رواية ومضه امل الفصل الأول بقلم ام مصطفى
ايناس
تعاي بوية تعاي
-هايبة الله يساعدك
-ويساعدج بنيتي هاج اخذي المسواك وبيهن دجاجة مذبوحة فوتي بوية نظفيها امج وين
-امي تسبح بنهلة
-اي الله يساعدها على مابلاها
دخلت المسواك للمطبخ وطلعت الدجاجة
خليتها ع الكاونتر
طبت اية تجر برجلها جر
-اجه ابوية
-اي اجة طب يغير ملابسة
راح اخلي مي يفور حتى تنتفين ريش الدجاجة ونگطعها اني وياج
-تلحك تستوي ع الغدة
-اي تلحك تستوي هسه ١١ الا ربع ربع ساعة انضفها وساعة تستوي ابوج من البارحة كال مشتهيها صفرة مركة والصفرة ميرادلها شي خلي مي وبصل وبهارات ونومي بصرة وملح وعوفيها تستوي ع راحتها
جانت عدنا تنكة دهن اوفور مي بيها مخليها لهيج شغلات للباجة للدجاج نفور مي الهن بيها
رحت ترستها من حوض المي الي جان بالحوش مالتنا جان حوشنا جبير بوسط البيت وبنيان داير مداير الحوش
بنص الحوش جان بوري المي الوحيد بنص الحوض محطوط ونترس منه مي
خليت التنكة بالحوض ويجري البوري عليها
طلعت امي شايلة نهلة وتدعي
-ربي امتحانك صعب الاهي اطيني القوة حتى اتحمل والامتحان
ركضت عليها يمة اطيني اشيلها وياج
لا بنتي مااكدريلها
-سمعت صوت ابوج شنو اجه
-اي فات للغرفةةيغير ملابسة
-الله يساعده ويعينه
شلت تنكة المي وطبيت للمطبخ حطيتها ع النار وكلت لاية
ايوته الدجاجة عليج تنضفيها
اروح افوت للحمام اغسل ملابس نهلة وارجعلج خطية امي تعبت
طلعت صار بوجعي ابوي لا بس كلابة البيت جانت عدنا قريولة بنص الحوش جوه ضل النخلة الي زارعيها بنص حوشنا
كعد عليها وراديونه بيده يسمع اخبار
طلعت امي
ها ابو ريسان الله يساعدك
-هلا هلا بيج نسيمة
-شنو شصاير خير
-يكولون امريكا راح اطب للعراق
-يااا امريكا شجابها علينا صخام
-امريكا مايصعب عليها شي ومن تكول شي تسويه
-اووف ياربي ميصير نرتاح ابد جيناها حروب بحروب رحمتك ربي
-نسيمة اريدج تلزمين ايدج بالمواد الغذائية خاف كلشي يصير
ولا تبيعين شي ابد من الحصة تفيدنا
-اي ان شاء الله
واني راح اترس التانكيات نفط
-اي فدوه اهم شي النفط
باجر اخلي يمج خمس الاف اذا فات ابو عربانة النفط اترسي تانكيين هو التانكي بالفين ونص
-اي ان شاء الله
كام يستغفر ومدنك ع السبحة
-اليوم اجاني نعيم للمحل
-شيريد شعجب
-يريد فلوس كالعادة
-اي واطيته
-ايي اطيته ابني شسوي بعد
-بس انت هيج تعلمهم ع العطية ليش مايشتغلون وينتكلون ع روحهم
-والله يامرة تعبت واني احجي
منتكلين علي وجماله يكلي بوية المن تريدهن اذا مو لولدك
كتله يابه ماعندي بس فلوس دفنتي ضامهن وشغل المحل يادوب يكفي اعيش خواتك بيهن
يكلي لعد احنه مو ولدك لو بس بنات نسيمة بناتك
..والله تعبت منهم طماعين حيل واحسهم ماعدهم محنه ع اخواتهم ابد
رغم اني مقصرت وياهم اشتريت بيت الهم وصرفت عليهم طول هالوكت وزوجتهم وزوجت اختهم صافي
بعد شيردن احسهم ينتقمون مني عبالك اني حركت امهم وموتتها مو هي طكت عليها الجولة بالحمام وحركتها
استغفر الله ياربي
خايف يامرة اموت ومحد الهذن البنيات
-اسم الله عليك عيوني
ايناس جنت اغسل بملابس نهلة واسمع كلام امي وابوي وحيل انقهرت
صح اخوتي ابد محسينا منهم محنة ولا يوم شفنه حب اتجاهنا منهم حتى اختنا صافي علاقتها ويانه رسميات ودائما تفضل بنات خالاتها علينا ومن ازوجت لليوم ماشفنها بس بالمناسبات
رغم جانت عايشة ويانه وعلاقتنا طيبة بيها ماعدنا مشاكل وياها وهي هم جانت عازلة روحها .....
عصرت الملابس وذبيت المي الي بالطشت وطلعت بالحوش جان حبل مربوط بالشجره لشباك المطبخ
شريت الملابس عليه
وفتت يم اية لكيتها مكملة نتف الدجاجة ............
اني اية جنت حلوه حلوه بشكل عيون صفر كبار وبيضة شفاف بياضي نمشة ماكو بوجهي ضعيفة طولي وسد شكرة وشعري سرح طووويل كولش ودائما امي تضفرة الي كصيبة ليورة
اشبه ذول الي يكولون مولودين بايلة القدر لكن كل حلو بيه لوله مثل ميكولون
صار عندي مرض شلل الاطفال من الصغر حاولوا اهلي يعالجوني بس بقت رجلي اليمنى ميت تقريب العصب مالتها كمت اجرها جر من امشي
بعدها انولدت نهلة انولدت معوقة
رجليها ميتات اثنينهن
بوكتها كالو عوق ولادي لان الورك جان مقلوب عبالك رجليها ليوره ومفتوحة
من صارت اتهموا امي تجيب معوقين
لكن ابوي جان رجال مؤمن وكال هذا امر الله سبحانه وتعالى ولا اعتراض ع امرة اليجي من الله هلة بيه ويامحلاه
بعدها امي جابت ايناس جانت مابيها شي وكاملة والحمد لله
عشنا وي اخوانا ٣ من ابونا بس عمرنا محسنا همة اخوانه ولا شفنه محنة منهم
الى ان ابوي زوجهم سوه وسكنهم ابيتنا الجبير. قسمة الهم ٣ مشتملات واحنا اجينا كعدنا بهذا البيت الصغير
كلهم ابوي هذا ورثكم وحصتكم انطيتة الكم واني عدل وهذا البيت يبقى لاخواتكم
من يومها مايجونه هواي بس يعني للضرورة لو ابوي يدز عليهم لو يردون فلوس من ابوي يجون وسلامهم بارد كلش ويانه
-اية وين صافنة
-ها لا هيج بس اذكرت اخوتي ابد مااحس بمحنه منهم اتجاهنا رغم احنه نحبهم
-اي عادي تعودنا الله يهديهم يارب علينا
اكولج اني رايحة التلفزيون وي امي من المصلح
-صدك اي فدوه كلش؟ضجنه عاد هو ونستنا بالبيت
-ديري بالج ع نهلة
-ان شاء الله
ايناس لبست عباتي صاحت امي علي وينج ايناس
-اجيت يمة
جيبيلج وصلة نسويها اوگة نخليها ع راسنة ونحط التلفزيون عليه
اي اي
جبت خاولي ولفيته وطلعنا
جنت فرحانه بطلعة لان مو هواية اطلع
كالت امي خل نمر ع ابو الحصة بلكت ذاب طحين هم نجيبه
وصلنا جانت ام نادية هي توزع الحصة وابنها يساعدها
-شلونج ام نادية هاي الحصة مال هذا الشهر غيره
-اي اي ذبوا مال شهرين حصة كاملة اخذيها
- مو هسة من اروح اجيب التلفزيون من المصلح وارجع
-لا فدوه لعينج ام اية اخذيهن هسه اريد اخلص مشوفين بالشارع المواد الغذائية باقية
-زين عدكم عربانه
اي هاي ايجار
-عادي ااجرها وخلي ايناس تاخذها للبيت
يمة ايناس روحي وي ابو العرانه للبيت واني رايحة اجيب التلفزيون من المصلح وارجع
-صار يوم
يله بنتي بسعج ارجعي للبيت ابوج ينزلهن وي الولد
راحت امي وام نادية كامت توزن الحصة
وابنها يحط بالعربانه جان يباوع ويتبسم الي كلما يحط حاجة
خلص
-اكلج ايناس متكفي العربانه لازم تردبين لان الحصة مال شهرين طبك
-يعني شنو
يعني خاله روحي وارجعي ع الدرب الثاني وهم جيبي فلوس الحصة
-ان شاء الله خالة
يله يمة رحمن روح وصلها وارجع بالعجل ورانه شغل
-ايي صار
باوعلي تندلين وحجة بصوت ناصي
-هزيتله راسي
-اي اي
-يله امشي
-امشي ولافة عباتي ع وجهي مستحية امشي وي ولد اتلفت يمنه يسرة وكل شويه ادير وجهي عليه مثل الطفلة الخايفة عبالك مدري شمسويه
انوب هو من التفتلة يبتسملي
اخر مرة التفتت اريد اكلة وصلت
كام وغمزلي بساع درت وجهي ومشيت وعثرت بالرصيف وتاير العربانه صار ع رجلي
صرخت
اخخخ
رطع العربانه واجة دنك علي بخوف
-ها خوما صارلج شي ؟تاذيتي
-ها اي لا
-شنو تاذيتي شو اشوف رجلج
-لا شنو تشوفها غطيتها بالعباية وجلبت بالعربانة اريد اكوم كومني
ومااحس الة صوت اخوي ريسان شنو هاي
شدسوون
شلون لازمها من ايدها
-خوية ع كيفك البنية وكعت وصارت رجلها جوه العربانه واني كومتها
باوعلي وخزرني
وانت شطلعج ولج بالشارع
-مممووو موو جبت الحصصصصة
-ليش امج متجيبها انت شكو طالعة وجاية وي الولد اني اعلمج فوتي جوه
وانت امشي يله طببها للبيت الحصة
ركضت اعرج ع السريع وطبيت للبيت
خايفة حتى وجع رجلي ماحسيته من الخوف
شافتني اية
واجت تجررر برجلها كوه
-اجيتي وين امي
-هااا
شبيج صفرة وترجفين شكوو
وكعت وكعت
طب ريسان وينها وينها
اجة علي لزمني من اذني شطلعج لج
-والله امي كلتلي روحي وياه للبيت وهي راحت تجيب التلفزيون
طلع ابوي ع صوته
ريسان شصاير شكوو
-يابة هاي شكو مطلعها وحدها
باوعلي لعد امج وين
-يابه امي راحت تجيب التلفزيون من المصلح وبطريقنا لكينا ام نادية ذابة الحصة امي كالت روحي وديها للبيت واني اروح للتلفزيون
-ها دفوتي بويه فوتي
التفت ع ريسان شبيك راعب البنية واذا طالعة وحدها قابل تنوكل يابوية
تعال اكعد
التفت ع رحمن
لك خلصت يله ورينا عرض جتافك
يابة اريدك بشغلة
-كول شبيك
-مرتي زعلانه راحت
-ليش زعلانه شسويت الها
-يابة مسويت شي بس صرت عصبي وضربتها عاد هي اخذت الولد وراحت لهلها يابه روح رجعها الي مااريد اروح اني مالي خلكهم
-انتم ماتجوني بس بالمشاكل الله واكبر عليكم اتمنى يوم تجون الي وتكللولي بويه اجينه نشوفك شمحتاج مامحتاج
بس بالمشاكل والفلوس
اية طلعت حطيت الجاي لاخوي ريسان ورحت ابوسة واسلم عليه
تقربت منه بلهفة شلونك خوية مشتاقلك
جاوبني ابرود ودار وجهه هله هله بيج
جريت نفسي ورجعت
ضل هو كاعد
-اخخخ اخخ
-شبيج ايناس
-رجلي توجعني
جانت مدنكة وكاعدة ولازمة رجلها
-عزززة هاي شبيها رجلج ماكولة اكل
-وكعت على الرصيف وتاير العربانه صار ع رجلي اخخخ توجعني بس لا انفركت رجلي
دنكت عليها افرك بيها
صار صياح ابوي وعزام
طلعت اباوع شكو اسمع ابوي يكله
حصتكم اخذتوها وبعد ماالكم شي المحل معيش خواتكم بيه شنو تردون ابيعة وشلون نعيش
-يابة نريد فلوس مااعرف النه حصة بهذا البيت وبالمحل
-انتم ماالكم اي شي وبعدين تردون تورثوني واني عدل ولكم حسبنا الله ونعم الوكيل عليكم من ولد
