رواية زوجي يعشق اخري الفصل الواحد والعشرون بقلم ساره الخفاجي
خابرت حارث وطلبت منة جهاز تسجيل ،وثاني يوم رحت للموعد رحنة لمكان كلش هادئ ناس بي قليلين وهدوء اني اختاريت المكان حتى التسجيل ينجح .
أول مشافتني سلمت رادت تبوسني مخليتهة .
-هاي بعدج زعلانة مني .
-شتكولين انتي .
-لامبين عليج بعدج زعلانة ،يمعودة لتخافين هوة وين اكو نظام اكو صخام شوكلهة دتشتغل هيج ومحد اله دخل بيهم .
-كل عقلج تحجين نبراس انتي ورطتيني ،اني وثقتي بيج وخنتي ثقتي.
-سمر شدتحجين انتي على ياورطة دتاخذين فلوس لولا مدام تاخذين هاي موورطة هاي رزق واجاج وقبلتي بي.
-لتعصبيني نبراس احنه بمكان عام ،لج موكتيلي شغل خير ومساعدة ناس مظلومه لولا.
-اي كتلج ،ومجذبت .
-شون بلة وين وجه الشبة بين الگلتي وبين الي ديصير.
-احنه مساعدة الناس الي تريد تتخلص من ناس ماذيهة سواء منافسة او عداوة او ثار المهم اليدفع نسويلة الشغل.
-صدك تحجين وهاي هم تسمة مساعدة والاعضاء والمخدرات شنو.
-الاعضاء هم دنساعد ناس تحتاج للاعضاء قابل راح ناكلهن والمخدرات اكو ناس متتحمل بدونهن هم خطية يحتاجوهن مثل الدوة .
-شوفي نبراس اني اعتبرتج صديقة واخت ووثقت بيج وانتي طعنتيني بظهري وآني راح اسافر ومااعرف راح ارجع لو لا بعد بس خلي بالج عمري مراح اسامحج وحسبي الله عليج عالسويتي وياية .
ردت اكوم گعدتني ..
گامت تبجي .
-سمر والله جبرني من عرف بيج محامية جبرني اورطج مقبلت وضربني اني حظي وقسمتي بالدنيا طلع اخوية واحد عار وسگط ورط كل العائلة وياه وانتي حظج جابج برجلج النة وهوة مصدك لان جان ضايج من المحامي القبلج ومن اجيتي خلص عليه واكثر شي رادج لان وحيدة مكدرت احجي لان جان مراقبني وبس احجي يكتل ابني.
-ابنج.
-اي عندي ابن من طليقي بس محد يدري بي من طلگت جنت حامل وماادري ورة مجبت مخلاني احجي لاحد وبقة الطفل بدون هوية وضمان الة حتى مااحجي وانفذ اوامرة.
-تردين تقنعيني بهالحجي .
-والله دااحجي صدك ،حقج مصدكين منو يصدك أخوة يسوي باختة هيج مستعد يبيعنه على مود الفلوس .
-اخذي ابنج وشردي.
-مااكدر يلگانة وين منروح عندة معارف بكل مكان وحتى بالدولة عدة عرف
-لاقيمنة واني مخططة اسجنة وطلع الأخ عندة سند قوي ،،احجي وية روحي وصفنت بدون مااحس.
-سمر شدتفكرين ،الله عليج سامحيني اني مثلج متورطة ،اني ميهمني اي شي بس ابني .
-مااعرف شكلج نبراس بس مال اسامحج مستحيل هالشي انتي ضيعتي كل مستقبلي انتي واخوج .
عفتهة وطلعت سمعت التسجيل انقهرت عليهة جانت دموعهة صادقة ممعقولة دجذب بوجهي رحت لبيت فاتن سمع حارث التسجيل كيف بي گال بعد نفذ الخطة وعندج اثبات بلسانهة انه ورطتج بدون متدرين بس الشغلة كبرت وصارت بيهة روس كبار لازم نعرف منو وياه لان اذا مكشفناهم كلهم راح يطلع منهة مثل الشعر من العجين وتوكع براسج .
-وشون نعرف .
-خليهة يمي خلي احجي وية رئيسي بالشغل ونشوف شنسوي.
رجعت للبيت واني مسطورة اطلع من ورطة حتى اورط نفسي بورطة اكبر.
صارت بيهة روس جبيرة بالدولة اكيد حتوكع براسي صح عندي آمل بس هم خايفة اتصل عادل يسال عليه شون صرت وانحلت الشغلة لولا .
جان منتظر على نار حتى نزوج بس جنت احسة ضايج من شي وميحجي حاولت اجرجرة بالحجي بالبداية مقبل بعدين گال الحجية مموافقة حاليا بس لتخافين مصيرهة توافق ادري بيهة تريد سعادتي وسعادتي وياج .
-اذا مموافقة لتكسر كلامهة وتزعلهة مهما يكون هاي امك عادل ورضا الله برضاها.
-لا لتخافين والله حتقبل اعرف بيهة متكسر خاطري.
-الي بي الخير يقدمة الله .
-ان شاء الله.
سديت الخط ورة محجة عادل عالشغل وشصار وياة وشكد مشتاقلي ومكاني خالي بالمكتب ...
رحت سبحت أريد اطرد التعب والخوف من جسمي وخليت راسي عالفراش ونمت.
گعدت الصبح لگيت رسالة من حارث .
اول متقرين الرسالة تعالي لهذا العنوان وتاكدي محد مراقبج.
بدلت عالسريع وسويتلي لفة جبن حتى جاي مسويت وطلعت اجرت تكسي ورحت لمطعم حتى اتاكد محد وراية وراهة رحت لمول افتريت شوية بالمول وراهة طلعت ورحت للعنوان من تاكدت ماكو احد وراية...
-يمة الله يخليج بس تعرفي عليهة إذا شفتي عليهة زلة مااخطبهة البنية ادي واخلاق وبت اصول.
-ليش لعد اطلگت إذا مثل متكول.
-يمة موشرط التطلگ السبب بيهة يمكن الرجال مو ابن اوادم ومأذيهة.
-يايمة اشكال شفنة شو مطلگنه.
-يمة جيل هسة مو مثل جيل قبل ،هسة البنات وعن وگامن يعرفن حقوقهن وميقبلن بالظلم.
-ليش شسوالهة يمة وظلمهة.
-خانهة .
-يااا والله عبالي سالفة شوكل الزلم تخون خوما كل الناس تطلگ.
-يمة اكو الي يتحمل واكو الي ميكدر يتحمل وسمر من هالنوع.
-والله يايمة مدام ماعاشت وتحملت وية الاول مراح تكمل وياك .
-يمة دوافقي وبعدين الله كريم نكمل لولا.
-خلي اشوفهة واحجي وياهة وبعدين اقرر بس ماوعدك .
-الله يخليج النة يمة بست راسهة ورحت لغرفتي حتى اگول لسمر ونتفق على يوم...
