيت وهيج عيشة وهيج دلال بس والله كلو ما جان بعيني شفايدتو وانا ما مرتاحة وياه وما يحبني ؟
ضلت تسولف ودموعها تنزل واني أبجي على بجيتها ضليت أواسيها واصبري ومآب حباب راح يتغير حسيتها من سولفت وفضفضنا ارتاحت شوي عفتها گامت تغسل
مشيت مخنوگة طلعت برة جان عبالي مآب مثل شبير ما يزعلني بكلمة ولا يرضى على زعلي ويجي يراضيني
جانوا هم بعدهم گاعدين برة مخلين كراسي بالحديقة مشيت من وراهم ما منتبهين لحد محسوا بخطواتي
اثنينهم انداروا بسرعة شافوني
شبير :- دهيرة انتِ منين طلعتي ولج
مآب :- حرمتك إستخبارات اخذها مني
ضجت من كلامهم وطابگة حواجبي مبرطمة بوجهم
شبير شافني ضايجة گال :- شبيج ؟
نورجان :- امدة الزلم كلهم
فتحوا عيونهم اثنينهم بنفس اللحظة عفتهم وركضت جوة للبيت نمت يم البنات وعفت شبير لوحده
ثاني يوم الصبح اجه مؤتمن جايب زوجته وأطفاله وسلام مناك جاب عائلته وجاي صرنا لمة شكبرها
ضلينا يومين هناك وبالثالث عود نطلع بالليل لبيوتنا
العصر الولد برة جاي تليفون لسلام مخليهم يتطافرون فات شبير جار سويچ سيارته ماخذ أخوه وطالع أعصابه صايرة نار ومآب وأخوه لحگوهم بسيارة لخ ..
ضلينا مخبوصات كاتلنا الخوف وحدة تگول للثانية شصاير گمنا نلوب راحوا كلهم بدون ليحجون شي
أثاري بيومها نسيبهم رجل اختهم ( هيام ) لازمها كاتلها وجاية لبيت عمو تيم تبجي وتشكي لعمة شيخة وعلي مناك فاير ورايحله ومخابر عمامه مبلغهم بالصار
راحوله للبيت دافرين الباب وفايتين لازمينه سلام وشبير مطيحين حظه وشبير لازم عليه الحزام واگعله دك ومؤتمن ضال يفازع بينهم ويوخرهم عنه
الولد مو غريب يصير ابن عمهم من طالعين منه گايم ومخابر أبوه گايله :- ولد عمي عزام وولد الخال هدوا علي لبيتي دموني وطلعوا
أبوه راجع مفزع بقية عمامهم ومخابرين الخال حجوله الصار عبالهم ببغداد گلهم هسه جايكم من بيتنا رايح لبيت أبو الولد الضربوه صياح مناه وحجاية مناه
من عارف السالفة وليش ضاربينه گايم گالب السالفة عليهم وحق الولد وأهله بالصار لأن كاتل بنت اخته
العمام ما عاجبهم الحجي وضالين يحجون :- وإذا ما طگها ؟ .. شلون تروح تفزع إخوتها على رجلها .. وعش تطلع من بيتو بدون علمو ؟
وحجي هواي غاثين بيه الخال وما فاضة بينهم طالع منهم وهو صاير أعصاب محترك دمه من حجيهم
الولد من عرفوا بالصار گايمين شبير ومآب متانينه بالبيت لحد ما راجع ولازمينه مكسرينه تكسير فوك الكتلة الأولى وگايمين مربطينه وساحلينا بالجنطة
مؤتمن وسلام وصلوا ميدرون بالصار ورجعوا للمزرعة وشبير ومآب وراهم مدستريها بينهم وجايبينه وياهم
عافوا سيارتهم برة ما دخلوها شوي وشفتهم طابين علينا اثنينهم واحنا الخوف كاتلنا وهم يتضاحكون
حجولنا السالفة مخابر الخال على ابنه الكبير
شوي وفات مؤتمن من برة صاير نار صاح بيهم
مؤتمن :- يول انتوا شمفينين ؟
باوعوله اثنينهم مستغربين
گلهم :- أبوي خابرني يصيح وعيتهدد عليكم يگلي اگضبهم شمسوين من ورانا ومخلينو واج نار هيج
- هو أبوك من يمتى ما صيح وهدد شو من شفتو وشافني يصارخ اسمو يطلك
- شبيرررر تاحجي صدك فايرة أعصابو ومغتاض منكم حيل هالمرة فهمني شعاملين تاتصرف
- بالحرام إذا سوينا شي أبوك يتبلى علينا هذا أخوك واسألو
گله :- انا أدري ؟
هز راسه وهو يباوعلهم :- هين يجي ونفهم منو
باوعلنا شبير :- ها النثاية سمعتن خالي جاي بالطريق گومن گدامي اغسلن السطح ونظفن البيت
مآب :- زين السطح عش ينغسل شنو راح يطير طيور ؟
- لا ينام فوك لان تنگطع الكهرباء
من جاي الخال لازمهم برة استلمهم رزايل فشار ممخلي
صايح بيهم :- وييييين وديتوه ؟
فاتحيله الجنطة مال سيارة لاگي رجل هيام مربط وسادين حلگه وجهه مدمة ما ينشاف من ملامحه شي
صايح بيهم ينزلوه ويفتحون ايده ورجله
- لا خالي بشرفك انتظر منا لباجر وصيت على قفص تاحطو بيه
فدار :- وشتستفاد بالله ؟
- اگعد أصورو وألزمها عليه لزمة العمر كلما اجه على بالو وراد يمد ايدو على حرمتو يتذكر لازم عليه تصوير
- دمشي فكو امشي تعال هسع اخلص من لساناتهم سايب مسربت مناعيل الوالدين
- وعالخال ثلثين الولد عالخال
- اتخسى
أخذ الخال الولد وياه بسيارته وطلعوا قبلنا واحنا لمينا غراضنا قفلنا البيبان وصعدنا سياراتنا لحگناهم
شبير مفعل وضع الطز ولا عبالك مسوي شي وصلنا هناك نزلنا ببيت عمو تيم حتى ماما لگيتها يمهم
الولد أول ما فازين على اختهم گعدوا سمعوا منها الصار وليش ضاربها وهي تبجي وتشكيلهم جان وجها يخوف
شال شُبير بنتها مريم عضها من خدها گامت تصرخ طلع تليفونه وخلاه بيدها يلا سكتت بس تناشغ دمعتها بعينها
ماما گلتله :- خطية ليش هيج
علي خيبر :- عوفيه شغلها وطفاها
انگلبت المشكلة ضحك وسوالف باللمة سلام ومرته هنا واحنا وماما وهيام، الخال أخذ ولده وراحوا لبيتهم
خابر عمو تيم سامع بالصار انطه المقسوم لشبير
وگعد يرزله على مسامع الجميع فاتحين وياه سبيكر
تيم الله :- كلو من ابوي لو لاف راسو بذيج الليلة الگشرة وما عمل عملتو وخلف شكولك الزفرة
شيخة :- شجاك على وليدي شو تگوم تگعد عتصيح بيه
- والله مچذب ؟ حاولت وياه ما تاب بمراهقتو گلنا ميخالف طايش وبعدو صغير هسع يدخل جامعة وهو ينعدل لوحدو شو دخلها منا وزاد عالقاط قاطين
شلتو شمرتو على خالي وراح للسلك العسكري گلت اي ارتاحيت منو وصار زلمة بعد ردلي شاد الرتبة ومتفرعن بالزايد خلقتو مگلوبة ونازع أخلاقو وضاربها چلاق
طول ما يحجي شبير نايم بحضن عمة شيخة مغمض عيونه بس أشوف ابتسامته وعمة تلعب بشعره
عمة ما رضت لكلام تيم گامت تدافعله
- لا تحجي على وليدي شبير هذا شيخ الشباب
گلها :- ايه شيخ الكاولية
علي جان يم رجل شبير ديشرب چاي
غص بالاستكانة انطاه دفرة وگله
شبير :- انتَ انچب
ضلينا نمنا بيومها عندهم من التعب وثاني يوم رجعنا
... 《 شهربان 》 ...
راسي عالجامة أباوع للشارع والسيارة تمشي شعور غريب بين أحس روحي متحررة ومقيدة بنفس الوكت
هاي رجعتي من الطبيب بعد أربعة أشهر من العلاج
شهور وأيام طويلة مرت الله وحده يعلم بصعوبتها وثگلها عليَّ سواء نفسيًا أو جسديًا
بداية خطة العلاج جانوا مركزين على سحب السموم والمادة اللي بجسمي جانت بدايتها أصعب أيام
أتذكر بأول يوم دخلتلي الممرضة الصبح قاسلتي ضغطي وحرارتي وفحصت النبض مالتي
جانت تصير عندي رجفة وصداع يلزم راسي يموتني
انطتني جرعة مهدئة ضربتني بأيدي على وصف الدكتور
جانوا راسميلي روتين كامل شلون يمشي اليوم وكل خطوة جان محسوب حسابها مراقبين حركتي نومتي الأكل ما آكل إلا اللي محددينه إلي بنظام غذائي صحي
الممرضة وياي ملازمتني تجيني من الصبح متروح إلا بالليل والدكتور جان متابع حالتي أول بأول عالتليفون
وجان كل اسبوع يجي يقيم وضعي وحالتي والتقدم
بأول اسبوع عدى جنت أشوف الموضوع عادي رغم صعوبته بس مجان مستحيل بس بعدها رجعت ألوب عالحبوب أريد بس ولو نص وحدة آخذها
فقدت وانلعب بحالي لعب ورگصتهم وياي الغرفة الـ اني بيها فارغة ما ألگى شي أگوم أضرب راسي بالحايط
كم مرة يفز من نومه يلگاني على هالحالة ويلزمني الليل كله يضل مگابلني حتى لا أأذي روحي
الممرضة مستمرة فحوصات روتينية كل يوم وجبات أكل بساعات محددة تگعد مرات تسولف وياي تحاول تلهيني عن حاجتي للحبوب وگالت لعبد تحتاج نشاطات
گام جابلي كتب ودفتر مذكرات لزمته ترتسته ترس كتابات بنفس الساعة والكتابة جانت كلمة وحدة
( أكرهك ) وبنص الدفتر كاتبة اسمه بخط كبير
من داخل الصبح يشوفني گعد يقرا بيهن وشايف الكتابة واسمه رفع راسه يباوعلي
عبد الإله :- هاي ليش هيج بانو ؟
بان :- أكرهك أموت منك
هز راسه :- ميخالف اكرهيني بس دگومي وصيري زينة
جانوا ينطوني أدوية بديل عن الحبوب حتى تخفف الأعراض أموت باليوم ألف موتة يلا يخلص وأنام
جسمي جان طبيعي حتى شكلي متحسن مو مثل قبل أحس عندي طاقة وخفيفة بالحركة بس حاجتي للحبوب جانت طاغية على كل تفكيري، انتهيت عليهن
بعد مرور شهر من العلاج صار بدال ميجي الدكتور للشقة احنا نروحله لعيادته العلاج بعده مستمر روحاتي للدكاترة ما بطلت دائمًا فحوصات كل كم يوم مراقبيني
عبد جان وياي ما عافني خاصة بأول أيام حتى الشقة مجان يطلعها ولا ساعة ولا يخلي أحد يجينا
جسمي شبه نظف من السموم الدكاترة والفحوصات أكدتلنا هالشي واستمرينا بالجلسات النفسية والأدوية البديلة لحد مخلوني أفقد رغبتي بالحبوب شوي شوي وبديت أتناساهن وألتهي بروحي أكثر
خلال هالأربعة أشهر تغير شكلي ١٨٠ درجة صعد وزني وسمنت رجع للطبيعي وجهي حيوي مو شاحب ومريض مثل قبل نومي استعدل وصرت أنام بدون المهدئات
هذا كله بجهة وفرحتي بشعري جانت بجهة ثانية
طالع أكثر من قبل وطولان بشكل ملحوظ حيل صار عبالك اني گاصته بوي ضليت لابسة السكارف بس أطلع مقدمة شعري من گدام وأشده من ورى يطلع حلو
ما فزيت من صفنتي إلا من وگفت السيارة وأشرلي
عبد الإله :- انزلي يلا
نزلت واني مستغربة كل وبالي مرجعني للشقة أخذني من ايدي ودخلنا لعيادة انتبهت مكتوب طبيبة نسائية
جان ماخذ موعد وحاجز وحتى مگايلي دخلنا عالدكتورة
گاعدة على ميزها لابسة نظارتها مركزة بأوراقي والفحوصات اللي انطاهن الها ويسولفلها عن حالتي
وهي تهز راسها :- عظيم عظيم
نزلت نظارتها عافت الأوراق وشبكت أصابعها عالمكتب
صارت عينها وياي :- لا بطلة تقدم ملحوظ جدًا عن أول مرة شوفتني بيها صورها وفحوصاتها القديمة
- فيديني دكتورة صارلي فترة طويلة أفكر بالموضوع
- اي تفضل أسمعك
- لو حملت هالفترة هم راح يأثر شي عالجنين ؟
فتحت عيوني على وسعهن أباوعله وهو متجاهلني مركز بكلامه ويَّ الدكتورة ومحادثتهم
گلتله :- حقيقة ما أگدر أجزملك بهذا الشي الحمل ممكن يصير عادي لكن برأيي تنتظر بعد من شهرين إلى تلاثة للتأكد من شفائها التام وحتى نتجنب أي مخاطر ممكن يتعرض الها الطفل في حال صار حمل بالمستقبل
شرحتله أكثر عن الوضع تشكرها وگمنا طلعنا واني مورثة من عنده أحجي وياه ميرد وصلنا للسيارة
وگفت ضربت رجلي بالگاع :- اوگف دا أحاجيك
اندارلي :- شبيج ؟
- منو الگلك اني موافقة نسوي طفل ؟
- ومنو الطلب رأيج انتِ اني قررت وانتهى الموضوع
- لو تنط تسسسمع لو لا لو تنط وكلام الله طفل ما أشيلّك ببطني أكتله حاله حال القبله وميرفلي جفن
- عفية بالسباعية
- شنو البالك عالجتني من الحبوب حتى تخليني أحمل بطفل يشيل أسمك ؟ والحُرررر كل السويته هالشهور وفترة العلاج أهدمه فوك راسك بظرف كم يوم
ضل يباوعلي :- اصعدي
صعدت السيارة ورگعت الباب حيل وهو صعد وساق السيارة أحس الهوى اختفى فجأة فتحت الجامة
صرت أجر النفس بصعوبة اختنگت وصرت أفرك بصدري
وصلنا للشقة ودخلنا واحنا نتجادل على نفس الموضوع
بان :- لو أعرف أگطع روحي ولا أخليك تلزمني وتتقربلي
- شبيج شو مصدگة روحج انتِ ورايحة زايد هو منو المگلبج شايفة شكلج بالمراية لو لا ؟ شعر بيه شوفة مثل البنات ما عندج
مرديت عليه بس الحجاية حزت بخاطري عفته وطبيت للغرفة شبعت بجي گمت أباوع لروحي بالمراية
مديت ايدي على شعري ورجعت بيَّ ذاكرتي لذاك اليوم من هو لازمني مثبتني وابن عمه يمشي المكينة على راسي أحس الموقف هسه صار من گد ما مأذيني
مسحت دموعي :- بسيطة إذا ما ندمتكم واحد واحد عالساعة الفكرتوا بيها تلزمون شعري وتحرگون گلبي بيه
بنفس اليوم اجانا أرقم گعدوا بالصالة يحجون صوتهم جان ناصي ومتحذرين فتحت باب الغرفة شوي وگفت أتسمع وأباوع عليهم شنو يسوون ظهرهم صاير علي
مگابلين اللابتوب مال عبد وأسمعه يگله
أرقم :- هذا التصوير الطلبته
- أخذت وكت طويل حيل أرقم
- شسوي صاحب المحل متوفي وسادين محله من وكتها لحد قبل كم يوم رجعوا ولده فتحوه وطلبت منهم التسجيل مال كامرات
- وعرفتهم ؟
- اي انتَ هم تعرفهم مو غريبين عليك
- اي دحجي أجر الحجاية جر منك
- من ربع فدار الأنباري ..
وصار يأشرله عالشاشة :- واحد منهم بالداخلية هم يعودله والثاني يصير ابن اخته هذا نفسه اللزمني قبل فترة وگام يهدد يريد عنوانك
- لا حلو والله العقيد گام يلعب بذيله ويدزلي جماعته يفوتون للشقة
- يا عقيد يمعود غير اترفع برتبة عميد وانتظر سنة هيج ويشد السيف على چتفه ويصعد لواء
- سهلة سهلة جايه الدور وهذا ابن اخته تجيبلي رقمه خلي أشوف شسالفته طاب للشقة بنص الليل
سديت الباب على كيفي وابتعدت گعدت أصفّن تأكدت ديحجون على فدار الأنباري طليق ماما بس معرفت ابن اخته منو يقصدون معقولة شبير ؟ ..
شگد حاولت طول هالفترة الراحت أحصل على موبايل حتى أخابرها ومصارت بالي يمهم حيل ماريد يتأذون
بنفس اليوم بالليل أسمع صوت عبد جاي من الصالة يتصايح ويَّ واحد بالتليفون اني بالغرفة وأسمعه صوته جان عالي حيل گمت للباب فتحته شوي وأباوعله
يروح ويجي بالمكان ويتلاغى ويَّ الطرف الثاني
صاح :- شنوووو الخاوة ؟ تفوت شقتي بنص اللييييييل وتگلي خاوة ؟ .. أحرگك انتَ وخالك ثق بالله .. دوس أدوسكم بقندرتي وخلي السبع البيكم يطلع ويلاويني
هواي أوقات أشوف أعصابه فايرة بس كلها مو مثل هالمرة يحجي بعلو صوته وجهه أحمر من العصبية عروگه بارزة بشكل واضح من گد مشاد عليهن
رجعت فتت جوة خنست طفيت الضوة وتمددت أنام
ثاني يوم بالليل اندك جرس الشقة رحت فتحته
صارت بوجهي يسر ..
مغيرة لون شعرها وگاصته ضعفانة شوي صايرة تخبل
فاتت بدون كلام سألتني على عبد أشرتلها جوة راحتله للغرفة واني عيني وراها گلت هسه تگب العيطة
بس الجماعة خنسوا مالهم صوت لا ساعة ولا ساعتين
لحد مطلع هو من الغرفة شافني گاعدة أگلب بالبلازمة
عبد الإله :- گومي بان حظري العشا
حجاها وگعد عالتخم شفتها طلعت وراه تگلب بشعرها وتباوعلي صفح هزيت ايدي وگمت منهم
ايدي تفتح بالعلاليك مال أكل جان كله جاهز بس أخليه بمواعين إلا اني ما اوصل الطبخ ولا يمه كُلش فد مرة
حسيت بحركة وراي انداريت لگيت يسر واگفة تباوعلي
ما اهتميت وكملت البيدي لحد محجت
يسر :- تصالحنا
انداريت عليها :- وياي ؟
- اي أكو غيرج هنا يعني
- اي عود مبروك
حجيتها ورجعت انطيتها ظهري
- شبيج شو أشوفج ضجتي
ضحكت ودرتلها بكل جسمي انتجيت عالكاونتر
- يسر شتردين ؟
- موتي قهر مشتاقلي موت وگلي أجيب ملابسي وأگعد عنده بعد بالشقة
- اي ؟
- لتزعلين إذا ممگلبج عادي تصير تاليته رجع للأصل
- توكلي بنتي
حجيتها وعفتها تحجي لوحدها وايدي تتحرك تاخذ بالمواعين قبل لا تدور وجهها وتطلع
گالت :- بسرعة كملي العشا وصيحيلنا ميتين جوع
ضليت أباوع وراها صافنة گمت آكل بشفتي بحرگة
أحجي ويَّ روحي وأرجع بالأكل للعلاليك سويتلي لفة وأكلتها سريع عالواگف سديت بيها جوعتي
باوعت من باب المطبخ مديت راسي الصالة فارغة
شلت العلاليك وطلعت فتحت باب الشقة ونزلت العمارة حراسه گاعدين جوة أول مشافوني واحد منهم صاح
رحت عليهم مديت الهم العلاليك
حجيت :- هذا الأكل عبد دزه الكم
أخذهن من ايدي يباوع مستغرب عفتهم ورجعت انداريت صعدت للشقة وسديت الباب على كيفي
اثنينهم ماكو بالغرفة عضيت شفتي
رجعنا لنفس اللعبان نفس بأول أيام زواجنا
رحت لغرفتي وسديت بابي ورى ربع ساعة فتح الباب
باوعلي شافني گاعدة فقيرة ممسوية شي صاح بوجهي
- الأكل ويييين وديتيه بانو ؟
عقدت حواجبي :- يا أكل ؟
اجاني لزمني من طرف ملابسي يعتني عت
- أحجي وياج لج لتستثولين العشا الطلبته وينه
- أكلته
صفگني راشدي مسحت خدي ابتسمت وباوعتله
خازرني حيل :- آخر مرة اسألج الأكل وينه احجي ذابته
- والله انوكل شبيك ولا ذبيت منه شي
ضل ساكت أنفاسه بوجهي حارة تچوي دفعني
رفع اصبعه بتهديد :- لا تشوفيني وجهج ما دامني گاعد
طلع ورگع الباب وراه غميته بأثنين ادية
الليل كله صوتهم وضحكهم يوصلني للغرفة صوت التلفزيون عالي انسطرت سطر ردت بس أغمض وأنام
سبيت بيهم لحد ما مليت اني مصدگت أعدل نومتي
ثاني يوم عالريوك لگيتهم گاعدين قبلي ديتريگون حميت الچاي صبيتلي كوب سويت توست عليه جبن
أخذتهم ورجعت لغرفتي آكل وأشرب راسي مسطور
صفنت على حالي ..
هو عايش ومكمل حياته ويَّ زوجته بشكل طبيعي واني عايفني معلگة عنده غرفة مثل البشر ممسويلي بحال المراية والقنفة مكسرة تكسير بيها بالنومة
جريت حسرة وگمت شلت كوبي ورحت للمطبخ أغسله
يسر :- بان لملمي المواعين اغسليهم
ما رديت ولا كأني سمعت دا امشي
صاح وراي :- تعاي لج مو تحاجيج
انداريتله :- نعم ؟
- شيلي المواعين اغسليهن يلا
جريت نفس أصبر روحي مشيت صرت أجمعهم واحد فوك الثاني وهو رجع التهى بتليفونه وهي تحاجيه
وگفت بنص المطبخ وشلتهن ليفوك كلهن مرة وحدة وگعتهن للگاع اتكسرن ولا ماعون بقى صاحي
گمزوا اثنينهم وگفوا وعبد شمر التليفون واجاني جرني سحلني طلعني من المطبخ أخذني لغرفتي شمرني
صاح :- لا انتِ جلدج يحكج ومشتاقة للحزام
حجاها وهو ينزع حزامه وبسرعة شاله ضربني بقوة اجت الحديدة اللي بطرفه بأيدي شاغت روحي
دنگت لازمة ايدي متأذية دموعي تنزل بسكتة
واگف يباوعلي من أول ضربة وگف طلع ورگع الباب
باوعت لأيدي مكان الضربة همست :- چلب
ضليت اليوم كله حابسة روحي بالغرفة ماريد أشوف خلقة واحد بيهم لحد ما بالليل مطفية الأضوية
حسيت الباب انفتح وخيال واحد فات فزيت من مكاني
شغل الضوة شافني صار يتقدم عليَّ گعد يمي بالگاع
گتله :- شعندك جاي هنا ؟ روح لمرتك أريد أنام
أخذ ايدي يباوع بيها :- غبية وحدة غبية ما گاعدة تفتهمين ما رايد أأذيج بس انتِ تجبريني بتصرفاتج
جريت ايدي منه
- مو مبرر يخليك تضربني مثل الحيوانة جوة ايدك
- انتِ تخليني أفقد عليج إلا اني ما رايد أذيتج
- ميشفعلك عندي لو شتگول مراح أشفعلك لحد ما أموت على السويته بيَّ ولا تتوقع بيوم راح أسامحك
- ميخالف راضي
- لك بابا لو بيك ذرة رجولة من صدك وتگول اني رجال تطلگني وتخليني أرجع لأهلي مو حابسني عندك بغرفة ومسويني مدمغة الك وخدامة جوة ايد مرتك
أشر على حلگه :- اششش كافي بلا تجاوز
- شنو ضجت ؟ ضوجتك الكلمة ؟ اي انتَ مو رجال
حجيت هيج جابني براشدي وصار يصيح
- ولج كافي كافيييييي
درت وجهي عيوني تحرگني من گد الدموع بس مبجيت
گام مني مشى للباب عبالي راح يطلع قفله ورجع اندارلي
فزيت بخوف من مكاني وگفت
- اطلع لتتقرب زايد والنبي أخزيك اطلع رووح لمرتك
ما اهتم نزع قميصه دا أشرد لزمني دفعني عالقنفة گمت أبجي وأصرخ بوجهه أخرمشه لزم ايدي ورفعها فوك راسي وايده الثانية تجردني من ملابسي صوتي جان عالي سد حلگي كتمه بيده ولازم ايدي مقيدني ثگل جسمه كله صاير فوگي ما أگدر أتحرك يوزع بوساته على جسمي واني أنفر ما بيدي شي أسويه صارت بس دموعي تصب ..
رجع وتقربلي .. رجع وعاد المشهد عليَّ بطريقة قذرة تخليني أكره روحي .. وكأني لعبة متحركة بدون مشاعر
من خلص ما گام مني ضل حاضني من ورى ايده محاوطتني ظهري لازك بصدره مخلاني أگوم
ضليت على هالحال الليل كله هو نايم واني ما أدري شوكت غفيت گعدت الصبح هو ماكو بس اني بالغرفةجريت ملابسي لبستها وگمت أخذت غيرهن جديدات وبوجهي للحمام سبحت وطلعت ايدي متزلغة وعيوني منفوخة من البجي صارت يسر بوجهي تباوع لرگبتي
انگلبت خلقتها دا أمشي أتعداها لزمتني رجعتني
يسر :- شنو لبالج راح يحبج بهاي حركاتج الرخصية ؟
نترت ايدها :- دوخري مني الله يرضى عليج مناقصتج
عفتها ومشيت لغرفتي وسديت الباب ضليت على حالي ساعتين منطوية على روحي مالي نفس أسوي شي
لحد مفزيت اجت براسي شغلة گمت طلعت بسرعة أباوع بالشقة محد جان بيها يسر تسبح وعبد طالع
رحت لغرفته مشيت للميز اللي يم الجرباية أدور بين الأشرطة وعلاليك الأدوية اني متأكدة مخليه هنا
لحد موگع بيدي باوعت لشكل العلبة لهسه أتذكرها جانت الممرضة تنطيني منها فترة العلاج حتى أنام
اخذتها وطلعت بسرعة خليتها جوة القنفة متبين
لليل وگفت أصبلهم بالعشا طلعتها أخذت كم حباية دگيتهم وخليتهم بالأكل وين ماكو سوائل خلطتهم وياه
التهوا ياكلون وگاعدة بالغرفة على أعصابي
ورى ساعة يلا بدوا يغفون يسر گامت طبت للغرفة وعبد بمكانه تمدد عالتخم ايده على عيونه دخل بسبات
مشيتله أهز بيه ماكو ميتحرك نصيت صوت التلفزيون
جريت تليفونه بصمته انفتح بديت أگلب بيه اكو شي براسي أريد أوصله دخلت على الأرقام اللي عنده أكثرها غريبة بدون اسم رجعت على محادثتهم هو وأرقم
وأقرا بالمسجات القديمة وصدك صار الرقم گدامي
رحت طلعته من سجل المكالمات وطابقت الرقم نفسه دست إتصال واني على أعصابي أهز برجلي سريع
فتح خط ضل ساكت ولا اني حجيت
گال :- متحجي عش متصل
عقدت حاحبي هاللهجة أعرفها سامعتها قبل
تشجعت ورديت :- ألـو
من سمع صوتي سكت لحظات بعدها رد
- منو وياي ؟
- فاعلة خير
- لا والله
- والله العظيم شبيك تستهزء
- اي ؟
- شوف ما أريد اطول وياك بالحجي راح أحجيلك السالفة بسرعة عبد وابن عمه عندهم تسليم باجر الساعة تسعة بالليل بمنطقة...
انطيته العنوان ومكان التسليم بالضبط
- وشجابرني أصدك هالكلام هذا منو يگول مو هو موصيج تخابرين تا تجرجريني
- أجرجرك شنو ابني أعرفك تعرفني فوك مدا أسوي زين
- زينيش هذا مخابرتني من رقمو تاتبلغين عليه وين صايرة هاي
- ميدري والله
- شيثبت ؟
- دگيتله منوم بالأكل ونام
من حجيت هيج ضل فترة طويلة ساكت گتله :- ها ؟
- يول انتِ بان مو ؟
جمدت بمكاني هذا منين يعرف اسمي
- لا مو اني
- يابا وعديلة مريم هاي انتِ وينج يولي امج مفرفحة وراج والناس عتدور عليج
فز گلبي من ذكر ماما :- تعرفها ؟
- عجل شلون ما أعرفها هي الوصتني بيج
- يمك ؟
- لا وين بالغربية أگلها مسيبتني عليج تادور ببغداد عيالي صار بالشهور ما شايفهم من وراج
- النوب ؟
- دنطيني عنوانج تاجيج
- لا وين تجي يمعود تريد تبليني حراس عبد لازمين العمارة إذا شافوك تودع وتعاي كله من وراج
- انطي العنوان بنتي لا تعبيني
- أبد والله ولا تفكر توصل
- عجل شلون أشوفج مو عطيت كلمة لأمج أردج الها
ضليت ساكتة شوي بعدها گتله
- شوف باجر من تجون لمكان التسليم تلگاني هناك
- دنكتمي انكتمي تروح للتسليم هي
- والله معليك أدبرها وهناك نتشاوف ومثل مگتلك التسليم ساعة تسعة بالليل
حجيتها وسديت الخط ما انتظرته يجاوبني رجع اتصل
فتحته :- وصدك بعد لا تتصل راح أحذف المكالمات ترى تبليني وأصير بيد عبد يجنزني
وهم سديته قبل لا يرد بس بعد ما اتصل رحت للسجل مسحت المكالمتين رجعت الموبايل لمكانه ومشيت
خطرت على بالي ماما سجلت رقمها ودست اتصال مرتين دك يلا جاوبني صوت رجال غريب
گتله :- العفو هذا مو رقم شدن ؟
- يا شدن بوية بهالليل انا توفيق توفيق أبو كامل
سديته بسرعة باوعت بالرقم مغلطانة هذا هو حافظته معقولة مغيرته وانباع رقمها لغير واحد ..
ثاني يوم گاعد عبد متأخر مو مثل كل مرة يباوع للساعة وضال يصفن مينام هو لهذا الوقت
الساعة جانت ورى الظهر قريب الوحدة يسر جانت نفس حالته واني وياهم عالواهس توني گعدت
طلع روحنا اليوم بس يصيح ويتأمر مزاجه مخربط يخابر كل شوي يشيل التليفون وصاير عصبي
لليل وهو على هالخبصة الساعة جانت بالسبعة ونص فات يبدل ويسر يمه بالغرفة السويچ مشمور بالصالة عالطبلة جان بصمة فتحتها وأباوع ليشوفوني
شلت حفايتي وطلعت من الشقة نزلت العمارة واني أتلفت استغربت ماكو أحد من حراسه جانوا تلاثة
واني الليل كله گاعدة أسوي سيناريوهات شلون أغافلهم وأطلع وإذا انلگفت بشنو أتحجج بنزولي لجوة
مشيت للسيارة فتحتها وفتحت الجنطة وسديته للباب گمت أباوع داير مدايري ماكو أحد صعدت ونزلتها عليّ ما طول هواي شوي وحسيت عليه يفتح الباب ويصعد شغلها بسرعة وساق وهو مستعجل اتصالات مبطلت طول الطريق لحد ورى ربع ساعة مشي وگفت السيارة
أسمع صوت واحد يسلم عليه ويضحك وياه وصار صوته قريب كُلش يمي صاح :- افتحلي الجنطة عبد
يمة غير گلبي صار بين رجلي تشاهدت على روحي
انرفعت عني واني سادة عيوني حيل الضوة ضرب وجهي فتحت عيوني گدامي رجال كبير بالعمر
فاتح عيونه حيل يخوزر صاح
شاكر :- تعال شوف هالشوفة لك عبددددددد
نزل بسرعة شافني لو طار عقله نزلني سحل انطاني كم كفخة عالماشي تصبيرة صعدني بالسيارة ليورة
اندار وغير الطريق هذا الرجال گاعد يمه واثنينهم نازلين عليَّ بالحجي والغلط لحد مرجعني للعمارة
أخذني تجرجر صعدني فوك وصلنا للشقة شفت هذا نفسه اللي يوگفه يم الباب ميجيبه بس من يطلع
شمرني وصاح يتوعدلي :- دخلي أرجع وأستلمج بعيني
راح بسرعة وسد الباب وراه وقفله علينا يسر تباوعلي وتسأل شكو ما رديت عليها وگمت مشيت لغرفتي
بهالأثناء الساعة صايرة تسعة عبد وعمه ما واصلين أرقم جان سابقهم لهناك وياه جماعتهم والجماعة الثانيين المتفقين وياهم عالتسليم گايمة الدوريات محاصرتهم وكابسة عليهم كلهم كبسة وحدة وشايلتهم
ومن ضمنهم جان أرقم ..
من واصل هالحجي لعبد وشاكر راجعين ما مكملين طريقهم وضالين يفرون بأذانهم شلون صار هيج ومنو البلغ عليهم وعلسهم هالعلسة وشاكين بجماعتهم
رجعوا للشقة يتصايحون ومخابرات متوترين حيل لأن أرقم رايح بيها عبد من گاعد صافنلها گعدته متأخر وصعدتي وياه بالسيارة منين ميجيبها صايرة اني گباله
گوم وتعال للغرفة مالتي لگاني گاعدة بالزاوية اجاني استلمني تكفخ راشديات يمنى يسرى ويصيح يريدني أحجيله واني أحلف ما أدري بشي من الصار
عمه واگف برة وسامع الحجي صاح عليه من الباب
شاكر :- اكتلها عبدددد اكتلها حط طلقة براسها وذبها على عمتها ملة هالگحاب هذن
هو يصيح وعمه يصيح واني بينهم أبجي
جر مسدسه سحب أقسام ولزمني من شعري أخذني سحل بالگاع طلعني وسط صريخي..
