رواية فصيلتي طفلة الفصل الأول بقلم مجهول
اعرفكم على شخصيات القصه
اني نسرين عمري 13 سنة واصغر بنت عد اهلي وعندي خوات اثنين اكبر مني متزوجات الاولى اسمها اسماء عمرها 24 سنة متزوجه من احد اقاربنا وعدها بنات اثنين وولد والثانية اسمها هيام عمرها 22 كانت عايشة عد بيت جدي اهل امي وهم عايشين ببغداد ومتزوجه من شخص جان زميلها بالجامعه هي الوحيده مكملة دراسة ماعدها اطفال متزوجه جديد وعندي اخ واحد اسمه علي مو متزوج عمره 19 وطبعا احنا عايشين باحدى قرى الجنوب وامي وابوية الله ينطيهم طولة العمر ..... لهنا كملت وصف عائلتنا
وهسه راح اوصف بيت الشيخ الي هو اشهر شيخ عشيرة بالجنوب بيت شيخ عيدان الله يرحمه متكون من ابنه الجبير شيخ غيث عمره 30 سنة مامتزوج وهو لزم الشيخه بعد ابو الشيخ عيدان الله يرحمه وعنده اخوة اثنين اخو الاول هاشم عمره 28 سنة والثاني حازم وعمره 22 مامتزوجين وحازم يدرس ببغداد طالب جامعه مرحلة رابعة علوم حاسبات واخوات اثنين وحده اسمها فرح عمرها 20 سنة متزوجه والثانية اسمها حنان عمرها 16 سنة طالبة صف ثالث متوسط وهي من البنات القليلات الي واصلات بالدراسة بالقرية لان احنا عدنا البنية من توصل سادس ابتدائي اهلها يبطلوها وبساتين الشيخ قريبه من بيت الشيخ واني ابوي واخوي يشتغلون بالگاع مال بيت الشيخ واخوي جان حاط عينة على اخت الشيخ غيث ويومية يتانيها من تروح للمدرسة وهي كلش حلوة عيونها كبار سود وبيضة كلش وشگرة ومتوسطه الطول يعني اي شخص يشوفها ينعجب بيها واخوي هم مامقصر شكلة يجنن حنطاوي وعيونة سود وجسمه يخبل نرجع لقصتنا اخوي جان كلش معجب باخت الشيخ ويومية ينتظر شوكت تروح للمدرسة حتى يشوفها وطبعا هيه هم منتبهه عليه وجان هم عاجبها .....
احنا يومية نگعد من الفجر نحلب الهوايش ونحضر الريوك حتى ابوي واخوي يرحون للشغل وطبعا اني صف خامس وبطلني ابوي گال شسوي بالدراسة هيه اول وتالي تتزوج وتروح لبيت رجلها صح اني انقهرت وبجيت بس ماكدر اعارض ابوي وطبعا طلعو اخوي وابوي للشغل واني وامي كعدنا نظف البيت وبيت الهوايش والعصر احنا كاعدين وسمعنا صوت الطلقات وهوسة بالقرية .........
بعد ماسمعنا هوسة بالقرية عرفنا انو اخوي جان واگف يباوع على اخت الشيخ واخوها هاشم شايفه وصاير عصبي نار وجاي يتعارك ويا اخوي وعيونة تجدح نار وصاير مصايح واخو الشيخ هاشم غالط واخوي مامتحمل وضاربه بالمنجل بگلبة وميت اخو الشيخ ماملحگين يودو للمستسفى وابوي من سامع رأستنا داز اخوي لبغداد گايله روح لبغداد يم اختك لما نفض السالفة .....
بيت شيخ غيث من سامع خبر موت اخو متخبل وگايللهم اله اخذ حگ اخوي وگتل علي ابن هذا الفلاح المهتلف ....
ابوي رجع متخبل وگال لزوم اروح على شيخ عشيرتنا واخذ اخواني وولد عمي والشيخ ونروح لبيت شيخ غيث واطلب منهم عطوه حتى لتصير بحر دم بينا وامي گامت تعيط وتلطم وتبجي وتصيح راح وليدي علاوي الماعندي غيره وليد .راح ابوي واحنا بقينا ننتظر ولليل اجه ابوي يگول خذينا منهم عطوة ثلاث تيام لما تخلص الفاتحه ويصير فصل ونشوف شيردون فصل عاد امي گالته احنا شعنده حتى فلوس ماعدنا غير بس كم بقرة گاله ابوي ربج يسهلها .....
في مكان ثاني اخوي وهو صاعد بسيارات العبرية رايح لبغداد وعيونة تبجي دم على الي صار وعلى الحب الي منه وهو حبه لاخت الشيخ وصل بغداد لبيت اخته ورحبو بي اختي ورجلها وحجالهم الي صار واختي كامت تبجي على حال اهلي لان تعرف حالتنا فقيرة وماعدنا فلوس ولااي شي ......
بيت الشيخ جانو الكل صايرين اعصاب ويتوعدون انو ياخذون بثار ابنهم الي مات والشيخ غيث گال لاخته بعد متداومين مدرسة ومبطلها من المدرسة وهيه گايمه تبجي وتملخ بروحها هم لان اخوها مات بسببها وهم لان بطلوها من مدرسة وخلصت الفاتحه واجه يوم الفصل ........
