رواية سواد الاثمد الفصل الواحد والعشرون بقلم نورس
جر مسدسه سحب أقسام أحس الدم جمد بجسمي
اجه لزمني من شعري أخذني سحل بالگاع طلعني من الغرفة وسط صريخي اللي ترس الشقة خلاني بالباب لزمت ايده أتوسله ودموعي تنزل
بان :- عليك الله لتكتلني والله ممسوية شي والله
عيونه شايطة صاير نار دنك جرني من متني گومني غصب عني وسحلني وراه طلعني برة الشقة
أمشي وأعثر صايرة وراه وهو گدامي يمشي سريع ما ألحك بيه نزلنا الدرج وكم مرة بمرة تعثر رجلي بالباية واجي إلا شوي اوگع لوما هو لازمني بآخر باية جانت عالية انلوت رجلي بيها عطت
بوجع ما اهتم لصرختي
أخذني للسيارة ودفعني فتح الجنطة وصار گبالي
أشرلي بالمسدس :- اصعدي لج
- وين ماخذنـ..
قبل لا أكمل الحجاية رفع سلاحه رمى طلقة ليفوك ورجع خلاه بوجهي منيشن عليَّ گال بتحذير
- الطلقة الثانية بيج ماريد ولا نفس اصعدي يلا
سويت مثل ميريد شهگتي لازمة صدري گعدت بالجنطة ورفعت رجلي تقدم بأتجاهي دفعني حيل وسدها عليَّ
أسمع صوته وهو يخابر جان عالي يصيح ويفشر ويسب لسانه ما سكت ولا لحظة لحد محسيت عليه يصعد شغل السيارة ومشت بينا لزمتني الرجفة تمددت تكورت على روحي بالجنطة ظلمة سواد بسواد ما أگدر أشوف شي صوت أنفاسي عالي گلبي يدك يدك سريع حيل
للحظة حسيته حيطلع من صدري من الخوفة الجنت عايشتها بساعتها ماكو براسي غير فكرة وحجاية وحدة
ماخذني حتى يكتلني ويشمرني بدون لحد يدري
اختنگت العرق صار يتصبب من كل وجهي خوف ورهبة من الموقف ما أدري بيه وين ماخذني وشيدور براسه
ما أدري شگد مر من الوكت بس فوك الساعة والسيارة تمشي موگفت أبد الطريق النمشي بيه طسات كل شوي تگبن بينا السيارة تصعد وتنزل انخض جسمي خض
لحد ورى فترة يلا حسيت عليه وگف وأسمع صوت الباب وهو ينسد حيل ثواني وانفتحت الجنطة
صار گبالي نفس ملامحه ونفس الإنفعال بعده عليه
عبد الإله :- انزلي گدامي
من شافني متحركت وضالة صافنة بوجهه جرني من ايدي نزلني حيل مسيطرت وگعت من الجنطة للگاع
سدها ورفعني وگفني رجلي گوة واگفة عليها مأذيتني
دفعني بطرف المسدس من چتفي
صاح :- امشي يلا
مشيت گدامه رجلي موتتني متحملت الألم وگفت رجع دفعني بنفس الحركة درتله وجهي دموعي تنزل
- والله ما أگدر أمشي رجلي دتأذيني
- طبج ألف وجع مو شغلي گدامي يلا
كملت مشي هو يدفع يريدني أمشي سريع واني گوة أجر بروحي جر خطفت بنظرة سريعة عالمكان الأحنا بيه أشجار بكل مكان داير مدايرنا السيارة عفناها ورانا بين الزرع وماشين بأتجاه بيت متوسط المكان صاير طابقين
الطريق اللي يوصل للبيت ضيك تراب على طوله وظلمة الدنيا ليل ما تسمع بس صوت شوشرة والهوى يعصف بأوراق الشجر تتحرك وكأنها تهمس بشي مو مفهوم
الجو كله رهبة ظلمة ما أشوف شي گدامي ضوة القمر ينسل من بين فروع الأشجار ضواه معكوس عالبيت راسم ملامحه يبين من بعيد مثل الخيال شبابيكه سود وأظلم تحس وراه عيون تراقب كل واحد يقترب منه
وسط الظلمة الأحنا بيها جان فلاش موبايله لازمة يضويلنا الطريق واحنا نمشي لحد موصلنا للباب
مد ايده لجيبه طلع مفتاح ومد ايده من وراي صار يفتح بالقفل فتحه وشاله شمره ودفعني ليجوة بالظلمة
من شفته دار وجهه طلع وسد الباب وراه تهسترت گمت وراه أدك عالباب وأبجي أتوسله حتى يطلعني مناه
ماكو ماكوو صوته عافني وراح هنا، گعدت للگاع ظهري عالباب ولامة رجلي لصدري مغمضة عيوني حيل بخوف
صارت تجيني أفكار وتخيلات جانت كفيلة تخلي جسمي كله يرجف مثل السعفة فزيت من سمعت صوت الباب وراي وهو يتحرك على كيف مثل واحد يدفع بيه
انكتمت حتى النفس گطعته وضليت بمكاني متحركت
الدفع عالباب صار أقوى وتأكدت أكو واحد وراه من برة يدفع بيه مجان ببالي هو لحد مسمعت صوته صاح
عبد :- الثولة وخري من الباب خلي أفوت
وخرت ايدي من حلگلي شهگت وجريت النفس وگمت بسرعة وگفت گبال الباب فتحه صار گدامي ما أشوف منه شي غير ظله لازم الفلاش ومخليه بوجهي
سد الباب وقفله ومشى تعداني وفات ليجوة مشيت وراه لا إرادي بسرعة أعرج برجلي مدا أگدر ألحك بيه
وگف گبال كابينة الكهرباء رفع الجوزة اشتغلت أضوية البيت ونور المكان سد الكابينة واندار شافني وراه
خفت من نظرته الي تراجعت كم خطوة ليورى
گال :- لا تخافين هواي انتِ
- والله مسويت شي ليش متصدگني
اجاني من ورى جرني من رگبتي ومشى وهو يحجي
- تعاي نتحاسب عليهن وحدة وحدة وعود أفكر أصدگج لو لا
فتح الباب دخلني للمطبخ دفعني للگاع جر واحد من الكراسي مال طاولة الطعام وگعد عليه مگابلني
انداريت بكل جسمي عليه واني عالگاع شفته طلع باكيته سحب جگارته وطلع الجداحة حتى يورثها
شغلها وجر نفس منها ونفخه عينه مشالها عني
أشرلي بيده :- احجي يلا جاي أسمع
- شأحجي
- لتثوليها لج ثقي بالله الكريم ألزمج أربطج حالج حال البهايم برة بالهيمة أخلي الچلاب السايبة تاكل بيج
بللت شفايفي سرت قشعريرة بكل جسمي من كلامه سحب نفس لاخ من جگارته وكمل على كلامه
- احجي فضيني لتخليني أعرف بطريقتي لأن بساعتها صدك ما أرحمج احجي شلون وصلتي البلاغ للشرطة
- ما أدري مخابرت أحد ولا بلغت ولا أدري بشي
دفع الكرسي وگاملي لزمني من فكي جابني براشدي فر راسي بيه ورجع لزمني عدلني خلى وجهي گبال وجهه
- للمرة الأخيرة أگلج احجي قبل لا تگب عندي وأجر سلاحي أفرغه براسج
ايدي لازمة ايده أحاول أخفف قبضته على فكي
نزلت دموعي :- ما أدري ما عندي شي أحجيه ولا أعرف أي شي من اللي دتگوله
رجع ضربني راشدي سطرني ويَّ الكاشي عدل وگفته
- حلو الحجي بس إذا رجعت وعدت تسجيل الكامرات مال شقة ولگيت الج ايد بالسالفة ثقي راح أخليج تتمنين الموت بكل ساعة وما تلاگيه
- شتريد تسوي سوي اني ما عندي شي أضمه
- لا والله وبعدج مصرّة سهلة أرجع وبعيني اني متأكد انتِ وراها وانطيتج فرصة عسى ولعل كلامج يشفعلج عندي بس بعيني بانوو
- سوي اللي تريده ولو أذيتني وكتلتني واني مالي ذنب بالصار خطيتي برگبتك ليوم الدين لأن مالي ايد بكل اللي حجيته
مسحت الدم من خشمي وباوعتله :- روح شوف المنك وبيك منو الباعك وبلغ عليك وعلسك هيج لتجي بس عليَّ شفتني على گد ايدك وعايف الباقين يصولون ويجولون براحتهم
- أحلف عليج ماكو غيرج مسويها بس اصبريلي أخلص البيدي وأتفرغلج
حجاها ومشى للشباك مال مطبخ يجر بيه يشوفه ينفتح جان مسدود حيل ولا تحرك عافه واندارلي أخذ أغراضه
طلع وقفل الباب مال مطبخ من برة واني بيه
حركت روحي بالگوة گمت على حيلي أباوع من الشباك ظلمة بس أضوية البيت مضوية المساحة الأحنا بيها الداير مدايرنا كله أظلم السيارة صايرة من الجهة الثانية
گعدت للگاع رجعت راسي ليورة نزف خشمي مگاعد يوگف كل شوي أرفع تيشيرتي أمسحه ويرجع ينزل
باوعت للتيشيرت اندمر صار كله دم گمت أدور بالمطبخ أريد كلينكس وصلة أي شي أمسح بيه الدم من خشمي
فتحت الجرارات مال كاونتر دورت بيهن ايدي صار بيها تراب المكان مجان قديم بس مبين متروك صار فترة
فتحت وحدة من الخانات لگيت علبة إسعافات صغيرة جريتها طلعت منها گطن وگعدت عالكرسي لازمة خشمي لزمت رجلي اللي انلوت عضيت شفتي حتى ما أگدر أضغط عليها من الوجع رفعتها خليتها على كرسي ثاني
كل خطوة عليها جنت أحسها عقوبة الي الرجل مو ثابتة كلما حاولت اوگف عليها تخوني تصير ما تحملني حرارة أحس تسري بيها ونغزات مثل النار تدك بالعظم
حاولت أتناسى الوجع وگمت لحيلي صرت أدور أي شي ثگيل يساعدني حتى أكسر شباك المطبخ طلعت گدر صرت أضرب عالشباك بكل قوتي يا دوب انفطرت الجامة فطر بسيط نزلت ايدي فحطانة مدري هو الشباك صار هالگد قوي لو اني ايدي جانت خاوية متعيني
شمرت الگدر من ايدي ورجعت لمكاني خايبة دنگت راسي عالطاولة أبجي على حالي وللمكان الوصلتله
معقولة ماما ما درت ما عرفت باللي ديصيرلي ما حسها گلبها هيج اني منسية عندها ومگاعد تذكرني
ضليت على وضعي مدنگة دموعي تنزل أنحب من الوجع
لحد مفزيت عالباب وهو ينفتح رفعت راسي بسرعة
أباوعله نظراته تريد تطلع بروحي صار يروح ويجي بالمطبخ متخصر والأيد الثانية يمسح على وجهه بتعب
نظراتي جانت تراقبه يروح يمنى ويجي يسرى لحد ما استقر بمكانه ووگف گدامي خلى ايده عالطبلة دنك
باوع بعيوني وگال :- تسجيلات الكامرات مال ليلة البارحة وينهن بانو
- ما أدري
ما شلت عيني ولا كسرت نظراته شاال ايده قربها من وجهي يريد يلزمني غمض بسرعة ونزلها يحاول يلزم نفسه عني ويتمالك أعصابه هدئ وجر نفس
- شوفي شوفي أنطيج كلمة إذا حجيتي وما ضميتي شي عليَّ ما أأذيج ولا أمد ايدي بس گوليلي شلون بلغتي
كزيت على أسناني :- ما عندي شي أحجيه لأن ما عندي شي ضامته عنك أستوعب هالكلام وبطل من هذا التفكير المريض والشك اللي مالي راسك
اول محجيت هيج سطرني براشدي بكل قوته أفتر راسي وافترت الدنيا بيَّ أباوع للمكان أحاول أسيطر على الدوخة اللي اجتني عيوني مغوشة ما أميز شي
صارت الدنيا سودة بعيني ومسيطرت أكثر غمضت عيوني مغمي عليَّ شهگت بنفس اللحظة وفزيت
مَي بارد تارسني بلل ملابسي وهو گبالي بيده الگلاص
عافه عالكاونتر ورجع اندارلي :- هسه تحجين لو شلون
نزلت دموعي الوجع بكل جسمي رجلي صرت ما أحس بيها فقدت عليه وصرت أصيح
بان :- انتَ واحد مريض گتلك والله ما أدري كافي راح أموت جوة ايدك كافي
- عساج وأبو زايد
حجاها ودفعني من متني ليورى صرنا اني والكرسي سوة وانگلبت ليورى عالگاع تكسرت تكسير
انتهيت من الوجع گعدت لازمة متني أون من ألم جسمي
فتحت عيوني شفته جر جداحته واجاني
انخمش گلبي وزحفت ليورى گعد ركبه ونص ولزم رجلي جرني رجعني عليه وشال الجداحة شغلها وقربها
- هسه تحجين لو أچويلج لسانج أخليج تنخرسين من صدك
- والله حرام عليك لك خليلك بس موقف يشفعلك عندي بعدين
أحجي وأشهك وهو براسه سالفة وحدة شلون بلغتي
من شاف الضرب والصياح مجابوا نتيجة شغل الجداحة ولزم ايدي قربها مني حرگني عطت وجفلت بسرعة
لزمت ايدي ضميتها بحضني دموعي مسكتوا رجع لزم شعري قربني عليه وشغلها قرب النار عليه من ورى
رغم وجع رجلي بذيج الساعة والحالة الجنت بيها اتناسيتهم كلهم من تقرب لشعري وشميت ريحة الحرك
طفرت على حيلي رجعت ليورى ورجعت وگعت واعيط
- لا إلا شعري ليش هيج حيوان هستوة بدة يطول ولك ليش شسويتلك گتلك مو اني حلفتلك مو اني ليش تسوي هيج
اتهسرت بالگاع وأتلمس بشعري الريحة ترست خشمي صرت ألزمه أريد أعرف مكان الحرك أكو جهة من الطرف احترگت دا أحس بيها ميبسة واني ألزمها بيدي
ضليت أبجي بالگاع وأغلط عليه بصوت ناصي انهديت بيه ما همني يسمعني لو لا كل فكري جان بشعري
من شافني حالتي گام على حيله أخذ المطبخ تكسير مخلى لا ماعون صاحي لا غرض الكراسي شالهن وشمرهن انگلب غول يهاجم أي شي گباله وصوت صياحه العالي تارس المكان
دك تليفونه هدئ ووگف من سمعه يرن اجه أخذه باوع بالأسم ورجع باوعلي فاتح عيونه حيل صاح بوجهي
- انگلعي من گدامي للغرفة گومي ولي من وجهي لتخليني أشوفج لا أجرم بيج بهالليل
گمت أجر بروحي طلعت من المطبخ وهو التهى يخابر
أمشي بالبيت وگفت أباوع داير مدايري اجت عيني عالباب اللي دخلنا منه دا أمشيله اجاني صوته من وراي
صاح :- اني شحجيت
باوعتله ضليت صافنة بوجهه
نزل التليفون واجاني يجرني من ملابسي :- لج بابا امشي لتطلعين گبالي انتِ ما رايدة روحج ولي
حجاها ودفعني عالدرج لزمت بالمحجر
صحت بيه :- شبيك ما أندل وين اروح
أشرلي بيده :- انگبري فوك يلا گدامي
انداريت وصرت أصعد الدرج أحاول أسرع بس رجلي مدا تعيني عالصعدة على ما خلصت الدرج روحي طالعة
مشيت شوي ليگدام ليجي يلحگني ويشوفني واگفة بنهاية الممر صارت بوجهي غرفة فتحت الباب فتت بيها
كفختني ريحة قوية انگلبت معدتي رفعت ايدي سديت خشمي وطبيت ليجوة أباوع بيها جانت غرفة شبابية
جرباية نفر واحد كنتور صغير أبو خانتين ميز مراية فارغ ما عليه غير فرچة شعر وعلبة جل أصفر
المراية جانت متربة والأثاث مثل الحال انتبهت گعدت عالجرباية وعيوني تتجول عالغرفة انداريت وراي شفت بطالة شرب بالگاع ورى الجرباية وكم ماعون بيه گشور كرزات وگلاصات قديمة سديت عيوني حيل
رفعت تيشيرتي :- شنو هاللعبان نفس هذا يا ربي
گمت لميز تواليت وگفت گبال المراية مسحت التراب العليها بيدي وباوعت بيها نكتتها بسرعة بملابسي
تقربت أدور براسي أريد أشوف الصفحة اللي حرگها ماخذ منها شوية من جوة من الأطراف عضيت شفتي بقهر صار شهور أنتظره يطول ويجي بلحظة يحرگه
سمعت أصوات جاية من جوة بس مو من داخل البيت الصوت جان برة مشيت للشباك وخرت البردة أباوع
سيارتين واگفات جوة گدام البيت و واگفين مجموعة يطلع بيهم خمسة لو ستة ما ميزت شفت عبد طلع برة
وگف يحجي وياهم واحد منهم رفع راسه لفوك انتبهلي
رديت البردة بسرعة ومشيت گعدت عالچرباية عيني صارت على رجلي صايرة حمرة وأحس بيها مورمة
ورى شوي انفتح باب الغرفة يدور بعيونه لحد مصارت عليَّ اجاني لزمني گومني أخذني وگفني يم الشباك
- جاي تشوفين ذولة محاوطين البيت من كل صفحة وصيتهم بس يشوفونج عاتبة رجلج برة باب البيت يرفعون سلاحهم يرمونج بدون ميسألون
شد على قبضة ايده أكثر ويحذرني :- يعني درب الشردة طلعيه من راسج لأن تاليتج مكتولة
- افتهمت بس ايدك عووف شعري دتأذيني
- يابة إذا ما أخذته الج عالصفر ما أتسمى عالزلم
نترني حيل من ايده وعافني وطلع من الغرفة
لزمت راسي بوجع وباوعت وراه صفگت ايدي وغميته
مشيت لمكاني أدردم :- الأغبر عباله راح تفوتني سالفة الكامرات وأعوفله لزمة وراي أتفل بخلقتي إذا ما اني شلت شاربك بالقندرة اني الك
ضليت بالغرفة لأكثر من ساعة من شفته طول ما اجه وموگف جماعة لازميلي الباب عرفته طالع من البيت
تمددت عالجرباية الليل كله ردت بس تغمض عيني الوجع ياكل بجسمي أكل وألم رجلي عبالك هسه صحى
ضليت ألوب واتگلب بمكاني ما أدري شوكت غفيت
فزيت من نومتي على نفس الوجع باوعت للشباك بعدها الدنيا ظلمة حركت روحي وگمت من مكاني طلعت من الغرفة أباوع بالممر أدور على حمام
الأضوية جانت مشتغلة وماكو صوت بالبيت اطمئنيت ومشيت طلعت أمشي بالممر صار الحمام بوجهي
احتاجيت أذب على جسمي مَـي بارد قفلت الباب ونزعت ملابسي علگتهن لا يلوحهن المَـي ويتبللن
فتحت الدوش نزل بالبداية منه مَي أصفر ما عرفته تراب لو صدئ انتظرته لحد مصار صافي ودخلت جواه
غمضت عيوني حيل ورفعت راسي أمرر ايدي على جسمي على كيفي ضليت فترة واگفة جوة الدوش
سديته وما انتظرت جسمي ينشف لبست ملابسي وهو مبلل وطلعت من الحمام حاضنة روحي أطگطك
سمعت صوت حركة وراي انداريت بسرعة بفزة صار بوجهي عطت شال ايده خلاها على حلگي يسكتني
گلبي يدك سريع من الهبطة شلت ايده جريت نفس دا أمشي منه حاوط خصري وجرني عليه قربني أكثر
لزمت ايده اوخر بيه وأحجي وياه
بان :- عبد شبيك وخر
يباوع لعيوني ركزت بوجهه انتبهت وجهه وعيونه حمر يغمض ويفتح بثگل شال ايده يحركها على وجهي
بس الريحة مجانت طبيعية
گتله :- انتَ شارب
قرب وجهه مني رجعت ليورة وأدفع بيه أريده يوخر لزمت ايده ونترتها بكل قوتي ثگيل ما أگدرله
وگف لازم راسه دايخ گوة مسيطر على وگفته
رفع راسه يباوعلي :- تحلفين مو انتِ المبلغة
- استغفر الله يا ربي حتى وانتَ مو بوعيك مو حلفت وگتلك مو اني افهم يا بشر مو اني
صاح :- ومنو گلج ما واعي كل حركاتج مراقبها وواعيلهن ولا تغفل عيني منج
سكت شوي وگال :- الدوريات الحاصرت المكان طالعة من المركز اللي يشتغل بيه فدار الأنباري تدرين لو لا
- لا
ضحك وهو يهز راسه :- چذابة والله
- مدا أكذب
- لعد شنو من صدفة هاي يعرفون موقع التسليم وبيش الساعة بالضبط ومو أي مركز لا إلا اليشتغل بيه الأنباري تردين تقنعيني كل هذا مالج ايد بيه
ضليت ساكتة أباوعله بعدها حجيت
- شلون راح أگدر أوصل لرقم فدار شمدريني عنه
- مو إلا فدار تخابرين امج مثلا وتگوليلها تبلغ بمكانج
بللت شفايفي بلعت ريگي واني أباوعله
- ممخابرتها ولا عندي تواصل وياها
باوع بوجهي لثواني طويلة وكأنه يريد يقرة عيوني اجاني أخذني من ايدي ومشى بيَّ للغرفة عرفته على شنو ناوي صرت أحاول أفلت ايده أريد أشرد
سبقني وحاوط جسمي رفعني من الگاع دخلني للغرفة گمت أشمر بجسمي وأصرخ شال ايده سد حلگي
شمرني عالجرباية گمت بسرعة واندار هو عالباب يسده ورجعلي صار يتقدم عليَّ واني أرجع ليورة
نزلت دموعي :- عليك الله لتجبرني والله أسوي أي شي تريده مني بس لتتقربلي ما أشرد بعد والنبي
صرت بينه وبين الحايط ماد ايده حاصرني ومدنك
عبد الإله :- انتِ متشردين
- اي والله أبقى يمك بعد وأگعد ساكتة ما أسوي شي
ضحك :- اني أگلج تسويها
- لا والله ما أسويها ما أعيدها بعد التوبة والله
- والله تسويها حفظت سوالفج
صار قريب حيل أنفاسه تضرب على بشرتي درت وجهي للجهة الثانية يطبع بوسات بطيئة على وجهي وصار ينزل لرگبتي أحس بملمس شفايفه على جلدي
تكش روحي وتلعب نفسي بالزايد فوك ريحته اللي تلعب النفس خليت ايدي على صدره حتى أدفعه لزمني يمنعني وجرني حيل بأتجاه الجرباية دفعني عليها
صرت أجر بروحي أريد أفلت وهو فوگاي ينزع بقميصه دموعي مبطلت صراخي ما وگف محد اجاني وشافني ليش دا أصرخ ما هزته دموعي ولا صوت شهگتي
استسلمت جوة ايده يحركني شلون ميريد غمضت عيوني عضيت شفتي نفس المشهد خطف بذاكرتي
صرخاتها وصوت بجيها لهسه بأذني تستنجد وتصرخ تريد واحد يخلصها من جوة ايده وهو ياكل بجسمها ما همه عمرها ولا جسمها الهزيل ولا صوتها
جانت تبجي وتصرخ :- بابا
جنت واگفة أباوعلها على مسافة جامدة بمكاني ما أگدر أسوي شي ما حجيت ولا نزلت دموعي الرجفة لازمتني
فتحت عيوني وطلعت مني شهگة شگت صدري
وجهه گدامي يباوعلي درت وجهي للجهة الثانية وأحس بملمس أصابعه وهي تمسح دموعي من خدي
نفسه عالي يضرب على خدي تقرب من اذني يهمس
- ليش مترديني
يحجي ولازم فكي بدون ليضغط حيل
همس بثگل :- أحبج والله ليش متردين قربي
درت وجهي عليه أحجي من بين دموعي فاير دمي
- تحبني وتأذيني مصايرة هاي تحبني وبعد كل كلمة وفعل يبدر مني تكفخني تحبني وتعاملني معاملة بنت الليل بالفراش وكأن الوياك حيوانة ما الها إحساس ولا مشاعر تخلص منها وتشمرها شمرة هدومك الوسخة
شددت على كلامي وكملت بقرف :- لو تعرف شگد أسترخص روحي وأحس بالرخص بكل مرة تتقربلي واني ادري بيك قبلها جنت يمها وبفراشها كل هذا وجاي دتگولي أحبچ لك شكد شايلة بگلبي حقد وكره على سجودة وسالم على بيعتي الك بذاك اليوم بس ميوصل لذرة من كرهي إلك
ابتسم :- ميخالف اكرهيني المهم اني أحبچ
لعبت نفسي أكثر من كلامه دا أگوم رجعني مخلاني
صحت :- وخر
- تدرين بانو ..
يمرر أنفه على رگبتي يشم بيها ويسولف
گال :- ابن اخته هد عالشقة هو وجماعته يدورون عليج
عقدت حاجبي صار تركيزي كله باللي ديگوله
- بكل عقلهم ذول يردون ياخذوج مني راح أخليهم
- شتريد مني شكو مبقيني عندك خليني أرجع لأهلي حرام عليك امي واختي حيصيرلي بالسنة مشايفتهم
- والله تحلمين متخلصين مني بس الموت ياخذج من عندي مالتي خليها ببالج انتِ كلج مالتي
- تريد طفل مني مو
ضل ساكت يباوع لعيوني :- وكتاب الله أنزله حاله حال أخوه القبله وما أخليك تتهنى بخبر حملي
ضحك :- يعيش هسه تشوفين
- لو أعرف أموت نفسي اني هم وميهمني حتى لو فتت للنار أكثر من النار الـ اني بيها وياك هسه
- احجي وسولفي بكيفج متعرفين شضاملج من يجي وكتها بس دخلي تصير وبطنج تشيلي طفل
نزلت دموعي گمت أصرخ :- مو بكيفك والله أكتل روحي أكتلك انتَ وميرفلي جفن عليك
تمدد وجر راسي لصدره :- اششش كافي نامي
ضليت أتلاوى وياه أريده يعوفني جان لازمني ميخلني أتحرك من مكاني انطيته ظهري وسحبت الغطة رفعته خليته بين سنوني تطلع مني صرخات مكتومة
أحجي وأهدد وأسوي وما أسوي بس تتقربلي بعد بس جان حجي بالهوى انعادت مرة ومرتين وتلاثة
وكأن يعرف الضرب والصراخ والتهديد گام ميجيب نتيجة صار يستغلني بهالموضوع ويجبرني على قربه
كم مرة ردت أسويها ولزمت السچينة قربتها لمعصمي
بس مجان عندي الشجاعة صدك حتى أسويها وأنتحر
كلما أجيت ألزم السچين ايدي جانت ترجف تمنعني أتحرك ويصير عندي تشنج لحد ما أشمرها من ايدي
مر اسبوع اسبوعين تلاثة واني على نفس الوضع
يجيني سكران تالي الليل لو أحبس روحي بالغرفة وأقفل الباب لو ما ألحك ويلگفني يغصبني عالنومة
كم مرة يجيبله وحدة وياه ويفوتها گبال عيني للغرفة ما أعرف غايته شنو يريد يكسر عيني لو يلوي ذراعي
بس جنت أتقزز منه ويزيد كرهي اله أضعاف خاصة من يكمل ويرجعلي للغرفة الگاعدة بيها ويصير يدك عالباب يردني أفوته لحد ما يمل ويروح من وحده واني گاعدة من ورى الباب أسمعله وكلامه اللي جان يجيبلي الغثيان
بيوم جنت گاعدة ويَّ روحي وأحسب بيدي جنت أحسبلها موعدها فات صارله كم يوم لزمتني الخوفة
وبديت أراجع نفسي بآخر أيام
مجان عندي دوخة ولا لعبان نفس ولا الأعراض اللي جانت تجيلي بحملي الأول بس بقيت بشك وآكل بروحي
هو صار أيام ممتقربلي
ملتهي ومشبع روحه بالعنده كل يومين جايبله وحدة شكل من گحابه گلب البيت دعـ** يا فايت طالع
بهالفترة جانت تجي مرة تجي بالأربعينات للبيت تنظفه وتطبخلنا الأكل بس مجان يخليني أشوفها يصعدني يحبسني بالغرفة لحد متكمل وتروح يلا يفتحلي الباب
هواي حاولت أتواصل وياها بس هو جان سابقني وموصيها ممنوع تحاجيني لو تتقربلي ولو شوي
انفتح الباب فزيت من مكاني من شفته هو دخل وسد الباب عاقد حواجبه ويباوعلي مستغرب
- شبيج فزيتي
دا امشي أتعداه لزمني رجعني لمكاني :- اوگفي جاي أحجي وياج
- وخر لتلزمني
سواها عناد وجرني من عكسي يمرر أنفه على وجهي
- وإذا لزمتج شتسوين
- وخر گتلك تعبانة ما عندي قابلية للحجي
وگفني ثبتني ومد ايده لجبتهي
- شبيج مريضة ما مسخنة ما مبين بيج شي
- تعبانة دا أگلك عندي عذر شرعي جسمي متكسر
عقد حاجبه أكثر مضيك عيونه
گال :- فايت موعدها هالشهر مو
فتحت عيوني بسرعة وعيونه ضحكت قبل شفايفه هز راسه مثل اللي تأكد من الخبر وعض شفته
- حامل
صرخت :- مستحيل
- لا مستطيل
نزلت دموعي مسيطرت عليهن :- والله مو حامل مو بكيفك
- لا بكيفج صار شهر أبوي اللي ينام وياج
گعدت للگاع أنحب على حظي ومصيبتي أخذني من ايدي گومني غصب رحنا للغرفة شال تليفونه وصى جماعته يجيبوله إختبار حمل منزلي من الصيدلية
سد التليفون وباوعلي :- هسه نعرف ونتأكد حامل لو لا
ضليت گاعدة منهارة أمسح دموعي وترجع تنزل وأدعي بگلبي كون رب العالمين يخيبه وما ينطيه اللي يريده
أشوفه على أعصابه أكثر مني گاعد گبالي عينه بالجهاز بس إنفعالات وجهه وحركاته تگول باله مو يم الموبايل
يهز برجله عالسريع حواجبه ما فكت على نفس الطبگة
مرت ساعتين واحنا على نار هادية تفور بأعصابنا لحد مدك تليفونه رفعه يجاوب وگام طلع من الغرفة
أقل العشر دقايق ورجعلي بيده علاگة شمرها بحضني
عبد الإله :- گومي للحمام سوي الاختبار
رفعت أكتافي :- مـا ما أسوي
دار وجهه يتمالك أعصابه ويتمتم بكلمات ما فهمتها
- فضيني بانو گومي گدامي لتخليني أفقد عليج وأضرب
- مـا
- لج شنو عناد هو
اجه جرني من ياختي يمشي أخذني وياه للحمام
دفعني ليجوة :- فوتي يلا واگفلج هنا
اجيت أحجي شال ايده :- ثقي بالله 5 دقايق لو ما سويتي الأختبار برضاتج أجرج أسحلج تسوينه غصبًا ما عليج فوتي ولا تعبيني دام النفس عليج طيبة
فتت وسديت الباب بوجهه شي بداخلي يگلي اشمريه وخلي يولي بس الفضول العندي جان أكثر منه حتى أعرف النتيجة وأدعي رب العالمين يكذب اللي براسي
وگفت أسويه وأبجي بدون صوت خليت الأختبار عالميز غسلت وجهي بمَـي بارد وباوعت بالمراية صاير أحمر
انرگع الباب حيل وصوته من وراه گتله :- اوگف لحظة
رجعت أباوع بيه وايدي على گلبي جان خط واحد
الضحكة ترست وجهي أبجي وأضحك مثل المخبلة
وصوت الدك عالباب يزيد أخذته بأيدي وفتحت الباب طلعتله نظراته مترقبة مديته اله أخذه يباوع بيه
بان :- مو گتلك ماكو حمل
أعصابه صارت براسه جر العلاگة طلعلي واحد ثاني
- امشي سويه مرة ثانية
- لتتخبل گتلك مو حامل يـ..
قاطعني بصيحة عالية جبرتني آخذ الأختبار من ايده ورجعت دخلت سويته للمرة الثانية والنتيجة نفسها
طلعتله شمرته عليه وگع للگاع وعفته ومشيت للغرفة
《 نورجان 》
مرت فترة على زعلة هيام وعركتها هي ورجلها
العمام حاولوا يسدون السالفة ورجلها جان رايدها ترجع بس هي مقبلت شگد حاجوها رادوا وهي ميبسة راسها
حتى الخال راحلها وگعد وياها يحاجيها وهي ترده
هيام :- خالي جيتك عالعين والراس بس ما دام أخوي الجبير مو هين وانا بيتو أضل انتظر راعي البيت لحد ما يرد وهو يشوفلي حل لسالفتي منا لساعتها لحد يجيبلي طاري الرجعة لرجلي
- عش انا مو بعينج ولج
- لا حشى محشوم وجيتك على راسي بس گلت العندي يرد أخوي وياخذلي حگي عندي حجي چثير نايم على افادي تاحجي الو
- وان جانت گعدتوا مطولة شلون هو صارلو شوفة عينج بالشهور ما جاي لهين ملتهي بشغلو ببغداد
- اي لساعتها الله كريم انتظرو عودين لحد ما يرد
هز راسه بيأس منها :- لا حول ولا قوة إلا بالله لشوكت عتفض مصايبكم ما أدري
شيخة :- گول يا الله يا خوية ما طارت الدنيا ذاك بيتها وهذا بيتها وبيوت اخوتها مفتوحة إلها شوكت ما رد تيم اگعدوا وفضوها وياهم وكلمن يرد لأهلو
- الولد رايدها يا شيخة هسع واحد غير يحجي الألو والعليه يعني فوك الدگة العملوها بيه اخوتها وين صايرة هاي حتى أبوه وعمامو ما راضين عليه وعاندهم واجاني
- عجل شوفة عينك حجيت لما مليت شبيدنا قابل
- هيّن تايرد تيم ويصير خير
- يمتى يجي والله گعدتو طولت هناك بنتو تسأل عليه عيونها تدورو بالبيت
- ما عتجي بالأيد خوية كلما نوصللها البنية تطير من ايدنا وتغير مكان سكنها چم مرة بمرة حجيت وياه وگتلو عوف السالفة يمي ورد لعيالك ميبس راسو
- شلون سالفة هاي وشغلو من هين هم عايفو
- نسيبو گاضب الشغل عنو ساد مكانو هو موصيه ومتابع وياه مخابرات ما عايفو بحالو
- ميخالف مو مثل من راعي الشغل هو الداير حلالو ويعرف الفايتة والطالعة يعني هسع هيج أحسن يشتغل يم الناس الغربة وعايف شغلو هين لغيرو
- هاي شنعمل تيم بعد قابل متعرفينو لو جديدين عليه
طلع الخال من بيتهم هيام طالعة وياه گلتله :- رايدة أگعد ببيت أخوتي لحد ما يرد أبو علي لبيتو وأجيلو
گاموا أخذوها لبيت سلام ما طولت يومين وبالثالث لمت ملابسها جابت جهالها واجت عندنا لبيتنا
وگعدت تشكيلنا من سعاد مرة سلام مخليتها تصيح الغوث متريدها تگعد عندهم وگايمة فالتة من بيتهم
شدن :- ميخالف حبيبتي لتشيلين بخاطرج هذا هم بيت أخوج ان شاء الله هنا هناك ماكو فرق
- الحمد لله
باوعتلي :- شطابخين عالغدة خية هذول موتوني جوعانين يريدون أكل
فزت ماما ويَّ حجايتها راحت للمطبخ تكمل الغدة
وهي عينها وراها :- هاي امج هيج عتفتر بالبيت گدام شبير بهذا لبسها
استغربت وهزيت راسي :- اي شبيه
- يا غير خزي تگلي شبيه النوب
- بس لبسها مستور ممبين منه شي
- هو بس عاللبس ما دحگتي شعرها مطلعتو تفتر بيه والله زحمة من أخوي حتى واحد ما ياخذ راحتو ببيتو
- بالعكس والله شُبير حيل يحب ماما ويحترمها وهي هماتين
- بس گدامجن تاما تزعلن وتشيلن بخاطرجن عليه إلا انا أخوي واعرفو خشي گلبو ودحگيه تلاگينو مخنوك خنك متقيد ما عيگدر ياخذ راحتو بالبيت وامج هين
ضجت من كلامها أخذت الصغار ومشيت للمطبخ شافتني ماما وهي تگلب الگدورة تگليبة أخيرة
گالت :- كمل الأكل ماما نصيت عليه إذا تردين صبي للجهال
صبيتلهم وگعدت أوكل بيهم ماما واگفة منتچية عالكاونتر موبايلها بيدها عينها عليَّ حست بضوجتي
سدت الموبايل :- شبيج نورجان
رفعت راسي باوعتلها :- ها وياي
- اي وياج لويش هالتكشيرة على وجهج توج مبيج شي
- ماكو شي
حجيتها واني أعقد حواجبي وصرت ألم الأكل الوگع اجت تحجي بس قاطعتها هيام وهي تفوت عالمطبخ
هيام :- يا وكلتيهم جان ندهتيلي وصخوج ما يگعدون
- لا عادي گاعدين مسووا شي
أخذتهم وگفت تغسللهم عالمغسلة واني گمت أغسل
مجان مضايقني وجودها وبالعكس كُلش جنت متونسة على أطفالها بس هي ما انطتني مجال أفرح بيها گامت دوم تسمعلي حجي ومركزة بماما حيل شلبست وشنو أكلت وشسوت من حركة وليش گاعدتلها گعدة
مرت فترة كملت كورس ثاني وامتحنت الإمتحانات النهائية ومنتظرة المدرسة تعلن موعد النتائج
بيومها رحنا اني وشبير نجيبها ورجعت الضحكة تارسة وجهي ولازمة النتيجة بيدي ناجحة
شبير :- سيبي يولي نجحتي بزود تدريسي
- والله اني قريت انتَ بس شوية راجعتلي
- بزود تدريسي وللصبح
حجاها وعلى الأغاني مشغل سارية ومنطلق وياها
بنص الطريق اندار يباوعلي أدندن ويَّ الأغنية
گتله :- هاا
- شو مكيفة ومصدگة روحج وهي مرگعتها خمسينات
فتحت عيوني :- عززاا وينهن يا كذاب هاك شوف والله درجاتي عالية بس اثنين سبعينات شوف المياية
- يا مياية ذني وينهن
رفعتله الشهادة :- ولك هذني هذن
- بنت السطل هن غير فنية ورياضة
- اي حتى لو تعبت بيهن ترى وأطلبك هدية مال نجاح
- النوب
- اي لعد شلون ماما ولا مرة فوتت نجاحي جانت تذكرني دوم حتى لو بهدية بسيطة تفرحني
- هو انتِ شطلع عينج غير امج
- اهوو والله تجيبلي هدية
- ما عندي يولي منين أجيب أحير بالعيشة لو بأكلج لو أنگل هدايا
- يا كذاب عندك شگد فلوس
- انا منيلي يابا متوهمة فقير ويتيم ومگطوع من شجرة
- والنبي تجيبلي هدية
- يربك قافلة عالهدية شتردين أجيبلج بالله
- ماعرف انتَ بكيفك
- أجيبلج جهاز جديد
- لا مالتي ما بيه شي
- عجل شتردين
- شمدريني بكيفك
- عجل أنطيج فلوس وانتِ اشتري اللي بنفسج أحسن
- لا أريد انتَ على ذوقك تختارلي
- والله حيرتيني شجيبلج هسع
- بكيفك
صاح :- يول لا تسودنيني هذا كلو وبكيفي
- جيبلي بزونة
31 تعليق
- لا ربحنا عايز وصاويص فوك راسي فوك العندي
- لا والنبي حلوة جيبلي وحدة من زمان بنفسي
- انتِ موجودة ميحتاج
- اهو شُبير حباب
- مو حباب
- عليك النبي أريد بزونة والله معلية تجيبلي وحدة
قلل السرعة وصار يمشي على كيف ويدور بعيونه
نورجان :- شدتسوي
- تاشوفلي بزون سايب بالشارع أصعدو ناخذو ويانا للبيت
- أريد وحدة نظيفة ماريد من الشارع جنهن سكارى
34 تعليق
اندارلي فاتح عينه :- هاا وانتِ وين شايفة السكارى
- انتَ كم مرة شفتك سكران
عض شفته عينه عالطريق :- يول انا اگول نتجاوز موضوع البزونة وأشوفلج چلب اخذيه ربيه
- ميحتاج انتَ موجود
ضرب بريك فجأة وهو يمشي انرجينا بالسيارة
اندارلي فاتح عيونه لزمني من شعري خازرني
56 تعليق
- انا چلب ولج
هزيت راسي بسرعة :- والنبي مو قصدي هيج وحق الله
- عجل شنو گصدج
- مو انتَ گتلي ميحتاج نجيب بزونة انتِ موجودة واني رجعتلكياها گتلك ميحتاج چلب انتَ موجود
33 تعليق
- النوب تعيد بيها يربك تعيد بيها
خليت ايدي على حلگي بعد محجيت
گال :- ايه عفية ضلي هيج لا تفتحين حلگج منا لحد ما نوصل للبيت
رجعني للبيت وهو طلع بسيارته گال عندي شغل
دخلت جوة حجيت لماما اللي صار
شدن :- خرب حظي بالله هي هاي حجاية يا ماما
42 تعليق
- مو قصدي والله گلتها بالشقة
هيام :- شنو من شقة هذا يدوس بالبطن وين أكو وحدة تگول لرجلها انتَ چلب حرام يطلگها وتحرم عليه بنفس الساعة محد يرضاها
- هو يعرفها متعود على زلات لسانها متشوفينه محجى وياها شي
- لا خية ما مقبولة هالمرة يفوتها نوبة اللخ يجيبها بطراك يفر راسها تاتعدل لسانها اگضبي بنتج وعلميها سوالف البزران خلي تنساها هسع هي مرة متزوجة حتى الچلمة محسوبة عليها هاي انا گتلج
حجتها وراحت موتت روحي بالبجي بحضن ماما وراها
- والنبي ماما مو قصدي بيمن أحلفلج
63 تعليق
- أدري ماما أدري معليج بيها تحجي لوحدها
- خاف شُبير زعلان مني
- انتِ من نزلتي السيارة شلون شفتيه ضايج لو عادي
- لا مضايج
- بعد شكو خلي اليحجي يحجي لوحده مدام انتوا متصافين بينكم ومتفاهمين معليج بأحد
سويت مثل مگالت ماما العصر اجتنا مرة عمهم وياها بنتها غادة وسهاد وبناتها اجن يشوفن هيام
ماما گعدت يمهن من باب المجاملة بأعتبارهن خطار جايات للبيت بس شافتهن متقيدات ومتجبجبات منها
ترخصت منهن وگامت اجت للمطبخ جنت اني واگفة دا أحظر بصينية الضيافة ووگفت يمي تسولفلي
شدن :- يمة مبالعاتني كُلش الوجوه متنگة علي
- اي هن يحبن مرة خالهن ومراضيات على زواجكم
- ديلا على أساس جانوا دهن ودبس هو وياها واجيت اني أخذته منها شو شارد منها شردة لغير محافظة وهي تدري بيه ديتزوج عليها عليش من استقر وياي انفجرت
- بس اني مدا أشوفها سوت شي حتى مشايفتج ولا اجتنا لهنا بس گرايبها والداير مدايرها مساكتات
- اي عيني غير هي الموصيتهن تملي براسهن ويجن يذبن سمهن يمي
نصت صوتها عينها عالباب
گالت :- باعي حتى هاي اخته هيام گعدتها ويانا بالبيت مو خالية براسها موال تريد تغنيه إلا شجابرها تعوف بيت تيم شكبره وشگده وتجينا هنا
- عمة شيخة هواي حجت وياها هي مدتقبل تروح هناك
- لعد شدا أحجي اني وراها سالفة مو خالية هالبنية وهسه تشوفين
حضرت الصينية بيها عصاير أخذتها ومشيتلهن افتريت عليهن قدمتلهن مرة عمهم عينها مشالتها مني
گالت :- ما حبلتي
هزيت راسي لا
اندار على سهاد مستغربة :- شعجب لهساع صارلهم شكثر متزوجين
سهاد :- شمدرينا عمة البنت مريضة مدري شبيها ومحد دايرلها وانا هم مو فوك راسها جان أخذتها للدكتور
نورجان :- لا والله مبية شي
- عجل عش ما حبلتي هاي صارلكم بالسنة وانتِ بعدج هم صغيرة رحمج بساع يشيلو جاهل
- ما أدري
هيام :- هو انتِ شتدرين
اندارت عليهن :- ما عاجبني حالهم أخوي ما مرتاح بزواجو منها وهي ما رايدتو جم مرة بمرة أدحگها نازلة تنام بغرفة امها وين صايرة هاي تعوف زلمتها بنص الليل
- انا من الأول گلت لعمتي البنية غريبة ومو بطبع بناتنا ما عيتوالمون سوية ما سمعت مني وأخذوها الو
ضجت حيل من كلامهن وانقهرت دا امشي صاحت وراي هيام :- تعاي اخذيه هذا عصيرج وسوي چاي
أخذت الصينية ورجعت للمطبخ عيوني مغورگة
باوعتلي :- شو رجعتيه
- يردون چاي
41 تعليق
أحجي وأتحرك دايرة وجهي بس حست بنبرتي مخنوگة
دارتني عليها شافتني :- سمعنج حجي مو
- عوفيهن ماما خلي شيردون يحجون مو بالي
- لا واضح بدموعج هاي
- يعني شسوي
- رديهن لتسكتين على حجاية يمسنج بيها شنو ناقصة طول جمال ندارة حتى يحجن عليج بشنو هن أحسن منج ليش تخليهن يدوسن عليج ليمتى تضلين بهاي الشخصية الضعيفة نورجان ترى تعبتيني وكلام الله
متحملت نزلت دموعي زادتها عليَّ بكلامها تنهدت
جرتني لحضنها :- والله متهون عليَّ دموعج بس ميصير هالشكل يا ماما ترضين بكل حجاية وتسكتين لكل واحد يسمعج كلمة تغثج وبس الدموع تخر شالفايدة يعني
- انتِ مشايفتهن من يتگابلن عليَّ لا وحدة ولا اثنين وكل مشافني وجابن طاري الحبالة والجهال وليش محبلتي وشعندج لهسه ديدورن على حجة حتى يزوجن شبير لبنت عمه
- واحنا شلون مراح نخلص من هالسالفة شو هن ميتات لأن فدار أخذني على مرته وجايات يردن يزوجن شبير الثانية شهالمنطق العايشات بيه
- شمدريني يردني أحبل لو نزوجه غير وحدة
- انسي ماما انسي خليهم شيردون يحجون شبير يحبج وما دايرلهن بال واخوته وخاله ما همهم هالسالفة هذا بس حجي نسوان
عبرتها مثل موصتني بس ضلت براسي حجايتهن وصار الموضوع ياكل ويشرب وياي ليش لهسه محبلت
《 شهربان 》
لاحظت نفسي هالفترة هواي أنام جسمي على طول خامل ومبية حيل أتحرك وبس أنعس وين ما أشوف فراش أذب روحي عليه وأجرها نومة طويلة
بالبداية جنت شاكة ديحطلي شي بالأكل گطعته
وضلت نفس الأعراض تجيني كسل خمول نوم ما أشبع
دورتي الشهرية طولت أيام وما أجتني أعراض حمل مجانت مبينة عليَّ خفت منها وهو جان مراقبني
مركز وياي ويحسب وكل مرة يسألني عليها حاولت أكذب عليه بس لگفني ضل الموضوع براسه
گام أخذني لنفس الدكتورة النسائية خلاها تفحصني
گعدت على كرسيها گلتله :- ولو اني نصحتكم متسوون حمل هالفترة بس مدام دورتها انتظمت وبمتابعة طبية مستمرة ماكو خطر ان شاء الله عالطفل
صرنا واحد يباوع بوجه الثاني گلبي يدك ممستوعبة الكلام اندارلها :- حامل
عقدت حاجبها مستغربة :- اي زوجتك حامل لتگولي معندكم علم مستحيل راح تخلص شهرها الثاني
رجعنا الطريق كله حجايتها تدك براسي دموعي مبطلت تنزل وهو ولا على باله فرحان مشغل اغنية ويدندن بيها
رجعني للبيت نزلت بسرعة ودخلت صعدت بوجهي لغرفتي شمرت روحي عالجرباية انتهيت بجي
شسوي يا ربي أكتله أكتل روحي
شردت منه مفاد وگعت الأول صارتله فرصة رجع استغلني بيها شلون أخلص روحي منه ماريده
دا أموت وياه عالبطيء يوم بعد يوم حابسني هنا حالي حال الحيوان هو گالها الي وسواها صدك وحبسني
وين أروح إلمن أشكي معندي رقم أي أحد معندي تليفون ولا أي جهاز وأخابر منو ماما وضيعتها
سمعت صوته من جوة ديصيحني ما گمتله
لحد ما فتح الباب واجاني جرني من ايدي نزلني وياه
دخلني للغرفة الجوة جانت متنظفة بالجديد أيام وهي مقفولة محد يدخل الها من وكت مگعدنا هنا
باوعت بيها ورجعت باوعتله :- ليش جبتني هنا
ما رد تعداني ومشى دنك جوة الجرباية طلع حبل وگام
أشرلي بيده :- تعاي
انداريت دا أمشي لزمني من بطني وگعد عالجرباية وقيدني بحضنه أملص بروحي منه مگدرت مثبتني
لزم ايدي طبگهن ليورة وشد الحبل ربطهن بيه گام وگفت على حيلي مد ايده على كتفي گعدني غصب ودنك على رجلي ربطها قيد حركتي مخلاني أتحرك
أصرخ أحرك بجسمي بدموع وأباوعله واگف گبالي ايده بجيوب بنطرونه عينه مثبتها عليَّ نظراته باردة
بان :- افتح ايدي تخبلت شبيك
- هو ينراد أصير مخبل حتى أعرف شلون أتعامل وياج
- وين تريد توصل كافي ما مليت ما جزت مني اني ما أفيدك لتنتظر الطفل مني گتلك هالحجي من قبل وأرجع أعيده أموت روحي ولا أخليه
64 تعليق
- ديلا موتي روحج بالله جاي أباوعلج
حركت ايدي من ورى حاولت اوگف على رجلي مسيطرت رجعت گعدت دموعي نزلت بقلة حيلة
گال :- هذا حالج منا لحد ما يثبت حملج ساعتها عود أفكر أفتح اديج ورجليج لو أعوفج مربطة
- دتزيد حقدي وكرهي الك بأفعالك هاي خلي ببالك يجي يوم وراح ينگلب الدور وتجيني تدور رضاي وما راح أقبل
ضحك :- عود ميخالف لساعتها نتحاسب بيناتنا
- أندمك والله
- يصير خير
حجاها ودار وجهه وطلع سد الباب وراه
حاولت أگوم رجلي متطابگات ما أگدر احركهن ضليت گاعدة بالساعات بمكاني الباب مسدود محد اجه
72 تعليق
خليت راسي عالجرباية دموعي تنزل بسكتة بس صوتي واني أجر النفس جان عالي بالغرفة
بحملي هذا فتحت على نفسي باب ثاني يربطني اني وعبد ويزيد قيودي بيه أكثر من قبل غصب عني
بأول أيام جانت المرة اللي تجينا تنظف تدخلي الأكل وتحاول توكلني بس اني جنت رافضة شگد حاولت وياها تساعدني بس تجيبلي تليفونها أخابر الشرطة
راحت وصلتله هالحجي اله گام حتى هي يمنعها تفوتلي وصار يجيبلي الأكل بنفسه ويجبرني حتى آكل منه
كم مرة دفرت الطبلة كم مرة گلبت الصينية والبيها يجيبني براشدي ويگعد يوكلني كم لگمة بالغصب
مجان يأذيني خايف على ابنه بس إذا عاندت حيل يجيبني بضربة يعدلني بيها لو على خدي لو حلگي
الحمام هو ياخذني بيده وميفتح الحبل إلا من نوصل للباب يحسبلي وقت إذا تعديته يدفر الباب ويفوت وراي
جان مداريني ومهتم بالأكل وشنو لازم أشرب والعلاج اللي وصفته اله الدكتورة ينطينياه بوقته أول بأول
بس نفسيًا جنت مكسورة معرف شلون يداري كسرتي كل يوم جديد جنت أحسه يقربني من نهايتي وياه
نفسيتي بالنازل ما أشوف بشر ما أگدر أتحرك لأي مكان جنت عايشة بس جسد ونفس يصعد وينزل بصدري
53 تعليق
دخلت بشهري الرابع أخذني للدكتورة ايدي ورجلي جانوا متشنجات ما أگدر أحركهم وبس أرجف
حالتي جانت مو طبيعية وجان مبين حيل على وجهي والدكتورة مكلفت نفسها حتى تسألتي وكأنها تعرف كُلشي كلامهم جان بس وضع الطفل وحالة الطفل
من رجعنا عالبيت صارت بوجهنا يسر منتظرتنا هناك
تقربت باوسته سلمت عليه وهو يضحكلها ايده محاوطة كتفها يدنك يهمس بأذنها وهي تتبسم وتباوعله
عضيت شفتي ومشيت عنهم رجعت للغرفة حسيت عليه وهو يفوت وراي عدلت گعدتي ومديتله ايدي
أخذ الحبل وصار گبالي ضل واگف يباوع لعيوني
- يلا اربط ايدي
شمره بالگاع ولزم وجهي تقرب دنك عليَّ نفرت منه انداريت للجهة الثانية يحرك شفايفه على خدي
عبد الإله :- ليش هيج بانو ليش
وخر مني يباوعلي يريدني أجاوبه
بللت شفايفي :- اربطني عبد اني دا أگلك اربطني لأن بأول فرصة تصيرلي تدير وجهك ومتلگاني بعد
- عشم إبليس بالجنة أخليج تطلعين منا بكيفج قبل ولادتج
53 تعليق
- عاجبك أعيد السويته بأبنك الأول
- لو فكرتي وسويتيها راح تأذين نفسج انتِ وسمعتي الدكتورة الإسقاط إذا ما جان طبيعي راح يكتلج الج
- وهيج اني حياتي ملونة ومثالية وهامتني لا أخسرها يعني
- متسويها ولو سويتيها احسبي روحج ميتة إذا مو بالنزف اني أحط طلقة براسج وأخلص عليج
- تهديدات تهديدات دكافي ما مليت بس تهدد
- ليش تحبين أسويها
ضليت ساكتة أباوعله گلبي تزيد دگاته
هز راسه :- سهلة جيبي ابني وتدللين ما راح أخليها بنفسج
- تريد تاخذه وتكتلني
68 تعليق
- إذا ما بقيتي عندي تربين بأبني تحلمين أعوفج مرتاحة بغير مكان خليها براسج هاي
حجى آخر كلمة ودار وجهه وعافني
لزمت ايدي آثار الحبل بارزة بشكل عليها وتخوف صرت أفرك بيها وأون بوجع تمددت عيني عالحايط صافنة
حتى البجي مل مني روحي ميتة مالي نفس بشي
《 نورجان 》
دا أغسل بالمواعين وسمعت صوت سيارته وهو يدخلها للگراج غسلت ايدي وطلعتله بسرعة وگفت بالباب
انتظرته بين مطفاها ونزل واني مبتسمتله شافني غمزلي
اجاني يمشي بيده علاگة دنك عليَّ بسته بخده
شبير :- يا يمة يا يمة راح التعب
باوعت لأيده :- شجايبلي وياك
- هاي لا وين مو الج
- لعد المن
- انتِ شعليج
89 تعليق
- گول والله مو الي
- وحك هذا السويچ وحك ذيج السيارة دحگيها شلون واگفة
برطمت بزعل دنك ضرب راسي براسه
گال :- هاي مو الج بس جبتلج شي بالمقعد الخلفي بالسيارة روحي شوفيه
فزيت بسرعة ركضت للسيارة فتحت الباب الخلفي
شهگت صرت أگمز وهو يضحك اجاني يمشي
حضني من ورى :- ها شلونها
- شُبير گزگزت شگدوتها
- تاتربيها على ايدج
دنك شال البزونة وهي تناوي مدها الي :- گربي تعاي
ضليت واگفة ورجعت ليورى
فتح عيونه :- لا يا بنت السطل انا ألمن جبتها إذا تخافين
- مخايفة
- عجل شكو
- شوفها شلون تتحرك جنها سلبوح خاف تفلت من ايدي
- گربي لج
وگفت يمه انطانياها وهي تروح منا وتجي منا متستقر بيدي صغيرونة لونها رصاصي تخبل شال صندوگها وغراضها وراي
ودخلنا اثنينا نمشي للبيت ونلاعب بيها وهي بيدي
انداريتله :- شسميها
- فحل يول مو نثية
وگفت :- لا ردت بنية مو ولد
- ولا يهمج هي فحلة هاي
- والله معليّة أريد بزونة مو بزون
- اخذيها وانطمي ترى آخذها منج بعد متشوفين مني لا بزون ولا عتوي هاي انا گتلج
حجاها ومشى واني وراه سكتت لا يسويها صدك ويرجعها لأن هو ميحبهن گوة قنعته يجيبلي وحدة
تلگته اخته سلمت عليه عفته يحجي وياها ورحت أشوف البزونة لماما فتحت الباب ودخلتلها
- ماما شوفي
حجيتها ومديتها الها جفلت بسرعة
شدن :- عزة بعينج وخريها مني وخريها
- والله متخوف صغيرونة
- مثل جداحتچن ذاك خلصتنها علي صغير وصغير لحد ما شوه اديجن بخراميشه
- هذاك مال شارع هاي نظيفة مال بيت
شبير :- عش متگولين جداحتكم مچلوب على صاحبتو
انداريتله واگف بالباب ومنتچي ايده بجيوبه
- شُبير لتحجي عليها ترى ما أقبل
- منو منهن البزونة لو اختج
- اثنينهن ترى أزعل عليك
- أيباه وزعلتهم
التهيت اليوم كله بيها مگابلتها وگاعدة والجهال يحومون عليها مكيفين بيها أكثر مني
هيام :- احنا شلون بالمسوية روحها بزر وحاطة عگلها بعگل الجهال
انداريت عليها :- بشنو ضوجتج وهيج تحجين وياي
- اركدي شوي واثگلي هالتطفر هذا مو لعمرج البگدج بحضنها جاهل
تنهدت بحسرة :- بس هم حظ اخوي هذا ما حظالو بمرة تسر گلبو وتحملو بولد يشيل اسمو
- واني شبيدي يعني
- انتِ الصوج منج ما تحبلين شمدرينا أهلج شلون زتوج علينا لا عمام لا زفة الواحد حتى ما ينسر بخلفة منجن
أخذت البزونة وصعدت لغرفتي وين متشوفني لازم تذبلي حجاية تسمني بيها وتذكرني بسالفة الحمل
ثاني يوم اجتنا غادة وامها هاي اللخ هم كثرت حياتها لهنا كل كم يوم جايتنا ضليت جوة حتى مطلعتلهن
ورى نص ساعة نزلت أشوف شكو بالبيت رحت للصالة صارت غادة بوجهي گاعدة هي وهيام سلمت عليها
هيام :- عش ما نزلتي سلمتي على مرة عمي
- وينها
- يا بعد وكت راحت المرة
باوعت لغادة :- وانتِ حتبقين هنا
- اي تبقى هين عندج مانع انا گتلها تبات عندي الليلة ونس وياي بالغرفة
- ترى محجيت شي بس دا اسأل
- لا هم عايز تحجين وتفكين حلگج لوما البيت بيت أخوي فوك ما ملفين امج ومگعديها عدنا بس هو الصوج منو حجي النسوان الغرب داير راسو
متحملت عفتهن ورحت لماما محترگة بدمي
انتبهتلي :- ها شبيج تحوصين
وگفت :- دتخنگني ماما بكلامها تگوم تگعد بس تحجي عليج ما أگدر أتحمل دا أفور من جوة
- هيام مو ؟ مو گتلج سوسة بلة لتحتكين بيها ولا تگابليها
- هسه اني يمها حتى بيتي صرت ما أخذ راحتي بيه مثل قبل من وراها فوك راسي بكُلشي
- والله لوما عيب وحاسبة خاطر لشبير وفدار جان شفت شغلي وياها وانطيتها حجايتين تلصمها كلها خلك خطار هنا شدعوة عليها شوفة هالحال
61 تعليق
- وتگوم تگعد تصيح بيت أخوي ولا عبالك اني مرته
- دتعير ماما دتعيرج هي مستثقلة گعدتي وياكم بالبيت مو شي ثاني ايدي أگصها إذا مطلعت فرحة موصيتها
بالليل من اجه شبير جان راسي على صدره وهو يلعب بشعري گعدت أشكيله الصار وسولفتله على غادة
فز :- غادة هين
- اي اختك گلتلها تبقى تبات عدنا
- وشنو هيام تعزم بكيفها
- ردت أگلهم شُبير ميقبل يكرهها بس سكتت
- الحمدلله همزين سكتي جان لصتيها
رجع خلى راسه عالمخدة وجرني لحضنه
- ما أريدها شُبير لتجينا بعد للبيت
- بس الليلة تحمليها قابل كل يوم بايتة هين هي
- حتى لو ما أريدها تجي بعد
- شلون يولي أطردها غير خطار
- احجي ويَّ هيام گلها بعد لتدز عليها
- النوب
باوعتله :- اي هي اختك تتعمد تسوي هيج حتى تضوجني بيها
- شلج بهالحجي
- والنبي حتى ماما مسلمت منها دائمًا تعيرها وتسمعها حجي لأن گاعدة عدنا بالبيت
گام گعد :- حجي جديد هذا
- لا مو جديد هي من زمان تسمع ماما حجي بس ماما وصتني ما أسولفلك
عقد حاجبه ملامحه انگلبت
- وشتحجي وياها بالله شتگلها
151
بديت أعيد عليه السوالف وحدة وحدة ضل يصفّن آخر شي گام من مكانه يلبس بالتيشيرت وراد يطلع
اندارلي :- لتنزلين هسع أجي ما اتأخر
- ليش
خزرني سكتت وضليت بمكاني وهو راح سد الباب وراه
فاتت بالعشر دقايق ضليت أحوص متحملت طلعت وراه أسمع صوت جاي من جوة وگفت عالمحجر أباوع
شبير واخته واگفين مبين جان عصبي بس يحاول ميعلي صوته عليها وهي ترادده ما انكسرت عينها
هيام :- وكت الخلاك تنزلي بتالي الليل من حجي حرمتك هيج بسرعة راحت كتتهن الك
- اي تحجيلي عجل شترديها تدحگج تذبين كلام لأمها وتسكت ميصير هيج خوية عيب
- ما جذبت مرة خالي من گالت البغداديات دارن روسكم علينا
- لج شو انتِ متعرفين تسولفين خليني محترم گدرج عندي لا توازيتي تاحجي حجاية تغثج مني
- وانتَ شدعوة هيج منزل روحك الهن الأماية گعدتها عندك شنو معناها تبقى مرة غريبة عود اسمها ام مرتك
- وانتِ شعليج يولي گاعدة عندج لو عندي عش هيج شايلة منها شمسويتلج المرة
- ما أودها بواگة زلم إلا رجال مثل خالي وحدة مثل هاي تگلب حالو وتگلبو على أهل بيتو مخليتو ميشوفهم
- يول هذا الحجي مو الج أعرف منو الراس الوراه
- لا أحد وراي ولا غيرو گتلك هالمرة گعدتها هين غلط بغلط تريد تروح لبيت خالي غير صارت حرمتو بعد
- معليج انتِ تگعد هين تگعد هناك باليعجبها وشغلة لخ هاي غادة وسالفة كل يومين دازة وراها صايرة ما تعجبني والموال البراسج انسيه لان ما راح يصير
- يا مواليش خوية صدك جذب شنو هالحجي
- حافظ دروبجن هيام لتخليني أنهد بيجن وحدة وحدة ان جان انتِ لو سهاد وام بان عوفيها بحالها لأن لو أحس بيج مسمعتها بعد حجاية تسمعين مني غير حجي
- غادة تكدرت من گعدتها الليلة عندك والغريبة مستگعدة عندك دوم ما فكيت حلگك
صاح :- هم ردت وگالت الغريبة لج بابا عوفي المرة بحالها
صوته صار عالي جرها من ايدها وطلعوا برة عفته يحجي وياها وانداريت نزلت لغرفة ماما
جانت مشغلة التيبلام :- ها گاعدة
شدن :- شنو هذا الصوت البرة
سديت الباب ومشيت گعدت عالجرباية يمها
- شُبير ديرزل بأخته على مودج
حجيتلها الكلام الگلته اله عبالي راح ترزلني
گالت :- زين تسوين هاي مو مال عيني وأغاتي وينراد واحد يلصمها على حلگها خليها منها لأخوها أحسن
اندك الباب گمت فتحته صار بوجهي عض ايده
شبير :- احنا شحجينا
قاطعة صوت ماما وهي تگوم ووگف يحاجيها من الباب اعتذر منها نيابة عن اخته وسوالفها وضلوا يحجون
10
آخر شي گلها :- هسع ما شايلة بخاطرج علينا
ضحكت :- لا عيني شنو القصة أهل احنا مبيناتنا زعل
اندارلي :- يلا گدامي انتِ هم وراج حساب
نورجان :- والله ممسوية شي
- دتعاي انا أگلج شسويتي
أخذني من ايدي وصعدنا الدرج واحد يدردم عالثاني
الصبح واحنا گاعدين عالريوك هيام گامت باست راسه واعتذرت منه گدامنا وهو شال ايدها باسها وصار يشاقيها ولا عبالك نفسهم البارحة جانوا يتناطحون
جانت تخزرني من جوة ليجوة بس تسولف وتضحك
صعد فوك يريد يبدل واني واگفة ألملم بالمواعين
سمعته يصيح من فوك صوته رج البيت رج
تطافرنا بسرعة صعدنا للطابق الثاني لگينا واگف منطي ظهره لغادة وهي صايرة ورى الباب دموعها بعينها تبجي
راحتله تحجي بخوف :- ها خيرك خوية شبيك
شبير :- اللي يروح خطار غير يحترم روحو ويحترم البيت الگاعد بيه
- غير تفهمني شصاير
- دحگي لبسها المخلع هالساقطة وييين صايرة هاي عتفتر جدامي بهيج لبس مخازي بالله لو خابرت عمي واخوتها ووصلتلهم هالحجي راح يرضون لبنتهم يا غيرة سز عيرضاها على عرضو
أخذنا بصوته ما انطانا مجال نحجي واخته تبوس بيه تريده يهدئ :- يا فدوة لعينك خوية انا أطيحلك حظها هالطايحة الحظ هاي بس فدوة لعينك لا توصلها لأخوتها والله ما يتفاهمون يگضبوها ما يرحمونها
- عجل خليها تحترم نفسها وتفوت تلبس لبس أوادم وخابري أهلها يجون ياخذوها من هين بيتي يتعذرها
- هذا يجرالك فدوة لعينك بس لا تكدر خاطرك
عافهن وراح نزل ليجوة سويچ سيارته بيده
عيني جانت على غادة اللي مگطعة روحها بالبجي الوجه أحمر شعرها فالته على طوله سرح مَي صايرة ورى الباب بس راسها مادته مشفتها شلابسة
فاتتلها هيام وسدن الباب اني وماما وحدة تباوع للثانية
شدن :- هي هاي مو محجبة
- اي
- لعد شلون طالعة گدامه بشعرها
- شمدريني بيها
- عشتو حجاب نص ردن ومن يردن يحجن بالستر والإلتزام يصير ماكو منهن
أخذتني ونزلنا للمطبخ أغسل بالمواعين
- عوفيهن ماما اني أكملهم روحي شوفي موبايلج كل شوي يدك
- اهوو شلون نسيت گلي خابريني
راحت بسرعة ووگفت اني أكمل غسل عالسنك
أدندن بأغنية لنانسي عجرم :- مش حرام انك تخدعني في حبي ليك الغرام وسنين حياتي وعشقي ليك
واني مندمجة گرصة اجتني بمتني من ورى خلتني أگمز انداريت بسرعة لازمة ايدي متوجعة لگيتها وراي
غادة :- لبالج أعوفج تتهنين بيه
نترت بيها :- شبيج
- متدوملج والله اصبري كلها فترة وينگلب عليج أن ما صار طلاگج على ايدي انا معتبة هيّن
حجتها وطلعت برة ضلت عيني وراها مصدومة بيها
《 شهربان 》
مرت فترة يسر ملازمتني متخليني أتحرك منا لهنا إذا ما ألگاها بوراي فتح ايدي بس خلاله بديل حراسة
وين ما أروح تطلع بوجهي خاف لا أسوي شي بروحي
فتحت الباب ومدت راسها تصيحلي
يسر :- يلا بان الغدة جاهز گومي اكلي
- ماريد ما أشتهي
اجتني :- شنو الما أشتهي يمعودة باعي حالج ولا تگول وحدة حامل ميصير هيج اجبري روحج لخاطر الطفل
ضليت مركزة بوجها لفترة گالت :- شبيج
- بس لو أعرف شنو هالنفسية اللي عندج وجاية تصيحلي عالأكل علمود ابنه اللي ببطني
- كُلشي يهون لخاطره
- ممجبورة تسمعيله وتسوين اللي يريده شنو الغاية من جابج وخلاج گدامي طول الوكت حتى تداريني بغيابه
- ومنو گلج اني مجبورة اني اللي أقترحت عليه أجي أگعد وياكم وهو مگال باطل وهم فرصة أضل يمه
- ترى اللي بـ بطني ابنه دتستوعبين هالكلام لو لا شلون تردين تقنعيني هذا البينكم حب تحبينه وقابلة ينام ويَّ غيرج لج اني أشوف دم سنوني ولا أشوفه بس من يجيلي بيده وحدة أتشعوط ألف مرة مو حبًا بيه بس أقلها جان يخليلي إحترام بأعتباري زوجته
- يحبني يدور ويدور ويرجعلي لو ينام ويَّ ألف وحدة
- مو أگلج انتِ وحدة كرامة سز
عفتها وگمت اجت وراي گعدنا ناكل محجت شي ولا ردت على كلامي بس جانت ضوجتها مبينة بوجها
وهي تاكل گالت :- على شنو جاي تتنسين
- ليش
- هيج بس أريد أعرف
رجعت دنگت على ماعوني :- ما أدري مرات أشتهي حلاة بس مدا أحس بروحي حامل
ردت بأهتمام :- شلون يعني
- أتذكر بحملي الأول من أول أيام الاعراض طلعت روحي بس أستفرغ ودوخة لازمتني بس بهذا حملي المرات اللي تقيأت بيها تنعد عالأصابع دوخة بسيطة جانت تجي وتروح بأول أيام بس هسه عادي
- انتِ حتى بطنج ممبينة ولا شوي مسألتي الدكتورة
- لا وميهمني
- والطفل شذنبه
- ذنبه برگبة أبوه يطلع عايش ميت معاق آخر همي
- انتِ مرايدته افتهمنا بس احنا نريده شوي عينج على نفسج انتبهي لروحج
- انتوا تردونه لازم مواعدج يسجله بأسمج
164 تعليق
- اي صحيح الطفل ورى متولدين النا احنا نربيه وانتِ يطلگج ويرجعج لأهلج بعد ميربطج بيه شي
- اتخسون والله لو أعرف أذبحه وما أنطيه
- شنو هالأنانية انتِ متردينه بالأصل عوفيه الي
- مو هو لعبة أعوفه الج مصدگة روحها
- توج تگولين ميهمني
- اي بس مو انطيه لعبد ديربيه حتى يكبر يعيد أمجاد أبوه العار
- الحجي يفيدج يجي الطفل رأسًا لحضني يبقى بينا اني وأبوه وانتِ يشيلج يشمرج على أمج
- يشمرني والله لو تدرين بالحجي اللي گاله إلي
سكتت شوية :- شگلج
- روحي اسأليه منه تطلع أحلى وخلي يگولج ورى الولادة شيريد يسوي ووين يخليني
عفتها محترگة بدمها ورحت للغرفة لا النومة تفيدني ولا مال أبقى گاعدة وساكتة راح تطلعني مناه
ضليت طول هالأيام أحاول أحصل تليفون منهم هي متفارگه لجهازها وهو نفس الحال مصارتلي فرصة
لحد ما بمرة واني طالعة من الغرفة صار گدامي واحد من الحراس واگف يم نقطة يريد يشحن تليفونه
شافني :- راح أطلع بس خليت التليفون
محجيت شي كمل وراح عيني وراه باوعت للبيت داير مدايري ماكو أحد مشيت شلت تليفونه جان نوكيا قديم
أخذته ضميته بصدري ورجعت لغرفتي طلعته قفلته وضميته بالدوشك مال جرباية وسديت السحاب عليه
جريت نفس مسحت وجهي متوترة وعرگانة
بس شيوصلني لرقمه وهو بجهاز عبد
رفعت راسي ليفوك :- يا رب سهلها عليّ
من راجع الحارس راد ياخذ تليفونه ملاگيه بمكانه أول ما اجيت براسه اني من شافني طالعة اجه عبد للغرفة
صاح :- التليفون وينه طلعيه
- يا تليفون
جر نفس گوة لازم روحه :- بانو لا تعبيني طلعي التليفون الجان عالشحن يلا حبيبتي
- مدا أفتهم عن شنو دتحجي يا تليفون هذا
اجه لزمني من شعري عتني عت ويصيح
- لج بان لتلعبين عليَّ طلعي الخرا التليفون وين ضميتيه
صحت بوجهه :- افهم ما أدري
عافني وصار يدور بالغرفة گلبها گلب ما خلى لا فراش لا غراض لا ملابس حتى الكنتور حركه يباوع وراه
باوعت للهوسة السواها بالغرفة وگف بنصها متخصر
اندارلي :- انزعي
- شبيك انتَ تخبلت دا أگولك مو عندي
- اششش انزعي التيشيرت اللابسته يلا فضيني
نزعته گدامه أنكت بملابسي وأصرخ
- هاك شوف كُلشي وصحت بان ما عندي شي ولا ماخذة تليفون والزم حراسك ذول المنحطين ولتخليهم يدخلون للبيت مرة الثانية
اجاني لزمني من شعري :- شسوالج
- وخر لتزمني هيج
- احجي لا أطلع حرگتي كلها بيج شسوالج گلي فتت للبيت وصرتي انتِ بوجهه
- ذبلي حجي وراد يتحرش بيَّ لوما هددته بيك
- هاا
- بيك خير ولو عندك شوية غيرة على عرضك تروح تطلع عضلاتك عليه بدال ما گالب راسك بالحجي ومخليك تجيني تدور تليفونه يمي
عافني بنترة يباوعلي بشك
عدلت شعري رجعته ليورى :- هم حاسب روحك رجال انتَ مرتك تگلك واحد راد يتحرش بيَّ وضال صافن بوجهي
سطرني براشدي ما عجبه الكلام باوعتله
- اضرب هو انتَ گدرتك بس عالنسوان مفهوم المرجلة عندك مقتصر عالضرب والنومة عاشت ايدك وحي الله البطن النگلتك والله
رگع الباب وطلع فايرة أعصابه :- گلعة
اجتني يسر شافت الهوسة أخذتني للغرفة الفوك گعدتني بيها :- ابقي هنا لشوي تجي المنظفة أخليها تلم الهوسة الجوة
قبل لتطلع اندارتلي :- بان انتِ صدك مماخذة التليفون
- استغفر الله باع منو الأجاني
- دا أحجي وياج بإحترام ليش هيج معندج أسلوب
- بكيفي اني مخبلة عوفوني يلا لحد يتقربلي
هزت راسها وطلعت لشوي اجت مستعجلة مغيرة ملابسها ومتحضرة شايلة جنطتها تليفونها بأيدها
باوعتلي :- اني رايحة والدتي ناقليها للمستشفى يجوز باجر أمرلج
حجتها وطلعت بسرعة ضلت عيني وراها كشختها هاي والكعب مو مال وحدة امها مريضة ما ركزت وياها
بالليل رجع عبد يدورني فتح الباب شافني
عبد الإله :- گومي نامي بذيج الغرفة
مشيت عبالي يقصد غرفتي الجوة صاح وراي :- هنا
انداريت أشرلي على غرفته ضليت واگفة مترددة بعدها مشيت ماريد أحصل حجاية منه فات وراي وگف يغير ملابسه عينه عليَّ عاقدة حواجبي ومتضايقة
صار گدامي لزم وجهي :- شبيج
نترت ايده :- وخر
- انطيته المقسوم وطردته وعيونج
- بعديش
مد ايده لخدي :- كسر بأيدي المديتها عليج
غورگت عيوني :- وخر عبد
- لا تصديني أريدج افتهمي أحبج والله
يحجي ويتقرب مني أكثر أنفاسه تضرب بوجهي يحرك شفايفه على خدي ونزل لشفتي باسني رفعت ايدي ورجعت نزلتها رفع راسه جبهته على جبهتي يجر نفس
مد ايده يخلي خصلات شعري ورى اذني
همس :- كلما تكبرين يوم تحلين بعيني أكثر من قبل
شد خصري قربني اله رجع باسني مشى للجرباية
الدنيا نص الليل ظهري عليه محاوط بطني من ورى ميغطي جسمي غير الشرشف تحركت شوي انداريتله
مديت ايدي لوجهه نايم ذاب روحه بتعب رفعت ايده من بطني وتحركت على كيفي نزلت رجلي للگاع
شلت ملابسي لبستهم عالسريع ورحت من الجهة الثانية مخلي موبايله وغراضه عالميز رفعته جان مشتغل
فتحت عيوني أباوعله وأرجع أباوع للشاشة مال تليفون مفتوح على محادثة بينه وبين واحد صرت بزاوية الغرفة رجعت لمحادثته هو وأرقم طلعت الرقم نفسه
عيني صارت تدور بالمكان أريد قلم مشيت لميز تواليت صار گبالي قلم كحلة أخذته وگعدت للگاع سجلت الرقم على صفحة من الحايط ليجوة بسرعة
طلعت من المحادثة ورجعت للأولى سديت التليفون وخليته بمكانه ورجعت من الجهة الثانية نمت بصفه
ثاني يوم انتظرته طلع من البيت وتأكدت من روحته
فتت للغرفة وعفت الباب مفتوح أباوع خاف أحد يفوت
التليفون بيدي رحت للمكان الكتبت بيه الرقم سجلته وأخذت نفس دست اتصال طلع رنين واني على أعصابي
لحد ماجاني نفسه صوته :- ألـو
عضيت شفتي هديت نفسي شوي
گتله :- ألو اني بان
أول مسمع صوتي عرفني صاح :- وينج انتِ
- ما أدري والله ما أدري من ذاك اليوم الخابرتك بيه أخذني من الشقة وغير مكانا گعدنا بغير بيت
- انطيني العنوان يبلوة
- ما أعرفه المكان فارغ ماكو نقطة دالة كم مرة حاولت أحفظ الطريق واحنا رايحين للدكتورة مگدرت كُلش بعيد
- سوالج شي ضربج
نزلت دموعي طلعت شهگة مني لا إرادي سمعته يستغفر
گال :- دكافي بابا عوفي البجي وگليلي منيلج هالتليفون وين جنتي كل هالفترة عش ما اتصلتي
بديت أسولفله عالحراسة المخليها وتشدده عليَّ
- شنو فلمو هذا
- ماعرف بس خلصني الله يخليك لتبقوني يمه أموت والله إذا مكتلني هو اني أكتل روحي بس خلصوني منه گول لعمو فدار احجي لشبير مآب أي واحد يعرفني
- سهلة يولي ما دام رقمج صار بيدي
- التليفون مو مالتي مال واحد من حراسه بگته منه
- وخوما گضبج
عقدت حاجبي :- شنو
- يولي التليفون خوما يدري بيه عندج
- شاك بس فريتها عليه وضيعت السالفة
- لا گالوها هم
- شگالوا
- كلفة
گال راح يحددون موقعي من التليفون
بان :- بس ترى الجهاز مبيه نت صرصور من القديمات
- ميخالف هم يتحدد موقع الجهاز من الرقم بس تاخذ وكت من يوم ليومين اصبريلي منا لباجر أرجع أخابرج والتليفون ضميه بس لتغلقينه ترى ما نگدر نشتغل وهو مسدود
- تمام حنتظرك لعد
- ديري بالج على نفسج طولي خلك واتحملي بس لباجر
- ماشي
سديته منه شي بداخلي مطمأن سمعت صوت خطوات ثگيلة عالدرج واحد ديصعد انخبصت خبص بمكاني
گمت قفلت الباب وأباوع بالغرفة وين أضمه
طفيت التليفون وخليته بصدري وضليت واگفة أباوع من باب الغرفة أشوف منو الأجه وگلبي صار طبل العرق يتصبب من كل وجهي رجلي ترجف گوة مسيطرة واگفة أسمع صوت واحد يحجي بصوت خشن صار خيال أسود من جوة الباب واندك فز گلبي ويَّ صوت الدگة مشيت على كيفي جريت نفس فتحته ومديت راسي فتحت عيوني على وسعها من شفته ...
