رواية ومضه امل الفصل الثاني بقلم ام مصطفى
ايناس ضل ابويه يتصايح وي ريسان
-يابة مو قصدي بس انت هم ساعدنا
-لك منو يساعد منو انتوا تساعدوني لو اني اساعدكم بركبتي ٣ بنات ومعوقات خافوا الله ذن خواتكم باجر من اموت وين يرحن كلي غير انتو سندهن بالدنيا اخواتكم لولا تريد مني فلوس ليش اني شنو بقى عندي اشو بعد العندي والماعندي وبنيت مشتملات الكم وزوجتكم بعد تردون اصرف ع جهالكم ونسوانكم
وانتوا محد يكلف نفسة ويجيني للمحل يساعدني بس من تردون شي
-حقك يابة بس تعرف رواتبنا كلش قليلة متكفي وانت ابونا مو غريب ولا عيب اذا ناخذ منك
وهاك راسك ابوسة لاتزعل يابه
-استغفر الله ياربي متصير جاره الكم
-يابة هسه تروح ترجعلي مرتي
-روح واني باليل اروح عود عليها
-الله يطول بعمرك يابه
طلع
وابوي ضل يتحسب ويستغفر
طلعت اعرج
-شبيج اتعرجين خاف بس انت سالمة
-يابة عثرت ووكعت
اندك الباب
روحي شوفي منو
اكيد ابو الحصة جاب بقية المواد
-زين لعد روحي خل يفوتهن
يابة يريد فلوس حصتين
-خل يفوتهن واني انطيه
طلعت فتحت الباب
جان اشوف بس العربانه كبالي الولد ماكو
مديت راسي لكيته واكف بعيد
شافني اجة ع السريع
ها شلون صارت رجلج
عبست بوجهه زينه يله فوت المواد
-اي يله اخوج راح ؟
-شنو وانت شعليك
-شبيج خفت عليج لا سوالج شي
-لا عليمن قابل شمسوية اني
-سباعية طلعتي مو بس حلوه
-شنوو
لا اكلج افتحي الباب
ديله بالعجل اروح اجيبلك فلوس
رجعت وهو يدخل المواد
اخذت فلوس من ابوي
هاك شكرا
انت شكرا لان تعرفت عليج شسمج
-وانت شعليك باسمي صدك متستحي
سديت الباب بوجهه وفتت احجي وي نفسي شكد ميستحي ومن وراه وكعت وحصلتلي رزالة من ريسان
بالليل ابوي راح يرجع مرت ريسان واحنه كعدنا ع التلفزيزن نتفرج فرحانين كلش بيه صارلنا اربع ايام بله تلفزيون
جانت نهلة خطية سولتها بالتلفزيون لان معوقة وكاعده ع الكرسي وبس تتفرج
رجع ابوية هم عصبي كال ذول مناويين يخلصوها ع خير ولدي اني بس تخلص سالفة الحرب وامريكا ادير البيت باسمكم
احسن شي حتى من اموت اني مأمن ع هالبنيات
-عمرك طويل عيوني ابو ريسان اسم الله عليك
-الموت مابي اسم واني خايف ذول يشمروكم بالشارع ومايسئلون عنكم
احسن شي احط البيت والمحل باسمكم
-الي تشوفة سويه
-البنات وين
-مكابلات هالتلفزيون وكاعدات
-خليهن شتردين منهن مظلومات هالبنات الف الحمد الله والشكر ربي مااكول غيرها ع عطيتك
اية
فرشت ايناس فراش ونزلنا نهلة من الكرسي نومناها بفراشها ونمنا سوه وامي وابوي هم ناموا
مثل كل يوم احلم بفارس احلامي يجي ع حصانة الابيض وياخذني
دوم احلام احلام اليقظة اتخايل نفسي عروس ويجي ذاك الشاب الحلو يزوجني وياخذني وضل احلم واحلم واعيش احلامي الى ان اغفى
وغفيت واسمع صوت صياح ابوي نص الليل حرامي حرامي
كمت كوة وايناس طفرت كدامي بس اني كوه كمت
ايناس كوميني ولج شكووو
ابوي يصيح حرامي
خايفة خايفة افتح الباب
افتحي منين خايفة
لج خاف الحرامي يكمز علينا
اني كايمة افتحة انت ضلي خايفة
كمت الزم بالحايط وامشي وايناس وراي
فتحت الباب واشوف واحد ابوي لاحكة ع الدرج راد يلزمه ابوي جان هو ملثم ولازم بيده صندوك فلوس ابوية
ضرب ابوي براسة وكع ابوي
صرخنا يابة
والحرامي صعد ع الدرج يركض
ركضنا يابة يابة
وامي تصرخ ابو ريسان اسم الله عليك
كمنا نصرخ نسمع بس صافورة الحارس يفتر بالدربونه
طلعت اصرخ
الحكوا ابوي مات الحكولنا
شافني الحارس اصرخ اجة يركض
ها بوية بيكم شي
اي عمو حرامي طفر علينا وضرب ابوي
-سويلي طريق بوية
اي اي
ركضت جوه امي خالة راس ابوي بحضنها وتصرخ
نهلة تزحف وتصرخ من بعيد شبي ابوي
واية تفرج برجليه يابة كوم يابه شبيك
دخل الحارس
خير خير شصاير
-شوفة عينك حرامي باك فلوس ابو ريسان ولمن راد يلزمة ضربة وانهزم
من وين انهزم
منا
صعد يركض للسطح ورجع
كال ماكو احد
وين التليفون
بالاستقبال
راح اتصل ع الاسعاف والنجدة
ربع ساعة اجت النجدة والاسعاف والناس كعدت من صوت سيارة النجدة وسيارة الاسعاف
شالوا ابوي الاسعاف
ودخل علينا ضابط وشرطي يسئل امي شنو انباك من عدنا
امي كلتله فلوس مليونين بذاك الوكت المليونين تحجي
دخلو ياخذون بصمات ومااعرف شنو
وطلعوا
وامي لحكت ابوي
واحنا شحالنا
نبجي دم ع ابوي
ابونا حيل حنين علينا وبس هو النا صح عدنا اخوان بس ماعدهم محنه ابد علينا
-ياربي كوم ابوي بالسلامة ماعدنا غيرة وج ايناس خاف ابوي يموت شلون منو النا
-لا دكولين هيج اية ابوي يحبنا مايعوفنا
تكابلنا اتلاثتنه نبجي وخايفين حييل
فاتت جيرانه علينا
-شنو سلامات شصاير
-خالة حرامي طفر علينا وضرب ابوي
-يا صخام حرامي سنين صار هنا ماسمعنا حرامي سطة ع بيت شباگ منكم
فلوس ابوي
وين خاليهن بالغرفة بكنتور ابوي
وامج وابوج وين نايمين
هو خالة بالغرفة
-يااا هذا الحرامي يعرف مكانهن وجاي مخصوص عليهن
-شنو يعني
-هذا حرامي بيت يندل وين حاطيهن
-لا خالة هو بس اني خواتي بالبيت
-والله تحير الشغلة شلون لعد اجة كبل ع الكنتور ويندل غرفة ابوج
والله ماادري ياخالة بس احنا حييل خليفين لا يرجع خالة ابقي يمنا
-اي مو تدللين ضالة يمجن مااعوفجن والحارس هم كاعد كبال بيتكم لا تحافن يمة بعد ميرجع اخذ الي يريدهن وراح
جانت الدنيا بارده بداية الشهر الثالث ودنيا ليل جنا نرجف مدري خوف مدري برد
كالت ام احمد جيرانه
خالة دفوتن جوه للغرفة ترجفن برد
اي خالة اي
باوعت ع نهلة منو يكومها لو امي جان شالتها للعربانه صعدتها
طبيت جبت عربانتها وحاولت اكومها بس هي شويه ثكيله ام احمد ساعدتني ورفعتها وياي
-الله يساعد امجن ع هالضيم شلاع كلب خالة انتن
-شسوي خاله هيج رب العالمين كاتب النه
دفعت نهلة واية تمشي كوه وفتنا للغرفة
شغلت الصوبة وكعدنا كبالها متغطين ابطاطين
والمرة لازمة سبحتها تسبح
الى ان صار اذان الفجر
كالت اروح للبيت اصلي
لا تخافن صار الصبح ماعليجن شي واني هسه هم احجي وي ابو سعيد الحارس مايعةف البيت الة يطلع الصبح
وانتن خابرن ع اخوتجن من يطلع الصبح
-اي خاله روحي ماقصرتي ويانه
صليت
واباوع ع نهلة نامت وهي كاعده بالعربانه
شينزلها هسه
اية تكدرين اني وياج نتعاون عليها انزلها
كعديها حتى متثكل وخل انزلها
اكلج اية شتكولين ابوي مابي شي
-ان شاء الله مبي شي
زين ليش تاخروا
والله ماادري
اكلج صار الصبح اخابر ع الولد
-اي خابري روحي بلكت يرحون ويرجعون يطمنونه همة
-اي خل اروح اخابر
دتعاي انزل نهله
كوه شلناها حسينا شكد امي تعبانه سوده علي تصعد وتنزل وتسبح وتلبس اووف عمت عيني عليج يايمة
خابرت ع الولد وبلغتهم وكالوا راح يرحون
نعيم ضل يسئلني شلون هيج صار وليش
حجيتله الصار بس هو ضل يصيح علي
وسمعني حجي وسدة بوجهي
ياربي لا تخلينا تحت رحمة اخوتي لان ماعدهم لا رحمه ولا محنه يارب ترجع ابوي سالم
....
للساعة عشرة الصبح رجعت امي
كالت ابوجن حالته خطرة وصاير ارتجاج عنده بالراس وفاقد الوعي حاليا يكولون حالته خطره
تحجي وتبجي وتولول وتدعي
ادعن ولجن يرجع ابوجن سالم بلكت بيجن وحده يستجاب دعائها
-يمة منو يم ابوي
-ضلوا اخوتج هناك يمة واني رجعوني
وسمعوني حجي يسم البدن
-هم اني من خابرت نعيم يكلي فكر وراح تكرطن ابوي وضل يحجي ويصيح
-اخخخ دخيلك ربي من الجاي
بقينا يوم كامل لا اكل ولا شرب الجيران طابين طالعين واجت اختي صافي
تسئل شصاير امي سولفت الها
بعدين خلت وراحت للمستشفى
من الصبح اتصلوا علينا ع جنسية ابوي
امي من سمعت يردون الجنسية صرخت يبووووي مات اوجن مات ولجن
