رواية جثة لطيفة النحس الفصل الأول بقلم ياسر عوده
قبل ما نبداء بقول لاي حد ان القصه متذاعه بقناه على اليوتيوب ومش سامح لاي حد يخدها ويذعها.
بقلم ياسر عوده #القَصَّاصْ
الاول اذكر الله وصل على الحبيب المصطفى وادعوا لاخوانكم بفلسطين والسودان وكل بلاد المسلمين .
اتمنى منكم تعلقوا اقل حاجه 10 تعليقات ده غير التفاعل ده اللى بيشهر الصفحه واعتبروه ده تقدير من حضراتكم ليا وشكرا احبائي.
انا عمكم عرفه الزبال، ايوه انا بقولها عادي من غير ما اتحرج منها، علشان انا لو لقيت شغلانه تانيه غيرها كنت اشتغلتها، بس انا احسن من ناس كتير اوي، ومش هقول دي شغلانه شريفه والكلام ده لانها فعلا كده، بس حد فيكم عنده شغلانه ممكن تديني مرتب شهري 10 الاف جنيه وسعات 12 الف جنيه، اظن ان في ناس من اللى بتسمعني بتكمل من خمسه لـ سبعه الاف بالعافيه، يبقى بالزمه مين فينا اللى المفروض يصعب على التاني؟
الزباله دي كنز، اوقات بتطلع منها حاجات كتير اوي وانتم اللى بترموها وغيركم بيدفع فلوس علشان يشتريها، بس زي ما الزباله ممكن نلاقي فيها حاجات قيمه، بردوا ممكن نلاقي فيها مصيبه من مصايبكم، ودا اللى حصل معايا شخصيا، لما كنت بشوف شغلي اليومي وبجمع الزباله، ولما خلصت ولميت الزباله من الشقق اللى متفق معاهم، روحت بعربيتي الكارو لمقلب الزباله علشان ارميها هناك، وهناك لما اتخلصت من الزباله اللى كانت معايا انتبهت ان في ريحه وحشه اوي، مش بس ريحه الزباله، لا ريحه تانيه عارفها كويس، ريحه حيوان ميت.
المهم انا ماهتمتش في البدايه، وكنت خلاص ناوي امشي، بس عيني جت على حاجه غريبه، صندوق خشبي كبير، طبعا اول لما شوفته افتكرت انه فاضي، ففكرت اني اروح واخده واستفاد بيه، انا ممكن اعمل بيه حاجات كتير اوي، وفعلا رجعت للصندوق ده علشان اشوفه فاضي فعلا ولا جواه زباله، ولما وصلت الصندوق خدت بالي ان الريحه الوحشه طالعه منه، وقتها اتضايقت معقول حد حط حيوان جوه الصندوق وقفل عليه، ووقتها انا فكرت اني مش هعرف استفاد من الصندوق، وسبته علشان امشي بس وقفت تاني، وقررت افتح الصندوق واللى كان مقفول بقفل، وروحت العربيه وجبت العده اللى بشلها معايا، وفتحت القفل بالعافيه وكسرته وفتحت الصندوق فعلا، ولما عملت كده اتصدمت، علشان انا لقيت فيه جثه، بس ماكنتش جثه حيوان ميت زي ما كنت متوقع، لا انا لقيت جواه جثه بشريه، كان المنظر مخيف وصعب جدا، واول لما شوفت المنظر ده قررت اني لازم اسيب المكان وامشي بسرعه، ماكنتش عاوز اتدبس في حاجه، ولما خدت العربيه ومشيت وروحت البيت، وعاوز اقولكم اني طول الليل ماعرفتش انام خالص، كنت عمال افكر في الصندوق واللى لقيته جواه، بس كنت بقول لـ نفسي اكيد في حد هيشوف الصندوق وهيبلغ عنه، وتاني يوم انا بعد ما خلصت شغلي ولميت الزباله وروحت لـ مقلب الزباله، وهناك اتصدمت لما لقيت الصندوق موجود مكانه، ازاي يعني مافيش حد شافه لغايه دلوقتي، دي حاجه مستحيله اصل اللى بيرمي الزباله في المقلب ده كتير اوي، والمكان مابيفضاش، وبعدها فهمت السبب، مافيش حد بلغ مش علشان هما ماشفوش الصندوق، لا طبعا شفوه وعرفوا اللى جواه، بس كل واحد فيهم عمل اللى انا عملته، مشيوا وقالوا احنا مالنا، ليه هيحطوا نفسهم في مسأله وتحقيق من الشرطه، وحقيقي هما عندهم حق، بس لو سبناه بالمنظر ده فأحنا كده بنساعد المجرم اللى ارتكب الجريمه دي، ووقتها انا فكرت ان لازم حد يتطوع ويبلغ، ومش هينفع استنى حد تاني يعمل كده، ولازم انا اللى ابلغ الشرطه، لازم حد ياخد خطوه اجابيه، وانا قرت اني انا اللى هاخد الخطوه دي ومش هستنى حد تاني يخودها، ومسكت التليفون وبلغت الشرطه ان في صندوق خشبي موجود وجواه جثه متقطعه في مقلب الزباله، ووقتها قالولي افضل مكاني وهيجي فريق من الشرطه هيجيلي حالا.
وسمعت الكلام وفضلت مكاني، وفجأه لقيت عربيات شرطه كتير جت وحوطت المكان، وبسرعه نزل منها مجموعه وكل واحد فيهم كان عارف هو هيعمل ايه، مجموعه عملوا اللى بيسموه كاردون ومنهم اللى منع الناس تقرب، وفي ناس لابسه ابيض ابتدوايشتغلوا على الصندوق نفسه، اما انا فاتكلم معايا الضابط المسئول عن فريق الشرطه، وسمعتهم بيقولوله كريم باشا.
اول حاجه سألني:
-انت عرفه اللى بلغت عن الجثه؟
-ايوه يا بيه، واحلفلك اني ماعرفش حاجه عنه، وماليش دعوه بالجثه اللى جوه الصندوق، ومعرفش اصلا دي جثه مين.
-اهدا يا عرفى، انت هنا مجرد شاهد، يعني مافيش حد وجهلك أي اهتمام، وقبل ما اتكلم معاك في أي حاجه انا حابب اشكرك على تعاونك وانك كنت اجابي واتصلت وماخفتش من حاجه.
-الشهاده لله يا باشا انا كنت مرعوب مش خايف، بس ماكنش في حد عاوز يبلغ عن الجثه، وانا صعب عليا الميت اللى في الصندوق، وفكرت مع نفسي لقيت ان التأخير في التبليغ اكيد مش في مصلحه التحقيق اللى هيحصل.
-عندك حق طبعا، وعلشان كده انا بشكرك.
-العفو يا باشا.
-دلوقتي انا عاوزكتحكيلي كل اللى حصل بالتفصيل، واوعي تنسى أي تفصيله ولو كانت صغيره.
وابتديت احكيله كل حاجه حصلت زي ما سمعتوها من شويه، وبعد ما خلصت كل حاجه لقيته بيسألني:
-تفتكر مين اللى رمي الصندوق ده؟، او مثلا ماشوفتش اللى بيرمي الصندوق، أي معلومه توصلنا للي رمي الصندوق؟
-الشهاده لله انا ماشوفتهوش.
-طيب يا عرفه، انا عاوزك تسيب عنوانك واحتمال كبير نبعتلك نتكلم مع بعض شويه، وانت كمان لو افتكرت أي معلومه ماقولتهاش، مش عاوزك تتردد وتيجي تحكي على طول.
-تمام يا فندم.
انا مامشتش زي ما هو قالي، بس وقفت بعيد شويه، وعرفت اللى حصل في المكان، الجماعه اللى لابسين اللبس الابيض دوول بيسموهم الطب الشرعي والمعمل الجنائي، وعرفت انهم بيعرفوا كل حاجه حصلت في المكان بفحصهم للجثه والمكان، وعرفت انهم قالوا ان الجثه بتاعت وحده ست، وكمان عرفت ان القاتل كان حريص اوي، شوه بصمات يد المجني عليها، ومش بس كده دا قطعها لقطع وكمان بعد ما قطع راسها حطها في مايه مغليه لغايه لما شوه ملامحها ومخلاش حد يقدر يتعرف عليها.
انا سمعت واحد من بتوع المعمل الجنائي بيقول ان الجاني شخص فاهم يتعامل مع الجثه، بيقول انه غسل الجثه بمساحيق دمرت كل البصمات اللى كانت على الجثه، وكمان مالقوشأي اوراق او دليل يوصلهم لمعرفه صاحبه الجثه.
وحتى لما افراد الشرطه كانت بتحقق مع الناس علشان تلاقي أي شاهد ينفعهم في حل لغز الجريمه، مالقوشأي شخص شاف حاجه تساعدهم، وماقدروش يوصلوا لـ أي معلومه تفدهم، وبعدها نقلوا الصندوق والجثه اللى جواه للتشريح في اداره الطب الشرعي.
وبعد يومين لقيت حضره الضابط بعتلي مره تانيه، وروحتله لقسم الشرطه، وفي القسم انا عرفت انهم لسه ماوصلوش للجاني، ومش بس كده دوول حتى ماعرفوش مين صاحبه الجثه من اساسه.
ولما قابلت الضابط لقيته بيعرض عليا صور ناس وبيقولي لو شوفتهم في مقلب الزباله قبل كده ولا لا، بس انا معرفتهمش كلهم الا شخص واحد بس واللى يبقى اسمه فريد، وفريد ده يبقى واحد من اللى شغالين في الخرده، وبتوع الخرده مرتبطين بينا، لاننا لما بنلاقي في الزباله اللى بنجمعها حاجه تتباع خرده زي الحديد او النحاس، بنروح نبعها لبتوع الخرده، وفريد واحد من تجار الخرده اللى بنتعامل معاهم، وطبعا عرفت الضابط اني اعرف فريد لاني اوقات كتير بروح ليه ابيع الخورده اللى بلاقيها، واني اعرفه من زمان من ساعه اخوه الكبير المعلم ربيع الله يرحمه.
قتها لقيت الضابط بيقولي:
-وتفتكر واحد زي فريد لازم يروح لمقلب الزباله كل يوم علشان يباشر شغله؟
استغربت من السؤال ده وقولتله:
-هو مش محتاج يروح اصلا، معظم الزبالين بيرحوله علشان يبعوله الخرده اللى بيلقوها.
-تمام، تفتكر بقى ليه فريد كل يوم كان بيروح لمقلب الزباله؟
وقتها انا خوفت ارد عليه رد يدبس فريد، وعلشان كده سكت في البدايه، وفهم الضابط وقتها اني متردد فقالي:
-اسمع يا عرفه، انا لغايه دلوقتي بعاملك على انك شاهد، بس لو خبيت عني حاجه او حبيت تضللني، وقتها مش عارف انا ممكن اعمل معاك ايه، ومش بعيد اخليك شريك في الجريمه.
طبعا انا خوفت من كلامه وقولتله:
-لا يا فندم شريك ايه، حقك عليا ماكنتش اقصد، وحقيقي انا معرفش ليه فريد بيروح مقلب الزباله وعلشان ايه، بس اللى انا عارفه انه مش محتاج يروح هناك اصلا ومالهوش شغل هناك.
-تمام اوي شكرا يا عرفه، خليك شويه يمكن احتجلك تاني.
وفضلت في القسم وماتحركتش، وفهمت هناك ان الشرطه قبضوا على فريد لانه كل يوم كان بيروح للمقلب اللى الشرطه لقوا فيه الصندوق، والمخبرين اللى هناك شافوه وقبضوا عليه لما لقوه كل يوم بيروح، ووقتها قال في التحقيقات انه شغال في الخرده وطبيعي يروح لمقالب الزباله، بس الضابط ماكنش مصدقه وبعتلي يسألني عن الموضوع ده، وانتم سمعتم الاجابه بنفسكم، ووقتها الضابط واجه فريد وضغط عليه علشان يقول الحقيقه، وفي اللحظه دي فريد اتكلم وقال كلام تاني خالص، قال كلام صعب اوي وكان صدمه للجميع، وحتى انا لما عرفته اتصدمت لانه قال:
-الحقيقه انا واخواتي كنا قلقانين من حاجه، اصلنا سمعنا عن حكايه الجثه اللى لقتها الشرطه في صندوق في مقلب الزباله، وان الجثه دي جثه وحده ست، ولما عرفنا ان صاحبه الجثه في اواخر الاربعنات، انا واخواتي قلقنا لان ارمله اخونا ربيع الله يرحمه متغيبه بقالها كام يوم عن بتها، وكل مره نروح نسأل ونطمأن عليها مانلقهاش، وحتى لما بنتصل بيها نطمأن عليها تليفونها مقفول، وسنها نفس السن اللى بتقولوا انها للجثه، واحنا علشان خايفين تطلع هنا كنت بروح مقلب الزباله وبحاول اعرف اخر الاخبار، كنت عاوز اعرف الشرطه عرفت مين صحبه الجثه ولا لا علشان اطمأن واخواتي يطمأنوا.
وقتها الضابط سأله:
-ومرات اخوك اسمها ايه؟
-لطيفه يا فندم.
-انتم عملتم محضر تغيب ليها؟
-لا طبعا ماعملناش، احنا مش عارفين لو فعلا حصلها حاجه او لا، يمكن تكون عند اختها اللى عايشه في السويس، اصلنا كنا نعرف ان ليها اخت عايشه في السويس واوقات كانت بتزورها كل فتره طويله، وطبعا خوفنا نروح نعمل محضر في القسم وهي ترجع وتبقى كويسه، ووقتها مش هنبقا كسبنا غير الفضيحه وخلاص، احنا اصلنا صعايده يا باشا والحاجات دي بنسميها فضيحه.
وزي ما سمعتم ده كان رد فريد، والحقيقه كلامه كان مقنع جدا، وعلشان كده الضابط طلب منه كل بيانات ارمله اخوه واللى كان اسمها لطيفه، وطلب تحريات عن مكانها، وكمان طلب استدعاء اختها اللى في السويس، وعمل كده لما سأل فريد لو كانت مرات اخوه مخلفه من اخوه، بس كان رد فريد ان لطيفه مابتخلفش، وساعتها عمل زي ما قولتلكم واستدعي اختها، كان عنده احساس ان الجثه اللى لقوها في مقلب الزباله هي جثه لطيفه ارمله المعلم ربيع الله يرحمه.
