رواية بدون كلام الفصل الأول بقلم جمانه السعيدي
عطور مواليد ٩٠
من سكنة بغداد احنا ٣ نفرات اني وامي واخوي
ازغر مني بسنتين
ابوي ميت واني عمري ٨ سنوات
مات اثر حادث دهس وهو راجع من الشغل
احنا ناس على كد حالنا تكدرون تكولون عايشين تحت خط الفقر
بيت قديم واثاث معدم وحاله معيشه صعبه
ابوي كان يشتغل عامل
مجرد رجال عامل
وامي ربت بيت واخوي من ذوي الاحتياجات الخاصه
احنا نسمي بلعاميه مخبل العمر جبير بس العقل زغير
عقل طفل
بالاضافه جسمه رخي اعصابه شبه تالفه
يمشي ويهتز جسمه مايسيطر على اعصابه
هو هيج من الولاده
ابوي الله يرحمه انسان مكافح يشتغل ليل نهار
حتى يوفر النا لكمه ناكلها
ماعدنا اهتمامات ثانيه لا نفكر نغير بيتنا التعبان
ولا نشتري اثاث جديد
ولا حتى ملابس بيها خير
يله العيشه دابره ولله الحمد
عندي عم وحيد أكبر من ابوي بلعمر
بس أكبر حرامي ااكبر قفاص
مستعد يضحك على اكبر واحد وياخذ منه فلوس
مايشتغل شغلته الوحيده النصب والاحتيال
وتمثيل دور المسكين
كدام الناس حتى تعطف علي وتنطي فلوس
كلشي مستعد يسوي بس كون يحصل فلوس
عكس شخصية ابوي ابوي انسان نضيف
يصلي ويصوم ويخاف الله وابد ماياكل حرام
مقتنع بوضعه وحياته رغم الفقر والعوز الي عايشه
يكول الحمد لله عدنا بيت يلمنا واخر النهار ااكو اكل بيتنا
حتلو خبز وماي
نعمه من الله اهم شي رب العالمين ساترنا بستره
جمانه السعيدي
اما عمي كلشي ما يعجبه ولا مقتنع ولا يصلي ولا يصوم
من ابوي يسئله ليش ما تصلي
يكول هو رب العالمين شمنطيني حتى اصلي
رغم هو مزوج وعنده اولاد وبنات وساكن بيت العائله
يعني مايدفع اجار مثلنا
صحه وعافيه وسكن وما راضي بوضعه
يريد يكعد والدنيا تمطر علي فلوس
قبل كنا كلنا كاعدين بيت جدي
عائلتنا وعائلة عمي وجدي وبيبي
بعد وفاة بيبي وجدي المشاكل كثرة
بسبب المشاكل طلعنا لان الحياة صارت صعبه
مشاكل طول النهار
بين عمي وزوجته وبينا
على ابسط الاشياء يتعاركون
لو تشوفون امي شكد فقيره فقيره الدرجه ما تتخيلون
تصدك بكلشي
لو واحد يكوللها الشط احترك اصدك بي
مستعده طلع اللكمه من حلكها وتنطيها
بس زوجة عمي جانت شاده وياها
وعلى ابسط الاشياء تسوي مشكله
حتى تكتل امي هواي مرات تنظرب امي من زوجة عمي
على ابسط الاشياء
ماكو حل غير كل واحد يعيش بيت مستقل عن الثاني
عمي مايشتغل وابوي يشتغل عامل
باعتبار ابوي يشتغل عمي كاعد
يعني ابوي الي يكدر يطلع بيت وحد
احنا عائله قليله بس اني وامي وابوي واخوي
بينما بيت عمي عدهم اربع اولاد وبنات ثنيين
عمي مايقبل يبيع البيت وينطينا حصتنا
يريدنا نطلع ونعوف البيت اله
جمانه السعيدي
المهم استحوذ عمي على البيت
واحنا طلعنا بيت اجار تعبان وقديم كلش
لان الإيجار قليل سكنا بهذا البيت
وحتى نخلص من المشاكل
هاي المشاكل مو بين الاطفال
لا عمي وزوجته كانو يخلقون المشاكل
على ابسط الاشياء مشكله
راح احجيلكم نبذه عن شغل عمي الحرامي
تخيلو عمي إذا راد فلوس ومحتاج كلش شيسوي
يسئل ابوي وين تشتغل ويروح علي للشغل
بحجة يشوفه ويطمن علي
ثاني يوم الصبح من يطلع ابوي المكان العمل
يلكون الشبابيك والبيبان مبيوكه من المكان
يروح عمي بليل يحملهن وياخذهن يبيعهن حتى يصير عنده فلوس
لو يحمل الاسمنت والحديد وياخذه يبيعه
اتكررت هاي الحاله كم مره
يروح المكان العمل سواء كان بيت أو مدرسه او اي شي
يكعد ويا العمال بحجة يشوف ابوي وهو بلحقيقه جاي يسحب الشبابيك والبيبان وشنو ممكن يشيله وياخذه من المكان
واذا بعدهم ما منزلين مواد البناء يسئلهم يمتى تنزلوهن
الحد ما فديوم واحد شافه وهو يحمل الاسمنت من المكان
لزمه بمكان الحادث
وبلغ علي لزمته الشرطه دخل سجن بوقتها ست اشهر
والناس الطيبه راحت اتوسلت بابو الشغل حتى يطلعه
طلع بعد ست اشهر سجن
عمي انسان لا ذمه ولا ضمير
مايريد يشتغل ويتعب بس يريد فلوس
شلون مااعرف
هاي قصه عرفاناها عنه بالصدفه
ما خفي كان اعظم الله اعلم شلون جان يبوك
ومنيين حتى يصرف على عائلته
جمانه السعيدي
بعد ما تعرض ابوي للحادث الي تسبب بقتله
وهو راجع من الشغل
هاي كانت نقطة التغيير بحياة عمي
موت ابوي فتح باب الفلوس على عمي
لحظة الي شفت عمي وهو يتهدد على الولد الي دهسه بسيارته
حسيت عمي شكد يحبنا وشكد يحب ابوي
كان يعيط بصوت عالي
حق اخوي مااعوفه
انتم قتلتم اخوي
يتمتم اطفاله ووين ترحون من رب العالمين
رجال فقير يروح ويرجع بطريقه
لو لان عدكم فلوس تشترون سيارات تخبلتو علينا
حق اخوي اخذه مربع منكم
عطور....حسيت بهاي اللحظه بالفخر عندي عم يدافع عنا
ويريد ياخذ حق ابوي من القاتل
الفاتحه كانت بسيطه وفقيره
لان احنا ناس فقره وعلى كد حالنا
حتى الفاتحه هم تريد.كشخه وناس واصله حتى تصير
فاتحه الناس تحجي بيها
ابوي عافنا اني وامي واخوي المخبل
عائله فقيره وتعبانه بوسط مجتمع مايرحم ابد
بعد الفاتحه عمي تصدر المجلس وأخذ فصل ابوي
هذا الفصل الي ما شفنا منه كلشي
عمي كدام الناس ادى دوره على اكمل وجه
دافع عن حق اخو واخذه
بس اخذه النفسه كان عذره المن انطي هاي الفلوس
للمخبل لو الهاي الطفله
لو امهم الفقيره ااكيد راح يصرفونه
ومراح يستفيدون منه ابد
ماعدهم معرفه شلون يديرون الامور شلون انطيهم الفصل
الفصل يبقى عندي واني اشتغل واعيشهم
كدام الناس كلام عمي عين العقل
هو هذا الكلام المظبوط
لان فعلا احنا ماعدنا احد حكيم بلبيت ممكن
يتحمل هيج مسؤليه
بس بلواقع والحقيقه الي عمي كان يخفيها
عن الناس كلها
عمي جان خال عينه على الفصل
مبلغ محترم بضل ضروف الحصار بذاك الوقت
هيج مبلغ كفيل يغير حياته للابد
جمانه السعيدي
بما ان ابوي فقير وماعنده احد يدافع عن حقه
هاي الفلوس من حق عمي
ومحد راح يسئله عنها
اول اسبوع بعد ما استلم عمي الفصل كان يجيبلنا
مسواك ويجي يسئل عنا
هيج كدام الناس على اساس هو راح يتحمل مسؤوليتنا
بعد وفاة ابوي
من بعدها عمي نسانا اصلا نسا باب بيتنا شلونه
ماعاد يجي يسئل عنا
ولا يذكرنا ولا يعرف احنا شلون عايشين
ومنيين نصرف
كتلنا الجوع كنا ناكل اي شي اي شي
بس حتى تسد جوعنا
الجوارين كثر الله خيرهم ماكانو ينسونا
بعدين وحده من الجيران اقترحت على امي اطلع راتب
رعايه صح قليل بس يسد شويه
هاي المره الطيبه كثر الله خيرها
اخذت امي ومشت وياها بلمعامله
لان مثل ما كتلكم امي فقيره وكلشي ماتعرف
فعلا خلال كم شهر طلع راتب امي
شكد فرحنا بهذا تلراتب الي ماكان يسد عشر ايام من
الشهر
وباقي الشهر نخلصه شلون مجان
الي يدزلنا شوية مخضر والي يطبخ ثواب ويدزلنا
اما اني بنات الجوارين يدزلي ملابس المدرسه القديمه
لان يشترن جديد
شكد جنت افرح بهاي الملابس
اطير من الفرح رغم هاي الملابس مرات تكون تعبانه
وقديمه بس ميخالف
اهم شي اكمل مدرستي
شكد جنت أتعرض للتنمر من البنات بسبب ملابس
مرات البنات نفسهن الي ينطي ملابس
يعيرني ببهن بلمدرسه
بس اني من رب العالمين كنت قنوعه
ومااهتم صح اضوج يعني مو بدون احساس
بس بلاخير اسكت واتقبل الموضوع
لان ماكو حل اذا مااخذ هاي الملابس شلون اروح للمدرسه
حتى جنط قديمه يدزلي
وواكو ناس بكلبها رحمه
تشتريلي جواريب واقلام
الحمد لله على كل حال
