رواية مال الكنزي للنزهي الفصل الأول بقلم محمد الخواجه
كل يوم الواحد مننا بيقوم الصبح يسب ويلعن للشغل وللحياة والالتزامات اللي عليه من جمعيات بقى من مصاريفه الشخصية أو مصاريف الناس اللي هو مسؤول عنهم. ولكن بعد دقايق بيقوم يغسل وشه ويجهز نفسه وينزل يركب قطار الحياة وعلى رأي الست أم كلثوم الهوى غلابة وعلى رأي أحمد شيبة اللي له قرش مابينامش مابالك بقى من اللي عليه. وكما قال محمد الخواجه
انجز ياض وانزل الشغل عليك أقساط وهتتحبس ياض.
نبدأ اليوم الجميل وأنت نازل من بيتكم في حدايق القبة تتمخطر بالجينز والتيشرت البولو والنظارة البولس وتعدي على عمك جمعة تخطف واحد فول وواحد صوابع وتتوكل على الله تبدأ رحلتك في المترو أو في الأتوبيس المكيف أبو دورين اللي بيروح التجمع الخامس. اللي تذكرته بقت بـ 25 جنيه دلوقتي بس مش ده موضوعنا. هتلقى واحد طالع يتشحتف ويعيط وكبير في السن ويقول والله يا إخواتي مش لاقي أكل وممعيش حق العلاج ومعايا 4 بناتي أيتام بأكلهم.. أيتام إزاي يا عم الحج مانت عايش أهو. ما علينا ويلم اللي فيه النصيب ويمشي ولما الساعة تبدأ تقرب من 11 ويكون الكل راح شغله يجي عم الشحات الطيب الغلبان ده ياخد بعضه ويروح عند مدرسة محمد فريد ويخش بين المساكن يقلع الجلبية ويلبس جلبية تانية محترمة ويغسل وشه ويسرح شعره ويتوكل على الله يقعد يعد الغلة حصيلة الكام ساعة دول واللي بيكون مش أقل من 400 جنيه أو 500 جنيه في 4 ساعات عمل مش أكتر.. وهنا يجي واحد محترم أو ست طيبة بزيادة وتقولي رزقه يبني معلش أقولك التسول مش رزق والنصب باسم الله ليس له علاقة بالرزق.
الفلوس اللي خدها دي متعرفش هو هيعمل بيها إيه
بس أقولك أنا بيعمل بيها ايه. من واقع مشاهدتي وحضوري تحقيق شرطي لواقعة من دول.
بعد ما يجيب السجاير الميريت أو المارلبورو يروح يقعد على القهوة ويلعب قمار ويروح آخر الليل بلقمة والصبح يعيد نفسه الحوار تاني لأنه باختصار معندوش حد بيصرف عليه. ده بالنسبة للرجالة تعال بقى نخش على الي بدعوها وهي الحريم واللي أنا ليا معهم بدل الواقعة 50 واقعة آخرهم والله كان من شهر..
لما تقطع تذكرة وتخش المترو أنت هنا داخل عالم تاني حرفياً مش مجرد كلام عربيات مليانة ناس وكل واحد له حكاية وحدوتة اللي رايح شغله واللي راجع من شغله واللي مسافر والعسكري اللي جي من الوحدة بتاعته والعكس. ونخش بقى على الطايفة بتاعة البياعين واللي منهم ناس كتير فعلاً غلابة وبياكلوا عيش ولكن بيتحايلوا على القانون. وأنت قاعد في أمان الله تبص تلقى واحدة ست داخلة تقول ( والنبي يا إخواتي ساعدوني معايا 4 أيتام بربيهم والنبي يا إخواتي حق باكو مناديل يتعشوا بيها اليتامى.. طبعاً بصوت شحتفة ومسكنة وعياط. ومتفهمش إيه حكاية 4 أيتام دول غالباً هو ستاندرد لازم تخلف 4 غير كده مش هينفع تخش نقابة الشحاتين و تشحت سوري الشروط بتقول كده. طبعاً دي لوحدها وبتبقى ماشية بتزك برجلها عشان يا عيني مش قادرة تخدم في البيوت ولا قادرة تعمل حاجة تجيب منها قرش بالحلال. وهوبا أول ماتنزل من العربية تلقيها ولا المرسيدس c180 عشان مفيش حد من شرطة المحطه يشوفها
تعال بقى للنموذج التاني اللي تبقى طالعة ومعها 3 عيال اتنين بيشحتوا معها وواحد نايم على إيدها متخدر ولا متعرفش إيه حكايته وتسمعها وهي بتقول والله ياخواتي العيال ماكلت من امبارح والله إخواتي مادفعت إيجار البيت حن على الغلابة يحن عليك ربنا... يعلمالله أن اللي هحكيه ده حصل قدام عيني قبل العيد بأسبوع وأنا في محطة مترو حمامات القبة وجيت واقف عند آخر المحطة وجمبي معاون أمن وأنا ساعتها كنت لابس أسود والنظارة كالعادة مش بقلعها من على وشي هي كانت فكراني شرطة لأنها خبت رزمة الفلوس والعيال الصغيرة الاتنين اللي كانوا معها هم فعلاً ولادها وبدأت العيال تهزر مع بعض عيال صغيرة بتلعب ولما ضربوا بعض أقسم بالله أنا سمعت أقذر الشتايم اللي مش ممكن تخرج من مسجل خطر بس خرجت منها هي
يا ولاد الـ ويا ولاد ال... وهاتك يا شتيمة وقامت تضربها لولا أنا ومعاون الأمن وقفنالها المهم ركبت هي المترو اللي جه وأنا دخلت ولقيتها اتحولت واحدة تانية قدامي أقسم بالله سعاد حسني متعرفش تعمل الأداء التحويلي اللي عملته ده وأنا بقيت واقف مش عارف أعمل إيه أضحك وآخدها من شعرها أسلمها لنقطة المحطة بس طبعاً الناس كلها هتقولي حرام عليك ومنك لله يا مفتري ودي ناس غلابة لأن طبعاً محدش كان معايا تحت وشاف الي انا شفته وكتيررررر أوي من المواقف دي لا تعد ولا تحصى ولكن اللي لا يمكن أنسى هي الست العجوزة التي تبلغ من العمر أكثر من 60 سنة وجت وقفت جمب الميكروباص بتاع الشغل وأنا بركب وقالت بالحرف
والنبي يبني مفطرتش ولا كلت من امبارح أي حاجة لله
وفعلاً فتحت الشنطة ملقتش فيها غير 600 جنيه كلهم فئة 200 جنيه فتحت الشنطة وحلفتلها بالله فعلاً إني مش معايا والله غير فلوس صحيحة وكان الرد صاعق ( معايا فكة هات الـ 200 أفكها لك وطلعت الكيس بتاعها وفعلاً كان متروس فلوس فئات مختلفة تخيل المبلغ ده وإمتا الساعة كانت 7 الصبح
((آآآه يا قلبي يا كتاكت يامنت متنيل وساكت)))
معلش طولت عليكم في المقدمة....
من داخل مكتب السيد مساعد الوزير لقطاع الأمن العام... اجتماع عاجل لكل من
السيد مدير أمن القاهرة
السيد مدير أمن الجيزة
السيد مدير المباحث الجنائية
السيد مدير الإدارة العامة لشرطة النقل والمواصلات
مقدم شرطه منتدب من مباحث أمن الدولة..
السيد مدير الأمن العام: طيب يا جماعة محتاج أفهم حاجة واحدة بس سيبكم من كل التقارير اللي قدامي دي أنا عاوز أفهم حاجة هل ده تشكيل عصابي؟ ريا وسكينة رجعوا تاني؟ ولا ده سفاح المعادي النسخة الجديدة مانا عاوز أفهم.
مدير أمن القاهرة : معالي مساعد أرجوك اهدأ والله إحنا شغالين تحريات مش ساكتين ومفيش أي دليل جنائي من الأصل الوفاة طبيعية جداً ولو أن الأعراض اتكررت مرتين في نفس اليوم في نفس المستشفى ده اللي خلى الدكتور يبلغ أن فيه شبهة جنائية يعني غير كده مكناش هنعرف أصلاً..
مدير الأمن العام : وادينا عرفنا يا سيادة اللواء عندك حل؟
مدير المباحث الجنائية: لو تسمحلي يا سيادة اللواء أرد أنا على السيد المدير.. يا فندم التحريات اللي إحنا شغالين عليها واللي التقارير بتاعتها قدام معاليك بتقول إن في نمطين بس ربطوا ما بين الضحايا
المدير : إيه هو؟
مدير المباحث الجنائية : السن والتسول
سن الضحايا كلهم ما بين 45 لـ 60 سنة وأحياناً بيكون أكبر من كده تحرياتنا أثبتت إن كلهم بيعملوا في التسول ما بين المترو والأتوبيسات ولذلك أنا طلبت من سيادتك حضور سيادة اللواء حافظ بكونه مدير شرطة النقل والمواصلات لأنه هو الوحيد اللي في إيده يساعدنا
مدير الأمن العام : يا شريف بيه كل ده على عيني ورأسي أنا عاوز خطة عاوز خيط عشان نتفق كلنا نمشي وراه..
مدير المباحث الجنائية : المجرم بيختار الضحايا مابين القاهرة والجيزة وده اللي عرفناه بعد ما أخطرنا كل المستشفيات بأعراض الموت اللي اتكررت مع الحالتين
حالتين في القليوبية ودول من القاهرة بس بيتسولوا في القليوبية مركز الخانكة
حالتين في الجيزة
وحالتين في القاهرة
الطب الشرعي بعد التشريح قال إن سبب الوفاة هو
وجود بودرة زجاج مضاف إليه بعض الكيماويات ومضاف إليه زرنيخ بنسبة بسيطة جداً لاتتعدى 3 مللي
وده بيعمل عملية تجانس مع البودرة. بمعنى
الزجاج ده مش زجاج حي ده زجاج سيكوريت بيطحنه لحد ما يوصل لقوام البودرة ويبدأ يحط منه حاجات بسيطة في المشروب.. وبعدها بيوم أو اتنين يحط بودرة تاني بنسبة بسيطة برضو. وتالت يوم يحط 2 مللي أو 3 مللي زرنيخ في مشروب برضو لما الزرنيخ يوصل للبودرة اللي بتفضل مترسبة في الجسم وبتعمل إمساك شديد جداً بمجرد وصول الزرنيخ تبدأ الملحمة تشتغل بعد ساعة البودرة تتحول لأجسام مدببة تجرح المعدة بالكامل تهتك في جدار المعدة ولو حاول الشخص إنه يرجع بيموت في الحال لأن الشظية اللي اتكونت دي بتقطع المريء والقصبة الهوائية وتفرتك كل اللي هتقابله من المعدة لحد ماتخرج من الفم.
مدير الأمن العام : السؤال هنا بيستفيد إيه من قتلهم
مدير أمن القاهرة : في الواقع يا فندم لحد دلوقتي مش عارفين سبب محدد تحرياتنا بتقول
(يرن جرس هاتف المكتب)
مدير الأمن العام : أيوه.... إمتا وفين؟ طيب تمام مش عاوز حد ياخد باله الإسعاف تشيلها وانقلوها بسرعة إلى أقرب مستشفى حكومي وتحت حراسة وإن فضل فيها الروح بلغوني
مدير المباحث : خير يا فندم
مدير الأمن العام : عدد الضحايا وصل كام دلوقتي
مدير المباحث : 6 يا فندم
مدير الأمن العام : ولسه هيزيدوا ربنا يسترها بقى
في واحدة متسولة حصلها نفس الأعراض وقيء دم وقعت في محطة عزبة النخل وحالياً في غرفة الإسعاف
شوفوا بقى كل واحد منكم هيختار أفضل راجل عنده ويتكون فريق بحث وتحري الكل يتعاون والفريق هيكون تحت قيادة سيادة المقدم. أنا نسيت أعرفكم بالمقدم
مراد الخواجة من مباحث أمن الدولة
مراد: الحقيقة يا فندم أنا مبسوط جداً بفكرة حضرتك في إنشاء الفريق كده هيسهل علينا كتير..
يرن واتساب هاتف مراد الخواجه
مراد الخواجة مبتسماً : أقدر أقول إني وصلت للخيط اللي هنمشي وراه يا فندم..
مدير الأمن العام : عظيم جداً إيه الخطة
مراد: هنبدأ من....
