رواية قدر مكتوب الفصل الأول بقلم ام مصطفى
رند
ماما شوكت نروح لبيت جدو مو كلتي ع عطلة نص السنه وهاي صارت خل نروح عفية ماما
-اي ماما ان شاء الله بابا هاليومين ياخذنه ان شاء الله
-هي هي هههي واخيرا راح نروح للفلوجة مشتاقين لبيت جدو
-اي والله اني هم مشتاقة لامي وابوية هواي
دروحي شوفي اخوج سيف وين
سيف يلعب اتاري بالغرفة كالعادة
-زين لعد ادخلي اسبحي حتى يجي بابا ونتغدة
-اي صار
ثاني يوم
الاب
-ربيحة حضري نفسج باجر باجر الفجر نطلع لللفلوجة
-صدك غير تكلي من وكت
-هسه يلة كدرت ارتب اموري باجر اوديكم وارجع
شكد راح تبقون هناك ؟
-اسبوع وتعال النا
-ان شاء الله
زين لعد رتبوا اموركم ونومي الجهال من وكت حتى يكعدون من وكت
-اي ان شاء الله هسه يفرحون حيل خصوصا رند
الام
-رند سيف وينكم ماما يله حضروا جنطتكم وملابسكم باجر الصبح نطلع لبيت جدكم
-صدككك هييي
رند
ركضت طلعت جنطتي الي دائما من اروح لبيت جدي اخذها وياي
خليت ملابس ولعابتي الي جابها بابا الي بمناسبة عيد ميلادي
جنت اريد اشوفها لبنت خالتي سها جنت اني وسها صديقات كولش
ليهسه اذكر لعبنا وزعلنا ونرجع نصالح
وجنت كولشي اشوفها اذا جابلي بابا هديه
بذاك الوكت جان عمري سبع سنوات ثاني ابتدائي
وسيف صف رابع
كلش زين اذكر ذاك اليوم ومدا يروح من مخيلتي
يمكن منمت للصبح رغم امي كالت نامو من وكت
بس اني ابد منمت انام وافز اباوع بلكت طلع الفجر الى ان سمعت صوت بابا طلع للحمام يتوضأ ويحمحم
بسرعة طفرت وفتحت الباب
شافني ضحك
-ياملعونه جنج منايمة ابد اليوم
-كمت افرك بعيوني
بابا طلع الفجر لولا
-اي طلع
تقدم علي وباسني يله حبيبتي روحي غسلي وتوضي وصلي حتى نوصل بالسلامه
-اي بابا صار
وسيف كعدي
-بابا سيف تنبل ميكعد انت كعدة
-ههههه حقج صدك تنبل اني اكعده انت روحي غسلي
عفت بابا
وصارت امي بوجهي تشيل بشعرها بالقراصة
-هاولج هاي كاعده انتي
ابتسمت بخجل
-اي ماما
-جنج منايمة
-لا لا نمت بس كعدت
-اكص ايدي اذا نمتي
دمشي غسلي وتوضي
ركضت للمغسله اغسل
ورجعت بسرعة لبست حرام الصلاة وكفت ورة امي الي فرشت سجادتها وبدت تصلي واني فرحانه جنت بالي كلة يم الروحة للبيت جدي
خلصنا وامي دخلت للمطبخ تسوي الريوك
وخلت لفات النه كالت خاف تجوعون بالطريق خلتهم بحافظه
وحطت الفطور
كعدنا ناكل سيف حجة
بابا شكد راح نبقى هناك
-اسبوع واجي عليكم
-زين بابا يصير اخذ،الاتاري مالتي وياي نلعب هناك بي اني ومحمد ابن خالي
-ميخالف اخذة بس حافظ عليه كو تعطلة لو تعطل اليدات وتعال بابا جيبلي غيرة
-لا لا اوعدك بابا راح احافظ عليه
-خل نشوف
يله استعجلوا حتى نوصل من وكت الدنيا جنها راح تمطر اشو غيمت وصار بيها هوة عالي
-الام
اي صح ابو سيف اني اجيت اكلك جنها راح تمطر
-عادي حتى لو تمطر بعد اني اخذت اجازه مااكدر اتعطل اليوم يله استعجلوا خل نطلع
-
بسرعة لبسنا وماما طلعت الجنط وسدت البيبان
قبل لا تطلع التفتت ع البيت بس مااعرف شكالت
وبقت تباوع ع البيت مااعرفت شنو من نظرة عبالك جاي تودع البيت او هاي اخر مرة تشوفة
بينما جان بابا مستعجل ويدك هورن
سيف شايل كارتونة الاتاري وصعد
واني اخذت لعابتي وياي الي جابها الي بابا
صعدنا ليوره اني وسيف وماما يم بابا ليكدام جانت الدنيا حيل بارده شهر الواحد وبرد يموت
امي لبستنا قبابيط ثخينه كولش
جان قبوطي من فرو وحتى الكلاو من فرو ولابسته اني ابد منزعته
طول الطريق ماما وبابا يحجون بينهم
سيف نزع قبوطة كال حاره صارت
بس اني جنت بردانه منزعته بدت تمطر الدنيا وصارت هوه وضباب
انعدم الرؤيا بوكتها بابا كال
كلشي مجاي اشوف من الضباب
جان بالي كوله شوكت نوصل واشوف لاعبتي
مااحسيت اله السيارة كامت تمشي سريع
وماما تعيط بعدها صارت ضربة كلش قوية
وماحسيت اله اني بالمستشفى
بابا ماما سيف وين انتوا
ماما راسي يوجعني وينج
اسمع صوت
صحت كعدت
وفكاي دكاترة اثنين فتحت عيوني شفتهم
-بابا شسمج انتي
ضليت ساكته بس اتلفت خفت مااعرف شصار شجابني ياربي اني اتحلم لو شنو
اجتي دكتوره
ها صحت
خلت ايدها ع كصتي حبيبتي انت شسمج ؟
باوعت الها
رند
-عاشت الاسامي حبيبتي
-وين ماما وين بابا ؟
حبيبتي بابا ماما زينين لا تخافين بس انت تندلين بيتكم
اي
وين
بغداد بالغدير
-ها زين حافظه رقم تليفون
-لا كلهن مبايل بابا وماما
التفتت ع الدكتور اليمها مااعرف شكلتله
ورجعت علي ارتاحي ماما
-دكتورة وين امي خل اروح الهم
حبيبتي همة يجوج هسه انت بس ارتاحي بعدج تعبانه الله نجاج من الموت
غطتني زين
وطلعت هي ودكتور
ضليت ادير بعيوني حاولت اتحرك بس رجلي مكبسة جانت
بقيت اتذكر شجابني شصار
اذكرت الضربه القوية وصريخ امي
معقولة انكلبت السيارة بينه
-اي اي وماما بابا هم اكيد تاذوا نفسي
غفيت وماافزيت اله نص الليل وبعدني بنفس المكان هنا مااعرف ليش كمت ابجي اريد ماما اريد بابا
دخلت علي غير دكتورة
هاي ليش تعيطين شبيج
-اريد امي
-حبيبتي ارجعي نامي ولا تبجين الصبح يجون اهلج ياخذوج ان شاء الله
-لا هسه اريدهم اخاف انام هنا وحدي
-حبيبتي هسه دنيا ليل الصبح ان شاء الله يجون اهلج ويشوفوج
اتصلنا بيهم وراح يجون انت بس نامي هسه
يوجعج شي اي راسي حيل ماذيني هسه يطيب من تنامين طلعت ابرة من جيبها
وضربتني بعدها نمت صحيت ع صوت عمو لؤي اي هاي رند بنت اخوي
سمعت صوته فتحت عيونه وشفته عمو وين ابوي
