رواية خيط وابرة الفصل العشرون بقلم شمس العراقية
لينا ...
ـ شتگولين اله ليش شعندي وياه وتهددين حضرتج
ـ لا ما أهدد بس نافع حيل مهتم الج وأنتِ كذلك أحسج مو بس مهتمه وتخافين منه وهذا الشي مو خالي ما تعبر عليه سوالف الأخ وأخته .
ـ صفا أني ماأتهدد أكسر رأسج والله
ـ تعالي وفضيني وأتشاقه وياج شگوله يعمي تعمين عليه سمعتج من سمعتي غير أحنه صديقات
ـ أنعل هيج صداقه طايح حظها بس أشوفج الا أطيح حظج.. قفلت الخط بوجهي وهي تضحك فورت دمي كمت لبست ياربي عمي ما موجود وأروحلها وأفهم منها شقصدها أكول لنافع أنه ما أتهدد وتلوي ذراعي
طلعت لكيت نور كاعده بالمطبخ تأكل فواكهه هلاو
نور ـ هلاو عيني متغديه
ـ أي.. خالتي وين
ـ نايمه
ـ وعمي
ـ ما موجود ليش تسألين
ـ نور الله عليج أريد أروح بيت عمتي حربيه غطي وراي
ـ ماكو طلعه أنسيها
ـ گامت وهي تشيل ماعون الفواكهه أمانه نور أحلفج بغافر.. باوعتلي وخزرتني بعيونها والله خفت شبيج
ـ أكسر رأسج أذا تحلفيني بي
ـ ليش هيج عزيز! ما عرفتج تحبينه بهل السرعه
سرعة التخطي عندج فضيعه
ـ لينا سگتتي خليني محترمتج
ـ أسفه الله عليج خليني أروح عندي أمتحان والله
ـ كعدي وأقري شگو موليه الهم ما أقبل لاتحاولين
ـ الله عليج بس هالمره وعد أني بعد ما أروحلهم
ـ وتقطعين علاقتج بصفا نهائي نهائي ما مرتاحتلها طول العرس تمركص وتصور بنفسها شكلها أوفر! وتصرفاتها مو منطقيه!
ـ بلعت ريگ هاي داهيه والله لو تكشف صفا تعدمني قبل نافع هزتلي حواجبها تتوعدلي..ها نور هسه أروح
لا عليج الله وافقيى
ـ ونص ساعه وتجين يخلص وقتج أني أجيج للبيت وأطيح حظج وأغسلج غسل كدام صفا .
ـ تمام..طلعت مستعجلة وأحجي ويه نفسب من صدك أخصمها وياها وأسحب نفسي أصلاً آني ساحبة نفسي بس هي مجلبة بيّه.
طلعت أتمشى بالفرع، وبالي مشغول بصفا وبسوالفها
الجو خانگني دا أفكر شلون أخلص من هالدوخة كلها
وفجأة... صادفني أبو مسار طالع من المحل ونزلت راسي بسرعة ومشيت بس هو كأنه دا ينتظرني!
أستوقفتني نظراته! ما أعرف شلون يباوع عبالك صاحبته لو حبيبته!
ونوب يغمز ويرفعلي بحواجبه ويأشرلي بأيده بحركات معناها نتخابر! أستغفر الله هذا عقله مو براسه أبد مو طبيعي
أستعجلت بمشيتي، بس أريد أوصل والتفتت وراي وگلبي وگف من الخوف ياربي أسترني منين طلعتلي جنت خلصانه منك طول هالفترة
رجعت باوعت لگيته بعد واكف بمكانه ويضحك ونفس الحركات! أستعجلت ووصلت ودگيت الجرس وأيدي ترجف وأنفتح الباب حليم هلاو حليم
حليم ـ هلا بيج.. أتفضلي
لينا ـ دخلت بس البنات كاعده بالمطبخ يسون كبه سلمت عليهن وزهور تهلي بيه كالعاده هالبنيه شگد تنحب
زهور ـ يا هلا والله.. هسه جنت بطاريچ گلت لو تجينا لينا وصفا گالت گتلها تعالي بلكي تجي زين ما سويتي
لينا ـ وبيج أكثر وصفا وين
زينب ـ فوك بغرفتها هسه قبل لاتجين صعدت
لينا ـ ترخصت وصعدت دگيت باب غرفتها وفتحه صفنت بوجهه وهي تهلي بيه سحبتها ورديت الباب
صفا ـ شبيج تخبلتي عوفي أيدي
ـ شنو قصدج تهدديني بإبو مسار
ـ يمعوده هيج حبيت أنصب عليج وأنتِ طاگج الثول بسرعه تعبر عليج شدعوه هيج خوافه وبعدين مو ما عندج شيء ويه أبو مسار ليش خايفه من تهديدي!
ـ دفعتها بكل حيلي وأفرك بوجهي وأني أتذكر شلون يباوعلي وهي عاطت بيه لان أذيتها من دفعتها
ـ شبيج خبال مثل البغل جان كسرتيني شگو تخبلتي ما تتحملين شقه كبر لفج
ـ لا والله الكبر يلفج ويطمج ويخلصني منج أنتِ لعنه ومرض سرطان والله دواج الذبح والله.. أحجي بعصبيه ودمي محترك ما حسيت غير قفلت الباب وجرتني من شعري بقوه وخنگتني وحجت بغضب عارم
ـ شوفي لچ أني ما أتهدد لا عبالج بكلمتين تخوفيني بنافع أطيح حظج وأغسل تأريخج أذا تندگين بيه وهالمره راح أعديها الج مره لخ ما يصيرلج خير فاهمه
لا أنتِ ولا أمثالج يحجون عني ويحددون مصيري .
ـ عافتني وضليت أكح مختنگه وأباوعلها بحقد صفا مالي شغل وبعد ما عليه بيج حتى من الخط راح أطلع ولو توصل بيه أعوف حتى مدرستي بس مهم أخلص منج ساعه السوده الشفتج بيها .
ـ أنجبي وأحجي عدل وين موليه تعالي لينا أحنه صديقات والله أحبج وأعزح أوكفي خل نتفاهم لينا
ـ فتحي الباب خل أولي ومن هاللحظه لا أعرفج ولاتعرفيني عوفيني فگي ياخه عني.. فتحي الباب
ـ ما أفتحه گبل ما أتفاهم وياج
ـ عطت بيها نتفاهم بشنو صفا دخيل بختج عوفيني أولي نور تتنظرني على نار أصلاً تأخرت عليها
ـ يله روحي بعدين نحجي وأمانه لاتزعلين مني أني ما عندي غيرج أمون عليه أحنه صديقات عادي تصير هل الأشكالات بينا مو..
ـ فتحي الباب..فتحته ونزلت سريع وباوعتلها وحلفت بعد لو أشوفها تحترك ما أطفيها.. طلعت وزهور خلت ماعون گبه تسلمين
زهور ـ بالعافيه
لينا ـ توني أريد أطلع ودخل نافع شايل السويج ورفع عيونه باوعلي وصفن لثواني وحجه
نافع ـ شوگت أجيتي
ـ قبل نص ساعه
ـ لوحدج
ـ أي
ـ أمشي أوصلج ولاتجين لوحدج ميثم شنو شغله
ـ تمام طلعت وياه سيارته جانت طابگه يم الباب وناجح صاعد ليكدام
ناجح ـ ها لينا يمنا شلونج ولچ
لينا ـ زينه الحمدلله صعدت ليورا وطلعنا وصلنا الأسواق ناجح نزل
نافع ـ جگاير وياك
لينا ـ نزل ونافع باوعلي بالجامه وركز عليّ!
نافع ـ نزلي صعدي ليگدام
ـ نزلت صعدت وطلعنا وبالطريق صادفنا أبو مسار گبل رفع أيده لنافع ونافع غلس ما سلم ورجع باوعلي وگال
ـ هذا أبو مسار ما مرتاحله نظراته ما تعجب وجه الفاين شتگولين أنتِ
ـ أي بس يباوع وجهه مو راحه.. حجيت أريد أحسسه الوضع طبيعي گلشي ولا أخسر ثقته على رغم ما عندي شيء أخاف منه بس بسبب أخته گمت أخاف
ـ هو مو راحه مو راحه وما مرتاحله وحتى أنتِ گمت ما أرتاحلج ما أدري ليش گلبي گام يلعب!
ـ وأني شعليه ما ترتاحلي
ـ ما أدري أحساس لا أكثر مو
ـ أي.. بلعت ريگ وطبگ السياره ونزلت وعيونه عليه وهو مرتجي هالستيرن ليش هيج تباوع
ـ بيج شيء!صاير وياج شيء!ضامه شيء!
ـ لا شگو قابل.. شبيك نافع
ـ سلامتج يله روحي وأنتبهي لدراستج لينا
ـ أن شـاء الله ..دخلت البيت دايخه بگلامه لگيت نور وخالتي ينتظرني وخالتي شگلها معصبه گبل شالت النعال وركضت وراي ونور تصيح ومجلبه بيها
سميعه ـ أني مو نبهت عليج وحجيت وگلت صفا ما تروحيلها گلت لوما گلت ولج طايحة الحظ لازم يحط عندج گلبن حنة أختج مشكله وسونها سم علينا
لينا ـ خاله التوبه والله بعد ما أروحلها خلص والله.. نور صايره بالنص تفازع وخالتي تريد تلزمني وشمرت نعال أجه بكصتي عبالك نيشان وتحجي ودمها محترك
ـ شلون تروحين لوحدج شلون متگولليلي شعاشگه من صفا من أهمداج أنتِ وياها وجهه الوجه الذكر وأخف من الريشه أنه أدري بگلبها شناويه عليج وهي بنت حربيه عرج مهديه عرجهن عرج هجمان بيوت هذه شغلتهن يهدمن ويعمرن اليردنه تردين تجيبلي سالفه يلينا ناقصه مصايب أنه ما گافي البيه تردين تجلطيني .
نور ـ ماما خلص عوفيها عندي والله أني أحاجيها عوفيها وهذيج هي لازگتلها قابل ما تعرفين لينا.. يله فوتي داخل
لينا ـ عفتهن ودخلت لازمه مكان الضربه خرب بيومج مو أيد بشر أيد بغل شالت رأسي وأني صوجي رحت والله صوجي نوب كلام نافع عبالك شاك بشيء خرب بعقلج لينا .
كاعده أمسح مكان نعال نوب نعال حمام ودخلت نور ها
نور ـ وجعا! أمشي نافع يريدج بالأسم
لينا ـ بلعت ريگ وينه
ـ بالباب واگف ينتظرچ ما دخل.. يله أمشي
ـ طلعت وياها وهي معصبه أكثر من خالتي وخالتي ماكو يمكن دخلت تصلي رحت الباب ونور ضلت باب المطبخ شفته واكف يم السياره وصافن گلبي وگع من الخوف گبل باوعلي حس بوجودي وتقدم يمشي بثكل وصلني .
نافع ـ أمشي أصعدي بالسياره
لينا ـ ليش صاير شيء وليش أصعد بعدين والله نور وخاله ما يقبلن هسه نكتلت بنعال الحمام
ـ عندي.. يله أمشي
ـ باوعت على نور وأشرتلي وطلعت صعدت السياره ومد ظهره ليورا وسحب جنطتي وشمرها بحضني تذكرت من ناجح جان ليكدام اني صعدت ليورا ونسيت.. فززني من صفنتي .
نافع ـ صورة الشيخ شتسوي بجنطتچ .
لينا ـ يا صوره! بلعت ريگ ورفعها وخلاها بوجهي
ـ صورة أخويه حربي شتسوي بجنطتج
ـ أها الصوره أي مره من رحنا للقصر بيت جدك لكيتها هناك وشلتها وضميتها بجنطتي
ـ وليش ضميتيها عندج! شتسوين بيها
ـ شسوي بيها نافع شهل السؤال قابل أسحرله من كل عقلك تسألني هالسؤال
ـ ما أدري يجوز لان أنتِ عرجج عرج مهديه أم السحوره گلشي أتوقع منجن .
ـ لا مو لهل الدرجه صح جديتي مهديه معروفه بسحورتها بس أني ما طالعه عليها وتربيه أمي صايمه مصليه تخاف الله لا عيني شجابني على مهديه
ـ عوفي مهديه.. الصوره
ـ شبيها
ـ ليش بقيتها عندج
ـ ما بقيتها عمداً بس گتلك شفتها واكعه بالكاع وگلت خطيه يضل بالگاع زحمه وهو شيخ شلتها وضميتها
ـ أنتِ دثو لو أخو
ـ دثو شُنو
ـ هيج واحد مخبل وأهله ذابينه.. المهم الصوره عندي وشكراً لان شلتي من الكاع الج فضل علينا وعالشيخ
ـ ها فضلكم على نفسكم ما سويت شيء
ـ يله نزلي للبيت ومره لاخ لاتذبين نفسج بمشاكل أنتِ بغنا عنها أمج مره أصيله لاتجبيين أسمها بحجايات ينزلن الرأس هالمره وكعت بإيدي وسلمتي مره لاخ ما تسلمين والناس ما ترحم لينا منك وبيك يأكل لحمك وشفتي بعينج الصار وأني عادج وحده من أخواتي ديري بالج على نفسج أبويه .
ـ أن شـاء الله عيني تسلم على گلشي نافع
ـ لا تدللي
ـ نزلت وضجت حيل من الموقف الخليت نفسي بي وصاح وراي
ـ جنطتج نسيتها
ـ رجعت أخذتها صدك تعال أنت شلون تفتشها مو عيب
ـ بكيفي
ـ ضحكت ودخلت البيت ونور تنظف الطباخ مسويه حمله تنظيف شنو نور داخله دورة تعليم النظافه هم
ـ أي
ـ أي زين.. مشيت وأستغربت منها ما سألتني نافع شراد مني! يعني معقوله تكون نسته وتخطته وعادي اي ليش لان غافر حيل يحبها ويوميه يحير شيجيب الها ويونسها يمكن هو العوض من بعد نافع بس والله نافع خوش رجال يله الحياة قسمه نصيب .
لليل قريت الأمتحان أجييت أنام وصلتني رساله منها
صفا ـ أختج راح تچي تسكن يمنا معقوله ما تچين عليها لهل الدرجه هانت صداقتنا وبعتيها بهل السهوله لينا
لينا ـ تجاهلتها وأستغربت كلامها شلون تسكن يمهم وهي هناك غرفتها وكالوا يسكنون بالقصر شصار!.
___________
نور
ـ طول هالأيام اللي مرّت من عمري والعشتها ويه غافر خلتني أعتزل العالم كله وأدخل لعالمه الهادئ عالم ما بيه أذيه ، ما بيه سوالف توجع الگلب
صرت ما أهتم لأي كلام يغثني لأن أعرف زين آخر اليوم أكو حضن وكلمة منه تطيب خاطر المكسور تنسيني گلشي مر عليّ.
غافر بالنسبة إلي مو بس شخص هو الدواء اللي يداوي جروحي القديمة هو الأمان..اللي حتى على حزن والدي لحگوني بكلامهم وما سلمت منهم. وياه تعلمت شلون أتنفس من جديد.
نفتر سوا ، ونختار غرفتنا قطعة قطعة يمشي وحاضن إيدي، يحچي ويناقشني وأني ساكته وأستمعله وأحب أباوعله وأسرق نظرات وأتمعن بتفاصيل وجهه
فجأه وگف وباوعلي
غافر ـ جاي تباوعيلي بنظرات الله يسترج منها
نور ـ غير أنت خوش زلمه وشگلك يجذب النظر .. ابتسمت بوجهه وتقرب مني وتلفت يمنة ويسره
ـ أني أشتاك الچ. شلون بيچ أنتِ ما ناويه ترحمين حالي
ـ أحب أباوعلك
ـ باوعي باوعي.. ولله بس مال هسه أجعصج شو أمشي عدل لا دوخيني، ترا آني دايخ وتزيديها عليّ
ـ تمام مشيت خطوتين وسمعت صوته من وراي
ـ نور جيبي إيدج ما تفارگيني
ـ أبداً حجيتها عالسريع وكف وباوعلي بعمق
ـ نور
ـ نعم حبيبي
ـ تدريين أعشقج وأعشق هدوءج، وعنادج، وحتى سكوتج من أسولف
ـ وأني أعشق أمانك اللي يخليني أحس الدنيا بعدها بخير.
شد على إيدي ومشينا وأفترينا وأختارينا الغرفه وثبتنا على رأي واحد وكملنا مشتريات الجهاز سوا وهو هم أخذ ملابس وتشاركنا الرأي سوا وكل تفصيلة صغيرة للعرس يسألني عليها نور هاي تعجبج ونختارها سوا
رجعنا للبيت ونزلنا الأغراض وأمي جابتله ماي ودخلت الأغراض للغرفه وهو يشرب وعيونه على الإستقبال.
غافر ـ شوفيلي عمج موجود؟
نور ـ لا حبيبي اليوم بالدوام تقرب وهمس
ـ يربك... تعالي يمي ليش بعيده
ـ هسه حبيبي مديت رأسي من باب المطبخ باوعت لماما ولينا وسحبني بسرعة للإستقبال حضني من خصري، وصار وجهه قريب من وجهي كلش
ضل صافن بعيوني ثواني كأنه دا يقرا كل اللي بعيوني
وتقرب وشم خدي، وهمس بإذني .
ـ ريحتج تموت نور.. أدمنتها
ـ الرجفة عبرت بجسمي كله..وشعور الخوف ممزوج بأمان.. رفع وجهي بإيديه الأثنين وباسني من خشمي بوسات خفيفة بعدها لمس شفايفي بطرف أصابعه وگال بصوت ناصي
ـ هذن ما ألمسهن إلا من تصيرين يمي أريد أول بوسة،
وأول حضن تكون بأمان ما أريد أحد يخرب لحظه أعيشها وياج
ـ سكتت وما گدرت أرد وبقينا واكفين ثواني وصوت أنفاسه قريب، ودگات گلبه دا أحسها من خلال إيدي اللي بعدها بإيده وسحبني بهدوء وگعدنا على التخم بالإستقبال.
ـ تعالي اگعدي يمي .
ـ گعدت ولزگت كتفي بكتفه
ـ تدريين نور
ـ همم
ـ من عقدت عليج وأجيت شفتج گلت بگلبي هاي تريد واحد يحضن وجعها قبل فرحها وأني من يومها نويت أكون هذا الواحد.
ـ حط راسه على راسي وگال
ـ أريد من أرجع تعبان من الدوام أرجع للبيت وألگاج كاعدة تنتظريني أريد نتعارك على أتفه سبب، ونتصالح سوا وزعلنا ما ينام الليل وأريد أنام وإيدي بإيدج، وأگعد الصبح على صوتج..
ـ ضحكت ودمعة فرح لمعت بعيني تمام وأني أريد من أضوج ألگاك أول واحد يمسح على راسي وأريد من أطبخ وأحرك الأكل تضحك عليّ وتاكل وتگول أطيب أكل
أريد نصلي سوا، ونفتر سوا، ونشيب سوا وگل أيامنا نعيشها سوا
سكت شوية وبعدين باوعلي وضحك
ـ شاطرة والله جاي ترسمين مستقبلنا وأحنه غرفتنا لحد الان ما جابينها.
ـ غير أنت اللي خليتني أحلم.. مد إيده وعدّل خصلة شعر وگعت على وجهي .
ـ هذا حقج ومطلبج حبيبي وأنتِ أحلمي وأني أحققلج
ـ حضني وضمني لصدره وهمست الله لا يحرمني منك غافر .
ـ ولا منچ
ـ فزينا على صوت أمي
ـ نور ماما
ـ هو عدل كعدته وكح وأني گمت عليها ها ماما
سميعه ـ تعالي ضيفي شيء بطرك كلاص المي .
ـ أني كافي عليه ضحكت وكفختني ودخلت عليه بيدها صينية الفواكهه ومشيت وراها كعدت بصفه أكشرله وأنطي وهو يسولف ويه أمي لما قرر يروح وگمت وصلته للباب .
ـ الصبح أحتمال أمرلج أمي تريد شغلات للبيت وگتلها أخذي نور وياج لان البيت بيتج وأنتِ وياها أعرف شنو يحتاج البيت من نواقص .
ـ تمام حبيبي تدلل أنت وخاله
ـ فدوه لوجهج.. يله دخلي حبيبي .
ـ الله وياك.. رجعت وكعدنا أني وأمي ولينا نشوف الجهاز ورتبناه بالجنط
سميعه ـ من يجيبون الغرفه نروح نرتبه الج
نور ـ تمام.. كملنا ورحت نمت وثاني يوم أفتريت ويه خالتي أخذنا كل نقوصات البيت وبعدها أمي راحت السوك وجابت هدايا لـ لبنى لان السبعه مالتها باجر عرفنا جايه هنا بيت عمي مشعان رغم هي هناك بس ما أدري شصار وليش رجعت ولا لبنى حجتلنا .
تحضرنا وجارات أمي هم تحضرن يروحون عليها گالن عالعصر وأمي أخذتلها ثلاجه وشاشة بلازما وأوتي هو ومسطبه مالته وصوبه كهربائيه وأخذتلها كلاده ذهب حلوه وفخمه وشغلات ونواعم هواي مأخذتلها حتى سيتات نوم لان دگول جهازها ما عاجبني خالتي نهاوند مسولفه الها گايلتها جهازها ما يترس العين وهي جنة مشعان العين عليها عاد أمي ما قصرت وياها گومه أخذنا إلها ملابس عالموديل على ذوقي وذوق أمي الحلو وحبيت هالجانب من أمي .. وصلنا البيت وكعدت تفتح الأكياس وتصفط ولينا تباوع علينا وصافنه شبيج
لينا ـ لا هيج بس خاله
سميعه ـ شبيج تبتسسين خيرج أحجي
ـ مصدومه بيج وبكرمج هذا
ـ خايبه ما تنجبين كرمي من جيبي غير راتب أبوجن وأمجن هذا حقجن يمه وأني هم وراي گبر وحساب وكتاب وراتب أبوجن المن شو راح أضل بس بطركج وبطرك ميثم كافي علينا وزايد وخليني هسه أخذ هدايا لأخواتج وأختج لبنى عند عمتها وأني أكثر وحده تعرفهن .
ـ رحمه الله والديج وأسم الله على عمرج خاله الله يخليج ويخليني وأشبعج مغثه
ـ كفختها وشكلهن يضحك ساعه أصحاب ساعه أعداء ما ينحرزن.. وتحضرنا وأمي تتخابر هي وخالاتي وعلى أساس العصر نروح بس گايلين لا الصبح عالغده هما هيج العاده عدهم لازم غده لأهل العروس .
ومن الصبح كعدنا وتحضرنا وخالتي صبيحه أجتنا تروح ويانا وشايله علبه لونها أحمر .
صبيحه ـ نور يمه خلي هاي بجنطتج.
نور ـ أي خاله طلعت قطعة ذهب وضميتها يمي وكشخت أني ولينا.. وأمي وخالتي واكفات يحجن علمود السياره تشيل الثلاجه والبلازما والصوبه وباقي الهدايا..
ميثم ـ ماما خوما تتأخرون والغده شلون
سميعه ـ شعليك من عدنا يا ماما والغده طبخته الك من يجي عمك صبوا وأكلوا .
نور ـ ميثم هاك عشره أشتري بيها بس توعدني ما تطلع من البيت الا نجي
ميثم ـ سويها حمره وانطيج وعد عمر كله ما اطلع من البيت
ـ هاك تدلل اشتري بيهن وارجع ما اوصيك بعد
ـ تدللين
لينا ـ ضملي مو تأكلهن كلهن
ـ ميخالف أعوفلج أندومي
ـ عابت ما أريد هسه خالتي تنطيني بحالك ابو فليس
نور ـ تلاغت هي وياه وأمي سكتتها وخلت بيدها ٢٥ وكامت تهز بحواجبها كدامه فرحانه بيها..وأجه غافر وصعد الأغراض وطلعنا وياه وكعدن ليورا وأني كعدني بالصدر ووصلنا البيت وسيارتهم طابگه يم الباب وكومه جهال بالباب يمكن خالتي نهاوند يمهم ودگ هورن وطلع نافع رافع ردانه ويصييح عليهم ومخبوص
نافع ـ أمشوا لأهلكم يله ترا ما عندي عرس عمي مو عرس فضحتوني بالمنطقه شنهي بيت گاوليه شو أمشوا لبيوتكم .
غافر ـ لك عوفوهم جهال خطيه
ـ هذول خطيه..أنه الخطيه رأسي صار مرگه من وراهم يله يابه أتفضلوا أتفضلوا .ها عميمه الهدايا هذن كلهن الج
سميعه ـ أي يبعد عمتك
نافع ـ خوش هدايا دسمه وثكيله هذن اليه مو
سميعه ـ أي يبعد عمتك چا شلون..أنت من تتزوج تدلل أشلع الك عيوني .
نافع ـ أريدج سالمه عميمه ما تقصرين والله..وأنتِ عمه شو أيد ورا وأيد كدام تملصتي منها عيني غافر الما جايب هديه يرجع يجيب هيج الأوصول ومن تتزوج نرجعهم الكم على أقل جان جبتوا بطانيه أم النمر .
صبيحه ـ فلا تبطل سوالفك عود نجيبلك من تتزوج
نافع ـ ما تقصرون يا الف هلا بيكم يا هلا بعماتي يا هلا بالحيايا والعرابيد
نور ـ خربنا ضحك وحضن عماته وواكف يسولف وياهن يم الباب وأجه عمي مشعان ويضحكون على سوالفه ونزلت وغافر فتح الصندوك ونزل الأغراض خلاهن بالباب ولينا طفرت عيونها تدور على لبنى..
ودخلنا وراهم وطلعت لبنى كاشخه وأمي تقربت عليها ولبنى گبل حضنتها بحضن دافي
نافع ـ صدك جذب گاتليج لازمين الج العصا لزمتيها دك أحضان وبواچي شسالفه لبنى فشلتينا .
نور ـ ولا يبطل سوالفه هههه ودخلوا الزلم الأستقبال وباوستها مبروك يعروس شطالعه تخبلين
لبنى ـ فدوه لگلبج..لينا حبيبتي أمي أنتِ يمه بنيتي
نور ـ بجتنا من حضنتها ولينا تشهك وتبجي صوتها يفطر الگلب وأمي سگتتها ودخلنا البيت وتلكتنا خالاتي نهاوند ولميعه سلمنا ودخلنا على حبوبه تهلي وترحب بينا ..
الحجيه عطايات ـ يا كُل هلا يا كُل هلا..
نور ـ هلا بيج حبوبه كعدنا وأجتي عمتي حربيه بس سلمت على خالتي صبيحه وأحنه عبرتنا بدون سلام أمي سگتت وحبوبه هزت رأسها بقهر .
والبنات كلهن أجن سلمن وزهور كعدت بصفي وتسألني على جهازي شگد گلبها طيب
زهور ـ البارحه جنت بطاريج وردت أحد يجيبني أشوف جهازج بس الولد طالعين ومخبوصين والله أعذريني جان أجيتج والله أنتِ عزيزه عليه .
نور ـ فدوه لگلبج بس كلامج كافي كعدت يمنا وشوي وگامت هي لازمه المطبخ ويه خالاتي واجتي خالتي لميعه وكعدنا نسولف وتسألني
لميعه ـ شوكت عرسج
نور ـ بعد ما محددين والله بس عن قريب
ـ الله يسعدج فدوه لوجهج
ـ باستني وكعدنا خوش كعده ولبنى كاعده ومبتسمه وخجلانه ورادت تكوم تساعدهن بس حبوبه ما خلتها تكوم وأجه باقر وسلم علينا
باقر ـ يا هلا بعماتي جيتجن عزيزه عليه .
سميعه ـ بالمهلي يعين عمتك أمك شو ماكو ما شفتها
باقر ـ والله موجوده جانت تعزل وترتب بغرفتي هسه تجي
لبنى ـ كملنا أني وياها بس دخلت الحمام تسبح.
نور ـ ترخص وگام يم الزلم وأجتي عمتي وهبيه سلمت علينا وكعدت بصف لبنى ويسولفن بينهن يمكن ناقلين غراضها لان هي هالأيام أجتي هنا .
وضلينا كاعدين وصار وگت الغده وصبوا والزلم وحد والنسوان وحد أني كعدت بصف خالتي وتجيب وتخلي كدامي..
صبيحه ـ أكلي يصير بيج لحمه وراج عرس وبدله ضعغتي فدنوب.. هاج أكلي مو بس تنكمشين
نور ـ تسلمين عيني خاله وأكلت والأكل جان طيب كلش
وكملنا وكعدنا نشرب الچاي وطولت الكعده وكمنا بغرفتها حيل حلوه ومرتبه .
لينا ـ يعني صار عندج غرفتين
لبنى ـ أي وحده هنا ووحده بالقصر
سميعه ـ ليش ما فهمتي عرفتي شنو السبب مو على أساس من الأول هنا تسكنيين
لبنى ـ سالفة طويله خاله بعدين أحجيها الج
نور ـ حسيتها ما تريد تحجي أو أحد يسمع وأمي ما لحت عليها وجان باقي عدها اغراض ما مرتبه كعدنا رتبنا وياها وضلينا بغرفتها وأمي لبنى فرشتلها بالكاع وتمددت وأني وأخواتي كعدنا نسولف ونتحضر لان السبعه العصر تبلش والنسوان جوارينهم وجوارينه كلها تجي العصريات..
للعصر تحضرنا ولبنى هم كشخت وسرحت الها شعرها
وميگجت الها وكملنا والعرفته الزلم طلعوا والأستقبال فرغ وطلعنا كلهن كاشخات وعمتي حربيه تحچي على زهور
حربيه ـ ما تفوتين تكشخين أخوج مو جابلج كلابيه شحلاتها فوتي لبسيها بلكي وحده تشوفج وتأخذج أهمداج ربعج والأصغر منجن تزوجن وأنتِ مكابلتني
نور ـ زهور باوعتلي دنگت رأسها وعمتي أندارت شافتنا وصدت وجهه ودخلت الأستقبال ودخلنا وبلشن النسوان يجن ومباركات وهدايا لما فضت وكمنا وأمي توصي بيها ولبنى تهز برأسها .
وگفنا بالحوش وخابرت على غافر صوت زلم وهوسه جاوبني ها عيني وين أنت .
غافر ـ ها حبيبي بالبيت الغرفه وصلت والله وجاي نشدها ما تكدرون تتنظرون بس المشكله أخاف اتأخر
ـ ها كيفك عادي نتمشى
ـ لا لا هسه أدزلكم نافع.. نافع نافع
ـ قطع الخط يمكن نافع موجود يمه.. وكعدنا بالحديقه ننتظر وأجه نافع وعمتي حربيه هزتله رأسه ما راضيه وحجت بصوت مسموع
حربيه ـ نوب عليه تشتغل الهن سايق
نافع ـ يمه صوتچ.. يله عماتي أوصجلن لان غافر الغرفه وصلت ما يكدر يعوفهم ويچي .
صبيحه ـ يمه وصلت غرفته سوده عليه ماكو وحده هلهلت اله .
نافع ـ أي قبل نص ساعه وصلت .
الحجيه عطايات ـ من يگملونها شد باليل نجيج نشوفها وأخواتج يهلهلن تدللي يا أم غافر .
صبيحه ـ ما تقصرن يمه.. يله نور گومي
نور ـ أي خاله ودعنا لبنى وخالتي أنطتها هديتها قطعه الذهب وطلعنا بسيارته وبالطريق غافر خابر عليه
نافع ـ بعد شنو محتاج بس هذن يله هسه أوصلهن وأجيبهن وأجي تذكر خاف محتاج شيء مو ارجع وترجعني نوب ماشي عيني أدلل.
نور ـ طبگت سيارته ونزلنا وخالتي صبيحه راحت وياه دخلت البيت وأتصلت عليه ها حبيبي محتاج شي
غافر ـ لا حبيبي ما محتاج غير صوتج
ـ تعبان
ـ فدوه الج أحلى تعب غير هاي غرفتنا
ـ من تكملها دزلي صورها
ـ ليش صورها أجيبج تشوفينها بالواقع
ـ وعمي خاف ما يقبل
ـ أدز عليه نافع ويخلصني منه .
ـ تمام حبيبي أنتظرك...غيرت ملابسي وسويت العشه مخلمه علمتني عليها لبنى سهله ما تكلف.. ورن موبايلي غافر ها حبيبي .
ـ حبيبي راح أجي أخذج علمود تشوفين الغرفه
ـ تعال ما عندي شيء.. صدك تعشيت
ـ لا والله نافع جاب عشه للعمال بس من فرحتي نفسي مسدوده بعدين أتعشى
ـ سويت عشه أجيبلك وياي
ـ أي خليني أشوف طبخج مو بس صور وتشهيني
ـ ههه تمام تدلل.. يله أروح اتحضر بينما تجي
ـ تمام
ـ عالسريع أخذتله من العشه ولبست ورتبت نفسي وشافتني أمي ماما غافر يجي يأخذني أشوف الغرفه عادي أروح
ـ روحي ماما بس لاتتأخرين
ـ ماشي شلت جنطتي والعشه وطلعت لكيته توه واصل وصعدت ووصلنا ويسولفلي متحمس أكثر مني وشفت شحاطات يم الباب منو يمكم .
ـ خوالي.. جديتي وخالاتي ونافع!
ـ ها تمام.. دخلت وياه وكلهم جانوا بالغرفه غافر دخل قبلي وأني وراه سلمت وردوا السلام ونافع صار مقابيلي وأجتي عينه بعيني وركز على الحافظه البيدي!البيها العشه
الحجيه عطايات ـ مبارك يحبوبه شايفيين خيرها
غافر ـ الله يبارك بعمرج جده .
نور ـ وگفت بصف غافر ويحجون وخالتي نهاوند تفحص الكنتور وشاف اليده مال الباب ما مشدوده
نهاوند ـ هاي ناسينها يمكن
غافر ـ أي ما ضبطت گال باجر الصبح يجي يسويها
نهاوند ـ خوش غرفه تگمه عجبني ذوقك
نافع ـ أسألها أم الذوق هاي درجة أولى بگلشي .
نهاوند ـ أعجبك ولك
نور ـ ضحكوا وغافر يحجي هو وخالتي نهاوند منطيني ظهره وحبوبه وخالتي صبيحه يحجن عالعرس وأني واكفه ونافع مقابيلي أيده بجيبوبه رفع رأسه وجر حسره ويباوعلي ويرجع يباوع للكاع ويصفن عالأخشاب قطعه قطعه.. طلعت للمطبخ خليت الحافظه عالكاونتر ورجعت باوعت على غافر باوعلي وأبتسم ورديت الأبتسامه
غافر ـ ها عجبتج.. تعالي شوفي الكنتور
نور ـ أي كلش عاشت أيدك مشيت وياه ونباوع أني وياه وهما طلعوا ونافع قبل لايطلع من الغرفه باوعلنا وگال
نافع ـ غافر لاتنسى الكنتور أكد عليهم أذا ما يشتغلونه الك هسه بعد ما يشتغلونه .
غافر ـ أن شـاء الله حبيبي ما قصرت تعبتك وياي أخدمك بيوم عرسك
نافع ـ غصباً عليه غير أخوي أخدمك بماي عيوني وتستاهل وشايفين خيرها حبيبي يله أني اروح تحتاج شيء خابرني .
غافر ـ سلامتك .
نور ـ طلع وياه يوصله للباب.. وفتحت الأبواب وأشوفها جبيره وحيل حلوه بس يحتاج الها تنظيف وأفتر بيها وأجه غافر باوعلي بلهفه وتقرب حضني وباسني من كصتي وخشمه على خشمي وحجه بلهفه
ـ أشتاقيت أشتاقيت
ـ خاله خاف تجي
ـ لا خاله عدها أهم شيء راحة أبنها وأذا تجي حلالي
ـ نزلت رأسي مستحيه منه وسحبني من أيدي وحضني كدام المرايا وصافنين على شكلنا
ـ كلها أيام وتنورينها
صبيحه ـ غافر يمه
نور ـ گبل أبتعد وطلع الها عدلت شالي ولحگته المطبخ ولكيتها مطلعه المخلمه تحميها اله
صبيحه ـ هاي يمكن خالتك جايبتها الك راح أحميها تتعشى بيها سوده عليه على غده الظهر
غافر ـ لا مو خالتي هاي مرتي جابتلي عشه
صبيحه ـ نور.. تعرفين تطبخين
نور ـ أي بس مو كلش جاي أتعلم
ـ أي هاج أحميها وعشي رجلج
ـ تمام أخذتها وحميتها وطلعت خضره وبيبسي باقي من العشه رتبت صينيه وأخذتها اله كعد يتعشى ورحت سويت الچاي .
صبيحه ـ دتعالي شيلي الصينيه بعدين جيبي الچاي
نور ـ أي خاله هسه.. شلتها وخليتها عالسنك باوعت ما ضل وگت وصبيتله جاي وقدمتله الگوب وخالتي باوعتلي .
ـ بعدج ما تعرفين مالات الأوادم
ـ شــنو خاله
ـ هيج.. غافر يمه گوم وصلها خاف عمها يضل يحجي
ـ گامت للمطبخ شفتها وگفت تغسل المواعين غافر ضل ساكت وأني ضليت ساكته ويشرب چاي ويباوعلي غافر توديني تأخرت
ـ لاتضوجين أمي طيبه وتحبچ وباجر من تصيرين مرتي راح تحبج أكثر مني .
ـ لا عادي.
ـ يله گومي أوصلج .
ـ يله خاله تصبحين على خير
ـ الله وياج
ـ طلعت أمشي ورا وبالي مشغول أشسويت وضاجت مني وتذكرت بس لا علمود المواعين خرب والله لان ما ضل وگت .. وصلني تصبح على خير .
ـ وأنتِ بالف خير حبيبتي .
ـ نزلت وهو راح الله وياه.. ولكيت أهلي كاعدين مسوين كعده حلوه ولينا متعاركه هي وميثم عالجبس وأمي تصييح ضحكت عليهم ودخلت غرفتي..
ومر كم يوم وكملنا كل شغلنا حدووا موعد العرس واتفق هو وعمي لان ما يريد الموعد يتأخر على أساس يسويلي حنه بالقاعه بس ماما ما قبلت كالتله بس العرس بالقاعه والحنه بالبيت واني هم أشوف هيج أحسن من المصاريف زايده .
اليوم الحنه مالتي ومن الصبح البنيه أجتي هي والكادر نصبت الكوشه طلعت تخبل وأمي دفعت الفلوس ما قبلت غافر يدفع وتعاندوا هو وياها وهي قفلت الا هي تدفع وتقرب حضنها ويبوس بيها وصفن عليه وضحك
غافر ـ حضري روحج أخذج الصالون .
نور ـ تمام حبيبي وتحضرت ولينا وياي وتمنيت لبنى تجي ويانا بس أمي گالت مخابرتها ويه حمواتها تروح
وتشتغل لي وجان تدخل علينا لبنى لك هلا شجابج
لبنى ـ باقر جابني .
لينا ـ والله گلت اذا ما أجتي أزعل عليج زعله شگدها شگبرها تفضلين حمواتج على أخواتج ها .
ـ لا ولج بس هنا أتفقن وگالن تعاي ويانا والصراحه ما ردت أروح لان هوسه وبنات عمي محمود عاد گلت لباقر گبل جابني فدوه لعيونه .
ـ ها فدوه لعيونه وأني
ـ يمه تغااار تغااار أنتِ بنتي مكانج محد يأخذه
نور ـ وبلشنا مكياج وتسريحه وتونسنا وگملنا وناجح أجه أخذنا عمي محمود دازه لان غافر عنده شغل وصلنا والبيت مالتنا مليان كلها چايه وتلگتني أمي فدوه رحتلج ماما.. وخالتي نهاوند أول ما نزلت طشت
عليه الجگليت وتهلهل هي وخالتي لميعه
أباوع الكل موجود وكلهن كاشخات وعيوني تدور على أمي ودمعت عيوني هبت عليه ريحة أبوي حيل أستفقده بلحظات فرحي.. الله يرحمك حبيبي
.. وشوي شوي الناس صارت تجي من نسوان وبنات جوارينه وعمات غافر وبنات عماته من عمام أبوه دخلن وأمي وخالاتي وحبوبه أستقبلنهن ورحبن بيهن وأجن باركن اليه وكعدن بصف حبوبه ..
وأشتغلت الأغاني وتحضرن البنات أخوات نافع وبنات عمي محمود وكم بنيه من بنات عماته
وصفا ونورس توسطن وبلشن يركصن وحركات وشعر
ذبن لحم بس ما عجبتني نورس من تركص تتقرب مني وتهز بجسمها باوعت لأمي وأمي تهز برأسها ونوب تجي صفا عبالك يعاندن واجتهن زهور تصفك وتدفع بيهن وتضحك كأنما حست بحركاتهن .
تجاهلت وعشت فرحتي بحنتي وأباوع على أخواتي لينا بس مهمتها التصوير ولينى بصف خالتي وهبيه ولبنى تسولف وخالتي تباوع على حلگها..
نور ـ أمي وخالتي حضرن الذهب ينتظرن غافر يجي ويلبسني ولبنى ولينا راحن المطبخ يحضرن الضيافه ولبنى تفتر وأباوع عليها طالعه شخصيه حيل كشختها مميزه من دونهم عبالك شيخه فدوه لطولها ..
وصفا شغلت أغنيه لساجده عبيد وگامن يرددن وراها ونورس صوتها واضح وتردد وتباوعلي وياها صفا
صفا ـ لاتحجي وياي وتشمت عداي ... أيوا أيوا
نور ـ تجاهلتهن وأخذت موبايلي من لبنى غافر يتصل هلا حبيبي .
غافر ـ ها حبيبي شوية نوب وأجي هوسه يمج لازم بلشت الحفله
ـ أي من زمان بس ناقصتك
ـ جايج حبيبي جايج .
ـ هلا بيك حبيبي.. أخذت الموبايل وطلبن مني أركص ما قبلت أبد لحت عليه بس رفضت رفض قاطع
نورس ـ خوما يوميه تتزوجين حرامات تتندمين گومي ويانا يله .
نور ـ لا خليني كاعده مرتاحه وغافر هسه يچي وما أحب الرگص أركصن أنتن رگصجن يخبل.. سگتت وراحت وبعدها أبد ما ركصت وگفت عالصفحه والبنات طلبن منها بوزت ما أعرف شجاها
.. وسمعت صوت هلاهل لخالتي نهاوند وصوتها يتردد بكل زاوية بالبيت أحسسها أكثر واحدة فرحانه دخلت وهي تطش الجكليت وتهلهل خالتي صبيحه تقدمت وحضنته وبوسته وحبوبة تباوعله بابتسامة رضا.
بين الهوسه هو وأكف ويباوعلي بضحكة هادئة، وكأنما الناس كلها أختفت وبقيت بس أني التفت عليّ بنظرات حب ولهفة تقدم بخطوات واثقة، وگمت أنا استقبله. ومن وصلني سكت الكل صار هدوء مفاجئ بالرغم من صوت الأغاني .
سكت للحظة، عيونه تجولت بملامحي يتأمل كأنه يحاول يحفظ تفاصيلي بذاكرته بعدها مد إيده بحنان باسني من كصتي، وحضن جف أيدي وهمس بحب
غافر ـ أجيتج ومستعد أگابل الدنيا كلها بصفچ
نور ـ جاوبته بخجل هلا بيك.. تقرب أكثر وهو يتأملني ويتمعن بشگلي وملامحي .
غافر ـ دخيل أبو الحسنين تردين تجلطيني بجمالج شطالعة أنتِ گمر ويضوي.. هلال العيد خرب بروح عمامج تگطعين النفس بويه شگد حلوة مريتي
ـ نزلت راسي وأنا أحس بحرارة الخجل تصعد لوجهي. گعد بصفي وأيده حاضنه جف أيدي وبلشت فقرة الذهب لبسني وخالتي وأمي ينطنه وهو يلبسني ولينا تصورنا وبعدها أخذنا صور وما طول عالكد لبس ذهب والصور وطلع.. ورجعت أستمرت الحفله
.. مر الوقت وخلصت الحفله وگمت للغرفه غيرت بدلتي بفستان مرتب وحلو.
وطلعت وكلها مشت ضلن بس بنات خالي مشعان وعمتي حربيه كاعده هي وحبوبه وخالاتي بالاستقبال
وبنات خالتي نهاوند وعمي محمود ..
دخلت المطبخ أدور على لينا أريد أشوف الصور بموبايلها وسمعتهن يحجن بينهم .
زينب ـ ومنين سمعتهن هالحچي شو أنه مو بالبيت ما سمعت ولا أحد جايب طاري الخطبه
صفا ـ لا حبيبتي أنتِ عايشه بعالم الموزاي غير صار شهر مخلينها أبالهم بس ينتظرون نافع وهسه أجه الوقت المناسب قابل الأفراح بس الهن أحنه هم من حقنا يصير عدنا فرحه وعرس .
زهور ـ لأتضلن تصفطن بكيفجن نافع ما يعرف بهالحجي
ضمياء ـ لا صدك حچيها حبوبه كالت نخطبلها هالأسبوع حضري نفسج جنتنا .
نورس ـ يله أمشن هسه عمتي حربيه تسأل علينا
نور ـ توني أريد أرجع وصارت بوجهي أبتسمت وعبرتني وهي تضحك وتسولف وياهن وزهور تتهرب مني ولحگتهن وأبتسمت بداخلي گلت تستاهل نافع الله يسعدك من حقك تتزوج وتشوف حياتك تستاهل .
رجعت كعدت يمهن وعمتي وجهت الكلام الهن
حربيه ـ خابري على واحد من أخوانج يجون تأخرنا يله كافي بعد وراجن باجر .
صفا ـ خابرت نافع بالطريق هسه يجي .
نور ـ تحضرن يمشن وأمي وجهه أنگلب وخالاتي وحبوبه ما أعرف شحجن وياها ويوصن بيها ويباعن على نورس وأمي تهز برأسها وهي ساكته .
وبالطرمه واكفه بصف أمي وأنفتح الباب دخل نافع من بعيد صاحلهن ودخلت الأستقبال وباركلي وراحن ولبنى ضلت يمنا خطيه ما قصرت لملمت الهوسه ويه أمي
بس أمي ما عجبتني لما أجه عمي دخل بالأستقبال وگف يحجي ويه أمي .
محمود ـ أكيد گالن الچ
سميعه ـ أي گالن
ـ خوما عندج أعتراض على جيتهن
ـ لا وأنت مقرر ومبلغ أختك وأهلك بعد على شنو أعترض .
ـ أي قررت لان مشلوع گلبي مقسمين نصين بين البيتين وضعي مخربط وحربيه ما مقصره وياهن بس هم كافي والبيت صاحبه يريدني أفرغه وبالمنطقه ماكو أيجار قريب على بيت مشعان
ـ هذا هو التشوفه
ـ أي وأني من زمان ردت أجيبهن يمج بس گلت خاف ما يتوالمن ويه نور وبنتج وكحه عاد هي راح تمشي لبيت رجلها .
ـ شعجب بس بنتي الوكحه ششفت عليها يمه
ـ ما تحترم ولسانها طويل ما عدنا بنات بصلافتها وعرامتها.. مو هنا موضوعنا يله رايح أجيبهن وأجي فرغي الهن غرفه من الغرف وأذا غرفتج بعد أحسن ششايف منج أني .
ـ موجوده غرفتهن يكعدن بغرفه لينا ولينا تأخذ غرفة أختها وغرفتي محد يأخذها وما تشوف شيء مني لاتتأمل
ـ ما متأمل ديله عاد من حورج .
نور ـ طلع يفر بالسويج وأمي باوعتلي يسگنن أهنا
سميعه ـ أي
ـ وافقتي
ـ چا شسوي وطول الحفله يقنعن بيه بس لو يموت ما يصيرلي رجال وخل يجيب بناته أتحمل گلشي الا هو أموت ولا هو .
ـ تحجي وهي كارهته دخلت عصبيه ومزعوجه وحاجت لينا وفرغت الغرفه وجابت غراضها خلتهن بغرفتي بقيت ساكته ما حجيت لان ماما مقتنعه وراضيه بجييتهن .
لينا ـ هذا باع البيت ولغف فلوسه على سوالفه وما بي حيل أيجارات وگالك بيت جبير وأبلاش على شنو أدفع أيجارات وهم يخلص من همهن وأكيد عمتي حربيه طفح الكيل وطگتها بوجهه وهم تخبث علينا وتخرب راحتنا دزتلنا بناته .
نور ـ أمي مـا حچت بس نظفت الغرفه ولينا ولبنى كعدن يرتبن غراض لينا وأصلاً كنتوري فرغ وملابسي وأغراضي كلهن راحن لغرفتي أمي وأخواتي رتبتهن
تأخر الوقت ودخلت سبحت وتعشينا ونظفنا البيت وكملنا ولبنى لبست باقر أجه أخذها وراحت..ودخل عمي محمود شايل جنط خلاهن وراه بنات سبأ نبأ نورس أخر وحده تجر بروحها گالبه خلقتها هي وسبأ عكس نبأ وجهه يضحك .
دخلن الغرفه ونورس صوتها عالي هي وعمي محمود
باوعت لأمي منو الوكحه أنه لو بنته
سميعه ـ أمشي يمه أمشي نامي يمي اليوم .
نورس ـ جبتني على عمى عيوني ويم منو يم مرتك وبناتها
محمود ـ خالتج نورس بابا خالتج
ـ يا خاله تحجي عنها وين أكو خاله ترضى على نفسها تأخذ رجل أختها شنو من نفس نفسها بس حقيرات هي وبنتها بواكات الزلم
ـ نورس بابا لاتتخبلين عيب بابا وخالتج ما دزت عليه الزواج صار علمود المشاكل الصارت والبيت أيجار وعمتج ما مجبوره بيجن وبيتها صار بي جنه مو مثل قبل وأنتِ باجر عكبه تتزوجين ويضلن أخواتج لوحدهن وهذا بيت عمج وخالتج يعني مو بيت غريب.. كافي بابا أحشمي نفسج وأحترمي ترا صابر وساكتلج لان ما أريد أقهرج وأكسر خاطرج .
ـ لو شايل هم لخاطري جان ما تزوجت وفرطت بمكان أمي ولو أنت من زمان فرطت بيها قابل جديده عليك
ـ مكان أمج محد يأخذه لا خالتج ولا غيرها.. يله گافي باوعي على أخواتج وعقلي عليهن وگبري عقلج بابا أنتِ أختهن الجبيره لاتشلعين گلبي .
نور ـ عفتهن ودخلت يم أمي هاي شبيها من كل عقلها قحط عليج وعلى أبوچ فواكاها يعني.. ونمت بحضن أمي وهي تحجيلي وتعلمني وتنصحني لما غفيت..
ثاني يوم العرس من الصبح أجه غافر أخذني أني وأخواتي وخالتي نهاوند من الصبح أجتنا ورحنا لصالون وهنا قبلنا راحن ناجح أجه أخذهن .
كملنا باوعت على نفسي بالمرايا وصفنت على شگلي بالبدله البيضه على مكياجي وتسريحتي وأتمعن بشكلي ودمعت عيوني وأبتسمت ولبنى أجتي ساعدتني هي ولينا وخالتي طلعني لبرا نروح البيت
بس الما متوقعته نافع اليأخذنا لا مستحيل كل ظني ناجح وهو يضل يم غافر يساعده شجابك نافع .
طلعنا وشغل السياره وطبگها باب الصالون مُباشرةً ونزل لابس أسود بإسود ولابس نظارات وفتح الباب ولينا ولبنى ساعدني وصعدت ولينا وخالتي نهاوند بصفي ولبنى صعدت ليكدام ..
شغل السياره وطلعنا وأني طول الطريق متوتره وغافر أتصل وجاوبته هلا عيني .
غافر ـ ها حبيبي طلعتوا
نور ـ أي بالطريق
ـ ماشي حبيبتي نتخابر
ـ تمام..طول الطريق صمت وهدوء ولينا تباوعلي وترجع تباوع لنافع صديت وجهي لشارع لما وصلني ودگ هورن قوي وميثم فتحلنا الباب وطبگها بالطرمه
ونزل بإيده فتحلي الباب وخالتي ساعدتني لان بدلتي ضخمه حيــل.. وحبوبه طشت الجگليت وتهلهل وتبچي .
الحجيه عطايات ـ يغافر يجده شايف خيرها ومستاهلها
نور ـ دخلت الأستقبال كلهن موجودات وشفت أمي اجتي حضنتني تبوس بيه وتبچي وخالتي نهاوند تسكت بيها وگمت أبجي عليها ولبنى أجتي مسحت دموعي وگعدت وكلهن كاشخات والبيت مليان..
مر الوقت وعلى أتصال وياه وسمعنا هورنات السيارات وصل ودگات گلبي صارت بكل سرعتها وعبرتي ترست صدري أمي ملخت نفسها لزمت أيدها هي تبجي واني أبجي بالگوه خالاتي سگتنها وگامت تهلهل وياهن..
ودخل غافر وعيونه تلمع بالفرح وبصفه نافع وباقر وناجح وعمي مشعان وعمي محمود وتقرب باس أمي من رأسها وتقرب بصفي لزم أيدي وهلاهل وطش الجگليت وطلعنا من الأستقبال بالهواسات مالت حبوبه
وبالطرمه قبل لانصعد السياره دخلت فرقة طبل وهوسات نافع يرفع بإيده الهم معناها علوا الصوت
بعد بعد وتقدم فتح باب سيارته وجگارته بحلگه وطلع الرشاش ورفعها لسما وگام يضرب بيها بكل قوته وگال بصوت مسموع!
نافع ـ الخوه اليوم تبين واليتگتر مو وفاي.الضيم نعوفه ويومك نفرح بي..وضلع من ضلوعي اليوم معرس
نور ـ وحبوبه تصييح عليه وعمي مشعان گال
مشعان ـ عوفي أخو وصاحبه وفرحان اله عوفي .
نور ـ وصعدني بسيارة غافر بالصدر هو اليسوق لوحدنا
وكلهن طلعن توجهن عالسيارات وأمي حاضنه أيدي وتوصي بغافر .
غافر ـ لما أبن أختج وقريب عليج على شنو توصيني يا خاله صدك جذب أزعل منج والله .
سميعه ـ هاي رويحتي وخليتها بأيدك وخالتك مهضومه وطلعت من الدنيا بس بنور دير بالك عليها .
غافر ـ أحطها بعيوني عيوني خاله .
نور ـ أبتسملي وحضن أيدي بحنيه ودعت أمي وميثم رفعلي أيده وبوسات فدوه لوجهك.. وطلعنا من بيت أبويه يا بعد كل البيوت اليوم بنتك تزوجت بابا حبيبي
طلعنا أول الناس ورانا سيارات الزفه ورفع أيدي وباسها بحنيه وشغل الأغاني وعبرت من يمنا سيارة نافع ماكو أحد وياه بس ناجح والمصور ..
وصلنا الأستديو أخذنا جلسة تصوير وبعدها للقاعه
وتوترت وحضن أيدي بحنيه برطمت وهو مبتسم
غافر ـ شبيج حبيبي تبجين وأني يمج أوفا
نور ـ لاتعوفني تبقى يمي
ـ وين أعوفج غير ما مصدك صرتي الي لاتخافين حبيبي أني أمانچ مو خوفج .
ـ كعدنا وهو ما عافني وبلشت أجواء الحفله وغافر كظاها بس مخابرات وعايفني وطنگرت عليه وأجه مبتسم صديت وجهي زعلانه منه
ـ زعلت والله زعلت
ـ أي مو گتلي ما أعوفج
ـ عندي شغله مهمه يا حبيبي
ـ وهسه خلصت شغلتك
ـ أي الحمدلله يله ضحكي خل أشوف سنج
ـ ضحكت وتقرب همس
ـ بس تخيلي اليوم تنامين بحضني بس تخيلي تفقدين الوعي والله .
ـ غافر لاتخوفني.. ضحك من گل گلبه
ـ لج شگد خبله
ـ أني مو خبله أني نور
ـ بويا أسنح على صوتج من تجيج هالتنعويصه .
ـ أي ضل أتقشمر عليه.
ـ غير تخلص الحفله شوفي ياهو اليتقشمر عليج
ـ سگتت خجلني خرب يضحك وهو مراقب شكلي شلون سگتني وگام على صوت نافع يصيحله .
نافع ـ غافر .
غافر ـ أجيت
نور ـ راحلهم ويمكن يرگصون بس هالمره خوالي مترأسين الجوبيه خالي مشعان وخالي منعم وبعدهم غافر وباقر وناجح وحليم ونافع بالنص يركص بكل حيله وتگابل هو وغافر شكلهم شگد حلو مثل التؤام حتى يتشابهون هواي بس غافر شوي طويل وصدره عريض لان هو أكبر من نافع.. نافع أصغرهم كلهم ما عدا حليم وناجح .
غافر أخذ سبحة نافع ويجوب بيها ونافع مقابيله ومن يجوب يضرب الكاع بكل حيله.. وغافر نهد حيله تعب ويمسح بگصته وعمي مشعان حضنه من گتفه وباسه وراح گوم خالتي صبيحه وتركص وياهم ونافع راح جاب حبوبه گوه تمشي وتحجي عليه هو لح عليها وهي ما ردته وتهوس وياه
وتبوس بي وحسيتها تبچي بس مع ذلك ضل
مستمر يركص هو وغافر.. وأستمرت الحفله وحيل جانت حلوه بكل تفاصيلها كل أهلي وناسي حاضرين ...
وصار وقت الصور والصوره الجماعيه وخوالي أجو كلهم وحبوبه وخالي مشعان حاضن خالتي من كتفها وگفوا بصفها وأخر شيء نافع أجه هو وحبوبه وگف بصف غافر وأخذنا صوره وبعدها نافع أشر للمصوره .
نافع ـ أريد صوره جماعية بس أحنه الثلاثه .
ـ تدلل أستاذ .
نور ـ حبوبه ضلت صافنه علينا وخالي مشعان نزل رأسه ومشىٰ وتقرب وگف بصفي وغافر من الصفحه الثانيه أني صرت بنصهم حتى النفس كطعته رغم هو بس سترته لامست طارف بدلتي وغافر حاضن جف أيدي وأخذت الصوره وبعدها أخذوا بس هو وياه
.. دعيت من گل گلبي صداقتهم تدوم لابد ونافع بهاي وگفته بين مواقف الصداقه الحقيقه والأخويه وصارله الأخ لان هو وحيد أمه ويتيم وخوالي كلهم وگفوا وياه وحضروا عرسه ما قصروا وسوله أحلى عرس ..
وأكملنا فقرة الصور وصار وقت المباركات كلهم أجو باركولنا وأخر شيء نافع وصلنا وحضن غافر ويبوس بي أكثر من مره بكل أحترام
نافع ـ مبارك حبيبي وأخوي بالرفاه والبنين
نور ـ وصل العندي وباوعلي وعلى وجهه أبتسامه گال بصوت خافت .
نافع ـ مبروك بنت خالي، شايفه كل الخير.. الله يهنيكم وبالرفاه والبنين أن شـاء الله .
نور ـ الله يبارك بعمرك، تسلم .
خلصت الحفلة وطلعنا، ولبنى ما عافتني خطيه سألتني
لبنى ـ نور محتاجة أجي وياج
ـ قبل لا أجاوب، غافر جاوبها بابتسام
غافر ـ لا عيني ست لبنى، تسلمين ومتقصرين ما نحتاج إلا سلامتج تعبناج ويانا اليوم
لبنى ـ تدللون عيني، الله يسعدكم ويتمم عليكم بالخير
نور ـ شكرتها وراحت لباقر ينتظرها وبنظرة عفوية باوعت ووگعت عيني على نافع واگف بصفحه يراقبنا إيده بجيوبه ولابس نظارته.. نزل نظاراته وباوعلنا ونظراته غريبة بيها حزن عميق دنّگت راسي بسرعة وغافر شغل السيارة ومشى.. دگ هورن لنافع، ونافع رفع إيده
نافع ـ بالسلامة حبيبي
نور ـ عبرنا ومشينا وطلعنا باتجاه الفندق وهما راحوا السيارة هدوء، تقرب غافر لزم إيدي وباسها، وخلاها على صدره وهو يباوعلي بنظراته خجلت ودنّگت، بس هو ظل عينه عليه، حسيت نبضات گلبه جوه إيدي، والرجفة سرت بجسمي كله.. رفعت راسي بهمس غافر
غافر ـ ها يا دگات گلبي
نور ـ گلبك ليش يدگ سريع
غافر ـ فرحان بيج يروحي .
ـ ما گدرت أرد فقط أكتفيت بإبتسامة وصلنا الفندق دخلني الغرفه ونزل يجيب الجنط كعدت لازمه گلبي وبالگوه أبلع ريگي بــصعوبه والتوتر والخوف صعد
عندي وتذكرت كلام ماما والأدعيه الگالتلي عليهن
وأنفتح الباب ودخل الجنط وتقرب نزع سترته ولازم موبايله يمكن يخابر على خالتي .
غافر ـ ها حجيه أي وصلنا عيني أنتِ لا لايضل بالج أن شـاء الله ماشي يمه .
ـ سد الموبايل وذبه على الميز والتفت عليّ.. حاولت أتهرب من نظراته، گمت أفرك بإيدي من التوتر مغمضة عيوني وخايفه فجأة حسيت بي صار گبالي، رفع حنجي بيده وبنظرة دافيه باوعلي وحايرة وين أودي عيوني ما أگدر أثبت بنظراته من الخجل والارتباك.
غافر ـ خايفة مني
نور ـ ما جاوبته لزم إيدي اللي جانت ترجف وبإيديه وحنيته وهدوئه المعتاد حاول يطمنّي
غافر ـ نور باوعيلي ليش هذا الخوف أني غافر سندج وأمانج ما أريد شي يضوجج أو يخليج تحسين بهالارتباك .
ـ ضليت ساكته وأستمعله هو يباوعلي وعيونه مليانة دفأ سحب إيدي وباسها وباس باطنها، وبصوت ناصي
_ ليش الرجفة نور والله جنت أتمنى المس إيدج وأرقبج من بعيد وأنتظر هالساعه التجي وتجمعني بيج
ـ قربني وضمني لصدره گمت أسمع نبضات گلبه وهي تزيد مو بس من الفرح حتى من لهفته.. تقرب مني وبكل حنية، مسح بيده على وجهي، وبدأ يفك شعري بهدوء وهو يهمس
ـ أريدج تنسين كل شي، تنسين التعب، والخوف، ورهبة هالليلة. ماكو شي راح يصير ويتم بدون ما أنتِ تحسين بالأمان
ـ هزيت رأسي وسحب أيدي وصلينا سوا ورفع أيده يدعي ودمعت عيني وأني أباوعله وگمل وگام وأندار عليه وباوعلي حسيت بنظراته تحتضنني قبل إيديه
ـ تدرين جنت أتخيل هالحظة بگلبي ألف مرة.. بس الحقيقة طلعت أحلى بهواية من خيالي مو مستعجل على شي، وجودج بحد ذاته يمي كافي عندي .
ـ صفنت بوجهه وبكل حنية تقرب أكثر وبدأ يوزع بوسات خفيفة ودافية على گصتي، وعلى خدي، وكل بوسة منه تهمس بمعنى بـ أحبج بس بطريقة تختلف خله وجهه قريب من وجهي وأنفاسه الدافية جانت تلمس بشرتي وتزيد ارتباكي وخجلي منه، وبنفس الوقت تذوب كل الحواجز اللي بيناتنا.
بكل رقة، رفع وجهي بيده، والتقت عيونه بعيوني نظرة حب عميقه وتقرب وباسني بشفتي بوسة خفيفة جانت بطيئة، مليانة احساس، مو بوسة استعجال، بس بوسة اعتراف بكل اللي بگلبه حسيت برعشة سرت بجسمي كله، وگلبي دگاته زادت لدرجة هو يسمعها ..
فاتحه الجنطة وأحضرله ملابسه وحضرت ملابسي وطلع هو ينشف شعره وتقرب حضني من ظهري وباسني هذن ملابسك أني أدخل أسبح .
غافر ـ ماشي أنتظرج علمود نتعشى
نور ـ دخلت الحمام حاضنه گلبي وبعدها تعشينا وسولفنا ونومني بحضنه ويلعب بخصلات شعري يعاملني كأني بنته طفلته ..
ثاني يوم الصبح طلعنا للبيت لكينا خالتي محضرتلنا الريوك هي وأمي وتريگنا سوه وأمي تباوعلي مبتمسه وأحسها تريد تنفرد بيه ومن گاموا همست
سميعه ـ ها ماما شلونج
نور ـ الحمدلله ماما زينه .
ـ الف الحمدلله ربي.. الله يسعدكم ماما .
ـ أجه وباوعلي وعيونه تحجي.. شلت المواعين وأمي وگفت غسلتهن وأسمع صوته ويه خالتي صبيحه بعصبيه
سميعه ـ شبيها خالتج يا ستار روحي عليهم .
نور ـ وگفت وأسمعه يهدي بيها
صبيحه ـ منين طلعتي بهل السالفه هسه عرسان أكعدوا بالبيت نوب عليه شهر العسل مو أجانب أحنه
غافر ـ يا أمي قابل وين مسافر وبعدين حالي حال العالم
خليني أسافر برضاج مو بزعلج
صبيحه ـ وليش هسه يله تحجيلي أي أخر الناس تخطط لوحدك ولا تگول عندي أم وگلبها عليه
ـ والله العظيم صارت عالسريع وأصلاً أنتِ أول وحده أكولج حتى نور ما تدري
ـ أي مسويلها مفاجأة وأني صدمه تصدمني بيها وتسافر وتخليني لوحدي
ـ قابل أسافر بعد ما أرجع لو أقيم هناك شسالفه يمه وگتلج نور مـا تدري.. ما گلت لأي أحد هسه گلتلج ونافع هم يدري بيه أسافر .
ـ وضروري تسافر! ولد خالك مو وياك شو محد منهم سافر والله منعم ومفضل عليهم ليش هالهنگمه لو هاي طلباتها هي تريدك تسفرها
ـ يمه فدوة لعينج شچاي أحجي أني هندي مو گتلج ما تدري.. وشعليه بولد خوالي وعمامي وشعليه بالعالم المهم راحتي وناستي أني ومرتي
ـ شسويلك بعد
ـ زعلتي أدري بيج
ـ لا ما زعلانه بس ما تطولون يومين وترجعون
ـ أن شـاء الله تدلل حجيه شعندي غيرج وين أكدر على فراگج يا يمه .
نور ـ رجعت وأمي هزتلي رأسها وأجه هو وسگتنا وگف يحجي ويه أمي وخالتي باوعتلي ما مرتضيه وحسيتها ضاجت على موضوع السفر.. رحت الغرفتي وأجه هو
غافر ـ شبيج
نور ـ لا حبيبي ما بيه شيء.. تقدم حضني وباسني
غافر ـ باجر طيارتنا جهزي نفسج وحضري ملابسنا وكثري لان نطول حسبة ١٥ يوم .
نور ـ وخاله
ـ حجيت وياها.. أريد أبتعد عن العالم وأنفرد بعالم بس أني وياج وأعيش كل تفاصيل حبي وياج ثانيه بثانيه
ـ حضنته وشميت عطره وأني وياك لأخر العالم ..
ـ يا عالمي وكل ناسي موطني الأحبه والأعشقه
ـ وقربني اله بكل حب.... والصبح ودعنا ماما وخالتي وطلعنا للمطار وتوجهنا سفرتنا لتركيا أيد بإيد كتف على كتف بكل حب ومبتعدين عن كل العالم بس حب غافر ونور ...
_______________
لبنى ـ مر يومين بالقصر وأجه عمي مشعان العرفته من كلامهم جاي يأخذنا وياه بس الحجيه وعمتي ما راضيات وهو مصمم على قراره وباقر كاعد وساكت
الحجيه عطايات ـ الجنه جنة وهبيه ليش تأخذها هناك يا يمه خليها هنا قابل نحصدها أنگلها حالها من حالنا
وهبيه ـ لا مو حالها من حالنا والله ما أخليها تجيس غرض بهل القصر ولا أطلعها لكاع والزرع والحلال بس شغلات البيت وأني وياها نتعاون عليهن بس لاتأخذها خليها عندي هي جنتي مو جنة حربيه علمود تسكنها يمها أني ششوف من زوجة أبني حتى جهالهم يربون بعيدين عليا .
مشعان ـ يا مره شبيج شجاي أحجي من ساعه أكولج باقر دوامه هناك والطريق بعيد أخاف عليه يضل رايح جاي وهو عسكري هناك دوامه قريب وكدام عيني
ـ من ينزل يجي لهنا
ـ ويضل كلما ينزل يجي لهنا بابا أبني أخاف عليه وراح يترقى أبنج ما تخافين عليه
ـ شلون ما أخاف عليه هذا رويحتي من الدنيا أني شعندي غيره هو وأخوه النايم بالسجن سوده بوجهي
لبنى ـ گامت تبچي وگام باقر حضنها ويسگتها وضلوا يحجون بينهم ما أتفقوا نوب عمتي طلبت يأجرلي وهم رفض مصمم على قراره الا أسكن يمهم
مشعان ـ يمه أحجيلج حجايه والله أذا ما تجون وياي أحلف على حربيه وأطلگها والله لاتشلعون گلبي
الحجيه عطايات ـ أتفل من حلگك لاتتسودن وين تطلگها بهل العمر ولدها زلم وبناتها نسوان تسودنت يمشعان خلص يرحون وياك بس فضنا من سوادينك .
لبنى ـ عفتهم ودخلت غرفتي وأجه باقر ها حبيبي شصار
باقر ـ هذا أبويه كلمته هي التمشي غصباً عليه وعلى الكل هم.. تحضري نرجع للبيت
ـ ليش ما تحجي وياه
ـ حجيت وياه لبنى وأساساً أني جنت رايد السكنه هناك وغرفتي أخذتها وشديتها هناك علمود دوامي وهم أنتِ بنت دلال ينشلع گلبج ما ردت تنظلمين مثل أمي بس سواية خالتي خلتني أغير حساباتي بساعتها رحت أشتريت غرفه وجبتها نصبتها هنا وگلت ما أرجع بعد وأمي فرحت لان تريدج يمها بس أبويه هسه يگول ما أريد تگولون أبويه ظلمنا .. يله تحضري
ـ والغرفه
ـ شبيها
ـ تضل
ـ أي بعد أشتريتها نعوفها من نجي لهنا أنام بيها شتردين حبيبي صار عندج غرفتين طگت مرت الضابط
ـ سحبني وعصر عظامي وشالني خرب باقر راح أوكع
ـ ولج ثكيله عظمج خشن لبنى
ـ لاتحسدني مخلين عيونكم على لحمتي
ـ هههه ليش منو مخلي عينه علمود أفگسها والله ياهو اليباوعلچ ولج أحجيلي أحجيلي
ـ هاا محد أنت غير.. ويگوللي المدعبله صدك باقر أني مدعبله
ـ لا والله تخبلين جسمج متروس وعالطلب والأريده تعرفين ذوقي أحب المربربه .
ـ طلعتوا صدك هذا ذوقكم
ـ أي ليش متابعه ذوق العسكري
ـ لا ههههه عزا بس لينا تسولفلي وناصبه عليه
ـ أنتِ ذوقي الخاص والنادر والمميز.. أنتِ نصيبي من الدنيا والشيء الثمين أفرع گلبي وأضمج بي وأحس لازم بعد أضمج علمود ما تنشافين بس أنه أتمعن وأشبع شوف بهل الوجه اليضوي والجسم المربرب
ـ خجلتني باقر.. ضحكنا وضلينا كاعدين نسولف ونسينا عمي مشعان وأندك الباب گام طلع وأجه أشرلي وگمت حضرت ملابسي وشغلاتي وعمتي تبجي ودعناها وهي حاضتني وتبوس بيه
وهبيه ـ عينج على نفسج وعلى رجلج ديري بالج بنيتي وأنه كل فترة أطس عليج وكلني ثقه بيج تدرين بالج على باقر أنتِ خوش بنيه ونياله وبخته بيج وليدي الله يهنيكم يا يمه
لبنى ـ تسلمين عيوني خاله.. ودعناهم ورجعنا ويه عمي مشعان وأول يوم جان صعب عليه أجواء البيت ونظرات عمتي حربيه رغم البنات حيل حبابات بس أستوحشت المكان عكس ما جنت بالقصر نفه ومريح ويشرح الصدر ..
ومن أول يوم أستلمتني عمتي.. جنت بالحمام أغسل ملابسي وملابس باقر ودخلت خلت طشت مليان ملابس لولدها وگالت بصيغة أمر .
حربيه ـ هذن بدلات حموينچ مالت الدوام غسليهن زين بس مو بالغساله غسليهن بيدج دامج بالحمام تغسلين ملابس
ـ بس عمه أني أغسل ملابس رجلي وملابسي
ـ أي وما تغسلين ملابس حموينج
ـ لا مو هيج قصدي بس
ـ بدون تبسبس غسليهن شصار عليج .
ـ طلعت وأستغفرت ربي مو عندج كومه بنات بعدني عروس شمرتي عليه ملابسهم بس متأكده متعمده لان وحده من البدلات لاحظت عليها لبس دفاع المدني جانت نظيفه يمكن هاي لنافع بس مالت الكابتن ناجح لا جانت وسخه.. غسلتهن وسگتت وبس أشوف زهور أكول الها ما مجبوره أغسل ملابسهم ويتعلمن عليه ومثل ما گالت عمتي وهبيه لاتخدمين أحد بس رجلج وتسوين اللي عليج وبس .
... وأجه يوم السبعه وعمتي أجتي جابتلي كم غرض باقي هناك وفراش ورتبنا سوا ومن خلصت السبعه ضلت يمنا باتت فقيره وطيبه حتى ولد عمتي حربيه حيل يحبونها ويحترمونها ..
وطول هالفتره كظيتها ويه نور بالحنه والعرس وباقر وجه مدلغم يريد يبجي لان عايفته رغم ما أبات يم أهلي بس يضوج ما يقبل أفاركه متعلق بيه وأني مو بس تعلقت بي لا شايفته كل أهلي حنيته وحبه طغى عليه
باقر ـ سبعتج وطلعت وأختج وتزوجت وخلصنا منها ومن هوستها
لبنى ـ يا باقر
ـ أي ياااا باقر وباقر مشتعل أهل أهله عليج غير عايفتني من وراها يابه ما صدكت يخلص العرس واحطج بالسياره ونرجع البيت نوب وكفتلي تحاجيها محتاجه أجي وياج! وأني خراع خضره واكف والله بيج عجل بس كلت خطيه بعدها عروس .
ـ هاا وأهون عليك وفواكاها تعيب عليه
ـ أوووف شايفه روحج من تحجين شيصير بيه
ـ باقر
ـ أهله وناسه شتردين بويه
ـ حضني من وجهي مقابل وجهه والعب بشعره خلص بعد ما أعوفك بس الجمعه أروح أبات ممكن
ـ تباتين وشتسوين تباتين مو هسع تگولين ما أعوفك لا يابه لا ماكو طلعه وأهلج هما يجون شو أختج كل يومين تمرلج وعمتي عود اني أجيبها الج
ـ لا خلص هاي هي ما أروح أنسى مشيت وصاح وراي بعصبيه الا وگفني
ـ وين موليه من أحاجيج تبقين واكفه لما أكمل حجايتي
ـ نزلت رأسي وتقرب عليه
ـ ليش تمشين
ـ ما مشيت بس أنت ما تقبل گلت هاي هي على راحته
ـ بس مو هيج.. وخلص أوديج الجمعه
ـ لا ما يحتاج والله
ـ ترا ما أكدر على فراكچ وحجيت هيج
ـ أبتسمت أدري بيك
ـ لبنى أنه عاشگچ عشگ ماله نهاية عشگ ما مر على گلب زلمة گبلي. صرت لچ أبو، وأخ، وحبيب، وسند. من تگوليلي أعوفك ، چنچ تگولين للأبو اترك ضناك وبعدني ما شبعت منج شنهي ما شبعتي من اهلج
كافي صرتي حصة باقر ياعيني
ـ لا مو هيج بس علمود لينا خلص والله أنسى الموضوع
ـ أني أوديج سهله يله بوسيني
ـ بسته من خده وحضني ورضينا بساعتها.. وثاني يوم كاعدين العصريات ويحجون بينهم وبطاري نور وغافر سافروا ولا أدري تفاجئت بسفرتها يله بالعافيه عليها
وترجع بالسلامه أن شـاء الله .
مشعان ـ نافع وين ما رجع لحدهسه .
حربيه ـ موجود نايم بغرفته .
مشعان ـ عبالي بايت برا
ـ لا موجود وين يبات برا هو ما طالع من البيت من العرس هو بغرفته حتى لدوامه ما رايح مأخذ أجازه .
لبنى ـ يحجون بينهم ما فهمت گلشي لان عمي كلامه بعصبيه على نافع وجانت خالتي لميعه يمنا ما راحت من يوم زواج نور ضلت يمنا هي والحجيه وأكثر شيء جانت مسؤوليتها نافع دومها تكعد يمه لـو بالحديقه لو بغرفته وتوديله الأكــل .. مبين علاقتهم قويه وهي حبابه وتنحب
جنت أسوي كيكه وأجتي لينا هي وميثم دخلوا عليه يمه هلا حضنتهم وأبوس بيهم شجابكم دخلوا دخلوا
ميثم ـ رحنا الأسواق أشترينا وكلنا نمرلج وأشتريتلج وياي
لبنى ـ فدوه لطولك تسلم ولينا تتلفت شبيج على منو تدورين .
لينا ـ لا هيج بس صفا وين
ـ وشتردين منها
ـ هيج سألت عليها عدنا أمتحان باجر
ـ بغرفتها بس وگت الغده نزلت وصعدت وما عليج بيها أقري أمتحانج وهذا هو
ـ أي شعليه أي شلونج أخبارج ويه عيالج ويه عمتي صدك خالتي تسلم عليج ودزتلج الراتب مالت أمي مجموع يمها أنطتني مصرف والباقي گالت بدربج أنطي لاختج .
ـ كثر الله خيرها بس لـو تضمه عدها مثل قبل أحسن وأني ما محتاجه والله
ـ لا يمعوده دخيلج شتضمه يمها ليش مو سكنن يمنا الحيتان وعمج الحوت الأسود يلغف الأخضر واليابس ونورس الحيه لسانها بس يلعلع شگد عرمه وكحه
ـ خير خوما گابه المشاكل
ـ لا يمعوده أني بغرفتي هنا بغرفتهن بس تتمضيك وتعيب وما يعجبها العجب شالعه گلب خالتي بس نبأ حبابه وهذيج انطيها بس لازمه مرايا وتصور كالبه الغرفه أستديو والحياطين أم كلثوم وفيروز وعبد الحليم حافظ وراشد الماجد عايشه بعالم الموازي عود أنتيگا وكذا وسوالف تعبانه .
ـ شعليج بيهن كلمن حر بنفسه
ـ مو يتمجذبن هواي على شنو تمضيك وشوفة النفس شو هي خالتجن واحنه ولد گريه كلمن يعرف أخيه .
ـ سگتتي عمتي أجتي
حربيه ـ ها لينا شجابج ها عمه ميثم شلونك
ميثم ـ زين عمه .
حربيه ـ شلونكم البنات شلونهم خوما شالعات گلب محمود
لينا ـ لا زينين الحمدلله لايضل بالج عيوني عمه
حربيه ـ أي زين زين يله أذا تمشين أمشي وياي أروح أشوف البنات .
لبنى ـ عبرتنا وهي لابسه عبايتها ولينا تنفست بقلة صبر وخلت الراتب بإيدي ومشت وراها ميثم.. ورجعت الغرفه لكيت باقر يحجي ويه الضابط مالته بس دخلت أشرلي بأيدي معناها بدون صوت .
كعدت يمه وأباوعله شلون يحجي ويأشر بأيده فدوه شگد شخصية رجلي.. باوعلي وعگد حواجبه بإبتسامة ونهى الأتصال وتقرب كرصني من خدي وباسني .
باقر ـ لاهيج تباوعلي رجال شگدني شگبرني أطيح من طولي كدام عيونج .
لبنى ـ غير أنت شخصيه وأحب أباوعلك
ـ يحبيبي والله
ـ حبيبي هذا راتب أمي
ـ أي وليش جايبته اليه
ـ خاف تحتاجه أني ما محتاجته والله
ـ لا حبيبتي راتب أمج الج ولأختج وضمي بعدين من ينجمع مبلغ زين أخذلج بيهن ذهب لو عقار أسجله بإسمج
ـ بس أذا تحتاج تگولي
ـ ما محتاج الحمدلله وحتى لو أحتاج ما أخذ منج وأني أنطيج مو أنتِ تنطيني عمت عيني أذا أخذ منج صدك جذب لبنى أزعل منج ها
ـ لا حبيبي گلشي ولا زعلك
ـ ديله گومي ضمي راتب أمج وخلي عليهن فلوس الهدايا وراتبي ينزل رأس الشهر وأجملهن وأخذلج بيهن قطعة ذهب زينه أكشخي بيها .
ـ تقربت بسته من خده فدوه لعمرك ما أريد غير سلامتك .
ـ بس تدلليني
ـ ضحكت وخجلت منه وگمت ضميتهن وتشكرت ربي على نعمة وجوده ..أذن المغرب وصلينا أني وياه وطلعنا سوا هو راح كعد بالحديقه الحجيه وعمي مشعان وخالتي لميعه بس عمتي حربيه بعدها ما جايه عفتهم ودخلت المطبخ يسون عشه ردت أساعدهم بس ما خلني حيل حبابات وأكثر شيء زهور .
صبينا العشه وتعشينا ونافع أجه تعشى ويانا ويتبادلون بينهم النظرات ما فهمت گلشي وگملنا والبنات يغسلن المواعين وأني صبيتلهم الچاي وأجه ناجح .
ناجح ـ أمي أجتي لو بعدها
زهور ـ لا والله بعدها .
لبنى ـ أخذتلهم الجاي قدمتلهم ودخل نافع كعد وأخذ الجاي من الصينيه وكعدت بصف باقر أشرب الچاي ونافع حچه هو مدنك رأسه ويخوط بالأستگان گال:
نافع ـ عود حضروا نفسكم باجر ترحون تخطبولي نورس
